មជ្ឈិមនិកាយ មជ្ឈិមបណ្ណាសក

ភាគទី២៣

ចតុត្ថោ ភាគោ

នមោ តស្ស ភគវតោ អរហតោ សម្មាសម្ពុទ្ធស្ស។

គហបតិវគ្គោ

បឋមំ កន្ទរកសុត្តំ

[១] ឯវម្មេ សុតំ។ ឯកំ សមយំ ភគវា ចម្បាយំ វិហរតិ គគ្គរាយ បោក្ខរណិយា តីរេ មហតា ភិក្ខុសង្ឃេន សទ្ធឹ។ អថខោ បេស្សោ ច ហត្ថារោហបុត្តោ កន្ទរកោ ច បរិព្វាជកោ យេន ភគវា តេនុបសង្កមឹសុ ឧបសង្កមិត្វា បេស្សោ ហត្ថារោហបុត្តោ ភគវន្តំ អភិវាទេត្វា ឯកមន្តំ និសីទិ។ កន្ទរកោ បន បរិព្វាជកោ ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ អដ្ឋាសិ។ ឯកមន្តំ ឋិតោ ខោ កន្ទរកោ បរិព្វាជកោ តុណ្ហីភូតំ តុណ្ហីភូតំ ភិក្ខុសង្ឃំ អនុវិលោកេត្វា ភគវន្តំ ឯតទវោច អច្ឆរិយំ ភោ គោតម អព្ភូតំ ភោ គោតម យាវញ្ចីទំ ភោតា គោតមេន សម្មា ភិក្ខុសង្ឃោ បដិបាទិតោ យេបិ តេ ភោ គោតម អហេសុំ អតីតមទ្ធានំ អរហន្តោ សម្មាសម្ពុទ្ធា តេបិ ភគវន្តោ ឯតបរមំយេវ សម្មា ភិក្ខុសង្ឃំ បដិបាទេសុំ សេយ្យថាបិ ឯតរហិ ភោតា គោតមេន សម្មា ភិក្ខុសង្ឃោ បដិបាទិតោ យេបិ តេ ភោ គោតម ភវិស្សន្តិ អនាគតមទ្ធានំ អរហន្តោ សម្មាសម្ពុទ្ធា តេបិ ភគវន្តោ ឯតបរមំយេវ សម្មា ភិក្ខុសង្ឃំ បដិបាទេស្សន្តិ សេយ្យថាបិ ឯតរហិ ភោតា គោតមេន សម្មា ភិក្ខុសង្ឃោ បដិបាទិតោតិ។

[២] ឯវមេតំ កន្ទរក ឯវមេតំ កន្ទរក យេបិ តេ កន្ទរក អហេសុំ អតីតមទ្ធានំ អរហន្តោ សម្មាសម្ពុទ្ធា តេបិ ភគវន្តោ ឯតបរមំយេវ សម្មា ភិក្ខុសង្ឃំ បដិបាទេសុំ សេយ្យថាបិ ឯតរហិ មយា សម្មា ភិក្ខុសង្ឃោ បដិបាទិតោ យេបិ តេ កន្ទរក ភវិស្សន្តិ អនាគតមទ្ធានំ អរហន្តោ សម្មាសម្ពុទ្ធា តេបិ ភគវន្តោ ឯតបរមំយេវ សម្មា ភិក្ខុសង្ឃំ បដិបាទេស្សន្តិ សេយ្យថាបិ ឯតរហិ មយា សម្មា ភិក្ខុសង្ឃោ បដិបាទិតោ សន្តិ ហិ កន្ទរក ភិក្ខូ ឥមស្មឹ ភិក្ខុសង្ឃេ អរហន្តោ ខីណាសវា វុសិតវន្តោ កតករណីយា ឱហិតភារា អនុប្បត្តសទត្ថា បរិក្ខីណភវសញ្ញោជនា សម្មទញ្ញា វិមុត្តា សន្តិ បន កន្ទរក ភិក្ខូ ឥមស្មឹ ភិក្ខុសង្ឃេ សេខា សន្តតសីលា សន្តតវុត្តិនោ និបកា និបកវុត្តិនោ តេ ចតូសុ សតិប្បដ្ឋានេសុ សុប្បតិដ្ឋិតចិត្តា វិហរន្តិ កតមេសុ ចតូសុ ឥធ កន្ទរក ភិក្ខុ កាយេ កាយានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សំ វេទនាសុ វេទនានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សំ ចិត្តេ ចិត្តានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សំ ធម្មេសុ ធម្មានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សន្តិ។

[៣] ឯវំ វុត្តេ បេស្សោ ហត្ថារោហបុត្តោ ភគវន្តំ ឯតទវោច អច្ឆរិយំ ភន្តេ អព្ភូតំ ភន្តេ យាវ សុប្បញ្ញត្តា ចិមេ ចត្តារោ សតិប្បដ្ឋានា សត្តានំ វិសុទ្ធិយា សោកបរិទេវានំ សមតិក្កមាយ ទុក្ខទោមនស្សានំ អត្ថង្គមាយ ញាយស្ស អធិគមាយ និព្វានស្ស សច្ឆិកិរិយាយ មយម្បិ ហិ ភន្តេ គិហី ឱទាតវសនា កាលេន កាលំ ឥមេសុ ចតូសុ សតិប្បដ្ឋានេសុ សុប្បតិដ្ឋិតចិត្តា វិហរាម ឥធ មយំ ភន្តេ កាយេ កាយានុបស្សិនោ [ឱ. កាយានុបស្សី។] វិហរាម អាតាបិនោ សម្បជានា សតិមន្តោ វិនេយ្យ លោកេ អភិជ្ឈាទោមនស្សំ វេទនាសុ វេទនានុបស្សិនោ [ឱ. វេទនានុបស្សី។] វិហរាម អាតាបិនោ សម្បជានា សតិមន្តោ វិនេយ្យ លោកេ អភិជ្ឈាទោមនស្សំ ចិត្តេ ចិត្តានុបស្សិនោ [ឱ. ចិត្តានុបស្សី។] វិហរាម អាតាបិនោ សម្បជានា សតិមន្តោ វិនេយ្យ លោកេ អភិជ្ឈាទោមនស្សំ ធម្មេសុ ធម្មានុបស្សិនោ [ឱ. ធម្មានុបស្សី។] វិហរាម អាតាបិនោ សម្បជានា សតិមន្តោ វិនេយ្យ លោកេ អភិជ្ឈាទោមនស្សំ អច្ឆរិយំ ភន្តេ អព្ភូតំ ភន្តេ យាវញ្ចីទំ ភន្តេ ភគវា ឯវំ មនុស្សគហនេ ឯវំ មនុស្សកសដេ ឯវំ មនុស្សសាឋេយ្យេ វត្តមានេ សត្តានំ ហិតាហិតំ ជានាតិ គហនញ្ហេតំ ភន្តេ យទិទំ មនុស្សា ឧត្តានកញ្ហេតំ ភន្តេ យទិទំ បសវោ អហញ្ហិ ភន្តេ បហោមិ ហត្ថិទម្មំ សារេតុំ យាវតកេន អន្តរេន ចម្បំ គតាគតំ ករិស្សតិ សព្វានិ តានិ សាឋេយ្យានិ កូដេយ្យានិ វង្កេយ្យានិ ជិម្ហេយ្យានិ បាតុករិស្សតិ អម្ហាកម្បន ភន្តេ ទាសាតិ វា បេស្សាតិ វា កម្មករាតិ វា អញ្ញថា ច កាយេន សមុទាចរន្តិ អញ្ញថា ច វាចាយ អញ្ញថា ច នេសំ ចិត្តំ ហោតិ អច្ឆរិយំ ភន្តេ អព្ភូតំ ភន្តេ យាវញ្ចីទំ ភន្តេ ភគវា ឯវំ មនុស្សគហនេ ឯវំ មនុស្សកសដេ ឯវំ មនុស្សសាឋេយ្យេ វត្តមានេ ហិតាហិតំ ជានាតិ គហនញ្ហេតំ ភន្តេ យទិទំ មនុស្សា ឧត្តានកញ្ហេតំ ភន្តេ យទិទំ បសវោតិ។

[៤] ឯវមេតំ បេស្ស ឯវមេតំ បេស្ស គហនញ្ហេតំ បេស្ស យទិទំ មនុស្សា ឧត្តានកញ្ហេតំ បេស្ស យទិទំ បសវោ ចត្តារោមេ បេស្ស បុគ្គលា សន្តោ សំវិជ្ជមានា លោកស្មឹ កតមេ ចត្តារោ ឥធ បេស្ស ឯកច្ចោ បុគ្គលោ អត្តន្តបោ ហោតិ អត្តបរិតាបនានុយោគមនុយុត្តោ ឥធ បន បេស្ស ឯកច្ចោ បុគ្គលោ បរន្តបោ ហោតិ បរបរិតាបនានុយោគមនុយុត្តោ ឥធ បេស្ស ឯកច្ចោ បុគ្គលោ អត្តន្តបោ ច ហោតិ អត្តបរិតាបនានុយោគមនុយុត្តោ បរន្តបោ ច បរបរិតាបនានុយោគមនុយុត្តោ ឥធ បន បេស្ស ឯកច្ចោ បុគ្គលោ នេវត្តន្តបោ ហោតិ នាត្តបរិតាបនានុយោគមនុយុត្តោ ន បរន្តបោ ន បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតីភូតោ សុខប្បដិសំវេទី ព្រហ្មភូតេន អត្តនា វិហរតិ ឥមេសំ បេស្ស ចតុន្នំ បុគ្គលានំ កតមោ តេ បុគ្គលោ ចិត្តំ អារាធេតីតិ។

[៥] យ្វាយំ ភន្តេ បុគ្គលោ អត្តន្តបោ អត្តបរិតាបនានុយោគមនុយុត្តោ អយំ មេ បុគ្គលោ ចិត្តំ នារាធេតិ យោបាយំ ភន្តេ បុគ្គលោ បរន្តបោ បរបរិតាបនានុយោគមនុយុត្តោ អយម្បិ មេ បុគ្គលោ ចិត្តំ នារាធេតិ យោបាយំ ភន្តេ បុគ្គលោ អត្តន្តបោ ច អត្តបរិតាបនានុយោគមនុយុត្តោ បរន្តបោ ច បរបរិតាបនានុយោគមនុយុត្តោ អយម្បិ មេ បុគ្គលោ ចិត្តំ នារាធេតិ យោ ច ខោ អយំ ភន្តេ បុគ្គលោ នេវត្តន្តបោ នាត្តបរិតាបនានុយោគមនុយុត្តោ ន បរន្តបោ ន បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតីភូតោ សុខប្បដិសំវេទី ព្រហ្មភូតេន អត្តនា វិហរតិ អយំ មេ បុគ្គលោ ចិត្តំ អារាធេតីតិ។ កស្មា បន តេ បេស្ស ឥមេ តយោ បុគ្គលា ចិត្តំ នារាធេន្តីតិ។

[៦] យ្វាយំ ភន្តេ បុគ្គលោ អត្តន្តបោ អត្តបរិតាបនានុយោគមនុយុត្តោ សោ អត្តានំ សុខកាមំ ទុក្ខប្បដិក្កូលំ អាតាបេតិ បរិតាបេតិ ឥមិនា មេ អយំ បុគ្គលោ ចិត្តំ នារាធេតិ យោបាយំ ភន្តេ បុគ្គលោ បរន្តបោ បរបរិតាបនានុយោគមនុយុត្តោ សោ បរំ សុខកាមំ ទុក្ខប្បដិក្កូលំ អាតាបេតិ បរិតាបេតិ ឥមិនា មេ អយំ បុគ្គលោ ចិត្តំ នារាធេតិ យោបាយំ ភន្តេ បុគ្គលោ អត្តន្តបោ ច អត្តបរិតាបនានុយោគមនុយុត្តោ បរន្តបោ ច បរបរិតាបនានុយោគមនុយុត្តោ សោ អត្តានញ្ច បរញ្ច សុខកាមំ ទុក្ខប្បដិក្កូលំ អាតាបេតិ បរិតាបេតិ ឥមិនា មេ អយំ បុគ្គលោ ចិត្តំ នារាធេតិ យោ ច ខោ អយំ បុគ្គលោ នេវត្តន្តបោ នាត្តបរិតាបនានុយោគមនុយុត្តោ ន បរន្តបោ ន បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតីភូតោ សុខប្បដិសំវេទី ព្រហ្មភូតេន អត្តនា វិហរតិ ឥមិនា មេ អយំ បុគ្គលោ ចិត្តំ អារាធេតិ ហន្ទ ចទានិ មយំ ភន្តេ គច្ឆាម ពហុកិច្ចា មយំ ពហុករណីយាតិ។ យស្សទានិ ត្វំ បេស្ស កាលំ មញ្ញសីតិ។ អថខោ បេស្សោ ហត្ថារោហបុត្តោ ភគវតោ ភាសិតំ អភិនន្ទិត្វា អនុមោទិត្វា ឧដ្ឋាយាសនា ភគវន្តំ អភិវាទេត្វា បទក្ខិណំ កត្វា បក្កាមិ។

[៧] អថខោ ភគវា អចិរប្បក្កន្តេ បេស្សេ ហត្ថារោហបុត្តេ ភិក្ខូ អាមន្តេសិ បណ្ឌិតោ ភិក្ខវេ បេស្សោ ហត្ថារោហបុត្តោ មហាបញ្ញោ ភិក្ខវេ បេស្សោ ហត្ថារោហបុត្តោ សចេ ភិក្ខវេ បេស្សោ ហត្ថារោហបុត្តោ មុហុត្តំ និសីទេយ្យ យាវស្សាហំ ឥមេ ចត្តារោ បុគ្គលេ វិត្ថារេន វិភជិស្សាមិ មហតា អត្ថេន សំយុត្តោ អភវិស្ស អបិច ភិក្ខវេ ឯត្តាវតាបិ បេស្សោ ហត្ថារោហបុត្តោ មហតា អត្ថេន សំយុត្តោតិ។ ឯតស្ស ភគវា កាលោ ឯតស្ស សុគត កាលោ យំ ភគវា ឥមេ ចត្តារោ បុគ្គលេ វិត្ថារេន វិភជេយ្យ ភគវតោ សុត្វា ភិក្ខូ ធារេស្សន្តីតិ។ តេនហិ ភិក្ខវេ សុណាថ សាធុកំ មនសិករោថ ភាសិស្សាមីតិ។ ឯវំ ភន្តេតិ ខោ តេ ភិក្ខូ ភគវតោ បច្ចស្សោសុំ។

[៨] ភគវា ឯតទវោច កតមោ ច ភិក្ខវេ បុគ្គលោ អត្តន្តបោ អត្តបរិតាបនានុយោគមនុយុត្តោ។ ឥធ ភិក្ខវេ ឯកច្ចោ បុគ្គលោ អចេលកោ ហោតិ មុត្តាចារោ ហត្ថាវលេខនោ [ឱ.ម. ហត្ថាបលេខនោ។] ន ឯហិភទ្ទន្តិកោ ន តិដ្ឋភទ្ទន្តិកោ នាភិហតំ ន ឧទ្ទិស្ស កតំ ន និមន្តនំ សាទិយតិ សោ ន កុម្ភិមុខា បដិគ្គណ្ហាតិ ន កឡោបិមុខា បដិគ្គណ្ហាតិ ន ឯឡកមន្តរំ ន ទណ្ឌមន្តរំ ន មូសលមន្តរំ ន ទ្វិន្នំ ភុញ្ជមានានំ ន គព្ភិនិយា ន បាយមានាយ ន បុរិសន្តរគតាយ ន សង្កិត្តីសុ ន យត្ថ សា ឧបដ្ឋិតោ ហោតិ ន យត្ថ មក្ខិកា សណ្ឌសណ្ឌចារិនី ន មច្ឆំ ន មំសំ ន សុរំ ន មេរយំ ន ថុសោទកំ បិវតិ។ សោ ឯកាគារិកោ វា ហោតិ ឯកាលោបិកោ ទ្វាគារិកោ វា ហោតិ ទ្វាលោបិកោ។បេ។ សត្តាគារិកោ វា ហោតិ សត្តាលោបិកោ ឯកិស្សាបិ ទត្តិយា យាបេតិ ទ្វីហិបិ ទត្តីហិ យាបេតិ។បេ។ សត្តហិបិ ទត្តីហិ យាបេតិ ឯកាហិកម្បិ [ម. ឯកាហិកំបិ។] អាហារំ អាហារេតិ ទ្វីហិកម្បិ អាហារំ អាហារេតិ។បេ។ សត្តាហិកម្បិ អាហារំ អាហារេតិ ឥតិ ឯវរូបម្បិ [ឱ. ឯវរូបំ។ ម. ឯវរូបំបិ។] អទ្ធមាសិកំ [ឱ. អទ្ធមាសិកម្បិ។ ម. អទ្ធមាសិកំ។] បរិយាយភត្តភោជនានុយោគមនុយុត្តោ វិហរតិ។ សោ សាកភក្ខោ វា ហោតិ សាមាកភក្ខោ វា ហោតិ នីវារភក្ខោ វា ហោតិ ទទ្ទុលភក្ខោ វា ហោតិ ហដភក្ខោ វា ហោតិ កណភក្ខោ វា ហោតិ អាចាមភក្ខោ វា ហោតិ បិញ្ញាកភក្ខោ វា ហោតិ តិណភក្ខោ វា ហោតិ គោមយភក្ខោ វា ហោតិ វនមូលផលាហារោ វា យាបេតិ បវត្តផលភោជី។ សោ សាណានិបិ ធារេតិ មសាណានិបិ ធារេតិ ឆវទុស្សានិបិ ធារេតិ បំសុកូលានិបិ ធារេតិ តិរីដានិបិ ធារេតិ អជិនានិបិ ធារេតិ អជិនក្ខិបម្បិ ធារេតិ កុសចីរម្បិ ធារេតិ វាកចីរម្បិ ធារេតិ ផលកចីរម្បិ ធារេតិ កេសកម្ពលម្បិ ធារេតិ វាលកម្ពលម្បិ ធារេតិ ឧឡូកបក្ខម្បិ ធារេតិ កេសមស្សុលោចកោបិ ហោតិ កេសមស្សុលោចនានុយោគមនុយុត្តោ ឧព្ភត្ថកោបិ ហោតិ អាសនប្បដិក្ខិត្តោ ឧក្កុដិកោបិ ហោតិ ឧក្កុដិកប្បធានមនុយុត្តោ កណ្ដកាបស្សយិកោបិ ហោតិ កណ្ដកាបស្សយេ សេយ្យំ កប្បេតិ សាយតតិយកម្បិ ឧទកោរោហនានុយោគមនុយុត្តោ វិហរតិ ឥតិ ឯវរូបំ អនេកវិហិតំ កាយស្ស អាតាបនបរិតាបនានុយោគមនុយុត្តោ វិហរតិ អយំ វុច្ចតិ ភិក្ខវេ បុគ្គលោ អត្តន្តបោ អត្តបរិតាបនានុយោគមនុយុត្តោ។

[៩] កតមោ ច ភិក្ខវេ បុគ្គលោ បរន្តបោ បរបរិតាបនានុយោគមនុយុត្តោ។ ឥធ ភិក្ខវេ ឯកច្ចោ បុគ្គលោ ឱរព្ភិកោ [ម. ឱរម្ភិកោ។] ហោតិ សូករិកោ សាកុណិកោ [ម. សាកុន្តិកោ។ សាកុណីកោ។] មាគវិកោ លុទ្ទោ មច្ឆឃាតកោ ចោរោ ចោរឃាតកោ ពន្ធនាគារិកោ យេ វា បនញ្ញេបិ កេចិ កុរូរកម្មន្តា អយំ វុច្ចតិ ភិក្ខវេ បុគ្គលោ បរន្តបោ បរបរិតាបនានុយោគមនុយុត្តោ។

[១០] កតមោ ច ភិក្ខវេ បុគ្គលោ អត្តន្តបោ ច អត្តបរិតាបនានុយោគមនុយុត្តោ បរន្តបោ ច បរបរិតាបនានុយោគមនុយុត្តោ។ ឥធ ភិក្ខវេ ឯកច្ចោ បុគ្គលោ រាជា វា ហោតិ ខត្តិយោ មុទ្ធាវសិត្តោ ព្រាហ្មណោ វា មហាសាលោ សោ បុរត្ថិមេន នគរស្ស នវំ សន្ថាគារំ ការាបេត្វា កេសមស្សុំ ឱហារេត្វា ខរាជិនំ [ខុរាជិនន្តិបិ បាឋោ។] និវាសេត្វា សប្បិតេលេន កាយំ អព្ភញ្ជិត្វា មិគវិសាណេន បិដ្ឋឹ កណ្ឌុវមានោ នវំ [ឱ.ម. នវន្តិ ន ទិស្សតិ។] សន្ថាគារំ បវិសតិ សទ្ធឹ មហេសិយា ព្រាហ្មណេន ច បុរោហិតេន សោ តត្ថ អនន្តរហិតាយ ភូមិយា ហរិតុបលិត្តាយ [ឱ. ហរិតុបត្តាយ។] សេយ្យំ កប្បេតិ សោ [ឱ.ម. សោតិ ន ទិស្សតិ។] ឯកិស្សា គាវិយា សរូបវច្ឆាយ យំ ឯកស្មឹ ថនេ ខីរំ ហោតិ តេន រាជា យាបេតិ យំ ទុតិយស្មឹ ថនេ ខីរំ ហោតិ តេន មហេសី យាបេតិ យំ តតិយស្មឹ ថនេ ខីរំ ហោតិ តេន ព្រាហ្មណោ បុរោហិតោ យាបេតិ យំ ចតុត្ថស្មឹ ថនេ ខីរំ ហោតិ តេន អគ្គឹ ជុហតិ [ឱ.ម. ជុហន្តិ។] អវសេសេន វច្ឆកោ យាបេតិ សោ ឯវមាហ ឯត្តកា ឧសភា ហញ្ញន្តុ យញ្ញត្ថាយ ឯត្តកា វច្ឆតរា ហញ្ញន្តុ យញ្ញត្ថាយ ឯត្តកា វច្ឆតរិយោ ហញ្ញន្តុ យញ្ញត្ថាយ ឯត្តកា អជា ហញ្ញន្តុ យញ្ញត្ថាយ ឯត្តកា ឧរព្ភា ហញ្ញន្តុ យញ្ញត្ថាយ ឯត្តកា អស្សា ហញ្ញន្តុ យញ្ញត្ថាយ [ឱ. ឯត្តកា អស្សា ហញ្ញន្តុ យញ្ញត្ថាយាតិ ន ទិស្សតិ។] ឯត្តកា រុក្ខា ឆិជ្ជន្តុ យូបត្ថាយ ឯត្តកា ទព្វា លុយន្តុ បរិសន្ថាយាតិ [ឱ. ពរិហិសត្ថាយាតិ។] យេបិស្ស តេ ហោន្តិ ទាសាតិ វា បេស្សាតិ វា កម្មករាតិ វា តេបិ ទណ្ឌតជ្ជិតា ភយតជ្ជិតា អស្សុមុខា រុទមានា បរិកម្មានិ ករោន្តិ អយំ វុច្ចតិ ភិក្ខវេ បុគ្គលោ អត្តន្តបោ ច អត្តបរិតាបនានុយោគមនុយុត្តោ បរន្តបោ ច បរបរិតាបនានុយោគមនុយុត្តោ។

[១១] កតមោ ច ភិក្ខវេ បុគ្គលោ នេវត្តន្តបោ [ម. នេវត្តន្តបោ ច។] នាត្តបរិតាបនានុយោគមនុយុត្តោ ន បរន្តបោ ន បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតីភូតោ សុខប្បដិសំវេទី ព្រហ្មភូតេន អត្តនា វិហរតិ។ ឥធ ភិក្ខវេ តថាគតោ លោកេ ឧប្បជ្ជតិ អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវា សោ ឥមំ លោកំ សទេវកំ សមារកំ សព្រហ្មកំ សស្សមណព្រាហ្មណឹ បជំ សទេវមនុស្សំ សយំ អភិញ្ញា សច្ឆិកត្វា បវេទេតិ សោ ធម្មំ ទេសេតិ អាទិកល្យាណំ មជ្ឈេកល្យាណំ បរិយោសានកល្យាណំ សាត្ថំ សព្យញ្ជនំ កេវលបរិបុណ្ណំ បរិសុទ្ធំ ព្រហ្មចរិយំ បកាសេតិ។ តំ ធម្មំ សុណាតិ គហបតិ វា គហបតិបុត្តោ វា អញ្ញតរស្មឹ វា កុលេ បច្ឆា ជាតោ សោ តំ ធម្មំ សុត្វា តថាគតេ សទ្ធំ បដិលភតិ សោ តេន សទ្ធាបដិលាភេន សមន្នាគតោ ឥតិ បដិសញ្ចិក្ខតិ សម្ពាធោ ឃរាវាសោ រជាបថោ អព្ភោកាសោ បព្វជ្ជា នយិទំ សុករំ អគារំ អជ្ឈាវសតា ឯកន្តបរិបុណ្ណំ ឯកន្តបរិសុទ្ធំ សង្ខលិខិតំ ព្រហ្មចរិយំ ចរិតុំ យន្នូនាហំ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជេយ្យន្តិ។ សោ អបរេន សមយេន អប្បំ វា ភោគក្ខន្ធំ បហាយ មហន្តំ វា ភោគក្ខន្ធំ បហាយ អប្បំ វា ញាតិបរិវដ្ដំ បហាយ មហន្តំ វា ញាតិបរិវដ្ដំ បហាយ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជតិ។

[១២] សោ ឯវំ បព្វជិតោ សមានោ ភិក្ខូនំ សិក្ខាសាជីវសមាបន្នោ បាណាតិបាតំ បហាយ បាណាតិបាតា បដិវិរតោ ហោតិ និហិតទណ្ឌោ និហិតសត្ថោ លជ្ជី ទយាបន្នោ សព្វប្បាណភូតហិតានុកម្បី វិហរតិ អទិន្នាទានំ បហាយ អទិន្នាទានា បដិវិរតោ ហោតិ ទិន្នាទាយី ទិន្នបាដិកង្ខី អថេនេន សុចិភូតេន អត្តនា វិហរតិ អព្រហ្មចរិយំ បហាយ ព្រហ្មចារី ហោតិ អារាចារី វិរតោ មេថុនា គាមធម្មា មុសាវាទំ បហាយ មុសាវាទា បដិវិរតោ ហោតិ សច្ចវាទី សច្ចសន្ធោ ថេតោ បច្ចយិកោ អវិសំវាទកោ លោកស្ស បិសុណំ វាចំ បហាយ បិសុណាយ វាចាយ បដិវិរតោ ហោតិ ឥតោ សុត្វា ន អមុត្រ អក្ខាតា ឥមេសំ ភេទាយ អមុត្រ វា សុត្វា ន ឥមេសំ អក្ខាតា អមូសំ ភេទាយ ឥតិ ភិន្នានំ វា សន្ធាតា សហិតានំ វា អនុប្បទាតា សមគ្គារាមោ សមគ្គរតោ សមគ្គនន្ទី សមគ្គករណឹ វាចំ ភាសិតា ហោតិ ផរុសំ បហាយ ផរុសាយ វាចាយ បដិវិរតោ ហោតិ យា សា វាចា នេលា កណ្ណសុខា បេមនីយា ហទយង្គមា បោរី ពហុជនកន្តា ពហុជនមនាបា តថារូបឹ វាចំ ភាសិតា ហោតិ សម្ផប្បលាបំ បហាយ សម្ផប្បលាបា បដិវិរតោ ហោតិ កាលវាទី ភូតវាទី អត្ថវាទី ធម្មវាទី វិនយវាទី និធានវតឹ វាចំ ភាសិតា កាលេន សាបទេសំ បរិយន្តវតឹ អត្ថសញ្ហិតំ។ សោ វីជគាមភូតគាមសមារម្ភា [ឱ.ម. ពីជគាមភូតគាមសមារម្ភោ។] បដិវិរតោ ហោតិ ឯកភត្តិកោ ហោតិ រត្តូបរតោ វិរតោ វិកាលភោជនា នច្ចគីតវាទិតវិសូកទស្សនា បដិវិរតោ ហោតិ មាលាគន្ធវិលេបនធារណមណ្ឌនវិភូសនដ្ឋានា បដិវិរតោ ហោតិ ឧច្ចាសយនមហាសយនា បដិវិរតោ ហោតិ ជាតរូបរជតប្បដិគ្គហណា បដិវិរតោ ហោតិ អាមកធញ្ញប្បដិគ្គហណា បដិវិរតោ ហោតិ អាមកមំសប្បដិគ្គហណា បដិវិរតោ ហោតិ ឥត្ថីកុមារិកាបដិគ្គហណា បដិវិរតោ ហោតិ ទាសីទាសប្បដិគ្គហណា បដិវិរតោ ហោតិ អជេលកប្បដិគ្គហណា បដិវិរតោ ហោតិ កុក្កុដសូករប្បដិគ្គហណា បដិវិរតោ ហោតិ ហត្ថិគវាស្សវឡវប្បដិគ្គហណា បដិវិរតោ ហោតិ ខេត្តវត្ថុប្បដិគ្គហណា បដិវិរតោ ហោតិ ទូតេយ្យប្បហីណគមនានុយោគា បដិវិរតោ ហោតិ កយវិក្កយា បដិវិរតោ ហោតិ តុលាកូដកំសកូដមានកូដា បដិវិរតោ ហោតិ ឧក្កោដនវញ្ចននិកតសាវិយោគា បដិវិរតោ ហោតិ ឆេទនវធពន្ធនវិបរាមោសអាលោបសហសាការា បដិវិរតោ ហោតិ។ សោ សន្តុដ្ឋោ ហោតិ កាយបរិហារិកេន ចីវរេន កុច្ឆិបរិហារិកេន បិណ្ឌបាតេន យេន យេនេវ បក្កមតិ សមាទាយេវ បក្កមតិ។ សេយ្យថាបិ នាម បក្ខី សកុណោ យេន យេនេវ ឌេតិសបត្តភារោវ ឌេតិ ឯវមេវ ភិក្ខុ សន្តុដ្ឋោ ហោតិ កាយបរិហារិកេន ចីវរេន កុច្ឆិបរិហារិកេន បិណ្ឌបាតេន យេន យេនេវ បក្កមតិ សមាទាយេវ បក្កមតិ។ សោ ឥមិនា អរិយេន សីលក្ខន្ធេន សមន្នាគតោ អជ្ឈត្តំ អនវជ្ជសុខំ បដិសំវេទេតិ។ សោ ចក្ខុនា រូបំ ទិស្វា ន និមិត្តគ្គាហី ហោតិ នានុព្យញ្ជនគ្គាហី យត្វាធិករណមេនំ ចក្ខុន្ទ្រិយំ អសំវុតំ វិហរន្តំ អភិជ្ឈាទោមនស្សា បាបកា អកុសលា ធម្មា អន្វាស្សវេយ្យុំ តស្ស សំវរាយ បដិបជ្ជតិ រក្ខតិ ចក្ខុន្ទ្រិយំ ចក្ខុន្ទ្រិយេ សំវរំ អាបជ្ជតិ សោតេន សទ្ទំ សុត្វា… ឃានេន គន្ធំ ឃាយិត្វា… ជិវ្ហាយ រសំ សាយិត្វា… កាយេន ផោដ្ឋព្វំ ផុសិត្វា… មនសា ធម្មំ វិញ្ញាយ ន និមិត្តគ្គាហី ហោតិ នានុព្យញ្ជនគ្គាហី យត្វាធិករណមេនំ មនិន្ទ្រិយំ អសំវុតំ វិហរន្តំ អភិជ្ឈាទោមនស្សា បាបកា អកុសលា ធម្មា អន្វាស្សវេយ្យុំ តស្ស សំវរាយ បដិបជ្ជតិ រក្ខតិ មនិន្ទ្រិយំ មនិន្ទ្រិយេ សំវរំ អាបជ្ជតិ។ សោ ឥមិនា អរិយេន ឥន្ទ្រិយសំវរេន សមន្នាគតោ អជ្ឈត្តំ អព្យាសេកសុខំ បដិសំវេទេតិ។ សោ អភិក្កន្តេ បដិក្កន្តេ សម្បជានការី ហោតិ អាលោកិតេ វិលោកិតេ សម្បជានការី ហោតិ សម្មិញ្ជិតេ បសារិតេ សម្បជានការី ហោតិ សង្ឃាដិបត្តចីវរធារណេ សម្បជានការី ហោតិ អសិតេ បីតេ ខាយិតេ សាយិតេ សម្បជានការី ហោតិ ឧច្ចារប្បស្សាវកម្មេ សម្បជានការី ហោតិ គតេ ឋិតេ និសិន្នេ សុត្តេ ជាគរិតេ ភាសិតេ តុណ្ហីភាវេ សម្បជានការី ហោតិ។

