មជ្ឈិមនិកាយ មជ្ឈិមបណ្ណាសក

ភាគទី២៥

ឆដ្ឋភាគ

នមោ តស្ស ភគវតោ អរហតោ សម្មាសម្ពុទ្ធស្ស។

ព្រាហ្មណវគ្គោ

បឋមំ ព្រហ្មាយុសុត្តំ

[១] ឯវមេ្ម សុតំ។ ឯកំ សមយំ ភគវា វិទេហេសុ ចារិកំ ចរតិ មហតា ភិក្ខុសង្ឃេន សទ្ធឹ បញ្ចមត្តេហិ ភិក្ខុសតេហិ។ តេន ខោ បន សមយេន ព្រហ្មាយុ ព្រាហ្មណោ មិថិលាយំ បដិវសតិ ជិណ្ណោ វុឌ្ឍោ មហល្លកោ អទ្ធគតោ វយោអនុប្បត្តោ វីសវស្សសតិកោ ជាតិយា តិណ្ណំ វេទានំ បារគូ សនិឃណ្ឌុកេដុភានំ សាក្ខរប្បភេទានំ ឥតិហាសបញ្ចមានំ បទកោ វេយ្យាករណោ លោកាយតមហាបុរិសលក្ខណេសុ អនវយោ។ អស្សោសិ ខោ ព្រហ្មាយុ ព្រាហ្មណោ សមណោ ខលុ ភោ គោតមោ សក្យបុត្តោ សក្យកុលា បព្វជិតោ វិទេហេសុ ចារិកំ ចរតិ មហតា ភិក្ខុសង្ឃេន សទ្ធឹ បញ្ចមត្តេហិ ភិក្ខុសតេហិ តំ ខោ បន ភវន្តំ គោតមំ ឯវំ កល្យាណោ កិត្តិសទ្ទោ អព្ភុគ្គតោ ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវា [ម. ភគវាតិ។] សោ ឥមំ លោកំ សទេវកំ សមារកំ សព្រហ្មកំ សស្សមណព្រាហ្មណឹ បជំ សទេវមនុស្សំ សយំ អភិញ្ញា សច្ឆិកត្វា បវេទេតិ សោ ធម្មំ ទេសេតិ អាទិកល្យាណំ មជ្ឈេកល្យាណំ បរិយោសានកល្យាណំ សាត្ថំ សព្យញ្ជនំ កេវលបរិបុណ្ណំ បរិសុទ្ធំ ព្រហ្មចរិយំ បកាសេតិ សាធុ ខោ បន តថារូបានំ អរហតំ ទស្សនំ ហោតីតិ។

[២] តេន ខោ បន សមយេន ព្រហ្មាយុស្ស ព្រាហ្មណស្ស ឧត្តរោ នាម មាណវោ អន្តេវាសី ហោតិ តិណ្ណំ វេទានំ បារគូ សនិឃណ្ឌុកេដុភានំ សាក្ខរប្បភេទានំ ឥតិហាសបញ្ចមានំ បទកោ វេយ្យាករណោ លោកាយតមហាបុរិសលក្ខណេសុ អនវយោ។ អថខោ ព្រហ្មាយុ ព្រាហ្មណោ ឧត្តរំ មាណវំ អាមន្តេសិ អយំ តាត ឧត្តរ សមណោ គោតមោ សក្យបុត្តោ សក្យកុលា បព្វជិតោ វិទេហេសុ ចារិកំ ចរតិ មហតា ភិក្ខុសង្ឃេន សទ្ធឹ បញ្ចមត្តេហិ ភិក្ខុសតេហិ តំ ខោ បន ភវន្តំ គោតមំ ឯវំ កល្យាណោ កិត្តិសទ្ទោ អព្ភុគ្គតោ ឥតិបិ សោ ភគវា អរហំ សម្មាសម្ពុទ្ធោ។បេ។ សាធុ ខោ បន តថារូបានំ អរហតំ ទស្សនំ ហោតីតិ ឯហិ ត្វំ តាត ឧត្តរ យេន សមណោ គោតមោ តេនុបសង្កម ឧបសង្កមិត្វា សមណំ គោតមំ ជានាហិ យទិ វា តំ ភវន្តំ គោតមំ តថា សន្តំយេវ សទ្ទោ អព្ភុគ្គតោ យទិ វា នោ តថា យទិ វា សោ ភវំ គោតមោ តាទិសោ យទិ វា ន តាទិសោ តយា មយំ តំ ភវន្តំ គោតមំ ទេសិស្សាមាតិ [ឱ.ម. វេទិស្សាមាតិ។]។ យថាកថំ បនាហំ ភោ ភវន្តំ តំ គោតមំ ជានិស្សាមិ យទិ វា តំ ភវន្តំ គោតមំ តថា សន្តំយេវ សទ្ទោ អព្ភុគ្គតោ យទិ វា នោ តថា យទិ វា សោ ភវំ គោតមោ តាទិសោ យទិ វា ន តាទិសោតិ។ អាគតានិ ខោ តាត ឧត្តរ អម្ហាកំ មន្តេសុ ទ្វត្តឹសមហាបុរិសលក្ខណានិ យេហិ សមន្នាគតស្ស មហាបុរិសស្ស ទ្វេវ [ម. ទ្វេយេវ។] គតិយោ ភវន្តិ អនញ្ញា សចេ អគារំ អជ្ឈាវសតិ រាជា ហោតិ ចក្កវត្តិ ធម្មិកោ ធម្មរាជា ចាតុរន្តោ វិជិតាវី ជនបទត្ថាវរិយប្បត្តោ សត្តរតនសមន្នាគតោ តស្សិមានិ សត្ត រតនានិ ភវន្តិ សេយ្យថីទំ ចក្ករតនំ ហត្ថិរតនំ អស្សរតនំ មណិរតនំ ឥត្ថីរតនំ គហបតិរតនំ បរិណាយករតនមេវ សត្តមំ បរោសហស្សំ ខោ បនស្ស បុត្តា ភវន្តិ សូរា វីរង្គរូបា បរសេនប្បមទ្ទនា សោ ឥមំ បឋវឹ សាគរបរិយន្តំ អទណ្ឌេន អសត្ថេន ធម្មេន [ម. ឯត្ថន្តរេ សមេនាតិ ទិស្សតិ។] អភិវិជិយ អជ្ឈាវសតិ សចេ ខោ បន អគារស្មា អនគារិយំ បព្វជតិ អរហំ ហោតិ សម្មាសម្ពុទ្ធោ លោកេ វិវដច្ឆទោ អហំ ខោ បន តាត ឧត្តរ មន្តានំ កត្តា [ឱ.ម. ទាតា។] ត្វំ មន្តានំ បដិគ្គហេតាតិ។

[៣] ឯវំ ភោតិ ខោ ឧត្តរោ មាណវោ ព្រហ្មាយុស្ស ព្រាហ្មណស្ស បដិស្សុត្វា ឧដ្ឋាយាសនា ព្រហ្មាយុំ ព្រាហ្មណំ អភិវាទេត្វា បទក្ខិណំ កត្វា វិទេហេសុ យេន ភគវា តេន ចារិកំ បក្កាមិ អនុបុព្វេន ចារិកញ្ចរមានោ យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ ឧត្តរោ មាណវោ ភគវតោ កាយេ ទ្វត្តឹស មហាបុរិសលក្ខណានិ សម្មន្នេសិ។ អទ្ទសា ខោ ឧត្តរោ មាណវោ ភគវតោ កាយេ ទ្វត្តឹស មហាបុរិសលក្ខណានិ យេភុយ្យេន ឋបេត្វា ទ្វេ ទ្វីសុ មហាបុរិសលក្ខណេសុ កង្ខតិ វិចិកិច្ឆតិ នាធិមុច្ចតិ ន សំបសីទតិ កោសោហិតេ ច វត្ថគុយ្ហេ បហុតជិវ្ហតាយ ច។

[៤] អថខោ ភគវតោ ឯតទហោសិ បស្សតិ ខោ មេ អយំ ឧត្តរោ មាណវោ ទ្វត្តឹស មហាបុរិសលក្ខណានិ យេភុយ្យេន ឋបេត្វា ទ្វេ ទ្វីសុ មហាបុរិសលក្ខណេសុ កង្ខតិ វិចិកិច្ឆតិ នាធិមុច្ចតិ ន សំបសីទតិ កោសោហិតេ ច វត្ថគុយ្ហេ បហុតជិវ្ហតាយ ចាតិ។ អថខោ ភគវា តថារូបំ ឥទ្ធាភិសង្ខារំ អភិសង្ខារេសិ យថា អទ្ទស ឧត្តរោ មាណវោ ភគវតោ កោសោហិតំ វត្ថគុយ្ហំ។ អថខោ ភគវា ជិវ្ហំ និន្នាមេត្វា ឧភោបិ កណ្ណសោតានិ អនុមសិ បដិមសិ ឧភោបិ នាសិកសោតានិ អនុមសិ បដិមសិ កេវលកប្បំ [ឱ. កេវលកម្បិ។] នលាដមណ្ឌលំ ជិវ្ហាយ ឆាទេសិ [ឱ. បច្ឆាទេសីតិ ទិស្សតិ។]។

[៥] អថខោ ឧត្តរស្ស មាណវស្ស ឯតទហោសិ សមន្នាគតោ ខោ សមណោ គោតមោ ទ្វត្តឹសមហាបុរិសលក្ខណេហិ យន្នូនាហំ សមណំ គោតមំ អនុពន្ធេយ្យំ ឥរិយាបថមស្ស បស្សេយ្យន្តិ។ អថខោ ឧត្តរោ មាណវោ សត្ត មាសានិ ភគវន្តំ អនុពន្ធិ ឆាយាវ អនុបាយិនី។ អថខោ ឧត្តរោ មាណវោ សត្តន្នំ មាសានំ អច្ចយេន វិទេហេសុ យេន មិថិលា តេន ចារិកំ បក្កាមិ អនុបុព្វេន ចារិកំ ចរមានោ យេន មិថិលា យេន ព្រហ្មាយុ ព្រាហ្មណោ តេនុបសង្កមិ ឧបសង្កមិត្វា ព្រហ្មាយុំ ព្រាហ្មណំ អភិវាទេត្វា ឯកមន្តំ និសីទិ។ ឯកមន្តំ និសិន្នំ ខោ ឧត្តរំ មាណវំ ព្រហ្មាយុ ព្រាហ្មណោ ឯតទវោច កច្ចិ តាត ឧត្តរ តំ ភវន្តំ គោតមំ តថា សន្តំយេវ សទ្ទោ អព្ភុគ្គតោ នោ អញ្ញថា កច្ចិ បន សោ ភវំ គោតមោ តាទិសោ នោ អញ្ញាទិសោតិ។

[៦] យថា [ឱ.ម. តថា។] សន្តំយេវ ភោ តំ ភវន្តំ គោតមំ តថា [ម. តថាសទ្ទោ ន ទិស្សតិ។] សទ្ទោ អព្ភុគ្គតោ នោ អញ្ញថា តាទិសោ ច ខោ សោ ភវំ គោតមោ នោ អញ្ញាទិសោ សមន្នាគតោ ច ភោ សោ ភវំ គោតមោ ទ្វត្តឹសមហាបុរិសលក្ខណេហិ សុប្បតិដ្ឋិតបាទោ ខោ បន សោ ភវំ គោតមោ ឥទម្បិ តស្ស ភោតោ គោតមស្ស មហាបុរិសស្ស មហាបុរិសលក្ខណំ ភវតិ ហេដ្ឋា ខោ បន តស្ស ភោតោ គោតមស្ស បាទតលេសុ ចក្កានិ ជាតានិ សហស្សារានិ សនេមិកានិ សនាភិកានិ សព្វាការបរិបូរានិ។ អាយតបណ្ហិ ខោ បន សោ ភវំ គោតមោ ទីឃង្គុលី ខោ បន សោ ភវំ គោតមោ មុទុតលុណហត្ថបាទោ ខោ បន សោ ភវំ គោតមោ ជាលហត្ថបាទោ ខោ បន សោ ភវំ គោតមោ ឧស្សង្ខបាទោ ខោ បន សោ ភវំ គោតមោ ឯណិជង្ឃោ ខោ បន សោ ភវំ គោតមោ ឋិតកោ ខោ បន សោ ភវំ គោតមោ អនោនមន្តោ ឧភោហិ បាណិតលេហិ ជន្នុកានិ បរិមសតិ បរិមជ្ជតិ កោសោហិតវត្ថគុយ្ហោ ខោ បន សោ ភវំ គោតមោ សុវណ្ណវណ្ណោ ខោ បន សោ ភវំ គោតមោ កាញ្ចនសន្និភតចោ សុខុមច្ឆវី ខោ បន សោ ភវំ គោតមោ សុខុមត្តា ឆវិយា រជោជល្លំ កាយេន ឧបលិម្បតិ ឯកេកលោមោ ខោ បន សោ ភវំ គោតមោ ឯកេកានិ លោមានិ លោមកូបេសុ ជាតានិ ឧទ្ធគ្គលោមោ ខោ បន សោ ភវំ គោតមោ ឧទ្ធគ្គានិ លោមានិ ជាតានិ នីលានិ អញ្ជនវណ្ណានិ កុណ្ឌលាវដ្ដានិ បទក្ខិណាវដ្ដកជាតានិ ព្រហ្មុជុគត្តោ ខោ បន សោ ភវំ គោតមោ សត្តុស្សទោ ខោ បន សោ ភវំ គោតមោ [ឱ. សត្តុស្សទោ បន សោ ភវំ គោតមោតិ ន ទិស្សតិ។] សីហបុព្វឌ្ឍកាយោ ខោ បន សោ ភវំ គោតមោ ចិតន្តរំសោ ខោ បន សោ ភវំ គោតមោ និគ្រោធបរិមណ្ឌលោ ខោ បន សោ ភវំ គោតមោ យាវតក្វស្ស កាយោ តាវតក្វស្ស ព្យាមោ យាវតក្វស្ស ព្យាមោ តាវតក្វស្ស កាយោ។ សមវដ្ដក្ខន្ធោ ខោ បន សោ ភវំ គោតមោ រសត្តសគ្គី [ឱ.ម. រសគ្គសគ្គី។] ខោ បន សោ ភវំ គោតមោ សីហហនុ ខោ បន សោ ភវំ គោតមោ ចត្តាឡីសទន្តោ ខោ បន សោ ភវំ គោតមោ សមទន្តោ ខោ បន សោ ភវំ គោតមោ អវិរឡទន្តោ [ឱ. អវិវរទន្តោ។] ខោ បន សោ ភវំ គោតមោ សុសុក្កទាឋោ ខោ បន សោ ភវំ គោតមោ បហុតជិវ្ហោ ខោ បន សោ ភវំ គោតមោ ព្រហ្មស្សរោ ខោ បន សោ ភវំ គោតមោ ករវិកភាណី អភិនីលនេត្តោ ខោ បន សោ ភវំ គោតមោ គោបខុមោ ខោ បន សោ ភវំ គោតមោ ឧណ្ណា ខោ បនស្ស ភោតោ គោតមស្ស ភមុកន្តរេ ជាតា ឱទាតា មុទុ តលសន្និភា ឧណ្ហិសសីសោ ខោ បន សោ ភវំ គោតមោ ឥទម្បិ តស្ស ភោតោ គោតមស្ស មហាបុរិសស្ស មហាបុរិសលក្ខណំ ភវតិ។ ឥមេហិ ខោ សោ ភោ ភវំ គោតមោ ទ្វត្តឹសមហាបុរិសលក្ខណេហិ សមន្នាគតោ។ គច្ឆន្តោ ខោ បន សោ ភវំ គោតមោ ទក្ខិណេន [ឱ. ទក្ខិណេនេវ។] បាទេន បឋមំ បក្កមតិ សោ នាតិទូរេ បាទំ ឧទ្ធរតិ នាច្ចាសន្នេ បាទំ និក្ខិបតិ សោ នាតិសីឃំ គច្ឆតិ នាតិសណិកំ គច្ឆតិ ន ច អទ្ធវេន អទ្ធវំ [ឱ.ម. អន្ទុវេន អន្ទុវំ។] សង្ឃដ្ដេន្តោ គច្ឆតិ ន ច គោប្ផកេន គោប្ផកំ សង្ឃដ្ដេន្តោ គច្ឆតិ សោ គច្ឆន្តោ ន សត្ថឹ ឧន្នាមេតិ ន សត្ថឹ ឱនាមេតិ ន សត្ថឹ សន្នាមេតិ ន សត្ថឹ វិនាមេតិ គច្ឆតោ ខោ បន តស្ស [ឱ. បនស្ស។] ភោតោ គោតមស្ស អារទ្ធកាយោ វ ន ឥញ្ជតិ ន ច កាយពលេន គច្ឆតិ អវលោកេន្តោ [ម. អបលោកេន្តោ។] ខោ បន សោ ភវំ គោតមោ សព្វកាយេនេវ អវលោកេតិ សោ ន ឧទ្ធំ ឧល្លោកេតិ ន អធោ ឱលោកេតិ ន [ឱ. ន ច។] វិក្ខេបមានោ គច្ឆតិ យុគ្គមត្តញ្ច បេក្ខតិ តតោ ចស្ស ឧត្តរឹ អនាវដំ ញាណទស្សនំ ភវតិ។ សោ អន្តរឃរំ បវិសន្តោ ន កាយំ ឧន្នាមេតិ ន កាយំ ឱនាមេតិ ន កាយំ សន្នាមេតិ ន កាយំ វិនាមេតិ។ សោ នាតិទូរេ នាច្ចាសន្នេ អាសនស្ស បរិវត្តតិ ន ច បាណិនា អាលម្ពិត្វា អាសនេ និសីទតិ ន ច អាសនស្មឹ [ម. អាសនេ តស្មឹ។] កាយំ បក្ខិបតិ។ សោ អន្តរឃរេ និសិន្នោ សមានោ ន ហត្ថកុក្កុច្ចំ អាបជ្ជតិ ន បាទកុក្កុច្ចំ អាបជ្ជតិ ន ច អទ្ធវេន អទ្ធវំ អារោបេត្វា និសីទតិ ន គោប្ផកេន គោប្ផកំ អារោបេត្វា និសីទតិ ន ច បាណិនា ហណុកំ ឧបទហេត្វា [ឱ. ឧប្បាទិយិត្វា។] និសីទតិ។ សោ អន្តរឃរេ និសិន្នោ [ឱ. និសិន្នោ វ។] សមានោ ន ឆម្ភតិ ន កម្បតិ ន វេធតិ ន បរិតស្សតិ សោ អច្ឆម្ភី អកម្បី អវេធី អបរិតស្សី វិគតលោមហំសោ វិវេកាវត្តោ [ម. វិវេកាវដោ។] ច។ សោ ភវំ គោតមោ អន្តរឃរេ និសិន្នោ ហោតិ សោ បតោទកំ បដិគ្គណ្ហន្តោ ន បត្តំ ឧន្នាមេតិ ន បត្តំ ឱនាមេតិ ន បត្តំ សន្នាមេតិ ន បត្តំ វិនាមេតិ សោ បត្តោទកំ បដិគ្គណ្ហាតិ នាតិថោកំ នាតិពហុំ។ សោ ន ខលុខលុការកំ [ឱ. ខុលុខុលុការកំ។] បត្តំ ធោវតិ ន សំបរិវត្តកំ បត្តំ ធោវតិ ន បត្តំ ភូមិយំ និក្ខិបេត្វា ហត្ថេ ធោវតិ។ ហត្ថេសុ ធោតេសុ បត្តោ ធោតោ ហោតិ បត្តេ ធោតេ ហត្ថា ធោតា ហោន្តិ។ សោ បត្តោទកំ ឆឌ្ឌេតិ នាតិទូរេ នាច្ចាសន្នេ ន ច វិច្ឆឌ្ឌិយមានោ។ សោ ឱទនំ បដិគ្គណ្ហន្តោ ន បត្តំ ឧន្នាមេតិ ន បត្តំ ឱនាមេតិ ន បត្តំ សន្នាមេតិ ន បត្តំ វិនាមេតិ។ សោ ឱទនំ បដិគ្គណ្ហាតិ នាតិថោកំ នាតិពហុំ។ ព្យញ្ជនំ បន [ឱ. ខោ បន។] សោ ភវំ គោតមោ បដិគ្គណ្ហាតិ ព្យញ្ជនមត្តាយ អាហារេតិ ន ច ព្យញ្ជនេន អាលោបំ អតិនាមេតិ [ឱ. អតិមញ្ញមេតិ។]។ ទ្វត្តិក្ខត្តុំ ខោ [ឱ. ខោ បន សោ។] ភវំ គោតមោ មុខេ អាលោបំ សំបរិវត្តេត្វា អជ្ឈោហរតិ។ ន ចស្ស កាចិ ឱទនមិញ្ជា អសំភិន្នា កាយំ បវិសតិ។ ន ចស្ស កាចិ ឱទនមិញ្ជា មុខេ អវសិដ្ឋា ហោតិ។ អឌ្ឍាយ [ឱ. អថាបរំ។ ម. អទ្ធាយំ។] អាលោបំ ឧបនាមេតិ។ រសប្បដិសំវេទី ខោ បន សោ ភវំ គោតមោ អាហារំ អាហារេតិ នោ ច រសរាគប្បដិសំវេទី។ អដ្ឋង្គសមន្នាគតំ ខោ បន សោ ភវំ គោតមោ អាហារំ អាហារេតិ នេវ ទវាយ ន មទាយ ន មណ្ឌនាយ ន វិភូសនាយ យាវទេវ ឥមស្ស កាយស្ស ឋិតិយា យាបនាយ វិហឹសុបរតិយា ព្រហ្មចរិយានុគ្គហាយ ឥតិ បុរាណញ្ច វេទនំ បដិហង្ខាមិ នវញ្ច វេទនំ ន ឧប្បាទេស្សាមិ យាត្រា ច មេ ភវិស្សតិ អនវជ្ជតា ច ផាសុវិហារោ ចាតិ។ សោ ភុត្តាវី បត្តោទកំ បដិគ្គណ្ហន្តោ ន បត្តំ ឧន្នាមេតិ ន បត្តំ ឱនាមេតិ ន បត្តំ សន្នាមេតិ ន បត្តំ វិនាមេតិ។ សោ បត្តោទកំ បដិគ្គណ្ហាតិ នាតិថោកំ នាតិពហុំ។ សោ ន ខលុខលុការកំ បត្តំ ធោវតិ ន សំបរិវត្តកំ បត្តំ ធោវតិ ន បត្តំ ភូមិយំ និក្ខិបិត្វា ហត្ថេ ធោវតិ ហត្ថេសុ ធោតេសុ បត្តោ ធោតោ ហោតិ បត្តេ ធោតេ ហត្ថា ធោតា ហោន្តិ។ សោ បត្តោទកំ ឆឌ្ឌេតិ នាតិទូរេ នាច្ចាសន្នេ ន ច វិច្ឆឌ្ឌិយមានោ។ សោ ភុត្តាវី ន បត្តំ ភូមិយំ និក្ខិបតិ នាតិទូរេ នាច្ចាសន្នេ ន ច អនត្ថិកោ បត្តេន ហោតិ ន ច អតិវេលានុរក្ខី បត្តស្មឹ។ សោ ភុត្តាវី មុហុត្តំ តុណ្ហី និសីទតិ។ ន ច អនុមោទនស្ស កាលមតិនាមេតិ។ សោ ភុត្តាវី អនុមោទតិ ន តំ ភត្តំ គរហតិ ន អញ្ញំ ភត្តំ បដិកង្ខតិ។ អញ្ញទត្ថុំ ធម្មិយា កថាយ តំ បរិសំ សន្ទស្សេតិ សមាទបេតិ សមុត្តេជេតិ សម្បហំសេតិ។ សោ តំ បរិសំ ធម្មិយា កថាយ សន្ទស្សេត្វា សមាទបេត្វា សមុត្តេជេត្វា សម្បហំសេត្វា ឧដ្ឋាយាសនា បក្កមតិ។ សោ នាតិសីឃំ គច្ឆតិ នាតិសណិកំ គច្ឆតិ ន ច មុញ្ចិតុកាមោ គច្ឆតិ។ ន ច តស្ស ភោតោ គោតមស្ស កាយេ ចីវរំ អច្ចុកដ្ឋំ ហោតិ ន ច អច្ចោកដ្ឋំ ន ច កាយស្មឹ អល្លីនំ ន ច កាយស្មា [ឱ. កាយស្មឹ។] អបក្កដ្ឋំ។ ន ច [ឱ.ម. ច តស្ស។] ភោតោ គោតមស្ស កាយស្មឹ [ឱ. កាយម្ហា។] វាតោ ចីវរំ អសំវហតិ [ឱ. អបវហតិ។]។ ន ច តស្ស ភោតោ គោតមស្ស កាយេ រជោជល្លំ លិម្បតិ។ សោ អារាមគតោ និសីទតិ បញ្ញត្តេ អាសនេ និសជ្ជ បាទេ បក្ខាលេតិ។ ន ច សោ ភវំ គោតមោ បាទមណ្ឌនានុយោគមនុយុត្តោ វិហរតិ។ សោ បាទេ បក្ខាលេត្វា និសីទតិ បល្លង្កំ អាភុជិត្វា ឧជុំ កាយំ បណិធាយ បរិមុខំ សតឹ ឧបដ្ឋបេត្វា។ សោ នេវ អត្តព្យាពាធាយ ចេតេតិ ន បរព្យាពាធាយ ចេតេតិ ន ឧភយព្យាពាធាយ ចេតេតិ។ អត្តហិតំ បរហិតំ ឧភយហិតំ សព្វលោកហិតមេវ សោ ភវំ គោតមោ ចិន្តេន្តោ និសិន្នោ ហោតិ។ សោ អារាមគតោ បរិសតិ ធម្មំ ទេសេតិ ន តំ បរិសំ ឧស្សាទេតិ ន តំ បរិសំ អប្បសាទេតិ អញ្ញទត្ថុំ ធម្មិយា កថាយ តំ បរិសំ សន្ទស្សេតិ សមាទបេតិ សមុត្តេជេតិ សម្បហំសេតិ។ អដ្ឋង្គសមន្នាគតោ ខោ បនស្ស ភោតោ គោតមស្ស មុខតោ ឃោសោ និច្ឆរតិ វិស្សដ្ឋោ ច វិញ្ញេយ្យោ ច មញ្ជុ ច សវនីយោ ច វិន្ទុ [ឱ.ម. ពិន្ទុ។] ច អវិសារី ច គម្ភីរោ ច និន្នាទី ច។ យថា បរិសំ ខោ បន សោ ភវំ គោតមោ សរេន វិញ្ញាបេតិ ន ចស្ស ពហិទ្ធា បរិសាយ ឃោសោ និច្ឆរតិ។ តេ តេន ភោតា គោតមេន ធម្មិយា កថាយ សន្ទស្សិតា សមាទបិតា សមុត្តេជិតា សម្បហំសិតា ឧដ្ឋាយាសនា បក្កមន្តិ អវលោកយមានាយេវ អវិជហន្តាភាវេន [ឱ. អវិជហត្តាភាវេន។ ម.អវិជហិតត្តា។] អទ្ទសាម ខោ មយំ ភោ តំ ភវន្តំ គោតមំ គច្ឆន្តំ អទ្ទសាម ឋិតំ អទ្ទសាម អន្តរឃរំ បវិសន្តំ អទ្ទសាម អន្តរឃរេ និសិន្នំ តុណ្ហីភូតំ អទ្ទសាម អន្តរឃរេ ភុញ្ជន្តំ អទ្ទសាម ភុត្តាវឹ និសិន្នំ តុណ្ហីភូតំ អទ្ទសាម ភុត្តាវឹ អនុមោទន្តំ អទ្ទសាម អារាមំ អាគច្ឆន្តំ អទ្ទសាម អារាមគតំ និសិន្នំ តុណ្ហីភូតំ អទ្ទសាម អារាមគតំ បរិសតិ ធម្មំ ទេសេន្តំ ឯទិសោ ច ឯទិសោ ច សោ ភវំ គោតមោ តតោ ច ភិយ្យោតិ។

[៧] ឯវំ វុត្តេ ព្រហ្មាយុ ព្រាហ្មណោ ឧដ្ឋាយាសនា ឯកំសំ ឧត្តរាសង្គំ ករិត្វា យេន ភគវា តេនញ្ជលិម្បណាមេត្វា តិក្ខត្តុំ ឧទានំ ឧទានេសិ នមោ តស្ស ភគវតោ អរហតោ សម្មាសម្ពុទ្ធស្ស… នមោ តស្ស ភគវតោ អរហតោ សម្មាសម្ពុទ្ធស្សាតិ អប្បេវ នាម មយំ កទាចិ ករហចិ តេន ភោតា គោតមេន សទ្ធឹ សមាគច្ឆេយ្យាម អប្បេវ នាម សិយា កោចិទេវ កថាសល្លាបោតិ។

[៨] អថខោ ភគវា វិទេហេសុ អនុបុព្វេន ចារិកញ្ចរមានោ យេន មិថិលា តទវសរិ។ តត្រ សុទំ ភគវា មិថិលាយំ វិហរតិ មឃទេវម្ភវនេ [ឱ. មខាទេវម្ពវនេ។]។ អស្សោសុំ ខោ មិថិលេយ្យកា ព្រាហ្មណគហបតិកា សមណោ ខលុ ភោ គោតមោ សក្យបុត្តោ សក្យកុលា បព្វជិតោ វិទេហេសុ ចារិកញ្ចរមានោ មហតា ភិក្ខុសង្ឃេន សទ្ធឹ បញ្ចមត្តេហិ ភិក្ខុសតេហិ មិថិលំ អនុប្បត្តោ មិថិលាយំ វិហរតិ មឃទេវម្ពវនេ តំ ខោ បន ភវន្តំ គោតមំ ឯវំ កល្យាណោ កិត្តិសទ្ទោ អព្ភុគ្គតោ ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវា សោ ឥមំ លោកំ សទេវកំ សមារកំ សព្រហ្មកំ សស្សមណព្រាហ្មណឹ បជំ សទេវមនុស្សំ សយំ អភិញ្ញា សច្ឆិកត្វា បវេទេតិ សោ ធម្មំ ទេសេតិ អាទិកល្យាណំ មជ្ឈេកល្យាណំ បរិយោសានកល្យាណំ សាត្ថំ សព្យញ្ជនំ កេវលបរិបុណ្ណំ បរិសុទ្ធំ ព្រហ្មចរិយំ បកាសេតិ សាធុ ខោ បន តថារូបានំ អរហតំ ទស្សនំ ហោតីតិ។ អថខោ មិថិលេយ្យកា ព្រាហ្មណគហបតិកា យេន ភគវា តេនុបសង្កមឹសុ ឧបសង្កមិត្វា អប្បេកច្ចេ ភគវន្តំ អភិវាទេត្វា ឯកមន្តំ និសីទឹសុ អប្បេកច្ចេ ភគវតា សទ្ធឹ សម្មោទឹសុ សម្មោទនីយំ កថំ សារាណីយំ វីតិសារេត្វា ឯកមន្តំ និសីទឹសុ អប្បេកច្ចេ យេន ភគវា តេនញ្ជលិម្បណាមេត្វា ឯកមន្តំ និសីទឹសុ អប្បេកច្ចេ ភគវតោ សន្តិកេ នាមគោត្តំ សាវេត្វា ឯកមន្តំ និសីទឹសុ អប្បេកច្ចេ តុណ្ហីភូតា ឯកមន្តំ និសីទឹសុ។

[៩] អស្សោសិ ខោ ព្រហ្មាយុ ព្រាហ្មណោ សមណោ ខលុ ភោ គោតមោ សក្យបុត្តោ សក្យកុលា បព្វជិតោ [ឱ.ម. ឯត្ថន្តរេ មិថិលំ អនុប្បត្តោតិ ទិស្សតិ។] មិថិលាយំ វិហរតិ មឃទេវម្ពវនេតិ។ អថខោ ព្រហ្មាយុ ព្រាហ្មណោ សម្ពហុលេហិ មាណវកេហិ សទ្ធឹ យេន មឃទេវម្ពវនំ តេនុបសង្កមិ។ អថខោ ព្រហ្មាយុនោ ព្រាហ្មណស្ស អវិទូរេ អម្ពវនស្ស ឯតទហោសិ ន ខោ មេតំ បដិរូបំ យោហំ បុព្វេ អប្បដិសំវិទិតោ សមណំ គោតមំ ទស្សនាយ ឧបសង្កមេយ្យន្តិ។ អថខោ ព្រហ្មាយុ ព្រាហ្មណោ អញ្ញតរំ មាណវកំ អាមន្តេសិ ឯហិ ត្វំ មាណវក យេន សមណោ គោតមោ តេនុបសង្កម ឧបសង្កមិត្វា មម វចនេន សមណំ គោតមំ អប្បាពាធំ អប្បាតង្កំ លហុដ្ឋានំ ពលំ ផាសុវិហារំ បុច្ឆ ព្រហ្មាយុ ភោ គោតម ព្រាហ្មណោ ភវន្តំ គោតមំ អប្បាពាធំ អប្បាតង្កំ លហុដ្ឋានំ ពលំ ផាសុវិហារំ បុច្ឆតីតិ ឯវញ្ច វទេហិ ព្រហ្មាយុ ភោ គោតម ព្រាហ្មណោ ជិណ្ណោ វុឌ្ឍោ មហល្លកោ អទ្ធគតោ វយោអនុប្បត្តោ វីសវស្សសតិកោ ជាតិយា តិណ្ណំ វេទានំ បារគូ សនិឃណ្ឌុកេដុភានំ សាក្ខរប្បភេទានំ ឥតិហាសបញ្ចមានំ បទកោ វេយ្យាករណោ លោកាយតមហាបុរិសលក្ខណេសុ អនវយោ យាវតា ភោ ព្រាហ្មណគហបតិកា មិថិលាយំ បដិវសន្តិ ព្រហ្មាយុ តេសំ ព្រាហ្មណោ អគ្គមក្ខាយតិ យទិទំ ភោគេហិ ព្រហ្មាយុ តេសំ ព្រាហ្មណោ អគ្គមក្ខាយតិ យទិទំ មន្តេហិ ព្រហ្មាយុ តេសំ ព្រាហ្មណោ អគ្គមក្ខាយតិ យទិទំ អាយុនា ចេវ យសសា ច សោ ភោតោ គោតមស្ស ទស្សនកាមោតិ។

[១០] ឯវំ ភោតិ ខោ សោ មាណវកោ ព្រហ្មាយុស្ស ព្រាហ្មណស្ស បដិស្សុត្វា យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ អដ្ឋាសិ។ ឯកមន្តំ ឋិតោ ខោ [ឱ.ម. ខោ សោតិ ទិស្សតិ។] មាណវកោ ភគវន្តំ ឯតទវោច ព្រហ្មាយុ ភោ គោតម ព្រាហ្មណោ ភវន្តំ គោតមំ អប្បាពាធំ អប្បាតង្កំ លហុដ្ឋានំ ពលំ ផាសុវិហារំ បុច្ឆតិ ព្រហ្មាយុ ភោ គោតម ព្រាហ្មណោ ជិណ្ណោ វុឌ្ឍោ មហល្លកោ អទ្ធគតោ វយោអនុប្បត្តោ វីសវស្សសតិកោ ជាតិយា តិណ្ណំ វេទានំ បារគូ សនិឃណ្ឌុកេដុភានំ សាក្ខរប្បភេទានំ ឥតិហាសបញ្ចមានំ បទកោ វេយ្យាករណោ លោកាយតមហាបុរិសលក្ខណេសុ អនវយោ យាវតា ភោ ព្រាហ្មណគហបតិកា មិថិលាយំ បដិវសន្តិ ព្រហ្មាយុ តេសំ ព្រាហ្មណោ អគ្គមក្ខាយតិ យទិទំ ភោគេហិ ព្រហ្មាយុ តេសំ ព្រាហ្មណោ អគ្គមក្ខាយតិ យទិទំ មន្តេហិ ព្រហ្មាយុ តេសំ ព្រាហ្មណោ អគ្គមក្ខាយតិ យទិទំ អាយុនា ចេវ យសសា ច សោ ភោតោ គោតមស្ស ទស្សនកាមោតិ។ យស្សទានិ មាណវ [ឱ. មាណវក។] ព្រហ្មាយុ ព្រាហ្មណោ កាលំ មញ្ញតីតិ។ អថខោ សោ មាណវកោ យេន ព្រហ្មាយុ ព្រាហ្មណោ តេនុបសង្កមិ ឧបសង្កមិត្វា ព្រហ្មាយុំ ព្រាហ្មណំ ឯតទវោច កតាវកាសោ ខោ ភវំ [ម. ខោម្ហិ ភវតាតិ ទិស្សតិ។] សមណេន គោតមេន យស្សទានិ ភវំ កាលំ មញ្ញតីតិ [ឱ. មញ្ញសីតិ។]។

[១១] អថខោ ព្រហ្មាយុ ព្រាហ្មណោ យេន ភគវា តេនុបសង្កមិ។ អទ្ទសា ខោ សា បរិសា ព្រហ្មាយុំ ព្រាហ្មណំ ទូរតោ វ អាគច្ឆន្តំ ទិស្វា [ឱ.ម. ទិស្វាន។] ឱរមត្ថ [ម. ឱរមតិ។] ឱកាសមកាសិ យថាតំ ញាតស្ស យសស្សិនោ។ អថខោ ព្រហ្មាយុ ព្រាហ្មណោ តំ បរិសំ ឯតទវោច អលំ ភោ [ម. ខោ ភោ។] និសីទថ តុម្ហេ សកេ អាសនេ ឥធាហំ សមណស្ស គោតមស្ស សន្តិកេ និសីទិស្សាមីតិ។ អថខោ ព្រហ្មាយុ ព្រាហ្មណោ យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ ព្រហ្មាយុ ព្រាហ្មណោ ភគវតោ កាយេ ទ្វត្តឹស មហាបុរិសលក្ខណានិ សម្មន្នេសិ។ អទ្ទសា ខោ ព្រហ្មាយុ ព្រាហ្មណោ ភគវតោ កាយេ ទ្វត្តឹស មហាបុរិសលក្ខណានិ យេភុយ្យេន ឋបេត្វា ទ្វេ ទ្វីសុ មហាបុរិសលក្ខណេសុ កង្ខតិ វិចិកិច្ឆតិ នាធិមុច្ឆតិ ន សំបសីទតិ កោសោហិតេ ច វត្ថគុយ្ហេ បហុតជិវ្ហតាយ ច [ម. ចាតីតិ ទិស្សតិ។]។ អថខោ ព្រហ្មាយុ ព្រាហ្មណោ ភគវន្តំ គាថាហិ អជ្ឈភាសិ

យេ មេ ទ្វត្តឹសាតិ សុតា មហាបុរិសលក្ខណា

ទុវេ [ម. ទ្វេ។] តេសំ ន បស្សាមិ ភោតោ កាយស្មិ គោតម

កច្ចិ កោសោហិតំ ភោតោ វត្ថគុយ្ហំ នរុត្តម

នារីសមានាមសវ្ហយា [ម. នារីសមានសវ្ហយាតិ ទិស្សតិ។] កច្ចិ ជិវ្ហា នរស្សិកា

កិច្ចិ បហុតជិវ្ហោសិ យថាតំ ជានិយាមសេ [ម. ជានិស្សាមសេ។]

និន្នាមយេតំ តនុកំ [ម. បហុតំ។] កង្ខំ វិនយ នោ ឥសេ

ទិដ្ឋធម្មហិតត្ថាយ សម្បរាយ សុខាយ ច

កតាវកាសា បុច្ឆាម យំកិញ្ចិ អភិបត្ថិតន្តិ។

[១២] អថខោ ភគវតោ ឯតទហោសិ បស្សតិ ខោ មេ អយំ ព្រហ្មាយុ ព្រាហ្មណោ ទ្វត្តឹស មហាបុរិសលក្ខណានិ យេភុយ្យេន ឋបេត្វា ទ្វេ ទ្វីសុ មហាបុរិសលក្ខណេសុ កង្ខតិ វិចិកិច្ឆតិ នាធិមុច្ចតិ ន សំបសីទតិ កោសោហិតេ ច វត្ថគុយ្ហេ បហុតជិវ្ហតាយ ចាតិ។ អថខោ ភគវា តថារូបំ ឥទ្ធាភិសង្ខារំ អភិសង្ខារេសិ យថា អទ្ទស ព្រហ្មាយុ ព្រាហ្មណោ ភគវតោ កោសោហិតំ វត្ថគុយ្ហំ។ អថខោ ភគវា ជិវ្ហំ និន្នាមេត្វា ឧភោបិ កណ្ណសោតានិ អនុមសិ បដិមសិ ឧភោបិ នាសិកសោតានិ អនុមសិ បដិមសិ កេវលកប្បំ [ឱ. កេវលកម្បិ។] នលាដមណ្ឌលំ ជិវ្ហាយ ឆាទេសិ [ឱ. បច្ឆាទេសីតិ ទិស្សតិ។ ម. ឆាទេតិ។]។ អថខោ ភគវា ព្រហ្មាយុំ ព្រាហ្មណំ គាថាហិ អជ្ឈភាសិ

យេ តេ ទ្វត្តឹសាតិ សុតា មហាបុរិសលក្ខណា

សព្វេ តេ មម កាយស្មឹ មា តេ [ម. វោ។] កង្ខាហុ ព្រាហ្មណ

អភិញ្ញេយ្យំ អភិញ្ញាតំ ភាវេតព្វញ្ច ភាវិតំ

បហាតព្វំ បហីនំ មេ តស្មា ពុទ្ធោស្មិ ព្រាហ្មណ

ទិដ្ឋធម្មហិតត្ថាយ សម្បរាយ សុខាយ ច

កតាវកាសោ បុច្ឆស្សុ យំកិញ្ចិ អភិបត្ថិតន្តិ។

[១៣] អថខោ ព្រហ្មាយុស្ស ព្រាហ្មណស្ស ឯតទហោសិ កតាវកាសោ ខោម្ហិ សមណេន គោតមេន កឹ នុ ខោ អហំ សមណំ គោតមំ បុច្ឆេយ្យំ ទិដ្ឋធម្មិកំ វា អត្ថំ សម្បរាយិកំ វាតិ។ អថខោ ព្រហ្មាយុស្ស ព្រាហ្មណស្ស ឯតទហោសិ កុសលោ ខោ អហំ ទិដ្ឋធម្មិកានំ អត្ថានំ អញ្ញេបិ មំ ទិដ្ឋធម្មិកំ អត្ថំ បុច្ឆន្តិ យន្នូនាហំ សមណំ គោតមំ សម្បរាយិកមេវ អត្ថំ បុច្ឆេយ្យន្តិ។ អថខោ ព្រហ្មាយុ ព្រាហ្មណោ ភគវន្តំ គាថាហិ អជ្ឈភាសិ

កថំ ខោ ព្រាហ្មណោ ហោតិ កថំ ភវតិ វេទគូ

តេវិជ្ជោ ភោ កថំ ហោតិ សោត្ថិយោ កិន្តិ វុច្ចតិ

អរហំ ភោ កថំ ហោតិ កថំ ភវតិ កេវលី

មុនិ ច ភោ កថំ ហោតិ ពុទ្ធោ កិន្តិ បវុច្ចតីតិ។

[១៤] អថខោ ភគវា ព្រហ្មាយុំ ព្រាហ្មណំ គាថាហិ បច្ចភាសិ

បុព្វេនិវាសំ យោ វេទី សគ្គាបាយញ្ច បស្សតិ

អថោ ជាតិក្ខយំ បត្តោ អភិញ្ញាវោសិតោ មុនិ

ចិត្តំ វិសុទ្ធំ ជានាតិ មុត្តំ រាគេហិ សព្វសោ

បហីនជាតិមរណោ ព្រហ្មចរិយស្ស កេវលី

បារគូ សព្វធម្មានំ ពុទ្ធោ តាទិ បវុច្ចតីតិ។

[១៥] ឯវំ វុត្តេ ព្រហ្មាយុ ព្រាហ្មណោ ឧដ្ឋាយាសនា ឯកំសំ ឧត្តរាសង្គំ ករិត្វា ភគវតោ បាទេសុ សិរសា និបតិត្វា ភគវតោ បាទានិ មុខេន ច បរិចុម្ពតិ បាណីហិ [ឱ.ម. ឯត្ថន្តរេ ចសទ្ទោ ទិស្សតិ។] បរិសម្ពាហតិ នាមញ្ច សាវេតិ ព្រហ្មាយ្វាហំ [ម. ព្រហ្មាយុហំ។] ភោ គោតម ព្រាហ្មណោ ព្រហ្មាយ្វាហំ ភោ គោតម ព្រាហ្មណោតិ។ អថខោ សា បរិសា អច្ឆរិយព្ភូតជាតា [ឱ.ម. អច្ឆរិយព្ភូតចិត្តជាតាតិ ទិស្សតិ។] អហោសិ អច្ឆរិយំ វត ភោ អព្ភូតំ វត ភោ សមណស្ស មហិទ្ធិកតា មហានុភាវតា យត្រ ហិ នាមាយំ ព្រហ្មាយុ ព្រាហ្មណោ ញាតោ យសស្សី ឯវរូបំ បរមំ និបច្ចការំ ករិស្សតីតិ។ អថខោ ភគវា ព្រហ្មាយុំ ព្រាហ្មណំ ឯតទវោច អលំ ព្រាហ្មណ ឧដ្ឋហ [ម. ឧដ្ឋាហិ។] និសីទ ត្វំ សកេ អាសនេ យតោ តេ មយិ ចិត្តំ បសន្នន្តិ។ អថខោ ព្រហ្មាយុ ព្រាហ្មណោ ឧដ្ឋហិត្វា សកេ អាសនេ និសីទិ។

[១៦] អថខោ ភគវា ព្រហ្មាយុស្ស ព្រាហ្មណស្ស អនុបុព្វីកថំ កថេសិ សេយ្យថីទំ ទានកថំ សីលកថំ សគ្គកថំ កាមានំ អាទីនវំ ឱការំ សង្កិលេសំ នេក្ខម្មេ អានិសំសំ បកាសេសិ។ យទា ភគវា អញ្ញាសិ ព្រហ្មាយុំ ព្រាហ្មណំ កល្លចិត្តំ មុទុចិត្តំ វិនីវរណចិត្តំ ឧទគ្គចិត្តំ បសន្នចិត្តំ អថ យា ពុទ្ធានំ សាមុក្កំសិកា ធម្មទេសនា តំ បកាសេសិ ទុក្ខំ សមុទយំ និរោធំ មគ្គំ។ សេយ្យថាបិ នាម សុទ្ធំ វត្ថំ អបគតកាឡកំ សម្មទេវ រជនំ បដិគ្គណ្ហេយ្យ ឯវមេវ ព្រហ្មាយុស្ស ព្រាហ្មណស្ស តស្មឹយេវ អាសនេ វិរជំ វីតមលំ ធម្មចក្ខុំ ឧទបាទិ យំ កិញ្ចិ សមុទយធម្មំ សព្វន្តំ និរោធធម្មន្តិ។

[១៧] អថខោ ព្រហ្មាយុ ព្រាហ្មណោ ទិដ្ឋធម្មោ បត្តធម្មោ វិទិតធម្មោ បរិយោគាឡ្ហធម្មោ តិណ្ណវិចិកិច្ឆោ វិគតកថំកថោ វេសារជ្ជប្បត្តោ អបរប្បច្ចយោ សត្ថុសាសនេ ភគវន្តំ ឯតទវោច អភិក្កន្តំ ភោ គោតម អភិក្កន្តំ ភោ គោតម សេយ្យថាបិ ភោ គោតម និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ ភោតា គោតមេន អនេកបរិយាយេន ធម្មោ បកាសិតោ ឯសាហំ ភវន្តំ គោតមំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភវំ គោតមោ ធារេតុ អជ្ជតគ្គេ បាណុបេតំ សរណង្គតំ អធិវាសេតុ ច មេ ភវំ គោតមោ ស្វាតនាយ ភត្តំ សទ្ធឹ ភិក្ខុសង្ឃេនាតិ។ អធិវាសេតិ ភគវា តុណ្ហីភាវេន។

[១៨] អថខោ ព្រហ្មាយុ ព្រាហ្មណោ ភគវតោ អធិវាសនំ វិទិត្វា ឧដ្ឋាយាសនា ភគវន្តំ អភិវាទេត្វា បទក្ខិណំ កត្វា បក្កាមិ។ អថខោ ព្រហ្មាយុ ព្រាហ្មណោ តស្សា រត្តិយា អច្ចយេន សកេ និវេសនេ បណីតំ ខាទនីយំ ភោជនីយំ បដិយាទាបេត្វា ភគវតោ កាលំ អារោចាបេសិ កាលោ ខោ ភោ គោតម និដ្ឋិតំ ភត្តន្តិ។ អថខោ ភគវា បុព្វណ្ហសមយំ និវាសេត្វា បត្តចីវរមាទាយ យេន ព្រហ្មាយុស្ស ព្រាហ្មណស្ស និវេសនំ តេនុបសង្កមិ ឧបសង្កមិត្វា បញ្ញត្តេ អាសនេ និសីទិ សទ្ធឹ ភិក្ខុសង្ឃេន។ អថខោ ព្រហ្មាយុ ព្រាហ្មណោ សត្តាហំ ពុទ្ធប្បមុខំ ភិក្ខុសង្ឃំ បណីតេន ខាទនីយេន ភោជនីយេន សហត្ថា សន្តប្បេសិ សម្បវារេសិ។ អថខោ ភគវា តស្ស សត្តាហស្ស អច្ចយេន វិទេហេសុ ចារិកំ បក្កាមិ។

[១៩] អថខោ ព្រហ្មាយុ ព្រាហ្មណោ អចិរប្បក្កន្តស្ស ភគវតោ កាលមកាសិ។ អថខោ សម្ពហុលា ភិក្ខូ យេន ភគវា តេនុបសង្កមឹសុ ឧបសង្កមិត្វា ភគវន្តំ អភិវាទេត្វា ឯកមន្តំ និសីទឹសុ។ ឯកមន្តំ និសិន្នា ខោ [ឱ. ខោសទ្ទោ នត្ថិ។] តេ ភិក្ខូ ភគវន្តំ ឯតទវោចុំ ព្រហ្មាយុ ភន្តេ ព្រាហ្មណោ កាលកតោ តស្ស កា គតិ កោ អភិសម្បរាយោតិ។

[២០] បណ្ឌិតោ ភិក្ខវេ ព្រហ្មាយុ ព្រាហ្មណោ បច្ចបាទិ ធម្មំ សានុធម្មំ នេវ មំ [ឱ. ធម្មស្សានុធម្មំ ន វ មន្តិ ទិស្សតិ។ ម. ធម្ម… ន ច មន្តី ទិស្សតិ។] ធម្មាធិករណំ វិហេសេសិ ព្រហ្មាយុ [ឱ.ម. ឯត្ថន្តរេ ភិក្ខវេតិ ទិស្សតិ។] ព្រាហ្មណោ បញ្ចន្នំ ឱរម្ភាគិយានំ សញ្ញោជនានំ បរិក្ខយា ឱបបាតិកោ ហោតិ តត្ថ បរិនិព្វាយី អនាវត្តិធម្មោ តស្មា លោកាតិ។ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទុន្តិ។

