មជ្ឈិមនិកាយ មូលបណ្ណាសកំ

ភាគទី២០

បឋមោ ភាគោ

នមោ តស្ស ភគវតោ អរហតោ សម្មាសម្ពុទ្ធស្ស។

មូលបរិយាយវគ្គោ [ឆដ្ឋ. មូលបរិយាយសុត្តំ]

[១] ឯវមេ្ម សុតំ។ ឯកំ សមយំ ភគវា ឧក្កដ្ឋាយំ វិហរតិ សុភគវនេ សាលរាជមូលេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។ ភគវា ឯតទវោច សព្វធម្មមូលបរិយាយំ វោ ភិក្ខវេ ទេសិស្សាមិ [ឱ. ទេសេស្សាមិ។] តំ សុណាថ សាធុកំ មនសិករោថ ភាសិស្សាមីតិ។ ឯវម្ភន្តេតិ ខោ តេ ភិក្ខូ ភគវតោ បច្ចស្សោសុំ។

[២] ភគវា ឯតទវោច ឥធ ភិក្ខវេ អស្សុតវា បុថុជ្ជនោ អរិយានំ អទស្សាវី អរិយធម្មស្ស អកោវិទោ អរិយធម្មេ អវិនីតោ សប្បុរិសានំ អទស្សាវី សប្បុរិសធម្មស្ស អកោវិទោ សប្បុរិសធម្មេ អវិនីតោ បឋវឹ បឋវិតោ សញ្ជានាតិ បឋវឹ បឋវិតោ សញ្ញត្វា បឋវឹ មញ្ញតិ បឋវិយា មញ្ញតិ បឋវិតោ មញ្ញតិ បឋវិមេ្មតិ មញ្ញតិ បឋវឹ អភិនន្ទតិ។ តំ កិស្ស ហេតុ។ អបរិញ្ញាតំ [សព្វត្ថ អបរិញ្ញាតន្តន្តិ កត្ថចិ បោត្ថកេ ទិស្សតិ។] តស្សាតិ វទាមិ។ អាបំ អាបតោ សញ្ជានាតិ អាបំ អាបតោ សញ្ញត្វា អាបំ មញ្ញតិ អាបស្មឹ មញ្ញតិ អាបតោ មញ្ញតិ អាបមេ្មតិ មញ្ញតិ អាបំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ តេជំ តេជតោ សញ្ជានាតិ តេជំ តេជតោ សញ្ញត្វា តេជំ មញ្ញតិ តេជស្មឹ មញ្ញតិ តេជតោ មញ្ញតិ តេជមេ្មតិ មញ្ញតិ តេជំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ វាយំ វាយតោ សញ្ជានាតិ វាយំ វាយតោ សញ្ញត្វា វាយំ មញ្ញតិ វាយស្មឹ មញ្ញតិ វាយតោ មញ្ញតិ វាយមេ្មតិ មញ្ញតិ វាយំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ ភូតេ ភូតតោ សញ្ជានាតិ ភូតេ ភូតតោ សញ្ញត្វា ភូតេ មញ្ញតិ ភូតេសុ មញ្ញតិ ភូតតោ មញ្ញតិ ភូតេ មេតិ មញ្ញតិ ភូតេ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ ទេវេ ទេវតោ សញ្ជានាតិ ទេវេ ទេវតោ សញ្ញត្វា ទេវេ មញ្ញតិ ទេវេសុ មញ្ញតិ ទេវតោ មញ្ញតិ ទេវេ មេតិ មញ្ញតិ ទេវេ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ បជាបតឹ បជាបតិតោ សញ្ជានាតិ បជាបតឹ បជាបតិតោ សញ្ញត្វា បជាបតឹ មញ្ញតិ បជាបតិស្មឹ មញ្ញតិ បជាបតិតោ មញ្ញតិ បជាបតិមេ្មតិ មញ្ញតិ បជាបតឹ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ ព្រហ្មំ ព្រហ្មតោ សញ្ជានាតិ ព្រហ្មំ ព្រហ្មតោ សញ្ញត្វា ព្រហ្មំ មញ្ញតិ ព្រហ្មនិ [ម. ព្រហ្មស្មឹ។] មញ្ញតិ ព្រហ្មតោ មញ្ញតិ ព្រហ្មំ មេតិ [ឱ. ព្រហ្មម្មេតិ។] មញ្ញតិ ព្រហ្មំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ អាភស្សរេ អាភស្សរតោ សញ្ជានាតិ អាភស្សរេ អាភស្សរតោ សញ្ញត្វា អាភស្សរេ មញ្ញតិ អាភស្សរេសុ មញ្ញតិ អាភស្សរតោ មញ្ញតិ អាភស្សរេ មេតិ មញ្ញតិ អាភស្សរេ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ សុភកិណ្ហេ សុភកិណ្ហតោ [ឱ. សុភកិណ្ណេ សុភកិណ្ណតោ។] សញ្ជានាតិ សុភកិណ្ហេ សុភកិណ្ហតោ សញ្ញត្វា សុភកិណ្ហេ មញ្ញតិ សុភកិណ្ហេសុ មញ្ញតិ សុភកិណ្ហតោ មញ្ញតិ សុភកិណ្ហេ មេតិ មញ្ញតិ សុភកិណ្ហេ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ វេហប្ផលេ វេហប្ផលតោ សញ្ជានាតិ វេហប្ផលេ វេហប្ផលតោ សញ្ញត្វា វេហប្ផលេ មញ្ញតិ វេហប្ផលេសុ មញ្ញតិ វេហប្ផលតោ មញ្ញតិ វេហប្ផលេ មេតិ មញ្ញតិ វេហប្ផលេ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ អភិភុំ អភិភូតោ សញ្ជានាតិ អភិភុំ អភិភូតោ សញ្ញត្វា អភិភុំ មញ្ញតិ អភិភុស្មឹ មញ្ញតិ អភិភូតោ មញ្ញតិ អភិភុមេ្មតិ មញ្ញតិ អភិភុំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ អាកាសានញ្ចាយតនំ អាកាសានញ្ចាយតនតោ សញ្ជានាតិ អាកាសានញ្ចាយតនំ អាកាសានញ្ចាយតនតោ សញ្ញត្វា អាកាសានញ្ចាយតនំ មញ្ញតិ អាកាសានញ្ចាយតនស្មឹ មញ្ញតិ អាកាសានញ្ចាយតនតោ មញ្ញតិ អាកាសានញ្ចាយតនមេ្មតិ មញ្ញតិ អាកាសានញ្ចាយតនំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ វិញ្ញាណញ្ចាយតនំ វិញ្ញាណញ្ចាយតនតោ សញ្ជានាតិ វិញ្ញាណញ្ចាយតនំ វិញ្ញាណញ្ចាយតនតោ សញ្ញត្វា វិញ្ញាណញ្ចាយតនំ មញ្ញតិ វិញ្ញាណញ្ចាយតនស្មឹ មញ្ញតិ វិញ្ញាណញ្ចាយតនតោ មញ្ញតិ វិញ្ញាណញ្ចាយតនមេ្មតិ មញ្ញតិ វិញ្ញាណញ្ចាយតនំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ អាកិញ្ចញ្ញាយតនំ អាកិញ្ចញ្ញាយតនតោ សញ្ជានាតិ អាកិញ្ចញ្ញាយតនំ អាកិញ្ចញ្ញាយតនតោ សញ្ញត្វា អាកិញ្ចញ្ញាយតនំ មញ្ញតិ អាកិញ្ចញ្ញាយតនស្មឹ មញ្ញតិ អាកិញ្ចញ្ញាយតនតោ មញ្ញតិ អាកិញ្ចញ្ញាយតនមេ្មតិ មញ្ញតិ អាកិញ្ចញ្ញាយតនំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ នេវសញ្ញានាសញ្ញាយតនំ នេវសញ្ញានាសញ្ញាយតនតោ សញ្ជានាតិ នេវសញ្ញានាសញ្ញាយតនំ នេវសញ្ញានាសញ្ញាយតនតោ សញ្ញត្វា នេវសញ្ញានាសញ្ញាយតនំ មញ្ញតិ នេវសញ្ញានាសញ្ញាយតនស្មឹ មញ្ញតិ នេវសញ្ញានាសញ្ញាយតនតោ មញ្ញតិ នេវសញ្ញានាសញ្ញាយតនមេ្មតិ មញ្ញតិ នេវសញ្ញានាសញ្ញាយតនំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ ទិដ្ឋំ ទិដ្ឋតោ សញ្ជានាតិ ទិដ្ឋំ ទិដ្ឋតោ សញ្ញត្វា ទិដ្ឋំ មញ្ញតិ ទិដ្ឋស្មឹ មញ្ញតិ ទិដ្ឋតោ មញ្ញតិ ទិដ្ឋមេ្មតិ មញ្ញតិ ទិដ្ឋំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ សុតំ សុតតោ សញ្ជានាតិ សុតំ សុតតោ សញ្ញត្វា សុតំ មញ្ញតិ សុតស្មឹ មញ្ញតិ សុតតោ មញ្ញតិ សុតមេ្មតិ មញ្ញតិ សុតំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ មុតំ មុតតោ សញ្ជានាតិ មុតំ មុតតោ សញ្ញត្វា មុតំ មញ្ញតិ មុតស្មឹ មញ្ញតិ មុតតោ មញ្ញតិ មុតមេ្មតិ មញ្ញតិ មុតំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ វិញ្ញាតំ វិញ្ញាតតោ សញ្ជានាតិ វិញ្ញាតំ វិញ្ញាតតោ សញ្ញត្វា វិញ្ញាតំ មញ្ញតិ វិញ្ញាតស្មឹ មញ្ញតិ វិញ្ញាតតោ មញ្ញតិ វិញ្ញាតមេ្មតិ មញ្ញតិ វិញ្ញាតំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ ឯកត្តំ ឯកត្តតោ សញ្ជានាតិ ឯកត្តំ ឯកត្តតោ សញ្ញត្វា ឯកត្តំ មញ្ញតិ ឯកត្តស្មឹ មញ្ញតិ ឯកត្តតោ មញ្ញតិ ឯកត្តមេ្មតិ មញ្ញតិ ឯកត្តំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ នានត្តំ នានត្តតោ សញ្ជានាតិ នានត្តំ នានត្តតោ សញ្ញត្វា នានត្តំ មញ្ញតិ នានត្តស្មឹ មញ្ញតិ នានត្តតោ មញ្ញតិ នានត្តមេ្មតិ មញ្ញតិ នានត្តំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ សព្វំ សព្វតោ សញ្ជានាតិ សព្វំ សព្វតោ សញ្ញត្វា សព្វំ មញ្ញតិ សព្វស្មឹ មញ្ញតិ សព្វតោ មញ្ញតិ សព្វមេ្មតិ មញ្ញតិ សព្វំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។ និព្វានំ និព្វានតោ សញ្ជានាតិ និព្វានំ និព្វានតោ សញ្ញត្វា និព្វានំ មញ្ញតិ និព្វានស្មឹ មញ្ញតិ និព្វានតោ មញ្ញតិ និព្វានមេ្មតិ មញ្ញតិ និព្វានំ អភិនន្ទតិ។ តំ កិស្ស ហេតុ។ អបរិញ្ញាតំ តស្សាតិ វទាមិ។

បុថុជ្ជនវសេន បឋមនយភូមិបរិច្ឆេទោ

[ឱ. បទទ្វយមិទំ ន ទិស្សតិ។ ម. ឥតោ បរំ និដ្ឋិតោតិ សព្វត្ថ ទិស្សតិ។]។

[៣] យោបិ សោ ភិក្ខវេ ភិក្ខុ សេខោ អប្បត្តមានសោ អនុត្តរំ យោគក្ខេមំ បត្ថយមានោ វិហរតិ។ សោបិ បឋវឹ បឋវិតោ អភិជានាតិ បឋវឹ បឋវិតោ អភិញ្ញាយ បឋវឹ មាមញ្ញី [ឱ.ម. មាមញ្ញិ។] បឋវិយា មាមញ្ញី [ឱ.ម. មាមញ្ញិ។] បឋវិតោ មាមញ្ញី [ឱ.ម. មាមញ្ញិ។] បឋវិមេ្មតិ មាមញ្ញី [ឱ.ម. មាមញ្ញិ។] បឋវឹ មាភិនន្ទី [ឱ. មា អភិនន្ទិ។ ម. មាភិនន្ទតិ។]។ តំ កិស្ស ហេតុ។ បរិញ្ញេយ្យំ តស្សាតិ វទាមិ។បេ។ អាបំ តេជំ វាយំ ភូតេ ទេវេ បជាបតឹ ព្រហ្មំ អាភស្សរេ សុភកិណ្ហេ វេហប្ផលេ អភិភុំ អាកាសានញ្ចាយតនំ វិញ្ញាណញ្ចាយតនំ អាកិញ្ចញ្ញាយតនំ នេវសញ្ញានាសញ្ញាយតនំ ទិដ្ឋំ សុតំ មុតំ វិញ្ញាតំ ឯកត្តំ នានត្តំ សព្វំ និព្វានំ និព្វានតោ អភិជានាតិ និព្វានំ និព្វានតោ អភិញ្ញាយ និព្វានំ មាមញ្ញី និព្វានស្មឹ មាមញ្ញី និព្វានតោ មាមញ្ញី និព្វានមេ្មតិ មាមញ្ញី និព្វានំ មាភិនន្ទី។ តំ កិស្ស ហេតុ។ បរិញ្ញេយ្យំ តស្សាតិ វទាមិ។

សេខវសេន ទុតិយនយភូមិបរិច្ឆេទោ [ឱ. ឥទំ បទទ្វយំ ន ទិស្សតិ។]។

[៤] យោបិ សោ ភិក្ខវេ ភិក្ខុ អរហំ ខីណាសវោ វុសិតវា កតករណីយោ ឱហិតភារោ អនុប្បត្តសទត្ថោ បរិក្ខីណភវសំយោជនោ សម្មទញ្ញាវិមុត្តោ សោបិ បឋវឹ បឋវិតោ អភិជានាតិ បឋវឹ បឋវិតោ អភិញ្ញាយ បឋវឹ ន មញ្ញតិ បឋវិយា ន មញ្ញតិ បឋវិតោ ន មញ្ញតិ បឋវមេ្មតិ ន មញ្ញតិ បឋវឹ នាភិនន្ទតិ។ តំ កិស្ស ហេតុ។ បរិញ្ញាតំ តស្សាតិ វទាមិ។ បេ។ អាបំ តេជំ វាយំ ភូតេ ទេវេ បជាបតឹ ព្រហ្មំ អាភស្សរេ សុភកិណ្ហេ វេហប្ផលេ អភិភុំ អាកាសានញ្ចាយតនំ វិញ្ញាណញ្ចាយតនំ អាកិញ្ចញ្ញាយតនំ នេវសញ្ញានាសញ្ញាយតនំ ទិដ្ឋំ សុតំ មុតំ វិញ្ញាតំ ឯកត្តំ នានត្តំ សព្វំ និព្វានំ និព្វានតោ អភិជានាតិ និព្វានំ និព្វានតោ អភិញ្ញាយ និព្វានំ ន មញ្ញតិ និព្វានស្មឹ ន មញ្ញតិ និព្វានតោ ន មញ្ញតិ និព្វានមេ្មតិ ន មញ្ញតិ និព្វានំ នាភិនន្ទតិ។ តំ កិស្ស ហេតុ។ បរិញ្ញាតំ តស្សាតិ វទាមិ។

ខីណាសវវសេន តតិយនយភូមិបរិច្ឆេទោ [ឱ. ឥទំ បទទ្វយំ ន ទិស្សតិ។]។

[៥] យោបិ សោ ភិក្ខវេ ភិក្ខុ អរហំ ខីណាសវោ វុសិតវា កតករណីយោ ឱហិតភារោ អនុប្បត្តសទត្ថោ បរិក្ខីណភវសំយោជនោ សម្មទញ្ញាវិមុត្តោ សោបិ បឋវឹ បឋវិតោ អភិជានាតិ បឋវឹ បឋវិតោ អភិញ្ញាយ បឋវឹ ន មញ្ញតិ បឋវិយា ន មញ្ញតិ បឋវិតោ ន មញ្ញតិ បឋវមេ្មតិ ន មញ្ញតិ បឋវឹ នាភិនន្ទតិ។ តំ កិស្ស ហេតុ។ ខយា រាគស្ស វីតរាគត្តា។ បេ។ អាបំ តេជំ វាយំ ភូតេ ទេវេ បជាបតឹ ព្រហ្មំ អាភស្សរេ សុភកិណ្ហេ វេហប្ផលេ អភិភុំ អាកាសានញ្ចាយតនំ វិញ្ញាណញ្ចាយតនំ អាកិញ្ចញ្ញាយតនំ នេវសញ្ញានាសញ្ញាយតនំ ទិដ្ឋំ សុតំ មុតំ វិញ្ញាតំ ឯកត្តំ នានត្តំ សព្វំ និព្វានំ និព្វានតោ អភិជានាតិ និព្វានំ និព្វានតោ អភិញ្ញាយ និព្វានំ ន មញ្ញតិ និព្វានស្មឹ ន មញ្ញតិ និព្វានតោ ន មញ្ញតិ និព្វានមេ្មតិ ន មញ្ញតិ និព្វានំ នាភិនន្ទតិ។ តំ កិស្ស ហេតុ។ ខយា រាគស្ស វីតរាគត្តា។

ខីណាសវវសេន ចតុត្ថនយភូមិបរិច្ឆេទោ [ឱ. ឥទំ បទទ្វយំ ន ទិស្សតិ។]។

[៦] យោបិ សោ ភិក្ខវេ ភិក្ខុ អរហំ ខីណាសវោ វុសិតវា កតករណីយោ ឱហិតភារោ អនុប្បត្តសទត្ថោ បរិក្ខីណភវសំយោជនោ សម្មទញ្ញា វិមុត្តោ សោបិ បឋវឹ បឋវិតោ អភិជានាតិ បឋវឹ បឋវិតោ អភិញ្ញាយ បឋវឹ ន មញ្ញតិ បឋវិយា ន មញ្ញតិ បឋវិតោ ន មញ្ញតិ បឋវិម្មេតិ ន មញ្ញតិ បឋវឹ នាភិនន្ទតិ។ តំ កិស្ស ហេតុ។ ខយា ទោសស្ស វីតទោសត្តា។ បេ។ អាបំ តេជំ វាយំ ភូតេ ទេវេ បជាបតឹ ព្រហ្មំ អាភស្សរេ សុភកិណ្ហេ វេហប្ផលេ អភិភុំ អាកាសានញ្ចាយតនំ វិញ្ញាណញ្ចាយតនំ អាកិញ្ចញ្ញាយតនំ នេវសញ្ញានាសញ្ញាយតនំ ទិដ្ឋំ សុតំ មុតំ វិញ្ញាតំ ឯកត្តំ នានត្តំ សព្វំ និព្វានំ និព្វានតោ អភិជានាតិ និព្វានំ និព្វានតោ អភិញ្ញាយ និព្វានំ ន មញ្ញតិ និព្វានស្មឹ ន មញ្ញតិ និព្វានតោ ន មញ្ញតិ និព្វានម្មេតិ ន មញ្ញតិ និព្វានំ នាភិនន្ទតិ។ តំ កិស្ស ហេតុ។ ខយា ទោសស្ស វីតទោសត្តា។

ខីណាសវវសេន បញ្ចមនយភូមិបរិច្ឆេទោ [ឱ. ឥទំ បទទ្វយំ ន ទិស្សតិ។]។

[៧] យោបិ សោ ភិក្ខវេ ភិក្ខុ អរហំ ខីណាសវោ វុសិតវា កតករណីយោ ឱហិតភារោ អនុប្បត្តសទត្ថោ បរិក្ខីណភវសំយោជនោ សម្មទញ្ញាវិមុត្តោ សោបិ បឋវឹ បឋវិតោ អភិជានាតិ បឋវឹ បឋវិតោ អភិញ្ញាយ បឋវឹ ន មញ្ញតិ បឋវិយា ន មញ្ញតិ បឋវិតោ ន មញ្ញតិ បឋវិម្មេតិ ន មញ្ញតិ បឋវឹ នាភិនន្ទតិ។ តំ កិស្ស ហេតុ។ ខយា មោហស្ស វីតមោហត្តា។ បេ។ អាបំ តេជំ វាយំ ភូតេ ទេវេ បជាបតឹ ព្រហ្មំ អាភស្សរេ សុភកិណ្ហេ វេហប្ផលេ អភិភុំ អាកាសានញ្ចាយតនំ វិញ្ញាណញ្ចាយតនំ អាកិញ្ចញ្ញាយតនំ នេវសញ្ញានាសញ្ញាយតនំ ទិដ្ឋំ សុតំ មុតំ វិញ្ញាតំ ឯកត្តំ នានត្តំ សព្វំ និព្វានំ និព្វានតោ អភិជានាតិ និព្វានំ និព្វានតោ អភិញ្ញាយ និព្វានំ ន មញ្ញតិ និព្វានស្មឹ ន មញ្ញតិ និព្វានតោ ន មញ្ញតិ និព្វានម្មេតិ ន មញ្ញតិ និព្វានំ នាភិនន្ទតិ។ តំ កិស្ស ហេតុ។ ខយា មោហស្ស វីតមោហត្តា។

ខីណាសវវសេន ឆដ្ឋនយភូមិបរិច្ឆេទោ [ឱ. ឥទំ បទទ្វយំ ន ទិស្សតិ។]។

[៨] តថាគតោបិ ភិក្ខវេ អរហំ សម្មាសម្ពុទ្ធោ បឋវឹ បឋវិតោ អភិជានាតិ បឋវឹ បឋវិតោ អភិញ្ញាយ បឋវឹ ន មញ្ញតិ បឋវិយា ន មញ្ញតិ បឋវិតោ ន មញ្ញតិ បឋវិម្មេតិ ន មញ្ញតិ បឋវឹ នាភិនន្ទតិ។ តំ កិស្ស ហេតុ។ បរិញ្ញាតន្តំ តថាគតស្សាតិ វទាមិ។ បេ។ អាបំ តេជំ វាយំ ភូតេ ទេវេ បជាបតឹ ព្រហ្មំ អាភស្សរេ សុភកិណ្ហេ វេហប្ផលេ អភិភុំ អាកាសានញ្ចាយតនំ វិញ្ញាណញ្ចាយតនំ អាកិញ្ចញ្ញាយតនំ នេវសញ្ញានាសញ្ញាយតនំ ទិដ្ឋំ សុតំ មុតំ វិញ្ញាតំ ឯកត្តំ នានត្តំ សព្វំ និព្វានំ និព្វានតោ អភិជានាតិ និព្វានំ និព្វានតោ អភិញ្ញាយ និព្វានំ ន មញ្ញតិ និព្វានស្មឹ ន មញ្ញតិ និព្វានតោ ន មញ្ញតិ និព្វានម្មេតិ ន មញ្ញតិ និព្វានំ នាភិនន្ទតិ។ តំ កិស្ស ហេតុ។ បរិញ្ញាតន្តំ តថាគតស្សាតិ វទាមិ។

សត្ថុវសេន សត្តមនយភូមិបរិច្ឆេទោ [ឱ. ឥទំ បទទ្វយំ ន ទិស្សតិ។]។

[៩] តថាគតោបិ ភិក្ខវេ អរហំ សម្មាសម្ពុទ្ធោ បឋវឹ បឋវិតោ អភិជានាតិ បឋវឹ បឋវិតោ អភិញ្ញាយ បឋវឹ ន មញ្ញតិ បឋវិយា ន មញ្ញតិ បឋវិតោ ន មញ្ញតិ បឋវិម្មេតិ ន មញ្ញតិ បឋវឹ នាភិនន្ទតិ។ តំ កិស្ស ហេតុ។ នន្ទិ [ឱ.ម. នន្ទី។] ទុក្ខស្ស មូលន្តិ ឥតិ វិទិត្វា ភវា ជាតិ ភូតស្ស ជរាមរណន្តិ។ តស្មាតិហ ភិក្ខវេ តថាគតោ សព្វសោ តណ្ហានំ ខយា វិរាគា និរោធា ចាគា បដិនិស្សគ្គា អនុត្តរំ សម្មាសម្ពោធឹ អភិសម្ពុទ្ធោតិ វទាមិ។ បេ។ អាបំ តេជំ វាយំ ភូតេ ទេវេ បជាបតឹ ព្រហ្មំ អាភស្សរេ សុភកិណ្ហេ វេហប្ផលេ អភិភុំ អាកាសានញ្ចាយតនំ វិញ្ញាណញ្ចាយតនំ អាកិញ្ចញ្ញាយតនំ នេវសញ្ញានាសញ្ញាយតនំ ទិដ្ឋំ សុតំ មុតំ វិញ្ញាតំ ឯកត្តំ នានត្តំ សព្វំ និព្វានំ និព្វានតោ អភិជានាតិ និព្វានំ និព្វានតោ អភិញ្ញាយ និព្វានំ ន មញ្ញតិ និព្វានស្មឹ ន មញ្ញតិ និព្វានតោ ន មញ្ញតិ និព្វានម្មេតិ ន មញ្ញតិ និព្វានំ នាភិនន្ទតិ។ តំ កិស្ស ហេតុ។ នន្ទិ ទុក្ខស្ស មូលន្តិ ឥតិ វិទិត្វា ភវា ជាតិ ភូតស្ស ជរាមរណន្តិ។ តស្មាតិហ ភិក្ខវេ តថាគតោ សព្វសោ តណ្ហានំ ខយា វិរាគា និរោធា ចាគា បដិនិស្សគ្គា អនុត្តរំ សម្មាសម្ពោធឹ អភិសម្ពុទ្ធោតិ វទាមីតិ។

សត្ថុវសេន អដ្ឋមនយភូមិបរិច្ឆេទោ [ឱ. ឥទំ បទទ្វយំ ន ទិស្សតិ។]។

ឥទមវោច ភគវា ន អត្តមនា តេ ភិក្ខូ ភគវតោ ភាសិតំ អភិនន្ទុន្តិ។

មូលបរិយាយសុត្តំ បឋមំ និដ្ឋិតំ [ឱ.ម. មូលបរិយាយសុត្តន្តំ បឋមំ។]។

ទុតិយំ សព្វាសវសំវរសុត្តំ

[១០] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។ ភគវា ឯតទវោច សព្វាសវសំវរបរិយាយំ វោ ភិក្ខវេ ទេសិស្សាមិ តំ សុណាថ សាធុកំ មនសិករោថ ភាសិស្សាមីតិ។ ឯវម្ភន្តេតិ ខោ តេ ភិក្ខូ ភគវតោ បច្ចស្សោសុំ។

[១១] ភគវា ឯតទវោច ជានតោ អហំ ភិក្ខវេ បស្សតោ អាសវានំ ខយំ វទាមិ នោ អជានតោ នោ អបស្សតោ។ កិញ្ច [កិញ្ចីតិ កត្ថចិ បោត្ថកេ ទិស្សតិ។] ភិក្ខវេ ជានតោ កឹ បស្សតោ អាសវានំ ខយោ ហោតិ។ យោនិសោ ច មនសិការំ អយោនិសោ ច មនសិការំ។ អយោនិសោ ភិក្ខវេ មនសិករោតោ អនុប្បន្នា ចេវ អាសវា ឧប្បជ្ជន្តិ ឧប្បន្នា ច អាសវា បវឌ្ឍន្តិ។ យោនិសោ ច ខោ ភិក្ខវេ មនសិករោតោ អនុប្បន្នា ចេវ អាសវា ន ឧប្បជ្ជន្តិ ឧប្បន្នា ច អាសវា បហិយ្យន្តិ។ អត្ថិ ភិក្ខវេ អាសវា ទស្សនា បហាតព្វា អត្ថិ អាសវា សំវរា បហាតព្វា អត្ថិ អាសវា បដិសេវនា បហាតព្វា អត្ថិ អាសវា អធិវាសនា បហាតព្វា អត្ថិ អាសវា បរិវជ្ជនា បហាតព្វា អត្ថិ អាសវា វិនោទនា បហាតព្វា អត្ថិ អាសវា ភាវនា បហាតព្វា។

[ឆដ្ឋ. ទស្សនា បហាតព្វាសវា]។

[១២] កតមេ ច ភិក្ខវេ អាសវា ទស្សនា បហាតព្វា។ ឥធ ភិក្ខវេ អស្សុតវា បុថុជ្ជនោ អរិយានំ អទស្សាវី អរិយធម្មស្ស អកោវិទោ អរិយធម្មេ អវិនីតោ សប្បុរិសានំ អទស្សាវី សប្បុរិសធម្មស្ស អកោវិទោ សប្បុរិសធម្មេ អវិនីតោ មនសិករណីយេ ធម្មេ នប្បជានាតិ អមនសិករណីយេ ធម្មេ នប្បជានាតិ។ សោ មនសិករណីយេ ធម្មេ អប្បជានន្តោ អមនសិករណីយេ ធម្មេ អប្បជានន្តោ យេ ធម្មា ន មនសិករណីយា តេ ធម្មេ មនសិករោតិ យេ ធម្មា មនសិករណីយា តេ ធម្មេ ន មនសិករោតិ។ កតមេ ច ភិក្ខវេ ធម្មា ន មនសិករណីយា យេ ធម្មេ មនសិករោតិ។ យស្ស ភិក្ខវេ ធម្មេ មនសិករោតោ អនុប្បន្នោ វា កាមាសវោ ឧប្បជ្ជតិ ឧប្បន្នោ វា កាមាសវោ បវឌ្ឍតិ អនុប្បន្នោ វា ភវាសវោ ឧប្បជ្ជតិ ឧប្បន្នោ វា ភវាសវោ បវឌ្ឍតិ អនុប្បន្នោ វា អវិជ្ជាសវោ ឧប្បជ្ជតិ ឧប្បន្នោ វា អវិជ្ជាសវោ បវឌ្ឍតិ ឥមេ ធម្មា ន មនសិករណីយា យេ ធម្មេ មនសិករោតិ។ កតមេ ច ភិក្ខវេ ធម្មា មនសិករណីយា យេ ធម្មេ ន មនសិករោតិ។ យស្ស ភិក្ខវេ ធម្មេ មនសិករោតោ អនុប្បន្នោ វា កាមាសវោ ន ឧប្បជ្ជតិ ឧប្បន្នោ វា កាមាសវោ បហិយ្យតិ អនុប្បន្នោ វា ភវាសវោ ន ឧប្បជ្ជតិ ឧប្បន្នោ វា ភវាសវោ បហិយ្យតិ អនុប្បន្នោ វា អវិជ្ជាសវោ ន ឧប្បជ្ជតិ ឧប្បន្នោ វា អវិជ្ជាសវោ បហិយ្យតិ ឥមេ ធម្មា មនសិករណីយា យេ ធម្មេ ន មនសិករោតិ។ តស្ស អមនសិករណីយានំ ធម្មានំ មនសិការា មនសិករណីយានំ ធម្មានំ អមនសិការា អនុប្បន្នា ចេវ អាសវា ឧប្បជ្ជន្តិ ឧប្បន្នា ច អាសវា បវឌ្ឍន្តិ។ សោ ឯវំ អយោនិសោ មនសិករោតិ អហោសឹ នុ ខោ អហំ អតីតមទ្ធានំ ន នុ ខោ អហោសឹ អតីតមទ្ធានំ កឹ នុ ខោ អហោសឹ អតីតមទ្ធានំ កថំ នុ ខោ អហោសឹ អតីតមទ្ធានំ កឹ ហុត្វា កឹ អហោសឹ នុ ខោ អហំ អតីតមទ្ធានំ ភវិស្សាមិ នុ ខោ អហំ អនាគតមទ្ធានំ ន នុ ខោ ភវិស្សាមិ អនាគតមទ្ធានំ កឹ នុ ខោ ភវិស្សាមិ អនាគតមទ្ធានំ កថំ នុ ខោ ភវិស្សាមិ អនាគតមទ្ធានំ កឹ ហុត្វា កឹ ភវិស្សាមិ នុ ខោ អហំ អនាគតមទ្ធានន្តិ ឯតរហិ វា បច្ចុប្បន្នមទ្ធានំ អារព្ភ អជ្ឈត្តំ កថំកថី ហោតិ អហំ នុ [ឱ. អហន្នុ។] ខោស្មិ នោ នុ ខោស្មិ កឹ នុ ខោស្មិ កថំ នុ ខោស្មិ អយំ នុ ខោ សត្តោ កុតោ អាគតោ សោ កុហឹ គាមី ភវិស្សតីតិ។ តស្ស ឯវំ អយោនិសោ មនសិករោតោ ឆន្នំ ទិដ្ឋីនំ អញ្ញតរា ទិដ្ឋិ ឧប្បជ្ជតិ។ អត្ថិ មេ អត្តាតិ វាស្ស សច្ចតោ ថេតតោ ទិដ្ឋិ ឧប្បជ្ជតិ។ នត្ថិ មេ អត្តាតិ វាស្ស សច្ចតោ ថេតតោ ទិដ្ឋិ ឧប្បជ្ជតិ។ អត្តនា វ អត្តានំ សញ្ជានាមីតិ វាស្ស សច្ចតោ ថេតតោ ទិដ្ឋិ ឧប្បជ្ជតិ។ អត្តនា វ អនត្តានំ សញ្ជានាមីតិ វាស្ស សច្ចតោ ថេតតោ ទិដ្ឋិ ឧប្បជ្ជតិ។ អនត្តនា វ អត្តានំ សញ្ជានាមីតិ វាស្ស សច្ចតោ ថេតតោ ទិដ្ឋិ ឧប្បជ្ជតិ។ អថ វា បនស្ស ឯវំ ទិដ្ឋិ ហោតិ យោ មេ អយំ អត្តា វ វេទេយ្យោ តត្រ តត្រ កល្យាណបាបកានំ កម្មានំ វិបាកំ បដិសំវេទេតិ សោ ខោ បន មេ អយំ អត្តា និច្ចោ ធុវោ សស្សតោ អវិបរិណាមធម្មោ សស្សតិសមំ តថេវ ឋស្សតីតិ។ ឥទំ វុច្ចតិ ភិក្ខវេ ទិដ្ឋិគតំ ទិដ្ឋិគហនំ ទិដ្ឋិកន្តារោ [ទិដ្ឋិកន្តារន្តិ កត្ថចិ បោត្ថកេ ទិស្សតិ។] ទិដ្ឋិវិសូកំ ទិដ្ឋិវិប្ផន្ទិតំ ទិដ្ឋិសំយោជនំ។ ទិដ្ឋិសំយោជនសំយុត្តោ ភិក្ខវេ អស្សុតវា បុថុជ្ជនោ ន បរិមុច្ចតិ ជាតិយា ជរាយ មរណេន សោកបរិទេវទុក្ខទោមនស្សុបាយាសេហិ [ឱ.ម. សោកេហិ បរិទេវេហិ ទុក្ខេហិ ទោមនស្សេហិ ឧបាយាសេហិ។] ន បរិមុច្ចតិ ទុក្ខស្មាតិ វទាមិ។ សុតវា ច ខោ ភិក្ខវេ អរិយសាវកោ អរិយានំ ទស្សាវី អរិយធម្មស្ស កោវិទោ អរិយធម្មេ សុវិនីតោ សប្បុរិសានំ ទស្សាវី សប្បុរិសធម្មស្ស កោវិទោ សប្បុរិសធម្មេ សុវិនីតោ មនសិករណីយេ ធម្មេ បជានាតិ អមនសិករណីយេ ធម្មេ បជានាតិ។ សោ មនសិករណីយេ ធម្មេ បជានន្តោ អមនសិករណីយេ ធម្មេ បជានន្តោ យេ ធម្មា ន មនសិករណីយា តេ ធម្មេ ន មនសិករោតិ។ យេ ធម្មា មនសិករណីយា តេ ធម្មេ មនសិករោតិ។ កតមេ ច ភិក្ខវេ ធម្មា ន មនសិករណីយា យេ ធម្មេ ន មនសិករោតិ។ យស្ស ភិក្ខវេ ធម្មេ មនសិករោតោ អនុប្បន្នោ វា កាមាសវោ ឧប្បជ្ជតិ ឧប្បន្នោ វា កាមាសវោ បវឌ្ឍតិ អនុប្បន្នោ វា ភវាសវោ ឧប្បជ្ជតិ ឧប្បន្នោ វា ភវាសវោ បវឌ្ឍតិ អនុប្បន្នោ វា អវិជ្ជាសវោ ឧប្បជ្ជតិ ឧប្បន្នោ វា អវិជ្ជាសវោ បវឌ្ឍតិ ឥមេ ធម្មា ន មនសិករណីយា យេ ធម្មេ ន មនសិករោតិ។ កតមេ ច ភិក្ខវេ ធម្មា មនសិករណីយា យេ ធម្មេ មនសិករោតិ។ យស្ស ភិក្ខវេ ធម្មេ មនសិករោតោ អនុប្បន្នោ វា កាមាសវោ ន ឧប្បជ្ជតិ ឧប្បន្នោ វា កាមាសវោ បហិយ្យតិ អនុប្បន្នោ វា ភវាសវោ ន ឧប្បជ្ជតិ ឧប្បន្នោ វា ភវាសវោ បហិយ្យតិ អនុប្បន្នោ វា អវិជ្ជាសវោ ន ឧប្បជ្ជតិ ឧប្បន្នោ វា អវិជ្ជាសវោ បហិយ្យតិ ឥមេ ធម្មា មនសិករណីយា យេ ធម្មេ មនសិករោតិ។ តស្ស អមនសិករណីយានំ ធម្មានំ អមនសិការា មនសិករណីយានំ ធម្មានំ មនសិការា អនុប្បន្នា ចេវ អាសវា ន ឧប្បជ្ជន្តិ ឧប្បន្នា ច អាសវា បហិយ្យន្តិ។ សោ ឥទំ ទុក្ខន្តិ យោនិសោ មនសិករោតិ អយំ ទុក្ខសមុទយោតិ យោនិសោ មនសិករោតិ អយំ ទុក្ខនិរោធោតិ យោនិសោ មនសិករោតិ អយំ ទុក្ខនិរោធគាមិនី បដិបទាតិ យោនិសោ មនសិករោតិ។ តស្ស ឯវំ យោនិសោ [ឱ. យោនិសោតិ ន ទិស្សតិ។] មនសិករោតោ តីណិ សំយោជនានិ បហិយ្យន្តិ សក្កាយទិដ្ឋិ វិចិកិច្ឆា សីលព្វតបរាមាសោ។ ឥមេ វុច្ចន្តិ ភិក្ខវេ អាសវា ទស្សនា បហាតព្វា។

[ឆដ្ឋ. សំវរា បហាតព្វាសវា]

[១៣] កតមេ ច ភិក្ខវេ អាសវា សំវរា បហាតព្វា។ ឥធ ភិក្ខវេ ភិក្ខុ បដិសង្ខា យោនិសោ ចក្ខុន្ទ្រិយសំវរសំវុតោ វិហរតិ។ យញ្ហិស្ស ភិក្ខវេ ចក្ខុន្ទ្រិយសំវរំ អសំវុតស្ស វិហរតោ ឧប្បជ្ជេយ្យុំ អាសវា វិឃាតបរិឡាហា ចក្ខុន្ទ្រិយសំវរំ សំវុតស្ស វិហរតោ ឯវំស តេ អាសវា វិឃាតបរិឡាហា ន ហោន្តិ។ បដិសង្ខា យោនិសោ សោតិន្ទ្រិយសំវរសំវុតោ វិហរតិ។បេ។ បដិសង្ខា យោនិសោ ឃានិន្ទ្រិយសំវរសំវុតោ វិហរតិ។បេ។ បដិសង្ខា យោនិសោ ជីវ្ហិន្ទ្រិយសំវរសំវុតោ វិហរតិ។បេ។ បដិសង្ខា យោនិសោ កាយិន្ទ្រិយសំវរសំវុតោ វិហរតិ។បេ។ បដិសង្ខា យោនិសោ មនិន្ទ្រិយសំវរសំវុតោ វិហរតិ។ យញ្ហិស្ស ភិក្ខវេ មនិន្ទ្រិយសំវរំ អសំវុតស្ស វិហរតោ ឧប្បជ្ជេយ្យុំ អាសវា វិឃាតបរិឡាហា មនិន្ទ្រិយសំវរំ សំវុតស្ស វិហរតោ ឯវំស តេ អាសវា វិឃាតបរិឡាហា ន ហោន្តិ។ យញ្ហិស្ស ភិក្ខវេ សំវរំ អសំវុតស្ស វិហរតោ ឧប្បជ្ជេយ្យុំ អាសវា វិឃាតបរិឡាហា សំវរំ សំវុតស្ស វិហរតោ ឯវំស តេ អាសវា វិឃាតបរិឡាហា ន ហោន្តិ។ ឥមេ វុច្ចន្តិ ភិក្ខវេ អាសវា សំវរា បហាតព្វា។

[ឆដ្ឋ. បដិសេវនា បហាតព្វាសវា]

[១៤] កតមេ ច ភិក្ខវេ អាសវា បដិសេវនា បហាតព្វា។ ឥធ ភិក្ខវេ ភិក្ខុ បដិសង្ខា យោនិសោ ចីវរំ បដិសេវតិ យាវទេវ សីតស្ស បដិឃាតាយ ឧណ្ហស្ស បដិឃាតាយ ឌំសមកសវាតាតបសិរឹសបសម្ផស្សានំ បដិឃាតាយ យាវទេវ ហិរិកោបិនប្បដិច្ឆាទនត្ថំ។ បដិសង្ខា យោនិសោ បិណ្ឌបាតំ បដិសេវតិ នេវ ទវាយ ន មទាយ ន មណ្ឌនាយ ន វិភូសនាយ យាវទេវ ឥមស្ស កាយស្ស ឋិតិយា យាបនាយ វិហឹសុបរតិយា ព្រហ្មចរិយានុគ្គហាយ ឥតិ បុរាណញ្ច វេទនំ បដិហង្ខាមិ នវញ្ច វេទនំ ន ឧប្បាទេស្សាមិ យាត្រា ច មេ ភវិស្សតិ អនវជ្ជតា ច ផាសុវិហារោ ចតិ [ម. ច។]។ បដិសង្ខា យោនិសោ សេនាសនំ បដិសេវតិ យាវទេវ សីតស្ស បដិឃាតាយ ឧណ្ហស្ស បដិឃាតាយ ឌំសមកសវាតាតបសិរឹសបសម្ផស្សានំ បដិឃាតាយ យាវទេវ ឧតុបរិស្សយវិនោទនំ បដិសល្លានារាមត្ថំ [ឱ. បដិសល្លាណារាមត្ថំ។]។ បដិសង្ខា យោនិសោ គិលានប្បច្ចយភេសជ្ជបរិក្ខារំ បដិសេវតិ យាវទេវ ឧប្បន្នានំ វេយ្យាពាធិកានំ វេទនានំ បដិឃាតាយ អព្យាបជ្ឈបរមតាយ [អព្យាបជ្ឈបរមតាយាតីតិ កត្ថចិ បោត្ថកេ ទិស្សតិ។]។ យញ្ហិស្ស ភិក្ខវេ អប្បដិសេវតោ ឧប្បជ្ជេយ្យុំ អាសវា វិឃាតបរិឡាហា បដិសេវតោ ឯវំស តេ អាសវា វិឃាតបរិឡាហា ន ហោន្តិ។ ឥមេ វុច្ចន្តិ ភិក្ខវេ អាសវា បដិសេវនា បហាតព្វា។

[ឆដ្ឋ. អធិវាសនា បហាតព្វាសវា]

[១៥] កតមេ ច ភិក្ខវេ អាសវា អធិវាសនា បហាតព្វា។ ឥធ ភិក្ខវេ ភិក្ខុ បដិសង្ខា យោនិសោ ខមោ ហោតិ សីតស្ស ឧណ្ហស្ស ជិឃច្ឆាយ បិបាសាយ ឌំសមកសវាតាតបសិរឹសបសម្ផស្សានំ ទុរុត្តានំ ទុរាគតានំ វចនបថានំ ឧប្បន្នានំ សារីរិកានំ វេទនានំ ទុក្ខានំ តិប្បានំ [ម. តិព្វានំ។] ខរានំ កដុកានំ អសាតានំ អមនាបានំ បាណហរានំ អធិវាសិកជាតិកោ [អធិវាសកជាតិកោ។] ហោតិ។ យញ្ហិស្ស ភិក្ខវេ អនធិវាសយតោ ឧប្បជ្ជេយ្យុំ អាសវា វិឃាតបរិឡាហា អធិវាសយតោ ឯវំស តេ អាសវា វិឃាតបរិឡាហា ន ហោន្តិ។ ឥមេ វុច្ចន្តិ ភិក្ខវេ អាសវា អធិវាសនា បហាតព្វា។

[ឆដ្ឋ. បរិវជ្ជនា បហាតព្វាសវា]

[១៦] កតមេ ច ភិក្ខវេ អាសវា បរិវជ្ជនា បហាតព្វា។ ឥធ ភិក្ខវេ ភិក្ខុ បដិសង្ខា យោនិសោ ចណ្ឌំ ហត្ថឹ បរិវជ្ជេតិ ចណ្ឌំ អស្សំ បរិវជ្ជេតិ ចណ្ឌំ គោណំ បរិវជ្ជេតិ ចណ្ឌំ កុក្កុរំ បរិវជ្ជេតិ អហឹ ខាណុំ កណ្ដកដ្ឋានំ សោព្ភំ បបាតំ ចន្ទនិកំ ឱឡិគល្លំ។ យថារូបេ អនាសនេ និសិន្នំ យថារូបេ អគោចរេ ចរន្តំ យថារូបេ បាបកេ មិត្តេ ភជន្តំ វិញ្ញូ សព្រហ្មចារី បាបកេសុ ឋានេសុ ឱកប្បេយ្យុំ។ សោ តញ្ច អនាសនំ តញ្ច អគោចរំ តេ ច បាបកេ មិត្តេ បដិសង្ខា យោនិសោ បរិវជ្ជេតិ។ យញ្ហិស្ស ភិក្ខវេ អបរិវជ្ជយតោ ឧប្បជ្ជេយ្យុំ អាសវា វិឃាតបរិឡាហា បរិវជ្ជយតោ ឯវំស តេ អាសវា វិឃាតបរិឡាហា ន ហោន្តិ។ ឥមេ វុច្ចន្តិ ភិក្ខវេ អាសវា បរិវជ្ជនា បហាតព្វា។

[ឆដ្ឋ. វិនោទនា បហាតព្វាសវា]

[១៧] កតមេ ច ភិក្ខវេ អាសវា វិនោទនា បហាតព្វា។ ឥធ ភិក្ខវេ ភិក្ខុ បដិសង្ខា យោនិសោ ឧប្បន្នំ កាមវិតក្កំ នាធិវាសេតិ បជហតិ វិនោទេតិ ព្យន្តីករោតិ [ឱ. ព្យន្តិករោតិ។ ម. ព្យន្តឹករោតិ។] អនភាវង្គមេតិ ឧប្បន្នំ ព្យាបាទវិតក្កំ។បេ។ ឧប្បន្នំ វិហឹសាវិតក្កំ។បេ។ ឧប្បន្នុប្បន្នេ បាបកេ អកុសលេ ធម្មេ នាធិវាសេតិ បជហតិ វិនោទេតិ ព្យន្តីករោតិ [ឱ. ព្យន្តិករោតិ។ ម. ព្យន្តឹករោតិ។] អនភាវង្គមេតិ។ យញ្ហិស្ស ភិក្ខវេ អវិនោទយតោ ឧប្បជ្ជេយ្យុំ អាសវា វិឃាតបរិឡាហា វិនោទយតោ ឯវំស តេ អាសវា វិឃាតបរិឡាហា ន ហោន្តិ។ ឥមេ វុច្ចន្តិ ភិក្ខវេ អាសវា វិនោទនា បហាតព្វា។

[ឆដ្ឋ. ភាវនា បហាតព្វាសវា]

[១៨] កតមេ ច ភិក្ខវេ អាសវា ភាវនា បហាតព្វា។ ឥធ ភិក្ខវេ ភិក្ខុ បដិសង្ខា យោនិសោ សតិសម្ពោជ្ឈង្គំ ភាវេតិ វិវេកនិស្សិតំ វិរាគនិស្សិតំ និរោធនិស្សិតំ វោស្សគ្គបរិណាមំ [ឱ.ម. វោស្សគ្គបរិណាមឹ] បដិសង្ខា យោនិសោ ធម្មវិចយសម្ពោជ្ឈង្គំ ភាវេតិ។បេ។ វីរិយសម្ពោជ្ឈង្គំ ភាវេតិ។បេ។ បីតិសម្ពោជ្ឈង្គំ ភាវេតិ។បេ។ បស្សទ្ធិសម្ពោជ្ឈង្គំ ភាវេតិ។បេ។ សមាធិសម្ពោជ្ឈង្គំ ភាវេតិ។បេ។ ឧបេក្ខាសម្ពោជ្ឈង្គំ ភាវេតិ វិវេកនិស្សិតំ វិរាគនិស្សិតំ និរោធនិស្សិតំ វោស្សគ្គបរិណាមំ [ឱ.ម. វោស្សគ្គបរិណាមឹ។]។ យញ្ហិស្ស ភិក្ខវេ អភាវយតោ ឧប្បជ្ជេយ្យុំ អាសវា វិឃាតបរិឡាហា ភាវយតោ ឯវំស តេ អាសវា វិឃាតបរិឡាហា ន ហោន្តិ។ ឥមេ វុច្ចន្តិ ភិក្ខវេ អាសវា ភាវនា បហាតព្វា។

[១៩] យតោ ច [ឱ.ម. ច សទ្ទោ ន ទិស្សតិ។] ខោ ភិក្ខវេ ភិក្ខុនោ យេ អាសវា ទស្សនា បហាតព្វា តេ ទស្សនា បហីនា ហោន្តិ។ យេ អាសវា សំវរា បហាតព្វា តេ សំវរា បហីនា ហោន្តិ។ យេ អាសវា បដិសេវនា បហាតព្វា តេ បដិសេវនា បហីនា ហោន្តិ។ យេ អាសវា អធិវាសនា បហាតព្វា តេ អធិវាសនា បហីនា ហោន្តិ។ យេ អាសវា បរិវជ្ជនា បហាតព្វា តេ បរិវជ្ជនា បហីនា ហោន្តិ។ យេ អាសវា វិនោទនា បហាតព្វា តេ វិនោទនា បហីនា ហោន្តិ។ យេ អាសវា ភាវនា បហាតព្វា តេ ភាវនា បហីនា ហោន្តិ។ អយំ វុច្ចតិ ភិក្ខវេ ភិក្ខុ សព្វាសវសំវរសំវុតោ វិហរតិ អច្ឆេច្ឆិ តណ្ហំ វិវត្តយិ សំយោជនំ [ឱ. វាវត្តយិ សំយោជនំ។] សម្មាមានាភិសមយា អន្តមកាសិ ទុក្ខស្សាតិ។ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទុន្តិ។

សព្វាសវសំវរសុត្តំ ទុតិយំ [ឱ. សព្វាសវសំវរសុត្តំ ទុតិយំ។ ម. សព្វាសវសុត្តន្តំ ទុតិយំ។] និដ្ឋិតំ។

តតិយំ ធម្មទាយាទសុត្តំ

[២០] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។

[២១] ភគវា ឯតទវោច ធម្មទាយាទា មេ ភិក្ខវេ ភវថ មា អាមិសទាយាទា អត្ថិ មេ តុម្ហេសុ អនុកម្បា កិន្តិ មេ សាវកា ធម្មទាយាទា ភវេយ្យុំ នោ អាមិសទាយាទាតិ។ តុម្ហេ ច មេ ភិក្ខវេ អាមិសទាយាទា ភវេយ្យាថ នោ ធម្មទាយាទា តុម្ហេបិ តេន អាទិស្សា [ម. អាទិយា។] ភវេយ្យាថ អាមិសទាយាទា សត្ថុ សាវកា វិហរន្តិ នោ ធម្មទាយាទាតិ។ អហម្បិ តេន អាទិស្សោ [ម. អាទិយោ។] ភវេយ្យំ អាមិសទាយាទា សត្ថុ សាវកា វិហរន្តិ នោ ធម្មទាយាទាតិ។ តុម្ហេ ច មេ ភិក្ខវេ ធម្មទាយាទា ភវេយ្យាថ នោ អាមិសទាយាទា តុម្ហេបិ តេន ន អាទិស្សា ភវេយ្យាថ ធម្មទាយាទា សត្ថុ សាវកា វិហរន្តិ នោ អាមិសទាយាទាតិ។ អហម្បិ តេន ន អាទិស្សោ ភវេយ្យំ ធម្មទាយាទា សត្ថុ សាវកា វិហរន្តិ នោ អាមិសទាយាទាតិ។ តស្មាតិហ មេ ភិក្ខវេ ធម្មទាយាទា ភវថ មា អាមិសទាយាទា អត្ថិ មេ តុម្ហេសុ អនុកម្បា កិន្តិ មេ សាវកា ធម្មទាយាទា ភវេយ្យុំ នោ អាមិសទាយាទាតិ។

[២២] ឥធាហំ ភិក្ខវេ ភុត្តាវី អស្សំ បវារិតោ បរិបុណ្ណោ បរិយោសិតោ សុហិតោ យាវទត្ថោ សិយា ច មេ បិណ្ឌបាតោ អតិរេកធម្មោ ឆឌ្ឌិយធម្មោ។ អថ ទ្វេ ភិក្ខូ អាគច្ឆេយ្យុំ ជិឃច្ឆាទុព្វល្យបរេតា ត្យាហំ ឯវំ វទេយ្យំ អហំ ខោម្ហិ ភិក្ខវេ ភុត្តាវី បវារិតោ បរិបុណ្ណោ បរិយោសិតោ សុហិតោ យាវទត្ថោ អត្ថិ ច មេ អយំ បិណ្ឌបាតោ អតិរេកធម្មោ ឆឌ្ឌិយធម្មោ សចេ អាកង្ខថ ភុញ្ជថ សចេ តុម្ហេ ន ភុញ្ជិស្សថ ឥទានាហំ អបហរិតេ វា ឆឌ្ឌេស្សាមិ អប្បាណកេ វា ឧទកេ ឱបិលាបេស្សាមីតិ។ តត្ថេកស្ស [ឱ.ម. តត្រេកស្ស។] ភិក្ខុនោ ឯវមស្ស ភគវា ខោ ភុត្តាវី បវារិតោ បរិបុណ្ណោ បរិយោសិតោ សុហិតោ យាវទត្ថោ អត្ថិ ចាយំ ភគវតោ បិណ្ឌបាតោ អតិរេកធម្មោ ឆឌ្ឌិយធម្មោ សចេ មយំ ន ភុញ្ជិស្សាម ឥទានិ ភគវា អបហរិតេ វា ឆឌ្ឌេស្សតិ អប្បាណកេ វា ឧទកេ ឱបិលាបេស្សតិ វុត្តំ ខោ បនេតំ ភគវតា ធម្មទាយាទា មេ ភិក្ខវេ ភវថ មា អាមិសទាយាទាតិ អាមិសញ្ញតរំ ខោ បនេតំ យទិទំ បិណ្ឌបាតោ យន្នូនាហំ ឥមំ បិណ្ឌបាតំ អភុញ្ជិត្វា ឥមិនា វ [ឱ.ម. វសទ្ទោ នត្ថិ។] ជិឃច្ឆាទុព្វល្យេន [ឱ. ជិឃច្ឆាទុព្វល្លេន។] ឯវំ ឥមំ រត្តិន្ទិវំ វីតិនាមេយ្យន្តិ។ សោ តំ បិណ្ឌបាតំ អភុញ្ជិត្វា តេនេវ ជិឃច្ឆាទុព្វល្យេន [ឱ. ជិឃច្ឆាទុព្វល្លេន។] ឯវំ តំ រត្តិន្ទិវំ វីតិនាមេយ្យ។ អថ ទុតិយស្ស ភិក្ខុនោ ឯវមស្ស ភគវា ខោ ភុត្តាវី បវារិតោ បរិបុណ្ណោ បរិយោសិតោ សុហិតោ យាវទត្ថោ អត្ថិ ចាយំ ភគវតោ បិណ្ឌបាតោ អតិរេកធម្មោ ឆឌ្ឌិយធម្មោ សចេ មយំ ន ភុញ្ជិស្សាម ឥទានិ ភគវា អបហរិតេ វា ឆឌ្ឌេស្សតិ អប្បាណកេ វា ឧទកេ ឱបិលាបេស្សតិ យន្នូនាហំ ឥមំ បិណ្ឌបាតំ ភុញ្ជិត្វា ជិឃច្ឆាទុព្វល្យំ បដិវិនោទេត្វា [ឱ. បដិវិនេត្វា។] ឯវំ ឥមំ រត្តិន្ទិវំ វីតិនាមេយ្យន្តិ។ សោ តំ បិណ្ឌបាតំ ភុញ្ជិត្វា ជិឃច្ឆាទុព្វល្យំ បដិវិនោទេត្វា ឯវំ តំ រត្តិន្ទិវំ វីតិនាមេយ្យ។ កិញ្ចាបិ សោ ភិក្ខវេ ភិក្ខុ តំ បិណ្ឌបាតំ ភុញ្ជិត្វា ជិឃច្ឆាទុព្វល្យំ បដិវិនោទេត្វា ឯវំ តំ រត្តិន្ទិវំ វីតិនាមេយ្យ។ អថ ខោ អសុយេវ មេ បុរិមោ ភិក្ខុ បុជ្ជតរោ ច បាសំសតរោ ច។ តំ កិស្ស ហេតុ។ តញ្ហិ តស្ស ភិក្ខវេ ភិក្ខុនោ ទីឃរត្តំ អប្បិច្ឆតាយ សន្តុដ្ឋិយា សល្លេខាយ សុភរតាយ វីរិយារម្ភាយ សំវត្តិស្សតិ។ តស្មាតិហ មេ ភិក្ខវេ ធម្មទាយាទា ភវថ មា អាមិសទាយាទា អត្ថិ មេ តុម្ហេសុ អនុកម្បា កិន្តិ មេ សាវកា ធម្មទាយាទា ភវេយ្យុំ នោ អាមិសទាយាទាតិ។ ឥទមវោច ភគវា ឥទំ វត្វាន [ឱ. វត្វា។] សុគតោ ឧដ្ឋាយាសនា វិហារំ បាវិសិ។

[២៣] តត្រ ខោ អាយស្មា សារីបុត្តោ អចិរប្បក្កន្តស្ស ភគវតោ ភិក្ខូ អាមន្តេសិ អាវុសោ ភិក្ខវោតិ។ អាវុសោតិ [ឱ.ម. អាវុសោតិ ខោ។] តេ ភិក្ខូ អាយស្មតោ សារីបុត្តស្ស បច្ចស្សោសុំ។ អាយស្មា សារីបុត្តោ ឯតទវោច កិត្តាវតា នុ ខោ អាវុសោ សត្ថុ បវិវិត្តស្ស វិហរតោ សាវកា វិវេកំ នានុសិក្ខន្តិ កិត្តាវតា ច បន សត្ថុ បវិវិត្តស្ស វិហរតោ សាវកា វិវេកមនុសិក្ខន្តីតិ។ ទូរតោបិ ខោ មយំ អាវុសោ អាគច្ឆេយ្យាម អាយស្មតោ សារីបុត្តស្ស សន្តិកេ ឯតស្ស ភាសិតស្ស អត្ថមញ្ញាតុំ សាធុ វតាយស្មន្តំយេវ សារីបុត្តំ បដិភាតុ ឯតស្ស ភាសិតស្ស អត្ថោ អាយស្មតោ សារីបុត្តស្ស សុត្វា ភិក្ខូ ធារេស្សន្តីតិ។ តេនហាវុសោ សុណាថ សាធុកំ មនសិករោថ ភាសិស្សាមីតិ។ ឯវមាវុសោតិ ខោ តេ ភិក្ខូ អាយស្មតោ សារីបុត្តស្ស បច្ចស្សោសុំ។

[២៤] អាយស្មា សារីបុត្តោ ឯតទវោច កិត្តាវតា នុ ខោ អាវុសោ សត្ថុ បវិវិត្តស្ស វិហរតោ សាវកា វិវេកំ នានុសិក្ខន្តិ [ឱ. កិត្តាវតា នុ ខោ អាវុសោ សត្ថុ បវិវិត្តស្ស វិហរតោ សាវកា វិវេកំ នានុសិក្ខន្តីតិ ន ទិស្សតិ។] ឥធាវុសោ សត្ថុ បវិវិត្តស្ស វិហរតោ សាវកា វិវេកំ នានុសិក្ខន្តិ យេសញ្ច ធម្មានំ សត្ថា បហានមាហ តេ ច ធម្មេ នប្បជហន្តិ ពាហុល្លិកា [ឱ. ពាហុលិកា។] ច ហោន្តិ សាថិលិកា [ឱ. សាថលិកា។] ឱក្កមនេ បុព្វង្គមា បវិវេកេ និក្ខិត្តធុរា។ តត្រាវុសោ ថេរា ភិក្ខូ តីហិ ឋានេហិ គារយ្ហា ភវន្តិ។ សត្ថុ បវិវិត្តស្ស វិហរតោ សាវកា វិវេកំ នានុសិក្ខន្តីតិ ឥមិនា បឋមេន ឋានេន ថេរា ភិក្ខូ គារយ្ហា ភវន្តិ។ យេសញ្ច ធម្មានំ សត្ថា បហានមាហ តេ ច ធម្មេ នប្បជហន្តីតិ ឥមិនា ទុតិយេន ឋានេន ថេរា ភិក្ខូ គារយ្ហា ភវន្តិ។ ពាហុល្លិកា ច សាថិលិកា ឱក្កមនេ បុព្វង្គមា បវិវេកេ និក្ខិត្តធុរាតិ ឥមិនា តតិយេន ឋានេន ថេរា ភិក្ខូ គារយ្ហា ភវន្តិ។ ថេរា អាវុសោ ភិក្ខូ ឥមេហិ តីហិ ឋានេហិ គារយ្ហា ភវន្តិ។ តត្រាវុសោ មជ្ឈិមា ភិក្ខូ។បេ។ នវា ភិក្ខូ តីហិ ឋានេហិ គារយ្ហា ភវន្តិ។ សត្ថុ បវិវិត្តស្ស វិហរតោ សាវកា វិវេកំ នានុសិក្ខន្តីតិ ឥមិនា បឋមេន ឋានេន នវា ភិក្ខូ គារយ្ហា ភវន្តិ។ យេសញ្ច ធម្មានំ សត្ថា បហានមាហ តេ ច ធម្មេ នប្បជហន្តីតិ ឥមិនា ទុតិយេន ឋានេន នវា ភិក្ខូ គារយ្ហា ភវន្តិ។ ពាហុល្លិកា ច សាថិលិកា ឱក្កមនេ បុព្វង្គមា បវិវេកេ និក្ខិត្តធុរាតិ ឥមិនា តតិយេន ឋានេន នវា ភិក្ខូ គារយ្ហា ភវន្តិ។ នវា ហាវុសោ ភិក្ខូ ឥមេហិ តីហិ ឋានេហិ គារយ្ហា ភវន្តិ។ ឯត្តាវតា ខោ អាវុសោ សត្ថុ បវិវិត្តស្ស វិហរតោ សាវកា វិវេកំ នានុសិក្ខន្តិ។

[២៥] កិត្តាវតា ច បនាវុសោ សត្ថុ [ឱ. ច បន សត្ថុ។] បវិវិត្តស្ស វិហរតោ សាវកា វិវេកមនុសិក្ខន្តិ ឥធាវុសោ សត្ថុ បវិវិត្តស្ស វិហរតោ សាវកា វិវេកមនុសិក្ខន្តិ យេសញ្ច ធម្មានំ សត្ថា បហានមាហ តេ ច ធម្មេ បជហន្តិ ន ច ពាហុល្លិកា ហោន្តិ ន សាថិលិកា ឱក្កមនេ និក្ខិត្តធុរា បវិវេកេ បុព្វង្គមា។ តត្រាវុសោ ថេរា ភិក្ខូ តីហិ ឋានេហិ បាសំសា ភវន្តិ។ សត្ថុ បវិវិត្តស្ស វិហរតោ សាវកា វិវេកមនុសិក្ខន្តីតិ ឥមិនា បឋមេន ឋានេន ថេរា ភិក្ខូ បាសំសា ភវន្តិ។ យេសញ្ច ធម្មានំ សត្ថា បហានមាហ តេ ច ធម្មេ បជហន្តីតិ ឥមិនា ទុតិយេន ឋានេន ថេរា ភិក្ខូ បាសំសា ភវន្តិ។ ន ច ពាហុល្លិកា ន សាថិលិកា ឱក្កមនេ និក្ខិត្តធុរា បវិវេកេ បុព្វង្គមាតិ ឥមិនា តតិយេន ឋានេន ថេរា ភិក្ខូ បាសំសា ភវន្តិ។ ថេរា ហាវុសោ ភិក្ខូ ឥមេហិ តីហិ ឋានេហិ បាសំសា ភវន្តិ។ តត្រាវុសោ មជ្ឈិមា ភិក្ខូ។បេ។ នវា ភិក្ខូ តីហិ ឋានេហិ បាសំសា ភវន្តិ។ សត្ថុ បវិវិត្តស្ស វិហរតោ សាវកា វិវេកមនុសិក្ខន្តីតិ ឥមិនា បឋមេន ឋានេន នវា ភិក្ខូ បាសំសា ភវន្តិ។ យេសញ្ច ធម្មានំ សត្ថា បហានមាហ តេ ច ធម្មេ បជហន្តីតិ ឥមិនា ទុតិយេន ឋានេន នវា ភិក្ខូ បាសំសា ភវន្តិ។ ន ច ពាហុល្លិកា ន សាថិលិកា ឱក្កមនេ និក្ខិត្តធុរា បវិវេកេ បុព្វង្គមាតិ ឥមិនា តតិយេន ឋានេន នវា ភិក្ខូ បាសំសា ភវន្តិ។ នវា ហាវុសោ ភិក្ខូ ឥមេហិ តីហិ ឋានេហិ បាសំសា ភវន្តិ។ ឯត្តាវតា ខោ អាវុសោ សត្ថុ បវិវិត្តស្ស វិហរតោ សាវកា វិវេកមនុសិក្ខន្តិ។

[២៦] តត្រាវុសោ លោភោ ច បាបកោ ទោសោ ច បាបកោ លោភស្ស ច បហានាយ ទោសស្ស ច បហានាយ អត្ថិ មជ្ឈិមា បដិបទា ចក្ខុករណី ញាណករណី ឧបសមាយ អភិញ្ញាយ សម្ពោធាយ និព្វានាយ សំវត្តតិ។ កតមា ច សា អាវុសោ មជ្ឈិមា បដិបទា ចក្ខុករណី ញាណករណី ឧបសមាយ អភិញ្ញាយ សម្ពោធាយ និព្វានាយ សំវត្តតិ។ អយមេវ អរិយោ អដ្ឋង្គិកោ មគ្គោ សេយ្យថីទំ សម្មាទិដ្ឋិ សម្មាសង្កប្បោ សម្មាវាចា សម្មាកម្មន្តោ សម្មាអាជីវោ សម្មាវាយាមោ សម្មាសតិ សម្មាសមាធិ។ អយំ ខោ សា អាវុសោ មជ្ឈិមា បដិបទា ចក្ខុករណី ញាណករណី ឧបសមាយ អភិញ្ញាយ សម្ពោធាយ និព្វានាយ សំវត្តតីតិ។ តត្រាវុសោ កោធោ ច បាបកោ ឧបនាហោ ច បាបកោ…។ មក្ខោ ច បាបកោ បឡាសោ ច បាបកោ…។ ឥស្សា ច បាបិកា មច្ឆេរញ្ច បាបកំ…។ មាយា ច បាបិកា សាឋេយ្យំ ច បាបកំ…។ ថម្ភោ ច បាបកោ សារម្ភោ ច បាបកោ…។ មានោ ច បាបកោ អតិមានោ ច បាបកោ…។ មទោ ច បាបកោ បមាទោ ច បាបកោ មទស្ស ច បហានាយ បមាទស្ស ច បហានាយ អត្ថិ មជ្ឈិមា បដិបទា ចក្ខុករណី ញាណករណី ឧបសមាយ អភិញ្ញាយ សម្ពោធាយ និព្វានាយ សំវត្តតិ។ កតមា ច សា អាវុសោ មជ្ឈិមា បដិបទា ចក្ខុករណី ញាណករណី ឧបសមាយ អភិញ្ញាយ សម្ពោធាយ និព្វានាយ សំវត្តតិ។ អយមេវ អរិយោ អដ្ឋង្គិកោ មគ្គោ សេយ្យថីទំ សម្មាទិដ្ឋិ សម្មាសង្កប្បោ សម្មាវាចា សម្មាកម្មន្តោ សម្មាអាជីវោ សម្មាវាយាមោ សម្មាសតិ សម្មាសមាធិ។ អយំ ខោ សា អាវុសោ មជ្ឈិមា បដិបទា ចក្ខុករណី ញាណករណី ឧបសមាយ អភិញ្ញាយ សម្ពោធាយ និព្វានាយ សំវត្តតីតិ។ ឥទមវោច អាយស្មា សារីបុត្តោ អត្តមនា តេ ភិក្ខូ អាយស្មតោ សារីបុត្តស្ស ភាសិតំ អភិនន្ទុន្តិ។

ធម្មទាយាទសុត្តំ តតិយំ [ឱ. ធម្មទាយាទសុត្តំ តតិយំ។ ម. ធម្មទាយាទសុត្តន្តំ តតិយំ។] និដ្ឋិតំ។

ចតុត្ថំ ភយភេរវសុត្តំ

[២៧] ឯវម្ម សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ អថ ខោ ជាណុស្សោណិ ព្រាហ្មណោ យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។

[២៨] ឯកមន្តំ និសិន្នោ ខោ ជាណុស្សោណិ ព្រាហ្មណោ ភគវន្តំ ឯតទវោច យេមេ ភោ គោតម កុលបុត្តា ភវន្តំ គោតមំ ឧទ្ទិស្ស សទ្ធា អគារស្មា អនគារិយំ បព្វជិតា ភវន្តេសំ [ឱ.ម. ភវំ តេសំ។] គោតមោ បុព្វង្គមោ ភវន្តេសំ [ឱ.ម. ភវំ តេសំ។] គោតមោ ពហុការោ ភវន្តេសំ [ឱ.ម. ភវំ តេសំ។] គោតមោ សមាទបេតា ភោតោ ច បន គោតមស្ស សា ជនតា ទិដ្ឋានុគតឹ អាបជ្ជតីតិ។ ឯវមេតំ ព្រាហ្មណ ឯវមេតំ ព្រាហ្មណ យេ តេ ព្រាហ្មណ កុលបុត្តា មមំ ឧទ្ទិស្ស សទ្ធា អគារស្មា អនគារិយំ បព្វជិតា អហំ តេសំ បុព្វង្គមោ អហំ តេសំ ពហុការោ អហំ តេសំ សមាទបេតា មមញ្ច បន សា ជនតា ទិដ្ឋានុគតឹ អាបជ្ជតីតិ។

[២៩] ទុរភិសម្ភវានិ ហិ [ម. ហិ ខោ។] ភោ គោតម អរញ្ញវនបត្ថានិ [ឱ. អរញ្ញេ បត្ថានិ។] បន្តានិ សេនាសនានិ ទុក្ករំ បវិវេកំ ទុរភិរមំ ឯកត្តេ ហរន្តិ មញ្ញេ មនោ វនានិ សមាធឹ អលភមានស្ស ភិក្ខុនោតិ។ ឯវមេតំ ព្រាហ្មណ ឯវមេតំ ព្រាហ្មណ ទុរភិសម្ភវានិ ហិ [ម. ហិ ខោ។] ព្រាហ្មណ អរញ្ញវនបត្ថានិ បន្តានិ សេនាសនានិ ទុក្ករំ បវិវេកំ ទុរភិរមំ ឯកត្តេ ហរន្តិ មញ្ញេ មនោ វនានិ សមាធឹ អលភមានស្ស ភិក្ខុនោតិ។

[៣០] មយ្ហម្បិ ខោ ព្រាហ្មណ បុព្វេវ សម្ពោធា អនភិសម្ពុទ្ធស្ស ពោធិសត្តស្សេវ សតោ ឯតទហោសិ ទុរភិសម្ភវានិ ហិ ខោ អរញ្ញវនបត្ថានិ បន្តានិ សេនាសនានិ ទុក្ករំ បវិវេកំ ទុរភិរមំ ឯកត្តេ ហរន្តិ មញ្ញេ មនោ វនានិ សមាធឹ អលភមានស្ស ភិក្ខុនោតិ។

[៣១] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា អបរិសុទ្ធកាយកម្មន្តា អរញ្ញវនបត្ថានិ បន្តានិ សេនាសនានិ បដិសេវន្តិ អបរិសុទ្ធកាយកម្មន្តសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ អបរិសុទ្ធកាយកម្មន្តោ អរញ្ញវនបត្ថានិ បន្តានិ សេនាសនានិ បដិសេវាមិ បរិសុទ្ធកាយកម្មន្តោហមស្មិ។ យេ ហិ វោ អរិយា បរិសុទ្ធកាយកម្មន្តា អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ [ឱ. អញ្ញតមោ។ ឯវំ សព្វត្ថ។] ឯតមហំ ព្រាហ្មណ បរិសុទ្ធកាយកម្មន្តតំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

[៣២] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា អបរិសុទ្ធវចីកម្មន្តា។បេ។ អបរិសុទ្ធមនោកម្មន្តា អបរិសុទ្ធាជីវា អរញ្ញវនបត្ថានិ បន្តានិ សេនាសនានិ បដិសេវន្តិ អបរិសុទ្ធាជីវសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ អបរិសុទ្ធាជីវោ អរញ្ញវនបត្ថានិ បន្តានិ សេនាសនានិ បដិសេវាមិ បរិសុទ្ធាជីវោហមស្មិ។ យេ ហិ វោ អរិយា បរិសុទ្ធាជីវា អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ [ឱ. អញ្ញតមោ។ ឯវំ សព្វត្ថ។] ឯតមហំ ព្រាហ្មណ បរិសុទ្ធាជីវតំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

[៣៣] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា អភិជ្ឈាលូ កាមេសុ តិព្វសារាគា អរញ្ញវនបត្ថានិ បន្តានិ សេនាសនានិ បដិសេវន្តិ អភិជ្ឈាលុកាមេសុតិព្វសារាគសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ អភិជ្ឈាលុ កាមេសុ តិព្វសារាគោ អរញ្ញវនបត្ថានិ បន្តានិ សេនាសនានិ បដិសេវាមិ អនភិជ្ឈាលុហមស្មិ។ យេ ហិ វោ អរិយា អនភិជ្ឈាលូ អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ ឯតមហំ ព្រាហ្មណ អនភិជ្ឈាលុតំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