[១៣] សោ ឥមិនា ច អរិយេន សីលក្ខន្ធេន សមន្នាគតោ ឥមិនា ច អរិយេន ឥន្ទ្រិយសំវរេន សមន្នាគតោ ឥមិនា ច អរិយេន សតិសម្បជញ្ញេន សមន្នាគតោ វិវិត្តំ សេនាសនំ ភជតិ អរញ្ញំ រុក្ខមូលំ បព្វតំ កន្ទរំ គិរិគុហំ សុសានំ វនបត្ថំ អព្ភោកាសំ បលាលបុញ្ជំ។ សោ បច្ឆាភត្តំ បិណ្ឌបាតប្បដិក្កន្តោ និសីទតិ បល្លង្កំ អាភុជិត្វា ឧជុំ កាយំ បណិធាយ បរិមុខំ សតឹ ឧបដ្ឋបេត្វា។ សោ អភិជ្ឈំ លោកេ បហាយ វិគតាភិជ្ឈេន ចេតសា វិហរតិ អភិជ្ឈាយ ចិត្តំ បរិសោធេតិ ព្យាបាទប្បទោសំ បហាយ អព្យាបន្នចិត្តោ វិហរតិ សព្វប្បាណភូតហិតានុកម្បី ព្យាបាទប្បទោសា ចិត្តំ បរិសោធេតិ ថីនមិទ្ធំ បហាយ វិគតថីនមិទ្ធោ វិហរតិ អាលោកសញ្ញី សតោ សម្បជានោ ថីនមិទ្ធា ចិត្តំ បរិសោធេតិ ឧទ្ធច្ចកុក្កុច្ចំ បហាយ អនុទ្ធតោ វិហរតិ អជ្ឈត្តំ វូបសន្តចិត្តោ ឧទ្ធច្ចកុក្កុច្ចា ចិត្តំ បរិសោធេតិ វិចិកិច្ឆំ បហាយ តិណ្ណវិចិកិច្ឆោ វិហរតិ អកថំកថី កុសលេសុ ធម្មេសុ វិចិកិច្ឆាយ ចិត្តំ បរិសោធេតិ។

[១៤] សោ ឥមេ បញ្ច នីវរណេ បហាយ ចេតសោ ឧបក្កិលេសេ បញ្ញាយ ទុព្វលីករណេ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវំ អវិតក្កំ អវិចារំ សមាធិជំ បីតិសុខំ ទុតិយំ ឈានំ ឧបសម្បជ្ជ វិហរតិ បីតិយា ច វិរាគា ឧបេក្ខកោ ច វិហរតិ សតោ ច សម្បជានោ សុខញ្ច កាយេន បដិសំវេទេតិ យន្តំ អរិយា អាចិក្ខន្តិ ឧបេក្ខកោ សតិមា សុខវិហារីតិ តតិយំ ឈានំ ឧបសម្បជ្ជ វិហរតិ សុខស្ស ច បហានា ទុក្ខស្ស ច បហានា បុព្វេវ សោមនស្សទោមនស្សានំ អត្ថង្គមា អទុក្ខមសុខំ ឧបេក្ខាសតិបារិសុទ្ធឹ ចតុត្ថំ ឈានំ ឧបសម្បជ្ជ វិហរតិ។

[១៥] សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ [ឱ. អនេជ្ជប្បត្តេ។] បុព្វេនិវាសានុស្សតិញ្ញាណាយ ចិត្តំ អភិនិន្នាមេតិ សោ អនេកវិហិតំ បុព្វេនិវាសំ អនុស្សរតិ សេយ្យថីទំ ឯកម្បិ ជាតឹ ទ្វេបិ ជាតិយោ តិស្សោបិ ជាតិយោ ចតស្សោបិ ជាតិយោ បញ្ចបិ ជាតិយោ ទសបិ ជាតិយោ វីសម្បិ ជាតិយោ តឹសម្បិ ជាតិយោ ចត្តាឡីសម្បិ ជាតិយោ បញ្ញាសម្បិ ជាតិយោ ជាតិសតម្បិ ជាតិសហស្សម្បិ ជាតិសតសហស្សម្បិ អនេកេបិ សំវដ្ដកប្បេ អនេកេបិ វិវដ្ដកប្បេ អនេកេបិ សំវដ្ដវិវដ្ដកប្បេ អមុត្រាសឹ ឯវំនាមោ ឯវំគោត្តោ ឯវំវណ្ណោ ឯវមាហារោ ឯវំសុខទុក្ខប្បដិសំវេទី ឯវមាយុបរិយន្តោ សោ តតោ ចុតោ អមុត្រ ឧទបាទឹ [ឱ. ឧប្បាទឹ។] តត្រាបាសឹ ឯវំនាមោ ឯវំគោត្តោ ឯវំវណ្ណោ ឯវមាហារោ ឯវំសុខទុក្ខប្បដិសំវេទី ឯវមាយុបរិយន្តោ សោ តតោ ចុតោ ឥធូបបន្នោតិ។ ឥតិ សាការំ សឧទ្ទេសំ អនេកវិហិតំ បុព្វេនិវាសំ អនុស្សរតិ។

[១៦] សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ សត្តានំ ចុតូបបាតញ្ញាណាយ ចិត្តំ អភិនិន្នាមេតិ សោ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សតិ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ យថាកម្មូបគេ សត្តេ បជានាតិ ឥមេ វត ភោន្តោ សត្តា កាយទុច្ចរិតេន សមន្នាគតា វចីទុច្ចរិតេន សមន្នាគតា មនោទុច្ចរិតេន សមន្នាគតា អរិយានំ ឧបវាទកា មិច្ឆាទិដ្ឋិកា មិច្ឆាទិដ្ឋិកម្មសមាទានា តេ កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបន្នា ឥមេ វា បន ភោន្តោ សត្តា កាយសុចរិតេន សមន្នាគតា វចីសុចរិតេន សមន្នាគតា មនោសុចរិតេន សមន្នាគតា អរិយានំ អនុប្បវាទកា សម្មាទិដ្ឋិកា សម្មាទិដ្ឋិកម្មសមាទានា តេ កាយស្ស ភេទា បរម្មរណា សុគតឹ សគ្គំ លោកំ ឧបបន្នាតិ។ ឥតិ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សតិ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ យថាកម្មូបគេ សត្តេ បជានាតិ។

[១៧] សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ អាសវានំ ខយញ្ញាណាយ ចិត្តំ អភិនិន្នាមេតិ សោ ឥទំ ទុក្ខន្តិ យថាភូតំ បជានាតិ អយំ ទុក្ខសមុទយោតិ យថាភូតំ បជានាតិ អយំ ទុក្ខនិរោធោតិ យថាភូតំ បជានាតិ អយំ ទុក្ខនិរោធគាមិនី បដិបទាតិ យថាភូតំ បជានាតិ ឥមេ អាសវាតិ យថាភូតំ បជានាតិ អយំ អាសវសមុទយោតិ យថាភូតំ បជានាតិ អយំ អាសវនិរោធោតិ យថាភូតំ បជានាតិ អយំ អាសវនិរោធគាមិនី បដិបទាតិ យថាភូតំ បជានាតិ។ តស្ស ឯវំ ជានតោ ឯវំ បស្សតោ កាមាសវាបិ ចិត្តំ វិមុច្ចតិ ភវាសវាបិ ចិត្តំ វិមុច្ចតិ អវិជ្ជាសវាបិ ចិត្តំ វិមុច្ចតិ វិមុត្តស្មឹ វិមុត្តមិតិ ញាណំ ហោតិ ខីណា ជាតិ វុសិតំ ព្រហ្មចរិយំ កតំ ករណីយំ នាបរំ ឥត្ថត្តាយាតិ បជានាតិ អយំ វុច្ចតិ ភិក្ខវេ បុគ្គលោ នេវត្តន្តបោ នាត្តបរិតាបនានុយោគមនុយុត្តោ ន បរន្តបោ ន បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតីភូតោ សុខប្បដិសំវេទី ព្រហ្មភូតេន អត្តនា វិហរតីតិ។ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទុន្តិ។

កន្ទរកសុត្តំ បឋមំ និដ្ឋិតំ [ឱ.ម. និដ្ឋិតន្តិ សព្វត្ថ ន ទិស្សតិ។]។

ទុតិយំ អដ្ឋកនាគរសុត្តំ

[១៨] ឯវម្មេ សុតំ។ ឯកំ សមយំ អាយស្មា អានន្ទោ វេសាលិយំ វិហរតិ វេឡុវគ្គាមកេ។ តេន ខោ បន សមយេន ទសមោ គហបតិ អដ្ឋកនាគរោ បាតលិបុត្តំ អនុប្បត្តោ ហោតិ កេនចិទេវ ករណីយេន។ អថខោ ទសមោ គហបតិ អដ្ឋកនាគរោ យេន កុក្កុដារាមោ យេន អញ្ញតរោ ភិក្ខុ តេនុបសង្កមិ ឧបសង្កមិត្វា តំ ភិក្ខុំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ ទសមោ គហបតិ អដ្ឋកនាគរោ តំ ភិក្ខុំ ឯតទវោច កហំ នុ ខោ ភន្តេ អាយស្មា អានន្ទោ ឯតរហិ វិហរតិ ទស្សនកាមា ហិ មយំ តំ អានន្ទន្តិ។ ឯសោ គហបតិ អាយស្មា អានន្ទោ វេសាលិយំ វិហរតិ វេឡុវគ្គាមកេតិ។ អថខោ ទសមោ គហបតិ អដ្ឋកនាគរោ បាតលិបុត្តេ តំ ករណីយំ តីរេត្វា យេន វេសាលី យេន វេឡុវគ្គាមកោ យេនាយស្មា អានន្ទោ តេនុបសង្កមិ ឧបសង្កមិត្វា អាយស្មន្តំ អានន្ទំ អភិវាទេត្វា ឯកមន្តំ និសីទិ។

[១៩] ឯកមន្តំ និសិន្នោ ខោ ទសមោ គហបតិ អដ្ឋកនាគរោ អាយស្មន្តំ អានន្ទំ ឯតទវោច អត្ថិ នុ ខោ ភន្តេ អានន្ទ តេន ភគវតា ជានតា បស្សតា អរហតា សម្មាសម្ពុទ្ធេន ឯកធម្មោ អក្ខាតោ យត្ថ ភិក្ខុនោ អប្បមត្តស្ស អាតាបិនោ បហិតត្តស្ស វិហរតោ អវិមុត្តញ្ចេវ [ឱ. អវិមុត្តំ វា។] ចិត្តំ វិមុច្ចតិ អបរិក្ខីណា ច [ឱ. វា។] អាសវា បរិក្ខយំ គច្ឆន្តិ អននុប្បត្តញ្ច [ឱ. អននុប្បត្តំ វា។] អនុត្តរំ យោគក្ខេមំ អនុបាបុណាតីតិ។ អត្ថិ ខោ គហបតិ តេន ភគវតា ជានតា បស្សតា អរហតា សម្មាសម្ពុទ្ធេន ឯកធម្មោ អក្ខាតោ យត្ថ ភិក្ខុនោ អប្បមត្តស្ស អាតាបិនោ បហិតត្តស្ស វិហរតោ អវិមុត្តញ្ចេវ ចិត្តំ វិមុច្ចតិ អបរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាតីតិ។ កតមោ បន ភន្តេ អានន្ទ តេន ភគវតា ជានតា បស្សតា អរហតា សម្មាសម្ពុទ្ធេន ឯកធម្មោ អក្ខាតោ យត្ថ ភិក្ខុនោ អប្បមត្តស្ស អាតាបិនោ បហិតត្តស្ស វិហរតោ អវិមុត្តញ្ចេវ ចិត្តំ វិមុច្ចតិ អបរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាតីតិ។

[២០] ឥធ គហបតិ ភិក្ខុ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ សោ ឥតិ បដិសញ្ចិក្ខតិ ឥទម្បិ ខោ បឋមំ ឈានំ អភិសង្ខតំ អភិសញ្ចេតយិតំ យំ ខោ បន កិញ្ចិ អភិសង្ខតំ អភិសញ្ចេតយិតំ តទនិច្ចំ និរោធធម្មន្តិ បជានាតិ សោ តត្ថ ឋិតោ អាសវានំ ខយំ បាបុណាតិ នោ ចេ អាសវានំ ខយំ បាបុណាតិ តេនេវ ធម្មរាគេន តាយ ធម្មនន្ទិយា បញ្ចន្នំ ឱរម្ភាគិយានំ សញ្ញោជនានំ បរិក្ខយា ឱបបាតិកោ ហោតិ តត្ថ បរិនិព្វាយី អនាវត្តិធម្មោ តស្មា លោកា អយម្បិ ខោ គហបតិ តេន ភគវតា ជានតា បស្សតា អរហតា សម្មាសម្ពុទ្ធេន ឯកធម្មោ អក្ខាតោ យត្ថ ភិក្ខុនោ អប្បមត្តស្ស អាតាបិនោ បហិតត្តស្ស វិហរតោ អវិមុត្តញ្ចេវ ចិត្តំ វិមុច្ចតិ អបរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាតិ។ បុន ចបរំ គហបតិ ភិក្ខុ វិតក្កវិចារានំ វូបសមា។បេ។ ទុតិយំ ឈានំ ឧបសម្បជ្ជ វិហរតិ សោ ឥតិ បដិសញ្ចិក្ខតិ ឥទម្បិ ខោ ទុតិយំ ឈានំ អភិសង្ខតំ អភិសញ្ចេតយិតំ។បេ។ អនុត្តរំ យោគក្ខេមំ អនុបាបុណាតិ។ បុន ចបរំ គហបតិ ភិក្ខុ បីតិយា ច វិរាគា។បេ។ តតិយំ ឈានំ ឧបសម្បជ្ជ វិហរតិ សោ ឥតិ បដិសញ្ចិក្ខតិ ឥទម្បិ ខោ តតិយំ ឈានំ អភិសង្ខតំ អភិសញ្ចេតយិតំ។បេ។ អនុត្តរំ យោគក្ខេមំ អនុបាបុណាតិ។ បុន ចបរំ គហបតិ ភិក្ខុ សុខស្ស ច បហានា។បេ។ ចតុត្ថំ ឈានំ ឧបសម្បជ្ជ វិហរតិ សោ ឥតិ បដិសញ្ចិក្ខតិ ឥទម្បិ ខោ ចតុត្ថំ ឈានំ អភិសង្ខតំ អភិសញ្ចេតយិតំ។បេ។ អនុត្តរំ យោគក្ខេមំ អនុបាបុណាតិ។

[២១] បុន ចបរំ គហបតិ ភិក្ខុ មេត្តាសហគតេន ចេតសា ឯកំ ទិសំ ផរិត្វា វិហរតិ តថា ទុតិយំ តថា តតិយំ តថា ចតុត្ថំ ឥតិ ឧទ្ធមធោ តិរិយំ សព្វធិ សព្វត្តតាយ សព្វាវន្តំ លោកំ មេត្តាសហគតេន ចេតសា វិបុលេន មហគ្គតេន អប្បមាណេន អវេរេន អព្យាបជ្ឈេន ផរិត្វា វិហរតិ សោ ឥតិ បដិសញ្ចិក្ខតិ អយម្បិ ខោ មេត្តា ចេតោវិមុត្តិ អភិសង្ខតា អភិសញ្ចេតយិតា យំ ខោ បន កិញ្ចិ អភិសង្ខតំ អភិសញ្ចេតយិតំ តទនិច្ចំ និរោធធម្មន្តិ បជានាតិ សោ តត្ថ ឋិតោ។បេ។ អនុត្តរំ យោគក្ខេមំ អនុបាបុណាតិ។ បុន ចបរំ គហបតិ ភិក្ខុ ករុណាសហគតេន ចេតសា។បេ។ មុទិតាសហគតេន ចេតសា… ឧបេក្ខាសហគតេន ចេតសា ឯកំ ទិសំ ផរិត្វា វិហរតិ តថា ទុតិយំ តថា តតិយំ តថា ចតុត្ថំ ឥតិ ឧទ្ធមធោ តិរិយំ សព្វធិ សព្វត្តតាយ សព្វាវន្តំ លោកំ ឧបេក្ខាសហគតេន ចេតសា វិបុលេន មហគ្គតេន អប្បមាណេន អវេរេន អព្យាបជ្ឈេន ផរិត្វា វិហរតិ សោ ឥតិ បដិសញ្ចិក្ខតិ អយម្បិ ខោ ឧបេក្ខាចេតោវិមុត្តិ អភិសង្ខតា អភិសញ្ចេតយិតា យំ ខោ បន កិញ្ចិ អភិសង្ខតំ អភិសញ្ចេតយិតំ តទនិច្ចំ និរោធធម្មន្តិ បជានាតិ សោ តត្ថ ឋិតោ។បេ។ អនុត្តរំ យោគក្ខេមំ អនុបាបុណាតិ។

[២២] បុន ចបរំ គហបតិ ភិក្ខុ សព្វសោ រូបសញ្ញានំ សមតិក្កមា បដិឃសញ្ញានំ អត្ថង្គមា នានត្តសញ្ញានំ អមនសិការា អនន្តោ អាកាសោតិ អាកាសានញ្ចាយតនំ ឧបសម្បជ្ជ វិហរតិ សោ ឥតិ បដិសញ្ចិក្ខតិ អយម្បិ ខោ អាកាសានញ្ចាយតនសមាបត្តិ អភិសង្ខតា អភិសញ្ចេតយិតា យំ ខោ បន កិញ្ចិ អភិសង្ខតំ អភិសញ្ចេតយិតំ តទនិច្ចំ និរោធធម្មន្តិ បជានាតិ សោ តត្ថ ឋិតោ។បេ។ អនុត្តរំ យោគក្ខេមំ អនុបាបុណាតិ។ បុន ចបរំ គហបតិ ភិក្ខុ សព្វសោ អាកាសានញ្ចាយតនំ សមតិក្កម្ម អនន្តំ វិញ្ញាណន្តិ វិញ្ញាណញ្ចាយតនំ ឧបសម្បជ្ជ វិហរតិ សោ ឥតិ បដិសញ្ចិក្ខតិ អយម្បិ ខោ វិញ្ញាណញ្ចាយតនសមាបត្តិ អភិសង្ខតា អភិសញ្ចេតយិតា យំ ខោ បន កិញ្ចិ អភិសង្ខតំ អភិសញ្ចេតយិតំ តទនិច្ចំ និរោធធម្មន្តិ បជានាតិ សោ តត្ថ ឋិតោ។បេ។ អនុត្តរំ យោគក្ខេមំ អនុបាបុណាតិ។ បុន ចបរំ គហបតិ ភិក្ខុ សព្វសោ វិញ្ញាណញ្ចាយតនំ សមតិក្កម្ម នត្ថិ កិញ្ចីតិ អាកិញ្ចញ្ញាយតនំ ឧបសម្បជ្ជ វិហរតិ សោ ឥតិ បដិសញ្ចិក្ខតិ អយម្បិ ខោ អាកិញ្ចញ្ញាយតនសមាបត្តិ អភិសង្ខតា អភិសញ្ចេតយិតា យំ ខោ បន កិញ្ចិ អភិសង្ខតំ អភិសញ្ចេតយិតំ តទនិច្ចំ និរោធធម្មន្តិ បជានាតិ សោ តត្ថ ឋិតោ អាសវានំ ខយំ បាបុណាតិ នោ ចេ អាសវានំ ខយំ បាបុណាតិ តេនេវ ធម្មរាគេន តាយ ធម្មនន្ទិយា បញ្ចន្នំ ឱរម្ភាគិយានំ សញ្ញោជនានំ បរិក្ខយា ឱបបាតិកោ ហោតិ តត្ថ បរិនិព្វាយី អនាវត្តិធម្មោ តស្មា លោកា អយំ ខោ គហបតិ តេន ភគវតា ជានតា បស្សតា អរហតា សម្មាសម្ពុទ្ធេន ឯកធម្មោ អក្ខាតោ យត្ថ ភិក្ខុនោ អប្បមត្តស្ស អាតាបិនោ បហិតត្តស្ស វិហរតោ អវិមុត្តញ្ចេវ ចិត្តំ វិមុច្ចតិ អបរិក្ខីណា ច អាសវា បរិក្ខយំ គច្ឆន្តិ អននុប្បត្តញ្ច អនុត្តរំ យោគក្ខេមំ អនុបាបុណាតីតិ។

[២៣] ឯវំ វុត្តេ ទសមោ គហបតិ អដ្ឋកនាគរោ អាយស្មន្តំ អានន្ទំ ឯតទវោច សេយ្យថាបិ ភន្តេ អានន្ទ បុរិសោ ឯកំ និធិមុខំ គវេសន្តោ សកិទេវ ឯកាទស និធិមុខានិ អធិគច្ឆេយ្យ ឯវមេវ ខោ អហំ ភន្តេ ឯកំ អមតទ្វារំ គវេសន្តោ សកិទេវ ឯកាទស អមតទ្វារានិ អលត្ថំ សវនាយ សេយ្យថាបិ ភន្តេ បុរិសស្ស អគារំ ឯកាទសទ្វារំ សោ តស្មឹ អគារេ អាទិត្តេ ឯកមេកេនបិ ទ្វារេន សក្កុណេយ្យ អត្តានំ សោត្ថឹ កាតុំ ឯវមេវ ខោ អហំ ភន្តេ ឥមេសំ ឯកាទសន្នំ អមតទ្វារានំ ឯកមេកេនបិ អមតទ្វារេន សក្ខិស្សាមិ អត្តានំ សោត្ថឹ កាតុំ ឥមេ ហិ នាម ភន្តេ អញ្ញតិត្ថិយា អាចរិយស្ស អាចរិយធនំ បរិយេសិស្សន្តិ កិមង្គំ បនាហំ អាយស្មតោ អានន្ទស្ស បូជំ ន ករិស្សាមីតិ។ អថខោ ទសមោ គហបតិ អដ្ឋកនាគរោ បាតលិបុត្តកញ្ច វេសាលិកញ្ច ភិក្ខុសង្ឃំ សន្និបាតេត្វា [ឱ.ម. សន្និបាតាបេត្វា។] បណីតេន ខាទនីយេន ភោជនីយេន សហត្ថា សន្តប្បេសិ សម្បវារេសិ ឯកមេកញ្ច ភិក្ខុំ បច្ចេកំ ទុស្សយុគេន អច្ឆាទេសិ អាយស្មន្តំ អានន្ទំ តិចីវរេន អច្ឆាទេសិ អាយស្មតោ អានន្ទស្ស បញ្ចសតំ វិហារំ ការាបេសីតិ។

អដ្ឋកនាគរសុត្តំ ទុតិយំ និដ្ឋិតំ។

តតិយំ សេក្ខប្បដិបទាសុត្តំ [ឆដ្ឋ. សេខសុត្តំ]

[២៤] ឯវម្មេ សុតំ។ ឯកំ សមយំ ភគវា សក្កេសុ វិហរតិ កបិលវត្ថុស្មឹ និគ្រោធារាមេ។ តេន ខោ បន សមយេន កាបិលវត្ថវានំ សក្យានំ នវំ សន្ថាគារំ អចិរការិតំ ហោតិ អនជ្ឈាវុដ្ឋបុព្វំ [ឱ.ម. អនជ្ឈាវុដ្ឋំ។] សមណេន វា ព្រាហ្មណេន វា កេនចិ វា មនុស្សភូតេន។ អថខោ កាបិលវត្ថវា សក្យា យេន ភគវា តេនុបសង្កមឹសុ ឧបសង្កមិត្វា ភគវន្តំ អភិវាទេត្វា ឯកមន្តំ និសីទឹសុ។ ឯកមន្តំ និសិន្នា ខោ កាបិលវត្ថវា សក្យា ភគវន្តំ ឯតទវោចុំ ឥធ ភន្តេ កាបិលវត្ថវានំ សក្យានំ នវំ សន្ថាគារំ អចិរការិតំ ហោតិ [ឱ. ហោតីតិ ន ទិស្សតិ។] អនជ្ឈាវុដ្ឋបុព្វំ សមណេន វា ព្រាហ្មណេន វា កេនចិ វា មនុស្សភូតេន តំ ភន្តេ ភគវា បឋមំ បរិភុញ្ជតុ ភគវតា បឋមំ បរិភុត្តំ បច្ឆា កាបិលវត្ថវា សក្យា បរិភុញ្ជិស្សន្តិ តទស្ស កាបិលវត្ថវានំ សក្យានំ ទីឃរត្តំ ហិតាយ សុខាយាតិ។ អធិវាសេសិ ភគវា តុណ្ហីភាវេន។ អថខោ កាបិលវត្ថវា សក្យា ភគវតោ អធិវាសនំ វិទិត្វា ឧដ្ឋាយាសនា ភគវន្តំ អភិវាទេត្វា បទក្ខិណំ កត្វា យេន នវំ [ឱ.ម. នវន្តិ ន ទិស្សតិ។] សន្ថាគារំ តេនុបសង្កមឹសុ ឧបសង្កមិត្វា សព្វសន្ថរឹ សន្ថាគារំ សន្ថរាបេត្វា [ឱ.ម. សន្ថរិត្វា។] អាសនានិ បញ្ញាបេត្វា ឧទកមណិកំ បតិដ្ឋាបេត្វា តេលប្បទីបំ អារោបេត្វា យេន ភគវា តេនុបសង្កមឹសុ ឧបសង្កមិត្វា ភគវន្តំ អភិវាទេត្វា ឯកមន្តំ អដ្ឋំសុ។ ឯកមន្តំ ឋិតា ខោ កាបិលវត្ថវា សក្យា ភគវន្តំ ឯតទវោចុំ សព្វសន្ថរឹ សន្ថតំ ភន្តេ សន្ថាគារំ អាសនានិ បញ្ញត្តានិ ឧទកមណិកោ បតិដ្ឋាបិតោ តេលប្បទីបោ អារោបិតោ យស្សទានិ ភន្តេ ភគវា កាលំ មញ្ញតីតិ។