ព្រហ្មាយុសុត្តំ បឋមំ និដ្ឋិតំ។

ទុតិយំ សេលសុត្តំ

[២១] ឯវមេ្ម សុតំ។ ឯកំ សមយំ ភគវា អង្គុត្តរាបេសុ ចារិកញ្ចរមានោ មហតា ភិក្ខុសង្ឃេន សទ្ធឹ អឌ្ឍតេលសេហិ ភិក្ខុសតេហិ យេន អាបណំ នាម អង្គុត្តរាបានំ និគមោ តទវសរិ។ អស្សោសិ ខោ កេណិយោ ជដិលោ សមណោ ខលុ ភោ គោតមោ សក្យបុត្តោ សក្យកុលា បព្វជិតោ អង្គុត្តរាបេសុ ចារិកញ្ចរមានោ មហតា ភិក្ខុសង្ឃេន សទ្ធឹ អឌ្ឍតេលសេហិ ភិក្ខុសតេហិ អាបណំ អនុប្បត្តោ តំ ខោ បន ភវន្តំ គោតមំ ឯវំ កល្យាណោ កិត្តិសទ្ទោ អព្ភុគ្គតោ ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវា សោ ឥមំ លោកំ សទេវកំ សមារកំ សព្រហ្មកំ សស្សមណព្រាហ្មណឹ បជំ សទេវមនុស្សំ សយំ អភិញ្ញា សច្ឆិកត្វា បវេទេតិ សោ ធម្មំ ទេសេតិ អាទិកល្យាណំ មជ្ឈេកល្យាណំ បរិយោសានកល្យាណំ សាត្ថំ សព្យញ្ជនំ កេវលបរិបុណ្ណំ បរិសុទ្ធំ ព្រហ្មចរិយំ បកាសេតិ សាធុ ខោ បន តថារូបានំ អរហតំ ទស្សនំ ហោតីតិ។

[២២] អថខោ កេណិយោ ជដិលោ យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នំ ខោ កេណិយំ ជដិលំ ភគវា ធម្មិយា កថាយ សន្ទស្សេសិ សមាទបេសិ សមុត្តេជេសិ សម្បហំសេសិ។ អថខោ កេណិយោ ជដិលោ ភគវតា ធម្មិយា កថាយ សន្ទស្សិតោ សមាទបិតោ សមុត្តេជិតោ សម្បហំសិតោ ភគវន្តំ ឯតទវោច អធិវាសេតុ មេ ភវំ គោតមោ ស្វាតនាយ ភត្តំ សទ្ធឹ ភិក្ខុសង្ឃេនាតិ។ ឯវំ វុត្តេ ភគវា កេណិយំ ជដិលំ ឯតទវោច មហា ខោ កេណិយ ភិក្ខុសង្ឃោ អឌ្ឍតេលសានិ ភិក្ខុសតានិ ត្វញ្ច ព្រាហ្មណេសុ អភិប្បសន្នោតិ។ ទុតិយម្បិ ខោ កេណិយោ ជដិលោ ភគវន្តំ ឯតទវោច កិញ្ចាបិ ភោ [ម. ខោ ភោ។] គោតម មហាភិក្ខុសង្ឃោ អឌ្ឍតេលសានិ ភិក្ខុសតានិ អហញ្ច ព្រាហ្មណេសុ អភិប្បសន្នោ អធិវាសេតុ មេ ភវំ គោតមោ ស្វាតនាយ ភត្តំ សទ្ធឹ ភិក្ខុសង្ឃេនាតិ។ ទុតិយម្បិ ខោ ភគវា កេណិយំ ជដិលំ ឯតទវោច មហា ខោ កេណិយ ភិក្ខុសង្ឃោ អឌ្ឍតេលសានិ ភិក្ខុសតានិ ត្វញ្ច ព្រាហ្មណេសុ អភិប្បសន្នោតិ។ តតិយម្បិ ខោ កេណិយោ ជដិលោ ភគវន្តំ ឯតទវោច កិញ្ចាបិ ភោ គោតម មហាភិក្ខុសង្ឃោ អឌ្ឍតេលសានិ ភិក្ខុសតានិ អហញ្ច ព្រាហ្មណេសុ អភិប្បសន្នោ អធិវាសេត្វេវ មេ ភវំ គោតមោ ស្វាតនាយ ភត្តំ សទ្ធឹ ភិក្ខុសង្ឃេនាតិ។ អធិវាសេតិ ភគវា តុណ្ហីភាវេន។ អថខោ កេណិយោ ជដិលោ ភគវតោ អធិវាសនំ វិទិត្វា ឧដ្ឋាយាសនា យេន សកោ អស្សមោ តេនុបសង្កមិ ឧបសង្កមិត្វា មិត្តាមច្ចេ ញាតិសាលោហិតេ អាមន្តេសិ សុណន្តុ មេ ភោន្តោ មិត្តាមច្ចា ញាតិសាលោហិតា សមណោ មេ គោតមោ និមន្តិតោ ស្វាតនាយ ភត្តំ សទ្ធឹ ភិក្ខុសង្ឃេន យេន មេ កាយវេយ្យាវត្តិកំ ករេយ្យាថាតិ។ ឯវំ ភោតិ ខោ កេណិយស្ស ជដិលស្ស មិត្តាមច្ចា ញាតិសាលោហិតា កេណិយស្ស ជដិលស្ស បដិស្សុត្វា អប្បេកច្ចេ ឧទ្ធនានិ ខនន្តិ អប្បេកច្ចេ កដ្ឋានិ ផាលេន្តិ អប្បេកច្ចេ ភាជនានិ ធោវន្តិ អប្បេកច្ចេ ឧទកមណិកំ បតិដ្ឋាបេន្តិ អប្បេកច្ចេ អាសនានិ បញ្ញាបេន្តិ។ កេណិយោបិ ជដិលោ សាមញ្ញេវ [ម. សាមំយេវ។] មណ្ឌលមាឡំ បដិយាទេតិ។

[២៣] តេន ខោ បន សមយេន សេលោ ព្រាហ្មណោ អាបណេ បដិវសតិ តិណ្ណំ វេទានំ បារគូ សនិឃណ្ឌុកេដុភានំ សាក្ខរប្បភេទានំ ឥតិហាសបញ្ចមានំ បទកោ វេយ្យាករណោ លោកាយតមហាបុរិសលក្ខណេសុ អនវយោ តីណិ មាណវកសតានិ មន្តេ វាចេតិ។ តេន ខោ បន សមយេន កេណិយោ ជដិលោ សេលេ ព្រាហ្មណេ អភិប្បសន្នោ ហោតិ។ អថខោ សេលោ ព្រាហ្មណោ តីហិ មាណវកសតេហិ បរិវុតោ ជង្ឃាវិហារំ អនុចង្កមមានោ អនុវិចរមានោ យេន កេណិយស្ស ជដិលស្ស អស្សមោ តេនុបសង្កមិ។ អទ្ទសា ខោ សេលោ ព្រាហ្មណោ កេណិយស្មឹ ជដិលេ [ម. កេណិយស្ស ជដិលស្ស អស្សមេតិ ទិស្សតិ។] អប្បេកច្ចេ ឧទ្ធនានិ ខនន្តេ អប្បេកច្ចេ កដ្ឋានិ ផាលេន្តេ អប្បេកច្ចេ ភាជនានិ ធោវន្តេ អប្បេកច្ចេ ឧទកមណិកំ បតិដ្ឋាបេន្តេ អប្បេកច្ចេ អាសនានិ បញ្ញាបេន្តេ កេណិយំ ជដិលំ សាមញ្ញេវ មណ្ឌលមាឡំ បដិយាទេន្តំ ទិស្វាន កេណិយំ ជដិលំ ឯតទវោច កឹ នុ ភោតោ កេណិយស្ស អាវាហោ វា ភវិស្សតិ វិវាហោ វា ភវិស្សតិ មហាយញ្ញោ វា បច្ចុបដ្ឋិតោ រាជា [ម. រាជា វា។] មាគធោ សេនិយោ ពិម្ពិសារោ និមន្តិតោ ស្វាតនាយ សទ្ធឹ ពលកាយេនាតិ។ ន មេ ភោ សេល [ម. សេលាតិ ន ទិស្សតិ។] អាវាហោ វា ភវិស្សតិ នបិ វិវាហោ វា ភវិស្សតិ នបិ រាជា មាគធោ សេនិយោ ពិម្ពិសារោ និមន្តិតោ ស្វាតនាយ សទ្ធឹ ពលកាយេន អបិច ខោ មេ មហាយញ្ញោ បច្ចុបដ្ឋិតោ អត្ថិ [ម. អត្ថិ ភោ។] សមណោ គោតមោ សក្យបុត្តោ សក្យកុលា បព្វជិតោ អង្គុត្តរាបេសុ ចារិកញ្ចរមានោ មហតា ភិក្ខុសង្ឃេន សទ្ធឹ អឌ្ឍតេលសេហិ ភិក្ខុសតេហិ អាបណំ អនុប្បត្តោ តំ ខោ បន ភវន្តំ គោតមំ ឯវំ កល្យាណោ កិត្តិសទ្ទោ អព្ភុគ្គតោ ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវាតិ សោ មេ និមន្តិតោ ស្វាតនាយ សទ្ធឹ ភិក្ខុសង្ឃេនាតិ។ ពុទ្ធោតិ ភោ កេណិយ វទេសីតិ។ ពុទ្ធោតិ ភោ សេល វទាមីតិ។ ពុទ្ធោតិ ភោ កេណិយ វទេសីតិ។ ពុទ្ធោតិ ភោ សេល វទាមីតិ។ អថខោ សេលស្ស ព្រាហ្មណស្ស ឯតទហោសិ ឃោសោបិ ខោ ឯសោ ទុល្លភោ លោកស្មឹ យទិទំ ពុទ្ធោតិ អាគតានិ ខោ បនម្ហាកំ មន្តេសុ ទ្វត្តឹស មហាបុរិសលក្ខណានិ យេហិ សមន្នាគតស្ស មហាបុរិសស្ស ទ្វេវ គតិយោ ភវន្តិ អនញ្ញា សចេ អគារំ អជ្ឈាវសតិ រាជា ហោតិ ចក្កវត្តិ ធម្មិកោ ធម្មរាជា ចាតុរន្តោ វិជិតាវី ជនបទត្ថាវរិយប្បត្តោ សត្តរតនសមន្នាគតោ តស្សិមានិ សត្ត រតនានិ ភវន្តិ សេយ្យថីទំ ចក្ករតនំ ហត្ថិរតនំ អស្សរតនំ មណិរតនំ ឥត្ថីរតនំ គហបតិរតនំ បរិណាយករតនមេវ សត្តមំ បរោសហស្សំ ខោ បនស្ស បុត្តា ភវន្តិ សូរា វីរង្គរូបា បរសេនប្បមទ្ទនា សោ ឥមំ បឋវឹ សាគរបរិយន្តំ អទណ្ឌេន អសត្ថេន ធម្មេន អភិវិជិយ អជ្ឈាវសតិ សចេ បន អគារស្មា អនគារិយំ បព្វជតិ អរហំ ហោតិ សម្មាសម្ពុទ្ធោ លោកេ វិវដច្ឆទោ កហំ បន ភោ កេណិយ ឯតរហិ សោ ភវំ គោតមោ វិហរតិ អរហំ សម្មាសម្ពុទ្ធោតិ។

[២៤] ឯវំ វុត្តេ កេណិយោ ជដិលោ ទក្ខិណំ ពាហំ បគ្គហេត្វា សេលំ ព្រាហ្មណំ ឯតទវោច យេនេសា ភោ សេល នីលវនរាជីតិ។ អថខោ សេលោ ព្រាហ្មណោ តីហិ មាណវកសតេហិ សទ្ធឹ យេន ភគវា តេនុបសង្កមិ។ អថខោ សេលោ ព្រាហ្មណោ តេ មាណវកេ អាមន្តេសិ អប្បសទ្ទា ភោន្តោ អាគច្ឆន្តុ បទេ បទំ និក្ខិបន្តា ទុរា សទា ហិ តេ ភវន្តោ សីហាវ ឯកចរា យទា ចាហំ ភោតា សមណេន គោតមេន សទ្ធឹ មន្តេយ្យំ មា មេ ភោន្តោ [ម. ភោន្តោបិ។] អន្តរន្តរា កថំ ឱបាតេថ កថាបរិយោសានំ ច [ម. ចសទ្ទោ នត្ថិ។] មេ ភវន្តោ អាគមេន្តូតិ។ អថខោ សេលោ ព្រាហ្មណោ យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ សេលោ ព្រាហ្មណោ ភគវតោ កាយេ ទ្វត្តឹស មហាបុរិសលក្ខណានិ សម្មន្នេសិ។ អទ្ទសា ខោ សេលោ ព្រាហ្មណោ ភគវតោ កាយេ ទ្វត្តឹស មហាបុរិសលក្ខណានិ យេភុយ្យេន ឋបេត្វា ទ្វេ ទ្វីសុ មហាបុរិសលក្ខណេសុ កង្ខតិ វិចិកិច្ឆតិ នាធិមុច្ចតិ ន សំបសីទតិ កោសោហិតេ ច វត្ថគុយ្ហេ បហុតជិវ្ហតាយ ច។

[២៥] អថខោ ភគវតោ ឯតទហោសិ បស្សតិ ខោ មេ អយំ សេលោ ព្រាហ្មណោ ទ្វត្តឹស មហាបុរិសលក្ខណានិ យេភុយ្យេន ឋបេត្វា ទ្វេ ទ្វីសុ មហាបុរិសលក្ខណេសុ កង្ខតិ វិចិកិច្ឆតិ នាធិមុច្ចតិ ន សំបសីទតិ កោសោហិតេ ច វត្ថគុយ្ហេ បហុតជិវ្ហតាយ ចាតិ។ អថខោ ភគវា តថារូបំ ឥទ្ធាភិសង្ខារំ អភិសង្ខារេសិ យថា អទ្ទស សេលោ ព្រាហ្មណោ ភគវតោ កោសោហិតំ វត្ថគុយ្ហំ។ អថខោ ភគវា ជិវ្ហំ និន្នាមេត្វា ឧភោបិ កណ្ណសោតានិ អនុមសិ បដិមសិ ឧភោបិ នាសិកសោតានិ អនុមសិ បដិមសិ កេវលកប្បំ នលាដមណ្ឌលំ ជិវ្ហាយ ឆាទេសិ។

[២៦] អថខោ សេលស្ស ព្រាហ្មណស្ស ឯតទហោសិ សមន្នាគតោ ខោ សមណោ គោតមោ ទ្វត្តឹសមហាបុរិសលក្ខណេហិ បរិបុណ្ណេហិ នោ អបរិបុណ្ណេហិ នោ ច ខោ នំ ជានាមិ ពុទ្ធោ វា នោ វា សុតំ បន មេតំ ព្រាហ្មណានំ វុឌ្ឍានំ [ម. ខោ បន។] មហល្លកានំ អាចរិយប្បាចរិយានំ ភាសមានានំ យេ តេ ភវន្តិ អរហន្តោ សម្មាសម្ពុទ្ធា តេ សកេ វណ្ណេ ភញ្ញមានេ អត្តានំ បាតុករោន្តីតិ [ម. តិសទ្ទោ នត្ថិ។] យន្នូនាហំ សមណំ គោតមំ សម្មុខា សារុប្បាហិ គាថាហិ អភិត្ថវេយ្យន្តិ។ អថខោ សេលោ ព្រាហ្មណោ ភគវន្តំ សម្មុខា សារុប្បាហិ គាថាហិ អភិត្ថវិ

បរិបុណ្ណកាយោ សុរុចី សុជាតោ ចារុទស្សនោ

សុវណ្ណវណ្ណោសិ ភគវា សុសុក្កទាឋោ សវីរិយវា [ម. វីរិយវា។]

នរស្ស ហិ សុជាតស្ស យេ ភវន្តិ វិសុញ្ជនា [ម. វិយញ្ជនា។]

សព្វេ តេ តវ កាយស្មឹ មហាបុរិសលក្ខណា

បសន្ននេត្តោ សុមុខោ ព្រហ្មា ឧជុ បតាបវា

មជ្ឈេ សមណសង្ឃស្ស អាទិច្ចោវ វិរោចសិ

កល្យាណទស្សនោ ភិក្ខុ កញ្ចនសន្និភត្តចោ

កឹ តេ សមណភាវេន ឯវំ ឧត្តមវណ្ណិនោ

រាជា អរហសិ ភវិតុំ ចក្កវត្តិ រថេសភោ

ចាតុរន្តោ វិជិតាវី ជម្ពុសណ្ឌស្ស [ម. ជម្ពុមណ្ឌស្ស។] ឥស្សរោ

ខត្តិយា ភោជរាជានោ [ម. ភោគិរាជានោ។] អនុយុត្តា ភវន្តុ តេ

រាជាភិរាជា មនុជិន្ទោ រជ្ជំ ការេហិ គោតម [ម. ការេថ គោតមំ។]

រាជាហមស្មិ សេលាតិ (ភគវា) ធម្មរាជា អនុត្តរោ

ធម្មេន ចក្កំ វត្តេមិ ចក្កំ អប្បដិវត្តិយំ

សម្ពុទ្ធោ បដិជានាសិ (ឥតិ សេលោ ព្រាហ្មណោ) ធម្មរាជា អនុត្តរោ

ធម្មេន ចក្កំ វត្តេមិ ឥតិ ភាសសិ គោតម

កោ នុ សេនាបតិ ភោតោ សាវកោ សត្ថុ ទន្វយោ

កោ នោមំ អនុវត្តេតិ ធម្មចក្កំ បវត្តិតំ

មយា បវត្តិតំ ចក្កំ (សេលាតិ ភគវា) ធម្មចក្កំ អនុត្តរំ

សារីបុត្តោ អនុវត្តេតិ អនុជាតោ តថាគតំ

អភិញ្ញេយ្យំ អភិញ្ញាតំ ភាវេតព្វញ្ច ភាវិតំ

បហាតព្វំ បហីនំ មេ តស្មា ពុទ្ធោស្មិ ព្រាហ្មណ

វិនយស្សុ មយិ កង្ខំ អធិមុច្ចស្សុ ព្រាហ្មណ

ទុល្លភំ ទស្សនំ ហោតិ សម្ពុទ្ធានំ អភិណ្ហសោ

យេសំ វេ ទុល្លភោ លោកេ បាតុភាវោ អភិណ្ហសោ

សោហំ ព្រាហ្មណ សម្ពុទ្ធោ សល្លកត្តោ អនុត្តរោ

ព្រហ្មភូតោ អតិតុលោ មារសេនប្បមទ្ទនោ

សព្វាមិត្តេ វសីកត្វា មោទាមិ អកុតោភយោ

ឥមំ ភោន្តោ និសាមេថ យថា ភាសតិ ចក្ខុមា

សល្លកត្តោ មហាវីរោ សីហោវ នទតី វនេ

ព្រហ្មភូតំ អតិតុលំ មារសេនប្បមទ្ទនំ

កោ ទិស្វា នប្បសីទេយ្យ អបិ កណ្ហាភិជាតិកោ

យោ មំ ឥច្ឆតិ អន្វេតុ យោ ច និច្ឆតិ គច្ឆតុ

ឥធាហំ បព្វជិស្សាមិ វរប្បញ្ញស្ស សន្តិកេ

ឯវញ្ចេ រុច្ចតិ ភោតោ សម្មាសម្ពុទ្ធសាសនំ

មយំបិ បព្វជិស្សាម វរប្បញ្ញស្ស សន្តិកេ

ព្រាហ្មណា តិសតា ឥមេ យាចន្តិ បញ្ជលីកតា

ព្រហ្មចរិយំ ចរិស្សាម ភគវា តវ សន្តិកេ

ស្វាក្ខាតំ ព្រហ្មចរិយំ (សេលាតិ ភគវា) សន្ទិដ្ឋិកមកាលិកំ

យត្ថ អមោឃា បព្វជ្ជា អប្បមត្តស្ស សិក្ខតោតិ។

អលត្ថ ខោ សេលោ ព្រាហ្មណោ សបរិសោ ភគវតោ សន្តិកេ បព្វជ្ជំ អលត្ថ ឧបសម្បទំ។

[២៧] អថខោ កេណិយោ ជដិលោ តស្សា រត្តិយា អច្ចយេន សកេ អស្សមេ បណីតំ ខាទនីយំ ភោជនីយំ បដិយាទាបេត្វា ភគវតោ កាលំ អារោចាបេសិ កាលោ ភោ គោតម និដ្ឋិតំ ភត្តន្តិ។ អថខោ ភគវា បុព្វណ្ហសមយំ និវាសេត្វា បត្តចីវរមាទាយ យេន កេណិយស្ស ជដិលស្ស អស្សមោ តេនុប្បសង្កមិ ឧបសង្កមិត្វា បញ្ញត្តេ អាសនេ និសីទិ សទ្ធឹ ភិក្ខុសង្ឃេន។ អថខោ កេណិយោ ជដិលោ ពុទ្ធប្បមុខំ ភិក្ខុសង្ឃំ បណីតេន ខាទនីយេន ភោជនីយេន សហត្ថា សន្តប្បេសិ សម្បវារេសិ។ អថខោ កេណិយោ ជដិលោ ភគវន្តំ ភុត្តាវឹ ឱនីតបត្តបាណឹ អញ្ញតរំ នីចំ អាសនំ គហេត្វា ឯកមន្តំ និសីទិ។

[២៨] ឯកមន្តំ និសិន្នំ ខោ កេណិយំ ជដិលំ ភគវា ឥមាហិ គាថាហិ អនុមោទិ

អគ្គិហុត្តមុខា យញ្ញា សាវិត្តិ ឆន្ទសោ មុខំ

រាជា មុខំ មនុស្សានំ នទីនំ សាគរោ មុខំ

នក្ខត្តានំ មុខំ ចន្ទោ អាទិច្ចោ តបតំ មុខំ

បុញ្ញមាកង្ខមានានំ សង្ឃោ វេ យជតំ មុខន្តិ។

អថខោ ភគវា កេណិយំ ជដិលំ ឥមាហិ គាថាហិ អនុមោទិត្វា ឧដ្ឋាយាសនា បក្កាមិ។ អថខោ អាយស្មា សេលោ សបរិសោ វូបកដ្ឋោ អប្បមត្តោ អាតាបី បហិតត្តោ វិហរន្តោ នចិរស្សេវ យស្សត្ថាយ កុលបុត្តា សម្មទេវ អគារស្មា អនគារិយំ បព្វជន្តិ តទនុត្តរំ ព្រហ្មចរិយបរិយោសានំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហាសិ ខីណា ជាតិ វុសិតំ ព្រហ្មចរិយំ កតំ ករណីយំ នាបរំ ឥត្ថត្តាយាតិ អព្ភញ្ញាសិ។ អញ្ញតរោ ខោ បនាយស្មា សេលោ សបរិសោ អរហតំ អហោសិ។

[២៩] អថខោ អាយស្មា សេលោ សបរិសោ យេន ភគវា តេនុបសង្កមិ ឧបសង្កមិត្វា ឯកំសំ ចីវរំ កត្វា យេន ភគវា តេនញ្ជលិម្បណាមេត្វា ភគវន្តំ គាថាហិ អជ្ឈភាសិ

យន្តំ សរណមាគម្ហ [ម. សរណមាគម្ម។] ឥតោ អដ្ឋមិ ចក្ខុម

សត្តរត្តេន ភគវា ទន្តម្ហា តវ សាសនេ

តុវំ ពុទ្ធោ តុវំ សត្ថា តុវំ មារាភិភូ មុនិ

តុវំ អនុសយេ ឆេកោ តិណ្ណោ តារេសិមំ បជំ

ឧបធី តេ សមតិក្កន្តា អាសវា តេ បទាលិតា

សីហោវ អនុបាទានោ បហីនភយភេរវោ

ភិក្ខវោ តិសតា ឥមេ តិដ្ឋន្តិ បញ្ជលីកតា

បាទេ វីរ បសារេហិ នាគា វន្ទន្តុ សត្ថុនោតិ។

សេលសុត្តំ ទុតិយំ និដ្ឋិតំ។

តតិយំ អស្សលាយនសុត្តំ

[៣០] ឯវមេ្ម សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តេន ខោ បន សមយេន នានាវេរជ្ជកានំ ព្រាហ្មណានំ បញ្ចមត្តានិ ព្រាហ្មណសតានិ សាវត្ថិយំ បដិវសន្តិ កេនចិទេវ ករណីយេន។ អថខោ តេសំ ព្រាហ្មណានំ ឯតទហោសិ អយំ ខោ សមណោ គោតមោ ចាតុវណ្ណឹ សុទ្ធឹ បញ្ញាបេតិ កោ នុ ខោ បហោតិ សមណេន គោតមេន សទ្ធឹ អស្មឹ វចនេ បដិមន្តេតុន្តិ។ តេន ខោ បន សមយេន អស្សលាយនោ នាម មាណវោ សាវត្ថិយំ បដិវសតិ ទហរោ វុត្តសិរោ សោឡសវស្សុទ្ទេសិកោ ជាតិយា តិណ្ណំ វេទានំ បារគូ សនិឃណ្ឌុកេដុភានំ សាក្ខរប្បភេទានំ ឥតិហាសបញ្ចមានំ បទកោ វេយ្យាករណោ លោកាយតមហាបុរិសលក្ខណេសុ អនវយោ។ អថខោ តេសំ ព្រាហ្មណានំ ឯតទហោសិ អយំ ខោ អស្សលាយនោ មាណវោ សាវត្ថិយំ បដិវសតិ ទហរោ។បេ។ អនវយោ សោ ខោ បហោតិ សមណេន គោតមេន សទ្ធឹ អស្មឹ វចនេ បដិមន្តេតុន្តិ។

[៣១] អថខោ តេ ព្រាហ្មណា យេន អស្សលាយនោ មាណវោ តេនុបសង្កមឹសុ ឧបសង្កមិត្វា អស្សលាយនំ មាណវំ ឯតទវោចុំ អយំ ភោ អស្សលាយន សមណោ គោតមោ ចាតុវណ្ណឹ សុទ្ធឹ បញ្ញាបេតិ ឯតុ ភវំ អស្សលាយន [ឱ.ម. អស្សលាយនោ។] សមណេន គោតមេន សទ្ធឹ អស្មឹ វចនេ បដិមន្តេតូតិ [ឱ.ម. បដិមន្តេតុន្តិ។]។ ឯវំ វុត្តេ អស្សលាយនោ មាណវោ តេ ព្រាហ្មណេ ឯតទវោច សមណោ ខលុ ភោ គោតមោ ធម្មវាទី ធម្មវាទិនោ ច បន ទុប្បដិមន្តិយា ភវន្តិ នាហំ សក្កោមិ សមណេន គោតមេន សទ្ធឹ អស្មឹ វចនេ បដិមន្តេតុន្តិ។ ទុតិយម្បិ ខោ តេ [ឱ. តេតិ បទំ ន ទិស្សតិ។] ព្រាហ្មណា អស្សលាយនំ មាណវំ ឯតទវោចុំ អយំ ភោ អស្សលាយន សមណោ គោតមោ ចាតុវណ្ណឹ សុទ្ធឹ បញ្ញាបេតិ ឯតុ ភវំ អស្សលាយន [ឱ.ម. អស្សលាយនោ។] សមណេន គោតមេន សទ្ធឹ អស្មឹ វចនេ បដិមន្តេតូតិ [ឱ.ម. បដិមន្តេតុ។ ឱ.ម. ចរិតំ ខោ បន ភោតា អស្សលាយនេន បរិព្វាជកន្តីតិ អតិរេកបាឋា ទិស្សន្តិ។]។ ទុតិយម្បិ ខោ អស្សលាយនោ មាណវោ តេ ព្រាហ្មណេ ឯតទវោច សមណោ ខលុ ភោ គោតមោ ធម្មវាទី ធម្មវាទិនោ ច បន ទុប្បដិមន្តិយា ភវន្តិ នាហំ សក្កោមិ សមណេន គោតមេន សទ្ធឹ អស្មឹ វចនេ បដិមន្តេតុន្តិ។ តតិយម្បិ ខោ តេ ព្រាហ្មណា អស្សលាយនំ មាណវំ ឯតទវោចុំ អយំ ភោ អស្សលាយន សមណោ គោតមោ ចាតុវណ្ណឹ សុទ្ធឹ បញ្ញាបេតិ ឯតុ ភវំ អស្សលាយន [ម. អស្សលាយនោ។] សមណេន គោតមេន សទ្ធឹ អស្មឹ វចនេ បដិមន្តេតុ [ឱ.ម. បដិមន្តេតុំ។] ចរិតំ ខោ បន ភោតា អស្សលាយនេន បរិព្វាជកំ មា ភវំ អស្សលាយនោ អយុទ្ធបរាជិតំ បរាជយីតិ។ ឯវំ វុត្តេ អស្សលាយនោ មាណវោ តេ ព្រាហ្មណេ ឯតទវោច អទ្ធា ខោ អហំ ភន្តេ ន លភាមិ សមណោ ខលុ ភោ គោតមោ ធម្មវាទី ធម្មវាទិនោ ច បន ទុប្បដិមន្តិយា ភវន្តិ នាហំ សក្កោមិ សមណេន គោតមេន សទ្ធឹ អស្មឹ វចនេ បដិមន្តេតុំ អបិចាហំ ភវតំ [ឱ.ម. ភវន្តានំ។] វចនេន គមិស្សាមីតិ។

[៣២] អថខោ អស្សលាយនោ មាណវោ មហតា [ម. មហតិយា។] ព្រាហ្មណគណេន សទ្ធឹ យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ អស្សលាយនោ មាណវោ ភគវន្តំ ឯតទវោច ព្រាហ្មណា ភោ គោតម ឯវមាហំសុ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ ព្រាហ្មណា វ សុក្កោ វណ្ណោ កណ្ហោ អញ្ញោ វណ្ណោ ព្រាហ្មណា វ សុជ្ឈន្តិ នោ អព្រាហ្មណា ព្រាហ្មណា វ ព្រហ្មុនោ បុត្តា ឱរសា មុខតោ ជាតា ព្រហ្មជា ព្រហ្មនិម្មិតា ព្រហ្មទាយាទាតិ ឥធ ភវំ គោតមោ កិមាហាតិ។

[៣៣] ទិស្សន្តេ [ឱ.ម. ទិស្សន្តិ។] ខោ បន អស្សលាយន ព្រាហ្មណានំ ព្រាហ្មណិយោ ឧតុនិយោបិ គព្ភិនិយោបិ វិជ្ជាយមានាបិ បាយមានាបិ តេ ច ព្រាហ្មណា យោនិជា វ សមានា ឯវមាហំសុ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ ព្រាហ្មណា វ សុក្កោ វណ្ណោ កណ្ហោ អញ្ញោ វណ្ណោ ព្រាហ្មណា វ សុជ្ឈន្តិ នោ អព្រាហ្មណា ព្រាហ្មណា វ ព្រហ្មុនោ បុត្តា ឱរសា មុខតោ ជាតា ព្រហ្មជា ព្រហ្មនិម្មិតា ព្រហ្មទាយាទាតិ។ កិញ្ចាបិ ភវំ គោតមោ ឯវមាហ អថខ្វេត្ថ [ឱ. អថខោ។] ព្រាហ្មណា ឯវមេតំ មញ្ញន្តិ ព្រាហ្មណា វ សេដ្ឋោ វណ្ណា។បេ។ ព្រហ្មទាយាទាតិ។

[៣៤] តំ កឹ មញ្ញសិ អស្សលាយន សុតន្តេ យោនកកម្ពោជេសុ [ឱ.ម. យោនកម្ពោជេសុ។] អញ្ញេសុ ច បច្ចន្តិមេសុ ជនបទេសុ ទ្វេវ វណ្ណា អយ្យោ ចេវ ទាសោ ច អយ្យោ ហុត្វា ទាសោ ហោតិ ទាសោ ហុត្វា អយ្យោ ហោតីតិ។ ឯវំ ភោ សុតំ [ម. សុតំ តំ។] មេ យោនកកម្ពោជេសុ អញ្ញេសុ ច បច្ចន្តិមេសុ ជនបទេសុ ទ្វេវ វណ្ណា អយ្យោ ចេវ ទាសោ ច អយ្យោ ហុត្វា ទាសោ ហោតិ ទាសោ ហុត្វា អយ្យោ ហោតីតិ។ ឯត្ថ អស្សលាយន ព្រាហ្មណានំ កឹ ពលំ កោ អស្សាសោ យទេត្ថ ព្រាហ្មណា ឯវមាហំសុ ព្រាហ្មណា សេដ្ឋោ វណ្ណោ ហីនោ អញ្ញោ វណ្ណោ។បេ។ ព្រហ្មទាយាទាតិ។ កិញ្ចាបិ ភវំ គោតមោ ឯវមាហ អថខ្វេត្ថ ព្រាហ្មណា ឯវមេតំ មញ្ញន្តិ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ។បេ។ ព្រហ្មទាយាទាតិ។

[៣៥] តំ កឹ មញ្ញសិ អស្សលាយន ខត្តិយោ វ នុ ខោ បាណាតិបាតី អទិន្នាទាយី កាមេសុមិច្ឆាចារី មុសាវាទី បិសុណវាចោ ផរុសវាចោ សម្ផប្បលាបី អភិជ្ឈាលុ ព្យាបន្នចិត្តោ មិច្ឆាទិដ្ឋី កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជេយ្យ នោ ព្រាហ្មណោ វេស្សោ វ នុ ខោ… សុទ្ទោ វ [ឱ. ច។] នុ ខោ បាណាតិបាតី អទិន្នាទាយី កាមេសុមិច្ឆាចារី មុសាវាទី បិសុណវាចោ ផរុសវាចោ សម្ផប្បលាបី អភិជ្ឈាលុ ព្យាបន្នចិត្តោ មិច្ឆាទិដ្ឋី កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជេយ្យ នោ ព្រាហ្មណោតិ។ នោ ហិទំ ភោ គោតម ខត្តិយោបិ ហិ ភោ គោតម បាណាតិបាតី អទិន្នាទាយី កាមេសុមិច្ឆាចារី មុសាវាទី បិសុណវាចោ ផរុសវាចោ សម្ផប្បលាបី អភិជ្ឈាលុ ព្យាបន្នចិត្តោ មិច្ឆាទិដ្ឋី កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជេយ្យ ព្រាហ្មណោបិ ហិ ភោ គោតម… វេស្សោបិ ហិ ភោ គោតម… សុទ្ទោបិ ហិ ភោ គោតម… សព្វេបិ ហិ ភោ គោតម ចត្តារោ វណ្ណា បាណាតិបាតិនោ អទិន្នាទាយិនោ កាមេសុមិច្ឆាចារិនោ មុសាវាទិនោ បិសុណវាចា ផរុសវាចា សម្ផប្បលាបិនោ អភិជ្ឈាលូ ព្យាបន្នចិត្តា មិច្ឆាទិដ្ឋី [ឱ. មិច្ឆាទិដ្ឋិនោ។] កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជេយ្យុន្តិ។ ឯត្ថ អស្សលាយន ព្រាហ្មណានំ កឹ ពលំ កោ អស្សាសោ យទេត្ថ ព្រាហ្មណា ឯវមាហំសុ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ។បេ។ ព្រហ្មទាយាទាតិ។ កិញ្ចាបិ ភវំ គោតមោ ឯវមាហ អថខ្វេត្ថ ព្រាហ្មណា ឯវមេតំ មញ្ញន្តិ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ។បេ។ ព្រហ្មទាយាទាតិ។

[៣៦] តំ កឹ មញ្ញសិ អស្សលាយន ព្រាហ្មណោ វ នុ ខោ បាណាតិបាតា បដិវិរតោ អទិន្នាទានា បដិវិរតោ កាមេសុមិច្ឆាចារា បដិវិរតោ មុសាវាទា បដិវិរតោ បិសុណាយ វាចាយ បដិវិរតោ ផរុសាយ វាចាយ បដិវិរតោ សម្ផប្បលាបា បដិវិរតោ អនភិជ្ឈាលុ អព្យាបន្នចិត្តោ សម្មាទិដ្ឋី កាយស្ស ភេទា បរម្មរណា សុគតឹ សគ្គំ លោកំ ឧបបជ្ជេយ្យ នោ ខត្តិយោ នោ វេស្សោ នោ សុទ្ទោតិ។ នោ ហិទំ ភោ គោតម ខត្តិយោបិ ហិ ភោ គោតម បាណាតិបាតា បដិវិរតោ អទិន្នាទានា បដិវិរតោ កាមេសុមិច្ឆាចារា បដិវិរតោ មុសាវាទា បដិវិរតោ បិសុណាយ វាចាយ បដិវិរតោ ផរុសាយ វាចាយ បដិវិរតោ សម្ផប្បលាបា បដិវិរតោ អនភិជ្ឈាលុ អព្យាបន្នចិត្តោ សម្មាទិដ្ឋី កាយស្ស ភេទា បរម្មរណា សុគតឹ សគ្គំ លោកំ ឧបបជ្ជេយ្យ ព្រាហ្មណោបិ ហិ ភោ គោតម… វេស្សោបិ ហិ ភោ គោតម… សុទ្ទោបិ ហិ ភោ គោតម… សព្វេបិ ហិ ភោ គោតម ចត្តារោ វណ្ណា បាណាតិបាតា បដិវិរតា អទិន្នាទានា បដិវិរតា កាមេសុមិច្ឆាចារា បដិវិរតា មុសាវាទា បដិវិរតា បិសុណាយ វាចាយ បដិវិរតា ផរុសាយ វាចាយ បដិវិរតា សម្ផប្បលាបា បដិវិរតា អនភិជ្ឈាលូ អព្យាបន្នចិត្តា សម្មាទិដ្ឋី កាយស្ស ភេទា បរម្មរណា សុគតឹ សគ្គំ លោកំ ឧបបជ្ជេយ្យុន្តិ។ ឯត្ថ អស្សលាយន ព្រាហ្មណានំ កឹ ពលំ កោ អស្សាសោ យទេត្ថ ព្រាហ្មណា ឯវមាហំសុ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ។បេ។ ព្រហ្មទាយាទាតិ។ កិញ្ចាបិ ភវំ គោតមោ ឯវមាហ អថខ្វេត្ថ ព្រាហ្មណា ឯវមេតំ មញ្ញន្តិ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ។បេ។ ព្រហ្មទាយាទាតិ។

[៣៧] តំ កឹ មញ្ញសិ អស្សលាយន ព្រាហ្មណោ វ នុ ខោ បហោតិ អស្មឹ បទេសេ អវេរំ អព្យាបជ្ឈំ មេត្តចិត្តំ ភាវេតុំ នោ ខត្តិយោ នោ វេស្សោ នោ សុទ្ទោតិ។ នោ ហិទំ ភោ គោតម ខត្តិយោបិ ហិ ភោ គោតម បហោតិ អស្មឹ បទេសេ អវេរំ អព្យាបជ្ឈំ មេត្តចិត្តំ ភាវេតុំ ព្រាហ្មណោបិ ហិ ភោ គោតម… វេស្សោបិ ហិ ភោ គោតម… សុទ្ទោបិ ហិ ភោ គោតម… សព្វេបិ ហិ ភោ គោតម ចត្តារោ វណ្ណា បហោន្តិ អស្មឹ បទេសេ អវេរំ អព្យាបជ្ឈំ មេត្តចិត្តំ ភាវេតុន្តិ។ ឯត្ថ អស្សលាយន ព្រាហ្មណានំ កឹ ពលំ កោ អស្សាសោ យទេត្ថ ព្រាហ្មណា ឯវមាហំសុ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ។បេ។ ព្រហ្មទាយាទាតិ។ កិញ្ចាបិ ភវំ គោតមោ ឯវមាហ អថខ្វេត្ថ ព្រាហ្មណា ឯវមេតំ មញ្ញន្តិ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ។បេ។ ព្រហ្មទាយាទាតិ។

[៣៨] តំ កឹ មញ្ញសិ អស្សលាយន ព្រាហ្មណោ វ នុ ខោ បហោតិ សោត្តឹ សិនានំ [ឱ. សោត្ថឹ សិនានឹ។ ម. សោត្តិ សិនានិ។] អាទាយ នទឹ គន្ត្វា រជោជល្លំ បវាហេតុំ នោ ខត្តិយោ នោ វេស្សោ នោ សុទ្ទោតិ។ នោ ហិទំ ភោ គោតម ខត្តិយោបិ ហិ ភោ គោតម បហោតិ សោត្តឹ សិនានំ អាទាយ នទឹ គន្ត្វា រជោជល្លំ បវាហេតុំ ព្រាហ្មណោបិ ហិ ភោ គោតម… វេស្សោបិ ហិ ភោ គោតម… សុទ្ទោបិ ហិ ភោ គោតម… សព្វេបិ ហិ ភោ គោតម ចត្តារោ វណ្ណា បហោន្តិ សោត្តឹ សិនានំ អាទាយ នទឹ គន្ត្វា រជោជល្លំ បវាហេតុន្តិ។ ឯត្ថ អស្សលាយន ព្រាហ្មណានំ កឹ ពលំ កោ អស្សាសោ យទេត្ថ ព្រាហ្មណា ឯវមាហំសុ ព្រាហ្មណោ វ សេដ្ឋោ វណ្ណោ ហីនោ អញ្ញោ វណ្ណោ។បេ។ ព្រហ្មទាយាទាតិ។ កិញ្ចាបិ ភវំ គោតមោ ឯវមាហ អថខ្វេត្ថ ព្រាហ្មណា ឯវមេតំ មញ្ញន្តិ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ។បេ។ ព្រហ្មទាយាទាតិ។

[៣៩] តំ កឹ មញ្ញសិ អស្សលាយន ឥធ រាជា ខត្តិយោ មុទ្ធាវសិត្តោ នានាជច្ចានំ បុរិសានំ បុរិសសតំ សន្និបាតេយ្យ អាយន្តុ ភោន្តោ យេ តត្ថ ខត្តិយកុលា ព្រាហ្មណកុលា រាជញ្ញកុលា ឧប្បន្នា សាកស្ស វា [ឱ. សាកស្ស វាតិ ន ទិស្សតិ។] សាលស្ស វា សលឡស្ស វា ចន្ទនស្ស វា បទុមកស្ស វា ឧត្តរារណឹ អាទាយ អគ្គឹ អភិនិព្វត្តេន្តុ តេជោ បាតុករោន្តុ អាយន្តុ បន ភោន្តោ យេ ច [ឱ. ចសទ្ទោ នត្ថិ។] តត្ថ ចណ្ឌាលកុលា នេសាទកុលា វេណុកុលា [ឱ. វេណកុលា។] រថការកុលា បុក្កុសកុលា ឧប្បន្នា សាបានទោណិយា វា សូករទោណិយា វា រជកទោណិយា វា ឯលណ្ឌកដ្ឋស្ស វា ឧត្តរារណឹ អាទាយ អគ្គឹ អភិនិព្វត្តេន្តុ តេជោ បាតុករោន្តូតិ តំ កឹ មញ្ញសិ អស្សលាយន យោ ច នុ ខោ [ឱ. ឯវន្នុ ខោ សោតិ ទិស្សតិ។] ខត្តិយកុលា ព្រាហ្មណកុលា រាជញ្ញកុលា ឧប្បន្នេហិ សាកស្ស វា សាលស្ស វា សលឡស្ស វា ចន្ទនស្ស វា បទុមកស្ស វា ឧត្តរារណឹ អាទាយ អគ្គិ អភិនិព្វត្តោ តេជោ បាតុកតោ សោ ឯវ នុ ខ្វស្ស អគ្គិ អច្ចិមា ចេវ [ឱ. ច។] វណ្ណិមា ច បភស្សរោ ច តេន ច សក្កា អគ្គិនា អគ្គិករណីយំ កាតុំ យោ បន សោ ចណ្ឌាលកុលា នេសាទកុលា វេណុកុលា រថការកុលា បុក្កុសកុលា ឧប្បន្នេហិ សាបានទោណិយា វា សូករទោណិយា វា រជកទោណិយា វា ឯលណ្ឌកដ្ឋស្ស វា ឧត្តរារណឹ អាទាយ អគ្គិ អភិនិព្វត្តោ តេជោ បាតុកតោ ស្វាស្ស អគ្គិ ន ចេវ អច្ចិមា ន ច វណ្ណិមា ន ច បភស្សរោ ន ច តេន សក្កា អគ្គិនា អគ្គិករណីយំ កាតុន្តិ។ នោ ហិទំ ភោ គោតម យោបិ [ឱ. បិសទ្ទោ នត្ថិ។] សោ ភោ គោតម ខត្តិយកុលា ព្រាហ្មណកុលា រាជញ្ញកុលា ឧប្បន្នេហិ សាកស្ស វា សាលស្ស វា សលឡស្ស វា ចន្ទនស្ស វា បទុមកស្ស វា ឧត្តរារណឹ អាទាយ អគ្គិ អភិនិព្វត្តោ តេជោ បាតុកតោ ស្វាស្ស អគ្គិ អច្ចិមា ចេវ វណ្ណិមា ច បភស្សរោ ច តេន ច សក្កា អគ្គិនា អគ្គិករណីយំ កាតុំ យោបិ សោ ចណ្ឌាលកុលា នេសាទកុលា វេណុកុលា រថការកុលា បុក្កុសកុលា ឧប្បន្នេហិ សាបានទោណិយា វា សូករទោណិយា វា រជកទោណិយា វា ឯលណ្ឌកដ្ឋស្ស វា ឧត្តរារណឹ អាទាយ អគ្គិ អភិនិព្វត្តោ តេជោ បាតុកតោ សោបស្ស [ឱ. ច។] អគ្គិ អច្ចិមា ច វណ្ណិមា ច បភស្សរោ ច តេនបិ ច សក្កា អគ្គិនា អគ្គិករណីយំ កាតុំ សព្វោបិ ហិ ភោ គោតម អគ្គិ អច្ចិមា ច វណ្ណិមា ច បភស្សរោ ច សព្វេនបិ ច សក្កា អគ្គិនា អគ្គិករណីយំ កាតុន្តិ។ ឯត្ថ អស្សលាយន ព្រាហ្មណានំ កឹ ពលំ កោ អស្សាសោ យទេត្ថ ព្រាហ្មណា ឯវមាហំសុ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ ព្រាហ្មណា វ សុក្កោ វណ្ណោ កណ្ហោ អញ្ញោ វណ្ណោ ព្រាហ្មណា វ សុជ្ឈន្តិ នោ អព្រាហ្មណា ព្រាហ្មណា វ ព្រហ្មុនោ បុត្តា ឱរសា មុខតោ ជាតា ព្រហ្មជា ព្រហ្មនិម្មិតា ព្រហ្មទាយាទាតិ។ កិញ្ចាបិ ភវំ គោតមោ ឯវមាហ អថខ្វេត្ថ ព្រាហ្មណា ឯវមេតំ មញ្ញន្តិ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ។បេ។ ព្រហ្មទាយាទាតិ។

[៤០] តំ កឹ មញ្ញសិ អស្សលាយន ឥធ ខត្តិយកុមារោ ព្រាហ្មណកញ្ញាយ សទ្ធឹ សំវាសំ កប្បេយ្យ តេសំ សំវាសមន្វាយ បុត្តោ ជាយេថ យោ សោ ខត្តិយកុមារេន ព្រាហ្មណកញ្ញាយ បុត្តោ ឧប្បន្នោ សិយា សោ មាតុបិ សទិសោ បិតុបិ សទិសោ ខត្តិយោតិបិ វត្តព្វោ ព្រាហ្មណោតិបិ វត្តព្វោតិ។ យោ សោ ភោ គោតម ខត្តិយកុមារេន ព្រាហ្មណកញ្ញាយ បុត្តោ ឧប្បន្នោ សិយា សោ មាតុបិ សទិសោ បិតុបិ សទិសោ ខត្តិយោតិបិ វត្តព្វោ ព្រាហ្មណោតិបិ វត្តព្វោតិ។

[៤១] តំ កឹ មញ្ញសិ អស្សលាយន ឥធ ព្រាហ្មណកុមារោ ខត្តិយកញ្ញាយ សទ្ធឹ សំវាសំ កប្បេយ្យ តេសំ សំវាសមន្វាយ បុត្តោ ជាយេថ យោ សោ ព្រាហ្មណកុមារេន ខត្តិយកញ្ញាយ បុត្តោ ឧប្បន្នោ សិយា សោ មាតុបិ សទិសោ បិតុបិ សទិសោ ខត្តិយោតិបិ វត្តព្វោ ព្រាហ្មណោតិបិ វត្តព្វោតិ។ យោ សោ ភោ គោតម ព្រាហ្មណកុមារេន ខត្តិយកញ្ញាយ បុត្តោ ឧប្បន្នោ សិយា សោ មាតុបិ សទិសោ បិតុបិ សទិសោ ខត្តិយោតិបិ វត្តព្វោ ព្រាហ្មណោតិបិ វត្តព្វោតិ។

[៤២] តំ កឹ មញ្ញសិ អស្សលាយន ឥធ វលវំ គទ្រភេន សម្បយោជេយ្យុំ តេសំ សម្បយោគមន្វាយ កិស្សរោ [ឱ. កិសោរោ។] ជាយេថ យោ សោបិ [ឱ. អបិសទ្ទោ នត្ថិ។] វលវាយ គទ្រភេន កិស្សរោ [ឱ. កិសារោ។] ឧប្បន្នោ សិយា សោ មាតុបិ សទិសោ បិតុបិ សទិសោ អស្សោតិបិ វត្តព្វោ គទ្រភោតិបិ វត្តព្វោតិ។ សោ កុមារណ្ឌុបិ [ឱ. វេកុរញ្ជាយាតិ ទិស្សតិ។ ម. កុណ្ឌន្តិ ទិស្សតិ។] សោ ភោ គោតម អស្សតរោ ហោតិ ឥទំ ហិស្ស ភោ គោតម នានាករណំ បស្សាមិ អមុត្រ ច [ឱ. ចសទ្ទោ នត្ថិ។] បន សានំ [ម. បនេសានំ។] ន កិញ្ចិ នានាករណំ បស្សាមីតិ។

[៤៣] តំ កឹ មញ្ញសិ អស្សលាយន ឥធាស្សុ ទ្វេ មាណវកា ភាតរោ សោទរិយា [ឱ.ម. សឧទរិយា។] ឯកោ អជ្ឈាយកោ ឧបនីតោ ឯកោ អនជ្ឈាយកោ អនុបនីតោ កមេត្ថ ព្រាហ្មណា បឋមំ ភោជេយ្យុំ សទ្ធេ វា ថាលិបាកេ វា យញ្ញេ វា បាហុនេ [ម. បាហុនកេ។] វាតិ។ យោ សោ ភោ គោតម មាណវកោ អជ្ឈាយកោ ឧបនីតោ តមេត្ថ ព្រាហ្មណា បឋមំ ភោជេយ្យុំ សទ្ធេ វា ថាលិបាកេ វា យញ្ញេ វា បាហុនេ វា កឹ ហិ ភោ គោតម អនជ្ឈាយកេ អនុបនីតេ ទិន្នំ មហប្ផលំ ភវិស្សតីតិ។

[៤៤] តំ កឹ មញ្ញសិ អស្សលាយន ឥធាស្សុ ទ្វេ មាណវកា ភាតរោ សោទរិយា ឯកោ អជ្ឈាយកោ ឧបនីតោ ទុស្សីលោ បាបធម្មោ ឯកោ អនជ្ឈាយកោ អនុបនីតោ សីលវា កល្យាណធម្មោ កមេត្ថ ព្រាហ្មណា បឋមំ ភោជេយ្យុំ សទ្ធេ វា ថាលិបាកេ វា យញ្ញេ វា បាហុនេ វាតិ។ យោ សោ ភោ គោតម មាណវកោ អនជ្ឈាយកោ អនុបនីតោ សីលវា កល្យាណធម្មោ តមេត្ថ ព្រាហ្មណា បឋមំ ភោជេយ្យុំ សទ្ធេ វា ថាលិបាកេ វា យញ្ញេ វា បាហុនេ វា កឹ ហិ ភោ គោតម ទុស្សីលេ បាបធម្មេ ទិន្នំ មហប្ផលំ ភវិស្សតីតិ។ បុព្វេ ខោ ត្វំ អស្សលាយន ជាតឹ អគមាសិ ជាតឹ គន្ត្វា មន្តេ អគមាសិ មន្តេ គន្ត្វា តមេវ ឋបេត្វា [ឱ. តមេតំ ត្វន្តិ ទិស្សតិ។ ម. តបេ អគមាសិ។ តបេ គន្ត្វាតិ ទិស្សតិ។] ចាតុវណ្ណឹ សុទ្ធឹ បច្ចាគតោ យមហំ បញ្ញបេមីតិ។ ឯវំ វុត្តេ អស្សលាយនោ មាណវោ តុណ្ហីភូតោ មង្កុភូតោ បត្តក្ខន្ធោ អធោមុខោ បជ្ឈាយន្តោ អប្បដិភាណោ និសីទិ។