[៣៤] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា ព្យាបន្នចិត្តា បទុដ្ឋមនសង្កប្បា អរញ្ញវនបត្ថានិ បន្តានិ សេនាសនានិ បដិសេវន្តិ ព្យាបន្នចិត្តបទុដ្ឋមនសង្កប្បសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ ព្យាបន្នចិត្តោ បទុដ្ឋមនសង្កប្បោ អរញ្ញវនបត្ថានិ បន្តានិ សេនាសនានិ បដិសេវាមិ មេត្តចិត្តោហមស្មិ។ យេ ហិ វោ អរិយា មេត្តចិត្តា អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ ឯតមហំ ព្រាហ្មណ មេត្តចិត្តតំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

[៣៥] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា ថីនមិទ្ធបរិយុដ្ឋិតា អរញ្ញវនបត្ថានិ បន្តានិ សេនាសនានិ បដិសេវន្តិ ថីនមិទ្ធបរិយុដ្ឋានសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ ថីនមិទ្ធបរិយុដ្ឋិតោ អរញ្ញវនបត្ថានិ បន្តានិ សេនាសនានិ បដិសេវាមិ វិគតថីនមិទ្ធោហមស្មិ។ យេ ហិ វោ អរិយា វិគតថីនមិទ្ធា អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ ឯតមហំ ព្រាហ្មណ វិគតថីនមិទ្ធតំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

[៣៦] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា ឧទ្ធតា អវូបសន្តចិត្តា អរញ្ញវនបត្ថានិ បន្តានិ សេនាសនានិ បដិសេវន្តិ ឧទ្ធតាវូបសន្តចិត្តសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ ឧទ្ធតោ អវូបសន្តចិត្តោ អរញ្ញវនបត្ថានិ បន្តានិ សេនាសនានិ បដិសេវាមិ វូបសន្តចិត្តោហមស្មិ។ យេ ហិ វោ អរិយា វូបសន្តចិត្តា អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ ឯតមហំ ព្រាហ្មណ វូបសន្តចិត្តតំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

[៣៧] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា កង្ខី វិចិកិច្ឆី អរញ្ញវនបត្ថានិ បន្តានិ សេនាសនានិ បដិសេវន្តិ កង្ខិវិចិកិច្ឆិសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ កង្ខី វិចិកិច្ឆី អរញ្ញវនបត្ថានិ បន្តានិ សេនាសនានិ បដិសេវាមិ តិណ្ណវិចិកិច្ឆោហមស្មិ។ យេ ហិ វោ អរិយា តិណ្ណវិចិកិច្ឆា អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ ឯតមហំ ព្រាហ្មណ តិណ្ណវិចិកិច្ឆតំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

[៣៨] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា អត្តុក្កំសកា បរវម្ភី អរញ្ញវនបត្ថានិ បន្តានិ សេនាសនានិ បដិសេវន្តិ អត្តុក្កំសនបរវម្ភនសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ អត្តុក្កំសកោ បរវម្ភី អរញ្ញវនបត្ថានិ បន្តានិ សេនាសនានិ បដិសេវាមិ អនត្តុក្កំសកោ អបរវម្ភីហមស្មិ។ យេ ហិ វោ អរិយា អនត្តុក្កំសកា អបរវម្ភី អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ ឯតមហំ ព្រាហ្មណ អនត្តុក្កំសកតំ អបរវម្ភិតំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

[៣៩] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា ឆម្ភី ភិរុកជាតិកា អរញ្ញវនបត្ថានិ បន្តានិ សេនាសនានិ បដិសេវន្តិ ឆម្ភិភិរុកជាតិកសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ ឆម្ភី ភិរុកជាតិកោ អរញ្ញវនបត្ថានិ បន្តានិ សេនាសនានិ បដិសេវាមិ វិគតលោមហំសោហមស្មិ។ យេ ហិ វោ អរិយា វិគតលោមហំសា អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ ឯតមហំ ព្រាហ្មណ វិគតលោមហំសតំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

[៤០] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា លាភសក្ការសិលោកំ និកាមយមានា អរញ្ញវនបត្ថានិ បន្តានិ សេនាសនានិ បដិសេវន្តិ លាភសក្ការសិលោកនិកាមយមានសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ លាភសក្ការសិលោកំ និកាមយមានោ អរញ្ញវនបត្ថានិ បន្តានិ សេនាសនានិ បដិសេវាមិ អប្បិច្ឆោហមស្មិ។ យេ ហិ វោ អរិយា អប្បិច្ឆា អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ ឯតមហំ ព្រាហ្មណ អប្បិច្ឆតំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

[៤១] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា កុសីតា ហីនវីរិយា អរញ្ញវនបត្ថានិ បន្តានិ សេនាសនានិ បដិសេវន្តិ កុសីតហីនវីរិយសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ កុសីតោ ហីនវីរិយោ អរញ្ញវនបត្ថានិ បន្តានិ សេនាសនានិ បដិសេវាមិ អារទ្ធវីរិយោហមស្មិ។ យេ ហិ វោ អរិយា អារទ្ធវីរិយា អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ ឯតមហំ ព្រាហ្មណ អារទ្ធវីរិយតំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

[៤២] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា មុដ្ឋស្សតី អសម្បជានា អរញ្ញវនបត្ថានិ បន្តានិ សេនាសនានិ បដិសេវន្តិ មុដ្ឋស្សតិអសម្បជានសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ មុដ្ឋស្សតិ អសម្បជានោ អរញ្ញវនបត្ថានិ បន្តានិ សេនាសនានិ បដិសេវាមិ ឧបដ្ឋិតស្សតិហមស្មិ។ យេ ហិ វោ អរិយា ឧបដ្ឋិតស្សតី អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ ឯតមហំ ព្រាហ្មណ ឧបដ្ឋិតស្សតិតំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

[៤៣] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា អសមាហិតា វិព្ភន្តចិត្តា អរញ្ញវនបត្ថានិ បន្តានិ សេនាសនានិ បដិសេវន្តិ អសមាហិតវិព្ភន្តចិត្តសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ អសមាហិតោ វិព្ភន្តចិត្តោ អរញ្ញវនបត្ថានិ បន្តានិ សេនាសនានិ បដិសេវាមិ សមាធិសម្បន្នោហមស្មិ។ យេ ហិ វោ អរិយា សមាធិសម្បន្នា អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ ឯតមហំ ព្រាហ្មណ សមាធិសម្បទំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

[៤៤] តស្ស មយ្ហំ ព្រាហ្មណ ឯតទហោសិ យេ ខោ កេចិ សមណា វា ព្រាហ្មណា វា ទុប្បញ្ញា ឯលមូគា អរញ្ញវនបត្ថានិ បន្តានិ សេនាសនានិ បដិសេវន្តិ ទុប្បញ្ញឯលមូគសន្ទោសហេតុ ហវេ តេ ភោន្តោ សមណព្រាហ្មណា អកុសលំ ភយភេរវំ អវ្ហយន្តិ។ ន ខោ បនាហំ ទុប្បញ្ញោ ឯលមូគោ អរញ្ញវនបត្ថានិ បន្តានិ សេនាសនានិ បដិសេវាមិ បញ្ញាសម្បន្នោហមស្មិ។ យេ ហិ វោ អរិយា បញ្ញាសម្បន្នា អរញ្ញវនបត្ថានិ បន្តានិ សេនាសនានិ បដិសេវន្តិ តេសមហំ អញ្ញតរោ ឯតមហំ ព្រាហ្មណ បញ្ញាសម្បទំ អត្តនិ សម្បស្សមានោ ភិយ្យោ បល្លោមមាបាទឹ អរញ្ញេ វិហារាយ។

សោឡសបរិយាយំ និដ្ឋិតំ។

[៤៥] តស្ស មយ្ហំ ព្រាហ្មណ ឯតទហោសិ យន្នូនាហំ យា តា រត្តិយោ អភិញ្ញាតា អភិលក្ខិតា ចាតុទ្ទសី បញ្ចទសី អដ្ឋមី ច បក្ខស្ស តថារូបាសុ រត្តីសុ យានិ តានិ អារាមចេតិយានិ វនចេតិយានិ រុក្ខចេតិយានិ ភឹសនកានិ សលោមហំសានិ តថារូបេសុ សេនាសនេសុ វិហរេយ្យំ។ អប្បេវនាមតំ ភយភេរវំ បស្សេយ្យន្តិ។ សោ ខោ អហំ ព្រាហ្មណ អបរេន សមយេន យា តា រត្តិយោ អភិញ្ញាតា អភិលក្ខិតា ចាតុទ្ទសី បញ្ចទសី អដ្ឋមី ច បក្ខស្ស តថារូបាសុ រត្តីសុ យានិ តានិ អារាមចេតិយានិ វនចេតិយានិ រុក្ខចេតិយានិ ភឹសនកានិ សលោមហំសានិ តថារូបេសុ សេនាសនេសុ វិហរាមិ តត្ថ ច មេ ព្រាហ្មណ វិហរតោ មិគោ វា អាគច្ឆតិ មោរោ វា កដ្ឋំ បាតេតិ វាតោ វា បណ្ណកសដំ [ឱ. បណ្ណសដំ។ ម. បណ្ណសង្កដំ។] ឯរេតិ។ តស្ស មយ្ហំ ព្រាហ្មណ ឯវំ ហោតិ ឯតំ នូន តំ ភយភេរវំ អាគច្ឆតីតិ។ តស្ស មយ្ហំ ព្រាហ្មណ ឯតទហោសិ កិន្នុខោ អហំ អញ្ញទត្ថុ ភយប្បដិកង្ខី វិហរាមិ យន្នូនាហំ យថាភូតស្ស [ឱ.ម. យថាភូតំ។] យថាភូតស្ស មេ តំ ភយភេរវំ អាគច្ឆតិ តថាភូតោ [ឱ.ម. តថាភូតំ។] តថាភូតោ វ តំ ភយភេរវំ បដិវិនេយ្យន្តិ។ តស្ស មយ្ហំ ព្រាហ្មណ ចង្កមន្តស្ស តំ ភយភេរវំ អាគច្ឆតិ។ សោ ខោ អហំ ព្រាហ្មណ នេវ តាវ តិដ្ឋាមិ ន និសីទាមិ ន និបជ្ជាមិ យាវ ចង្កមន្តោ វ តំ ភយភេរវំ បដិវិនេមិ។ តស្ស មយ្ហំ ព្រាហ្មណ ឋិតស្ស តំ ភយភេរវំ អាគច្ឆតិ។ សោ ខោ អហំ ព្រាហ្មណ នេវ តាវ ចង្កមាមិ ន និសីទាមិ ន និបជ្ជាមិ យាវ ឋិតោវ តំ ភយភេរវំ បដិវិនេមិ។ តស្ស មយ្ហំ ព្រាហ្មណ និសិន្នស្ស តំ ភយភេរវំ អាគច្ឆតិ។ សោ ខោ អហំ ព្រាហ្មណ នេវ តាវ និបជ្ជាមិ ន តិដ្ឋាមិ ន ចង្កមាមិ យាវ និសិន្នោ វ តំ ភយភេរវំ បដិវិនេមិ។ តស្ស មយ្ហំ ព្រាហ្មណ និបន្នស្ស តំ ភយភេរវំ អាគច្ឆតិ។ សោ ខោ អហំ ព្រាហ្មណ នេវ តាវ និសីទាមិ ន តិដ្ឋាមិ ន ចង្កមាមិ យាវ និបន្នោ វ តំ ភយភេរវំ បដិវិនេមិ។

[៤៦] សន្តិ ខោ បន ព្រាហ្មណ ឯកេ សមណព្រាហ្មណា រត្តឹយេវ សមានំ ទិវាតិ សញ្ជានន្តិ ទិវាយេវ សមានំ រត្តីតិ សញ្ជានន្តិ ឥទមហំ តេសំ សមណព្រាហ្មណានំ សម្មោហវិហារស្មឹ វទាមិ។ អហំ ខោ បន ព្រាហ្មណ រត្តឹយេវ សមានំ រត្តីតិ សញ្ជានាមិ ទិវាយេវ សមានំ ទិវាតិ សញ្ជានាមិ។ យំ ខោ តំ ព្រាហ្មណ សម្មា វទមានោ វទេយ្យ អសម្មោហធម្មោ សត្តោ លោកេ ឧប្បន្នោ ពហុជនហិតាយ ពហុជនសុខាយ លោកានុកម្បកាយ [ឱ.ម. លោកានុកម្បាយ។] អត្ថាយ ហិតាយ សុខាយ ទេវមនុស្សានន្តិ។ មមេវ តំ សម្មា វទមានោ វទេយ្យ អសម្មោហធម្មោ សត្តោ លោកេ ឧប្បន្នោ ពហុជនហិតាយ ពហុជនសុខាយ លោកានុកម្បកាយ អត្ថាយ ហិតាយ សុខាយ ទេវមនុស្សានន្តិ។

[៤៧] អារទ្ធំ ខោ បន មេ ព្រាហ្មណ វីរិយំ អហោសិ អសល្លីនំ ឧបដ្ឋិតា សតិ អប្បម្មុដ្ឋា [ឱ. អសម្មដ្ឋា។ ម. អសំមុដ្ឋា។] បស្សទ្ធោ កាយោ អសារទ្ធោ សមាហិតំ ចិត្តំ ឯកគ្គំ។ សោ ខោ អហំ ព្រាហ្មណ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហាសិ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវំ អវិតក្កំ អវិចារំ សមាធិជំ បីតិសុខំ ទុតិយំ ឈានំ ឧបសម្បជ្ជ វិហាសឹ បីតិយា ច វិរាគា ឧបេក្ខកោ ច វិហាសឹ សតោ ច សម្បជានោ សុខញ្ច កាយេន បដិសំវេទេសឹ យន្តំ អរិយា អាចិក្ខន្តិ ឧបេក្ខកោ សតិមា សុខវិហារីតិ តតិយំ ឈានំ ឧបសម្បជ្ជ វិហាសឹ សុខស្ស ច បហានា ទុក្ខស្ស ច បហានា បុព្វេវ សោមនស្សទោមនស្សានំ អត្ថង្គមា អទុក្ខមសុខំ ឧបេក្ខាសតិបារិសុទ្ធឹ ចតុត្ថំ ឈានំ ឧបសម្បជ្ជ វិហាសឹ។

[៤៨] សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ [ឱ. អានេជ្ជប្បត្តេ។] បុព្វេនិវាសានុស្សតិញ្ញាណាយ ចិត្តំ អភិនិន្នាមេសឹ។ សោ អនេកវិហិតំ បុព្វេនិវាសំ អនុស្សរាមិ សេយ្យថីទំ ឯកម្បិ ជាតឹ ទ្វេបិ ជាតិយោ តិស្សោបិ ជាតិយោ ចតស្សោបិ ជាតិយោ បញ្ចបិ ជាតិយោ ទសបិ ជាតិយោ វីសម្បិ ជាតិយោ តឹសម្បិ ជាតិយោ ចត្តាឡីសម្បិ ជាតិយោ បញ្ញាសម្បិ ជាតិយោ ជាតិសតម្បិ ជាតិសហស្សម្បិ ជាតិសតសហស្សម្បិ អនេកេបិ សំវដ្ដកប្បេ អនេកេបិ វិវដ្ដកប្បេ អនេកេបិ សំវដ្ដវិវដ្ដកប្បេ អមុត្រាសឹ ឯវំនាមោ ឯវំគោត្តោ ឯវំវណ្ណោ ឯវមាហារោ ឯវំសុខទុក្ខប្បដិសំវេទី ឯវមាយុបរិយន្តោ សោ តតោ ចុតោ អមុត្រ ឧទបាទឹ តត្រាបាសឹ ឯវំនាមោ ឯវំគោត្តោ ឯវំវណ្ណោ ឯវមាហារោ ឯវំសុខទុក្ខប្បដិសំវេទី ឯវមាយុបរិយន្តោ សោ តតោ ចុតោ ឥធូបបន្នោតិ។ ឥតិ សាការំ សឧទ្ទេសំ អនេកវិហិតំ បុព្វេនិវាសំ អនុស្សរាមិ។ អយំ ខោ មេ ព្រាហ្មណ រត្តិយា បឋមេ យាមេ បឋមា វិជ្ជា អធិគតា អវិជ្ជា វិហតា វិជ្ជា ឧប្បន្នា តមោ វិហតោ អាលោកោ ឧប្បន្នោ យថាតំ អប្បមត្តស្ស អាតាបិនោ បហិតត្តស្ស វិហរតោ។

[៤៩] សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនិយេ ឋិតេ អានេញ្ជប្បត្តេ សត្តានំ ចុតូបបាតញ្ញាណាយ ចិត្តំ អភិនិន្នាមេសឹ។ សោ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សាមិ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ យថាកម្មូបគេ សត្តេ បជានាមិ ឥមេ វត ភោន្តោ សត្តា កាយទុច្ចរិតេន សមន្នាគតា វចីទុច្ចរិតេន សមន្នាគតា មនោទុច្ចរិតេន សមន្នាគតា អរិយានំ ឧបវាទកា មិច្ឆាទិដ្ឋិកា មិច្ឆាទិដ្ឋិកម្មសមាទានា តេ កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបន្នា ឥមេ វា បន ភោន្តោ សត្តា កាយសុចរិតេន សមន្នាគតា វចីសុចរិតេន សមន្នាគតា មនោសុចរិតេន សមន្នាគតា អរិយានំ អនុបវាទកា សម្មាទិដ្ឋិកា សម្មាទិដ្ឋិកម្មសមាទានា តេ កាយស្ស ភេទា បរម្មរណា សុគតឹ សគ្គំ លោកំ ឧបបន្នាតិ។ ឥតិ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សាមិ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ យថាកម្មូបគេ សត្តេ បជានាមិ។ អយំ ខោ មេ ព្រាហ្មណ រត្តិយា មជ្ឈិមេ យាមេ ទុតិយា វិជ្ជា អធិគតា អវិជ្ជា វិហតា វិជ្ជា ឧប្បន្នា តមោ វិហតោ អាលោកោ ឧប្បន្នោ យថាតំ អប្បមត្តស្ស អាតាបិនោ បហិតត្តស្ស វិហរតោ។

[៥០] សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនិយេ ឋិតេ អានេញ្ជប្បត្តេ អាសវានំ ខយញ្ញាណាយ ចិត្តំ អភិនិន្នាមេសឹ។ សោ ឥទំ ទុក្ខន្តិ យថាភូតំ អព្ភញ្ញាសឹ អយំ ទុក្ខសមុទយោតិ យថាភូតំ អព្ភញ្ញាសឹ អយំ ទុក្ខនិរោធោតិ យថាភូតំ អព្ភញ្ញាសឹ អយំ ទុក្ខនិរោធគាមិនី បដិបទាតិ យថាភូតំ អព្ភញ្ញាសឹ ឥមេ អាសវាតិ យថាភូតំ អព្ភញ្ញាសឹ អយំ អាសវសមុទយោតិ យថាភូតំ អព្ភញ្ញាសឹ អយំ អាសវនិរោធោតិ យថាភូតំ អព្ភញ្ញាសឹ អយំ អាសវនិរោធគាមិនី បដិបទាតិ យថាភូតំ អព្ភញ្ញាសឹ។ តស្ស មេ ឯវំ ជានតោ ឯវំ បស្សតោ កាមាសវាបិ ចិត្តំ វិមុច្ចិត្ថ ភវាសវាបិ ចិត្តំ វិមុច្ចិត្ថ អវិជ្ជាសវាបិ ចិត្តំ វិមុច្ចិត្ថ វិមុត្តស្មឹ វិមុត្តមិតិ ញាណំ អហោសិ ខីណា ជាតិ វុសិតំ ព្រហ្មចរិយំ កតំ ករណីយំ នាបរំ ឥត្ថត្តាយាតិ អព្ភញ្ញាសឹ។ អយំ ខោ មេ ព្រាហ្មណ រត្តិយា បច្ឆិមេ យាមេ តតិយា វិជ្ជា អធិគតា អវិជ្ជា វិហតា វិជ្ជា ឧប្បន្នា តមោ វិហតោ អាលោកោ ឧប្បន្នោ យថាតំ អប្បមត្តស្ស អាតាបិនោ បហិតត្តស្ស វិហរតោ។

[៥១] សិយា ខោ បន តេ ព្រាហ្មណ ឯវមស្ស អជ្ជាបិ នូន សមណោ គោតមោ អវីតរាគោ អវីតទោសោ អវីតមោហោ តស្មា អរញ្ញវនបត្ថានិ បន្តានិ សេនាសនានិ បដិសេវតីតិ។ ន ខោ បនេតំ ព្រាហ្មណ ឯវំ ទដ្ឋព្វំ។ ទ្វេ ខោ អហំ ព្រាហ្មណ អត្ថវសេ សម្បស្សមានោ អរញ្ញវនបត្ថានិ បន្តានិ សេនាសនានិ បដិសេវាមិ អត្តនោ ច ទិដ្ឋធម្មសុខវិហារំ សម្បស្សមានោ បច្ឆិមញ្ច ជនតំ អនុកម្បមានោតិ។

[៥២] អនុកម្បិតរូបា វតាយំ [ឱ. យំ។] ភោតា គោតមេន បច្ឆិមា ជនតា យថាតំ អរហតា សម្មាសម្ពុទ្ធេន។ អភិក្កន្តំ ភោ គោតម អភិក្កន្តំ ភោ គោតម សេយ្យថាបិ ភោ គោតម និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ [ឱ.ម. ឯវមេវំ។] ភោតា គោតមេន អនេកបរិយាយេន ធម្មោ បកាសិតោ។ ឯសាហំ ភវន្តំ គោតមំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភវំ គោតមោ ធារេតុ អជ្ជតគ្គេ បាណុបេតំ សរណង្គតន្តិ [ឱ. សរណគតន្តីតិ ទិស្សតិ។]។

ភយភេរវសុត្តន្តំ ចតុត្ថំ និដ្ឋិតំ [ឱ. ម. និដ្ឋិតន្តិ ន ទិស្សតិ។]។

បញ្ចមំ អនង្គណសុត្តំ

[៥៣] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ អាយស្មា សារីបុត្តោ ភិក្ខូ អាមន្តេសិ អាវុសោ ភិក្ខវោតិ។ អាវុសោតិ ខោ តេ ភិក្ខូ អាយស្មតោ សារីបុត្តស្ស បច្ចស្សោសុំ។

[៥៤] អាយស្មា សារីបុត្តោ ឯតទវោច ចត្តារោមេ អាវុសោ បុគ្គលា សន្តោ សំវិជ្ជមានា លោកស្មឹ។ កតមេ ចត្តារោ។ ឥធាវុសោ ឯកច្ចោ បុគ្គលោ សង្គណោ វ [សង្គណោ ចាតិ កត្ថចិ បោត្ថកេ ទិស្សតិ។] សមានោ អត្ថិ មេ អជ្ឈត្តំ អង្គណន្តិ យថាភូតំ នប្បជានាតិ។ ឥធ បនាវុសោ ឯកច្ចោ បុគ្គលោ សង្គណោ វ [សង្គណោ ចាតិ កត្ថចិ បោត្ថកេ ទិស្សតិ។] សមានោ អត្ថិ មេ អជ្ឈត្តំ អង្គណន្តិ យថាភូតំ បជានាតិ។ ឥធាវុសោ ឯកច្ចោ បុគ្គលោ អនង្គណោ វ សមានោ នត្ថិ មេ អជ្ឈត្តំ អង្គណន្តិ យថាភូតំ នប្បជានាតិ។ ឥធ បនាវុសោ ឯកច្ចោ បុគ្គលោ អនង្គណោ វ សមានោ នត្ថិ មេ អជ្ឈត្តំ អង្គណន្តិ យថាភូតំ បជានាតិ។ តត្រាវុសោ យ្វាយំ បុគ្គលោ សង្គណោ វ សមានោ អត្ថិ មេ អជ្ឈត្តំ អង្គណន្តិ យថាភូតំ នប្បជានាតិ អយំ ឥមេសំ ទ្វិន្នំ បុគ្គលានំ សង្គណានំយេវ សតំ ហីនបុរិសោ អក្ខាយតិ។ តត្រាវុសោ យ្វាយំ បុគ្គលោ សង្គណោ វ សមានោ អត្ថិ មេ អជ្ឈត្តំ អង្គណន្តិ យថាភូតំ បជានាតិ អយំ ឥមេសំ ទ្វិន្នំ បុគ្គលានំ សង្គណានំយេវ សតំ សេដ្ឋបុរិសោ អក្ខាយតិ។ តត្រាវុសោ យ្វាយំ បុគ្គលោ អនង្គណោ វ សមានោ នត្ថិ មេ អជ្ឈត្តំ អង្គណន្តិ យថាភូតំ នប្បជានាតិ អយំ ឥមេសំ ទ្វិន្នំ បុគ្គលានំ អនង្គណានំយេវ សតំ ហីនបុរិសោ អក្ខាយតិ។ តត្រាវុសោ យ្វាយំ បុគ្គលោ អនង្គណោ វ សមានោ នត្ថិ មេ អជ្ឈត្តំ អង្គណន្តិ យថាភូតំ បជានាតិ អយំ ឥមេសំ ទ្វិន្នំ បុគ្គលានំ អនង្គណានំយេវ សតំ សេដ្ឋបុរិសោ អក្ខាយតីតិ។

[៥៥] ឯវំ វុត្តេ អាយស្មា មហាមោគ្គល្លានោ អាយស្មន្តំ សារីបុត្តំ ឯតទវោច កោ នុ ខោ អាវុសោ សារីបុត្ត ហេតុ កោ បច្ចយោ យេនិមេសំ ទ្វិន្នំ បុគ្គលានំ សង្គណានំយេវ សតំ ឯកោ ហីនបុរិសោ អក្ខាយតិ ឯកោ សេដ្ឋបុរិសោ អក្ខាយតិ កោ បនាវុសោ សារីបុត្ត ហេតុ កោ បច្ចយោ យេនិមេសំ ទ្វិន្នំ បុគ្គលានំ អនង្គណានំយេវ សតំ ឯកោ ហីនបុរិសោ អក្ខាយតិ ឯកោ សេដ្ឋបុរិសោ អក្ខាយតីតិ។ តត្រាវុសោ យ្វាយំ បុគ្គលោ សង្គណោ វ សមានោ អត្ថិ មេ អជ្ឈត្តំ អង្គណន្តិ យថាភូតំ នប្បជានាតិ តស្សេតំ បាដិកង្ខំ ន ឆន្ទំ ជនេស្សតិ ន វាយមិស្សតិ ន វីរិយំ អារភិស្សតិ តស្ស អង្គណស្ស បហានាយ។ សោ សរាគោ សទោសោ សមោហោ សង្គណោ សង្កិលិដ្ឋចិត្តោ កាលំ ករិស្សតិ។ សេយ្យថាបិ អាវុសោ កំសបាតិ អាភតា អាបណា វា កម្មារកុលា វា រជេន ច មលេន ច បរិយោនទ្ធា តមេនំ សាមិកា ន ចេវ បរិភុញ្ជេយ្យុំ ន ច បរិយោទបេយ្យុំ រជាបថេ ច នំ និក្ខិបេយ្យុំ ឯវញ្ហិ សា អាវុសោ កំសបាតិ អបរេន សមយេន សង្កិលិដ្ឋតរា អស្ស មលគ្គហិតាតិ។ ឯវមាវុសោតិ។ ឯវមេវ ខោ អាវុសោ យ្វាយំ បុគ្គលោ សង្គណោ វ សមានោ អត្ថិ មេ អជ្ឈត្តំ អង្គណន្តិ យថាភូតំ នប្បជានាតិ តស្សេតំ បាដិកង្ខំ ន ឆន្ទំ ជនេស្សតិ ន វាយមិស្សតិ ន វីរិយំ អារភិស្សតិ តស្ស អង្គណស្ស បហានាយ។ សោ សរាគោ សទោសោ សមោហោ សង្គណោ សង្កិលិដ្ឋចិត្តោ កាលំ ករិស្សតិ។ តត្រាវុសោ យ្វាយំ បុគ្គលោ សង្គណោ វ សមានោ អត្ថិ មេ អជ្ឈត្តំ អង្គណន្តិ យថាភូតំ បជានាតិ តស្សេតំ បាដិកង្ខំ ឆន្ទំ ជនេស្សតិ វាយមិស្សតិ វីរិយំ អារភិស្សតិ តស្ស អង្គណស្ស បហានាយ។ សោ អរាគោ អទោសោ អមោហោ អនង្គណោ អសង្កិលិដ្ឋចិត្តោ កាលំ ករិស្សតិ។ សេយ្យថាបិ អាវុសោ កំសបាតិ អាភតា អាបណា វា កម្មារកុលា វា រជេន ច មលេន ច បរិយោនទ្ធា តមេនំ សាមិកា បរិភុញ្ជេយ្យុំ ចេវ បរិយោទបេយ្យុំ ច ន ច នំ រជាបថេ និក្ខិបេយ្យុំ ឯវញ្ហិ សា អាវុសោ កំសបាតិ អបរេន សមយេន បរិសុទ្ធា អស្ស បរិយោទាតាតិ។ ឯវមាវុសោតិ។ ឯវមេវ ខោ អាវុសោ យ្វាយំ បុគ្គលោ សង្គណោ វ សមានោ អត្ថិ មេ អជ្ឈត្តំ អង្គណន្តិ យថាភូតំ បជានាតិ តស្សេតំ បាដិកង្ខំ ឆន្ទំ ជនេស្សតិ វាយមិស្សតិ វីរិយំ អារភិស្សតិ តស្ស អង្គណស្ស បហានាយ។ សោ អរាគោ អទោសោ អមោហោ អនង្គណោ អសង្កិលិដ្ឋចិត្តោ កាលំ ករិស្សតិ។ តត្រាវុសោ យ្វាយំ បុគ្គលោ អនង្គណោ វ សមានោ នត្ថិ មេ អជ្ឈត្តំ អង្គណន្តិ យថាភូតំ នប្បជានាតិ តស្សេតំ បាដិកង្ខំ សុភនិមិត្តំ មនសិករិស្សតិ តស្ស សុភនិមិត្តស្ស មនសិការា រាគោ ចិត្តំ អនុទ្ធំសេស្សតិ។ សោ សរាគោ សទោសោ សមោហោ សង្គណោ សង្កិលិដ្ឋចិត្តោ កាលំ ករិស្សតិ។ សេយ្យថាបិ អាវុសោ កំសបាតិ អាគតា អាបណា វា កម្មារកុលា វា បរិសុទ្ធា បរិយោទាតា តមេនំ សាមិកា ន ចេវ បរិភុញ្ជេយ្យុំ ន ច បរិយោទបេយ្យុំ រជាបថេ ច នំ និក្ខិបេយ្យុំ ឯវញ្ហិ សា អាវុសោ កំសបាតិ អបរេន សមយេន សង្កិលិដ្ឋា [ឱ.ម. សង្កិលិដ្ឋតរា។] អស្ស មលគ្គហិតាតិ។ ឯវមាវុសោតិ។ ឯវមេវ ខោ អាវុសោ យ្វាយំ បុគ្គលោ អនង្គណោ វ សមានោ នត្ថិ មេ អជ្ឈត្តំ អង្គណន្តិ យថាភូតំ នប្បជានាតិ តស្សេតំ បាដិកង្ខំ សុភនិមិត្តំ មនសិករិស្សតិ តស្ស សុភនិមិត្តស្ស មនសិការា រាគោ ចិត្តំ អនុទ្ធំសេស្សតិ។ សោ សរាគោ សទោសោ សមោហោ សង្គណោ សង្កិលិដ្ឋចិត្តោ កាលំ ករិស្សតិ។ តត្រាវុសោ យ្វាយំ បុគ្គលោ អនង្គណោ វ សមានោ នត្ថិ មេ អជ្ឈត្តំ អង្គណន្តិ យថាភូតំ បជានាតិ តស្សេតំ បាដិកង្ខំ សុភនិមិត្តំ មនសិករិស្សតិ តស្ស សុភនិមិត្តស្ស មនសិការា រាគោ ចិត្តំ នានុទ្ធំសេស្សតិ។ សោ អរាគោ អទោសោ អមោហោ អនង្គណោ អសង្កិលិដ្ឋចិត្តោ កាលំ ករិស្សតិ។ សេយ្យថាបិ អាវុសោ កំសបាតិ អាភតា អាបណា វា កម្មារកុលា វា បរិសុទ្ធា បរិយោទាតាតមេនំ សាមិកា បរិភុញ្ជេយ្យុំ ចេវ បរិយោទបេយ្យុំ ច ន ច នំ រជាបថេ និក្ខិបេយ្យុំ ឯវញ្ហិ សា អាវុសោ កំសបាតិ អបរេន សមយេន បរិសុទ្ធតរា អស្ស បរិយោទាតាតិ។ ឯវមាវុសោតិ។ ឯវមេវ ខោ អាវុសោ យ្វាយំ បុគ្គលោ អនង្គណោ វ សមានោ នត្ថិ មេ អជ្ឈត្តំ អង្គណន្តិ យថាភូតំ បជានាតិ តស្សេតំ បាដិកង្ខំ សុភនិមិត្តំ ន មនសិករិស្សតិ តស្ស សុភនិមិត្តស្ស អមនសិការា រាគោ ចិត្តំ នានុទ្ធំសេស្សតិ។ សោ អរាគោ អទោសោ អមោហោ អនង្គណោ អសង្កិលិដ្ឋចិត្តោ កាលំ ករិស្សតិ។ អយំ ខោ អាវុសោ មោគ្គល្លាន ហេតុ អយំ បច្ចយោ យេនិមេសំ ទ្វិន្នំ បុគ្គលានំ សង្គណានំយេវ សតំ ឯកោ ហីនបុរិសោ អក្ខាយតិ ឯកោ សេដ្ឋបុរិសោ អក្ខាយតិ អយំ ខោ បនាវុសោ មោគ្គល្លាន ហេតុ អយំ បច្ចយោ យេនិមេសំ ទ្វិន្នំ បុគ្គលានំ អនង្គណានំយេវ សតំ ឯកោ ហីនបុរិសោ អក្ខាយតិ ឯកោ សេដ្ឋបុរិសោ អក្ខាយតីតិ។

[៥៦] អង្គណំ អង្គណន្តិ អាវុសោ វុច្ចតិ កិស្ស នុ ខោ ឯតំ អាវុសោ អធិវចនំ យទិទំ អង្គណន្តិ។ បាបកានំ [ឱ. បាបកានំ ខោ។] ឯតំ អាវុសោ អកុសលានំ ឥច្ឆាវចរានំ អធិវចនំ យទិទំ អង្គណន្តិ [ឱ. អង្គណំ ឥតិសទ្ទោ នត្ថិ។]។

[៥៧] ឋានំ ខោ បនេតំ អាវុសោ វិជ្ជតិ យំ ឥធេកច្ចស្ស ភិក្ខុនោ ឯវំ ឥច្ឆា ឧប្បជ្ជេយ្យ អាបត្តិញ្ច វត អាបន្នោ អស្សំ ន ច មំ ភិក្ខូ ជានេយ្យុំ អាបត្តឹ អាបន្នោតិ។ ឋានំ ខោ បនេតំ អាវុសោ វិជ្ជតិ យន្តំ ភិក្ខុំ ភិក្ខូ ជានេយ្យុំ អាបត្តឹ អាបន្នោតិ។ ជានន្តិ មំ ភិក្ខូ អាបត្តឹ អាបន្នោតិ ឥតិ សោ កុបិតោ ហោតិ អប្បតីតោ។ យោ ចេវ ខោ អាវុសោ កោបោ យោ ច អប្បច្ចយោ ឧភយមេតំ អង្គណំ។

[៥៨] ឋានំ ខោ បនេតំ អាវុសោ វិជ្ជតិ យំ ឥធេកច្ចស្ស ភិក្ខុនោ ឯវំ ឥច្ឆា ឧប្បជ្ជេយ្យ អាបត្តិញ្ច វត អាបន្នោ អស្សំ អនុរហោ មំ ភិក្ខូ ចោទេយ្យុំ នោ សង្ឃមជ្ឈេតិ។ ឋានំ ខោ បនេតំ អាវុសោ វិជ្ជតិ យន្តំ ភិក្ខុំ ភិក្ខូ សង្ឃមជ្ឈេ ចោទេយ្យុំ នោ អនុរហោ។ សង្ឃមជ្ឈេ មំ ភិក្ខូ ចោទេន្តិ នោ អនុរហោតិ ឥតិ សោ កុបិតោ ហោតិ អប្បតីតោ។ យោ ចេវ ខោ អាវុសោ កោបោ យោ ច អប្បច្ចយោ ឧភយមេតំ អង្គណំ។

[៥៩] ឋានំ ខោ បនេតំ អាវុសោ វិជ្ជតិ យំ ឥធេកច្ចស្ស ភិក្ខុនោ ឯវំ ឥច្ឆា ឧប្បជ្ជេយ្យ អាបត្តិញ្ច វត អាបន្នោ អស្សំ សប្បដិបុគ្គលោ មំ ចោទេយ្យ នោ អប្បដិបុគ្គលោតិ។ ឋានំ ខោ បនេតំ អាវុសោ វិជ្ជតិ យន្តំ ភិក្ខុំ អប្បដិបុគ្គលោ ចោទេយ្យ នោ សប្បដិបុគ្គលោ។ អប្បដិបុគ្គលោ មំ ចោទេតិ នោ សប្បដិបុគ្គលោតិ ឥតិ សោ កុបិតោ ហោតិ អប្បតីតោ។ យោ ចេវ ខោ អាវុសោ កោបោ យោ ច អប្បច្ចយោ ឧភយមេតំ អង្គណំ។

[៦០] ឋានំ ខោ បនេតំ អាវុសោ វិជ្ជតិ យំ ឥធេកច្ចស្ស ភិក្ខុនោ ឯវំ ឥច្ឆា ឧប្បជ្ជេយ្យ អហោ វត មមេវ សត្ថា បដិបុច្ឆិត្វា បដិបុច្ឆិត្វា ភិក្ខូនំ ធម្មំ ទេសេយ្យ ន អញ្ញំ ភិក្ខុំ សត្ថា បដិបុច្ឆិត្វា បដិបុច្ឆិត្វា ភិក្ខូនំ ធម្មំ ទេសេយ្យាតិ។ ឋានំ ខោ បនេតំ អាវុសោ វិជ្ជតិ យំ អញ្ញំ ភិក្ខុំ សត្ថា បដិបុច្ឆិត្វា បដិបុច្ឆិត្វា ភិក្ខូនំ ធម្មំ ទេសេយ្យ ន តំ ភិក្ខុំ សត្ថា បដិបុច្ឆិត្វា បដិបុច្ឆិត្វា ភិក្ខូនំ ធម្មំ ទេសេយ្យ។ អញ្ញំ ភិក្ខុំ សត្ថា បដិបុច្ឆិត្វា បដិបុច្ឆិត្វា ភិក្ខូនំ ធម្មំ ទេសេតិ ន មំ សត្ថា បដិបុច្ឆិត្វា បដិបុច្ឆិត្វា ភិក្ខូនំ ធម្មំ ទេសេតីតិ ឥតិ សោ កុបិតោ ហោតិ អប្បតីតោ។ យោ ចេវ ខោ អាវុសោ កោបោ យោ ច អប្បច្ចយោ ឧភយមេតំ អង្គណំ។

[៦១] ឋានំ ខោ បនេតំ អាវុសោ វិជ្ជតិ យំ ឥធេកច្ចស្ស ភិក្ខុនោ ឯវំ ឥច្ឆា ឧប្បជ្ជេយ្យ អហោ វត មមេវ ភិក្ខូ បុរក្ខត្វា បុរក្ខត្វា គាមំ ភត្តាយ បវិសេយ្យុំ ន អញ្ញំ ភិក្ខុំ ភិក្ខូ បុរក្ខត្វា បុរក្ខត្វា គាមំ ភត្តាយ បវិសេយ្យុន្តិ។ ឋានំ ខោ បនេតំ អាវុសោ វិជ្ជតិ យំ អញ្ញំ ភិក្ខុំ ភិក្ខូ បុរក្ខត្វា បុរក្ខត្វា គាមំ ភត្តាយ បវិសេយ្យុំ ន តំ ភិក្ខុំ ភិក្ខូ បុរក្ខត្វា បុរក្ខត្វា គាមំ ភត្តាយ បវិសេយ្យុំ។ អញ្ញំ ភិក្ខុំ ភិក្ខូ បុរក្ខត្វា បុរក្ខត្វា គាមំ ភត្តាយ បវិសន្តិ ន មំ ភិក្ខូ បុរក្ខត្វា បុរក្ខត្វា គាមំ ភត្តាយ បវិសន្តីតិ ឥតិ សោ កុបិតោ ហោតិ អប្បតីតោ។ យោ ចេវ ខោ អាវុសោ កោបោ យោ ច អប្បច្ចយោ ឧភយមេតំ អង្គណំ។

[៦២] ឋានំ ខោ បនេតំ អាវុសោ វិជ្ជតិ យំ ឥធេកច្ចស្ស ភិក្ខុនោ ឯវំ ឥច្ឆា ឧប្បជ្ជេយ្យ អហោ វត អហមេវ លភេយ្យំ ភត្តគ្គេ អគ្គាសនំ អគ្គោទកំ អគ្គបិណ្ឌំ ន អញ្ញោ ភិក្ខុ លភេយ្យ ភត្តគ្គេ អគ្គាសនំ អគ្គោទកំ អគ្គបិណ្ឌន្តិ។ ឋានំ ខោ បនេតំ អាវុសោ វិជ្ជតិ យំ អញ្ញោ ភិក្ខុ លភេយ្យ ភត្តគ្គេ អគ្គាសនំ អគ្គោទកំ អគ្គបិណ្ឌំ ន សោ ភិក្ខុ លភេយ្យ ភត្តគ្គេ អគ្គាសនំ អគ្គោទកំ អគ្គបិណ្ឌំ។ អញ្ញោ ភិក្ខុ លភតិ ភត្តគ្គេ អគ្គាសនំ អគ្គោទកំ អគ្គបិណ្ឌំ នាហំ លភាមិ ភត្តគ្គេ អគ្គាសនំ អគ្គោទកំ អគ្គបិណ្ឌន្តិ ឥតិ សោ កុបិតោ ហោតិ អប្បតីតោ។ យោ ចេវ ខោ អាវុសោ កោបោ យោ ច អប្បច្ចយោ ឧភយមេតំ អង្គណំ។

[៦៣] ឋានំ ខោ បនេតំ អាវុសោ វិជ្ជតិ យំ ឥធេកច្ចស្ស ភិក្ខុនោ ឯវំ ឥច្ឆា ឧប្បជ្ជេយ្យ អហោ វត អហមេវ ភត្តគ្គេ ភុត្តាវី អនុមោទេយ្យំ ន អញ្ញោ ភិក្ខុ ភត្តគ្គេ ភុត្តាវី អនុមោទេយ្យាតិ។ ឋានំ ខោ បនេតំ អាវុសោ វិជ្ជតិ យំ អញ្ញោ ភិក្ខុ ភត្តគ្គេ ភុត្តាវី អនុមោទេយ្យ ន សោ ភិក្ខុ ភត្តគ្គេ ភុត្តាវី អនុមោទេយ្យ។ អញ្ញោ ភិក្ខុ ភត្តគ្គេ ភុត្តាវី អនុមោទតិ នាហំ ភត្តគ្គេ ភុត្តាវី អនុមោទាមីតិ ឥតិ សោ កុបិតោ ហោតិ អប្បតីតោ។ យោ ចេវ ខោ អាវុសោ កោបោ យោ ច អប្បច្ចយោ ឧភយមេតំ អង្គណំ។

[៦៤] ឋានំ ខោ បនេតំ អាវុសោ វិជ្ជតិ យំ ឥធេកច្ចស្ស ភិក្ខុនោ ឯវំ ឥច្ឆា ឧប្បជ្ជេយ្យ អហោ វត អហមេវ អារាមគតានំ ភិក្ខូនំ ធម្មំ ទេសេយ្យំ ន អញ្ញោ ភិក្ខុ អារាមគតានំ ភិក្ខូនំ ធម្មំ ទេសេយ្យាតិ។ ឋានំ ខោ បនេតំ អាវុសោ វិជ្ជតិ យំ អញ្ញោ ភិក្ខុ អារាមគតានំ ភិក្ខូនំ ធម្មំ ទេសេយ្យ ន សោ ភិក្ខុ អារាមគតានំ ភិក្ខូនំ ធម្មំ ទេសេយ្យ។ អញ្ញោ ភិក្ខុ អារាមគតានំ ភិក្ខូនំ ធម្មំ ទេសេតិ នាហំ អារាមគតានំ ភិក្ខូនំ ធម្មំ ទេសេមីតិ ឥតិ សោ កុបិតោ ហោតិ អប្បតីតោ។ យោ ចេវ ខោ អាវុសោ កោបោ យោ ច អប្បច្ចយោ ឧភយមេតំ អង្គណំ។

[៦៥] ឋានំ ខោ បនេតំ អាវុសោ វិជ្ជតិ យំ ឥធេកច្ចស្ស ភិក្ខុនោ ឯវំ ឥច្ឆា ឧប្បជ្ជេយ្យ អហោ វត អហមេវ អារាមគតានំ ភិក្ខូនីនំ ធម្មំ ទេសេយ្យំ។បេ។ ឧបាសកានំ ធម្មំ ទេសេយ្យំ។បេ។ ឧបាសិកានំ ធម្មំ ទេសេយ្យំ ន អញ្ញោ ភិក្ខុ អារាមគតានំ ឧបាសិកានំ ធម្មំ ទេសេយ្យាតិ។ ឋានំ ខោ បនេតំ អាវុសោ វិជ្ជតិ យំ អញ្ញោ ភិក្ខុ អារាមគតានំ ឧបាសិកានំ ធម្មំ ទេសេយ្យ ន សោ ភិក្ខុ អារាមគតានំ ឧបាសិកានំ ធម្មំ ទេសេយ្យ។ អញ្ញោ ភិក្ខុ អារាមគតានំ ឧបាសិកានំ ធម្មំ ទេសេតិ នាហំ អារាមគតានំ ឧបាសិកានំ ធម្មំ ទេសេមីតិ ឥតិ សោ កុបិតោ ហោតិ អប្បតីតោ។ យោ ចេវ ខោ អាវុសោ កោបោ យោ ច អប្បច្ចយោ ឧភយមេតំ អង្គណំ។

[៦៦] ឋានំ ខោ បនេតំ អាវុសោ វិជ្ជតិ យំ ឥធេកច្ចស្ស ភិក្ខុនោ ឯវំ ឥច្ឆា ឧប្បជ្ជេយ្យ អហោ វត មមេវ ភិក្ខូ សក្ករេយ្យុំ គរុករេយ្យុំ មានេយ្យុំ បូជេយ្យុំ ន អញ្ញំ ភិក្ខុំ ភិក្ខូ សក្ករេយ្យុំ គរុករេយ្យុំ មានេយ្យុំ បូជេយ្យុន្តិ។ ឋានំ ខោ បនេតំ អាវុសោ វិជ្ជតិ យំ អញ្ញំ ភិក្ខុំ ភិក្ខូ សក្ករេយ្យុំ គរុករេយ្យុំ មានេយ្យុំ បូជេយ្យុំ ន តំ ភិក្ខុំ ភិក្ខូ សក្ករេយ្យុំ គរុករេយ្យុំ មានេយ្យុំ បូជេយ្យុំ។ អញ្ញំ ភិក្ខុំ ភិក្ខូ សក្ករោន្តិ គរុករោន្តិ មានេន្តិ បូជេន្តិ ន មំ ភិក្ខូ សក្ករោន្តិ គរុករោន្តិ មានេន្តិ បូជេន្តីតិ ឥតិ សោ កុបិតោ ហោតិ អប្បតីតោ។ យោ ចេវ ខោ អាវុសោ កោបោ យោ ច អប្បច្ចយោ ឧភយមេតំ អង្គណំ។

[៦៧] ឋានំ ខោ បនេតំ អាវុសោ វិជ្ជតិ យំ ឥធេកច្ចស្ស ភិក្ខុនោ ឯវំ ឥច្ឆា ឧប្បជ្ជេយ្យ អហោ វត មមេវ ភិក្ខុនិយោ។បេ។ ឧបាសកា។បេ។ ឧបាសិកាយោ សក្ករេយ្យុំ គរុករេយ្យុំ មានេយ្យុំ បូជេយ្យុំ ន អញ្ញំ ភិក្ខុំ ឧបាសិកាយោ សក្ករេយ្យុំ គរុករេយ្យុំ មានេយ្យុំ បូជេយ្យុន្តិ។ ឋានំ ខោ បនេតំ អាវុសោ វិជ្ជតិ យំ អញ្ញំ ភិក្ខុំ ឧបាសិកាយោ សក្ករេយ្យុំ គរុករេយ្យុំ មានេយ្យុំ បូជេយ្យុំ ន តំ ភិក្ខុំ ឧបាសិកាយោ សក្ករេយ្យុំ គរុករេយ្យុំ មានេយ្យុំ បូជេយ្យុំ។ អញ្ញំ ភិក្ខុំ ឧបាសិកាយោ សក្ករោន្តិ គរុករោន្តិ មានេន្តិ បូជេន្តិ ន មំ ឧបាសិកាយោ សក្ករោន្តិ គរុករោន្តិ មានេន្តិ បូជេន្តីតិ ឥតិ សោ កុបិតោ ហោតិ អប្បតីតោ។ យោ ចេវ ខោ អាវុសោ កោបោ យោ ច អប្បច្ចយោ ឧភយមេតំ អង្គណំ។

[៦៨] ឋានំ ខោ បនេតំ អាវុសោ វិជ្ជតិ យំ ឥធេកច្ចស្ស ភិក្ខុនោ ឯវំ ឥច្ឆា ឧប្បជ្ជេយ្យ អហោ វត អហមេវ លាភី អស្សំ បណីតានំ ចីវរានំ ន អញ្ញោ ភិក្ខុ លាភី អស្ស បណីតានំ ចីវរានន្តិ។ ឋានំ ខោ បនេតំ អាវុសោ វិជ្ជតិ យំ អញ្ញោ ភិក្ខុ លាភី អស្ស បណីតានំ ចីវរានំ ន សោ ភិក្ខុ លាភី អស្ស បណីតានំ ចីវរានំ។ អញ្ញោ ភិក្ខុ លាភី បណីតានំ ចីវរានំ នាហំ លាភី បណីតានំ ចីវរានន្តិ ឥតិ សោ កុបិតោ ហោតិ អប្បតីតោ។ យោ ចេវ ខោ អាវុសោ កោបោ យោ ច អប្បច្ចយោ ឧភយមេតំ អង្គណំ។

[៦៩] ឋានំ ខោ បនេតំ អាវុសោ វិជ្ជតិ យំ ឥធេកច្ចស្ស ភិក្ខុនោ ឯវំ ឥច្ឆា ឧប្បជ្ជេយ្យ អហោ វត អហមេវ លាភី អស្សំ បណីតានំ បិណ្ឌបាតានំ។បេ។ បណីតានំ សេនាសនានំ។បេ។ បណីតានំ គិលានប្បច្ចយភេសជ្ជបរិក្ខារានំ ន អញ្ញោ ភិក្ខុ លាភី អស្ស បណីតានំ គិលានប្បច្ចយភេសជ្ជបរិក្ខារានន្តិ។ ឋានំ ខោ បនេតំ អាវុសោ វិជ្ជតិ យំ អញ្ញោ ភិក្ខុ លាភី អស្ស បណីតានំ គិលានប្បច្ចយភេសជ្ជបរិក្ខារានំ ន សោ ភិក្ខុ លាភី អស្ស បណីតានំ គិលានប្បច្ចយភេសជ្ជបរិក្ខារានំ។ អញ្ញោ ភិក្ខុ លាភី បណីតានំ គិលានប្បច្ចយភេសជ្ជបរិក្ខារានំ នាហំ លាភី បណីតានំ គិលានប្បច្ចយភេសជ្ជបរិក្ខារានន្តិ ឥតិ សោ កុបិតោ ហោតិ អប្បតីតោ។ យោ ចេវ ខោ អាវុសោ កោបោ យោ ច អប្បច្ចយោ ឧភយមេតំ អង្គណំ។ ឥមេសំ ខោ ឯតំ អាវុសោ បាបកានំ អកុសលានំ ឥច្ឆាវចរានំ អធិវចនំ យទិទំ អង្គណន្តិ។

[៧០] យស្ស កស្សចិ អាវុសោ ភិក្ខុនោ ឥមេ បាបកា អកុសលា ឥច្ឆាវចរា អប្បហីនា ទិស្សន្តិ ចេវ សុយ្យន្តិ ច។ កិញ្ចាបិ សោ ហោតិ អារញ្ញកោ បន្តសេនាសនោ បិណ្ឌបាតិកោ សបទានចារី បំសុកុលិកោ [ឱ.ម. បំសុកូលិកោ។] លូខចីវរធរោ អថខោ នំ សព្រហ្មចារី នេវ [ឱ. ន។ ម. ន ចេវ។] សក្ករោន្តិ ន គរុករោន្តិ ន មានេន្តិ ន បូជេន្តិ។ តំ កិស្ស ហេតុ។ តេ ហិ តស្ស អាយស្មតោ បាបកា អកុសលា ឥច្ឆាវចរា អប្បហីនា ទិស្សន្តិ ចេវ សុយ្យន្តិ ច។ សេយ្យថាបិ អាវុសោ កំសបាតិ អាភតា អាបណា វា កម្មារកុលា វា បរិសុទ្ធា បរិយោទាតា។ តមេនំ សាមិកា អហិកុណបំ វា កុក្កុរកុណបំ វា មនុស្សកុណបំ វា រចយិត្វា អញ្ញិស្សា កំសបាតិយា បដិកុជ្ជិត្វា អន្តរាបណំ បដិបជ្ជេយ្យុំ។ តមេនំ ជនោ ទិស្វា ឯវំ វទេយ្យ អម្ភោ កិមេវិទំ ហរិយ្យតិ ជញ្ញំ ជញ្ញំ [ឱ.ម. ជញ្ញជញ្ញំ។] វិយាតិ។ តមេនំ ឧដ្ឋហិត្វា អបាបុរិត្វា ឱលោកេយ្យ តស្ស សហទស្សនេន អមនាបតា ច សណ្ឋហេយ្យ បាដិក្កូល្យតា ច សណ្ឋហេយ្យ ជេគុច្ឆតា ច សណ្ឋហេយ្យ ជិឃច្ឆិតានម្បិ ន ភោត្តុកម្យតា អស្ស បគេវ សុហិតានំ ឯវមេវ ខោ អាវុសោ យស្ស កស្សចិ ភិក្ខុនោ ឥមេ បាបកា អកុសលា ឥច្ឆាវចរា អប្បហីនា ទិស្សន្តិ ចេវ សុយ្យន្តិ ច។ កិញ្ចាបិ សោ ហោតិ អារញ្ញកោ បន្តសេនាសនោ បិណ្ឌបាតិកោ សបទានចារី បំសុកុលិកោ លូខចីវរធរោ អថ ខោ នំ សព្រហ្មចារី នេវ សក្ករោន្តិ ន គរុករោន្តិ ន មានេន្តិ ន បូជេន្តិ។ តំ កិស្ស ហេតុ។ តេ ហិ តស្ស អាយស្មតោ បាបកោ អកុសលា ឥច្ឆាវចរា អប្បហីនា ទិស្សន្តិ ចេវ សុយ្យន្តិ ច។

[៧១] យស្ស កស្សចិ អាវុសោ ភិក្ខុនោ ឥមេ បាបកា អកុសលា ឥច្ឆាវចរា បហីនា ទិស្សន្តិ ចេវ សុយ្យន្តិ ច។ កិញ្ចាបិ សោ ហោតិ គាមន្តវិហារី នេមន្តនិកោ គហបតិចីវរធរោ អថ ខោ នំ សព្រហ្មចារី សក្ករោន្តិ គរុករោន្តិ មានេន្តិ បូជេន្តិ។ តំ កិស្ស ហេតុ។ តេ ហិ តស្ស អាយស្មតោ បាបកា អកុសលា ឥច្ឆាវចរា បហីនា ទិស្សន្តិ ចេវ សុយ្យន្តិ ច។ សេយ្យថាបិ អាវុសោ កំសបាតិ អាភតា អាបណា វា កម្មារកុលា វា បរិសុទ្ធា បរិយោទាតា។ តមេនំ សាមិកា សាលីនំ ឱទនំ វិចិតកាឡកំ អនេកសូបំ អនេកព្យញ្ជនំ រចយិត្វា អញ្ញិស្សា កំសបាតិយា បដិកុជ្ជិត្វា អន្តរាបណំ បដិបជ្ជេយ្យុំ។ តមេនំ ជនោ ទិស្វា ឯវំ វទេយ្យ អម្ភោ កិមេវិទំ ហរិយ្យតិ ជញ្ញំ ជញ្ញំ វិយាតិ។ តមេនំ ឧដ្ឋហិត្វា អបាបុរិត្វា ឱលោកេយ្យ តស្ស សហ ទស្សនេន មនាបតា ច សណ្ឋហេយ្យ អប្បដិក្កូល្យតា ច សណ្ឋហេយ្យ អជេគុច្ឆតា ច សណ្ឋហេយ្យ សុហិតានម្បិ ភោត្តុកម្យតា អស្ស បគេវ ជិឃច្ឆិតានំ ឯវមេវ ខោ អាវុសោ យស្ស កស្សចិ ភិក្ខុនោ ឥមេ បាបកា អកុសលា ឥច្ឆាវចរា បហីនា ទិស្សន្តិ ចេវ សុយ្យន្តិ ច។ កិញ្ចាបិ សោ ហោតិ គាមន្តវិហារី នេមន្តនិកោ គហបតិចីវរធរោ អថ ខោ នំ សព្រហ្មចារី សក្ករោន្តិ គរុករោន្តិ មានេន្តិ បូជេន្តិ។ តំ កិស្ស ហេតុ។ តេ ហិ តស្ស អាយស្មតោ បាបកា អកុសលា ឥច្ឆាវចរា បហីនា ទិស្សន្តិ ចេវ សុយ្យន្តិ ចាតិ។

[៧២] ឯវំ វុត្តេ អាយស្មា មហាមោគ្គល្លានោ អាយស្មន្តំ សារីបុត្តំ ឯតទវោច ឧបមា មំ អាវុសោ សារីបុត្ត បដិភាតីតិ។ បដិភាតុ តំ អាវុសោ មោគ្គល្លានាតិ។ ឯកមិទាហំ អាវុសោ សមយំ រាជគហេ វិហរាមិ គិរិព្វជេ។ អថ ខ្វាហំ អាវុសោ បុព្វណ្ហសមយំ និវាសេត្វា បត្តចីវរមាទាយ រាជគហំ បិណ្ឌាយ បាវិសឹ។ តេន ខោ បន សមយេន សមីតិ យានការបុត្តោ រថស្ស នេមឹ តច្ឆេតិ [ឱ. គច្ឆតិ។]។ តមេនំ បណ្ឌុបុត្តោ អាជីវកោ បុរាណយានការបុត្តោ បច្ចុបដ្ឋិតោ ហោតិ។ អថខោ អាវុសោ បណ្ឌុបុត្តស្ស អាជីវកស្ស បុរាណយានការបុត្តស្ស ឯវំ ចេតសោ បរិវិតក្កោ ឧទបាទិ អហោ វតាយំ សមីតិ យានការបុត្តោ ឥមិស្សា នេមិយា ឥមញ្ច វង្កំ ឥមញ្ច ជិម្ហំ ឥមញ្ច ទោសំ តច្ឆេយ្យ ឯវាយំ នេមិ អបគតវង្កា អបគតជិម្ហា អបគតទោសា សុទ្ធា អស្ស សារេ [ឱ. សុទ្ធាស្ស សារេ។ ម. សុទ្ធា សារេ។] បតិដ្ឋិតាតិ។ យថា យថា ខោ អាវុសោ បណ្ឌុបុត្តស្ស អាជីវកស្ស បុរាណយានការបុត្តស្ស ចេតសោ បរិវិតក្កោ [ឱ. បរិវិតក្កិតំ។] ហោតិ តថា តថា សមីតិ យានការបុត្តោ តស្សា នេមិយា តញ្ច វង្កំ តញ្ច ជិម្ហំ តញ្ច ទោសំ តច្ឆតិ។ អថខោ អាវុសោ បណ្ឌុបុត្តោ អាជីវកោ បុរាណយានការបុត្តោ អត្តមនោ អត្តមនវាចំ និច្ឆារេសិ ហទយា ហទយំ មញ្ញេ អញ្ញាយ តច្ឆតីតិ។ ឯវមេវ ខោ អាវុសោ យេ តេ បុគ្គលា អស្សទ្ធា ជីវិកត្ថា ន សទ្ធា អគារស្មា អនគារិយំ បព្វជិតា សឋា មាយាវិនោ កេដុភិនោ ឧទ្ធតា ឧន្នឡា ចបលា មុខរា វិកិណ្ណវាចា ឥន្ទ្រិយេសុ អគុត្តទ្វារា ភោជនេ អមត្តញ្ញុនោ ជាគរិយំ អននុយុត្តា សាមញ្ញេ អនបេក្ខវន្តោ សិក្ខាយ ន តិព្វគារវា ពាហុលិកា សាថិលិកា ឱក្កមនេ បុព្វង្គមា បវិវេកេ និក្ខិត្តធុរា កុសីតា ហីនវីរិយា មុដ្ឋស្សតី អសម្បជានា អសមាហិតា វិព្ភន្តចិត្តា ទុប្បញ្ញា ឯលមូគា តេសំ អាយស្មា សារីបុត្តោ ឥមិនា ធម្មបរិយាយេន ហទយា ហទយំ មញ្ញេ អញ្ញាយ តច្ឆតិ។ យេ បន តេ កុលបុត្តា សទ្ធា អគារស្មា អនគារិយំ បព្វជិតា អសឋា អមាយាវិនោ អកេដុភិនោ អនុទ្ធតា អនុន្នឡា អចបលា អមុខរា អវិកិណ្ណវាចា ឥន្ទ្រិយេសុ គុត្តទ្វារា ភោជនេ មត្តញ្ញុនោ ជាគរិយំ អនុយុត្តា សាមញ្ញេ អបេក្ខវន្តោ សិក្ខាយ តិព្វគារវា ន ពាហុលិកា ន សាថិលិកា ឱក្កមនេ និក្ខិត្តធុរា បវិវេកេ បុព្វង្គមា អារទ្ធវីរិយា បហិតត្តា ឧបដ្ឋិតស្សតី សម្បជានា សមាហិតា ឯកគ្គចិត្តា បញ្ញវន្តោ អនេលមូគា តេ អាយស្មតោ សារីបុត្តស្ស ឥមំ ធម្មបរិយាយំ សុត្វា បិវន្តិ មញ្ញេ ឃសន្តិ មញ្ញេ វចសា ចេវ មនសា ច សាធុ វត ភោ សព្រហ្មចារី អកុសលា វុដ្ឋាបេត្វា កុសលេ បតិដ្ឋាបេតីតិ [ឱ.ម. បតិដ្ឋាបេតិ។]។ សេយ្យថាបិ អាវុសោ ឥត្ថី វា បុរិសោ វា ទហរោ យុវា មណ្ឌនកជាតិកោ សីសន្នហាតោ [ឱ. សីសំ នហាតោ។] ឧប្បលមាលំ វា វស្សិកមាលំ វា អធិមុត្តកមាលំ វា លភិត្វា ឧភោហិ ហត្ថេហិ បដិគ្គហេត្វា ឧត្តមង្គេ សិរស្មឹ បតិដ្ឋបេយ្យ ឯវមេវ ខោ អាវុសោ យេ តេ កុលបុត្តា សទ្ធា អគារស្មា អនគារិយំ បព្វជិត្វា អសឋា អមាយាវិនោ អកេដុភិនោ អនុទ្ធតា អនុន្នឡា អចបលា អមុខរា អវិកិណ្ណវាចា ឥន្ទ្រិយេសុ គុត្តទ្វារា ភោជនេ មត្តញ្ញុនោ ជាគរិយំ អនុយុត្តា សាមញ្ញេ អបេក្ខវន្តោ សិក្ខាយ តិព្វគារវា ន ពាហុល្លិកា ន សាថិលិកា ឱក្កមនេ និក្ខិត្តធុរា បវិវេកេ បុព្វង្គមា អារទ្ធវីរិយា បហិតត្តា ឧបដ្ឋិតស្សតី សម្បជានា សមាហិតា ឯកគ្គចិត្តា បញ្ញវន្តោ អនេលមូគា តេ អាយស្មតោ សារីបុត្តស្ស ឥមំ ធម្មបរិយាយំ សុត្វា បិវន្តិ មញ្ញេ ឃសន្តិ មញ្ញេ វចសា ចេវ មនសា ច សាធុ វត ភោ សព្រហ្មចារី អកុសលា វុដ្ឋាបេត្វា កុសលេ បតិដ្ឋាបេតីតិ។ ឥតិហ តេ ឧភោ មហានាគា អញ្ញមញ្ញស្ស សុភាសិតំ សមនុមោទឹសូតិ។

អនង្គណសុត្តំ បញ្ចមំ និដ្ឋិតំ។

ឆដ្ឋំ អាកង្ខេយ្យសុត្តំ

[៧៣] ឯវមេ្ម សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។ ភគវា ឯតទវោច សម្បន្នសីលា ភិក្ខវេ វិហរថ សម្បន្នបាតិមោក្ខា បាតិមោក្ខសំវរសំវុតា វិហរថ អាចារគោចរសម្បន្នា អណុមត្តេសុ វជ្ជេសុ ភយទស្សាវិនោ [ឱ.ម. ភយទស្សាវី។] សមាទាយ សិក្ខថ សិក្ខាបទេសុ។

[៧៤] អាកង្ខេយ្យ ចេ ភិក្ខវេ ភិក្ខុ សព្រហ្មចារីនំ បិយោ ច អស្សំ មនាបោ ច [ឱ. ចសទ្ទោ ន ទិស្សតិ។] គរុ ច [ឱ. ចសទ្ទោ ន ទិស្សតិ។] ភាវនីយោ ចាតិ សីលេស្វេវស្ស បរិបូរការី អជ្ឈត្តញ្ចេតោសមថមនុយុត្តោ អនិរាកតជ្ឈានោ វិបស្សនាយ សមន្នាគតោ ព្រូហេតា សុញ្ញាគារានំ។

[៧៥] អាកង្ខេយ្យ ចេ ភិក្ខវេ ភិក្ខុ លាភី អស្សំ ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារានន្តិ សីលេស្វេវស្ស បរិបូរការី អជ្ឈត្តញ្ចេតោសមថមនុយុត្តោ អនិរាកតជ្ឈានោ វិបស្សនាយ សមន្នាគតោ ព្រូហេតា សុញ្ញាគារានំ។

[៧៦] អាកង្ខេយ្យ ចេ ភិក្ខវេ ភិក្ខុ យេសាហំ ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារំ បរិភុញ្ជាមិ តេសន្តេ [ឱ.ម. តេសំ តេ។] ការា មហប្ផលា អស្សុ មហានិសំសាតិ សីលេស្វេវស្ស បរិបូរការី អជ្ឈត្តញ្ចេតោសមថមនុយុត្តោ អនិរាកតជ្ឈានោ វិបស្សនាយ សមន្នាគតោ ព្រូហេតា សុញ្ញាគារានំ។

[៧៧] អាកង្ខេយ្យ ចេ ភិក្ខវេ ភិក្ខុ យេ មេ [ម. មំ។] ញាតិសាលោហិតា បេតា កាលកតា បសន្នចិត្តា អនុស្សរន្តិ តេសន្តំ [ឱ. តេសំ តំ។] មហប្ផលំ អស្ស មហានិសំសន្តិ សីលេស្វេវស្ស បរិបូរការី អជ្ឈត្តញ្ចេតោសមថមនុយុត្តោ អនិរាកតជ្ឈានោ វិបស្សនាយ សមន្នាគតោ ព្រូហេតា សុញ្ញាគារានំ។

[៧៨] អាកង្ខេយ្យ ចេ ភិក្ខវេ ភិក្ខុ អរតិរតិសហោ អស្សំ ន ច មំ អរតិ សហេយ្យ ឧប្បន្នំ អរតឹ អភិភុយ្យ អភិភុយ្យ វិហរេយ្យន្តិ សីលេស្វេវស្ស បរិបូរការី។បេ។ ព្រូហេតា សុញ្ញាគារានំ។

[៧៩] អាកង្ខេយ្យ ចេ ភិក្ខវេ ភិក្ខុ ភយភេរវសហោ អស្សំ ន ច មំ ភយភេរវំ សហេយ្យ ឧប្បន្នំ ភយភេរវំ អភិភុយ្យ អភិភុយ្យ វិហរេយ្យន្តិ សីលេស្វេវស្ស បរិបូរការី។បេ។ ព្រូហេតា សុញ្ញាគារានំ។

[៨០] អាកង្ខេយ្យ ចេ ភិក្ខវេ ភិក្ខុ ចតុន្នំ ឈានានំ អាភិចេតសិកានំ ទិដ្ឋធម្មសុខវិហារានំ និកាមលាភី អស្សំ អកិច្ឆលាភី អកសិរលាភីតិ សីលេស្វេវស្ស បរិបូរការី។បេ។ ព្រូហេតា សុញ្ញាគារានំ។

[៨១] អាកង្ខេយ្យ ចេ ភិក្ខវេ ភិក្ខុ យេ តេ សន្តា វិមោក្ខា អតិក្កម្ម រូបេ អារុប្បា តេ កាយេន ផុសិត្វា វិហរេយ្យន្តិ សីលេស្វេវស្ស បរិបូរការី។បេ។ ព្រូហេតា សុញ្ញាគារានំ។

[៨២] អាកង្ខេយ្យ ចេ ភិក្ខវេ ភិក្ខុ តិណ្ណំ សំយោជនានំ បរិក្ខយា សោតាបន្នោ អស្សំ អវិនិបាតធម្មោ និយតោ សម្ពោធិបរាយនោតិ សីលេស្វេវស្ស បរិបូរការី។បេ។ ព្រូហេតា សុញ្ញាគារានំ។

[៨៣] អាកង្ខេយ្យ ចេ ភិក្ខវេ ភិក្ខុ តិណ្ណំ សំយោជនានំ បរិក្ខយា រាគទោសមោហានំ តនុត្តា សកទាគាមី អស្សំ សកិទេវ ឥមំ លោកំ អាគន្ត្វា ទុក្ខស្សន្តំ ករេយ្យន្តិ សីលេស្វេវស្ស បរិបូរការី អជ្ឈត្តញ្ចេតោសមថមនុយុត្តោ អនិរាកតជ្ឈានោ វិបស្សនាយ សមន្នាគតោ ព្រូហេតា សុញ្ញាគារានំ។

[៨៤] អាកង្ខេយ្យ ចេ ភិក្ខវេ ភិក្ខុ បញ្ចន្នំ ឱរម្ភាគិយានំ សំយោជនានំ បរិក្ខយា ឱបបាតិកោ អស្សំ តត្ថ បរិនិព្វាយី អនាវត្តិធម្មោ តស្មា លោកាតិ សីលេស្វេវស្ស បរិបូរការី។បេ។ ព្រូហេតា សុញ្ញាគារានំ។

[៨៥] អាកង្ខេយ្យ ចេ ភិក្ខវេ ភិក្ខុ អនេកវិហិតំ ឥទ្ធិវិធំ បច្ចនុភវេយ្យំ ឯកោបិ ហុត្វា ពហុធា អស្សំ ពហុធាបិ ហុត្វា ឯកោ អស្សំ អាវិភាវំ តិរោភាវំ តិរោកុឌ្ឌំ តិរោបាការំ តិរោបព្វតំ អសជ្ជមានោ គច្ឆេយ្យំ សេយ្យថាបិ អាកាសេ បឋវិយាបិ ឧម្មុជ្ជនិមុជ្ជំ ករេយ្យំ សេយ្យថាបិ ឧទកេ ឧទកេបិ អភិជ្ជមានេ គច្ឆេយ្យំ សេយ្យថាបិ បឋវិយំ អាកាសេបិ បល្លង្កេន កប្បេយ្យំ សេយ្យថាបិ បក្ខី សកុណោ ឥមេបិ ចន្ទិមសុរិយេ ឯវំមហិទ្ធិកេ ឯវំមហានុភាវេ បាណិនា បរាមសេយ្យំ [ឱ. បរិមសេយ្យំ។] បរិមជ្ជេយ្យំ យាវ ព្រហ្មលោកាបិ កាយេន វសំ វត្តេយ្យន្តិ សីលេស្វេវស្ស បរិបូរការី។បេ។ ព្រូហេតា សុញ្ញាគារានំ។

[៨៦] អាកង្ខេយ្យ ចេ ភិក្ខវេ ភិក្ខុ ទិព្វាយ សោតធាតុយា វិសុទ្ធាយ អតិក្កន្តមានុសិកាយ ឧភោ សទ្ទេ សុណេយ្យំ ទិព្វេ ច មានុសេ ច យេ ទូរេ សន្តិកេ ចាតិ សីលេស្វេវស្ស បរិបូរការី។បេ។ ព្រូហេតា សុញ្ញាគារានំ។

[៨៧] អាកង្ខេយ្យ ចេ ភិក្ខវេ ភិក្ខុ បរសត្តានំ បរបុគ្គលានំ ចេតសា ចេតោ បរិច្ច ជានេយ្យំ សរាគំ វា ចិត្តំ សរាគំ ចិត្តន្តិ បជានេយ្យំ វីតរាគំ វា ចិត្តំ វីតរាគំ ចិត្តន្តិ បជានេយ្យំ សទោសំ វា ចិត្តំ សទោសំ ចិត្តន្តិ បជានេយ្យំ វីតទោសំ វា ចិត្តំ វីតទោសំ ចិត្តន្តិ បជានេយ្យំ សមោហំ វា ចិត្តំ សមោហំ ចិត្តន្តិ បជានេយ្យំ វីតមោហំ វា ចិត្តំ វីតមោហំ ចិត្តន្តិ បជានេយ្យំ សង្ខិត្តំ វា ចិត្តំ សង្ខិត្តំ ចិត្តន្តិ បជានេយ្យំ វិក្ខិត្តំ វា ចិត្តំ វិក្ខិត្តំ ចិត្តន្តិ បជានេយ្យំ មហគ្គតំ វា ចិត្តំ មហគ្គតំ ចិត្តន្តិ បជានេយ្យំ អមហគ្គតំ វា ចិត្តំ អមហគ្គតំ ចិត្តន្តិ បជានេយ្យំ សឧត្តរំ វា ចិត្តំ សឧត្តរំ ចិត្តន្តិ បជានេយ្យំ អនុត្តរំ វា ចិត្តំ អនុត្តរំ ចិត្តន្តិ បជានេយ្យំ សមាហិតំ វា ចិត្តំ សមាហិតំ ចិត្តន្តិ បជានេយ្យំ អសមាហិតំ វា ចិត្តំ អសមាហិតំ ចិត្តន្តិ បជានេយ្យំ វិមុត្តំ វា ចិត្តំ វិមុត្តំ ចិត្តន្តិ បជានេយ្យំ អវិមុត្តំ វា ចិត្តំ អវិមុត្តំ ចិត្តន្តិ បជានេយ្យន្តិ សីលេស្វេវស្ស បរិបូរការី។បេ។ ព្រូហេតា សុញ្ញាគារានំ។