[២៥] អថខោ ភគវា និវាសេត្វា បត្តចីវរមាទាយ សទ្ធឹ ភិក្ខុសង្ឃេន យេន សន្ថាគារំ តេនុបសង្កមិ ឧបសង្កមិត្វា បាទេ បក្ខាលេត្វា សន្ថាគារំ បវិសិត្វា មជ្ឈិមថម្ភំ និស្សាយ បុរត្ថាភិមុខោ និសីទិ។ ភិក្ខុសង្ឃោបិ ខោ បាទេ បក្ខាលេត្វា សន្ថាគារំ បវិសិត្វា បច្ឆិមំ ភិត្តឹ និស្សាយ បុរត្ថាភិមុខោ និសីទិ ភគវន្តំយេវ បុរក្ខត្វា។ កាបិលវត្ថវាបិ ខោ សក្យា បាទេ បក្ខាលេត្វា សន្ថាគារំ បវិសិត្វា បុរត្ថិមំ ភិត្តឹ និស្សាយ បច្ឆិមាភិមុខា [ឱ. បច្ឆាមុខា។] និសីទឹសុ ភគវន្តំយេវ បុរក្ខត្វា។ អថខោ ភគវា កាបិលវត្ថវេ សក្យេ ពហុទេវ រត្តឹ ធម្មិយា កថាយ សន្ទស្សេត្វា សមាទបេត្វា សមុត្តេជេត្វា សម្បហំសេត្វា អាយស្មន្តំ អានន្ទំ អាមន្តេសិ បដិភាតុ តំ អានន្ទ កាបិលវត្ថវានំ សក្យានំ សេក្ខោ បដិបទោ បិដ្ឋិ មេ អាគិលាយតិ តមហំ អាយមិស្សាមីតិ។ ឯវំ ភន្តេតិ ខោ អាយស្មា អានន្ទោ ភគវតោ បច្ចស្សោសិ។ អថខោ ភគវា ចតុគ្គុណំ សង្ឃាដឹ បញ្ញាបេត្វា ទក្ខិណេន បស្សេន សីហសេយ្យំ កប្បេសិ បាទេន បាទំ អច្ចាធាយ សតោ សម្បជានោ ឧដ្ឋានសញ្ញំ មនសិករិត្វា។

[២៦] អថខោ អាយស្មា អានន្ទោ មហានាមំ សក្កំ អាមន្តេសិ ឥធ មហានាម អរិយស្សាវកោ សីលសម្បន្នោ ហោតិ ឥន្ទ្រិយេសុ គុត្តទ្វារោ ហោតិ ភោជនេ មត្តញ្ញូ ហោតិ ជាគរិយមនុយុត្តោ ហោតិ សត្តហិ សទ្ធម្មេហិ សមន្នាគតោ ហោតិ ចតុន្នំ ឈានានំ អាភិចេតសិកានំ ទិដ្ឋធម្មសុខវិហារានំ និកាមលាភី ហោតិ អកិច្ឆលាភី អកសិរលាភី។

[២៧] កថញ្ច មហានាម អរិយស្សាវកោ សីលសម្បន្នោ ហោតិ។ ឥធ មហានាម អរិយស្សាវកោ សីលវា ហោតិ បាតិមោក្ខសំវរសំវុតោ វិហរតិ អាចារគោចរសម្បន្នោ អណុមត្តេសុ វជ្ជេសុ ភយទស្សាវី សមាទាយ សិក្ខតិ សិក្ខាបទេសុ ឯវំ ខោ មហានាម អរិយស្សាវកោ សីលសម្បន្នោ ហោតិ។

[២៨] កថញ្ច មហានាម អរិយស្សាវកោ ឥន្ទ្រិយេសុ គុត្តទ្វារោ ហោតិ។ ឥធ មហានាម អរិយស្សាវកោ ចក្ខុនា រូបំ ទិស្វា ន និមិត្តគ្គាហី ហោតិ នានុព្យញ្ជនគ្គាហី យត្វាធិករណមេនំ ចក្ខុន្ទ្រិយំ អសំវុតំ វិហរន្តំ អភិជ្ឈាទោមនស្សា បាបកា អកុសលា ធម្មា អន្វាស្សវេយ្យុំ តស្ស សំវរាយ បដិបជ្ជតិ រក្ខតិ ចក្ខុន្ទ្រិយំ ចក្ខុន្ទ្រិយេ សំវរំ អាបជ្ជតិ សោតេន សទ្ទំ សុត្វា។បេ។ ឃានេន គន្ធំ ឃាយិត្វា… ជិវ្ហាយ រសំ សាយិត្វា… កាយេន ផោដ្ឋព្វំ ផុសិត្វា… មនសា ធម្មំ វិញ្ញាយ ន និមិត្តគ្គាហី ហោតិ នានុព្យញ្ជនគ្គាហី យត្វាធិករណមេនំ មនិន្ទ្រិយំ អសំវុតំ វិហរន្តំ អភិជ្ឈាទោមនស្សា បាបកា អកុសលា ធម្មា អន្វាស្សវេយ្យុំ តស្ស សំវរាយ បដិបជ្ជតិ រក្ខតិ មនិន្ទ្រិយំ មនិន្ទ្រិយេ សំវរំ អាបជ្ជតិ ឯវំ ខោ មហានាម អរិយស្សាវកោ ឥន្ទ្រិយេសុ គុត្តទ្វារោ ហោតិ។

[២៩] កថញ្ច មហានាម អរិយស្សាវកោ ភោជនេ មត្តញ្ញូ ហោតិ។ ឥធ មហានាម អរិយស្សាវកោ បដិសង្ខា យោនិសោ អាហារំ អាហារេតិ នេវ ទវាយ ន មទាយ ន មណ្ឌនាយ ន វិភូសនាយ យាវទេវ ឥមស្ស កាយស្ស ឋិតិយា យាបនាយ វិហឹសុបរតិយា ព្រហ្មចរិយានុគ្គហាយ ឥតិ បុរាណញ្ច វេទនំ បដិហង្ខាមិ នវញ្ច វេទនំ ន ឧប្បាទេស្សាមិ យាត្រា ច មេ ភវិស្សតិ អនវជ្ជតា ច ផាសុវិហារោ ចាតិ ឯវំ ខោ មហានាម អរិយស្សាវកោ ភោជនេ មត្តញ្ញូ ហោតិ។

[៣០] កថញ្ច មហានាម អរិយស្សាវកោ ជាគរិយមនុយុត្តោ ហោតិ។ ឥធ មហានាម អរិយស្សាវកោ ទិវសំ ចង្កមេន និសជ្ជាយ អាវរណីយេហិ ធម្មេហិ ចិត្តំ បរិសោធេតិ រត្តិយា បឋមំ យាមំ ចង្កមេន និសជ្ជាយ អាវរណីយេហិ ធម្មេហិ ចិត្តំ បរិសោធេតិ រត្តិយា មជ្ឈិមំ យាមំ ទក្ខិណេន បស្សេន សីហសេយ្យំ កប្បេតិ បាទេន បាទំ អច្ចាធាយ សតោ សម្បជានោ ឧដ្ឋានសញ្ញំ មនសិករិត្វា រត្តិយា បច្ឆិមំ យាមំ បច្ចុដ្ឋាយ ចង្កមេន និសជ្ជាយ អាវរណីយេហិ ធម្មេហិ ចិត្តំ បរិសោធេតិ ឯវំ ខោ មហានាម អរិយស្សាវកោ ជាគរិយមនុយុត្តោ ហោតិ។

[៣១] កថញ្ច មហានាម អរិយស្សាវកោ សត្តហិ សទ្ធម្មេហិ សមន្នាគតោ ហោតិ។ ឥធ មហានាម អរិយស្សាវកោ សទ្ធោ ហោតិ សទ្ទហតិ តថាគតស្ស ពោធឹ ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវាតិ ហិរិមា ហោតិ ហិរិយតិ កាយទុច្ចរិតេន វចីទុច្ចរិតេន មនោទុច្ចរិតេន ហិរិយតិ បាបកានំ អកុសលានំ ធម្មានំ សមាបត្តិយា ឱត្តាបី ហោតិ ឱត្តបតិ កាយទុច្ចរិតេន វចីទុច្ចរិតេន មនោទុច្ចរិតេន ឱត្តបតិ បាបកានំ អកុសលានំ ធម្មានំ សមាបត្តិយា ពហុស្សុតោ ហោតិ សុតធរោ សុតសន្និចយោ យេ តេ ធម្មា អាទិកល្យាណា មជ្ឈេកល្យាណា បរិយោសានកល្យាណា សាត្ថា សព្យញ្ជនា កេវលបរិបុណ្ណំ បរិសុទ្ធំ ព្រហ្មចរិយំ អភិវទន្តិ តថារូបស្ស ធម្មា ពហុស្សុតា ហោន្តិ ធតា វចសា បរិចិតា មនសានុបេក្ខិតា ទិដ្ឋិយា សុប្បដិវិទ្ធា អារទ្ធវីរិយោ ហោតិ [ឱ.ម. វិហរតិ។] អកុសលានំ ធម្មានំ បហានាយ កុសលានំ ធម្មានំ ឧបសម្បទាយ ថាមវា ទឡ្ហបរក្កមោ អនិក្ខិត្តធុរោ កុសលេសុ ធម្មេសុ សតិមា ហោតិ បរមេន សតិនេបក្កេន សមន្នាគតោ ចិរកតម្បិ ចិរភាសិតម្បិ សរិតា អនុស្សរិតា បញ្ញវា ហោតិ ឧទយត្ថគាមិនិយា បញ្ញាយ សមន្នាគតោ [ម. សមន្នាគតោ ហោតិ។] អរិយាយ និព្វេធិកាយ សម្មា ទុក្ខក្ខយគាមិនិយា ឯវំ ខោ មហានាម អរិយស្សាវកោ សត្តហិ សទ្ធម្មេហិ សមន្នាគតោ ហោតិ។

[៣២] កថញ្ច មហានាម អរិយស្សាវកោ ចតុន្នំ ឈានានំ អាភិចេតសិកានំ ទិដ្ឋធម្មសុខវិហារានំ និកាមលាភី ហោតិ អកិច្ឆលាភី អកសិរលាភី។ ឥធ មហានាម អរិយស្សាវកោ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវ អវិតក្កំ អវិចារំ សមាធិជំ បីតិសុខំ ទុតិយំ ឈានំ ឧបសម្បជ្ជ វិហរតិ បីតិយា ច វិរាគា ឧបេក្ខកោ ច វិហរតិ សតោ ច សម្បជានោ សុខញ្ច កាយេន បដិសំវេទេតិ យន្តំ អរិយា អាចិក្ខន្តិ ឧបេក្ខកោ សតិមា សុខវិហារីតិ តតិយំ ឈានំ ឧបសម្បជ្ជ វិហរតិ សុខស្ស ច បហានា ទុក្ខស្ស ច បហានា បុព្វេវ សោមនស្សទោមនស្សានំ អត្ថង្គមា អទុក្ខមសុខំ ឧបេក្ខាសតិបារិសុទ្ធឹ ចតុត្ថំ ឈានំ ឧបសម្បជ្ជ វិហរតិ ឯវំ ខោ មហានាម អរិយស្សាវកោ ចតុន្នំ ឈានានំ អាភិចេតសិកានំ ទិដ្ឋធម្មសុខវិហារានំ និកាមលាភី ហោតិ អកិច្ឆលាភី អកសិរលាភី។

[៣៣] យតោ ខោ មហានាម អរិយស្សាវកោ ឯវំ សីលសម្បន្នោ ហោតិ ឯវំ ឥន្ទ្រិយេសុ គុត្តទ្វារោ ហោតិ ឯវំ ភោជនេ មត្តញ្ញូ ហោតិ ឯវំ ជាគរិយមនុយុត្តោ ហោតិ ឯវំ សត្តហិ សទ្ធម្មេហិ សមន្នាគតោ ហោតិ ឯវំ ចតុន្នំ ឈានានំ អាភិចេតសិកានំ ទិដ្ឋធម្មសុខវិហារានំ និកាមលាភី ហោតិ អកិច្ឆលាភី អកសិរលាភី អយំ វុច្ចតិ មហានាម អរិយស្សាវកោ សេក្ខោ បដិបទោ អបុច្ចណ្ឌតាយ សមាបន្នោ ភព្វោ អភិនិព្ភិទាយ ភព្វោ សម្ពោធាយ ភព្វោ អនុត្តរស្ស យោគក្ខេមស្ស អធិគមាយ។ សេយ្យថាបិ មហានាម កុក្កុដិយា អណ្ឌានិ អដ្ឋ វា ទស វា ទ្វាទស វា តានស្សុ កុក្កុដិយា សម្មា អធិសយិតានិ សម្មា បរិសេទិតានិ សម្មា បរិភាវិតានិ កិញ្ចាបិ តស្សា កុក្កុដិយា ន ឯវំ ឥច្ឆា ឧប្បជ្ជេយ្យ អហោ វតិមេ [ឱ. វតមេ។] កុក្កុដបោតកា បាទនខសិខាយ វា មុខតុណ្ឌកេន វា អណ្ឌកោសំ បទាលេត្វា សោត្ថិនា អភិនិព្ភិជ្ជេយ្យុន្តិ [ឱ.ម. ឥតោ បរំ អថខោ ភព្វា វ តេ កុក្កុដបោតកា បាទនខសិខាយ វា មុខតុណ្ឌកេន វា អណ្ឌកោសំ បទាលេត្វា សោត្ថិនា អភិនិព្ភិជ្ជិតុន្តិ ទិស្សន្តិ។] ឯវមេវ ខោ មហានាម យតោ អរិយស្សាវកោ ឯវំ សីលសម្បន្នោ ហោតិ ឯវំ ឥន្ទ្រិយេសុ គុត្តទ្វារោ ហោតិ ឯវំ ភោជនេ មត្តញ្ញូ ហោតិ ឯវំ ជាគរិយមនុយុត្តោ ហោតិ ឯវំ សត្តហិ សទ្ធម្មេហិ សមន្នាគតោ ហោតិ ឯវំ ចតុន្នំ ឈានានំ អាភិចេតសិកានំ ទិដ្ឋធម្មសុខវិហារានំ និកាមលាភី ហោតិ អកិច្ឆលាភី អកសិរលាភី អយំ វុច្ចតិ មហានាម អរិយស្សាវកោ សេក្ខោ បដិបទោ អបុច្ចណ្ឌតាយ សមាបន្នោ ភព្វោ អភិនិព្ភិទាយ ភព្វោ សម្ពោធាយ ភព្វោ អនុត្តរស្ស យោគក្ខេមស្ស អធិគមាយ។ ស ខោ សោ មហានាម អរិយស្សាវកោ ឥមំយេវ អនុត្តរំ ឧបេក្ខាសតិបារិសុទ្ធឹ អាគម្ម អនេកវិហិតំ បុព្វេនិវាសំ អនុស្សរតិ សេយ្យថីទំ ឯកម្បិ ជាតឹ ទ្វេបិ ជាតិយោ។បេ។ ឥតិ សាការំ សឧទ្ទេសំ អនេកវិហិតំ បុព្វេនិវាសំ អនុស្សរតិ អយមស្ស បឋមាភិនិព្ភិទា ហោតិ កុក្កុដច្ឆាបកស្សេវ អណ្ឌកោសម្ហា។ ស ខោ សោ មហានាម អរិយស្សាវកោ ឥមំយេវ អនុត្តរំ ឧបេក្ខាសតិបារិសុទ្ធឹ អាគម្ម ទិព្វេន ចក្ខុនា វិសុទ្ធេន អតិក្កន្តមានុសកេន។បេ។ យថាកម្មូបគេ សត្តេ បជានាតិ អយមស្ស ទុតិយាភិនិព្ភិទា ហោតិ កុក្កុដច្ឆាបកស្សេវ អណ្ឌកោសម្ហា។ ស ខោ សោ មហានាម អរិយស្សាវកោ ឥមំយេវ អនុត្តរំ ឧបេក្ខាសតិបារិសុទ្ធឹ អាគម្ម អាសវានំ ខយា អនាសវំ ចេតោវិមុត្តឹ បញ្ញាវិមុត្តឹ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរតិ អយមស្ស តតិយាភិនិព្ភិទា ហោតិ កុក្កុដច្ឆាបកស្សេវ អណ្ឌកោសម្ហា។

[៣៤] យម្បិ [ម. យម្បិ ខោ។] មហានាម អរិយស្សាវកោ សីលសម្បន្នោ ហោតិ ឥទម្បិស្ស ហោតិ ចរណស្មឹ យម្បិ [ម. យម្បិ ខោ។] មហានាម អរិយស្សាវកោ ឥន្ទ្រិយេសុ គុត្តទ្វារោ ហោតិ ឥទម្បិស្ស ហោតិ ចរណស្មឹ យម្បិ [ម. យម្បិ ខោ។] មហានាម អរិយស្សាវកោ ភោជនេ មត្តញ្ញូ ហោតិ ឥទម្បិស្ស ហោតិ ចរណស្មឹ យម្បិ [ម. យម្បិ ខោ។] មហានាម អរិយស្សាវកោ ជាគរិយមនុយុត្តោ ហោតិ ឥទម្បិស្ស ហោតិ ចរណស្មឹ យម្បិ [ម. យម្បិ ខោ។] មហានាម អរិយស្សាវកោ សត្តហិ សទ្ធម្មេហិ សមន្នាគតោ ហោតិ ឥទម្បិស្ស ហោតិ ចរណស្មឹ យម្បិ [ម. យម្បិ ខោ។] មហានាម អរិយស្សាវកោ ចតុន្នំ ឈានានំ អាភិចេតសិកានំ ទិដ្ឋធម្មសុខវិហារានំ និកាមលាភី ហោតិ អកិច្ឆលាភី អកសិរលាភី ឥទម្បិស្ស ហោតិ ចរណស្មឹ យញ្ច ខោ មហានាម អរិយស្សាវកោ អនេកវិហិតំ បុព្វេនិវាសំ អនុស្សរតិ សេយ្យថីទំ ឯកម្បិ ជាតឹ ទ្វេបិ ជាតិយោ។បេ។ ឥតិ សាការំ សឧទ្ទេសំ អនេកវិហិតំ បុព្វេនិវាសំ អនុស្សរតិ ឥទម្បិស្ស ហោតិ វិជ្ជាយ យម្បិ មហានាម អរិយស្សាវកោ ទិព្វេន ចក្ខុនា វិសុទ្ធេន អតិក្កន្តមានុសកេន។បេ។ យថាកម្មូបគេ សត្តេ បជានាតិ ឥទម្បិស្ស ហោតិ វិជ្ជាយ យម្បិ មហានាម អរិយស្សាវកោ អាសវានំ ខយា អនាសវំ ចេតោវិមុត្តឹ បញ្ញាវិមុត្តឹ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរតិ ឥទម្បិស្ស ហោតិ វិជ្ជាយ អយំ វុច្ចតិ មហានាម អរិយស្សាវកោ វិជ្ជាសម្បន្នោ ឥតិបិ ចរណសម្បន្នោ ឥតិបិ វិជ្ជាចរណសម្បន្នោ ឥតិបិ។ ព្រហ្មុនាបេសា [ម. ព្រហ្មុនា ខោ បនេសា។] មហានាម សនង្កុមារេន គាថា ភាសិតា

ខត្តិយោ សេដ្ឋោ ជនេតស្មឹ យេ គោត្តប្បដិសារិនោ

វិជ្ជាចរណសម្បន្នោ សោ សេដ្ឋោ ទេវមានុសេតិ។

[៣៥] សា ខោ បនេសា មហានាម ព្រហ្មុនា សនង្កុមារេន គាថា សុគីតា ន ទុគ្គីតា សុភាសិតា ន [ម. នោ។] ទុព្ភាសិតា អត្ថសញ្ហិតា នោ អនត្ថសញ្ហិតា អនុមតា ភគវតាតិ។ អថខោ ភគវា ឧដ្ឋហិត្វា អាយស្មន្តំ អានន្ទំ អាមន្តេសិ សាធុ សាធុ អានន្ទ សាធុ ខោ ត្វំ អានន្ទ កាបិលវត្ថវានំ សក្យានំ សេក្ខប្បដិបទំ [ឱ. សេក្ខំ បាដិបទំ។] អភាសីតិ។ ឥទមវោច អាយស្មា អានន្ទោ សមនុញ្ញោ សត្ថា អហោសិ អត្តមនា កាបិលវត្ថវា សក្យា អាយស្មតោ អានន្ទស្ស ភាសិតំ អភិនន្ទុន្តិ។

សេក្ខប្បដិបទាសុត្តំ តតិយំ និដ្ឋិតំ។

ចតុត្ថំ បោតលិយសុត្តំ

[៣៦] ឯវម្មេ សុតំ។ ឯកំ សមយំ ភគវា អង្គុត្តរាបេសុ វិហរតិ អាបណំ នាម អង្គុត្តរាបានំ និគមោ។ អថខោ ភគវា បុព្វណ្ហសមយំ និវាសេត្វា បត្តចីវរមាទាយ អាបណំ បិណ្ឌាយ បាវិសិ។ អាបណេ បិណ្ឌាយ ចរិត្វា បច្ឆាភត្តំ បិណ្ឌបាតប្បដិក្កន្តោ យេន អញ្ញតរោ វនសណ្ឌោ តេនុបសង្កមិ ឧបសង្កមិត្វា ទិវាវិហារាយ តំ វនសណ្ឌំ អជ្ឈោគហេត្វា [ឱ.ម. អជ្ឈោគាហិត្វា។] អញ្ញតរស្មឹ រុក្ខមូលេ ទិវាវិហារំ [ឱ. ទិវាវិហារន្តិ ន ទិស្សតិ។] និសីទិ។ បោតលិយោបិ ខោ គហបតិ សម្បន្ននិវាសនបាបុរណោ [ឱ. សម្បន្ននិវាសបាវុរណោ។ ម. សម្បន្ននិវាសនបាវុរណោ។] ឆត្តុបាហនាហិ ជង្ឃាវិហារំ អនុចង្កមមានោ អនុវិចរមានោ យេន សោ វនសណ្ឌោ តេនុបសង្កមិ ឧបសង្កមិត្វា តំ វនសណ្ឌំ អជ្ឈោគហេត្វា យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ អដ្ឋាសិ។

[៣៧] ឯកមន្តំ ឋិតំ ខោ បោតលិយំ គហបតឹ ភគវា ឯតទវោច សំវិជ្ជន្តិ [ឱ. សំវជ្ជន្តេ។] ខោ គហបតិ អាសនានិ សចេ អាកង្ខសិ និសីទាតិ។ ឯវំ វុត្តេ បោតលិយោ គហបតិ គហបតិវាទេន មំ សមណោ គោតមោ សមុទាចរតីតិ កុបិតោ អនត្តមនោ តុណ្ហី អហោសិ។ ទុតិយម្បិ ខោ ភគវា បោតលិយំ គហបតឹ ឯតទវោច សំវិជ្ជន្តិ [ឱ. សំវជ្ជន្តេ។] ខោ គហបតិ អាសនានិ សចេ អាកង្ខសិ និសីទាតិ។ ទុតិយម្បិ ខោ បោតលិយោ គហបតិ គហបតិវាទេន មំ សមណោ គោតមោ សមុទាចរតីតិ កុបិតោ អនត្តមនោ តុណ្ហី អហោសិ។ តតិយម្បិ ខោ ភគវា បោតលិយំ គហបតឹ ឯតទវោច សំវិជ្ជន្តិ ខោ គហបតិ អាសនានិ សចេ អាកង្ខសិ និសីទាតិ។ ឯវំ វុត្តេ បោតលិយោ គហបតិ គហបតិវាទេន មំ សមណោ គោតមោ សមុទាចរតីតិ កុបិតោ អនត្តមនោ ភគវន្តំ ឯតទវោច តយិទំ ភោ គោតម នច្ឆន្នំ តយិទំ នប្បដិរូបំ យំ មំ ត្វំ គហបតិវាទេន សមុទាចរសីតិ។ តេ ហិ [ម. តេន ហិ។] តេ គហបតិ អាការា តេ លិង្គា តេ និមិត្តា យថាតំ គហបតិស្សាតិ។ តថា ហិ បន មេ ភោ គោតម សព្វេ កម្មន្តា បដិក្ខិត្តា សព្វេ វោហារា សមុច្ឆិន្នាតិ។ យថាកថំ បន តេ គហបតិ សព្វេ កម្មន្តា បដិក្ខិត្តា សព្វេ វោហារា សមុច្ឆិន្នាតិ។ ឥធ មេ ភោ គោតម យំ អហោសិ ធនំ វា ធញ្ញំ វា រជតំ វា ជាតរូបំ វា សព្វន្តំ បុត្តានំ ទាយជ្ជំ និយ្យាតំ តត្ថាហំ អនោវាទី អនុបវាទី ឃាសច្ឆាទនបរមោ វិហរាមិ ឯវញ្ច [ឱ. ឯវំ ខោ។ ម. ឯវំ។] មេ ភោ គោតម សព្វេ កម្មន្តា បដិក្ខិត្តា សព្វេ វោហារា សមុច្ឆិន្នាតិ។ អញ្ញថា ខោ ត្វំ គហបតិ វោហារសមុច្ឆេទំ វទេសិ [ឱ. វទសិ។] អញ្ញថា ច បន អរិយស្ស វិនយេ វោហារសមុច្ឆេទោ ហោតីតិ។ យថាកថំ បន ភន្តេ អរិយស្ស វិនយេ វោហារសមុច្ឆេទោ ហោតិ សាធុ មេ ភន្តេ ភគវា តថា ធម្មំ ទេសេតុ យថា អរិយស្ស វិនយេ វោហារសមុច្ឆេទោ ហោតីតិ។ តេនហិ គហបតិ សុណាហិ [ម. សុណោហិ។] សាធុកំ មនសិករោហិ ភាសិស្សាមីតិ។ ឯវំ ភន្តេតិ ខោ បោតលិយោ គហបតិ ភគវតោ បច្ចស្សោសិ។

[៣៨] ភគវា ឯតទវោច អដ្ឋ ខោ ឥមេ គហបតិ ធម្មា អរិយស្ស វិនយេ វោហារសមុច្ឆេទាយ សំវត្តន្តិ កតមេ អដ្ឋ អបាណាតិបាតំ និស្សាយ បាណាតិបាតោ បហាតព្វោ ទិន្នាទានំ និស្សាយ អទិន្នាទានំ បហាតព្វំ សច្ចំ វាចំ និស្សាយ មុសាវាទោ បហាតព្វោ អបិសុណំ វាចំ និស្សាយ បិសុណា វាចា បហាតព្វា អគិទ្ធិលោភំ និស្សាយ គិទ្ធិលោភោ បហាតព្វោ អនិន្ទារោសំ និស្សាយ និន្ទារោសោ បហាតព្វោ អកោធុបាយាសំ និស្សាយ កោធុបាយាសោ បហាតព្វោ អនតិមានំ និស្សាយ អតិមានោ បហាតព្វោ ឥមេ ខោ គហបតិ អដ្ឋ ធម្មា សង្ខិត្តេន វុត្តា វិត្ថារេន អវិភត្តា អរិយស្ស វិនយេ វោហារសមុច្ឆេទាយ សំវត្តន្តីតិ។ យេមេ បន [ឱ. បនសទ្ទោ ន ទិស្សតិ។] ភន្តេ ភគវតា អដ្ឋ ធម្មា សង្ខិត្តេន វុត្តា វិត្ថារេន អវិភត្តា អរិយស្ស វិនយេ វោហារសមុច្ឆេទាយ សំវត្តន្តិ សាធុ មេ ភន្តេ ភគវា ឥមេ អដ្ឋ ធម្មេ វិត្ថារេន [ម. វិត្ថារេត្វា។] វិភជតុ អនុកម្បំ ឧបាទាយាតិ។ តេនហិ គហបតិ សុណាហិ សាធុកំ មនសិករោហិ ភាសិស្សាមីតិ។ ឯវំ ភន្តេតិ ខោ បោតលិយោ គហបតិ ភគវតោ បច្ចស្សោសិ។

[៣៩] ភគវា ឯតទវោច អបាណាតិបាតំ និស្សាយ បាណាតិបាតោ បហាតព្វោតិ ឥតិ ខោ បនេតំ វុត្តំ កិញ្ចេតំ បដិច្ច វុត្តំ ឥធ គហបតិ អរិយស្សាវកោ ឥតិ បដិសញ្ចិក្ខតិ យេសំ ខោ អហំ សញ្ញោជនានំ ហេតុ បាណាតិបាតី អស្សំ តេសាហំ សញ្ញោជនានំ បហានាយ សមុច្ឆេទាយ បដិបន្នោ អហញ្ចេវ ខោ បន បាណាតិបាតី អស្សំ អត្តាបិ មំ ឧបវទេយ្យ បាណាតិបាតប្បច្ចយា អនុវិច្ច វិញ្ញូ [ម. អនុវិច្ចាបិ មំ វិញ្ញូ។] គរហេយ្យុំ បាណាតិបាតប្បច្ចយា កាយស្ស ភេទា បរម្មរណា ទុគ្គតិ បាដិកង្ខា បាណាតិបាតប្បច្ចយា ឯតទេវ ខោ បន សញ្ញោជនំ ឯតំ នីវរណំ យទិទំ បាណាតិបាតោ យេ ច បាណាតិបាតប្បច្ចយា ឧប្បជ្ជេយ្យុំ អាសវា វិឃាតបរិឡាហា បាណាតិបាតា បដិវិរតស្ស ឯវំស តេ អាសវា វិឃាតបរិឡាហា ន ហោន្តិ អបាណាតិបាតំ និស្សាយ បាណាតិបាតោ បហាតព្វោតិ ឥតិ យន្តំ វុត្តំ ឥទមេតំ បដិច្ច វុត្តំ។