[៤៥] អថខោ ភគវា អស្សលាយនំ មាណវំ តុណ្ហីភូតំ មង្កុភូតំ បត្តក្ខន្ធំ អធោមុខំ បជ្ឈាយន្តំ អប្បដិភាណំ វិទិត្វា អស្សលាយនំ មាណវំ ឯតទវោច ភូតបុព្វំ អស្សលាយន សត្តន្នំ ព្រាហ្មណិសីនំ អរញ្ញាយតនេ បណ្ណកុដីសុ សម្មន្តានំ ឯវរូបំ បាបកំ ទិដ្ឋិគតំ ឧប្បន្នំ ហោតិ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ។បេ។ ព្រហ្មទាយាទាតិ។ អស្សោសិ ខោ អស្សលាយន អសិតោ ទេវលោ ឥសិ សត្តន្នំ កិរ ព្រាហ្មណិសីនំ អរញ្ញាយតនេ បណ្ណកុដីសុ សម្មន្តានំ ឯវរូបំ បាបកំ ទិដ្ឋិគតំ ឧប្បន្នំ ហោតិ ព្រាហ្មណា វ សេដ្ឋោ វណ្ណោ។បេ។ ព្រហ្មទាយាទាតិ។ អថខោ អស្សលាយន អសិតោ ទេវលោ ឥសិ កេសមស្សុំ កប្បេត្វា មញ្ជេដ្ឋវណ្ណានិ ទុស្សានិ និវាសេត្វា អគលិយោ [ឱ. អដលិយោ។ ម. បដលិយោ។] ឧបាហនា អារោហិត្វា ជាតរូបមយំ ទណ្ឌំ គហេត្វា សត្តន្នំ ព្រាហ្មណិសីនំ បត្ថិណ្ឌិលេ [ឱ.ម. បត្ថណ្ឌិលេ។] បាតុរហោសិ។ អថខោ អស្សលាយន អសិតោ ទេវលោ ឥសិ សត្តន្នំ ព្រាហ្មណិសីនំ បត្ថិណ្ឌិលេ ចង្កមមានោ ឯវមាហ ហន្ទ កោ នុ ខោ ឥមេ ភវន្តោ ព្រាហ្មណិសយោ គន្តា [ឱ. គតា។] ហន្ទ កោ នុ ខោ ឥមេ ភវន្តោ ព្រាហ្មណិសយោ គន្តាតិ។ អថខោ អស្សលាយន សត្ត ព្រាហ្មណិសយោ អសិតំ ទេវលំ ឥសឹ ឯតទវោចុំ [ឱ. អថខោ អស្សលាយន សត្តន្នំ ព្រាហ្មណិសីនំ ឯតទហោសីតិ ទិស្សតិ។ ម. អថ អស្សលាយន…។] កោ នាយំ [ម. បនាយំ។] គាមណ្ឌលរូបោ វិយ សត្តន្នំ ព្រាហ្មណិសីនំ បត្ថិណ្ឌិលេ ចង្កមមានោ ឯវមាហ ហន្ទ កោ នុ ខោ ឥមេ ភវន្តោ ព្រាហ្មណិសយោ គន្តា ហន្ទ កោ នុ ខោ ឥមេ ភវន្តោ ព្រាហ្មណិសយោ គន្តាតិ ហន្ទ នំ អភិសបិស្សាមាតិ។ អថខោ អស្សលាយន សត្ត ព្រាហ្មណិសយោ អសិតំ ទេវលំ ឥសឹ អភិសបឹសុ ភស្មា ចបលី [ឱ.ម. វសលី។] ហោហិ ភស្មា ចបលី ហោហិ ភស្មា ចបលី ហោហីតិ។ យថា យថា ខោ អស្សលាយន សត្ត ព្រាហ្មណិសយោ អសិតំ ទេវលំ ឥសឹ អភិសបឹសុ តថា តថា អសិតោ ទេវលោ ឥសិ អភិរូបតរោ ចេវ ហោតិ ទស្សនីយតរោ ច បាសាទិកតរោ ច។ អថខោ អស្សលាយន សត្តន្នំ ព្រាហ្មណិសីនំ ឯតទហោសិ មោឃំ វត នោ តបោ អប្ផលំ ព្រហ្មចរិយំ មយំ ហិ បុព្វេ យំ អភិសបាម ភស្មា ចបលី ហោហីតិ ភស្មា [ឱ. ភស្មាវ។] ភវតិ ឯកច្ចោ ឥមំ បន មយំ យថា យថា អភិសបាម តថា តថា អភិរូបតរោ ចេវ ហោតិ ទស្សនីយតរោ ច បាសាទិកតរោ ចាតិ។ ន ភវន្តានំ មោឃំ តបោ ន បនាប្ផលំ ព្រហ្មចរិយំ ឥង្ឃ ភវន្តោ យោ មយិ មនោបទោសោ តំ បជហថាតិ។ យោ ភវតិ មនោបទោសោ តំ បជហាម កោ នុ ភវំ ហោតីតិ។ សុតោ នោ ភវតំ អសិតោ ទេវលោ ឥសីតិ។ ឯវំ ភោតិ [ឱ.ម. ឥតិសទ្ទោ នត្ថិ។]។ សោ ខ្វាហំ ភោ ហោមីតិ។ អថខោ អស្សលាយន សត្ត ព្រាហ្មណិសយោ អសិតំ ទេវលំ ឥសឹ អភិវាទេតុំ ឧបក្កមឹសុ [ឱ. ឧបសង្កមឹសុ។]។ អថខោ អស្សលាយន អសិតោ ទេវលោ ឥសិ សត្ត ព្រាហ្មណិសយោ ឯតទវោច សុតមេតំ ភោ សត្តន្នំ កិរ ព្រាហ្មណិសីនំ អរញ្ញាយតនេ បណ្ណកុដីសុ សម្មន្តានំ ឯវរូបំ បាបកំ ទិដ្ឋិគតំ ឧប្បន្នំ ព្រាហ្មណា វ សេដ្ឋោ វណ្ណោ ហីនោ អញ្ញោ វណ្ណោ ព្រាហ្មណា វ សុក្កោ វណ្ណោ កណ្ហោ អញ្ញោ វណ្ណោ ព្រាហ្មណា វ សុជ្ឈន្តិ នោ អព្រាហ្មណា ព្រាហ្មណា វ ព្រហ្មុនោ បុត្តា ឱរសា មុខតោ ជាតា ព្រហ្មជា ព្រហ្មនិម្មិតា ព្រហ្មទាយាទាតិ។ ឯវំ ភោតិ។ ជានន្តិ បន ភោន្តោ យា ជនិមាតា [ម. ជិនកា មាតា។] ព្រាហ្មណំយេវ អគមាសិ នោ អព្រាហ្មណន្តិ។ នោ ហិទំ ភោ។ ជានន្តិ បន ភោន្តោ យា ជនិមាតុ មាតា យាវ សត្តមា មាតុ [ឱ. មាតូតិ ន ទិស្សតិ។] មាតាមហយុគា ព្រាហ្មណំយេវ អគមាសិ នោ អព្រាហ្មណន្តិ។ នោ ហិទំ ភោ។ ជានន្តិ បន ភោន្តោ យោ ជនិបិតា [ម. ជនតោ បិតា។] ព្រាហ្មណំយេវ អគមាសិ នោ អព្រាហ្មណិន្តិ។ នោ ហិទំ ភោ។ ជានន្តិ បន ភោន្តោ យោ ជនិបិតុ បិតា យាវ សត្តមា បិតុ [ឱ. បិតូតិ ន ទិស្សតិ។] បិតាមហយុគា ព្រាហ្មណឹយេវ អគមាសិ នោ អព្រាហ្មណិន្តិ។ នោ ហិទំ ភោ។ ជានន្តិ បន ភោន្តោ យថា គព្ភស្ស អវក្កន្តិ ហោតីតិ។ ជានាម មយំ ភោ យថា គព្ភស្ស អវក្កន្តិ ហោតិ ឥធ មាតាបិតរោ ច [ឱ. វ។] សន្និបតិតា ហោន្តិ មាតា ច ឧតុនី ហោតិ គន្ធព្វោ ច បច្ចុបដ្ឋិតោ ហោតិ ឯវំ តិណ្ណំ សន្និបាតា គព្ភស្ស អវក្កន្តិ ហោតីតិ។ ជានន្តិ បន ភោន្តោ យគ្ឃេ សោ គន្ធព្វោ ខត្តិយោ វា ព្រាហ្មណោ វា វេស្សោ វា សុទ្ទោ វាតិ។ ន មយំ ភោ ជានាម យគ្ឃេ សោ គន្ធព្វោ ខត្តិយោ វា ព្រាហ្មណោ វា វេស្សោ វា សុទ្ទោ វាតិ។ ឯវំ សន្តេ ភោន្តោ [ឱ.ម. ភោ។] ជានាថ កេ តុម្ហេ ហោថាតិ។ ឯវំ សន្តេ ភោ ន មយំ ជានាម កេចិ មយំ ហោមាតិ។ តេ ហិ នាម អស្សលាយន សត្ត ព្រាហ្មណិសយោ អសិតេន ទេវលេន ឥសិនា សកេ ជាតិវាទេ សមនុយុញ្ជិយមានា សមនុគ្គាហិយមានា សមនុភាសិយមានា ន សម្បាយិស្សន្តិ កឹ បន ត្វំ ឯតរហិ មយា សកស្មឹ ជាតិវាទេ សមនុយុញ្ជិយមានោ សមនុគ្គាហិយមានោ សមនុភាសិយមានោ សម្បាយិស្សសិ យេសំ ត្វំ សាចរិយកោ ន បុណ្ណោ ទព្វិគ្គាហោតិ។

[៤៦] ឯវំ វុត្តេ អស្សលាយនោ មាណវោ ភគវន្តំ ឯតទវោច អភិក្កន្តំ ភោ គោតម។បេ។ ឧបាសកំ មំ ភវំ គោតមោ ធារេតុ អជ្ជតគ្គេ បាណុបេតំ សរណង្គតន្តិ។

អស្សលាយនសុត្តំ តតិយំ និដ្ឋិតំ។

ចតុត្ថំ ឃោដមុខសុត្តំ

[៤៧] ឯវម្មេ សុតំ។ ឯកំ សមយំ អាយស្មា ឧទេនោ ពារាណសិយំ វិហរតិ ខេមិយម្ពវនេ។ តេន ខោ បន សមយេន ឃោដមុខោ ព្រាហ្មណោ ពារាណសឹ អនុប្បត្តោ ហោតិ កេនចិទេវ ករណីយេន។ អថខោ ឃោដមុខោ ព្រាហ្មណោ ជង្ឃាវិហារំ អនុចង្កមមានោ អនុវិចរមានោ យេន ខេមិយម្ពវនំ តេនុបសង្កមិ។ តេន ខោ បន សមយេន អាយស្មា ឧទេនោ អព្ភោកាសេ ចង្កមតិ។ អថខោ ឃោដមុខោ ព្រាហ្មណោ យេន អាយស្មា ឧទេនោ តេនុបសង្កមិ ឧបសង្កមិត្វា អាយស្មតា ឧទេនេន សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា អាយស្មន្តំ ឧទេនំ ចង្កមន្តំ អនុចង្កមមានោ ឯវមាហ អម្ភោ សមណ នត្ថិ ធម្មិកោ បរិព្វជោ [ឱ. បរិព្វាជោតិ ទិស្សតិ។] ឯវំ មេ ឯត្ថ ហោតិ តញ្ច ខោ ភវន្តរូបានំ វា អទស្សនា យោ វា បនេត្ថ ធម្មោតិ។

[៤៨] ឯវំ វុត្តេ អាយស្មា ឧទេនោ ចង្កមា ឱរោហិត្វា វិហារំ បវិសិត្វា បញ្ញត្តេ អាសនេ និសីទិ។ ឃោដមុខោបិ ខោ ព្រាហ្មណោ ចង្កមា ឱរោហិត្វា វិហារំ បវិសិត្វា ឯកមន្តំ អដ្ឋាសិ។ ឯកមន្តំ ឋិតំ ខោ ឃោដមុខំ ព្រាហ្មណំ អាយស្មា ឧទេនោ ឯតទវោច សំវិជ្ជន្តេ ខោ ព្រាហ្មណ អាសនានិ សចេ អាកង្ខសិ និសីទាតិ។ ឯតទេវ ខោ បន មយំ ភោតោ ឧទេនស្ស អាគមយមានា ន [ម. នសទ្ទោ នត្ថិ។] និសីទាម កថំ ហិ នាម មាទិសោ បុព្វេ អនិមន្តិតោ អាសនេ និសីទិតព្វំ មញ្ញេយ្យាតិ។ អថខោ ឃោដមុខោ ព្រាហ្មណោ អញ្ញតរំ នីចំ អាសនំ គហេត្វា ឯកមន្តំ និសីទិ។ ឯកមន្តំ និសិន្នោ ខោ ឃោដមុខោ ព្រាហ្មណោ អាយស្មន្តំ ឧទេនំ ឯតទវោច អម្ភោ សមណ នត្ថិ ធម្មិកោ បរិព្វជោ ឯវំ មេ ឯត្ថ ហោតិ តញ្ច ខោ ភវន្តរូបានំ វា អទស្សនា យោ វា បនេត្ថ ធម្មោតិ។ សចេ ខោ បន មេ ត្វំ ព្រាហ្មណ អនុមញ្ញេយ្យំ អនុជានេយ្យាសិ បដិក្កោសេតព្វញ្ច បដិក្កោសេយ្យាសិ យស្ស ច បន មេ ភាសិតស្ស អត្ថំ ន ជានេយ្យាសិ មមំយេវ តត្ថ ឧត្តរឹ បដិបុច្ឆេយ្យាសិ ឥទំ ភោ ឧទេន កថំ ឥមស្ស ក្វត្ថោតិ ឯវំ កត្វា សិយា នោ ឯត្ថ កថាសល្លាបោតិ។ អនុមញ្ញេយ្យំ ខ្វាហំ ភោតោ ឧទេនស្ស អនុជានិស្សាមិ បដិក្កោសិតព្វញ្ច បដិក្កោសិស្សាមិ យស្ស ច បនាហំ ភោតោ ឧទេនស្ស ភាសិតស្ស អត្ថំ ន ជានិស្សាមិ ភវន្តំយេវ តត្ថ ឧទេនំ ឧត្តរឹ បដិបុច្ឆិស្សាមិ ឥទំ ភោ ឧទេន កថំ ឥមស្ស ក្វត្ថោតិ ឯវំ កត្វា ហោតុ នោ ឯត្ថ កថាសល្លាបោតិ។

[៤៩] ចត្តារោមេ ព្រាហ្មណ បុគ្គលា សន្តោ សំវិជ្ជមានា លោកស្មឹ កតមេ ចត្តារោ ឥធ ព្រាហ្មណ ឯកច្ចោ បុគ្គលោ អត្តន្តបោ ហោតិ អត្តបរិតាបនានុយោគមនុយុត្តោ ឥធ បន ព្រាហ្មណ ឯកច្ចោ បុគ្គលោ បរន្តបោ ហោតិ បរបរិតាបនានុយោគមនុយុត្តោ ឥធ បន ព្រាហ្មណ ឯកច្ចោ បុគ្គលោ អត្តន្តបោ ច អត្តបរិតាបនានុយោគមនុយុត្តោ បរន្តបោ ច បរបរិតាបនានុយោគមនុយុត្តោ ឥធ បន ព្រាហ្មណ ឯកច្ចោ បុគ្គលោ នេវត្តន្តបោ ហោតិ នាត្តបរិតាបនានុយោគមនុយុត្តោ ន បរន្តបោ ន បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតិភូតោ សុខប្បដិសំវេទី ព្រហ្មភូតេន អត្តនា វិហរតិ ឥមេសំ ព្រាហ្មណ ចតុន្នំ បុគ្គលានំ កតមោ តេ បុគ្គលោ ចិត្តំ អារាធេតីតិ។ យ្វាយំ ភោ ឧទេន បុគ្គលោ អត្តន្តបោ អត្តបរិតាបនានុយោគមនុយុត្តោ អយំ មេ បុគ្គលោ ចិត្តំ នារាធេតិ យោបាយំ ភោ ឧទេន បុគ្គលោ បរន្តបោ បរបរិតាបនានុយោគមនុយុត្តោ អយម្បិ មេ បុគ្គលោ ចិត្តំ នារាធេតិ យោបាយំ ភោ ឧទេន បុគ្គលោ អត្តន្តបោ ច អត្តបរិតាបនានុយោគមនុយុត្តោ បរន្តបោ ច បរបរិតាបនានុយោគមនុយុត្តោ អយម្បិ មេ បុគ្គលោ ចិត្តំ នារាធេតិ យោ ច ខោ អយំ ភោ ឧទេន បុគ្គលោ នេវត្តន្តបោ នាត្តបរិតាបនានុយោគមនុយុត្តោ ន បរន្តបោ ន បរបរិតាបនានុយោគមនុយុត្តោ សោ អនត្តន្តបោ ច អបរន្តបោ ច [ឱ.ម. ចសទ្ទោ នត្ថិ។] ទិដ្ឋេវ ធម្មេ និច្ឆាតោ និព្វុតោ សីតីភូតោ សុខប្បដិសំវេទី ព្រហ្មភូតេន អត្តនា វិហរតិ អយំ មេ បុគ្គលោ ចិត្តំ អារាធេតីតិ។ កស្មា បន តេ ព្រាហ្មណ ឥមេ តយោ បុគ្គលា ចិត្តំ នារាធេន្តីតិ។ យ្វាយំ ភោ ឧទេន បុគ្គលោ អត្តន្តបោ អត្តបរិតាបនានុយោគមនុយុត្តោ សោ អត្តានំ សុខកាមំ ទុក្ខប្បដិក្កូលំ អាតាបេតិ បរិតាបេតិ ឥមិនា មេ អយំ បុគ្គលោ ចិត្តំ នារាធេតិ យោបាយំ ភោ ឧទេន បុគ្គលោ បរន្តបោ បរបរិតាបនានុយោគមនុយុត្តោ សោ បរំ សុខកាមំ ទុក្ខប្បដិក្កូលំ អាតាបេតិ បរិតាបេតិ ឥមិនា មេ អយំ បុគ្គលោ ចិត្តំ នារាធេតិ យោបាយំ ភោ ឧទេន បុគ្គលោ អត្តន្តបោ ច អត្តបរិតាបនានុយោគមនុយុត្តោ បរន្តបោ ច បរបរិតាបនានុយោគមនុយុត្តោ សោ អត្តានញ្ច បរញ្ច សុខកាមេ ទុក្ខប្បដិក្កូលេ អាតាបេតិ បរិតាបេតិ ឥមិនា មេ អយំ បុគ្គលោ ចិត្តំ នារាធេតិ យោ ច ខោ អយំ ភោ ឧទេន បុគ្គលោ នេវត្តន្តបោ នាត្តបរិតាបនានុយោគមនុយុត្តោ ន បរន្តបោ ន បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតីភូតោ សុខប្បដិសំវេទី ព្រហ្មភូតេន អត្តនា វិហរតិ សោ អត្តានញ្ច បរញ្ច សុខកាមេ ទុក្ខប្បដិក្កូលេ នេវ អាតាបេតិ ន បរិតាបេតិ ឥមិនា មេ អយំ បុគ្គលោ ចិត្តំ អារាធេតីតិ។

[៥០] ទ្វេមា ព្រាហ្មណ បរិសា កតមា ទ្វេ ឥធ ព្រាហ្មណ ឯកច្ចា បរិសា សារត្តរត្តា មណិកុណ្ឌលេសុ បុត្តភរិយំ បរិយេសតិ ទាសីទាសំ បរិយេសតិ ខេត្តវត្ថុំ បរិយេសតិ ជាតរូបរជតំ បរិយេសតិ ឥធ បន ព្រាហ្មណ ឯកច្ចា បរិសា អសារត្តរត្តា មណិកុណ្ឌលេសុ បុត្តភរិយំ បហាយ ទាសីទាសំ បហាយ ខេត្តវត្ថុំ បហាយ ជាតរូបរជតំ បហាយ អគារស្មា អនគារិយំ បព្វជិតា យ្វាយំ [ឱ.ម. ស្វាយំ។] ព្រាហ្មណ បុគ្គលោ នេវត្តន្តបោ នាត្តបរិតាបនានុយោគមនុយុត្តោ ន បរន្តបោ ន បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតីភូតោ សុខប្បដិសំវេទី ព្រហ្មភូតេន អត្តនា វិហរតិ ឥមំ ត្វំ ព្រាហ្មណ បុគ្គលំ កតមស្សំ បរិសាយំ ពហុលំ សមនុបស្សសិ យា ចាយំ បរិសា សារត្តរត្តា មណិកុណ្ឌលេសុ បុត្តភរិយំ បរិយេសតិ ទាសីទាសំ បរិយេសតិ ខេត្តវត្ថុំ បរិយេសតិ ជាតរូបរជតំ បរិយេសតិ យា ចាយំ បរិសា អសារត្តរត្តា មណិកុណ្ឌលេសុ បុត្តភរិយំ បហាយ ទាសីទាសំ បហាយ ខេត្តវត្ថុំ បហាយ ជាតរូបរជតំ បហាយ អគារស្មា អនគារិយំ បព្វជិតាតិ។ យ្វាយំ ភោ ឧទេន បុគ្គលោ នេវត្តន្តបោ នាត្តបរិតាបនានុយោគមនុយុត្តោ ន បរន្តបោ ន បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតិភូតោ សុខប្បដិសំវេទី ព្រហ្មភូតេន អត្តនា វិហរតិ ឥមាហំ បុគ្គលំ យាយំ បរិសា អសារត្តរត្តា មណិកុណ្ឌលេសុ បុត្តភរិយំ បហាយ ទាសីទាសំ បហាយ ខេត្តវត្ថុំ បហាយ ជាតរូបរជតំ បហាយ អគារស្មា អនគារិយំ បព្វជិតា ឥមិស្សំ បរិសាយំ ពហុលំ សមនុបស្សាមីតិ។ ឥទានេវ ខោ បន តេ ព្រាហ្មណ ភាសិតំ មយំ ឯវំ អាជានាម អម្ភោ សមណ នត្ថិ ធម្មិកោ បរិព្វជោ ឯវំ មេ ឯត្ថ ហោតិ តញ្ច ខោ ភវន្តរូបានំ វា អទស្សនា យោ វា បនេត្ថ ធម្មោតិ។ អទ្ធា ខោ មេ សា ភោ ឧទេន សានុគ្គហា វាចា ភាសិតា អត្ថិ ធម្មិកោ បរិព្វជោ ឯវំ មេ ឯត្ថ ហោតិ ឯវញ្ច បន មំ ភវំ ឧទេនោ ធារេតុ យេ ចិមេ ភោតា ឧទេនេន ចត្តារោ បុគ្គលា សង្ខិត្តេន វុត្តា វិត្ថារេន អវិភត្តា សាធុ មេ ភវំ ឧទេនោ ឥមេ ចត្តារោ បុគ្គលេ វិត្ថារេន វិភជតុ អនុកម្បំ ឧបាទាយាតិ។ តេនហិ ព្រាហ្មណ សុណាហិ សាធុកំ មនសិករោហិ ភាសិស្សាមីតិ ឯវំ ភោតិ ខោ ឃោដមុខោ ព្រាហ្មណោ អាយស្មតោ ឧទេនស្ស បច្ចស្សោសិ។

[៥១] អាយស្មា ឧទេនោ ឯតទវោច កតមោ ច ព្រាហ្មណ បុគ្គលោ អត្តន្តបោ អត្តបរិតាបនានុយោគមនុយុត្តោ ឥធ ព្រាហ្មណ ឯកច្ចោ បុគ្គលោ អចេលកោ ហោតិ មុត្តាចារោ ហត្ថាវលេខនោ ន ឯហិភទន្តិកោ ន តិដ្ឋភទន្តិកោ នាភិហតំ ន ឧទ្ទិស្ស កតំ ន និមន្តនំ សាទិយតិ សោ ន កុម្ភិមុខា បដិគ្គណ្ហាតិ ន កឡោបិមុខា បដិគ្គណ្ហាតិ ន ឯឡកមន្តរំ ន ទណ្ឌមន្តរំ [ន ទណ្ឌមន្តរន្តិបិ។ ន ទណ្ឌកមន្តរន្តិបិ អម្ហាកំ បោត្ថកេ បាឋោ ទិស្សតិ។ ឱ. រោបិយបោត្ថកេ ន ទណ្ឌមន្តរន្តិ បាឋោ ទិស្សតិ។ តត្ថ ន ទណ្ឌមន្តរន្តិ បទំ យុត្តតរំ សព្វដ្ឋកថាសុ ភាវតោ។ ន មណ្ឌមន្តរន្តិ បាឋោ កត្ថចិ បោត្ថកេ ទិស្សតិ។ សោ ន សមេតិ អដ្ឋកថាសុ អភាវតោ។] ន មូសលមន្តរំ ន ទ្វិន្នំ ភុញ្ជមានានំ ន គព្ភិនិយា ន បាយមានាយ ន បុរិសន្តរគតាយ ន សង្កិត្តីសុ ន យត្ថ សា ឧបដ្ឋិតោ ហោតិ ន យត្ថ មក្ខិកា សណ្ឌសណ្ឌចារិនី ន មច្ឆំ ន មំសំ ន សុរំ ន មេរយំ ន ថុសោទកំ បិវតិ សោ ឯកាគារិកោ វា ហោតិ ឯកាលោបិកោ ទ្វាគារិកោ វា ហោតិ ទ្វាលោបិកោ។បេ។ សត្តាគារិកោ វា ហោតិ សត្តាលោបិកោ ឯកិស្សាបិ ទត្តិយា យាបេតិ ទ្វីហីបិ ទត្តីហិ យាបេតិ តីហិបិ ទត្តីបិ យាបេតិ។បេ។ សត្តហិបិ ទត្តីហិ យាបេតិ ឯកាហិកំបិ អាហារំ អាហារេតិ ទ្វីហិកំបិ អាហារំ អាហារេតិ។បេ។ សត្តាហិកំបិ អាហារំ អាហារេតិ ឥតិ ឯវរូបំ អឌ្ឍមាសិកំបិ បរិយាយភត្តភោជនានុយោគមនុយុត្តោ វិហរតិ សោ សាកភក្ខោ វា ហោតិ សាមាកភក្ខោ វា ហោតិ នីវារភក្ខោ វា ហោតិ ទទ្ទុលភក្ខោ វា ហោតិ និយាសភក្ខោ វា ហោតិ ហដភក្ខោ វា ហោតិ កណភក្ខោ វា ហោតិ អាចាមភក្ខោ វា ហោតិ បិញ្ញាកភក្ខោ វា ហោតិ តិណភក្ខោ វា ហោតិ គោមយភក្ខោ វា ហោតិ វនមូលផលាហារោ យាបេតិ បវត្តផលភោជី សោ សាណានិបិ ធារេតិ មសាណានិបិ ធារេតិ ឆវទុស្សានិបិ ធារេតិ បំសុកូលានិបិ ធារេតិ តិរីដានិបិ ធារេតិ អជិនំបិ ធារេតិ អជិនក្ខិបំបិ ធារេតិ កុសចីរំបិ ធារេតិ វាកចីរំបិ ធារេតិ ផលកចីរំបិ ធារេតិ កេសកម្ពលំបិ ធារេតិ វាលកម្ពលំបិ ធារេតិ ឧឡូកបក្ខំបិ ធារេតិ កេសមស្សុលោចកោបិ ហោតិ កេសមស្សុលោចនានុយោគមនុយុត្តោ ឧព្ភដ្ឋកោបិ ហោតិ អាសនបដិក្ខិត្តោ ឧក្កុដិកោបិ ហោតិ ឧក្កុដិកប្បធានមនុយុត្តោ កណ្ដកាបស្សយិកោបិ ហោតិ កណ្ដកាបស្សយេ សេយ្យំ កប្បេតិ សាយតតិយកំបិ ឧទកោរោហណានុយោគមនុយុត្តោ វិហរតិ ឥតិ ឯវរូបំ អនេកវិហិតំ កាយស្ស អាតាបនបរិតាបនានុយោគមនុយុត្តោ វិហរតិ អយំ វុច្ចតិ ព្រាហ្មណ បុគ្គលោ អត្តន្តបោ អត្តបរិតាបនានុយោគមនុយុត្តោ។

[៥២] កតមោ ច ព្រាហ្មណ បុគ្គលោ បរន្តបោ បរបរិតាបនានុយោគមនុយុត្តោ ឥធ ព្រាហ្មណ ឯកច្ចោ បុគ្គលោ ឱរព្ភិកោ ហោតិ សូករិកោ [ឱ. សោករិកោ។] សាកុណិកោ មាគវិកោ លុទ្ទោ មច្ឆឃាតកោ ចោរោ ចោរឃាតកោ [ម. ឯត្ថន្តរេ គោឃាតកោតិ ទិស្សតិ។] ពន្ធនាគារិកោ យេ វា បនញ្ញេបិ កេចិ កុរូរកម្មន្តា អយំ វុច្ចតិ ព្រាហ្មណ បុគ្គលោ បរន្តបោ បរបរិតាបនានុយោគមនុយុត្តោ។

[៥៣] កតមោ ច ព្រាហ្មណ បុគ្គលោ អត្តន្តបោ ច អត្តបរិតាបនានុយោគមនុយុត្តោ បរន្តបោ ច បរបរិតាបនានុយោគមនុយុត្តោ ឥធ ព្រាហ្មណ ឯកច្ចោ បុគ្គលោ រាជា វា ហោតិ ខត្តិយោ មុទ្ធាវសិត្តោ ព្រាហ្មណោ វា មហាសាលោ សោ បុរត្ថិមេន នគរស្ស នវំ សន្ថាគារំ ការាបេត្វា កេសមស្សុំ ឱហារេត្វា ខរាជិនំ [ម. ខុរាជិនំ។] និវាសេត្វា សប្បិតេលេន កាយំ អព្ភញ្ជិត្វា មិគវិសាណេន បិដ្ឋឹ កណ្ឌុវមានោ សន្ថាគារំ បវិសតិ សទ្ធឹ មហេសិយា ព្រាហ្មណេន ច បុរោហិតេន សោ តត្ថ អនន្តរហិតាយ ភូមិយា ហរិតូបលិត្តាយ សេយ្យំ កប្បេតិ សោ [ម. សោតិ ន ទិស្សតិ។] ឯកិស្សា គាវិយា សរូបវច្ឆាយ យំ ឯកស្មឹ ថនេ ខីរំ ហោតិ តេន រាជា យាបេតិ យំ ទុតិយស្មឹ ថនេ ខីរំ ហោតិ តេន មហេសី យាបេតិ យំ តតិយស្មឹ ថនេ ខីរំ ហោតិ តេន ព្រាហ្មណោ បុរោហិតោ យាបេតិ យំ ចតុត្ថស្មឹ ថនេ ខីរំ ហោតិ តេន អគ្គឹ ជូហតិ អវសេសេន វច្ឆកោ យាបេតិ សោ ឯវមាហ ឯត្តកា ឧសភា ហញ្ញន្តុ យញ្ញត្ថាយ ឯត្តកា វច្ឆតរា ហញ្ញន្តុ យញ្ញត្ថាយ ឯត្តកា វច្ឆតរិយោ ហញ្ញន្តុ យញ្ញត្ថាយ ឯត្តកា អជា ហញ្ញន្តុ យញ្ញត្ថាយ ឯត្តកា ឧរព្ភា ហញ្ញន្តុ យញ្ញត្ថាយ [ម. ឯត្ថន្តរេ ឯត្តកា អស្សា ហញ្ញន្តុ យញ្ញត្ថាយាតិ ទិស្សតិ។ បរិហីសត្ថាយាតីតិ ទិស្សតិ។] ឯត្តកា រុក្ខា ឆិជ្ជន្តុ យូបត្ថាយ ឯត្តកា ទព្វា លុយន្តុ បរិសត្ថាយាតិ យេបិស្ស តេ ហោន្តិ ទាសាតិ វា បេស្សាតិ វា កម្មករាតិ វា តេបិ ទណ្ឌតជ្ជិតា ភយតជ្ជិតា អស្សុមុខា រោទមានា បរិកម្មានិ ករោន្តិ អយំ វុច្ចតិ ព្រាហ្មណ បុគ្គលោ អត្តន្តបោ ច អត្តបរិតាបនានុយោគមនុយុត្តោ បរន្តបោ ច បរបរិតាបនានុយោគមនុយុត្តោ។

[៥៤] កតមោ ច ព្រាហ្មណ បុគ្គលោ នេវត្តន្តបោ នាត្តបរិតាបនានុយោគមនុយុត្តោ ន បរន្តបោ ន បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតីភូតោ សុខប្បដិសំវេទី ព្រហ្មភូតេន អត្តនា វិហរតិ ឥធ ព្រាហ្មណ តថាគតោ លោកេ ឧប្បជ្ជតិ អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវា សោ ឥមំ លោកំ សទេវកំ សមារកំ សព្រហ្មកំ សស្សមណព្រាហ្មណឹ បជំ សទេវមនុស្សំ សយំ អភិញ្ញា សច្ឆិកត្វា បវេទេតិ សោ ធម្មំ ទេសេតិ អាទិកល្យាណំ មជ្ឈេកល្យាណំ បរិយោសានកល្យាណំ សាត្ថំ សព្យញ្ជនំ កេវលបរិបុណ្ណំ បរិសុទ្ធំ ព្រហ្មចរិយំ បកាសេតិ។ តំ ធម្មំ សុណាតិ គហបតិ វា គហបតិបុត្តោ វា អញ្ញតរស្មឹ វា កុលេ បច្ឆាជាតោ សោ តំ ធម្មំ សុត្វា តថាគតេ សទ្ធំ បដិលភតិ។ សោ តេន សទ្ធាបដិលាភេន សមន្នាគតោ ឥតិ បដិសញ្ចិក្ខតិ សម្ពាធោ ឃរាវាសោ រជាបថោ អព្ភោកាសោ បព្វជ្ជា ន យិទំ សុករំ អគារំ អជ្ឈាវសតា ឯកន្តបរិបុណ្ណំ ឯកន្តបរិសុទ្ធំ សង្ខលិខិតំ ព្រហ្មចរិយំ ចរិតុំ យន្នូនាហំ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជេយ្យន្តិ។ សោ អបរេន សមយេន អប្បំ វា ភោគក្ខន្ធំ បហាយ មហន្តំ វា ភោគក្ខន្ធំ បហាយ អប្បំ វា ញាតិបរិវដ្ដំ បហាយ មហន្តំ វា ញាតិបរិវដ្ដំ បហាយ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជតិ។

[៥៥] សោ ឯវំ បព្វជិតោ សមានោ ភិក្ខូនំ សិក្ខាសាជីវសមាបន្នោ បាណាតិបាតំ បហាយ បាណាតិបាតា បដិវិរតោ ហោតិ និហិតទណ្ឌោ និហិតសត្ថោ លជ្ជី ទយាបន្នោ សព្វបាណភូតហិតានុកម្បី វិហរតិ អទិន្នាទានំ បហាយ អទិន្នាទានា បដិវិរតោ ហោតិ ទិន្នាទាយី ទិន្នប្បដិកង្ខី អថេនេន សុចិភូតេន អត្តនា វិហរតិ អព្រហ្មចរិយំ បហាយ ព្រហ្មចារី ហោតិ អារាចារី វិហរតោ មេថុនា គាមធម្មា មុសាវាទំ បហាយ មុសាវាទា បដិវិរតោ ហោតិ សច្ចវាទី សច្ចសន្ធោ ថេតោ បច្ចយិកោ អវិសំវាទកោ លោកស្ស បិសុណំ វាចំ បហាយ បិសុណាយ វាចាយ បដិវិរតោ ហោតិ ឥតោ សុត្វា ន អមុត្រ អក្ខាតា ឥមេសំ ភេទាយ អមុត្រ វា សុត្វា ន ឥមេសំ អក្ខាតា អមូសំ ភេទាយ ឥតិ ភិន្នានំ វា សន្ធាតា សហិតានំ វា អនុប្បទាតា សមគ្គារាមោ សមគ្គរតោ សមគ្គនន្ទី សមគ្គករណឹ វាចំ ភាសិតា ហោតិ ផរុសំ វាចំ បហាយ ផរុសាយ វាចាយ បដិវិរតោ ហោតិ យា សា វាចា នេលា កណ្ណសុខា បេមនីយា ហទយង្គមា បោរី ពហុជនកន្តា ពហុជនមនាបា តថារូបឹ វាចំ ភាសិតា ហោតិ សម្ផប្បលាបំ បហាយ សម្ផប្បលាបា បដិវិរតោ ហោតិ កាលវាទី ភូតវាទី អត្ថវាទី ធម្មវាទី វិនយវាទី និធាវតឹ វាចំ ភាសិតា កាលេន សាបទេសំ បរិយន្តវតឹ អត្ថសំហិតំ។ សោ វីជគាមភូតគាមសមារម្ភា បដិវិរតោ ហោតិ ឯកភត្តិកោ ហោតិ រត្តូបរតោ វិរតោ វិកាលភោជនា នច្ចគីតវាទិតវិសូកទស្សនា បដិវិរតោ ហោតិ មាលាគន្ធវិលេបនធារណមណ្ឌនវិភូសនដ្ឋានា បដិវិរតោ ហោតិ ឧច្ចាសយនមហាសយនា បដិវិរតោ ហោតិ ជាតរូបរជតប្បដិគ្គហណា បដិវិរតោ ហោតិ អាមកធញ្ញប្បដិគ្គហណា បដិវិរតោ ហោតិ អាមកមំសប្បដិគ្គហណា បដិវិរតោ ហោតិ ឥត្ថីកុមារិកបដិគ្គហណា បដិវិរតោ ហោតិ ទាសីទាសប្បដិគ្គហណា បដិវិរតោ ហោតិ អជេឡកប្បដិគ្គហណា បដិវិរតោ ហោតិ កុក្កុដសូករប្បដិគ្គហណា បដិវិរតោ ហោតិ ហត្ថិគវាស្សវលវប្បដិគ្គហណា បដិវិរតោ ហោតិ ខេត្តវត្ថុប្បដិគ្គហណា បដិវិរតោ ហោតិ ទូតេយ្យប្បហីណគមនានុយោគា បដិវិរតោ ហោតិ កយវិក្កយា បដិវិរតោ ហោតិ តុលាកូដកំសកូដមានកូដា បដិវិរតោ ហោតិ ឧក្កោដនវញ្ចននិកតិសាវិយោគា បដិវិរតោ ហោតិ ឆេទនវធពន្ធនវិបរាមោសអាលោបសហសាការា បដិវិរតោ ហោតិ។ សោ សន្តុដ្ឋោ ហោតិ កាយបរិហារិកេន ចីវរេន កុច្ឆិបរិហារិកេន បិណ្ឌបាតេន យេន យេនេវ បក្កមតិ សមាទាយេវ បក្កមតិ។ សេយ្យថាបិ នាម បក្ខី សកុណោ យេន យេនេវ ឌេតិ សបត្តភារោ ឌេតិ ឯវមេវ ភិក្ខុ សន្តុដ្ឋោ ហោតិ កាយបរិហារិកេន ចីវរេន កុច្ឆិបរិហារិកេន បិណ្ឌបាតេន យេន យេនេវ បក្កមតិ សមាទាយេវ បក្កមតិ។ សោ ឥមិនា អរិយេន សីលក្ខន្ធេន សមន្នាគតោ អជ្ឈត្តំ អនវជ្ជសុខំ បដិសំវេទេតិ។ សោ ចក្ខុនា រូបំ ទិស្វា ន និមិត្តគ្គាហី ហោតិ នានុព្យញ្ជនគ្គាហី យត្វាធិករណមេនំ ចក្ខុន្ទ្រិយំ អសំវុតំ វិហរន្តំ អភិជ្ឈាទោមនស្សា បាបកា អកុសលា ធម្មា អន្វាស្សវេយ្យុំ តស្ស សំវរាយ បដិបជ្ជតិ រក្ខតិ ចក្ខុន្ទ្រិយំ ចក្ខុន្ទ្រិយេ សំវរំ អាបជ្ជតិ។ សោតេន សទ្ទំ សុត្វា… ឃានេន គន្ធំ ឃាយិត្វា… ជិវ្ហាយ រសំ សាយិត្វា… កាយេន ផោដ្ឋព្វំ ផុសិត្វា… មនសា ធម្មំ វិញ្ញាយ ន និមិត្តគ្គាហី ហោតិ នានុព្យញ្ជនគ្គាហី យត្វាធិករណមេនំ មនិន្ទ្រិយំ អសំវុតំ វិហរន្តំ អភិជ្ឈាទោមនស្សា បាបកា អកុសលា ធម្មា អន្វាស្សវេយ្យុំ តស្ស សំវរាយ បដិបជ្ជតិ រក្ខតិ មនិន្ទ្រិយំ មនិន្ទ្រិយេ សំវរំ អាបជ្ជតិ។ សោ ឥមិនា អរិយេន ឥន្ទ្រិយសំវរេន សមន្នាគតោ អជ្ឈត្តំ អព្យាសេកសុខំ បដិសំវេទេតិ។ សោ អភិក្កន្តេ បដិក្កន្តេ សម្បជានការី ហោតិ អាលោកិតេ វិលោកិតេ សម្បជានការី ហោតិ សម្មិញ្ជិតេ បសារិតេ សម្បជានការី ហោតិ សង្ឃាដិបត្តចីវរធារណេ សម្បជានការី ហោតិ អសិតេ បីតេ ខាយិតេ សាយិតេ សម្បជានការី ហោតិ ឧច្ចារប្បស្សាវកម្មេ សម្បជានការី ហោតិ គតេ ឋិតេ និសិន្នេ សុត្តេ ជាគរិតេ ភាសិតេ តុណ្ហីភាវេ សម្បជានការី ហោតិ។

[៥៦] សោ ឥមិនា ច អរិយេន សីលក្ខន្ធេន សមន្នាគតោ ឥមិនា ច អរិយេន ឥន្ទ្រិយសំវរេន សមន្នាគតោ ឥមិនា ច អរិយេន សតិសម្បជញ្ញេន សមន្នាគតោ វិវិត្តំ សេនាសនំ ភជតិ អរញ្ញំ រុក្ខមូលំ បព្វតំ កន្ទរំ គិរិគុហំ សុសានំ វនបត្ថំ អព្ភោកាសំ បលាលបុញ្ជំ។ សោ បច្ឆាភត្តំ បិណ្ឌបាតប្បដិក្កន្តោ និសីទតិ បល្លង្កំ អាភុជិត្វា ឧជុំ កាយំ បណិធាយ បរិមុខំ សតឹ ឧបដ្ឋបេត្វា។ សោ អភិជ្ឈំ លោកេ បហាយ វិគតាភិជ្ឈេន ចេតសា វិហរតិ អភិជ្ឈាយ ចិត្តំ បរិសោធេតិ ព្យាបាទប្បទោសំ បហាយ អព្យាបន្នចិត្តោ វិហរតិ សព្វបាណភូតហិតានុកម្បី ព្យាបាទប្បទោសា ចិត្តំ បរិសោធេតិ ថីនមិទ្ធំ បហាយ វិគតថីនមិទ្ធោ វិហរតិ អាលោកសញ្ញី សតោ សម្បជានោ ថីនមិទ្ធា ចិត្តំ បរិសោធេតិ ឧទ្ធច្ចកុក្កុច្ចំ បហាយ អនុទ្ធតោ វិហរតិ អជ្ឈត្តំ វូបសន្តចិត្តោ ឧទ្ធច្ចកុក្កុច្ចា ចិត្តំ បរិសោធេតិ វិចិកិច្ឆំ បហាយ តិណ្ណវិចិកិច្ឆោ វិហរតិ អកថំកថី កុសលេសុ ធម្មេសុ វិចិកិច្ឆាយ ចិត្តំ បរិសោធេតិ។

[៥៧] សោ ឥមេ បញ្ច នីវរណេ បហាយ ចេតសោ ឧបក្កិលេសេ បញ្ញាយ ទុព្វលីករណេ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវំ អវិតក្កំ អវិចារំ សមាធិជំ បីតិសុខំ ទុតិយំ ឈានំ ឧបសម្បជ្ជ វិហរតិ បីតិយា ច វិរាគា ឧបេក្ខកោ ច វិហរតិ សតោ ច សម្បជានោ សុខញ្ច កាយេន បដិសំវេទេតិ យន្តំ អរិយា អាចិក្ខន្តិ ឧបេក្ខកោ សតិមា សុខវិហារីតិ តតិយំ ឈានំ ឧបសម្បជ្ជ វិហរតិ សុខស្ស ច បហានា ទុក្ខស្ស ច បហានា បុព្វេវ សោមនស្សទោមនស្សានំ អត្ថង្គមា អទុក្ខមសុខំ ឧបេក្ខាសតិបារិសុទ្ធឹ ចតុត្ថំ ឈានំ ឧបសម្បជ្ជ វិហរតិ។

[៥៨] សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ បុព្វេនិវាសានុស្សតិញ្ញាណាយ ចិត្តំ អភិនិន្នាមេតិ សោ អនេកវិហិតំ បុព្វេនិវាសំ អនុស្សរតិ សេយ្យថីទំ ឯកំបិ ជាតឹ ទ្វេបិ ជាតិយោ តិស្សោបិ ជាតិយោ ចតស្សោបិ ជាតិយោ បញ្ចបិ ជាតិយោ ទសបិ ជាតិយោ វីសំបិ ជាតិយោ តឹសំបិ ជាតិយោ ចត្តាឡីសំបិ ជាតិយោ បញ្ញាសំបិ ជាតិយោ ជាតិសតំបិ ជាតិសហស្សំបិ ជាតិសតសហស្សំបិ អនេកេបិ សំវដ្ដកប្បេ អនេកេបិ វិវដ្ដកប្បេ អនេកេបិ សំវដ្ដវិវដ្ដកប្បេ អមុត្រាសឹ ឯវំនាមោ ឯវំគោត្តោ ឯវំវណ្ណោ ឯវមាហារោ ឯវំសុខទុក្ខប្បដិសំវេទី ឯវមាយុបរិយន្តោ សោ តតោ ចុតោ អមុត្រ ឧទបាទឹ តត្រាបាសឹ ឯវំនាមោ ឯវំគោត្តោ ឯវំវណ្ណោ ឯវមាហារោ ឯវំសុខទុក្ខប្បដិសំវេទី ឯវមាយុបរិយន្តោ សោ តតោ ចុតោ ឥធូបបន្នោតិ ឥតិ សាការំ សឧទ្ទេសំ អនេកវិហិតំ បុព្វេនិវាសំ អនុស្សរតិ។

[៥៩] សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ សត្តានំ ចុតូបបាតញ្ញាណាយ ចិត្តំ អភិនិន្នាមេតិ សោ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សតិ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ យថាកម្មូបគេ សត្តេ បជានាតិ ឥមេ វត ភោន្តោ សត្តា កាយទុច្ចរិតេន សមន្នាគតា។បេ។ អរិយានំ ឧបវាទកា មិច្ឆាទិដ្ឋិកា មិច្ឆាទិដ្ឋិកម្មសមាទានា តេ កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបន្នា ឥមេ វា បន ភោន្តោ សត្តា កាយសុច្ចរិតេន សមន្នាគតា។បេ។ អរិយានំ អនុបវាទកា សម្មាទិដ្ឋិកា សម្មាទិដ្ឋិកម្មសមាទានា តេ កាយស្ស ភេទា បរម្មរណា សុគតឹ សគ្គំ លោកំ ឧបបន្នាតិ ឥតិ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សតិ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ យថាកម្មូបគេ សត្តេ បជានាតិ។

[៦០] សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ អាសវានំ ខយញ្ញាណាយ ចិត្តំ អភិនិន្នាមេតិ។ សោ ឥទំ ទុក្ខន្តិ យថាភូតំ បជានាតិ អយំ ទុក្ខសមុទយោតិ យថាភូតំ បជានាតិ អយំ ទុក្ខនិរោធោតិ យថាភូតំ បជានាតិ អយំ ទុក្ខនិរោធគាមិនី បដិបទាតិ យថាភូតំ បជានាតិ ឥមេ អាសវាតិ យថាភូតំ បជានាតិ អយំ អាសវសមុទយោតិ យថាភូតំ បជានាតិ អយំ អាសវនិរោធោតិ យថាភូតំ បជានាតិ អយំ អាសវនិរោធគាមិនី បដិបទាតិ យថាភូតំ បជានាតិ។ តស្ស ឯវំ ជានតោ ឯវំ បស្សតោ កាមាសវាបិ ចិត្តំ វិមុច្ចតិ ភវាសវាបិ ចិត្តំ វិមុច្ចតិ អវិជ្ជាសវាបិ ចិត្តំ វិមុច្ចតិ វិមុត្តស្មឹ វិមុត្តមីតិ ញាណំ ហោតិ ខីណា ជាតិ វុសិតំ ព្រហ្មចរិយំ កតំ ករណីយំ នាបរំ ឥត្ថត្តាយាតិ បជានាតិ អយំ វុច្ចតិ ព្រាហ្មណ បុគ្គលោ នេវត្តន្តបោ នាត្តបរិតាបនានុយោគមនុយុត្តោ ន បរន្តបោ ន បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតីភូតោ សុខប្បដិសំវេទី ព្រហ្មភូតេន អត្តនា វិហរតីតិ។

[៦១] ឯវំ វុត្តេ ឃោដមុខោ ព្រាហ្មណោ អាយស្មន្តំ ឧទេនំ ឯតទវោច អភិក្កន្តំ ភោ ឧទេន អភិក្កន្តំ ភោ ឧទេន សេយ្យថាបិ ភោ ឧទេន និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ ភោតា ឧទេនេន អនេកបរិយាយេន ធម្មោ បកាសិតោ ឯសាហំ ភវន្តំ ឧទេនំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភវំ ឧទេនោ ធារេតុ អជ្ជតគ្គេ បាណុបេតំ សរណង្គតន្តិ។ មា ខោ មំ ត្វំ ព្រាហ្មណ សរណំ អគមាសិ តមេវ ត្វំ ភគវន្តំ សរណំ គច្ឆាហិ យមហំ សរណំ គតោតិ។ កហំ បន ភោ ឧទេន ឯតរហិ សោ ភវំ គោតមោ វិហរតិ អរហំ សម្មាសម្ពុទ្ធោតិ បរិនិព្វុតោ ខោ ព្រាហ្មណ ឯតរហិ សោ ភគវា អរហំ សម្មាសម្ពុទ្ធោតិ។ សចេ ហិ មយំ ភោ ឧទេន សុណេយ្យាម តំ ភវន្តំ គោតមំ ទសសុ [ឱ. ទសសុបិ។] យោជនេសុ ទសបិ មយំ យោជនានិ គច្ឆេយ្យាម តំ ភវន្តំ គោតមំ ទស្សនាយ អរហន្តំ សម្មាសម្ពុទ្ធំ សចេ [ឱ. ហិសទ្ទោ ទិស្សតិ។] មយំ ភោ ឧទេន សុណេយ្យាម តំ ភវន្តំ គោតមំ វីសតិយា យោជនេសុ… តឹសតិយា យោជនេសុ… ចត្តាឡីសាយ យោជនេសុ… បញ្ញាសាយ យោជនេសុ បញ្ញាសំបិ មយំ យោជនានិ គច្ឆេយ្យាម តំ ភវន្តំ គោតមំ ទស្សនាយ អរហន្តំ សម្មាសម្ពុទ្ធំ យោជនសតេបិ មយំ ភោ ឧទេន សុណេយ្យាម តំ ភវន្តំ គោតមំ យោជនសតំបិ មយំ គច្ឆេយ្យាម តំ ភវន្តំ គោតមំ ទស្សនាយ អរហន្តំ សម្មាសម្ពុទ្ធំ យតោ ច ខោ ភោ ឧទេន បរិនិព្វុតោ សោ ភវំ គោតមោ បរិនិព្វុតំបិ មយំ តំ ភវន្តំ គោតមំ សរណំ គច្ឆាម ធម្មញ្ច ភិក្ខុសង្ឃញ្ច ឧបាសកំ មំ ភវំ ឧទេនោ ធារេតុ អជ្ជតគ្គេ បាណុបេតំ សរណង្គតំ អត្ថិ ច មេ ភោ ឧទេន អង្គរាជា ទេវសិកំ និច្ចភិក្ខំ ទទាតិ តតោ អហំ ភោតោ ឧទេនស្ស ឯកំ និច្ចភិក្ខំ ទទាមីតិ។