[៨៨] អាកង្ខេយ្យ ចេ ភិក្ខវេ ភិក្ខុ អនេកវិហិតំ បុព្វេនិវាសំ អនុស្សរេយ្យំ សេយ្យថីទំ ឯកម្បិ ជាតឹ ទ្វេបិ ជាតិយោ តិស្សោបិ ជាតិយោ ចតស្សោបិ ជាតិយោ បញ្ចបិ ជាតិយោ ទសបិ ជាតិយោ វីសម្បិ ជាតិយោ តឹសម្បិ ជាតិយោ ចត្តាឡីសម្បិ ជាតិយោ បញ្ញាសម្បិ ជាតិយោ ជាតិសតម្បិ ជាតិសហស្សម្បិ ជាតិសតសហស្សម្បិ អនេកេបិ សំវដ្ដកប្បេ អនេកេបិ វិវដ្ដកប្បេ អនេកេបិ សំវដ្ដវិវដ្ដកប្បេ អមុត្រាសឹ ឯវំនាមោ ឯវំគោត្តោ ឯវំវណ្ណោ ឯវមាហារោ ឯវំសុខទុក្ខប្បដិសំវេទី ឯវមាយុបរិយន្តោ សោ តតោ ចុតោ អមុត្រ ឧទបាទឹ តត្រាបាសឹ ឯវំនាមោ ឯវំគោត្តោ ឯវំវណ្ណោ ឯវមាហារោ ឯវំសុខទុក្ខប្បដិសំវេទី ឯវមាយុបរិយន្តោ សោ តតោ ចុតោ ឥធូបបន្នោតិ ឥតិ សាការំ សឧទ្ទេសំ អនេកវិហិតំ បុព្វេនិវាសំ អនុស្សរេយ្យន្តិ សីលេស្វេវស្ស បរិបូរការី។បេ។ ព្រូហេតា សុញ្ញាគារានំ។

[៨៩] អាកង្ខេយ្យ ចេ ភិក្ខវេ ភិក្ខុ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សេយ្យំ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ យថាកម្មូបគេ សត្តេ បជានេយ្យំ ឥមេ វត ភោន្តោ សត្តា កាយទុច្ចរិតេន សមន្នាគតា វចីទុច្ចរិតេន សមន្នាគតា មនោទុច្ចរិតេន សមន្នាគតា អរិយានំ ឧបវាទកា មិច្ឆាទិដ្ឋិកា មិច្ឆាទិដ្ឋិកម្មសមាទានា តេ កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបន្នា ឥមេ វា បន ភោន្តោ សត្តា កាយសុចរិតេន សមន្នាគតា វចីសុចរិតេន សមន្នាគតា មនោសុចរិតេន សមន្នាគតា អរិយានំ អនុបវាទកា សម្មាទិដ្ឋិកា សម្មាទិដ្ឋិកម្មសមាទានា តេ កាយស្ស ភេទា បរម្មរណា សុគតឹ សគ្គំ លោកំ ឧបបន្នាតិ ឥតិ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សេយ្យំ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ យថាកម្មូបគេ សត្តេ បជានេយ្យន្តិ សីលេស្វេវស្ស បរិបូរការី អជ្ឈត្តញ្ចេតោសមថមនុយុត្តោ អនិរាកតជ្ឈានោ វិបស្សនាយ សមន្នាគតោ ព្រូហេតា សុញ្ញាគារានំ។

[៩០] អាកង្ខេយ្យ ចេ ភិក្ខវេ ភិក្ខុ អាសវានំ ខយា អនាសវំ ចេតោវិមុត្តឹ បញ្ញាវិមុត្តឹ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរេយ្យន្តិ សីលេស្វេវស្ស បរិបូរការី អជ្ឈត្តញ្ចេតោសមថមនុយុត្តោ អនិរាកតជ្ឈានោ វិបស្សនាយ សមន្នាគតោ ព្រូហេតា សុញ្ញាគារានំ។ សម្បន្នសីលា ភិក្ខវេ វិហរថ សម្បន្នបាតិមោក្ខា បាតិមោក្ខសំវរសំវុតា វិហរថ អាចារគោចរសម្បន្នា អណុមត្តេសុ វជ្ជេសុ ភយទស្សាវី សមាទាយ សិក្ខថ សិក្ខាបទេសូតិ។ ឥតិ យន្តំ វុត្តំ ឥទមេតំ បដិច្ច វុត្តន្តិ។ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទុន្តិ។

អាកង្ខេយ្យសុត្តំ ឆដ្ឋំ និដ្ឋិតំ [ឱ.ម. និដ្ឋិតន្តិ ន ទិស្សតិ។]។

សត្តមំ វត្ថូបមសុត្តំ [ឆដ្ឋ. វត្ថសុត្តំ]

[៩១] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។

[៩២] ភគវា ឯតទវោច សេយ្យថាបិ ភិក្ខវេ វត្ថំ សង្កិលិដ្ឋំ មលគ្គហិតំ តមេនំ រជកោ យស្មឹ យស្មឹ រង្គជាតេ ឧបសំហរេយ្យ យទិ នីលកាយ យទិ បីតកាយ យទិ លោហិតកាយ យទិ មញ្ជេដ្ឋិកាយ [ឱ. មជ្ជេដ្ឋកាយ។ ម. មជ្ជិដ្ឋកាយ។] ទុរត្តវណ្ណមេវស្ស [ឱ. ទូរត្តវណ្ណមេវស្ស។] អបរិសុទ្ធវណ្ណមេវស្ស។ តំ កិស្ស ហេតុ។ អប្បរិសុទ្ធត្តា ភិក្ខវេ វត្ថស្ស ឯវមេវ ខោ ភិក្ខវេ ចិត្តេ សំកិលិដ្ឋេ ទុគ្គតិ បាដិកង្ខា។ សេយ្យថាបិ ភិក្ខវេ វត្ថំ បរិសុទ្ធំ បរិយោទាតំ តមេនំ រជកោ យស្មឹ យស្មឹ រង្គជាតេ ឧបសំហរេយ្យ យទិ នីលកាយ យទិ បីតកាយ យទិ លោហិតកាយ យទិ មញ្ជេដ្ឋិកាយ សុរត្តវណ្ណមេវស្ស បរិសុទ្ធវណ្ណមេវស្ស។ តំ កិស្ស ហេតុ។ បរិសុទ្ធត្តា ភិក្ខវេ វត្ថស្ស ឯវមេវ ខោ ភិក្ខវេ ចិត្តេ អសង្កិលិដ្ឋេ សុគតិ បាដិកង្ខា។

[៩៣] កតមេ ច ភិក្ខវេ ចិត្តស្ស ឧបក្កិលេសា។ អភិជ្ឈាវិសមលោភោ ចិត្តស្ស ឧបក្កិលេសោ ព្យាបាទោ ចិត្តស្ស ឧបក្កិលេសោ កោធោ ចិត្តស្ស ឧបក្កិលេសោ ឧបនាហោ ចិត្តស្ស ឧបក្កិលេសោ មក្ខោ ចិត្តស្ស ឧបក្កិលេសោ បឡាសោ ចិត្តស្ស ឧបក្កិលេសោ ឥស្សា ចិត្តស្ស ឧបក្កិលេសោ មច្ឆរិយំ ចិត្តស្ស ឧបក្កិលេសោ មាយា ចិត្តស្ស ឧបក្កិលេសោ សាឋេយ្យំ ចិត្តស្ស ឧបក្កិលេសោ ថម្ភោ ចិត្តស្ស ឧបក្កិលេសោ សារម្ភោ ចិត្តស្ស ឧបក្កិលេសោ មានោ ចិត្តស្ស ឧបក្កិលេសោ អតិមានោ ចិត្តស្ស ឧបក្កិលេសោ មទោ ចិត្តស្ស ឧបក្កិលេសោ បមាទោ ចិត្តស្ស ឧបក្កិលេសោ។

[៩៤] ស ខោ សោ [ម. សេខោ សោ។] ភិក្ខវេ ភិក្ខុ អភិជ្ឈាវិសមលោភោ ចិត្តស្ស ឧបក្កិលេសោតិ ឥតិ វិទិត្វា អភិជ្ឈាវិសមលោភំ ចិត្តស្ស ឧបក្កិលេសំ បជហតិ។ ព្យាបាទោ ចិត្តស្ស ឧបក្កិលេសោតិ ឥតិ វិទិត្វា ព្យាបាទំ ចិត្តស្ស ឧបក្កិលេសំ បជហតិ។ កោធោ ចិត្តស្ស ឧបក្កិលេសោតិ ឥតិ វិទិត្វា កោធំ ចិត្តស្ស ឧបក្កិលេសំ បជហតិ។ ឧបនាហោ ចិត្តស្ស ឧបក្កិលេសោតិ ឥតិ វិទិត្វា ឧបនាហំ ចិត្តស្ស ឧបក្កិលេសំ បជហតិ។ មក្ខោ ចិត្តស្ស ឧបក្កិលេសោតិ ឥតិ វិទិត្វា មក្ខំ ចិត្តស្ស ឧបក្កិលេសំ បជហតិ។ បឡាសោ ចិត្តស្ស ឧបក្កិលេសោតិ ឥតិ វិទិត្វា បឡាសំ ចិត្តស្ស ឧបក្កិលេសំ បជហតិ។ ឥស្សា ចិត្តស្ស ឧបក្កិលេសោតិ ឥតិ វិទិត្វា ឥស្សំ ចិត្តស្ស ឧបក្កិលេសំ បជហតិ។ មច្ឆរិយំ ចិត្តស្ស ឧបក្កិលេសោតិ ឥតិ វិទិត្វា មច្ឆរិយំ ចិត្តស្ស ឧបក្កិលេសំ បជហតិ។ មាយា ចិត្តស្ស ឧបក្កិលេសោតិ ឥតិ វិទិត្វា មាយំ ចិត្តស្ស ឧបក្កិលេសំ បជហតិ។ សាឋេយ្យំ ចិត្តស្ស ឧបក្កិលេសោតិ ឥតិ វិទិត្វា សាឋេយ្យំ ចិត្តស្ស ឧបក្កិលេសំ បជហតិ។ ថម្ភោ ចិត្តស្ស ឧបក្កិលេសោតិ ឥតិ វិទិត្វា ថម្ភំ ចិត្តស្ស ឧបក្កិលេសំ បជហតិ។ សារម្ភោ ចិត្តស្ស ឧបក្កិលេសោតិ ឥតិ វិទិត្វា សារម្ភំ ចិត្តស្ស ឧបក្កិលេសំ បជហតិ។ មានោ ចិត្តស្ស ឧបក្កិលេសោតិ ឥតិ វិទិត្វា មានំ ចិត្តស្ស ឧបក្កិលេសំ បជហតិ។ អតិមានោ ចិត្តស្ស ឧបក្កិលេសោតិ ឥតិ វិទិត្វា អតិមានំ ចិត្តស្ស ឧបក្កិលេសំ បជហតិ។ មទោ ចិត្តស្ស ឧបក្កិលេសោតិ ឥតិ វិទិត្វា មទំ ចិត្តស្ស ឧបក្កិលេសំ បជហតិ។ បមាទោ ចិត្តស្ស ឧបក្កិលេសោតិ ឥតិ វិទិត្វា បមាទំ ចិត្តស្ស ឧបក្កិលេសំ បជហតិ។

[៩៥] យតោ ខោ ភិក្ខវេ ភិក្ខុនោ អភិជ្ឈាវិសមលោភោ ចិត្តស្ស ឧបក្កិលេសោតិ ឥតិ វិទិត្វា អភិជ្ឈាវិសមលោភោ ចិត្តស្ស ឧបក្កិលេសោ បហីនោ ហោតិ។ ព្យាបាទោ ចិត្តស្ស ឧបក្កិលេសោតិ ឥតិ វិទិត្វា ព្យាបាទោ ចិត្តស្ស ឧបក្កិលេសោ បហីនោ ហោតិ។ កោធោ ចិត្តស្ស ឧបក្កិលេសោតិ ឥតិ វិទិត្វា កោធោ ចិត្តស្ស ឧបក្កិលេសោ បហីនោ ហោតិ។ ឧបនាហោ ចិត្តស្ស ឧបក្កិលេសោតិ ឥតិ វិទិត្វា ឧបនាហោ ចិត្តស្ស ឧបក្កិលេសោ បហីនោ ហោតិ។ មក្ខោ ចិត្តស្ស ឧបក្កិលេសោតិ ឥតិ វិទិត្វា មក្ខោ ចិត្តស្ស ឧបក្កិលេសោ បហីនោ ហោតិ។ បឡាសោ ចិត្តស្ស ឧបក្កិលេសោតិ ឥតិ វិទិត្វា បឡាសោ ចិត្តស្ស ឧបក្កិលេសោ បហីនោ ហោតិ។ ឥស្សា ចិត្តស្ស ឧបក្កិលេសោតិ ឥតិ វិទិត្វា ឥស្សា ចិត្តស្ស ឧបក្កិលេសោ បហីនោ ហោតិ។ មច្ឆរិយំ ចិត្តស្ស ឧបក្កិលេសោតិ ឥតិ វិទិត្វា មច្ឆរិយំ ចិត្តស្ស ឧបក្កិលេសោ បហីនោ ហោតិ។ មាយា ចិត្តស្ស ឧបក្កិលេសោតិ ឥតិ វិទិត្វា មាយា ចិត្តស្ស ឧបក្កិលេសោ បហីនោ ហោតិ។ សាឋេយ្យំ ចិត្តស្ស ឧបក្កិលេសោតិ ឥតិ វិទិត្វា សាឋេយ្យំ ចិត្តស្ស ឧបក្កិលេសោ បហីនោ ហោតិ។ ថម្ភោ ចិត្តស្ស ឧបក្កិលេសោតិ ឥតិ វិទិត្វា ថម្ភោ ចិត្តស្ស ឧបក្កិលេសោ បហីនោ ហោតិ។ សារម្ភោ ចិត្តស្ស ឧបក្កិលេសោតិ ឥតិ វិទិត្វា សារម្ភោ ចិត្តស្ស ឧបក្កិលេសោ បហីនោ ហោតិ។ មានោ ចិត្តស្ស ឧបក្កិលេសោតិ ឥតិ វិទិត្វា មានោ ចិត្តស្ស ឧបក្កិលេសោ បហីនោ ហោតិ។ អតិមានោ ចិត្តស្ស ឧបក្កិលេសោតិ ឥតិ វិទិត្វា អតិមានោ ចិត្តស្ស ឧបក្កិលេសោ បហីនោ ហោតិ។ មទោ ចិត្តស្ស ឧបក្កិលេសោតិ ឥតិ វិទិត្វា មទោ ចិត្តស្ស ឧបក្កិលេសោ បហីនោ ហោតិ។ បមាទោ ចិត្តស្ស ឧបក្កិលេសោតិ ឥតិ វិទិត្វា បមាទោ ចិត្តស្ស ឧបក្កិលេសោ បហីនោ ហោតិ។ សោ ពុទ្ធេ អវេច្ចប្បសាទេន សមន្នាគតោ ហោតិ ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវាតិ។ ធម្មេ អវេច្ចប្បសាទេន សមន្នាគតោ ហោតិ ស្វាក្ខាតោ ភគវតា ធម្មោ សន្ទិដ្ឋិកោ អកាលិកោ ឯហិបស្សិកោ ឱបនយិកោ បច្ចត្តំ វេទិតព្វោ វិញ្ញូហីតិ។ សង្ឃេ អវេច្ចប្បសាទេន សមន្នាគតោ ហោតិ សុបដិបន្នោ ភគវតោ សាវកសង្ឃោ ឧជុបដិបន្នោ ភគវតោ សាវកសង្ឃោ ញាយបដិបន្នោ ភគវតោ សាវកសង្ឃោ សាមីចិបដិបន្នោ ភគវតោ សាវកសង្ឃោ យទិទំ ចត្តារិ បុរិសយុគានិ អដ្ឋ បុរិសបុគ្គលា ឯស ភគវតោ សាវកសង្ឃោ អាហុនេយ្យោ បាហុនេយ្យោ ទក្ខិណេយ្យោ អញ្ជលិករណីយោ អនុត្តរំ បុញ្ញក្ខេត្តំ លោកស្សាតិ។ យតោធិ ខោ បនស្ស ចត្តំ ហោតិ វន្តំ មុត្តំ បហីនំ បដិនិស្សដ្ឋំ។ សោ ពុទ្ធេ អវេច្ចប្បសាទេន សមន្នាគតោម្ហីតិ លភតិ អត្ថវេទំ លភតិ ធម្មវេទំ លភតិ ធម្មូបសញ្ហិតំ បាមុជ្ជំ បមុទិតស្ស បីតិ ជាយតិ បីតិមនស្ស កាយោ បស្សម្ភតិ បស្សទ្ធកាយោ សុខំ វេទេតិ សុខិនោ ចិត្តំ សមាធិយតិ។ ធម្មេ។បេ។ សង្ឃេ អវេច្ចប្បសាទេន សមន្នាគតោម្ហីតិ លភតិ អត្ថវេទំ លភតិ ធម្មវេទំ លភតិ ធម្មូបសញ្ហិតំ បាមុជ្ជំ បមុទិតស្ស បីតិ ជាយតិ បីតិមនស្ស កាយោ បស្សម្ភតិ បស្សទ្ធកាយោ សុខំ វេទេតិ សុខិនោ ចិត្តំ សមាធិយតិ។ យតោធិ ខោ បន មេ ចត្តំ វន្តំ មុត្តំ បហីនំ បដិនិស្សដ្ឋន្តិ លភតិ អត្ថវេទំ លភតិ ធម្មវេទំ លភតិ ធម្មូបសញ្ហិតំ បាមុជ្ជំ បមុទិតស្ស បីតិ ជាយតិ បីតិមនស្ស កាយោ បស្សម្ភតិ បស្សទ្ធកាយោ សុខំ វេទេតិ សុខិនោ ចិត្តំ សមាធិយតិ។

[៩៦] ស ខោ សោ ភិក្ខវេ ភិក្ខុ ឯវំសីលោ ឯវំធម្មោ ឯវំបញ្ញោ សាលីនញ្ចេបិ បិណ្ឌបាតំ ភុញ្ជតិ វិចិតកាឡកំ អនេកសូបំ អនេកព្យញ្ជនំ នេវស្ស តំ ហោតិ អន្តរាយាយ។ សេយ្យថាបិ ភិក្ខវេ វត្ថំ សំកិលិដ្ឋំ មលគ្គហិតំ អច្ឆំ ឧទកំ [ម. អច្ឆោទកំ។] អាគម្ម បរិសុទ្ធំ ហោតិ បរិយោទាតំ ឧក្កាមុខំ វា បនាគម្ម ជាតរូបំ សុបរិសុទ្ធំ [ឱ.ម. បរិសុទ្ធំ។] ហោតិ បរិយោទាតំ ឯវមេវ ខោ ភិក្ខវេ ភិក្ខុ ឯវំសីលោ ឯវំធម្មោ ឯវំបញ្ញោ សាលីនញ្ចេបិ បិណ្ឌបាតំ ភុញ្ជតិ វិចិតកាឡកំ អនេកសូបំ អនេកព្យញ្ជនំ នេវស្ស តំ ហោតិ អន្តរាយាយ។

[៩៧] សោ មេត្តាសហគតេន ចេតសា ឯកំ ទិសំ ផរិត្វា វិហរតិ តថា ទុតិយំ តថា តតិយំ តថា ចតុត្ថំ។ ឥតិ ឧទ្ធមធោ តិរិយំ សព្វធិ សព្វត្ថតាយ សព្វាវន្តំ លោកំ មេត្តាសហគតេន ចេតសា វិបុលេន មហគ្គតេន អប្បមាណេន អវេរេន អព្យាបជ្ឈេន ផរិត្វា វិហរតិ។ ករុណាសហគតេន ចេតសា។បេ។ មុទិតាសហគតេន ចេតសា។បេ។ ឧបេក្ខាសហគតេន ចេតសា ឯកំ ទិសំ ផរិត្វា វិហរតិ តថា ទុតិយំ តថា តតិយំ តថា ចតុត្ថំ។ ឥតិ ឧទ្ធមធោ តិរិយំ សព្វធិ សព្វត្ថតាយ សព្វាវន្តំ លោកំ ឧបេក្ខាសហគតេន ចេតសា វិបុលេន មហគ្គតេន អប្បមាណេន អវេរេន អព្យាបជ្ឈេន ផរិត្វា វិហរតិ។ សោ អត្ថិ ឥទំ អត្ថិ ហីនំ អត្ថិ បណីតំ អត្ថិ ឥមស្ស សញ្ញាគតស្ស ឧត្តរឹ និស្សរណន្តិ បជានាតិ។ តស្ស ឯវំ ជានតោ ឯវំ បស្សតោ កាមាសវាបិ ចិត្តំ វិមុច្ចតិ ភវាសវាបិ ចិត្តំ វិមុច្ចតិ អវិជ្ជាសវាបិ ចិត្តំ វិមុច្ចតិ វិមុត្តស្មឹ វិមុត្តមីតិ ញាណំ ហោតិ ខីណា ជាតិ វុសិតំ ព្រហ្មចរិយំ កតំ ករណីយំ នាបរំ ឥត្ថត្តាយាតិ បជានាតិ។ អយំ វុច្ចតិ ភិក្ខវេ ភិក្ខុ សិនាតោ អន្តរេន សិនានេនាតិ។

[៩៨] តេន ខោ បន សមយេន សុន្ទរិកភារទ្វាជោ ព្រាហ្មណោ ភគវតោ អវិទូរេ និសិន្នោ ហោតិ។ អថខោ សុន្ទរិកភារទ្វាជោ ព្រាហ្មណោ ភគវន្តំ ឯតទវោច គច្ឆតិ បន ភវំ គោតមោ ពាហុកំ នទឹ សិនាយិតុន្តិ។ កឹ ព្រាហ្មណ ពាហុកាយ នទិយា កឹ ពាហុកា នទី ករិស្សតីតិ។ លោកសម្មតា [ឱ. មោក្ខសម្មតា។] ហិ ភោ គោតម ពាហុកា នទី ពហុជនស្ស បុញ្ញសម្មតា ហិ ភោ គោតម ពាហុកា នទី ពហុជនស្ស ពាហុកាយ ច [ម. ចការោ ន ទិស្សតិ។] បន នទិយា ពហុជនោ បាបកម្មំ កតំ [ឱ. បាបំ កតំ កម្មំ។] បវាហេតីតិ។ អថខោ ភគវា សុន្ទរិកភារទ្វាជំ ព្រាហ្មណំ គាថាហិ អជ្ឈភាសិ

ពាហុកំ អធិកក្កញ្ច គយំ សុន្ទរិកាមបិ [ម. សុន្ទរិកំ មហឹ។]

សរស្សតឹ បយាគញ្ច អថោ ពាហុមតឹ នទឹ

និច្ចម្បិ ពាលោ បក្ខន្នោ [ម. បក្ខន្ទោ។] កណ្ហកម្មោ ន សុជ្ឈតិ

កឹ សុន្ទរិកា ករិស្សតិ កឹ បយាគោ កឹ ពាហុកា នទី។

វេរឹ កតកិព្វិសំ នរំ ន ហិ នំ សោធយេ បាបកម្មិនំ

សុទ្ធស្ស វេ សទា ផគ្គុ សុទ្ធស្សុបោសថោ សទា

សុទ្ធស្ស សុចិកម្មស្ស សទា សម្បជ្ជតេ វតំ។

ឥធេវ សិនាហិ ព្រាហ្មណ សព្វភូតេសុ ករោហិ ខេមតំ

សចេ មុសា ន ភណសិ សចេ បាណំ ន ហឹសសិ

សចេ អទិន្នំ នាទិយសិ សទ្ទហានោ អមច្ឆរី

កឹ កាហសិ គយំ គន្ត្វា ឧទបានោបិ តេ គយាតិ។

[៩៩] ឯវំ វុត្តេបិ សុន្ទរិកភារទ្វាជោ ព្រាហ្មណោ ភគវន្តំ ឯតទវោច អភិក្កន្តំ ភោ គោតម អភិក្កន្តំ ភោ គោតម សេយ្យថាបិ ភោ គោតម និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលបជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ ភោតា គោតមេន អនេកបរិយាយេន ធម្មោ បកាសិតោ ឯសាហំ ភវន្តំ គោតមំ សរណំ គច្ឆាមិ ធម្មញ្ច ភិក្ខុសង្ឃញ្ច លភេយ្យាហំ ភោតោ គោតមស្ស សន្តិកេ បព្វជ្ជំ លភេយ្យំ ឧបសម្បទន្តិ។ អលត្ថ ខោ សុន្ទរិកភារទ្វាជោ ព្រាហ្មណោ ភគវតោ សន្តិកេ បព្វជ្ជំ អលត្ថ ឧបសម្បទំ។ អចិរូបសម្បន្នោ ខោ បនាយស្មា ភារទ្វាជោ ឯកោ វូបកដ្ឋោ អប្បមត្តោ អាតាបី បហិតត្តោ វិហរន្តោ នចិរស្សេវ យស្សត្ថាយ កុលបុត្តា សម្មទេវ អគារស្មា អនគារិយំ បព្វជន្តិ តទនុត្តរំ ព្រហ្មចរិយបរិយោសានំ ទិដ្ឋេវ ធម្មេ សយំ អព្ភញ្ញាយ សច្ឆិកត្វា ឧបសម្បជ្ជ វិហាសិ [ឱ. វិហរតិ។] ខីណា ជាតិ វុសិតំ ព្រហ្មចរិយំ កតំ ករណីយំ នាបរំ ឥត្ថត្តាយាតិ អព្ភញ្ញាសិ។ អញ្ញតរោ ខោ បនាយស្មា ភារទ្វាជោ អរហតំ អហោសីតិ។

វត្ថូបមសុត្តំ សត្តមំ និដ្ឋិតំ [ឱ. វត្ថុបមសុត្តំ សត្តមំ។ ម. វត្ថសុត្តន្តំ សត្តមំ។]។

អដ្ឋមំ សល្លេខសុត្តំ

[១០០] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ អថខោ អាយស្មា មហាចុន្ទោ សាយណ្ហសមយំ បដិសល្លានា វុដ្ឋិតោ យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ អាយស្មា មហាចុន្ទោ ភគវន្តំ ឯតទវោច យា ឥមា ភន្តេ អនេកវិហិតា ទិដ្ឋិយោ លោកេ ឧប្បជ្ជន្តិ អត្តវាទប្បដិសំយុត្តា វា លោកវាទប្បដិសំយុត្តា វា អាទិមេវ នុ ខោ ភន្តេ ភិក្ខុនោ មនសិករោតោ ឯវមេតាសំ ទិដ្ឋីនំ បហានំ ហោតិ ឯវមេតាសំ ទិដ្ឋីនំ បដិនិស្សគ្គោ ហោតីតិ។

[១០១] យា ឥមា ចុន្ទ អនេកវិហិតា ទិដ្ឋិយោ លោកេ ឧប្បជ្ជន្តិ អត្តវាទប្បដិសំយុត្តា វា លោកវាទប្បដិសំយុត្តា វា យត្ថ ចេតា ទិដ្ឋិយោ ឧប្បជ្ជន្តិ យត្ថ ច អនុសេន្តិ យត្ថ ច សមុទាចរន្តិ [ឱ.ម. តន្តិ បាឋោ ទិស្សតិ។] នេតំ មម នេសោហមស្មិ ន មេសោ អត្តាតិ ឯវមេតំ យថាភូតំ សម្មប្បញ្ញាយ បស្សតោ ឯវមេតាសំ ទិដ្ឋីនំ បហានំ ហោតិ ឯវមេតាសំ ទិដ្ឋីនំ បដិនិស្សគ្គោ ហោតិ។

[១០២] ឋានំ ខោ បនេតំ ចុន្ទ វិជ្ជតិ យំ ឥធេកច្ចោ ភិក្ខុ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរេយ្យ តស្ស ឯវមស្ស សល្លេខេន វិហរាមីតិ ន ខោ បនេតេ ចុន្ទ អរិយស្ស វិនយេ សល្លេខា វុច្ចន្តិ ទិដ្ឋធម្មសុខវិហារា ឯតេ អរិយស្ស វិនយេ វុច្ចន្តិ។ ឋានំ ខោ បនេតំ ចុន្ទ វិជ្ជតិ យំ ឥធេកច្ចោ ភិក្ខុ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវំ អវិតក្កំ អវិចារំ សមាធិជំ បីតិសុខំ ទុតិយំ ឈានំ ឧបសម្បជ្ជ វិហរេយ្យ តស្ស ឯវមស្ស សល្លេខេន វិហរាមីតិ ន ខោ បនេតេ ចុន្ទ អរិយស្ស វិនយេ សល្លេខា វុច្ចន្តិ ទិដ្ឋធម្មសុខវិហារា ឯតេ អរិយស្ស វិនយេ វុច្ចន្តិ។ ឋានំ ខោ បនេតំ ចុន្ទ វិជ្ជតិ យំ ឥធេកច្ចោ ភិក្ខុ បីតិយា ច វិរាគា ឧបេក្ខកោ ច វិហរេយ្យ សតោ ច សម្បជានោ សុខញ្ច កាយេន បដិសំវេទេយ្យ យន្តំ អរិយា អាចិក្ខន្តិ ឧបេក្ខកោ សតិមា សុខវិហារីតិ តតិយំ ឈានំ ឧបសម្បជ្ជ វិហរេយ្យ តស្ស ឯវមស្ស សល្លេខេន វិហរាមីតិ ន ខោ បនេតេ ចុន្ទ អរិយស្ស វិនយេ សល្លេខា វុច្ចន្តិ ទិដ្ឋធម្មសុខវិហារា ឯតេ អរិយស្ស វិនយេ វុច្ចន្តិ។ ឋានំ ខោ បនេតំ ចុន្ទ វិជ្ជតិ យំ ឥធេកច្ចោ ភិក្ខុ សុខស្ស ច បហានា ទុក្ខស្ស ច បហានា បុព្វេ វ សោមនស្សទោមនស្សានំ អដ្ឋង្គមា អទុក្ខមសុខំ [ឱ. អដ្ឋគមា អទុក្ខំ អសុខំ។] ឧបេក្ខាសតិបារិសុទ្ធឹ ចតុត្ថំ ឈានំ ឧបសម្បជ្ជ វិហរេយ្យ តស្ស ឯវមស្ស សល្លេខេន វិហរាមីតិ ន ខោ បនេតេ ចុន្ទ អរិយស្ស វិនយេ សល្លេខា វុច្ចន្តិ ទិដ្ឋធម្មសុខវិហារា ឯតេ អរិយស្ស វិនយេ វុច្ចន្តិ។

[១០៣] ឋានំ ខោ បនេតំ ចុន្ទ វិជ្ជតិ យំ ឥធេកច្ចោ ភិក្ខុ សព្វសោ រូបសញ្ញានំ សមតិក្កមា បដិឃសញ្ញានំ អត្ថង្គមា នានត្តសញ្ញានំ អមនសិការា អនន្តោ អាកាសោតិ អាកាសានញ្ចាយតនំ ឧបសម្បជ្ជ វិហរេយ្យ តស្ស ឯវមស្ស សល្លេខេន វិហរាមីតិ ន ខោ បនេតេ ចុន្ទ អរិយស្ស វិនយេ សល្លេខា វុច្ចន្តិ សន្តា ឯតេ វិហារា អរិយស្ស វិនយេ វុច្ចន្តិ។ ឋានំ ខោ បនេតំ ចុន្ទ វិជ្ជតិ យំ ឥធេកច្ចោ ភិក្ខុ សព្វសោ អាកាសានញ្ចាយតនំ សមតិក្កម្ម អនន្តំ វិញ្ញាណន្តិ វិញ្ញាណញ្ចាយតនំ ឧបសម្បជ្ជ វិហរេយ្យ តស្ស ឯវមស្ស សល្លេខេន វិហរាមីតិ ន ខោ បនេតេ ចុន្ទ អរិយស្ស វិនយេ សល្លេខា វុច្ចន្តិ សន្តា ឯតេ វិហារា អរិយស្ស វិនយេ វុច្ចន្តិ។ ឋានំ ខោ បនេតំ ចុន្ទ វិជ្ជតិ យំ ឥធេកច្ចោ ភិក្ខុ សព្វសោ វិញ្ញាណញ្ចាយតនំ សមតិក្កម្ម នត្ថិ កិញ្ចីតិ អាកិញ្ចញ្ញាយតនំ ឧបសម្បជ្ជ វិហរេយ្យ តស្ស ឯវមស្ស សល្លេខេន វិហរាមីតិ ន ខោ បនេតេ ចុន្ទ អរិយស្ស វិនយេ សល្លេខា វុច្ចន្តិ សន្តា ឯតេ វិហារា អរិយស្ស វិនយេ វុច្ចន្តិ។ ឋានំ ខោ បនេតំ ចុន្ទ វិជ្ជតិ យំ ឥធេកច្ចោ ភិក្ខុ សព្វសោ អាកិញ្ចញ្ញាយតនំ សមតិក្កម្ម នេវសញ្ញានាសញ្ញាយតនំ ឧបសម្បជ្ជ វិហរេយ្យ តស្ស ឯវមស្ស សល្លេខេន វិហរាមីតិ ន ខោ បនេតេ ចុន្ទ អរិយស្ស វិនយេ សល្លេខា វុច្ចន្តិ សន្តា ឯតេ វិហារា អរិយស្ស វិនយេ វុច្ចន្តិ។

[១០៤] ឥធ ខោ បន វោ ចុន្ទ សល្លេខោ ករណីយោ។ បរេ វិហឹសកា ភវិស្សន្តិ មយមេត្ថ អវិហឹសកា ភវិស្សាមាតិ សល្លេខោ ករណីយោ។ បរេ បាណាតិបាតី ភវិស្សន្តិ មយមេត្ថ បាណាតិបាតា បដិវិរតា ភវិស្សាមាតិ សល្លេខោ ករណីយោ។ បរេ អទិន្នាទាយី ភវិស្សន្តិ មយមេត្ថ អទិន្នាទានា បដិវិរតា ភវិស្សាមាតិ សល្លេខោ ករណីយោ។ បរេ អព្រហ្មចារី ភវិស្សន្តិ មយមេត្ថ ព្រហ្មចារី ភវិស្សាមាតិ សល្លេខោ ករណីយោ។ បរេ មុសាវាទី ភវិស្សន្តិ មយមេត្ថ មុសាវាទា បដិវិរតា ភវិស្សាមាតិ សល្លេខោ ករណីយោ។ បរេ បិសុណវាចា [ឱ. បិសុណា វាចា។] ភវិស្សន្តិ មយមេត្ថ បិសុណា វាចាយ បដិវិរតា ភវិស្សាមាតិ សល្លេខោ ករណីយោ។ បរេ ផរុសវាចា [ផរុសា វាចា។] ភវិស្សន្តិ មយមេត្ថ ផរុសាយ វាចាយ បដិវិរតា ភវិស្សាមាតិ សល្លេខោ ករណីយោ។ បរេ សម្ផប្បលាបី ភវិស្សន្តិ មយមេត្ថ សម្ផប្បលាបា បដិវិរតា ភវិស្សាមាតិ សល្លេខោ ករណីយោ។ បរេ អភិជ្ឈាលូ ភវិស្សន្តិ មយមេត្ថ អនភិជ្ឈាលូ ភវិស្សាមាតិ សល្លេខោ ករណីយោ។ បរេ ព្យាបន្នចិត្តា ភវិស្សន្តិ មយមេត្ថ អព្យាបន្នចិត្តា ភវិស្សាមាតិ សល្លេខោ ករណីយោ។ បរេ មិច្ឆាទិដ្ឋិកា [ឱ.ម. មិច្ឆាទិដ្ឋី។] ភវិស្សន្តិ មយមេត្ថ សម្មាទិដ្ឋិកា [ឱ.ម. សម្មាទិដ្ឋី។] ភវិស្សាមាតិ សល្លេខោ ករណីយោ។ បរេ មិច្ឆាសង្កប្បា ភវិស្សន្តិ មយមេត្ថ សម្មាសង្កប្បា ភវិស្សាមាតិ សល្លេខោ ករណីយោ។ បរេ មិច្ឆាវាចា ភវិស្សន្តិ មយមេត្ថ សម្មាវាចា ភវិស្សាមាតិ សល្លេខោ ករណីយោ។ បរេ មិច្ឆាកម្មន្តា ភវិស្សន្តិ មយមេត្ថ សម្មាកម្មន្តា ភវិស្សាមាតិ សល្លេខោ ករណីយោ។ បរេ មិច្ឆាអាជីវា ភវិស្សន្តិ មយមេត្ថ សម្មាអាជីវា ភវិស្សាមាតិ សល្លេខោ ករណីយោ។ បរេ មិច្ឆាវាយាមា ភវិស្សន្តិ មយមេត្ថ សម្មាវាយាមា ភវិស្សាមាតិ សល្លេខោ ករណីយោ។ បរេ មិច្ឆាសតី ភវិស្សន្តិ មយមេត្ថ សម្មាសតី ភវិស្សាមាតិ សល្លេខោ ករណីយោ។ បរេ មិច្ឆាសមាធី ភវិស្សន្តិ មយមេត្ថ សម្មាសមាធី ភវិស្សាមាតិ សល្លេខោ ករណីយោ។ បរេ មិច្ឆាញាណី ភវិស្សន្តិ មយមេត្ថ សម្មាញាណី ភវិស្សាមាតិ សល្លេខោ ករណីយោ។ បរេ មិច្ឆាវិមុត្តី ភវិស្សន្តិ មយមេត្ថ សម្មាវិមុត្តី ភវិស្សាមាតិ សល្លេខោ ករណីយោ។ បរេ ថីនមិទ្ធបរិយុដ្ឋិតា ភវិស្សន្តិ មយមេត្ថ វិគតថីនមិទ្ធា [ម. វិគតថីនមិទ្ធតា។] ភវិស្សាមាតិ សល្លេខោ ករណីយោ។ បរេ ឧទ្ធតា ភវិស្សន្តិ មយមេត្ថ អនុទ្ធតា ភវិស្សាមាតិ សល្លេខោ ករណីយោ។ បរេ វេចិកិច្ឆី ភវិស្សន្តិ មយមេត្ថ តិណ្ណវីចិកិច្ឆា ភវិស្សាមាតិ សល្លេខោ ករណីយោ។ បរេ កោធនា ភវិស្សន្តិ មយមេត្ថ អក្កោធនា ភវិស្សាមាតិ សល្លេខោ ករណីយោ។ បរេ ឧបនាហី ភវិស្សន្តិ មយមេត្ថ អនុបនាហី ភវិស្សាមាតិ សល្លេខោ ករណីយោ។ បរេ មក្ខី ភវិស្សន្តិ មយមេត្ថ អមក្ខី ភវិស្សាមាតិ សល្លេខោ ករណីយោ។ បរេ បឡាសី ភវិស្សន្តិ មយមេត្ថ អបឡាសី ភវិស្សាមាតិ សល្លេខោ ករណីយោ។ បរេ ឥស្សុកី ភវិស្សន្តិ មយមេត្ថ អនិស្សុកី ភវិស្សាមាតិ សល្លេខោ ករណីយោ។ បរេ មច្ឆរី ភវិស្សន្តិ មយមេត្ថ អមច្ឆរី ភវិស្សាមាតិ សល្លេខោ ករណីយោ។ បរេ សឋា ភវិស្សន្តិ មយមេត្ថ អសឋា ភវិស្សាមាតិ សល្លេខោ ករណីយោ។ បរេ មាយាវី ភវិស្សន្តិ មយមេត្ថ អមាយាវី ភវិស្សាមាតិ សល្លេខោ ករណីយោ។ បរេ ថទ្ធា ភវិស្សន្តិ មយមេត្ថ អថទ្ធា ភវិស្សាមាតិ សល្លេខោ ករណីយោ។ បរេ អតិមានី ភវិស្សន្តិ មយមេត្ថ អនតិមានី ភវិស្សាមាតិ សល្លេខោ ករណីយោ។ បរេ ទុព្វចា ភវិស្សន្តិ មយមេត្ថ សុវចា ភវិស្សាមាតិ សល្លេខោ ករណីយោ។ បរេ បាបមិត្តា ភវិស្សន្តិ មយមេត្ថ កល្យាណមិត្តា ភវិស្សាមាតិ សល្លេខោ ករណីយោ។ បរេ បមត្តា ភវិស្សន្តិ មយមេត្ថ អប្បមត្តា ភវិស្សាមាតិ សល្លេខោ ករណីយោ។ បរេ អស្សទ្ធា ភវិស្សន្តិ មយមេត្ថ សទ្ធា ភវិស្សាមាតិ សល្លេខោ ករណីយោ។ បរេ អហិរិកា ភវិស្សន្តិ មយមេត្ថ ហិរិមនា ភវិស្សាមាតិ សល្លេខោ ករណីយោ។ បរេ អនោត្តប្បី ភវិស្សន្តិ មយមេត្ថ ឱត្តប្បី ភវិស្សាមាតិ សល្លេខោ ករណីយោ។ បរេ អប្បស្សុត្តា ភវិស្សន្តិ មយមេត្ថ ពហុស្សុតា ភវិស្សាមាតិ សល្លេខោ ករណីយោ។ បរេ កុសីតា ភវិស្សន្តិ មយមេត្ថ អារទ្ធវីរិយា ភវិស្សាមាតិ សល្លេខោ ករណីយោ។ បរេ មុដ្ឋស្សតី ភវិស្សន្តិ មយមេត្ថ ឧបដ្ឋិតស្សតី ភវិស្សាមាតិ សល្លេខោ ករណីយោ។ បរេ ទុប្បញ្ញា ភវិស្សន្តិ មយមេត្ថ បញ្ញាសម្បន្នា ភវិស្សាមាតិ សល្លេខោ ករណីយោ។ បរេ សន្ទិដ្ឋិបរាមាសិអាធានគ្គាហិទុប្បដិនិស្សគ្គី [ម. សន្ទិដ្ឋិបរាមាសី អាធានគាហី។] ភវិស្សន្តិ មយមេត្ថ អសន្ទិដ្ឋិបរាមាសិអនាធានគ្គាហិសុប្បដិនិស្សគ្គី ភវិស្សាមាតិ សល្លេខោ ករណីយោ។

[១០៥] ចិត្តុប្បាទម្បិ [ម. ចិត្តុប្បាទំបិ។] ខោ អហំ ចុន្ទ កុសលេសុ ធម្មេសុ ពហុការំ វទាមិ កោ បន វាទោ កាយេន វាចាយ អនុវិធិយនាសុ [ឱ.ម. អនុវិធីយ។]។ តស្មាតិហ ចុន្ទ បរេ វិហឹសកា ភវិស្សន្តិ មយមេត្ថ អវិហឹសកា ភវិស្សាមាតិ ចិត្តំ ឧប្បាទេតព្វំ។ បរេ បាណាតិបាតី ភវិស្សន្តិ មយមេត្ថ បាណាតិបាតា បដិវិរតា ភវិស្សាមាតិ ចិត្តំ ឧប្បាទេតព្វំ។បេ។ បរេ សន្ទិដ្ឋិបរាមាសិ​អាធានគ្គាហិ​ទុប្បដិនិស្សគ្គី ភវិស្សន្តិ មយមេត្ថ អសន្ទិដ្ឋិបរាមាសិអនាធានគ្គាហិសុប្បដិនិស្សគ្គី ភវិស្សាមាតិ ចិត្តំ ឧប្បាទេតព្វំ។

[១០៦] សេយ្យថាបិ ចុន្ទ វិសមោ មគ្គោ តស្សាស្ស [ម. អស្ស តស្ស។] អញ្ញោ សមោ មគ្គោ បរិក្កមនាយ សេយ្យថាបិ បន ចុន្ទ វិសមំ តិត្ថំ តស្សាស្ស អញ្ញំ សមំ តិត្ថំ បរិក្កមនាយ ឯវមេវ ខោ ចុន្ទ វិហឹសកស្ស បុរិសបុគ្គលស្ស អវិហឹសា ហោតិ បរិក្កមនាយ។ បាណាតិបាតិស្ស បុរិសបុគ្គលស្ស បាណាតិបាតា វេរមណី ហោតិ បរិក្កមនាយ។ អទិន្នាទាយិស្ស បុរិសបុគ្គលស្ស អទិន្នាទានា វេរមណី ហោតិ បរិក្កមនាយ។ អព្រហ្មចារិស្ស បុរិសបុគ្គលស្ស ព្រហ្មចរិយំ ហោតិ បរិក្កមនាយ។ មុសាវាទិស្ស បុរិសបុគ្គលស្ស មុសាវាទា វេរមណី ហោតិ បរិក្កមនាយ។ បិសុណវាចស្ស [ឱ. បិសុណាវាចស្ស។] បុរិសបុគ្គលស្ស បិសុណាយ វាចាយ វេរមណី ហោតិ បរិក្កមនាយ។ ផរុសវាចស្ស [ឱ. ផរុសាវាចស្ស។] បុរិសបុគ្គលស្ស ផរុសាយ វាចាយ វេរមណី ហោតិ បរិក្កមនាយ។ សម្ផប្បលាបិស្ស បុរិសបុគ្គលស្ស សម្ផប្បលាបា វេរមណី ហោតិ បរិក្កមនាយ។ អភិជ្ឈាលុស្ស បុរិសបុគ្គលស្ស អនភិជ្ឈា ហោតិ បរិក្កមនាយ។ ព្យាបន្នចិត្តស្ស បុរិសបុគ្គលស្ស អព្យាបាទោ ហោតិ បរិក្កមនាយ។ មិច្ឆាទិដ្ឋិកស្ស បុរិសបុគ្គលស្ស សម្មាទិដ្ឋិ ហោតិ បរិក្កមនាយ។ មិច្ឆាសង្កប្បស្ស បុរិសបុគ្គលស្ស សម្មាសង្កប្បោ ហោតិ បរិក្កមនាយ។ មិច្ឆាវាចស្ស បុរិសបុគ្គលស្ស សម្មាវាចា ហោតិ បរិក្កមនាយ។ មិច្ឆាកម្មន្តស្ស បុរិសបុគ្គលស្ស សម្មាកម្មន្តោ ហោតិ បរិក្កមនាយ។ មិច្ឆាអាជីវស្ស បុរិសបុគ្គលស្ស សម្មាអាជីវោ ហោតិ បរិក្កមនាយ។ មិច្ឆាវាយាមស្ស បុរិសបុគ្គលស្ស សម្មាវាយាមោ ហោតិ បរិក្កមនាយ។ មិច្ឆាសតិស្ស បុរិសបុគ្គលស្ស សម្មាសតិ ហោតិ បរិក្កមនាយ។ មិច្ឆាសមាធិស្ស បុរិសបុគ្គលស្ស សម្មាសមាធិ ហោតិ បរិក្កមនាយ។ មិច្ឆាញាណិស្ស បុរិសបុគ្គលស្ស សម្មាញាណំ ហោតិ បរិក្កមនាយ។ មិច្ឆាវិមុត្តិស្ស បុរិសបុគ្គលស្ស សម្មាវិមុត្តិ ហោតិ បរិក្កមនាយ។ ថីនមិទ្ធបរិយុដ្ឋិតស្ស បុរិសបុគ្គលស្ស វិគតថីនមិទ្ធតា ហោតិ បរិក្កមនាយ។ ឧទ្ធតស្ស បុរិសបុគ្គលស្ស អនុទ្ធច្ចំ ហោតិ បរិក្កមនាយ។ វេចិកិច្ឆិស្ស បុរិសបុគ្គលស្ស តិណ្ណវិចិកិច្ឆតា ហោតិ បរិក្កមនាយ។ កោធនស្ស បុរិសបុគ្គលស្ស អក្កោធោ ហោតិ បរិក្កមនាយ។ ឧបនាហិស្ស បុរិសបុគ្គលស្ស អនុបនាហោ ហោតិ បរិក្កមនាយ។ មក្ខិស្ស បុរិសបុគ្គលស្ស អមក្ខោ ហោតិ បរិក្កមនាយ។ បឡាសិស្ស បុរិសបុគ្គលស្ស អបឡាសោ ហោតិ បរិក្កមនាយ។ ឥស្សុកិស្ស បុរិសបុគ្គលស្ស អនិស្សា ហោតិ បរិក្កមនាយ។ មច្ឆរិស្ស បុរិសបុគ្គលស្ស អមច្ឆរិយំ ហោតិ បរិក្កមនាយ។ សឋស្ស បុរិសបុគ្គលស្ស អសាឋេយ្យំ ហោតិ បរិក្កមនាយ។ មាយាវិស្ស បុរិសបុគ្គលស្ស អមាយា ហោតិ បរិក្កមនាយ។ ថទ្ធស្ស បុរិសបុគ្គលស្ស អថទ្ធិយំ ហោតិ បរិក្កមនាយ។ អតិមានិស្ស បុរិសបុគ្គលស្ស អនតិមានោ ហោតិ បរិក្កមនាយ។ ទុព្វចស្ស បុរិសបុគ្គលស្ស សោវចស្សតា ហោតិ បរិក្កមនាយ។ បាបមិត្តស្ស បុរិសបុគ្គលស្ស កល្យាណមិត្តតា ហោតិ បរិក្កមនាយ។ បមត្តស្ស បុរិសបុគ្គលស្ស អប្បមាទោ ហោតិ បរិក្កមនាយ។ អស្សទ្ធស្ស បុរិសបុគ្គលស្ស សទ្ធា ហោតិ បរិក្កមនាយ។ អហិរិកស្ស បុរិសបុគ្គលស្ស ហិរិ ហោតិ បរិក្កមនាយ។ អនោត្តប្បិស្ស បុរិសបុគ្គលស្ស ឱត្តប្បំ ហោតិ បរិក្កមនាយ។ អប្បសុតស្ស បុរិសបុគ្គលស្ស ពាហុសច្ចំ ហោតិ បរិក្កមនាយ។ កុសីតស្ស បុរិសបុគ្គលស្ស វីរិយារម្ភោ ហោតិ បរិក្កមនាយ។ មុដ្ឋស្សតិស្ស បុរិសបុគ្គលស្ស ឧបដ្ឋិតស្សតិតា ហោតិ បរិក្កមនាយ។ ទុប្បញ្ញស្ស បុរិសបុគ្គលស្ស បញ្ញាសម្បទា ហោតិ បរិក្កមនាយ។ សន្ទិដ្ឋិបរាមាសិអាធានគ្គាហិទុប្បដិនិស្សគ្គិស្ស បុរិសបុគ្គលស្ស អសន្ទិដ្ឋិបរាមាសិអនាធានគ្គាហិសុប្បដិនិស្សគ្គិតា ហោតិ បរិក្កមនាយ។

[១០៧] សេយ្យថាបិ ចុន្ទ យេកេចិ អកុសលា ធម្មា សព្វេ តេ អធោភាវង្គមនីយា [ម. អធោភាគង្គមនីយា។] យេកេចិ កុសលា ធម្មា សព្វេ តេ ឧបរិភាវង្គមនីយា ឯវមេវ ខោ ចុន្ទ វិហឹសកស្ស បុរិសបុគ្គលស្ស អវិហឹសា ហោតិ ឧបរិភាវាយ [ឧបរិភាគាយ។]។ បាណាតិបាតិស្ស បុរិសបុគ្គលស្ស បាណាតិបាតា វេរមណី ហោតិ ឧបរិភាវាយ [ម. ឧបរិភាគាយ។]។ អទិន្នាទាយិស្ស។បេ។ សន្ទិដ្ឋិបរាមាសិអាធានគ្គាហិទុប្បដិនិស្សគ្គិស្ស បុរិសបុគ្គលស្ស អសន្ទិដ្ឋិបរាមាសិអនាធានគ្គាហិសុប្បដិនិស្សគ្គិតា ហោតិ ឧបរិភាវាយ។

[១០៨] សោ វត ចុន្ទ អត្តនា បលិបបលិបន្នោ បរំ បលិបបលិបន្នំ ឧទ្ធរិស្សតីតិ នេតំ ឋានំ វិជ្ជតិ។ សោ វត ចុន្ទ អត្តនា អបលិបបលិបន្នោ បរំ បលិបបលិបន្នំ ឧទ្ធរិស្សតីតិ ឋានមេតំ វិជ្ជតិ។ សោ វត ចុន្ទ អត្តនា អទន្តោ អវិនីតោ អបរិនិព្វុតោ បរំ ទមេស្សតិ វិនេស្សតិ បរិនិព្វាបេស្សតីតិ នេតំ ឋានំ វិជ្ជតិ។ សោ វត ចុន្ទ អត្តនា ទន្តោ វិនីតោ បរិនិព្វុតោ បរំ ទមេស្សតិ វិនេស្សតិ បរិនិព្វាបេស្សតីតិ ឋានមេតំ វិជ្ជតិ។ ឯវមេវ ខោ ចុន្ទ វិហឹសកស្ស បុរិសបុគ្គលស្ស អវិហឹសា ហោតិ បរិនិព្វានាយ។ បាណាតិបាតិស្ស បុរិសបុគ្គលស្ស បាណាតិបាតា វេរមណី ហោតិ បរិនិព្វានាយ។ អទិន្នាទាយិស្ស បុរិសបុគ្គលស្ស អទិន្នាទានា វេរមណី ហោតិ បរិនិព្វានាយ។ អព្រហ្មចារិស្ស បុរិសបុគ្គលស្ស ព្រហ្មចរិយំ ហោតិ បរិនិព្វានាយ។ មុសាវាទិស្ស បុរិសបុគ្គលស្ស មុសាវាទា វេរមណី ហោតិ បរិនិព្វានាយ។ បិសុណវាចស្ស បុរិសបុគ្គលស្ស បិសុណាយ វាចាយ វេរមណី ហោតិ បរិនិព្វានាយ។ ផរុសវាចស្ស បុរិសបុគ្គលស្ស ផរុសាយ វាចាយ វេរមណី ហោតិ បរិនិព្វានាយ។ សម្ផប្បលាបិស្ស បុរិសបុគ្គលស្ស សម្ផប្បលាបា វេរមណី ហោតិ បរិនិព្វានាយ។ អភិជ្ឈាលុស្ស បុរិសបុគ្គលស្ស អនភិជ្ឈា ហោតិ បរិនិព្វានាយ។ ព្យាបន្នចិត្តស្ស បុរិសបុគ្គលស្ស អព្យាបាទោ ហោតិ បរិនិព្វានាយ។ មិច្ឆាទិដ្ឋិកស្ស បុរិសបុគ្គលស្ស សម្មាទិដ្ឋិ ហោតិ បរិនិព្វានាយ។ មិច្ឆាសង្កប្បស្ស បុរិសបុគ្គលស្ស សម្មាសង្កប្បោ ហោតិ បរិនិព្វានាយ។ មិច្ឆាវាចស្ស បុរិសបុគ្គលស្ស សម្មាវាចា ហោតិ បរិនិព្វានាយ។ មិច្ឆាកម្មន្តស្ស បុរិសបុគ្គលស្ស សម្មាកម្មន្តោ ហោតិ បរិនិព្វានាយ។ មិច្ឆាអាជីវស្ស បុរិសបុគ្គលស្ស សម្មាអាជីវោ ហោតិ បរិនិព្វានាយ។ មិច្ឆាវាយាមស្ស បុរិសបុគ្គលស្ស សម្មាវាយាមោ ហោតិ បរិនិព្វានាយ។ មិច្ឆាសតិស្ស បុរិសបុគ្គលស្ស សម្មាសតិ ហោតិ បរិនិព្វានាយ។ មិច្ឆាសមាធិស្ស បុរិសបុគ្គលស្ស សម្មាសមាធិ ហោតិ បរិនិព្វានាយ។ មិច្ឆាញាណិស្ស បុរិសបុគ្គលស្ស សម្មាញាណំ ហោតិ បរិនិព្វានាយ។ មិច្ឆាវិមុត្តិស្ស បុរិសបុគ្គលស្ស សម្មាវិមុត្តិ ហោតិ បរិនិព្វានាយ។ ថីនមិទ្ធបរិយុដ្ឋិតស្ស បុរិសបុគ្គលស្ស វិគតថីនមិទ្ធតា ហោតិ បរិនិព្វានាយ។ ឧទ្ធតស្ស បុរិសបុគ្គលស្ស អនុទ្ធច្ចំ ហោតិ បរិនិព្វានាយ។ វេចិកិច្ឆិស្ស បុរិសបុគ្គលស្ស តិណ្ណវិចិកិច្ឆតា ហោតិ បរិនិព្វានាយ។ កោធនស្ស បុរិសបុគ្គលស្ស អក្កោធោ ហោតិ បរិនិព្វានាយ។ ឧបនាហិស្ស បុរិសបុគ្គលស្ស អនុបនាហោ ហោតិ បរិនិព្វានាយ។ មក្ខិស្ស បុរិសបុគ្គលស្ស អមក្ខោ ហោតិ បរិនិព្វានាយ។ បឡាសិស្ស បុរិសបុគ្គលស្ស អបឡាសោ ហោតិ បរិនិព្វានាយ។ ឥស្សុកិស្ស បុរិសបុគ្គលស្ស អនិស្សា ហោតិ បរិនិព្វានាយ។ មច្ឆរិស្ស បុរិសបុគ្គលស្ស អមច្ឆរិយំ ហោតិ បរិនិព្វានាយ។ សឋស្ស បុរិសបុគ្គលស្ស អសាឋេយ្យំ ហោតិ បរិនិព្វានាយ។ មាយាវិស្ស បុរិសបុគ្គលស្ស អមាយា ហោតិ បរិនិព្វានាយ។ ថទ្ធស្ស បុរិសបុគ្គលស្ស អថទ្ធិយំ ហោតិ បរិនិព្វានាយ។ អតិមានិស្ស បុរិសបុគ្គលស្ស អនតិមានោ ហោតិ បរិនិព្វានាយ។ ទុព្វចស្ស បុរិសបុគ្គលស្ស សោវចស្សតា ហោតិ បរិនិព្វានាយ។ បាបមិត្តស្ស បុរិសបុគ្គលស្ស កល្យាណមិត្តតា ហោតិ បរិនិព្វានាយ។ បមត្តស្ស បុរិសបុគ្គលស្ស អប្បមាទោ ហោតិ បរិនិព្វានាយ។ អស្សទ្ធស្ស បុរិសបុគ្គលស្ស សទ្ធា ហោតិ បរិនិព្វានាយ។ អហិរិកស្ស បុរិសបុគ្គលស្ស ហិរិ ហោតិ បរិនិព្វានាយ។ អនោត្តប្បិស្ស បុរិសបុគ្គលស្ស ឱត្តប្បំ ហោតិ បរិនិព្វានាយ។ អប្បសុតស្ស បុរិសបុគ្គលស្ស ពាហុសច្ចំ ហោតិ បរិនិព្វានាយ។ កុសីតស្ស បុរិសបុគ្គលស្ស វីរិយារម្ភោ ហោតិ បរិនិព្វានាយ។ មុដ្ឋស្សតិស្ស បុរិសបុគ្គលស្ស ឧបដ្ឋិតស្សតិតា ហោតិ បរិនិព្វានាយ។ ទុប្បញ្ញស្ស បុរិសបុគ្គលស្ស បញ្ញាសម្បទា ហោតិ បរិនិព្វានាយ។ សន្ទិដ្ឋិបរាមាសិអាធានគ្គាហិទុប្បដិនិស្សគ្គិស្ស បុរិសបុគ្គលស្ស អសន្ទិដ្ឋិបរាមាសិអនាធានគ្គាហិសុប្បដិនិស្សគ្គិតា ហោតិ បរិនិព្វានាយ។

[១០៩] ឥតិ ខោ ចុន្ទ ទេសិតោ មយា សល្លេខបរិយាយោ ទេសិតោ ចិត្តុប្បាទបរិយាយោ ទេសិតោ បរិក្កមនបរិយាយោ ទេសិតោ ឧបរិភាវបរិយាយោ [ម. ឧបរិភាគ…។] ទេសិតោ បរិនិព្វានបរិយាយោ។ យំ ខោ ចុន្ទ សត្ថារា ករណីយំ សាវកានំ ហិតេសិនា អនុកម្បកេន អនុកម្បំ ឧបាទាយ កតំ វោ តំ មយា។ ឯតានិ ចុន្ទ រុក្ខមូលានិ ឯតានិ សុញ្ញាគារានិ ឈាយថ ចុន្ទ មា បមាទត្ថ មា បច្ឆា វិប្បដិសារិនោ អហុវត្ថ។ អយំ វោ [ម. ខោ។] អម្ហាកំ អនុសាសនីតិ។ ឥទមវោច ភគវា អត្តមនោ អាយស្មា មហាចុន្ទោ ភគវតោ ភាសិតំ អភិនន្ទីតិ។

ចតុត្តាឡីស បទា វុត្តា សន្ធិយោ បញ្ច ទេសិតា

សល្លេខោ នាម សុត្តន្តោ គម្ភីរោ សាគរូបមោតិ [ម. ចតុចត្តាឡីស បទា វុត្តា សន្ធឹ យា បញ្ច ទេសិតា សល្លេខោ នាម សុត្តនោ គម្ភីរោ សាគរូបមោតិ ទិស្សតិ។ ឱ. ចតុត្តាឡីស បទា វុត្តា សន្ធិយោ បញ្ច ទេសិតា សល្លេខោ នាម សុត្តន្តោ គម្ភីរោ សាគរូបមោតិ ន ទិស្សតិ។]។

សល្លេខសុត្តំ អដ្ឋមំ និដ្ឋិតំ។

នវមំ សម្មាទិដ្ឋិសុត្តំ

[១១០] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ អាយស្មា សារីបុត្តោ ភិក្ខូ អាមន្តេសិ អាវុសោ [ឱ. អាវុសោតិ ន ទិស្សតិ។] ភិក្ខវោតិ។ អាវុសោតិ [ឱ.ម. អាវុសោតិ ខោ។] តេ ភិក្ខូ អាយស្មតោ សារីបុត្តស្ស បច្ចស្សោសុំ។ អាយស្មា សារីបុត្តោ ឯតទវោច សម្មាទិដ្ឋិ សម្មាទិដ្ឋីតិ អាវុសោ វុច្ចតិ កិត្តាវតា នុ ខោ អាវុសោ អរិយសាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ ទូរតោបិ ខោ មយំ អាវុសោ អាគច្ឆេយ្យាម អាយស្មតោ សារីបុត្តស្ស សន្តិកេ ឯតស្ស ភាសិតស្ស អត្ថមញ្ញាតុំ សាធុ វតាយស្មន្តំយេវ សារីបុត្តំ បដិភាតុ ឯតស្ស ភាសិតស្ស អត្ថោ អាយស្មតោ សារីបុត្តស្ស សុត្វា ភិក្ខូ ធារេស្សន្តីតិ។ តេនហិ អាវុសោ [ឱ. តេនហាវុសោ។] សុណាថ សាធុកំ មនសិករោថ ភាសិស្សាមីតិ។ ឯវមាវុសោតិ ខោ តេ ភិក្ខូ អាយស្មតោ សារីបុត្តស្ស បច្ចស្សោសុំ។

[១១១] អាយស្មា សារីបុត្តោ ឯតទវោច យតោ ខោ អាវុសោ អរិយសាវកោ អកុសលញ្ច បជានាតិ អកុសលមូលញ្ច បជានាតិ កុសលញ្ច បជានាតិ កុសលមូលញ្ច បជានាតិ ឯត្តាវតាបិ ខោ អាវុសោ អរិយសាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ [ឱ.ម. សទ្ធម្មំ។]។ កតមំ បនាវុសោ អកុសលំ [ឱ.ម. ឥតោ បរំ កតមំ អកុសលមូលំ កតមំ កុសលំ កតមំ កុសលមូលន្តិ ន ទិស្សតិ។]។ បាណាតិបាតោ ខោ អាវុសោ អកុសលំ អទិន្នាទានំ អកុសលំ កាមេសុមិច្ឆាចារោ អកុសលំ មុសាវាទោ អកុសលំ បិសុណា វាចា អកុសលំ ផរុសា វាចា អកុសលំ សម្ផប្បលាបោ អកុសលំ អភិជ្ឈា អកុសលំ ព្យាបាទោ អកុសលំ មិច្ឆាទិដ្ឋិ អកុសលំ ឥទំ វុច្ចតាវុសោ អកុសលំ។ កតមញ្ចាវុសោ អកុសលមូលំ។ លោភោ អកុសលមូលំ ទោសោ អកុសលមូលំ មោហោ អកុសលមូលំ ឥទំ វុច្ចតាវុសោ អកុសលមូលំ។ កតមញ្ចាវុសោ កុសលំ។ បាណាតិបាតា វេរមណី កុសលំ អទិន្នាទានា វេរមណី កុសលំ កាមេសុមិច្ឆាចារា វេរមណី កុសលំ មុសាវាទា វេរមណី កុសលំ បិសុណាយ វាចាយ វេរមណី កុសលំ ផរុសាយ វាចាយ វេរមណី កុសលំ សម្ផប្បលាបា វេរមណី កុសលំ អនភិជ្ឈា កុសលំ អព្យាបាទោ កុសលំ សម្មាទិដ្ឋិ កុសលំ ឥទំ វុច្ចតាវុសោ កុសលំ។ កតមញ្ចាវុសោ កុសលមូលំ។ អលោភោ កុសលមូលំ អទោសោ កុសលមូលំ អមោហោ កុសលមូលំ ឥទំ វុច្ចតាវុសោ កុសលមូលំ។ យតោ ខោ អាវុសោ អរិយសាវកោ ឯវំ អកុសលំ បជានាតិ ឯវំ អកុសលមូលំ បជានាតិ ឯវំ កុសលំ បជានាតិ ឯវំ កុសលមូលំ បជានាតិ សោ សព្វសោ រាគានុសយំ បហាយ បដិឃានុសយំ បដិវិនោទេត្វា អស្មីតិ ទិដ្ឋិមានានុសយំ សមូហនិត្វា អវិជ្ជំ បហាយ វិជ្ជំ ឧប្បាទេត្វា ទិដ្ឋេវ ធម្មេ ទុក្ខស្សន្តករោ ហោតិ។ ឯត្តាវតាបិ ខោ អាវុសោ អរិយសាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១១២] សាធាវុសោតិ ខោ តេ ភិក្ខូ អាយស្មតោ សារីបុត្តស្ស ភាសិតំ អភិនន្ទិត្វា អនុមោទិត្វា អាយស្មន្តំ សារីបុត្តំ ឧត្តរឹ បញ្ហំ អបុច្ឆឹសុ [ឱ.ម. អបុច្ឆុំ។] សិយា បនាវុសោ អញ្ញោបិ បរិយាយោ យថា អរិយសាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១១៣] សិយាវុសោតិ អាយស្មា សារីបុត្តោ អវោច យតោ ខោ អាវុសោ [ឱ.ម. សិយា អាវុសោ។ យតោ ខោ អាវុសោតិ ទិស្សតិ។] អរិយសាវកោ អាហារញ្ច បជានាតិ អាហារសមុទយញ្ច បជានាតិ អាហារនិរោធញ្ច បជានាតិ អាហារនិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយសាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមោ បនាវុសោ អាហារោ កតមោ អាហារសមុទយោ កតមោ អាហារនិរោធោ កតមា អាហារនិរោធគាមិនី បដិបទាតិ។ ចត្តារោមេ អាវុសោ អាហារា ភូតានំ វា សត្តានំ ឋិតិយា សម្ភិវេសីនំ វា អនុគ្គហាយ។ កតមេ ចត្តារោ។ កវឡិង្ការោ [ឱ. កពឡិង្ការោ។ ម. កពឡិការោ។] អាហារោ ឱឡារិកោ វា សុខុមោ វា ផស្សោ ទុតិយោ មនោសញ្ចេតនា តតិយា វិញ្ញាណំ ចតុត្ថំ។ តណ្ហាសមុទយា អាហារសមុទយោ តណ្ហានិរោធា អាហារនិរោធោ អយមេវ អរិយោ អដ្ឋង្គិកោ មគ្គោ អាហារនិរោធគាមិនី បដិបទា សេយ្យថីទំ សម្មាទិដ្ឋិ សម្មាសង្កប្បោ សម្មាវាចា សម្មាកម្មន្តោ សម្មាអាជីវោ សម្មាវាយាមោ សម្មាសតិ សម្មាសមាធិ។ យតោ ខោ អាវុសោ អរិយសាវកោ ឯវំ អាហារំ បជានាតិ ឯវំ អាហារសមុទយំ បជានាតិ ឯវំ អាហារនិរោធំ បជានាតិ ឯវំ អាហារនិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ បដិឃានុសយំ បដិវិនោទេត្វា អស្មីតិ ទិដ្ឋិមានានុសយំ សមូហនិត្វា អវិជ្ជំ បហាយ វិជ្ជំ ឧប្បាទេត្វា ទិដ្ឋេវ ធម្មេ ទុក្ខស្សន្តករោ ហោតិ ឯត្តាវតាបិ ខោ អាវុសោ អរិយសាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១១៤] សាធាវុសោតិ ខោ តេ ភិក្ខូ អាយស្មតោ សារីបុត្តស្ស ភាសិតំ អភិនន្ទិត្វា អនុមោទិត្វា អាយស្មន្តំ សារីបុត្តំ ឧត្តរឹ បញ្ហំ អបុច្ឆឹសុ សិយា បនាវុសោ។បេ។