[៤០] ទិន្នាទានំ និស្សាយ អទិន្នាទានំ បហាតព្វន្តិ ឥតិ ខោ បនេតំ វុត្តំ កិញ្ចេតំ បដិច្ច វុត្តំ ឥធ គហបតិ អរិយស្សាវកោ ឥតិ បដិសញ្ចិក្ខតិ យេសំ ខោ អហំ សញ្ញោជនានំ ហេតុ អទិន្នាទាយី អស្សំ តេសាហំ សញ្ញោជនានំ បហានាយ សមុច្ឆេទាយ បដិបន្នោ អហញ្ចេវ ខោ បន អទិន្នាទាយី អស្សំ អត្តាបិ មំ ឧបវទេយ្យ អទិន្នាទានប្បច្ចយា អនុវិច្ច វិញ្ញូ គរហេយ្យុំ អទិន្នាទានប្បច្ចយា កាយស្ស ភេទា បរម្មរណា ទុគ្គតិ បាដិកង្ខា អទិន្នាទានប្បច្ចយា ឯតទេវ ខោ បន សញ្ញោជនំ ឯតំ នីវរណំ យទិទំ អទិន្នាទានំ យេ ច អទិន្នាទានប្បច្ចយា ឧប្បជ្ជេយ្យុំ អាសវា វិឃាតបរិឡាហា អទិន្នាទានា បដិវិរតស្ស ឯវំស តេ អាសវា វិឃាតបរិឡាហា ន ហោន្តិ ទិន្នាទានំ និស្សាយ អទិន្នាទានំ បហាតព្វន្តិ ឥតិ យន្តំ វុត្តំ ឥទមេតំ បដិច្ច វុត្តំ។

[៤១] សច្ចំ វាចំ និស្សាយ មុសាវាទោ បហាតព្វោតិ ឥតិ ខោ បនេតំ វុត្តំ កិញ្ចេតំ បដិច្ច វុត្តំ ឥធ គហបតិ អរិយស្សាវកោ ឥតិ បដិសញ្ចិក្ខតិ យេសំ ខោ អហំ សញ្ញោជនានំ ហេតុ មុសាវាទី អស្សំ តេសាហំ សញ្ញោជនានំ បហានាយ សមុច្ឆេទាយ បដិបន្នោ អហញ្ចេវ ខោ បន មុសាវាទី អស្សំ អត្តាបិ មំ ឧបវទេយ្យ មុសាវាទប្បច្ចយា អនុវិច្ច វិញ្ញូ គរហេយ្យុំ មុសាវាទប្បច្ចយា កាយស្ស ភេទា បរម្មរណា ទុគ្គតិ បាដិកង្ខា មុសាវាទប្បច្ចយា ឯតទេវ ខោ បន សញ្ញោជនំ ឯតំ នីវរណំ យទិទំ មុសាវាទោ យេ ច មុសាវាទប្បច្ចយា ឧប្បជ្ជេយ្យុំ អាសវា វិឃាតបរិឡាហា មុសាវាទា បដិវិរតស្ស ឯវំស តេ អាសវា វិឃាតបរិឡាហា ន ហោន្តិ សច្ចំ វាចំ និស្សាយ មុសាវាទោ បហាតព្វោតិ ឥតិ យន្តំ វុត្តំ ឥទមេតំ បដិច្ច វុត្តំ។

[៤២] អបិសុណំ វាចំ និស្សាយ បិសុណា វាចា បហាតព្វាតិ ឥតិ ខោ បនេតំ វុត្តំ កិញ្ចេតំ បដិច្ច វុត្តំ ឥធ គហបតិ អរិយស្សាវកោ ឥតិ បដិសញ្ចិក្ខតិ យេសំ ខោ អហំ សញ្ញោជនានំ ហេតុ បិសុណវាចោ អស្សំ តេសាហំ សញ្ញោជនានំ បហានាយ សមុច្ឆេទាយ បដិបន្នោ អហញ្ចេវ ខោ បន បិសុណវាចោ អស្សំ អត្តាបិ មំ ឧបវទេយ្យ បិសុណវាចប្បច្ចយា អនុវិច្ច វិញ្ញូ គរហេយ្យុំ បិសុណវាចប្បច្ចយា កាយស្ស ភេទា បរម្មរណា ទុគ្គតិ បាដិកង្ខា បិសុណវាចប្បច្ចយា ឯតទេវ ខោ បន សញ្ញោជនំ ឯតំ នីវរណំ យទិទំ បិសុណវាចា យេ ច បិសុណវាចប្បច្ចយា ឧប្បជ្ជេយ្យុំ អាសវា វិឃាតបរិឡាហា បិសុណាយ វាចាយ បដិវិរតស្ស ឯវំស តេ អាសវា វិឃាតបរិឡាហា ន ហោន្តិ អបិសុណំ វាចំ និស្សាយ បិសុណា វាចា បហាតព្វាតិ ឥតិ យន្តំ វុត្តំ ឥទមេតំ បដិច្ច វុត្តំ។

[៤៣] អគិទ្ធិលោភំ និស្សាយ គិទ្ធិលោភោ បហាតព្វោតិ ឥតិ ខោ បនេតំ វុត្តំ កិញ្ចេតំ បដិច្ច វុត្តំ ឥធ គហបតិ អរិយស្សាវកោ ឥតិ បដិសញ្ចិក្ខតិ យេសំ ខោ អហំ សញ្ញោជនានំ ហេតុ គិទ្ធិលោភី អស្សំ តេសាហំ សញ្ញោជនានំ បហានាយ សមុច្ឆេទាយ បដិបន្នោ អហញ្ចេវ ខោ បន គិទ្ធិលោភី អស្សំ អត្តាបិ មំ ឧបវទេយ្យ គិទ្ធិលោភប្បច្ចយា អនុវិច្ច វិញ្ញូ គរហេយ្យុំ គិទ្ធិលោភប្បច្ចយា កាយស្ស ភេទា បរម្មរណា ទុគ្គតិ បាដិកង្ខា គិទ្ធិលោភប្បច្ចយា ឯតទេវ ខោ បន សញ្ញោជនំ ឯតំ នីវរណំ យទិទំ គិទ្ធិលោភោ យេ ច គិទ្ធិលោភប្បច្ចយា ឧប្បជ្ជេយ្យុំ អាសវា វិឃាតបរិឡាហា អគិទ្ធិលោភិស្ស ឯវំស តេ អាសវា វិឃាតបរិឡាហា ន ហោន្តិ អគិទ្ធិលោភំ និស្សាយ គិទ្ធិលោភោ បហាតព្វោតិ ឥតិ យន្តំ វុត្តំ ឥទមេតំ បដិច្ច វុត្តំ។

[៤៤] អនិន្ទារោសំ និស្សាយ និន្ទារោសោ បហាតព្វោតិ ឥតិ ខោ បនេតំ វុត្តំ កិញ្ចេតំ បដិច្ច វុត្តំ ឥធ គហបតិ អរិយស្សាវកោ ឥតិ បដិសញ្ចិក្ខតិ យេសំ ខោ អហំ សញ្ញោជនានំ ហេតុ និន្ទារោសី អស្សំ តេសាហំ សញ្ញោជនានំ បហានាយ សមុច្ឆេទាយ បដិបន្នោ អហញ្ចេវ ខោ បន និន្ទារោសី អស្សំ អត្តាបិ មំ ឧបវទេយ្យ និន្ទារោសប្បច្ចយា អនុវិច្ច វិញ្ញូ គរហេយ្យុំ និន្ទារោសប្បច្ចយា កាយស្ស ភេទា បរម្មរណា ទុគ្គតិ បាដិកង្ខា និន្ទារោសប្បច្ចយា ឯតទេវ ខោ បន សញ្ញោជនំ ឯតំ នីវរណំ យទិទំ និន្ទារោសោ យេ ច និន្ទារោសប្បច្ចយា ឧប្បជ្ជេយ្យុំ អាសវា វិឃាតបរិឡាហា អនិន្ទារោសិស្ស ឯវំស តេ អាសវា វិឃាតបរិឡាហា ន ហោន្តិ អនិន្ទារោសំ និស្សាយ និន្ទារោសោ បហាតព្វោតិ ឥតិ យន្តំ វុត្តំ ឥទមេតំ បដិច្ច វុត្តំ។

[៤៥] អក្កោធុបាយាសំ និស្សាយ កោធុបាយាសោ បហាតព្វោតិ ឥតិ ខោ បនេតំ វុត្តំ កិញ្ចេតំ បដិច្ច វុត្តំ ឥធ គហបតិ អរិយស្សាវកោ ឥតិ បដិសញ្ចិក្ខតិ យេសំ ខោ អហំ សញ្ញោជនានំ ហេតុ កោធុបាយាសី អស្សំ តេសាហំ សញ្ញោជនានំ បហានាយ សមុច្ឆេទាយ បដិបន្នោ អហញ្ចេវ ខោ បន កោធុបាយាសី អស្សំ អត្តាបិ មំ ឧបវទេយ្យ កោធុបាយាសប្បច្ចយា អនុវិច្ច វិញ្ញូ គរហេយ្យុំ កោធុបាយាសប្បច្ចយា កាយស្ស ភេទា បរម្មរណា ទុគ្គតិ បាដិកង្ខា កោធុបាយាសប្បច្ចយា ឯតទេវ ខោ បន សញ្ញោជនំ ឯតំ នីវរណំ យទិទំ កោធុបាយាសោ យេ ច កោធុបាយាសប្បច្ចយា ឧប្បជ្ជេយ្យុំ អាសវា វិឃាតបរិឡាហា អក្កោធុបាយាសិស្ស ឯវំស តេ អាសវា វិឃាតបរិឡាហា ន ហោន្តិ អកោធុបាយាសំ និស្សាយ កោធុបាយាសោ បហាតព្វោតិ ឥតិ យន្តំ វុត្តំ ឥទមេតំ បដិច្ច វុត្តំ។

[៤៦] អនតិមានំ និស្សាយ អតិមានោ បហាតព្វោតិ ឥតិ ខោ បនេតំ វុត្តំ កិញ្ចេតំ បដិច្ច វុត្តំ ឥធ គហបតិ អរិយស្សាវកោ ឥតិ បដិសញ្ចិក្ខតិ យេសំ ខោ អហំ សញ្ញោជនានំ ហេតុ អតិមានី អស្សំ តេសាហំ សញ្ញោជនានំ បហានាយ សមុច្ឆេទាយ បដិបន្នោ អហញ្ចេវ ខោ បន អតិមានី អស្សំ អត្តាបិ មំ ឧបវទេយ្យ អតិមានប្បច្ចយា អនុវិច្ច វិញ្ញូ គរហេយ្យុំ អតិមានប្បច្ចយា កាយស្ស ភេទា បរម្មរណា ទុគ្គតិ បាដិកង្ខា អតិមានប្បច្ចយា ឯតទេវ ខោ បន សញ្ញោជនំ ឯតំ នីវរណំ យទិទំ អតិមានោ យេ ច អតិមានប្បច្ចយា ឧប្បជ្ជេយ្យុំ អាសវា វិឃាតបរិឡាហា អនតិមានិស្ស ឯវំស តេ អាសវា វិឃាតបរិឡាហា ន ហោន្តិ អនតិមានំ និស្សាយ អតិមានោ បហាតព្វោតិ ឥតិ យន្តំ វុត្តំ ឥទមេតំ បដិច្ច វុត្តំ។ ឥមេ ខោ គហបតិ អដ្ឋ ធម្មា សង្ខិត្តេន វុត្តា វិត្ថារេន អវិភត្តា យេ អរិយស្ស វិនយេ បហានាយ វោហារសមុច្ឆេទាយ សំវត្តន្តិ ន ត្វេវ តាវ គហបតិ អរិយស្ស វិនយេ សព្វេន សព្វំ សព្វថា សព្វំ វោហារស្ស សមុច្ឆេទោ ហោតីតិ។ យថាកថំ បន ភន្តេ អរិយស្ស វិនយេ សព្វេន សព្វំ សព្វថា សព្វំ វោហារសមុច្ឆេទោ ហោតិ សាធុ មេ ភន្តេ ភគវា តថា ធម្មំ ទេសេតុ យថា អរិយស្ស វិនយេ សព្វេន សព្វំ សព្វថា សព្វំ វោហារស្ស សមុច្ឆេទោ ហោតីតិ។ តេនហិ គហបតិ សុណាហិ សាធុកំ មនសិករោហិ ភាសិស្សាមីតិ។ ឯវំ ភន្តេតិ ខោ បោតលិយោ គហបតិ ភគវតោ បច្ចស្សោសិ។

[ឆដ្ឋ. កាមាទីនវកថា]

[៤៧] ភគវា ឯតទវោច សេយ្យថាបិ គហបតិ កុក្កុរោ ជិឃច្ឆាទុព្វល្យបរេតោ គោឃាតកសូនំ បច្ចុបដ្ឋិតោ អស្ស តមេនំ ទក្ខោ គោឃាតកោ វា គោឃាតកន្តេវាសី វា អដ្ឋិកង្កលំ សុនិកន្តំ និកន្តំ និម្មំសំ លោហិតមក្ខិតំ ឧបច្ឆូភេយ្យំ [ឧបច្ឆុភេយ្យាតិបិ ឧបច្ចុម្ភេយ្យាតិបិ ឧបត្ថម្ភេយ្យាតិបិ បាឋោ ទិស្សតិ។ ឧបច្ចម្ភេយ្យាតិ ឥទដ្ឋកថា។] តំ កឹ មញ្ញសិ គហបតិ អបិ នុ សោ កុក្កុរោ អមុំ អដ្ឋិកង្កលំ សុនិកន្តំ និកន្តំ និម្មំសំ លោហិតមក្ខិតំ បលេហន្តោ [ឱ. បលិខាទន្តោ។] ជិឃច្ឆាទុព្វល្យំ បដិវិនេយ្យាតិ។ នោ ហេតំ ភន្តេ តំ កិស្ស ហេតុ អទុំ ហិ ភន្តេ អដ្ឋិកង្កលំ សុនិកន្តំ និកន្តំ និម្មំសំ លោហិតមក្ខិតំ យាវទេវ ច បន សោ កុក្កុរោ កិលមថស្ស វិឃាតស្ស ភាគី អស្សាតិ។ ឯវមេវ ខោ គហបតិ អរិយស្សាវកោ ឥតិ បដិសញ្ចិក្ខតិ អដ្ឋិកង្កលូបមា កាមា វុត្តា ភគវតា ពហុទុក្ខា ពហូបាយាសា អាទីនវោ ឯត្ថ ភិយ្យោតិ ឯវមេតំ យថាភូតំ សម្មប្បញ្ញាយ ទិស្វា យាយំ ឧបេក្ខា នានត្តា នានត្តសិតា តំ អភិនិវជ្ជេត្វា យាយំ ឧបេក្ខា ឯកត្តា ឯកត្តសិតា យត្ថ សព្វសោ លោកាមិសុបាទានា អបរិសេសា និរុជ្ឈន្តិ តមេវ ឧបេក្ខំ ភាវេតិ។

[៤៨] សេយ្យថាបិ គហបតិ គិជ្ឈោ វា កង្ខោ វា [ឱ.ម. កង្កោ វា។] កុលលោ វា មំសបេសិមាទាយ [ឱ.ម. មំសបេសី អាទាយ។] ឧឌ្ឌយេយ្យ [ម. ឧឌ្ឍិយេយ្យ។] តមេនំ គិជ្ឈាបិ កង្ខាបិ កុលលាបិ អនុបតិត្វា អនុបតិត្វា វិតច្ឆេយ្យុំ វិរាជេយ្យុំ តំ កឹ មញ្ញសិ គហបតិ សចេ សោ គិជ្ឈោ វា កង្ខោ វា កុលលោ វា តំ មំសបេសឹ ន ខិប្បមេវ បដិនិស្សជ្ជេយ្យ សោ តតោនិទានំ មរណំ វា និគ្គច្ឆេយ្យ [ឱ.ម. និគច្ឆេយ្យ។] មរណមត្តំ វា ទុក្ខន្តិ។ ឯវំ ភន្តេ។ ឯវមេវ ខោ គហបតិ អរិយស្សាវកោ ឥតិ បដិសញ្ចិក្ខតិ មំសបេសូបមា កាមា វុត្តា ភគវតា ពហុទុក្ខា ពហូបាយាសា អាទីនវោ ឯត្ថ ភិយ្យោតិ ឯវមេតំ យថាភូតំ សម្មប្បញ្ញាយ ទិស្វា យាយំ ឧបេក្ខា នានត្តា នានត្តសិតា តំ អភិនិវជ្ជេត្វា យាយំ ឧបេក្ខា ឯកត្តា ឯកត្តសិតា យត្ថ សព្វសោ លោកាមិសុបាទានា អបរិសេសា និរុជ្ឈន្តិ តមេវ ឧបេក្ខំ ភាវេតិ។

[៤៩] សេយ្យថាបិ គហបតិ បុរិសោ អាទិត្តំ តិណុក្កំ អាទាយ បតិវាតំ គច្ឆេយ្យ តំ កឹ មញ្ញសិ គហបតិ សចេ សោ បុរិសោ តំ អាទិត្តំ តិណុក្កំ ន ខិប្បមេវ បដិនិស្សជ្ជេយ្យ តស្ស សា អាទិត្តា តិណុក្កា ហត្ថំ វា ឌហេយ្យ [ឱ.ម. ទហេយ្យ។] ពាហុំ វា ឌហេយ្យ អញ្ញតរំ វា អញ្ញតរំ វា អង្គប្បច្ចង្គំ វា [ឱ. អញ្ញតរំ វា អង្គប្បច្ចង្គំ។] ឌហេយ្យ សោ តតោនិទានំ មរណំ វា និគ្គច្ឆេយ្យ មរណមត្តំ វា ទុក្ខន្តិ។ ឯវំ ភន្តេ។ ឯវមេវ ខោ គហបតិ អរិយស្សាវកោ ឥតិ បដិសញ្ចិក្ខតិ តិណុក្កូបមា កាមា វុត្តា ភគវតា ពហុទុក្ខា ពហូបាយាសា អាទីនវោ ឯត្ថ ភិយ្យោតិ ឯវមេតំ យថាភូតំ សម្មប្បញ្ញាយ ទិស្វា។បេ។ តមេវ ឧបេក្ខំ ភាវេតិ។

[៥០] សេយ្យថាបិ គហបតិ អង្គារកាសុសាធិកបោរិសា បូរា អង្គារានំ វិតច្ចិកានំ វីតធូមានំ អថ បុរិសោ អាគច្ឆេយ្យ ជីវិតុកាមោ អមរិតុកាមោ សុខកាមោ ទុក្ខប្បដិក្កូលោ តមេនំ ទ្វេ ពលវន្តោ បុរិសា នានាពាហាសុ គហេត្វា អង្គារកាសុំ ឧបកឌ្ឍេយ្យុំ តំ កឹ មញ្ញសិ គហបតិ អបិ នុ សោ បុរិសោ ឥតិ ចីតិ ចេវ កាយំ សន្នាមេយ្យាតិ [ម. បនាមេយ្យាតិ។]។ នោ ហេតំ ភន្តេ [ឱ.ម. ឯវំ ភន្តេ។] តំ កិស្ស ហេតុ វិទិតំ ហិ ភន្តេ តស្ស បុរិសស្ស ឥមញ្ច [ឱ. ឥមញ្ចេ។] អហំ អង្គារកាសុំ បបតិស្សាមិ តតោនិទានំ មរណំ វា និគ្គច្ឆិស្សាមិ [ឱ. និគច្ឆាមិ។] មរណមត្តំ វា ទុក្ខន្តិ។ ឯវមេវ ខោ គហបតិ អរិយស្សាវកោ ឥតិ បដិសញ្ចិក្ខតិ អង្គារកាសូបមា កាមា វុត្តា ភគវតា ពហុទុក្ខា ពហូបាយាសា អាទីនវោ ឯត្ថ ភិយ្យោតិ ឯវមេតំ យថាភូតំ សម្មប្បញ្ញាយ ទិស្វា។បេ។ តមេវ ឧបេក្ខំ ភាវេតិ។

[៥១] សេយ្យថាបិ គហបតិ បុរិសោ សុបិនកំ បស្សេយ្យ អារាមរាមណេយ្យកំ វនរាមណេយ្យកំ ភូមិរាមណេយ្យកំ បោក្ខរណិរាមណេយ្យកំ សោ បដិពុទ្ធោ ន កិញ្ចិ បស្សេយ្យ ឯវមេវ ខោ គហបតិ អរិយស្សាវកោ ឥតិ បដិសញ្ចិក្ខតិ សុបិនកូបមា កាមា វុត្តា ភគវតា ពហុទុក្ខា ពហូបាយាសា អាទីនវោ ឯត្ថ ភិយ្យោតិ។បេ។ តមេវ ឧបេក្ខំ ភាវេតិ។

[៥២] សេយ្យថាបិ គហបតិ បុរិសោ យាចិតកំ ភោគំ យាចិត្វា យានំ ឱរោបេយ្យ [ឱ. យានំ បោរោសេយ្យំ។ ម. យានំ វា បោរោសេយ្យំ។] បវរមណិកុណ្ឌលំ សោ តេហិ យាចិតកេហិ ភោគេហិ បុរក្ខតោ បរិវុតោ អន្តរាបណំ បដិបជ្ជេយ្យ តមេនំ ជនោ ទិស្វា ឯវំ វទេយ្យ ភោគី វត ភោ បុរិសោ ឯវំ កិរ ភោគិនោ ភោគានិ ភុញ្ជន្តីតិ តមេនំ សាមិកា យត្ថ យត្ថេវ បស្សេយ្យុំ តត្ថ តត្ថេវ សាមិកា [ឱ. សាមិកាតិ ន ទិស្សតិ។] សានិ ហរេយ្យុំ តំ កឹ មញ្ញសិ គហបតិ អលំ នុ ខោ តស្ស បុរិសស្ស អញ្ញថត្តាយាតិ។ នោ ហេតំ ភន្តេ [ឱ.ម. ឯវំ ភន្តេ។] តំ កិស្ស ហេតុ សាមិនោ ហិ ភន្តេ សានិ ហរន្តីតិ។ ឯវមេវ ខោ គហបតិ អរិយស្សាវកោ ឥតិ បដិសញ្ចិក្ខតិ យាចិតកូបមា កាមា វុត្តា ភគវតា ពហុទុក្ខា ពហូបាយាសា អាទីនវោ ឯត្ថ ភិយ្យោតិ។បេ។ តមេវ ឧបេក្ខំ ភាវេតិ។

[៥៣] សេយ្យថាបិ គហបតិ គាមស្ស វា និគមស្ស វា អវិទូរេ តិព្វោ វនសណ្ឌោ តត្រស្ស រុក្ខោ សម្បន្នផលោ ច ឧប្បន្នផលោ ច ន ចាស្សុ កានិចិ ផលានិ ភូមិយំ បតិតានិ អថ បុរិសោ អាគច្ឆេយ្យ ផលត្ថិកោ ផលគវេសី ផលបរិយេសនំ ចរមានោ សោ តំ វនសណ្ឌំ អជ្ឈោគហេត្វា តំ រុក្ខំ បស្សេយ្យ សម្បន្នផលញ្ច ឧប្បន្នផលញ្ច តស្ស ឯវមស្ស អយំ ខោ រុក្ខោ សម្បន្នផលោ ច ឧប្បន្នផលោ ច នត្ថិ ច កានិចិ ផលានិ ភូមិយំ បតិតានិ ជានាមិ ខោ បនាហំ រុក្ខំ អភិរុយ្ហិតុំ [ឱ.ម. អារោហិតុំ។] យន្នូនាហំ ឥមំ រុក្ខំ អភិរុយ្ហិត្វា [ឱ. អារោហិត្វា។] យាវទត្ថញ្ច ខាទេយ្យំ ឧច្ឆង្គញ្ច បូរេយ្យន្តិ សោ តំ រុក្ខំ អភិរុយ្ហិត្វា [ឱ. អារោហិត្វា។] យាវទត្ថញ្ច ខាទេយ្យ ឧច្ឆង្គញ្ច បូរេយ្យ អថ ទុតិយោ បុរិសោ អាគច្ឆេយ្យ ផលត្ថិកោ ផលគវេសី ផលបរិយេសនំ ចរមានោ តិណ្ហំ កុធារឹ [ឱ. កុឋារឹ។ ម. កុទារឹ។] អាទាយ សោ តំ វនសណ្ឌំ អជ្ឈោគហេត្វា តំ រុក្ខំ បស្សេយ្យ សម្បន្នផលញ្ច ឧប្បន្នផលញ្ច តស្ស ឯវមស្ស អយំ រុក្ខោ សម្បន្នផលោ ច ឧប្បន្នផលោ ច នត្ថិ ច កានិចិ ផលានិ ភូមិយំ បតិតានិ ន ខោ បនាហំ ជានាមិ រុក្ខំ អភិរុយ្ហិតុំ យន្នូនាហំ ឥមំ រុក្ខំ មូលតោ ឆេត្វា យាវទត្ថញ្ច ខាទេយ្យំ ឧច្ឆង្គញ្ច បូរេយ្យន្តិ សោ តំ រុក្ខំ មូលតោ ឆិន្ទេយ្យ តំ កឹ មញ្ញសិ គហបតិ អមុកោ សោ [ឱ. អសុ យោ សោ។] បុរិសោ បឋមំ រុក្ខំ អារុឡ្ហោ សចេ ខោ សោ ន ខិប្បមេវ ឱរោហេយ្យ តស្ស សោ រុក្ខោ បបតន្តោ ហត្ថំ វា ភញ្ជេយ្យ បាទំ វា ភញ្ជេយ្យ អញ្ញតរំ វា អង្គប្បច្ចង្គំ ភញ្ជេយ្យ សោ តតោនិទានំ មរណំ វា និគ្គច្ឆេយ្យ មរណមត្តំ វា ទុក្ខន្តិ។ ឯវំ ភន្តេ។ ឯវមេវ ខោ គហបតិ អរិយស្សាវកោ ឥតិ បដិសញ្ចិក្ខតិ រុក្ខផលូបមា កាមា វុត្តា ភគវតា ពហុទុក្ខា ពហូបាយាសា អាទីនវោ ឯត្ថ ភិយ្យោតិ ឯវមេតំ យថាភូតំ សម្មប្បញ្ញាយ ទិស្វា យាយំ ឧបេក្ខា នានត្តា នានត្តសិតា តំ អភិនិវជ្ជេត្វា យាយំ ឧបេក្ខា ឯកត្តា ឯកត្តសិតា យត្ថ សព្វសោ លោកាមិសុបាទានា អបរិសេសា និរុជ្ឈន្តិ តមេវ ឧបេក្ខំ ភាវេតិ។

[៥៤] ស ខោ សោ គហបតិ អរិយស្សាវកោ ឥមមេវ [ឱ.ម. ឥមំយេវ។] អនុត្តរំ ឧបេក្ខាសតិបារិសុទ្ធឹ អាគម្ម អនេកវិហិតំ បុព្វេនិវាសំ អនុស្សរតិ សេយ្យថីទំ ឯកម្បិ ជាតឹ ទ្វេបិ ជាតិយោ។បេ។ ឥតិ សាការំ សឧទ្ទេសំ អនេកវិហិតំ បុព្វេនិវាសំ អនុស្សរតិ។ ស ខោ សោ គហបតិ អរិយស្សាវកោ ឥមមេវ [ឱ.ម. ឥមំយេវ។] អនុត្តរំ ឧបេក្ខាសតិបារិសុទ្ធឹ អាគម្ម ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សតិ ចវមានេ ឧប្បជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ។បេ។ យថាកម្មូបគេ សត្តេ បជានាតិ។ ស ខោ សោ គហបតិ អរិយស្សាវកោ ឥមំយេវ អនុត្តរំ ឧបេក្ខាសតិបារិសុទ្ធឹ អាគម្ម អាសវានំ ខយា អនាសវំ ចេតោវិមុត្តឹ បញ្ញាវិមុត្តឹ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរតិ។

[៥៥] ឯត្តាវតា ខោ គហបតិ អរិយស្ស វិនយេ សព្វេន សព្វំ សព្វថា សព្វំ វោហារសមុច្ឆេទោ ហោតិ តំ កឹ មញ្ញសិ គហបតិ យថា អរិយស្ស វិនយេ សព្វេន សព្វំ សព្វថា សព្វំ វោហារសមុច្ឆេទោ ហោតិ អបិ នុ ត្វំ ឯវរូបំ វោហារសមុច្ឆេទំ អត្តនិ សមនុបស្សីតិ។ កោ ចាហំ ភន្តេ យោ [ឱ.ម. កោ។] ច អរិយស្ស វិនយេ សព្វេន សព្វំ សព្វថា សព្វំ វោហារសមុច្ឆេទោ អារកាហំ ភន្តេ អរិយស្ស វិនយេ សព្វេន សព្វំ សព្វថា សព្វំ វោហារសមុច្ឆេទា មយំ ហិ ភន្តេ បុព្វេ អញ្ញតិត្ថិយេ បរិព្វាជកេ អនាជានីយេវ សមានេ អាជានីយាតិ អមញ្ញិម្ហ អនាជានីយេវ សមានេ អាជានីយភោជនំ ភោជិម្ហ អនាជានីយេវ សមានេ អាជានីយដ្ឋានេ ឋបិម្ហ ភិក្ខូ បន មយំ ភន្តេ អាជានីយេវ សមានេ អនាជានីយាតិ អមញ្ញិម្ហ អាជានីយេវ សមានេ អនាជានីយភោជនំ ភោជិម្ហ អាជានីយេវ សមានេ អនាជានីយដ្ឋានេ ឋបិម្ហ ឥទានិ បន មយំ ភន្តេ អញ្ញតិត្ថិយេ បរិព្វាជកេ អនាជានីយេវ សមានេ អនាជានីយាតិ ជានិស្សាម អនាជានីយេវ សមានេ អនាជានីយភោជនំ ភោជិស្សាម អនាជានីយេវ សមានេ អនាជានីយដ្ឋានេ ឋបេស្សាម ភិក្ខូ បន មយំ ភន្តេ អាជានីយេវ សមានេ អាជានីយាតិ ជានិស្សាម អាជានីយេវ សមានេ អាជានីយភោជនំ ភោជិស្សាម អាជានីយេវ សមានេ អាជានីយដ្ឋានេ ឋបេស្សាម អជនេសិ វត មេ ភន្តេ ភគវា សមណេសុ សមណបេមំ សមណេសុ សមណបសាទំ សមណេសុ សមណគារវំ អភិក្កន្តំ ភន្តេ អភិក្កន្តំ ភន្តេ សេយ្យថាបិ ភន្តេ និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ [ឱ. ឯវមេវំ។ ម. ឯវមេវ ខោ។] ភគវតា អនេកបរិយាយេន ធម្មោ បកាសិតោ ឯសាហំ ភន្តេ ភគវន្តំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភគវា ធារេតុ អជ្ជតគ្គេ បាណុបេតំ សរណង្គតន្តិ។