[៦២] កឹ បន តេ ព្រាហ្មណ អង្គរាជា ទេវសិកំ និច្ចភិក្ខំ ទទាតីតិ។ បញ្ចបិ [ឱ. អបិសទ្ទោ ន ទិស្សតិ។] ភោ ឧទេន កហាបណសតានីតិ។ ន ខោ នោ ព្រាហ្មណ កប្បតិ ជាតរូបរជតំ បដិគ្គហេតុន្តិ។ សចេ តំ ភោ ឧទេន [ឱ.ម. ភោតោ ឧទេនស្សាតិ ទិស្សតិ។] ន កប្បតិ វិហារំ ភោតោ ឧទេនស្ស ការាបេស្សាមីតិ។ សចេ ខោ មេ ត្វំ ព្រាហ្មណ វិហារំ ការាបេតុកាមោ បាដលិបុត្តេ សង្ឃស្ស ឧបដ្ឋានសាលំ ការាបេហីតិ។ ឥមិនាហំ [ឱ. ឥមិនាបហំ។] ភោតោ ឧទេនស្ស ភិយ្យោសោ មត្តាយ អត្តមនោ អភិរទ្ធោ យំ មំ ភវំ ឧទេនោ សង្ឃេ ទានេ [ឱ.ម. ទានំ។] សមាទបេតិ ឯសាហំ ភោ ឧទេន ឯតិស្សា ច និច្ចភិក្ខាយ អបរាយ ច និច្ចភិក្ខាយ បាដលិបុត្តេ សង្ឃស្ស ឧបដ្ឋានសាលំ ការាបេស្សាមីតិ។ អថខោ ឃោដមុខោ ព្រាហ្មណោ ឯតិស្សា ច និច្ចភិក្ខាយ អបរាយ ច និច្ចភិក្ខាយ បាដលិបុត្តេ សង្ឃស្ស ឧបដ្ឋានសាលំ ការាបេសិ។ សា ឯតរហិ ឃោដមុខីតិ វុច្ចតីតិ។

ឃោដមុខសុត្តំ ចតុត្ថំ និដ្ឋិតំ។

បញ្ចមំ ចង្កីសុត្តំ

[៦៣] ឯវមេ្ម សុតំ។ ឯកំ សមយំ ភគវា កោសលេសុ ចារិកញ្ចរមានោ មហតា ភិក្ខុសង្ឃេន យេន ឱបាសាទំ [ឱ. ឱបសាទំ។] នាម កោសលានំ ព្រាហ្មណគ្គាមោ តទវសរិ។ តត្រ សុទំ ភគវា ឱបាសាទេ វិហរតិ ឧត្តរេន ឱបាសាទំ ទេវវនេ សាលវនេ។ តេន ខោ បន សមយេន ចង្កី ព្រាហ្មណោ ឱបាសាទំ អជ្ឈាវសតិ សត្តុស្សទំ សតិណកដ្ឋោទកំ សធញ្ញំ រាជភោគំ រញ្ញា បសេនទិនា កោសលេន ទិន្នំ រាជទាយំ ព្រហ្មទេយ្យំ។

[៦៤] អស្សោសុំ ខោ ឱបាសាទកា [ឱ. ឱបសាទកា។] ព្រាហ្មណគហបតិកា សមណោ ខលុ ភោ គោតមោ សក្យបុត្តោ សក្យកុលា បព្វជិតោ កោសលេសុ ចារិកញ្ចរមានោ មហតា ភិក្ខុសង្ឃេន សទ្ធឹ ឱបាសាទំ អនុប្បត្តោ ឱបាសាទេ វិហរតិ ឧត្តរេន ឱបាសាទំ ទេវវនេ សាលវនេ តំ ខោ បន ភវន្តំ គោតមំ ឯវំ កល្យាណោ កិត្តិសទ្ទោ អព្ភុគ្គតោ ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវា សោ ឥមំ លោកំ សទេវកំ សមារកំ សព្រហ្មកំ សស្សមណព្រាហ្មណឹ បជំ សទេវមនុស្សំ សយំ អភិញ្ញា សច្ឆិកត្វា បវេទេតិ សោ ធម្មំ ទេសេតិ អាទិកល្យាណំ មជ្ឈេកល្យាណំ បរិយោសានកល្យាណំ សាត្ថំ សព្យញ្ជនំ កេវលបរិបុណ្ណំ បរិសុទ្ធំ ព្រហ្មចរិយំ បកាសេតិ សាធុ ខោ បន តថារូបានំ អរហតំ ទស្សនំ ហោតីតិ។ អថខោ ឱបាសាទកា ព្រាហ្មណគហបតិកា ឱបាសាទកា និក្ខមិត្វា សង្ឃា សង្ឃីគណីភូតា ឧត្តរេន មុខា គច្ឆន្តិ យេន ទេវវនំ សាលវនំ។ តេន ខោ បន សមយេន ចង្កី ព្រាហ្មណោ ឧបរិ បាសាទេ ទិវា សេយ្យំ ឧបគតោ ហោតិ [ម. ហោតីតិ ន ទិស្សតិ។]។

[៦៥] អទ្ទសា ខោ ចង្កី ព្រាហ្មណោ ឱបាសាទកេ ព្រាហ្មណគហបតិកេ ឱបាសាទា និក្ខមិត្វា សង្ឃេ សង្ឃីគណីភូតេ ឧត្តរេន មុខេ គច្ឆន្តេ យេន ទេវវនំ សាលវនំ ទិស្វាន ខត្តំ អាមន្តេសិ កិន្នុ ខោ ភោ ខត្តេ ឱបាសាទកា ព្រាហ្មណគហបតិកា ឱបាសាទា និក្ខិមិត្វា សង្ឃា សង្ឃីគណីភូតា ឧត្តរេន មុខា គច្ឆន្តិ យេន ទេវវនំ សាលវនន្តិ។ អត្ថិ ភោ ចង្កិ សមណោ គោតមោ សក្យបុត្តោ សក្យកុលា បព្វជិតោ កោសលេសុ ចារិកញ្ចរមានោ មហតា ភិក្ខុសង្ឃេន សទ្ធឹ ឱបាសាទំ អនុប្បត្តោ ឱបាសាទេ វិហរតិ ឧត្តរេន ឱបាសាទំ ទេវវនេ សាលវនេ តំ ខោ បន ភវន្តំ គោតមំ ឯវំ កល្យាណោ កិត្តិសទ្ទោ អព្ភុគ្គតោ ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវាតិ តមេតេ ភវន្តំ គោតមំ ទស្សនាយ ឧបសង្កមន្តីតិ។ តេនហិ ភោ ខត្តេ យេន ឱបាសាទកា ព្រាហ្មណគហបតិកា តេនុបសង្កមិ ឧបសង្កមិត្វា ឱបាសាទកេ ព្រាហ្មណគហបតិកេ ឯវំ វទេហិ ចង្កី ភោ ព្រាហ្មណោ ឯវមាហ អាគមេន្តុ កិរ ភវន្តោ ចង្កីបិ ព្រាហ្មណោ សមណំ គោតមំ ទស្សនាយ ឧបសង្កមតីតិ [ឱ.ម. ឧបសង្កមិស្សតីតិ។]។ ឯវំ ភោតិ ខោ សោ ខត្តា ចង្កិស្ស ព្រាហ្មណស្ស បដិស្សុត្វា យេន ឱបាសាទកា ព្រាហ្មណគហបតិកា តេនុបសង្កមិ ឧបសង្កមិត្វា ឱបាសាទកេ ព្រាហ្មណគហបតិកេ ឯតទវោច ចង្កី ភោ ព្រាហ្មណោ ឯវមាហ អាគមេន្តុ កិរ ភវន្តោ ចង្កីបិ ព្រាហ្មណោ សមណំ គោតមំ ទស្សនាយ ឧបសង្កមិស្សតីតិ។

[៦៦] តេន ខោ បន សមយេន នានាវេរជ្ជកានំ ព្រាហ្មណានំ បញ្ចមត្តានិ ព្រាហ្មណសតានិ ឱបាសាទេ បដិវសន្តិ កេនចិទេវ ករណីយេន។ អស្សោសុំ ខោ តេ ព្រាហ្មណា ចង្កី កិរ ព្រាហ្មណោ សមណំ គោតមំ ទស្សនាយ ឧបសង្កមិស្សតីតិ។ អថ [ឱ.ម. អថខោ។] តេ ព្រាហ្មណា យេន ចង្កី ព្រាហ្មណោ តេនុបសង្កមឹសុ ឧបសង្កមិត្វា ចង្កឹ ព្រាហ្មណំ ឯតទវោចុំ សច្ចំ កិរ ភវំ ចង្កី សមណំ គោតមំ ទស្សនាយ ឧបសង្កមិស្សតីតិ។ ឯវំ ខោ [ឱ.ម. ខោ មេ។] ភោ ហោតិ អហំបិ សមណំ គោតមំ ទស្សនាយ ឧបសង្កមិស្សាមីតិ។ មា ភវំ ចង្កី សមណំ គោតមំ ទស្សនាយ ឧបសង្កមិ ន អរហតិ ភវំ ចង្កី សមណំ គោតមំ ទស្សនាយ ឧបសង្កមិតុំ សមណោ ត្វេវ គោតមោ អរហតិ ភវន្តំ ចង្កឹ ទស្សនាយ ឧបសង្កមិតុំ ភវញ្ហិ ចង្កី ឧភតោសុជាតោ មាតិតោ ច បិតិតោ ច សំសុទ្ធគ្គហណិកោ យាវ សត្តមា បិតាមហយុគា អក្ខិត្តោ អនុបក្កុដ្ឋោ ជាតិវាទេន យម្បិ ភវំ ចង្កី ឧភតោសុជាតោ មាតិតោ ច បិតិតោ ច សំសុទ្ធគ្គហណិកោ យាវ សត្តមា បិតាមហយុគា អក្ខិត្តោ អនុបក្កុដ្ឋោ ជាតិវាទេន ឥមិនាបង្គេន ន អរហតិ ភវំ ចង្កី សមណំ គោតមំ ទស្សនាយ ឧបសង្កមិតុំ សមណោ ត្វេវ គោតមោ អរហតិ ភវន្តំ ចង្កឹ ទស្សនាយ ឧបសង្កមិតុំ ភវញ្ហិ ចង្កី អទ្ធោ មហទ្ធនោ មហាភោគោ ភវញ្ហិ ចង្កី តិណ្ណំ វេទានំ បារគូ សនិឃណ្ឌុកេដុភានំ សាក្ខរប្បភេទានំ ឥតិហាសបញ្ចមានំ បទកោ វេយ្យាករណោ លោកាយតមហាបុរិសលក្ខណេសុ អនវយោ ភវញ្ហិ ចង្កី អភិរូបោ ទស្សនីយោ បាសាទិកោ បរមាយ វណ្ណបោក្ខរតាយ សមន្នាគតោ ព្រហ្មវណ្ណី ព្រហ្មវច្ឆសី អខុទ្ទាវកាសោ ទស្សនាយ ភវញ្ហិ ចង្កី សីលវា ពុឌ្ឍសីលី ពុឌ្ឍសីលេន សមន្នាគតោ ភវញ្ហិ ចង្កី កល្យាណវាចោ កល្យាណវាក្ករណោ បោរិយា វាចាយ សមន្នាគតោ វិសដ្ឋាយ អនេលគឡាយ អត្ថស្ស វិញ្ញាបនិយា ភវញ្ហិ ចង្កី ពហុន្នំ អាចរិយប្បាចរិយោ តីណិ មាណវកសតានិ មន្តេ វាចេតិ ភវញ្ហិ ចង្កី រញ្ញោ បសេនទិស្ស កោសលស្ស សក្កតោ គរុកតោ មានិតោ បូជិតោ អបចិតោ ភវញ្ហិ ចង្កី ព្រាហ្មណស្ស បោក្ខរសាតិស្ស សក្កតោ គរុកតោ មានិតោ បូជិតោ អបចិតោ ភវញ្ហិ ចង្កី ឱបាសាទំ អជ្ឈាវសតិ សត្តុស្សទំ សតិណកដ្ឋោទកំ សធញ្ញំ រាជភោគំ រញ្ញា បសេនទិនា កោសលេន ទិន្នំ រាជទាយំ ព្រហ្មទេយ្យំ យម្បិ ភវំ ចង្កី ឱបាសាទំ អជ្ឈាវសតិ សត្តុស្សទំ សតិណកដ្ឋោទកំ សធញ្ញំ រាជភោគំ រញ្ញា បសេនទិនា កោសលេន ទិន្នំ រាជទាយំ ព្រហ្មទេយ្យំ ឥមិនាបង្គេន ន អរហតិ ភវំ ចង្កី សមណំ គោតមំ ទស្សនាយ ឧបសង្កមិតុំ សមណោ ត្វេវ គោតមោ អរហតិ ភវន្តំ ចង្កឹ ទស្សនាយ ឧបសង្កមិតុន្តិ។

[៦៧] ឯវំ វុត្តេ ចង្កី ព្រាហ្មណោ តេ ព្រាហ្មណេ ឯតទវោច តេនហិ ភោ មមាបិ សុណាថ យថា យថា មយមេវ អរហាម តំ សមណំ គោតមំ ទស្សនាយ ឧបសង្កមិតុំ ន ត្វេវ អរហតិ សោ ភវំ គោតមោ អម្ហាកំ ទស្សនាយ ឧបសង្កមិតុំ សមណោ ខលុ ភោ គោតមោ ឧភតោសុជាតោ មាតិតោ ច បិតិតោ ច សំសុទ្ធគ្គហណិកោ យាវ សត្តមា បិតាមហយុគា អក្ខិត្តោ អនុបក្កុដ្ឋោ ជាតិវាទេន យម្បិ សមណោ គោតមោ ឧភតោសុជាតោ។បេ។ ជាតិវាទេន ឥមិនាបង្គេន ន អរហតិ សោ ភវំ គោតមោ អម្ហាកំ ទស្សនាយ ឧបសង្កមិតុំ អថខោ មយមេវ អរហាម តំ ភវន្តំ គោតមំ ទស្សនាយ ឧបសង្កមិតុំ សមណោ ខលុ ភោ គោតមោ បហូតំ ហិរញ្ញសុវណ្ណំ ឱហាយ បព្វជិតោ ភូមិគតំ ច វេហាសដ្ឋញ្ច សមណោ ខលុ ភោ គោតមោ ទហរោ វ សមានោ សុសុកាឡកេសោ ភទ្រេន យោព្វនេន សមន្នាគតោ បឋមេន វយសា អគារស្មា អនគារិយំ បព្វជិតោ សមណោ ខលុ ភោ គោតមោ អកាមកានំ មាតាបិតូនំ អស្សុមុខានំ រុទន្តានំ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជិតោ សមណោ ខលុ ភោ គោតមោ អភិរូបោ ទស្សនីយោ បាសាទិកោ បរមាយ វណ្ណបោក្ខរតាយ សមន្នាគតោ ព្រហ្មវណ្ណី ព្រហ្មវច្ឆសី អខុទ្ទាវកាសោ ទស្សនាយ សមណោ ខលុ ភោ គោតមោ សីលវា អរិយសីលី កុសលសីលី កុសលេន សីលេន សមន្នាគតោ សមណោ ខលុ ភោ គោតមោ កល្យាណវាចោ កល្យាណវាក្ករណោ បោរិយា វាចាយ សមន្នាគតោ វិស្សដ្ឋាយ អនេលគឡាយ អត្ថស្ស វិញ្ញាបនិយា សមណោ ខលុ ភោ គោតមោ ពហុន្នំ អាចរិយប្បាចរិយោ សមណោ ខលុ ភោ គោតមោ ខីណកាមរាគោ វិគតចាបល្លោ សមណោ ខលុ ភោ គោតមោ កម្មវាទី កិរិយវាទី អបាបបុរេក្ខារោ ព្រហ្មញ្ញាយ បជាយ សមណោ ខលុ ភោ គោតមោ ឧច្ចាកុលា បព្វជិតោ អសំភិន្នា ខត្តិយកុលា សមណោ ខលុ ភោ គោតមោ អទ្ធកុលា បព្វជិតោ មហទ្ធនា មហាភោគា សមណំ ខលុ ភោ គោតមំ តិរោរដ្ឋា តិរោជនបទា សំបុច្ឆិតុំ អាគច្ឆន្តិ សមណំ ខលុ ភោ គោតមំ អនេកានិ ទេវតាសហស្សានិ បាណេហិ សរណំ គតានិ សមណំ ខលុ ភោ គោតមំ ឯវំ កល្យាណោ កិត្តិសទ្ទោ អព្ភុគ្គតោ ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវាតិ សមណោ ខលុ ភោ គោតមោ ទ្វត្តឹសមហាបុរិសលក្ខណេហិ សមន្នាគតោ សមណំ ខលុ ភោ គោតមំ រាជា មាគធោ សេនិយោ ពិម្ពិសារោ សបុត្តទារោ បាណេហិ សរណំ គតោ សមណំ ខលុ ភោ គោតមំ រាជា បសេនទិ កោសលោ សបុត្តទារោ បាណេហិ សរណំ គតោ សមណំ ខលុ ភោ គោតមំ ព្រាហ្មណោ បោក្ខរសាតិ សបុត្តទារោ បាណេហិ សរណំ គតោ សមណោ ខលុ ភោ គោតមោ ឱបាសាទំ អនុប្បត្តោ ឱបាសាទេ វិហរតិ ឧត្តរេន ឱបាសាទំ ទេវវនេ សាលវនេ យេ បន ខោ កេចិ សមណា វា ព្រាហ្មណា វា អម្ហាកំ គាមក្ខេត្តំ អាគច្ឆន្តិ អតិថិនោ តេ ហោន្តិ អតិថី ខោ បនម្ហេហិ សក្កាតព្វា គរុកាតព្វា មានេតព្វា បូជេតព្វា យម្បិ ភោ សមណោ គោតមោ ឱបាសាទំ អនុប្បត្តោ ឱបាសាទេ វិហរតិ ឧត្តរេន ឱបាសាទំ ទេវវនេ សាលវនេ អតិថិម្ហាកំ សមណោ គោតមោ អតិថិ ខោ បនម្ហេហិ សក្កាតព្វោ គរុកាតព្វោ មានេតព្វោ បូជេតព្វោ ឥមិនាបង្គេន ន អរហតិ សោ ភវំ គោតមោ អម្ហាកំ ទស្សនាយ ឧបសង្កមិតុំ អថខោ មយមេវ អរហាម តំ ភវន្តំ គោតមំ ទស្សនាយ ឧបសង្កមិតុំ ឯត្តកំ ខោ អហំ ភោ តស្ស ភោតោ គោតមស្ស វណ្ណំ បរិយាបុណាមិ ន ច សោ ភវំ គោតមោ ឯត្តកវណ្ណោ អបរិមាណវណ្ណោ ហិ សោ ភវំ គោតមោ ឯកមេកេនបិ ភោ អង្គេន សមន្នាគតោ ន អរហតិ សោ ភវំ គោតមោ អម្ហាកំ ទស្សនាយ ឧបសង្កមិតុំ អថខោ មយមេវ អរហាម តំ ភវន្តំ គោតមំ ទស្សនាយ ឧបសង្កមិតុន្តិ [ឱ.ម. ឥតិសទ្ទោ ន ទិស្សតិ។]។ តេនហិ ភោ សព្វេវ មយំ សមណំ គោតមំ ទស្សនាយ ឧបសង្កមិស្សាមាតិ។ អថខោ ចង្កី ព្រាហ្មណោ មហតា ព្រាហ្មណគណេន សទ្ធឹ យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។ តេន ខោ បន សមយេន ភគវា វុឌ្ឍេហិ វុឌ្ឍេហិ ព្រាហ្មណេហិ សទ្ធឹ កិញ្ចិ កិញ្ចិ កថំ សារាណីយំ វីតិសារេត្វា និសិន្នោ ហោតិ។

[៦៨] តេន ខោ បន សមយេន កាបទិកោ នាម [ឱ. កាបដ្ឋិកោ នាម។ ម. កាបដិកោ នាម។] មាណវោ ទហរោ វុត្តសិរោ សោឡសវស្សុទ្ទេសិកោ ជាតិយា តិណ្ណំ វេទានំ បារគូ សនិឃណ្ឌុកេដុភានំ សាក្ខរប្បភេទានំ ឥតិហាសបញ្ចមានំ បទកោ វេយ្យាករណោ លោកាយតមហាបុរិសលក្ខណេសុ អនវយោ តស្សំ បរិសាយំ និសិន្នោ ហោតិ។ សោ វុឌ្ឍានំ វុឌ្ឍានំ ព្រាហ្មណានំ ភគវតា សទ្ធឹ មន្តយមានានំ អន្តរន្តរា កថំ ឱបាតេតិ។ អថខោ ភគវា កាបទិកំ មាណវំ អប្បសាទេសិ មា អាយស្មា ភារទ្វាជោ វុឌ្ឍានំ វុឌ្ឍានំ ព្រាហ្មណានំ មន្តយមានានំ អន្តរន្តរា កថំ ឱបាតេសិ [ឱ. ឱបាតេតុ។ ម. ឱបាតេហិ។] កថាបរិយោសានំ អាយស្មា ភារទ្វាជោ អាគមេតូតិ។

[៦៩] ឯវំ វុត្តេ ចង្កី ព្រាហ្មណោ ភគវន្តំ ឯតទវោច មា ភវំ គោតមោ កាបទិកំ មាណវំ អប្បសាទេសិ កុលបុត្តោ ច កាបទិកោ មាណវោ ពហុស្សុតោ ច កាបទិកោ មាណវោ បណ្ឌិតោ ច កាបទិកោ មាណវោ កល្យាណវាក្ករណោ ច កាបទិកោ មាណវោ បហោតិ ច កាបទិកោ មាណវោ ភោតា គោតមេន សទ្ធឹ អស្មឹ វចនេ បដិមន្តេតុន្តិ។ អថខោ ភគវតោ ឯតទហោសិ អទ្ធា ខោ កាបទិកស្ស មាណវស្ស តេវិជ្ជកេ បាវចនេ កតំ ភវិស្សតិ តថា ហិ នំ ព្រាហ្មណា សំបុរេក្ខរោន្តីតិ។ អថខោ កាបទិកស្ស មាណវស្ស ឯតទហោសិ យទា មេ សមណោ គោតមោ ចក្ខុនា ចក្ខុំ ឧបសំហរិស្សតិ អថាហំ សមណំ គោតមំ បញ្ហំ បុច្ឆិស្សាមីតិ។ អថខោ ភគវា កាបទិកស្ស មាណវស្ស ចេតសា ចេតោបរិវិតក្កមញ្ញាយ យេន កាបទិកោ មាណវោ តេន ចក្ខូនិ ឧបសំហាសិ។ អថខោ កាបទិកស្ស មាណវស្ស ឯតទហោសិ សមន្នាហរតិ ខោ មំ សមណោ គោតមោ យន្នូនាហំ សមណំ គោតមំ បញ្ហំ បុច្ឆេយ្យន្តិ។ អថខោ កាបទិកោ មាណវោ ភគវន្តំ ឯតទវោច យទិទំ ភោ គោតម ព្រាហ្មណានំ បោរាណំ មន្តបទំ ឥតិហីតិហបរម្បរាយ បិដកសម្បទាយ តត្ថ ច ព្រាហ្មណា ឯកំសេន និដ្ឋំ គច្ឆន្តិ ឥទមេវ សច្ចំ មោឃមញ្ញន្តិ ឥធ ភវំ គោតមោ កិមាហាតិ។

[៧០] កឹ បន ភារទ្វាជ អត្ថិ កោចិ ព្រាហ្មណានំ ឯកព្រាហ្មណោបិ យោ ឯវមាហ អហមេតំ ជានាមិ អហមេតំ បស្សាមិ ឥទមេវ សច្ចំ មោឃមញ្ញន្តិ។ នោ ហិទំ ភោ គោតម។ កឹ បន ភារទ្វាជ អត្ថិ កោចិ ព្រាហ្មណានំ ឯកាចរិយោបិ ឯកាចរិយប្បាចរិយោបិ យាវ សត្តមា អាចរិយមហយុគា [ឱ.ម. បិសទ្ទោ ទិស្សតិ។] យោ ឯវមាហ អហមេតំ ជានាមិ អហមេតំ បស្សាមិ ឥទមេវ សច្ចំ មោឃមញ្ញន្តិ។ នោ ហិទំ ភោ គោតម។ កឹ បន ភារទ្វាជ យេបិ តេ ព្រាហ្មណានំ បុព្វកា ឥសយោ មន្តានំ កត្តារោ មន្តានំ បវត្តារោ យេសមិទំ ឯតរហិ ព្រាហ្មណា បោរាណំ មន្តបទំ គីតំ បវុត្តំ សមិហិតំ តទនុគាយន្តិ តទនុភាសន្តិ ភាសិតមនុភាសន្តិ វាចិតមនុវាចេន្តិ សេយ្យថីទំ អដ្ឋកោ វាមកោ វាមទេវោ វេស្សាមិត្តោ យមតគ្គិ អង្គីរសោ ភារទ្វាជោ វាសេដ្ឋោ កស្សបោ ភគុ តេបិ ឯវមាហំសុ មយមេតំ ជានាម មយមេតំ បស្សាម ឥទមេវ សច្ចំ មោឃមញ្ញន្តិ។ នោ ហិទំ ភោ គោតម។

[៧១] ឥតិ កិរ ភារទ្វាជ នត្ថិ កោចិ ព្រាហ្មណានំ ឯកព្រាហ្មណោបិ យោ ឯវមាហ អហមេតំ ជានាមិ អហមេតំ បស្សាមិ ឥទមេវ សច្ចំ មោឃមញ្ញន្តិ នត្ថិ កោចិ ព្រាហ្មណានំ ឯកាចរិយោបិ ឯកាចរិយប្បាចរិយោបិ យាវ សត្តមា អាចរិយមហយុគា យោ ឯវមាហ អហមេតំ ជានាមិ អហមេតំ បស្សាមិ ឥទមេវ សច្ចំ មោឃមញ្ញន្តិ យេបិ តេ ព្រាហ្មណានំ បុព្វកា ឥសយោ មន្តានំ កត្តារោ មន្តានំ បវត្តារោ យេសមិទំ ឯតរហិ ព្រាហ្មណា បោរាណំ មន្តបទំ គីតំ បវុត្តំ សមិហិតំ តទនុគាយន្តិ តទនុភាសន្តិ ភាសិតមនុភាសន្តិ វាចិតមនុវាចេន្តិ សេយ្យថីទំ អដ្ឋកោ វាមកោ វាមទេវោ វេស្សាមិត្តោ យមតគ្គិ អង្គីរសោ ភារទ្វាជោ វាសេដ្ឋោ កស្សបោ ភគុ តេបិ ន ឯវមាហំសុ មយមេតំ ជានាម មយមេតំ បស្សាម ឥទមេវ សច្ចំ មោឃមញ្ញន្តិ។ សេយ្យថាបិ ភារទ្វាជ អន្ធវេណិ បរម្បរាសំសត្តា បុរិមោបិ ន បស្សតិ មជ្ឈិមោបិ ន បស្សតិ បច្ឆិមោបិ ន បស្សតិ ឯវមេវ ខោ ភារទ្វាជ អន្ធវេណូបមំ មញ្ញេ ព្រាហ្មណានំ ភាសិតំ សម្បជ្ជតិ បុរិមោបិ ន បស្សតិ មជ្ឈិមោបិ ន បស្សតិ បច្ឆិមោបិ ន បស្សតិ តំ កឹ មញ្ញសិ ភារទ្វាជ ននុ ឯវំ សន្តេ ព្រាហ្មណានំ អមូលិកា សទ្ធា សម្បជ្ជតីតិ។ ន ខ្វេត្ថ [ឱ. ន ខោត្ថ។] ភោ គោតម ព្រាហ្មណា សទ្ធាយយេវ បយិរុបាសន្តិ អនុស្សវាបេត្ថ ព្រាហ្មណា បយិរុបាសន្តីតិ។

[៧២] បុព្វេវ ខោ ត្វំ ភារទ្វាជ សទ្ធំ អគមាសិ អនុស្សវំ ឥទានិ វទេសិ បញ្ច ខោ ឥមេ ភារទ្វាជ ធម្មា ទិដ្ឋេវ ធម្មេ ទ្វិធាវិបាកា កតមេ បញ្ច សទ្ធា រុចិ អនុស្សវោ អាការបរិវិតក្កោ ទិដ្ឋិនិជ្ឈានក្ខន្តិ ឥមេ ខោ ភារទ្វាជ បញ្ច ធម្មា ទិដ្ឋេវ ធម្មេ ទ្វិធាវិបាកា អបិច ភារទ្វាជ សុស្សទ្ទហិតំយេវ ហោតិ តញ្ច ហោតិ រិត្តំ តុច្ឆំ មុសា នោ ចេបិ សុស្សទ្ទហិតំ ហោតិ តញ្ច ហោតិ ភូតំ តច្ឆំ អនញ្ញថា អបិច ភារទ្វាជ សុរុចិតំយេវ ហោតិ។បេ។ ស្វានុស្សុតំយេវ ហោតិ។បេ។ សុបរិវិតក្កំយេវ ហោតិ។បេ។ សុនិជ្ឈាយិតំយេវ ហោតិ តញ្ច ហោតិ រិត្តំ តុច្ឆំ មុសា នោ ចេបិ សុនិជ្ឈាយិតំ ហោតិ តញ្ច ហោតិ ភូតំ តច្ឆំ អនញ្ញថា សច្ចំ អនុរក្ខតា ភារទ្វាជ វិញ្ញុនា បុរិសេន នាលមេត្ថ ឯកំសេន និដ្ឋំ គន្តុំ ឥទមេវ សច្ចំ មោឃមញ្ញន្តិ។ កិត្តាវតា បន ភោ គោតម សច្ចានុរក្ខណា ហោតិ កិត្តាវតា សច្ចមនុរក្ខតិ សច្ចានុរក្ខណំ មយំ ភវន្តំ គោតមំ បុច្ឆាមាតិ។

[៧៣] សទ្ធា ចេបិ ភារទ្វាជ បុរិសស្ស ហោតិ ឯវំ មេ សទ្ធាតិ ឥតិ វទំ [ម. ឯវមេវ សិជ្ឈតីតិ ឥតិ វាតន្តិ ទិស្សន្តិ។] សច្ចមនុរក្ខតិ ន ត្វេវ តាវ ឯកំសេន និដ្ឋំ គច្ឆតិ ឥទមេវ សច្ចំ មោឃមញ្ញន្តិ ឯត្តាវតា ខោ ភារទ្វាជ សច្ចមនុរក្ខណា ហោតិ ឯត្តាវតា សច្ចមនុរក្ខតិ ឯត្តាវតា ច មយំ សច្ចានុរក្ខណំ បញ្ញាបេម ន ត្វេវ តាវ សច្ចានុពោធោ ហោតិ រុចិ ចេបិ ភារទ្វាជ បុរិសស្ស ហោតិ… អនុស្សវោ ចេបិ ភារទ្វាជ បុរិសស្ស ហោតិ… អាការបរិវិតក្កោ ចេបិ ភារទ្វាជ បុរិសស្ស ហោតិ… ទិដ្ឋិនិជ្ឈានក្ខន្តិ ចេបិ ភារទ្វាជ បុរិសស្ស ហោតិ ឯវំ មេ [ម. ឯវមេវ។] ទិដ្ឋិនិជ្ឈានក្ខន្តីតិ ឥតិ វទំ [ម. វាតំ។] សច្ចមនុរក្ខតិ ន ត្វេវ តាវ ឯកំសេន និដ្ឋំ គច្ឆតិ ឥទមេវ សច្ចំ មោឃមញ្ញន្តិ ឯត្តាវតា ខោ ភារទ្វាជ សច្ចមនុរក្ខណា ហោតិ ឯត្តាវតា សច្ចមនុរក្ខតិ ឯត្តាវតា ច មយំ សច្ចានុរក្ខណំ បញ្ញាបេម ន ត្វេវ តាវ សច្ចានុពោធោ ហោតីតិ។ ឯត្តាវតា ភោ គោតម សច្ចមនុរក្ខណា ហោតិ ឯត្តាវតា សច្ចមនុរក្ខតិ ឯត្តាវតា ច មយំ សច្ចានុរក្ខណំ បញ្ញាបេម កិត្តាវតា បន ភោ គោតម សច្ចានុពោធោ ហោតិ កិត្តាវតា សច្ចមនុពុជ្ឈតិ សច្ចានុពោធំ មយំ ភវន្តំ គោតមំ បុច្ឆាមាតិ។

[៧៤] ឥធ កិរ ភារទ្វាជ ភិក្ខុ អញ្ញតរំ គាមំ វា និគមំ វា ឧបនិស្សាយ វិហរតិ។ តមេវ [ឱ.ម. តមេនំ។] គហបតិ វា គហបតិបុត្តោ វា ឧបសង្កមិត្វា តីសុ ធម្មេសុ សមន្នេសតិ លោភនីយេសុ ធម្មេសុ ទោសនីយេសុ ធម្មេសុ មោហនីយេសុ ធម្មេសុ អត្ថិ នុ ខោ ឥមស្ស អាយស្មតោ តថារូបា លោភនីយា ធម្មា យថារូបេហិ លោភនីយេហិ ធម្មេហិ បរិយាទិន្នចិត្តោ អជានំ វា វទេយ្យ ជានាមីតិ អបស្សំ វា វទេយ្យ បស្សាមីតិ បរំ វា តថត្តាយ សមាទបេយ្យ យំ បរេសំ អស្ស ទីឃរត្តំ អហិតាយ ទុក្ខាយាតិ។ តមេនំ សមន្នេសមានោ ឯវំ ជានាតិ នត្ថិ ខោ ឥមស្សាយស្មតោ តថារូបា លោភនីយា ធម្មា យថារូបេហិ លោភនីយេហិ ធម្មេហិ បរិយាទិន្នចិត្តោ អជានំ វា វទេយ្យ ជានាមីតិ អបស្សំ វា វទេយ្យ បស្សាមីតិ បរំ វា តថត្តាយ សមាទបេយ្យ យំ បរេសំ អស្ស ទីឃរត្តំ អហិតាយ ទុក្ខាយាតិ។ តថា [ម. តថារូបោ។] ខោ បនិមស្សាយស្មតោ កាយសមាចារោ តថា [ម. តថារូបោ។] វចីសមាចារោ យថាតំ អលុទ្ធស្ស យំ ខោ បន អយមាយស្មា ធម្មំ ទេសេតិ គម្ភីរោ សោ ធម្មោ ទុទ្ទសោ ទុរនុពោធោ សន្តោ បណីតោ អតក្កាវចរោ ធម្មោ និបុណោ បណ្ឌិតវេទនីយោ ន សោ សុទេសិយោ [ម. សុទេសនីយោ។] លុទ្ធេនាតិ។ យតោ នំ សមន្នេសមានោ វិសុទ្ធំ លោភនីយេហិ ធម្មេហិ បស្សតិ សមនុបស្សតិ តតោ នំ ឧត្តរឹ សមន្នេសតិ ទោសនីយេសុ ធម្មេសុ អត្ថិ នុ ខោ ឥមស្សាយស្មតោ តថារូបា ទោសនីយា ធម្មា យថារូបេហិ ទោសនីយេហិ ធម្មេហិ បរិយាទិន្នចិត្តោ អជានំ វា វទេយ្យ ជានាមីតិ អបស្សំ វា វទេយ្យ បស្សាមីតិ បរំ វា តថត្តាយ សមាទបេយ្យ យំ បរេសំ អស្ស ទីឃរត្តំ អហិតាយ ទុក្ខាយាតិ។ តមេនំ សមន្នេសមានោ ឯវំ ជានាតិ នត្ថិ ខោ ឥមស្សាយស្មតោ តថារូបា ទោសនីយា ធម្មា យថារូបេហិ ទោសនីយេហិ ធម្មេហិ បរិយាទិន្នចិត្តោ អជានំ វា វទេយ្យ ជានាមីតិ អបស្សំ វា វទេយ្យ បស្សាមីតិ បរំ វា តថត្តាយ សមាទបេយ្យ យំ បរេសំ អស្ស ទីឃរត្តំ អហិតាយ ទុក្ខាយាតិ។ តថា ខោ បនិមស្សាយស្មតោ កាយសមាចារោ តថា វចីសមាចារោ យថាតំ អទុដ្ឋស្ស យំ ខោ បន អយមាយស្មា ធម្មំ ទេសេតិ គម្ភីរោ សោ ធម្មោ ទុទ្ទសោ ទុរនុពោធោ សន្តោ បណីតោ អតក្កាវចរោ និបុណោ បណ្ឌិតវេទនីយោ ន សោ ធម្មោ សុទេសិយោ ទុដ្ឋេនាតិ។ យតោ នំ សមន្នេសមានោ វិសុទ្ធំ ទោសនីយេហិ ធម្មេហិ បស្សតិ សមនុបស្សតិ តតោ នំ ឧត្តរឹ សមន្នេសតិ មោហនីយេសុ ធម្មេសុ អត្ថិ នុ ខោ ឥមស្សាយស្មតោ តថារូបា មោហនីយា ធម្មា យថារូបេហិ មោហនីយេហិ ធម្មេហិ បរិយាទិន្នចិត្តោ អជានំ វា វទេយ្យ ជានាមីតិ អបស្សំ វា វទេយ្យ បស្សាមីតិ បរំ វា តថត្តាយ សមាទបេយ្យ យំ បរេសំ អស្ស ទីឃរត្តំ អហិតាយ ទុក្ខាយាតិ។ តមេនំ សមន្នេសមានោ ឯវំ ជានាតិ នត្ថិ ខោ ឥមស្សាយស្មតោ តថារូបា មោហនីយា ធម្មា យថារូបេហិ មោហនីយេហិ ធម្មេហិ បរិយាទិន្នចិត្តោ អជានំ វា វទេយ្យ ជានាមីតិ អបស្សំ វា វទេយ្យ បស្សាមីតិ បរំ វា តថត្តាយ សមាទបេយ្យ យំ បរេសំ អស្ស ទីឃរត្តំ អហិតាយ ទុក្ខាយាតិ។ តថា ខោ បនិមស្សាយស្មតោ កាយសមាចារោ តថា វចីសមាចារោ យថាតំ អមូឡ្ហស្ស យំ ខោ បន អយមាយស្មា ធម្មំ ទេសេតិ គម្ភីរោ សោ ធម្មោ ទុទ្ទសោ ទុរនុពោធោ សន្តោ បណីតោ អតក្កាវចរោ និបុណោ បណ្ឌិតវេទនីយោ ន សោ ធម្មោ សុទេសិយោ មូឡ្ហេនាតិ។ យតោ នំ សមន្នេសមានោ វិសុទ្ធំ មោហនីយេហិ ធម្មេហិ បស្សតិ សមនុបស្សតិ អថ តម្ហិ សទ្ធំ និវេសេតិ សទ្ធាជាតោ ឧបសង្កមតិ ឧបសង្កមន្តោ បយិរុបាសតិ បយិរុបាសន្តោ សោតំ ឱទហតិ ឱហិតស្សោតោ ធម្មំ សុណាតិ សុត្វា ធម្មំ ធារេតិ ធតានំ ធម្មានំ អត្ថំ ឧបបរិក្ខតិ អត្ថំ ឧបបរិក្ខតោ ធម្មា និជ្ឈានំ ខមន្តិ ធម្មនិជ្ឈានក្ខន្តិយា សតិ ឆន្ទោ ជាយតិ ឆន្ទជាតោ ឧស្សហតិ ឧស្សហិត្វា តុលេតិ តុលយិត្វា បទហតិ បហិតត្តោ សមានោ កាយេន ចេវ បរមត្ថសច្ចំ សច្ឆិករោតិ បញ្ញាយ ច នំ អតិវិជ្ឈ បស្សតិ។ ឯត្តាវតា ខោ ភារទ្វាជ សច្ចានុពោធោ ហោតិ ឯត្តាវតា សច្ចមនុពុជ្ឈតិ ឯត្តាវតា ច មយំ សច្ចានុពោធំ បញ្ញាបេម នត្វេវ សច្ចានុប្បត្តិ ហោតីតិ។ ឯត្តាវត្តា ភោ គោតម សច្ចានុពោធោ ហោតិ ឯត្តាវតា សច្ចមនុពុជ្ឈតិ ឯត្តាវតា ច មយំ សច្ចានុពោធំ បញ្ញាបេម កិត្តាវតា បន ភោ គោតម សច្ចានុប្បត្តិ ហោតិ កិត្តាវតា សច្ចមនុប្បាបុណាតិ សច្ចានុប្បត្តឹ មយំ ភវន្តំ គោតមំ បុច្ឆាមាតិ។

[៧៥] តេសំយេវ ភារទ្វាជ ធម្មានំ អាសេវនា ភាវនា ពហុលីកម្មំ សច្ចានុប្បត្តិ ហោតិ ឯត្តាវតា ខោ ភារទ្វាជ សច្ចានុប្បត្តិ ហោតិ ឯត្តាវតា សច្ចមនុប្បាបុណាតិ ឯត្តាវតា ច មយំ សច្ចានុប្បត្តឹ បញ្ញាបេមាតិ។ ឯត្តាវតា ភោ គោតម សច្ចានុប្បត្តិ ហោតិ ឯត្តាវតា សច្ចមនុប្បាបុណាតិ ឯត្តាវតា ច មយំ សច្ចានុប្បត្តឹ បញ្ញាបេម សច្ចានុប្បត្តិយា បន ភោ គោតម កតមោ ធម្មោ ពហុការោ សច្ចានុប្បត្តិយា ពហុការំ ធម្មំ មយំ ភវន្តំ គោតមំ បុច្ឆាមាតិ។

[៧៦] សច្ចានុប្បត្តិយា ខោ ភារទ្វាជ បធានំ ពហុការំ នោ ចេ តំ បទហេយ្យ នយិទំ សច្ចមនុប្បាបុណេយ្យ យស្មា ច ខោ បទហតិ តស្មា សច្ចមនុប្បាបុណាតិ តស្មា សច្ចានុប្បត្តិយា បធានំ ពហុការន្តិ។ បធានស្ស បន ភោ គោតម កតមោ ធម្មោ ពហុការោ បធានស្ស ពហុការំ ធម្មំ មយំ ភវន្តំ គោតមំ បុច្ឆាមាតិ។ បធានស្ស ខោ ភារទ្វាជ តុលនា ពហុការា នោ ចេ តំ តុលេយ្យ នយិទំ បទហេយ្យ យស្មា ច ខោ តុលេតិ តស្មា បទហតិ តស្មា បធានស្ស តុលនា ពហុការាតិ។ តុលនាយ បន ភោ គោតម កតមោ ធម្មោ ពហុការោ តុលនាយ ពហុការំ ធម្មំ មយំ ភវន្តំ គោតមំ បុច្ឆាមាតិ។ តុលនាយ ខោ ភារទ្វាជ ឧស្សាហោ ពហុការោ នោ ចេ តំ ឧស្សហេយ្យ នយិទំ តុលេយ្យ យស្មា ច ខោ ឧស្សហតិ តស្មា តុលេតិ តស្មា តុលនាយ ឧស្សាហោ ពហុការោតិ។ ឧស្សាហស្ស បន ភោ គោតម កតមោ ធម្មោ ពហុការោ ឧស្សាហស្ស ពហុការំ ធម្មំ មយំ ភវន្តំ គោតមំ បុច្ឆាមាតិ។ ឧស្សាហស្ស ខោ ភារទ្វាជ ឆន្ទោ ពហុការោ នោ ចេ តំ ឆន្ទោ ជាយេថ នយិទំ ឧស្សហេយ្យ យស្មា ច ខោ ឆន្ទោ ជាយតិ តស្មា ឧស្សហតិ តស្មា ឧស្សាហស្ស ឆន្ទោ ពហុការោតិ។ ឆន្ទស្ស បន ភោ គោតម កតមោ ធម្មោ ពហុការោ ឆន្ទស្ស ពហុការំ ធម្មំ មយំ ភវន្តំ គោតមំ បុច្ឆាមាតិ។ ឆន្ទស្ស ខោ ភារទ្វាជ ធម្មនិជ្ឈានក្ខន្តិ ពហុការា នោ ចេ តំ ធម្មា និជ្ឈានំ ខមេយ្យុំ នយិទំ ឆន្ទោ ជាយេថ យស្មា ច ខោ ធម្មា និជ្ឈានំ ខមន្តិ តស្មា ឆន្ទោ ជាយតិ តស្មា ឆន្ទស្ស ធម្មនិជ្ឈានក្ខន្តិ ពហុការាតិ។ ធម្មនិជ្ឈានក្ខន្តិយា បន ភោ គោតម កតមោ ធម្មោ ពហុការោ ធម្មនិជ្ឈានក្ខន្តិយា ពហុការំ ធម្មំ មយំ ភវន្តំ គោតមំ បុច្ឆាមាតិ។ ធម្មនិជ្ឈានក្ខន្តិយា ខោ ភារទ្វាជ អត្ថុបបរិក្ខា ពហុការា នោ ចេ តំ អត្ថំ ឧបបរិក្ខេយ្យ នយិទំ ធម្មា និជ្ឈានំ ខមេយ្យុំ យស្មា ច ខោ អត្ថំ ឧបបរិក្ខតិ តស្មា ធម្មា និជ្ឈានំ ខមន្តិ តស្មា ធម្មនិជ្ឈានក្ខន្តិយា អត្ថុបបរិក្ខា ពហុការាតិ។ អត្ថុបបរិក្ខាយ បន ភោ គោតម កតមោ ធម្មោ ពហុការោ អត្ថុបបរិក្ខាយ ពហុការំ ធម្មំ មយំ ភវន្តំ គោតមំ បុច្ឆាមាតិ។ អត្ថុបបរិក្ខាយ ខោ ភារទ្វាជ ធម្មធារណា ពហុការា នោ ចេ តំ ធម្មំ ធារេយ្យ នយិទំ អត្ថំ ឧបបរិក្ខេយ្យ យស្មា ច ខោ ធម្មំ ធារេតិ តស្មា អត្ថំ ឧបបរិក្ខតិ តស្មា អត្ថុបបរិក្ខាយ ធម្មធារណា ពហុការាតិ។ ធម្មធារណាយ បន ភោ គោតម កតមោ ធម្មោ ពហុការោ ធម្មធារណាយ ពហុការំ ធម្មំ មយំ ភវន្តំ គោតមំ បុច្ឆាមាតិ។ ធម្មធារណាយ ខោ ភារទ្វាជ ធម្មស្សវនំ ពហុការំ នោ ចេ តំ ធម្មំ សុណេយ្យ នយិទំ ធម្មំ ធារេយ្យ យស្មា ច ខោ ធម្មំ សុណាតិ តស្មា ធម្មំ ធារេតិ តស្មា ធម្មធារណាយ ធម្មស្សវនំ ពហុការន្តិ។ ធម្មស្សវនស្ស បន ភោ គោតម កតមោ ធម្មោ ពហុការោ ធម្មស្សវនស្ស ពហុការំ ធម្មំ មយំ ភវន្តំ គោតមំ បុច្ឆាមាតិ។ ធម្មស្សវនស្ស ខោ ភារទ្វាជ សោតាវធានំ ពហុការំ នោ ចេ តំ សោតំ ឱទហេយ្យ នយិទំ ធម្មំ សុណេយ្យ យស្មា ច ខោ សោតំ ឱទហតិ តស្មា ធម្មំ សុណាតិ តស្មា ធម្មស្សវនស្ស សោតាវធានំ ពហុការន្តិ។ សោតាវធានស្ស បន ភោ គោតម កតមោ ធម្មោ ពហុការោ សោតាវធានស្ស ពហុការំ ធម្មំ មយំ ភវន្តំ គោតមំ បុច្ឆាមាតិ។ សោតាវធានស្ស ខោ ភារទ្វាជ បយិរុបាសនា ពហុការា នោ ចេ តំ បយិរុបាសេយ្យ នយិទំ សោតំ ឱទហេយ្យ យស្មា ច ខោ បយិរុបាសតិ តស្មា សោតំ ឱទហតិ តស្មា សោតាវធានស្ស បយិរុបាសនា ពហុការាតិ។ បយិរុបាសនាយ បន ភោ គោតម កតមោ ធម្មោ ពហុការោ បយិរុបាសនាយ ពហុការំ ធម្មំ មយំ ភវន្តំ គោតមំ បុច្ឆាមាតិ។ បយិរុបាសនាយ ខោ ភារទ្វាជ ឧបសង្កមនំ ពហុការំ នោ ចេ តំ ឧបសង្កមេយ្យ នយិទំ បយិរុបាសេយ្យ យស្មា ច ខោ ឧបសង្កមតិ តស្មា បយិរុបាសតិ តស្មា បយិរុបាសនាយ ឧបសង្កមនំ ពហុការន្តិ។ ឧបសង្កមនស្ស បន ភោ គោតម កតមោ ធម្មោ ពហុការោ ឧបសង្កមនស្ស ពហុការំ ធម្មំ មយំ ភវន្តំ គោតមំ បុច្ឆាមាតិ។ ឧបសង្កមនស្ស ខោ ភារទ្វាជ សទ្ធា ពហុការា នោ ចេ តំ សទ្ធា ជាយេថ នយិទំ ឧបសង្កមេយ្យ យស្មា ច ខោ សទ្ធា ជាយតិ តស្មា ឧបសង្កមតិ តស្មា ឧបសង្កមនស្ស សទ្ធា ពហុការាតិ។