[១១៥] សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយសាវកោ ទុក្ខញ្ច បជានាតិ ទុក្ខសមុទយញ្ច បជានាតិ ទុក្ខនិរោធញ្ច បជានាតិ ទុក្ខនិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយសាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមម្បនាវុសោ ទុក្ខំ [ឱ.ម. កតមំ បនាវុសោ ទុក្ខំ។ កតមោ ទុក្ខសមុទយោ។ កតមោ ទុក្ខនិរោធោ។ កតមោ ទុក្ខនិរោធគាមិនី បដិបទាតិ ទិស្សន្តិ។] ជាតិបិ ទុក្ខា ជរាបិ ទុក្ខា មរណម្បិ ទុក្ខំ សោកបរិទេវទុក្ខទោមនស្សុបាយាសាបិ ទុក្ខា អប្បិយេហិ សម្បយោគោ ទុក្ខោ បិយេហិ វិប្បយោគោ ទុក្ខោ [ឱ.ម. អប្បិយេហិ សម្បយោគោ ទុក្ខោ បិយេហិ វិប្បយោគោតិ ន ទិស្សន្តិ។] យម្បិច្ឆំ ន លភតិ តម្បិ [ម. តំបិ។] ទុក្ខំ សង្ខិត្តេន បញ្ចុបាទានក្ខន្ធា ទុក្ខា ឥទំ វុច្ចតាវុសោ ទុក្ខំ។ កតមោ ចាវុសោ ទុក្ខសមុទយោ យាយំ តណ្ហា បោនោព្ភវិកា នន្ទិរាគសហគតា តត្រតត្រាភិនន្ទិនី សេយ្យថីទំ កាមតណ្ហា ភវតណ្ហា វិភវតណ្ហា អយំ វុច្ចតាវុសោ ទុក្ខសមុទយោ។ កតមោ ចាវុសោ ទុក្ខនិរោធោ យោ តស្សាយេវ តណ្ហាយ អសេសវិរាគនិរោធោ ចាគោ បដិនិស្សគ្គោ មុត្តិ អនាលយោ អយំ វុច្ចតាវុសោ ទុក្ខនិរោធោ។ កតមា ចាវុសោ ទុក្ខនិរោធគាមិនី បដិបទា អយមេវ អរិយោ អដ្ឋង្គិកោ មគ្គោ [ឱ.ម. មគ្គោ ទុក្ខនិរោធគាមិនី បដិបទា។] សេយ្យថីទំ សម្មាទិដ្ឋិ។បេ។ សម្មាសមាធិ។ យតោ ខោ អាវុសោ អរិយស្សាវកោ ឯវំ ទុក្ខំ បជានាតិ ឯវំ ទុក្ខសមុទយំ បជានាតិ ឯវំ ទុក្ខនិរោធំ បជានាតិ ឯវំ ទុក្ខនិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ បដិឃានុសយំ បដិវិនោទេត្វា អស្មឹតិ ទិដ្ឋិមានានុសយំ សមូហនិត្វា អវិជ្ជំ បហាយ វិជ្ជំ ឧប្បាទេត្វា ទិដ្ឋេវ ធម្មេ ទុក្ខស្សន្តករោ ហោតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១១៦] សាធាវុសោតិ ខោ តេ ភិក្ខូ អាយស្មតោ សារីបុត្តស្ស ភាសិតំ អភិនន្ទិត្វា អនុមោទិត្វា អាយស្មន្តំ សារីបុត្តំ ឧត្តរឹ បញ្ហំ អបុច្ឆឹសុ សិយា បនាវុសោ អញ្ញោបិ បរិយាយោ យថា អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១១៧] សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយស្សាវកោ ជរាមរណញ្ច បជានាតិ ជរាមរណសមុទយញ្ច បជានាតិ ជរាមរណនិរោធញ្ច បជានាតិ ជរាមរណនិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋិ ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមំ បនាវុសោ ជរាមរណំ កតមោ ជរាមរណសមុទយោ កតមោ ជរាមរណនិរោធោ កតមា ជរាមរណនិរោធគាមិនី បដិបទាតិ [ឱ.ម. បដិបទា។]។ យា តេសំ តេសំ សត្តានំ តម្ហិ តម្ហិ សត្តនិកាយេ ជរា ជីរណតា ខណ្ឌិច្ចំ បាលិច្ចំ វលិតចតា [ឱ.ម. វលិត្តចតា។ វលិត្តចតាតិ អម្ហាកំ ខន្តិ។] អាយុនោ សំហានិ ឥន្ទ្រិយានំ បរិបាកោ អយំ វុច្ចតតិ [ឱ.ម. វុច្ចតាវុសោ។] ជរា។ យា [ឱ.ម. ឥធ (កតមញ្ចាវុសោ មរណំ) យំ។] តេសំ តេសំ សត្តានំ តម្ហា តម្ហា សត្តនិកាយា ចុតិ ចវនតា ភេទោ អន្តរធានំ មច្ចុ មរណំ កាលកិរិយា ខន្ធានំ ភេទោ កឡេវរស្ស និក្ខេបោ ជីវិតិន្ទ្រិយស្ស ឧបច្ឆេទោ ឥទំ វុច្ចតិ មរណំ [ឱ. និក្ខេបោ ឥទំ វុច្ចតាវុសោ មរណំ។]។ ឥតិ អយញ្ច ជរា ឥទញ្ច មរណំ ឥទំ វុច្ចតាវុសោ ជរាមរណំ។ ជាតិសមុទយា ជរាមរណសមុទយោ ជាតិនិរោធា ជរាមរណនិរោធោ អយមេវ អរិយោ អដ្ឋង្គិកោ មគ្គោ ជរាមរណនិរោធគាមិនី បដិបទា សេយ្យថីទំ សម្មាទិដ្ឋិ។បេ។ សម្មាសមាធិ។ យតោ ខោ អាវុសោ អរិយស្សាវកោ ឯវំ ជរាមរណំ បជានាតិ ឯវំ ជរាមរណសមុទយំ បជានាតិ ឯវំ ជរាមរណនិរោធំ បជានាតិ ឯវំ ជរាមរណនិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ។បេ។ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១១៨] សិយា បនាវុសោ។បេ។ សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយស្សាវកោ ជាតិញ្ច បជានាតិ ជាតិសមុទយញ្ច បជានាតិ ជាតិនិរោធញ្ច បជានាតិ ជាតិនិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមា បនាវុសោ ជាតិ កតមោ ជាតិសមុទយោ កតមោ ជាតិនិរោធោ កតមា ជាតិនិរោធគាមិនី បដិបទា។ យា តេសំ តេសំ សត្តានំ តម្ហិ តម្ហិ សត្តនិកាយេ ជាតិ សញ្ជាតិ ឱក្កន្តិ និព្វត្តិ [ឱ.ម. និព្វត្តីតិ ន ទិស្សតិ។] អភិនិព្វត្តិ ខន្ធានំ បាតុភាវោ អាយតនានំ បដិលាភោ អយំ វុច្ចតាវុសោ ជាតិ។ ភវសមុទយា ជាតិសមុទយោ ភវនិរោធា ជាតិនិរោធោ អយមេវ អរិយោ អដ្ឋង្គិកោ មគ្គោ ជាតិនិរោធគាមិនី បដិបទា សេយ្យថីទំ សម្មាទិដ្ឋិ។បេ។ សម្មាសមាធិ។ យតោ ខោ អាវុសោ អរិយស្សាវកោ ឯវំ ជាតឹ បជានាតិ ឯវំ ជាតិសមុទយំ បជានាតិ ឯវំ ជាតិនិរោធំ បជានាតិ ឯវំ ជាតិនិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ។បេ។ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១១៩] សិយា បនាវុសោ។បេ។ សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយស្សាវកោ ភវញ្ច បជានាតិ ភវសមុទយញ្ច បជានាតិ ភវនិរោធញ្ច បជានាតិ ភវនិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមោ បនាវុសោ ភវោ កតមោ ភវសមុទយោ កតមោ ភវនិរោធោ កតមា ភវនិរោធគាមិនី បដិបទា [ឱ.ម. បដិបទា។]។ តយោមេ អាវុសោ ភវា កាមភវោ រូបភវោ អរូបភវោ។ ឧបាទានសមុទយា ភវសមុទយោ ឧបាទាននិរោធា ភវនិរោធោ អយមេវ អរិយោ អដ្ឋង្គិកោ មគ្គោ ភវនិរោធគាមិនី បដិបទា សេយ្យថីទំ សម្មាទិដ្ឋិ។បេ។ សម្មាសមាធិ។ យតោ ខោ អាវុសោ អរិយស្សសាវកោ ឯវំ ភវំ បជានាតិ ឯវំ ភវសមុទយំ បជានាតិ ឯវំ ភវនិរោធំ បជានាតិ ឯវំ ភវនិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ។បេ។ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១២០] សិយា បនាវុសោ។បេ។ សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយស្សាវកោ ឧបាទានញ្ច បជានាតិ ឧបាទានសមុទយញ្ច បជានាតិ ឧបាទាននិរោធញ្ច បជានាតិ ឧបាទាននិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមំ បនាវុសោ ឧបាទានំ កតមោ ឧបាទានសមុទយោ កតមោ ឧបាទាននិរោធោ កតមា ឧបាទាននិរោធគាមិនី បដិបទាតិ។ ចត្តារីមានិ អាវុសោ ឧបាទានានិ [ឱ. ចត្តារោមេ អាវុសោ ឧបាទានា។] កាមុបាទានំ ទិដ្ឋុបាទានំ សីលព្វតុបាទានំ អត្តវាទុបាទានំ។ តណ្ហាសមុទយោ ឧបាទានសមុទយោ តណ្ហានិរោធោ ឧបាទាននិរោធោ អយមេវ អរិយោ អដ្ឋង្គិកោ មគ្គោ ឧបាទាននិរោធគាមិនី បដិបទា សេយ្យថីទំ សម្មាទិដ្ឋិ។បេ។ សម្មាសមាធិ។ យតោ ខោ អាវុសោ អរិយស្សាវកោ ឯវំ ឧបាទានំ បជានាតិ ឯវំ ឧបាទានសមុទយំ បជានាតិ ឯវំ ឧបាទាននិរោធំ បជានាតិ ឯវំ ឧបាទាននិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ។បេ។ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១២១] សិយា បនាវុសោ។បេ។ សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយស្សាវកោ តណ្ហញ្ច បជានាតិ តណ្ហាសមុទយញ្ច បជានាតិ តណ្ហានិរោធញ្ច បជានាតិ តណ្ហានិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមា បនាវុសោ តណ្ហា កតមោ តណ្ហាសមុទយោ កតមោ តណ្ហានិរោធោ កតមា តណ្ហានិរោធគាមិនី បដិបទាតិ។ ឆយិមេ អាវុសោ តណ្ហាកាយា រូបតណ្ហា សទ្ទតណ្ហា គន្ធតណ្ហា រសតណ្ហា ផោដ្ឋព្វតណ្ហា ធម្មតណ្ហា។ វេទនាសមុទយា តណ្ហាសមុទយោ វេទនានិរោធា តណ្ហានិរោធោ អយមេវ អរិយោ អដ្ឋង្គិកោ មគ្គោ តណ្ហានិរោធគាមិនី បដិបទា សេយ្យថីទំ សម្មាទិដ្ឋិ។បេ។ សម្មាសមាធិ។ យតោ ខោ អាវុសោ អរិយស្សាវកោ ឯវំ តណ្ហំ បជានាតិ ឯវំ តណ្ហាសមុទយំ បជានាតិ ឯវំ តណ្ហានិរោធំ បជានាតិ ឯវំ តណ្ហានិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ។បេ។ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១២២] សិយា បនាវុសោ។បេ។ សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយស្សាវកោ វេទនញ្ច បជានាតិ វេទនាសមុទយញ្ច បជានាតិ វេទនានិរោធញ្ច បជានាតិ វេទនានិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមា បនាវុសោ វេទនា កតមោ វេទនាសមុទយោ កតមោ វេទនានិរោធោ កតមា វេទនានិរោធគាមិនី បដិបទាតិ។ ឆយិមេ អាវុសោ វេទនាកាយា ចក្ខុសម្ផស្សជា វេទនា សោតសម្ផស្សជា វេទនា ឃានសម្ផស្សជា វេទនា ជិវ្ហាសម្ផស្សជា វេទនា កាយសម្ផស្សជា វេទនា មនោសម្ផស្សជា វេទនា។ ផស្សសមុទយា វេទនាសមុទយោ ផស្សនិរោធា វេទនានិរោធោ អយមេវ អរិយោ អដ្ឋង្គិកោ មគ្គោ វេទនានិរោធគាមិនី បដិបទា សេយ្យថីទំ សម្មាទិដ្ឋិ។បេ។ សម្មាសមាធិ។ យតោ ខោ អាវុសោ អរិយស្សាវកោ ឯវំ វេទនំ បជានាតិ ឯវំ វេទនាសមុទយំ បជានាតិ ឯវំ វេទនានិរោធំ បជានាតិ ឯវំ វេទនានិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ។បេ។ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១២៣] សិយា បនាវុសោ។បេ។ សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយស្សាវកោ ផស្សញ្ច បជានាតិ ផស្សសមុទយញ្ច បជានាតិ ផស្សនិរោធញ្ច បជានាតិ ផស្សនិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមោ បនាវុសោ ផស្សោ កតមោ ផស្សសមុទយោ កតមោ ផស្សនិរោធោ កតមា ផស្សនិរោធគាមិនី បដិបទាតិ។ ឆយិមេ អាវុសោ ផស្សកាយា ចក្ខុសម្ផស្សោ សោតសម្ផស្សោ ឃានសម្ផស្សោ ជិវ្ហាសម្ផស្សោ កាយសម្ផស្សោ មនោសម្ផស្សោ។ សឡាយតនសមុទយា ផស្សសមុទយោ សឡាយតននិរោធា ផស្សនិរោធោ អយមេវ អរិយោ អដ្ឋង្គិកោ មគ្គោ ផស្សនិរោធគាមិនី បដិបទា សេយ្យថីទំ សម្មាទិដ្ឋិ។បេ។ សម្មាសមាធិ។ យតោ ខោ អាវុសោ អរិយស្សាវកោ ឯវំ ផស្សំ បជានាតិ ឯវំ ផស្សសមុទយំ បជានាតិ ឯវំ ផស្សនិរោធំ បជានាតិ ឯវំ ផស្សនិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ។បេ។ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១២៤] សិយា បនាវុសោ។បេ។ សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយស្សាវកោ សឡាយតនញ្ច បជានាតិ សឡាយតនសមុទយញ្ច បជានាតិ សឡាយតននិរោធញ្ច បជានាតិ សឡាយតននិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមំ បនាវុសោ សឡាយតនំ កតមោ សឡាយតនសមុទយោ កតមោ សឡាយតននិរោធោ កតមា សឡាយតននិរោធគាមិនី បដិបទាតិ។ ឆយិមានិ អាវុសោ អាយតនានិ ចក្ខ្វាយតនំ [ឱ.ម. ចក្ខាយតនំ។] សោតាយតនំ ឃានាយតនំ ជិវ្ហាយតនំ កាយាយតនំ មនាយតនំ។ នាមរូបសមុទយា សឡាយតនសមុទយោ នាមរូបនិរោធា សឡាយតននិរោធោ អយមេវ អរិយោ អដ្ឋង្គិកោ មគ្គោ សឡាយតននិរោធគាមិនី បដិបទា សេយ្យថីទំ សម្មាទិដ្ឋិ។បេ។ សម្មាសមាធិ។ យតោ ខោ អាវុសោ អរិយស្សាវកោ ឯវំ សឡាយតនំ បជានាតិ ឯវំ សឡាយតនសមុទយំ បជានាតិ ឯវំ សឡាយតននិរោធំ បជានាតិ ឯវំ សឡាយតននិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ។បេ។ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១២៥] សិយា បនាវុសោ។បេ។ សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយស្សាវកោ នាមរូបញ្ច បជានាតិ នាមរូបសមុទយញ្ច បជានាតិ នាមរូបនិរោធញ្ច បជានាតិ នាមរូបនិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមំ បនាវុសោ នាមរូបំ កតមោ នាមរូបសមុទយោ កតមោ នាមរូបនិរោធោ កតមា នាមរូបនិរោធគាមិនី បដិបទាតិ។ វេទនា សញ្ញា ចេតនា ផស្សោ មនសិការោ ឥទំ វុច្ចតិ [ឱ.ម. វុច្ចតាវុសោ។] នាមំ។ ចត្តារិ ច មហាភូតានិ ចតុន្នញ្ច មហាភូតានំ ឧបាទាយ រូបំ ឥទំ វុច្ចតិ [ឱ.ម. វុច្ចតាវុសោ។] រូបំ។ ឥតិ ឥទញ្ច នាមំ ឥទញ្ច រូបំ ឥទំ វុច្ចតាវុសោ នាមរូបំ។ វិញ្ញាណសមុទយា នាមរូបសមុទយោ វិញ្ញាណនិរោធោ នាមរូបនិរោធោ អយមេវ អរិយោ អដ្ឋង្គិកោ មគ្គោ នាមរូបនិរោធគាមិនី បដិបទា សេយ្យថីទំ សម្មាទិដ្ឋិ។បេ។ សម្មាសមាធិ។ យតោ ខោ អាវុសោ អរិយស្សាវកោ ឯវំ នាមរូបំ បជានាតិ ឯវំ នាមរូបសមុទយំ បជានាតិ ឯវំ នាមរូបនិរោធំ បជានាតិ ឯវំ នាមរូបនិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ។បេ។ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១២៦] សិយា បនាវុសោ។បេ។ សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយស្សាវកោ វិញ្ញាណញ្ច បជានាតិ វិញ្ញាណសមុទយញ្ច បជានាតិ វិញ្ញាណនិរោធញ្ច បជានាតិ វិញ្ញាណនិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមំ បនាវុសោ វិញ្ញាណំ កតមោ វិញ្ញាណសមុទយោ កតមោ វិញ្ញាណនិរោធោ កតមា វិញ្ញាណនិរោធគាមិនី បដិបទាតិ។ ឆយិមេ អាវុសោ វិញ្ញាណកាយា ចក្ខុវិញ្ញាណំ សោតវិញ្ញាណំ ឃានវិញ្ញាណំ ជិវ្ហាវិញ្ញាណំ កាយវិញ្ញាណំ មនោវិញ្ញាណំ។ សង្ខារសមុទយា វិញ្ញាណសមុទយោ សង្ខារនិរោធា វិញ្ញាណនិរោធោ អយមេវ អរិយោ អដ្ឋង្គិកោ មគ្គោ វិញ្ញាណនិរោធគាមិនី បដិបទា សេយ្យថីទំ សម្មាទិដ្ឋិ។បេ។ សម្មាសមាធិ។ យតោ ខោ អាវុសោ អរិយស្សាវកោ ឯវំ វិញ្ញាណំ បជានាតិ ឯវំ វិញ្ញាណសមុទយំ បជានាតិ ឯវំ វិញ្ញាណនិរោធំ បជានាតិ ឯវំ វិញ្ញាណនិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ។បេ។ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១២៧] សិយា បនាវុសោ។បេ។ សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយស្សាវកោ សង្ខារញ្ច បជានាតិ សង្ខារសមុទយញ្ច បជានាតិ សង្ខារនិរោធញ្ច បជានាតិ សង្ខារនិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមេ បនាវុសោ សង្ខារា កតមោ សង្ខារសមុទយោ កតមោ សង្ខារនិរោធោ កតមា សង្ខារនិរោធគាមិនី បដិបទាតិ។ តយោមេ អាវុសោ សង្ខារា កាយសង្ខារោ វចីសង្ខារោ ចិត្តសង្ខារោ។ អវិជ្ជាសមុទយា សង្ខារសមុទយោ អវិជ្ជានិរោធា សង្ខារនិរោធោ អយមេវ អរិយោ អដ្ឋង្គិកោ មគ្គោ សង្ខារនិរោធគាមិនី បដិបទា សេយ្យថីទំ សម្មាទិដ្ឋិ។បេ។ សម្មាសមាធិ។ យតោ ខោ អាវុសោ អរិយស្សាវកោ ឯវំ សង្ខារំ បជានាតិ ឯវំ សង្ខារសមុទយំ បជានាតិ ឯវំ សង្ខារនិរោធំ បជានាតិ ឯវំ សង្ខារនិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ បដិឃានុសយំ បដិវិនោទេត្វា អស្មីតិ ទិដ្ឋិមានានុសយំ សមូហនិត្វា អវិជ្ជំ បហាយ វិជ្ជំ ឧប្បាទេត្វា ទិដ្ឋេវ ធម្មេ ទុក្ខស្សន្តករោ ហោតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១២៨] សិយា បនាវុសោ។បេ។ សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយស្សាវកោ អវិជ្ជញ្ច បជានាតិ អវិជ្ជាសមុទយញ្ច បជានាតិ អវិជ្ជានិរោធញ្ច បជានាតិ អវិជ្ជានិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមា បនាវុសោ អវិជ្ជា កតមោ អវិជ្ជាសមុទយោ កតមោ អវិជ្ជានិរោធោ កតមា អវិជ្ជានិរោធគាមិនី បដិបទាតិ។ យំ ខោ អាវុសោ ទុក្ខេ អញ្ញាណំ ទុក្ខសមុទយេ អញ្ញាណំ ទុក្ខនិរោធេ អញ្ញាណំ ទុក្ខនិរោធគាមិនិយា [ឱ.ម. ទុក្ខនិរោធគាមិនី។] បដិបទាយ អញ្ញាណំ អយំ វុច្ចតាវុសោ អវិជ្ជា។ អាសវសមុទយា អវិជ្ជាសមុទយោ អាសវនិរោធា អវិជ្ជានិរោធោ អយមេវ អរិយោ អដ្ឋង្គិកោ មគ្គោ អវិជ្ជានិរោធគាមិនី បដិបទា សេយ្យថីទំ សម្មាទិដ្ឋិ។បេ។ សម្មាសមាធិ។ យតោ ខោ អាវុសោ អរិយស្សាវកោ ឯវំ អវិជ្ជំ បជានាតិ ឯវំ អវិជ្ជាសមុទយំ បជានាតិ ឯវំ អវិជ្ជានិរោធំ បជានាតិ ឯវំ អវិជ្ជានិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ បដិឃានុសយំ បដិវិនោទេត្វា អស្មីតិ ទិដ្ឋិមានានុសយំ សមូហនិត្វា អវិជ្ជំ បហាយ វិជ្ជំ ឧប្បាទេត្វា ទិដ្ឋេវ ធម្មេ ទុក្ខស្សន្តករោ ហោតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១២៩] សាធាវុសោតិ ខោ តេ ភិក្ខូ អាយស្មតោ សារីបុត្តស្ស ភាសិតំ អភិនន្ទិត្វា អនុមោទិត្វា អាយស្មន្តំ សារីបុត្តំ ឧត្តរឹ បញ្ហំ អបុច្ឆឹសុ [ឱ.ម. អបុច្ឆុំ។] សិយា បនាវុសោ អញ្ញោបិ បរិយាយោ យថា អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។

[១៣០] សិយាវុសោតិ អាយស្មា សារីបុត្តោ អវោច យតោ ខោ អាវុសោ អរិយស្សាវកោ អាសវញ្ច បជានាតិ អាសវសមុទយញ្ច បជានាតិ អាសវនិរោធញ្ច បជានាតិ អាសវនិរោធគាមិនឹ បដិបទញ្ច បជានាតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ កតមោ បនាវុសោ អាសវោ កតមោ អាសវសមុទយោ កតមោ អាសវនិរោធោ កតមា អាសវនិរោធគាមិនី បដិបទាតិ។ តយោមេ អាវុសោ អាសវា កាមាសវោ ភវាសវោ អវិជ្ជាសវោ។ អវិជ្ជាសមុទយា អាសវសមុទយោ អវិជ្ជានិរោធា អាសវនិរោធោ អយមេវ អរិយោ អដ្ឋង្គិកោ មគ្គោ អាសវនិរោធគាមិនី បដិបទា សេយ្យថីទំ សម្មាទិដ្ឋិ សម្មាសង្កប្បោ សម្មាវាចា សម្មាកម្មន្តោ សម្មាអាជីវោ សម្មាវាយាមោ សម្មាសតិ សម្មាសមាធិ។ យតោ ខោ អាវុសោ អរិយស្សាវកោ ឯវំ អាសវំ បជានាតិ ឯវំ អាសវសមុទយំ បជានាតិ ឯវំ អាសវនិរោធំ បជានាតិ ឯវំ អាសវនិរោធគាមិនឹ បដិបទំ បជានាតិ សោ សព្វសោ រាគានុសយំ បហាយ បដិឃានុសយំ បដិវិនោទេត្វា អស្មីតិ ទិដ្ឋិមានានុសយំ សមូហនិត្វា អវិជ្ជំ បហាយ វិជ្ជំ ឧប្បាទេត្វា ទិដ្ឋេវ ធម្មេ ទុក្ខស្សន្តករោ ហោតិ ឯត្តាវតាបិ ខោ អាវុសោ អរិយស្សាវកោ សម្មាទិដ្ឋី ហោតិ ឧជុគតាស្ស ទិដ្ឋិ ធម្មេ អវេច្ចប្បសាទេន សមន្នាគតោ អាគតោ ឥមំ សទ្ធម្មន្តិ។ ឥទមវោច អាយស្មា សារីបុត្តោ អត្តមនា តេ ភិក្ខូ អាយស្មតោ សារីបុត្តស្ស ភាសិតំ អភិនន្ទុន្តិ។

សម្មាទិដ្ឋិសុត្តំ នវមំ និដ្ឋិតំ [ឱ.ម. សម្មាទិដ្ឋិសុត្តន្តំ នវមំ។]។

ទុក្ខំ ជរាមរណំ ឧបាទានំ

សឡាយតនំ នាមរូបំ វិញ្ញាណំ

យំ ឆបទេ កតមំ

បនាវុសោ វទានកេ។

ជាតិ តណ្ហា ច វេទនា

អវិជ្ជាយ ចតុក្កកា

យា ចត្តារិ បទេ កតមា

បនាវុសោ វទានកេ។

អាហារោ ច ភវោ ផស្សោ

សង្ខារោ អាសវបញ្ចមោ

យំ បញ្ចបទេ កតមំ

បនាវុសោ វទានកេ។

កតមន្តិ ឆព្វិធា វុត្តំ

កតមានិ ចតុព្វិធា

កតមោ បញ្ចវិធោ វុត្តោ

សព្វសង្ខារានំ បញ្ចទស បទានិ ចាតិ [ម. ទុក្ខំ ជរាមរណំ ឧបាទានំ សឡាយតនំ នាមរូបំ វិញ្ញាណំ យា សា បរេ កតមា បនាវុសោ បទានំ កឹ ជាតិ តណ្ហា ច វេទនា អវិជ្ជាយ ចតុក្កនយោ ចត្តារិ បរេ កតមា បនាវុសោ បទានំ កេវលំ។ អាហារោ ច ភវោ ផស្សោ សង្ខារោ អាសវបញ្ចមោ យាវ បញ្ចបរេ កតមោ បនាវុសោ បទានំ កឹ កតមន្តិ ឆព្វិធា វុត្តំ។ កតមានិ ចតុព្វិធានិ កតមោ បញ្ចវិធោ វុត្តោ សព្វេសំ ឯកសង្ខានំ បញ្ចនយបទានិ ចាតិ ទិស្សន្តិ។]។

ទសមំ សតិប្បដ្ឋានសុត្តំ

[១៣១] ឯវម្មេ សុតំ។ ឯកំ សមយំ ភគវា កុរូសុ វិហរតិ កម្មាសធម្មំ នាម កុរូនំ និគមោ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។

[១៣២] ភគវា ឯតទវោច ឯកាយនោ អយំ ភិក្ខវេ មគ្គោ សត្តានំ វិសុទ្ធិយា សោកបរិទេវានំ សមតិក្កមាយ ទុក្ខទោមនស្សានំ អត្ថង្គមាយ ញាយស្ស អធិគមាយ និព្វានស្ស សច្ឆិកិរិយាយ។ យទិទំ ចត្តារោ សតិប្បដ្ឋានា។ កតមេ ចត្តារោ។ ឥធ ភិក្ខវេ ភិក្ខុ កាយេ កាយានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សំ។ វេទនាសុ វេទនានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សំ។ ចិត្តេ ចិត្តានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សំ។ ធម្មេសុ ធម្មានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សំ។

[ឆដ្ឋ. កាយានុបស្សនា អានាបានបព្វំ]

[១៣៣] កថញ្ច ភិក្ខវេ ភិក្ខុ កាយេ កាយានុបស្សី វិហរតិ។ ឥធ ភិក្ខវេ ភិក្ខុ អរញ្ញគតោ វា រុក្ខមូលគតោ វា សុញ្ញាគារគតោ វា និសីទតិ បល្លង្កំ អាភុជិត្វា ឧជុំ កាយំ បណិធាយ បរិមុខំ សតឹ ឧបដ្ឋបេត្វា។ សោ សតោ វ អស្សសតិ សតោ [ម. សតោ វ។] បស្សសតិ។ ទីឃំ វា អស្សសន្តោ ទីឃំ អស្សសាមីតិ បជានាតិ។ ទីឃំ វា បស្សសន្តោ ទីឃំ បស្សសាមីតិ បជានាតិ។ រស្សំ វា អស្សសន្តោ រស្សំ អស្សសាមីតិ បជានាតិ។ រស្សំ វា បស្សសន្តោ រស្សំ បស្សសាមីតិ បជានាតិ។ សព្វកាយប្បដិសំវេទី អស្សសិស្សាមីតិ សិក្ខតិ។ សព្វកាយប្បដិសំវេទី បស្សសិស្សាមីតិ សិក្ខតិ។ បស្សម្ភយំ កាយសង្ខារំ អស្សសិស្សាមីតិ សិក្ខតិ។ បស្សម្ភយំ កាយសង្ខារំ បស្សសិស្សាមីតិ សិក្ខតិ។ សេយ្យថាបិ ភិក្ខវេ ទក្ខោ ភមការោ វា ភមការន្តេវាសី វា ទីឃំ វា អញ្ឆន្តោ ទីឃំ អញ្ឆាមីតិ បជានាតិ។ រស្សំ វា អញ្ឆន្តោ រស្សំ អញ្ឆាមីតិ បជានាតិ។ ឯវមេវ ខោ ភិក្ខវេ ភិក្ខុ ទីឃំ វា អស្សសន្តោ ទីឃំ អស្សសាមីតិ បជានាតិ។ ទីឃំ វា បស្សសន្តោ ទីឃំ បស្សសាមីតិ បជានាតិ។ រស្សំ វា អស្សសន្តោ រស្សំ អស្សសាមីតិ បជានាតិ។ រស្សំ វា បស្សសន្តោ រស្សំ បស្សសាមីតិ បជានាតិ។ សព្វកាយប្បដិសំវេទី អស្សសិស្សាមីតិ សិក្ខតិ។ សព្វកាយប្បដិសំវេទី បស្សសិស្សាមីតិ សិក្ខតិ។ បស្សម្ភយំ កាយសង្ខារំ អស្សសិស្សាមីតិ សិក្ខតិ។ បស្សម្ភយំ កាយសង្ខារំ បស្សសិស្សាមីតិ សិក្ខតិ។ ឥតិ អជ្ឈត្តំ វា កាយេ កាយានុបស្សី វិហរតិ ពហិទ្ធា វា កាយេ កាយានុបស្សី វិហរតិ អជ្ឈត្តពហិទ្ធា វា កាយេ កាយានុបស្សី វិហរតិ សមុទយធម្មានុបស្សី វា កាយស្មឹ វិហរតិ វយធម្មានុបស្សី វា កាយស្មឹ វិហរតិ សមុទយវយធម្មានុបស្សី វា កាយស្មឹ វិហរតិ អត្ថិ កាយោតិ វា បនស្ស សតិ បច្ចុបដ្ឋិតា ហោតិ យាវទេវ ញាណមត្តាយ បដិស្សតិមត្តាយ អនិស្សិតោ ច វិហរតិ ន ច កិញ្ចិ លោកេ ឧបាទិយតិ ឯវម្បិ ភិក្ខវេ ភិក្ខុ កាយេ កាយានុបស្សី វិហរតិ។

អានាបានបព្វំ។

[ឆដ្ឋ. កាយានុបស្សនា ឥរិយាបថបព្វំ]

[១៣៤] បុន ចបរំ ភិក្ខវេ ភិក្ខុ គច្ឆន្តោ វា គច្ឆាមីតិ បជានាតិ ឋិតោ វា ឋិតោម្ហីតិ បជានាតិ និសិន្នោ វា និសិន្នោម្ហីតិ បជានាតិ សយានោ វា សយានោម្ហីតិ បជានាតិ។ យថា យថា វា បនស្ស កាយោ បណិហិតោ ហោតិ តថា តថា នំ បជានាតិ។ ឥតិ អជ្ឈត្តំ វា កាយេ កាយានុបស្សី វិហរតិ។បេ។ ឯវម្បិ ភិក្ខវេ ភិក្ខុ កាយេ កាយានុបស្សី វិហរតិ។

ឥរិយាបថបព្វំ។

[ឆដ្ឋ. កាយានុបស្សនា សម្បជានបព្វំ]

[១៣៥] បុន ចបរំ ភិក្ខវេ ភិក្ខុ អភិក្កន្តេ បដិក្កន្តេ សម្បជានការី ហោតិ អាលោកិតេ វិលោកិតេ សម្បជានការី ហោតិ សមិញ្ជិតេ បសារិតេ សម្បជានការី ហោតិ សង្ឃាដិបត្តចីវរធារណេ សម្បជានការី ហោតិ អសិតេ បីតេ ខាយិតេ សាយិតេ សម្បជានការី ហោតិ ឧច្ចារប្បស្សាវកម្មេ សម្បជានការី ហោតិ គតេ ឋិតេ និសិន្នេ សុត្តេ ជាគរិតេ ភាសិតេ តុណ្ហីភាវេ សម្បជានការី ហោតិ។ ឥតិ អជ្ឈត្តំ វា កាយេ កាយានុបស្សី វិហរតិ។បេ។ ឯវម្បិ ភិក្ខវេ ភិក្ខុ កាយេ កាយានុបស្សី វិហរតិ។

សម្បជញ្ញបព្វំ។

[ឆដ្ឋ. កាយានុបស្សនា បដិកូលមនសិការបព្វំ]

[១៣៦] បុន ចបរំ ភិក្ខវេ ភិក្ខុ ឥមមេវ កាយំ ឧទ្ធំ បាទតលា អធោ កេសមត្ថកា តចបរិយន្តំ បូរន្នានប្បការស្ស អសុចិនោ បច្ចវេក្ខតិ អត្ថិ ឥមស្មឹ កាយេ កេសា លោមា នខា ទន្តា តចោ មំសំ ន្ហារូ អដ្ឋី អដ្ឋិមិញ្ជំ វក្កំ ហទយំ យកនំ កិលោមកំ បិហកំ បប្ផាសំ អន្តំ អន្តគុណំ ឧទរិយំ ករីសំ បិត្តំ សេម្ហំ បុព្វោ លោហិតំ សេទោ មេទោ អស្សុ វសា ខេឡោ សិង្ឃាណិកា លសិកា មុត្តន្តិ [ម. មុត្តំ មត្ថលុង្គន្តិ។]។ សេយ្យថាបិ ភិក្ខវេ ឧភតោមុខា មូតោឡី [ឱ. មុតោឡី។ ម. បដោឡិ។] បូរា នានាវិហិតស្ស ធញ្ញស្ស សេយ្យថីទំ សាលីនំ វិហីនំ មុគ្គានំ មាសានំ តិលានំ តណ្ឌុលានំ។ តមេនំ ចក្ខុមា បុរិសោ មុញ្ចិត្វា បច្ចវេក្ខេយ្យ ឥមេ សាលី ឥមេ វីហី ឥមេ មុគ្គា ឥមេ មាសា ឥមេ តិលា ឥមេ តណ្ឌុលាតិ ឯវមេវ ខោ ភិក្ខវេ ភិក្ខុ ឥមមេវ កាយំ ឧទ្ធំ បាទតលា អធោ កេសមត្ថកា តចបរិយន្តំ បូរន្នានប្បការស្ស អសុចិនោ បច្ចវេក្ខតិ អត្ថិ ឥមស្មឹ កាយេ កេសា លោមា។បេ។ លសិកា មុត្តន្តិ។ ឥតិ អជ្ឈត្តំ វា កាយេ កាយានុបស្សី វិហរតិ។បេ។ ឯវម្បិ ភិក្ខវេ ភិក្ខុ កាយេ កាយានុបស្សី វិហរតិ។

បដិក្កូលបព្វំ [ឱ. បដិក្កូលបព្វន្តិ ន ទិស្សតិ។]។

[ឆដ្ឋ. កាយានុបស្សនា ធាតុមនសិការបព្វំ]

[១៣៧] បុន ចបរំ ភិក្ខវេ ភិក្ខុ ឥមមេវ កាយំ យថាឋិតំ យថាបណិហិតំ ធាតុសោ បច្ចវេក្ខតិ អត្ថិ ឥមស្មឹ កាយេ បឋវីធាតុ អាបោធាតុ តេជោធាតុ វាយោធាតូតិ។ សេយ្យថាបិ ភិក្ខវេ ទក្ខោ គោឃាតកោ វា គោឃាតកន្តេវាសី វា គាវឹ វធិត្វា ចតុមហាបថេ វិលសោ បដិវិភជិត្វា និសិន្នោ អស្ស ឯវមេវ ខោ ភិក្ខវេ ភិក្ខុ ឥមមេវ កាយំ យថាឋិតំ យថាបណិហិតំ ធាតុសោ បច្ចវេក្ខតិ អត្ថិ ឥមស្មឹ កាយេ បឋវីធាតុ អាបោធាតុ តេជោធាតុ វាយោធាតូតិ។ ឥតិ អជ្ឈត្តំ វា កាយេ កាយានុបស្សី វិហរតិ។បេ។ ឯវម្បិ ភិក្ខវេ ភិក្ខុ កាយេ កាយានុបស្សី វិហរតិ។

ធាតុបព្វំ [ឱ. ធាតុបព្វន្តិ ន ទិស្សតិ។]។

[ឆដ្ឋ. កាយានុបស្សនា នវសិវថិកបព្វំ]

[១៣៨] បុន ចបរំ ភិក្ខវេ ភិក្ខុ សេយ្យថាបិ បស្សេយ្យ សរីរំ សិវថិកាយ ឆឌ្ឌិតំ ឯកាហមតំ វា ទ្វីហមតំ វា តីហមតំ វា ឧទ្ធុមាតកំ វិនីលកំ វិបុព្វកជាតំ។ សោ ឥមមេវ កាយំ ឧបសំហរតិ អយម្បិ ខោ កាយោ ឯវំធម្មោ ឯវំភាវី ឯវំ អនតីតោតិ [ឱ. ឯតំ អនតីតោតិបិ បាឋោ។]។ ឥតិ អជ្ឈត្តំ វា កាយេ កាយានុបស្សី វិហរតិ។បេ។ ឯវម្បិ ភិក្ខវេ ភិក្ខុ កាយេ កាយានុបស្សី វិហរតិ។ បុន ចបរំ ភិក្ខវេ ភិក្ខុ សេយ្យថាបិ បស្សេយ្យ សរីរំ សីវថិកាយ ឆឌ្ឌិតំ កាកេហិ វា ខជ្ជមានំ គិជ្ឈេហិ វា ខជ្ជមានំ កុលលេហិ វា [ឱ.ម. កុលលេហិ វា ខជ្ជមានំ គិជ្ឈេហិ វាតិ ទិស្សន្តិ។] ខជ្ជមានំ សុវាណេហិ វា ខជ្ជមានំ [ឱ. សុបាណេហិ វា ខជ្ជមានំ។ ម. កង្កេហិ វា ខជ្ជមានំ សុនខេហិ វា ខជ្ជមានំ ព្យគ្ឃេហិ វា ខជ្ជមានំ ទីបីហិ វា ខជ្ជមានន្តិ ទិស្សន្តិ។] សិង្គាលេហិ វា ខជ្ជមានំ វិវិធេហិ វា បាណកជាតេហិ ខជ្ជមានំ។ សោ ឥមមេវ កាយំ ឧបសំហរតិ អយម្បិ ខោ កាយោ ឯវំធម្មោ ឯវំភាវី ឯវំអនតីតោតិ។ ឥតិ អជ្ឈត្តំ វា កាយេ កាយានុបស្សី វិហរតិ។បេ។ ឯវម្បិ ភិក្ខវេ ភិក្ខុ កាយេ កាយានុបស្សី វិហរតិ។ បុន ចបរំ ភិក្ខវេ ភិក្ខុ សេយ្យថាបិ បស្សេយ្យ សរីរំ សីវថិកាយ ឆឌ្ឌិតំ អដ្ឋិសង្ខលិកំ [ឱ. អដ្ឋិកសង្ខលិកន្តិ ទិស្សតិ។] សមំសលោហិតំ ន្ហារុសម្ពន្ធំ។បេ។ អដ្ឋិសង្ខលិកំ និម្មំសលោហិតមក្ខិតំ ន្ហារុសម្ពន្ធំ។បេ។ អដ្ឋិសង្ខលិកំ អបគតមំសលោហិតំ ន្ហារុសម្ពន្ធំ។បេ។ អដ្ឋិកានិ អបគតន្ហារុសម្ពន្ធានិ [ឱ. អបគតសម្ពន្ធានិ។] ទិសា វិទិសា វិក្ខិត្តានិ អញ្ញេន ហត្ថដ្ឋិកំ អញ្ញេន បាទដ្ឋិកំ អញ្ញេន ជង្ឃដ្ឋិកំ អញ្ញេន ឧរុដ្ឋិកំ អញ្ញេន កដិដ្ឋិកំ អញ្ញេន បិដ្ឋិកណ្ដកដ្ឋិកំ អញ្ញេន ផាសុកដ្ឋិកំ អញ្ញេន ឧរដ្ឋិកំ អញ្ញេន ពាហុដ្ឋិកំ អញ្ញេន អំសដ្ឋិកំ អញ្ញេន គីវដ្ឋិកំ អញ្ញេន ហនុដ្ឋិកំ អញ្ញេន ទន្តដ្ឋិកំ អញ្ញេន សីសកដាហំ [ឱ. អញ្ញេន ហត្ថដ្ឋិកំ អញ្ញេន បាទដ្ឋិកំ អញ្ញេន ជង្ឃដ្ឋិកំ អញ្ញេន ឧរដ្ឋិកំ អញ្ញេន កដដ្ឋិកំ អញ្ញេន បិដ្ឋិកណ្ដកំ អញ្ញេន សីសកដាហន្តិ ទិស្សន្តិ។ ម. អញ្ញេន ហត្ថដ្ឋិកំ អញ្ញេន បាទដ្ឋិកំ អញ្ញេន គោប្ផកដ្ឋិកំ អញ្ញេន ជង្ឃដ្ឋិកំ អញ្ញេន ឧរុដ្ឋិកំ អញ្ញេន កដដ្ឋិកំ អញ្ញេន ផាសុកដ្ឋិកំ អញ្ញេន បិដ្ឋិដ្ឋិកំ អញ្ញេន ខន្ធដ្ឋិកំ អញ្ញេន គីវដ្ឋិកំ អញ្ញេន ហនុកដ្ឋិកំ អញ្ញេន ទន្តដ្ឋិកំ អញ្ញេន សីសកដាហន្តិ ទិស្សន្តិ។]។ សោ ឥមមេវ កាយំ ឧបសំហរតិ អយម្បិ ខោ កាយោ ឯវំធម្មោ ឯវំភាវី ឯវំ អនតីតោតិ។ ឥតិ អជ្ឈត្តំ វា កាយេ កាយានុបស្សី វិហរតិ។បេ។ ឯវម្បិ ភិក្ខវេ ភិក្ខុ កាយេ កាយានុបស្សី វិហរតិ។ បុន ចបរំ ភិក្ខវេ ភិក្ខុ សេយ្យថាបិ បស្សេយ្យ សរីរំ សីវថិកាយ ឆឌ្ឌិតំ អដ្ឋិកានិ សេតានិ សង្ខវណ្ណូបនិភានិ [ម. សង្ខវណ្ណបដិភាគានិ។] …។ អដ្ឋិកានិ បុញ្ជកិតានិ [ម. បុញ្ជកីដានិ។] តេរោវស្សកានិ…។ អដ្ឋិកានិ បូតីនិ ចុណ្ណកជាតានិ។ សោ ឥមមេវ កាយំ ឧបសំហរតិ អយម្បិ ខោ កាយោ ឯវំធម្មោ ឯវំភាវី ឯវំ អនតីតោតិ។ ឥតិ អជ្ឈត្តំ វា កាយេ កាយានុបស្សី វិហរតិ ពហិទ្ធា វា កាយេ កាយានុបស្សី វិហរតិ អជ្ឈត្តពហិទ្ធា វា កាយេ កាយានុបស្សី វិហរតិ សមុទយធម្មានុបស្សី វា កាយស្មឹ វិហរតិ វយធម្មានុបស្សី វា កាយស្មឹ វិហរតិ សមុទយវយធម្មានុបស្សី វា កាយស្មឹ វិហរតិ អត្ថិ កាយោតិ វា បនស្ស សតិ បច្ចុបដ្ឋិតា ហោតិ យាវទេវ ញាណមត្តាយ បតិស្សតិមត្តាយ អនិស្សិតោ ច វិហរតិ ន ច កិញ្ចិ លោកេ ឧបាទិយតិ ឯវំ ខោ ភិក្ខវេ ភិក្ខុ កាយេ កាយានុបស្សី វិហរតិ។

នវសីវថិកាបព្វំ។

កាយានុបស្សនាសតិប្បដ្ឋានំ។

[ឆដ្ឋ. វេទនានុបស្សនា]

[១៣៩] កថញ្ច ភិក្ខវេ ភិក្ខុ វេទនាសុ វេទនានុបស្សី វិហរតិ។ ឥធ ភិក្ខវេ ភិក្ខុ សុខំ វេទនំ វេទិយមានោ សុខំ វេទនំ វេទិយាមីតិ បជានាតិ ទុក្ខំ វេទនំ វេទិយមានោ ទុក្ខំ វេទនំ វេទិយាមីតិ បជានាតិ អទុក្ខមសុខំ វេទនំ វេទិយមានោ អទុក្ខមសុខំ វេទនំ វេទិយាមីតិ បជានាតិ។ សាមិសំ វា សុខំ វេទនំ វេទិយមានោ សាមិសំ សុខំ វេទនំ វេទិយាមីតិ បជានាតិ និរាមិសំ វា សុខំ វេទនំ វេទិយមានោ និរាមិសំ សុខំ វេទនំ វេទិយាមីតិ បជានាតិ។ សាមិសំ វា ទុក្ខំ វេទនំ វេទិយមានោ សាមិសំ ទុក្ខំ វេទនំ វេទិយាមីតិ បជានាតិ និរាមិសំ វា ទុក្ខំ វេទនំ វេទិយមានោ និរាមិសំ ទុក្ខំ វេទនំ វេទិយាមីតិ បជានាតិ។ សាមិសំ វា អទុក្ខមសុខំ វេទនំ វេទិយមានោ សាមិសំ អទុក្ខមសុខំ វេទនំ វេទិយាមីតិ បជានាតិ និរាមិសំ វា អទុក្ខមសុខំ វេទនំ វេទិយមានោ និរាមិសំ អទុក្ខមសុខំ វេទនំ វេទិយាមីតិ បជានាតិ។ ឥតិ អជ្ឈត្តំ វា វេទនាសុ វេទនានុបស្សី វិហរតិ ពហិទ្ធា វា វេទនាសុ វេទនានុបស្សី វិហរតិ អជ្ឈត្តពហិទ្ធា វា វេទនាសុ វេទនានុបស្សី វិហរតិ សមុទយធម្មានុបស្សី វា វេទនាសុ វិហរតិ វយធម្មានុបស្សី វា វេទនាសុ វិហរតិ សមុទយវយធម្មានុបស្សី វា វេទនាសុ វិហរតិ អត្ថិ វេទនាតិ វា បនស្ស សតិ បច្ចុបដ្ឋិតា ហោតិ យាវទេវ ញាណមត្តាយ បដិស្សតិមត្តាយ អនិស្សិតោ ច វិហរតិ ន ច កិញ្ចិ លោកេ ឧបាទិយតិ ឯវំ ខោ ភិក្ខវេ ភិក្ខុ វេទនាសុ វេទនានុបស្សី វិហរតិ។

វេទនានុបស្សនាសតិបដ្ឋានំ [ឱ. វេទនានុបស្សនាសតិបដ្ឋានន្តិ ន ទិស្សតិ។]។

[ឆដ្ឋ. ចិត្តានុបស្សនា]

[១៤០] កថញ្ច ភិក្ខវេ ភិក្ខុ ចិត្តេ ចិត្តានុបស្សី វិហរតិ។ ឥធ ភិក្ខវេ ភិក្ខុ សរាគំ វា ចិត្តំ សរាគំ ចិត្តន្តិ បជានាតិ វីតរាគំ វា ចិត្តំ វីតរាគំ ចិត្តន្តិ បជានាតិ។ សទោសំ វា ចិត្តំ សទោសំ ចិត្តន្តិ បជានាតិ វីតទោសំ វា ចិត្តំ វីតទោសំ ចិត្តន្តិ បជានាតិ។ សមោហំ វា ចិត្តំ សមោហំ ចិត្តន្តិ បជានាតិ វីតមោហំ វា ចិត្តំ វីតមោហំ ចិត្តន្តិ បជានាតិ។ សង្ខិត្តំ វា ចិត្តំ សង្ខិត្តំ ចិត្តន្តិ បជានាតិ វិក្ខិត្តំ វា ចិត្តំ វិក្ខិត្តំ ចិត្តន្តិ បជានាតិ។ មហគ្គតំ វា ចិត្តំ មហគ្គតំ ចិត្តន្តិ បជានាតិ អមហគ្គតំ វា ចិត្តំ អមហគ្គតំ ចិត្តន្តិ បជានាតិ។ សឧត្តរំ វា ចិត្តំ សឧត្តរំ ចិត្តន្តិ បជានាតិ អនុត្តរំ វា ចិត្តំ អនុត្តរំ ចិត្តន្តិ បជានាតិ។ សមាហិតំ វា ចិត្តំ សមាហិតំ ចិត្តន្តិ បជានាតិ អសមាហិតំ វា ចិត្តំ អសមាហិតំ ចិត្តន្តិ បជានាតិ។ វិមុត្តំ វា ចិត្តំ វិមុត្តំ ចិត្តន្តិ បជានាតិ អវិមុត្តំ វា ចិត្តំ អវិមុត្តំ ចិត្តន្តិ បជានាតិ។ ឥតិ អជ្ឈត្តំ វា ចិត្តេ ចិត្តានុបស្សី វិហរតិ ពហិទ្ធា វា ចិត្តេ ចិត្តានុបស្សី វិហរតិ អជ្ឈត្តពហិទ្ធា វា ចិត្តេ ចិត្តានុបស្សី វិហរតិ សមុទយធម្មានុបស្សី វា ចិត្តស្មឹ វិហរតិ វយធម្មានុបស្សី វា ចិត្តស្មឹ វិហរតិ សមុទយវយធម្មានុបស្សី វា ចិត្តស្មឹ វិហរតិ អត្ថិ ចិត្តន្តិ វា បនស្ស សតិ បច្ចុបដ្ឋិតា ហោតិ យាវទេវ ញាណមត្តាយ បដិស្សតិមត្តាយ អនិស្សិតោ ច វិហរតិ ន ច កិញ្ចិ លោកេ ឧបាទិយតិ ឯវំ ខោ ភិក្ខវេ ភិក្ខុ ចិត្តេ ចិត្តានុបស្សី វិហរតិ។

ចិត្តានុបស្សនាសតិបដ្ឋានំ [ឱ. ចិត្តានុបស្សនាសតិបដ្ឋានន្តិ ន ទិស្សតិ។]។

[ឆដ្ឋ. ធម្មានុបស្សនា នីវរណបព្វំ]

[១៤១] កថញ្ច ភិក្ខវេ ភិក្ខុ ធម្មេសុ ធម្មានុបស្សី វិហរតិ។ ឥធ ភិក្ខវេ ភិក្ខុ ធម្មេសុ ធម្មានុបស្សី វិហរតិ បញ្ចសុ នីវរណេសុ។ កថញ្ច ភិក្ខវេ ភិក្ខុ ធម្មេសុ ធម្មានុបស្សី វិហរតិ បញ្ចសុ នីវរណេសុ។ ឥធ ភិក្ខវេ ភិក្ខុ សន្តំ វា អជ្ឈត្តំ កាមច្ឆន្ទំ អត្ថិ មេ អជ្ឈត្តំ កាមច្ឆន្ទោតិ បជានាតិ អសន្តំ វា អជ្ឈត្តំ កាមច្ឆន្ទំ នត្ថិ មេ អជ្ឈត្តំ កាមច្ឆន្ទោតិ បជានាតិ។ យថា ច អនុប្បន្នស្ស កាមច្ឆន្ទស្ស ឧប្បាទោ ហោតិ តញ្ច បជានាតិ យថា ច ឧប្បន្នស្ស កាមច្ឆន្ទស្ស បហានំ ហោតិ តញ្ច បជានាតិ យថា ច បហីនស្ស កាមច្ឆន្ទស្ស អាយតឹ អនុប្បាទោ ហោតិ តញ្ច បជានាតិ។ សន្តំ វា អជ្ឈត្តំ ព្យាបាទំ អត្ថិ មេ អជ្ឈត្តំ ព្យាបាទោតិ បជានាតិ អសន្តំ វា អជ្ឈត្តំ ព្យាបាទំ នត្ថិ មេ អជ្ឈត្តំ ព្យាបាទោតិ បជានាតិ។ យថា ច អនុប្បន្នស្ស ព្យាបាទស្ស ឧប្បាទោ ហោតិ តញ្ច បជានាតិ យថា ច ឧប្បន្នស្ស ព្យាបាទស្ស បហានំ ហោតិ តញ្ច បជានាតិ យថា ច បហីនស្ស ព្យាបាទស្ស អាយតឹ អនុប្បាទោ ហោតិ តញ្ច បជានាតិ។ សន្តំ វា អជ្ឈត្តំ ថីនមិទ្ធំ អត្ថិ មេ អជ្ឈត្តំ ថីនមិទ្ធន្តិ បជានាតិ អសន្តំ វា អជ្ឈត្តំ ថីនមិទ្ធំ នត្ថិ មេ អជ្ឈត្តំ ថីនមិទ្ធន្តិ បជានាតិ។ យថា ច អនុប្បន្នស្ស ថីនមិទ្ធស្ស ឧប្បាទោ ហោតិ តញ្ច បជានាតិ យថា ច ឧប្បន្នស្ស ថីនមិទ្ធស្ស បហានំ ហោតិ តញ្ច បជានាតិ យថា ច បហីនស្ស ថីនមិទ្ធស្ស អាយតឹ អនុប្បាទោ ហោតិ តញ្ច បជានាតិ។ សន្តំ វា អជ្ឈត្តំ ឧទ្ធច្ចកុក្កុច្ចំ អត្ថិ មេ អជ្ឈត្តំ ឧទ្ធច្ចកុក្កុច្ចន្តិ បជានាតិ អសន្តំ វា អជ្ឈត្តំ ឧទ្ធច្ចកុក្កុច្ចំ នត្ថិ មេ អជ្ឈត្តំ ឧទ្ធច្ចកុក្កុច្ចន្តិ បជានាតិ។ យថា ច អនុប្បន្នស្ស ឧទ្ធច្ចកុក្កុច្ចស្ស ឧប្បាទោ ហោតិ តញ្ច បជានាតិ យថា ច ឧប្បន្នស្ស ឧទ្ធច្ចកុក្កុច្ចស្ស បហានំ ហោតិ តញ្ច បជានាតិ យថា ច បហីនស្ស ឧទ្ធច្ចកុក្កុច្ចស្ស អាយតឹ អនុប្បាទោ ហោតិ តញ្ច បជានាតិ។ សន្តំ វា អជ្ឈត្តំ វីចិកិច្ឆំ អត្ថិ មេ អជ្ឈត្តំ វីចិកិច្ឆាតិ បជានាតិ អសន្តំ វា អជ្ឈត្តំ វីចិកិច្ឆំ នត្ថិ មេ អជ្ឈត្តំ វីចិកិច្ឆាតិ បជានាតិ។ យថា ច អនុប្បន្នាយ វីចិកិច្ឆាយ ឧប្បាទោ ហោតិ តញ្ច បជានាតិ យថា ច ឧប្បន្នាយ វីចិកិច្ឆាយ បហានំ ហោតិ តញ្ច បជានាតិ យថា ច បហីនាយ វីចិកិច្ឆាយ អាយតឹ អនុប្បាទោ ហោតិ តញ្ច បជានាតិ។ ឥតិ អជ្ឈត្តំ វា ធម្មេសុ ធម្មានុបស្សី វិហរតិ ពហិទ្ធា វា ធម្មេសុ ធម្មានុបស្សី វិហរតិ អជ្ឈត្តពហិទ្ធា វា ធម្មេសុ ធម្មានុបស្សី វិហរតិ សមុទយធម្មានុបស្សី វា ធម្មេសុ វិហរតិ វយធម្មានុបស្សី វា ធម្មេសុ វិហរតិ សមុទយវយធម្មានុបស្សី វា ធម្មេសុ វិហរតិ អត្ថិ ធម្មាតិ វា បនស្ស សតិ បច្ចុបដ្ឋិតា ហោតិ យាវទេវ ញាណមត្តាយ បដិស្សតិមត្តាយ អនិស្សិតោ ច វិហរតិ ន ច កិញ្ចិ លោកេ ឧបាទិយតិ ឯវម្បិ ខោ ភិក្ខវេ ភិក្ខុ ធម្មេសុ ធម្មានុបស្សី វិហរតិ បញ្ចសុ នីវរណេសុ។

នីវរណបព្វំ [ឱ. នីវរណបព្វន្តិ ន ទិស្សតិ។]។

[ឆដ្ឋ. ធម្មានុបស្សនា ខន្ធបព្វំ]

[១៤២] បុន ចបរំ ភិក្ខវេ ភិក្ខុ ធម្មេសុ ធម្មានុបស្សី វិហរតិ បញ្ចសុ ឧបាទានក្ខន្ធេសុ។ កថញ្ច ភិក្ខវេ ភិក្ខុ ធម្មេសុ ធម្មានុបស្សី វិហរតិ បញ្ចសុ ឧបាទានក្ខន្ធេសុ។ ឥធ ភិក្ខវេ ភិក្ខុ ឥតិ រូបំ ឥតិ រូបស្ស សមុទយោ ឥតិ រូបស្ស អត្ថង្គមោ ឥតិ វេទនា ឥតិ វេទនាយ សមុទយោ ឥតិ វេទនាយ អត្ថង្គមោ ឥតិ សញ្ញា ឥតិ សញ្ញាយ សមុទយោ ឥតិ សញ្ញាយ អត្ថង្គមោ ឥតិ សង្ខារា ឥតិ សង្ខារានំ សមុទយោ ឥតិ សង្ខារានំ អត្ថង្គមោ ឥតិ វិញ្ញាណំ ឥតិ វិញ្ញាណស្ស សមុទយោ ឥតិ វិញ្ញាណស្ស អត្ថង្គមោតិ។ ឥតិ អជ្ឈត្តំ វា ធម្មេសុ ធម្មានុបស្សី វិហរតិ ពហិទ្ធា វា ធម្មេសុ ធម្មានុបស្សី វិហរតិ អជ្ឈត្តពហិទ្ធា វា ធម្មេសុ ធម្មានុបស្សី វិហរតិ សមុទយធម្មានុបស្សី វា ធម្មេសុ វិហរតិ វយធម្មានុបស្សី វា ធម្មេសុ វិហរតិ សមុទយវយធម្មានុបស្សី វា ធម្មេសុ វិហរតិ អត្ថិ ធម្មាតិ វា បនស្ស សតិ បច្ចុបដ្ឋិតា ហោតិ យាវទេវ ញាណមត្តាយ បដិស្សតិមត្តាយ អនិស្សិតោ ច វិហរតិ ន ច កិញ្ចិ លោកេ ឧបាទិយតិ ឯវម្បិ ខោ ភិក្ខវេ ភិក្ខុ ធម្មេសុ ធម្មានុបស្សី វិហរតិ បញ្ចសុ ឧបាទានក្ខន្ធេសុ។

ខន្ធបព្វំ។

[ឆដ្ឋ. ធម្មានុបស្សនា អាយតនបព្វំ]

[១៤៣] បុន ចបរំ ភិក្ខវេ ភិក្ខុ ធម្មេសុ ធម្មានុបស្សី វិហរតិ ឆសុ អជ្ឈត្តិកពាហិរេសុ អាយតនេសុ។ កថញ្ច ភិក្ខវេ ភិក្ខុ ធម្មេសុ ធម្មានុបស្សី វិហរតិ ឆសុ អជ្ឈត្តិកពាហិរេសុ អាយតនេសុ។ ឥធ ភិក្ខវេ ភិក្ខុ ចក្ខុញ្ច បជានាតិ រូបេ ច បជានាតិ យញ្ច តទុភយំ បដិច្ច ឧប្បជ្ជតិ សញ្ញោជនំ [ឱ. សំយោជនំ។] តញ្ច បជានាតិ។ យថា ច អនុប្បន្នស្ស សញ្ញោជនស្ស ឧប្បាទោ ហោតិ តញ្ច បជានាតិ យថា ច ឧប្បន្នស្ស សញ្ញោជនស្ស បហានំ ហោតិ តញ្ច បជានាតិ យថា ច បហីនស្ស សញ្ញោជនស្ស អាយតឹ អនុប្បាទោ ហោតិ តញ្ច បជានាតិ។ សោតញ្ច បជានាតិ សទ្ទេ ច បជានាតិ…។ ឃានញ្ច បជានាតិ គន្ធេ ច បជានាតិ…។ ជិវ្ហញ្ច បជានាតិ រសេ ច បជានាតិ…។ កាយញ្ច បជានាតិ ផោដ្ឋព្វេ ច បជានាតិ…។ មនញ្ច បជានាតិ ធម្មេ ច បជានាតិ យញ្ច តទុភយំ បដិច្ច ឧប្បជ្ជតិ សញ្ញោជនំ តញ្ច បជានាតិ។ យថា ច អនុប្បន្នស្ស សញ្ញោជនស្ស ឧប្បាទោ ហោតិ តញ្ច បជានាតិ យថា ច ឧប្បន្នស្ស សញ្ញោជនស្ស បហានំ ហោតិ តញ្ច បជានាតិ យថា ច បហីនស្ស សញ្ញោជនស្ស អាយតឹ អនុប្បាទោ ហោតិ តញ្ច បជានាតិ។ ឥតិ អជ្ឈត្តំ វា ធម្មេសុ ធម្មានុបស្សី វិហរតិ ពហិទ្ធា វា ធម្មេសុ ធម្មានុបស្សី វិហរតិ អជ្ឈត្តពហិទ្ធា វា ធម្មេសុ ធម្មានុបស្សី វិហរតិ សមុទយធម្មានុបស្សី វា ធម្មេសុ វិហរតិ វយធម្មានុបស្សី វា ធម្មេសុ វិហរតិ សមុទយវយធម្មានុបស្សី វា ធម្មេសុ វិហរតិ អត្ថិ ធម្មាតិ វា បនស្ស សតិ បច្ចុបដ្ឋិតា ហោតិ យាវទេវ ញាណមត្តាយ បដិស្សតិមត្តាយ អនិស្សិតោ ច វិហរតិ ន ច កិញ្ចិ លោកេ ឧបាទិយតិ ឯវម្បិ ខោ ភិក្ខវេ ភិក្ខុ ធម្មេសុ ធម្មានុបស្សី វិហរតិ ឆសុ អជ្ឈត្តិកពាហិរេសុ អាយតនេសុ។

អាយតនបព្វំ [ឱ. អាយតនបព្វន្តិ ន ទិស្សតិ។]។

[ឆដ្ឋ. ធម្មានុបស្សនា ពោជ្ឈង្គបព្វំ]

[១៤៤] បុន ចបរំ ភិក្ខវេ ភិក្ខុ ធម្មេសុ ធម្មានុបស្សី វិហរតិ សត្តសុ ពោជ្ឈង្គេសុ។ កថញ្ច ភិក្ខវេ ភិក្ខុ ធម្មេសុ ធម្មានុបស្សី វិហរតិ សត្តសុ ពោជ្ឈង្គេសុ។ ឥធ ភិក្ខវេ ភិក្ខុ សន្តំ វា អជ្ឈត្តំ សតិសម្ពោជ្ឈង្គំ អត្ថិ មេ អជ្ឈត្តំ សតិសម្ពោជ្ឈង្គោតិ បជានាតិ អសន្តំ វា អជ្ឈត្តំ សតិសម្ពោជ្ឈង្គំ នត្ថិ មេ អជ្ឈត្តំ សតិសម្ពោជ្ឈង្គោតិ បជានាតិ។ យថា ច អនុប្បន្នស្ស សតិសម្ពោជ្ឈង្គស្ស ឧប្បាទោ ហោតិ តញ្ច បជានាតិ យថា ច ឧប្បន្នស្ស សតិសម្ពោជ្ឈង្គស្ស ភាវនាបារិបូរិ [ឱ.ម. ភាវនាបារិបូរី។] ហោតិ តញ្ច បជានាតិ។ សន្តំ វា អជ្ឈត្តំ ធម្មវិចយសម្ពោជ្ឈង្គំ…។ សន្តំ វា អជ្ឈត្តំ វីរិយសម្ពោជ្ឈង្គំ…។ សន្តំ វា អជ្ឈត្តំ បីតិសម្ពោជ្ឈង្គំ…។ សន្តំ វា អជ្ឈត្តំ បស្សទ្ធិសម្ពោជ្ឈង្គំ…។ សន្តំ វា អជ្ឈត្តំ សមាធិសម្ពោជ្ឈង្គំ…។ សន្តំ វា អជ្ឈត្តំ ឧបេក្ខាសម្ពោជ្ឈង្គំ អត្ថិ មេ អជ្ឈត្តំ ឧបេក្ខាសម្ពោជ្ឈង្គោតិ បជានាតិ អសន្តំ វា អជ្ឈត្តំ ឧបេក្ខាសម្ពោជ្ឈង្គំ នត្ថិ មេ អជ្ឈត្តំ ឧបេក្ខាសម្ពោជ្ឈង្គោតិ បជានាតិ។ យថា ច អនុប្បន្នស្ស ឧបេក្ខាសម្ពោជ្ឈង្គស្ស ឧប្បាទោ ហោតិ តញ្ច បជានាតិ យថា ច ឧប្បន្នស្ស ឧបេក្ខាសម្ពោជ្ឈង្គស្ស ភាវនាបារិបូរិ ហោតិ តញ្ច បជានាតិ។ ឥតិ អជ្ឈត្តំ វា ធម្មេសុ ធម្មានុបស្សី វិហរតិ ពហិទ្ធា វា ធម្មេសុ ធម្មានុបស្សី វិហរតិ អជ្ឈត្តពហិទ្ធា វា ធម្មេសុ ធម្មានុបស្សី វិហរតិ សមុទយធម្មានុបស្សី វា ធម្មេសុ វិហរតិ វយធម្មានុបស្សី វា ធម្មេសុ វិហរតិ អត្ថិ ធម្មាតិ វា បនស្ស សតិ បច្ចុបដ្ឋិតា ហោតិ យាវទេវ ញាណមត្តាយ បតិស្សតិមត្តាយ អនិស្សិតោ ច វិហរតិ ន ច កិញ្ចិ លោកេ ឧបាទិយតិ ឯវម្បិ ខោ ភិក្ខវេ ភិក្ខុ ធម្មេសុ ធម្មានុបស្សី វិហរតិ សត្តសុ ពោជ្ឈង្គេសុ។

ពោជ្ឈង្គបព្វំ [បាឋន្តរេ បុន បឋមភាណវារោតិ ទិស្សតិ។ ឱ. ពោជ្ឈង្គបព្វន្តិ ន ទិស្សតិ។]។

[ឆដ្ឋ. ធម្មានុបស្សនា សច្ចបព្វំ]

[១៤៥] បុន ចបរំ ភិក្ខវេ ភិក្ខុ ធម្មេសុ ធម្មានុបស្សី វិហរតិ ចតូសុ អរិយសច្ចេសុ។ កថញ្ច ភិក្ខវេ ភិក្ខុ ធម្មេសុ ធម្មានុបស្សី វិហរតិ ចតូសុ អរិយសច្ចេសុ។ ឥធ ភិក្ខវេ ភិក្ខុ ឥទំ ទុក្ខន្តិ យថាភូតំ បជានាតិ អយំ ទុក្ខសមុទយោតិ យថាភូតំ បជានាតិ អយំ ទុក្ខនិរោធោតិ យថាភូតំ បជានាតិ អយំ ទុក្ខនិរោធគាមិនី បដិបទាតិ យថាភូតំ បជានាតិ។ ឥតិ អជ្ឈត្តំ វា ធម្មេសុ ធម្មានុបស្សី វិហរតិ ពហិទ្ធា វា ធម្មេសុ ធម្មានុបស្សី វិហរតិ អជ្ឈត្តពហិទ្ធា វា ធម្មេសុ ធម្មានុបស្សី វិហរតិ សមុទយធម្មានុបស្សី វា ធម្មេសុ វិហរតិ វយធម្មានុបស្សី វា ធម្មេសុ វិហរតិ សមុទយវយធម្មានុបស្សី វា ធម្មេសុ វិហរតិ អត្ថិ ធម្មាតិ វា បនស្ស សតិ បច្ចុបដ្ឋិតា ហោតិ យាវទេវ ញាណមត្តាយ បតិស្សតិមត្តាយ អនិស្សិតោ ច វិហរតិ ន ច កិញ្ចិ លោកេ ឧបាទិយតិ ឯវំ ខោ ភិក្ខវេ ភិក្ខុ ធម្មេសុ ធម្មានុបស្សី វិហរតិ ចតូសុ អរិយសច្ចេសុ [បាឋន្តរេ ឥតិ អជ្ឈត្តំ វា។បេ។ បឋមភាណវារោតិ ឥមានិ ន ទិស្សន្តិ។]។

សច្ចបព្វំ។ បឋមភាណវារោ។

[ឆដ្ឋ. ទុក្ខសច្ចនិទ្ទេសោ]

[១៤៦] [ស្សាមបោត្ថកេ វិត្ថារបាឋោ។] កតមញ្ច ភិក្ខវេ ទុក្ខំ អរិយសច្ចំ។ ជាតិបិ ទុក្ខា ជរាបិ ទុក្ខា មរណម្បិ ទុក្ខំ សោកបរិទេវទុក្ខទោមនស្សុបាយាសាបិ ទុក្ខា អប្បិយេហិ សម្បយោគោ ទុក្ខោ បិយេហិ វិប្បយោគោ ទុក្ខោ យម្បិច្ឆំ ន លភតិ តម្បិ ទុក្ខំ សង្ខិត្តេន បញ្ចុបាទានក្ខន្ធា ទុក្ខា។ កតមា ច ភិក្ខវេ ជាតិ។ យា តេសំ តេសំ សត្តានំ តម្ហិ តម្ហិ សត្តនិកាយេ ជាតិ សញ្ជាតិ ឱក្កន្តិ អភិនិព្វត្តិ ខន្ធានំ បាតុភាវោ អាយតនានំ បដិលាភោ អយំ វុច្ចតិ ភិក្ខវេ ជាតិ។ កតមា ច ភិក្ខវេ ជរា។ យា តេសំ តេសំ សត្តានំ តម្ហិ តម្ហិ សត្តនិកាយេ ជរា ជិរណតា ខណ្ឌិច្ចំ បាលិច្ចំ វលិត្តចតា អាយុនោ សំហានិ ឥន្ទ្រិយានំ បរិបាកោ អយំ វុច្ចតិ ភិក្ខវេ ជរា។ កតមញ្ច ភិក្ខវេ មរណំ។ យា តេសំ តេសំ សត្តានំ តម្ហា តម្ហា សត្តនិកាយា ចុតិ ចវនតា ភេទោ អន្តរធានំ មច្ចុ មរណំ កាលកិរិយា ខន្ធានំ ភេទោ កឡេវរស្ស និក្ខេបោ ជីវិតិន្ទ្រិយស្ស ឧបច្ឆេទោ ឥទំ វុច្ចតិ ភិក្ខវេ មរណំ។ កតមោ ច ភិក្ខវេ សោកោ។ យោ ខោ ភិក្ខវេ អញ្ញតរញ្ញតរេន ព្យសនេន សមន្នាគតស្ស អញ្ញតរញ្ញតរេន ទុក្ខធម្មេន ផុដ្ឋស្ស សោកោ សោចនា សោចិតត្តំ អន្តោសោកោ អន្តោបរិសោកោ អយំ វុច្ចតិ ភិក្ខវេ សោកោ។ កតមោ ច ភិក្ខវេ បរិទេវោ។ យោ ខោ ភិក្ខវេ អញ្ញតរញ្ញតរេន ព្យសនេន សមន្នាគតស្ស អញ្ញតរញ្ញតរេន ទុក្ខធម្មេន ផុដ្ឋស្ស អាទេវោ បរិទេវោ អាទេវនា បរិទេវនា អាទេវិតត្តំ បរិទេវិតត្តំ អយំ វុច្ចតិ ភិក្ខវេ បរិទេវោ។ កតមញ្ច ភិក្ខវេ ទុក្ខំ។ យំ ខោ ភិក្ខវេ កាយិកំ ទុក្ខំ កាយិកំ អសាតំ កាយសម្ផស្សជំ ទុក្ខំ អសាតំ វេទយិតំ ឥទំ វុច្ចតិ ភិក្ខវេ ទុក្ខំ។ កតមញ្ច ភិក្ខវេ ទោមនស្សំ។ យំ ខោ ភិក្ខវេ ចេតសិកំ ទុក្ខំ ចេតសិកំ អសាតំ ចេតោសម្ផស្សជំ ទុក្ខំ អសាតំ វេទយិតំ ឥទំ វុច្ចតិ ភិក្ខវេ ទោមនស្សំ។ កតមោ ច ភិក្ខវេ ឧបាយាសោ។ យោ ខោ ភិក្ខវេ អញ្ញតរញ្ញតរេន ព្យសនេន សមន្នាគតស្ស អញ្ញតរញ្ញតរេន ទុក្ខធម្មេន ផុដ្ឋស្ស អាយាសោ ឧបាយាសោ អាយាសិតត្តំ ឧបាយាសិតត្តំ អយំ វុច្ចតិ ភិក្ខវេ ឧបាយាសោ។ កតមោ ច ភិក្ខវេ អប្បិយេហិ សម្បយោគោ ទុក្ខោ។ ឥធ ភិក្ខវេ យស្ស តេ ហោន្តិ អនិដ្ឋា អកន្តា អមនាបា រូបា សទ្ទា គន្ធា រសា ផោដ្ឋព្វា យេ វា បនស្ស តេ ហោន្តិ អនត្ថកាមា អហិតកាមា អផាសុកាមា អយោគក្ខេមកាមា យា តេហិ សង្គតិ [ម. សទ្ធឹ សង្គតិ។] សមាគមោ សមោធានំ មិស្សីភាវោ អយំ វុច្ចតិ ភិក្ខវេ អប្បិយេហិ សម្បយោគោ ទុក្ខោ។ កតមោ ច ភិក្ខវេ បិយេហិ វិប្បយោគោ ទុក្ខោ។ ឥធ ភិក្ខវេ យស្ស តេ ហោន្តិ ឥដ្ឋា កន្តា មនាបា រូបា សទ្ទា គន្ធា រសា ផោដ្ឋព្វា យេ វា បនស្ស តេ ហោន្តិ អត្ថកាមា ហិតកាមា ផាសុកាមា យោគក្ខេមកាមា មាតា វា បិតា វា ភាតា វា ភគិនី វា មិត្តា វា អមច្ចា វា ញាតិសាលោហិតា វា យា តេហិ អសង្គតិ អសមាគមោ អសមោធានំ អមិស្សីភាវោ អយំ វុច្ចតិ ភិក្ខវេ បិយេហិ វិប្បយោគោ ទុក្ខោ។ កតមញ្ច ភិក្ខវេ យម្បិច្ឆំ ន លភតិ តម្បិ ទុក្ខំ។ ជាតិធម្មានំ ភិក្ខវេ សត្តានំ ឯវំ ឥច្ឆា ឧប្បជ្ជតិ អហោ វត មយំ ន ជាតិធម្មា អស្សាម ន ច វត នោ ជាតិ អាគច្ឆេយ្យាតិ ន ខោ បនេតំ ឥច្ឆាយ បត្តព្វំ ឥទម្បិ យម្បិច្ឆំ ន លភតិ តម្បិ ទុក្ខំ។ ជរាធម្មានំ ភិក្ខវេ សត្តានំ…។ ព្យាធិធម្មានំ ភិក្ខវេ សត្តានំ…។ មរណធម្មានំ ភិក្ខវេ សត្តានំ…។ សោកបរិទេវទុក្ខទោមនស្សុបាយាសធម្មានំ ភិក្ខវេ សត្តានំ ឯវំ ឥច្ឆា ឧប្បជ្ជតិ អហោ វត មយំ ន សោកបរិទេវទុក្ខទោមនស្សុបាយាសធម្មា អស្សាម ន ច វត នោ សោកបរិទេវទុក្ខទោមនស្សុបាយាសា អាគច្ឆេយ្យុន្តិ ន ខោ បនេតំ ឥច្ឆាយ បត្តព្វំ ឥទម្បិ យម្បិច្ឆំ ន លភតិ តម្បិ ទុក្ខំ។ កតមេ ច ភិក្ខវេ សង្ខិត្តេន បញ្ចុបាទានក្ខន្ធា ទុក្ខា សេយ្យថីទំ រូបូបាទានក្ខន្ធោ វេទនូបាទានក្ខន្ធោ សញ្ញូបាទានក្ខន្ធោ សង្ខារូបាទានក្ខន្ធោ វិញ្ញាណូបាទានក្ខន្ធោ ឥមេ វុច្ចន្តិ ភិក្ខវេ សង្ខិត្តេន បញ្ចុបាទានក្ខន្ធា ទុក្ខា។ ឥទំ វុច្ចតិ ភិក្ខវេ ទុក្ខំ អរិយសច្ចំ។

[ឆដ្ឋ. សមុទយសច្ចនិទ្ទេសោ]