បោតលិយសុត្តំ ចតុត្ថំ និដ្ឋិតំ [ឱ.ម. និដ្ឋិតន្តិ សព្វត្ថ ន ទិស្សតិ។]។

បញ្ចមំ ជីវកសុត្តំ

[៥៦] ឯវម្មេ សុតំ។ ឯកំ សមយំ ភគវា រាជគហេ វិហរតិ ជីវកស្ស កោមារភច្ចស្ស អម្ពវនេ។ អថខោ ជីវកោ កោមារភច្ចោ យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ ជីវកោ កោមារភច្ចោ ភគវន្តំ ឯតទវោច សុតមេតំ ភន្តេ សមណំ គោតមំ ឧទ្ទិស្ស បាណំ អារភន្តិ តំ សមណោ គោតមោ ជានំ ឧទ្ទិស្ស កតំ មំសំ បរិភុញ្ជតិ បដិច្ច កម្មន្តិ យេ តេ ភន្តេ ឯវមាហំសុ សមណំ គោតមំ ឧទ្ទិស្ស បាណំ អារភន្តិ តំ សមណោ គោតមោ ជានំ ឧទ្ទិស្ស កតំ មំសំ បរិភុញ្ជតិ បដិច្ច កម្មន្តិ កច្ចិ តេ ភន្តេ ភគវតោ វុត្តវាទិនោ ន ច ភគវន្តំ អភូតេន អព្ភាចិក្ខន្តិ ធម្មស្ស ចានុធម្មំ ព្យាករោន្តិ ន ច កោចិ សហធម្មិកោ វាទានុវាទោ គារយ្ហដ្ឋានំ [ឱ. គារយ្ហំ ឋានន្តិ ទិស្សតិ។] អាគច្ឆតីតិ។

[៥៧] យេ តេ ជីវក ឯវមាហំសុ សមណំ គោតមំ ឧទ្ទិស្ស បាណំ អារភន្តិ តំ សមណោ គោតមោ ជានំ ឧទ្ទិស្ស កតំ មំសំ បរិភុញ្ជតិ បដិច្ច កម្មន្តិ ន មេ តេ វុត្តវាទិនោ អព្ភាចិក្ខន្តិ ច មំ តេ អសតា អភូតេន [ឱ. អព្ភាចិក្ខន្តិ ច បន មន្តេ អសតា អភូតេន។ ម. អសតា អភូតេន អព្ភាចិក្ខន្តិ។] តីហិ ខោ អហំ ជីវក ឋានេហិ មំសំ អប្បរិភោគន្តិ វទាមិ ទិដ្ឋំ សុតំ បរិសង្កិតំ ឥមេហិ ខោ អហំ ជីវក តីហិ ឋានេហិ មំសំ អប្បរិភោគន្តិ វទាមិ តីហិ ខោ អហំ ជីវក ឋានេហិ មំសំ បរិភោគន្តិ វទាមិ អទិដ្ឋំ អសុតំ អបរិសង្កិតំ ឥមេហិ ខោ អហំ ជីវក តីហិ ឋានេហិ មំសំ បរិភោគន្តិ វទាមិ។

[៥៨] ឥធ ជីវក ភិក្ខុ អញ្ញតរំ គាមំ វា និគមំ វា ឧបនិស្សាយ វិហរតិ។ សោ មេត្តាសហគតេន ចេតសា ឯកំ ទិសំ ផរិត្វា វិហរតិ តថា ទុតិយំ តថា តតិយំ តថា ចតុត្ថំ ឥតិ ឧទ្ធមធោ តិរិយំ សព្វធិ សព្វត្តតាយ សព្វាវន្តំ លោកំ មេត្តាសហគតេន ចេតសា វិបុលេន មហគ្គតេន អប្បមាណេន អវេរេន អព្យាបជ្ឈេន ផរិត្វា វិហរតិ។ តមេនំ គហបតិ វា គហបតិបុត្តោ វា ឧបសង្កមិត្វា ស្វាតនាយ ភត្តេន និមន្តេតិ អាកង្ខមានោ ជីវក ភិក្ខុ អធិវាសេតិ។ សោ តស្សា រត្តិយា អច្ចយេន បុព្វណ្ហសមយំ និវាសេត្វា បត្តចីវរមាទាយ យេន តស្ស គហបតិស្ស វា គហបតិបុត្តស្ស វា និវេសនំ តេនុបសង្កមិ ឧបសង្កមិត្វា បញ្ញត្តេ អាសនេ និសីទតិ។ តមេនំ សោ គហបតិ វា គហបតិបុត្តោ វា បណីតេន បិណ្ឌបាតេន បរិវិសតិ។ តស្ស ន ឯវំ ហោតិ សាធុ វត មាយំ គហបតិ វា គហបតិបុត្តោ វា បណីតេន បិណ្ឌបាតេន បរិវិសតិ អហោ វត មាយំ គហបតិ វា គហបតិបុត្តោ វា អាយតិម្បិ ឯវរូបេន បណីតេន បិណ្ឌបាតេន បរិវិសេយ្យាតិ ឯវម្បិស្ស ន ហោតិ។ សោ តំ បិណ្ឌបាតំ អគធិតោ អមុច្ឆិតោ អនជ្ឈាបន្នោ [ឱ. អនជ្ឈោបន្នោ។] អាទីនវទស្សាវី និស្សរណប្បញ្ញោ បរិភុញ្ជតិ។ តំ កឹ មញ្ញសិ ជីវក អបិ នុ សោ ភិក្ខុ តស្មឹ សមយេ អត្តព្យាពាធាយ វា ចេតេតិ បរព្យាពាធាយ វា ចេតេតិ ឧភយព្យាពាធាយ វា ចេតេតីតិ។ នោ ហេតំ ភន្តេ។ ននុ សោ ជីវក ភិក្ខុ តស្មឹ សមយេ អនវជ្ជំយេវ អាហារំ អាហារេតីតិ។ ឯវំ ភន្តេ សុតំ មេតំ ភន្តេ ព្រហ្មា មេត្តាវិហារីតិ តម្មេ ឥទំ ភន្តេ ភគវា សក្ខិ ទិដ្ឋោ ភគវា ហិ ភន្តេ មេត្តាវិហារីតិ។ យេន ខោ ជីវក រាគេន យេន ទោសេន យេន មោហេន ព្យាបាទវា អស្ស សោ រាគោ សោ ទោសោ សោ មោហោ តថាគតស្ស បហីនោ ឧច្ឆិន្នមូលោ តាលាវត្ថុកតោ អនភាវង្កតោ [ឱ. អនភាវគតោ។] អាយតឹ អនុប្បាទធម្មោ សចេ ខោ តេ ជីវក ឥទំ សន្ធាយ ភាសិតំ អនុជានាមិ តេ ឯតន្តិ។ ឯតទេវ ខោ បន មេ ភន្តេ សន្ធាយ ភាសិតន្តិ [ឱ.ម. ឥតិសទ្ទោ ន ទិស្សតិ។]។

[៥៩] ឥធ ជីវក ភិក្ខុ អញ្ញតរំ គាមំ វា និគមំ វា ឧបនិស្សាយ វិហរតិ។ សោ ករុណាសហគតេន ចេតសា។បេ។ មុទិតាសហគតេន ចេតសា… ឧបេក្ខាសហគតេន ចេតសា ឯកំ ទិសំ ផរិត្វា វិហរតិ តថា ទុតិយំ តថា តតិយំ តថា ចតុត្ថំ ឥតិ ឧទ្ធមធោ តិរិយំ សព្វធិ សព្វត្តតាយ សព្វាវន្តំ លោកំ ឧបេក្ខាសហគតេន ចេតសា វិបុលេន មហគ្គតេន អប្បមាណេន អវេរេន អព្យាបជ្ឈេន ផរិត្វា វិហរតិ។ តមេនំ គហបតិ វា គហបតិបុត្តោ វា ឧបសង្កមិត្វា ស្វាតនាយ ភត្តេន និមន្តេតិ អាកង្ខមានោ [ឱ.ម. អាកង្ខមានោ វ។] ជីវក ភិក្ខុ អធិវាសេតិ។ សោ តស្សា រត្តិយា អច្ចយេន បុព្វណ្ហសមយំ និវាសេត្វា បត្តចីវរមាទាយ យេន តស្ស គហបតិស្ស វា គហបតិបុត្តស្ស វា និវេសនំ តេនុបសង្កមិ ឧបសង្កមិត្វា បញ្ញត្តេ អាសនេ និសីទតិ។ តមេនំ សោ គហបតិ វា គហបតិបុត្តោ វា បណីតេន បិណ្ឌបាតេន បរិវិសតិ។ តស្ស ន ឯវំ ហោតិ សាធុ វត មាយំ គហបតិ វា គហបតិបុត្តោ វា បណីតេន បិណ្ឌបាតេន បរិវិសតិ អហោ វត មាយំ គហបតិ វា គហបតិបុត្តោ វា អាយតិម្បិ ឯវរូបេន បណីតេន បិណ្ឌបាតេន បរិវិសេយ្យាតិ ឯវម្បិស្ស ន ហោតិ។ សោ តំ បិណ្ឌបាតំ អគធិតោ អមុច្ឆិតោ អនជ្ឈាបន្នោ អាទីនវទស្សាវី និស្សរណប្បញ្ញោ បរិភុញ្ជតិ។ តំ កឹ មញ្ញសិ ជីវក អបិ នុ សោ ភិក្ខុ តស្មឹ សមយេ អត្តព្យាពាធាយ វា ចេតេតិ បរព្យាពាធាយ វា ចេតេតិ ឧភយព្យាពាធាយ វា ចេតេតីតិ។ នោ ហេតំ ភន្តេ។ ននុ សោ ជីវក ភិក្ខុ តស្មឹ សមយេ តំ អនវជ្ជំយេវ អាហារំ អាហារេតីតិ។ ឯវំ ភន្តេ សុតំ មេតំ ភន្តេ ព្រហ្មា ឧបេក្ខាវិហារីតិ តម្មេ ឥទំ ភន្តេ ភគវា សក្ខិ ទិដ្ឋោ ភគវា ហិ ភន្តេ ឧបេក្ខាវិហារីតិ។ យេន ខោ ជីវក រាគេន យេន ទោសេន យេន មោហេន វិហេសវា [ឱ.ម. វិហេសាវា។] អស្ស អរតិវា អស្ស បដិឃវា [ម. បដិឃោវា។] អស្ស សោ រាគោ សោ ទោសោ សោ មោហោ តថាគតស្ស បហីនោ ឧច្ឆិន្នមូលោ តាលាវត្ថុកតោ អនភាវង្គតោ អាយតឹ អនុប្បាទធម្មោ សចេ ខោ តេ ជីវក ឥទំ សន្ធាយ ភាសិតំ អនុជានាមិ តេ ឯតន្តិ។ ឯតទេវ ខោ បន មេ ភន្តេ សន្ធាយ ភាសិតន្តិ។

[៦០] យោ ខោ ជីវក តថាគតំ វា តថាគតស្សាវកំ វា ឧទ្ទិស្ស បាណំ អារភតិ សោ បញ្ចហិ ឋានេហិ ពហុំ អបុញ្ញំ បសវតិ យម្បិ សោ គហបតិ [ឱ. គហបតីតិ ន ទិស្សតិ។] ឯវមាហ គច្ឆថ អមុកំ នាម បាណំ អានេថាតិ ឥមិនា បឋមេន ឋានេន ពហុំ អបុញ្ញំ បសវតិ យម្បិ សោ បាណោ គលប្បវេធកេន អានីយមានោ ទុក្ខទោមនស្សំ បដិសំវេទេតិ ឥមិនា ទុតិយេន ឋានេន ពហុំ អបុញ្ញំ បសវតិ យម្បិ សោ ឯវមាហ គច្ឆថ ឥមំ បាណំ អារភថាតិ ឥមិនា តតិយេន ឋានេន ពហុំ អបុញ្ញំ បសវតិ យម្បិ សោ បាណោ អារភិយមានោ ទុក្ខទោមនស្សំ បដិសំវេទេតិ ឥមិនា ចតុត្ថេន ឋានេន ពហុំ អបុញ្ញំ បសវតិ យម្បិ សោ តថាគតំ វា តថាគតស្សាវកំ វា អកប្បិយេន អស្សាទេតិ ឥមិនា បញ្ចមេន ឋានេន ពហុំ អបុញ្ញំ បសវតិ យោ ខោ ជីវក តថាគតំ វា តថាគតស្សាវកំ វា ឧទ្ទិស្ស បាណំ អារភតិ សោ ឥមេហិ បញ្ចហិ ឋានេហិ ពហុំ អបុញ្ញំ បសវតីតិ។

[៦១] ឯវំ វុត្តេ ជីវកោ កោមារភច្ចោ ភគវន្តំ ឯតទវោច អច្ឆរិយំ ភន្តេ អព្ភូតំ ភន្តេ កប្បិយំ វត ភន្តេ ភិក្ខូ អាហារំ អាហារេន្តិ អនវជ្ជំ វត ភន្តេ ភិក្ខូ អាហារំ អាហារេន្តិ អភិក្កន្តំ ភន្តេ អភិក្កន្តំ ភន្តេ សេយ្យថាបិ ភន្តេ និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ ភគវតា អនេកបរិយាយេន ធម្មោ បកាសិតោ ឯសាហំ ភន្តេ ភគវន្តំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភគវា ធារេតុ អជ្ជតគ្គេ បាណុបេតំ សរណង្គតន្តិ។

ជីវកសុត្តំ បញ្ចមំ និដ្ឋិតំ។

ឆដ្ឋំ ឧបាលិវាទសុត្តំ [ឆដ្ឋ. ឧបាលិសុត្តំ]

[៦២] ឯវម្មេ សុតំ។ ឯកំ សមយំ ភគវា នាឡន្ទាយំ វិហរតិ បាវារិកម្ពវនេ។ តេន ខោ បន សមយេន និគន្ថោ [និគ្គន្ថោតិបិ សំយោគោ ទដ្ឋព្វោ។] នាដបុត្តោ នាឡន្ទាយំ បដិវសតិ មហតិយា និគន្ថបរិសាយ សទ្ធឹ។ អថខោ ទីឃតបស្សី និគន្ថោ នាឡន្ទាយំ បិណ្ឌាយ ចរិត្វា បច្ឆាភត្តំ បិណ្ឌបាតប្បដិក្កន្តោ យេន បាវារិកម្ពវនំ យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ អដ្ឋាសិ។ ឯកមន្តំ ឋិតំ ខោ ទីឃតបស្សឹ និគន្ថំ ភគវា ឯតទវោច សំវិជ្ជន្តិ ខោ [ឱ. សំវិជ្ជន្តេ ខោតិ ទិស្សតិ។] ទីឃតបស្សិ អាសនានិ សចេ អាកង្ខសិ និសីទាតិ។ ឯវំ វុត្តេ ទីឃតបស្សី និគន្ថោ អញ្ញតរំ នីចំ អាសនំ គហេត្វា ឯកមន្តំ និសីទិ។

[៦៣] ឯកមន្តំ និសិន្នំ ខោ ទីឃតបស្សឹ និគន្ថំ ភគវា ឯតទវោច កតិ បន តបស្សិ និគន្ថោ នាដបុត្តោ កម្មានិ បញ្ញាបេតិ បាបស្ស កម្មស្ស កិរិយាយ បាបស្ស កម្មស្ស បវត្តិយាតិ។ ន ខោ អាវុសោ គោតម អាចិណ្ណំ និគន្ថស្ស នាដបុត្តស្ស កម្មំ កម្មន្តិ បញ្ញាបេតុំ ទណ្ឌំ ទណ្ឌន្តិ ខោ អាវុសោ គោតម អាចិណ្ណំ និគន្ថស្ស នាដបុត្តស្ស បញ្ញាបេតុន្តិ។ កតិ បន តបស្សិ និគន្ថោ នាដបុត្តោ ទណ្ឌានិ បញ្ញាបេតិ បាបស្ស កម្មស្ស កិរិយាយ បាបស្ស កម្មស្ស បវត្តិយាតិ។ តីណិ [ឱ. តីណិ ខោ។] អាវុសោ គោតម និគន្ថោ នាដបុត្តោ ទណ្ឌានិ បញ្ញាបេតិ បាបស្ស កម្មស្ស កិរិយាយ បាបស្ស កម្មស្ស បវត្តិយា សេយ្យថីទំ កាយទណ្ឌំ វចីទណ្ឌំ មនោទណ្ឌន្តិ។ កឹ បន តបស្សិ អញ្ញទេវ កាយទណ្ឌំ អញ្ញំ វចីទណ្ឌំ អញ្ញំ មនោទណ្ឌន្តិ។ អញ្ញទេវ អាវុសោ គោតម កាយទណ្ឌំ អញ្ញំ វចីទណ្ឌំ អញ្ញំ មនោទណ្ឌន្តិ។ ឥមេសំ បន តបស្សិ តិណ្ណំ ទណ្ឌានំ ឯវំ បដិវិភត្តានំ ឯវំ បដិវិសិដ្ឋានំ កតមំ ទណ្ឌំ និគន្ថោ នាដបុត្តោ មហាសាវជ្ជតរំ បញ្ញាបេតិ បាបស្ស កម្មស្ស កិរិយាយ បាបស្ស កម្មស្ស បវត្តិយា យទិ វា កាយទណ្ឌំ យទិ វា វចីទណ្ឌំ យទិ វា មនោទណ្ឌន្តិ។ ឥមេសំ ខោ អាវុសោ គោតម តិណ្ណំ ទណ្ឌានំ ឯវំ បដិវិភត្តានំ ឯវំ បដិវិសិដ្ឋានំ កាយទណ្ឌំ និគន្ថោ នាដបុត្តោ មហាសាវជ្ជតរំ បញ្ញាបេតិ បាបស្ស កម្មស្ស កិរិយាយ បាបស្ស កម្មស្ស បវត្តិយា នោ តថា វចីទណ្ឌំ នោ តថា មនោទណ្ឌន្តិ។ កាយទណ្ឌន្តិ តបស្សិ វទេសិ។ កាយទណ្ឌន្តិ អាវុសោ គោតម វទាមិ។ កាយទណ្ឌន្តិ តបស្សិ វទេសិ។ កាយទណ្ឌន្តិ អាវុសោ គោតម វទាមិ។ កាយទណ្ឌន្តិ តបស្សិ វទេសិ។ កាយទណ្ឌន្តិ អាវុសោ គោតម វទាមីតិ។ ឥតិហ ភគវា ទីឃតបស្សឹ និគន្ថំ ឥមស្មឹ កថាវត្ថុស្មឹ យាវតតិយកំ បតិដ្ឋាបេសិ។

[៦៤] ឯវំ វុត្តេ ទីឃតបស្សី និគន្ថោ ភគវន្តំ ឯតទវោច ត្វំ បនាវុសោ គោតម កតិ ទណ្ឌានិ បញ្ញាបេសិ បាបស្ស កម្មស្ស កិរិយាយ បាបស្ស កម្មស្ស បវត្តិយាតិ។ ន ខោ តបស្សិ អាចិណ្ណំ តថាគតស្ស ទណ្ឌំ ទណ្ឌន្តិ បញ្ញាបេតុំ កម្មំ កម្មន្តិ ខោ តបស្សិ អាចិណ្ណំ តថាគតស្ស បញ្ញាបេតុន្តិ។ ត្វំ បនាវុសោ គោតម កតិ កម្មានិ បញ្ញាបេសិ បាបស្ស កម្មស្ស កិរិយាយ បាបស្ស កម្មស្ស បវត្តិយាតិ។ តីណិ ខោ អហំ តបស្សិ កម្មានិ បញ្ញាបេមិ បាបស្ស កម្មស្ស កិរិយាយ បាបស្ស កម្មស្ស បវត្តិយា សេយ្យថីទំ កាយកម្មំ វចីកម្មំ មនោកម្មន្តិ។ កឹ បនាវុសោ គោតម អញ្ញទេវ កាយកម្មំ អញ្ញំ វចីកម្មំ អញ្ញំ មនោកម្មន្តិ។ អញ្ញទេវ តបស្សិ កាយកម្មំ អញ្ញំ វចីកម្មំ អញ្ញំ មនោកម្មន្តិ។ ឥមេសំ បនាវុសោ គោតម តិណ្ណំ កម្មានំ ឯវំ បដិវិភត្តានំ ឯវំ បដិវិសិដ្ឋានំ កតមំ កម្មំ មហាសាវជ្ជតរំ បញ្ញាបេសិ បាបស្ស កម្មស្ស កិរិយាយ បាបស្ស កម្មស្ស បវត្តិយា យទិ វា កាយកម្មំ យទិ វា វចីកម្មំ យទិ វា មនោកម្មន្តិ។ ឥមេសំ ខោ អហំ តបស្សិ តិណ្ណំ កម្មានំ ឯវំ បដិវិភត្តានំ ឯវំ បដិវិសិដ្ឋានំ មនោកម្មំ មហាសាវជ្ជតរំ បញ្ញាបេមិ បាបស្ស កម្មស្ស កិរិយាយ បាបស្ស កម្មស្ស បវត្តិយា នោ តថា កាយកម្មំ នោ តថា វចីកម្មន្តិ។ មនោកម្មន្តិ អាវុសោ គោតម វទេសិ។ មនោកម្មន្តិ តបស្សិ វទាមិ។បេ។ មនោកម្មន្តិ អាវុសោ គោតម វទេសិ។ មនោកម្មន្តិ តបស្សិ វទាមីតិ។ ឥតិហ ទីឃតបស្សី និគន្ថោ ភគវន្តំ ឥមស្មឹ កថាវត្ថុស្មឹ យាវតតិយកំ បតិដ្ឋាបេត្វា ឧដ្ឋាយាសនា យេន និគន្ថោ នាដបុត្តោ តេនុបសង្កមិ។

[៦៥] តេន ខោ បន សមយេន និគន្ថោ នាដបុត្តោ មហតិយា គិហិបរិសាយ សទ្ធឹ និសិន្នោ ហោតិ ពាលកិនិយា ឧបាលិប្បមុខាយ [ឱ.ម. ពាលកិរិយា បរិសាយ ឧបាលិបមុខាយាតិ ទិស្សតិ។]។ អទ្ទសា ខោ និគន្ថោ នាដបុត្តោ ទីឃតបស្សឹ និគន្ថំ ទូរតោ វ អាគច្ឆន្តំ ទិស្វាន ទីឃតបស្សឹ និគន្ថំ ឯតទវោច ហន្ទ កុតោ នុ ត្វំ តបស្សិ អាគច្ឆសិ ទិវាទិវស្សាតិ។ ឥតោ ហិ ខោ អហំ ភន្តេ អាគច្ឆាមិ សមណស្ស គោតមស្ស សន្តិកាតិ។ អហុ បន តេ តបស្សិ សមណេន គោតមេន សទ្ធឹ កោចិទេវ កថាសល្លាបោតិ។ អហុ ខោ មេ ភន្តេ សមណេន គោតមេន សទ្ធឹ កោចិទេវ កថាសល្លាបោតិ។ យថាកថំ បន តេ តបស្សិ អហុ សមណេន គោតមេន សទ្ធឹ កោចិទេវ កថាសល្លាបោតិ។ អថខោ ទីឃតបស្សី និគន្ថោ យាវតកោ អហោសិ ភគវតា សទ្ធឹ កថាសល្លាបោ តំ សព្វំ និគន្ថស្ស នាដបុត្តស្ស អារោចេសិ។ ឯវំ វុត្តេ និគន្ថោ នាដបុត្តោ ទីឃតបស្សឹ និគន្ថំ ឯតទវោច សាធុ សាធុ តបស្សិ យថា តំ សុតវតា សាវកេន សម្មទេវ សត្ថុ សាសនំ អាជានន្តេន ឯវមេវ ទីឃតបស្សិនា និគន្ថេន សមណស្ស គោតមស្ស ព្យាកតំ កិញ្ហិ សោភតិ ឆវោ មនោទណ្ឌោ ឥមស្ស ឯវំ ឱឡារិកស្ស កាយទណ្ឌស្ស ឧបនិធាយ អថខោ កាយទណ្ឌោ វ មហាសាវជ្ជតរោ បាបស្ស កម្មស្ស កិរិយាយ បាបស្ស កម្មស្ស បវត្តិយា នោ តថា វចីទណ្ឌោ នោ តថា មនោទណ្ឌោតិ។

[៦៦] ឯវំ វុត្តេ ឧបាលិ គហបតិ និគន្ថំ នាដបុត្តំ ឯតទវោច សាធុ សាធុ ភន្តេ ទីឃតបស្សី យថា តំ សុតវតា សាវកេន សម្មទេវ សត្ថុ សាសនំ អាជានន្តេន ឯវមេវ ភទន្តេន ទីឃតបស្សិនា [ឱ. តបស្សិនា។] សមណស្ស គោតមស្ស ព្យាកតំ កិញ្ហិ សោភតិ ឆវោ មនោទណ្ឌោ ឥមស្ស ឯវំ ឱឡារិកស្ស កាយទណ្ឌស្ស ឧបនិធាយ អថខោ កាយទណ្ឌោ វ មហាសាវជ្ជតរោ បាបស្ស កម្មស្ស កិរិយាយ បាបស្ស កម្មស្ស បវត្តិយា នោ តថា វចីទណ្ឌោ នោ តថា មនោទណ្ឌោ ហន្ទ ចាហំ ភន្តេ គច្ឆាមិ សមណស្ស គោតមស្ស ឥមស្មឹ កថាវត្ថុស្មឹ វាទំ អារោបេស្សាមិ សចេ មេ សមណោ គោតមោ តថា បតិដ្ឋហិស្សតិ យថា ភទន្តេន តបស្សិនា បតិដ្ឋាបិតំ សេយ្យថាបិ នាម ពលវា បុរិសោ ទីឃលោមិកំ ឯឡកំ លោមេសុ គហេត្វា អាកឌ្ឍេយ្យ បរិកឌ្ឍេយ្យ សម្បរិកឌ្ឍេយ្យ ឯវមេវាហំ សមណំ គោតមំ វាទេន វាទំ អាកឌ្ឍិស្សាមិ បរិកឌ្ឍិស្សាមិ សម្បរិកឌ្ឍិស្សាមិ សេយ្យថាបិ នាម ពលវា បុរិសោ [ឱ.ម. បុរិសោតិ ន ទិស្សតិ។] សោណ្ឌិកាកម្មការោ មហន្តំ សោណ្ឌិកាកិលញ្ជំ គម្ភីរេ ឧទករហទេ បក្ខិបិត្វា កណ្ណេ គហេត្វា អាកឌ្ឍេយ្យ បរិកឌ្ឍេយ្យ សម្បរិកឌ្ឍេយ្យ ឯវមេវាហំ សមណំ គោតមំ វាទេន វាទំ អាកឌ្ឍិស្សាមិ បរិកឌ្ឍិស្សាមិ សម្បរិកឌ្ឍិស្សាមិ សេយ្យថាបិ នាម ពលវា បុរិសោ [ឱ.ម. បុរិសោតិ ន ទិស្សតិ។] សោណ្ឌិកាធុត្តោ ថាលំ [ឱ. វាលំ។] កណ្ណេ គហេត្វា ឱធុនេយ្យ និទ្ធុនេយ្យ និប្បោឋេយ្យ [ឱ. និប្ផាទេយ្យ។ ម. និប្ផោឌេយ្យ។] ឯវមេវាហំ សមណំ គោតមំ វាទេន វាទំ ឱធុនិស្សាមិ និទ្ធុនិស្សាមិ និប្បោថេស្សាមិ [ឱ. និប្ផាទេស្សាមិ។ ម. និប្ផោឌេស្សាមិ។] សេយ្យថាបិ នាម កុញ្ជរោ សដ្ឋីហាយនោ គម្ភីរំ បោក្ខរណឹ ឱគាហេត្វា សាណធោវិកំ [ឱ. ម. សាណធោវីកំ។] នាម កីឡិតជាតំ កីឡតិ ឯវមេវាហំ សមណំ គោតមំ សាណធោវិកំ [ឱ. ម. សាណធោវីកំ។] មញ្ញេ កីឡិតជាតំ កីឡិស្សាមិ ហន្ទ ចាហំ ភន្តេ គច្ឆាមិ សមណស្ស គោតមស្ស ឥមស្មឹ កថាវត្ថុស្មឹ វាទំ អារោបេស្សាមីតិ។ គច្ឆ ត្វំ គហបតិ សមណស្ស គោតមស្ស ឥមស្មឹ កថាវត្ថុស្មឹ វាទំ អារោបេហិ អហំ វា គហបតិ សមណស្ស គោតមស្ស វាទំ អារោបេយ្យំ ទីឃតបស្សី វា និគន្ថោ ត្វំ វាតិ។