[៧៧] សច្ចានុរក្ខណំ មយំ ភវន្តំ គោតមំ អបុច្ឆិម្ហា [ឱ.ម. អបុច្ឆិម្ហ។] សច្ចានុរក្ខណំ ភវំ គោតមោ ព្យាកាសិ តញ្ច បនម្ហាកំ រុច្ចតិ ចេវ ខមតិ ច តេន ចម្ហា អត្តមនា សច្ចមនុពោធំ មយំ ភវន្តំ គោតមំ អបុច្ឆិម្ហា សច្ចមនុពោធំ ភវំ គោតមោ ព្យាកាសិ តញ្ច បនម្ហាកំ រុច្ចតិ ចេវ ខមតិ ច តេន ចម្ហា អត្តមនា សច្ចានុបត្តឹ មយំ ភវន្តំ គោតមំ អបុច្ឆិម្ហា សច្ចានុបត្តឹ ភវំ គោតមោ ព្យាកាសិ តញ្ច បនម្ហាកំ រុច្ចតិ ចេវ ខមតិ ច តេន ចម្ហា អត្តមនា សច្ចានុបត្តិយា ពហុការំ ធម្មំ មយំ ភវន្តំ គោតមំ អបុច្ឆិម្ហា សច្ចានុបត្តិយា ពហុការំ ធម្មំ ភវំ គោតមោ ព្យាកាសិ តញ្ច បនម្ហាកំ រុច្ចតិ ចេវ ខមតិ ច តេន ចម្ហា អត្តមនា យំ យទេវ ច មយំ ភវន្តំ គោតមំ អបុច្ឆិម្ហា តំ តទេវ ភវំ គោតមោ ព្យាកាសិ តញ្ច បនម្ហាកំ រុច្ចតិ ចេវ ខមតិ ច តេន ចម្ហា អត្តមនា មយំ ហិ ភោ គោតម បុព្វេ ឯវំ ជានាម កេ ច មុណ្ឌកា សមណកា ឥព្ភា កណ្ហា ពន្ធុបាទប្បច្ចា កេ ច ធម្មស្ស អញ្ញាតារោតិ អជនេសិ វត មេ ភវំ គោតមោ សមណេសុ សមណប្បេមំ សមណេសុ សមណប្បសាទំ សមណេសុ សមណគារវំ អភិក្កន្តំ ភោ គោតម។បេ។ ឧបាសកំ មំ ភវំ គោតមោ ធារេតុ អជ្ជតគ្គេ បាណុបេតំ សរណង្គតន្តិ។

ចង្កីសុត្តំ បញ្ចមំ និដ្ឋិតំ។

ឆដ្ឋំ ឯសុការីសុត្តំ

[៧៨] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ អថខោ ឯសុការី ព្រាហ្មណោ យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។

[៧៩] ឯកមន្តំ និសិន្នោ ខោ ឯសុការី ព្រាហ្មណោ ភគវន្តំ ឯតទវោច ព្រាហ្មណា ភោ គោតម ចតស្សោ បារិចរិយា បញ្ញបេន្តិ ព្រាហ្មណស្ស បារិចរិយំ បញ្ញបេន្តិ ខត្តិយស្ស បារិចរិយំ បញ្ញបេន្តិ វេស្សស្ស បារិចរិយំ បញ្ញបេន្តិ សុទ្ទស្ស បារិចរិយំ បញ្ញបេន្តិ។ តត្រិទំ ភោ គោតម ព្រាហ្មណា ព្រាហ្មណស្ស បារិចរិយំ បញ្ញបេន្តិ ព្រាហ្មណោ វា ព្រាហ្មណំ បរិចរេយ្យ ខត្តិយោ វា ព្រាហ្មណំ បរិចរេយ្យ វេស្សោ វា ព្រាហ្មណំ បរិចរេយ្យ សុទ្ទោ វា ព្រាហ្មណំ បរិចរេយ្យាតិ ឥទំ ខោ ភោ គោតម ព្រាហ្មណា ព្រាហ្មណស្ស បារិចរិយំ បញ្ញបេន្តិ។ តត្រិទំ ភោ គោតម ព្រាហ្មណា ខត្តិយស្ស បារិចរិយំ បញ្ញបេន្តិ ខត្តិយោ វា ខត្តិយំ បរិចរេយ្យ វេស្សោ វា ខត្តិយំ បរិចរេយ្យ សុទ្ទោ វា ខត្តិយំ បរិចរេយ្យាតិ ឥទំ ខោ ភោ គោតម ព្រាហ្មណា ខត្តិយស្ស បារិចរិយំ បញ្ញបេន្តិ។ តត្រិទំ ភោ គោតម ព្រាហ្មណា វេស្សស្ស បារិចរិយំ បញ្ញបេន្តិ វេស្សោ វា វេស្សំ បរិចរេយ្យ សុទ្ទោ វា វេស្សំ បរិចរេយ្យាតិ ឥទំ ខោ ភោ គោតម ព្រាហ្មណា វេស្សស្ស បារិចរិយំ បញ្ញបេន្តិ។ តត្រិទំ ភោ គោតម ព្រាហ្មណា សុទ្ទស្ស បារិចរិយំ បញ្ញបេន្តិ សុទ្ទោ វ សុទ្ទំ បរិចរេយ្យ កោ បនញ្ញោ សុទ្ទំ បរិចរិស្សតីតិ ឥទំ ខោ ភោ គោតម ព្រាហ្មណា សុទ្ទស្ស បារិចរិយំ បញ្ញបេន្តិ ព្រាហ្មណា ភោ គោតម ឥមា ចតស្សោ បារិចរិយា បញ្ញបេន្តិ ឥទំ [ឱ. ឥធាតិ ទិស្សតិ។] ភវំ គោតមោ កិមាហាតិ។

[៨០] កឹ បន ព្រាហ្មណ សព្វោ លោកោ ព្រាហ្មណានំ ឯតទព្ភនុជានាតិ ឥមា ចតស្សោ បារិចរិយា បញ្ញបេន្តូតិ [ម. បញ្ញបេន្តីតិ។]។ នោ ហិទំ ភោ គោតម។ សេយ្យថាបិ ព្រាហ្មណ បុរិសោ ទឡិទ្ទោ អស្សកោ អនាឡ្ហិយោ តស្ស អកាមស្ស វិសំ [ឱ. ពិលំ។ ម. ពីលំ។] ឱលគ្គេយ្យុំ ឥទន្តេ អម្ភោ បុរិស មំសំ ខាទិតព្វំ មូលញ្ច អនុប្បទាតព្វន្តិ ឯវមេវ ខោ ព្រាហ្មណ ព្រាហ្មណា អប្បដិញ្ញាយ [ឱ. អប្បដិញ្ញាយេតេសំ។] តេសំ សមណព្រាហ្មណានំ អថ ច បនិមា ចតស្សោ បារិចរិយា បញ្ញបេន្តិ។ នាហំ ព្រាហ្មណ សព្វំ បរិចរិតព្វន្តិ វទាមិ ន បនាហំ ព្រាហ្មណ សព្វំ ន បរិចរិតព្វន្តិ វទាមិ។ យំ ហិស្ស ព្រាហ្មណ បរិចរតោ បារិចរិយាហេតុ បាបិយោ អស្ស ន សេយ្យោ នាហន្តំ បរិចរិតព្វន្តិ វទាមិ យញ្ច ខ្វស្ស ព្រាហ្មណ បរិចរតោ បារិចរិយាហេតុ សេយ្យោ អស្ស ន បាបិយោ តមហំ បរិចរិតព្វន្តិ វទាមិ។ ខត្តិយញ្ចេបិ ព្រាហ្មណ ឯវំ បុច្ឆេយ្យុំ យំ វា តេ បរិចរតោ បារិចរិយាហេតុ បាបិយោ អស្ស ន សេយ្យោ យំ វា តេ បរិចរតោ បារិចរិយាហេតុ សេយ្យោ អស្ស ន បាបិយោ កមេត្ថ បរិចរេយ្យាសីតិ។ ខត្តិយោបិ ហិ ព្រាហ្មណ សម្មា ព្យាករមានោ ឯវំ ព្យាករេយ្យ យំ ហិ មេ បរិចរតោ បារិចរិយាហេតុ បាបិយោ អស្ស ន សេយ្យោ នាហន្តំ បរិចរេយ្យំ យញ្ច ខោ មេ បរិចរតោ បារិចរិយាហេតុ សេយ្យោ អស្ស ន បាបិយោ តមហំ បរិចរេយ្យន្តិ។ ព្រាហ្មណំ ចេបិ ព្រាហ្មណ… វេស្សំ ចេបិ ព្រាហ្មណ… សុទ្ទំ ចេបិ ព្រាហ្មណ ឯវំ បុច្ឆេយ្យុំ យំ វា តេ បរិចរតោ បារិចរិយាហេតុ បាបិយោ អស្ស ន សេយ្យោ យំ វា តេ បរិចរតោ បារិចរិយាហេតុ សេយ្យោ អស្ស ន បាបិយោ កមេត្ថ បរិចរេយ្យាសីតិ។ សុទ្ទោបិ [ឱ.ម. ឯត្ថន្តរេ ហិសទ្ទោ ទិស្សតិ។] ព្រាហ្មណ សម្មា ព្យាករមានោ ឯវំ ព្យាករេយ្យ យំ ហិ មេ បរិចរតោ បារិចរិយាហេតុ បាបិយោ អស្ស ន សេយ្យោ នាហន្តំ បរិចរេយ្យំ យញ្ច ខោ មេ បរិចរតោ បរិចរិយាហេតុ សេយ្យោ អស្ស ន បាបិយោ តមហំ បរិចរេយ្យន្តិ។

[៨១] នាហំ ព្រាហ្មណ ឧច្ចាកុលីនតា សេយ្យសោតិ [ឱ.ម. សេយ្យំ សោតិ។ បាបិយំ សោតិ។] វទាមិ ន បនាហំ ព្រាហ្មណ ឧច្ចាកុលីនតា បាបិយសោតិ [ឱ.ម. សេយ្យំ សោតិ។ បាបិយំ សោតិ។] វទាមិ។ នាហំ ព្រាហ្មណ ឧឡារវណ្ណតា សេយ្យសោតិ វទាមិ ន បនាហំ ព្រាហ្មណ ឧឡារវណ្ណតា បាបិយសោតិ វទាមិ។ នាហំ ព្រាហ្មណ ឧឡារភោគតា សេយ្យសោតិ វទាមិ ន បនាហំ ព្រាហ្មណ ឧឡារភោគតា បាបិយសោតិ វទាមិ។ ឧច្ចាកុលីនោបិ ហិ ព្រាហ្មណ ឥធេកច្ចោ បាណាតិបាតី ហោតិ អទិន្នាទាយី ហោតិ កាមេសុមិច្ឆាចារី ហោតិ មុសាវាទី ហោតិ បិសុណវាចោ ហោតិ ផរុសវាចោ ហោតិ សម្ផប្បលាបី ហោតិ អភិជ្ឈាលុ ហោតិ ព្យាបន្នចិត្តោ ហោតិ មិច្ឆាទិដ្ឋី ហោតិ តស្មា ន ឧច្ចាកុលីនតា សេយ្យសោតិ វទាមិ។ ឧច្ចាកុលីនោបិ ហិ ព្រាហ្មណ ឥធេកច្ចោ បាណាតិបាតា បដិវិរតោ ហោតិ អទិន្នាទានា បដិវិរតោ ហោតិ កាមេសុមិច្ឆាចារា បដិវិរតោ ហោតិ មុសាវាទា បដិវិរតោ ហោតិ បិសុណាយ វាចាយ បដិវិរតោ ហោតិ ផរុសាយ វាចាយ បដិវិរតោ ហោតិ សម្ផប្បលាបា បដិវិរតោ ហោតិ អនភិជ្ឈាលុ ហោតិ អព្យាបន្នចិត្តោ ហោតិ សម្មាទិដ្ឋី ហោតិ តស្មា ន ឧច្ចាកុលីនតា បាបិយសោតិ វទាមិ។ ឧឡារវណ្ណោបិ ហិ ព្រាហ្មណ ឥធេកច្ចោ បាណាតិបាតី ហោតិ អទិន្នាទាយី ហោតិ កាមេសុមិច្ឆាចារី ហោតិ មុសាវាទី ហោតិ បិសុណវាចោ ហោតិ ផរុសវាចោ ហោតិ សម្ផប្បលាបី ហោតិ អភិជ្ឈាលុ ហោតិ ព្យាបន្នចិត្តោ ហោតិ មិច្ឆាទិដ្ឋី ហោតិ តស្មា ន ឧឡារវណ្ណតា សេយ្យសោតិ វទាមិ។ ឧឡារវណ្ណោបិ ហិ ព្រាហ្មណ ឥធេកច្ចោ បាណាតិបាតា បដិវិរតោ ហោតិ អទិន្នាទានា បដិវិរតោ ហោតិ កាមេសុមិច្ឆាចារា បដិវិរតោ ហោតិ មុសាវាទា បដិវិរតោ ហោតិ បិសុណាយ វាចាយ បដិវិរតោ ហោតិ ផរុសាយ វាចាយ បដិវិរតោ ហោតិ សម្ផប្បលាបា បដិវិរតោ ហោតិ អនភិជ្ឈាលុ ហោតិ អព្យាបន្នចិត្តោ ហោតិ សម្មាទិដ្ឋី ហោតិ តស្មា ន ឧឡារវណ្ណតា បាបិយសោតិ វទាមិ។ ឧឡារភោគោបិ ហិ ព្រាហ្មណ ឥធេកច្ចោ បាណាតិបាតី ហោតិ អទិន្នាទាយី ហោតិ កាមេសុមិច្ឆាចារី ហោតិ មុសាវាទី ហោតិ បិសុណវាចោ ហោតិ ផរុសវាចោ ហោតិ សម្ផប្បលាបី ហោតិ អភិជ្ឈាលុ ហោតិ អព្យាបន្នចិត្តោ ហោតិ មិច្ឆាទិដ្ឋី ហោតិ តស្មា ន ឧឡារភោគតា សេយ្យសោតិ វទាមិ។ ឧឡារភោគោបិ ហិ ព្រាហ្មណ ឥធេកច្ចោ បាណាតិបាតា បដិវិរតោ ហោតិ អទិន្នាទានា បដិវិរតោ ហោតិ កាមេសុមិច្ឆាចារា បដិវិរតោ ហោតិ មុសាវាទា បដិវិរតោ ហោតិ បិសុណាយ វាចាយ បដិវិរតោ ហោតិ ផរុសាយ វាចាយ បដិវិរតោ ហោតិ សម្ផប្បលាបា បដិវិរតោ ហោតិ អនភិជ្ឈាលុ ហោតិ អព្យាបន្នចិត្តោ ហោតិ សម្មាទិដ្ឋី ហោតិ តស្មា ន ឧឡារភោគតា បាបិយសោតិ វទាមិ នាហំ ព្រាហ្មណ សព្វំ បរិចរិតព្វន្តិ វទាមិ ន បនាហំ ព្រាហ្មណ សព្វំ ន បរិចរិតព្វន្តិ វទាមិ។ យំ ហិស្ស ព្រាហ្មណ បរិចរតោ បារិចរិយាហេតុ សទ្ធា វឌ្ឍតិ សីលំ វឌ្ឍតិ សុតំ វឌ្ឍតិ ចាគោ វឌ្ឍតិ បញ្ញា វឌ្ឍតិ តមហំ បរិចរិតព្វន្តិ វទាមីតិ។

[៨២] ឯវំ វុត្តេ ឯសុការី ព្រាហ្មណោ ភគវន្តំ ឯតទវោច ព្រាហ្មណា ភោ គោតម ចត្តារិ ធនានិ បញ្ញបេន្តិ ព្រាហ្មណស្ស សទ្ធនំ [ឱ.ម. សន្ធនំ។] បញ្ញបេន្តិ ខត្តិយស្ស សទ្ធនំ បញ្ញបេន្តិ វេស្សស្ស សទ្ធនំ បញ្ញបេន្តិ សុទ្ទស្ស សទ្ធនំ បញ្ញបេន្តិ។ តត្រិទំ ភោ គោតម ព្រាហ្មណា ព្រាហ្មណស្ស សទ្ធនំ បញ្ញបេន្តិ ភិក្ខាចរិយំ ភិក្ខាចរិយញ្ច បន ព្រាហ្មណោ សទ្ធនំ អតិមញ្ញមានោ អកិច្ចការី ហោតិ គោបោវ អទិន្នំ អាទិយមានោតិ ឥទំ ខោ ភោ គោតម ព្រាហ្មណា ព្រាហ្មណស្ស សទ្ធនំ បញ្ញបេន្តិ។ តត្រិទំ ភោ គោតម ព្រាហ្មណា ខត្តិយស្ស សទ្ធនំ បញ្ញបេន្តិ ធនុកលាបំ ធនុកលាបញ្ច បន ខត្តិយោ សទ្ធនំ អតិមញ្ញមានោ អកិច្ចការី ហោតិ គោបោវ អទិន្នំ អាទិយមានោតិ ឥទំ ខោ ភោ គោតម ព្រាហ្មណា ខត្តិយស្ស សទ្ធនំ បញ្ញបេន្តិ។ តត្រិទំ ភោ គោតម ព្រាហ្មណា វេស្សស្ស សទ្ធនំ បញ្ញបេន្តិ កសិគោរក្ខំ កសិគោរក្ខញ្ច បន វេស្សោ សទ្ធនំ អតិមញ្ញមានោ អកិច្ចការី ហោតិ គោបោវ អទិន្នំ អាទិយមានោតិ ឥទំ ខោ ភោ គោតម ព្រាហ្មណា វេស្សស្ស សទ្ធនំ បញ្ញបេន្តិ។ តត្រិទំ ភោ គោតម ព្រាហ្មណា សុទ្ទស្ស សទ្ធនំ បញ្ញបេន្តិ អសិតព្យាភង្គឹ អសិតព្យាភង្គិញ្ច បន សុទ្ទោ សន្ធនំ អតិមញ្ញមានោ អកិច្ចការី ហោតិ គោបោវ អទិន្នំ អាទិយមានោតិ ឥទំ ខោ ភោ គោតម ព្រាហ្មណា សុទ្ទស្ស សទ្ធនំ បញ្ញបេន្តិ។ [ឱ. ព្រាហ្មណា ភោ គោតមាត្យាទិបយោគេ ទិស្សតិ។] ឥមានិ ចត្តារិ ធនានិ បញ្ញបេន្តិ ឥធ ភវំ គោតមោ កិមាហាតិ។

[៨៣] កឹ បន ព្រាហ្មណ សព្វោ លោកោ ព្រាហ្មណានំ ឯតទព្ភនុជានាតិ ឥមានិ ចត្តារិ ធនានិ បញ្ញបេន្តូតិ។ នោ ហិទំ ភោ គោតម។ សេយ្យថាបិ ព្រាហ្មណ បុរិសោ ទឡិទ្ទោ អស្សកោ អនាឡ្ហិយោ តស្ស អកាមស្ស វិសំ ឱលគ្គេយ្យុំ ឥទន្តេ អម្ភោ បុរិស មំសំ ខាទិតព្វំ មូលញ្ច អនុប្បទាតព្វន្តិ ឯវមេវ ខោ ព្រាហ្មណ ព្រាហ្មណា អប្បដិញ្ញាយ តេសំ សមណព្រាហ្មណានំ អថ ច បនិមានិ ចត្តារិ ធនានិ បញ្ញបេន្តិ។ អរិយំ ខោ បន អហំ ព្រាហ្មណ លោកុត្តរំ ធម្មំ បុរិសស្ស សទ្ធនំ បញ្ញបេមិ បោរាណំ ខោ បនស្ស មាតាបេត្តិកំ កុលវំសំ អនុស្សរតោ យត្ថ យត្ថេវ អត្តភាវស្ស អភិនិព្វត្តិ ហោតិ តេន តេនេវ សំខ្យំ [ឱ. សង្ខំ។] គច្ឆតិ ខត្តិយកុលេ ចេ អត្តភាវស្ស អភិនិព្វត្តិ ហោតិ ខត្តិយោត្វេវ សំខ្យំ គច្ឆតិ ព្រាហ្មណកុលេ ចេ អត្តភាវស្ស អភិនិព្វត្តិ ហោតិ ព្រាហ្មណោត្វេវ សំខ្យំ គច្ឆតិ វេស្សកុលេ ចេ អត្តភាវស្ស អភិនិព្វត្តិ ហោតិ វេស្សោត្វេវ សំខ្យំ គច្ឆតិ សុទ្ទកុលេ ចេ អត្តភាវស្ស អភិនិព្វត្តិ ហោតិ សុទ្ទោត្វេវ សំខ្យំ គច្ឆតិ។ សេយ្យថាបិ ព្រាហ្មណ យំ យទេវ បច្ចយំ បដិច្ច អគ្គិ ជលតិ តេន តេនេវ សំខ្យំ គច្ឆតិ។ កដ្ឋញ្ចេ បដិច្ច អគ្គិ ជលតិ កដ្ឋគ្គិត្វេវ សំខ្យំ គច្ឆតិ សកលិកញ្ចេ បដិច្ច អគ្គិ ជលតិ សកលិកគ្គិត្វេវ សំខ្យំ គច្ឆតិ តិណញ្ចេ បដិច្ច អគ្គិ ជលតិ តិណគ្គិត្វេវ សំខ្យំ គច្ឆតិ គោមយញ្ចេ បដិច្ច អគ្គិ ជលតិ គោមយគ្គិត្វេវ សំខ្យំ គច្ឆតិ ឯវមេវ ខោ អហំ ព្រាហ្មណ អរិយំ លោកុត្តរំ ធម្មំ បុរិសស្ស សទ្ធនំ បញ្ញបេមិ បោរាណំ ខោ បនស្ស មាតាបេត្តិកំ កុលវំសំ អនុស្សរតោ យត្ថ យត្ថេវ អត្តភាវស្ស អភិនិព្វត្តិ ហោតិ តេន តេនេវ សំខ្យំ គច្ឆតិ ខត្តិយកុលេ ចេ អត្តភាវស្ស អភិនិព្វត្តិ ហោតិ ខត្តិយោត្វេវ សំខ្យំ គច្ឆតិ ព្រាហ្មណកុលេ ចេ អត្តភាវស្ស អភិនិព្វត្តិ ហោតិ ព្រាហ្មណោត្វេវ សំខ្យំ គច្ឆតិ វេស្សកុលេ ចេ អត្តភាវស្ស អភិនិព្វត្តិ ហោតិ វេស្សោត្វេវ សំខ្យំ គច្ឆតិ សុទ្ទកុលេ ចេ អត្តភាវស្ស អភិនិព្វត្តិ ហោតិ សុទ្ទោត្វេវ សំខ្យំ គច្ឆតិ។

[៨៤] ខត្តិយកុលា ចេបិ ព្រាហ្មណ អគារស្មា អនគារិយំ បព្វជិតោ ហោតិ សោ ច តថាគតប្បវេទិតំ ធម្មវិនយំ អាគម្ម បាណាតិបាតា បដិវិរតោ ហោតិ អទិន្នាទានា បដិវិរតោ ហោតិ អព្រហ្មចរិយា បដិវិរតោ ហោតិ មុសាវាទា បដិវិរតោ ហោតិ បិសុណាយ វាចាយ បដិវិរតោ ហោតិ ផរុសាយ វាចាយ បដិវិរតោ ហោតិ សម្ផប្បលាបា បដិវិរតោ ហោតិ អនភិជ្ឈាលុ ហោតិ អព្យាបន្នចិត្តោ ហោតិ សម្មាទិដ្ឋី ហោតិ អារាធកោ ហោតិ ញាយំ ធម្មំ កុសលំ។ ព្រាហ្មណកុលា ចេបិ ព្រាហ្មណ អគារស្មា អនគារិយំ បព្វជិតោ ហោតិ សោ ច តថាគតប្បវេទិតំ ធម្មវិនយំ អាគម្ម បាណាតិបាតា បដិវិរតោ ហោតិ អទិន្នាទានា បដិវិរតោ ហោតិ អព្រហ្មចរិយា បដិវិរតោ ហោតិ មុសាវាទា បដិវិរតោ ហោតិ។បេ។ សម្មាទិដ្ឋី ហោតិ អារាធកោ ហោតិ ញាយំ ធម្មំ កុសលំ។ វេស្សកុលា ចេបិ ព្រាហ្មណ អគារស្មា អនគារិយំ បព្វជិតោ ហោតិ សោ ច តថាគតប្បវេទិតំ ធម្មវិនយំ អាគម្ម បាណាតិបាតា បដិវិរតោ ហោតិ អទិន្នាទានា បដិវិរតោ ហោតិ អព្រហ្មចរិយា បដិវិរតោ ហោតិ មុសាវាទា បដិវិរតោ ហោតិ។បេ។ សម្មាទិដ្ឋី ហោតិ អារាធកោ ហោតិ ញាយំ ធម្មំ កុសលំ។ សុទ្ទកុលា ចេបិ ព្រាហ្មណ អគារស្មា អនគារិយំ បព្វជិតោ ហោតិ សោ ច តថាគតប្បវេទិតំ ធម្មវិនយំ អាគម្ម បាណាតិបាតា បដិវិរតោ ហោតិ អទិន្នាទានា បដិវិរតោ ហោតិ អព្រហ្មចរិយា បដិវិរតោ ហោតិ មុសាវាទា បដិវិរតោ ហោតិ បិសុណាយ វាចាយ បដិវិរតោ ហោតិ ផរុសាយ វាចាយ បដិវិរតោ ហោតិ សម្ផប្បលាបា បដិវិរតោ ហោតិ អនភិជ្ឈាលុ ហោតិ អព្យាបន្នចិត្តោ ហោតិ សម្មាទិដ្ឋី ហោតិ អារាធកោ ហោតិ ញាយំ ធម្មំ កុសលំ។ តំ កឹ មញ្ញសិ ព្រាហ្មណ ព្រាហ្មណោ វ នុ ខោ បហោតិ អស្មឹ បទេសេ អវេរំ អព្យាបជ្ឈំ មេត្តចិត្តំ ភាវេតុំ នោ ខត្តិយោ នោ វេស្សោ នោ សុទ្ទោតិ។ នោ ហិទំ ភោ គោតម ខត្តិយោបិ ហិ ភោ គោតម បហោតិ អស្មឹ បទេសេ អវេរំ អព្យាបជ្ឈំ មេត្តចិត្តំ ភាវេតុំ ព្រាហ្មណោបិ ហិ ភោ គោតម… វេស្សោបិ ហិ ភោ គោតម… សុទ្ទោបិ ហិ ភោ គោតម… សព្វេបិ ហិ ភោ គោតម ចត្តារោ វណ្ណា បហោន្តិ អស្មឹ បទេសេ អវេរំ អព្យាបជ្ឈំ មេត្តចិត្តំ ភាវេតុន្តិ។

[៨៥] ឯវមេវ ខោ ព្រាហ្មណ ខត្តិយកុលា ចេបិ អគារស្មា អនគារិយំ បព្វជិតោ ហោតិ សោ ច តថាគតប្បវេទិតំ ធម្មវិនយំ អាគម្ម បាណាតិបាតា បដិវិរតោ ហោតិ អទិន្នាទានា បដិវិរតោ ហោតិ អព្រហ្មចរិយា បដិវិរតោ ហោតិ មុសាវាទា បដិវិរតោ ហោតិ បិសុណាយ វាចាយ បដិវិរតោ ហោតិ ផរុសាយ វាចាយ បដិវិរតោ ហោតិ សម្ផប្បលាបា បដិវិរតោ ហោតិ អនភិជ្ឈាលុ ហោតិ អព្យាបន្នចិត្តោ ហោតិ សម្មាទិដ្ឋី ហោតិ អារាធកោ ហោតិ ញាយំ ធម្មំ កុសលំ។ ព្រាហ្មណកុលា ចេបិ ព្រាហ្មណ… វេស្សកុលា ចេបិ ព្រាហ្មណ… សុទ្ទកុលា ចេបិ ព្រាហ្មណ អគារស្មា អនគារិយំ បព្វជិតោ ហោតិ សោ ច តថាគតប្បវេទិតំ ធម្មវិនយំ អាគម្ម បាណាតិបាតា បដិវិរតោ ហោតិ អទិន្នាទានា បដិវិរតោ ហោតិ អព្រហ្មចរិយា បដិវិរតោ ហោតិ មុសាវាទា បដិវិរតោ ហោតិ បិសុណាយ វាចាយ បដិវិរតោ ហោតិ ផរុសាយ វាចាយ បដិវិរតោ ហោតិ សម្ផប្បលាបា បដិវិរតោ ហោតិ អនភិជ្ឈាលុ ហោតិ អព្យាបន្នចិត្តោ ហោតិ សម្មាទិដ្ឋី ហោតិ អារាធកោ ហោតិ ញាយំ ធម្មំ កុសលំ។ តំ កឹ មញ្ញសិ ព្រាហ្មណ ព្រាហ្មណោ វ នុ ខោ បហោតិ សោត្តឹ សិនានំ អាទាយ នទឹ គន្ត្វា រជោជល្លំ បវាហេតុំ នោ ខត្តិយោ នោ វេស្សោ នោ សុទ្ទោតិ។ នោ ហិទំ ភោ គោតម ខត្តិយោបិ ហិ ភោ គោតម បហោតិ សោត្តឹ សិនានំ អាទាយ នទឹ គន្ត្វា រជោជល្លំ បវាហេតុំ ព្រាហ្មណោបិ ហិ ភោ គោតម… វេស្សោបិ ហិ ភោ គោតម … សុទ្ទោបិ ហិ ភោ គោតម… សព្វេបិ ហិ ភោ គោតម ចត្តារោ វណ្ណា បហោន្តិ សោត្តឹ សិនានំ អាទាយ នទឹ គន្ត្វា រជោជល្លំ បវាហេតុន្តិ។

[៨៦] ឯវមេវ ខោ ព្រាហ្មណ ខត្តិយកុលា ចេបិ អគារស្មា អនគារិយំ បព្វជិតោ ហោតិ សោ ច តថាគតប្បវេទិតំ ធម្មវិនយំ អាគម្ម បាណាតិបាតា បដិវិរតោ ហោតិ អទិន្នាទានា បដិវិរតោ ហោតិ អព្រហ្មចរិយា បដិវិរតោ ហោតិ មុសាវាទា បដិវិរតោ ហោតិ បិសុណាយ វាចាយ បដិវិរតោ ហោតិ ផរុសាយ វាចាយ បដិវិរតោ ហោតិ សម្ផប្បលាបា បដិវិរតោ ហោតិ អនភិជ្ឈាលុ ហោតិ អព្យាបន្នចិត្តោ ហោតិ សម្មាទិដ្ឋី ហោតិ អារាធកោ ហោតិ ញាយំ ធម្មំ កុសលំ។ ព្រាហ្មណកុលា ចេបិ ព្រាហ្មណ… វេស្សកុលា ចេបិ ព្រាហ្មណ… សុទ្ទកុលា ចេបិ ព្រាហ្មណ អគារស្មា អនគារិយំ បព្វជិតោ ហោតិ សោ ច តថាគតប្បវេទិតំ ធម្មវិនយំ អាគម្ម បាណាតិបាតា បដិវិរតោ ហោតិ អទិន្នាទានា បដិវិរតោ ហោតិ អព្រហ្មចរិយា បដិវិរតោ ហោតិ មុសាវាទា បដិវិរតោ ហោតិ បិសុណាយ វាចាយ បដិវិរតោ ហោតិ ផរុសាយ វាចាយ បដិវិរតោ ហោតិ សម្ផប្បលាបា បដិវិរតោ ហោតិ អនភិជ្ឈាលុ ហោតិ អព្យាបន្នចិត្តោ ហោតិ សម្មាទិដ្ឋី ហោតិ អារាធកោ ហោតិ ញាយំ ធម្មំ កុសលំ។ តំ កឹ មញ្ញសិ ព្រាហ្មណ ឥធ រាជា ខត្តិយោ មុទ្ធាវសិត្តោ នានាជច្ចានំ បុរិសានំ បុរិសសតំ សន្និបាតេយ្យ អាយន្តុ ភោន្តោ យេ តត្ថ ខត្តិយកុលា ព្រាហ្មណកុលា រាជញ្ញកុលា ឧប្បន្នា សាកស្ស វា សាលស្ស វា សលឡស្ស វា ចន្ទនស្ស វា បទុមកស្ស វា ឧត្តរារណឹ អាទាយ អគ្គឹ អភិនិព្វត្តេន្តុ តេជោ បាតុករោន្តុ អាយន្តុ បន ភោន្តោ យេ តត្ថ ចណ្ឌាលកុលា នេសាទកុលា វេណុកុលា រថការកុលា បុក្កុសកុលា ឧប្បន្នា សាបានទោណិយា វា សូករទោណិយា វា រជកទោណិយា វា ឯលណ្ឌកដ្ឋស្ស វា ឧត្តរារណឹ អាទាយ អគ្គឹ អភិនិព្វត្តេន្តុ តេជោ បាតុករោន្តូតិ។ តំ កឹ មញ្ញសិ ព្រាហ្មណ យោ ឯវ នុ ខោ សោ ខត្តិយកុលា ព្រាហ្មណកុលា រាជញ្ញកុលា ឧប្បន្នេហិ សាកស្ស វា សាលស្ស វា សលឡស្ស វា ចន្ទនស្ស វា បទុមកស្ស វា ឧត្តរារណឹ អាទាយ អគ្គិ អភិនិព្វត្តោ តេជោ បាតុកតោ ស្វេវ នុ ខ្វស្ស អគ្គិ អច្ចិមា ចេវ វណ្ណិមា ច បភស្សរោ ច តេន សក្កា អគ្គិនា អគ្គិករណីយំ កាតុំ យោ បន សោ ចណ្ឌាលកុលា នេសាទកុលា វេណុកុលា រថការកុលា បុក្កុសកុលា ឧប្បន្នេហិ សាបានទោណិយា វា សូករទោណិយា វា រជកទោណិយា វា ឯលណ្ឌកដ្ឋស្ស វា ឧត្តរារណឹ អាទាយ អគ្គិ អភិនិព្វត្តោ តេជោ បាតុកតោ ស្វាស្ស អគ្គិ ន ចេវ អច្ចិមា ន ច វណ្ណិមា ន ច បភស្សរោ ន ច តេន សក្កា អគ្គិនា អគ្គិករណីយំ កាតុន្តិ។ នោ ហិទំ ភោ គោតម យោបិ សោ ភោ គោតម ខត្តិយកុលា ព្រាហ្មណកុលា រាជញ្ញកុលា ឧប្បន្នេហិ សាកស្ស វា សាលស្ស វា សលឡស្ស វា ចន្ទនស្ស វា បទុមកស្ស វា ឧត្តរារណឹ អាទាយ អគ្គិ អភិនិព្វត្តោ តេជោ បាតុកតោ ស្វាស្ស អគ្គិ អច្ចិមា ចេវ វណ្ណិមា ច បភស្សរោ ច តេន ច សក្កា អគ្គិនា អគ្គិករណីយំ កាតុំ យោបិ សោ ចណ្ឌាលកុលា នេសាទកុលា វេណុកុលា រថការកុលា បុក្កុសកុលា ឧប្បន្នេហិ សាបានទោណិយា វា សូករទោណិយា វា រជកទោណិយា វា ឯលណ្ឌកដ្ឋស្ស វា ឧត្តរារណឹ អាទាយ អគ្គិ អភិនិព្វត្តោ តេជោ បាតុកតោ សោបិស្ស អគ្គិ អច្ចិមា ចេវ វណ្ណិមា ច បភស្សរោ ច តេនបិ ច សក្កា អគ្គិនា អគ្គិករណីយំ កាតុំ សព្វោបិ ហិ ភោ គោតម អគ្គិ អច្ចិមា ចេវ វណ្ណិមា ច បភស្សរោ ច សព្វេនបិ ច សក្កា អគ្គិនា អគ្គិករណីយំ កាតុន្តិ។

[៨៧] ឯវមេវ ខោ ព្រាហ្មណ ខត្តិយកុលា ចេបិ អគារស្មា អនគារិយំ បព្វជិតោ ហោតិ សោ ច តថាគតប្បវេទិតំ ធម្មវិនយំ អាគម្ម បាណាតិបាតា បដិវិរតោ ហោតិ អទិន្នាទានា បដិវិរតោ ហោតិ អព្រហ្មចរិយា បដិវិរតោ ហោតិ មុសាវាទា បដិវិរតោ ហោតិ បិសុណាយ វាចាយ បដិវិរតោ ហោតិ ផរុសាយ វាចាយ បដិវិរតោ ហោតិ សម្ផប្បលាបា បដិវិរតោ ហោតិ អនភិជ្ឈាលុ ហោតិ អព្យាបន្នចិត្តោ ហោតិ សម្មាទិដ្ឋី ហោតិ អារាធកោ ហោតិ ញាយំ ធម្មំ កុសលំ។ ព្រាហ្មណកុលា ចេបិ ព្រាហ្មណ… វេស្សកុលា ចេបិ ព្រាហ្មណ… សុទ្ទកុលា ចេបិ ព្រាហ្មណ អគារស្មា អនគារិយំ បព្វជិតោ ហោតិ សោ ច តថាគតប្បវេទិតំ ធម្មវិនយំ អាគម្ម បាណាតិបាតា បដិវិរតោ ហោតិ អទិន្នាទានា បដិវិរតោ ហោតិ អព្រហ្មចរិយា បដិវិរតោ ហោតិ មុសាវាទា បដិវិរតោ ហោតិ បិសុណាយ វាចាយ បដិវិរតោ ហោតិ ផរុសាយ វាចាយ បដិវិរតោ ហោតិ សម្ផប្បលាបា បដិវិរតោ ហោតិ អនភិជ្ឈាលុ ហោតិ អព្យាបន្នចិត្តោ ហោតិ សម្មាទិដ្ឋី ហោតិ អារាធកោ ហោតិ ញាយំ ធម្មំ កុសលន្តិ។

[៨៨] ឯវំ វុត្តេ ឯសុការី ព្រាហ្មណោ ភគវន្តំ ឯតទវោច អភិក្កន្តំ ភោ គោតម។បេ។ ឧបាសកំ មំ ភវំ គោតមោ ធារេតុ អជ្ជតគ្គេ បាណុបេតំ សរណង្គតន្តិ។

ឯសុការីសុត្តំ ឆដ្ឋំ និដ្ឋិតំ។

សត្តមំ ធនញ្ជានិសុត្តំ

[ឱ. ធានញ្ជានិសុត្តំ។ ម. ធនញ្ជានីសុត្តំ។]

[៨៩] ឯវម្មេ សុតំ។ ឯកំ សមយំ ភគវា រាជគហេ វិហរតិ វេឡុវនេ កលន្ទកនិវាបេ។ តេន ខោ បន សមយេន អាយស្មា សារីបុត្តោ ទក្ខិណាគិរិស្មឹ ចារិកញ្ចរតិ មហតា ភិក្ខុសង្ឃេន សទ្ធឹ។ អថខោ អញ្ញតរោ ភិក្ខុ រាជគហេ វស្សំ វុត្ថោ យេន ទក្ខិណាគិរិ យេនាយស្មា សារីបុត្តោ តេនុបសង្កមិ ឧបសង្កមិត្វា អាយស្មតា សារីបុត្តេន សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។

[៩០] ឯកមន្តំ និសិន្នំ ខោ តំ ភិក្ខុំ អាយស្មា សារីបុត្តោ ឯតទវោច កច្ចាវុសោ ភគវា អរោគោ ច ពលវា ចាតិ។ អរោគោ ចាវុសោ ភគវា ពលវា ចាតិ។ កច្ចិ បនាវុសោ ភិក្ខុសង្ឃោ អរោគោ ច ពលវា ចាតិ។ ភិក្ខុសង្ឃោបិ ខោ អាវុសោ អរោគោ ច ពលវា ចាតិ។ ឯត្ថ អាវុសោ តណ្ឌុលបាលទ្វារាយំ ធនញ្ជានិ នាម ព្រាហ្មណោ អត្ថិ កច្ចាវុសោ ធនញ្ជានិ [ឱ.ម. ឯត្ថន្តរេ នាមាតិ ទិស្សតិ។] ព្រាហ្មណោ អរោគោ ច ពលវា ចាតិ។ ធនញ្ជានិបិ ខោ អាវុសោ ព្រាហ្មណោ អរោគោ ច ពលវា ចាតិ។ កច្ចិ បនាវុសោ ធនញ្ជានិ ព្រាហ្មណោ អប្បមត្តោតិ។ កុតោ [ម. កុតោ បនាវុសោ។] នោ បនាវុសោ ធនញ្ជានិស្ស ព្រាហ្មណស្ស អប្បមាទោ ធនញ្ជានិ អាវុសោ ព្រាហ្មណោ រាជានំ និស្សាយ ព្រាហ្មណគហបតិកេ វិលុម្បតិ ព្រាហ្មណគហបតិកេ និស្សាយ រាជានំ វិលុម្បតិ យាបិស្ស ភរិយា សទ្ធា សទ្ធា កុលា អានីតា សាបិ [ឱ. សាបិស្ស។] កាលកតា អញ្ញស្ស ភរិយា អស្សទ្ធា អស្សទ្ធា កុលា អានីតាតិ។ ទុស្សុតំ វតាវុសោ អស្សុម្ហា យេ មយំ ធនញ្ជានឹ ព្រាហ្មណំ បមត្តំ អស្សុម្ហា អប្បេវ នាម មយំ កទាចិ ករហចិ ធនញ្ជានិនា ព្រាហ្មណេន សទ្ធឹ សមាគច្ឆេយ្យាម អប្បេវ នាម សិយា កោចិទេវ កថាសល្លាបោតិ។ អថខោ អាយស្មា សារីបុត្តោ ទក្ខិណាគិរិស្មឹ យថាភិរន្តំ វិហរិត្វា យេន រាជគហំ តេន ចារិកំ បក្កាមិ អនុបុព្វេន ចារិកញ្ចរមានោ យេន រាជគហំ តទវសរិ។

[៩១] តត្រ សុទំ អាយស្មា សារីបុត្តោ រាជគហេ វិហរតិ វេឡុវនេ កលន្ទកនិវាបេ។ អថខោ អាយស្មា សារីបុត្តោ បុព្វណ្ហសមយំ និវាសេត្វា បត្តចីវរមាទាយ រាជគហំ បាវិសិ។ តេន ខោ បន សមយេន ធនញ្ជានិ ព្រាហ្មណោ ពហិនគរេ គាវោ គោដ្ឋេ ទុហាបេតិ។ អថខោ អាយស្មា សារីបុត្តោ រាជគហេ បិណ្ឌាយ ចរិត្វា បច្ឆាភត្តំ បិណ្ឌបាតប្បដិក្កន្តោ យេន ធនញ្ជានិ ព្រាហ្មណោ តេនុបសង្កមិ។ អទ្ទសា ខោ ធនញ្ជានិ ព្រាហ្មណោ អាយស្មន្តំ សារីបុត្តំ ទូរតោ វ អាគច្ឆន្តំ ទិស្វាន យេនាយស្មា សារីបុត្តោ តេនុបសង្កមិ ឧបសង្កមិត្វា អាយស្មន្តំ សារីបុត្តំ ឯតទវោច ឥតោ ភោ សារីបុត្ត បយោ បីយតំ តាវ ភត្តស្ស កាលោ ភវិស្សតីតិ។ អលំ ព្រាហ្មណ កតំ មេ អជ្ជ ភត្តកិច្ចំ អមុកស្មឹ មេ រុក្ខមូលេ ទិវាវិហារោ ភវិស្សតិ តត្រ អាគច្ឆេយ្យាសីតិ។ ឯវំ ភោតិ ខោ ធនញ្ជានិ ព្រាហ្មណោ អាយស្មតោ សារីបុត្តស្ស បច្ចស្សោសិ។ អថខោ ធនញ្ជានិ ព្រាហ្មណោ បច្ឆាភត្តំ ភុត្តបាតរាសោ យេនាយស្មា សារីបុត្តោ តេនុបសង្កមិ ឧបសង្កមិត្វា អាយស្មតា សារីបុត្តេន សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។

[៩២] ឯកមន្តំ និសិន្នំ ខោ ធនញ្ជានឹ ព្រាហ្មណំ អាយស្មា សារីបុត្តោ ឯតទវោច កច្ចិសិ ធនញ្ជានិ អប្បមត្តោតិ។ កុតោ ភោ សារីបុត្ត អម្ហាកំ អប្បមាទោ យេសន្នោ មាតាបិតរោ បោសេតព្វា បុត្តទារោ បោសេតព្វោ ទាសកម្មករបោរិសំ បោសេតព្វា មិត្តាមច្ចានំ មិត្តាមច្ចករណីយំ កាតព្វំ ញាតិសាលោហិតានំ ញាតិសាលោហិតករណីយំ កាតព្វំ អតិថីនំ អតិថិករណីយំ កាតព្វំ បុព្វបេតានំ បុព្វបេតករណីយំ កាតព្វំ ទេវតានំ ទេវតាករណីយំ កាតព្វំ រញ្ញោ រាជករណីយំ កាតព្វំ អយម្បិ កាយោ បិណេតព្វោ ព្រូហេតព្វោតិ។

[៩៣] តំ កឹ មញ្ញសិ ធនញ្ជានិ ឥធេកច្ចោ មាតាបិតូនំ ហេតុ អធម្មចារី វិសមចារី អស្ស តមេនំ អធម្មចរិយវិសមចរិយាហេតុ [ឱ.ម. អធម្មចរិយាវិសមចរិយាហេតុ។] និរយំ និរយបាលា ឧបកឌ្ឍេយ្យុំ លភេយ្យ នុ ខោ សោ អហំ ខោ មាតាបិតូនំ ហេតុ អធម្មចារី វិសមចារី អហោសឹ មា មំ និរយំ និរយបាលាតិ មាតាបិតរោ វា បនស្ស លភេយ្យុំ ឯសោ ខោ អម្ហាកំ ហេតុ អធម្មចារី វិសមចារី អហោសិ មា នំ និរយំ និរយបាលាតិ។ នោ ហិទំ ភោ សារីបុត្ត អថខោ នំ វិកន្ទន្តំយេវ និរយេ និរយបាលា បក្ខិបេយ្យុំ។

[៩៤] តំ កឹ មញ្ញសិ ធនញ្ជានិ ឥធេកច្ចោ បុត្តទារស្ស ហេតុ អធម្មចារី វិសមចារី អស្ស តមេនំ អធម្មចរិយវិសមចរិយាហេតុ និរយំ និរយបាលា ឧបកឌ្ឍេយ្យុំ លភេយ្យ នុ ខោ សោ អហំ ខោ បុត្តទារស្ស ហេតុ អធម្មចារី វិសមចារី អហោសឹ មា មំ និរយំ និរយបាលាតិ បុត្តទារោ វា បនស្ស លភេយ្យ ឯសោ ខោ អម្ហាកំ ហេតុ អធម្មចារី វិសមចារី អហោសិ មា នំ និរយំ និរយបាលាតិ។ នោ ហិទំ ភោ សារីបុត្ត អថខោ នំ វិកន្ទន្តំយេវ និរយេ និរយបាលា បក្ខិបេយ្យុំ។

[៩៥] តំ កឹ មញ្ញសិ ធនញ្ជានិ ឥធេកច្ចោ ទាសកម្មករបោរិសស្ស ហេតុ អធម្មចារី វិសមចារី អស្ស តមេនំ អធម្មចរិយវិសមចរិយាហេតុ និរយំ និរយបាលា ឧបកឌ្ឍេយ្យុំ លភេយ្យ នុ ខោ សោ អហំ ខោ ទាសកម្មករបោរិសស្ស ហេតុ អធម្មចារី វិសមចារី អហោសឹ មា មំ និរយំ និរយបាលាតិ ទាសកម្មករបោរិសំ វា បនស្ស លភេយ្យ ឯសោ ខោ អម្ហាកំ ហេតុ អធម្មចារី វិសមចារី អហោសិ មា នំ និរយំ និរយបាលាតិ។ នោ ហិទំ ភោ សារីបុត្ត អថខោ នំ វិកន្ទន្តំយេវ និរយេ និរយបាលា បក្ខិបេយ្យុំ។

[៩៦] តំ កឹ មញ្ញសិ ធនញ្ជានិ ឥធេកច្ចោ មិត្តាមច្ចានំ ហេតុ អធម្មចារី វិសមចារី អស្ស តមេនំ អធម្មចរិយវិសមចរិយាហេតុ និរយំ និរយបាលា ឧបកឌ្ឍេយ្យុំ លភេយ្យ នុ ខោ សោ អហំ ខោ មិត្តាមច្ចានំ ហេតុ អធម្មចារី វិសមចារី អហោសឹ មា មំ និរយំ និរយបាលាតិ មិត្តាមច្ចា វា បនស្ស លភេយ្យុំ ឯសោ ខោ អម្ហាកំ ហេតុ អធម្មចារី វិសមចារី អហោសិ មា នំ និរយំ និរយបាលាតិ។ នោ ហិទំ ភោ សារីបុត្ត អថខោ នំ វិកន្ទន្តំយេវ និរយេ និរយបាលា បក្ខិបេយ្យុំ។

[៩៧] តំ កឹ មញ្ញសិ ធនញ្ជានិ ឥធេកច្ចោ ញាតិសាលោហិតានំ ហេតុ អធម្មចារី វិសមចារី អស្ស តមេនំ អធម្មចរិយវិសមចរិយាហេតុ និរយំ និរយបាលា ឧបកឌ្ឍេយ្យុំ លភេយ្យ នុ ខោ សោ អហំ ខោ ញាតិសាលោហិតានំ ហេតុ អធម្មចារី វិសមចារី អហោសឹ មា មំ និរយំ និរយបាលាតិ ញាតិសាលោហិតា វា បនស្ស លភេយ្យុំ ឯសោ ខោ អម្ហាកំ ហេតុ អធម្មចារី វិសមចារី អហោសិ មា នំ និរយំ និរយបាលាតិ។ នោ ហិទំ ភោ សារីបុត្ត អថខោ នំ វិកន្ទន្តំយេវ និរយេ និរយបាលា បក្ខិបេយ្យុំ។

[៩៨] តំ កឹ មញ្ញសិ ធនញ្ជានិ ឥធេកច្ចោ អតិថីនំ ហេតុ អធម្មចារី វិសមចារី អស្ស តមេនំ អធម្មចរិយវិសមចរិយាហេតុ និរយំ និរយបាលា ឧបកឌ្ឍេយ្យុំ លភេយ្យ នុ ខោ សោ អហំ ខោ អតិថីនំ ហេតុ អធម្មចារី វិសមចារី អហោសឹ មា មំ និរយំ និរយបាលាតិ អតិថិនោ វា បនស្ស លភេយ្យុំ ឯសោ ខោ អម្ហាកំ ហេតុ អធម្មចារី វិសមចារី អហោសិ មា នំ និរយំ និរយបាលាតិ។ នោ ហិទំ ភោ សារីបុត្ត អថខោ នំ វិកន្ទន្តំយេវ និរយេ និរយបាលា បក្ខិបេយ្យុំ។

[៩៩] តំ កឹ មញ្ញសិ ធនញ្ជានិ ឥធេកច្ចោ បុព្វបេតានំ ហេតុ អធម្មចារី វិសមចារី អស្ស តមេនំ អធម្មចរិយវិសមចរិយាហេតុ និរយំ និរយបាលា ឧបកឌ្ឍេយ្យុំ លភេយ្យ នុ ខោ សោ អហំ ខោ បុព្វបេតានំ ហេតុ អធម្មចារី វិសមចារី អហោសឹ មា មំ និរយំ និរយបាលាតិ បុព្វបេតា វា បនស្ស លភេយ្យុំ ឯសោ ខោ អម្ហាកំ ហេតុ អធម្មចារី វិសមចារី អហោសិ មា នំ និរយំ និរយបាលាតិ។ នោ ហិទំ ភោ សារីបុត្ត អថខោ នំ វិកន្ទន្តំយេវ និរយេ និរយបាលា បក្ខិបេយ្យុំ។

[១០០] តំ កឹ មញ្ញសិ ធនញ្ជានិ ឥធេកច្ចោ ទេវតានំ ហេតុ អធម្មចារី វិសមចារី អស្ស តមេនំ អធម្មចរិយវិសមចរិយាហេតុ និរយំ និរយបាលា ឧបកឌ្ឍេយ្យុំ លភេយ្យ នុ ខោ សោ អហំ ខោ ទេវតានំ ហេតុ អធម្មចារី វិសមចារី អហោសឹ មា មំ និរយំ និរយបាលាតិ ទេវតា វា បនស្ស លភេយ្យុំ ឯសោ ខោ អម្ហាកំ ហេតុ អធម្មចារី វិសមចារី អហោសិ មា នំ និរយំ និរយបាលាតិ។ នោ ហិទំ ភោ សារីបុត្ត អថខោ នំ វិកន្ទន្តំយេវ និរយេ និរយបាលា បក្ខិបេយ្យុំ។