[១៤៧] កតមញ្ច ភិក្ខវេ ទុក្ខសមុទយោ អរិយសច្ចំ។ យាយំ តណ្ហា បោនោព្ភវិកា នន្ទិរាគសហគតា តត្រតត្រាភិនន្ទិនី សេយ្យថីទំ កាមតណ្ហា ភវតណ្ហា វិភវតណ្ហា។ សា ខោ បនេសា ភិក្ខវេ តណ្ហា កត្ថ ឧប្បជ្ជមានា ឧប្បជ្ជតិ កត្ថ និវីសមានា និវីសតិ។ យំ លោកេ បិយរូបំ សាតរូបំ ឯត្ថេសា តណ្ហា ឧប្បជ្ជមានា ឧប្បជ្ជតិ ឯត្ថ និវីសមានា និវីសតិ។ កិញ្ចិ [ម. កិញ្ច។] លោកេ បិយរូបំ សាតរូបំ។ ចក្ខុំ លោកេ បិយរូបំ សាតរូបំ ឯត្ថេសា តណ្ហា ឧប្បជ្ជមានា ឧប្បជ្ជតិ ឯត្ថ និវីសមានា និវីសតិ។ សោតំ ឃានំ ជិវ្ហា កាយោ មនោ លោកេ បិយរូបំ សាតរូបំ ឯត្ថេសា តណ្ហា ឧប្បជ្ជមានា ឧប្បជ្ជតិ ឯត្ថ និវីសមានា និវីសតិ។ រូបា សទ្ទា គន្ធា រសា ផោដ្ឋព្វា ធម្មា លោកេ បិយរូបំ សាតរូបំ ឯត្ថេសា តណ្ហា ឧប្បជ្ជមានា ឧប្បជ្ជតិ ឯត្ថ និវីសមានា និវីសតិ។ ចក្ខុវិញ្ញាណំ សោតវិញ្ញាណំ ឃានវិញ្ញាណំ ជិវ្ហាវិញ្ញាណំ កាយវិញ្ញាណំ មនោវិញ្ញាណំ លោកេ បិយរូបំ សាតរូបំ ឯត្ថេសា តណ្ហា ឧប្បជ្ជមានា ឧប្បជ្ជតិ ឯត្ថ និវីសមានា និវីសតិ។ ចក្ខុសម្ផស្សោ សោតសម្ផស្សោ ឃានសម្ផស្សោ ជិវ្ហាសម្ផស្សោ កាយសម្ផស្សោ មនោសម្ផស្សោ លោកេ បិយរូបំ សាតរូបំ ឯត្ថេសា តណ្ហា ឧប្បជ្ជមានា ឧប្បជ្ជតិ ឯត្ថ និវីសមានា និវីសតិ។ ចក្ខុសម្ផស្សជា វេទនា សោតសម្ផស្សជា វេទនា ឃានសម្ផស្សជា វេទនា ជិវ្ហាសម្ផស្សជា វេទនា កាយសម្ផស្សជា វេទនា មនោសម្ផស្សជា វេទនា លោកេ បិយរូបំ សាតរូបំ ឯត្ថេសា តណ្ហា ឧប្បជ្ជមានា ឧប្បជ្ជតិ ឯត្ថ និវីសមានា និវីសតិ។ រូបសញ្ញា សទ្ទសញ្ញា គន្ធសញ្ញា រសសញ្ញា ផោដ្ឋព្វសញ្ញា ធម្មសញ្ញា លោកេ បិយរូបំ សាតរូបំ ឯត្ថេសា តណ្ហា ឧប្បជ្ជមានា ឧប្បជ្ជតិ ឯត្ថ និវីសមានា និវីសតិ។ រូបសញ្ចេតនា សទ្ទសញ្ចេតនា គន្ធសញ្ចេតនា រសសញ្ចេតនា ផោដ្ឋព្វសញ្ចេតនា ធម្មសញ្ចេតនា លោកេ បិយរូបំ សាតរូបំ ឯត្ថេសា តណ្ហា ឧប្បជ្ជមានា ឧប្បជ្ជតិ ឯត្ថ និវីសមានា និវីសតិ។ រូបតណ្ហា សទ្ទតណ្ហា គន្ធតណ្ហា រសតណ្ហា ផោដ្ឋព្វតណ្ហា ធម្មតណ្ហា លោកេ បិយរូបំ សាតរូបំ ឯត្ថេសា តណ្ហា ឧប្បជ្ជមានា ឧប្បជ្ជតិ ឯត្ថ និវីសមានា និវីសតិ។ រូបវិតក្កោ សទ្ទវិតក្កោ គន្ធវិតក្កោ រសវិតក្កោ ផោដ្ឋព្វវិតក្កោ ធម្មវិតក្កោ លោកេ បិយរូបំ សាតរូបំ ឯត្ថេសា តណ្ហា ឧប្បជ្ជមានា ឧប្បជ្ជតិ ឯត្ថ និវីសមានា និវីសតិ។ រូបវិចារោ សទ្ទវិចារោ គន្ធវិចារោ រសវិចារោ ផោដ្ឋព្វវិចារោ ធម្មវិចារោ លោកេ បិយរូបំ សាតរូបំ ឯត្ថេសា តណ្ហា ឧប្បជ្ជមានា ឧប្បជ្ជតិ ឯត្ថ និវីសមានា និវីសតិ។ ឥទំ វុច្ចតិ ភិក្ខវេ ទុក្ខសមុទយោ អរិយសច្ចំ។

[ឆដ្ឋ. និរោធសច្ចនិទ្ទេសោ]

[១៤៨] កតមញ្ច ភិក្ខវេ ទុក្ខនិរោធោ អរិយសច្ចំ។ យោ តស្សាយេវ តណ្ហាយ អសេសវិរាគនិរោធោ ចាគោ បដិនិស្សគ្គោ មុត្តិ អនាលយោ។ សា ខោ បនេសា ភិក្ខវេ តណ្ហា កត្ថ បហិយ្យមានា បហិយ្យតិ កត្ថ និរុជ្ឈមានា និរុជ្ឈតិ។ យំ លោកេ បិយរូបំ សាតរូបំ ឯត្ថេសា តណ្ហា បហិយ្យមានា បហិយ្យតិ ឯត្ថ និរុជ្ឈមានា និរុជ្ឈតិ។ កិញ្ចិ លោកេ បិយរូបំ សាតរូបំ។ ចក្ខុំ លោកេ បិយរូបំ សាតរូបំ ឯត្ថេសា តណ្ហា បហិយ្យមានា បហិយ្យតិ ឯត្ថ និរុជ្ឈមានា និរុជ្ឈតិ។ សោតំ ឃានំ ជិវ្ហា កាយោ មនោ លោកេ បិយរូបំ សាតរូបំ ឯត្ថេសា តណ្ហា បហិយ្យមានា បហិយ្យតិ ឯត្ថ និរុជ្ឈមានា និរុជ្ឈតិ។ រូបា សទ្ទា គន្ធា រសា ផោដ្ឋព្វា ធម្មា លោកេ បិយរូបំ សាតរូបំ ឯត្ថេសា តណ្ហា បហិយ្យមានា បហិយ្យតិ ឯត្ថ និរុជ្ឈមានា និរុជ្ឈតិ។ ចក្ខុវិញ្ញាណំ សោតវិញ្ញាណំ ឃានវិញ្ញាណំ ជិវ្ហាវិញ្ញាណំ កាយវិញ្ញាណំ មនោវិញ្ញាណំ លោកេ បិយរូបំ សាតរូបំ ឯត្ថេសា តណ្ហា បហិយ្យមានា បហិយ្យតិ ឯត្ថ និរុជ្ឈមានា និរុជ្ឈតិ។ ចក្ខុសម្ផស្សោ សោតសម្ផស្សោ ឃានសម្ផស្សោ ជិវ្ហាសម្ផស្សោ កាយសម្ផស្សោ មនោសម្ផស្សោ លោកេ បិយរូបំ សាតរូបំ ឯត្ថេសា តណ្ហា បហិយ្យមានា បហិយ្យតិ ឯត្ថ និរុជ្ឈមានា និរុជ្ឈតិ។ ចក្ខុសម្ផស្សជា វេទនា សោតសម្ផស្សជា វេទនា ឃានសម្ផស្សជា វេទនា ជិវ្ហាសម្ផស្សជា វេទនា កាយសម្ផស្សជា វេទនា មនោសម្ផស្សជា វេទនា លោកេ បិយរូបំ សាតរូបំ ឯត្ថេសា តណ្ហា បហិយ្យមានា បហិយ្យតិ ឯត្ថ និរុជ្ឈមានា និរុជ្ឈតិ។ រូបសញ្ញា សទ្ទសញ្ញា គន្ធសញ្ញា រសសញ្ញា ផោដ្ឋព្វសញ្ញា ធម្មសញ្ញា លោកេ បិយរូបំ សាតរូបំ ឯត្ថេសា តណ្ហា បហិយ្យមានា បហិយ្យតិ ឯត្ថ និរុជ្ឈមានា និរុជ្ឈតិ។ រូបសញ្ចេតនា សទ្ទសញ្ចេតនា គន្ធសញ្ចេតនា រសសញ្ចេតនា ផោដ្ឋព្វសញ្ចេតនា ធម្មសញ្ចេតនា លោកេ បិយរូបំ សាតរូបំ ឯត្ថេសា តណ្ហា បហិយ្យមានា បហិយ្យតិ ឯត្ថ និរុជ្ឈមានា និរុជ្ឈតិ។ រូបតណ្ហា សទ្ទតណ្ហា គន្ធតណ្ហា រសតណ្ហា ផោដ្ឋព្វតណ្ហា ធម្មតណ្ហា លោកេ បិយរូបំ សាតរូបំ ឯត្ថេសា តណ្ហា បហិយ្យមានា បហិយ្យតិ ឯត្ថ និរុជ្ឈមានា និរុជ្ឈតិ។ រូបវិតក្កោ សទ្ទវិតក្កោ គន្ធវិតក្កោ រសវិតក្កោ ផោដ្ឋព្វវិតក្កោ ធម្មវិតក្កោ លោកេ បិយរូបំ សាតរូបំ ឯត្ថេសា តណ្ហា បហិយ្យមានា បហិយ្យតិ ឯត្ថ និរុជ្ឈមានា និរុជ្ឈតិ។ រូបវិចារោ សទ្ទវិចារោ គន្ធវិចារោ រសវិចារោ ផោដ្ឋព្វវិចារោ ធម្មវិចារោ លោកេ បិយរូបំ សាតរូបំ ឯត្ថេសា តណ្ហា បហិយ្យមានា បហិយ្យតិ ឯត្ថ និរុជ្ឈមានា និរុជ្ឈតិ។ ឥទំ វុច្ចតិ ភិក្ខវេ ទុក្ខនិរោធោ អរិយសច្ចំ។

[ឆដ្ឋ. មគ្គសច្ចនិទ្ទេសោ]

[១៤៩] កតមញ្ច ភិក្ខវេ ទុក្ខនិរោធគាមិនី បដិបទា អរិយសច្ចំ។ អយមេវ អរិយោ អដ្ឋង្គិកោ មគ្គោ សេយ្យថីទំ សម្មាទិដ្ឋិ សម្មាសង្កប្បោ សម្មាវាចា សម្មាកម្មន្តោ សម្មាអាជីវោ សម្មាវាយាមោ សម្មាសតិ សម្មាសមាធិ។ កតមា ច ភិក្ខវេ សម្មាទិដ្ឋិ។ យំ ខោ ភិក្ខវេ ទុក្ខេ ញាណំ ទុក្ខសមុទយេ ញាណំ ទុក្ខនិរោធេ ញាណំ ទុក្ខនិរោធគាមិនិយា បដិបទាយ ញាណំ អយំ វុច្ចតិ ភិក្ខវេ សម្មាទិដ្ឋិ។ កតមោ ច ភិក្ខវេ សម្មាសង្កប្បោ។ នេក្ខម្មសង្កប្បោ អព្យាបាទសង្កប្បោ អវិហឹសាសង្កប្បោ អយំ វុច្ចតិ ភិក្ខវេ សម្មាសង្កប្បោ។ កតមា ច ភិក្ខវេ សម្មាវាចា។ មុសាវាទា វេរមណី បិសុណាយ វាចាយ វេរមណី ផរុសាយ វាចាយ វេរមណី សម្ផប្បលាបា វេរមណី អយំ វុច្ចតិ ភិក្ខវេ សម្មាវាចា។ កតមោ ច ភិក្ខវេ សម្មាកម្មន្តោ។ បាណាតិបាតា វេរមណី អទិន្នាទានា វេរមណី កាមេសុ មិច្ឆាចារា វេរមណី អយំ វុច្ចតិ ភិក្ខវេ សម្មាកម្មន្តោ។ កតមោ ច ភិក្ខវេ សម្មាអាជីវោ។ ឥធ ភិក្ខវេ អរិយស្សាវកោ មិច្ឆាអាជីវំ បហាយ សម្មាអាជីវេន ជីវិកំ កប្បេតិ អយំ វុច្ចតិ ភិក្ខវេ សម្មាអាជីវោ។ កតមោ ច ភិក្ខវេ សម្មាវាយាមោ។ ឥធ ភិក្ខវេ ភិក្ខុ អនុប្បន្នានំ បាបកានំ អកុសលានំ ធម្មានំ អនុប្បាទាយ ឆន្ទំ ជនេតិ វាយមតិ វីរិយំ អារភតិ ចិត្តំ បគ្គណ្ហាតិ បទហតិ ឧប្បន្នានំ បាបកានំ អកុសលានំ ធម្មានំ បហានាយ ឆន្ទំ ជនេតិ វាយមតិ វីរិយំ អារភតិ ចិត្តំ បគ្គណ្ហាតិ បទហតិ អនុប្បន្នានំ កុសលានំ ធម្មានំ ឧប្បាទាយ ឆន្ទំ ជនេតិ វាយមតិ វីរិយំ អារភតិ ចិត្តំ បគ្គណ្ហាតិ បទហតិ ឧប្បន្នានំ កុសលានំ ធម្មានំ ឋិតិយា អសម្មោសាយ ភិយ្យោភាវាយ វេបុល្លាយ ភាវនាយ បារិបូរិយា ឆន្ទំ ជនេតិ វាយមតិ វីរិយំ អារភតិ ចិត្តំ បគ្គណ្ហាតិ បទហតិ អយំ វុច្ចតិ ភិក្ខវេ សម្មាវាយាមោ។ កតមា ច ភិក្ខវេ សម្មាសតិ។ ឥធ ភិក្ខវេ ភិក្ខុ កាយេ កាយានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សំ។ វេទនាសុ វេទនានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សំ។ ចិត្តេ ចិត្តានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សំ។ ធម្មេសុ ធម្មានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សំ អយំ វុច្ចតិ ភិក្ខវេ សម្មាសតិ។ កតមោ ច ភិក្ខវេ សម្មាសមាធិ។ ឥធ ភិក្ខវេ ភិក្ខុ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវំ អវិតក្កំ អវិចារំ សមាធិជំ បីតិសុខំ ទុតិយំ ឈានំ ឧបសម្បជ្ជ វិហរតិ បីតិយា ច វិរាគា ឧបេក្ខកោ ច វិហរតិ សតោ ច សម្បជានោ សុខញ្ច កាយេន បដិសំវេទេតិ យន្តំ អរិយា អាចិក្ខន្តិ ឧបេក្ខកោ សតិមា សុខវិហារីតិ តតិយំ ឈានំ ឧបសម្បជ្ជ វិហរតិ សុខស្ស ច បហានា ទុក្ខស្ស ច បហានា បុព្វេវ សោមនស្សទោមនស្សានំ អត្ថង្គមា អទុក្ខមសុខំ ឧបេក្ខាសតិបារិសុទ្ធឹ ចតុត្ថំ ឈានំ ឧបសម្បជ្ជ វិហរតិ អយំ វុច្ចតិ ភិក្ខវេ សម្មាសមាធិ។ ឥទំ វុច្ចតិ ភិក្ខវេ ទុក្ខនិរោធគាមិនី បដិបទា អរិយសច្ចំ។

[១៥០] ឥតិ អជ្ឈត្តំ វា ធម្មេសុ ធម្មានុបស្សី វិហរតិ ពហិទ្ធា វា ធម្មេសុ ធម្មានុបស្សី វិហរតិ អជ្ឈត្តពហិទ្ធា វា ធម្មេសុ ធម្មានុបស្សី វិហរតិ សមុទយធម្មានុបស្សី វា ធម្មេសុ វិហរតិ វយធម្មានុបស្សី វា ធម្មេសុ វិហរតិ សមុទយវយធម្មានុបស្សី វា ធម្មេសុ វិហរតិ អត្ថិ ធម្មាតិ វា បនស្ស សតិ បច្ចុបដ្ឋិតា ហោតិ យាវទេវ ញាណមត្តាយ បតិស្សតិមត្តាយ អនិស្សិតោ ច វិហរតិ ន ច កិញ្ចិ លោកេ ឧបាទិយតិ ឯវម្បិ ខោ ភិក្ខវេ ភិក្ខុ ធម្មេសុ ធម្មានុបស្សី វិហរតិ ចតូសុ អរិយសច្ចេសុ [បាឋន្តរេ បុន សច្ចសព្វំ។ ធម្មានុបស្សនាសតិប្បដ្ឋានន្តិ ទិស្សតិ។]។

[ឆដ្ឋ. សច្ចបព្វំ និដ្ឋិតំ។]

[ឆដ្ឋ. ធម្មានុបស្សនា និដ្ឋិតា។]

[១៥១] យោ ហិ កោចិ ភិក្ខវេ ឥមេ ចត្តារោ សតិប្បដ្ឋានេ ឯវំ ភាវេយ្យ សត្ត វស្សានិ តស្ស ទ្វិន្នំ ផលានំ អញ្ញតរំ ផលំ បាដិកង្ខំ ទិដ្ឋេវ ធម្មេ អញ្ញា សតិ វា ឧបាទិសេសេ អនាគាមិតា តិដ្ឋន្តុ ភិក្ខវេ សត្ត វស្សានិ។ យោ ហិ កោចិ ភិក្ខវេ ឥមេ ចត្តារោ សតិប្បដ្ឋានេ ឯវំ ភាវេយ្យ ឆ វស្សានិ បញ្ច វស្សានិ ចត្តារិ វស្សានិ តីណិ វស្សានិ ទ្វេ វស្សានិ ឯកំ វស្សំ… តិដ្ឋតុ ភិក្ខវេ ឯកំ វស្សំ។ យោ ហិ កោចិ ភិក្ខវេ ឥមេ ចត្តារោ សតិប្បដ្ឋានេ ឯវំ ភាវេយ្យ សត្ត មាសានិ តស្ស ទ្វិន្នំ ផលានំ អញ្ញតរំ ផលំ បាដិកង្ខំ ទិដ្ឋេវ ធម្មេ អញ្ញា សតិ វា ឧបាទិសេសេ អនាគាមិតា តិដ្ឋន្តុ ភិក្ខវេ សត្ត មាសានិ។ យោ ហិ កោចិ ភិក្ខវេ ឥមេ ចត្តារោ សតិប្បដ្ឋានេ ឯវំ ភាវេយ្យ ឆ មាសានិ បញ្ច មាសានិ ចត្តារិ មាសានិ តីណិ មាសានិ ទ្វេ មាសានិ [ម. ឯកំ មាសំ។] អឌ្ឍមាសំ… តិដ្ឋតុ ភិក្ខវេ អឌ្ឍមាសោ។ យោ ហិ កោចិ ភិក្ខវេ ឥមេ ចត្តារោ សតិប្បដ្ឋានេ ឯវំ ភាវេយ្យ សត្តាហំ តស្ស ទ្វិន្នំ ផលានំ អញ្ញតរំ ផលំ បាដិកង្ខំ ទិដ្ឋេវ ធម្មេ អញ្ញា សតិ វា ឧបាទិសេសេ អនាគាមិតា។

[១៥២] ឯកាយនោ អយំ ភិក្ខវេ មគ្គោ សត្តានំ វិសុទ្ធិយា សោកបរិទេវានំ សមតិក្កមាយ ទុក្ខទោមនស្សានំ អត្ថង្គមាយ ញាយស្ស អធិគមាយ និព្វានស្ស សច្ឆិកិរិយាយ យទិទំ ចត្តារោ សតិប្បដ្ឋានាតិ។ ឥតិ យន្តំ វុត្តំ ឥទមេតំ បដិច្ច វុត្តន្តិ។ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទុន្តិ។

មហាសតិប្បដ្ឋានសុត្តំ ទសមំ និដ្ឋិតំ។

មូលបរិយាយវគ្គោ បឋមោ។

តស្សុទ្ទានំ

អជរំ អមរំ អមតាធិគមំ

ផលមគ្គនិទស្សនំ ទុក្ខនុទំ

សហិតត្ថមហារហស្សករំ

ពហុប្បីតិហរំ វិវិធំ សុណាថ

តឡាកាវ សុបូរិតំ ឃម្មបថេ

តិវិធគ្គិសិលេសិតនិព្វានំ

ព្យាធិបនោទនឱបទយោ

មជ្ឈិមសុត្តវរា ឋបិតា

មធុមទ្ទវមន្ទរសា

អមរានំ ខិឌ្ឌរតិជននី

មនុសង្ឃំ តំ សុត្តព្យាករណញ្ច

ឋបិតា សក្យបុត្តានមាភិរមត្តា

តិបញ្ញាសវរំ ទិយឌ្ឍសតំ

ទ្វេ ច វេយ្យាករណំ អបរេ ច តេ

អសមេ បឋវគ្គវគ្គេ អនុបុព្វេន

ឯកមនា និសាមេថ មុទគ្គំ

មូលអាសវធម្មទាយាទ-

ភេរវនង្គណកង្ខសុត្តំ

វត្ថសល្លេខទិដ្ឋិសតិ

បឋវគ្គវរោ សោ សមត្តោ។

សីហនាទវគ្គោ

បឋមំ ចូឡសីហនាទសុត្តំ

[១៥៣] ឯវមេ្ម សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។

[១៥៤] ភគវា ឯតទវោច ឥធេវ ភិក្ខវេ សមណោ ឥធ ទុតិយោ សមណោ ឥធ តតិយោ សមណោ ឥធ ចតុត្ថោ សមណោ សុញ្ញា បរប្បវាទា សមណេហិ អញ្ញេភីតិ ឯវមេវ [ឱ. ឯវមេតំ។] ភិក្ខវេ សម្មា សីហនាទំ នទថ។ ឋានំ ខោ បនេតំ ភិក្ខវេ វិជ្ជតិ យំ អញ្ញតិត្ថិយា បរិព្វាជកា ឯវំ វទេយ្យុំ កោ បនាយស្មន្តានំ អស្សាសោ កឹ ពលំ យេន តុម្ហេ អាយស្មន្តោ អត្តនិ សម្បស្សមានា [ឱ.ម. អត្តនិ សម្បស្សមានាតិ ន ទិស្សតិ។] ឯវំ វទេថ ឥធេវ សមណោ ឥធ ទុតិយោ សមណោ ឥធ តតិយោ សមណោ ឥធ ចតុត្ថោ សមណោ សុញ្ញា បរប្បវាទា សមណេហិ អញ្ញេភីតិ ឯវំវាទិនោ ភិក្ខវេ អញ្ញតិត្ថិយា បរិព្វាជកា ឯវមស្សុ វចនីយា អត្ថិ ខោ នោ អាវុសោ តេន ភគវតា ជានតា បស្សតា អរហតា សម្មាសម្ពុទ្ធេន ចត្តារោ ធម្មា អក្ខាតា យេ មយំ អត្តនិ សម្បស្សមានា ឯវំ វទេម ឥធេវ សមណោ ឥធ ទុតិយោ សមណោ ឥធ តតិយោ សមណោ ឥធ ចតុត្ថោ សមណោ សុញ្ញា បរប្បវាទា សមណេហិ អញ្ញេភីតិ កតមេ ចត្តារោ អត្ថិ ខោ នោ អាវុសោ សត្ថរិ បសាទោ អត្ថិ ធម្មេ បសាទោ អត្ថិ សីលេសុ បរិបូរការិតា សហធម្មិកា ខោ បន [ឱ. បន នោ។] បិយា មនាបា គហដ្ឋា ចេវ បព្វជិតា ច ឥមេ ខោ នោ អាវុសោ តេន ភគវតា ជានតា បស្សតា អរហតា សម្មាសម្ពុទ្ធេន ចត្តារោ ធម្មា អក្ខាតា យេ មយំ អត្តនិ សម្បស្សមានា ឯវំ វទេម ឥធេវ សមណោ ឥធ ទុតិយោ សមណោ ឥធ តតិយោ សមណោ ឥធ ចតុត្ថោ សមណោ សុញ្ញា បរប្បវាទា សមណេហិ អញ្ញេភីតិ។ ឋានំ ខោ បនេតំ ភិក្ខវេ វិជ្ជតិ យំ អញ្ញតិត្ថិយា បរិព្វាជកា ឯវំ វទេយ្យុំ អម្ហាកម្បិ ខោ អាវុសោ អត្ថិ សត្ថរិ បសាទោ យោ [ឱ.ម. សោ។] អម្ហាកំ សត្ថា អម្ហាកម្បិ អត្ថិ ធម្មេ បសាទោ យោ [ឱ.ម. សោ។] អម្ហាកំ ធម្មោ មយម្បិ សីលេសុ បរិបូរការិនោ យានិ អម្ហាកំ សីលានិ អម្ហាកម្បិ សហធម្មិកា បិយា មនាបា គហដ្ឋា ចេវ បព្វជិតា ច។ ឥធ នោ អាវុសោ កោ វិសេសោ កោ អធិប្បាយោ [អធិប្បាយសោតិបិ បាឋោ។] កឹ នានាករណំ យទិទំ តុម្ហាកញ្ចេវ អម្ហាកញ្ចាតិ។ ឯវំវាទិនោ ភិក្ខវេ អញ្ញតិត្ថិយា បរិព្វាជកា ឯវមស្សុ វចនីយា កឹ បនាវុសោ ឯកា និដ្ឋា ឧទាហុ បុថូ និដ្ឋាតិ។ សម្មា ព្យាករមានា ភិក្ខវេ អញ្ញតិត្ថិយា បរិព្វាជកា ឯវំ ព្យាករេយ្យុំ ឯកា ហាវុសោ និដ្ឋា ន បុថូ និដ្ឋាតិ។ សា បនាវុសោ និដ្ឋា សរាគស្ស ឧទាហុ វីតរាគស្សាតិ។ សម្មា ព្យាករមានា ភិក្ខវេ អញ្ញតិត្ថិយា បរិព្វាជកា ឯវំ ព្យាករេយ្យុំ វីតរាគស្សាវុសោ សា និដ្ឋា ន សា និដ្ឋា សរាគស្សាតិ។ សា បនាវុសោ និដ្ឋា សទោសស្ស ឧទាហុ វីតទោសស្សាតិ។ សម្មា ព្យាករមានា ភិក្ខវេ អញ្ញតិត្ថិយា បរិព្វាជកា ឯវំ ព្យាករេយ្យុំ វីតទោសស្សាវុសោ សា និដ្ឋា ន សា និដ្ឋា សទោសស្សាតិ។ សា បនាវុសោ និដ្ឋា សមោហស្ស ឧទាហុ វីតមោហស្សាតិ។ សម្មា ព្យាករមានា ភិក្ខវេ អញ្ញតិត្ថិយា បរិព្វាជកា ឯវំ ព្យាករេយ្យុំ វីតមោហស្សាវុសោ សា និដ្ឋា ន សា និដ្ឋា សមោហស្សាតិ។ សា បនាវុសោ និដ្ឋា សតណ្ហស្ស ឧទាហុ វីតតណ្ហស្សាតិ។ សម្មា ព្យាករមានា ភិក្ខវេ អញ្ញតិត្ថិយា បរិព្វាជកា ឯវំ ព្យាករេយ្យុំ វីតតណ្ហស្សាវុសោ សា និដ្ឋា ន សា និដ្ឋា សតណ្ហស្សាតិ។ សា បនាវុសោ និដ្ឋា សឧបាទានស្ស ឧទាហុ អនុបាទានស្សាតិ។ សម្មា ព្យាករមានា ភិក្ខវេ អញ្ញតិត្ថិយា បរិព្វាជកា ឯវំ ព្យាករេយ្យុំ អនុបាទានស្សាវុសោ សា និដ្ឋា ន សា និដ្ឋា សឧបាទានស្សាតិ។ សា បនាវុសោ វិទ្ទសុនោ ឧទាហុ អវិទ្ទសុនោតិ។ សម្មា ព្យាករមានា ភិក្ខវេ អញ្ញតិត្ថិយា បរិព្វាជកា ឯវំ ព្យាករេយ្យុំ វិទ្ទសុនោ អាវុសោ សា និដ្ឋា ន សា និដ្ឋា អវិទ្ទសុនោតិ។ សា បនាវុសោ និដ្ឋា អនុរុទ្ធប្បដិវិរុទ្ធស្ស ឧទាហុ អននុរុទ្ធប្បដិវិរុទ្ធស្សាតិ [អននុរុទ្ធាប្បដិវិរុទ្ធស្សាតិ ឥតិបិ បាឋោ។]។ សម្មា ព្យាករមានា ភិក្ខវេ អញ្ញតិត្ថិយា បរិព្វាជកា ឯវំ ព្យាករេយ្យុំ អននុរុទ្ធប្បដិវិរុទ្ធស្សាវុសោ សា និដ្ឋា ន សា និដ្ឋា អនុរុទ្ធប្បដិវិរុទ្ធស្សាតិ។ សា បនាវុសោ និដ្ឋា បបញ្ចារាមស្ស បបញ្ចរតិនោ ឧទាហុ និប្បបញ្ចារាមស្ស និប្បបញ្ចរតិនោតិ។ សម្មា ព្យាករមានា ភិក្ខវេ អញ្ញតិត្ថិយា បរិព្វាជកា ឯវំ ព្យាករេយ្យុំ និប្បបញ្ចារាមស្សាវុសោ សា និដ្ឋា និប្បបញ្ចរតិនោ ន សា និដ្ឋា បបញ្ចារាមស្ស បបញ្ចរតិនោតិ។

[១៥៥] ទ្វេមា ភិក្ខវេ ទិដ្ឋិយោ ភវទិដ្ឋិ ច វិភវទិដ្ឋិ ច។ យេ ហិ កេចិ ភិក្ខវេ សមណា វា ព្រាហ្មណា វា ភវទិដ្ឋឹ អល្លីនា ភវទិដ្ឋឹ ឧបគតា ភវទិដ្ឋឹ អជ្ឈោសិតា វិភវទិដ្ឋិយា តេ បដិវិរុទ្ធា។ យេ ហិ កេចិ ភិក្ខវេ សមណា វា ព្រាហ្មណា វា វិភវទិដ្ឋឹ អល្លីនា វិភវទិដ្ឋឹ ឧបគតា វិភវទិដ្ឋឹ អជ្ឈោសិតា ភវទិដ្ឋិយា តេ បដិវិរុទ្ធា។ យេ ហិ កេចិ ភិក្ខវេ សមណា វា ព្រាហ្មណា វា ឥមាសំ ទ្វិន្នំ ទិដ្ឋីនំ សមុទយញ្ច អត្ថង្គមញ្ច អស្សាទញ្ច អាទីនវញ្ច និស្សរណញ្ច យថាភូតំ នប្បជានន្តិ តេ សរាគា តេ សទោសា តេ សមោហា តេ សតណ្ហា តេ សឧបាទានា តេ អវិទ្ទសុនោ តេ អនុរុទ្ធប្បដិវិរុទ្ធា តេ បបញ្ចារាមា បបញ្ចរតិនោ តេ ន បរិមុច្ចន្តិ ជាតិយា ជរាមរណេន សោកបរិទេវទុក្ខទោមនស្សុបាយាសេហិ [ឱ.ម. សោកេហិ បរិទេវេហិ ទុក្ខេហិ ទោមនស្សេហិ ឧបាយាសេហិ។] ន បរិមុច្ចន្តិ ទុក្ខស្មាតិ វទាមិ។ យេ ហិ កេចិ [ឱ.ម. យេ ច ខោ កេចិ ភិក្ខវេ។] សមណា វា ព្រាហ្មណា វា ឥមាសំ ទ្វិន្នំ ទិដ្ឋីនំ សមុទយញ្ច អត្ថង្គមញ្ច អស្សាទញ្ច អាទីនវញ្ច និស្សរណញ្ច យថាភូតំ បជានន្តិ តេ វីតរាគា តេ វីតទោសា តេ វីតមោហា តេ វីតតណ្ហា តេ អនុបាទានា តេ វិទ្ទសុនោ តេ អននុរុទ្ធប្បដិវិរុទ្ធា តេ និប្បបញ្ចារាមា និប្បបញ្ចរតិនោ តេ បរិមុច្ចន្តិ ជាតិយា ជរាមរណេន សោកបរិទេវទុក្ខទោមនស្សុបាយាសេហិ បរិមុច្ចន្តិ ទុក្ខស្មាតិ វទាមិ។

[១៥៦] ចត្តារិមានិ ភិក្ខវេ ឧបាទានានិ កតមានិ ចត្តារិ កាមុបាទានំ ទិដ្ឋុបាទានំ សីលព្វតុបាទានំ អត្តវាទុបាទានំ។ សន្តិ ភិក្ខវេ ឯកេ សមណព្រាហ្មណា សព្វុបាទានបរិញ្ញាវាទា បដិជានមានា តេ ន សម្មា សព្វុបាទានបរិញ្ញំ បញ្ញាបេន្តិ កាមុបាទានស្ស បរិញ្ញំ បញ្ញាបេន្តិ ន ទិដ្ឋុបាទានស្ស បរិញ្ញំ បញ្ញាបេន្តិ ន សីលព្វតុបាទានស្ស បរិញ្ញំ បញ្ញាបេន្តិ ន អត្តវាទុបាទានស្ស បរិញ្ញំ បញ្ញាបេន្តិ តំ កិស្ស ហេតុ ឥមានិ ហិ តេ ភោន្តោ សមណព្រាហ្មណា តីណិ ឋានានិ យថាភូតំ នប្បជានន្តិ តស្មា តេ ភោន្តោ សមណព្រាហ្មណា សព្វុបាទានបរិញ្ញាវាទា បដិជានមានា តេ ន សម្មា សព្វុបាទានបរិញ្ញំ បញ្ញាបេន្តិ កាមុបាទានស្ស បរិញ្ញំ បញ្ញាបេន្តិ ន ទិដ្ឋុបាទានស្ស បរិញ្ញំ បញ្ញាបេន្តិ ន សីលព្វតុបាទានស្ស បរិញ្ញំ បញ្ញាបេន្តិ ន អត្តវាទុបាទានស្ស បរិញ្ញំ បញ្ញាបេន្តិ។ សន្តិ ភិក្ខវេ ឯកេ សមណព្រាហ្មណា សព្វុបាទានបរិញ្ញាវាទា បដិជានមានា តេ ន សម្មា សព្វុបាទានបរិញ្ញំ បញ្ញាបេន្តិ កាមុបាទានស្ស បរិញ្ញំ បញ្ញាបេន្តិ ទិដ្ឋុបាទានស្ស បរិញ្ញំ បញ្ញាបេន្តិ ន សីលព្វតុបាទានស្ស បរិញ្ញំ បញ្ញាបេន្តិ ន អត្តវាទុបាទានស្ស បរិញ្ញំ បញ្ញាបេន្តិ តំ កិស្ស ហេតុ ឥមានិ ហិ តេ ភោន្តោ សមណព្រាហ្មណា ទ្វេ ឋានានិ យថាភូតំ នប្បជានន្តិ តស្មា តេ ភោន្តោ សមណព្រាហ្មណា សព្វុបាទានបរិញ្ញាវាទា បដិជានមានា តេ ន សម្មា សព្វុបាទានស្ស បរិញ្ញំ បញ្ញាបេន្តិ កាមុបាទានស្ស បរិញ្ញំ បញ្ញាបេន្តិ ទិដ្ឋុបាទានស្ស បរិញ្ញំ បញ្ញាបេន្តិ ន សីលព្វតុបាទានស្ស បរិញ្ញំ បញ្ញាបេន្តិ ន អត្តវាទុបាទានស្ស បរិញ្ញំ បញ្ញាបេន្តិ។ សន្តិ ភិក្ខវេ ឯកេ សមណព្រាហ្មណា សព្វុបាទានបរិញ្ញាវាទា បដិជានមានា តេ ន សម្មា សព្វុបាទានស្ស បរិញ្ញំ បញ្ញាបេន្តិ កាមុបាទានស្ស បរិញ្ញំ បញ្ញាបេន្តិ ទិដ្ឋុបាទានស្ស បរិញ្ញំ បញ្ញាបេន្តិ សីលព្វតុបាទានស្ស បរិញ្ញំ បញ្ញាបេន្តិ ន អត្តវាទុបាទានស្ស បរិញ្ញំ បញ្ញាបេន្តិ តំ កិស្ស ហេតុ ឥមំ ហិ តេ ភោន្តោ សមណព្រាហ្មណា ឯកំ ឋានំ យថាភូតំ នប្បជានន្តិ តស្មា តេ ភោន្តោ សមណព្រាហ្មណា សព្វុបាទានបរិញ្ញាវាទា បដិជានមានា តេ ន សម្មា សព្វុបាទានស្ស បរិញ្ញំ បញ្ញាបេន្តិ កាមុបាទានស្ស បរិញ្ញំ បញ្ញាបេន្តិ ទិដ្ឋុបាទានស្ស បរិញ្ញំ បញ្ញាបេន្តិ សីលព្វតុបាទានស្ស បរិញ្ញំ បញ្ញាបេន្តិ ន អត្តវាទុបាទានស្ស បរិញ្ញំ បញ្ញាបេន្តិ។ ឯវរូបេ ខោ ភិក្ខវេ ធម្មវិនយេ យោ សត្ថរិ បសាទោ សោ ន សម្មគ្គតោ អក្ខាយតិ យោ ធម្មេ បសាទោ សោ ន សម្មគ្គតោ អក្ខាយតិ យា សីលេសុ បរិបូរការិតា [បរិបូរិការិតាតិបិ បាឋោ។] សា ន សម្មគ្គតា អក្ខាយតិ យា សហធម្មិកេសុ បិយមនាបតា សា ន សម្មគ្គតា អក្ខាយតិ តំ កិស្ស ហេតុ ឯវញ្ហេតំ ភិក្ខវេ ហោតិ យថាតំ ទុរក្ខាតេ ធម្មវិនយេ ទុប្បវេទិតេ អនិយ្យានិកេ អនុបសមសំវត្តនិកេ អសម្មាសម្ពុទ្ធប្បវេទិតេ។

[១៥៧] តថាគតោ ច ខោ ភិក្ខវេ អរហំ សម្មាសម្ពុទ្ធោ សព្វុបាទានបរិញ្ញាវាទោ បដិជានមានោ សម្មា សព្វុបាទានបរិញ្ញំ បញ្ញាបេតិ កាមុបាទានស្ស បរិញ្ញំ បញ្ញាបេតិ ទិដ្ឋុបាទានស្ស បរិញ្ញំ បញ្ញាបេតិ សីលព្វតុបាទានស្ស បរិញ្ញំ បញ្ញាបេតិ អត្តវាទុបាទានស្ស បរិញ្ញំ បញ្ញាបេតិ។ ឯវរូបេ ខោ ភិក្ខវេ ធម្មវិនយេ យោ សត្ថរិ បសាទោ សោ សម្មគ្គតោ អក្ខាយតិ យោ ធម្មេ បសាទោ សោ សម្មគ្គតោ អក្ខាយតិ យា សីលេសុ បរិបូរការិតា សា សម្មគ្គតា អក្ខាយតិ យា សហធម្មិកេសុ បិយមនាបតា សា សម្មគ្គតា អក្ខាយតិ តំ កិស្ស ហេតុ ឯវញ្ហេតំ ភិក្ខវេ ហោតិ យថាតំ ស្វាក្ខាតេ ធម្មវិនយេ សុប្បវេទិតេ និយ្យានិកេ ឧបសមសំវត្តនិកេ សម្មាសម្ពុទ្ធប្បវេទិតេ។

[១៥៨] ឥមេ ច ភិក្ខវេ ចត្តារោ ឧបាទានា កឹនិទានា កឹសមុទយា កឹជាតិកា កឹបភវា។ ឥមេ ចត្តារោ ឧបាទានា តណ្ហានិទានា តណ្ហាសមុទយា តណ្ហាជាតិកា តណ្ហាបភវា។ តណ្ហា ចាយំ ភិក្ខវេ កឹនិទានា កឹសមុទយា កឹជាតិកា កឹបភវា។ តណ្ហា វេទនានិទានា វេទនាសមុទយា វេទនាជាតិកា វេទនាបភវា។ វេទនា ចាយំ ភិក្ខវេ កឹនិទានា កឹសមុទយា កឹជាតិកា កឹបភវា។ វេទនា ផស្សនិទានា ផស្សសមុទយា ផស្សជាតិកា ផស្សប្បភវា។ ផស្សោ ចាយំ ភិក្ខវេ កឹនិទានោ កឹសមុទយោ កឹជាតិកោ កឹបភវោ។ ផស្សោ សឡាយតននិទានោ សឡាយតនសមុទយោ សឡាយតនជាតិកោ សឡាយតនប្បភវោ។ សឡាយតនញ្ចិទំ ភិក្ខវេ កឹនិទានំ កឹសមុទយំ កឹជាតិកំ កឹបភវំ។ សឡាយតនំ នាមរូបនិទានំ នាមរូបសមុទយំ នាមរូបជាតិកំ នាមរូបប្បភវំ។ នាមរូបញ្ចិទំ ភិក្ខវេ កឹនិទានំ កឹសមុទយំ កឹជាតិកំ កឹបភវំ។ នាមរូបំ វិញ្ញាណនិទានំ វិញ្ញាណសមុទយំ វិញ្ញាណជាតិកំ វិញ្ញាណប្បភវំ។ វិញ្ញាណញ្ចិទំ ភិក្ខវេ កឹនិទានំ កឹសមុទយំ កឹជាតិកំ កឹបភវំ។ វិញ្ញាណំ សង្ខារនិទានំ សង្ខារសមុទយំ សង្ខារជាតិកំ សង្ខារប្បភវំ។ សង្ខារា ចិមេ ភិក្ខវេ កឹនិទានា កឹសមុទយា កឹជាតិកា កឹបភវា។ សង្ខារា អវិជ្ជានិទានា អវិជ្ជាសមុទយា អវិជ្ជាជាតិកា អវិជ្ជាបភវា។ យតោ ច ខោ ភិក្ខវេ ភិក្ខុនោ អវិជ្ជា បហីនា ហោតិ វិជ្ជា ឧប្បន្នា សោ អវិជ្ជាវិរាគា វិជ្ជុប្បាទា នេវ កាមុបាទានំ ឧបាទិយតិ ន ទិដ្ឋុបាទានំ ឧបាទិយតិ ន សីលព្វតុបាទានំ ឧបាទិយតិ ន អត្តវាទុបាទានំ ឧបាទិយតិ អនុបាទិយំ ន បរិតស្សតិ អបរិតស្សំ បច្ចត្តញ្ញេវ [ឱ. បច្ចត្តំយេវ។] បរិនិព្វាយតិ ខីណា ជាតិ វុសិតំ ព្រហ្មចរិយំ កតំ ករណីយំ នាបរំ ឥត្ថត្តាយាតិ បជានាតិ [ឱ. បជានាតីតិ។]។ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទុន្តិ។

ចូឡសីហនាទសុត្តំ បឋមំ និដ្ឋិតំ។

ទុតិយំ មហាសីហនាទសុត្តំ

[១៥៩] ឯវមេ្ម សុតំ។ ឯកំ សមយំ ភគវា វេសាលិយំ វិហរតិ ពហិនគរេ អបរបុរេ [អវេរបុរេតិ បាឋោ បញ្ញាយតិ។] វនសណ្ឌេ។ តេន ខោ បន សមយេន សុនក្ខត្តោ លិច្ឆវិបុត្តោ អចិរប្បក្កន្តោ ហោតិ ឥមស្មា ធម្មវិនយា។ សោ វេសាលិយំ បរិសតិ [ឱ. បរិសតិន្តិ បាឋោ ទិស្សតិ។] ឯវំ [ឱ.ម. ឯតំ។] វាចំ ភាសតិ នត្ថិ សមណស្ស គោតមស្ស ឧត្តរិ [ឱ. ឧត្តរឹ។] មនុស្សធម្មា អលមរិយញ្ញាណទស្សនវិសេសោ តក្កបរិយាហតំ សមណោ គោតមោ ធម្មំ ទេសេតិ វីមំសានុចរិតំ សយំ បដិភាណំ យស្ស ច ខ្វាស្សត្ថាយ ធម្មោ ទេសិតោ សោ និយ្យាតិ តក្ករស្ស សម្មា ទុក្ខក្ខយាយាតិ។

[១៦០] អថខោ អាយស្មា សារីបុត្តោ បុព្វណ្ហសមយំ និវាសេត្វា បត្តចីវរមាទាយ វេសាលឹ បិណ្ឌាយ បាវិសិ។ អស្សោសិ ខោ អាយស្មា សារីបុត្តោ សុនក្ខត្តស្ស លិច្ឆវិបុត្តស្ស វេសាលិយំ បរិសតិ ឯវំ វាចំ ភាសមានស្ស នត្ថិ សមណស្ស គោតមស្ស ឧត្តរិ មនុស្សធម្មា អលមរិយញ្ញាណទស្សនវិសេសោ តក្កបរិយាហតំ សមណោ គោតមោ ធម្មំ ទេសេតិ វីមំសានុចរិតំ សយំ បដិភាណំ យស្ស ច ខ្វាស្សត្ថាយ ធម្មោ ទេសិតោ សោ និយ្យាតិ តក្ករស្ស សម្មា ទុក្ខក្ខយាយាតិ។ អថខោ អាយស្មា សារីបុត្តោ វេសាលិយំ បិណ្ឌាយ ចរិត្វា បច្ឆាភត្តំ បិណ្ឌបាតប្បដិក្កន្តោ យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ អាយស្មា សារីបុត្តោ ភគវន្តំ ឯតទវោច សុនក្ខត្តោ ភន្តេ លិច្ឆវិបុត្តោ អចិរប្បក្កន្តោ ឥមស្មា ធម្មវិនយា សោ វេសាលិយំ បរិសតិ ឯវំ វាចំ ភាសិតំ នត្ថិ សមណស្ស គោតមស្ស ឧត្តរិ មនុស្សធម្មា អលមរិយញ្ញាណទស្សនវិសេសោ តក្កបរិយាហតំ សមណោ គោតមោ ធម្មំ ទេសេតិ វីមំសានុចរិតំ សយំ បដិភាណំ យស្ស ច ខ្វាស្សត្ថាយ ធម្មោ ទេសិតោ សោ និយ្យាតិ តក្ករស្ស សម្មា ទុក្ខក្ខយាយាតិ។

[១៦១] កោធនោ ខោ [ឱ.ម. ខោសទ្ទោ ន ទិស្សតិ។] សារីបុត្ត សុនក្ខត្តោ មោឃបុរិសោ កោធា ច បនស្ស ឯសា វាចា ភាសិតា អវណ្ណំ ភាសិស្សាមីតិ សោ សារីបុត្ត សុនក្ខត្តោ មោឃបុរិសោ វណ្ណំយេវ តថាគតស្ស ភាសតិ វណ្ណោ ហេសោ សារីបុត្ត តថាគតស្ស យោ ឯវំ វទេយ្យ យស្ស ច ខ្វាស្សត្ថាយ ធម្មោ ទេសិតោ សោ និយ្យាតិ តក្ករស្ស សម្មា ទុក្ខក្ខយាយាតិ។

[១៦២] អយម្បិ [ម. អយំបិ។] ហិ នាម សារីបុត្ត សុនក្ខត្តស្ស មោឃបុរិសស្ស មយិ ធម្មន្វយោ ន ភវិស្សតិ ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវាតិ។

[១៦៣] អយម្បិ [ម. អយំបិ។] ហិ នាម សារីបុត្ត សុនក្ខត្តស្ស មោឃបុរិសស្ស មយិ ធម្មន្វយោ ន ភវិស្សតិ ឥតិបិ សោ ភគវា អនេកវិហិតំ ឥទ្ធិវិធំ បច្ចនុភោតិ ឯកោបិ ហុត្វា ពហុធា ហោតិ ពហុធាបិ ហុត្វា ឯកោ ហោតិ អាវិភាវំ តិរោភាវំ តិរោកុឌ្ឌំ តិរោបាការំ តិរោបព្វតំ អសជ្ជមានោ គច្ឆតិ សេយ្យថាបិ អាកាសេ។ បឋវិយាបិ ឧម្មុជ្ជនិម្មុជ្ជំ ករោតិ សេយ្យថាបិ ឧទកេ។ ឧទកេបិ អភិជ្ជមានេ គច្ឆតិ សេយ្យថា បឋវិយំ។ អាកាសេបិ បល្លង្កេន កមតិ សេយ្យថាបិ បក្ខី សកុណោ។ ឥមេបិ ចន្ទិមសុរិយេ ឯវំមហិទ្ធិកេ ឯវំមហានុភាវេ បាណិនា បរិមសតិ បរិមជ្ជតិ យាវ ព្រហ្មលោកាបិ កាយេន វសំ វត្តេតីតិ [ម. កេយេន សំបវត្តេតីតិ។]។

[១៦៤] អយម្បិ ហិ នាម សារីបុត្ត សុនក្ខត្តស្ស មោឃបុរិសស្ស មយិ ធម្មន្វយោ ន ភវិស្សតិ ឥតិបិ សោ ភគវា ទិព្វាយ សោតធាតុយា វិសុទ្ធាយ អតិក្កន្តមានុសិកាយ ឧភោ សទ្ទេ សុណាតិ ទិព្វេ ច មានុសេ ច យេ ទូរេ សន្តិកេ ចាតិ។

[១៦៥] អយម្បិ ហិ នាម សារីបុត្ត សុនក្ខត្តស្ស មោឃបុរិសស្ស មយិ ធម្មន្វយោ ន ភវិស្សតិ ឥតិបិ សោ ភគវា បរសត្តានំ បរបុគ្គលានំ ចេតសា ចេតោ បរិច្ច បជានាតិ។ សរាគំ វា ចិត្តំ សរាគំ ចិត្តន្តិ បជានាតិ វីតរាគំ វា ចិត្តំ វីតរាគំ ចិត្តន្តិ បជានាតិ។ សទោសំ វា ចិត្តំ សទោសំ ចិត្តន្តិ បជានាតិ វីតទោសំ វា ចិត្តំ វីតទោសំ ចិត្តន្តិ បជានាតិ។ សមោហំ វា ចិត្តំ សមោហំ ចិត្តន្តិ បជានាតិ វីតមោហំ វា ចិត្តំ វីតមោហំ ចិត្តន្តិ បជានាតិ។ សង្ខិត្តំ វា ចិត្តំ សង្ខិត្តំ ចិត្តន្តិ បជានាតិ វិក្ខិត្តំ វា ចិត្តំ វិក្ខិត្តំ ចិត្តន្តិ បជានាតិ។ មហគ្គតំ វា ចិត្តំ … អមហគ្គតំ វា ចិត្តំ… ។ សឧត្តរំ វា ចិត្តំ … អនុត្តរំ វា ចិត្តំ … ។ សមាហិតំ វា ចិត្តំ … អសមាហិតំ វា ចិត្តំ …។ វិមុត្តំ វា ចិត្តំ វិមុត្តំ ចិត្តន្តិ បជានាតិ អវិមុត្តំ វា ចិត្តំ អវិមុត្តំ ចិត្តន្តិ បជានាតិ។

[១៦៦] ទស ខោ បនិមានិ សារីបុត្ត តថាគតស្ស តថាគតពលានិ យេហិ ពលេហិ សមន្នាគតោ តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ កតមានិ ទស។ ឥធ សារីបុត្ត តថាគតោ ឋានញ្ច ឋានតោ អដ្ឋានញ្ច អដ្ឋានតោ យថាភូតំ បជានាតិ។ យម្បិ សារីបុត្ត តថាគតោ ឋានញ្ច ឋានតោ អដ្ឋានញ្ច អដ្ឋានតោ យថាភូតំ បជានាតិ ឥទម្បិ សារីបុត្ត តថាគតស្ស តថាគតពលំ ហោតិ យំ ពលំ អាគម្ម តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ បុន ចបរំ សារីបុត្ត តថាគតោ អតីតានាគតប្បច្ចុប្បន្នានំ កម្មសមាទានានំ ឋានសោ ហេតុសោ វិបាកំ យថាភូតំ បជានាតិ។ យម្បិ សារីបុត្ត តថាគតោ អតីតានាគតប្បច្ចុប្បន្នានំ កម្មសមាទានានំ ឋានសោ ហេតុសោ វិបាកំ យថាភូតំ បជានាតិ ឥទម្បិ សារីបុត្ត តថាគតស្ស តថាគតពលំ ហោតិ យំ ពលំ អាគម្ម តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ បុន ចបរំ សារីបុត្ត តថាគតោ សព្វត្ថគាមិនឹ បដិបទំ យថាភូតំ បជានាតិ។ យម្បិ សារីបុត្ត តថាគតោ សព្វត្ថគាមិនឹ បដិបទំ យថាភូតំ បជានាតិ ឥទម្បិ សារីបុត្ត តថាគតស្ស តថាគតពលំ ហោតិ យំ ពលំ អាគម្ម តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ បុន ចបរំ សារីបុត្ត តថាគតោ អនេកធាតុនានាធាតុលោកំ យថាភូតំ បជានាតិ។ យម្បិ សារីបុត្ត តថាគតោ អនេកធាតុនានាធាតុលោកំ យថាភូតំ បជានាតិ ឥទម្បិ សារីបុត្ត តថាគតស្ស តថាគតពលំ ហោតិ យំ ពលំ អាគម្ម តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ បុន ចបរំ សារីបុត្ត តថាគតោ សត្តានំ នានាធិមុត្តិកតំ យថាភូតំ បជានាតិ។ យម្បិ សារីបុត្ត តថាគតោ សត្តានំ នានាធិមុត្តិកតំ យថាភូតំ បជានាតិ ឥទម្បិ សារីបុត្ត តថាគតស្ស តថាគតពលំ ហោតិ យំ ពលំ អាគម្ម តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ បុន ចបរំ សារីបុត្ត តថាគតោ បរសត្តានំ បរបុគ្គលានំ ឥន្ទ្រិយបរោបរិយត្តំ យថាភូតំ បជានាតិ។ យម្បិ សារីបុត្ត តថាគតោ បរសត្តានំ បរបុគ្គលានំ ឥន្ទ្រិយបរោបរិយត្តំ យថាភូតំ បជានាតិ ឥទម្បិ សារីបុត្ត តថាគតស្ស តថាគតពលំ ហោតិ យំ ពលំ អាគម្ម តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ បុន ចបរំ សារីបុត្ត តថាគតោ ឈានវិមោក្ខសមាធិសមាបត្តីនំ សង្កិលេសំ វោទានំ វុដ្ឋានំ យថាភូតំ បជានាតិ។ យម្បិ សារីបុត្ត តថាគតោ ឈានវិមោក្ខសមាធិសមាបត្តីនំ សង្កិលេសំ វោទានំ វុដ្ឋានំ យថាភូតំ បជានាតិ ឥទម្បិ សារីបុត្ត តថាគតស្ស តថាគតពលំ ហោតិ យំ ពលំ អាគម្ម តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ បុន ចបរំ សារីបុត្ត តថាគតោ អនេកវិហិតំ បុព្វេនិវាសំ អនុស្សរតិ សេយ្យថីទំ ឯកម្បិ ជាតឹ ទ្វេបិ ជាតិយោ តិស្សោបិ ជាតិយោ ចតស្សោបិ ជាតិយោ បញ្ចបិ ជាតិយោ ទសបិ ជាតិយោ វីសម្បិ ជាតិយោ តឹសម្បិ ជាតិយោ ចត្តាឡីសម្បិ ជាតិយោ បញ្ញាសម្បិ ជាតិយោ ជាតិសតម្បិ ជាតិសហស្សម្បិ ជាតិសតសហស្សម្បិ អនេកេបិ សំវដ្ដកប្បេ អនេកេបិ វិវដ្ដកប្បេ អនេកេបិ សំវដ្ដវិវដ្ដកប្បេ អមុត្រាសឹ ឯវំនាមោ ឯវំគោត្តោ ឯវំវណ្ណោ ឯវមាហារោ ឯវំសុខទុក្ខប្បដិសំវេទី ឯវមាយុបរិយន្តោ សោ តតោ ចុតោ អមុត្រ ឧទបាទឹ តត្រាបាសឹ ឯវំនាមោ ឯវំគោត្តោ ឯវំវណ្ណោ ឯវមាហារោ ឯវំសុខទុក្ខប្បដិសំវេទី ឯវមាយុបរិយន្តោ សោ តតោ ចុតោ ឥធូបបន្នោតិ។ ឥតិ សាការំ សឧទ្ទេសំ អនេកវិហិតំ បុព្វេនិវាសំ អនុស្សរតិ។ យម្បិ សារីបុត្ត តថាគតោ អនេកវិហិតំ បុព្វេនិវាសំ អនុស្សរតិ សេយ្យថីទំ ឯកម្បិ ជាតឹ ទ្វេបិ ជាតិយោ។បេ។ ឥតិ សាការំ សឧទ្ទេសំ អនេកវិហិតំ បុព្វេនិវាសំ អនុស្សរតិ ឥទម្បិ សារីបុត្ត តថាគតស្ស តថាគតពលំ ហោតិ យំ ពលំ អាគម្ម តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ បុន ចបរំ សារីបុត្ត តថាគតោ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សតិ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ យថាកម្មូបគេ សត្តេ បជានាតិ ឥមេ វត។បេ។ បជានាតិ។ យម្បិ សារីបុត្ត តថាគតោ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សតិ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ យថាកម្មូបគេ សត្តេ បជានាតិ ឥមេ វត។បេ។ បជានាតិ ឥទម្បិ សារីបុត្ត តថាគតស្ស តថាគតពលំ ហោតិ យំ ពលំ អាគម្ម តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ បុន ចបរំ សារីបុត្ត តថាគតោ អាសវានំ ខយា អនាសវំ ចេតោវិមុត្តឹ បញ្ញាវិមុត្តឹ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរតិ។ យម្បិ សារីបុត្ត តថាគតោ អាសវានំ ខយា អនាសវំ ចេតោវិមុត្តឹ បញ្ញាវិមុត្តឹ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរតិ ឥទម្បិ សារីបុត្ត តថាគតស្ស តថាគតពលំ ហោតិ យំ ពលំ អាគម្ម តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ ឥមានិ ខោ សារីបុត្ត ទស តថាគតស្ស តថាគតពលានិ យេហិ ពលេហិ សមន្នាគតោ តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ យោ ខោ មំ សារីបុត្ត ឯវំ ជានន្តំ ឯវំ បស្សន្តំ ឯវំ វទេយ្យ នត្ថិ សមណស្ស គោតមស្ស ឧត្តរិ មនុស្សធម្មា អលមរិយញ្ញាណទស្សនវិសេសោ តក្កបរិយាហតំ សមណោ គោតមោ ធម្មំ ទេសេតិ វីមំសានុចរិតំ សយំ បដិភានន្តិ តំ សារីបុត្ត វាចំ អប្បហាយ តំ ចិត្តំ អប្បហាយ តំ ទិដ្ឋឹ អប្បដិនិស្សជ្ជិត្វា យថាភតំ និក្ខិត្តោ ឯវំ និរយេ។ សេយ្យថាបិ សារីបុត្ត ភិក្ខុ សីលសម្បន្នោ សមាធិសម្បន្នោ បញ្ញាសម្បន្នោ ទិដ្ឋេវ ធម្មេ អញ្ញំ អារាធេយ្យ ឯវំ សម្បទមិទំ សារីបុត្ត វទាមិ។ តំ វាចំ អប្បហាយ តំ ចិត្តំ អប្បហាយ តំ ទិដ្ឋឹ អប្បដិនិស្សជ្ជិត្វា យថាភតំ និក្ខិត្តោ ឯវំ និរយេ។

[១៦៧] ចត្តារិមានិ សារីបុត្ត តថាគតស្ស វេសារជ្ជានិ យេហិ វេសារជ្ជេហិ សមន្នាគតោ តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ កតមានិ ចត្តារិ។ សម្មាសម្ពុទ្ធស្ស តេ បដិជានតោ ឥមេ ធម្មា អនភិសម្ពុទ្ធាតិ តត្រ វត មំ សមណោ វា ព្រាហ្មណោ វា ទេវោ វា មារោ វា ព្រហ្មា វា កោចិ វា លោកស្មឹ សហធម្មេន បដិចោទេស្សតីតិ និមិត្តមេតំ សារីបុត្ត ន សមនុបស្សាមិ ឯតមហំ [ឱ. ឯតំបហំ។] សារីបុត្ត និមិត្តំ អសមនុបស្សន្តោ ខេមប្បត្តោ អភយប្បត្តោ វេសារជ្ជប្បត្តោ វិហរាមិ។ ខីណាសវស្ស តេ បដិជានតោ ឥមេ អាសវា អប្បរិក្ខីណាតិ តត្រ វត មំ សមណោ វា ព្រាហ្មណោ វា ទេវោ វា មារោ វា ព្រហ្មា វា កោចិ វា លោកស្មឹ សហធម្មេន បដិចោទេស្សតីតិ និមិត្តមេតំ សារីបុត្ត ន សមនុបស្សាមិ ឯតមហំ សារីបុត្ត និមិត្តំ អសមនុបស្សន្តោ ខេមប្បត្តោ អភយប្បត្តោ វេសារជ្ជប្បត្តោ វិហរាមិ។ យេ ខោ បន តេ [ម. បនេតេ។] អន្តរាយិកា ធម្មា វុត្តា តេ បដិសេវតោ នាលំ អន្តរាយាយាតិ តត្រ វត មំ សមណោ វា ព្រាហ្មណោ វា ទេវោ វា មារោ វា ព្រហ្មា វា កោចិ វា លោកស្មឹ សហធម្មេន បដិចោទេស្សតីតិ និមិត្តមេតំ សារីបុត្ត ន សមនុបស្សាមិ ឯតមហំ សារីបុត្ត និមិត្តំ អសមនុបស្សន្តោ ខេមប្បត្តោ អភយប្បត្តោ វេសារជ្ជប្បត្តោ វិហរាមិ។ យស្ស ខោ បន តេ អត្ថាយ ធម្មោ ទេសិតោ សោ ន និយ្យាតិ តក្ករស្ស សម្មា ទុក្ខក្ខយាយាតិ តត្រ វត មំ សមណោ វា ព្រាហ្មណោ វា ទេវោ វា មារោ វា ព្រហ្មា វា កោចិ វា លោកស្មឹ សហធម្មេន បដិចោទេស្សតីតិ និមិត្តមេតំ សារីបុត្ត ន សមនុបស្សាមិ ឯតមហំ សារីបុត្ត និមិត្តំ អសមនុបស្សន្តោ ខេមប្បត្តោ អភយប្បត្តោ វេសារជ្ជប្បត្តោ វិហរាមិ។ ឥមានិ ខោ សារីបុត្ត ចត្តារិ តថាគតស្ស វេសារជ្ជានិ យេហិ វេសារជ្ជេហិ សមន្នាគតោ តថាគតោ អាសភណ្ឋានំ បដិជានាតិ បរិសាសុ សីហនាទំ នទតិ ព្រហ្មចក្កំ បវត្តេតិ។ យោ ខោ មំ សារីបុត្ត ឯវំ ជានន្តំ ឯវំ បស្សន្តំ ឯវំ វទេយ្យ នត្ថិ សមណស្ស គោតមស្ស ឧត្តរិមនុស្សធម្មា អលមរិយញ្ញាណទស្សនវិសេសោ តក្កបរិយាហតំ សមណោ គោតមោ ធម្មំ ទេសេតិ វីមំសានុចរិតំ សយំ បដិភានន្តិ តំ សារីបុត្ត វាចំ អប្បហាយ តំ ចិត្តំ អប្បហាយ តំ ទិដ្ឋឹ អប្បដិនិស្សជ្ជិត្វា យថាភតំ និក្ខិត្តោ ឯវំ និរយេ។ សេយ្យថាបិ សារីបុត្ត ភិក្ខុ សីលសម្បន្នោ សមាធិសម្បន្នោ បញ្ញាសម្បន្នោ ទិដ្ឋេវ ធម្មេ អញ្ញំ អារាធេយ្យ ឯវំ សម្បទមិទំ សារីបុត្ត វទាមិ។ តំ វាចំ អប្បហាយ តំ ចិត្តំ អប្បហាយ តំ ទិដ្ឋឹ អប្បដិនិស្សជ្ជិត្វា យថាភតំ និក្ខិត្តោ ឯវំ និរយេ។

[១៦៨] អដ្ឋ ខោ ឥមា សារីបុត្ត បរិសា កតមា អដ្ឋ ខត្តិយបរិសា ព្រាហ្មណបរិសា គហបតិបរិសា សមណបរិសា ចាតុម្មហារាជិកបរិសា តាវត្តឹសបរិសា មារបរិសា ព្រហ្មបរិសា ឥមា ខោ សារីបុត្ត អដ្ឋ បរិសា។ ឥមេហិ ខោ សារីបុត្ត ចតូហិ វេសារជ្ជេហិ សមន្នាគតោ តថាគតោ ឥមា អដ្ឋ បរិសា ឧបសង្កមតិ អជ្ឈោគាហតិ។ អភិជានាមិ ខោ បនាហំ សារីបុត្ត អនេកសតំ ខត្តិយបរិសំ ឧបសង្កមិតា តត្រាបិ មយា សន្និសិន្នបុព្វញ្ចេវ សល្លបិតបុព្វញ្ច សាកច្ឆា ច សមាបជ្ជិតបុព្វា តត្រ វត មំ ភយំ វា សារជ្ជំ វា ឱក្កមិស្សតីតិ និមិត្តមេតំ សារីបុត្ត ន សមនុបស្សាមិ ឯតមហំ សារីបុត្ត និមិត្តំ អសមនុបស្សន្តោ។បេ។ វិហរាមិ។ អភិជានាមិ ខោ បនាហំ សារីបុត្ត អនេកសតំ ព្រាហ្មណបរិសំ គហបតិបរិសំ សមណបរិសំ ចាតុម្មហារាជិកបរិសំ តាវត្តឹសបរិសំ មារបរិសំ ព្រហ្មបរិសំ ឧបសង្កមិតា តត្រាបិ មយា សន្និសិន្នបុព្វញ្ចេវ សល្លបិតបុព្វញ្ច សាកច្ឆា ច សមាបជ្ជិតបុព្វា តត្រ វត មំ ភយំ វា សារជ្ជំ វា ឱក្កមិស្សតីតិ និមិត្តមេតំ សារីបុត្ត ន សមនុបស្សាមិ ឯតមហំ សារីបុត្ត និមិត្តំ អសមនុបស្សន្តោ ខេមប្បត្តោ។បេ។ វិហរាមិ។ យោ ខោ មំ សារីបុត្ត ឯវំ ជានន្តំ ឯវំ បស្សន្តំ ឯវំ វទេយ្យ នត្ថិ សមណស្ស គោតមស្ស ឧត្តរិ មនុស្សធម្មា អលមរិយញ្ញាណទស្សនវិសេសោ តក្កបរិយាហតំ សមណោ គោតមោ ធម្មំ ទេសេតិ វីមំសានុចរិតំ សយំ បដិភានន្តិ តំ សារីបុត្ត វាចំ អប្បហាយ តំ ចិត្តំ អប្បហាយ តំ ទិដ្ឋឹ អប្បដិនិស្សជ្ជិត្វា យថាភតំ និក្ខិត្តោ ឯវំ និរយេ។ សេយ្យថាបិ សារីបុត្ត ភិក្ខុ សីលសម្បន្នោ សមាធិសម្បន្នោ បញ្ញាសម្បន្នោ ទិដ្ឋេវ ធម្មេ អញ្ញំ អារាធេយ្យ ឯវំ សម្បទមិទំ សារីបុត្ត វទាមិ។ តំ វាចំ អប្បហាយ តំ ចិត្តំ អប្បហាយ តំ ទិដ្ឋឹ អប្បដិនិស្សជ្ជិត្វា យថាភតំ និក្ខិត្តោ ឯវំ និរយេ។

[១៦៩] ចតស្សោ ខោ ឥមា សារីបុត្ត យោនិយោ កតមា ចតស្សោ អណ្ឌជា យោនិ ជលាពុជា យោនិ សំសេទជា យោនិ ឱបបាតិកា យោនិ។ កតមា ច សារីបុត្ត អណ្ឌជា យោនិ យេ ខោ តេ សារីបុត្ត សត្តា អណ្ឌកោសំ អភិនិព្ភិជ្ជ ជាយន្តិ អយំ វុច្ចតិ សារីបុត្ត អណ្ឌជា យោនិ។ កតមា ច សារីបុត្ត ជលាពុជា យោនិ យេ ខោ តេ សារីបុត្ត សត្តា វត្ថិកោសំ អភិនិព្ភិជ្ជ ជាយន្តិ អយំ វុច្ចតិ សារីបុត្ត ជលាពុជា យោនិ។ កតមា ច សារីបុត្ត សំសេទជា យោនិ យេ ខោ តេ សារីបុត្ត សត្តា បូតិមច្ឆេ វា ជាយន្តិ បូតិកុណបេ វា បូតិកុម្មាសេ វា ចន្ទនិកាយ វា ឱឡិគល្លេ វា ជាយន្តិ អយំ វុច្ចតិ សារីបុត្ត សំសេទជា យោនិ។ កតមា ច សារីបុត្ត ឱបបាតិកា យោនិ ទេវា នេរយិកា ឯកច្ចេ ច មនុស្សា ឯកច្ចេ ច វិនិបាតិកា អយំ វុច្ចតិ សារីបុត្ត ឱបបាតិកា យោនិ។ ឥមា ខោ សារីបុត្ត ចតស្សោ យោនិយោ។ យោ ខោ មំ សារីបុត្ត ឯវំ ជានន្តំ ឯវំ បស្សន្តំ ឯវំ វទេយ្យ នត្ថិ សមណស្ស គោតមស្ស ឧត្តរិមនុស្សធម្មា អលមរិយញ្ញាណទស្សនវិសេសោ តក្កបរិយាហតំ សមណោ គោតមោ ធម្មំ ទេសេតិ វីមំសានុចរិតំ សយំបដិភានន្តិ តំ សារីបុត្ត វាចំ អប្បហាយ តំ ចិត្តំ អប្បហាយ តំ ទិដ្ឋឹ អប្បដិនិស្សជ្ជិត្វា យថាភតំ និក្ខិត្តោ ឯវំ និរយេ។ សេយ្យថាបិ សារីបុត្ត ភិក្ខុ សីលសម្បន្នោ សមាធិសម្បន្នោ បញ្ញាសម្បន្នោ ទិដ្ឋេវ ធម្មេ អញ្ញំ អារាធេយ្យ ឯវំ សម្បទមិទំ សារីបុត្ត វទាមិ។ តំ វាចំ អប្បហាយ តំ ចិត្តំ អប្បហាយ តំ ទិដ្ឋឹ អប្បដិនិស្សជ្ជិត្វា យថាភតំ និក្ខិត្តោ ឯវំ និរយេ។

[១៧០] បញ្ច ខោ ឥមា សារីបុត្ត គតិយោ កតមា បញ្ច និរយោ តិរច្ឆានយោនិ បិត្តិវិសយោ មនុស្សា ទេវា។ និរយញ្ចាហំ សារីបុត្ត បជានាមិ និរយគាមិញ្ច មគ្គំ និរយគាមិនិញ្ច បដិបទំ យថា បដិបន្នោ ច កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជតិ តញ្ច បជានាមិ។ តិរច្ឆានយោនិញ្ចាហំ សារីបុត្ត បជានាមិ តិរច្ឆានយោនិគាមិញ្ច មគ្គំ តិរច្ឆានយោនិគាមិនិញ្ច បដិបទំ យថា បដិបន្នោ ច កាយស្ស ភេទា បរម្មរណា តិរច្ឆានយោនឹ ឧបបជ្ជតិ តញ្ច បជានាមិ បិត្តិវិសយញ្ចាហំ សារីបុត្ត បជានាមិ បិត្តិវិសយគាមិញ្ច មគ្គំ បិត្តិវិសយគាមិនិញ្ច បដិបទំ យថា បដិបន្នោ ច កាយស្ស ភេទា បរម្មរណា បិត្តិវិសយំ ឧបបជ្ជតិ តញ្ច បជានាមិ។ មនុស្សេ ចាហំ សារីបុត្ត បជានាមិ មនុស្សលោកគាមិញ្ច មគ្គំ មនុស្សលោកគាមិនិញ្ច បដិបទំ យថា បដិបន្នោ ច កាយស្ស ភេទា បរម្មរណា មនុស្សេសុ ឧបបជ្ជតិ តញ្ច បជានាមិ។ ទេវេ ចាហំ សារីបុត្ត បជានាមិ ទេវលោកគាមិញ្ច មគ្គំ ទេវលោកគាមិនិញ្ច បដិបទំ យថា បដិបន្នោ ច កាយស្ស ភេទា បរម្មរណា សុគតឹ សគ្គំ លោកំ ឧបបជ្ជតិ តញ្ច បជានាមិ។ និព្វានញ្ចាហំ សារីបុត្ត បជានាមិ និព្វានគាមិញ្ច មគ្គំ និព្វានគាមិនិញ្ច បដិបទំ យថា បដិបន្នោ ច អាសវានំ ខយា អនាសវំ ចេតោវិមុត្តឹ បញ្ញាវិមុត្តឹ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរតិ តញ្ច បជានាមិ។

[១៧១] ឥធាហំ សារីបុត្ត ឯកច្ចំ បុគ្គលំ ឯវំ ចេតសា ចេតោ បរិច្ច ជានាមិ [ឱ.ម. បជានាមិ។] តថាយំ បុគ្គលោ បដិបន្នោ តថា ច ឥរិយតិ តញ្ច មគ្គំ សម្មារុឡ្ហោ យថា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជិស្សតីតិ តមេនំ បស្សាមិ អបរេន សមយេន ទិព្វេន ចក្ខុនា វិសុទ្ធេន អតិក្កន្តមានុសកេន កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបន្នំ ឯកន្តទុក្ខា តិប្បា [ម. តិព្វា។] កដុកា វេទនា វេទិយមានំ។ សេយ្យថាបិ សារីបុត្ត អង្គារកាសុ សាធិកបោរិសា បូរា អង្គារានំ វីតច្ចិកានំ វីតធូមានំ អថ បុរិសោ អាគច្ឆេយ្យ ឃម្មាភិតត្តោ ឃម្មបរេតោ កិលន្តោ តសិតោ បិបាសិតោ ឯកាយនេន មគ្គេន តមេវ អង្គារកាសុំ បណិធាយ តមេនំ ចក្ខុមា បុរិសោ ទិស្វា ឯវំ វទេយ្យ តថាយំ ភវំ បុរិសោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា ឥមំយេវ អង្គារកាសុំ អាគមិស្សតីតិ តមេនំ បស្សេយ្យ អបរេន សមយេន តស្សា អង្គារកាសុយា បតិតំ ឯកន្តទុក្ខា តិប្បា កដុកា វេទនា វេទិយមានំ ឯវមេវ ខោ អហំ សារីបុត្ត ឥធេកច្ចំ បុគ្គលំ ឯវំ ចេតសា ចេតោ បរិច្ច ជានាមិ តថាយំ បុគ្គលោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជិស្សតីតិ តមេនំ បស្សាមិ អបរេន សមយេន ទិព្វេន ចក្ខុនា វិសុទ្ធេន អតិក្កន្តមានុសកេន កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបន្នំ ឯកន្តទុក្ខា តិប្បា កដុកា វេទនា វេទិយមានំ។

[១៧២] ឥធ បនាហំ សារីបុត្ត ឯកច្ចំ បុគ្គលំ ឯវំ ចេតសា ចេតោ បរិច្ច ជានាមិ តថាយំ បុគ្គលោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា កាយស្ស ភេទា បរម្មរណា តិរច្ឆានយោនឹ ឧបបជ្ជិស្សតីតិ តមេនំ បស្សាមិ អបរេន សមយេន ទិព្វេន ចក្ខុនា វិសុទ្ធេន អតិក្កន្តមានុសកេន កាយស្ស ភេទា បរម្មរណា តិរច្ឆានយោនឹ ឧបបន្នំ ទុក្ខា តិប្បា កដុកា វេទនា វេទិយមានំ។ សេយ្យថាបិ សារីបុត្ត គូថកូបោ សាធិកបោរិសោ បូរោ គូថស្ស អថ បុរិសោ អាគច្ឆេយ្យ ឃម្មាភិតត្តោ ឃម្មបរេតោ កិលន្តោ តសិតោ បិបាសិតោ ឯកាយនេន មគ្គេន តមេវ គូថកូបំ បណិធាយ តមេនំ ចក្ខុមា បុរិសោ ទិស្វា ឯវំ វទេយ្យ តថាយំ ភវំ បុរិសោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា ឥមំយេវ គូថកូបំ អាគមិស្សតីតិ តមេនំ បស្សេយ្យ អបរេន សមយេន តស្មឹ គូថកូបេ បតិតំ ទុក្ខា តិប្បា កដុកា វេទនា វេទិយមានំ ឯវមេវ ខោ អហំ សារីបុត្ត ឥធេកច្ចំ បុគ្គលំ ឯវំ ចេតសា ចេតោ បរិច្ច ជានាមិ តថាយំ បុគ្គលោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា កាយស្ស ភេទា បរម្មរណា តិរច្ឆានយោនឹ ឧបបជ្ជិស្សតីតិ តមេនំ បស្សាមិ អបរេន សមយេន ទិព្វេន ចក្ខុនា វិសុទ្ធេន អតិក្កន្តមានុសកេន កាយស្ស ភេទា បរម្មរណា តិរច្ឆានយោនឹ ឧបបន្នំ ទុក្ខា តិប្បា កដុកា វេទនា វេទិយមានំ។