[៦៧] ឯវំ វុត្តេ ទីឃតបស្សី និគន្ថោ និគន្ថំ នាដបុត្តំ ឯតទវោច ន ខោ មេ តំ ភន្តេ រុច្ចតិ យំ ឧបាលិ គហបតិ សមណស្ស គោតមស្ស វាទំ អារោបេយ្យ សមណោ ហិ ភន្តេ គោតមោ មាយាវី អាវដ្ដនឹ មាយំ ជានាតិ យាយ អញ្ញតិត្ថិយានំ សាវកេ អាវដ្ដេតីតិ។ អដ្ឋានំ ខោ ឯតំ តបស្សិ អនវកាសោ យំ ឧបាលិ គហបតិ សមណស្ស គោតមស្ស សាវកត្តំ ឧបគច្ឆេយ្យ ឋានញ្ច ខោ ឯតំ វិជ្ជតិ យំ សមណោ គោតមោ ឧបាលិស្ស គហបតិស្ស សាវកត្តំ ឧបគច្ឆេយ្យ គច្ឆ ត្វំ គហបតិ សមណស្ស គោតមស្ស ឥមស្មឹ កថាវត្ថុស្មឹ វាទំ អារោបេហិ អហំ វា [ឱ.ម. វាហិ។] គហបតិ សមណស្ស គោតមស្ស វាទំ អារោបេយ្យំ ទីឃតបស្សី វា និគន្ថោ ត្វំ វាតិ។ ទុតិយម្បិ ខោ ទីឃតបស្សី និគន្ថោ និគន្ថំ នាដបុត្តំ ឯតទវោច ន ខោ មេ តំ ភន្តេ រុច្ចតិ យំ ឧបាលិ គហបតិ សមណស្ស គោតមស្ស វាទំ អារោបេយ្យ សមណោ ហិ ភន្តេ គោតមោ មាយាវី អាវដ្តនឹ មាយំ ជានាតិ យាយ អញ្ញតិត្ថិយានំ សាវកេ អាវដ្តេតីតិ។ អដ្ឋានំ ខោ ឯតំ តបស្សិ អនវកាសោ យំ ឧបាលិ គហបតិ សមណស្ស គោតមស្ស សាវកត្តំ ឧបគច្ឆេយ្យ ឋានញ្ច ខោ ឯតំ វិជ្ជតិ យំ សមណោ គោតមោ ឧបាលិស្ស គហបតិស្ស សាវកត្តំ ឧបគច្ឆេយ្យ គច្ឆ ត្វំ គហបតិ សមណស្ស គោតមស្ស ឥមស្មឹ កថាវត្ថុស្មឹ វាទំ អារោបេហិ អហំ វា [ឱ.ម. វា ហិ។] គហបតិ សមណស្ស គោតមស្ស វាទំ អារោបេយ្យ ទីឃតបស្សី វា និគន្ថោ ត្វំ វាតិ។ តតិយម្បិ ខោ ទីឃតបស្សី និគន្ថោ និគន្ថំ នាដបុត្តំ ឯតទវោច ន ខោ មេ តំ ភន្តេ រុច្ចតិ យំ ឧបាលិ គហបតិ សមណស្ស គោតមស្ស វាទំ អារោបេយ្យ សមណោ ហិ ភន្តេ គោតមោ មាយាវី អាវដ្ដនឹ មាយំ ជានាតិ យាយ អញ្ញតិត្ថិយានំ សាវកេ អាវដ្ដេតីតិ។ អដ្ឋានំ ខោ ឯតំ តបស្សិ អនវកាសោ យំ ឧបាលិ គហបតិ សមណស្ស គោតមស្ស សាវកត្តំ ឧបគច្ឆេយ្យ ឋានញ្ច ខោ ឯតំ វិជ្ជតិ យំ សមណោ គោតមោ ឧបាលិស្ស គហបតិស្ស សាវកត្តំ ឧបគច្ឆេយ្យ គច្ឆ ត្វំ គហបតិ សមណស្ស គោតមស្ស ឥមស្មឹ កថាវត្ថុស្មឹ វាទំ អារោបេហិ អហំ វា [ឱ.ម. វា ហិ។] គហបតិ សមណស្ស គោតមស្ស វាទំ អារោបេយ្យំ ទីឃតបស្សី វា និគន្ថោ ត្វំ វាតិ។

[៦៨] ឯវំ ភន្តេតិ ខោ ឧបាលិ គហបតិ និគន្ថស្ស នាដបុត្តស្ស បដិស្សុត្វា ឧដ្ឋាយាសនា និគន្ថំ នាដបុត្តំ អភិវាទេត្វា បទក្ខិណំ កត្វា យេន បាវារិកម្ពវនំ យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ ឧបាលិ គហបតិ ភគវន្តំ ឯតទវោច អាគមា នុ ខ្វិធ ភន្តេ ទីឃតបស្សី និគន្ថោតិ។ អាគមា ខ្វិធ គហបតិ ទីឃតបស្សី និគន្ថោតិ។ អហុ បន [ម. អហុ ខោ បន។] តេ ភន្តេ ទីឃតបស្សិនា និគន្ថេន សទ្ធឹ កោចិទេវ កថាសល្លាបោតិ។ អហុ ខោ មេ គហបតិ ទីឃតបស្សិនា និគន្ថេន សទ្ធឹ កោចិទេវ កថាសល្លាបោតិ។ យថាកថំ បន តេ ភន្តេ អហុ ទីឃតបស្សិនា និគន្ថេន សទ្ធឹ កោចិទេវ កថាសល្លាបោតិ។ អថខោ ភគវា យាវតកោ អហោសិ ទីឃតបស្សិនា និគន្ថេន សទ្ធឹ កថាសល្លាបោ តំ សព្វំ ឧបាលិស្ស គហបតិស្ស អារោចេសីតិ [ឱ.ម. ឥតិសទ្ទោ ន ទិស្សតិ។]។ ឯវំ វុត្តេ ឧបាលិ គហបតិ ភគវន្តំ ឯតទវោច សាធុ សាធុ ភន្តេ ទីឃតបស្សី យថា តំ សុតវតា សាវកេន សម្មទេវ សត្ថុ សាសនំ អាជានន្តេន ឯវមេវ ទីឃតបស្សិនា និគន្ថេន ភគវតោ ព្យាកតំ កិញ្ហិ សោភតិ ឆវោ មនោទណ្ឌោ ឥមស្ស ឯវំ ឱឡារិកស្ស កាយទណ្ឌស្ស ឧបនិធាយ អថខោ កាយទណ្ឌោ វ មហាសាវជ្ជតរោ បាបស្ស កម្មស្ស កិរិយាយ បាបស្ស កម្មស្ស បវត្តិយា នោ តថា វចីទណ្ឌោ នោ តថា មនោទណ្ឌោតិ។ សចេ ខោ ត្វំ គហបតិ សច្ចេ បតិដ្ឋាយ មន្តេយ្យាសិ សិយា នោ ឯត្ថ កថាសល្លាបោតិ។ សច្ចេ អហំ ភន្តេ បតិដ្ឋាយ មន្តេស្សាមិ ហោតុ នោ ឯត្ថ កថាសល្លាបោតិ។

[៦៩] តំ កឹ មញ្ញសិ គហបតិ ឥធស្ស និគន្ថោ អាពាធិកោ ទុក្ខិតោ ពាឡ្ហគិលានោ សីតោទកប្បដិក្ខិត្តោ ឧណ្ហោទកប្បដិសេវី សោ សីតោទកំ អលភមានោ កាលំ ករេយ្យ ឥមស្ស បន គហបតិ និគន្ថោ នាដបុត្តោ កត្ថុបបត្តឹ [ឱ. កត្ថូបបត្តឹ។] បញ្ញាបេតីតិ។ អត្ថិ ភន្តេ មនោសត្តា នាម ទេវា តត្ថ សោ ឧប្បជ្ជតិ តំ កិស្ស ហេតុ អសុ [ម. អមុ។] ហិ ភន្តេ មនោបដិពទ្ធោ កាលំ ករោតីតិ។ គហបតិ គហបតិ មនសិករោហិ [ឱ. មនសិករោហីតិ ន ទិស្សតិ។] មនសិករិត្វា ខោ ត្វំ [ឱ. ត្វន្តិ នត្ថិ។] គហបតិ ព្យាករោហិ ន ខោ តេ សន្ធិយតិ បុរិមេន វា បច្ឆិមំ បច្ឆិមេន វា បុរិមំ ភាសិតា ខោ បន តេ គហបតិ ឯសា វាចា សច្ចេ អហំ ភន្តេ បតិដ្ឋាយ មន្តេស្សាមិ ហោតុ នោ ឯត្ថ កថាសល្លាបោតិ។ កិញ្ចាបិ ភន្តេ ភគវា ឯវមាហ អថខោ កាយទណ្ឌោ វ មហាសាវជ្ជតរោ បាបស្ស កម្មស្ស កិរិយាយ បាបស្ស កម្មស្ស បវត្តិយា នោ តថា វចីទណ្ឌោ នោ តថា មនោទណ្ឌោតិ។

[៧០] តំ កឹ មញ្ញសិ គហបតិ ឥធស្ស និគន្ថោ ចាតុយាមសំវរសំវុតោ សព្វវារិវារិតោ សព្វវារិយុត្តោ សព្វវារិធុតោ សព្វវារិផុដ្ឋោ [ឱ.ម. សព្វវារិផុដោ។] សោ អភិក្កមន្តោ បដិក្កមន្តោ ពហូ ខុទ្ទកេ បាណេ សង្ឃាដំ [ឱ.ម. សង្ឃាតំ។] អាបាទេតិ ឥមស្ស បន គហបតិ និគន្ថោ នាដបុត្តោ កឹ [ឱ.ម. កំ។] វិបាកំ បញ្ញាបេតីតិ។ អសញ្ចេតនិកំ ភន្តេ និគន្ថោ នាដបុត្តោ នោ មហាសាវជ្ជំ បញ្ញាបេតីតិ។ សចេ បន គហបតិ ចេតេតីតិ។ មហាសាវជ្ជំ ភន្តេ ហោតីតិ។ ចេតនំ បន គហបតិ និគន្ថោ នាដបុត្តោ កិស្មឹ បញ្ញាបេតីតិ។ មនោទណ្ឌស្មឹ បន ភន្តេតិ។ គហបតិ គហបតិ មនសិករោហិ មនសិករិត្វា ខោ គហបតិ ព្យាករោហិ ន ខោ តេ សន្ធិយតិ បុរិមេន វា បច្ឆិមំ បច្ឆិមេន វា បុរិមំ ភាសិតា ខោ បន តេ គហបតិ ឯសា វាចា សច្ចេ អហំ ភន្តេ បតិដ្ឋាយ មន្តេស្សាមិ ហោតុ នោ ឯត្ថ កថាសល្លាបោតិ។ កិញ្ចាបិ ភន្តេ ភគវា ឯវមាហ អថខោ កាយទណ្ឌោ វ មហាសាវជ្ជតរោ បាបស្ស កម្មស្ស កិរិយាយ បាបស្ស កម្មស្ស បវត្តិយា នោ តថា វចីទណ្ឌោ នោ តថា មនោទណ្ឌោតិ។ តំ កឹ មញ្ញសិ គហបតិ អយំ នាឡន្ទា ឥទ្ធា ចេវ ផីតា ច ពហុជនា អាកិណ្ណមនុស្សាតិ។ ឯវំ ភន្តេ អយំ នាឡន្ទា ឥទ្ធា ចេវ ផីតា ច ពហុជនា អាកិណ្ណមនុស្សាតិ។ តំ កឹ មញ្ញសិ គហបតិ ឥធ បុរិសោ អាគច្ឆេយ្យ ឧក្ខិត្តាសិកោ សោ ឯវំ វទេយ្យ អហំ យាវតិកា ឥមិស្សា នាឡន្ទាយ បាណា តេ ឯកេន ខណេន ឯកេន មុហុត្តេន ឯកមំសខលំ ឯកមំសបុញ្ជំ ករិស្សាមីតិ។ តំ កឹ មញ្ញសិ គហបតិ បហោតិ នុ ខោ សោ បុរិសោ យាវតិកា ឥមិស្សា នាឡន្ទាយ បាណា តេ ឯកេន ខណេន ឯកេន មុហុត្តេន ឯកមំសខលំ ឯកមំសបុញ្ជំ កាតុន្តិ។ ទសបិ ភន្តេ បុរិសា វីសម្បិ ភន្តេ [ឱ. ឥមេ ភន្តេតិ សទ្ទា ន ទិស្សន្តិ។] បុរិសា តឹសម្បិ ភន្តេ [ឱ. ឥមេ ភន្តេតិ សទ្ទា ន ទិស្សន្តិ។] បុរិសា ចត្តាឡីសម្បិ ភន្តេ [ឱ. ឥមេ ភន្តេតិ សទ្ទា ន ទិស្សន្តិ។] បុរិសា បញ្ញាសម្បិ ភន្តេ [ឱ. ឥមេ ភន្តេតិ សទ្ទា ន ទិស្សន្តិ។] បុរិសា នប្បហោន្តិ យាវតិកា ឥមិស្សា នាឡន្ទាយ បាណា តេ ឯកេន ខណេន ឯកេន មុហុត្តេន ឯកមំសខលំ ឯកមំសបុញ្ជំ កាតុំ កិញ្ហិ សោភតិ ឯកោ ឆវោ បុរិសោតិ។ តំ កឹ មញ្ញសិ គហបតិ ឥធាគច្ឆេយ្យ សមណោ វា ព្រាហ្មណោ វា ឥទ្ធិមា ចេតោវសិប្បត្តោ សោ ឯវំ វទេយ្យ អហំ ឥមំ នាឡន្ទំ ឯកេន មនោបទោសេន ភស្មំ ករិស្សាមីតិ។ តំ កឹ មញ្ញសិ គហបតិ បហោតិ នុ ខោ សោ សមណោ វា ព្រាហ្មណោ វា ឥទ្ធិមា ចេតោវសិប្បត្តោ ឥមំ នាឡន្ទំ ឯកេន មនោបទោសេន ភស្មំ កាតុន្តិ។ ទសបិ ភន្តេ នាឡន្ទា វីសម្បិ ភន្តេ នាឡន្ទា តឹសម្បិ ភន្តេ នាឡន្ទា ចត្តាឡីសម្បិ ភន្តេ នាឡន្ទា បញ្ញាសម្បិ ភន្តេ នាឡន្ទា បហោតិ សោ សមណោ វា ព្រាហ្មណោ វា ឥទ្ធិមា ចេតោវសិប្បត្តោ ឥមំ នាឡន្ទំ ឯកេន មនោបទោសេន ភស្មំ កាតុំ កិញ្ហិ សោភតិ ឯកា ឆវា នាឡន្ទាតិ។ គហបតិ គហបតិ [ម. តេនហិ គហបតិ។] មនសិករោហិ មនសិករិត្វា ខោ ត្វំ គហបតិ ព្យាករោហិ ន ខោ តេ សន្ធិយតិ បុរិមេន វា បច្ឆិមំ បច្ឆិមេន វា បុរិមំ ភាសិតា ខោ បន តេ គហបតិ ឯសា វាចា សច្ចេ អហំ ភន្តេ បតិដ្ឋាយ មន្តេស្សាមិ ហោតុ នោ ឯត្ថ កថាសល្លាបោតិ។ កិញ្ចាបិ ភន្តេ ភគវា ឯវមាហ អថខោ កាយទណ្ឌោ វ មហាសាវជ្ជតរោ បាបស្ស កម្មស្ស កិរិយាយ បាបស្ស កម្មស្ស បវត្តិយា នោ តថា វចីទណ្ឌោ នោ តថា មនោទណ្ឌោតិ។ តំ កឹ មញ្ញសិ គហបតិ សុតន្តេ ទណ្ឌកីរញ្ញំ [ឱ. ទណ្ឌការញ្ញំ។] កាលិង្គារញ្ញំ មេជ្ឈារញ្ញំ [ម. មជ្ឈរញ្ញំ។] មាតង្គារញ្ញំ អរញ្ញំ អរញ្ញភូតន្តិ។ ឯវំ ភន្តេ សុតំ មេ ទណ្ឌកីរញ្ញំ កាលិង្គារញ្ញំ មេជ្ឈារញ្ញំ មាតង្គារញ្ញំ អរញ្ញំ អរញ្ញភូតន្តិ។ តំ កឹ មញ្ញសិ គហបតិ កិន្តិ តេ សុតំ កេន តំ ទណ្ឌកីរញ្ញំ កាលិង្គារញ្ញំ មេជ្ឈារញ្ញំ មាតង្គារញ្ញំ អរញ្ញំ អរញ្ញភូតន្តិ។ សុតំ មេតំ ភន្តេ ឥសីនំ មនោបទោសេន តំ ទណ្ឌកីរញ្ញំ កាលិង្គារញ្ញំ មេជ្ឈារញ្ញំ មាតង្គារញ្ញំ អរញ្ញំ អរញ្ញភូតន្តិ។ គហបតិ គហបតិ មនសិករោហិ មនសិករិត្វា ខោ ត្វំ គហបតិ ព្យាករោហិ ន ខោ តេ សន្ធិយតិ បុរិមេន វា បច្ឆិមំ បច្ឆិមេន វា បុរិមំ ភាសិតា ខោ បន តេ គហបតិ ឯសា វាចា សច្ចេ អហំ ភន្តេ បតិដ្ឋាយ មន្តេស្សាមិ ហោតុ នោ ឯត្ថ កថាសល្លាបោតិ។

[៧១] បុរិមេនាហំ [ឱ. បុរិមេនេវាហន្តិ ទិស្សតិ។] ភន្តេ ឱបម្មេន ភគវតោ អត្តមនោ អភិរទ្ធោ អបិចាហំ ឥមានិ ភគវតោ វិចិត្តានិ បញ្ហាបដិភាណានិ [ឱ.ម. វិចិត្រានិ បញ្ហបដិភានានិ។] សោតុកាមោ ឯវាហំ ភគវន្តំ បច្ចនីកាតព្វំ អវមញ្ញិស្សំ អភិក្កន្តំ ភន្តេ អភិក្កន្តំ ភន្តេ សេយ្យថាបិ ភន្តេ និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ ភគវតា អនេកបរិយាយេន ធម្មោ បកាសិតោ ឯសាហំ ភន្តេ ភគវន្តំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភគវា ធារេតុ អជ្ជតគ្គេ បាណុបេតំ សរណង្គតន្តិ [ឱ. បាណុបេតំ សរណគតន្តិ។]។

[៧២] អនុវិច្ចការំ ខោ គហបតិ ករោហិ អនុវិច្ចការោ តុម្ហាទិសានំ ញាតមនុស្សានំ សាធុ ហោតីតិ។ ឥមិនាបាហំ ភន្តេ ភគវតោ ភិយ្យោសោ មត្តាយ អត្តមនោ អភិរទ្ធោ យំ មំ ភគវា ឯវមាហ អនុវិច្ចការំ ខោ គហបតិ ករោហិ អនុវិច្ចការោ តុម្ហាទិសានំ ញាតមនុស្សានំ សាធុ ហោតីតិ មំ ហិ ភន្តេ អញ្ញតិត្ថិយា សាវកំ លភិត្វា កេវលកប្បំ នាឡន្ទំ បដាកំ បរិហរេយ្យុំ ឧបាលិ អម្ហាកំ គហបតិ សាវកត្តំ ឧបគតោតិ [ឱ. ម. សាវកត្តូបគតោតិ។] អថ ច បន មំ ភគវា ឯវមាហ អនុវិច្ចការំ ខោ គហបតិ ករោហិ អនុវិច្ចការោ ហិ [ឱ.ម. ហិ សទ្ទោ នត្ថិ។] តុម្ហាទិសានំ ញាតមនុស្សានំ សាធុ ហោតីតិ ឯសាហំ ភន្តេ ទុតិយម្បិ ភគវន្តំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភគវា ធារេតុ អជ្ជតគ្គេ បាណុបេតំ សរណង្គតន្តិ។

[៧៣] ទីឃរត្តំ ខោ តេ គហបតិ និគន្ថានំ ឱបាណភូតំ កុលំ យេន តេសំ ឧបគតានំ បិណ្ឌបាតំ ទាតព្វំ មញ្ញេយ្យាសីតិ។ ឥមិនាបាហំ ភន្តេ ភគវតោ ភិយ្យោសោ មត្តាយ អត្តមនោ អភិរទ្ធោ យំ មំ ភគវា ឯវមាហ ទីឃរត្តំ ខោ តេ គហបតិ និគន្ថានំ ឱបាណភូតំ កុលំ យេន តេសំ ឧបគតានំ បិណ្ឌបាតំ ទាតព្វំ មញ្ញេយ្យាសីតិ សុតំ មេតំ ភន្តេ សមណោ គោតមោ ឯវមាហ មយ្ហមេវ ទានំ ទាតព្វំ នាញ្ញេសំ ទានំ ទាតព្វំ មយ្ហមេវ សាវកានំ ទានំ ទាតព្វំ នាញ្ញេសំ សាវកានំ ទានំ ទាតព្វំ មយ្ហមេវ ទិន្នំ មហប្ផលំ នាញ្ញេសំ ទិន្នំ មហប្ផលំ មយ្ហមេវ សាវកានំ ទិន្នំ មហប្ផលំ នាញ្ញេសំ សាវកានំ ទិន្នំ មហប្ផលន្តិ អថ ច បន មំ ភគវា និគន្ថេសុបិ ទានេ សមាទបេតិ អបិច ភន្តេ មយមេត្ថ កាលំ ជានិស្សាម ឯសាហំ ភន្តេ តតិយម្បិ ភគវន្តំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភគវា ធារេតុ អជ្ជតគ្គេ បាណុបេតំ សរណង្គតន្តិ។

[៧៤] អថខោ ភគវា ឧបាលិស្ស គហបតិស្ស អនុបុព្វីកថំ កថេសិ សេយ្យថីទំ ទានកថំ សីលកថំ សគ្គកថំ កាមានំ អាទីនវំ ឱការំ សង្កិលេសំ នេក្ខម្មេ អានិសំសំ បកាសេសិ។ យទា ភគវា អញ្ញាសិ ឧបាលឹ គហបតឹ កល្លចិត្តំ មុទុចិត្តំ វិនីវរណចិត្តំ ឧទគ្គចិត្តំ បសន្នចិត្តំ អថ យា ពុទ្ធានំ សាមុក្កំសិកា ធម្មទេសនា តំ បកាសេសិ ទុក្ខំ សមុទយំ និរោធំ មគ្គំ។ សេយ្យថាបិ នាម សុទ្ធំ វត្ថំ អបគតកាឡកំ សម្មទេវ រជនំ បដិគ្គណ្ហេយ្យ ឯវមេវ ឧបាលិស្ស គហបតិស្ស តស្មឹយេវ អាសនេ វិរជំ វីតមលំ ធម្មចក្ខុំ ឧទបាទិ យំ កិញ្ចិ សមុទយធម្មំ សព្វន្តំ និរោធធម្មន្តិ។ អថខោ ឧបាលិ គហបតិ ទិដ្ឋធម្មោ បត្តធម្មោ វិទិតធម្មោ បរិយោគាឡ្ហធម្មោ តិណ្ណវិចិកិច្ឆោ វិគតកថំកថោ វេសារជ្ជប្បត្តោ អបរប្បច្ចយោ សត្ថុ សាសនេ ភគវន្តំ ឯតទវោច ហន្ទ ចទានិ មយំ ភន្តេ គច្ឆាម ពហុកិច្ចា មយំ ពហុករណីយាតិ។ យស្សទានិ ត្វំ គហបតិ កាលំ មញ្ញសីតិ។

[៧៥] អថខោ ឧបាលិ គហបតិ ភគវតោ ភាសិតំ អភិនន្ទិត្វា អនុមោទិត្វា ឧដ្ឋាយាសនា ភគវន្តំ អភិវាទេត្វា បទក្ខិណំ កត្វា យេន សកំ និវេសនំ តេនុបសង្កមិ ឧបសង្កមិត្វា ទោវារិកំ អាមន្តេសិ អជ្ជតគ្គេ សម្ម ទោវារិក អាវរាមិ ទ្វារំ និគន្ថានំ និគន្ថីនំ អនាវដំ ទ្វារំ ភគវតោ សាវកានំ [ឱ.ម. សាវកានន្តិ ន ទិស្សតិ។] ភិក្ខូនំ ភិក្ខុនីនំ ឧបាសកានំ ឧបាសិកានំ សចេ កោចិ និគន្ថោ អាគច្ឆតិ តមេនំ ត្វំ ឯវំ វទេយ្យាសិ តិដ្ឋ ភន្តេ មា បាវិសិ អជ្ជតគ្គេ ឧបាលិ គហបតិ សមណស្ស គោតមស្ស សាវកត្តំ ឧបគតោ អាវដំ ទ្វារំ និគន្ថានំ និគន្ថីនំ អនាវដំ ទ្វារំ ភគវតោ សាវកានំ [ឱ.ម. សាវកានន្តិ ន ទិស្សតិ។] ភិក្ខូនំ ភិក្ខុនីនំ ឧបាសកានំ ឧបាសិកានំ សចេ តេ [ម. វោ។] ភន្តេ បិណ្ឌកេន អត្ថោ ឯត្ថេវ តិដ្ឋ ឯត្ថេវ [ឱ. តិដ្ឋេត្ថេវ។] តេ [ម. វោ។] អាហរិស្សន្តីតិ។ ឯវំ ភន្តេតិ ខោ ទោវារិកោ ឧបាលិស្ស គហបតិស្ស បច្ចស្សោសិ។

[៧៦] អស្សោសិ ខោ ទីឃតបស្សី និគន្ថោ ឧបាលិ កិរ គហបតិ សមណស្ស គោតមស្ស សាវកត្តំ ឧបគតោតិ។ អថខោ ទីឃតបស្សី និគន្ថោ យេន និគន្ថោ នាដបុត្តោ តេនុបសង្កមិ ឧបសង្កមិត្វា និគន្ថំ នាដបុត្តំ ឯតទវោច សុតំ មេតំ ភន្តេ ឧបាលិ កិរ គហបតិ សមណស្ស គោតមស្ស សាវកត្តំ ឧបគតោតិ។ អដ្ឋានំ ខោ ឯតំ តបស្សិ អនវកាសោ យំ ឧបាលិ គហបតិ សមណស្ស គោតមស្ស សាវកត្តំ ឧបគច្ឆេយ្យ ឋានញ្ច ខោ ឯតំ វិជ្ជតិ យំ សមណោ គោតមោ ឧបាលិស្ស គហបតិស្ស សាវកត្តំ ឧបគច្ឆេយ្យាតិ។ ទុតិយម្បិ ខោ ទីឃតបស្សី និគន្ថោ និគន្ថំ នាដបុត្តំ ឯតទវោច សុតំ មេតំ ភន្តេ ឧបាលិ កិរ គហបតិ សមណស្ស គោតមស្ស សាវកត្តំ ឧបគតោតិ។ អដ្ឋានំ ខោ ឯតំ តបស្សិ អនវកាសោ យំ ឧបាលិ គហបតិ សមណស្ស គោតមស្ស សាវកត្តំ ឧបគច្ឆេយ្យ ឋានញ្ច ខោ ឯតំ វិជ្ជតិ យំ សមណោ គោតមោ ឧបាលិស្ស គហបតិស្ស សាវកត្តំ ឧបគច្ឆេយ្យាតិ។ តតិយម្បិ ខោ ទីឃតបស្សី និគន្ថោ និគន្ថំ នាដបុត្តំ ឯតទវោច សុតំ មេតំ ភន្តេ ឧបាលិ កិរ គហបតិ សមណស្ស គោតមស្ស សាវកត្តំ ឧបគតោតិ។ អដ្ឋានំ ខោ ឯតំ តបស្សិ អនវកាសោ យំ ឧបាលិ គហបតិ សមណស្ស គោតមស្ស សាវកត្តំ ឧបគច្ឆេយ្យ ឋានញ្ច ខោ ឯតំ វិជ្ជតិ យំ សមណោ គោតមោ ឧបាលិស្ស គហបតិស្ស សាវកត្តំ ឧបគច្ឆេយ្យ [ឱ.ម. ឥតិសទ្ទោ ទិស្សតិ។] ហន្ទាហំ ភន្តេ គច្ឆាមិ យាវ ជានាមិ យទិ វា ឧបាលិ គហបតិ សមណស្ស គោតមស្ស សាវកត្តំ ឧបគតោ យទិ វា នោតិ។ គច្ឆ ត្វំ តបស្សិ ជានាហិ យទិ វា ឧបាលិ គហបតិ សមណស្ស គោតមស្ស សាវកត្តំ ឧបគតោ យទិ វា នោតិ។