[១០១] តំ កឹ មញ្ញសិ ធនញ្ជានិ ឥធេកច្ចោ រញ្ញោ ហេតុ អធម្មចារី វិសមចារី អស្ស តមេនំ អធម្មចរិយវិសមចរិយាហេតុ និរយំ និរយបាលា ឧបកឌ្ឍេយ្យុំ លភេយ្យ នុ ខោ សោ អហំ ខោ រញ្ញោ ហេតុ អធម្មចារី វិសមចារី អហោសឹ មា មំ និរយំ និរយបាលាតិ រាជា វា បនស្ស លភេយ្យ ឯសោ ខោ អម្ហាកំ ហេតុ អធម្មចារី វិសមចារី អហោសិ មា នំ និរយំ និរយបាលាតិ។ នោ ហិទំ ភោ សារីបុត្ត អថខោ នំ វិកន្ទន្តំយេវ និរយេ និរយបាលា បក្ខិបេយ្យុំ។

[១០២] តំ កឹ មញ្ញសិ ធនញ្ជានិ ឥធេកច្ចោ កាយស្ស បិណនាហេតុ ព្រូហនាហេតុ អធម្មចារី វិសមចារី អស្ស តមេនំ អធម្មចរិយវិសមចរិយាហេតុ និរយំ និរយបាលា ឧបកឌ្ឍេយ្យុំ លភេយ្យ នុ ខោ សោ អហំ ខោ កាយស្ស បិណនាហេតុ ព្រូហនាហេតុ អធម្មចារី វិសមចារី អហោសឹ មា មំ និរយំ និរយបាលាតិ បរេ វា បនស្ស លភេយ្យុំ ឯសោ ខោ កាយស្ស បិណនាហេតុ ព្រូហនាហេតុ អធម្មចារី វិសមចារី អហោសិ មា នំ និរយំ និរយបាលាតិ។ នោ ហិទំ ភោ សារីបុត្ត អថខោ នំ វិកន្ទន្តំយេវ និរយេ និរយបាលា បក្ខិបេយ្យុំ។

[១០៣] តំ កឹ មញ្ញសិ ធនញ្ជានិ យោ វា មាតាបិតូនំ ហេតុ អធម្មចារី វិសមចារី អស្ស យោ វា មាតាបិតូនំ ហេតុ ធម្មចារី សមចារី អស្ស កតមំ សេយ្យោតិ។ យោ ហិ ភោ សារីបុត្ត មាតាបិតូនំ ហេតុ អធម្មចារី វិសមចារី អស្ស ន តំ សេយ្យោ យោ ច ខោ ភោ សារីបុត្ត មាតាបិតូនំ ហេតុ ធម្មចារី សមចារី អស្ស តទេវេត្ថ សេយ្យោ អធម្មចរិយវិសមចរិយាហិ ភោ សារីបុត្ត ធម្មចរិយសមចរិយា សេយ្យោតិ។ អត្ថិ ខោ ធនញ្ជានិ អញ្ញេ សហេតុកា ធម្មិកា កម្មន្តា យេហិ សក្កា មាតាបិតរោ ចេវ បោសេតុំ ន បាបកម្មំ កាតុំ បុញ្ញញ្ច បដិបទំ បដិបជ្ជិតុំ។

[១០៤] តំ កឹ មញ្ញសិ ធនញ្ជានិ យោ វា បុត្តទារស្ស ហេតុ អធម្មចារី វិសមចារី អស្ស យោ វា បុត្តទារស្ស ហេតុ ធម្មចារី សមចារី អស្ស កតមំ សេយ្យោតិ។ យោ ហិ ភោ សារីបុត្ត បុត្តទារស្ស ហេតុ អធម្មចារី វិសមចារី អស្ស ន តំ សេយ្យោ យោ ច ខោ ភោ សារីបុត្ត បុត្តទារស្ស ហេតុ ធម្មចារី សមចារី អស្ស តទេវេត្ថ សេយ្យោ អធម្មចរិយវិសមចរិយាហិ ភោ សារីបុត្ត ធម្មចរិយសមចរិយា សេយ្យោតិ។ អត្ថិ ខោ ធនញ្ជានិ អញ្ញេ សហេតុកា ធម្មិកា កម្មន្តា យេហិ សក្កា បុត្តទារេ ចេវ បោសេតុំ ន ច បាបកម្មំ កាតុំ បុញ្ញញ្ច បដិបទំ បដិបជ្ជិតុំ។

[១០៥] តំ កឹ មញ្ញសិ ធនញ្ជានិ យោ វា ទាសកម្មករបោរិសស្ស ហេតុ អធម្មចារី វិសមចារី អស្ស យោ វា ទាសកម្មករបោរិសស្ស ហេតុ ធម្មចារី សមចារី អស្ស កតមំ សេយ្យោតិ។ យោ ហិ ភោ សារីបុត្ត ទាសកម្មករបោរិសស្ស ហេតុ អធម្មចារី វិសមចារី អស្ស ន តំ សេយ្យោ យោ ច ខោ ភោ សារីបុត្ត ទាសកម្មករបោរិសស្ស ហេតុ ធម្មចារី សមចារី អស្ស តទេវេត្ថ សេយ្យោ អធម្មចរិយវិសមចរិយាហិ ភោ សារីបុត្ត ធម្មចរិយសមចរិយា សេយ្យោតិ។ អត្ថិ ខោ ធនញ្ជានិ អញ្ញេ សហេតុកា ធម្មិកា កម្មន្តា យេហិ សក្កា ទាសកម្មករបោរិសំ ចេវ បោសេតុំ ន ច បាបកម្មំ កាតុំ បុញ្ញញ្ច បដិបទំ បដិបជ្ជិតុំ។

[១០៦] តំ កឹ មញ្ញសិ ធនញ្ជានិ យោ វា មិត្តាមច្ចានំ ហេតុ អធម្មចារី វិសមចារី អស្ស យោ វា មិត្តាមច្ចានំ ហេតុ ធម្មចារី សមចារី អស្ស កតមំ សេយ្យោតិ។ យោ ហិ ភោ សារីបុត្ត មិត្តាមច្ចានំ ហេតុ អធម្មចារី វិសមចារី អស្ស ន តំ សេយ្យោ យោ ច ខោ ភោ សារីបុត្ត មិត្តាមច្ចានំ ហេតុ ធម្មចារី សមចារី អស្ស តទេវេត្ថ សេយ្យោ អធម្មចរិយវិសមចរិយាហិ ភោ សារីបុត្ត ធម្មចរិយសមចរិយា សេយ្យោតិ។ អត្ថិ ខោ ធនញ្ជានិ អញ្ញេ សហេតុកា ធម្មិកា កម្មន្តា យេហិ សក្កា មិត្តាមច្ចានញ្ចេវ មិត្តាមច្ចករណីយំ កាតុំ ន ច បាបកម្មំ កាតុំ បុញ្ញញ្ច បដិបទំ បដិបជ្ជិតុំ។

[១០៧] តំ កឹ មញ្ញសិ ធនញ្ជានិ យោ វា ញាតិសាលោហិតានំ ហេតុ អធម្មចារី វិសមចារី អស្ស យោ វា ញាតិសាលោហិតានំ ហេតុ ធម្មចារី សមចារី អស្ស កតមំ សេយ្យោតិ។ យោ ហិ ភោ សារីបុត្ត ញាតិសាលោហិតានំ ហេតុ អធម្មចារី វិសមចារី អស្ស ន តំ សេយ្យោ យោ ច ខោ ភោ សារីបុត្ត ញាតិសាលោហិតានំ ហេតុ ធម្មចារី សមចារី អស្ស តទេវេត្ថ សេយ្យោ អធម្មចរិយវិសមចរិយាហិ ភោ សារីបុត្ត ធម្មចរិយសមចរិយា សេយ្យោតិ។ អត្ថិ ខោ ធនញ្ជានិ អញ្ញេ សហេតុកា ធម្មិកា កម្មន្តា យេហិ សក្កា ញាតិសាលោហិតានញ្ចេវ ញាតិសាលោហិតករណីយំ កាតុំ ន ច បាបកម្មំ កាតុំ បុញ្ញញ្ច បដិបទំ បដិបជ្ជិតុំ។

[១០៨] តំ កឹ មញ្ញសិ ធនញ្ជានិ យោ វា អតិថីនំ ហេតុ អធម្មចារី វិសមចារី អស្ស យោ វា អតិថីនំ ហេតុ ធម្មចារី សមចារី អស្ស កតមំ សេយ្យោតិ។ យោ ហិ ភោ សារីបុត្ត អតិថីនំ ហេតុ អធម្មចារី វិសមចារី អស្ស ន តំ សេយ្យោ យោ ច ខោ ភោ សារីបុត្ត អតិថីនំ ហេតុ ធម្មចារី សមចារី អស្ស តទេវេត្ថ សេយ្យោ អធម្មចរិយវិសមចរិយាហិ ភោ សារីបុត្ត ធម្មចរិយសមចរិយា សេយ្យោតិ។ អត្ថិ ខោ ធនញ្ជានិ អញ្ញេ សហេតុកា ធម្មិកា កម្មន្តា យេហិ សក្កា អតិថីនញ្ចេវ អតិថិករណីយំ កាតុំ ន ច បាបកម្មំ កាតុំ បុញ្ញញ្ច បដិបទំ បដិបជ្ជិតុំ។

[១០៩] តំ កឹ មញ្ញសិ ធនញ្ជានិ យោ វា បុព្វបេតានំ ហេតុ អធម្មចារី វិសមចារី អស្ស យោ វា បុព្វបេតានំ ហេតុ ធម្មចារី សមចារី អស្ស កតមំ សេយ្យោតិ។ យោ ហិ ភោ សារីបុត្ត បុព្វបេតានំ ហេតុ អធម្មចារី វិសមចារី អស្ស ន តំ សេយ្យោ យោ ច ខោ ភោ សារីបុត្ត បុព្វបេតានំ ហេតុ ធម្មចារី សមចារី អស្ស តទេវេត្ថ សេយ្យោ អធម្មចរិយវិសមចរិយាហិ ភោ សារីបុត្ត ធម្មចរិយសមចរិយា សេយ្យោតិ។ អត្ថិ ខោ ធនញ្ជានិ អញ្ញេ សហេតុកា ធម្មិកា កម្មន្តា យេហិ សក្កា បុព្វបេតានញ្ចេវ បុព្វបេតករណីយំ កាតុំ ន ច បាបកម្មំ កាតុំ បុញ្ញញ្ច បដិបទំ បដិបជ្ជិតុំ។

[១១០] តំ កឹ មញ្ញសិ ធនញ្ជានិ យោ វា ទេវតានំ ហេតុ អធម្មចារី វិសមចារី អស្ស យោ វា ទេវតានំ ហេតុ ធម្មចារី សមចារី អស្ស កតមំ សេយ្យោតិ។ យោ ហិ ភោ សារីបុត្ត ទេវតានំ ហេតុ អធម្មចារី វិសមចារី អស្ស ន តំ សេយ្យោ យោ ច ខោ ភោ សារីបុត្ត ទេវតានំ ហេតុ ធម្មចារី សមចារី អស្ស តទេវេត្ថ សេយ្យោ អធម្មចរិយវិសមចរិយាហិ ភោ សារីបុត្ត ធម្មចរិយសមចរិយា សេយ្យោតិ។ អត្ថិ ខោ ធនញ្ជានិ អញ្ញេ សហេតុកា ធម្មិកា កម្មន្តា យេហិ សក្កា ទេវតានញ្ចេវ ទេវតាករណីយំ កាតុំ ន ច បាបកម្មំ កាតុំ បុញ្ញញ្ច បដិបទំ បដិបជ្ជិតុំ។

[១១១] តំ កឹ មញ្ញសិ ធនញ្ជានិ យោ វា រញ្ញោ ហេតុ អធម្មចារី វិសមចារី អស្ស យោ វា រញ្ញោ ហេតុ ធម្មចារី សមចារី អស្ស កតមំ សេយ្យោតិ។ យោ ហិ ភោ សារីបុត្ត រញ្ញោ ហេតុ អធម្មចារី វិសមចារី អស្ស ន តំ សេយ្យោ យោ ច ខោ ភោ សារីបុត្ត រញ្ញោ ហេតុ ធម្មចារី សមចារី អស្ស តទេវេត្ថ សេយ្យោ អធម្មចរិយវិសមចរិយាហិ ភោ សារីបុត្ត ធម្មចរិយសមចរិយា សេយ្យោតិ។ អត្ថិ ខោ ធនញ្ជានិ អញ្ញេ សហេតុកា ធម្មិកា កម្មន្តា យេហិ សក្កា រញ្ញោ ចេវ រាជករណីយំ កាតុំ ន ច បាបកម្មំ កាតុំ បុញ្ញញ្ច បដិបទំ បដិបជ្ជិតុំ។

[១១២] តំ កឹ មញ្ញសិ ធនញ្ជានិ យោ វា កាយស្ស បិណនាហេតុ ព្រូហនាហេតុ អធម្មចារី វិសមចារី អស្ស យោ វា កាយស្ស បិណនាហេតុ ព្រូហនាហេតុ ធម្មចារី សមចារី អស្ស កតមំ សេយ្យោតិ។ យោ ហិ ភោ សារីបុត្ត កាយស្ស បិណនាហេតុ ព្រូហនាហេតុ អធម្មចារី វិសមចារី អស្ស ន តំ សេយ្យោ យោ ច ខោ ភោ សារីបុត្ត កាយស្ស បិណនាហេតុ ព្រូហនាហេតុ ធម្មចារី សមចារី អស្ស តទេវេត្ថ សេយ្យោ អធម្មចរិយវិសមចរិយាហិ ភោ សារីបុត្ត ធម្មចរិយសមចរិយា សេយ្យោតិ។ អត្ថិ ខោ ធនញ្ជានិ អញ្ញេ សហេតុកា ធម្មិកា កម្មន្តា យេហិ សក្កា កាយស្ស ចេវ បិណេតុំ ព្រូហេតុំ ន ច បាបកម្មំ កាតុំ បុញ្ញញ្ច បដិបទំ បដិបជ្ជិតុន្តិ។ អថខោ ធនញ្ជានិ ព្រាហ្មណោ អាយស្មតោ សារីបុត្តស្ស ភាសិតំ អភិនន្ទិត្វា អនុមោទិត្វា ឧដ្ឋាយាសនា បក្កាមិ។

[១១៣] អថខោ ធនញ្ជានិ ព្រាហ្មណោ អបរេន សមយេន អាពាធិកោ ហោតិ [ឱ.ម. អហោសិ។] ទុក្ខិតោ ពាឡ្ហគិលានោ។ អថខោ ធនញ្ជានិ ព្រាហ្មណោ អញ្ញតរំ បុរិសំ អាមន្តេសិ ឯហិ ត្វំ អម្ភោ បុរិស យេន ភគវា តេនុបសង្កម ឧបសង្កមិត្វា មម វចនេន ភគវតោ បាទេ សិរសា វន្ទាហិ ធនញ្ជានិ ភន្តេ ព្រាហ្មណោ អាពាធិកោ ទុក្ខិតោ ពាឡ្ហគិលានោ សោ ភគវតោ បាទេ សិរសា វន្ទតីតិ យេន ចាយស្មា សារីបុត្តោ តេនុបសង្កម ឧបសង្កមិត្វា មម វចនេន អាយស្មតោ សារីបុត្តស្ស បាទេ សិរសា វន្ទាហិ ធនញ្ជានិ ភន្តេ ព្រាហ្មណោ អាពាធិកោ ទុក្ខិតោ ពាឡ្ហគិលានោ សោ អាយស្មតោ សារីបុត្តស្ស បាទេ សិរសា វន្ទតីតិ ឯវញ្ច វទេហិ សាធុ កិរ ភន្តេ អាយស្មា សារីបុត្តោ យេន ធនញ្ជានិស្ស ព្រាហ្មណស្ស និវេសនំ តេនុបសង្កមតុ អនុកម្បំ ឧបាទាយាតិ។

[១១៤] ឯវំ ភន្តេតិ ខោ សោ បុរិសោ ធនញ្ជានិស្ស ព្រាហ្មណស្ស [ឱ. ឯត្ថន្តរេ វចនន្តីតិ ទិស្សតិ។] បដិស្សុត្វា យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ សោ បុរិសោ ភគវន្តំ ឯតទវោច ធនញ្ជានិ ភន្តេ ព្រាហ្មណោ អាពាធិកោ ទុក្ខិតោ ពាឡ្ហគិលានោ សោ ភគវតោ បាទេ សិរសា វន្ទតីតិ យេនាយស្មា [ឱ.ម. យេន ចាយស្មា។] សារីបុត្តោ តេនុបសង្កមិ ឧបសង្កមិត្វា អាយស្មន្តំ សារីបុត្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ សោ បុរិសោ អាយស្មន្តំ សារីបុត្តំ ឯតទវោច ធនញ្ជានិ ភន្តេ ព្រាហ្មណោ អាពាធិកោ ទុក្ខិតោ ពាឡ្ហគិលានោ សោ អាយស្មតោ សារីបុត្តស្ស បាទេ សិរសា វន្ទតិ ឯវញ្ច វទេតិ សាធុ កិរ ភន្តេ អាយស្មា សារីបុត្តោ យេន ធនញ្ជានិស្ស ព្រាហ្មណស្ស និវេសនំ តេនុបសង្កមតុ អនុកម្បំ ឧបាទាយាតិ។ អធិវាសេសិ ខោ អាយស្មា សារីបុត្តោ តុណ្ហីភាវេន។

[១១៥] អថខោ អាយស្មា សារីបុត្តោ និវាសេត្វា បត្តចីវរមាទាយ យេន ធនញ្ជានិស្ស ព្រាហ្មណស្ស និវេសនំ តេនុបសង្កមិ ឧបសង្កមិត្វា បញ្ញត្តេ អាសនេ និសីទិ។ និសជ្ជ ខោ អាយស្មា សារីបុត្តោ ធនញ្ជានឹ ព្រាហ្មណំ ឯតទវោច កច្ចិ តេ ធនញ្ជានិ ខមនីយំ កច្ចិ យាបនីយំ កច្ចិ ទុក្ខា វេទនា បដិក្កមន្តិ នោ អភិក្កមន្តិ បដិក្កមោសានំ បញ្ញាយតិ នោ អភិក្កមោតិ។

[១១៦] ន មេ ភោ សារីបុត្ត ខមនីយំ ន យាបនីយំ ពាឡ្ហា មេ ទុក្ខា វេទនា អភិក្កមន្តិ នោ បដិក្កមន្តិ អភិក្កមោសានំ បញ្ញាយតិ នោ បដិក្កមោ សេយ្យថាបិ ភោ សារីបុត្ត ពលវា បុរិសោ តិណ្ហេន សិខរេន មុទ្ធានំ [ម. មុទ្ធនឹ។] អភិមត្ថេយ្យ ឯវមេវ ខោ មេ ភោ សារីបុត្ត អធិមត្តា វាតា មុទ្ធានំ [ម. មុទ្ធនិញ្ច។] ឱហនន្តិ ន មេ ភោ សារីបុត្ត ខមនីយំ ន យាបនីយំ ពាឡ្ហា មេ ទុក្ខា វេទនា អភិក្កមន្តិ នោ បដិក្កមន្តិ អភិក្កមោសានំ បញ្ញាយតិ នោ បដិក្កមោ សេយ្យថាបិ ភោ សារីបុត្ត ពលវា បុរិសោ ទឡ្ហេន វរត្តក្ខន្ធេន សីសេ សីសវេធនំ ទទេយ្យ ឯវមេវ ខោ មេ ភោ សារីបុត្ត អធិមត្តា សីសេ សីសវេទនា ន មេ ភោ សារីបុត្ត ខមនីយំ ន យាបនីយំ ពាឡ្ហា មេ ទុក្ខា វេទនា អភិក្កមន្តិ នោ បដិក្កមន្តិ អភិក្កមោសានំ បញ្ញាយតិ នោ បដិក្កមោ សេយ្យថាបិ ភោ សារីបុត្ត ទក្ខោ គោឃាតកោ វា គោឃាតកន្តេវាសី វា តិណ្ហេន គោវិកន្តនេន កុច្ឆឹ បរិកន្តេយ្យ ឯវមេវ ខោ មេ ភោ សារីបុត្ត អធិមត្តា វាតា កុច្ឆឹ បរិកន្តន្តិ ន មេ ភោ សារីបុត្ត ខមនីយំ ន យាបនីយំ ពាឡ្ហា មេ ទុក្ខា វេទនា អភិក្កមន្តិ នោ បដិក្កមន្តិ អភិក្កមោសានំ បញ្ញាយតិ នោ បដិក្កមោ សេយ្យថាបិ ភោ សារីបុត្ត ទ្វេ ពលវន្តោ បុរិសា ទុព្វលតរំ បុរិសំ នានាពាហាសុ គហេត្វា អង្គារកាសុយា សន្តាបេយ្យុំ សម្បរិតាបេយ្យុំ ឯវមេវ ខោ មេ ភោ សារីបុត្ត អធិមត្តោ កាយស្មឹ ឌាហោ ន មេ ភោ សារីបុត្ត ខមនីយំ ន យាបនីយំ ពាឡ្ហា មេ ទុក្ខា វេទនា អភិក្កមន្តិ នោ បដិក្កមន្តិ អភិក្កមោសានំ បញ្ញាយតិ នោ បដិក្កមោតិ។

[១១៧] តំ កឹ មញ្ញសិ ធនញ្ជានិ កតមំ សេយ្យោ និរយោ វា តិរច្ឆានយោនិ វាតិ។ និរយា ភោ សារីបុត្ត តិរច្ឆានយោនិ សេយ្យោតិ។ តំ កឹ មញ្ញសិ ធនញ្ជានិ កតមំ សេយ្យោ តិរច្ឆានយោនិ វា បិត្តិវិសយោ វាតិ។ តិរច្ឆានយោនិយា ភោ សារីបុត្ត បិត្តិវិសយោ សេយ្យោតិ។ តំ កឹ មញ្ញសិ ធនញ្ជានិ កតមំ សេយ្យោ បិត្តិវិសយោ វា មនុស្សា វាតិ។ បិត្តិវិសយា ភោ សារីបុត្ត មនុស្សា សេយ្យោតិ។ តំ កឹ មញ្ញសិ ធនញ្ជានិ កតមំ សេយ្យោ មនុស្សា វា ចាតុម្មហារាជិកា ទេវា វាតិ។ មនុស្សេហិ ភោ សារីបុត្ត ចាតុម្មហារាជិកា ទេវា សេយ្យោតិ។ តំ កឹ មញ្ញសិ ធនញ្ជានិ កតមំ សេយ្យោ ចាតុម្មហារាជិកា ទេវា វា តាវត្តឹសា ទេវា វាតិ។ ចាតុម្មហារាជិកេហិ ភោ សារីបុត្ត ទេវេហិ តាវត្តឹសា ទេវា សេយ្យោតិ។ តំ កឹ មញ្ញសិ ធនញ្ជានិ កតមំ សេយ្យោ តាវត្តឹសា ទេវា វា យាមា ទេវា វាតិ។ តាវត្តឹសេហិ ភោ សារីបុត្ត ទេវេហិ យាមា ទេវា សេយ្យោតិ។ តំ កឹ មញ្ញសិ ធនញ្ជានិ កតមំ សេយ្យោ យាមា ទេវា វា តុសិតា ទេវា វាតិ។ យាមេហិ ភោ សារីបុត្ត ទេវេហិ តុសិតា ទេវា សេយ្យោតិ។ តំ កឹ មញ្ញសិ ធនញ្ជានិ កតមំ សេយ្យោ តុសិតា ទេវា វា និម្មានរតី ទេវា វាតិ។ តុសិតេហិ ភោ សារីបុត្ត ទេវេហិ និម្មានរតី ទេវា សេយ្យោតិ។ តំ កឹ មញ្ញសិ ធនញ្ជានិ កតមំ សេយ្យោ និម្មានរតី ទេវា វា បរនិម្មិតវសវត្តី ទេវា វាតិ។ និម្មានរតីហិ ភោ សារីបុត្ត ទេវេហិ បរនិម្មិតវសវត្តី ទេវា សេយ្យោតិ។ តំ កឹ មញ្ញសិ ធនញ្ជានិ កតមំ សេយ្យោ បរនិម្មិតវសវត្តី ទេវា វា ព្រហ្មលោកោ វាតិ។ ព្រហ្មលោកោតិ ភវំ សារីបុត្តោ អាហ ព្រហ្មលោកោតិ ភវំ សារីបុត្តោ អាហាតិ។ អថខោ អាយស្មតោ សារីបុត្តស្ស ឯតទហោសិ ឥមេ ខោ ព្រាហ្មណា ព្រហ្មលោកាធិមុត្តា យន្នូនាហំ ធនញ្ជានិស្ស ព្រាហ្មណស្ស ព្រហ្មានំ សហព្យតាយ មគ្គំ ទេសេយ្យន្តិ។ ព្រហ្មានំ [ឱ.ម. ឯត្ថន្តរេ តេតិ បទំ អត្ថិ។] ធនញ្ជានិ សហព្យតាយ មគ្គំ ទេសេស្សាមិ តំ សុណាហិ សាធុកំ មនសិករោហិ ភាសិស្សាមីតិ។ ឯវំ ភោតិ ខោ ធនញ្ជានិ ព្រាហ្មណោ អាយស្មតោ សារីបុត្តស្ស បច្ចស្សោសិ។

[១១៨] អាយស្មា សារីបុត្តោ ឯតទវោច កតមោ ច ធនញ្ជានិ ព្រហ្មានំ សហព្យតាយ មគ្គោ ឥធ ធនញ្ជានិ ភិក្ខុ មេត្តាសហគតេន ចេតសា ឯកំ ទិសំ ផរិត្វា វិហរតិ តថា ទុតិយំ តថា តតិយំ តថា ចតុត្ថំ ឥតិ ឧទ្ធមធោ តិរិយំ សព្វធិ សព្វត្ថតាយ សព្វាវន្តំ លោកំ មេត្តាសហគតេន ចេតសា វិបុលេន មហគ្គតេន អប្បមាណេន អវេរេន អព្យាបជ្ឈេន ផរិត្វា វិហរតិ អយម្បិ ខោ ធនញ្ជានិ ព្រហ្មានំ សហព្យតាយ មគ្គោ បុន ចបរំ ធនញ្ជានិ ភិក្ខុ ករុណាសហគតេន ចេតសា… មុទិតាសហគតេន ចេតសា… ឧបេក្ខាសហគតេន ចេតសា ឯកំ ទិសំ ផរិត្វា វិហរតិ តថា ទុតិយំ តថា តតិយំ តថា ចតុត្ថំ ឥតិ ឧទ្ធមធោ តិរិយំ សព្វធិ សព្វត្ថតាយ សព្វាវន្តំ លោកំ ឧបេក្ខាសហគតេន ចេតសា វិបុលេន មហគ្គតេន អប្បមាណេន អវេរេន អព្យាបជ្ឈេន ផរិត្វា វិហរតិ អយំ ខោ ធនញ្ជានិ ព្រហ្មានំ សហព្យតាយ មគ្គោតិ។ តេនហិ ភោ សារីបុត្ត មម វចនេន ភគវតោ បាទេ សិរសា វន្ទាហិ ធនញ្ជានិ ភន្តេ ព្រាហ្មណោ អាពាធិកោ ទុក្ខិតោ ពាឡ្ហគិលានោ សោ ភគវតោ បាទេ សិរសា វន្ទតីតិ។

[១១៩] អថខោ អាយស្មា សារីបុត្តោ ធនញ្ជានឹ ព្រាហ្មណំ សតិ ឧត្តរិករណីយេ ហីនេ ព្រហ្មលោកេ បតិដ្ឋាបេត្វា ឧដ្ឋាយាសនា បក្កាមិ។ អថខោ ធនញ្ជានិ ព្រាហ្មណោ អចិរប្បក្កន្តេ អាយស្មន្តេ សារីបុត្តេ កាលមកាសិ ព្រហ្មលោកំ ឧបបជ្ជិ។ អថខោ ភគវា ភិក្ខូ អាមន្តេសិ ឯសោ ភិក្ខវេ សារីបុត្តោ ធនញ្ជានឹ ព្រាហ្មណំ សតិ ឧត្តរិករណីយេ ហីនេ ព្រហ្មលោកេ បតិដ្ឋាបេត្វា ឧដ្ឋាយាសនា បក្កន្តោតិ។

[១២០] អថខោ អាយស្មា សារីបុត្តោ យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ អាយស្មា សារីបុត្តោ ភគវន្តំ ឯតទវោច ធនញ្ជានិ ភន្តេ ព្រាហ្មណោ អាពាធិកោ ទុក្ខិតោ ពាឡ្ហគិលានោ សោ ភគវតោ បាទេ សិរសា វន្ទតីតិ។ កឹ បន ត្វំ សារីបុត្ត ធនញ្ជានឹ ព្រាហ្មណំ សតិ ឧត្តរិករណីយេ ហីនេ ព្រហ្មលោកេ បតិដ្ឋាបេត្វា ឧដ្ឋាយាសនា បក្កន្តោតិ។ មយ្ហំ ខោ ភន្តេ ឯវំ អហោសិ ឥមេ ខោ ព្រាហ្មណា ព្រហ្មលោកាធិមុត្តា យន្នូនាហំ ធនញ្ជានិស្ស ព្រាហ្មណស្ស ព្រហ្មានំ សហព្យតាយ មគ្គំ ទេសេយ្យន្តិ។ កាលកតោ វ សារីបុត្ត ធនញ្ជានិ ព្រាហ្មណោ ព្រហ្មលោកេ ឧបបន្នោតិ។

ធនញ្ជានិសុត្តំ សត្តមំ និដ្ឋិតំ។

អដ្ឋមំ វាសេដ្ឋសុត្តំ

[១២១] ឯវម្មេ សុតំ។ ឯកំ សមយំ ភគវា ឥច្ឆានង្គលេ វិហរតិ ឥច្ឆានង្គលវនសណ្ឌេ។ តេន ខោ បន សមយេន សម្ពហុលា អភិញ្ញាតា អភិញ្ញាតា ព្រាហ្មណមហាសាលា ឥច្ឆានង្គលេ បដិវសន្តិ សេយ្យថីទំ ចង្កី ព្រាហ្មណោ តារុក្ខោ ព្រាហ្មណោ បោក្ខរសាតិ ព្រាហ្មណោ ជាណុស្សោណិ ព្រាហ្មណោ តោទេយ្យោ ព្រាហ្មណោ អញ្ញេ ច អភិញ្ញាតា អភិញ្ញាតា ព្រាហ្មណមហាសាលា។ អថខោ វាសេដ្ឋភារទ្វាជានំ មាណវានំ ជង្ឃាវិហារំ អនុចង្កមន្តានំ អនុវិចរន្តានំ អយមន្តរាកថា ឧទបាទិ កថម្ភោ ព្រាហ្មណោ ហោតីតិ។ ភារទ្វាជោ មាណវោ ឯវមាហ យតោ ខោ ភោ ឧភតោ សុជាតោ ហោតិ មាតិតោ ច បិតិតោ ច សំសុទ្ធគ្គហណិកោ យាវ សត្តមា បិតាមហយុគា អក្ខិត្តោ អនុបកុដ្ឋោ ជាតិវាទេន ឯត្តាវតា ខោ ភោ ព្រាហ្មណោ ហោតីតិ។ វាសេដ្ឋមាណវោ ឯវមាហ យតោ ខោ ភោ សីលវា ច ហោតិ វត្តសម្បន្នោ ច ឯត្តាវតា ខោ ភោ ព្រាហ្មណោ ហោតីតិ។ នេវ ខោ អសក្ខិ ភារទ្វាជោ មាណវោ វាសេដ្ឋំ មាណវំ សញ្ញាបេតុំ ន បនាសក្ខិ វាសេដ្ឋោ មាណវោ ភារទ្វាជំ មាណវំ សញ្ញាបេតុំ។

[១២២] អថខោ វាសេដ្ឋោ មាណវោ ភារទ្វាជំ មាណវំ អាមន្តេសិ អយំ ខោ ភោ ភារទ្វាជ សមណោ គោតមោ សក្យបុត្តោ សក្យកុលា បព្វជិតោ ឥច្ឆានង្គលេ វិហរតិ ឥច្ឆានង្គលវនសណ្ឌេ តំ ខោ បន ភវន្តំ គោតមំ ឯវំ កល្យាណោ កិត្តិសទ្ទោ អព្ភុគ្គតោ ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវាតិ អាយាម ភោ ភារទ្វាជ យេន សមណោ គោតមោ តេនុបសង្កមិស្សាម ឧបសង្កមិត្វា សមណំ គោតមំ ឯតមត្ថំ បុច្ឆិស្សាម យថា នោ សមណោ គោតមោ ព្យាករិស្សតិ តថា នំ ធារេស្សាមាតិ។ ឯវំ ភោតិ ខោ ភារទ្វាជោ មាណវោ វាសេដ្ឋស្ស មាណវស្ស បច្ចស្សោសិ។ អថខោ វាសេដ្ឋភារទ្វាជមាណវា យេន ភគវា តេនុបសង្កមឹសុ ឧបសង្កមិត្វា ភគវតា សទ្ធឹ សម្មោទឹសុ សម្មោទនីយំ កថំ សារាណីយំ វីតិសារេត្វា ឯកមន្តំ និសីទឹសុ។

[១២៣] ឯកមន្តំ និសិន្នោ ខោ វាសេដ្ឋោ មាណវោ ភគវន្តំ គាថាហិ អជ្ឈភាសិ

អនុញ្ញាតប្បដិញ្ញាតា តេវិជ្ជា មយមស្មុភោ

អហំ បោក្ខរសាតិស្ស តារុក្ខស្សាយំ មាណវោ

តេវិជ្ជានំ យទក្ខាតំ តត្រ កេវលិនោស្ម សេ

បទកស្មា នោ ព្យាករណា ជប្បេ [ម. ជព្វេ។] អាចរិយសាទិសា

តេសន្នោ ជាតិវាទស្មឹ វិវាទោ អត្ថិ គោតម

ជាតិយា ព្រាហ្មណោ ហោតិ ភារទ្វាជោ ឥតិ ភាសតិ

អហញ្ច កម្មុនា ព្រូមិ ឯវំ ជានាហិ ចក្ខុម

តេន សក្កោម ញាបេតុំ អញ្ញមញ្ញំ មយំ ឧភោ

ភវន្តំ បុដ្ឋុំ អាគម្ម [ម. បុដ្ឋុមាគម្មា។] សម្ពុទ្ធំ ឥតិ វិស្សុតំ

ចន្ទំ យថា ខយាតីតំ បេច្ច បញ្ជាលិកា ជនា

វន្ទមានា នមស្សន្តិ ឯវំ លោកស្មិ គោតមំ

ចក្ខុំ លោកេ សមុប្បន្នំ មយំ បុច្ឆាម គោតមំ

ជាតិយា ព្រាហ្មណោ ហោតិ ឧទាហុ ភវតិ កម្មុនា

អជានតំ នោ ច ព្រូហិ យថា ជានេមុ ព្រាហ្មណំ។

[១២៤] តេសំ វោហំ ព្យាចិក្ខិស្សំ (វាសេដ្ឋាតិ ភគវា)

អនុបុព្វំ យថាកថំ

ជាតិវិភង្គំ បាណានំ អញ្ញមញ្ញា ហិ ជាតិយោ

តិណរុក្ខេបិ ជានាថ ន វាបិ បដិជាននេ

លិង្គំ ជាតិមយំ តេសំ អញ្ញមញ្ញា ហិ ជាតិយោ

តតោ កីដេ បដង្គេ ច យាវ កុន្ថកិបិល្លិកេ

លិង្គំ ជាតិមយំ តេសំ អញ្ញមញ្ញា ហិ ជាតិយោ

ចតុប្បទេបិ ជានាថ ខុទ្ទកេ ច មហល្លកេ

លិង្គំ ជាតិមយំ តេសំ អញ្ញមញ្ញា ហិ ជាតិយោ

បាទូទរេបិ ជានាថ ឧរគេ ទីឃបិដ្ឋិកេ

លិង្គំ ជាតិមយំ តេសំ អញ្ញមញ្ញា ហិ ជាតិយោ

តតោ មច្ឆេបិ ជានាថ ឧទកេ វារិគោចរេ

លិង្គំ ជាតិមយំ តេសំ អញ្ញមញ្ញា ហិ ជាតិយោ

តតោ បក្ខីបិ ជានាថ បត្តយានេ វិហង្គមេ

លិង្គំ ជាតិមយំ តេសំ អញ្ញមញ្ញា ហិ ជាតិយោ

យថា ឯតាសុ ជាតីសុ លិង្គំ ជាតិមយំ បុថុ

ឯវំ នត្ថិ មនុស្សេសុ លិង្គំ ជាតិមយំ បុថុ

ន កេសេហិ ន សីសេន ន កណ្ណេហិ ន អក្ខិភិ

ន មុខេន ន នាសាយ ន ឱដ្ឋេហិ ភមូហិ វា

ន គីវាយ ន អំសេហិ ន ឧទរេន ន បិដ្ឋិយា

ន សោណិយា ន ឧរស្មា ន សម្ពាធេ ន មេថុនេ [ម. មេថុនា។]

ន ហត្ថេហិ ន បាទេហិ ន អង្គុលីហិ [ម. នង្គុលីហិ។] នខេហិ វា

ន ជង្ឃាហិ ន ឩរូហិ ន វណ្ណេន សរេន វា

លិង្គំ ជាតិមយន្នេវ យថា អញ្ញាសុ ជាតិសុ

បច្ចត្តញ្ច សរីរេសុ មនុស្សេស្វេតំ ន វិជ្ជតិ

វោការំ ច មនុស្សេសុ សមញ្ញាយ បវុច្ចតិ

យោ ហិ កោចិ មនុស្សេសុ គោរក្ខំ ឧបជីវតិ

ឯវំ វាសេដ្ឋ ជានាហិ កស្សកោ សោ ន ព្រាហ្មណោ

យោ ហិ កោចិ មនុស្សេសុ បុថុសិប្បេន ជីវតិ

ឯវំ វាសេដ្ឋ ជានាហិ សិប្បិកោ សោ ន ព្រាហ្មណោ

យោ ហិ កោចិ មនុស្សេសុ វោហារំ ឧបជីវតិ

ឯវំ វាសេដ្ឋ ជានាហិ វាណិជោ សោ ន ព្រាហ្មណោ

យោ ហិ កោចិ មនុស្សេសុ បរបេស្សេន ជីវតិ

ឯវំ វាសេដ្ឋ ជានាហិ បេស្សិកោ សោ ន ព្រាហ្មណោ

យោ ហិ កោចិ មនុស្សេសុ អទិន្នំ ឧបជីវតិ

ឯវំ វាសេដ្ឋ ជានាហិ ចោរោ ឯសោ ន ព្រាហ្មណោ

យោ ហិ កោចិ មនុស្សេសុ ឥស្សត្ថំ ឧបជីវតិ

ឯវំ វាសេដ្ឋ ជានាហិ យោធាជីវោ ន ព្រាហ្មណោ

យោ ហិ កោចិ មនុស្សេសុ បោរោហិច្ចេន ជីវតិ

ឯវំ វាសេដ្ឋ ជានាហិ យាជកោ សោ ន ព្រាហ្មណោ

យោ ហិ កោចិ មនុស្សេសុ គាមំ រដ្ឋញ្ច ភុញ្ជតិ

ឯវំ វាសេដ្ឋ ជានាហិ រាជា ឯសោ ន ព្រាហ្មណោ

ន ចាហំ ព្រាហ្មណំ ព្រូមិ យោនិជំ មត្តិសម្ភវំ

ភោវាទី នាម សោ ហោតិ សវេ ហោតិ សកិញ្ចនោ

អកិញ្ចនំ អនាទានំ តមហំ ព្រូមិ ព្រាហ្មណំ

សព្វំ សញ្ញោជនំ ឆេត្វា យោ វេ ន បរិតស្សតិ

សង្គាតីតំ [សង្គាតិគន្តិប្យត្ថិ។] វិសំយុត្តំ តមហំ ព្រូមិ ព្រាហ្មណំ

ឆេត្វា នទ្ធឹ វរត្តញ្ច សន្ធានំ សហនុក្កមំ

ឧក្ខិត្តបលិឃំ ពុទ្ធំ តមហំ ព្រូមិ ព្រាហ្មណំ

អក្កោសំ វធពន្ធញ្ច អទុដ្ឋោ យោ តិតិក្ខតិ

ខន្តិពលំ ពលានីតំ តមហំ ព្រូមិ ព្រាហ្មណំ

អក្កោធនំ ធុតវន្តំ សីលវន្តំ អនុស្សុទំ

ទន្តំ អន្តិមសារីរំ តមហំ ព្រូមិ ព្រាហ្មណំ

វារិបោក្ខរបត្តេវ អារគ្គេរិវ សាសបោ

យោ ន លិម្បតិ កាមេសុ តមហំ ព្រូមិ ព្រាហ្មណំ

យោ ទុក្ខស្ស បជានាតិ ឥធេវ ខយមត្តនោ

បន្នភារំ វិសំយុត្តំ តមហំ ព្រូមិ ព្រាហ្មណំ

គម្ភីរបញ្ញំ មេធាវឹ មគ្គាមគ្គស្ស កោវិទំ

ឧត្តមត្ថំ អនុបត្តំ តមហំ ព្រូមិ ព្រាហ្មណំ

អសំសដ្ឋំ គហដ្ឋេហិ អនាគារេហិ ចូភយំ

អនោកសារឹ អប្បិច្ឆំ តមហំ ព្រូមិ ព្រាហ្មណំ

និធាយ ទណ្ឌំ ភូតេសុ តសេសុ ថាវរេសុ ច

យោ ន ហន្តិ ន ឃាតេតិ តមហំ ព្រូមិ ព្រាហ្មណំ

អវិរុទ្ធំ វិរុទ្ធេសុ អត្តទណ្ឌេសុ និព្វុតំ

សាទានេសុ អនាទានំ តមហំ ព្រូមិ ព្រាហ្មណំ

យស្ស រាគោ ច ទោសោ ច មានោ មក្ខោ ច បាតិតោ

សាសបោរិវ អារគ្គា តមហំ ព្រូមិ ព្រាហ្មណំ

អកក្កសំ វិញ្ញាបនឹ គិរំ សច្ចំ ឧទីរយេ

យាយ នាភិសជេ កិញ្ចិ តមហំ ព្រូមិ ព្រាហ្មណំ

យោបិ ទីឃំ វ រស្សំ វា អណុំ ថូលំ សុភាសុភំ

លោកេ អទិន្នំ នាមេតិ តមហំ ព្រូមិ ព្រាហ្មណំ

អាសា យស្ស ន វិជ្ជន្តិ អស្មឹ លោកេ បរម្ហិ ច

និរាសាសំ វិសំយុត្តំ តមហំ ព្រូមិ ព្រាហ្មណំ

យស្សាលយា ន វិជ្ជន្តិ អញ្ញាយ អកថំកថី

អមតោគធំ អនុប្បត្តំ តមហំ ព្រូមិ ព្រាហ្មណំ

យោធ បុញ្ញញ្ច បាបញ្ច ឧភោ សង្គំ ឧបច្ចគា

អសោកំ វិរជំ សុទ្ធំ តមហំ ព្រូមិ ព្រាហ្មណំ

ចន្ទំវ វិមលំ សុទ្ធំ វិប្បសន្នំ អនាវិលំ

នន្ទិភវបរិក្ខីណំ តមហំ ព្រូមិ ព្រាហ្មណំ

យោ ឥមំ បលិបថំ ទុគ្គំ សំសារំ មោហមច្ចគា

តិណ្ណោ បារំ គតោ ឈាយី អនេជោ អកថំកថី

អនុបាទាយ និព្វុតោ តមហំ ព្រូមិ ព្រាហ្មណំ

យោធ កាមេ [ម. តណ្ហំ។] បហន្ត្វាន អនាគារោ បរិព្វជេ

កាមភវបរិក្ខីណំ [ម. តណ្ហាភវបរិក្ខីណំ។] តមហំ ព្រូមិ ព្រាហ្មណំ

យោធ តណ្ហំ បហន្ត្វាន អនាគារោ បរិព្វជេ

កាមភវបរិក្ខីណំ [ម. តណ្ហាភវបរិក្ខីណំ។] តមហំ ព្រូមិ ព្រាហ្មណំ

ហិត្វា មានុសកំ យោគំ ទិព្វយោគំ ឧបច្ចគា

សព្វយោគវិសំយុត្តំ តមហំ ព្រូមិ ព្រាហ្មណំ

ហិត្វា រតឹ អរតិញ្ច សីតីភូតំ និរូបធឹ

សព្វលោកាភិភុំ វីរំ តមហំ ព្រូមិ ព្រាហ្មណំ

ចុតឹ យោ វេទិ សត្តានំ ឧបបត្តិញ្ច សព្វសោ

អសត្តំ សុគតំ ពុទ្ធំ តមហំ ព្រូមិ ព្រាហ្មណំ

យស្ស គតឹ ន ជានន្តិ ទេវា គន្ធព្វមានុសា

ខីណាសវំ អរហន្តំ តមហំ ព្រូមិ ព្រាហ្មណំ

យស្ស បុរេ ច បច្ឆា ច មជ្ឈេ ច នត្ថិ កិញ្ចនំ

អកិញ្ចនំ អនាទានំ តមហំ ព្រូមិ ព្រាហ្មណំ

ឧសភំ បវរំ វីរំ មហេសឹ វិជិតាវិនំ

អនេជំ ន្ហាតកំ ពុទ្ធំ តមហំ ព្រូមិ ព្រាហ្មណំ

បុព្វេនិវាសំ យោ វេទិ សគ្គាបាយញ្ច បស្សសិ [ម. បស្សតិ។]

អថោ ជាតិក្ខយំ បត្តោ តមហំ ព្រូមិ ព្រាហ្មណំ

សមញ្ញា ហេសា លោកស្មឹ នាមគោត្តំ បកប្បិតំ

សមុច្ច សមុទាគតំ តត្ថ តត្ថ បកប្បិតំ

ទីឃរត្តមនុសយិតំ ទិដ្ឋិគតមជានតំ

អជានន្តា នោ ច ព្រូហន្តិ ជាតិយា ហោតិ ព្រាហ្មណោ

ន ជច្ចា វសលោ ហោតិ ន ជច្ចា ហោតិ ព្រាហ្មណោ

កម្មុនា វសលោ ហោតិ កម្មុនា ហោតិ ព្រាហ្មណោ

កស្សកោ កម្មុនា ហោតិ សិប្បិកោ ហោតិ កម្មុនា

វាណិជោ កម្មុនា ហោតិ បេស្សិកោ ហោតិ កម្មុនា

ចោរោបិ កម្មុនា ហោតិ យោធាជីវោបិ កម្មុនា

យាជកោ កម្មុនា ហោតិ រាជាបិ ហោតិ កម្មុនា

ឯវមេតំ យថាភូតំ កម្មំ បស្សន្តិ បណ្ឌិតា

បដិច្ចសមុប្បាទទសា កម្មវិបាកកោវិទា

កម្មុនា វត្តតិ លោកោ កម្មុនា វត្តតិ បជា

កម្មនិ ពន្ធនា សត្តា រថស្សាណីវ យាយតោ

តបេន ព្រហ្មចរិយេន សំយមេន ទមេន ច

ឯតេន ព្រាហ្មណោ ហោតិ ឯតំ ព្រហ្មានមុត្តមំ

តីហិ វិជ្ជាហិ សម្បន្នោ សន្តោ ខីណបុនព្ភវោ

ឯវំ វាសេដ្ឋ ជានាហិ ព្រហ្មា សក្កោ វិជានតន្តិ។

[១២៥] ឯវំ វុត្តេ វាសេដ្ឋភារទ្វាជមាណវា ភគវន្តំ ឯតទវោចុំ អភិក្កន្តំ ភោ គោតម អភិក្កន្តំ ភោ គោតម សេយ្យថាបិ ភោ គោតម និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ ភោតា គោតមេន អនេកបរិយាយេន ធម្មោ បកាសិតោ ឯតេ មយំ ភវន្តំ គោតមំ សរណំ គច្ឆាម ធម្មញ្ច ភិក្ខុសង្ឃញ្ច ឧបាសកេ នោ ភវំ គោតមោ ធារេតុ អជ្ជតគ្គេ បាណុបេត សរណង្គតេតិ។

វាសេដ្ឋសុត្តំ អដ្ឋមំ និដ្ឋិតំ។

នវមំ សុភសុត្តំ

[១២៦] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តេន ខោ បន សមយេន សុភោ មាណវោ តោទេយ្យបុត្តោ សាវត្ថិយំ បដិវសតិ អញ្ញតរស្ស គហបតិស្ស និវេសនេ កេនចិទេវ ករណីយេន។ អថខោ សុភោ មាណវោ តោទេយ្យបុត្តោ យស្ស គហបតិស្ស និវេសនេ បដិវសតិ តំ គហបតឹ ឯតទវោច សុតមេតំ គហបតិ អវិវិត្តា សាវត្ថី អរហន្តេហិ កំ នុ ខ្វជ្ជ [ឱ. កន្នុ ខជ្ជ។] សមណំ វា ព្រាហ្មណំ វា បយិរុបាសេយ្យាមាតិ។ អយំ ភន្តេ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ តំ ភន្តេ ភគវន្តំ បយិរូបាសស្សូតិ។

[១២៧] អថខោ សុភោ មាណវោ តោទេយ្យបុត្តោ តស្ស គហបតិស្ស បដិស្សុត្វា យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ សុភោ មាណវោ តោទេយ្យបុត្តោ ភគវន្តំ ឯតទវោច ព្រាហ្មណា ភោ គោតម ឯវមាហំសុ គហដ្ឋោ អារាធកោ ហោតិ ញាយំ ធម្មំ កុសលំ ន បព្វជិតោ អារាធកោ ហោតិ ញាយំ ធម្មំ កុសលន្តិ ឥធ ភវំ គោតមោ កិមាហាតិ។ វិភជវាទោ ខោ អហមេត្ថ មាណវ នាហមេត្ថ ឯកំសវាទោ គិហិស្ស វាហំ មាណវ បព្វជិតស្ស វា មិច្ឆាបដិបត្តឹ វណ្ណេមិ [ឱ.ម. ន វណ្ណេមិ។] គិហី វា ហិ មាណវ បព្វជិតោ វា មិច្ឆាបដិបន្នោ មិច្ឆាបដិបត្តាធិករណហេតុ ន អារាធកោ ហោតិ ញាយំ ធម្មំ កុសលំ គិហិស្ស វាហំ មាណវ បព្វជិតស្ស វា សម្មាបដិបត្តឹ វណ្ណេមិ គិហី វា ហិ មាណវ បព្វជិតោ វា សម្មាបដិបន្នោ សម្មាបដិបត្តាធិករណហេតុ អារាធកោ ហោតិ ញាយំ ធម្មំ កុសលន្តិ។