[១៧៣] ឥធាហំ សារីបុត្ត ឯកច្ចំ បុគ្គលំ ឯវំ ចេតសា ចេតោ បរិច្ច ជានាមិ តថាយំ បុគ្គលោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា កាយស្ស ភេទា បរម្មរណា បិត្តិវិសយំ ឧបបជ្ជិស្សតីតិ តមេនំ បស្សាមិ អបរេន សមយេន ទិព្វេន ចក្ខុនា វិសុទ្ធេន អតិក្កន្តមានុសកេន កាយស្ស ភេទា បរម្មរណា បិត្តិវិសយំ ឧបបន្នំ ទុក្ខពហុលា វេទនា វេទិយមានំ។ សេយ្យថាបិ សារីបុត្ត រុក្ខោ វិសមេ ភូមិភាគេ ជាតោ តនុបត្តបលាសោ កវរច្ឆាយោ [ឱ.ម. កពច្ឆោយោ។] អថ បុរិសោ អាគច្ឆេយ្យ ឃម្មាភិតត្តោ ឃម្មបរេតោ កិលន្តោ តសិតោ បិបាសិតោ ឯកាយនេន មគ្គេន តមេវ រុក្ខំ បណិធាយ តមេនំ ចក្ខុមា បុរិសោ ទិស្វា ឯវំ វទេយ្យ តថាយំ ភវំ បុរិសោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា ឥមំយេវ រុក្ខំ អាគមិស្សតីតិ តមេនំ បស្សេយ្យ អបរេន សមយេន តស្ស រុក្ខស្ស ឆាយាយំ [ឱ.ម. ឆាយាយ។] និសិន្នំ វា និបន្នំ វា ទុក្ខពហុលា វេទនា វេទិយមានំ ឯវមេវ ខោ អហំ សារីបុត្ត ឥធេកច្ចំ បុគ្គលំ ឯវំ ចេតសា ចេតោ បរិច្ច ជានាមិ តថាយំ បុគ្គលោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា កាយស្ស ភេទា បរម្មរណា បិត្តិវិសយំ ឧបបជ្ជិស្សតីតិ តមេនំ បស្សាមិ អបរេន សមយេន ទិព្វេន ចក្ខុនា វិសុទ្ធេន អតិក្កន្តមានុសកេន កាយស្ស ភេទា បរម្មរណា បិត្តិវិសយំ ឧបបន្នំ ទុក្ខពហុលា វេទនា វេទិយមានំ។

[១៧៤] ឥធ បនាហំ សារីបុត្ត ឯកច្ចំ បុគ្គលំ ឯវំ ចេតសា ចេតោ បរិច្ច ជានាមិ តថាយំ បុគ្គលោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា កាយស្ស ភេទា បរម្មរណា មនុស្សេសុ ឧបបជ្ជិស្សតីតិ តមេនំ បស្សាមិ អបរេន សមយេន ទិព្វេន ចក្ខុនា វិសុទ្ធេន អតិក្កន្តមានុសកេន កាយស្ស ភេទា បរម្មរណា មនុស្សេសុ ឧបបន្នំ សុខពហុលា វេទនា វេទិយមានំ។ សេយ្យថាបិ សារីបុត្ត រុក្ខោ សមេ ភូមិភាគេ ជាតោ ពហលបត្តបលាសោ សណ្ឌច្ឆាយោ អថ បុរិសោ អាគច្ឆេយ្យ ឃម្មាភិតត្តោ ឃម្មបរេតោ កិលន្តោ តសិតោ បិបាសិតោ ឯកាយនេន មគ្គេន តមេវ រុក្ខំ បណិធាយ តមេនំ ចក្ខុមា បុរិសោ ទិស្វា ឯវំ វទេយ្យ តថាយំ បុរិសោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា ឥមំយេវ រុក្ខំ អាគមិស្សតីតិ តមេនំ បស្សេយ្យ អបរេន សមយេន តស្ស រុក្ខស្ស ឆាយាយំ និសិន្នំ វា និបន្នំ វា សុខពហុលា វេទនា វេទិយមានំ ឯវមេវ ខោ អហំ សារីបុត្ត ឥធេកច្ចំ បុគ្គលំ ឯវំ ចេតសា ចេតោ បរិច្ច ជានាមិ តថាយំ បុគ្គលោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ។បេ។ មនុស្សេសុ ឧបបន្នំ សុខពហុលា វេទនា វេទិយមានំ។

[១៧៥] ឥធាហំ សារីបុត្ត ឯកច្ចំ បុគ្គលំ ឯវំ ចេតសា ចេតោ បរិច្ច ជានាមិ តថាយំ បុគ្គលោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជិស្សតីតិ តមេនំ បស្សាមិ អបរេន សមយេន ទិព្វេន ចក្ខុនា វិសុទ្ធេន អតិក្កន្តមានុសកេន កាយស្ស ភេទា បរម្មរណា សុគតឹ សគ្គំ លោកំ ឧបបន្នំ ឯកន្តសុខា វេទនា វេទិយមានំ។ សេយ្យថាបិ សារីបុត្ត បាសាទោ តត្រស្ស កូដាគារំ ឧល្លិត្តាវលិត្តំ និវាតំ ផុសិតគ្គលំ [ឱ. ផស្សិតគ្គលំ។] បិហិតវាតបានំ តត្រស្ស បល្លង្កោ គោនកត្ថតោ បដិកត្ថតោ បដលិកត្ថតោ កទ្ទលិមិគប្បវរប្បច្ចត្ថរណោ សឧត្តរច្ឆទោ ឧភតោ លោហិតកូបធានោ អថ បុរិសោ អាគច្ឆេយ្យ ឃម្មាភិតត្តោ ឃម្មបរេតោ កិលន្តោ តសិតោ បិបាសិតោ ឯកាយនេន មគ្គេន តមេវ បាសាទំ បណិធាយ តមេនំ ចក្ខុមា បុរិសោ ទិស្វា ឯវំ វទេយ្យ តថាយំ ភវំ បុរិសោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា ឥមំយេវ បាសាទំ អាគមិស្សតីតិ តមេនំ បស្សេយ្យ អបរេន សមយេន តស្មឹ បាសាទេ តស្មឹ កូដាគារេ តស្មឹ បល្លង្កេ និសិន្នំ វា និបន្នំ វា ឯកន្តសុខា វេទនា វេទិយមានំ ឯវមេវ ខោ អហំ សារីបុត្ត ឥធេកច្ចំ បុគ្គលំ ឯវំ ចេតសា ចេតោ បរិច្ច បជានាមិ តថាយំ បុគ្គលោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជិស្សតីតិ តមេនំ បស្សាមិ អបរេន សមយេន ទិព្វេន ចក្ខុនា វិសុទ្ធេន អតិក្កន្តមានុសកេន កាយស្ស ភេទា បរម្មរណា សុគតឹ សគ្គំ លោកំ ឧបបន្នំ ឯកន្តសុខា វេទនា វេទិយមានំ។

[១៧៦] ឥធ បនាហំ សារីបុត្ត ឯកច្ចំ បុគ្គលំ ឯវំ ចេតសា ចេតោ បរិច្ច ជានាមិ តថាយំ បុគ្គលោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា អាសវានំ ខយា អនាសវំ ចេតោវិមុត្តឹ បញ្ញាវិមុត្តឹ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរតីតិ តមេនំ បស្សាមិ អបរេន សមយេន អាសវានំ ខយា អនាសវំ ចេតោវិមុត្តឹ បញ្ញាវិមុត្តឹ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរន្តំ ឯកន្តសុខា វេទនា វេទិយមានំ។ សេយ្យថាបិ សារីបុត្ត បោក្ខរណី អច្ឆោទកា សាតោទកា សីតោទកា សេតកា សុប្បតិត្ថា រមណីយា អវិទូរេ ចស្សា តិព្វោ វនសណ្ឌោ អថ បុរិសោ អាគច្ឆេយ្យ ឃម្មាភិតត្តោ ឃម្មបរេតោ កិលន្តោ តសិតោ បិបាសិតោ ឯកាយនេន មគ្គេន តមេវ បោក្ខរណឹ បណិធាយ តមេនំ ចក្ខុមា បុរិសោ ទិស្វា ឯវំ វទេយ្យ តថាយំ ភវំ បុរិសោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា ឥមំយេវ បោក្ខរណឹ អាគមិស្សតីតិ តមេនំ បស្សេយ្យ អបរេន សមយេន តំ បោក្ខរណឹ ឱគាហេត្វា [ឱ.ម. ឱគាហិត្វា។] នហាត្វា ច បិវិត្វា [ឱ. បិវិត្វា ច។ ម. បិវិត្វា ចាតិ ន ទិស្សតិ។] ច សព្វទរថកិលមថបរិឡាហំ បដិបស្សម្ភេត្វា បច្ចុត្តរិត្វា តស្មឹ វនសណ្ឌេ និសិន្នំ វា និបន្នំ វា ឯកន្តសុខា វេទនា វេទិយមានំ ឯវមេវ ខោ អហំ សារីបុត្ត ឥធេកច្ចំ បុគ្គលំ ឯវំ ចេតសា ចេតោ បរិច្ច ជានាមិ តថាយំ បុគ្គលោ បដិបន្នោ តថា ច ឥរិយតិ តញ្ច មគ្គំ សមារុឡ្ហោ យថា អាសវានំ ខយា អនាសវំ ចេតោវិមុត្តឹ បញ្ញាវិមុត្តឹ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរិស្សតីតិ តមេនំ បស្សាមិ អបរេន សមយេន អាសវានំ ខយា អនាសវំ ចេតោវិមុត្តឹ បញ្ញាវិមុត្តឹ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរន្តំ ឯកន្តសុខា វេទនា វេទិយមានំ។ ឥមា ខោ សារីបុត្ត បញ្ច គតិយោ។ យោ ខោ មំ សារីបុត្ត ឯវំ ជានន្តំ ឯវំ បស្សន្តំ ឯវំ វទេយ្យ នត្ថិ សមណស្ស គោតមស្ស ឧត្តរិ មនុស្សធម្មា អលមរិយញ្ញាណទស្សនវិសេសោ តក្កបរិយាហតំ សមណោ គោតមោ ធម្មំ ទេសេតិ វីមំសានុចរិតំ សយំ បដិភានន្តិ តំ សារីបុត្ត វាចំ អប្បហាយ តំ ចិត្តំ អប្បហាយ តំ ទិដ្ឋឹ អប្បដិនិស្សជ្ជិត្វា យថាភតំ និក្ខិត្តោ ឯវំ និរយេ។ សេយ្យថាបិ សារីបុត្ត ភិក្ខុ សីលសម្បន្នោ សមាធិសម្បន្នោ បញ្ញាសម្បន្នោ ទិដ្ឋេវ ធម្មេ អញ្ញំ អារាធេយ្យ ឯវំ សម្បទមិទំ សារីបុត្ត វទាមិ។ តំ វាចំ អប្បហាយ តំ ចិត្តំ អប្បហាយ តំ ទិដ្ឋឹ អប្បដិនិស្សជ្ជិត្វា យថាភតំ និក្ខិត្តោ ឯវំ និរយេ។

[១៧៧] អភិជាមិ ខោ បនាហំ សារីបុត្ត ចតុរង្គសមន្នាគតំ ព្រហ្មចរិយំ ចរិតា។ តបស្សិស្សុទំ ហោមិ បរមតបស្សី លូខោ សុទំ [ឱ. លុខស្សុទំ។] ហោមិ បរមលូខោ ជេគុច្ឆី សុទំ ហោមិ បរមជេគុច្ឆី បវិវិត្តោ សុទំ [ឱ. បវិវិត្តស្សុទំ។] ហោមិ បរមប្បវិវិត្តោ។

[១៧៨] តត្រស្សុ មេ ឥទំ សារីបុត្ត តបស្សិតាយ ហោតិ អចេលកោ ហោមិ មុត្តាចារោ ហត្ថាវលេខនោ ន ឯហិភទន្តិកោ ន តិដ្ឋភទន្តិកោ ន អភិហតំ [ឱ.ម. នាភិហដំ។] ន ឧទ្ទិស្ស កតំ ន និមន្តនំ សាទិយាមិ។ សោ ន កុម្ភិមុខា បដិគ្គណ្ហាមិ ន កឡោបិមុខា បដិគ្គណ្ហាមិ ន ឯឡកមន្តរំ ន ទណ្ឌមន្តរំ ន មូសលមន្តរំ ន ទ្វិន្នំ ភុញ្ជមានានំ ន គព្ភិនិយា ន បាយមានាយ ន បុរិសន្តរគតាយ ន សង្កិត្តីសុ ន យត្ថ សា ឧបដ្ឋិតោ ហោតិ ន យត្ថ មក្ខិកា សណ្ឌសណ្ឌចារិនី ន មច្ឆំ ន មំសំ ន សុរំ ន មេរយំ ន ថុសោទកំ បិវាមិ។ សោ ឯកាគារិកោ វា ហោមិ ឯកាលោបិកោ ទ្វាគារិកោ វា ហោមិ ទ្វាលោបិកោ។បេ។ សត្តាគារិកោ វា ហោមិ សត្តាលោបិកោ។ ឯកិស្សាបិ ទត្តិយា យាបេមិ ទ្វីហិបិ ទត្តីហិ យាបេមិ។បេ។ សត្តហិបិ យាបេមិ ឯកាហិកម្បិ [ឱ. សត្តហិបិ ទត្តីហិ យាបេមិ។ ឯហាហិកម្បិ។ ម. សត្តហិបិ ទត្តីហិ យាបេមិ។ ឯកាហិកំបិ។] អាហារំ អាហារេមិ ទ្វីហិកម្បិ អាហារំ អាហារេមិ។បេ។ សត្តាហិកម្បិ អាហារំ អាហារេមិ ឥតិ ឯវរូបំ អឌ្ឈមាសិកម្បិ បរិយាយភត្តភោជនានុយោគមនុយុត្តោ វិហរាមិ។ សោ សាកភក្ខោ វា ហោមិ សាមាកភក្ខោ វា ហោមិ និវារភក្ខោ វា ហោមិ ទទ្ទុលភក្ខោ វា ហោមិ ហដភក្ខោ វា ហោមិ កណភក្ខោ វា ហោមិ អាចាមភក្ខោ វា ហោមិ បិញ្ញាកភក្ខោ វា ហោមិ តិណភក្ខោ វា ហោមិ គោមយភក្ខោ វា ហោមិ វនមូលផលាហារោ យាបេមិ បវត្តផលភោជី។ សោ សាណានិបិ ធារេមិ មសាណានិបិ ធារេមិ ឆវទុស្សានិបិ ធារេមិ បំសុកូលានិបិ ធារេមិ តិរីដានិបិ ធារេមិ អជិនានិបិ [ឱ. អជិនម្បិ។ ម. អជិនំបិ។] ធារេមិ អជិនក្ខិបម្បិ ធារេមិ កុសចីរម្បិ ធារេមិ វាកចីរម្បិ ធារេមិ ផលកចីរម្បិ ធារេមិ កេសកម្ពលម្បិ ធារេមិ វាលកម្ពលម្បិ ធារេមិ ឧឡូកបក្ខម្បិ ធារេមិ កេសមស្សុលោចកោបិ ហោមិ កេសមស្សុលោចនានុយោគមនុយុត្តោ ឧព្ភដ្ឋកោ [ឱ.ម. ឧព្ភដ្ឋកោបិ។] ហោមិ អាសនប្បដិក្ខិត្តោ ឧក្កុដិកោបិ ហោមិ ឧក្កុដិកប្បធានមនុយុត្តោ កណ្ដកាបស្សយិកោបិ ហោមិ កណ្ដកាបស្សយេ សេយ្យំ កប្បេមិ សាយតតិយកម្បិ ឧទកោរោហនានុយោគមនុយុត្តោ វិហរាមិ ឥតិ ឯវរូបំ អនេកវិហិតំ កាយស្ស អាតាបនបរិតាបនានុយោគមនុយុត្តោ វិហរាមិ។ ឥទំសុ មេ សារីបុត្ត តបស្សិតាយ ហោតិ។

[១៧៩] តត្រស្សុ មេ ឥទំ សារីបុត្ត លូខស្មឹ ហោតិ។ នេកវស្សគណិកំ រជោជល្លំ កាយេ សន្និចិតំ ហោតិ បប្បដិកជាតំ។ សេយ្យថាបិ សារីបុត្ត តិណ្ឌុកខានុ [ឱ.ម. តិន្ទុកាខានុ។] នេកវស្សគណិកោ សន្និចិតោ ហោតិ បប្បដិកជាតោ ឯវមេវស្សុ មេ សារីបុត្ត នេកវស្សគណិកំ រជោជល្លំ កាយេ សន្និចិតំ ហោតិ បប្បដិកជាតំ។ តស្ស មយ្ហំ សារីបុត្ត ន ឯវំ ហោតិ អហោ វតាហំ ឥមំ រជោជល្លំ បាណិនា បរិមជ្ជេយ្យំ [បរិមជ្ជេយ្យន្តិ បាឋេន ភវិតព្វំ។]។ អញ្ញេ វា បន មេ ឥមំ រជោជល្លំ បាណិនា បរិមជ្ជេយ្យុន្តិ ឯវម្បិ មេ សារីបុត្ត ន ហោតិ។ ឥទំសុ មេ សារីបុត្ត លូខស្មឹ ហោតិ។

[១៨០] តត្រស្សុ មេ ឥទំ សារីបុត្ត ជេគុច្ឆិស្មឹ ហោតិ។ សោ ខោ អហំ សារីបុត្ត សតោ វ អភិក្កមាមិ សតោ បដិក្កមាមិ។ យាវ ឧទកពិន្ទុម្ហិបិ មេ ទយា បច្ចុបដ្ឋិតា ហោតិ មាហំ ខុទ្ទកេ បាណេ វិសមគតេ សង្ឃាតំ អាបាទេសិន្តិ។ ឥទំសុ មេ សារីបុត្ត ជេគុច្ឆិស្មឹ ហោតិ។

[១៨១] តត្រស្សុ មេ ឥទំ សារីបុត្ត បវិវិត្តស្មឹ ហោតិ។ សោ ខោ អហំ សារីបុត្ត អញ្ញតរំ អរញ្ញាយតនំ អជ្ឈោគាហេត្វា វិហរាមិ។ យទា បស្សាមិ គោបាលកំ វា បសុបាលកំ វា តិណហារកំ វា កដ្ឋហារកំ វា វនកម្មិកំ វា វនេន វនំ គហនេន គហនំ និន្នេន និន្នំ ថលេន ថលំ បបតាមិ តំ កិស្ស ហេតុ មា មំ តេ អទ្ទសំសុ អហញ្ច មា តេ អទ្ទសន្តិ។ សេយ្យថាបិ សារីបុត្ត អារញ្ញកោ មិគោ មនុស្សេ ទិស្វា វនេន វនំ គហនេន គហនំ និន្នេន និន្នំ ថលេន ថលំ បបតតិ ឯវមេវ ខោ អហំ សារីបុត្ត យទា បស្សាមិ គោបាលកំ វា បសុបាលកំ វា តិណហារកំ វា កដ្ឋហារកំ វា វនេន វនំ គហនេន គហនំ និន្នេន និន្នំ ថលេន ថលំ បបតាមិ តំ កិស្ស ហេតុ មា មំ តេ អទ្ទសំសុ អហញ្ច មា តេ អទ្ទសន្តិ។ ឥទំសុ មេ សារីបុត្ត បវិវិត្តស្មឹ ហោតិ។

[១៨២] សោ ខោ អហំ សារីបុត្ត យេ តេ គោត្ថា បដ្ឋិតគាវោ អបគតគោបាលា [ឱ.ម. អបគតគោបាលកា។] តត្ថ ចតុក្កុណ្ឌិកោ ឧបសង្កមិត្វា យានិ តានិ វច្ឆកានំ តរុណកានំ ធេនុបកានំ គោមយានិ តានិ សុទំ អាហារេមិ។ យាវកីវញ្ច មេ សារីបុត្ត សកំ មុត្តករីសំ អបរិយាទិន្នំ ហោតិ សកំយេវ សុទំ មុត្តករីសំ អាហារេមិ។ ឥទំសុ មេ សារីបុត្ត មហាវិកដភោជនស្មឹ ហោតិ។

[១៨៣] សោ ខោ អហំ សារីបុត្ត អញ្ញតរំ ភឹសនកំ វនសណ្ឌំ អជ្ឈោគាហេត្វា វិហរាមិ។ តត្រស្សុទំ សារីបុត្ត ភឹសនកស្ស វនសណ្ឌកស្ស ភឹសនកត្តស្មឹ ហោតិ។ យោ កោចិ អវីតរាគោ តំ វនសណ្ឌំ បវិសតិ យេភុយ្យេន លោមានិ ហំសន្តិ។ សោ ខោ អហំ សារីបុត្ត យា តា រត្តិយោ សីតា ហេមន្តិកា អន្តរដ្ឋកា ហិមបាតសមយា [ឱ. អន្តរដ្ឋកេ ហិមបាតសមយេ។] តថារូបាសុ រត្តីសុ រត្តឹ អព្ភោកាសេ វិហរាមិ ទិវា វនសណ្ឌេ គិម្ហានំ បច្ឆិមេ មាសេ ទិវា អព្ភោកាសេ វិហរាមិ រត្តឹ វនសណ្ឌេ។ អបិស្សុ មំ សារីបុត្ត អយំ អនច្ឆរិយាគាថា បដិភាសិ បុព្វេ អស្សុតបុព្វា

សោ តត្តោ សោ សិនោ ឯកោ

ឯកោ ភឹសនកេ វនេ

នគ្គោ ន ចគ្គិមាសិនោ

ឯសនាបសុតោ មុនីតិ។

[១៨៤] សោ ខោ អហំ សារីបុត្ត សុសានេ សេយ្យំ កប្បេមិ ឆវដ្ឋិកានិ ឧបធាយ។ អបិស្សុ មំ សារីបុត្ត គោមណ្ឌលា ឧបសង្កមិត្វា ឱដ្ឋុរោន្តិបិ [ឱ. ឱដ្ឋុភន្តិបិ។] ឱមុត្តេន្តិបិ បំសុកេនបិ ឱកិរន្តិ [ឱ. បំសុកេន ឱកិរកិរន្តិបិ។] កណ្ណសោតេសុបិ សលាកំ បវេសេន្តិ។ ន ខោ បនាហំ សារីបុត្ត អភិជានាមិ តេសុ បាបកំ ចិត្តំ ឧប្បាទេតា។ ឥទំសុ មេ សារីបុត្ត ឧបេក្ខាវិហរស្មឹ ហោតិ។

[១៨៥] សន្តិ ខោ បន សារីបុត្ត ឯកេ សមណព្រាហ្មណា ឯវំវាទិនោ ឯវំទិដ្ឋិនោ អាហារេន សុទ្ធីតិ។ តេ ឯវមាហំសុ កោលេហិ យាបេមាតិ។ តេ កោលម្បិ ខាទន្តិ កោលចុណ្ណម្បិ ខាទន្តិ កោលោទកម្បិ បិវន្តិ អនេកវិហិតម្បិ កោលវិកតឹ បរិភុញ្ជន្តិ។ អភិជានាមិ ខោ បនាហំ សារីបុត្ត ឯកំយេវ កោលំ អាហារំ អាហរិតា។ សិយា ខោ បន តេ សារីបុត្ត ឯវមស្ស មហា នូន តេន សមយេន កោលោ អហោសីតិ។ ន ខោ បនេតំ សារីបុត្ត ឯវំ ទដ្ឋព្វំ។ តទាបិ ឯតបរមោយេវ កោលោ អហោសិ សេយ្យថាបិ ឯតរហិ។ តស្ស មយ្ហំ សារីបុត្ត ឯកំយេវ កោលំ អាហារំ អាហារយតោ អធិមត្តកសីមានំ បត្តោ កាយោ ហោតិ។ សេយ្យថាបិ នាម អាសីតិកបព្វានិ វា កាលាបព្វានិ វា ឯវមេវស្សុ មេ អង្គប្បច្ចង្គានិ ភវន្តិ តាយេវប្បាហារតាយ។ សេយ្យថាបិ នាម ឱដ្ឋបទំ ឯវមេវស្សុ មេ អានិសទំ ហោតិ តាយេវប្បាហារតាយ។ សេយ្យថាបិ នាម វដ្ដនាវឡី ឯវមេវស្សុ មេ បិដ្ឋិកណ្ដកោ ឧន្នតាវនតោ ហោតិ តាយេវប្បាហារតាយ។ សេយ្យថាបិ នាម ជរសាលាយ គោបាណសិយោ ឱលុគ្គវិលុគ្គា ភវន្តិ ឯវមេវស្សុ មេ ផាសុឡិយោ ឱលុគ្គវិលុគ្គា ភវន្តិ តាយេវប្បាហារតាយ។ សេយ្យថាបិ នាម គម្ភីរេ ឧទបានេ ឧទកតារកា គម្ភីរគតា ឱក្ខាយិកា ទិស្សន្តិ ឯវមេវស្សុ មេ អក្ខិកូបេសុ អក្ខិតារកា គម្ភីរគតា ឱក្ខាយិកា ទិស្សន្តិ តាយេវប្បាហារតាយ។ សេយ្យថាបិ នាម តិត្តិកាលាពុ អាមកច្ឆិន្នោ វាតាតបេន សំផុសិតោ ហោតិ សម្មិលាតោ ឯវមេស្សុ មេ សីសច្ឆវិ សំផុសិតា ហោតិ សម្មិលាតា តាយេវប្បាហារតាយ។ សោ ខោ អហំ សារីបុត្ត ឧទរច្ឆវឹ បរិមសិស្សាមីតិ បិដ្ឋិកណ្ដកំយេវ បរិគ្គណ្ហាមិ បិដ្ឋិកណ្ដកំ បរិមសិស្សាមីតិ ឧទរច្ឆវឹយេវ បរិគ្គណ្ហាមិ យាវស្សុ មេ សារីបុត្ត ឧទរច្ឆវី បិដ្ឋិកណ្ដកំ អល្លិនា ហោតិ តាយេវប្បាហារតាយ។ សោ ខោ អហំ សារីបុត្ត វច្ចំ វា មុត្តំ វា ករិស្សាមីតិ តត្ថេវ អវកុជ្ជោ បបតាមិ តាយេវប្បាហារតាយ។ សោ ខោ អហំ សារីបុត្ត តមេវ កាយំ អស្សាសេន្តោ បាណិនា គត្តានិ អនោមជ្ជាមិ។ តស្ស មយ្ហំ សារីបុត្ត បាណិនា គត្តានិ អនោមជ្ជតោ បូតិមូលានិ លោមានិ កាយស្មា បបតន្តិ តាយេវប្បាហារតាយ។

[១៨៦] សន្តិ ខោ បន សារីបុត្ត ឯកេ សមណព្រាហ្មណា ឯវំវាទិនោ ឯវំទិដ្ឋិនោ អាហារេន សុទ្ធីតិ។ តេ ឯវមាហំសុ មុគ្គេហិ យាបេម។បេ។ តិលេហិ យាបេម។បេ។ តណ្ឌុលេហិ យាបេមាតិ។ តេ តណ្ឌុលម្បិ ខាទន្តិ តណ្ឌុលចុណ្ណម្បិ ខាទន្តិ តណ្ឌុលោទកម្បិ បិវន្តិ អនេកវិហិតម្បិ តណ្ឌុលវិកតឹ បរិភុញ្ជន្តិ។ អភិជានាមិ ខោ បនាហំ សារីបុត្ត ឯកំយេវ តណ្ឌុលំ អាហារំ អាហរិតា។ សិយា ខោ បន តេ សារីបុត្ត ឯវមស្ស មហា នូន តេន សមយេន តណ្ឌុលោ អហោសីតិ។ ន ខោ បនេតំ សារីបុត្ត ឯវំ ទដ្ឋព្វំ។ តទាបិ ឯតបរមោយេវ តណ្ឌុលោ អហោសិ សេយ្យថាបិ ឯតរហិ។ តស្ស មយ្ហំ សារីបុត្ត ឯកំយេវ តណ្ឌុលំ អាហារំ អាហារយតោ អធិមត្តកសិមានំ បត្តោ កាយោ ហោតិ។ សេយ្យថាបិ នាម អាសីតិកបព្វានិ វា កាលាបព្វានិ វា ឯវមេវស្សុ មេ អង្គប្បច្ចង្គានិ ភវន្តិ តាយេវប្បាហារតាយ។ សេយ្យថាបិ នាម ឱដ្ឋបទំ។បេ។ ហោតិ តាយេវប្បាហារតាយ។ សេយ្យថាបិ នាម វដ្ដនាវឡី។បេ។ តាយេវប្បាហារតាយ សេយ្យថាបិ នាម ជរសាលាយ។បេ។ សេយ្យថាបិ នាម គម្ភីរេ។បេ។ សេយ្យថាបិ នាម តិត្តិកាលាពុ។បេ។ សោ ខោ អហំ សារីបុត្ត ឧទរច្ឆវឹ។បេ។ សោ ខោ អហំ សារីបុត្ត វច្ចំ វា។បេ។ សោ ខោ អហំ សារីបុត្ត តមេវ កាយំ។បេ។ កាយស្មា បបតន្តិ តាយេវប្បាហារតាយ តាយបិ ខោ អហំ សារីបុត្ត អរិយាយ តាយ បដិបទាយ តាយ ទុក្ករការិកាយ នាជ្ឈគមឹ ឧត្តរិ មនុស្សធម្មា អលមរិយញ្ញាណទស្សនវិសេសំ តំ កិស្ស ហេតុ ឥមិស្សាយេវ អរិយាយ បញ្ញាយ អនធិគមា យាយំ បញ្ញា អធិគតា អរិយា និយ្យានិកា និយ្យាតិ តក្ករស្ស សម្មា ទុក្ខក្ខយាយ។

[១៨៧] សន្តិ បន [ឱ.ម. សន្តិ ខោ បន។] សារីបុត្ត ឯកេ សមណព្រាហ្មណា ឯវំវាទិនោ ឯវំទិដ្ឋិនោ សំសារេន សុទ្ធីតិ។ ន ខោ បនេសោ [ឱ. ន ខោ បន សោ។] សារីបុត្ត សំសារោ សុលភរូបោ យោ មយា អសំសរិតបុព្វោ ឥមិនា ទីឃេន អទ្ធុនា អញ្ញត្រ សុទ្ធាវាសេហិ ទេវេហិ សុទ្ធាវាសេ ចាហំ សារីបុត្ត ទេវេ សំសរេយ្យំ នយិមំ លោកំ បុនរាគច្ឆេយ្យំ។

[១៨៨] សន្តិ ខោ បន សារីបុត្ត ឯកេ សមណព្រាហ្មណា ឯវំវាទិនោ ឯវំទិដ្ឋិនោ ឧបបត្តិយា សុទ្ធីតិ។ ន ខោ បនេសា សារីបុត្ត ឧបបត្តិ សុលភរូបា យា មយា អនុបបន្នបុព្វា ឥមិនា ទីឃេន អទ្ធុនា អញ្ញត្រ សុទ្ធាវាសេហិ ទេវេហិ សុទ្ធាវាសេ ចាហំ សារីបុត្ត ទេវេ ឧបបជ្ជេយ្យំ នយិមំ លោកំ បុន អាគច្ឆេយ្យំ។

[១៨៩] សន្តិ ខោ បន សារីបុត្ត ឯកេ សមណព្រាហ្មណា ឯវំវាទិនោ ឯវំទិដ្ឋិនោ អាវាសេន សុទ្ធីតិ។ ន ខោ បនេសោ សារីបុត្ត អាវាសោ សុលភរូបោ យោ មយា អនាវុដ្ឋបុព្វោ ឥមិនា ទីឃេន អទ្ធុនា អញ្ញត្រ សុទ្ធាវាសេហិ ទេវេហិ សុទ្ធាវាសេ ចាហំ សារីបុត្ត ទេវេ អាវសេយ្យំ [ឱ.ម. វសេយ្យំ។] នយិមំ លោកំ បុន អាគច្ឆេយ្យំ។

[១៩០] សន្តិ ខោ បន សារីបុត្ត ឯកេ សមណព្រាហ្មណា ឯវំវាទិនោ ឯវំទិដ្ឋិនោ យញ្ញេន សុទ្ធីតិ។ ន ខោ បនេសោ សារីបុត្ត យញ្ញោ សុលភរូបោ យោ មយា អយិដ្ឋបុព្វោ ឥមិនា ទីឃេន អទ្ធុនា តញ្ច ខោ រញ្ញា វា សតា ខត្តិយេន មុទ្ធាវសិត្តេន ព្រាហ្មណេន វា មហាសាលេន។

[១៩១] សន្តិ ខោ បន សារីបុត្ត ឯកេ សមណព្រាហ្មណា ឯវំវាទិនោ ឯវំទិដ្ឋិនោ អគ្គិបារិចរិយាយ សុទ្ធីតិ។ ន ខោ បនេសោ សារីបុត្ត អគ្គិ សុលភរូបោ យោ មយា អបរិចិណ្ណបុព្វោ ឥមិនា ទីឃេន អទ្ធុនា តញ្ច ខោ រញ្ញា វា សតា ខត្តិយេន មុទ្ធាវសិត្តេន ព្រាហ្មណេន វា មហាសាលេន។

[១៩២] សន្តិ ខោ បន សារីបុត្ត ឯកេ សមណព្រាហ្មណា ឯវំវាទិនោ ឯវំទិដ្ឋិនោ យាវទេវាយំ ភវំ បុរិសោ ទហរោ ហោតិ យុវា សុសុកាឡកេសោ ភទ្រេន យោព្វនេន សមន្នាគតោ បឋមេន វយសា តាវទេវ បរមេន បញ្ញាវេយ្យត្តិយេន សមន្នាគតោ ហោតិ យតោ ច ខោ អយំ ភវំ បុរិសោ ជិណ្ណោ ហោតិ វុឌ្ឍោ មហល្លកោ អទ្ធគតោ វយោ អនុប្បត្តោ អសីតិកោ វា នវុតិកោ វា វស្សសតិកោ វា ជាតិយា អថ តម្ហា បញ្ញាវេយ្យត្តិយា បរិហាយតីតិ។ ន ខោ បនេតំ សារីបុត្ត ឯវំ ទដ្ឋព្វំ។ អហំ ខោ បន សារីបុត្ត ឯតរហិ ជិណ្ណោ វុឌ្ឍោ មហល្លកោ អទ្ធគតោ វយោ អនុប្បត្តោ អសីតិកោ មេ វយោ វត្តតិ។ ឥធស្សុ មេ [ឱ.ម. ឥធ មេ អស្សុ។] សារីបុត្ត ចត្តារោ សាវកា វស្សសតាយុកា វស្សសតជីវិនោ បរមាយ សតិយា ច គតិយា ច ធិតិយា ច សមន្នាគតា បរមេន ច បញ្ញាវេយ្យត្តិយេន សេយ្យថាបិ សារីបុត្ត ទឡ្ហធម្មា ធនុគ្គហោ សិក្ខិតោ កតហត្ថោ កតុបាសនោ [ឱ.ម. កតូបាសនោ។] លហុកេន អសនេន អប្បកសិរេនេវ តិរិយំ តាលច្ឆាយំ អតិបាតេយ្យ ឯវំ អធិមត្តសតិមន្តោ ឯវំ អធិមត្តគតិមន្តោ ឯវំ អធិមត្តធិតិមន្តោ ឯវំ បរមេន បញ្ញាវេយ្យត្តិយេន សមន្នាគតា តេ មំ ចតុន្នំ សតិប្បដ្ឋានានំ ឧបាទាយុបាទាយ បញ្ហំ បុច្ឆេយ្យុំ បុដ្ឋោ បុដ្ឋោ ចាហំ តេសំ ព្យាករេយ្យំ ព្យាកតញ្ច មេ ព្យាកតតោ ធារេយ្យុំ ន ច មំ ទុតិយកំ ឧត្តរឹ បដិបុច្ឆេយ្យុំ អញ្ញត្រ អសិតបីតខាយិតសាយិតា អញ្ញត្រ ឧច្ចារប្បស្សាវកម្មា អញ្ញត្រ និទ្ទាកិលមថប្បដិវិនោទនា អបរិយាទិន្នាយេវស្ស សារីបុត្ត តថាគតស្ស ធម្មទេសនា អបរិយាទិន្នំយេវស្ស តថាគតស្ស ធម្មបទព្យញ្ជនំ អបរិយាទិន្នំយេវស្ស តថាគតស្ស បញ្ហាបដិភានំ។ អថ មេ តេ ចត្តារោ សាវកា វស្សសតាយុកា វស្សសតជីវិនោ វស្សសតស្ស អច្ចយេន កាលំ ករេយ្យុំ។ មញ្ចកេន ចេបិ មំ សារីបុត្ត បរិហរិស្សថ នេវត្ថិ តថាគតស្ស បញ្ញាវេយ្យត្តិយស្ស អញ្ញថត្តំ។ យំ ខោ តំ សារីបុត្ត សម្មា វទមានោ វទេយ្យ អសម្មោហធម្មោ សត្តោ លោកេ ឧបន្នោ ពហុជនហិតាយ ពហុជនសុខាយ លោកានុកម្បាយ អត្ថាយ ហិតាយ សុខាយ ទេវមនុស្សានន្តិ។ មមេវ តំ សម្មា វទមានោ វទេយ្យ អសម្មោហធម្មោ សត្តោ លោកេ ឧប្បន្នោ ពហុជនហិតាយ ពហុជនសុខាយ លោកានុកម្បាយ អត្ថាយ ហិតាយ សុខាយ ទេវមនុស្សានន្តិ។

[១៩៣] តេន ខោ បន សមយេន អាយស្មា នាគសមាលោ ភគវតោ បិដ្ឋិតោ ហោតិ ភគវន្តំ វីជយមានោ។ អថខោ អាយស្មា នាគសមាលោ ភគវន្តំ ឯតទវោច អច្ឆរិយំ ភន្តេ អព្ភូតំ ភន្តេ អបិច មេ ភន្តេ ឥមំ ធម្មបរិយាយំ សុត្វា លោមានិ ហដ្ឋានិ កោ នាមាយំ [ឱ.ម. កោ នាមោ អយំ។] ភន្តេ ធម្មបរិយាយោតិ។ តស្មាតិហ ត្វំ នាគសមាល ឥមំ ធម្មបរិយាយំ លោមហំសនបរិយាយោ ត្វេវ នំ ធារេហីតិ។ ឥទមវោច ភគវា អត្តមនោ អាយស្មា នាគសមាលោ ភគវតោ ភាសិតំ អភិនន្ទីតិ។

មហាសីហនាទសុត្តំ ទុតិយំ និដ្ឋិតំ។

តតិយំ មហាទុក្ខក្ខន្ធសុត្តំ

[១៩៤] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ អថខោ សម្ពហុលា ភិក្ខូ បុព្វណ្ហសមយំ និវាសេត្វា បត្តចីវរមាទាយ សាវត្ថឹ បិណ្ឌាយ បាវិសឹសុ។ អថខោ តេសំ ភិក្ខូនំ ឯតទហោសិ អតិប្បគោ ខោ តាវ សាវត្ថិយំ បិណ្ឌាយ ចរិតុំ យន្នូន មយំ យេន អញ្ញតិត្ថិយានំ បរិព្វាជកានំ អារាមោ តេនុបសង្កមេយ្យាមាតិ។ អថខោ តេ ភិក្ខូ យេន អញ្ញតិត្ថិយានំ បរិព្វាជកានំ អារាមោ តេនុបសង្កមឹសុ ឧបសង្កមិត្វា តេហិ អញ្ញតិត្ថិយេហិ បរិព្វាជកេហិ សទ្ធឹ សម្មោទឹសុ សម្មោទនីយំ កថំ សារាណីយំ វីតិសារេត្វា ឯកមន្តំ និសីទឹសុ។ ឯកមន្តំ និសិន្នេ ខោ តេ ភិក្ខូ តេ អញ្ញតិត្ថិយា បរិព្វាជកា ឯតទវោចុំ សមណោ អាវុសោ គោតមោ កាមានំ បរិញ្ញំ បញ្ញាបេតិ មយម្បិ កាមានំ បរិញ្ញំ បញ្ញាបេម សមណោ អាវុសោ គោតមោ រូបានំ បរិញ្ញំ បញ្ញាបេតិ មយម្បិ រូបានំ បរិញ្ញំ បញ្ញាបេម សមណោ អាវុសោ គោតមោ វេទនានំ បរិញ្ញំ បញ្ញាបេតិ មយម្បិ វេទនានំ បរិញ្ញំ បញ្ញាបេម ឥធ នោ អាវុសោ កោ វិសេសោ កោ អធិប្បាយោ កឹ នានាករណំ សមណស្ស វា គោតមស្ស អម្ហាកំ វា យទិទំ ធម្មទេសនាយ វា ធម្មទេសនំ អនុសាសនិយា វា អនុសាសនិន្តិ។ អថខោ តេ ភិក្ខូ តេសំ អញ្ញតិត្ថិយានំ បរិព្វាជកានំ ភាសិតំ នេវ អភិនន្ទឹសុ នប្បដិក្កោសឹសុ អនភិនន្ទិត្វា អប្បដិក្កោសិត្វា ឧដ្ឋាយាសនា បក្កមឹសុ ភគវតោ សន្តិកេ ឯតស្ស ភាសិតស្ស អត្ថំ អាជានិស្សាមាតិ។

[១៩៥] អថខោ តេ ភិក្ខូ សាវត្ថិយំ បិណ្ឌាយ ចរិត្វា បច្ឆាភត្តំ បិណ្ឌបាតប្បដិក្កន្តា យេន ភគវា តេនុបសង្កមឹសុ ឧបសង្កមិត្វា ភគវន្តំ អភិវាទេត្វា ឯកមន្តំ និសីទឹសុ។ ឯកមន្តំ និសិន្នា ខោ តេ ភិក្ខូ ភគវន្តំ ឯតទវោចុំ ឥធ មយំ ភន្តេ បុព្វណ្ហសមយំ និវាសេត្វា បត្តចីវរមាទាយ សាវត្ថឹ បិណ្ឌាយ បវិសិម្ហ តេសន្នោ ភន្តេ អម្ហាកំ ឯតទហោសិ អតិប្បគោ ខោ តាវ សាវត្ថិយំ បិណ្ឌាយ ចរិតុំ យន្នូន មយំ យេន អញ្ញតិត្ថិយានំ បរិព្វាជកានំ អារាមោ តេនុបសង្កមេយ្យាមាតិ។ អថខោ មយំ ភន្តេ យេន អញ្ញតិត្ថិយានំ បរិព្វាជកានំ អារាមោ តេនុបសង្កមិម្ហ ឧបសង្កមិត្វា តេហិ អញ្ញតិត្ថិយេហិ បរិព្វាជកេហិ សទ្ធឹ សម្មោទិម្ហ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិម្ហ។ ឯកមន្តំ និសិន្នេ ខោ អម្ហេ ភន្តេ តេ អញ្ញតិត្ថិយា បរិព្វាជកា ឯតទវោចុំ [ឱ. ឯកមន្តំ និសិន្នេ ខោ ភន្តេ តេ អញ្ញតិត្ថិយា បរិព្វាជកា អម្ហេ ឯតទវោចុន្តិ ទិស្សតិ។] សមណោ អាវុសោ គោតមោ កាមានំ បរិញ្ញំ បញ្ញាបេតិ មយម្បិ កាមានំ បរិញ្ញំ បញ្ញាបេម សមណោ អាវុសោ គោតមោ រូបានំ បរិញ្ញំ បញ្ញាបេតិ មយម្បិ រូបានំ បរិញ្ញំ បញ្ញាបេម សមណោ អាវុសោ គោតមោ វេទនានំ បរិញ្ញំ បញ្ញាបេតិ មយម្បិ វេទនានំ បរិញ្ញំ បញ្ញាបេម ឥធ នោ អាវុសោ កោ វិសេសោ កោ អធិប្បាយោ កឹ នានាករណំ សមណស្ស វា គោតមស្ស អម្ហាកំ វា យទិទំ ធម្មទេសនាយ វា ធម្មទេសនំ អនុសាសនិយា វា អនុសាសនិន្តិ។ អថខោ មយំ ភន្តេ តេសំ អញ្ញតិត្ថិយានំ បរិព្វាជកានំ ភាសិតំ នេវ អភិនន្ទិម្ហ នប្បដិក្កោសិម្ហ អនភិនន្ទិត្វា អប្បដិក្កោសិត្វា ឧដ្ឋាយាសនា បក្កមិម្ហ ភគវតោ សន្តិកេ ឯតស្ស ភាសិតស្ស អត្ថំ អាជានិស្សាមាតិ។

[១៩៦] ឯវំវាទិនោ ភិក្ខវេ អញ្ញតិត្ថិយា បរិព្វាជកា ឯវមស្សុ វចនីយា កោ បនាវុសោ កាមានំ អស្សាទោ កោ អាទីនវោ កឹ និស្សរណំ កោ រូបានំ អស្សាទោ កោ អាទីនវោ កឹ និស្សរណំ កោ វេទនានំ អស្សាទោ កោ អាទីនវោ កឹ និស្សរណន្តិ។ ឯវំ បុដ្ឋា ភិក្ខវេ អញ្ញតិត្ថិយា បរិព្វាជកា ន ចេវ សម្បាយិស្សន្តិ ឧត្តរិញ្ច វិឃាតំ អាបជ្ជិស្សន្តិ តំ កិស្ស ហេតុ យថាតំ ភិក្ខវេ អវិសយស្មឹ។ នាហន្តំ ភិក្ខវេ បស្សាមិ សទេវកេ លោកេ សមារកេ សព្រហ្មកេ សស្សមណព្រាហ្មណិយា បជាយ សទេវមនុស្សាយ យោ ឥមេសំ បញ្ហានំ វេយ្យាករណេន ចិត្តំ អារាធេយ្យ អញ្ញត្រ តថាគតេន វា តថាគតស្សាវកេន វា ឥតោ វា បន សុត្វា។

[១៩៧] កោ ច ភិក្ខវេ កាមានំ អស្សាទោ។ បញ្ចិមេ ភិក្ខវេ កាមគុណា កតមេ បញ្ច ចក្ខុវិញ្ញេយ្យា រូបា ឥដ្ឋា កន្តា មនាបា បិយរូបា កាមូបសញ្ហិតា រជនីយា សោតវិញ្ញេយ្យា សទ្ទា… ឃានវិញ្ញេយ្យា គន្ធា … ជិវ្ហាវិញ្ញេយ្យា រសា… កាយវិញ្ញេយ្យា ផោដ្ឋព្វា ឥដ្ឋា កន្តា មនាបា បិយរូបា កាមូបសញ្ហិតា រជនីយា ឥមេ ខោ ភិក្ខវេ បញ្ច កាមគុណា។ យំ ខោ ភិក្ខវេ ឥមេ បញ្ច កាមគុណេ បដិច្ច ឧប្បជ្ជតិ សុខំ សោមនស្សំ អយំ កាមានំ អស្សាទោ។

[១៩៨] កោ ច ភិក្ខវេ កាមានំ អាទីនវោ។ ឥធ ភិក្ខវេ កុលបុត្តោ យេន សិប្បុដ្ឋានេន [ឱ.ម. សិប្បដ្ឋានេន។] ជីវិកំ កប្បេតិ យទិ មុទ្ធាយ យទិ គណនាយ យទិ សង្ខានេន យទិ កសិយា យទិ វណិជ្ជាយ យទិ គោរក្ខេន យទិ ឥស្សត្ថេន យទិ រាជបោរិសេន យទិ សិប្បញ្ញតរេន សីតស្ស បុរក្ខតោ ឧណ្ហស្ស បុរក្ខតោ ឌំសមកសវាតាតបសិរឹសប្បសម្ផស្សេហិ វិស្សមានោ ខុប្បិបាសាយ មិយ្យមានោ អយម្បិ ភិក្ខវេ កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ អាមាធិករណំ កាមានមេវ ហេតុ។ តស្ស ចេ ភិក្ខវេ កុលបុត្តស្ស ឯវំ ឧដ្ឋហតោ ឃដតោ វាយមតោ តេ ភោគា នាភិនិប្ផជ្ជន្តិ សោ សោចតិ កិលមតិ បរិទេវតិ ឧរត្តាឡឹ កន្ទតិ សម្មោហំ អាបជ្ជតិ មោឃំ វត មេ ឧដ្ឋានំ អផលោ វត មេ វាយាមោតិ អយម្បិ ភិក្ខវេ កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។ តស្ស ចេ ភិក្ខវេ កុលបុត្តស្ស ឯវំ ឧដ្ឋហតោ ឃដតោ វាយមតោ តេ ភោគា អភិនិប្ផជ្ជន្តិ សោ តេសំ ភោគានំ អារក្ខាធិករណំ ទុក្ខំ ទោមនស្សំ បដិសំវេទេតិ កិន្តិ តេ [ឱ.ម. មេ។] ភោគេ នេវ រាជានោ ហរេយ្យុំ ន ចោរា ហរេយ្យុំ ន អគ្គិ ឌហេយ្យ ន ឧទកំ វហេយ្យ ន អប្បិយា ទាយាទា ហរេយ្យុន្តិ។ តស្ស ឯវំ អារក្ខតោ គោបយតោ តេ ភោគេ រាជានោ វា ហរន្តិ ចោរា វា ហរន្តិ អគ្គិ វា ទហតិ ឧទកំ វា វហតិ អប្បិយា ទាយាទា វា ហរន្តិ សោ សោចតិ កិលមតិ បរិទេវតិ ឧរត្តាឡឹ កន្ទតិ សម្មោហំ អាបជ្ជតិ យម្បិ មេ អហោសិ តម្បិ នោ នត្ថីតិ អយម្បិ ភិក្ខវេ កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។ បុន ចបរំ ភិក្ខវេ កាមហេតុ កាមនិទានំ កាមាធិករណំ កាមានមេវ ហេតុ រាជានោបិ រាជូហិ វិវទន្តិ ខត្តិយាបិ ខត្តិយេហិ វិវទន្តិ ព្រាហ្មណាបិ ព្រាហ្មណេហិ វិវទន្តិ គហបតីបិ គហបតីហិ វិវទន្តិ មាតាបិ បុត្តេន វិវទតិ បុត្តោបិ មាតរា វិវទតិ បិតាបិ បុត្តេន វិវទតិ បុត្តោបិ បិតរា វិវទតិ ភាតាបិ ភាតរា វិវទតិ បុត្តោបិ បិតរា វិវទតិ ភាតាបិ ភាតរា វិវទតិ ភាតាបិ ភគិនិយា វិវទតិ ភគិនីបិ ភាតរា វិវទតិ សហាយោបិ សហាយេន វិវទតិ តេ តត្ថ កលហវិគ្គហវិវាទាបន្នា អញ្ញមញ្ញំ បាណីហិបិ ឧបក្កមន្តិ លេឌ្ឌូហិបិ ឧបក្កមន្តិ ទណ្ឌេហិបិ ឧបក្កមន្តិ សត្ថេហិបិ ឧបក្កមន្តិ តេ តត្ថ មរណម្បិ និគ្គច្ឆន្តិ មរណមត្តម្បិ ទុក្ខំ អយម្បិ ភិក្ខវេ កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។ បុន ចបរំ ភិក្ខវេ កាមហេតុ កាមនិទានំ កាមាធិករណំ កាមានមេវ ហេតុ អសិចម្មំ គហេត្វា ធនុកលាបំ សន្នយ្ហិត្វា ឧភតោ ព្យុឡ្ហំ [ឱ. វិយូឡហំ។] សង្គាមំ បក្ខន្ទន្តិ ឧសូសុបិ ខិប្បមានេសុ សត្តីសុបិ ខិប្បមានាសុ អសីសុបិ វិជ្ជោតលន្តេសុ តេ តត្ថ ឧសូហិបិ វិជ្ឈន្តិ សត្តិយាបិ វិជ្ឈន្តិ អសិនាបិ សីសំ ឆិន្ទន្តិ តេ តត្ថ មរណម្បិ និគ្គច្ឆន្តិ មរណមត្តម្បិ ទុក្ខំ អយម្បិ ភិក្ខវេ កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។ បុន ចបរំ ភិក្ខវេ កាមហេតុ កាមនិទានំ កាមាធិករណំ កាមានមេវ ហេតុ អសិចម្មំ គហេត្វា ធនុកលាបំ សន្នយ្ហិត្វា អដ្ដាវលេបនា [ឱ. អទ្ទាវលេបនា។] ឧបការិយោ បក្ខន្ទន្តិ ឧសូសុបិ ខិប្បមានេសុ សត្តីសុបិ ខិប្បមានាសុ អសីសុបិ វិជ្ជោតលន្តេសុ តេ តត្ថ ឧសូហិបិ វិជ្ឈន្តិ សត្តិយាបិ វិជ្ឈន្តិ ឆកណដិយាបិ [ឱ. បក្កដ្ឋិយា។] ឱសិញ្ចន្តិ អភិវគ្គេនបិ ឱមទ្ទន្តិ អសិនាបិ សីសំ ឆិន្ទន្តិ តេ តត្ថ មរណម្បិ និគ្គច្ឆន្តិ មរណមត្តម្បិ ទុក្ខំ អយម្បិ ភិក្ខវេ កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។ បុន ចបរំ ភិក្ខវេ កាមហេតុ កាមនិទានំ កាមាធិករណំ កាមានមេវ ហេតុ សន្ធិម្បិ ឆិន្ទន្តិ និល្លោបម្បិ ហរន្តិ ឯកាគារិកម្បិ ករោន្តិ បរិបន្ថេបិ តិដ្ឋន្តិ បរទារម្បិ គច្ឆន្តិ តមេនំ រាជានោ គហេត្វា វិវិធានិ កម្មការណានិ [ឱ. វិវិធា កម្មករណា។] ការេន្តិ [ឱ. ករោន្តិ។] កសាហិបិ តាឡេន្តិ វេត្តេហិបិ តាឡេន្តិ អឌ្ឍទណ្ឌកេហិបិ តាឡេន្តិ ហត្ថម្បិ ឆិន្ទន្តិ បាទម្បិ ឆិន្ទន្តិ ហត្ថបាទម្បិ ឆិន្ទន្តិ កណ្ណម្បិ ឆិន្ទន្តិ នាសម្បិ ឆិន្ទន្តិ កណ្ណនាសម្បិ ឆិន្ទន្តិ ពិលង្គថាលិកម្បិ ករោន្តិ សង្ខមុណ្ឌកម្បិ ករោន្តិ រាហុមុខម្បិ ករោន្តិ ជោតិមាលិកម្បិ ករោន្តិ ហត្ថប្បជ្ជោតិកម្បិ ករោន្តិ ឯរកវត្តិកម្បិ ករោន្តិ ចីរកវាសិកម្បិ ករោន្តិ ឯណេយ្យកម្បិ ករោន្តិ ពឡិសមំសិកម្បិ ករោន្តិ កហាបណកម្បិ ករោន្តិ ខារាបដិច្ឆកម្បិ ករោន្តិ បលិឃបរិវត្តិកម្បិ ករោន្តិ បលាលបីឋកម្បិ ករោន្តិ តត្តេនបិ តេលេន ឱសិញ្ចន្តិ សុនខេហិបិ ខាទាបេន្តិ ជីវន្តម្បិ សូលេ ឧត្តាសេន្តិ អសិនាបិ សីសំ ឆិន្ទន្តិ តេ តត្ថ មរណម្បិ និគ្គច្ឆន្តិ មរណមត្តម្បិ ទុក្ខំ អយម្បិ ភិក្ខវេ កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។ បុន ចបរំ ភិក្ខវេ កាមហេតុ កាមនិទានំ កាមាធិករណំ កាមានមេវ ហេតុ កាយេន ទុច្ចរិតំ ចរន្តិ វាចាយ ទុច្ចរិតំ ចរន្តិ មនសា ទុច្ចរិតំ ចរន្តិ តេ កាយេន ទុច្ចរិតំ ចរិត្វា វាចាយ ទុច្ចរិតំ ចរិត្វា មនសា ទុច្ចរិតំ ចរិត្វា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជន្តិ អយម្បិ ភិក្ខវេ កាមានំ អាទីនវោ សម្បរាយិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។

[១៩៩] កិញ្ច ភិក្ខវេ កាមានំ និស្សរណំ។ យោ ខោ ភិក្ខវេ កាមេសុ ឆន្ទរាគវិនយោ ឆន្ទរាគប្បហានំ ឥទំ កាមានំ និស្សរណំ។

[២០០] យេ ហិ កេចិ ភិក្ខវេ សមណា វា ព្រាហ្មណា វា ឯវំ កាមានំ អស្សាទញ្ច អស្សាទតោ អាទីនវញ្ច អាទីនវតោ និស្សរណញ្ច និស្សរណតោ យថាភូតំ នប្បជានន្តិ តេ វត សាមំ វា កាមេ បរិជានិស្សន្តិ បរំ វា តថត្តាយ សមាទបេស្សន្តិ យថាបដិបន្នោ កាមេ បរិជានិស្សតីតិ នេតំ ឋានំ វិជ្ជតិ។ យេ ច ខោ កេចិ ភិក្ខវេ សមណា វា ព្រាហ្មណា វា ឯវំ កាមានំ អស្សាទញ្ច អស្សាទតោ អាទីនវញ្ច អាទីនវតោ និស្សរណញ្ច និស្សរណតោ យថាភូតំ បជានន្តិ តេ វត សាមំ វា កាមេ បរិជានិស្សន្តិ បរំ វា តថត្តាយ សមាទបេស្សន្តិ យថាបដិបន្នោ កាមេ បរិជានិស្សតីតិ ឋានមេតំ វិជ្ជតិ។

[២០១] កោ ច ភិក្ខវេ រូបានំ អស្សាទោ។ សេយ្យថាបិ ភិក្ខវេ ខត្តិយកញ្ញា វា ព្រាហ្មណកញ្ញា វា គហបតិកញ្ញា វា បណ្ណរសវស្សុទ្ទេសិកា វា សោឡសវស្សុទ្ទេសិកា វា នាតិទីឃា នាតិរស្សា នាតិកិសា នាតិថូលា នាតិកាឡិកា នាច្ចោទាតា បរមា សា ភិក្ខវេ តស្មឹ សមយេ សុភា វណ្ណនិភាតិ។ ឯវំ ភន្តេតិ។ យំ ខោ ភិក្ខវេ សុភំ វណ្ណនិភំ បដិច្ច ឧប្បជ្ជតិ សុខំ សោមនស្សំ អយំ រូបានំ អស្សាទោ។

[២០២] កោ ច ភិក្ខវេ រូបានំ អាទីនវោ។ ឥធ ភិក្ខវេ តមេវ ភគិនឹ បស្សេយ្យ អបរេន សមយេន អសីតិកំ វា នាវុតិកំ វា វស្សសតិកំ វា ជាតិយា ជិណ្ណំ គោបាណសិវង្កំ ភោគ្គំ ទណ្ឌបរាយនំ បវេធមានំ គច្ឆន្តឹ អាតុរំ គតយោព្វនំ ខណ្ឌទន្តឹ បលិតកេសឹ វិលូនំ ខល្លិតសិរំ វលីនំ តិលកាហតគត្តំ។ តំ កឹ មញ្ញថ ភិក្ខវេ យា បុរិមា សុភា វណ្ណនិភា សា អន្តរហិតា អាទីនវោ បាតុភូតោតិ។ ឯវំ ភន្តេតិ។ អយំ ភិក្ខវេ រូបានំ អាទីនវោ។ បុន ចបរំ ភិក្ខវេ តមេវ ភគិនឹ បស្សេយ្យ អាពាធិកំ ទុក្ខិតំ ពាឡ្ហគិលានំ សកេ មុត្តករីសេ បលិបន្នំ សេមានំ [ម. សេយ្យមានំ។] អញ្ញេហិ វុដ្ឋាបិយមានំ អញ្ញេហិ សម្បវេសិយមានំ [ឱ. សំវេសិយមានន្តិ ទិស្សតិ។ ម. បវេសិយមានន្តិ ទិស្សតិ។]។ តំ កឹ មញ្ញថ ភិក្ខវេ យា បុរិមា សុភា វណ្ណនិភា សា អន្តរហិតា អាទីនវោ បាតុភូតោតិ។ ឯវំ ភន្តេតិ។ អយម្បិ ភិក្ខវេ រូបានំ អាទីនវោ។ បុន ចបរំ ភិក្ខវេ តមេវ ភគិនឹ បស្សេយ្យ សរីរំ សីវថិកាយ ឆឌ្ឌិតំ ឯកាហមតំ វា ទ្វីហមតំ វា តីហមតំ វា ឧទ្ធុមាតកំ វា [ឱ.ម. វាតិ ន ទិស្សតិ។] វិនីលកំ វា [ឱ.ម. វាតិ ន ទិស្សតិ។] វិបុព្វកជាតំ។ តំ កឹ មញ្ញថ ភិក្ខវេ យា បុរិមា សុភា វណ្ណនិភា សា អន្តរហិតា អាទីនវោ បាតុភូតោតិ។ ឯវំ ភន្តេតិ។ អយម្បិ ភិក្ខវេ រូបានំ អាទីនវោ។ បុន ចបរំ ភិក្ខវេ តមេវ ភគិនឹ បស្សេយ្យ សរីរំ សីវថិកាយ ឆឌ្ឌិតំ កាកេហិ វា ខជ្ជមានំ គិជ្ឈេហិ វា ខជ្ជមានំ កុលលេហិ វា ខជ្ជមានំ សុវានេហិ វា ខជ្ជមានំ សិង្កាលេហិ វា ខជ្ជមានំ វិវិធេហិ វា បាណកជាតិកេហិ ខជ្ជមានំ។ តំ កឹ មញ្ញថ ភិក្ខវេ យា បុរិមា សុភា វណ្ណនិភា សា អន្តរហិតា អាទីនវោ បាតុភូតោតិ។ ឯវំ ភន្តេតិ។ អយម្បិ ភិក្ខវេ រូបានំ អាទីនវោ។ បុន ចបរំ ភិក្ខវេ តមេវ ភគិនឹ បស្សេយ្យ សរីរំ សីវថិកាយ ឆឌ្ឌិតំ អដ្ឋិកសង្ខលិកំ សមំសលោហិតំ ន្ហារុសម្ពន្ធំ។បេ។ អដ្ឋិកសង្ខលិកំ និម្មំសលោហិតមក្ខិតំ ន្ហារុសម្ពន្ធំ។បេ។ អដ្ឋិកសង្ខលិកំ អបគតមំសលោហិតំ ន្ហារុសម្ពន្ធំ។បេ។ អដ្ឋិកានិ អបគតន្ហារុសម្ពន្ធានិ ទិសាវិទិសា វិក្ខិត្តានិ អញ្ញេន ហត្ថដ្ឋិកំ អញ្ញេន បាទដ្ឋិកំ អញ្ញេន ជង្ឃដ្ឋិកំ អញ្ញេន ឧរុដ្ឋិកំ អញ្ញេន កដិដ្ឋិកំ អញ្ញេន បិដ្ឋិកណ្តកដ្ឋិកំ អញ្ញេន ផាសុកដ្ឋិកំ អញ្ញេន ឧរដ្ឋិកំ អញ្ញេន ពាហុដ្ឋិកំ អញ្ញេន អំសដ្ឋិកំ អញ្ញេន គីវដ្ឋិកំ អញ្ញេន ហនុដ្ឋិកំ អញ្ញេន ទន្តដ្ឋិកំ អញ្ញេន សីសកដាហំ។ តំ កឹ មញ្ញថ ភិក្ខវេ យា បុរិមា សុភា វណ្ណនិភា សា អន្តរហិតា អាទីនវោ បាតុភូតោតិ។ ឯវំ ភន្តេតិ។ អយម្បិ ភិក្ខវេ រូបានំ អាទីនវោ។ បុន ចបរំ ភិក្ខវេ តមេវ ភគិនឹ បស្សេយ្យ សរីរំ សីវថិកាយ ឆឌ្ឌិតំ អដ្ឋិកានិ សេតានិ សង្ខវណ្ណូបនិភានិ។បេ។ អដ្ឋិកានិ បុញ្ជកិតានិ តេរោវស្សកានិ។បេ។ អដ្ឋិកានិ បូតីនិ ចុណ្ណកជាតានិ។ តំ កឹ មញ្ញថ ភិក្ខវេ យា បុរិមា សុភា វណ្ណនិភា សា អន្តរហិតា អាទីនវោ បាតុភូតោតិ។ ឯវំ ភន្តេតិ។ អយម្បិ ភិក្ខវេ រូបានំ អាទីនវោ។

[២០៣] កិញ្ច ភិក្ខវេ រូបានំ និស្សរណំ។ យោ ភិក្ខវេ រូបេសុ ឆន្ទរាគវិនយោ ឆន្ទរាគប្បហានំ ឥទំ រូបានំ និស្សរណំ។

[២០៤] យេ ហិ កេចិ ភិក្ខវេ សមណា វា ព្រាហ្មណា វា ឯវំ រូបានំ អស្សាទញ្ច អស្សាទតោ អាទីនវញ្ច អាទីនវតោ និស្សរណញ្ច និស្សរណតោ យថាភូតំ នប្បជានន្តិ តេ វត សាមំ វា រូបេ បរិជានិស្សន្តិ បរំ វា តថត្តាយ សមាទបេស្សន្តិ យថាបដិបន្នោ រូបេ បរិជានិស្សតីតិ នេតំ ឋានំ វិជ្ជតិ។ យេ ច ខោ កេចិ ភិក្ខវេ សមណា វា ព្រាហ្មណា វា ឯវំ រូបានំ អស្សាទញ្ច អស្សាទតោ អាទីនវញ្ច អាទីនវតោ និស្សរណញ្ច និស្សរណតោ យថាភូតំ បជានន្តិ តេ វត សាមំ វា រូបេ បរិជានិស្សន្តិ បរំ វា តថត្តាយ សមាទបេស្សន្តិ យថាបដិបន្នោ រូបេ បរិជានិស្សតីតិ ឋានមេតំ វិជ្ជតិ។

[២០៥] កោ ច ភិក្ខវេ វេទនានំ អស្សាទោ។ ឥធ ភិក្ខវេ ភិក្ខុ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ។ យស្មឹ សមយេ ភិក្ខវេ ភិក្ខុ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ នេវ តស្មឹ សមយេ អត្តព្យាពាធាយបិ ចេតេតិ ន បរព្យាពាធាយបិ ចេតេតិ ន ឧភយព្យាពាធាយបិ ចេតេតិ អព្យាបជ្ឈំយេវ តស្មឹ សមយេ វេទនំ វេទេតិ អព្យាបជ្ឈបរមាហំ ភិក្ខវេ វេទនានំ អស្សាទំ វទាមិ។ បុន ចបរំ ភិក្ខវេ ភិក្ខុ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវំ អវិតក្កំ អវិចារំ សមាធិជំ បីតិសុខំ ទុតិយំ ឈានំ ឧបសម្បជ្ជ វិហរតិ។ យស្មឹ សមយេ ភិក្ខវេ ភិក្ខុ វិតក្កវិចារានំ វូបសមា។បេ។ វិហរតិ នេវ តស្មឹ សមយេ អត្តព្យាពាធាយបិ ចេតេតិ។បេ។ វេទេតិ អព្យាបជ្ឈបរមាហំ ភិក្ខវេ វេទនានំ អស្សាទំ វទាមិ។ បុន ចបរំ ភិក្ខវេ ភិក្ខុ បីតិយា ច វិរាគា ឧបេក្ខកោ ច វិហរតិ សតោ ច សម្បជានោ សុខញ្ច កាយេន បដិសំវេទេតិ យន្តំ អរិយា អាចិក្ខន្តិ ឧបេក្ខកោ សតិមា សុខវិហារីតិ តតិយំ ឈានំ ឧបសម្បជ្ជ វិហរតិ។ យស្មឹ សមយេ ភិក្ខវេ ភិក្ខុ បីតិយា ច វិរាគា។បេ។ វិហរតិ នេវ តស្មឹ សមយេ។បេ។ វេទេតិ អព្យាបជ្ឈបរមាហំ ភិក្ខវេ វេទនានំ អស្សាទំ វទាមិ។ បុន ចបរំ ភិក្ខវេ ភិក្ខុ សុខស្ស ច បហានា ទុក្ខស្ស ច បហានា បុព្វេវ សោមនស្សទោមនស្សានំ អត្ថង្គមា អទុក្ខមសុខំ ឧបេក្ខាសតិបារិសុទ្ធឹ ចតុត្ថំ ឈានំ ឧបសម្បជ្ជ វិហរតិ។ យស្មឹ សមយេ ភិក្ខវេ ភិក្ខុ សុខស្ស ច។បេ។ វិហរតិ នេវ តស្មឹ សមយេ អត្តព្យាពាធាយបិ ចេតេតិ ន បរព្យាពាធាយបិ ចេតេតិ ន ឧភយព្យាពាធាយបិ ចេតេតិ អព្យាបជ្ឈំយេវ តស្មឹ សមយេ វេទនំ វេទេតិ អព្យាបជ្ឈបរមាហំ ភិក្ខវេ វេទនានំ អស្សាទំ វទាមិ។

[២០៦] កោ ច ភិក្ខវេ វេទនានំ អាទីនវោ។ យំ ភិក្ខវេ វេទនា អនិច្ចា ទុក្ខា វិបរិណាមធម្មា អយំ វេទនានំ អាទីនវោ។

[២០៧] កិញ្ច ភិក្ខវេ វេទនានំ និស្សរណំ។ យោ ភិក្ខវេ វេទនានំ ឆន្ទរាគវិនយោ ឆន្ទរាគប្បហានំ ឥទំ វេទនានំ និស្សរណំ។

[២០៨] យេ ហិ កេចិ ភិក្ខវេ សមណា វា ព្រាហ្មណា វា ឯវំ វេទនានំ អស្សាទញ្ច អស្សាទតោ អាទីនវញ្ច អាទីនវតោ និស្សរណញ្ច និស្សរណតោ យថាភូតំ នប្បជានន្តិ តេ វត សាមំ វា វេទនា បរិជានិស្សន្តិ បរំ វា តថត្តាយ សមាទបេស្សន្តិ យថាបដិបន្នោ វេទនា បរិជានិស្សតីតិ នេតំ ឋានំ វិជ្ជតិ។ យេ ច ខោ កេចិ ភិក្ខវេ សមណា វា ព្រាហ្មណា វា ឯវំ វេទនានំ អស្សាទញ្ច អស្សាទតោ អាទីនវញ្ច អាទីនវតោ និស្សរណញ្ច និស្សរណតោ យថាភូតំ បជានន្តិ តេ វត សាមំ វា វេទនា បរិជានិស្សន្តិ បរំ វា តថត្តាយ សមាទបេស្សន្តិ យថាបដិបន្នោ វេទនា បរិជានិស្សតីតិ ឋានមេតំ វិជ្ជតីតិ។ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទន្តិ។

មហាទុក្ខក្ខន្ធសុត្តំ តតិយំ និដ្ឋិតំ។

ចតុត្ថំ ចូឡទុក្ខក្ខន្ធសុត្តំ

[២០៩] ឯវម្មេ សុតំ។ ឯកំ សមយំ ភគវា សក្កេសុ វិហរតិ កបិលវត្ថុស្មឹ និគ្រោធារាមេ។ អថខោ មហានាមោ សក្កោ យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ មហានាមោ សក្កោ ភគវន្តំ ឯតទវោច ទីឃរត្តាហំ ភន្តេ ភគវតា ឯវំ ធម្មំ ទេសិតំ អាជានាមិ លោភោ ចិត្តស្ស ឧបក្កិលេសោ ទោសោ ចិត្តស្ស ឧបក្កិលេសោ មោហោ ចិត្តស្ស ឧបក្កិលេសោ [ឱ.ម. ឯកមន្តំ និសិន្នោ។ល។ ឧបក្កិលេសោតិ។ ឯវំ ចាហំ ភន្តេ ភគវតោ ធម្មំ ទេសិតំ អាជានាមិ លោភោ ចិត្តស្ស ឧបក្កិលេសោ ទោសោ ចិត្តស្ស ឧបក្កិលេសោ មោហោ ចិត្តស្ស ឧបក្កិលេសោតីតិ ទិស្សន្តិ។]។ អថ ច បន មេ ឯកទា លោភធម្មាបិ ចិត្តំ បរិយាទាយ តិដ្ឋន្តិ ទោសធម្មាបិ ចិត្តំ បរិយាទាយ តិដ្ឋន្តិ មោហធម្មាបិ ចិត្តំ បរិយាទាយ តិដ្ឋន្តិ តស្ស មយ្ហំ ភន្តេ ឯវំ ហោតិ កោសុ នាម មេ ធម្មោ អជ្ឈត្តំ អប្បហីនោ យេន មេ ឯកទា លោភធម្មាបិ ចិត្តំ បរិយាទាយ តិដ្ឋន្តិ ទោសធម្មាបិ ចិត្តំ បរិយាទាយ តិដ្ឋន្តិ មោហធម្មាបិ ចិត្តំ បរិយាទាយ តិដ្ឋន្តីតិ។

[២១០] សោ ឯវ ខោ តេ មហានាម ធម្មោ អជ្ឈត្តំ អប្បហីនោ យេន តេ ឯកទា លោភធម្មាបិ ចិត្តំ បរិយាទាយ តិដ្ឋន្តិ ទោសធម្មាបិ ចិត្តំ បរិយាទាយ តិដ្ឋន្តិ មោហធម្មាបិ ចិត្តំ បរិយាទាយ តិដ្ឋន្តិ។ សោ ច ហិ តេ មហានាម ធម្មោ អជ្ឈត្តំ បហីនោ អភវិស្ស។ ន ត្វំ អគារំ អជ្ឈាវសេយ្យាសិ ន កាមេ បរិភុញ្ជេយ្យាសិ។ យស្មា ច ខោ តេ មហានាម សោ ឯវ ធម្មោ អជ្ឈត្តំ អប្បហីនោ តស្មា ត្វំ អគារំ អជ្ឈាវសសិ កាមេ បរិភុញ្ជសិ។