[៧៧] អថខោ ទីឃតបស្សី និគន្ថោ យេន ឧបាលិស្ស គហបតិស្ស និវេសនំ តេនុបសង្កមិ។ អទ្ទសា ខោ ទោវារិកោ ទីឃតបស្សឹ និគន្ថំ ទូរតោ វ អាគច្ឆន្តំ ទិស្វាន ទីឃតបស្សឹ និគន្ថំ ឯតទវោច តិដ្ឋ ភន្តេ មា បាវិសិ អជ្ជតគ្គេ ឧបាលិ គហបតិ សមណស្ស គោតមស្ស សាវកត្តំ ឧបគតោ អាវដំ ទ្វារំ និគន្ថានំ និគន្ថីនំ អនាវដំ ទ្វារំ ភគវតោ សាវកានំ ភិក្ខូនំ ភិក្ខុនីនំ ឧបាសកានំ ឧបាសិកានំ សចេ តេ ភន្តេ បិណ្ឌកេន អត្ថោ ឯត្ថេវ តិដ្ឋ ឯត្ថេវ តេ អាហរិស្សន្តីតិ។ ន មេ អាវុសោ បិណ្ឌកេន អត្ថោតិ វត្វា តតោ បដិនិវត្តិត្វា យេន និគន្ថោ នាដបុត្តោ តេនុបសង្កមិ ឧបសង្កមិត្វា និគន្ថំ នាដបុត្តំ ឯតទវោច សច្ចំយេវ ខោ ភន្តេ យំ ឧបាលិ គហបតិ សមណស្ស គោតមស្ស សាវកត្តំ ឧបគតោ ឯតំ ខោ តេ អហំ ភន្តេ នាលត្ថំ ន ខោ មេ តំ ភន្តេ រុច្ចតិ យំ ឧបាលិ គហបតិ សមណស្ស គោតមស្ស វាទំ អារោបេយ្យ សមណោ ហិ ភន្តេ គោតមោ មាយាវី អាវដ្ដនឹ មាយំ ជានាតិ យាយ អញ្ញតិត្ថិយានំ សាវកេ អាវដ្ដេតីតិ អាវដ្ដោ ខោ តេ ភន្តេ ឧបាលិ គហបតិ សមណេន គោតមេន អាវដ្ដនិយា មាយាយាតិ។ អដ្ឋានំ ខោ ឯតំ ទីឃ [ឱ. ទីឃឥតិ ន ទិស្សតិ។] តបស្សិ អនវកាសោ យំ ឧបាលិ គហបតិ សមណស្ស គោតមស្ស សាវកត្តំ ឧបគច្ឆេយ្យ ឋានញ្ច ខោ ឯតំ វិជ្ជតិ យំ សមណោ គោតមោ ឧបាលិស្ស គហបតិស្ស សាវកត្តំ ឧបគច្ឆេយ្យាតិ។ ទុតិយម្បិ ខោ [ឱ. ទុតិយម្បិ ខោ … តតិយម្បិ ខោ ទីឃតបស្សីតិ ទិស្សន្តិ។] ទីឃតបស្សី និគន្ថោ និគន្ថំ នាដបុត្តំ ឯតទវោច សច្ចំយេវ ខោ ភន្តេ យំ ឧបាលិ គហបតិ សមណស្ស គោតមស្ស សាវកត្តំ ឧបគតោ ឯតំ ខោ តេ អហំ ភន្តេ នាលត្ថំ ន ខោ ម តំ ភន្តេ រុច្ចតិ យំ ឧបាលិ គហបតិ សមណស្ស គោតមស្ស វាទំ អារោបេយ្យ សមណោ ហិ ភន្តេ គោតមោ មាយាវី អាវដ្តនឹ មាយំ ជានាតិ យាយ អញ្ញតិត្ថិយានំ សាវកេ អាវដ្តេតីតិ អាវដ្តោ ខោ តេ ភន្តេ ឧបាលិ គហបតិ សមណេន គោតមេន អាវដ្តនិយា មាយាយាតិ។ អដ្ឋានំ ខោ ឯតំ តបស្សិ អនវកាសោ យំ ឧបាលិ គហបតិ សមណស្ស គោតមស្ស សាវកត្តំ ឧបគច្ឆេយ្យ ឋានញ្ច ខោ ឯតំ វិជ្ជតិ យំ សមណោ គោតមោ ឧបាលិស្ស គហបតិស្ស សាវកត្តំ ឧបគច្ឆេយ្យ ហន្ទ ចាហំ តបស្សិ គច្ឆាមិ យាវ សាមំយេវ ជានាមិ យទិ វា ឧបាលិ គហបតិ សមណស្ស គោតមស្ស សាវកត្តំ ឧបគតោ យទិ វា នោតិ។

[៧៨] អថខោ និគន្ថោ នាដបុត្តោ មហតិយា និគន្ថបរិសាយ សទ្ធឹ យេន ឧបាលិស្ស គហបតិស្ស និវេសនំ តេនុបសង្កមិ។ អទ្ទសា ខោ ទោវារិកោ និគន្ថំ នាដបុត្តំ ទូរតោ វ អាគច្ឆន្តំ ទិស្វាន និគន្ថំ នាដបុត្តំ ឯតទវោច តិដ្ឋ ភន្តេ មា បាវិសិ អជ្ជតគ្គេ ឧបាលិ គហបតិ សមណស្ស គោតមស្ស សាវកត្តំ ឧបគតោ អាវដំ ទ្វារំ និគន្ថានំ និគន្ថីនំ អនាវដំ ទ្វារំ ភគវតោ សាវកានំ ភិក្ខូនំ ភិក្ខុនីនំ ឧបាសកានំ ឧបាសិកានំ សចេ តេ ភន្តេ បិណ្ឌកេន អត្ថោ ឯត្ថេវ តិដ្ឋ ឯត្ថេវ តេ អាហរិស្សន្តីតិ។ តេនហិ សម្ម ទោវារិក យេន ឧបាលិ គហបតិ តេនុបសង្កមិ ឧបសង្កមិត្វា ឧបាលឹ គហបតឹ ឯវំ វទេហិ និគន្ថោ [ឱ.ម. និគន្ថោ ភន្តេ។] នាដបុត្តោ មហតិយា និគន្ថបរិសាយ សទ្ធឹ ពហិទ្វារកោដ្ឋកេ ឋិតោ សោ តេ ទស្សនកាមោតិ។ ឯវំ ភន្តេតិ ខោ ទោវារិកោ និគន្ថស្ស នាដបុត្តស្ស បដិស្សុត្វា យេន ឧបាលិ គហបតិ តេនុបសង្កមិ ឧបសង្កមិត្វា ឧបាលឹ គហបតឹ ឯតទវោច និគន្ថោ ភន្តេ នាដបុត្តោ មហតិយា និគន្ថបរិសាយ សទ្ធឹ ពហិទ្វារកោដ្ឋកេ ឋិតោ សោ តេ ទស្សនកាមោតិ។ តេនហិ សម្ម ទោវារិក មជ្ឈិមាយ ទ្វារសាលាយ អាសនានិ បញ្ញាបេសីតិ។ ឯវំ ភន្តេតិ ខោ ទោវារិកោ ឧបាលិស្ស គហបតិស្ស បដិស្សុត្វា មជ្ឈិមាយ ទ្វារសាលាយ អាសនានិ បញ្ញាបេត្វា យេន ឧបាលិ គហបតិ តេនុបសង្កមិ ឧបសង្កមិត្វា ឧបាលឹ គហបតឹ ឯតទវោច បញ្ញត្តានិ ខោ ភន្តេ មជ្ឈិមាយ ទ្វារសាលាយ អាសនានិ យស្សទានិ កាលំ មញ្ញសីតិ។ អថខោ ឧបាលិ គហបតិ យេន មជ្ឈិមា ទ្វារសាលា តេនុបសង្កមិ ឧបសង្កមិត្វា យំ តត្ថ អាសនំ អគ្គញ្ច សេដ្ឋញ្ច ឧត្តមញ្ច បណីតញ្ច តត្ថ សាមំ [ឱ. សាមន្តិ ន ទិស្សតិ។] និសីទិត្វា ទោវារិកំ អាមន្តេសិ តេនហិ សម្ម ទោវារិក យេន និគន្ថោ នាដបុត្តោ តេនុបសង្កមិ ឧបសង្កមិត្វា និគន្ថំ នាដបុត្តំ ឯវំ វទេហិ ឧបាលិ ភន្តេ គហបតិ ឯវមាហ បវិស កិរ ភន្តេ សចេ អាកង្ខសីតិ។ ឯវំ ភន្តេតិ ខោ ទោវារិកោ ឧបាលិស្ស គហបតិស្ស បដិស្សុត្វា យេន និគន្ថោ នាដបុត្តោ តេនុបសង្កមិ ឧបសង្កមិត្វា និគន្ថំ នាដបុត្តំ ឯតទវោច ឧបាលិ ភន្តេ គហបតិ ឯវមាហ បវិស កិរ ភន្តេ សចេ អាកង្ខសីតិ។ អថខោ និគន្ថោ នាដបុត្តោ មហតិយា និគន្ថបរិសាយ សទ្ធឹ យេន មជ្ឈិមា ទ្វារសាលា តេនុបសង្កមិ។

[៧៩] អថខោ ឧបាលិ គហបតិ យំ សុទំ បុព្វេ [ឱ.ម. បុព្វេវ។] យតោ បស្សតិ នាដបុត្តំ ទូរតោ វ អាគច្ឆន្តំ ទិស្វាន តតោ បច្ចុគ្គន្ត្វា យំ តត្ថ អាសនំ អគ្គញ្ច សេដ្ឋញ្ច ឧត្តមញ្ច បណីតញ្ច តំ ឧត្តរាសង្គេន សំមជ្ជិត្វា [ឱ. បមជ្ជិត្វា។] បរិគ្គហេត្វា និសីទាបេតិ សោទានិ យំ តត្ថ អាសនំ អគ្គញ្ច សេដ្ឋញ្ច ឧត្តមញ្ច បណីតញ្ច តត្ថ សាមំ និសីទិត្វា និគន្ថំ នាដបុត្តំ ឯតទវោច សំវិជ្ជន្តិ ខោ ភន្តេ គហបតិ អាសនានិ សចេ អាកង្ខសិ និសីទាតិ។ ឯវំ វុត្តេ និគន្ថោ នាដបុត្តោ ឧបាលឹ គហបតឹ ឯតទវោច ឧម្មត្តោសិ ត្វំ គហបតិ ទត្តោសិ ត្វំ គហបតិ គច្ឆាមហំ ភន្តេ សមណស្ស គោតមស្ស វាទំ អារោបេស្សាមីតិ គន្ត្វាន មហតាសិ វាទសង្ឃាដេន បដិមុក្កោ អាគតោ សេយ្យថាបិ គហបតិ បុរិសោ អណ្ឌហារកោ គន្ត្វា ឧព្ភតេហិ អណ្ឌេហិ អាគច្ឆេយ្យ សេយ្យថា វា បន គហបតិ បុរិសោ អក្ខិកហារកោ គន្ត្វា ឧព្ភតេហិ អក្ខីហិ អាគច្ឆេយ្យ ឯវមេវ ខោ ត្វំ គហបតិ គច្ឆាមហំ ភន្តេ សមណស្ស គោតមស្ស វាទំ អារោបេស្សាមីតិ គន្ត្វា មហតាសិ វាទសង្ឃាដេន បដិមុក្កោ អាគតោ អាវដ្ដោ ខោសិ ត្វំ គហបតិ សមណេន គោតមេន អាវដ្ដនិយា មាយាយាតិ។

[៨០] ភទ្ទិកា ភន្តេ អាវដ្ដនី មាយា កល្យាណី ភន្តេ អាវដ្ដនី មាយា បិយា មេ ភន្តេ ញាតិសាលោហិតា ឥមាយ អាវដ្ដនិយា អាវដ្ដេយ្យុំ បិយានម្បិ មេ អស្ស ញាតិសាលោហិតានំ ទីឃរត្តំ ហិតាយ សុខាយ សព្វេ ចេបិ ភន្តេ ខត្តិយា ឥមាយ អាវដ្ដនិយា អាវដ្ដេយ្យុំ សព្វេសានម្បិស្ស ខត្តិយានំ ទីឃរត្តំ ហិតាយ សុខាយ សព្វេ ចេបិ ភន្តេ ព្រាហ្មណា។បេ។ វេស្សា។បេ។ សុទ្ទា ឥមាយ អាវដ្ដនិយា អាវដ្ដេយ្យុំ សព្វេសានម្បិស្ស សុទ្ទានំ ទីឃរត្តំ ហិតាយ សុខាយ សទេវកោ ចេបិ ភន្តេ លោកោ សមារកោ សព្រហ្មកោ សស្សមណព្រាហ្មណី បជា សទេវមនុស្សា ឥមាយ អាវដ្ដនិយា អាវដ្ដេយ្យ សទេវកស្សបិស្ស លោកស្ស សមារកស្ស សព្រហ្មកស្ស សស្សមណព្រាហ្មណិយា បជាយ សទេវមនុស្សាយ ទីឃរត្តំ ហិតាយ សុខាយាតិ [ឱ. ឥតិសទ្ទោ ន ទិស្សតិ។]។ តេនហិ ភន្តេ ឧបមំ តេ [ឱ.ម. ឧបមន្តេ។] ករិស្សាមិ ឧបមាយបិធេកច្ចេ វិញ្ញូ បុរិសា ភាសិតស្ស អត្ថំ ជានន្តិ [ឱ. អាជានន្តិ។]។

[៨១] ភូតបុព្វំ ភន្តេ អញ្ញតរស្ស ព្រាហ្មណស្ស ជិណ្ណស្ស វុឌ្ឍស្ស មហល្លកស្ស ទហរា មាណវិកា បជាបតី អហោសិ គព្ភិនី ឧបវិជញ្ញា។ អថខោ ភន្តេ សា មាណវិកា តំ ព្រាហ្មណំ ឯតទវោច គច្ឆ ត្វំ ព្រាហ្មណ អាបណា មក្កដច្ឆាបកំ កិណិត្វា អានេហិ យោ មេ កុមារកស្ស កីឡាបនកោ ភវិស្សតីតិ។ ឯវំ វុត្តេ ភន្តេ សោ ព្រាហ្មណោ តំ មាណវិកំ ឯតទវោច អាគមេហិ តាវ ភោតិ យាវ វិជាយសិ សចេ ត្វំ ភោតិ កុមារកំ វិជាយិស្សសិ តស្សា តេ អហំ អាបណា មក្កដច្ឆាបកំ កិណិត្វា អានិស្សាមិ យោ តេ កុមារកស្ស កីឡាបនកោ ភវិស្សតិ សចេ បន ត្វំ ភោតិ កុមារិកំ វិជាយិស្សសិ តស្សា តេ អហំ អាបណា មក្កដច្ឆាបិកំ កិណិត្វា អានិស្សាមិ យា តេ កុមារិកាយ កីឡាបនិកា ភវិស្សតីតិ។ ទុតិយម្បិ ខោ ភន្តេ សា មាណវិកា តំ ព្រាហ្មណំ ឯតទវោច គច្ឆ ត្វំ ព្រាហ្មណ អាបណា មក្កដច្ឆាបកំ កិណិត្វា អានេហិ យោ មេ កុមារកស្ស កីឡាបនកោ ភវិស្សតីតិ។ ទុតិយម្បិ ខោ ភន្តេ សោ ព្រាហ្មណោ តំ មាណវិកំ ឯតទវោច អាគមេហិ តាវ ភោតិ យាវ វិជាយសិ សចេ ត្វំ ភោតិ កុមារកំ វិជាយិស្សសិ តស្សា តេ អហំ អាបណា មក្កដច្ឆាបកំ កិណិត្វា អានិស្សាមិ យោ តេ កុមារកស្ស កីឡាបនកោ ភវិស្សតិ សចេ បន ត្វំ ភោតិ កុមារិកំ វិជាយិស្សសិ តស្សា តេ អហំ អាបណា មក្កដច្ឆាបិកំ កិណិត្វា អានិស្សាមិ យា តេ កុមារិកាយ កីឡាបនិកា ភវិស្សតីតិ។ តតិយម្បិ ខោ ភន្តេ សា មាណវិកា តំ ព្រាហ្មណំ ឯតទវោច គច្ឆ ត្វំ ព្រាហ្មណ អាបណា មក្កដច្ឆាបកំ កិណិត្វា អានេហិ យោ មេ កុមារកស្ស កីឡាបនកោ ភវិស្សតីតិ។ អថខោ ភន្តេ សោ ព្រាហ្មណោ តស្សា មាណវិកាយ សារត្តោ បដិពទ្ធចិត្តោ អាបណា មក្កដច្ឆាបកំ កិណិត្វា អានេត្វា តំ មាណវិកំ ឯតទវោច អយំ តេ ភោតិ មយា អាបណា មក្កដច្ឆាបកោ កិណិត្វា អានីតោ យោ តេ កុមារកស្ស កីឡាបនកោ ភវិស្សតីតិ។ ឯវំ វុត្តេ ភន្តេ សា មាណវិកា តំ ព្រាហ្មណំ ឯតទវោច គច្ឆ ត្វំ ព្រាហ្មណ ឥមំ មក្កដច្ឆាបកំ អាទាយ យេន រត្តបាណី រជកបុត្តោ តេនុបសង្កមិ ឧបសង្កមិត្វា រត្តបាណឹ រជកបុត្តំ ឯវំ វទេហិ ឥច្ឆាមហំ សម្ម រត្តបាណិ ឥមំ មក្កដច្ឆាបកំ បីតាវលេបនំ នាម រង្គជាតំ រជិតំ [ឱ. រញ្ជិតំ។] អាកោដិ្តតប្បច្ចាកោដ្តិតំ ឧភតោភាគវិមដ្ឋន្តិ។ អថខោ ភន្តេ សោ ព្រាហ្មណោ តស្សា មាណវិកាយ សារត្តោ បដិពទ្ធចិត្តោ [ឱ.ម. បដិពទ្ធចិត្តោ តំ។] មក្កដច្ឆាបកំ អាទាយ យេន រត្តបាណី រជកបុត្តោ តេនុបសង្កមិ ឧបសង្កមិត្វា រត្តបាណឹ រជកបុត្តំ ឯតទវោច ឥច្ឆាមហំ សម្ម រត្តបាណិ ឥមំ មក្កដច្ឆាបកំ បីតាវលេបនំ នាម រង្គជាតំ រជិតំ អាកោដ្តិតប្បច្ចាកោដ្តិតំ ឧភតោភាគវិមដ្ឋន្តិ។ ឯវំ វុត្តេ ភន្តេ រត្តបាណី រជកបុត្តោ តំ ព្រាហ្មណំ ឯតទវោច អយំ ខោ តេ ភន្តេ មក្កដច្ឆាបកោ រង្គក្ខមោ ហិ ខោ នោ អាកោដ្តនក្ខមោ នោ វិមជ្ជនក្ខមោតិ។ ឯវមេវ ខោ ភន្តេ ពាលានំ និគន្ថានំ វាទោ រង្គក្ខមោ ហិ ខោ ពាលានំ នោ បណ្ឌិតានំ នោ អនុយោគក្ខមោ នោ វិមជ្ជនក្ខមោ។ អថខោ ភន្តេ សោ ព្រាហ្មណោ អបរេន សមយេន នវំ ទុស្សយុគំ អាទាយ យេន រត្តបាណី រជកបុត្តោ តេនុបសង្កមិ ឧបសង្កមិត្វា រត្តបាណឹ រជកបុត្តំ ឯតទវោច ឥច្ឆាមហំ សម្ម រត្តបាណិ ឥមំ នវំ ទុស្សយុគំ បីតាវលេបនំ នាម រង្គជាតំ រជិតំ អាកោដ្តិតប្បច្ចាកោដ្តិតំ ឧភតោភាគវិមដ្ឋន្តិ។ ឯវំ វុត្តេ ភន្តេ រត្តបាណី រជកបុត្តោ ព្រាហ្មណំ [ឱ.ម. តំ ព្រាហ្មណំ។] ឯតទវោច ឥទំ ខោ តេ ភន្តេ នវំ ទុស្សយុគំ រង្គក្ខមញ្ចេវ អាកោដ្តនក្ខមញ្ច វិមជ្ជនក្ខមញ្ចាតិ។ ឯវមេវ ខោ ភន្តេ តស្ស ភគវតោ វាទោ អរហតោ សម្មាសម្ពុទ្ធស្ស រង្គក្ខមោ ចេវ បណ្ឌិតានំ នោ ពាលានំ អនុយោគក្ខមោ ច វិមជ្ជនក្ខមោ ចាតិ។ សរាជិកា ខោ តំ គហបតិ បរិសា ឯវំ ជានាតិ ឧបាលិ គហបតិ និគន្ថស្ស នាដបុត្តស្ស សាវកោតិ កស្ស តំ គហបតិ សាវកំ ធារេមាតិ។

[៨២] ឯវំ វុត្តេ ឧបាលិ គហបតិ ឧដ្ឋាយាសនា ឯកំសំ ឧត្តរាសង្គំ ករិត្វា យេន ភគវា តេនញ្ជលិម្បណាមេត្វា និគន្ថំ នាដបុត្តំ ឯតទវោច តេនហិ ភន្តេ សុណោហិ យស្សាហំ សាវកោ ធីរស្ស វិគតមោហស្ស បភិន្នខីលស្ស វិជិតវិជយស្ស អនីឃស្ស សុសមចិត្តស្ស ពុទ្ធសីលស្ស [ឱ.ម. វុទ្ធសីលស្ស។] សាធុប្បញ្ញស្ស វេសមន្តរស្ស [ឱ. វេស្សន្តរស្ស។] វិមលស្ស ភគវតោ តស្ស សាវកោហមស្មិ អកថំកថិស្ស តុសិតស្ស វន្តលោកាមិសស្ស មុទិតស្ស កតសមណស្ស មនុជស្ស អន្តិមសរីរស្ស [ឱ.ម. អន្តិមសារីរស្ស។] នរស្ស អនោបមស្ស វិរជស្ស ភគវតោ តស្ស សាវកោហមស្មិ អសំសយស្ស កុសលស្ស វេនយិកស្ស សារថិវរស្ស អនុត្តរស្ស រុចិរធម្មស្ស និក្កង្ខស្ស បភាសករស្ស [ម. បភាសកស្ស។] មានច្ឆិទស្ស វីរស្ស ភគវតោ តស្ស សាវកោហមស្មិ និសភស្ស អប្បមេយ្យស្ស គម្ភីរស្ស មោនប្បត្តស្ស [ឱ.ម. មានបត្តស្ស។] ខេមង្ករស្ស វេទស្ស [ម. ទេវស្ស។] ធម្មដ្ឋស្ស សុសំវុតត្តស្ស [ឱ.ម. សំវុត្តស្ស។] សង្គាតិកស្ស មុត្តស្ស ភគវតោ តស្ស សាវកោហមស្មិ នាគស្ស បន្តសេនស្ស ខីណសញ្ញោជនស្ស មុត្តស្ស បដិមន្តកស្ស មោនស្ស [ឱ.ម. ធោនស្ស។] បន្នធជស្ស វីតរាគស្ស ទន្តស្ស និប្បបញ្ចស្ស ភគវតោ តស្ស សាវកោហមស្មិ ឥសិសត្តមស្ស អកុហស្ស តេវិជ្ជស្ស ព្រហ្មសត្តស្ស នហាតកស្ស បទកស្ស បស្សទ្ធស្ស វិទិតវេទស្ស បុរិន្ទទស្ស សក្កស្ស ភគវតោ តស្ស សាវកោហមស្មិ អរិយស្ស ភាវិតត្តស្ស បត្តិបត្តស្ស វេយ្យាករណស្ស សតិមតោ វិបស្សិស្ស អនភិណតស្ស នោ អបណតស្ស អានេជស្ស វសិប្បត្តស្ស ភគវតោ តស្ស សាវកោហមស្មិ សម្មគ្គតស្ស ឈាយិស្ស អននុគតន្តរស្ស សុទ្ធស្ស អសិតស្ស អប្បភីតស្ស [ឱ. អប្បហីតស្ស។ ម. ហិតស្ស។] បរិវិត្តស្ស អគ្គប្បត្តស្ស តិណ្ណស្ស តារយន្តស្ស ភគវតោ តស្ស សាវកោហមស្មិ សន្តស្ស ភូរិប្បញ្ញស្ស មហាបញ្ញស្ស វីតលោភស្ស តថាគតស្ស សុគតស្ស អប្បដិបុគ្គលស្ស អសមស្ស វិសារទស្ស និបុណស្ស ភគវតោ តស្ស សាវកោហមស្មិ តណ្ហច្ឆិទស្ស ពុទ្ធស្ស វីតធូមស្ស អនុបលិត្តស្ស អាហុនេយ្យស្ស យក្ខស្ស ឧត្តមបុគ្គលស្ស អតុលស្ស មហតោ យសគ្គប្បត្តស្ស ភគវតោ តស្ស សាវកោហមស្មីតិ។

[៨៣] កទា សញ្ញូឡ្ហា បន តេ គហបតិ ឥមេ សមណស្ស គោតមស្ស វណ្ណាតិ។ សេយ្យថាបិ ភន្តេ នានាបុប្ផានំ មហាបុប្ផរាសិ តមេនំ ទក្ខោ មាលាការោ វា មាលាការន្តេវាសី វា វិចិត្រមាលំ [ឱ. វិចិត្រំ មាលំ។ ម. វិចិត្តំ មាលំ។] គន្ថេយ្យ ឯវមេវ ខោ ភន្តេ សោ ភគវា អនេកវណ្ណោ អនេកសតវណ្ណោ កោ ហិ ភន្តេ វណ្ណារហស្ស វណ្ណំ ន ករិស្សតីតិ។ អថខោ និគន្ថស្ស នាដបុត្តស្ស ភគវតោ សក្ការំ អសហមានស្ស តត្ថេវ ឧណ្ហំ លោហិតំ មុខតោ ឧគ្គញ្ឆីតិ។

ឧបាលិវាទសុត្តំ ឆដ្ឋំ និដ្ឋិតំ។

សត្តមំ កុក្កុរោវាទសុត្តំ [ឆដ្ឋ. កុក្កុរវតិកសុត្តំ]

[៨៤] ឯវម្មេ សុតំ។ ឯកំ សមយំ ភគវា កោលិយេសុ វិហរតិ ហលិទ្ទវសនំ នាម កោលិយានំ និគមោ។ អថខោ បុណ្ណោ ច កោលិយបុត្តោ គោវត្តិកោ អចេលោ ច សេនិយោ កុក្កុរវត្តិកោ យេន ភគវា តេនុបសង្កមឹសុ ឧបសង្កមិត្វា បុណ្ណោ កោលិយបុត្តោ គោវត្តិកោ ភគវន្តំ អភិវាទេត្វា ឯកមន្តំ និសីទិ។ អចេលោ បន សេនិយោ កុក្កុរវត្តិកោ ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា កុក្កុរោវ បលិកុណ្ឋិត្វា [ឱ. បលិកុជ្ជិត្វា។ ម. បលិគុណ្ឋិត្វា។] ឯកមន្តំ និសីទិ។ ឯកមន្តំ និសិន្នោ ខោ បុណ្ណោ កោលិយបុត្តោ គោវត្តិកោ ភគវន្តំ ឯតទវោច អយំ ភន្តេ អចេលោ សេនិយោ កុក្កុរវត្តិកោ ទុក្ករការកោ ឆមាយំ និក្ខិត្តំ [ឱ. ឆមានិក្ខិត្តំ។] ភោជនំ ភុញ្ជតិ តស្ស តំ កុក្កុរវត្តំ ទីឃរត្តំ សមត្តំ សមាទិន្នំ តស្ស កា គតិ កោ អភិសម្បរាយោតិ។ អលំ បុណ្ណ តិដ្ឋតេតំ មា មំ ឯតំ បុច្ឆីតិ។ ទុតិយម្បិ ខោ បុណ្ណោ កោលិយបុត្តោ គោវត្តិកោ ភគវន្តំ ឯតទវោច អយំ ភន្តេ អចេលោ សេនិយោ កុក្កុរវត្តិកោ ទុក្ករការកោ ឆមាយំ និក្ខិត្តំ ភោជនំ ភុញ្ជតិ តស្ស តំ កុក្កុរវត្តំ ទីឃរត្តំ សមត្តំ សមាទិន្នំ តស្ស កា គតិ កោ អភិសម្បរាយោតិ។ អលំ បុណ្ណ តិដ្ឋតេតំ មា មំ ឯតំ បុច្ឆីតិ។ តតិយម្បិ ខោ បុណ្ណោ កោលិយបុត្តោ គោវត្តិកោ ភគវន្តំ ឯតទវោច អយំ ភន្តេ អចេលោ សេនិយោ កុក្កុរវត្តិកោ ទុក្ករការកោ ឆមាយំ និក្ខិត្តំ ភោជនំ ភុញ្ជតិ តស្ស តំ កុក្កុរវត្តំ ទីឃរត្តំ សមត្តំ សមាទិន្នំ តស្ស កា គតិ កោ អភិសម្បរាយោតិ។

[៨៥] អទ្ធា ខោ តេ អហំ បុណ្ណ ន លភាមិ អលំ បុណ្ណ តិដ្ឋតេតំ មា មំ ឯតំ បុច្ឆីតិ អបិច តេ អហំ ព្យាករិស្សាមិ ឥធ បុណ្ណ ឯកច្ចោ កុក្កុរវត្តំ ភាវេតិ បរិបុណ្ណំ អព្វោកិណ្ណំ កុក្កុរសីលំ ភាវេតិ បរិបុណ្ណំ អព្វោកិណ្ណំ កុក្កុរចិត្តំ ភាវេតិ បរិបុណ្ណំ អព្វោកិណ្ណំ កុក្កុរាកប្បំ ភាវេតិ បរិបុណ្ណំ អព្វោកិណ្ណំ សោ កុក្កុរវត្តំ ភាវេត្វា បរិបុណ្ណំ អព្វោកិណ្ណំ កុក្កុរសីលំ ភាវេត្វា បរិបុណ្ណំ អព្វោកិណ្ណំ កុក្កុរចិត្តំ ភាវេត្វា បរិបុណ្ណំ អព្វោកិណ្ណំ កុក្កុរាកប្បំ ភាវេត្វា បរិបុណ្ណំ អព្វោកិណ្ណំ កាយស្ស ភេទា បរម្មរណា កុក្កុរានំ សហព្យតំ ឧបបជ្ជតិ សចេ ខោ បនស្ស ឯវំ ទិដ្ឋិ ហោតិ ឥមិនាហំ សីលេន វា វត្តេន វា តបេន វា ព្រហ្មចរិយេន វា ទេវោ វា ភវិស្សាមិ ទេវញ្ញតរោ វាតិ សាស្ស ហោតិ មិច្ឆាទិដ្ឋិ មិច្ឆាទិដ្ឋិស្ស ខោ អហំ បុណ្ណំ ទ្វិន្នំ គតីនំ អញ្ញតរំ គតឹ វទាមិ និរយំ វា តិរច្ឆានយោនឹ វា ឥតិ ខោ បុណ្ណ សម្បជ្ជមានំ កុក្កុរវត្តំ កុក្កុរានំ សហព្យតំ ឧបនេតិ វិបជ្ជមានំ និរយន្តិ។ ឯវំ វុត្តេ អចេលោ សេនិយោ កុក្កុរវត្តិកោ បរោទិ អស្សូនិ បវត្តេសិ។