[១២៨] ព្រាហ្មណា ភោ គោតម ឯវមាហំសុ មហត្ថមិទំ មហាកិច្ចំ មហាធិករណំ មហាសមារម្ភំ ឃរាវាសកម្មដ្ឋានំ មហប្ផលំ ហោតិ អប្បត្ថមិទំ អប្បកិច្ចំ អប្បាធិករណំ អប្បសមារម្ភំ បព្វជ្ជា កម្មដ្ឋានំ អប្បប្ផលំ ហោតីតិ ឥធ ភវំ គោតមោ កិមាហាតិ។ ឯត្ថបិ ខោ អហំ មាណវ វិភជវាទោ នាហមេត្ថ ឯកំសវាទោ អត្ថិ មាណវ កម្មដ្ឋានំ មហត្ថំ មហាកិច្ចំ មហាធិករណំ មហាសមារម្ភំ វិបជ្ជមានំ អប្បប្ផលំ ហោតិ អត្ថិ មាណវ កម្មដ្ឋានំ មហត្ថំ មហាកិច្ចំ មហាធិករណំ មហាសមារម្ភំ សម្បជ្ជមានំ មហប្ផលំ ហោតិ អត្ថិ មាណវ កម្មដ្ឋានំ អប្បត្ថំ អប្បកិច្ចំ អប្បាធិករណំ អប្បសមារម្ភំ វិបជ្ជមានំ អប្បប្ផលំ ហោតិ អត្ថិ មាណវ កម្មដ្ឋានំ អប្បត្ថំ អប្បកិច្ចំ អប្បាធិករណំ អប្បសមារម្ភំ សម្បជ្ជមានំ មហប្ផលំ ហោតិ។

[១២៩] កតមំ [ឱ.ម. កតមញ្ច។] មាណវ កម្មដ្ឋានំ មហត្ថំ មហាកិច្ចំ មហាធិករណំ មហាសមារម្ភំ វិបជ្ជមានំ អប្បប្ផលំ ហោតិ កសិ ខោ មាណវ កម្មដ្ឋានំ មហត្ថំ មហាកិច្ចំ មហាធិករណំ មហាសមារម្ភំ វិបជ្ជមានំ អប្បប្ផលំ ហោតិ។ កតមញ្ច មាណវ កម្មដ្ឋានំ មហត្ថំ មហាកិច្ចំ មហាធិករណំ មហាសមារម្ភំ សម្បជ្ជមានំ មហប្ផលំ ហោតិ កសិយេវ ខោ មាណវ កម្មដ្ឋានំ មហត្ថំ មហាកិច្ចំ មហាធិករណំ មហាសមារម្ភំ សម្បជ្ជមានំ មហប្ផលំ ហោតិ។ កតមញ្ច មាណវ កម្មដ្ឋានំ អប្បត្ថំ អប្បកិច្ចំ អប្បាធិករណំ អប្បសមារម្ភំ វិបជ្ជមានំ អប្បប្ផលំ ហោតិ វណិជ្ជា ខោ មាណវ កម្មដ្ឋានំ អប្បត្ថំ អប្បកិច្ចំ អប្បាធិករណំ អប្បសមារម្ភំ វិបជ្ជមានំ អប្បប្ផលំ ហោតិ។ កតមញ្ច មាណវ កម្មដ្ឋានំ អប្បត្ថំ អប្បកិច្ចំ អប្បាធិករណំ អប្បសមារម្ភំ សម្បជ្ជមានំ មហប្ផលំ ហោតិ វណិជ្ជាយេវ ខោ មាណវ កម្មដ្ឋានំ អប្បត្ថំ អប្បកិច្ចំ អប្បាធិករណំ អប្បសមារម្ភំ សម្បជ្ជមានំ មហប្ផលំ ហោតិ។

[១៣០] សេយ្យថាបិ មាណវ កសិកម្មដ្ឋានំ មហត្ថំ មហាកិច្ចំ មហាធិករណំ មហាសមារម្ភំ វិបជ្ជមានំ អប្បប្ផលំ ហោតិ ឯវមេវ ខោ មាណវ ឃរាវាសកម្មដ្ឋានំ មហត្ថំ មហាកិច្ចំ មហាធិករណំ មហាសមារម្ភំ វិបជ្ជមានំ អប្បប្ផលំ ហោតិ។ សេយ្យថាបិ មាណវ កសិយេវ កម្មដ្ឋានំ មហត្ថំ មហាកិច្ចំ មហាធិករណំ មហាសមារម្ភំ សម្បជ្ជមានំ មហប្ផលំ ហោតិ ឯវមេវ ខោ មាណវ ឃរាវាសកម្មដ្ឋានំ មហត្ថំ មហាកិច្ចំ មហាធិករណំ មហាសមារម្ភំ សម្បជ្ជមានំ មហប្ផលំ ហោតិ។ សេយ្យថាបិ មាណវ វណិជ្ជាកម្មដ្ឋានំ អប្បត្ថំ អប្បកិច្ចំ អប្បាធិករណំ អប្បសមារម្ភំ វិបជ្ជមានំ អប្បប្ផលំ ហោតិ ឯវមេវ ខោ មាណវ បព្វជ្ជាកម្មដ្ឋានំ អប្បត្ថំ អប្បកិច្ចំ អប្បាធិករណំ អប្បសមារម្ភំ វិបជ្ជមានំ អប្បប្ផលំ ហោតិ។ សេយ្យថាបិ មាណវ វណិជ្ជាយេវ កម្មដ្ឋានំ អប្បត្ថំ អប្បកិច្ចំ អប្បាធិករណំ អប្បសមារម្ភំ សម្បជ្ជមានំ មហប្ផលំ ហោតិ ឯវមេវ ខោ មាណវ បព្វជ្ជាកម្មដ្ឋានំ អប្បត្ថំ អប្បកិច្ចំ អប្បាធិករណំ អប្បសមារម្ភំ សម្បជ្ជមានំ មហប្ផលំ ហោតីតិ។

[១៣១] ព្រាហ្មណា ភោ គោតម បញ្ច ធម្មេ បញ្ញបេន្តិ បុញ្ញស្ស កិរិយាយ កុសលស្ស អារាធនាយាតិ។ យេ តេ មាណវ ព្រាហ្មណា បញ្ច ធម្មេ បញ្ញបេន្តិ បុញ្ញស្ស កិរិយាយ កុសលស្ស អារាធនាយ សចេ តេ អគរុ សាធុ តេ បញ្ច ធម្មេ ឥមស្មឹ [ឥមិស្សន្តិ បាឋេន ភវិតព្វំ។] បរិសតិ [ឱ. បរិសតឹ។] ភាសស្សូតិ។ ន ខោ [ឱ.ម. ន ខោ មេតិ ទិស្សតិ។] ភោ គោតម គរុ យត្ថស្សុ ភវន្តោ វា និសិន្នោ ភវន្តរូបា វាតិ។ តេនហិ មាណវ ភាសស្សូតិ។

[១៣២] សច្ចំ ខោ ភោ គោតម ព្រាហ្មណា បឋមំ ធម្មំ បញ្ញបេន្តិ បុញ្ញស្ស កិរិយាយ កុសលស្ស អារាធនាយ តបំ [ម. តបញ្ច។] ខោ ភោ គោតម ព្រាហ្មណា ទុតិយំ ធម្មំ បញ្ញបេន្តិ បុញ្ញស្ស កិរិយាយ កុសលស្ស អារាធនាយ ព្រហ្មចរិយំ ខោ ភោ គោតម ព្រាហ្មណា តតិយំ ធម្មំ បញ្ញបេន្តិ បុញ្ញស្ស កិរិយាយ កុសលស្ស អារាធនាយ អជ្ឈេនំ ខោ ភោ គោតម ព្រាហ្មណា ចតុត្ថំ ធម្មំ បញ្ញបេន្តិ បុញ្ញស្ស កិរិយាយ កុសលស្ស អារាធនាយ ចាគំ ខោ ភោ គោតម ព្រាហ្មណា បញ្ចមំ ធម្មំ បញ្ញបេន្តិ បុញ្ញស្ស កិរិយាយ កុសលស្ស អារាធនាយ ព្រាហ្មណា ភោ គោតម ឥមេ បញ្ច ធម្មេ បញ្ញបេន្តិ បុញ្ញស្ស កិរិយាយ កុសលស្ស អារាធនាយាតិ ឥធ ភវំ គោតមោ កិមាហាតិ។

[១៣៣] កឹ បន មាណវ អត្ថិ កោចិ ព្រាហ្មណានំ ឯកព្រាហ្មណោបិ យោ ឯវមាហ អហំ ឥមេសំ បញ្ចន្នំ ធម្មានំ សយំ អភិញ្ញា សច្ឆិកត្វា វិបាកំ បវេទេមីតិ។ នោ ហិទំ ភោ គោតម។ កឹ បន មាណវ អត្ថិ កោចិ ព្រាហ្មណានំ ឯកាចរិយោបិ ឯកាចរិយប្បាចរិយោបិ យាវ សត្តមា អាចរិយមហយុគា យោ ឯវមាហ អហំ ឥមេសំ បញ្ចន្នំ ធម្មានំ សយំ អភិញ្ញា សច្ឆិកត្វា វិបាកំ បវេទេមីតិ។ នោ ហិទំ ភោ គោតម។ កឹ បន មាណវ យេបិ តេ ព្រាហ្មណានំ បុព្វកា ឥសយោ មន្តានំ កត្តារោ មន្តានំ បវត្តារោ យេសមិទំ ឯតរហិ ព្រាហ្មណានំ បោរាណំ មន្តបទំ គីតំ បវុត្តំ សមិហិតំ តទនុគាយន្តិ តទនុភាសន្តិ ភាសិតមនុភាសន្តិ វាចិតមនុវាចេន្តិ សេយ្យថីទំ អដ្ឋកោ វាមកោ វាមទេវោ វេស្សាមិត្តោ យមតគ្គិ អង្គីរសោ ភារទ្វាជោ វាសេដ្ឋោ កស្សបោ ភគុ តេបិ ឯវមាហំសុ មយំ ឥមេសំ បញ្ចន្នំ សយំ អភិញ្ញា សច្ឆិកត្វា វិបាកំ បវេទេមាតិ។ នោ ហិទំ ភោ គោតម។

[១៣៤] ឥតិ កិរ មាណវ នត្ថិ កោចិ ព្រាហ្មណានំ ឯកព្រាហ្មណោបិ យោ ឯវមាហ អហំ ឥមេសំ បញ្ចន្នំ ធម្មានំ សយំ អភិញ្ញា សច្ឆិកត្វា វិបាកំ បវេទេមីតិ នត្ថិ កោចិ ព្រាហ្មណានំ ឯកាចរិយោបិ ឯកាចរិយប្បាចរិយោបិ យាវ សត្តមា អាចរិយមហយុគា យោ ឯវមាហ អហំ ឥមេសំ បញ្ចន្នំ ធម្មានំ សយំ អភិញ្ញា សច្ឆិកត្វា វិបាកំ បវេទេមីតិ យេបិ តេ ព្រាហ្មណានំ បុព្វកា ឥសយោ មន្តានំ កត្តារោ មន្តានំ បវត្តារោ យេសមិទំ ឯតរហិ ព្រាហ្មណានំ បោរាណំ មន្តបទំ គីតំ បវុត្តំ សមិហិតំ តទនុគាយន្តិ តទនុភាសន្តិ ភាសិតមនុភាសតិ វាចិតមនុវាចេន្តិ សេយ្យថីទំ អដ្ឋកោ វាមកោ វាមទេវោ វេស្សាមិត្តោ យមតគ្គិ អង្គីរសោ ភារទ្វាជោ វាសេដ្ឋោ កស្សបោ ភគុ តេបិ ន ឯវមាហំសុ មយំ ឥមេសំ បញ្ចន្នំ ធម្មានំ សយំ អភិញ្ញា សច្ឆិកត្វា វិបាកំ បវេទេមាតិ សេយ្យថាបិ មាណវ អន្ធវេណិ បរំបរាសំសត្តា បុរិមោបិ ន បស្សតិ មជ្ឈិមោបិ ន បស្សតិ បច្ឆិមោបិ ន បស្សតិ ឯវមេវ ខោ មាណវ អន្ធវេណូបមំ មញ្ញេ ព្រាហ្មណានំ ភាសិតំ សម្បជ្ជតិ បុរិមោបិ ន បស្សតិ មជ្ឈិមោបិ ន បស្សតិ បច្ឆិមោបិ ន បស្សតីតិ។

[១៣៥] ឯវំ វុត្តេ សុភោ មាណវោ តោទេយ្យបុត្តោ ភគវតោ [ឱ.ម. ភគវតា។] អន្ធវេណូបម្មេន វុច្ចមានោ កុបិតោ អនត្តមនោ ភគវន្តំយេវ ខុំសេន្តោ ភគវន្តំយេវ វម្ភេន្តោ ភគវន្តំយេវ វទមានោ សមណោ គោតមោ បាបិតោ ភវិស្សតីតិ ភគវន្តំ ឯតទវោច ព្រាហ្មណោ ភោ គោតម បោក្ខរសាតិ ឱបម្មញ្ញោ សុភគវនិកោ ឯវមាហ ឯវមេវ ខោ [ឱ.ម. ខោសទ្ទោ នត្ថិ។] បនិមេ កេ សមណព្រាហ្មណា ឧត្តរឹ មនុស្សធម្មា អលមរិយញ្ញាណទស្សនវិសេសំ បដិជានន្តិ តេសមិទំ ភាសិតំ ហស្សកំយេវ សម្បជ្ជតិ នាមកំយេវ សម្បជ្ជតិ រិត្តកំយេវ សម្បជ្ជតិ តុច្ឆកំយេវ សម្បជ្ជតិ កថំ ហិ នាម មនុស្សភូតោ ឧត្តរឹ មនុស្សធម្មា អលមរិយញ្ញាណទស្សនវិសេសំ ញស្សតិ វា ទក្ខិតិ វា សច្ឆិ វា ករិស្សតីតិ នេតំ ឋានំ វិជ្ជតីតិ។ កឹ បន មាណវ ព្រាហ្មណោ បោក្ខរសាតិ ឱបម្មញ្ញោ សុភគវនិកោ សព្វេសំយេវ សមណព្រាហ្មណានំ ចេតសា ចេតោ បរិច្ច បជានាតីតិ។ សកាយបិ ហិ ភោ គោតម បុណ្ណិកាយ ទាសិយា ព្រាហ្មណោ បោក្ខរសាតិ ឱបម្មញ្ញោ សុភគវនិកោ [ឱ. ឯត្ថន្តរេ នសទ្ទោ ទិស្សតិ។] ចេតសា ចេតោ បរិច្ច បជានាតិ កុតោ បន សព្វេសំយេវ សមណព្រាហ្មណានំ ចេតសា ចេតោ បរិច្ច បជានិស្សតីតិ។

[១៣៦] សេយ្យថាបិ មាណវ ជច្ចន្ធោ បុរិសោ សោ [ឱ. សោតិ នត្ថិ។] ន បស្សេយ្យ កណ្ហសុក្កានិ រូបានិ ន បស្សេយ្យ នីលកានិ រូបានិ ន បស្សេយ្យ បីតកានិ រូបានិ ន បស្សេយ្យ លោហិតកានិ រូបានិ ន បស្សេយ្យ មញ្ជេដ្ឋកានិ រូបានិ ន បស្សេយ្យ សមវិសមានិ ន បស្សេយ្យ តារករូបានិ ន បស្សេយ្យ ចន្ទិមសុរិយេ សោ ឯវំ វទេយ្យ នត្ថិ កណ្ហសុក្កានិ រូបានិ នត្ថិ កណ្ហសុក្កានំ រូបានំ ទស្សាវី នត្ថិ នីលកានិ រូបានិ នត្ថិ នីលកានំ រូបានំ ទស្សាវី នត្ថិ បីតកានិ រូបានិ នត្ថិ បីតកានំ រូបានំ ទស្សាវី នត្ថិ លោហិតកានិ រូបានិ នត្ថិ លោហិតកានំ រូបានំ ទស្សាវី នត្ថិ មញ្ជេដ្ឋកានិ រូបានិ នត្ថិ មញ្ជេដ្ឋកានំ រូបានំ ទស្សាវី នត្ថិ សមវិសមំ នត្ថិ សមវិសមស្ស ទស្សាវី នត្ថិ តារករូបានិ នត្ថិ តារករូបានំ ទស្សាវី នត្ថិ ចន្ទិមសុរិយា នត្ថិ ចន្ទិមសុរិយានំ ទស្សាវី អហមេតំ ន ជានាមិ អហមេតំ ន បស្សាមិ តស្មា តំ [ឱ. តន្តិ ន ទិស្សតិ។] នត្ថីតិ សម្មា នុ ខោ សោ មាណវ វទមានោ វទេយ្យាតិ។ នោ ហិទំ ភោ គោតម អត្ថិ កណ្ហសុក្កានិ រូបានិ អត្ថិ កណ្ហសុក្កានំ រូបានំ ទស្សាវី អត្ថិ នីលកានិ រូបានិ អត្ថិ នីលកានំ រូបានំ ទស្សាវី អត្ថិ បីតកានិ រូបានិ អត្ថិ បីតកានំ រូបានំ ទស្សាវី អត្ថិ លោហិតកានិ រូបានិ អត្ថិ លោហិតកានំ រូបានំ ទស្សាវី អត្ថិ មញ្ជេដ្ឋកានិ រូបានិ អត្ថិ មញ្ជេដ្ឋកានំ រូបានំ ទស្សាវី អត្ថិ សមវិសមំ អត្ថិ សមវិសមស្ស ទស្សាវី អត្ថិ តារករូបានិ អត្ថិ តារករូបានំ ទស្សាវី អត្ថិ ចន្ទិមសុរិយា អត្ថិ ចន្ទិមសុរិយានំ ទស្សាវី អហមេតំ ន ជានាមិ អហមេតំ ន បស្សាមិ តស្មា តំ នត្ថីតិ ន ហិ ភោ គោតម សម្មា វទមានោ វទេយ្យាតិ។ ឯវមេវ ខោ មាណវ ព្រាហ្មណោ បោក្ខរសាតិ ឱបម្មញ្ញោ សុភគវនិកោ អន្ធោ អចក្ខុកោ សោ វត ឧត្តរឹ មនុស្សធម្មា អលមរិយញ្ញាណទស្សនវិសេសំ ញស្សតិ វា ទក្ខតិ វា សច្ឆិ វា ករិស្សតីតិ នេតិ ឋានំ វិជ្ជតិ។

[១៣៧] តំ កឹ មញ្ញសិ មាណវ យេ បន [ឱ. បនសទ្ទោ នត្ថិ។] តេ កោសលិកា ព្រាហ្មណមហាសាលា សេយ្យថីទំ ចង្កី ព្រាហ្មណោ តារុក្ខោ ព្រាហ្មណោ បោក្ខរសាតិ ព្រាហ្មណោ ជាណុស្សោណិ ព្រាហ្មណោ បិតា វា [ម. ច។] តេ តោទេយ្យោ កតមា នេសំ សេយ្យា [ឱ.ម. សេយ្យោ។] យំ វា តេ សំមុច្ឆា [ឱ. សម្មុសា។ ម. សមុច្ចា។] វាចំ ភាសេយ្យុំ យំ វា អសំមុច្ឆាតិ។ សំមុច្ឆា ភោ គោតម។ កតមា តេសំ សេយ្យា យំ វា តេ មន្តា វាចំ ភាសេយ្យុំ យំ វា អមន្តាតិ។ មន្តា ភោ គោតម។ កតមា តេសំ សេយ្យា យំ វា តេ បដិសង្ខាយ វាចំ ភាសេយ្យុំ យំ វា អប្បដិសង្ខាយាតិ។ បដិសង្ខាយ ភោ គោតម។ កតមា តេសំ សេយ្យា យំ វា តេ អត្ថសញ្ហិតំ វាចំ ភាសេយ្យុំ យំ វា អនត្ថសញ្ហិតន្តិ។ អត្ថសញ្ហិតំ ភោ គោតម។

[១៣៨] តំ កឹ មញ្ញសិ មាណវ យទិ ឯវំ សន្តេ ព្រាហ្មណេន បោក្ខរសាតិនា ឱបម្មញ្ញេន សុភគវនិកេន សំមុច្ឆា វាចា ភាសិតា អសំមុច្ឆាតិ។ សំមុច្ឆា ភោ គោតម។ មន្តា វាចា ភាសិតា អមន្តា វាចាតិ។ អមន្តា ភោ គោតម។ បដិសង្ខាយ ភាសិតា វាចា អប្បដិសង្ខាយាតិ។ អប្បដិសង្ខាយ ភោ គោតម។ អត្ថសញ្ហិតា វាចា ភាសិតា អនត្ថសញ្ហិតាតិ។ អនត្ថសញ្ហិតា ភោ គោតម។

[១៣៩] បញ្ច ខោ ឥមេ មាណវ នីវរណា កតមេ បញ្ច កាមច្ឆន្ទនីវរណំ ព្យាបាទនីវរណំ ថីនមិទ្ធនីវរណំ ឧទ្ធច្ចកុក្កុច្ចនីវរណំ វិចិកិច្ឆានីវរណំ ឥមេ ខោ មាណវ បញ្ច នីវរណា។ ឥមេហិ ខោ មាណវ បញ្ចហិ នីវរណេហិ ព្រាហ្មណោ បោក្ខរសាតិ ឱបម្មញ្ញោ សុភគវនិកោ អាវុតោ និវុតោ ឱផុតោ បរិយោនទ្ធោ សោ វត ឧត្តរឹ មនុស្សធម្មា អលមរិយញ្ញាណទស្សនវិសេសំ ញស្សតិ វា ទក្ខតិ វា សច្ឆិ វា ករិស្សតីតិ នេតំ ឋានំ វិជ្ជតិ។

[១៤០] បញ្ច ខោ ឥមេ មាណវ កាមគុណា កតមេ បញ្ច ចក្ខុវិញ្ញេយ្យា រូបា ឥដ្ឋា កន្តា មនាបា បិយរូបា កាមូបសញ្ហិតា រជនីយា សោតវិញ្ញេយ្យា សទ្ទា។បេ។ ឃានវិញ្ញេយ្យា គន្ធា… ជិវ្ហាវិញ្ញេយ្យា រសា… កាយវិញ្ញេយ្យា ផោដ្ឋព្វា ឥដ្ឋា កន្តា មនាបា បិយរូបា កាមូបសញ្ហិតា រជនីយា ឥមេ ខោ មាណវ បញ្ច កាមគុណា។ ឥមេហិ ខោ មាណវ បញ្ចហិ កាមគុណេហិ ព្រាហ្មណោ បោក្ខរសាតិ ឱបម្មញ្ញោ សុភគវនិកោ គធិតោ មុច្ឆិតោ អជ្ឈាបន្នោ [ឱ.ម. អជ្ឈោបន្នោ។] អនាទីនវទស្សាវី អនិស្សរណប្បញ្ញោ បរិភុញ្ជតិ សោ វត ឧត្តរឹ មនុស្សធម្មា អលមរិយញ្ញាណទស្សនវិសេសំ ញស្សតិ វា ទក្ខិតិ វា សច្ឆិ វា ករិស្សតីតិ នេតំ ឋានំ វិជ្ជតិ។

[១៤១] តំ កឹ មញ្ញសិ មាណវ យំ វា តិណកដ្ឋុបាទានំ បដិច្ច អគ្គឹ ជាលេយ្យ យំ វា និស្សដ្ឋតិណកដ្ឋុបាទានំ អគ្គឹ ជាលេយ្យ កតមោ នុ ខោ អស្ស អគ្គិ អច្ចិមា ចេវ [ឱ. ច។] វណ្ណិមា ច បភស្សរោ ចាតិ។ សចេ តំ ភោ គោតម ឋានំ និស្សដ្ឋតិណកដ្ឋុបាទានំ អគ្គឹ ជាលេតុំ ស្វាស្ស អគ្គិ អច្ចិមា ចេវ វណ្ណិមា ច បភស្សរោ ចាតិ។ អដ្ឋានំ ខោ ឯតំ មាណវ អនវកាសោ យំ និស្សដ្ឋតិណកដ្ឋុបាទានំ អគ្គឹ ជាលេយ្យ អញ្ញត្រ ឥទ្ធិមតា សេយ្យថាបិ មាណវ តិណកដ្ឋុបាទានំ បដិច្ច អគ្គិ ជលតិ តថូបមាហំ មាណវ ឥមំ បីតឹ វទាមិ យាយំ បីតិ បញ្ច កាមគុណេ បដិច្ច។ សេយ្យថាបិ មាណវ និស្សដ្ឋតិណកដ្ឋុបាទានោ អគ្គិ ជលតិ តថូបមាហំ មាណវ ឥមំ បីតឹ វទាមិ យាយំ បីតិ អញ្ញត្រេវ កាមេហិ អញ្ញត្រ អកុសលេហិ ធម្មេហិ កតមា ច មាណវ បីតិ អញ្ញត្រេវ កាមេហិ អញ្ញត្រ អកុសលេហិ ធម្មេហិ ឥធ មាណវ ភិក្ខុ វិវិច្ចេវ កាមេហិ វិវិច្ច អកុសលេហិ ធម្មេហិ។បេ។ បឋមំ ឈានំ ឧបសម្បជ្ជ វិហរតិ អយម្បិ ខោ មាណវ បីតិ អញ្ញត្រេវ កាមេហិ អញ្ញត្រ អកុសលេហិ ធម្មេហិ។ បុន ចបរំ មាណវ [ឱ.ម. ឯត្ថន្តរេ ភិក្ខូតិ ទិស្សតិ។] វិតក្កវិចារានំ វូបសមា។បេ។ ទុតិយំ ឈានំ ឧបសម្បជ្ជ វិហរតិ អយម្បិ ខោ មាណវ បីតិ អញ្ញត្រេវ កាមេហិ អញ្ញត្រ អកុសលេហិ ធម្មេហិ។

[១៤២] យេ តេ មាណវ ព្រាហ្មណា បញ្ច ធម្មេ បញ្ញបេន្តិ បុញ្ញស្ស កិរិយាយ កុសលស្ស អារាធនាយ កមេត្ថ ព្រាហ្មណា ធម្មំ មហប្ផលតរំ បញ្ញបេន្តិ បុញ្ញស្ស កិរិយាយ កុសលស្ស អារាធនាយាតិ។ យេមេ ភោ គោតម ព្រាហ្មណា បញ្ច ធម្មេ បញ្ញបេន្តិ បុញ្ញស្ស កិរិយាយ កុសលស្ស អារាធនាយ ចាគមេត្ថ ព្រាហ្មណា ធម្មំ មហប្ផលតរំ បញ្ញបេន្តិ បុញ្ញស្ស កិរិយាយ កុសលស្ស អារាធនាយាតិ។

[១៤៣] តំ កឹ មញ្ញសិ មាណវ ឥធ អញ្ញតរស្ស ព្រាហ្មណស្ស មហាយញ្ញោ បច្ចុបដ្ឋិតោ អស្ស។ អថ ទ្វេ ព្រាហ្មណា អាគច្ឆេយ្យុំ ឥត្ថន្នាមស្ស ព្រាហ្មណស្ស មហាយញ្ញំ អនុភវិស្សាមាតិ។ តត្រ ឯកស្ស [ឱ. តត្ថេកស្ស។] ព្រាហ្មណស្ស ឯវមស្ស អហោ វតាហមេវ លភេយ្យំ ភត្តគ្គេ អគ្គាសនំ អគ្គោទកំ អគ្គបិណ្ឌំ ន អញ្ញេ ព្រាហ្មណា លភេយ្យុំ [ឱ.ម. អញ្ញោ ព្រាហ្មណោ លភេយ្យាតិ ទិស្សតិ។] ភត្តគ្គេ អគ្គាសនំ អគ្គោទកំ អគ្គបិណ្ឌន្តិ។ ឋានំ ខោ បនេតំ មាណវ វិជ្ជតិ យំ អញ្ញោ ព្រាហ្មណោ លភេយ្យ ភត្តគ្គេ អគ្គាសនំ អគ្គោទកំ អគ្គបិណ្ឌំ ន សោ ព្រាហ្មណោ លភេយ្យ ភត្តគ្គេ អគ្គាសនំ អគ្គោទកំ អគ្គបិណ្ឌំ។ អញ្ញេ ព្រាហ្មណា លភន្តិ [ឱ. អញ្ញោ ព្រាហ្មណោ លភតីតិ ទិស្សតិ។] ភត្តគ្គេ អគ្គាសនំ អគ្គោទកំ អគ្គបិណ្ឌំ នាហំ លភាមិ ភត្តគ្គេ អគ្គាសនំ អគ្គោទកំ អគ្គបិណ្ឌន្តិ ឥតិ សោ កុបិតោ អនត្តមនោ ឥមស្ស បន មាណវ ព្រាហ្មណា កឹ វិបាកំ បញ្ញបេន្តីតិ។ ន ខ្វេត្ថ ភោ គោតម ព្រាហ្មណា ឯវំ ទានំ ទេន្តិ ឥមិនា ច វោ [ឱ.ម. ឥមិនា បរោ កុបិតោ ហោតូតិ ទិស្សតិ។] កុបិតោ អនត្តមនោតិ អថខ្វេត្ថ ព្រាហ្មណា អនុកម្បជាតិកំយេវ ទានំ ទេន្តីតិ។ ឯវំ សន្តេ ខោ មាណវ ព្រាហ្មណានំ ឥទំ ឆដ្ឋំ បុញ្ញកិរិយាវត្ថុំ ហោតិ យទិទំ អនុកម្បជាតិកន្តិ។ ឯវំ សន្តេ ភោ គោតម ព្រាហ្មណានំ ឥទំ ឆដ្ឋំ បុញ្ញកិរិយាវត្ថុំ ហោតិ យទិទំ អនុកម្បជាតិកន្តិ។

[១៤៤] យេ តេ មាណវ ព្រាហ្មណា បញ្ច ធម្មេ បញ្ញបេន្តិ បុញ្ញស្ស កិរិយាយ កុសលស្ស អារាធនាយ ឯតេ កត្ថ ពហុលំ សមនុបស្សសីតិ [ឱ.ម. ឥមេ ត្វំ បញ្ច ធម្មេ កត្ថ ពហុលំ សមនុបស្សិ គហដ្ឋេសុ វា បព្វជិតេសុ វាតិ ទិស្សន្តិ។]។ យេមេ ភោ គោតម ព្រាហ្មណា បញ្ច ធម្មេ បញ្ញបេន្តិ បុញ្ញស្ស កិរិយាយ កុសលស្ស អារាធនាយ ឥមាហំ បញ្ច ធម្មេ បព្វជិតេសុ ពហុលំ សមនុបស្សាមិ អប្បំ គហដ្ឋេសុ គហដ្ឋោ ហិ ភោ គោតម មហត្ថោ មហាកិច្ចោ មហាធិករណោ មហាសមារម្ភោ ន សតតំ សមិតំ សច្ចវាទី ហោតិ បព្វជិតោ ខោ បន ភោ គោតម អប្បត្ថោ អប្បកិច្ចោ អប្បាធិករណោ អប្បសមារម្ភោ សតតំ សមិតំ សច្ចវាទី ហោតិ គហដ្ឋោ ហិ ភោ គោតម មហត្ថោ មហាកិច្ចោ មហាធិករណោ មហាសមារម្ភោ ន សតតំ សមិតំ តបស្សី ហោតិ… ព្រហ្មចារី ហោតិ… សជ្ឈាយពហុលោ ហោតិ… ចាគពហុលោ ហោតិ បព្វជិតោ ខោ បន គោតម អប្បត្ថោ អប្បកិច្ចោ អប្បាធិករណោ អប្បសមារម្ភោ សតតំ សមិតំ តបស្សី ហោតិ… ព្រហ្មចារី ហោតិ… សជ្ឈាយពហុលោ ហោតិ… ចាគពហុលោ ហោតិ។ យេមេ ភោ គោតម ព្រាហ្មណា បញ្ច ធម្មេ បញ្ញបេន្តិ បុញ្ញស្ស កិរិយាយ កុសលស្ស អារាធនាយ ឥមាហំ បញ្ច ធម្មេ បព្វជិតេសុ ពហុលំ សមនុបស្សាមិ អប្បំ គហដ្ឋេសូតិ។

[១៤៥] យេ តេ មាណវ ព្រាហ្មណា បញ្ច ធម្មេ បញ្ញបេន្តិ បុញ្ញស្ស កិរិយាយ កុសលស្ស អារាធនាយ ចិត្តស្សាហំ ឯតេ បរិក្ខារេ វទាមិ យទិទំ ចិត្តំ អវេរំ អព្យាបជ្ឈំ តស្ស ភាវនាយ។ ឥធ មាណវ ភិក្ខុ សច្ចវាទី ហោតិ សោ សច្ចវាទិម្ហីតិ លភតិ អត្ថវេទំ លភតិ ធម្មវេទំ លភតិ ធម្មូបសញ្ហិតំ បាមុជ្ជំ យន្តំ កុសលូបសញ្ហិតំ បាមុជ្ជំ ចិត្តស្សាហំ ឯតំ បរិក្ខារំ វទាមិ យទិទំ ចិត្តំ អវេរំ អព្យាបជ្ឈំ តស្ស ភាវនាយ។ ឥធ មាណវ ភិក្ខុតបស្សី ហោតិ… ព្រហ្មចារី ហោតិ… សជ្ឈាយពហុលោ ហោតិ… ចាគពហុលោ ហោតិ សោ ចាគពហុលោម្ហីតិ លភតិ អត្ថវេទំ លភតិ ធម្មវេទំ លភតិ ធម្មូបសញ្ហិតំ បាមុជ្ជំ យន្តំ កុសលូបសញ្ហិតំ បាមុជ្ជំ ចិត្តស្សាហំ ឯតំ បរិក្ខារំ វទាមិ យទិទំ ចិត្តំ អវេរំ អព្យាបជ្ឈំ តស្ស ភាវនាយ។ យេ តេ មាណវ ព្រាហ្មណា បញ្ច ធម្មេ បញ្ញបេន្តិ បុញ្ញស្ស កិរិយាយ កុសលស្ស អារាធនាយ ចិត្តស្សាហំ ឯតេ បរិក្ខារេ វទាមិ យទិទំ ចិត្តំ អវេរំ អព្យាបជ្ឈំ តស្ស ភាវនាយាតិ។ ឯវំ វុត្តេ សុភោ មាណវោ តោទេយ្យបុត្តោ ភគវន្តំ ឯតទវោច សុតំ មេតំ ភោ គោតម សមណោ គោតមោ ព្រហ្មានំ សហព្យតាយ មគ្គំ បជានាតីតិ។

[១៤៦] តំ កឹ មញ្ញសិ មាណវ អាសន្នេ ឥតោ នឡការគាមោ នយិតោ ទូរេ នឡការគាមោតិ។ ឯវំ ភោ គោតម អាសន្នេ ឥតោ នឡការគាមោ នយិតោ ទូរេ នឡការគាមោតិ។ តំ កឹ មញ្ញសិ មាណវ ឥធ ខ្វស្ស [ឱ.ម. ឥធស្ស។] បុរិសោ នឡការគាមេ ជាតវឌ្ឍោ តមេនំ នឡការគាមតោ តាវទេវ អបសក្កំ [ឱ. អវដំ។] នឡការគាមស្ស មគ្គំ បុច្ឆេយ្យ សិយា នុ ខោ មាណវ តស្ស បុរិសស្ស នឡការគាមេ ជាតវឌ្ឍស្ស នឡការគាមស្ស មគ្គំ បុដ្ឋស្ស ទន្ធាយិតត្តំ វា វិត្ថាយិតត្តំ វាតិ។ នោ ហិទំ ភោ គោតម តំ កិស្ស ហេតុ អស្ស ហិ ភោ គោតម បុរិសស្ស នឡការគាមេ ជាតវឌ្ឍស្ស [ឱ.ម. អមុ ហិ ភោ គោតម បុរិសោ នឡការគាមេ ជាតវឌ្ឍោ តស្សាតិ ទិស្សន្តិ។] សព្វានេវ នឡការគាមស្ស មគ្គានិ សុវិទិតានីតិ។ សិយា នុ ខោ មាណវ តស្ស បុរិសស្ស នឡការគាមេ ជាតវឌ្ឍស្ស នឡការគាមស្ស មគ្គំ បុដ្ឋស្ស ទន្ធាយិតត្តំ វា វិត្ថាយិតត្តំ វា ន ត្វេវ តថាគតស្ស ព្រហ្មលោកំ វា ព្រហ្មលោកគាមិនឹ វា បដិបទំ បុដ្ឋស្ស ទន្ធាយិតត្តំ វា វិត្ថាយិតត្តំ វា ព្រហ្មានញ្ចាហំ មាណវ បជានាមិ ព្រហ្មលោកញ្ច ព្រហ្មលោកគាមិនិញ្ច បដិបទំ យថាបដិបន្នោ ច ព្រហ្មលោកំ ឧបបន្នោ តញ្ច បជានាមីតិ។ សុតំ មេតំ ភោ គោតម សមណោ គោតមោ ព្រហ្មានំ សហព្យតាយ មគ្គំ ទេសេតីតិ សាធុ មេ ភវំ គោតមោ ព្រហ្មានំ សហព្យតាយ មគ្គំ ទេសេតូតិ។ តេនហិ មាណវ សុណាហិ សាធុកំ មនសិករោហិ ភាសិស្សាមីតិ។ ឯវំ ភោតិ ខោ សុភោ មាណវោ តោទេយ្យបុត្តោ ភគវតោ បច្ចស្សោសិ។

[១៤៧] ភគវា ឯតទវោច កតមោ ច មាណវ ព្រហ្មានំ សហព្យតាយ មគ្គោ ឥធ មាណវ ភិក្ខុ មេត្តាសហគតេន ចេតសា ឯកំ ទិសំ ផរិត្វា វិហរតិ តថា ទុតិយំ តថា តតិយំ តថា ចតុត្ថំ ឥតិ ឧទ្ធមធោ តិរិយំ សព្វធិ សព្វត្ថតាយ សព្វាវន្តំ លោកំ មេត្តាសហគតេន ចេតសា វិបុលេន មហគ្គតេន អប្បមាណេន អវេរេន អព្យាបជ្ឈេន ផរិត្វា វិហរតិ ឯវំ ភាវិតាយ ខោ មាណវ មេត្តាយ ចេតោវិមុត្តិយា យំ បមាណកតំ កម្មំ ន តំ តត្រាវសិស្សតិ ន តំ តត្រាវតិដ្ឋតិ សេយ្យថាបិ មាណវ ពលវា សង្ខធមោ អប្បកសិរេនេវ ចាតុទ្ទិសា វិញ្ញាបេយ្យ ឯវមេវ ខោ មាណវ ឯវំ ភាវិតាយ មេត្តាយ ចេតោវិមុត្តិយា យំ បមាណកតំ កម្មំ ន តំ តត្រាវសិស្សតិ ន តំ តត្រាវសិស្សតិ ន តំ តត្រាវតិដ្ឋតិ អយម្បិ ខោ មាណវ ព្រហ្មានំ សហព្យតាយ មគ្គោ។ បុន ចបរំ មាណវ ភិក្ខុ ករុណាសហគតេន ចេតសា… មុទិតាសហគតេន ចេតសា… ឧបេក្ខាសហគតេន ចេតសា ឯកំ ទិសំ ផរិត្វា វិហរតិ តថា ទុតិយំ តថា តតិយំ តថា ចតុត្ថំ ឥតិ ឧទ្ធមធោ តិរិយំ សព្វធិ សព្វត្ថតាយ សព្វាវន្តំ លោកំ ឧបេក្ខាសហគតេន ចេតសា វិបុលេន មហគ្គតេន អប្បមាណេន អវេរេន អព្យាបជ្ឈេន ផរិត្វា វិហរតិ ឯវំ ភាវិតាយ ខោ មាណវ ឧបេក្ខាយ ចេតោវិមុត្តិយា យំ បមាណកតំ កម្មំ ន តំ តត្រាវសិស្សតិ ន តំ តត្រាវតិដ្ឋតិ សេយ្យថាបិ មាណវ ពលវា សង្ខធមោ អប្បកសិរេនេវ ចាតុទ្ទិសា វិញ្ញាបេយ្យ ឯវមេវ ខោ មាណវ ឯវំ ភាវិតាយ ឧបេក្ខាយ ចេតោវិមុត្តិយា យំ បមាណកតំ កម្មំ ន តំ តត្រាវសិស្សតិ ន តំ តត្រាវតិដ្ឋតិ អយម្បិ ខោ មាណវ ព្រហ្មានំ សហព្យតាយ មគ្គោតិ។

[១៤៨] ឯវំ វុត្តេ សុភោ មាណវោ តោទេយ្យបុត្តោ ភគវន្តំ ឯតទវោច អភិក្កន្តំ ភោ គោតម អភិក្កន្តំ ភោ គោតម សេយ្យថាបិ ភោ គោតម និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ ភោតា គោតមេន អនេកបរិយាយេន ធម្មោ បកាសិតោ ឯសាហំ ភវន្តំ គោតមំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភវំ គោតមោ ធារេតុ អជ្ជតគ្គេ បាណុបេតំ សរណង្គតំ ហន្ទ ចទានិ មយំ ភោ គោតម គច្ឆាម ពហុកិច្ចា មយំ ពហុករណីយាតិ។ យស្សទានិ ត្វំ មាណវ កាលំ មញ្ញសីតិ។ អថខោ សុភោ មាណវោ តោទេយ្យបុត្តោ ភគវតោ ភាសិតំ អភិនន្ទិត្វា ឧដ្ឋាយាសនា ភគវន្តំ អភិវាទេត្វា បទក្ខិណំ កត្វា បក្កាមិ។

[១៤៩] តេន ខោ បន សមយេន ជាណុស្សោណិ ព្រាហ្មណោ សព្វសេតេន វលវាភិរថេន សាវត្ថិយា និយ្យាតិ ទិវាទិវស្ស។ អទ្ទសា ខោ ជាណុស្សោណិ ព្រាហ្មណោ សុភំ មាណវំ តោទេយ្យបុត្តំ ទូរតោ វ អាគច្ឆន្តំ ទិស្វាន សុភំ មាណវំ តោទេយ្យបុត្តំ ឯតទវោច ហន្ទ [ឱ. ហន្ទ កុតោ នុ។] ភវំ ភារទ្វាជោ អាគច្ឆិ ទិវាទិវស្សាតិ។ ឥតោ ហិ ខោ អហំ ភោ អាគច្ឆាមិ សមណស្ស គោតមស្ស សន្តិកាតិ។ តំ កឹ មញ្ញសិ ភវំ ភារទ្វាជោ សមណស្ស គោតមស្ស បញ្ញាវេយ្យត្តិយំ បណ្ឌិតោ មញ្ញេតិ កោ ចាហម្ភោ កោ ច សមណស្ស គោតមស្ស បញ្ញាវេយ្យត្តិយំ ជានិស្សាមិ សោបិ នូនស្ស តាទិសោវ យោ សមណស្ស គោតមស្ស បញ្ញាវេយ្យត្តិយំ ជានេយ្យាតិ។ ឧឡារាយ ខលុ ភវំ ភារទ្វាជោ សមណំ គោតមំ បសំសាយ បសំសតីតិ។ កោ ចាហម្ភោ កោ ច សមណំ គោតមំ បសំសិស្សាមិ បសត្ថប្បសត្ថោ ច ភវំ គោតមោ សេដ្ឋោ ទេវមនុស្សានំ យេ ចិមេ ភោ ព្រាហ្មណា បញ្ច ធម្មេ បញ្ញបេន្តិ បុញ្ញស្ស កិរិយាយ កុសលស្ស អារាធនាយ ចិត្តស្សេវ សមណោ គោតមោ ឯតេ បរិក្ខារេ វទេតិ យទិទំ ចិត្តំ អវេរំ អព្យាបជ្ឈំ តស្ស ភាវនាយាតិ។

[១៥០] ឯវំ វុត្តេ ជាណុស្សោណិ ព្រាហ្មណោ សព្វសេតា វលវាភិរថា ឱរោហិត្វា ឯកំសំ ឧត្តរាសង្គំ ករិត្វា យេន ភគវា តេនញ្ជលិម្បណាមេត្វា ឧទានំ ឧទានេសិ លាភា រញ្ញោ បសេនទិស្ស កោសលស្ស សុលទ្ធំ រញ្ញោ បសេនទិស្ស កោសលស្ស យស្ស វិជិតេ តថាគតោ វិហរតិ អរហំ សម្មាសម្ពុទ្ធោតិ។

សុភសុត្តំ នវមំ និដ្ឋិតំ។

ទសមំ សគារវសុត្តំ [ឆដ្ឋ. សង្គារវសុត្តំ]

[១៥១] ឯវម្មេ សុតំ។ ឯកំ សមយំ ភគវា កោសលេសុ ចារិកំ ចរតិ មហតា ភិក្ខុសង្ឃេន សទ្ធឹ។ តេន ខោ បន សមយេន ធនញ្ជានី នាម ព្រាហ្មណី បច្ចលកប្បេ [ឱ. ចណ្ឌលកប្បេ។ ម. បញ្ចលិកប្បេ។] បដិវសតិ អភិប្បសន្នា ពុទ្ធេ ច ធម្មេ ច សង្ឃេ ច។ អថខោ ធនញ្ជានី ព្រាហ្មណី ឧបក្ខលិត្វា តិក្ខត្តុំ ឧទានំ ឧទានេសិ នមោ តស្ស ភគវតោ អរហតោ សម្មាសម្ពុទ្ធស្ស… នមោ តស្ស ភគវតោ អរហតោ សម្មាសម្ពុទ្ធស្សាតិ។

[១៥២] តេន ខោ បន សមយេន សគារវោ នាម [ឱ.ម. សំគារវោ នាម។] មាណវោ បច្ចលកប្បេ បដិវសតិ តិណ្ណំ វេទានំ បារគូ សនិឃណ្ឌុកេដុភានំ សាក្ខរប្បភេទានំ ឥតិហាសបញ្ចមានំ បទកោ វេយ្យាករណោ លោកាយតមហាបុរិសលក្ខណេសុ អនវយោ។ អស្សោសិ ខោ សគារវោ មាណវោ ធនញ្ជានិយា ព្រាហ្មណិយា ឯវំ វាចំ ភាសមានាយ សុត្វាន [ឱ.ម. នសទ្ទោ នត្ថិ។] ធនញ្ជានឹ ព្រាហ្មណឹ ឯតទវោច អវភូតា ច យំ ធនញ្ជានី ព្រាហ្មណី បរាភូតា ច យំ ធនញ្ជានី ព្រាហ្មណី វិជ្ជមានានំ តេវិជ្ជានំ [ឱ. តេវិជ្ជានន្តិ ន ទិស្សតិ។] ព្រាហ្មណានំ អថ ច បន តស្ស មុណ្ឌកស្ស សមណស្ស វណ្ណំ ភាសតីតិ។ ន ហិ បន ត្វំ តាត ភទ្រមុខ តស្ស ភគវតោ សីលប្បញ្ញាណំ [ឱ. សីលប្បញ្ញំ។] ជានាសិ សចេ ត្វំ តាត ភទ្រមុខ តស្ស ភគវតោ សីលប្បញ្ញាណំ ជានេយ្យាសិ ន ត្វំ តាត ភទ្រមុខ តំ ភគវន្តំ អក្កោសិតព្វំ បរិភាសិតព្វំ មញ្ញេយ្យាសីតិ។ តេនហិ ភោតិ យទា សមណោ គោតមោ បច្ចលកប្បំ អនុប្បត្តោ ហោតិ អថ [ឱ. អថខោ។] មេ អារោចេយ្យាសីតិ។ ឯវំ ភទ្រមុខាតិ ខោ ធនញ្ជានី ព្រាហ្មណី សគារវស្ស មាណវស្ស បច្ចស្សោសិ។

[១៥៣] អថខោ ភគវា កោសលេសុ អនុបុព្វេន ចារិកំ ចរមានោ យេន បច្ចលកប្បំ តទវសរិ។ តត្រ សុទំ ភគវា បច្ចលកប្បេ វិហរតិ តោទេយ្យានំ ព្រាហ្មណានំ អម្ពវនេ។ អស្សោសិ ខោ ធនញ្ជានី ព្រាហ្មណី ភគវា កិរ បច្ចលកប្បំ អនុប្បត្តោ បច្ចលកប្បេ វិហរតិ តោទេយ្យានំ ព្រាហ្មណានំ អម្ពវនេតិ។ អថខោ ធនញ្ជានី ព្រាហ្មណី យេន សគារវោ មាណវោ តេនុបសង្កមិ ឧបសង្កមិត្វា សគារវំ មាណវំ ឯតទវោច អយំ តាត ភទ្រមុខ សោ ភគវា បច្ចលកប្បំ អនុប្បត្តោ បច្ចលកប្បេ វិហរតិ តោទេយ្យានំ ព្រាហ្មណានំ អម្ពវនេ យស្សទានិ ត្វំ តាត ភទ្រមុខ កាលំ មញ្ញសីតិ។ ឯវំ ភោតីតិ ខោ សគារវោ មាណវោ ធនញ្ជានិយា ព្រាហ្មណិយា បដិស្សុត្វា យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ សគារវោ មាណវោ ភគវន្តំ ឯតទវោច សន្តិ ខោ ភោ គោតម ឯកេ សមណព្រាហ្មណា ទិដ្ឋធម្មាភិញ្ញាវោសានបារមិប្បត្តា អាទិព្រហ្មចរិយំ បដិជានន្តិ តត្រ ភោ គោតម យេ តេ សមណព្រាហ្មណា ទិដ្ឋធម្មាភិញ្ញាវោសានបារមិប្បត្តា អាទិព្រហ្មចរិយំ បដិជានន្តិ តេសំ ភវំ គោតមោ កតមោតិ។

[១៥៤] ទិដ្ឋធម្មាភិញ្ញាវោសានបារមិប្បត្តានំ អាទិព្រហ្មចរិយំ បដិជានន្តានំបិ ខោ អហំ ភារទ្វាជ វេមត្តំ វទាមិ សន្តិ ភារទ្វាជ ឯកេ សមណព្រាហ្មណា អនុស្សវិកា តេន [ឱ. តេ។] អនុស្សវេន ទិដ្ឋធម្មាភិញ្ញាវោសានបារមិប្បត្តា អាទិព្រហ្មចរិយំ បដិជានន្តិ សេយ្យថាបិ ព្រាហ្មណា តេវិជ្ជា។ សន្តិ បន ភារទ្វាជ ឯកេ សមណព្រាហ្មណា កេវលំ សទ្ធាមត្តកេន ទិដ្ឋធម្មាភិញ្ញាវោសានបារមិប្បត្តា អាទិព្រហ្មចរិយំ បដិជានន្តិ សេយ្យថាបិ តក្កី វីមំសី។ សន្តិ ភារទ្វាជ ឯកេ សមណព្រាហ្មណា បុព្វេ អននុស្សុតេសុ ធម្មេសុ សាមំយេវ ធម្មំ អភិញ្ញាយ ទិដ្ឋធម្មាភិញ្ញាវោសានបារមិប្បត្តា អាទិព្រហ្មចរិយំ បដិជានន្តិ តត្រ ភារទ្វាជ យេ តេ សមណព្រាហ្មណា បុព្វេ អននុស្សុតេសុ ធម្មេសុ សាមំយេវ ធម្មំ អភិញ្ញាយ ទិដ្ឋធម្មាភិញ្ញាវោសានបារមិប្បត្តា អាទិព្រហ្មចរិយំ បដិជានន្តិ តេសាហមស្មិ តទិមិនាបេតំ ភារទ្វាជ បរិយាយេន វេទិតព្វំ។ យថា យេ តេ សមណព្រាហ្មណា បុព្វេ អននុស្សុតេសុ ធម្មេសុ សាមំយេវ ធម្មំ អភិញ្ញាយ ទិដ្ឋធម្មាភិញ្ញាវោសានបារមិប្បត្តា អាទិព្រហ្មចរិយំ បដិជានន្តិ តេសាហមស្មិ។