[២១១] អប្បស្សាទា កាមា ពហុទុក្ខា ពហូបាយាសា អាទីនវោ ឯត្ថ ភិយ្យោតិ ឥតិ ចេបិ មហានាម អរិយស្សាវកស្ស យថាភូតំ សម្មប្បញ្ញាយ សុទិដ្ឋំ ហោតិ។ សោ ច អញ្ញត្រេវ កាមេហិ អញ្ញត្រ អកុសលេហិ ធម្មេហិ បីតិសុខំ នាធិគច្ឆតិ អញ្ញំ វា តតោ សន្តតរំ អថខោ សោ នេវ តាវ អនាវដ្ដី កាមេសុ ហោតិ។ យតោ ច ខោ មហានាម អរិយស្សាវកស្ស អប្បស្សាទា កាមា ពហុទុក្ខា ពហូបាយាសា អាទីនវោ ឯត្ថ ភិយ្យោតិ ឯវមេតំ [ឱ.ម. ឯវមេតំ យថាភូតំ។] សម្មប្បញ្ញាយ សុទិដ្ឋំ ហោតិ។ សោ ច អញ្ញត្រេវ កាមេហិ អញ្ញត្រ អកុសលេហិ ធម្មេហិ បីតិសុខំ អធិគច្ឆតិ អញ្ញំ វា [ឱ. អញ្ញញ្ច។] តតោ សន្តតរំ អថខោ សោ អនាវដ្ដី កាមេសុ ហោតិ។ មយ្ហម្បិ ខោ មហានាម បុព្វេវ សម្ពោធា អនភិសម្ពុទ្ធស្ស ពោធិសត្តស្សេវ សតោ អប្បស្សាទា កាមា ពហុទុក្ខា ពហូបាយាសា អាទីនវោ ឯត្ថ ភិយ្យោតិ យថាភូតំ [ឱ.ម. ឯវមេតំ យថាភូតំ។] សម្មប្បញ្ញាយ សុទិដ្ឋំ ហោតិ [ឱ. អហោសិ។]។ សោ ច អញ្ញត្រេវ កាមេហិ អញ្ញត្រ អកុសលេហិ ធម្មេហិ បីតិសុខំ នាជ្ឈគមឹ [ឱ. នាជ្ឈគមំ។] អញ្ញំ វា តតោ សន្តតរំ អថខ្វាហំ នេវ តាវ អនាវដ្ដី កាមេសុ បច្ចញ្ញាសឹ។ យតោ ច ខោ មេ មហានាម អប្បស្សាទា កាមា ពហុទុក្ខា ពហូបាយាសា អាទីនវោ ឯត្ថ ភិយ្យោតិ ឯវមេតំ យថាភូតំ សម្មប្បញ្ញាយ សុទិដ្ឋំ អហោសិ។ សោ ច អញ្ញត្រេវ កាមេហិ អញ្ញត្រ អកុសលេហិ ធម្មេហិ បីតិសុខំ អជ្ឈគមឹ អញ្ញញ្ច តតោ សន្តតរំ អថាហំ អនាវដ្ដី កាមេសុ បច្ចញ្ញាសឹ។

[២១២] កោ ច មហានាម កាមានំ អស្សាទោ។ បញ្ចិមេ មហានាម កាមគុណា កតមេ បញ្ច ចក្ខុវិញ្ញេយ្យា រូបា ឥដ្ឋា កន្តា មនាបា បិយរូបា កាមូបសញ្ហិតា រជនីយា សោតវិញ្ញេយ្យា សទ្ទា… ឃានវិញ្ញេយ្យា គន្ធា… ជិវ្ហាវិញ្ញេយ្យា រសា… កាយវិញ្ញេយ្យា ផោដ្ឋព្វា ឥដ្ឋា កន្តា មនាបា បិយរូបា កាមូបសញ្ហិតា រជនីយា ឥមេ ខោ មហានាម បញ្ច កាមគុណា។ យំ ខោ មហានាម ឥមេ បញ្ច កាមគុណេ បដិច្ច ឧប្បជ្ជតិ សុខំ សោមនស្សំ អយំ កាមានំ អស្សាទោ។

[២១៣] កោ ច មហានាម កាមានំ អាទីនវោ។ ឥធ មហានាម កុលបុត្តោ យេន សិប្បុដ្ឋានេន ជីវិកំ កប្បេតិ យទិ មុទ្ធាយ យទិ គណនាយ យទិ សង្ខានេន យទិ កសិយា យទិ វណិជ្ជាយ យទិ គោរក្ខេន យទិ ឥស្សត្ថេន យទិ រាជបោរិសេន យទិ សិប្បញ្ញតរេន សីតស្ស បុរក្ខតោ ឧណ្ហស្ស បុរក្ខតោ ឌំសមកសវាតាតបសិរឹសប្បសម្ផស្សេហិ រិស្សមានោ ខុប្បិបាសាយ មិយ្យមានោ អយម្បិ មហានាម កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។ តស្ស ចេ មហានាម កុលបុត្តស្ស ឯវំ ឧដ្ឋហតោ ឃដតោ វាយមតោ តេ ភោគា នាភិនិប្ផជ្ជន្តិ សោ សោចតិ កិលមតិ បរិទេវតិ ឧរត្តាឡឹ កន្ទតិ សម្មោហំ អាបជ្ជតិ មោឃំ វត មេ ឧដ្ឋានំ អផលោ វត មេ វាយាមោតិ។ អយម្បិ មហានាម កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។ តស្ស ចេ មហានាម កុលបុត្តស្ស ឯវំ ឧដ្ឋហតោ ឃដតោ វាយមតោ តេ ភោគា អភិនិប្ផជ្ជន្តិ សោ តេសំ ភោគានំ អារក្ខាធិករណំ ទុក្ខំ ទោមនស្សំ បដិសំវេទេតិ កិន្តិ មេ ភោគេ នេវ រាជានោ ហរេយ្យុំ ន ចោរា ហរេយ្យុំ ន អគ្គី ឌហេយ្យ ន ឧទកំ វហេយ្យ ន អប្បិយា ទាយាទា ហរេយ្យុន្តិ។ តស្ស ឯវំ អារក្ខតោ គោបយតោ តេ ភោគេ រាជានោ វា ហរន្តិ ចោរា វា ហរន្តិ អគ្គិ វា ឌហតិ ឧទកំ វា វហតិ អប្បិយា ទាយាទា វា ហរន្តិ សោ សោចតិ កិលមតិ បរិទេវតិ ឧរត្តាឡឹ កន្ទតិ សម្មោហំ អាបជ្ជតិ យម្បិ មេ អហោសិ តម្បិ នោ នត្ថីតិ។ អយម្បិ មហានាម កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។

[២១៤] បុន ចបរំ មហានាម កាមហេតុ កាមនិទានំ កាមាធិករណំ កាមានមេវ ហេតុ រាជានោបិ រាជូហិ វិវទន្តិ ខត្តិយាបិ ខត្តិយេហិ វិវទន្តិ ព្រាហ្មណាបិ ព្រាហ្មណេហិ វិវទន្តិ គហបតីបិ គហបតីហិ វិវទន្តិ មាតាបិ បុត្តេន វិវទតិ បុត្តោបិ មាតរា វិវទតិ បិតាបិ បុត្តេន វិវទតិ បុត្តោបិ បិតរា វិវទតិ ភាតាបិ ភាតរា វិវទតិ ភាតាបិ ភគិនិយា វិវទតិ ភគិនីបិ ភាតរា វិវទតិ សហាយោបិ សហាយេន វិវទតិ។ តេ តត្ថ កលហវិគ្គហវិវាទាបន្នា អញ្ញមញ្ញំ បាណីហិបិ ឧបក្កមន្តិ លេឌ្ឌូហិបិ ឧបក្កមន្តិ ទណ្ឌេហិបិ ឧបក្កមន្តិ សត្ថេហិបិ ឧបក្កមន្តិ តេ តត្ថ មរណម្បិ និគ្គច្ឆន្តិ មរណមត្តម្បិ ទុក្ខំ។ អយម្បិ មហានាម កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។

[២១៥] បុន ចបរំ មហានាម កាមហេតុ កាមនិទានំ កាមាធិករណំ កាមានមេវ ហេតុ អសិចម្មំ គហេត្វា ធនុកលាបំ សន្នយ្ហិត្វា ឧភតោព្យុឡ្ហំ សង្គាមំ បក្ខន្ទន្តិ ឧសូសុបិ ខិប្បមានេសុ សត្តីសុបិ ខិប្បមានាសុ អសីសុបិ វិជ្ជោតលន្តេសុ តេ តត្ថ ឧសូហិបិ វិជ្ឈន្តិ សត្តិយាបិ វិជ្ឈន្តិ អសិនាបិ សីសំ ឆិន្ទន្តិ តេ តត្ថ មរណម្បិ និគ្គច្ឆន្តិ មរណមត្តម្បិ ទុក្ខំ។ អយម្បិ មហានាម កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។

[២១៦] បុន ចបរំ មហានាម កាមហេតុ កាមនិទានំ កាមាធិករណំ កាមានមេវ ហេតុ អសិចម្មំ គហេត្វា ធនុកលាបំ សន្នយ្ហិត្វា អដ្តាវលេបនា ឧបការិយោ បក្ខន្ទន្តិ ឧសូសុបិ ខិប្បមានេសុ សត្តីសុបិ ខិប្បមានាសុ អសីសុបិ វិជ្ជោតលន្តេសុ តេ តត្ថ ឧសូហិបិ វិជ្ឈន្តិ សត្តិយាបិ វិជ្ឈន្តិ ឆកណដិយាបិ ឱសិញ្ចន្តិ អភិវគ្គេនបិ ឱមទ្ទន្តិ អសិនាបិ សីសំ ឆិន្ទន្តិ តេ តត្ថ មរណម្បិ និគ្គច្ឆន្តិ មរណមត្តម្បិ ទុក្ខំ។ អយម្បិ មហានាម កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។

[២១៧] បុន ចបរំ មហានាម កាមហេតុ កាមនិទានំ កាមាធិករណំ កាមានមេវ ហេតុ សន្ធិម្បិ ឆិន្ទន្តិ និល្លោបម្បិ ហរន្តិ ឯកាគារិកម្បិ ករោន្តិ បរិបន្ថេបិ តិដ្ឋន្តិ បរទារម្បិ គច្ឆន្តិ តមេនំ រាជានោ គហេត្វា វិវិធានិ កម្មករណានិ ការេន្តិ កសាហិបិ តាឡេន្តិ វេត្តេហិបិ តាឡេន្តិ អឌ្ឍទណ្ឌកេហិបិ តាឡេន្តិ។បេ។ ជោតិមាលិកម្បិ ករោន្តិ ហត្ថប្បជ្ជោតិកម្បិ ករោន្តិ ឯរកវត្តិកម្បិ ករោន្តិ ចីរកវាសិកម្បិ ករោន្តិ ឯណេយ្យកម្បិ ករោន្តិ ពលិសមំសិកម្បិ ករោន្តិ កហាបណកម្បិ ករោន្តិ ខារាបដិច្ឆកម្បិ ករោន្តិ បលិឃបរិវត្តិកម្បិ ករោន្តិ បលាលបីឋកម្បិ ករោន្តិ តត្តេនបិ តេលេន ឱសិញ្ចន្តិ សុនខេហិបិ ខាទាបេន្តិ ជីវន្តម្បិ សូលេ ឧត្តាសេន្តិ អសិនាបិ សីសំ ឆិន្ទន្តិ តេ តត្ថ មរណម្បិ និគ្គច្ឆន្តិ មរណមត្តម្បិ ទុក្ខំ។ អយម្បិ មហានាម កាមានំ អាទីនវោ សន្ទិដ្ឋិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។

[២១៨] បុន ចបរំ មហានាម កាមហេតុ កាមនិទានំ កាមាធិករណំ កាមានមេវ ហេតុ កាយេន ទុច្ចរិតំ ចរន្តិ វាចាយ ទុច្ចរិតំ ចរន្តិ មនសា ទុច្ចរិតំ ចរន្តិ តេ កាយេន ទុច្ចរិតំ ចរិត្វា វាចាយ ទុច្ចរិតំ ចរិត្វា មនសា ទុច្ចរិតំ ចរិត្វា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជន្តិ។ អយំ មហានាម កាមានំ អាទីនវោ សម្បរាយិកោ ទុក្ខក្ខន្ធោ កាមហេតុ កាមនិទានំ កាមាធិករណំ កាមានមេវ ហេតុ។

[២១៩] ឯកមិទាហំ មហានាម សមយំ រាជគហេ វិហរាមិ គិជ្ឈកូដេ បព្វតេ។ តេន ខោ បន សមយេន សម្ពហុលា និគន្ថា ឥសិគិលិបស្សេ កាឡសិលាយំ ឧព្ភដ្ឋកា ហោន្តិ អាសនប្បដិក្ខិត្តា ឱបក្កមិកា ទុក្ខា តិប្បា [ម. តិព្វា។] ខរា [ឱ.ម. ខរាតិ ន ទិស្សតិ។] កដុកា វេទនា វេទិយន្តិ។ អថ ខ្វាហំ [ឱ.ម. អថខោហំ។] មហានាម សាយណ្ហសមយំ បដិសល្លានា វុដ្ឋិតោ យេន ឥសិគិលិបស្សេ [ឱ. ឥសិគិលបស្សំ។] កាឡសិលា យេន តេ និគន្ថា [ឱ.ម. តេ នីគន្ថា។] តេនុបសង្កមឹ ឧបសង្កមិត្វា តេ និគន្ថេ ឯតទវោចំ កិន្នុ តុម្ហេ អាវុសោ និគន្ថា ឧព្ភដ្ឋកា ហោថ [ឱ.ម. ហោថាតិ ន ទិស្សតិ។] អាសនប្បដិក្ខិត្តា ឱបក្កមិកា ទុក្ខា តិប្បា ខរា កដុកា វេទនា វេទិយថាតិ។ ឯវំ វុត្តេ មហានាម តេ និគន្ថា មំ ឯតទវោចុំ និគន្ថោ អាវុសោ នាដបុត្តោ សព្វញ្ញូ សព្វទស្សាវី អបរិសេសំ ញាណទស្សនំ បដិជានាតិ ចរតោ ច មេ តិដ្ឋតោ ច សុត្តស្ស ច ជាគរស្ស ច សតតំ សមិតឹ ញាណទស្សនំ បច្ចុបដ្ឋិតន្តិ សោ ឯវមាហ អត្ថិ ខោ ភោ [ឱ. វោតិ បាឋោ ទិស្សតិ។] និគន្ថា បុព្វេ បាបកម្មំ កតំ តំ ឥមាយ ទុក្ខាយ [ឱ.ម. កដុកាយ។] ទុក្ករការិកាយ និជ្ជរេថ យំ បនេត្ថ ឯតរហិ កាយេន សំវុតា វាចាយ សំវុតា មនសា សំវុតា តំ អាយតឹ បាបស្ស កម្មស្ស អករណំ ឥតិ បុរាណានំ កម្មានំ តបសា ព្យន្តីភាវា នវានំ កម្មានំ អករណា អាយតឹ អនវស្សវោ អាយតឹ អនវស្សវា កម្មក្ខយោ កម្មក្ខយា ទុក្ខក្ខយោ ទុក្ខក្ខយា វេទនាក្ខយោ វេទនាក្ខយា សព្វំ ទុក្ខំ និជ្ជិណ្ណំ ភវិស្សតីតិ តញ្ច បន អម្ហាកំ រុច្ចតិ ចេវ ខមតិ ច តេន ចម្ហ អត្តមនាតិ។

[២២០] ឯវំ វុត្តេ អហំ មហានាម តេ និគន្ថេ ឯតទវោចំ កឹ បន តុម្ហេ អាវុសោ និគន្ថា ជានាថ អហុវម្ហេវ [ឱ.ម. អហុវាមេវ។] មយំ បុព្វេ ន នាហុវម្ហាតិ។ នោ ហិទំ អាវុសោតិ [ឱ.ម. អាវុសោ។]។ កឹ បន តុម្ហេ អាវុសោ និគន្ថា ជានាថ អករម្ហេវ [ឱ.ម. អករាមេវ។] មយំ បុព្វេ បាបកម្មំ ន នាករម្ហាតិ។ នោ ហិទំ អាវុសោ។ កឹ បន តុម្ហេ អាវុសោ និគន្ថា ជានាថ ឯវរូបំ វា ឯវរូបំ វា បាបកម្មំ អករម្ហាតិ។ នោ ហិទំ អាវុសោតិ។ កឹ បន តុម្ហេ អាវុសោ និគន្ថា ជានាថ ឯត្តកំ វា ទុក្ខំ និជ្ជិណ្ណំ ឯត្តកំ វា ទុក្ខំ និជ្ជរេតព្វំ ឯត្តកម្ហិ វា ទុក្ខេ និជ្ជិណ្ណេ សព្វំ ទុក្ខំ និជ្ជិណ្ណំ ភវិស្សតីតិ។ នោ ហិទំ អាវុសោតិ។ កឹ បន តុម្ហេ អាវុសោ និគន្ថា ជានាថ ទិដ្ឋេវ ធម្មេ អកុសលានំ ធម្មានំ បហានំ កុសលានំ ធម្មានំ ឧបសម្បទន្តិ។ នោ ហិទំ អាវុសោតិ។ ឥតិ កិរ តុម្ហេ អាវុសោ និគន្ថា ន ជានាថ អហុវម្ហេវ មយំ បុព្វេ ន នាហុវម្ហាតិ ន ជានាថ អករម្ហេវ មយំ បុព្វេ បាបកម្មំ ន នាករម្ហាតិ ន ជានាថ ឯវរូបំ វា ឯវរូបំ បាបកម្មំ អករម្ហាតិ ន ជានាថ ឯត្តកំ វា ទុក្ខំ និជ្ជិណ្ណំ ឯត្តកំ វា ទុក្ខំ និជ្ជរេតព្វំ ឯត្តកេ វា ទុក្ខេ និជ្ជិណ្ណេ សព្វំ ទុក្ខំ និជ្ជិណ្ណំ ភវិស្សតីតិ ន ជានាថ ទិដ្ឋេវ ធម្មេ អកុសលានំ ធម្មានំ បហានំ កុសលានំ ធម្មានំ ឧបសម្បទំ ឯវំ សន្តេ អាវុសោ និគន្ថា យេ លោកេ លុទ្ទា លោហិតបាណិនោ កុរូរកម្មន្តា មនុស្សេសុ បច្ឆា ជាតា តេ និគន្ថេសុ បព្វជ្ជន្តីតិ។ ន ខោ អាវុសោ គោតម សុខេន សុខំ អធិគន្តព្វំ ទុក្ខេន ខោ សុខំ អាវុសោ គោតម អធិគន្តព្វំ សុខេន ច អាវុសោ គោតម សុខំ អធិគន្តព្វំ អភវិស្ស រាជា មាគធោ សេនិយោ ពិម្ពិសារោ សុខំ អធិគច្ឆេយ្យ រាជា មាគធោ សេនិយោ ពិម្ពិសារោ សុខវិហារិតរោ អាយស្មតា គោតមេនាតិ។ អទ្ធាយស្មន្តេហិ និគន្ថេហិ សហសា អប្បដិសង្ខា វាចា ភាសិតា ន ខោ អាវុសោ គោតម សុខេន សុខំ អធិគន្តព្វំ ទុក្ខេន ខោ សុខំ អធិគន្តព្វំ សុខេន ច អាវុសោ គោតម សុខំ អធិគន្តព្វំ អភវិស្ស រាជា មាគធោ សេនិយោ ពិម្ពិសារោ សុខំ អធិគច្ឆេយ្យ រាជា មាគធោ សេនិយោ ពិម្ពិសារោ សុខវិហារិតរោ អាយស្មតា គោតមេនាតិ អបិច អហមេវ តត្ថ បដិបុច្ឆិតព្វោ កោ នុ ខោ អាយស្មន្តានំ សុខវិហារិតរោ រាជា វា មាគធោ សេនិយោ ពិម្ពិសារោ អាយស្មា វា គោតមោតិ។ អទ្ធាវុសោ គោតម អម្ហេហិ សហសា អប្បដិសង្ខា វាចា ភាសិតា ន ខោ អាវុសោ គោតម សុខេន សុខំ អធិគន្តព្វំ ទុក្ខេន ខោ សុខំ អធិគន្តព្វំ សុខេន ច អាវុសោ គោតម សុខំ អធិគន្តព្វំ អភវិស្ស រាជា មាគធោ សេនិយោ ពិម្ពិសារោ សុខំ អធិគច្ឆេយ្យ រាជា មាគធោ សេនិយោ ពិម្ពិសារោ សុខវិហារិតរោ អាយស្មតា គោតមេនាតិ អបិច តិដ្ឋតេតំ ឥទានិបិ មយំ អាយស្មន្តំ គោតមំ បុច្ឆាម កោ នុ ខោ អាយស្មន្តានំ សុខវិហារិតរោ រាជា វា មាគធោ សេនិយោ ពិម្ពិសារោ អាយស្មា វា គោតមោតិ។ តេនហាវុសោ និគន្ថា តុម្ហេ [ឱ.ម. តុម្ហេវ។] តត្ថ បដិបុច្ឆិស្សាមិ យថា វោ ខមេយ្យ តថា នំ ព្យាករេយ្យាថ តំ កឹ មញ្ញថាវុសោ និគន្ថា បហោតិ រាជា មាគធោ សេនិយោ ពិម្ពិសារោ អនិញ្ជមានោ កាយេន អភាសមានោ វាចំ សត្ត រត្តិន្ទិវានិ ឯកន្តសុខំ បដិសំវេទី វិហរិតុន្តិ។ នោ ហិទំ អាវុសោតិ។ តំ កឹ មញ្ញថាវុសោ និគន្ថា បហោតិ រាជា មាគធោ សេនិយោ ពិម្ពិសារោ អនិញ្ជមានោ កាយេន អភាសមានោ វាចំ ឆ រត្តិន្ទិវានិ… បញ្ច រត្តិន្ទិវានិ… ចត្តារិ រត្តិន្ទិវានិ… តីណិ រត្តិន្ទិវានិ… ទ្វេ រត្តិន្ទិវានិ… ឯកំ រត្តិន្ទិវំ ឯកន្តសុខំ បដិសំវេទី វិហរិតុន្តិ។ នោ ហិទំ អាវុសោតិ។ អហំ ខោ អាវុសោ និគន្ថា បហោមិ អនិញ្ជមានោ កាយេន អភាសមានោ វាចំ ឯកំ រត្តិន្ទិវំ ឯកន្តសុខំ បដិសំវេទី វិហរិតុំ។ អហំ ខោ អាវុសោ និគន្ថា បហោមិ អនិញ្ជមានោ កាយេន អភាសមានោ វាចំ ទ្វេ រត្តិន្ទិវានិ… តីណិ រត្តិន្ទិវានិ… ចត្តារិ រត្តិន្ទិវានិ… បញ្ច រត្តិន្ទិវានិ… ឆ រត្តិន្ទិវានិ… សត្ត រត្តិន្ទិវានិ ឯកន្តសុខំ បដិសំវេទី វិហរិតុំ។ តំ កឹ មញ្ញថាវុសោ និគន្ថា ឯវំ សន្តេ កោ សុខំ វិហរតិ រាជា វា មាគធោ សេនិយោ ពិម្ពិសារោ អហំ វាតិ។ ឯវំ សន្តេ អាយស្មា ច [ឱ. វ។] គោតមោ សុខវិហារិតរោ រញ្ញា មាគធេន សេនិយេន ពិម្ពិសារេនាតិ។ ឥទមវោច ភគវា អត្តមនោ មហានាមោ សក្កោ ភគវតោ ភាសិតំ អភិនន្ទីតិ។

ចូឡទុក្ខក្ខន្ធសុត្តេ ចតុត្ថំ និដ្ឋិតំ។

បញ្ចមំ អនុមានសុត្តំ

[២២១] ឯវម្មេ សុតំ។ ឯកំ សមយំ អាយស្មា មហាមោគ្គល្លានោ ភគ្គេសុ វិហរតិ សុំសុមារគិរេ ភេសកឡាវនេ មិគទាយេ។ តត្រខោ អាយស្មា មហាមោគ្គល្លានោ ភិក្ខូ អាមន្តេសិ អាវុសោ ភិក្ខវោតិ។ អាវុសោតិ ខោ តេ ភិក្ខូ អាយស្មតោ មហាមោគ្គល្លានស្ស បច្ចស្សោសុំ។

[២២២] អាយស្មា មហាមោគ្គល្លានោ ឯតទវោច បវារេតិ ចេបិ អាវុសោ ភិក្ខុ វទន្តុ មំ អាយស្មន្តោ វចនីយោម្ហិ អាយស្មន្តេហីតិ សោ ច ហោតិ ទុព្វចោ ទោវចស្សករណេហិ ធម្មេហិ សមន្នាគតោ អក្ខមោ អប្បទក្ខិណគ្គាហី អនុសាសនឹ អថខោ [ឱ.ម. ខោ នំ។] សព្រហ្មចារី ន ចេវ វត្តព្វំ មញ្ញន្តិ ន ច អនុសាសិតព្វំ មញ្ញន្តិ ន ច តស្មឹ បុគ្គលេ វិស្សាសំ អាបជ្ជិតព្វំ មញ្ញន្តិ។ កតមេ ចាវុសោ ទោវចស្សករណា ធម្មា។ ឥធាវុសោ ភិក្ខុ បាបិច្ឆោ ហោតិ បាបិកានំ ឥច្ឆានំ វសង្គតោ យម្បាវុសោ ភិក្ខុ បាបិច្ឆោ ហោតិ បាបិកានំ ឥច្ឆានំ វសង្គតោ អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ អត្តុក្កំសកោ ហោតិ បរវម្ភី យម្បាវុសោ ភិក្ខុ អត្តុក្កំសកោ ហោតិ បរវម្ភី អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ កោធនោ ហោតិ កោធាភិភូតោ យម្បាវុសោ ភិក្ខុ កោធនោ ហោតិ កោធាភិភូតោ អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ កោធនោ ហោតិ កោធហេតុ ឧបនាហី យម្បាវុសោ ភិក្ខុ កោធនោ ហោតិ កោធហេតុ ឧបនាហី អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ កោធនោ ហោតិ កោធហេតុ អភិសង្កី [ឱ.ម. អភិសង្គី។] យម្បាវុសោ ភិក្ខុ កោធនោ ហោតិ កោធហេតុ អភិសង្កី អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ កោធនោ ហោតិ កោធសាមន្តំ វាចំ និច្ឆារេតា យម្បាវុសោ ភិក្ខុ កោធនោ ហោតិ កោធសាមន្តំ វាចំ និច្ឆារេតា អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ ចុទិតោ ចោទកេន ចោទកំ បដិប្ផរតិ យម្បាវុសោ ភិក្ខុ ចុទិតោ ចោទកេន ចោទកំ បដិប្ផរតិ អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ ចុទិតោ ចោទកេន ចោទកំ អប្បសាទេតិ យម្បាវុសោ ភិក្ខុ ចុទិតោ ចោទកេន ចោទកំ អប្បសាទេតិ អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ ចុទិតោ ចោទកេន ចោទកស្ស បច្ចារោបេតិ យម្បាវុសោ ភិក្ខុ ចុទិតោ ចោទកេន ចោទកស្ស បច្ចារោបេតិ អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ ចុទិតោ ចោទកេន អញ្ញេនញ្ញំ បដិចរតិ ពហិទ្ធា កថំ អបនាមេតិ កោបញ្ច ទោសញ្ច អប្បច្ចយញ្ច បាតុករោតិ យម្បាវុសោ ភិក្ខុ ចុទិតោ ចោទកេន ចោទកំ អញ្ញេនញ្ញំ បដិចរតិ ពហិទ្ធា កថំ អបនាមេតិ កោបញ្ច ទោសញ្ច អប្បច្ចយញ្ច បាតុករោតិ អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ ចុទិតោ ចោទកេន អបទានេ ន សម្បាយតិ យម្បាវុសោ ភិក្ខុ ចុទិតោ ចោទកេន អបទានេ ន សម្បាយតិ អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ មក្ខី ហោតិ បឡាសី យម្បាវុសោ ភិក្ខុ មក្ខី ហោតិ បឡាសី អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ ឥស្សុកី ហោតិ មច្ឆរី យម្បាវុសោ ភិក្ខុ ឥស្សុកី ហោតិ មច្ឆរី អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ សឋោ ហោតិ មាយាវី យម្បាវុសោ ភិក្ខុ សឋោ ហោតិ មាយាវី អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ ថទ្ធោ ហោតិ អតិមានី យម្បាវុសោ ភិក្ខុ ថទ្ធោ ហោតិ អតិមានី អយម្បិ ធម្មោ ទោវចស្សករណោ។ បុន ចបរំ អាវុសោ ភិក្ខុ សន្ទិដ្ឋិបរាមាសី ហោតិ អាធានគ្គាហី ទុប្បដិនិស្សគ្គី យម្បាវុសោ ភិក្ខុ សន្ទិដ្ឋិបរាមាសី ហោតិ អាធានគ្គាហី ទុប្បដិនិស្សគ្គី អយម្បិ ធម្មោ ទោវចស្សករណោ។ ឥមេ វុច្ចន្តាវុសោ ទោវចស្សករណា ធម្មា។

[២២៣] នោ ចេបិ អាវុសោ ភិក្ខុ បវារេតិ វទន្តុ មំ អាយស្មន្តោ វចនីយោម្ហិ អាយស្មន្តេហីតិ សោ ច ហោតិ សុវចោ សោវចស្សករណេហិ ធម្មេហិ សមន្នាគតោ ខមោ បទក្ខិណគ្គាហី អនុសាសនឹ អថខោ នំ សព្រហ្មចារី វត្តព្វញ្ចេវ មញ្ញន្តិ អនុសាសិតព្វញ្ច មញ្ញន្តិ តស្មឹ ច បុគ្គលេ វិស្សាសំ អាបជ្ជិតព្វំ មញ្ញន្តិ។ កតមេ ចាវុសោ សោវចស្សករណា ធម្មា។ ឥធាវុសោ ភិក្ខុ ន បាបិច្ឆោ ហោតិ ន បាបិកានំ ឥច្ឆានំ វសង្គតោ យម្បាវុសោ ភិក្ខុ ន បាបិច្ឆោ ហោតិ ន បាបិកានំ ឥច្ឆានំ វសង្គតោ អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ អនត្តុក្កំសកោ ហោតិ អបរវម្ភី យម្បាវុសោ ភិក្ខុ អនត្តុក្កំសកោ ហោតិ អបរវម្ភី អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ ន កោធនោ ហោតិ ន កោធាភិភូតោ យម្បាវុសោ ភិក្ខុ ន កោធនោ ហោតិ ន កោធាភិភូតោ អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ ន កោធនោ ហោតិ ន កោធហេតុ ឧបនាហី យម្បាវុសោ ភិក្ខុ ន កោធនោ ហោតិ ន កោធហេតុ ឧបនាហី អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ ន កោធនោ ហោតិ ន កោធហេតុ អភិសង្កី យម្បាវុសោ ភិក្ខុ ន កោធនោ ហោតិ ន កោធហេតុ អភិសង្កី អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ ន កោធនោ ហោតិ ន កោធសាមន្តំ វាចំ និច្ឆារេតា យម្បាវុសោ ភិក្ខុ ន កោធនោ ហោតិ ន កោធសាមន្តំ វាចំ និច្ឆារេតា អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ ចុទិតោ ចោទកេន ចោទកំ ន បដិប្ផរតិ យម្បាវុសោ ភិក្ខុ ចុទិតោ ចោទកេន ចោទកំ ន បដិប្ផរតិ អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ ចុទិតោ ចោទកេន ចោទកំ ន អបសាទេតិ យម្បាវុសោ ភិក្ខុ ចុទិតោ ចោទកេន ចោទកំ ន អបសាទេតិ អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ ចុទិតោ ចោទកេន ចោទកស្ស ន បច្ចារោបេតិ យម្បាវុសោ ភិក្ខុ ចុទិតោ ចោទកេន ចោទកស្ស ន បច្ចារោបេតិ អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ ចុទិតោ ចោទកេន ចោទកស្ស ន អញ្ញេនញ្ញំ បដិចរតិ ន ពហិទ្ធាកថំ អបនាមេតិ ន កោបញ្ច ទោសញ្ច អប្បច្ចយញ្ច បាតុករោតិ យម្បាវុសោ ភិក្ខុ ចុទិតោ ចោទកេន ន អញ្ញេនញ្ញំ បដិចរតិ ន ពហិទ្ធាកថំ អបនាមេតិ ន កោបញ្ច ទោសញ្ច អប្បច្ចយញ្ច បាតុករោតិ អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ ចុទិតោ ចោទកេន ចោទកស្ស ន អបទានេ ន សម្បាយតិ យម្បាវុសោ ភិក្ខុ ចុទិតោ ចោទកេន ចោទកស្ស ន អបទានេ ន សម្បាយតិ អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ អមក្ខី ហោតិ អបឡាសី យម្បាវុសោ ភិក្ខុ អមក្ខី ហោតិ អបឡាសី អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ អនិស្សុកី ហោតិ អមច្ឆរី យម្បាវុសោ ភិក្ខុ អនិស្សុកី ហោតិ អមច្ឆរី អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ អសឋោ ហោតិ អមាយាវី យម្បាវុសោ ភិក្ខុ អសឋោ ហោតិ អមាយាវី អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ អថទ្ធោ ហោតិ អនតិមានី យម្បាវុសោ ភិក្ខុ អថទ្ធោ ហោតិ អនតិមានី អយម្បិ ធម្មោ សោវចស្សករណោ។ បុន ចបរំ អាវុសោ ភិក្ខុ អសន្ទិដ្ឋិបរាមាសី ហោតិ អនាធានគ្គាហី សុប្បដិនិស្សគ្គី យម្បាវុសោ ភិក្ខុ អសន្ទិដ្ឋិបរាមាសី ហោតិ អនាធានគ្គាហី សុប្បដិនិស្សគ្គី អយម្បិ ធម្មោ សោវចស្សករណោ។ ឥមេ វុច្ចន្តាវុសោ សោវចស្សករណា ធម្មា។

[២២៤] តត្រាវុសោ ភិក្ខុនា អត្តនា វ អត្តានំ ឯវំ អនុមានិតព្វំ [ឱ. អនុមិនិតព្វំ។] យោ ខ្វាយំ បុគ្គលោ បាបិច្ឆោ បាបិកានំ ឥច្ឆានំ វសង្គតោ អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ [ម. បនាស្សំ។] បាបិច្ឆោ បាបិកានំ ឥច្ឆានំ វសង្គតោ អហំ បស្សំ [ម. បាស្សំ។] បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា ន បាបិច្ឆោ ភវិស្សាមិ ន បាបិកានំ ឥច្ឆានំ វសង្គតោតិ ចិត្តំ ឧប្បាទេតព្វំ។ យោ ខ្វាយំ បុគ្គលោ អត្តុក្កំសកោ បរវម្ភី អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ អត្តុក្កំសកោ បរវម្ភី អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា អនត្តុក្កំសកោ ភវិស្សាមិ អបរវម្ភីតិ ចិត្តំ ឧប្បាទេតព្វំ។ យោ ខ្វាយំ បុគ្គលោ កោធនោ កោធាភិភូតោ អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ កោធនោ កោធាភិភូតោ អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនោ ន កោធនោ ភវិស្សាមិ ន កោធាភិភូតោតិ ចិត្តំ ឧប្បាទេតព្វំ។ យោ ខ្វាយំ បុគ្គលោ កោធនោ កោធហេតុ ឧបនាហី អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ កោធនោ កោធហេតុ ឧបនាហី អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា ន កោធនោ ភវិស្សាមិ ន កោធហេតុ ឧបនាហីតិ ចិត្តំ ឧប្បាទេតព្វំ។ យោ ខ្វាយំ បុគ្គលោ កោធនោ កោធហេតុ អភិសង្កី អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ កោធនោ កោធហេតុ អភិសង្កី អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា ន កោធនោ ភវិស្សាមិ ន កោធហេតុ អភិសង្កីតិ ចិត្តំ ឧប្បាទេតព្វំ។ យោ ខ្វាយំ បុគ្គលោ កោធនោ កោធសាមន្តំ វាចំ និច្ឆារេតា អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ កោធនោ កោធសាមន្តំ វាចំ និច្ឆារេតា អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា ន កោធនោ ភវិស្សាមិ ន កោធសាមន្តំ វាចំ និច្ឆារេស្សាមីតិ ចិត្តំ ឧប្បាទេតព្វំ។ យោ ខ្វាយំ បុគ្គលោ ចុទិតោ ចោទកេន ចោទកំ បដិប្ផរតិ អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ ចុទិតោ ចោទកេន ចោទកំ បដិប្ផរេយ្យំ អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា ចុទិតោ ចោទកេន ចោទកំ អប្បដិប្ផរិស្សាមីតិ [ឱ.ម. នប្បដិប្ផរិស្សាមីតិ។] ចិត្តំ ឧប្បាទេតព្វំ។ យោ ខ្វាយំ បុគ្គលោ ចុទិតោ ចោទកេន ចោទកំ អបសាទេតិ អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ ចុទិតោ ចោទកេន ចោទកំ អបសាទេយ្យំ អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា ចុទិតោ ចោទកេន ចោទកំ ន អបសាទេស្សាមីតិ ចិត្តំ ឧប្បាទេតព្វំ។ យោ ខ្វាយំ បុគ្គលោ ចុទិតោ ចោទកេន ចោទកស្ស បច្ចារោបេតិ អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ ចុទិតោ ចោទកេន ចោទកស្ស បច្ចារោបេយ្យំ អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា ចុទិតោ ចោទកេន ចោទកស្ស ន បច្ចារោបេស្សាមីតិ ចិត្តំ ឧប្បាទេតព្វំ។ យោ ខ្វាយំ បុគ្គលោ ចុទិតោ ចោទកេន ចោទកស្ស អញ្ញេនញ្ញំ បដិចរតិ ពហិទ្ធាកថំ អបនាមេតិ កោបញ្ច ទោសញ្ច អប្បច្ចយញ្ច បាតុករោតិ អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ ចុទិតោ ចោទកេន ចោទកស្ស អញ្ញេនញ្ញំ បដិចរេយ្យំ ពហិទ្ធាកថំ អបនាមេយ្យំ កោបញ្ច ទោសញ្ច អប្បច្ចយញ្ច បាតុករេយ្យំ អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា ចុទិតោ ចោទកេន ន អញ្ញេនញ្ញំ បដិចរិស្សាមិ ន ពហិទ្ធាកថំ អបនាមេស្សាមិ ន កោបញ្ច ទោសញ្ច អប្បច្ចយញ្ច បាតុករិស្សាមីតិ ចិត្តំ ឧប្បាទេតព្វំ។ យោ ខ្វាយំ បុគ្គលោ ចុទិតោ ចោទកេន អបទានេ ន សម្បាយតិ អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ ចុទិតោ ចោទកេន អបទានេ ន សម្បាយេយ្យំ អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា ចុទិតោ ចោទកេន អបទានេ ន សម្បាយិស្សាមីតិ ចិត្តំ ឧប្បាទេតព្វំ។ យោ ខ្វាយំ បុគ្គលោ មក្ខី បឡាសី អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ មក្ខី បឡាសី អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា អមក្ខី ភវិស្សាមិ អបឡាសីតិ ចិត្តំ ឧប្បាទេតព្វំ។ យោ ខ្វាយំ បុគ្គលោ ឥស្សុកី មច្ឆរី អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ ឥស្សុកី មច្ឆរី អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា អនិស្សុកី ភវិស្សាមិ អមច្ឆរីតិ ចិត្តំ ឧប្បាទេតព្វំ។ យោ ខ្វាយំ បុគ្គលោ សឋោ មាយាវី អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ សឋោ មាយាវី អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា អសឋោ ភវិស្សាមិ អមាយាវីតិ ចិត្តំ ឧប្បាទេតព្វំ។ យោ ខ្វាយំ បុគ្គលោ ថទ្ធោ អតិមានី អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ ថទ្ធោ អតិមានី អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា អថទ្ធោ ភវិស្សាមិ អនតិមានីតិ ចិត្តំ ឧប្បាទេតព្វំ។ យោ ខ្វាយំ បុគ្គលោ សន្ទិដ្ឋិបរាមាសី អាធានគ្គាហី ទុប្បដិនិស្សគ្គី អយំ មេ បុគ្គលោ អប្បិយោ អមនាបោ អហញ្ចេវ ខោ បនស្សំ សន្ទិដ្ឋិបរាមាសី អាធានគ្គាហី ទុប្បដិនិស្សគ្គី អហំ បស្សំ បរេសំ អប្បិយោ អមនាបោតិ។ ឯវំ ជានន្តេនាវុសោ ភិក្ខុនា អសន្ទិដ្ឋិបរាមាសី ភវិស្សាមិ អនាធានគ្គាហី សុប្បដិនិស្សគ្គីតិ ចិត្តំ ឧប្បាទេតព្វំ។

[២២៥] តត្រាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ បាបិច្ឆោ បាបិកានំ ឥច្ឆានំ វសង្គតោតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ បាបិច្ឆោ ខោម្ហិ បាបិកានំ ឥច្ឆានំ វសង្គតោតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ ន ខោម្ហិ បាបិច្ឆោ ន បាបិកានំ ឥច្ឆានំ វសង្គតោតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ អត្តុក្កំសកោ បរវម្ភីតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ អត្តុក្កំសកោ ខោម្ហិ បរវម្ភីតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ អនត្តុក្កំសកោ ខោម្ហិ អបរវម្ភីតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ កោធនោ កោធាភិភូតោតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ កោធនោ ខោម្ហិ កោធាភិភូតោតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ ន ខោម្ហិ កោធនោ ន កោធាភិភូតោតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ កោធនោ កោធហេតុ ឧបនាហីតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ កោធនោ ខោម្ហិ កោធហេតុ ឧបនាហីតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ ន ខោម្ហិ កោធនោ ន កោធហេតុ ឧបនាហីតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ កោធនោ កោធហេតុ អភិសង្កីតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ កោធនោ ខោម្ហិ កោធហេតុ អភិសង្កីតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ជានាតិ ន ខោម្ហិ កោធនោ ន កោធហេតុ អភិសង្កីតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ កោធនោ កោធសាមន្តំ វាចំ និច្ឆារេតាតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ កោធនោ ខោម្ហិ កោធសាមន្តំ វាចំ និច្ឆារេតាតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ ន ខោម្ហិ កោធនោ ន កោធសាមន្តំ វាចំ និច្ឆារេតាតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ ចុទិតោ ចោទកេន ចោទកំ បដិប្ផរាមីតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ ចុទិតោ ខោម្ហិ ចោទកេន ចោទកំ បដិប្ផរាមីតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ ចុទិតោ ខោម្ហិ ចោទកេន ចោទកំ ន បដិប្ផរាមីតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ ចុទិតោ ចោទកេន ចោទកំ អបសាទេមីតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ ចុទិតោ ចោទកេន ចោទកំ អបសាទេមីតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ ចុទិតោ ខោម្ហិ ចោទកេន ចោទកំ ន អបសាទេមីតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ ចុទិតោ ចោទកេន ចោទកស្ស បច្ចារោបេមីតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ ចុទិតោ ខោម្ហិ ចោទកេន ចោទកស្ស បច្ចារោបេមីតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ ចុទិតោ ខោម្ហិ ចោទកេន ចោទកស្ស ន បច្ចារោបេមីតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ ចុទិតោ ចោទកេន អញ្ញេនញ្ញំ បដិចរាមិ ពហិទ្ធាកថំ អបនាបេមិ កោបញ្ច ទោសញ្ច អប្បច្ចយញ្ច បាតុករោមីតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ ចុទិតោ ខោម្ហិ ចោទកេន អញ្ញេនញ្ញំ បដិចរាមិ ពហិទ្ធាកថំ អបនាបេមិ កោបញ្ច ទោសញ្ច អប្បច្ចយញ្ច បាតុករោមីតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ ចុទិតោ ខោម្ហិ ចោទកេន អញ្ញេនញ្ញំ ន បដិចរាមិ ន ពហិទ្ធាកថំ អបនាបេមិ ន កោបញ្ច ទោសញ្ច អប្បច្ចយញ្ច បាតុករោមីតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ ចុទិតោ ចោទកេន អបទានេ ន សម្បាយាមីតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ ចុទិតោ ខោម្ហិ ចោទកេន អបទានេ ន សម្បាយាមីតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ ចុទិតោ ខោម្ហិ ចោទកេន ន អបទានេ ន សម្បាយាមីតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ មក្ខី បឡាសីតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ មក្ខី ខោម្ហិ បឡាសីតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ អមក្ខី ខោម្ហិ អបឡាសីតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ ឥស្សុកី មច្ឆរីតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ ឥស្សុកី ខោម្ហិ មច្ឆរីតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ អនិស្សុកី ខោម្ហិ អមច្ឆរីតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ សឋោ មាយាវីតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ សឋោ ខោម្ហិ មាយាវីតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ អសឋោ ខោម្ហិ អមាយាវីតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ ថទ្ធោ អតិមានីតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ ថទ្ធោ ខោម្ហិ អតិមានីតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ អថទ្ធោ ខោម្ហិ អនតិមានីតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ បុន ចបរំ អាវុសោ ភិក្ខុនា អត្តនា វ អត្តានំ ឯវំ បច្ចវេក្ខិតព្វំ កិន្នុខោម្ហិ សន្ទិដ្ឋិបរាមាសី អាធានគ្គាហី ទុប្បដិនិស្សគ្គីតិ។ សចេ អាវុសោ ភិក្ខុ បច្ចវេក្ខមានោ ឯវំ ជានាតិ សន្ទិដ្ឋិបរាមាសី ខោម្ហិ អាធានគ្គាហី ទុប្បដិនិស្សគ្គីតិ តេនាវុសោ ភិក្ខុនា តេសំយេវ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ ឯវំ ជានាតិ អសន្ទិដ្ឋិបរាមាសី ខោម្ហិ អនាធានគ្គាហី សុប្បដិនិស្សគ្គីតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ សចេ អាវុសោ ភិក្ខុ បច្ចវេក្ខមានោ សព្វេបិមេ បាបកេ អកុសលេ ធម្មេ អប្បហីនេ អត្តនិ សមនុបស្សតិ តេនាវុសោ ភិក្ខុនា សព្វេសំយេវ ឥមេសំ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ សព្វេបិមេ បាបកេ អកុសលេ ធម្មេ បហីនេ អត្តនិ សមនុបស្សតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសុ។ សេយ្យថាបិ អាវុសោ ឥត្ថី វា បុរិសោ វា ទហរោ យុវា មណ្ឌនកជាតិកោ [ម. មណ្ឌនជាតិកោ។] អាទាសេ វា បរិសុទ្ធេ បរិយោទាតេ អច្ឆេ វា ឧទកបត្តេ សកមុខនិមិត្តំ បច្ចវេក្ខមានោ សចេ តត្ថ បស្សតិ រជំ វា អង្គណំ វា តស្សេវ រជស្ស វា អង្គណស្ស វា បហានាយ វាយមតិ នោ ចេ តត្ថ បស្សតិ រជំ វា អង្គណំ វា តេនេវ អត្តមនោ ហោតិ លាភា វត មេ បរិសុទ្ធំ វត មេតិ ឯវមេវ ខោ អាវុសោ សចេ ភិក្ខុ បច្ចវេក្ខមានោ សព្វេបិមេ បាបកេ អកុសលេ ធម្មេ អប្បហីនេ អត្តនិ សមនុបស្សតិ តេនាវុសោ ភិក្ខុនា សព្វេសំយេវ ឥមេសំ បាបកានំ អកុសលានំ ធម្មានំ បហានាយ វាយមិតព្វំ។ សចេ បនាវុសោ ភិក្ខុ បច្ចវេក្ខមានោ សព្វេបិមេ បាបកេ អកុសលេ ធម្មេ បហីនេ អត្តនិ សមនុបស្សតិ តេនាវុសោ ភិក្ខុនា តេនេវ បីតិប្បាមោជ្ជេន វិហាតព្វំ អហោរត្តានុសិក្ខិនា កុសលេសុ ធម្មេសូតិ។ ឥទមវោចាយស្មា មហាមោគ្គល្លានោ អត្តមនា តេ ភិក្ខូ អាយស្មតោ មហាមោគ្គល្លានស្ស ភាសិតំ អភិនន្ទុន្តិ។

អនុមានសុត្តំ បញ្ចមំ និដ្ឋិតំ។

ឆដ្ឋំ ចេតោខីលសុត្តំ

[២២៦] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។

[២២៧] ភគវា ឯតទវោច យស្ស កស្សចិ ភិក្ខវេ ភិក្ខុនោ បញ្ច ចេតោខីលា អប្បហីនា បញ្ច ចេតសោ វិនិពន្ធា អសមុច្ឆិន្នា សោ វតិមស្មឹ ធម្មវិនយេ វុឌ្ឍឹ វិរូឡ្ហឹ វេបុល្លំ អាបជ្ជិស្សតីតិ នេតំ ឋានំ វិជ្ជតិ។

[២២៨] កតមស្ស បញ្ច ចេតោខីលា អប្បហីនា ហោន្តិ។ ឥធ ភិក្ខវេ ភិក្ខុ សត្ថរិ កង្ខតិ វិចិកិច្ឆតិ នាធិមុច្ចតិ ន សម្បសីទតិ។ យោ សោ ភិក្ខវេ ភិក្ខុ សត្ថរិ កង្ខតិ វិចិកិច្ឆតិ នាធិមុច្ចតិ ន សម្បសីទតិ តស្ស ចិត្តំ ន នមតិ អាតប្បាយ អនុយោគាយ សាតច្ចាយ បធានាយ។ យស្ស ចិត្តំ ន នមតិ អាតប្បាយ អនុយោគាយ សាតច្ចាយ បធានាយ ឯវមស្សាយំ បឋមោ ចេតោខីលោ អប្បហីនោ ហោតិ។ បុន ចបរំ ភិក្ខវេ ភិក្ខុ ធម្មេ កង្ខតិ វិចិកិច្ឆតិ នាធិមុច្ចតិ ន សម្បសីទតិ។បេ។ សង្ឃេ កង្ខតិ វិចិកិច្ឆតិ នាធិមុច្ចតិ ន សម្បសីទតិ។បេ។ សិក្ខាយ កង្ខតិ វិចិកិច្ឆតិ នាធិមុច្ចតិ ន សម្បសីទតិ។ យោ សោ ភិក្ខវេ ភិក្ខុ សិក្ខាយ កង្ខតិ វិចិកិច្ឆតិ នាធិមុច្ចតិ ន សម្បសីទតិ តស្ស ចិត្តំ ន នមតិ អាតប្បាយ អនុយោគាយ សាតច្ចាយ បធានាយ។ យស្ស ចិត្តំ ន នមតិ អាតប្បាយ អនុយោគាយ សាតច្ចាយ បធានាយ ឯវមស្សាយំ ចតុត្ថោ ចេតោខីលោ អប្បហីនោ ហោតិ។ បុន ចបរំ ភិក្ខវេ ភិក្ខុ សព្រហ្មចារីសុ កុបិតោ ហោតិ អនត្តមនោ អាហតចិត្តោ ខីលជាតោ។ យោ សោ ភិក្ខវេ ភិក្ខុ សព្រហ្មចារីសុ កុបិតោ ហោតិ អនត្តមនោ អាហតចិត្តោ ខីលជាតោ តស្ស ចិត្តំ ន នមតិ អាតប្បាយ អនុយោគាយ សាតច្ចាយ បធានាយ។ យស្ស ចិត្តំ ន នមតិ អាតប្បាយ អនុយោគាយ សាតច្ចាយ បធានាយ ឯវមស្សាយំ បញ្ចមោ ចេតោខីលោ អប្បហីនោ ហោតិ។ ឥមស្ស បញ្ច ចេតោខីលា អប្បហីនា ហោន្តិ។

[២២៩] កតមស្ស បញ្ច ចេតសោ វិនិពន្ធា អសមុច្ឆិន្នា ហោន្តិ។ ឥធ ភិក្ខវេ ភិក្ខុ កាមេ អវីតរាគោ ហោតិ អវិគតច្ឆន្ទោ អវិគតប្បេមោ អវិគតបិបាសោ អវិគតបរិឡាហោ អវិគតតណ្ហោ។ យោ សោ ភិក្ខវេ ភិក្ខុ កាមេ អវីតរាគោ ហោតិ អវិគតច្ឆន្ទោ អវិគតប្បេមោ អវិគតបិបាសោ អវិគតបរិឡាហោ អវិគតតណ្ហោ តស្ស ចិត្តំ ន នមតិ អាតប្បាយ អនុយោគាយ សាតច្ចាយ បធានាយ។ យស្ស ចិត្តំ។បេ។ បធានាយ ឯវមស្សាយំ បឋមោ ចេតសោ វិនិពន្ធោ អសមុច្ឆិន្នោ ហោតិ។ បុន ចបរំ ភិក្ខវេ ភិក្ខុ កាយេ អវីតរាគោ ហោតិ។បេ។ រូបេ អវីតរាគោ ហោតិ អវិគតច្ឆន្ទោ អវិគតប្បេមោ អវិគតបិបាសោ អវិគតបរិឡាហោ អវិគតតណ្ហោ។ យោ សោ ភិក្ខវេ ភិក្ខុ រូបេ អវីតរាគោ ហោតិ។បេ។ ឯវមស្សាយំ តតិយោ ចេតសោ វិនិពន្ធោ អសមុច្ឆិន្នោ ហោតិ។ បុន ចបរំ ភិក្ខវេ ភិក្ខុ យាវទត្ថំ ឧទរាវទេហកំ ភុញ្ជិត្វា សេយ្យសុខំ បស្សសុខំ មិទ្ធសុខំ អនុយុញ្ជន្តោ [ឱ.ម. អនុយុត្តោ។] វិហរតិ។ យោ សោ ភិក្ខវេ ភិក្ខុ យាវទត្ថំ ឧទរាវទេហកំ ភុញ្ជិត្វា សេយ្យសុខំ បស្សសុខំ មិទ្ធសុខំ អនុយុញ្ជន្តោ [ឱ.ម. អនុយុត្តោ។] វិហរតិ តស្ស ចិត្តំ ន នមតិ អាតប្បាយ អនុយោគាយ សាតច្ចាយ បធានាយ។ យស្ស ចិត្តំ ន នមតិ អាតប្បាយ អនុយោគាយ សាតច្ចាយ បធានាយ ឯវមស្សាយំ ចតុត្ថោ ចេតសោ វិនិពន្ធោ អសមុច្ឆិន្នោ ហោតិ។ បុន ចបរំ ភិក្ខវេ ភិក្ខុ អញ្ញតរំ ទេវនិកាយំ បណិធាយ ព្រហ្មចរិយំ ចរិស្សតិ [ឱ.ម. ចរតិ។] ឥមិនាហំ សីលេន វា វតេ្តន វា តបេន វា ព្រហ្មចរិយេន វា ទេវោ វា ភវិស្សាមិ ទេវញ្ញតរោ វាតិ។ យោ សោ ភិក្ខវេ ភិក្ខុ អញ្ញតរំ ទេវនិកាយំ បណិធាយ ព្រហ្មចរិយំ ចរិស្សតិ [ឱ.ម. ចរតិ។] ឥមិនាហំ សីលេន វា វត្តេន វា តបេន វា ព្រហ្មចរិយេន វា ទេវោ វា ភវិស្សាមិ ទេវញ្ញតរោ វាតិ តស្ស ចិត្តំ ន នមតិ អាតប្បាយ អនុយោគាយ សាតច្ចាយ បធានាយ។ យស្ស ចិត្តំ ន នមតិ អាតប្បាយ អនុយោគាយ សាតច្ចាយ បធានាយ ឯវមស្សាយំ បញ្ចមោ ចេតសោ វិនិពន្ធោ អសមុច្ឆិន្នោ ហោតិ។ ឥមស្ស បញ្ច ចេតសោ វិនិពន្ធា អសមុច្ឆិន្នា ហោន្តិ។ យស្ស កស្សចិ ភិក្ខវេ ភិក្ខុនោ ឥមេ បញ្ច ចេតោខីលា អប្បហីនា ឥមេ បញ្ច ចេតសោ វិនិពន្ធា អសមុច្ឆិន្នា ហោន្តិ [ឱ.ម. ហោន្តីតិ ន ទិស្សតិ។] សោ វតិមស្មឹ ធម្មវិនយេ វុឌ្ឍឹ វិរូឡ្ហឹ វេបុល្លំ អាបជ្ជិស្សតីតិ នេតំ ឋានំ វិជ្ជតិ។

[២៣០] យស្ស កស្សចិ ភិក្ខវេ ភិក្ខុនោ បញ្ច ចេតោខីលា បហីនា បញ្ច ចេតសោ វិនិពន្ធា សមុច្ឆិន្នា សោ វតិមស្មឹ ធម្មវិនយេ វុឌ្ឍឹ វិរូឡ្ហឹ វេបុល្លំ អាបជ្ជិស្សតីតិ ឋានមេតំ វិជ្ជតិ។

[២៣១] កតមស្ស បញ្ច ចេតោខីលា បហីនា ហោន្តិ។ ឥធ ភិក្ខវេ ភិក្ខុ សត្ថរិ ន កង្ខតិ ន វិចិកិច្ឆតិ អធិមុច្ចតិ សម្បសីទតិ។ យោ សោ ភិក្ខវេ ភិក្ខុ សត្ថរិ ន កង្ខតិ ន វិចិកិច្ឆតិ អធិមុច្ចតិ សម្បសីទតិ តស្ស ចិត្តំ នមតិ អាតប្បាយ អនុយោគាយ សាតច្ចាយ បធានាយ។ យស្ស ចិត្តំ នមតិ អាតប្បាយ អនុយោគាយ សាតច្ចាយ បធានាយ ឯវមស្សាយំ បឋមោ ចេតោខីលោ បហីនោ ហោតិ។ បុន ចបរំ ភិក្ខវេ ភិក្ខុ ធម្មេ ន កង្ខតិ ន វិចិកិច្ឆតិ អធិមុច្ចតិ សម្បសីទតិ។បេ។ សង្ឃេ ន កង្ខតិ ន វិចិកិច្ឆតិ អធិមុច្ចតិ សម្បសីទតិ។បេ។ សិក្ខាយ ន កង្ខតិ ន វិចិកិច្ឆតិ អធិមុច្ចតិ សម្បសីទតិ។ យោ សោ ភិក្ខវេ ភិក្ខុ សិក្ខាយ ន កង្ខតិ ន វិចិកិច្ឆតិ អធិមុច្ចតិ សម្បសីទតិ តស្ស ចិត្តំ នមតិ។បេ។ ឯវមស្សាយំ ចតុត្ថោ ចេតោខីលោ បហីនោ ហោតិ។ បុន ចបរំ ភិក្ខវេ ភិក្ខុ សព្រហ្មចារីសុ ន កុបិតោ ហោតិ ន អនត្តមនោ ន អាហតចិត្តោ ន ខីលជាតោ។ យោ សោ ភិក្ខវេ ភិក្ខុ សព្រហ្មចារីសុ ន កុបិតោ ហោតិ ន អនត្តមនោ ន អាហតចិត្តោ ន ខីលជាតោ តស្ស ចិត្តំ នមតិ អាតប្បាយ អនុយោគាយ សាតច្ចាយ បធានាយ។ យស្ស ចិត្តំ នមតិ អាតប្បាយ អនុយោគាយ សាតច្ចាយ បធានាយ ឯវមស្សាយំ បញ្ចមោ ចេតោខីលោ បហីនោ ហោតិ។ ឥមស្ស បញ្ច ចេតោខីលា បហីនា ហោន្តិ។

[២៣២] កតមស្ស បញ្ច ចេតសោ វិនិពន្ធា សុសមុច្ឆិន្នា ហោន្តិ។ ឥធ ភិក្ខវេ ភិក្ខុ កាមេ វីតរាគោ ហោតិ វិគតច្ឆន្ទោ វិគតប្បេមោ វិគតបិបាសោ វិគតបរិឡាហោ វិគតតណ្ហោ។ យោ សោ ភិក្ខវេ ភិក្ខុ កាមេ វីតរាគោ ហោតិ វិគតច្ឆន្ទោ វិគតប្បេមោ វិគតបិបាសោ វិគតបរិឡាហោ វិគតតណ្ហោ តស្ស ចិត្តំ នមតិ អាតប្បាយ អនុយោគាយ សាតច្ចាយ បធានាយ យស្ស ចិត្តំ នមតិ អាតប្បាយ អនុយោគាយ សាតច្ចាយ បធានាយ ឯវមស្សាយំ បឋមោ ចេតសោ វិនិពន្ធោ សុសមុច្ឆិន្នោ ហោតិ។ បុន ចបរំ ភិក្ខវេ ភិក្ខុ កាយេ វីតរាគោ ហោតិ។បេ។ រូបេ វីតរាគោ ហោតិ។បេ។ បុន ចបរំ ភិក្ខវេ ភិក្ខុ ន យាវទត្ថំ ឧទរាវទេហកំ ភុញ្ជិត្វា សេយ្យសុខំ បស្សសុខំ មិទ្ធសុខំ អនុយុញ្ជន្តោ វិហរតិ។ យោ សោ ភិក្ខវេ ភិក្ខុ ន យាវទត្ថំ ឧទរាវទេហកំ ភុញ្ជិត្វា សេយ្យសុខំ បស្សសុខំ មិទ្ធសុខំ អននុយុញ្ជន្តោ វិហរតិ តស្ស ចិត្តំ នមតិ អាតប្បាយ អនុយោគាយ សាតច្ចាយ បធានាយ យស្ស ចិត្តំ នមតិ អាតប្បាយ អនុយោគាយ សាតច្ចាយ បធានាយ ឯវមស្សាយំ ចតុត្ថោ ចេតសោ វិនិពន្ធោ សុសមុច្ឆិន្នោ ហោតិ។ បុន ចបរំ ភិក្ខវេ ភិក្ខុ ន អញ្ញតរំ ទេវនិកាយំ បណិធាយ ព្រហ្មចរិយំ ចរិស្សតិ ឥមិនាហំ សីលេន វា វត្តេន វា តបេន វា ព្រហ្មចរិយេន វា ទេវោ វា ភវិស្សាមិ ទេវញ្ញតរោ វាតិ។ យោ សោ ភិក្ខវេ ភិក្ខុ ន អញ្ញតរំ ទេវនិកាយំ បណិធាយ ព្រហ្មចរិយំ ចរិស្សតិ ឥមិនាហំ សីលេន វា វត្តេន វា តបេន វា ព្រហ្មចរិយេន វា ទេវោ ភវិស្សាមិ ទេវញ្ញតរោ វាតិ តស្ស ចិត្តំ នមតិ អាតប្បាយ អនុយោគាយ សាតច្ចាយ បធានាយ យស្ស ចិត្តំ នមតិ អាតប្បាយ អនុយោគាយ សាតច្ចាយ បធានាយ ឯវមស្សាយំ បញ្ចមោ ចេតសោ វិនិពន្ធោ សុសមុច្ឆិន្នោ ហោតិ។ ឥមស្ស បញ្ច ចេតសោ វិនិពន្ធា សុសមុច្ឆិន្នា ហោន្តិ។ យស្ស កស្សចិ ភិក្ខវេ ភិក្ខុនោ ឥមេ បញ្ច ចេតោខីលា បហីនា ឥមេ បញ្ច ចេតសោ វិនិពន្ធា សុសមុច្ឆិន្នា ហោន្តិ។ សោ វតិមស្មឹ ធម្មវិនយេ វុឌ្ឍឹ វិរូឡ្ហឹ វេបុល្លំ អាបជ្ជិស្សតីតិ ឋានមេតំ វិជ្ជតិ។

[២៣៣] សោ ឆន្ទសមាធិប្បធានសង្ខារសមន្នាគតំ ឥទ្ធិបាទំ ភាវេតិ វីរិយសមាធិចិត្តសមាធិវីមំសាសមាធិប្បធានសង្ខារសមន្នាគតំ ឥទ្ធិបាទំ ភាវេតិ ឧស្សោឡ្ហិយេវ បញ្ចមី។ ស ខោ សោ ភិក្ខវេ ឯវំ ឧស្សោឡ្ហិបណ្ណរសង្គសមន្នាគតោ ភិក្ខុ ភព្វោ អភិនិព្ភិទាយ ភព្វោ សម្ពោធាយ ភព្វោ អនុត្តរស្ស យោគក្ខេមស្ស អធិគមាយ។ សេយ្យថាបិ ភិក្ខវេ កុក្កុដិយា អណ្ឌានិ អដ្ឋ វា ទស វា ទ្វាទស វា តានស្សុ កុក្កុដិយា សម្មា អធិសយិតានិ សម្មា បរិសេទិតានិ សម្មា បរិភាវិតានិ។ កិញ្ចាបិ តស្សា កុក្កុដិយា ន ឯវំ ឥច្ឆា ឧប្បជ្ជេយ្យ អហោ វតិមេ កុក្កុដបោតកា បាទនខសិខាយ វា មុខតុណ្ឌកេន វា អណ្ឌកោសំ បទាលេត្វា សោត្ថិនា អភិនិព្ភិជ្ជេយ្យុន្តិ អថខោ ភព្វាវ តេ កុក្កុដបោតកា បាទនខសិខាយ វា មុខតុណ្ឌកេន វា អណ្ឌកោសំ បទាលេត្វា សោត្ថិនា អភិនិព្ភិជ្ជិតុំ ឯវមេវ ខោ ភិក្ខវេ ឯវំ ឧស្សោឡ្ហិបណ្ណរសង្គសមន្នាគតោ ភិក្ខុ ភព្វោ អភិនិព្ភិទាយ ភព្វោ សម្ពោធាយ ភព្វោ អនុត្តរស្ស យោគក្ខេមស្ស អធិគមាយាតិ។ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទុន្តិ។

ចេតោខីលសុត្តំ ឆដ្ឋំ និដ្ឋិតំ [ឱ.ម. និដ្ឋិតន្តិ ន ទិស្សតិ។ ឯវំ សព្វត្ថ។]។

សត្តមំ វនបត្ថសុត្តំ

[២៣៤] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។ ភគវា ឯតទវោច វនបត្ថបរិយាយំ វោ ភិក្ខវេ ទេសិស្សាមិ តំ សុណាថ សាធុកំ មនសិករោថ ភាសិស្សាមីតិ។ ឯវំ ភន្តេតិ ខោ តេ ភិក្ខូ ភគវតោ បច្ចស្សោសុំ។

[២៣៥] ភគវា ឯតទវោច ឥធ ភិក្ខវេ ភិក្ខុ អញ្ញតរំ វនបត្ថំ ឧបនិស្សាយ វិហរតិ តស្ស តំ វនបត្ថំ ឧបនិស្សាយ វិហរតោ អនុបដ្ឋិតា ចេវ សតិ ន ឧបដ្ឋាតិ អសមាហិតញ្ច ចិត្តំ ន សមាធិយតិ អបរិក្ខីណា ច អាសវា ន បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ នានុបាបុណាតិ យេ ចិមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ កសិរេន សមុទាគច្ឆន្តិ។ តេន ភិក្ខវេ ភិក្ខុនា ឥតិ បដិសញ្ចិក្ខិតព្វំ អហំ ខោ ឥមំ វនបត្ថំ ឧបនិស្សាយ វិហរាមិ តស្ស មេ ឥមំ វនបត្ថំ ឧបនិស្សាយ វិហរតោ អនុបដ្ឋិតា ចេវ សតិ ន ឧបដ្ឋាតិ អសមាហិតញ្ច ចិត្តំ ន សមាធិយតិ អបរិក្ខីណា ច អាសវា ន បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ នានុបាបុណាមិ យេ ចិមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ កសិរេន សមុទាគច្ឆន្តីតិ។ តេន ភិក្ខវេ ភិក្ខុនា រត្តិភាគំ វា ទិវសភាគំ វា តម្ហា វនបត្ថា បក្កមិតព្វំ ន វត្ថព្វំ។

[២៣៦] ឥធ បន ភិក្ខវេ ភិក្ខុ អញ្ញតរំ វនបត្ថំ ឧបនិស្សាយ វិហរតិ តស្ស តំ វនបត្ថំ ឧបនិស្សាយ វិហរតោ អនុបដ្ឋិតា ចេវ សតិ ន ឧបដ្ឋាតិ អសមាហិតញ្ច ចិត្តំ ន សមាធិយតិ អបរិក្ខីណា ច អាសវា ន បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ នានុបាបុណាតិ យេ ច ខោ ឥមេ [ម. យេ ចិមេ។] បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ អប្បកសិរេន សមុទាគច្ឆន្តិ។ តេន ភិក្ខវេ ភិក្ខុនា ឥតិ បដិសញ្ចិក្ខិតព្វំ អហំ ខោ ឥមំ វនបត្ថំ ឧបនិស្សាយ វិហរាមិ តស្ស មេ ឥមំ វនបត្ថំ ឧបនិស្សាយ វិហរតោ អនុបដ្ឋិតា ចេវ សតិ ន ឧបដ្ឋាតិ អសមាហិតញ្ច ចិត្តំ ន សមាធិយតិ អបរិក្ខីណា ច អាសវា ន បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ នានុបាបុណាមិ យេ ច ខោ ឥមេ [ម. យេ ចិមេ។] បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ អប្បកសិរេន សមុទាគច្ឆន្តិ ន ខោ បនាហំ ចីវរហេតុ អគារស្មា អនគារិយំ បព្វជិតោ ន បិណ្ឌបាតហេតុ ន សេនាសនហេតុ ន គិលានប្បច្ចយភេសជ្ជបរិក្ខារហេតុ អគារស្មា អនគារិយំ បព្វជិតោ អថ ច បន មេ ឥមំ វនបត្ថំ ឧបនិស្សាយ វិហរតោ អនុបដ្ឋិតា ចេវ សតិ ន ឧបដ្ឋាតិ អសមាហិតញ្ច ចិត្តំ ន សមាធិយតិ អបរិក្ខីណា ច អាសវា ន បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ នានុបាបុណាមីតិ។ តេន ភិក្ខវេ ភិក្ខុនា សង្ខាបិ តម្ហា វនបត្ថា បក្កមិតព្វំ ន វត្ថព្វំ។

[២៣៧] ឥធ ភិក្ខវេ ភិក្ខុ អញ្ញតរំ វនបត្ថំ ឧបនិស្សាយ វិហរតិ តស្ស តំ វនបត្ថំ ឧបនិស្សាយ វិហរតោ អនុបដ្ឋិតា ចេវ សតិ ឧបដ្ឋាតិ អសមាហិតញ្ច ចិត្តំ សមាធិយតិ អបរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាតិ យេ ច ខោ ឥមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ កសិរេន សមុទាគច្ឆន្តិ តេន ភិក្ខវេ ភិក្ខុនា ឥតិ បដិសញ្ចិក្ខិតព្វំ អហំ ខោ ឥមំ វនបត្ថំ ឧបនិស្សាយ វិហរាមិ តស្ស មេ ឥមំ វនបត្ថំ ឧបនិស្សាយ វិហរតោ អនុបដ្ឋិតា ចេវ សតិ ឧបដ្ឋាតិ អសមាហិតញ្ច ចិត្តំ សមាធិយតិ អបរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាមិ។ យេ ច ខោ ឥមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ កសិរេន សមុទាគច្ឆន្តិ។ ន ខោ បនាហំ ចីវរហេតុ អគារស្មា អនគារិយំ បព្វជិតោ ន បិណ្ឌបាតហេតុ ន សេនាសនហេតុ ន គិលានប្បច្ចយភេសជ្ជបរិក្ខារហេតុ អគារស្មា អនគារិយំ បព្វជិតោ អថ ច បន មេ ឥមំ វនបត្ថំ ឧបនិស្សាយ វិហរតោ អនុបដ្ឋិតា ចេវ សតិ ឧបដ្ឋាតិ អសមាហិតញ្ច ចិត្តំ សមាធិយតិ អបរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាមីតិ។ តេន ភិក្ខវេ ភិក្ខុនា សង្ខាបិ តស្មឹ វនបត្ថេ វត្ថព្វំ ន បក្កមិតព្វំ។

[២៣៨] ឥធ បន ភិក្ខវេ ភិក្ខុ អញ្ញតរំ វនបត្ថំ ឧបនិស្សាយ វិហរតិ តស្ស តំ វនបត្ថំ ឧបនិស្សាយ វិហរតោ អនុបដ្ឋិតា ចេវ សតិ ឧបដ្ឋាតិ អសមាហិតញ្ច ចិត្តំ សមាធិយតិ អបរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាតិ យេ ច ខោ ឥមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ អប្បកសិរេន សមុទាគច្ឆន្តិ។ តេន ភិក្ខវេ ភិក្ខុនា ឥតិ បដិសញ្ចិក្ខិតព្វំ អហំ ខោ ឥមំ វនបត្ថំ ឧបនិស្សាយ វិហរាមិ តស្ស មេ ឥមំ វនបត្ថំ ឧបនិស្សាយ វិហរតោ អនុបដ្ឋិតា ចេវ សតិ ឧបដ្ឋាតិ អសមាហិតញ្ច ចិត្តំ សមាធិយតិ អបរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាមិ យេ ច ខោ ឥមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ អប្បកសិរេន សមុទាគច្ឆន្តីតិ។ តេន ភិក្ខវេ ភិក្ខុនា យាវជីវម្បិ តស្មឹ វនបត្ថេ វត្ថព្វំ ន បក្កមិតព្វំ។

[២៣៩] ឥធ ភិក្ខវេ ភិក្ខុ អញ្ញតរំ គាមំ ឧបនិស្សាយ វិហរតិ។បេ។ អញ្ញតរំ និគមំ ឧបនិស្សាយ វិហរតិ។បេ។ អញ្ញតរំ នគរំ ឧបនិស្សាយ វិហរតិ។បេ។ អញ្ញតរំ ជនបទំ ឧបនិស្សាយ វិហរតិ។បេ។ អញ្ញតរំ បុគ្គលំ ឧបនិស្សាយ វិហរតិ តស្ស តំ បុគ្គលំ ឧបនិស្សាយ វិហរតោ អនុបដ្ឋិតា ចេវ សតិ ន ឧបដ្ឋាតិ អសមាហិតញ្ច ចិត្តំ ន សមាធិយតិ អបរិក្ខីណា ច អាសវា ន បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ នានុបាបុណាតិ យេ ចិមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ កសិរេន សមុទាគច្ឆន្តិ។ តេន ភិក្ខវេ ភិក្ខុនា ឥតិ បដិសញ្ចិក្ខិតព្វំ អហំ ខោ ឥមំ បុគ្គលំ ឧបនិស្សាយ វិហរាមិ តស្ស មេ ឥមំ បុគ្គលំ ឧបនិស្សាយ វិហរតោ អនុបដ្ឋិតា ចេវ សតិ ន ឧបដ្ឋាតិ អសមាហិតញ្ច ចិត្តំ ន សមាធិយតិ អបរិក្ខីណា ច អាសវា ន បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ នានុបាបុណាមិ យេ ចិមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ កសិរេន សមុទាគច្ឆន្តីតិ។ តេន ភិក្ខវេ ភិក្ខុនា រត្តិភាគំ វា ទិវសភាគំ វា សោ បុគ្គលោ អនាបុច្ឆា បក្កមិតព្វោ នានុពន្ធិតព្វោ។