[១៥៥] ឥធ មេ ភារទ្វាជ បុព្វេវ សម្ពោធា អនភិសម្ពុទ្ធស្ស ពោធិសត្តស្សេវ សតោ ឯតទហោសិ សម្ពាធោ ឃរាវាសោ រជាបថោ អព្ភោកាសោ បព្វជ្ជា នយិទំ សុករំ អគារំ អជ្ឈាវសតា ឯកន្តបរិបុណ្ណំ ឯកន្តបរិសុទ្ធំ សង្ខលិខិតំ ព្រហ្មចរិយំ ចរិតុំ យន្នូនាហំ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជេយ្យន្តិ។ សោ ខោ អហំ ភារទ្វាជ អបរេន សមយេន ទហរោ វ សមានោ សុសុកាឡកេសោ ភទ្រេន យោព្វនេន សមន្នាគតោ បឋមេន វយសា អកាមកានំ មាតាបិតូនំ អស្សុមុខានំ រោទន្តានំ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជឹ។ សោ ឯវំ បព្វជិតោ សមានោ កឹកុសលគវេសី អនុត្តរំ សន្តិវរបទំ បរិយេសមានោ យេន អាឡារោ កាលាមោ តេនុបសង្កមឹ ឧបសង្កមិត្វា អាឡារំ កាលាមំ ឯតទវោចំ ឥច្ឆាមហំ អាវុសោ កាលាម ឥមស្មឹ ធម្មវិនយេ ព្រហ្មចរិយំ ចរិតុន្តិ។ ឯវំ វុត្តេ ភារទ្វាជ អាឡារោ កាលាមោ មំ ឯតទវោច វិហរតាយស្មា តាទិសោ អយំ ធម្មោ យត្ថ វិញ្ញូ បុរិសោ នចិរស្សេវ សកំ អាចរិយកំ អភិញ្ញា សច្ឆិកត្វា ឧបសម្បជ្ជ វិហរេយ្យាតិ។ សោ ខោ អហំ ភារទ្វាជ នចិរស្សេវ ខិប្បមេវ តំ ធម្មំ បរិយាបុណឹ។ សោ ខោ អហំ ភារទ្វាជ តាវតកេនេវ ឱដ្ឋបហតមត្តេន លបិតលាបនមត្តេន ញាណវាទញ្ច វទាមិ ថេរវាទញ្ច ជានាមិ បស្សាមីតិ ច បដិជានាមិ អហញ្ចេវ អញ្ញេ ច។ តស្ស មយ្ហំ ភារទ្វាជ ឯតទហោសិ ន ខោ អាឡារោ កាលាមោ ឥមំ ធម្មំ កេវលំ សទ្ធាមត្តកេន សយំ អភិញ្ញា សច្ឆិកត្វា ឧបសម្បជ្ជ វិហរាមីតិ បវេទេតិ អទ្ធា អាឡារោ កាលាមោ ឥមំ ធម្មំ ជានំ បស្សំ វិហរតីតិ។ អថខ្វាហំ ភារទ្វាជ យេន អាឡារោ កាលាមោ តេនុបសង្កមឹ ឧបសង្កមិត្វា អាឡារំ កាលាមំ ឯតទវោចំ កិត្តាវតា នោ អាវុសោ កាលាម ឥមំ ធម្មំ សយំ អភិញ្ញា សច្ឆិកត្វា ឧបសម្បជ្ជ បវេទេសីតិ។ ឯវំ វុត្តេ ភារទ្វាជ អាឡារោ កាលាមោ អាកិញ្ចញ្ញាយតនំ បវេទេសិ។ តស្ស មយ្ហំ ភារទ្វាជ ឯតទហោសិ ន ខោ អាឡារស្សេវ កាលាមស្ស អត្ថិ សទ្ធា មយ្ហំបត្ថិ សទ្ធា ន ខោ អាឡារស្សេវ កាលាមស្ស អត្ថិ វីរិយំ មយ្ហំបត្ថិ វីរិយំ សតិ… សមាធិ… បញ្ញា មយ្ហំបត្ថិ បញ្ញា យន្នូនាហំ យំ ធម្មំ អាឡារោ កាលាមោ សយំ អភិញ្ញា សច្ឆិកត្វា ឧបសម្បជ្ជ វិហរាមីតិ បវេទេតិ តស្ស ធម្មស្ស សច្ឆិកិរិយាយ បទហេយ្យន្តិ។ សោ ខោ អហំ ភារទ្វាជ នចិរស្សេវ ខិប្បមេវ តំ ធម្មំ សយំ អភិញ្ញា សច្ឆិកត្វា ឧបសម្បជ្ជ វិហាសឹ។ អថខ្វាហំ ភារទ្វាជ យេន អាឡារោ កាលាមោ តេនុបសង្កមឹ ឧបសង្កមិត្វា អាឡារំ កាលាមំ ឯតទវោចំ ឯត្តាវតា នោ អាវុសោ កាលាម ឥមំ ធម្មំ សយំ អភិញ្ញា សច្ឆិកត្វា ឧបសម្បជ្ជ បវេទេសីតិ។ ឯត្តាវតា ខោ អហំ អាវុសោ ឥមំ ធម្មំ សយំ អភិញ្ញា សច្ឆិកត្វា ឧបសម្បជ្ជ បវេទេមីតិ អហម្បិ ខោ អាវុសោ ឯត្តាវតា ឥមំ ធម្មំ សយំ អភិញ្ញា សច្ឆិកត្វា ឧបសម្បជ្ជ វិហរាមីតិ លាភា នោ អាវុសោ សុលទ្ធំ នោ អាវុសោ យេ មយំ អាយស្មន្តំ តាទិសំ សព្រហ្មចារឹ បស្សាម ឥតិ យាហំ ធម្មំ សយំ អភិញ្ញា សច្ឆិកត្វា ឧបសម្បជ្ជ បវេទេមិ តំ ត្វំ ធម្មំ សយំ អភិញ្ញា សច្ឆិកត្វា ឧបសម្បជ្ជ វិហាសិ យំ ត្វំ ធម្មំ សយំ អភិញ្ញា សច្ឆិកត្វា ឧបសម្បជ្ជ វិហាសិ តមហំ ធម្មំ សយំ អភិញ្ញា សច្ឆិកត្វា ឧបសម្បជ្ជ បវេទេមិ ឥតិ យាហំ ធម្មំ ជានាមិ តំ ត្វំ ធម្មំ ជានាសិ យំ ត្វំ ធម្មំ ជានាសិ តមហំ ធម្មំ ជានាមិ ឥតិ យាទិសោ អហំ តាទិសោ តុវំ យាទិសោ តុវំ តាទិសោ អហំ ឯហិទានិ អាវុសោ ឧភោ វ សន្តា ឥមំ គណំ បរិហរាមាតិ។ ឥតិ ខោ ភារទ្វាជ អាឡារោ កាលាមោ អាចរិយោ មេ សមានោ អន្តេវាសឹ មំ សមានំ អត្តនោ សមសមំ ឋបេសិ ឧឡារាយ ច មំ បូជាយ បូជេសិ។ តស្ស មយ្ហំ ភារទ្វាជ ឯតទហោសិ នាយំ ធម្មោ និព្វិទាយ ន វិរាគាយ ន និរោធាយ ន ឧបសមាយ ន អភិញ្ញាយ ន សម្ពោធាយ ន និព្វានាយ សំវត្តតិ យាវទេវ អាកិញ្ចញ្ញាយតនូបបត្តិយាតិ។ សោ ខោ អហំ ភារទ្វាជ តំ [ម. ឯតំ។] ធម្មំ អនលង្ករិត្វា តស្មា ធម្មា និព្វិជ្ជ បក្កាមឹ។

[១៥៦] សោ ខោ អហំ ភារទ្វាជ កឹកុសលគវេសី អនុត្តរំ សន្តិវរបទំ បរិយេសមានោ យេន ឧទ្ទកោ រាមបុត្តោ តេនុបសង្កមឹ ឧបសង្កមិត្វា ឧទ្ទកំ រាមបុត្តំ ឯតទវោចំ ឥច្ឆាមហំ អាវុសោ រាម ឥមស្មឹ ធម្មវិនយេ ព្រហ្មចរិយំ ចរិតុន្តិ។ ឯវំ វុត្តេ ភារទ្វាជ ឧទ្ទកោ រាមបុត្តោ មំ ឯតទវោច វិហរតាយស្មា តាទិសោ អយំ ធម្មោ យត្ថ វិញ្ញូ បុរិសោ នចិរស្សេវ សកំ អាចរិយកំ អភិញ្ញា សច្ឆិកត្វា ឧបសម្បជ្ជ វិហរេយ្យាតិ។ សោ ខោ អហំ ភារទ្វាជ នចិរស្សេវ ខិប្បមេវ តំ ធម្មំ បរិយាបុណឹ។ សោ ខោ អហំ ភារទ្វាជ តាវតកេនេវ ឱដ្ឋបហតមត្តេន លបិតលាបនមត្តេន ញាណវាទញ្ច វទាមិ ថេរវាទញ្ច ជានាមិ បស្សាមីតិ ច បដិជានាមិ អហញ្ចេវ អញ្ញេ ច។ តស្ស មយ្ហំ ភារទ្វាជ ឯតទហោសិ ន ខោ រាមោ ឥមំ ធម្មំ កេវលំ សទ្ធាមត្តកេន សយំ អភិញ្ញា សច្ឆិកត្វា ឧបសម្បជ្ជ វិហរាមីតិ បវេទេតិ អទ្ធា រាមោ ឥមំ ធម្មំ ជានំ បស្សំ វិហរតីតិ។ អថខ្វាហំ ភារទ្វាជ យេន ឧទ្ទកោ រាមបុត្តោ តេនុបសង្កមឹ ឧបសង្កមិត្វា ឧទ្ទកំ រាមបុត្តំ ឯតទវោចំ កិត្តាវតា នោ អាវុសោ រាម ឥមំ ធម្មំ សយំ អភិញ្ញា សច្ឆិកត្វា ឧបសម្បជ្ជ បវេទេសីតិ។ ឯវំ វុត្តេ ភារទ្វាជ ឧទ្ទកោ រាមបុត្តោ នេវសញ្ញានាសញ្ញាយតនំ បវេទេសិ។ តស្ស មយ្ហំ ភារទ្វាជ ឯតទហោសិ ន ខោ រាមស្សេវ អហោសិ សទ្ធា មយ្ហំបត្ថិ សទ្ធា ន ខោ រាមស្សេវ អហោសិ វីរិយំ។បេ។ សតិ សមាធិ… បញ្ញា មយ្ហំបត្ថិ បញ្ញា យន្នូនាហំ យំ ធម្មំ រាមោ សយំ អភិញ្ញា សច្ឆិកត្វា ឧបសម្បជ្ជ វិហរាមីតិ បវេទេសិ តស្ស ធម្មស្ស សច្ឆិកិរិយាយ បទហេយ្យន្តិ។ សោ ខោ អហំ ភារទ្វាជ នចិរស្សេវ ខិប្បមេវ តំ ធម្មំ សយំ អភិញ្ញា សច្ឆិកត្វា ឧបសម្បជ្ជ វិហាសឹ។ អថខ្វាហំ ភារទ្វាជ យេន ឧទ្ទកោ រាមបុត្តោ តេនុបសង្កមឹ ឧបសង្កមិត្វា ឧទ្ទកំ រាមបុត្តំ ឯតទវោចំ កិត្តាវតា នោ អាវុសោ រាម ឥមំ ធម្មំ សយំ អភិញ្ញា សច្ឆិកត្វា ឧបសម្បជ្ជ បវេទេសីតិ។ ឯត្តាវតា ខោ អហំ អាវុសោ ឥមំ ធម្មំ សយំ អភិញ្ញា សច្ឆិកត្វា ឧបសម្បជ្ជ បវេទេសីតិ អហម្បិ ខោ អាវុសោ ឯត្តាវតា ឥមំ ធម្មំ សយំ អភិញ្ញា សច្ឆិកត្វា ឧបសម្បជ្ជ វិហរាមីតិ លាភា នោ អាវុសោ សុលទ្ធំ នោ អាវុសោ យេ មយំ អាយស្មន្តំ តាទិសំ សព្រហ្មចារឹ បស្សាម ឥតិ យំ ធម្មំ រាមោ សយំ អភិញ្ញា សច្ឆិកត្វា ឧបសម្បជ្ជ បវេទេសិ តំ ត្វំ ធម្មំ សយំ អភិញ្ញា សច្ឆិកត្វា ឧបសម្បជ្ជ វិហាសិ យំ ត្វំ ធម្មំ សយំ អភិញ្ញា សច្ឆិកត្វា ឧបសម្បជ្ជ វិហាសិ តំ ធម្មំ រាមោ សយំ អភិញ្ញា សច្ឆិកត្វា ឧបសម្បជ្ជ បវេទេសិ ឥតិ យំ ធម្មំ រាមោ អភិញ្ញាសិ តំ ត្វំ ធម្មំ ជានាសិ យំ ត្វំ ធម្មំ ជានាសិ តំ ធម្មំ រាមោ អភិញ្ញាសិ ឥតិ យាទិសោ រាមោ អហោសិ តាទិសោ តុវំ យាទិសោ តុវំ តាទិសោ រាមោ អហោសិ ឯហិទានិ អាវុសោ តុវំ ឥមំ គណំ បរិហរាតិ។ ឥតិ ខោ ភារទ្វាជ ឧទ្ទកោ រាមបុត្តោ សព្រហ្មចារី មេ សមានោ អាចរិយដ្ឋានេវ មំ ឋបេសិ ឧឡារាយ ច មំ បូជាយ បូជេសិ។ តស្ស មយ្ហំ ភារទ្វាជ ឯតទហោសិ នាយំ ធម្មោ និព្វិទាយ ន វិរាគាយ ន និរោធាយ ន ឧបសមាយ ន អភិញ្ញាយ ន សម្ពោធាយ ន និព្វានាយ សំវត្តតិ យាវទេវ នេវសញ្ញានាសញ្ញាយតនូបត្តិយាតិ។ សោ ខោ អហំ ភារទ្វាជ តំ ធម្មំ អនលង្ករិត្វា តស្មា ធម្មា និព្វិជ្ជ បក្កាមឹ។

[១៥៧] សោ ខោ អហំ ភារទ្វាជ កឹកុសលគវេសី អនុត្តរំ សន្តិវរបទំ បរិយេសមានោ មគធេសុ អនុបុព្វេន ចារិកំ ចរមានោ យេន ឧរុវេលា សេនានិគមោ តទវសរិ។ តត្ថទ្ទសំ រមណីយំ ភូមិភាគំ បាសាទិកញ្ច វនសណ្ឌំ នទិញ្ច សន្ទន្តឹ សីតូទកំ សុប្បតិត្ថំ រមណីយំ សមន្តា គោចរគ្គាមំ។ តស្ស មយ្ហំ ភារទ្វាជ ឯតទហោសិ រមណីយោ វត ភូមិភាគោ បាសាទិកោ ច វនសណ្ឌោ នទី ច សន្ទន្តី សីតូទកា សុប្បតិត្ថា រមណីយា សមន្តា ច គោចរគ្គាមោ អលំ វតិទំ កុលបុត្តស្ស បធានត្ថិកស្ស បធានាយាតិ។ សោ ខោ អហំ ភារទ្វាជ តត្ថេវ និសីទឹ អលមិទំ បធានាយាតិ។

[១៥៨] អបិស្សុ មំ ភារទ្វាជ តិស្សោ ឧបមា បដិភំសុ អនច្ឆរិយា បុព្វេ អស្សុតបុព្វា។ សេយ្យថាបិ ភារទ្វាជ អល្លំ កដ្ឋំ សស្នេហំ ឧទកេ និក្ខិត្តំ អថ បុរិសោ អាគច្ឆេយ្យ ឧត្តរារណឹ អាទាយ អគ្គឹ អភិនិព្វត្តេស្សាមិ តេជោ បាតុករិស្សាមីតិ [ម. តេជោធាតុំ ករិស្សាមីតីតិ ទិស្សតិ។] តំ កឹ មញ្ញសិ ភារទ្វាជ អបិ នុ សោ បុរិសោ អមុំ អល្លំ កដ្ឋំ សស្នេហំ ឧទកេ និក្ខិត្តំ ឧត្តរារណឹ អាទាយ អភិមត្ថេន្តោ អគ្គឹ អភិនិព្វត្តេយ្យ តេជោ បាតុករេយ្យាតិ។ នោ ហិទំ ភោ គោតម តំ កិស្ស ហេតុ អទុញ្ហិ ភោ គោតម អល្លំ កដ្ឋំ សស្នេហំ តញ្ច បន ឧទកេ និក្ខិត្តំ យាវទេវ ច បន សោ បុរិសោ កិលមថស្ស វិឃាតស្ស ភាគី អស្សាតិ។ ឯវមេវ ខោ ភារទ្វាជ យេ ហិ កេចិ សមណា វា ព្រាហ្មណា វា កាយេន ចេវ កាមេហិ អវូបកដ្ឋា វិហរន្តិ យោ ច នេសំ កាមេសុ កាមច្ឆន្ទោ កាមស្នេហោ កាមមុច្ឆា កាមបិបាសា កាមបរិឡាហោ សោ ច អជ្ឈត្តំ ន សុប្បហីនោ ហោតិ ន សុប្បដិប្បស្សទ្ធោ ឱបក្កមិកា ចេបិ តេ ភោន្តោ សមណព្រាហ្មណា ទុក្ខា តិប្បា កដុកា វេទនា វេទិយន្តិ អភព្វា វ តេ ញាណាយ ទស្សនាយ អនុត្តរាយ សម្ពោធាយ នោ ចេបិ តេ ភោន្តោ សមណព្រាហ្មណា ឱបក្កមិកា ទុក្ខា តិប្បា កដុកា វេទនា វេទិយន្តិ អភព្វា វ តេ ញាណាយ ទស្សនាយ អនុត្តរាយ សម្ពោធាយ អយំ ខោ មំ ភារទ្វាជ បឋមា ឧបមា បដិភាសិ អនច្ឆរិយា បុព្វេ អស្សុតបុព្វា។

[១៥៩] អបរាបិ ខោ មំ ភារទ្វាជ ទុតិយា ឧបមា បដិភាសិ អនច្ឆរិយា បុព្វេ អស្សុតបុព្វា។ សេយ្យថាបិ ភារទ្វាជ អល្លំ កដ្ឋំ សស្នេហំ អារកា ឧទកា ថលេ និក្ខិត្តំ អថ បុរិសោ អាគច្ឆេយ្យ ឧត្តរារណឹ អាទាយ អគ្គឹ អភិនិព្វត្តេស្សាមិ តេជោ បាតុករិស្សាមីតិ តំ កឹ មញ្ញសិ ភារទ្វាជ អបិ នុ សោ បុរិសោ អមុំ អល្លំ កដ្ឋំ សស្នេហំ អារកា ឧទកា ថលេ និក្ខិត្តំ ឧត្តរារណឹ អាទាយ អភិមត្ថេន្តោ អគ្គឹ អភិនិព្វត្តេយ្យ តេជោ បាតុករេយ្យាតិ។ នោ ហិទំ ភោ គោតម តំ កិស្ស ហេតុ អទុញ្ហិ ភោ គោតម អល្លំ កដ្ឋំ សស្នេហំ កិញ្ចាបិ អារកា ឧទកា ថលេ និក្ខិត្តំ យាវទេវ ច បន សោ បុរិសោ កិលមថស្ស វិឃាតស្ស ភាគី អស្សាតិ។ ឯវមេវ ខោ ភារទ្វាជ យេ ហិ កេចិ សមណា វា ព្រាហ្មណា វា កាយេន ចេវ កាមេហិ វូបកដ្ឋា វិហរន្តិ យោ ច នេសំ កាមេសុ កាមច្ឆន្ទោ កាមស្នេហោ កាមមុច្ឆា កាមបិបាសា កាមបរិឡាហោ សោ ច អជ្ឈត្តំ ន សុប្បហីនោ ហោតិ ន សុប្បដិប្បស្សទ្ធោ ឱបក្កមិកា ចេបិ តេ ភោន្តោ សមណព្រាហ្មណា ទុក្ខា តិប្បា កដុកា វេទនា វេទិយន្តិ អភព្វា វ តេ ញាណាយ ទស្សនាយ អនុត្តរាយ សម្ពោធាយ នោ ចេបិ តេ ភោន្តោ សមណព្រាហ្មណា ឱបក្កមិកា ទុក្ខា តិប្បា កដុកា វេទនា វេទិយន្តិ អភព្វា វ តេ ញាណាយ ទស្សនាយ អនុត្តរាយ សម្ពោធាយ។ អយំ ខោ មំ ភារទ្វាជ ទុតិយា ឧបមា បដិភាសិ អនច្ឆរិយា បុព្វេ អស្សុតបុព្វា។

[១៦០] អបរាបិ ខោ មំ ភារទ្វាជ តតិយា ឧបមា បដិភាសិ អនច្ឆរិយា បុព្វេ អស្សុតបុព្វា។ សេយ្យថាបិ ភារទ្វាជ សុក្ខំ កដ្ឋំ កោឡាបំ អារកា ឧទកា ថលេ និក្ខិត្តំ អថ បុរិសោ អាគច្ឆេយ្យ ឧត្តរារណឹ អាទាយ អគ្គឹ អភិនិព្វត្តេស្សាមិ តេជោ បាតុករិស្សាមីតិ តំ កឹ មញ្ញសិ ភារទ្វាជ អបិ នុ សោ បុរិសោ អមុំ សុក្ខំ កដ្ឋំ កោឡាបំ អារកា ឧទកា ថលេ និក្ខិត្តំ ឧត្តរារណឹ អាទាយ អភិមត្ថេន្តោ អគ្គឹ អភិនិព្វត្តេយ្យ តេជោ បាតុករេយ្យាតិ។ ឯវំ ភោ គោតម តំ កិស្ស ហេតុ អទុញ្ហិ ភោ គោតម សុក្ខំ កដ្ឋំ កោឡាបំ តញ្ច បន អារកា ឧទកា ថលេ និក្ខិត្តន្តិ។ ឯវមេវ ខោ ភារទ្វាជ យេ ហិ កេចិ សមណា វា ព្រាហ្មណា វា កាយេន ចេវ កាមេហិ វូបកដ្ឋា វិហរន្តិ យោ ច នេសំ កាមេសុ កាមច្ឆន្ទោ កាមស្នេហោ កាមមុច្ឆា កាមបិបាសា កាមបរិឡាហោ សោ ច អជ្ឈត្តំ សុប្បហីនោ ហោតិ សុប្បដិប្បស្សទ្ធោ ឱបក្កមិកា ចេបិ តេ ភោន្តោ សមណព្រាហ្មណា ទុក្ខា តិប្បា កដុកា វេទនា វេទិយន្តិ ភព្វា វ តេ ញាណាយ ទស្សនាយ អនុត្តរាយ សម្ពោធាយ នោ ចេបិ តេ ភោន្តោ សមណព្រាហ្មណា ឱបក្កមិកា ទុក្ខា តិប្បា កដុកា វេទនា វេទិយន្តិ ភព្វា វ តេ ញាណាយ ទស្សនាយ អនុត្តរាយ សម្ពោធាយ។ អយំ ខោ មំ ភារទ្វាជ តតិយា ឧបមា បដិភាសិ អនច្ឆរិយា បុព្វេ អស្សុតបុព្វា។ ឥមា ខោ មំ ភារទ្វាជ តិស្សោ ឧបមា បដិភំសុ អនច្ឆរិយា បុព្វេ អស្សុតបុព្វា។

[១៦១] តស្ស មយ្ហំ ភារទ្វាជ ឯតទហោសិ យន្នូនាហំ ទន្តេភិ ទន្តមាធាយ ជិវ្ហាយ តាលុំ អាហច្ច ចេតសា ចិត្តំ អភិនិគ្គណ្ហេយ្យំ អភិនិប្បីឡេយ្យំ អភិសន្តាបេយ្យន្តិ។ សោ ខោ អហំ ភារទ្វាជ ទន្តេភិ ទន្តមាធាយ ជិវ្ហាយ តាលុំ អាហច្ច ចេតសា ចិត្តំ អភិនិគ្គណ្ហាមិ អភិនិប្បីឡេមិ អភិសន្តាបេមិ។ តស្ស មយ្ហំ ភារទ្វាជ ទន្តេភិ ទន្តមាធាយ ជិវ្ហាយ តាលុំ អាហច្ច ចេតសា ចិត្តំ អភិនិគ្គណ្ហតោ អភិនិប្បីឡយតោ អភិសន្តាបយតោ កច្ឆេហិ សេទា មុច្ចន្តិ។ សេយ្យថាបិ ភារទ្វាជ ពលវា បុរិសោ ទុព្វលតរំ បុរិសំ សីសេ វា គហេត្វា ខន្ធេ វា គហេត្វា អភិនិគ្គណ្ហេយ្យ អភិនិប្បីឡេយ្យ អភិសន្តាបេយ្យ ឯវមេវ ខោ មេ ភារទ្វាជ ទន្តេភិ ទន្តមាធាយ ជិវ្ហាយ តាលុំ អាហច្ច ចេតសា ចិត្តំ អភិនិគ្គណ្ហតោ អភិនិប្បីឡយតោ អភិសន្តាបយតោ កច្ឆេហិ សេទា មុច្ចន្តិ។ អារទ្ធំ ខោ បន មេ ភារទ្វាជ វីរិយំ ហោតិ អសល្លីនំ ឧបដ្ឋិតា សតិ អប្បម្មុដ្ឋា សារទ្ធោ ច បន មេ កាយោ ហោហិ អប្បដិប្បស្សទ្ធោ តេនេវ ទុក្ខប្បធានេន បធានាភិតុន្នស្ស សតោ។

[១៦២] តស្ស មយ្ហំ ភារទ្វាជ ឯតទហោសិ យន្នូនាហំ អប្បានកំ ឈានំ ឈាយេយ្យន្តិ។ សោ ខោ អហំ ភារទ្វាជ មុខតោ ច នាសតោ ច អស្សាសប្បស្សាសេ ឧបរុន្ធឹ។ តស្ស មយ្ហំ ភារទ្វាជ មុខតោ ច នាសតោ ច អស្សាសប្បស្សាសេសុ ឧបរុទ្ធេសុ កណ្ណសោតេហិ វាតានំ និក្ខន្តានំ អធិមត្តោ សទ្ទោ ហោតិ។ សេយ្យថាបិ នាម កម្មារគគ្គរិយា ធមមានាយ អធិមត្តោ សទ្ទោ ហោតិ ឯវមេវ ខោ មេ ភារទ្វាជ មុខតោ ច នាសតោ ច អស្សាសប្បស្សាសេសុ ឧបរុទ្ធេសុ កណ្ណសោតេហិ វាតានំ និក្ខន្តានំ អធិមត្តោ សទ្ទោ ហោតិ។ អារទ្ធំ ខោ បន មេ ភារទ្វាជ វីរិយំ ហោតិ អសល្លីនំ ឧបដ្ឋិតា សតិ អប្បម្មុដ្ឋា សារទ្ធោ ច បន មេ កាយោ ហោតិ អប្បដិប្បស្សទ្ធោ តេនេវ ទុក្ខប្បធានេន បធានាភិតុន្នស្ស សតោ។

[១៦៣] តស្ស មយ្ហំ ភារទ្វាជ ឯតទហោសិ យន្នូនាហំ អប្បានកំយេវ ឈានំ ឈាយេយ្យន្តិ។ សោ ខោ អហំ ភារទ្វាជ មុខតោ ច នាសតោ ច កណ្ណសោតតោ ច អស្សាសប្បស្សាសេ ឧបរុន្ធឹ។ តស្ស មយ្ហំ ភារទ្វាជ មុខតោ ច នាសតោ ច កណ្ណសោតតោ ច អស្សាសប្បស្សាសេសុ ឧបរុទ្ធេសុ អធិមត្តា វាតា មុទ្ធានំ ឱហនន្តិ។ សេយ្យថាបិ ភារទ្វាជ ពលវា បុរិសោ តិណ្ហេន សិខរេន មុទ្ធានំ [ម. មុទ្ធនឹ។] អភិមត្ថេយ្យ ឯវមេវ ខោ មេ ភារទ្វាជ មុខតោ ច នាសតោ ច កណ្ណសោតតោ ច អស្សាសប្បស្សាសេសុ ឧបរុទ្ធេសុ អធិមត្តា វាតា មុទ្ធានំ ឱហនន្តិ។ អារទ្ធំ ខោ បន មេ ភារទ្វាជ វីរិយំ ហោតិ អសល្លីនំ ឧបដ្ឋិតា សតិ អប្បម្មុដ្ឋា សារទ្ធោ ច បន មេ កាយោ ហោតិ អប្បដិប្បស្សទ្ធោ តេនេវ ទុក្ខប្បធានេន បធានាភិតុន្នស្ស សតោ។

[១៦៤] តស្ស មយ្ហំ ភារទ្វាជ ឯតទហោសិ យន្នូនាហំ អប្បានកំយេវ ឈានំ ឈាយេយ្យន្តិ។ សោ ខោ អហំ ភារទ្វាជ មុខតោ ច នាសតោ ច កណ្ណសោតតោ ច អស្សាសប្បស្សាសេ ឧបរុន្ធឹ។ តស្ស មយ្ហំ ភារទ្វាជ មុខតោ ច នាសតោ ច កណ្ណសោតតោ ច អស្សាសប្បស្សាសេសុ ឧបរុទ្ធេសុ អធិមត្តា សីសេ សីសវេទនា ហោន្តិ។ សេយ្យថាបិ ភារទ្វាជ ពលវា បុរិសោ ទឡ្ហេន វរត្តក្ខន្ធេន សីសេ សីសវេធនំ ទទេយ្យ ឯវមេវ ខោ មេ ភារទ្វាជ មុខតោ ច នាសតោ ច កណ្ណសោតតោ ច អស្សាសប្បស្សាសេសុ ឧបរុទ្ធេសុ អធិមត្តា សីសេ សីសវេទនា ហោតិ។ អារទ្ធំ ខោ បន មេ ភារទ្វាជ វីរិយំ ហោតិ អសល្លីនំ ឧបដ្ឋិតា សតិ អប្បម្មុដ្ឋា សារទ្ធោ ច បន មេ កាយោ ហោតិ អប្បដិប្បស្សទ្ធោ តេនេវ ទុក្ខប្បធានេន បធានាភិតុន្នស្ស សតោ។

[១៦៥] តស្ស មយ្ហំ ភារទ្វាជ ឯតទហោសិ យន្នូនាហំ អប្បានកំយេវ ឈានំ ឈាយេយ្យន្តិ។ សោ ខោ អហំ ភារទ្វាជ មុខតោ ច នាសតោ ច កណ្ណសោតតោ ច អស្សាសប្បស្សាសេ ឧបរុន្ធឹ។ តស្ស មយ្ហំ ភារទ្វាជ មុខតោ ច នាសតោ ច កណ្ណសោតតោ ច អស្សាសប្បស្សាសេសុ ឧបរុទ្ធេសុ អធិមត្តា វាតា កុច្ឆឹ បរិកន្តន្តិ។ សេយ្យថាបិ ភារទ្វាជ ទក្ខោ គោឃាតកោ វា គោឃាតកន្តេវាសី វា តិណ្ហេន គោវិកន្តនេន កុច្ឆឹ បរិកន្តេយ្យ ឯវមេវ ខោ មេ ភារទ្វាជ មុខតោ ច នាសតោ ច កណ្ណសោតតោ ច អស្សាសប្បស្សាសេសុ ឧបរុទ្ធេសុ អធិមត្តា វាតា កុច្ឆឹ បរិកន្តន្តិ។ អារទ្ធំ ខោ បន មេ ភារទ្វាជ វីរិយំ ហោតិ អសល្លីនំ ឧបដ្ឋិតា សតិ អប្បម្មុដ្ឋា សារទ្ធោ ច បន មេ កាយោ ហោតិ អប្បដិប្បស្សទ្ធោ តេនេវ ទុក្ខប្បធានេន បធានាភិតុន្នស្ស សតោ។

[១៦៦] តស្ស មយ្ហំ ភារទ្វាជ ឯតទហោសិ យន្នូនាហំ អប្បានកំយេវ ឈានំ ឈាយេយ្យន្តិ។ សោ ខោ អហំ ភារទ្វាជ មុខតោ ច នាសតោ ច កណ្ណសោតតោ ច អស្សាសប្បស្សាសេ ឧបរុន្ធឹ។ តស្ស មយ្ហំ ភារទ្វាជ មុខតោ ច នាសតោ ច កណ្ណសោតតោ ច អស្សាសប្បស្សាសេសុ ឧបរុទ្ធេសុ អធិមត្តោ កាយស្មឹ ឌាហោ ហោតិ។ សេយ្យថាបិ ភារទ្វាជ ពលវន្តោ បុរិសា ទុព្វលតរំ បុរិសំ នានាពាហាសុ គហេត្វា អង្គារកាសុយា សន្តាបេយ្យុំ [ម. សន្តាបេយ្យុំ សម្បរិតាបេយ្យុន្តិ ទិស្សតិ។] ឯវមេវ ខោ មេ ភារទ្វាជ មុខតោ ច នាសតោ ច កណ្ណសោតតោ ច អស្សាសប្បស្សាសេសុ ឧបរុទ្ធេសុ អធិមត្តោ កាយស្មឹ ឌាហោ ហោតិ។ អារទ្ធំ ខោ បន មេ ភារទ្វាជ វីរិយំ ហោតិ អសល្លីនំ ឧបដ្ឋិតា សតិ អប្បម្មុដ្ឋា សារទ្ធោ ច បន មេ កាយោ ហោតិ អប្បដិប្បស្សទ្ធោ តេនេវ ទុក្ខប្បធានេន បធានាភិតុន្នស្ស សតោ។ អបិស្សុ មំ ភារទ្វាជ ទេវតា ទិស្វា ឯវមាហំសុ កាលកតោ សមណោ គោតមោតិ។ ឯកច្ចា ទេវតា ឯវមាហំសុ ន កាលកតោ សមណោ គោតមោ អបិច កាលំ ករោតីតិ។ ឯកច្ចា ទេវតា ឯវមាហំសុ ន កាលកតោ សមណោ គោតមោ នបិ កាលំ ករោតិ អរហំ សមណោ គោតមោ វិហារោ ត្វេវ សោ អរហតោ ឯវរូបោ ហោតីតិ។

[១៦៧] តស្ស មយ្ហំ ភារទ្វាជ ឯតទហោសិ យន្នូនាហំ សព្វសោ អាហារុបច្ឆេទាយ បដិបជ្ជេយ្យន្តិ។ អថខោ មំ ភារទ្វាជ តា ទេវតា ឧបសង្កមិត្វា ឯតទវោចុំ មា ខោ ត្វំ មារិស សព្វសោ អាហារុបច្ឆេទាយ បដិបជ្ជិ សចេ ខោ ត្វំ មារិស សព្វសោ អាហារុបច្ឆេទាយ បដិបជ្ជិស្សសិ តស្ស តេ មយំ ទិព្វំ ឱជំ លោមកូបេហិ អជ្ឈោហរិស្សាម តាយ តុវំ យាបេស្សសីតិ។ តស្ស មយ្ហំ ភារទ្វាជ ឯតទហោសិ អហំ ចេវ ខោ បន សព្វសោ ជទ្ធុកំ [ឱ. អជទ្ធុកន្តិ ទិស្សតិ។] បដិជានេយ្យំ ឥមា ច ខោ មេ ទេវតា ទិព្វំ ឱជំ លោមកូបេហិ អជ្ឈោហរេយ្យុំ តាយ ចាហំ យាបេយ្យំ តំ មម អស្ស មុសាតិ។ សោ ខោ អហំ ភារទ្វាជ តា ទេវតា បច្ចាចិក្ខាមិ អលន្តិ វទាមិ។

[១៦៨] តស្ស មយ្ហំ ភារទ្វាជ ឯតទហោសិ យន្នូនាហំ ថោកំ ថោកំ អាហារំ អាហរេយ្យំ បសតំ បសតំ យទិ វា មុគ្គយូសំ យទិ វា កុលត្ថយូសំ យទិ វា កឡាយយូសំ យទិ វា ហរេណុកយូសន្តិ។ សោ ខោ អហំ ភារទ្វាជ ថោកំ ថោកំ អាហារំ អាហារេសឹ បសតំ បសតំ យទិ វា មុគ្គយូសំ យទិ វា កុលត្ថយូសំ យទិ វា កឡាយយូសំ យទិ វា ហរេណុកយូសំ។ តស្ស មយ្ហំ ភារទ្វាជ ថោកំ ថោកំ អាហារំ អាហារយតោ បសតំ បសតំ យទិ វា មុគ្គយូសំ យទិ វា កុលត្ថយូសំ យទិ វា កឡាយយូសំ យទិ វា ហរេណុកយូសំ អធិមត្តកសិមានំ បត្តោ កាយោ ហោតិ។ សេយ្យថាបិ នាម អាសីតិកបព្វានិ វា កាឡបព្វានិ វា ឯវមេវស្សុ មេ អង្គប្បច្ចង្គានិ ភវន្តិ តាយេវប្បាហារតាយ។ សេយ្យថាបិ នាម ឱដ្ឋបទំ ឯវមេវស្សុ មេ អានិសទំ ហោតិ តាយេវប្បាហារតាយ។ សេយ្យថាបិ នាម វដ្ដនាវឡី ឯវមេវស្សុ មេ បិដ្ឋិកណ្ដកោ ឧណ្ណតាវណតោ ហោតិ តាយេវប្បាហារតាយ។ សេយ្យថាបិ នាម ជជ្ជរសាលាយ គោបាណសិយោ ឱលុគ្គវិលុគ្គា ភវន្តិ ឯវមេវស្សុ មេ ផាសុឡិយោ ឱលុគ្គវិលុគ្គា ភវន្តិ តាយេវប្បាហារតាយ។ សេយ្យថាបិ នាម គម្ភីរេ ឱទបានេ ឧទកតារកា គម្ភីរគតា ឱក្ខាយិកា ទិស្សន្តិ ឯវមេវស្សុ មេ អក្ខិកូបេសុ អក្ខិតារកា គម្ភីរគតា ឱក្ខាយិកា ទិស្សន្តិ តាយេវប្បាហារតាយ។ សេយ្យថាបិ នាម តិត្តិកាលាពុ អាមកច្ឆិន្នោ វាតាតបេន សំផុសិតោ ហោតិ សម្មិលាតោ ឯវមេវស្សុ មេ សីសច្ឆវិ សំផុសិតា ហោតិ សម្មិលាតា តាយេវប្បាហារតាយ។ សោ ខោ អហំ ភារទ្វាជ ឧទរច្ឆវឹ បរិមសិស្សាមីតិ បិដ្ឋិកណ្ដកំយេវ បរិគ្គណ្ហាមិ បិដ្ឋិកណ្ដកំ បរិមសិស្សាមីតិ ឧទរច្ឆវឹយេវ បរិគ្គណ្ហាមិ យាវស្សុ មេ ភារទ្វាជ ឧទរច្ឆវិ បិដ្ឋិកណ្ដកំ អល្លីនា ហោតិ តាយេវប្បាហារតាយ។ សោ ខោ អហំ ភារទ្វាជ វច្ចំ វា មុត្តំ វា ករិស្សាមីតិ តត្ថេវ អវកុជ្ជោ បបតាមិ តាយេវប្បាហារតាយ។ សោ ខោ អហំ ភារទ្វាជ ឥមមេវ កាយំ អស្សាសេន្តោ បាណិនា គត្តានិ អនុមជ្ជាមិ។ តស្ស មយ្ហំ ភារទ្វាជ បាណិនា គត្តានិ អនុមជ្ជតោ បូតិមូលានិ លោមានិ កាយស្មា បបតន្តិ តាយេវប្បាហារតាយ។ អបិស្សុ មំ ភារទ្វាជ មនុស្សា ទិស្វា ឯវមាហំសុ កាឡោ សមណោ គោតមោតិ។ ឯកច្ចេ មនុស្សា ឯវមាហំសុ ន កាឡោ សមណោ គោតមោ សាមោ សមណោ គោតមោតិ។ ឯកច្ចេ មនុស្សា ឯវមាហំសុ ន កាឡោ សមណោ គោតមោ នបិ សាមោ មង្គុរច្ឆវិ សមណោ គោតមោតិ។ យាវស្សុ មេ ភារទ្វាជ បរិសុទ្ធោ ឆវិវណ្ណោ បរិយោទាតោ ឧបហតោ ហោតិ តាយេវប្បាហារតាយ។

[១៦៩] តស្ស មយ្ហំ ភារទ្វាជ ឯតទហោសិ យេ ខោ កេចិ អតីតមទ្ធានំ សមណា វា ព្រាហ្មណា វា ឱបក្កមិកា ទុក្ខា តិប្បា កដុកា វេទនា វេទិយឹសុ ឯតាវបរមំ នយិតោ ភិយ្យោ យេបិ កេចិ អនាគតមទ្ធានំ សមណា វា ព្រាហ្មណា វា ឱបក្កមិកា ទុក្ខា តិប្បា កដុកា វេទនា វេទិយិស្សន្តិ ឯតាវបរមំ នយិតោ ភិយ្យោ យេបិ កេចិ ឯតរហិ សមណា វា ព្រាហ្មណា វា ឱបក្កមិកា ទុក្ខា តិប្បា កដុកា វេទនា វេទិយន្តិ ឯតាវបរមំ នយិតោ ភិយ្យោ។ ន ខោ បនាហំ ឥមាយ កដុកាយ ទុក្ករការិកាយ អធិគច្ឆាមិ ឧត្តរឹ មនុស្សធម្មា អលមរិយញ្ញាណទស្សនវិសេសំ សិយា នុ ខោ អញ្ញោ មគ្គោ ពោធិយាតិ។ តស្ស មយ្ហំ ភារទ្វាជ ឯតទហោសិ អភិជានាមិ ខោ បនាហំ បិតុ សក្កស្ស កម្មន្តេ សីតាយ ជម្ពូឆាយាយ និសិន្នោ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតា សិយា នុ ខោ ឯសោ មគ្គោ ពោធិយាតិ។ តស្ស មយ្ហំ ភារទ្វាជ សតានុសារិវិញ្ញាណំ អហោសិ ឯសេវ មគ្គោ ពោធិយាតិ។ តស្ស មយ្ហំ ភារទ្វាជ ឯតទហោសិ កិន្នុ ខោ អហំ តស្ស សុខស្ស ភាយាមិ យន្តំ សុខំ អញ្ញត្រេវ កាមេហិ អញ្ញត្រ អកុសលេហិ ធម្មេហីតិ។ តស្ស មយ្ហំ ភារទ្វាជ ឯតទហោសិ ន ខោ អហំ តស្ស សុខស្ស ភាយាមិ យន្តំ សុខំ អញ្ញត្រេវ កាមេហិ អញ្ញត្រ អកុសលេហិ ធម្មេហីតិ។

[១៧០] តស្ស មយ្ហំ ភារទ្វាជ ឯតទហោសិ ន ខោ តំ សុករំ សុខំ អធិគន្តុំ ឯវំ អធិមត្តកសិមានំ បត្តកាយេន យន្នូនាហំ ឱឡារិកំ អាហារំ អាហរេយ្យំ ឱទនំ កុម្មាសន្តិ។ សោ ខោ អហំ ភារទ្វាជ ឱឡារិកំ អាហារំ អាហារេសឹ ឱទនំ កុម្មាសំ។ តេន ខោ បន មំ ភារទ្វាជ សមយេន បញ្ច ភិក្ខូ បច្ចុបដ្ឋិតា ហោន្តិ យំ នោ សមណោ គោតមោ ធម្មំ អធិគមិស្សតិ តន្នោ អារោចេស្សតីតិ។ យតោ ខោ អហំ ភារទ្វាជ ឱឡារិកំ អាហារំ អាហារេសឹ ឱទនំ កុម្មាសំ អថ មេ តេ បញ្ច ភិក្ខូ និព្វិជ្ជ បក្កមឹសុ ពាហុល្លិកោ សមណោ គោតមោ បធានវិព្ភន្តោ អាវត្តោ ពាហុល្លាយាតិ។

[១៧១] សោ ខោ អហំ ភារទ្វាជ ឱឡារិកំ អាហារំ អាហរិត្វា ពលំ គហេត្វា វិវិច្ចេវ កាមេហិ។បេ។ បឋមំ ឈានំ ឧបសម្បជ្ជ វិហាសឹ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវំ អវិតក្កំ អវិចារំ សមាធិជំ បីតិសុខំ ទុតិយំ ឈានំ ឧបសម្បជ្ជ វិហាសឹ បីតិយា ច វិរាគា ឧបេក្ខកោ ច វិហាសឹ សតោ ច សម្បជានោ សុខញ្ច កាយេន បដិសំវេទេសឹ យន្តំ អរិយា អាចិក្ខន្តិ ឧបេក្ខកោ សតិមា សុខវិហារីតិ តតិយំ ឈានំ ឧបសម្បជ្ជ វិហាសឹ សុខស្ស ច បហានា ទុក្ខស្ស ច បហានា បុព្វេវ សោមនស្សទោមនស្សានំ អត្ថង្គមា អទុក្ខមសុខំ ឧបេក្ខាសតិបារិសុទ្ធឹ ចតុត្ថំ ឈានំ ឧបសម្បជ្ជ វិហាសឹ។

[១៧២] សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ បុព្វេនិវាសានុស្សតិញ្ញាណាយ ចិត្តំ អភិនិន្នាមេសឹ។ សោ អនេកវិហិតំ បុព្វេនិវាសំ អនុស្សរាមិ សេយ្យថីទំ ឯកម្បិ ជាតឹ ទ្វេបិ ជាតិយោ។បេ។ ឥតិ សាការំ សឧទ្ទេសំ អនេកវិហិតំ បុព្វេនិវាសំ អនុស្សរាមិ។ អយំ ខោ មេ ភារទ្វាជ រត្តិយា បឋមេ យាមេ បឋមា វិជ្ជា អធិគតា អវិជ្ជា វិហតា វិជ្ជា ឧប្បន្នា តមោ វិហតោ អាលោកោ ឧប្បន្នោ យថាតំ អប្បមត្តស្ស អាតាបិនោ បហិតត្តស្ស វិហរតោ។

[១៧៣] សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ សត្តានំ ចុតូបបាតញ្ញាណាយ ចិត្តំ អភិនិន្នាមេសឹ។ សោ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សាមិ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ។បេ។ យថាកម្មូបគេ សត្តេ បជានាមិ អយំ ខោ មេ ភារទ្វាជ រត្តិយា មជ្ឈិមេ យាមេ ទុតិយា វិជ្ជា អធិគតា អវិជ្ជា វិហតា វិជ្ជា ឧប្បន្នា តមោ វិហតោ អាលោកោ ឧប្បន្នោ យថាតំ អប្បមត្តស្ស អាតាបិនោ បហិតត្តស្ស វិហរតោ។

[១៧៤] សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ អាសវានំ ខយញ្ញាណាយ ចិត្តំ អភិនិន្នាមេសឹ។ សោ ឥទំ ទុក្ខន្តិ យថាភូតំ អព្ភញ្ញាសឹ អយំ ទុក្ខសមុទយោតិ យថាភូតំ អព្ភញ្ញាសឹ អយំ ទុក្ខនិរោធោតិ យថាភូតំ អព្ភញ្ញាសឹ អយំ ទុក្ខនិរោធគាមិនី បដិបទាតិ យថាភូតំ អព្ភញ្ញាសឹ ឥមេ អាសវាតិ យថាភូតំ អព្ភញ្ញាសឹ អយំ អាសវសមុទយោតិ យថាភូតំ អព្ភញ្ញាសឹ អយំ អាសវនិរោធោតិ យថាភូតំ អព្ភញ្ញាសឹ អយំ អាសវនិរោធគាមិនី បដិបទាតិ យថាភូតំ អព្ភញ្ញាសឹ។ តស្ស មយ្ហំ [ម. មេ។] ឯវំ ជានតោ ឯវំ បស្សតោ កាមាសវាបិ ចិត្តំ វិមុច្ចិត្ថ ភវាសវាបិ ចិត្តំ វិមុច្ចិត្ថ អវិជ្ជាសវាបិ ចិត្តំ វិមុច្ចិត្ថ វិមុត្តស្មឹ វិមុត្តមិតិ ញាណំ ហោតិ ខីណា ជាតិ វុសិតំ ព្រហ្មចរិយំ កតំ ករណីយំ នាបរំ ឥត្ថត្តាយាតិ អព្ភញ្ញាសឹ។ អយំ ខោ មេ ភារទ្វាជ រត្តិយា បច្ឆិមេ យាមេ តតិយា វិជ្ជា អធិគតា អវិជ្ជា វិហតា វិជ្ជា ឧប្បន្នា តមោ វិហតោ អាលោកោ ឧប្បន្នោ យថាតំ អប្បមត្តស្ស អាតាបិនោ បហិតត្តស្ស វិហរតោតិ។

[១៧៥] ឯវំ វុត្តេ សគារវោ មាណវោ ភគវន្តំ ឯតទវោច អដ្ឋិត វត ភោតោ គោតមស្ស បធានំ អហោសិ សប្បុរិស វត ភោតោ គោតមស្ស បធានំ អហោសិ យថាតំ អរហតោ សម្មាសម្ពុទ្ធស្ស កឹ នុ ខោ ភោ គោតម អត្ថិ ទេវាតិ។ ឋានសោ ខោ បនេតំ [ឱ. ឋានសោ មេ តន្តិ ទិស្សតិ។] ភារទ្វាជ វិទិតំ យទិទំ អត្ថិ ទេវាតិ។ កិន្នុ ខោ ភោ គោតម អត្ថិ ទេវាតិ បុដ្ឋោ សមានោ ឋានសោ បនេតំ [ឱ. ឋានសោ មេ តន្តិ ទិស្សតិ។] ភារទ្វាជ វិទិតំ យទិទំ អត្ថិ ទេវាតិ វទេសិ ននុ [ម. ននុ ខោតិ ទិស្សតិ។] ភោ គោតម ឯវំ សន្តេ តុច្ឆា មុសា ហោតីតិ។ អត្ថិ ទេវាតិ ភារទ្វាជ បុដ្ឋោ សមានោ អត្ថិ ទេវាតិ យោ វទេយ្យ ឋានសោ វិទិតា មេ វិទិតាតិ យោ វទេយ្យ។ អថខ្វេត្ថ វិញ្ញូបុរិសេន ឯកំសេន និដ្ឋំ គន្តុំ [ឱ. គន្តព្វំ។] វា យទិទំ អត្ថិ ទេវាតិ។ កិស្ស បន មេ ភវំ គោតមោ អាទិកេនេវ ន ព្យាកាសីតិ។ ឧច្ចេន សម្មតំ ខោ ឯតំ ភារទ្វាជ លោកស្មឹ យទិទំ អត្ថិ ទេវាតិ។

[១៧៦] ឯវំ វុត្តេ សគារវោ មាណវោ ភគវន្តំ ឯតទវោច អភិក្កន្តំ ភោ គោតម អភិក្កន្តំ ភោ គោតម សេយ្យថាបិ ភោ គោតម និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ ភោតា គោតមេន អនេកបរិយាយេន ធម្មោ បកាសិតោ ឯសាហំ ភវន្តំ គោតមំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភវំ គោតមោ ធារេតុ អជ្ជតគ្គេ បាណុបេតំ សរណង្គតន្តិ។

សគារវសុត្តំ ទសមំ និដ្ឋិតំ។

ព្រាហ្មណវគ្គោ បញ្ចមោ។

តស្ស វគ្គស្ស ឧទ្ទានំ

ព្រហ្មាយុ សេលស្ស លាយនោ ឃោដមុខោ ច ព្រាហ្មណោ

ឯសុចង្កី ធនញ្ជានី វាសេដ្ឋោ សុភគារវោ។

មជ្ឈិមបណ្ណាសកំ សមត្តំ។

ចប់ ភាគ២៥។

សូមអនុមោទនា !!!