[២៤០] ឥធ ភិក្ខវេ ភិក្ខុ អញ្ញតរំ បុគ្គលំ ឧបនិស្សាយ វិហរតិ តស្ស តំ បុគ្គលំ ឧបនិស្សាយ វិហរតោ អនុបដ្ឋិតា ចេវ សតិ ន ឧបដ្ឋាតិ អសមាហិតញ្ច ចិត្តំ ន សមាធិយតិ អបរិក្ខីណា ច អាសវា ន បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ នានុបាបុណាតិ យេ ច ខោ ឥមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ អប្បកសិរេន សមុទាគច្ឆន្តិ។ តេន ភិក្ខវេ ភិក្ខុនា ឥតិ បដិសញ្ចិក្ខិតព្វំ អហំ ខោ ឥមំ បុគ្គលំ ឧបនិស្សាយ វិហរាមិ តស្ស មេ ឥមំ បុគ្គលំ ឧបនិស្សាយ វិហរតោ អនុបដ្ឋិតា ចេវ សតិ ន ឧបដ្ឋាតិ អសមាហិតញ្ច ចិត្តំ ន សមាធិយតិ អបរិក្ខីណា ច អាសវា ន បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ នានុបាបុណាមិ យេ ច ខោ ឥមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ អប្បកសិរេន សមុទាគច្ឆន្តិ ន ខោ បនាហំ ចីវរហេតុ អគារស្មា អនគារិយំ បព្វជិតោ ន បិណ្ឌបាតហេតុ ន សេនាសនហេតុ ន គិលានប្បច្ចយភេសជ្ជបរិក្ខារហេតុ អគារស្មា អនគារិយំ បព្វជិតោ អថ ច បន មេ ឥមំ បុគ្គលំ ឧបនិស្សាយ វិហរតោ អនុបដ្ឋិតា ចេវ សតិ ន ឧបដ្ឋាតិ អសមាហិតញ្ច ចិត្តំ ន សមាធិយតិ អបរិក្ខីណា ច អាសវា ន បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ នានុបាបុណាមីតិ។ តេន ភិក្ខវេ ភិក្ខុនា សង្ខាបិ សោ បុគ្គលោ អនាបុច្ឆា បក្កមិតព្វោ នានុពន្ធិតព្វោ។

[២៤១] ឥធ ភិក្ខវេ ភិក្ខុ អញ្ញតរំ បុគ្គលំ ឧបនិស្សាយ វិហរតិ តស្ស តំ បុគ្គលំ ឧបនិស្សាយ វិហរតោ អនុបដ្ឋិតា ចេវ សតិ ឧបដ្ឋាតិ អសមាហិតញ្ច ចិត្តំ សមាធិយតិ អប្បរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាតិ យេ ច ខោ ឥមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ កសិរេន សមុទាគច្ឆន្តិ។ តេន ភិក្ខវេ ភិក្ខុនា ឥតិ បដិសញ្ចិក្ខិតព្វំ អហំ ខោ ឥមំ បុគ្គលំ ឧបនិស្សាយ វិហរាមិ តស្ស មេ ឥមំ បុគ្គលំ ឧបនិស្សាយ វិហរតោ អនុបដ្ឋិតា ចេវ សតិ ឧបដ្ឋាតិ អសមាហិតញ្ច ចិត្តំ សមាធិយតិ អបរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាមិ យេ ច ខោ ឥមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ កសិរេន សមុទាគច្ឆន្តិ ន ខោ បនាហំ ចីវរហេតុ អគារស្មា អនគារិយំ បព្វជិតោ ន បិណ្ឌបាតហេតុ ន សេនាសនហេតុ ន គិលានប្បច្ចយភេសជ្ជបរិក្ខារហេតុ អគារស្មា អនគារិយំ បព្វជិតោ អថ ច បន មេ ឥមំ បុគ្គលំ ឧបនិស្សាយ វិហរតោ អនុបដ្ឋិតា ចេវ សតិ ឧបដ្ឋាតិ អសមាហិតញ្ច ចិត្តំ សមាធិយតិ អបរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាមីតិ។ តេន ភិក្ខវេ ភិក្ខុនា សង្ខាបិ សោ បុគ្គលោ អនុពន្ធិតព្វោ ន បក្កមិតព្វំ។

[២៤២] ឥធ បន ភិក្ខវេ ភិក្ខុ អញ្ញតរំ បុគ្គលំ ឧបនិស្សាយ វិហរតិ តស្ស តំ បុគ្គលំ ឧបនិស្សាយ វិហរតោ អនុបដ្ឋិតា ចេវ សតិ ឧបដ្ឋាតិ អសមាហិតញ្ច ចិត្តំ សមាធិយតិ អបរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាតិ យេ ច ខោ ឥមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ អប្បកសិរេន សមុទាគច្ឆន្តិ។ តេន ភិក្ខវេ ភិក្ខុនា ឥតិ បដិសញ្ចិក្ខិតព្វំ អហំ ខោ ឥមំ បុគ្គលំ ឧបនិស្សាយ វិហរាមិ តស្ស មេ ឥមំ បុគ្គលំ ឧបនិស្សាយ វិហរតោ អនុបដ្ឋិតា ចេវ សតិ ឧបដ្ឋាតិ អសមាហិតញ្ច ចិត្តំ សមាធិយតិ អបរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាមិ យេ ច ខោ ឥមេ បព្វជិតេន ជីវិតបរិក្ខារា សមុទានេតព្វា ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារា តេ អប្បកសិរេន សមុទាគច្ឆន្តីតិ។ តេន ភិក្ខវេ ភិក្ខុនា យាវជីវម្បិ សោ បុគ្គលោ អនុពន្ធិតព្វោ ន បក្កមិតព្វំ អបិ សមុជ្ជមានេនបីតិ [ឱ.ម. បនុជ្ជមានេនបីតិ ឥតិ ទិស្សតិ។]។ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទុន្តិ។

វនបត្ថសុត្តំ សត្តមំ និដ្ឋិតំ។

អដ្ឋមំ មធុបិណ្ឌិកសុត្តំ

[២៤៣] ឯវម្មេ សុតំ។ ឯកំ សមយំ ភគវា សក្កេសុ វិហរតិ កបិលវត្ថុស្មឹ និគ្រោធារាមេ។ អថខោ ភគវា បុព្វណ្ហសមយំ និវាសេត្វា បត្តចីវរមាទាយ កបិលវត្ថុំ បិណ្ឌាយ បាវិសិ។ កបិលវត្ថុស្មឹ បិណ្ឌាយ ចរិត្វា បច្ឆាភត្តំ បិណ្ឌបាតប្បដិក្កន្តោ យេន មហាវនំ តេនុបសង្កមិ ទិវាវិហារាយ មហាវនំ អជ្ឈោគាហេត្វា វេលុវលដ្ឋិកាយ មូលេ ទិវាវិហារំ និសីទិ។ ទណ្ឌបាណិបិ ខោ សក្កោ ជង្ឃាវិហារំ អនុចង្កមមានោ អនុវិចរមានោ យេន មហាវនំ តេនុបសង្កមិ មហាវនំ អជ្ឈោគាហេត្វា យេន វេលុវលដ្ឋិកា យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ទណ្ឌមោលុព្ភ ឯកមន្តំ អដ្ឋាសិ។ ឯកមន្តំ ឋិតោ ខោ ទណ្ឌបាណិ សក្កោ ភគវន្តំ ឯតទវោច កឹវាទី សមណោ កិមក្ខាយីតិ។ យថាវាទី ខោ អាវុសោ សទេវកេ លោកេ សមារកេ សព្រហ្មកេ សស្សមណព្រាហ្មណិយា បជាយ សទេវមនុស្សាយ ន កេនចិ លោកេ វិគ្គយ្ហ តិដ្ឋតិ យថា ច បន កាមេហិ វិសំយុត្តំ [ម. វិសញ្ញុត្តំ។] វិហរន្តំ តំ ព្រាហ្មណំ អកថំកថឹ ឆិន្នកុក្កុច្ចំ ភវាភវេ វីតតណ្ហំ សញ្ញា នានុសេន្តីតិ ឯវំវាទី ខោ អហំ អាវុសោ ឯវមក្ខាយីតិ។ ឯវំ វុត្តេ ទណ្ឌបាណិ សក្កោ សីសំ ឱកម្បេត្វា ជិវ្ហំ និល្លាឡេត្វា តិវិសាខំ នលាដិកំ នលាដេ វុដ្ឋាបេត្វា ទណ្ឌមោលុព្ភ បក្កាមិ។

[២៤៤] អថខោ ភគវា សាយណ្ហសមយំ បដិសល្លានា វុដ្ឋិតោ យេន និគ្រោធារាមោ តេនុបសង្កមិ ឧបសង្កមិត្វា បញ្ញត្តេ អាសនេ និសីទិ។ និសជ្ជ ខោ ភគវា ភិក្ខូ អាមន្តេសិ ឥធាហំ ភិក្ខវេ បុព្វណ្ហសមយំ និវាសេត្វា បត្តចីវរមាទាយ កបិលវត្ថុំ បិណ្ឌាយ បាវិសឹ កបិលវត្ថុស្មឹ បិណ្ឌាយ ចរិត្វា បច្ឆាភត្តំ បិណ្ឌបាតប្បដិក្កន្តោ យេន មហាវនំ តេនុបសង្កមឹ ទិវាវិហារាយ មហាវនំ អជ្ឈោគាហេត្វា វេលុវលដ្ឋិកាយ មូលេ ទិវាវិហារំ និសីទឹ។ ទណ្ឌបាណិបិ ខោ ភិក្ខវេ សក្កោ ជង្ឃាវិហារំ អនុចង្កមមានោ អនុវិចរមានោ យេន មហាវនំ តេនុបសង្កមិ មហាវនំ អជ្ឈោគាហេត្វា យេន វេលុវលដ្ឋិកា យេនាហំ តេនុបសង្កមិ ឧបសង្កមិត្វា មម [ម. មយា។] សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ទណ្ឌមោលុព្ភ ឯកមន្តំ អដ្ឋាសិ។ ឯកមន្តំ ឋិតោ ខោ ភិក្ខវេ ទណ្ឌបាណិ សក្កោ មំ ឯតទវោច កឹវាទី សមណោ កិមក្ខាយីតិ ឯវំ វុត្តេ អហំ ភិក្ខវេ ទណ្ឌបាណឹ សក្កំ ឯតទវោចំ យថាវាទី ខោ អាវុសោ សទេវកេ លោកេ សមារកេ សព្រហ្មកេ សស្សមណព្រាហ្មណិយា បជាយ សទេវមនុស្សាយ ន កេនចិ លោកេ វិគ្គយ្ហ តិដ្ឋតិ យថា ច បន កាមេហិ វិសំយុត្តំ វិហរន្តំ តំ ព្រាហ្មណំ អកថំកថឹ ឆិន្នកុក្កុច្ចំ ភវាភវេ វីតតណ្ហំ សញ្ញា នានុសេន្តីតិ ឯវំវាទី ខោ អហំ អាវុសោ ឯវមក្ខាយីតិ។ ឯវំ វុត្តេ ភិក្ខវេ ទណ្ឌបាណិ សក្កោ សីសំ ឱកម្បេត្វា ជិវ្ហំ និល្លាឡេត្វា តិវិសាខំ នលាដិកំ នលាដេ វុដ្ឋាបេត្វា ទណ្ឌមោលុព្ភ បក្កាមីតិ។

[២៤៥] ឯវំ វុត្តេ អញ្ញតរោ ភិក្ខុ ភគវន្តំ ឯតទវោច កឹវាទី បន ភន្តេ ភគវា សទេវកេ លោកេ សមារកេ សព្រហ្មកេ សស្សមណព្រាហ្មណិយា បជាយ សទេវមនុស្សាយ ន កេនចិ លោកេ វិគ្គយ្ហ តិដ្ឋតិ កថំ [ឱ.ម. កថញ្ច។] បន ភន្តេ [ឱ.ម. ភន្តេ ភគវន្តំ។] កាមេហិ វិសំយុត្តំ វិហរន្តំ តំ ព្រាហ្មណំ អកថំកថឹ ឆិន្នកុក្កុច្ចំ ភវាភវេ វីតតណ្ហំ សញ្ញា នានុសេន្តីតិ។ យតោនិទានំ ភិក្ខុ បុរិសំ បបញ្ចសញ្ញាសង្ខា សមុទាចរន្តិ ឯត្ថ ចេ នត្ថិ អភិនន្ទិតព្វំ អភិវទិតព្វំ អជ្ឈោសិតព្វំ ឯសេវន្តោ រាគានុសយានំ ឯសេវន្តោ បដិឃានុសយានំ ឯសេវន្តោ ទិដ្ឋានុសយានំ ឯសេវន្តោ វិចិកិច្ឆានុសយានំ ឯសេវន្តោ មានានុសយានំ ឯសេវន្តោ ភវរាគានុសយានំ ឯសេវន្តោ អវិជ្ជានុសយានំ ឯសេវន្តោ ទណ្ឌាទានសត្ថាទានកលហវិគ្គហវិវាទតុវំតុវបេសុញ្ញមុសាវាទានំ ឯត្ថេតេ បាបកា អកុសលា ធម្មា អបរិសេសា និរុជ្ឈន្តីតិ។ ឥទមវោច ភគវា ឥទំ វត្វាន សុគតោ ឧដ្ឋាយាសនា វិហារំ បាវិសិ។

[២៤៦] អថខោ តេសំ ភិក្ខូនំ អចិរបក្កន្តស្ស ភគវតោ ឯតទហោសិ ឥទំ ខោ នោ អាវុសោ ភគវា សង្ខិត្តេន ឧទ្ទេសំ ឧទ្ទិសិត្វា វិត្ថារេន អត្ថំ អវិភជិត្វា ឧដ្ឋាយាសនា វិហារំ បវិដ្ឋោ យតោនិទានំ ភិក្ខុ បុរិសំ បបញ្ចសញ្ញាសង្ខា សមុទាចរន្តិ ឯត្ថ ចេ នត្ថិ អភិនន្ទិតព្វំ អភិវទិតព្វំ អជ្ឈោសិតព្វំ ឯសេវន្តោ រាគានុសយានំ ឯសេវន្តោ បដិឃានុសយានំ ឯសេវន្តោ វិចិកិច្ឆានុសយានំ ឯសេវន្តោ មានានុសយានំ ឯសេវន្តោ ភវរាគានុសយានំ ឯសេវន្តោ អវិជ្ជានុសយានំ ឯសេវន្តោ ទណ្ឌាទានសត្ថាទានកលហវិគ្គហវាទតុវំតុវបេសុញ្ញមុសាវាទានំ ឯត្ថេតេ បាបកា អកុសលា ធម្មា អបរិសេសា និរុជ្ឈន្តីតិ កោ នុ ខោ ឥមស្ស ភគវតា សង្ខិត្តេន ឧទ្ទេសស្ស ឧទ្ទិដ្ឋស្ស វិត្ថារេន អត្ថំ អវិភត្តស្ស វិត្ថារេន អត្ថំ វិភជេយ្យាតិ។ អថខោ តេសំ ភិក្ខូនំ ឯតទហោសិ អយំ ខោ អាយស្មា មហាកច្ចានោ សត្ថុ ចេវ សំវណ្ណិតោ សម្ភាវិតោ ច វិញ្ញូនំ សព្រហ្មចារីនំ បហោតិ ចាយស្មា មហាកច្ចានោ ឥមស្ស ភគវតា សង្ខិត្តេន ឧទ្ទេសស្ស ឧទ្ទិដ្ឋស្ស វិត្ថារេន អត្ថំ អវិភត្តស្ស វិត្ថារេន អត្ថំ វិភជិតុំ យន្នូន មយំ យេនាយស្មា មហាកច្ចានោ តេនុបសង្កមេយ្យាម ឧបសង្កមិត្វា អាយស្មន្តំ មហាកច្ចានំ ឯតមត្ថំ បដិបុច្ឆេយ្យាមាតិ។ អថខោ តេ ភិក្ខូ យេនាយស្មា មហាកច្ចានោ តេនុបសង្កមឹសុ ឧបសង្កមិត្វា អាយស្មតា មហាកច្ចានេន សទ្ធឹ សម្មោទឹសុ សម្មោទនីយំ កថំ សារាណីយំ វីតិសារេត្វា ឯកមន្តំ និសីទឹសុ។ ឯកមន្តំ និសិន្នា ខោ តេ ភិក្ខូ អាយស្មន្តំ មហាកច្ចានំ ឯតទវោចុំ ឥទំ ខោ នោ អាវុសោ កច្ចាន ភគវា សង្ខិត្តេន ឧទ្ទេសំ ឧទ្ទិសិត្វា វិត្ថារេន អត្ថំ អវិភជិត្វា ឧដ្ឋាយាសនា វិហារំ បវិដ្ឋោ យតោនិទានំ ភិក្ខុ បុរិសំ បបញ្ចសញ្ញាសង្ខា សមុទាចរន្តិ ឯត្ថ ចេ នត្ថិ អភិនន្ទិតព្វំ។បេ។ ឯត្ថេតេ បាបកា អកុសលា ធម្មា អបរិសេសា និរុជ្ឈន្តីតិ តេសំ នោ អាវុសោ កច្ចាន អម្ហាកំ អចិរបក្កន្តស្ស ភគវតោ ឯតទហោសិ ឥទំ ខោ នោ អាវុសោ ភគវា សង្ខិត្តេន ឧទ្ទេសំ ឧទ្ទិសិត្វា វិត្ថារេន អត្ថំ អវិភជិត្វា ឧដ្ឋាយាសនា វិហារំ បវិដ្ឋោ យតោនិទានំ ភិក្ខុ បុរិសំ បបញ្ចសញ្ញាសង្ខា សមុទាចរន្តិ ឯត្ថ ចេ នត្ថិ អភិនន្ទិតព្វំ។បេ។ ឯត្ថេតេ បាបកា អកុសលា ធម្មា អបរិសេសា និរុជ្ឈន្តីតិ កោ នុ ខោ ឥមស្ស ភគវតា សង្ខិត្តេន ឧទ្ទេសស្ស ឧទ្ទិដ្ឋស្ស វិត្ថារេន អត្ថំ អវិភត្តស្ស វិត្ថារេន អត្ថំ វិភជេយ្យាតិ តេសំ នោ អាវុសោ កច្ចាន អម្ហាកំ ឯតទហោសិ អយំ ខោ អាវុសោ អាយស្មា មហាកច្ចានោ សត្ថុ ចេវ សំវណ្ណិតោ សម្ភាវិតោ ច វិញ្ញូនំ សព្រហ្មចារីនំ បហោតិ ចាយស្មា មហាកច្ចានោ ឥមស្ស ភគវតា សង្ខិត្តេន ឧទ្ទេសស្ស ឧទ្ទិដ្ឋស្ស វិត្ថារេន អត្ថំ អវិភត្តស្ស វិត្ថារេន អត្ថំ វិភជិតុំ យន្នូន មយំ យេនាយស្មា មហាកច្ចានោ តេនុបសង្កមេយ្យាម ឧបសង្កមិត្វា អាយស្មន្តំ មហាកច្ចានំ ឯតមត្ថំ បដិបុច្ឆេយ្យាមាតិ វិភជតាយស្មា មហាកច្ចានោតិ។

[២៤៧] សេយ្យថាបិ អាវុសោ បុរិសោ សារត្ថិកោ សារគវេសី សារបរិយេសនំ ចរមានោ មហតោ រុក្ខស្ស តិដ្ឋតោ សារតោ [ឱ.ម. សារវតោ។] អតិក្កម្មេវ មូលំ អតិក្កម្ម ខន្ធំ សាខាបលាសេ សារំ បរិយេសិតព្វំ មញ្ញេយ្យ ឯវំ សម្បទមិទំ អាយស្មន្តានំ សត្ថរិ សម្មុខីភូតេ តំ ភគវន្តំ អតិសិត្វា អម្ហេ ឯតមត្ថំ បដិបុច្ឆិតព្វំ មញ្ញថ [ឱ. មញ្ញេថ។] សោ ហាវុសោ ភគវា ជានំ ជានាតិ បស្សំ បស្សតិ ចក្ខុភូតោ ញាណភូតោ ធម្មភូតោ ព្រហ្មភូតោ វត្តា បវត្តា អត្ថស្ស និន្នេតា អមតស្ស ទាតា ធម្មស្សាមី តថាគតោ សោ ចេវ បនេតស្ស កាលោ អហោសិ យំ ភគវន្តំយេវ ឯតមត្ថំ បដិបុច្ឆេយ្យាថ យថា នោ ភគវា ព្យាករេយ្យ តថា នំ ធារេយ្យាថាតិ។ អទ្ធាវុសោ កច្ចាន ភគវា ជានំ ជានាតិ បស្សំ បស្សតិ ចក្ខុភូតោ ញាណភូតោ ធម្មភូតោ ព្រហ្មភូតោ វត្តា បវត្តា អត្ថស្ស និន្នេតា អមតស្ស ទាតា ធម្មស្សាមិ តថាគតោ សោ ចេវ បនេតស្ស កាលោ អហោសិ យំ ភគវន្តំយេវ ឯតមត្ថំ បដិបុច្ឆេយ្យាម យថា នោ ភគវា ព្យាករេយ្យ តថា នំ ធារេយ្យាម អបិចាយស្មា មហាកច្ចានោ សត្ថុ ចេវ សំវណ្ណិតោ សម្ភាវិតោ ច វិញ្ញូនំ សព្រហ្មចារីនំ បហោតិ ចាយស្មា មហាកច្ចានោ ឥមស្ស ភគវតា សង្ខិត្តេន ឧទ្ទេសស្ស ឧទ្ទិដ្ឋស្ស វិត្ថារេន អត្ថំ អវិភត្តស្ស វិត្ថារេន អត្ថំ វិភជិតុំ វិភជតាយស្មា មហាកច្ចានោ អគរុករិត្វាតិ [ម. អគរុំ កត្វាតិ។]។

[២៤៨] តេនហាវុសោ សុណាថ សាធុកំ មនសិករោថ ភាសិស្សាមីតិ។ ឯវមាវុសោតិ ខោ តេ ភិក្ខូ អាយស្មតោ មហាកច្ចានស្ស បច្ចស្សោសុំ។ អាយស្មា មហាកច្ចានោ ឯតទវោច យំ ខោ នោ អាវុសោ ភគវា សង្ខិត្តេន ឧទ្ទេសំ ឧទ្ទិសិត្វា វិត្ថារេន អត្ថំ អវិភជិត្វា ឧដ្ឋាយាសនា វិហារំ បវិដ្ឋោ យតោនិទានំ ភិក្ខុ បុរិសំ បបញ្ចសញ្ញាសង្ខា សមុទាចរន្តិ ឯត្ថ ចេ នត្ថិ អភិនន្ទិតព្វំ។បេ។ ឯត្ថេតេ បាបកា អកុសលា ធម្មា អបរិសេសា និរុជ្ឈន្តីតិ ឥមស្ស ខោ អហំ អាវុសោ ភគវតា សង្ខិត្តេន ឧទ្ទេសស្ស ឧទ្ទិដ្ឋស្ស វិត្ថារេន អត្ថំ អវិភត្តស្ស ឯវំ វិត្ថារេន អត្ថំ អាជានាមិ ចក្ខុញ្ចាវុសោ បដិច្ច រូបេ ច ឧប្បជ្ជតិ ចក្ខុវិញ្ញាណំ តិណ្ណំ សង្គតិ ផស្សោ ផស្សប្បច្ចយា វេទនា យំ វេទេតិ តំ សញ្ជានាតិ យំ សញ្ជានាតិ តំ វិតក្កេតិ យំ វិតក្កេតិ តំ បបញ្ចេតិ យំ បបញ្ចេតិ តតោនិទានំ បុរិសំ បបញ្ចសញ្ញាសង្ខា សមុទាចរន្តិ អតីតានាគតបច្ចុប្បន្នេសុ ចក្ខុវិញ្ញេយ្យេសុ រូបេសុ។ សោតញ្ចាវុសោ បដិច្ច សទ្ទេ ច ឧប្បជ្ជតិ សោតវិញ្ញាណំ។បេ។ ឃានញ្ចាវុសោ បដិច្ច គន្ធេ ច ឧប្បជ្ជតិ ឃានវិញ្ញាណំ។បេ។ ជិវ្ហញ្ចាវុសោ បដិច្ច រសេ ច ឧប្បជ្ជតិ ជិវ្ហាវិញ្ញាណំ។បេ។ កាយញ្ចាវុសោ បដិច្ច ផោដ្ឋព្វេ ច ឧប្បជ្ជតិ កាយវិញ្ញាណំ…។ មនញ្ចាវុសោ បដិច្ច ធម្មេ ច ឧប្បជ្ជតិ មនោវិញ្ញាណំ តិណ្ណំ សង្គតិ ផស្សោ ផស្សប្បច្ចយា វេទនា យំ វេទេតិ តំ សញ្ជានាតិ យំ សញ្ជានាតិ តំ វិតក្កេតិ យំ វិតក្កេតិ តំ បបញ្ចេតិ យំ បបញ្ចេតិ តតោនិទានំ បុរិសំ បបញ្ចសញ្ញាសង្ខា សមុទាចរន្តិ អតីតានាគតបច្ចុប្បន្នេសុ មនោវិញ្ញេយ្យេសុ ធម្មេសុ។ សោ វតាវុសោ ចក្ខុស្មឹ សតិ រូបេ សតិ ចក្ខុវិញ្ញាណេ សតិ ផស្សប្បញ្ញត្តឹ បញ្ញាបេស្សតីតិ ឋានមេតំ វិជ្ជតិ ផស្សប្បញ្ញត្តិយា សតិ វេទនាបញ្ញត្តឹ បញ្ញាបេស្សតីតិ ឋានមេតំ វិជ្ជតិ វេទនាបញ្ញត្តិយា សតិ សញ្ញាបញ្ញត្តឹ បញ្ញាបេស្សតីតិ ឋានមេតំ វិជ្ជតិ សញ្ញាបញ្ញត្តិយា សតិ វិតក្កប្បញ្ញត្តឹ បញ្ញាបេស្សតីតិ ឋានមេតំ វិជ្ជតិ វិតក្កប្បញ្ញត្តិយា សតិ បបញ្ចសញ្ញាសង្ខាសមុទាចរណប្បញ្ញត្តឹ បញ្ញាបេស្សតីតិ ឋានមេតំ វិជ្ជតិ។ សោ វតាវុសោ សោតស្មឹ សតិ សទ្ទេ សតិ…។ ឃានស្មឹ សតិ គន្ធេ សតិ…។ ជិវ្ហាយ សតិ រសេ សតិ…។ កាយស្មឹ សតិ ផោដ្ឋព្វេ សតិ…។ មនស្មឹ សតិ ធម្មេ សតិ មនោវិញ្ញាណេ សតិ ផស្សប្បញ្ញត្តឹ បញ្ញាបេស្សតីតិ ឋានមេតំ វិជ្ជតិ ផស្សប្បញ្ញត្តិយា សតិ វេទនាបញ្ញត្តឹ បញ្ញាបេស្សតីតិ ឋានមេតំ វិជ្ជតិ វេទនាបញ្ញត្តិយា សតិ សញ្ញាបញ្ញត្តឹ បញ្ញាបេស្សតីតិ ឋានមេតំ វិជ្ជតិ សញ្ញាបញ្ញត្តិយា សតិ វិតក្កប្បញ្ញត្តឹ បញ្ញាបេស្សតីតិ ឋានមេតំ វិជ្ជតិ វិតក្កប្បញ្ញត្តិយា សតិ បបញ្ចសញ្ញាសង្ខាសមុទាចរណប្បញ្ញត្តឹ បញ្ញាបេស្សតីតិ ឋានមេតំ វិជ្ជតិ។ សោ វតាវុសោ ចក្ខុស្មឹ អសតិ រូបេ អសតិ ចក្ខុវិញ្ញាណេ អសតិ ផស្សប្បញ្ញត្តឹ បញ្ញាបេស្សតីតិ នេតំ ឋានំ វិជ្ជតិ ផស្សប្បញ្ញត្តិយា អសតិ វេទនាបញ្ញត្តឹ បញ្ញាបេស្សតីតិ នេតំ ឋានំ វិជ្ជតិ វេទនាបញ្ញត្តិយា អសតិ សញ្ញាបញ្ញត្តឹ បញ្ញាបេស្សតីតិ នេតំ ឋានំ វិជ្ជតិ សញ្ញាបញ្ញត្តិយា អសតិ វិតក្កបញ្ញត្តឹ បញ្ញាបេស្សតីតិ នេតំ ឋានំ វិជ្ជតិ វិតក្កប្បញ្ញត្តិយា អសតិ បបញ្ចសញ្ញាសង្ខាសមុទាចរណប្បញ្ញត្តឹ បញ្ញាបេស្សតីតិ នេតំ ឋានំ វិជ្ជតិ។ សោ វតាវុសោ សោតស្មឹ អសតិ សទ្ទេ អសតិ។បេ។ ឃានស្មឹ អសតិ គន្ធេ អសតិ…។ ជិវ្ហាយ អសតិ រសេ អសតិ…។ កាយស្មឹ អសតិ ផោដ្ឋព្វេ អសតិ…។ មនស្មឹ អសតិ ធម្មេ អសតិ មនោវិញ្ញាណេ អសតិ ផស្សប្បញ្ញត្តឹ បញ្ញាបេស្សតីតិ នេតំ ឋានំ វិជ្ជតិ ផស្សប្បញ្ញត្តិយា អសតិ វេទនាបញ្ញត្តឹ បញ្ញាបេស្សតីតិ នេតំ ឋានំ វិជ្ជតិ វេទនាបញ្ញត្តិយា អសតិ សញ្ញាបញ្ញត្តឹ បញ្ញាបេស្សតីតិ នេតំ ឋានំ វិជ្ជតិ សញ្ញាបញ្ញត្តិយា អសតិ វិតក្កប្បញ្ញត្តឹ បញ្ញាបេស្សតីតិ នេតំ ឋានំ វិជ្ជតិ វិតក្កប្បញ្ញត្តិយា អសតិ បបញ្ចសញ្ញាសង្ខាសមុទាចរណប្បញ្ញត្តឹ បញ្ញាបេស្សតីតិ នេតំ ឋានំ វិជ្ជតិ។ យំ ខោ នោ អាវុសោ ភគវា សង្ខិត្តេន ឧទ្ទេសំ ឧទ្ទិសិត្វា វិត្ថារេន អត្ថំ អវិភជិត្វា ឧដ្ឋាយាសនា វិហារំ បវិដ្ឋោ យតោនិទានំ ភិក្ខុ បុរិសំ បបញ្ចសញ្ញាសង្ខា សមុទាចរន្តិ ឯត្ថ ចេ នត្ថិ អភិនន្ទិតព្វំ។បេ។ ឯត្ថេតេ បាបកា អកុសលា ធម្មា អបរិសេសា និរុជ្ឈន្តីតិ ឥមស្ស ខោ អហំ អាវុសោ ភគវតា សង្ខិត្តេន ឧទ្ទេសស្ស ឧទ្ទិដ្ឋស្ស វិត្ថារេន អត្ថំ អវិភត្តស្ស ឯវំ វិត្ថារេន អត្ថំ អាជានាមិ។ អាកង្ខមានា ច បន តុម្ហេ អាយស្មន្តោ ភគវន្តំយេវ ឧបសង្កមិត្វា ឯតមត្ថំ បដិបុច្ឆេយ្យាថ យថា នោ ភគវា ព្យាករោតិ តថា នំ ធារេយ្យាថាតិ។

[២៤៩] អថខោ តេ ភិក្ខូ អាយស្មតោ មហាកច្ចានស្ស ភាសិតំ អភិនន្ទិត្វា អនុមោទិត្វា ឧដ្ឋាយាសនា យេន ភគវា តេនុបសង្កមឹសុ ឧបសង្កមិត្វា ភគវន្តំ អភិវាទេត្វា ឯកមន្តំ និសីទឹសុ។ ឯកមន្តំ និសិន្នា ខោ តេ ភិក្ខូ ភគវន្តំ ឯតទវោចុំ យំ [ឱ. ឥទំ។] ខោ នោ ភន្តេ ភគវា សង្ខិត្តេន ឧទ្ទេសំ ឧទ្ទិសិត្វា វិត្ថារេន អត្ថំ អវិភជិត្វា ឧដ្ឋាយាសនា វិហារំ បវិដ្ឋោ យតោនិទានំ ភិក្ខុ បុរិសំ បបញ្ចសញ្ញាសង្ខា សមុទាចរន្តិ ឯត្ថ ចេ នត្ថិ អភិនន្ទិតព្វំ។បេ។ ឯត្ថេតេ បាបកា អកុសលា ធម្មា អបរិសេសា និរុជ្ឈន្តីតិ តេសំ នោ ភន្តេ អម្ហាកំ អចិរប្បក្កន្តស្ស ភគវតោ ឯតទហោសិ ឥទំ ខោ នោ អាវុសោ ភគវា សង្ខិត្តេន ឧទ្ទេសំ ឧទ្ទិសិត្វា វិត្ថារេន អត្ថំ អវិភជិត្វា ឧដ្ឋាយាសនា វិហារំ បវិដ្ឋោ យតោនិទានំ ភិក្ខុ បុរិសំ បបញ្ចសញ្ញាសង្ខា សមុទាចរន្តិ ឯត្ថ ចេ នត្ថិ អភិនន្ទិតព្វំ អភិវទិតព្វំ អជ្ឈោសិតព្វំ ឯសេវន្តោ រាគានុសយានំ ឯសេវន្តោ បដិឃានុសយានំ ឯសេវន្តោ ទិដ្ឋានុសយានំ ឯសេវន្តោ វិចិកិច្ឆានុសយានំ ឯសេវន្តោ មានានុសយានំ ឯសេវន្តោ ភវរាគានុសយានំ ឯសេវន្តោ អវិជ្ជានុសយានំ ឯសេវន្តោ ទណ្ឌាទានសត្ថាទានកលហវិគ្គហវិវាទតុវំតុវបេសុញ្ញមុសាវាទានំ ឯត្ថេតេ បាបកា អកុសលា ធម្មា អបរិសេសា និរុជ្ឈន្តីតិ កោ នុ ខោ ឥមស្ស ភគវតា សង្ខិត្តេន ឧទ្ទេសស្ស ឧទ្ទិដ្ឋស្ស វិត្ថារេន អត្ថំ អវិភត្តស្ស វិត្ថារេន អត្ថំ វិភជេយ្យាតិ។ តេសំ នោ ភន្តេ អម្ហាកំ ឯតទហោសិ អយំ ខោ អាយស្មា មហាកច្ចានោ សត្ថុ ចេវ សំវណ្ណិតោ សម្ភាវិតោ ច វិញ្ញូនំ សព្រហ្មចារីនំ បហោតិ ចាយស្មា មហាកច្ចានោ ឥមស្ស ភគវតា សង្ខិត្តេន ឧទ្ទេសស្ស ឧទ្ទិដ្ឋស្ស វិត្ថារេន អត្ថំ អវិភត្តស្ស វិត្ថារេន អត្ថំ វិភជិតុំ យន្នូន មយំ យេនាយស្មា មហាកច្ចានោ តេនុបសង្កមេយ្យាម ឧបសង្កមិត្វា អាយស្មន្តំ មហាកច្ចានំ ឯតមត្ថំ បដិបុច្ឆេយ្យាមាតិ។ អថខោ មយំ ភន្តេ យេនាយស្មា មហាកច្ចានោ តេនុបសង្កមិម្ហ ឧបសង្កមិត្វា អាយស្មន្តំ មហាកច្ចានំ ឯតមត្ថំ បដិបុច្ឆិម្ហ។ តេសំ នោ ភន្តេ អាយស្មតា មហាកច្ចានេន ឥមេហិ អាការេហិ ឥមេហិ បទេហិ ឥមេហិ ព្យញ្ជនេហិ អត្ថោ វិភត្តោតិ។ បណ្ឌិតោ ភិក្ខវេ មហាកច្ចានោ មហាបញ្ញោ ភិក្ខវេ មហាកច្ចានោ មញ្ចេបិ តុម្ហេ ភិក្ខវេ ឯតមត្ថំ បដិបុច្ឆេយ្យាថ អហម្បិ តំ ឯវមេវំ ព្យាករេយ្យំ យថា តំ មហាកច្ចានេន ព្យាកតំ ឯសោ ចេវ ឯតស្ស អត្ថោ ឯវញ្ច នំ ធារេថាតិ។

[២៥០] ឯវំ វុត្តេ អាយស្មា អានន្ទោ ភគវន្តំ ឯតទវោច សេយ្យថាបិ ភន្តេ បុរិសោ ជិឃច្ឆាទុព្វល្យបរេតោ មធុបិណ្ឌិកំ អធិគច្ឆេយ្យ សោ យតោ យតោ សាយេយ្យ លភេថេវ [ឱ. លភេថ។] សាទុំ រសំ [ម. សាទុរសំ។] អសេចនកំ ឯវមេវ ខោ ភន្តេ ចេតសោ ភិក្ខុ ទព្វជាតិកោ យតោ យតោ ឥមស្ស ធម្មបរិយាយស្ស បញ្ញាយ អត្ថំ ឧបបរិក្ខេយ្យ លភេថ ចេវ [ឱ.ម. លភេថេវ។] អត្តមនតំ លភេថ ច ចេតសោ បសាទំ កោ នាមាយំ ភន្តេ ធម្មបរិយាយោតិ។ តស្មាតិហ ត្វំ អានន្ទ ឥមំ ធម្មបរិយាយំ មធុបិណ្ឌិកបរិយោយាត្វេវ នំ ធារេហីតិ។ ឥទមវោច ភគវា អត្តមនោ អាយស្មា អានន្ទោ ភគវតោ ភាសិតំ អភិនន្ទីតិ។

មធុបិណ្ឌិកសុត្តំ អដ្ឋមំ និដ្ឋិតំ។

នវមំ ទ្វេធាវិតក្កសុត្តំ

[២៥១] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។

[២៥២] ភគវា ឯតទវោច បុព្វេ វ មេ ភិក្ខវេ សម្ពោធា អនភិសម្ពុទ្ធស្ស ពោធិសត្តស្សេវ សតោ ឯតទហោសិ យន្នូនាហំ ទ្វេធា [ឱ.ម. ទ្វិធាតិ ទិស្សតិ។] កត្វា ទ្វេធា កត្វា វិតក្កេ វិហរេយ្យន្តិ សោ ខោ អហំ ភិក្ខវេ យោ ចាយំ កាមវិតក្កោ យោ ច ព្យាបាទវិតក្កោ យោ ច វិហឹសាវិតក្កោ ឥមំ ឯកំ ភាគមកាសឹ យោ ចាយំ នេក្ខម្មវិតក្កោ យោ ច អព្យាបាទវិតក្កោ យោ ច អវិហឹសាវិតក្កោ ឥមំ ទុតិយំ ភាគមកាសឹ។ តស្ស មយ្ហំ ភិក្ខវេ ឯវំ អប្បមត្តស្ស អាតាបិនោ បហិតត្តស្ស វិហរតោ ឧប្បជ្ជតិ កាមវិតក្កោ សោ ឯវំ បជានាមិ ឧប្បន្នោ ខោ មេ អយំ កាមវិតក្កោ សោ ច ខោ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ បញ្ញានិរោធិកោ វិឃាតបក្ខិកោ អនិព្វានសំវត្តនិកោ អត្តព្យាពាធាយ សំវត្តតីតិបិ មេ ភិក្ខវេ បដិសញ្ចិក្ខតោ អព្ភត្ថំ គច្ឆតិ បរព្យាពាធាយ សំវត្តតីតិបិ មេ ភិក្ខវេ បដិសញ្ចិក្ខតោ អព្ភត្ថំ គច្ឆតិ ឧភយព្យាពាធាយ សំវត្តតីតិបិ មេ ភិក្ខវេ បដិសញ្ចិក្ខតោ អព្ភត្ថំ គច្ឆតិ បញ្ញានិរោធិកោ វិឃាតបក្ខិកោ អនិព្វានសំវត្តនិកោតិបិ មេ ភិក្ខវេ បដិសញ្ចិក្ខតោ អព្ភត្ថំ គច្ឆតិ។ សោ ខោ អហំ ភិក្ខវេ ឧប្បន្នុប្បន្នំ កាមវិតក្កំ បជ្ជហមេវ វិនោទនមេវ ព្យន្តមេវ [ឱ. ព្យន្តេវ។] នំ អកាសឹ។ តស្ស មយ្ហំ ភិក្ខវេ ឯវំ អប្បមត្តស្ស អាតាបិនោ បហិតត្តស្ស វិហរតោ ឧប្បជ្ជតិ ព្យាបាទវិតក្កោ។បេ។ ឧប្បជ្ជតិ វិហឹសាវិតក្កោ សោ ឯវំ បជានាមិ ឧប្បន្នោ ខោ មេ អយំ វិហឹសាវិតក្កោ សោ ច ខោ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ បញ្ញានិរោធិកោ វិឃាតបក្ខិកោ អនិព្វានសំវត្តនិកោ អត្តព្យាពាធាយ សំវត្តតីតិបិ មេ ភិក្ខវេ បដិសញ្ចិក្ខតោ អព្ភត្ថំ គច្ឆតិ បរព្យាពាធាយ សំវត្តតីតិបិ មេ ភិក្ខវេ បដិសញ្ចិក្ខតោ អព្ភត្ថំ គច្ឆតិ ឧភយព្យាពាធាយ សំវត្តតីតិបិ មេ ភិក្ខវេ បដិសញ្ចិក្ខតោ អព្ភត្ថំ គច្ឆតិ បញ្ញានិរោធិកោ វិឃាតបក្ខិកោ អនិព្វានសំវត្តនិកោតិបិ មេ ភិក្ខវេ បដិសញ្ចិក្ខតោ អព្ភត្ថំ គច្ឆតិ។ សោ ខោ អហំ ភិក្ខវេ ឧប្បន្នុប្បន្នំ វិហឹសាវិតក្កំ បជហមេវ វិនោទនមេវ ព្យន្តមេវ នំ អកាសឹ។ យញ្ញទេវ ភិក្ខវេ ភិក្ខុ ពហុលមនុវិតក្កេតិ អនុវិចារេតិ តថា តថា នតិ ហោតិ ចេតសោ។ កាមវិតក្កំ ចេ ភិក្ខវេ ភិក្ខុ ពហុលមនុវិតក្កេតិ អនុវិចារេតិ បហាសិ នេក្ខម្មវិតក្កំ កាមវិតក្កំ ពហុលមកាសិ តស្ស តំ កាមវិតក្កាយ ចិត្តំ នមតិ។ ព្យាបាទវិតក្កំ ចេ ភិក្ខវេ ភិក្ខុ…។ វិហឹសាវិតក្កំ ចេ ភិក្ខវេ ភិក្ខុ ពហុលមនុវិតក្កេតិ អនុវិចារេតិ បហាសិ អវិហឹសាវិតក្កំ វិហឹសាវិតក្កំ ពហុលមកាសិ តស្ស តំ វិហឹសាវិតក្កាយ ចិត្តំ នមតិ។ សេយ្យថាបិ ភិក្ខវេ វស្សានំ បច្ឆិមេ មាសេ សរទសមយេ កិដ្ឋសម្ពាធេ គោបាលកោ គាវោ រក្ខេយ្យ សោ គាវោ តតោ តតោ ទណ្ឌេន អាកោដ្តេយ្យ បដិកោដ្តេយ្យ សន្និរុទ្ធេយ្យ សន្និវារេយ្យ។ តំ កិស្ស ហេតុ។ បស្សតិ ហិ សោ ភិក្ខវេ គោបាលកោ តតោនិទានំ វធំ វា ពន្ធំ វា ជានឹ វា គរហំ វា ឯវមេវ ខោ អហំ ភិក្ខវេ អទ្ទសំ អកុសលានំ ធម្មានំ អាទីនវំ ឱការំ សង្កិលេសំ កុសលានំ ធម្មានំ នេក្ខម្មេ អានិសំសំ វោទានបក្ខំ តស្ស មយ្ហំ ភិក្ខវេ ឯវំ អប្បមត្តស្ស អាតាបិនោ បហិតត្តស្ស វិហរតោ ឧប្បជ្ជតិ នេក្ខម្មវិតក្កោ សោ ឯវំ បជានាមិ ឧប្បន្នោ ខោ មេ អយំ នេក្ខម្មវិតក្កោ សោ ច ខោ នេវ អត្តព្យាពាធាយ សំវត្តតិ ន បរព្យាពាធាយ សំវត្តតិ ន ឧភយព្យាពាធាយ សំវត្តតិ បញ្ញាវុឌ្ឍិកោ អវិឃាតបក្ខិកោ និព្វានសំវត្តនិកោ រត្តិញ្ចេបិ នំ ភិក្ខវេ អនុវិតក្កេយ្យំ អនុវិចារេយ្យំ នេវ តតោនិទានំ ភយំ សមនុបស្សាមិ។ ទិវសញ្ចេបិ នំ ភិក្ខវេ អនុវិតក្កេយ្យំ អនុវិចារេយ្យំ នេវ តតោនិទានំ ភយំ សមនុបស្សាមិ។ រត្តិន្ទិវញ្ចេបិ នំ ភិក្ខវេ អនុវិតក្កេយ្យំ អនុវិចារេយ្យំ នេវ តតោនិទានំ ភយំ សមនុបស្សាមិ។ អបិច ខោ មេ អតិចិរំ អនុវិតក្កយតោ អនុវិចារយតោ កាយោ កិលមេយ្យ កាយេ កិលន្តេ [ម. កិលមន្តេ។] ចិត្តំ ឱហញ្ញេយ្យ [ឱ.ម. ឩហញ្ញេយ្យ។] ឱហតេ ចិត្តេ អារា ចិត្តំ សមាធិម្ហាតិ សោ ខោ អហំ ភិក្ខវេ អជ្ឈត្តមេវ ចិត្តំ សណ្ឋបេមិ សន្និសីទេមិ ឯកោទឹ [ឱ. ឯកោទិ។] ករោមិ សមាទហាមិ តំ កិស្ស ហេតុ មា មេ ចិត្តំ ឧគ្ឃាដីតិ [ឱ. ឧហនីតិ។ ម. ឧហតីតិ។]។ តស្ស មយ្ហំ ភិក្ខវេ ឯវំ អប្បមត្តស្ស អាតាបិនោ បហិតត្តស្ស វិហរតោ ឧប្បជ្ជតិ អព្យាបាទវិតក្កោ។បេ។ ឧប្បជ្ជតិ អវិហឹសាវិតក្កោ សោ ឯវំ បជានាមិ ឧប្បន្នោ ខោ មេ អយំ អវិហឹសាវិតក្កោ សោ ច ខោ នេវ អត្តព្យាពាធាយ សំវត្តតិ ន បរព្យាពាធាយ សំវត្តតិ ន ឧភយព្យាពាធាយ សំវត្តតិ បញ្ញាវុឌ្ឍិកោ អវិឃាតបក្ខិកោ និព្វានសំវត្តនិកោ រត្តិញ្ចេបិ នំ ភិក្ខវេ អនុវិតក្កេយ្យំ អនុវិចារេយ្យំ នេវ តតោនិទានំ ភយំ សមនុបស្សាមិ។ ទិវសញ្ចេបិ នំ ភិក្ខវេ អនុវិតក្កេយ្យំ អនុវិចារេយ្យំ នេវ តតោនិទានំ ភយំ សមនុបស្សាមិ។ រត្តិន្ទិវញ្ចេបិ នំ ភិក្ខវេ អនុវិតក្កេយ្យំ អនុវិចារេយ្យំ នេវ តតោនិទានំ ភយំ សមនុបស្សាមិ។ អបិច ខោ មេ អតិចិរំ អនុវិតក្កយតោ អនុវិចារយតោ កាយោ កិលមេយ្យ កាយេ កិលន្តេ ចិត្តំ ឱហញ្ញេយ្យ ឱហតេ ចិត្តេ អារា ចិត្តំ សមាធិម្ហាតិ សោ ខោ អហំ ភិក្ខវេ អជ្ឈត្តមេវ ចិត្តំ សណ្ឋបេមិ សន្និសីទេមិ ឯកោទឹ ករោមិ សមាទហាមិ តំ កិស្ស ហេតុ មា មេ ចិត្តំ ឧគ្ឃាជីតិ។ យញ្ញទេវ ភិក្ខវេ ភិក្ខុ ពហុលមនុវិតក្កេតិ អនុវិចារេតិ តថា តថា នតិ ហោតិ ចេតសោ។ នេក្ខម្មវិតក្កំ ចេ ភិក្ខវេ ភិក្ខុ ពហុលមនុវិតក្កេតិ អនុវិចារេតិ បហាសិ កាមវិតក្កំ នេក្ខម្មវិតក្កំ ពហុលមកាសិ តស្ស តំ នេក្ខម្មវិតក្កាយ ចិត្តំ នមតិ។ អព្យាបាទវិតក្កំ ចេ ភិក្ខវេ ភិក្ខុ…។ អវិហឹសាវិតក្កំ ចេ ភិក្ខវេ ភិក្ខុ ពហុលមនុវិតក្កេតិ អនុវិចារេតិ បហាសិ វិហឹសាវិតក្កំ អវិហឹសាវិតក្កំ ពហុលមកាសិ តស្ស តំ អវិហឹសាវិតក្កាយ ចិត្តំ នមតិ។ សេយ្យថាបិ ភិក្ខវេ គិម្ហានំ បច្ឆិមេ មាសេ សព្វបស្សេសុ គាមន្តសម្ភវេសុ [ឱ.ម. សព្វសស្សេសុ គាមន្តសម្ភតេសុ។] គោបាលកោ គាវោ រក្ខេយ្យ តស្ស រុក្ខមូលគតស្ស វា អព្ភោកាសគតស្ស វា សតិករណីយមេវ ហោតិ ឯតា គាវោតិ ឯវមេវ ខោ ភិក្ខវេ សតិករណីយមេវ អហោសិ ឯតេ ធម្មាតិ។

[២៥៣] អារទ្ធំ ខោ បន មេ ភិក្ខវេ វីរិយំ អហោសិ អសល្លីនំ ឧបដ្ឋិតា សតិ អប្បម្មុដ្ឋា [ឱ. អសម្មុដ្ឋា។ ម. អសំមុដ្ឋា។] បស្សទ្ធោ កាយោ អសារទ្ធោ សមាហិតំ ចិត្តំ ឯកគ្គំ សោ ខោ អហំ ភិក្ខវេ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហាសឹ។ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវំ អវិតក្កំ អវិចារំ សមាធិជំ បីតិសុខំ ទុតិយំ ឈានំ។បេ។ តតិយំ ឈានំ…។ ចតុត្ថំ ឈានំ ឧបសម្បជ្ជ វិហាសឹ។ សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ បុព្វេនិវាសានុស្សតិញ្ញាណាយ ចិត្តំ អភិនិន្នាមេសឹ សោ អនេកវិហិតំ បុព្វេនិវាសំ អនុស្សរាមិ សេយ្យថីទំ ឯកម្បិ ជាតឹ ទ្វេបិ ជាតិយោ។បេ។ ឥតិ សាការំ សឧទ្ទេសំ អនេកវិហិតំ បុព្វេនិវាសំ អនុស្សរាមិ។ អយំ ខោ មេ ភិក្ខវេ រត្តិយា បឋមេ យាមេ បឋមា វិជ្ជា អធិគតា អវិជ្ជា វិហតា វិជ្ជា ឧប្បន្នា តមោ វិហតោ អាលោកោ ឧប្បន្នោ យថាតំ អប្បមត្តស្ស អាតាបិនោ បហិតត្តស្ស វិហរតោ។ សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ សត្តានំ ចុតូបបាតញ្ញាណាយ ចិត្តំ អភិនិន្នាមេសឹ សោ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សាមិ ចវមានេ ឧបបជ្ជមានេ។បេ។ ឥមេ វត ភោន្តោ សត្តា កាយទុច្ចរិតេន សមន្នាគតា។បេ។ ឥតិ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សាមិ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ យថាកម្មុបគេ សត្តេ បជានាមិ។ អយំ ខោ មេ ភិក្ខវេ រត្តិយា មជ្ឈិមេ យាមេ ទុតិយា វិជ្ជា អធិគតា អវិជ្ជា វិហតា វិជ្ជា ឧប្បន្នា តមោ វិហតោ អាលោកោ ឧប្បន្នោ យថាតំ អប្បមត្តស្ស អាតាបិនោ បហិតត្តស្ស វិហរតោ។ សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនិយេ ឋិតេ អានេញ្ជប្បត្តេ អាសវានំ ខយញ្ញាណាយ ចិត្តំ អភិនិន្នាមេសឹ សោ ឥទំ ទុក្ខន្តិ យថាភូតំ អព្ភញ្ញាសឹ អយំ ទុក្ខសមុទយោតិ យថាភូតំ អព្ភញ្ញាសឹ អយំ ទុក្ខនិរោធោតិ យថាភូតំ អព្ភញ្ញាសឹ អយំ ទុក្ខនិរោធគាមិនី បដិបទាតិ យថាភូតំ អព្ភញ្ញាសឹ ឥមេ អាសវាតិ យថាភូតំ អព្ភញ្ញាសឹ អយំ អាសវសមុទយោតិ យថាភូតំ អព្ភញ្ញាសឹ អយំ អាសវនិរោធោតិ យថាភូតំ អព្ភញ្ញាសឹ អយំ អាសវនិរោធគាមិនី បដិបទាតិ យថាភូតំ អព្ភញ្ញាសឹ តស្ស មេ ឯវំ ជានតោ ឯវំ បស្សតោ កាមាសវាបិ ចិត្តំ វិមុច្ចិត្ថ ភវាសវាបិ ចិត្តំ វិមុច្ចិត្ថ អវិជ្ជាសវាបិ ចិត្តំ វិមុច្ចិត្ថ វិមុត្តស្មឹ វិមុត្តមីតិ ញាណំ អហោសិ ខីណា ជាតិ វុសិតំ ព្រហ្មចរិយំ កតំ ករណីយំ នាបរំ ឥត្ថត្តាយាតិ អព្ភញ្ញាសឹ។ អយំ ខោ មេ ភិក្ខវេ រត្តិយា បច្ឆិមេ យាមេ តតិយា វិជ្ជា អធិគតា អវិជ្ជា វិហតា វិជ្ជា ឧប្បន្នា តមោ វិហតោ អាលោកោ ឧប្បន្នោ យថាតំ អប្បមត្តស្ស អាតាបិនោ បហិតត្តស្ស វិហរតោ។

[២៤៥] សេយ្យថាបិ ភិក្ខវេ អរញ្ញេ បវនេ មហន្តំ និន្នំ បល្លលំ តមេនំ មហា មិគសង្ឃោ ឧបនិស្សាយ វិហរេយ្យ តស្ស កោចិទេវ បុរិសោ ឧប្បជ្ជេយ្យ អនត្ថកាមោ អហិតកាមោ អយោគក្ខេមកាមោ សោ យ្វាស្ស មគ្គោ ខេមោ សោវត្ថិកោ បីតិគមនីយោ តំ មគ្គំ បិទហេយ្យ វិវរេយ្យ កុម្មគ្គំ ឱទហេយ្យ ឱកចរំ ឋបេយ្យ ឱកចារិកំ ឯវញ្ហិ សោ ភិក្ខវេ មហា មិគសង្ឃោ អបរេន សមយេន អនយព្យសនំ តនុត្តំ អាបជ្ជេយ្យ។ តស្សេវ ខោ បន ភិក្ខវេ មហតោ មិគសង្ឃស្ស កោចិទេវ បុរិសោ ឧប្បជ្ជេយ្យ អត្ថកាមោ ហិតកាមោ យោគក្ខេមកាមោ សោ យ្វាស្ស មគ្គោ ខេមោ សោវត្ថិកោ បីតិគមនីយោ តំ មគ្គំ វិវរេយ្យ បិទហេយ្យ កុម្មគ្គំ ឱហនេយ្យ [ឱ.ម. ឩហទេយ្យ។] ឱកចរំ នាសេយ្យ ឱកចារិកំ ឯវញ្ហិ សោ ភិក្ខវេ មហា មិគសង្ឃោ អបរេន សមយេន វុឌ្ឍឹ វិរូឡ្ហឹ វេបុល្លំ អាបជ្ជេយ្យ។ ឧបមា ខោ មេ អយំ ភិក្ខវេ កតា អត្ថស្ស វិញ្ញាបនាយ។ អយញ្ចេវេត្ថ អត្ថោ មហន្តំ និន្នំ បល្លលន្តិ ខោ ភិក្ខវេ កាមានមេតំ អធិវចនំ។ មហា មិគសង្ឃោតិ ខោ ភិក្ខវេ សត្តានមេតំ អធិវចនំ។ បុរិសោ អនត្ថកាមោ អហិតកាមោ អយោគក្ខេមកាមោតិ ខោ ភិក្ខវេ មារស្សេតំ បាបិមតោ អធិវចនំ។ កុម្មគ្គោតិ ខោ ភិក្ខវេ អដ្ឋង្គិកស្សេតំ មិច្ឆាមគ្គស្ស អធិវចនំ សេយ្យថីទំ មិច្ឆាទិដ្ឋិយា មិច្ឆាសង្កប្បស្ស មិច្ឆាវាចាយ មិច្ឆាកម្មន្តស្ស មិច្ឆាអាជីវស្ស មិច្ឆាវាយាមស្ស មិច្ឆាសតិយា មិច្ឆាសមាធិស្ស។ ឱកចរោតិ ខោ ភិក្ខវេ នន្ទិរាគស្សេតំ អធិវចនំ។ ឱកចារិកាតិ ខោ ភិក្ខវេ អវិជ្ជាយេតំ អធិវចនំ។ បុរិសោ អត្ថកាមោ ហិតកាមោ យោគក្ខេមកាមោតិ ខោ ភិក្ខវេ តថាគតស្សេ តំ អធិវចនំ អរហតោ សម្មាសម្ពុទ្ធស្ស។ មគ្គោ ខេមោ សោវត្ថិកោ បីតិគមនីយោតិ ខោ ភិក្ខវេ អរិយស្សេតំ អដ្ឋង្គិកស្ស មគ្គស្ស អធិវចនំ សេយ្យថីទំ សម្មាទិដ្ឋិយា សម្មាសង្កប្បស្ស សម្មាវាចាយ សម្មាកម្មន្តស្ស សម្មាអាជីវស្ស សម្មាវាយាមស្ស សម្មាសតិយា សម្មាសមាធិស្ស។

[២៥៥] ឥតិ ខោ ភិក្ខវេ វិវធោ មយា ខេមោ មគ្គោ សោវត្ថិកោ បីតិគមនីយោ បិហិតោ កុម្មគ្គោ ឱហិតោ [ឱ.ម. ឩហិតោ។] ឱកចរោ នាសិតា ឱកចារិកា។ យំ ភិក្ខវេ សត្ថារា ករណីយំ សាវកានំ ហិតេសិនា អនុកម្បកេន អនុកម្បំ ឧបាទាយ កតំ វោ តំ មយា។ ឯតានិ ភិក្ខវេ រុក្ខមូលានិ ឯតានិ សុញ្ញាគារានិ ឈាយថ ភិក្ខវេ មា បមាទត្ថ មា បច្ឆា វិប្បដិសារិនោ អហុវត្ថ។ អយំ វោ អម្ហាកំ អនុសាសនីតិ។ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទុន្តិ។

ទ្វេធាវិតក្កសុត្តំ នវមំ និដ្ឋិតំ។

ទសមំ វិតក្កសណ្ឋានសុត្តំ

[២៥៦] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។

[២៥៧] ភគវា ឯតទវោច អធិចិត្តមយុត្តេន ភិក្ខវេ ភិក្ខុនា បញ្ច និមិត្តានិ កាលេន កាលំ មនសិកាតព្វានិ។ កតមានិ បញ្ច។ ឥធ ភិក្ខវេ ភិក្ខុនោ យំ និមិត្តំ អាគម្ម យំ និមិត្តំ មនសិករោតោ ឧប្បជ្ជន្តិ បាបកា អកុសលា ឆន្ទូបសញ្ហិតាបិ [ឱ. ឆន្ទូបសំហិតាបិ។] ទោសូបសញ្ហិតាបិ វិតក្កា មោហូបសញ្ហិតាបិ តេន ភិក្ខវេ ភិក្ខុនា តម្ហា និមិត្តា អញ្ញំ និមិត្តំ។ មនសិកាតព្វំ កុសលូបសញ្ហិតំ តស្ស តម្ហា និមិត្តា អញ្ញំ និមិត្តំ មនសិករោតោ កុសលូបសញ្ហិតំ យេ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេ បហីយន្តិ តេ អព្ភត្ថំ គច្ឆន្តិ តេសំ បហានា អជ្ឈត្តមេវ ចិត្តំ សន្តិដ្ឋតិ សន្និសីទតិ ឯកោទិភោតិ [ឱ. ឯកោទិហោតិ។] សមាធិយតិ។ សេយ្យថាបិ ភិក្ខវេ ទក្ខោ ផលគណ្ឌោ វា ផលគណ្ឌន្តេវាសី [ឱ.ម. បលគណ្ឌោ វា បលគណ្ឌន្តេវាសី វា។] វា សុខុមាយ អាណិយា ឱឡារិកំ អាណឹ អភិនីហនេយ្យ អភិនីហរេយ្យ អភិនិវត្តេយ្យ [ឱ. អភិនិវជ្ជេយ្យ។] ឯវមេវ ខោ ភិក្ខវេ ភិក្ខុនោ យំ និមិត្តំ អាគម្ម យំ និមិត្តំ មនសិករោតោ ឧប្បជ្ជន្តិ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេន ភិក្ខវេ ភិក្ខុនា តម្ហា និមិត្តា អញ្ញំ និមិត្តំ មនសិកាតព្វំ កុសលូបសញ្ហិតំ តស្ស តម្ហា និមិត្តា អញ្ញំ និមិត្តំ មនសិករោតោ កុសលូបសញ្ហិតំ យេ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេ បហីយន្តិ តេ អព្ភត្ថំ គច្ឆន្តិ តេសំ បហានា អជ្ឈត្តមេវ ចិត្តំ សន្តិដ្ឋតិ សន្និសីទតិ ឯកោទិភោតិ សមាធិយតិ។

[២៥៨] តស្ស ចេ ភិក្ខវេ ភិក្ខុនោ តម្ហា និមិត្តា អញ្ញំ និមិត្តំ មនសិករោតោ កុសលូបសញ្ហិតំ ឧប្បជ្ជន្តេវ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេន ភិក្ខវេ ភិក្ខុនា តេសំ វិតក្កានំ អាទីនវោ ឧបបរិក្ខិតព្វោ ឥតិបិមេ វិតក្កា អកុសលា ឥតិបិមេ វិតក្កា សាវជ្ជា ឥតិបិមេ វិតក្កា ទុក្ខវិបាកាតិ។ តស្ស តេសំ វិតក្កានំ អាទីនវំ ឧបបរិក្ខតោ យេ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេ បហីយន្តិ តេ អព្ភត្ថំ គច្ឆន្តិ តេសំ បហានា អជ្ឈត្តមេវ ចិត្តំ សន្តិដ្ឋតិ សន្និសីទតិ ឯកោទិភោតិ សមាធិយតិ។ សេយ្យថាបិ ភិក្ខវេ ឥត្ថី វា បុរិសោ វា ទហរោ វា យុវា មណ្ឌនកជាតិកោ អហិកុណបេន វា កុក្កុរកុណបេន វា មនុស្សកុណបេន វា កណ្ឋេ អាលគ្គេន [ឱ.ម. អាសត្តេន។] អដ្ដិយេយ្យ ហរាយេយ្យ ជិគុច្ឆេយ្យ ឯវមេវ ខោ ភិក្ខវេ តស្ស ចេ ភិក្ខុនោ តម្ហា និមិត្តា អញ្ញំ និមិត្តំ មនសិករោតោ កុសលូបសញ្ហិតំ ឧប្បជ្ជន្តេវ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេន ភិក្ខវេ ភិក្ខុនា តេសំ វិតក្កានំ អាទីនវោ ឧបបរិក្ខិតព្វោ ឥតិបិមេ វិតក្កា អកុសលា ឥតិបិមេ វិតក្កា សាវជ្ជា ឥតិបិមេ វិតក្កា ទុក្ខវិបាកាតិ។ តស្ស តេសំ វិតក្កានំ អាទីនវំ ឧបបរិក្ខតោ យេ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេ បហីយន្តិ តេ អព្ភត្ថំ គច្ឆន្តិ តេសំ បហានា អជ្ឈត្តមេវ ចិត្តំ សន្តិដ្ឋតិ សន្និសីទតិ ឯកោទិភោតិ សមាធិយតិ។

[២៥៩] តស្ស ចេ ភិក្ខវេ ភិក្ខុនោ តេសំ [ឱ.ម. តេសម្បិ។] វិតក្កានំ អាទីនវំ ឧបបរិក្ខតោ ឧប្បជ្ជន្តេវ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេន ភិក្ខវេ ភិក្ខុនា តេសំ វិតក្កានំ អសតិអមនសិការោ អាបជ្ជិតព្វោ តស្ស តេសំ វិតក្កានំ អសតិអមនសិការំ អាបជ្ជតោ យេ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេ បហីយន្តិ តេ អព្ភត្ថំ គច្ឆន្តិ តេសំ បហានា អជ្ឈត្តមេវ ចិត្តំ សន្តិដ្ឋតិ សន្និសីទតិ ឯកោទិភោតិ សមាធិយតិ។ សេយ្យថាបិ ភិក្ខវេ ចក្ខុមា បុរិសោ អាបាថគតានំ រូបានំ អទស្សនកាមោ អស្ស សោ និម្មិលេយ្យ [ឱ. និមីលេយ្យ។] វា អញ្ញេន វា អបលោកេយ្យ ឯវមេវ ខោ ភិក្ខវេ តស្ស ចេ ភិក្ខុនោ តេសំ វិតក្កានំ អាទីនវំ ឧបបរិក្ខតោ ឧប្បជ្ជន្តេវ បាបកា អកុសលា វិតក្កា ឆន្ទូបសញ្ហិតាបិ។បេ។ ឯកោទិភោតិ សមាធិយតិ។

[២៦០] តស្ស ចេ ភិក្ខវេ ភិក្ខុនោ តេសំ វិតក្កានំ អសតិអមនសិការំ អាបជ្ជតោ ឧប្បជ្ជន្តេវ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេន ភិក្ខវេ ភិក្ខុនោ តេសំ វិតក្កានំ វិតក្កសង្ខារសណ្ឋានំ មនសិកាតព្វំ តស្ស តេសំ វិតក្កានំ វិតក្កសង្ខារសណ្ឋានំ មនសិករោតោ យេ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេ បហីយន្តិ តេ អព្ភត្ថំ គច្ឆន្តិ តេសំ បហានា អជ្ឈត្តមេវ ចិត្តំ សន្តិដ្ឋតិ សន្និសីទតិ ឯកោទិភោតិ សមាធិយតិ។ សេយ្យថាបិ ភិក្ខវេ បុរិសោ សីឃំ គច្ឆេយ្យ តស្ស ឯវមស្ស កិន្នុខោ អហំ សីឃំ គច្ឆាមិ យន្នូនាហំ សនិកំ គច្ឆេយ្យន្តិ សោ សនិកំ គច្ឆេយ្យ។ តស្ស ឯវមស្ស កិន្នុខោ អហំ សនិកំ គច្ឆាមិ យន្នូនាហំ តិដ្ឋេយ្យន្តិ សោ តិដ្ឋេយ្យ។ តស្ស ឯវមស្ស កិន្នុខោ អហំ ឋិតោ យន្នូនាហំ និសីទេយ្យន្តិ សោ និសីទេយ្យ។ តស្ស ឯវមស្ស កិន្នុខោ អហំ និសិន្នោ យន្នូនាហំ និបជ្ជេយ្យន្តិ សោ និបជ្ជេយ្យ ឯវញ្ហិ សោ ភិក្ខវេ បុរិសោ ឱឡារិកំ ឱឡារិកំ ឥរិយាបថំ អភិនិស្សជ្ជេត្វា [ឱ. អភិនិវជ្ជេត្វា។] សុខុមំ សុខុមំ ឥរិយាបថំ កប្បេយ្យ ឯវមេវ ខោ ភិក្ខវេ តស្ស ចេ ភិក្ខុនោ តេសំបិ វិតក្កានំ វិតក្កសង្ខារសណ្ឋានំ មនសិការោតោ ឧប្បជ្ជន្តេវ បាបកា អកុសលា វិតក្កា ឆន្ទូបសញ្ហិតាបិ។បេ។ ឯកោទិភោតិ សមាធិយតិ។

[២៦១] តស្ស ចេ ភិក្ខវេ ភិក្ខុនោ តេសំបិ វិតក្កានំ វិតក្កសង្ខារសណ្ឋានំ មនសិករោតោ ឧប្បជ្ជន្តេវ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេន ភិក្ខវេ ភិក្ខុនា ទន្តេភិ ទន្តមាធាយ ជិវ្ហាយ តាលុំ អាហច្ច ចេតសា ចិត្តំ អភិនិគ្គណ្ហិតព្វំ អភិនិប្បីឡេតព្វំ អភិសន្តាបេតព្វំ តស្ស ទន្តេភិ ទន្តមាធាយ ជិវ្ហាយ តាលុំ អាហច្ច ចេតសា ចិត្តំ អភិនិគ្គណ្ហតោ អភិនិប្បីឡយតោ អភិសន្តាបយតោ យេ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេ បហីយន្តិ តេ អព្ភត្ថំ គច្ឆន្តិ តេសំ បហានា អជ្ឈត្តមេវ ចិត្តំ សន្តិដ្ឋតិ សន្និសីទតិ ឯកោទិភោតិ សមាធិយតិ។ សេយ្យថាបិ ភិក្ខវេ ពលវា បុរិសោ ទុព្វលតរំ បុរិសំ សីសេ វា គលេ វា ខន្ធេ វា គហេត្វា [ឱ. សីសេ វា គហេត្វា ខន្ធេ វា គហេត្វាតិ ឥមេ បាឋោ បញ្ញាយន្តិ។] អភិនិគ្គណ្ហេយ្យ អភិនិប្បីឡេយ្យ អភិសន្តាបេយ្យ ឯវមេវ ខោ ភិក្ខវេ តស្ស ចេ ភិក្ខុនោ តេសំ វិតក្កានំ វិតក្កសង្ខារសណ្ឋានំ មនសិករោតោ ឧប្បជ្ជន្តេវ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេន ភិក្ខវេ ភិក្ខុនា ទន្តេភិ ទន្តមាធាយ ជិវ្ហាយ តាលុំ អាហច្ច ចេតសា ចិត្តំ អភិនិគ្គណ្ហិតព្វំ អភិនិប្បីឡេតព្វំ អភិសន្តាបេតព្វំ តស្ស ទន្តេភិ ទន្តមាធាយ ជិវ្ហាយ តាលុំ អាហច្ច ចេតសា ចិត្តំ អភិនិគ្គណ្ហតោ អភិនិប្បីឡយតោ អភិសន្តាបយតោ យេ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេ បហីយន្តិ តេ អព្ភត្ថំ គច្ឆន្តិ តេសំ បហានា អជ្ឈត្តមេវ ចិត្តំ សន្តិដ្ឋតិ សន្និសីទតិ ឯកោទិភោតិ សមាធិយតិ។

[២៦២] យតោ ច [ឱ. អយំ បាឋោ នត្ថិ។] ខោ ភិក្ខវេ ភិក្ខុនោ យំ និមិត្តំ អាគម្ម យំ និមិត្តំ មនសិករោតោ ឧប្បជ្ជន្តិ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តស្ស តម្ហា និមិត្តា អញ្ញំ និមិត្តំ មនសិករោតោ កុសលូបសញ្ហិតំ យេ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេ បហីយន្តិ តេ អព្ភត្ថំ គច្ឆន្តិ តេសំ បហានា អជ្ឈត្តមេវ ចិត្តំ សន្តិដ្ឋតិ សន្និសីទតិ ឯកោទិភោតិ សមាធិយតិ។ តេសំ វិតក្កានំ អាទីនវំ ឧបបរិក្ខតោ យេ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេ បហីយន្តិ តេ អព្ភត្ថំ គច្ឆន្តិ តេសំ បហានា អជ្ឈត្តមេវ ចិត្តំ សន្តិដ្ឋតិ សន្និសីទតិ ឯកោទិភោតិ សមាធិយតិ។ តេសំ វិតក្កានំ អសតិអមនសិការំ អាបជ្ជតោ យេ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេ បហីយន្តិ តេ អព្ភត្ថំ គច្ឆន្តិ តេសំ បហានា អជ្ឈត្តមេវ ចិត្តំ សន្តិដ្ឋតិ សន្និសីទតិ ឯកោទិភោតិ សមាធិយតិ។ តេសំ វិតក្កានំ វិតក្កសង្ខារសណ្ឋានំ មនសិករោតោ យេ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេ បហីយន្តិ តេ អព្ភត្ថំ គច្ឆន្តិ តេសំ បហានា អជ្ឈត្តមេវ ចិត្តំ សន្តិដ្ឋតិ សន្និសីទតិ ឯកោទិភោតិ សមាធិយតិ។ ទន្តេភិ ទន្តមាធាយ ជិវ្ហាយ តាលុំ អាហច្ច ចេតសា ចិត្តំ អភិនិគ្គណ្ហតោ អភិនិប្បីឡយតោ អភិសន្តាបយតោ យេ បាបកា អកុសលា វិតក្កា ឆន្ទូបសញ្ហិតាបិ ទោសូបសញ្ហិតាបិ មោហូបសញ្ហិតាបិ តេ បហីយន្តិ តេ អព្ភត្ថំ គច្ឆន្តិ តេសំ បហានា អជ្ឈត្តមេវ ចិត្តំ សន្តិដ្ឋតិ សន្និសីទតិ ឯកោទិភោតិ សមាធិយតិ។ អយំ វុច្ចតិ ភិក្ខវេ ភិក្ខុ វសី វិតក្កបរិយាយបថេសុ យំ វិតក្កំ អាកង្ខិស្សតិ តំ វិតក្កំ វិតក្កេស្សតិ យំ វិតក្កំ នាកង្ខិស្សតិ ន តំ វិតក្កំ វិតក្កេស្សតិ អច្ឆេច្ឆិ តណ្ហំ វិវត្តិយិ [ឱ. វាវត្តយិ។] សញ្ញោជនំ សម្មា មានាភិសមយា អន្តមកាសិ ទុក្ខស្សាតិ។ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទុន្តិ។

វិតក្កសណ្ឋានសុត្តំ ទសមំ និដ្ឋិតំ។

សីហនាទវគ្គោ ទុតិយោ។

តស្សុទ្ទានំ

ចូឡសីហលោមហំសវរោ មហា

ចូឡទុក្ខក្ខន្ធអនុមានិកសុត្តំ

ខីលបត្ថមធុបិណ្ឌិកទ្វិធាវិតក្កំ

បញ្ចនិមិត្តកថា បុន វគ្គោ។

ចប់ ភាគ២០។

សូមអនុមោទនា !!!