[៨៦] អថខោ ភគវា បុណ្ណំ កោលិយបុត្តំ គោវត្តិកំ ឯតទវោច ឯតំ ខោ តេ អហំ បុណ្ណ នាលត្ថំ អលំ បុណ្ណ តិដ្ឋតេតំ មា មំ ឯតំ បុច្ឆីតិ។ នាហំ ភន្តេ ឯតំ រោទាមិ យំ មំ ភគវា ឯវមាហ អបិច មេ ឥទំ ភន្តេ កុក្កុរវត្តំ ទីឃរត្តំ សមត្តំ សមាទិន្នំ អយំ ភន្តេ បុណ្ណោ កោលិយបុត្តោ គោវត្តិកោ តស្ស តំ គោវត្តំ ទីឃរត្តំ សមត្តំ សមាទិន្នំ តស្ស កា គតិ កោ អភិសម្បរាយោតិ។ អលំ សេនិយ តិដ្ឋតេតំ មា មំ ឯតំ បុច្ឆីតិ។ ទុតិយម្បិ ខោ អចេលោ សេនិយោ។បេ។ តតិយម្បិ ខោ អចេលោ សេនិយោ កុក្កុរវត្តិកោ ភគវន្តំ ឯតទវោច អយំ ភន្តេ បុណ្ណោ កោលិយបុត្តោ គោវត្តិកោ តស្ស តំ គោវត្តំ ទីឃរត្តំ សមត្តំ សមាទិន្នំ តស្ស កា គតិ កោ អភិសម្បរាយោតិ។ អទ្ធា ខោ តេ អហំ សេនិយ ន លភាមិ អលំ សេនិយ តិដ្ឋតេតំ មា មំ ឯតំ បុច្ឆីតិ អបិច តេ អហំ ព្យាករិស្សាមិ ឥធ សេនិយ ឯកច្ចោ គោវត្តំ ភាវេតិ បរិបុណ្ណំ អព្វោកិណ្ណំ គោសីលំ ភាវេតិ បរិបុណ្ណំ អព្វោកិណ្ណំ គោចិត្តំ ភាវេតិ បរិបុណ្ណំ អព្វោកិណ្ណំ គវាកប្បំ ភាវេតិ បរិបុណ្ណំ អព្វោកិណ្ណំ សោ គោវត្តំ ភាវេត្វា បរិបុណ្ណំ អព្វោកិណ្ណំ គោសីលំ ភាវេត្វា បរិបុណ្ណំ អព្វោកិណ្ណំ គោចិត្តំ ភាវេត្វា បរិបុណ្ណំ អព្វោកិណ្ណំ គវាកប្បំ ភាវេត្វា បរិបុណ្ណំ អព្វោកិណ្ណំ កាយស្ស ភេទា បរម្មរណា គុន្នំ សហព្យតំ ឧបបជ្ជតិ សចេ ខោ បនស្ស ឯវំ ទិដ្ឋិ ហោតិ ឥមិនាហំ សីលេន វា វត្តេន វា តបេន វា ព្រហ្មចរិយេន វា ទេវោ វា ភវិស្សាមិ ទេវញ្ញតរោ វាតិ សាស្ស ហោតិ មិច្ឆាទិដ្ឋិ មិច្ឆាទិដ្ឋិស្ស ខោ អហំ សេនិយ ទ្វិន្នំ គតីនំ អញ្ញតរំ គតឹ វទាមិ និរយំ វា តិរច្ឆានយោនឹ វា ឥតិ ខោ សេនិយ សម្បជ្ជមានំ គោវត្តំ គុន្នំ សហព្យតំ ឧបនេតិ វិបជ្ជមានំ និរយន្តិ។ ឯវំ វុត្តេ បុណ្ណោ កោលិយបុត្តោ គោវត្តិកោ បរោទិ អស្សូនិ បវត្តេសិ។

[៨៧] អថខោ ភគវា អចេលំ សេនិយំ កុក្កុរវត្តិកំ ឯតទវោច ឯតំ ខោ តេ អហំ សេនិយ នាលត្ថំ អលំ សេនិយ តិដ្ឋតេតំ មា មំ ឯតំ បុច្ឆីតិ។ នាហំ ភន្តេ ឯតំ រោទាមិ យំ មំ ភគវា ឯវមាហ អបិច មេ ឥទំ ភន្តេ គោវត្តំ ទីឃរត្តំ សមត្តំ សមាទិន្នំ ឯវំ បសន្នោ អហំ ភន្តេ ភគវតិ បហោតិ ភគវា តថា ធម្មំ ទេសេតុ យថា អហញ្ចេវិមំ គោវត្តំ បជហេយ្យំ អយញ្ច អចេលោ សេនិយោ កុក្កុរវត្តិកោ តំ កុក្កុរវត្តំ បជហេយ្យាតិ។ តេនហិ បុណ្ណ សុណាហិ សាធុកំ មនសិករោហិ ភាសិស្សាមីតិ។ ឯវំ ភន្តេតិ ខោ បុណ្ណោ កោលិយបុត្តោ គោវត្តិកោ ភគវតោ បច្ចស្សោសិ។

[៨៨] ភគវា ឯតទវោច ចត្តារិមានិ បុណ្ណ កម្មានិ មយា សយំ អភិញ្ញា សច្ឆិកត្វា បវេទិតានិ កតមានិ ចត្តារិ អត្ថិ បុណ្ណ កម្មំ កណ្ហំ កណ្ហវិបាកំ អត្ថិ បុណ្ណ កម្មំ សុក្កំ សុក្កវិបាកំ អត្ថិ បុណ្ណ កម្មំ កណ្ហសុក្កំ កណ្ហសុក្កវិបាកំ អត្ថិ បុណ្ណ កម្មំ អកណ្ហំ អសុក្កំ អកណ្ហអសុក្កវិបាកំ [ឱ. ឥធ កម្មន្តិ បាឋោ ទិស្សតិ។] កម្មក្ខយាយ សំវត្តតីតិ [ឱ.ម. ឥតិសទ្ទោ ន ទិស្សតិ។]។ កតមញ្ច បុណ្ណ កម្មំ កណ្ហំ កណ្ហវិបាកំ ឥធ បុណ្ណ ឯកច្ចោ សព្យាបជ្ឈំ [ឱ. សព្យាពជ្ឈំ។ ម. សព្យាពជ្ជំ។] កាយសង្ខារំ អភិសង្ខរោតិ សព្យាបជ្ឈំ វចីសង្ខារំ អភិសង្ខរោតិ សព្យាបជ្ឈំ មនោសង្ខារំ អភិសង្ខរោតិ សោ សព្យាបជ្ឈំ កាយសង្ខារំ អភិសង្ខរិត្វា សព្យាបជ្ឈំ វចីសង្ខារំ អភិសង្ខរិត្វា សព្យាបជ្ឈំ មនោសង្ខារំ អភិសង្ខរិត្វា សព្យាបជ្ឈំ លោកំ ឧបបជ្ជតិ តមេនំ សព្យាបជ្ឈំ លោកំ ឧបបន្នំ សមានំ សព្យាបជ្ឈា ផស្សា ផុសន្តិ សោ សព្យាបជ្ឈេហិ ផស្សេហិ ផុដ្ឋោ សមានោ សព្យាបជ្ឈំ វេទនំ វេទេតិ ឯកន្តទុក្ខំ សេយ្យថាបិ សត្តា នេរយិកាតិ [ឱ.ម. ឥតិសទ្ទោ ន ទិស្សតិ។] ឥតិ ខោ បុណ្ណ ភូតា ភូតស្ស ឧបបត្តិ ហោតិ យំ ករោតិ តេន ឧបបជ្ជតិ ឧបបន្នមេតំ ផស្សា ផុសន្តិ ឯវម្បាហំ បុណ្ណ កម្មទាយាទា សត្តាតិ វទាមិ ឥទំ វុច្ចតិ បុណ្ណ កម្មំ កណ្ហំ កណ្ហវិបាកំ។ កតមញ្ច បុណ្ណ កម្មំ សុក្កំ សុក្កវិបាកំ ឥធ បុណ្ណ ឯកច្ចោ អព្យាបជ្ឈំ កាយសង្ខារំ អភិសង្ខរោតិ អព្យាបជ្ឈំ វចីសង្ខារំ អភិសង្ខរោតិ អព្យាបជ្ឈំ មនោសង្ខារំ អភិសង្ខរោតិ សោ អព្យាបជ្ឈំ កាយសង្ខារំ អភិសង្ខរិត្វា អព្យាបជ្ឈំ វចីសង្ខារំ អភិសង្ខរិត្វា អព្យាបជ្ឈំ មនោសង្ខារំ អភិសង្ខរិត្វា អព្យាបជ្ឈំ លោកំ ឧបបជ្ជតិ តមេនំ អព្យាបជ្ឈំ លោកំ ឧបបន្នំ សមានំ អព្យាបជ្ឈា ផស្សា ផុសន្តិ សោ អព្យាបជ្ឈេហិ ផស្សេហិ ផុដ្ឋោ សមានោ អព្យាបជ្ឈំ វេទនំ វេទេតិ ឯកន្តសុខំ សេយ្យថាបិ ទេវា សុភកិណ្ហា ឥតិ ខោ បុណ្ណ ភូតា ភូតស្ស ឧបបត្តិ ហោតិ យំ ករោតិ តេន ឧបបជ្ជតិ ឧបបន្នមេតំ ផស្សា ផុសន្តិ ឯវម្បាហំ បុណ្ណ កម្មទាយាទា សត្តាតិ វទាមិ ឥទំ វុច្ចតិ បុណ្ណ កម្មំ សុក្កំ សុក្កវិបាកំ។ កតមញ្ច បុណ្ណ កម្មំ កណ្ហសុក្កំ កណ្ហសុក្កវិបាកំ ឥធ បុណ្ណ ឯកច្ចោ សព្យាបជ្ឈម្បិ អព្យាបជ្ឈម្បិ កាយសង្ខារំ អភិសង្ខរោតិ សព្យាបជ្ឈម្បិ អព្យាបជ្ឈម្បិ វចីសង្ខារំ អភិសង្ខរោតិ សព្យាបជ្ឈម្បិ អព្យាបជ្ឈម្បិ មនោសង្ខារំ អភិសង្ខរោតិ សោ សព្យាបជ្ឈម្បិ អព្យាបជ្ឈម្បិ កាយសង្ខារំ អភិសង្ខរិត្វា សព្យាបជ្ឈម្បិ អព្យាបជ្ឈម្បិ វចីសង្ខារំ អភិសង្ខរិត្វា សព្យាបជ្ឈម្បិ អព្យាបជ្ឈម្បិ មនោសង្ខារំ អភិសង្ខរិត្វា សព្យាបជ្ឈម្បិ អព្យាបជ្ឈម្បិ លោកំ ឧបបជ្ជតិ តមេនំ សព្យាបជ្ឈម្បិ អព្យាបជ្ឈម្បិ លោកំ ឧបបន្នំ សមានំ សព្យាបជ្ឈាបិ អព្យាបជ្ឈាបិ ផស្សា ផុសន្តិ សោ សព្យាបជ្ឈេហិបិ អព្យាបជ្ឈេហិបិ ផស្សេហិ ផុដ្ឋោ សមានោ សព្យាបជ្ឈម្បិ អព្យាបជ្ឈម្បិ វេទនំ វេទេតិ វោកិណ្ណំ សុខទុក្ខំ សេយ្យថាបិ មនុស្សា ឯកច្ចេ ច ទេវា ឯកច្ចេ ច វិនិបាតិកា ឥតិ ខោ បុណ្ណ ភូតា ភូតស្ស ឧបបត្តិ ហោតិ យំ ករោតិ តេន ឧបបជ្ជតិ ឧបបន្នមេតំ ផស្សា ផុសន្តិ ឯវម្បាហំ បុណ្ណ កម្មទាយាទា សត្តាតិ វទាមិ ឥទំ វុច្ចតិ បុណ្ណ កម្មំ កណ្ហសុក្កំ កណ្ហសុក្កវិបាកំ។ កតមញ្ច បុណ្ណ កម្មំ អកណ្ហំ អសុក្កំ អកណ្ហអសុក្កវិបាកំ កម្មក្ខយាយ សំវត្តតិ តត្រ បុណ្ណ យមិទំ កម្មំ កណ្ហំ កណ្ហវិបាកំ តស្ស បហានាយ យា ចេតនា យមិទំ កម្មំ សុក្កំ សុក្កវិបាកំ តស្ស បហានាយ យា ចេតនា យមិទំ កម្មំ កណ្ហសុក្កំ កណ្ហសុក្កវិបាកំ តស្ស បហានាយ យា ចេតនា ឥទំ វុច្ចតិ បុណ្ណ កម្មំ អកណ្ហំ អសុក្កំ អកណ្ហអសុក្កវិបាកំ កម្មក្ខយាយ សំវត្តតិ។ ឥមានិ ខោ បុណ្ណ ចត្តារិ កម្មានិ មយា សយំ អភិញ្ញា សច្ឆិកត្វា បវេទិតានីតិ។

[៨៩] ឯវំ វុត្តេ បុណ្ណោ កោលិយបុត្តោ គោវត្តិកោ ភគវន្តំ ឯតទវោច អភិក្កន្តំ ភន្តេ អភិក្កន្តំ សេយ្យថាបិ ភន្តេ និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ ភោតា គោតមេន អនេកបរិយាយេន ធម្មោ បកាសិតោ ឯសាហំ ភន្តេ ភគវន្តំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភគវា ធារេតុ អជ្ជតគ្គេ បាណុបេតំ សរណង្គតន្តិ។ អចេលោ បន [បនសទ្ទោ កត្ថចិ ន ទិស្សតិ។] សេនិយោ កុក្កុរវត្តិកោ ភគវន្តំ ឯតទវោច អភិក្កន្តំ ភន្តេ អភិក្កន្តំ ភន្តេ សេយ្យថាបិ ភន្តេ និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ ភោតា គោតមេន អនេកបរិយាយេន ធម្មោ បកាសិតោ ឯសាហំ ភន្តេ ភគវន្តំ សរណំ គច្ឆាមិ ធម្មញ្ច ភិក្ខុសង្ឃញ្ច លភេយ្យាហំ ភន្តេ ភគវតោ សន្តិកេ បព្វជ្ជំ លភេយ្យំ ឧបសម្បទន្តិ។ យោ ខោ សេនិយ អញ្ញតិត្ថិយបុព្វោ ឥមស្មឹ ធម្មវិនយេ អាកង្ខតិ បព្វជ្ជំ អាកង្ខតិ ឧបសម្បទំ សោ ចត្តារោ មាសេ បរិវសតិ ចតុន្នំ មាសានំ អច្ចយេន អារទ្ធចិត្តា ភិក្ខូ បព្វាជេន្តិ ឧបសម្បាទេន្តិ ភិក្ខុភាវាយ អបិច មេត្ថ បុគ្គលវេមត្តតា វិទិតាតិ។

[៩០] សចេ ខោ ភន្តេ [ឱ.ម. សចេ ភន្តេ។] អញ្ញតិត្ថិយបុព្វា ឥមស្មឹ ធម្មវិនយេ អាកង្ខន្តា បព្វជ្ជំ អាកង្ខន្តា ឧបសម្បទំ ចត្តារោ មាសេ បរិវសន្តិ ចតុន្នំ មាសានំ អច្ចយេន អារទ្ធចិត្តា ភិក្ខូ បព្វាជេន្តិ ឧបសម្បាទេន្តិ ភិក្ខុភាវាយ អហំ ចត្តារិ វស្សានិ បរិវសិស្សាមិ ចតុន្នំ វស្សានំ អច្ចយេន អារទ្ធចិត្តា ភិក្ខូ បព្វាជេន្តិ ឧបសម្បាទេន្តិ ភិក្ខុភាវាយាតិ។ អលត្ថ ខោ អចេលោ សេនិយោ កុក្កុរវត្តិកោ ភគវតោ សន្តិកេ បព្វជ្ជំ អលត្ថ ឧបសម្បទំ។ អចិរូបសម្បន្នោ ខោ បនាយស្មា សេនិយោ ឯកោ វូបកដ្ឋោ អប្បមត្តោ អាតាបី បហិតត្តោ វិហរន្តោ នចិរស្សេវ យស្សត្ថាយ កុលបុត្តា សម្មទេវ អគារស្មា អនគារិយំ បព្វជ្ជន្តិ តទនុត្តរំ ព្រហ្មចរិយបរិយោសានំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហាសិ ខីណា ជាតិ វុសិតំ ព្រហ្មចរិយំ កតំ ករណីយំ នាបរំ ឥត្ថត្តាយាតិ អព្ភញ្ញាសិ។ អញ្ញតរោ ចេ [ឱ. ចសទ្ទោ នត្ថិ។] ខោ បនាយស្មា សេនិយោ អរហតំ អហោសីតិ។

កុក្កុរោវាទសុត្តំ សត្តមំ [ម. វ។] និដ្ឋិតំ។

អដ្ឋមំ អភយរាជកុមារសុត្តំ

[៩១] ឯវម្មេ សុតំ។ ឯកំ សមយំ ភគវា រាជគហេ វិហរតិ វេឡុវនេ កឡន្ទកនិវាបេ។ អថខោ អភយោ រាជកុមារោ យេន និគន្ថោ នាដបុត្តោ តេនុបសង្កមិ ឧបសង្កមិត្វា និគន្ថំ នាដបុត្តំ អភិវាទេត្វា ឯកមន្តំ និសីទិ។

[៩២] ឯកមន្តំ និសិន្នំ ខោ អភយំ ខោ រាជកុមារំ និគន្ថោ នាដបុត្តោ ឯតទវោច ឯហិ ត្វំ រាជកុមារ សមណស្ស គោតមស្ស វាទំ អារោបេហិ ឯវំ តេ កល្យាណោ កិត្តិសទ្ទោ អព្ភុគ្គច្ឆិស្សតិ [ឱ. អព្ភុគញ្ឆីតិ។ ម. អព្ភុគច្ឆតិ។] អភយេន រាជកុមារេន សមណស្ស គោតមស្ស ឯវំមហិទ្ធិកស្ស ឯវំមហានុភាវស្ស វាទោ អារោបិតោតិ។ យថាកថំ បនាហំ ភន្តេ សមណស្ស គោតមស្ស ឯវំមហិទ្ធិកស្ស ឯវំមហានុភាវស្ស វាទំ អារោបេស្សាមីតិ។ ឯហិ ត្វំ រាជកុមារ យេន សមណោ គោតមោ តេនុបសង្កម ឧបសង្កមិត្វា សមណំ គោតមំ ឯវំ វទេហិ ភាសេយ្យ នុ ខោ ភន្តេ តថាគតោ តំ វាចំ យា សា វាចា បរេសំ អប្បិយា អមនាបាតិ សចេ បន តេ [ឱ. សចេ តេ។] សមណោ គោតមោ ឯវំ បុដ្ឋោ ឯវំ ព្យាករោតិ ភាសេយ្យ រាជកុមារ តថាគតោ តំ វាចំ សា វាចា បរេសំ អប្បិយា អមនាបាតិ តមេនំ ត្វំ ឯវំ វទេយ្យាសិ អថ កិញ្ចរហិ តេ ភន្តេ បុថុជ្ជនេន នានាករណំ បុថុជ្ជនោបិ ហិ តំ វាចំ ភាសេយ្យ យា សា វាចា បរេសំ អប្បិយា អមនាបាតិ សចេ បន តេ សមណោ គោតមោ ឯវំ បុដ្ឋោ ឯវំ ព្យាករោតិ ន រាជកុមារ តថាគតោ តំ វាចំ ភាសេយ្យ យា សា វាចា បរេសំ អប្បិយា អមនាបាតិ តមេនំ ត្វំ ឯវំ វទេយ្យាសិ អថ កិញ្ចរហិ តេ ភន្តេ ទេវទត្តោ ព្យាកតោ អាបាយិកោ ទេវទត្តោ នេរយិកោ ទេវទត្តោ កប្បដ្ឋោ ទេវទត្តោ អតេកិច្ឆោ ទេវទត្តោតិ តាយ ច បន តេ វាចាយ ទេវទត្តោ កុបិតោ អហោសិ អនត្តមនោតិ។ ឥមំ ខោ តេ រាជកុមារ សមណោ គោតមោ ឧភតោកោដិកំ បញ្ហំ បុដ្ឋោ សមានោ នេវ សក្ខិតិ ឧគ្គិលិតុំ នេវ សក្ខិតិ ឱគ្គិលិតុំ សេយ្យថាបិ នាម បុរិសស្ស អយសិង្ឃាដកំ [ឱ. អយោសិង្ឃាដកំ។] កណ្ឋេ វិលគ្គំ សោ នេវ សក្កុណេយ្យ ឧគ្គិលិតុំ នេវ សក្កុណេយ្យ ឱគ្គិលិតុំ ឯវមេវ ខោ តេ រាជកុមារ សមណោ គោតមោ ឥមំ ឧភតោកោដិកំ បញ្ហំ បុដ្ឋោ សមានោ នេវ សក្ខិតិ ឧគ្គិលិតុំ នេវ សក្ខិតិ ឱគ្គិលិតុន្តិ។ ឯវំ ភន្តេតិ ខោ អភយោ រាជកុមារោ និគន្ថស្ស នាដបុត្តស្ស បដិស្សុត្វា ឧដ្ឋាយាសនា និគន្ថំ នាដបុត្តំ អភិវាទេត្វា បទក្ខិណំ កត្វា យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នស្ស ខោ អភយស្ស រាជកុមារស្ស សុរិយំ ឱលោកេត្វា ឯតទហោសិ អកាលោ ខោ អជ្ជ ភគវតោ វាទំ អារោបេតុំ ស្វេទានាហំ សកេ និវេសនេ ភគវតោ វាទំ អារោបេស្សាមីតិ។ ភគវន្តំ ឯតទវោច អធិវាសេតុ មេ ភន្តេ ភគវា ស្វាតនាយ អត្តចតុត្ថោ ភត្តន្តិ។ អធិវាសេសិ ភគវា តុណ្ហីភាវេន។ អថខោ អភយោ រាជកុមារោ ភគវតោ អធិវាសនំ វិទិត្វា ឧដ្ឋាយាសនា ភគវន្តំ អភិវាទេត្វា បទក្ខិណំ កត្វា បក្កាមិ។ អថខោ ភគវា តស្សា រត្តិយា អច្ចយេន បុព្វណ្ហសមយំ និវាសេត្វា បត្តចីវរមាទាយ យេន អភយស្ស រាជកុមារស្ស និវេសនំ តេនុបសង្កមិ ឧបសង្កមិត្វា បញ្ញត្តេ អាសនេ និសីទិ។ អថខោ អភយោ រាជកុមារោ ភគវន្តំ បណីតេន ខាទនីយេន ភោជនីយេន សហត្ថា សន្តប្បេសិ សម្បវារេសិ។ អថខោ អភយោ រាជកុមារោ ភគវន្តំ ភុត្តាវឹ ឱនីតបត្តបាណឹ អញ្ញតរំ នីចំ អាសនំ គហេត្វា ឯកមន្តំ និសីទិ។

[៩៣] ឯកមន្តំ និសិន្នោ ខោ អភយោ រាជកុមារោ ភគវន្តំ ឯតទវោច ភាសេយ្យ នុ ខោ ភន្តេ តថាគតោ តំ វាចំ យា សា វាចា បរេសំ អប្បិយា អមនាបាតិ។ ន ខ្វេត្ថ [ឱ. ន ខោត្ថ។] រាជកុមារ ឯកំសេនាតិ។ ឯត្ថ ភន្តេ អនស្សុំ និគន្ថាតិ។ កឹ បន ត្វំ រាជកុមារ ឯវំ វទេសីតិ [ឱ.ម. ឥតិសទ្ទោ ន ទិស្សតិ។]។ ឯត្ថ ភន្តេ អនស្សុំ និគន្ថាតិ ឥធាហំ ភន្តេ យេន និគន្ថោ នាដបុត្តោ តេនុបសង្កមឹ ឧបសង្កមិត្វា និគន្ថំ នាដបុត្តំ អភិវាទេត្វា ឯកមន្តំ និសីទឹ ឯកមន្តំ និសិន្នំ ខោ មំ ភន្តេ និគន្ថោ នាដបុត្តោ ឯតទវោច ឯហិ ត្វំ រាជកុមារ សមណស្ស គោតមស្ស វាទំ អារោបេហិ ឯវំ តេ កល្យាណោ កិត្តិសទ្ទោ អព្ភុគ្គច្ឆិស្សតិ អភយេន រាជកុមារេន សមណស្ស គោតមស្ស ឯវំមហិទ្ធិកស្ស ឯវំមហានុភាវស្ស វាទោ អារោបិតោតិ ឯវំ វុត្តេ អហំ ភន្តេ និគន្ថំ នាដបុត្តំ ឯតទវោចំ យថាកថំ បនាហំ ភន្តេ សមណស្ស គោតមស្ស ឯវំមហិទ្ធិកស្ស ឯវំមហានុភាវស្ស វាទំ អារោបេស្សាមីតិ ឯហិ ត្វំ រាជកុមារ យេន សមណោ គោតមោ តេនុបសង្កម ឧបសង្កមិត្វា សមណំ គោតមំ ឯវំ វទេហិ ភាសេយ្យ នុ ខោ ភន្តេ តថាគតោ តំ វាចំ យា សា វាចា បរេសំ អប្បិយា អមនាបាតិ សចេ តេ សមណោ គោតមោ ឯវំ បុដ្ឋោ សមានោ [ឱ.ម. សមានោតិ ន ទិស្សតិ។] ឯវំ ព្យាករោតិ ភាសេយ្យ រាជកុមារ តថាគតោ តំ វាចំ យា សា វាចា បរេសំ អប្បិយា អមនាបាតិ តមេនំ ត្វំ ឯវំ វទេយ្យាសិ អថ កិញ្ចរហិ តេ ភន្តេ បុថុជ្ជនេន នានាករណំ បុថុជ្ជនោបិ ហិ តំ វាចំ ភាសេយ្យ យា សា វាចា បរេសំ អប្បិយា អមនាបាតិ សចេ បន តេ សមណោ គោតមោ ឯវំ បុដ្ឋោ ឯវំ ព្យាករោតិ ន រាជកុមារ តថាគតោ តំ វាចំ ភាសេយ្យ យា សា វាចា បរេសំ អប្បិយា អមនាបាតិ តមេនំ ត្វំ ឯវំ វទេយ្យាសិ អថ កិញ្ចរហិ តេ ភន្តេ ទេវទត្តោ ព្យាកតោ អាបាយិកោ ទេវទត្តោ នេរយិកោ ទេវទត្តោ កប្បដ្ឋោ ទេវទត្តោ អតេកិច្ឆោ ទេវទត្តោតិ តាយ ច បន តេ វាចាយ ទេវទត្តោ កុបិតោ អហោសិ អនត្តមនោតិ ឥមំ ខោ តេ រាជកុមារ សមណោ គោតមោ ឧភតោកោដិកំ បញ្ហំ បុដ្ឋោ សមានោ នេវ សក្ខិតិ ឧគ្គិលិតុំ នេវ សក្ខិតិ ឱគ្គិលិតុំ សេយ្យថាបិ នាម បុរិសស្ស អយសិង្ឃាដកំ កណ្ឋេ វិលគ្គំ សោ នេវ សក្កុណេយ្យ ឧគ្គិលិតុំ នេវ សក្កុណេយ្យ ឱគ្គិលិតុំ ឯវមេវ ខោ តេ រាជកុមារ សមណោ គោតមោ ឥមំ ឧភតោកោដិកំ បញ្ហំ បុដ្ឋោ សមានោ នេវ ឧគ្គិលិតុំ នេវ សក្ខិតិ ឱគ្គិលិតុន្តិ។

[៩៤] តេន ខោ បន សមយេន ទហរោ [ឱ.ម. ទហរោ កុមារោ។] មន្ទោ ឧត្តានសេយ្យកោ អភយស្ស រាជកុមារស្ស អង្កេ និសិន្នោ ហោតិ។ អថខោ ភគវា អភយំ រាជកុមារំ ឯតទវោច តំ កឹ មញ្ញសិ រាជកុមារ សចាយំ កុមារោ តុយ្ហំ វា បមាទមន្វាយ ធាតិយា វា បមាទមន្វាយ កដ្ឋំ វា កឋលំ វា មុខេ អាហរេយ្យ កិន្តិ តំ [ឱ.ម. នំ។] ករេយ្យាសីតិ។ អាហរេយ្យស្សាហំ ភន្តេ សចាហំ ភន្តេ ន សក្កុណេយ្យំ អាទិកេនេវ អាហរិតុំ [ឱ. អាហត្តុំ។ ម. អាហន្តុំ។] វាមេន ហត្ថេន សីសំ បរិគ្គហេត្វា ទក្ខិណេន ហត្ថេន វង្កង្គុលឹ កត្វា សលោហិតម្បិ អាហរេយ្យំ តំ កិស្ស ហេតុ អត្ថិ ហិ មេ [ឱ.ម. អត្ថិ មេ។] ភន្តេ កុមារេ អនុកម្បាតិ។ ឯវមេវ ខោ រាជកុមារ យំ តថាគតោ វាចំ ជានាតិ អភូតំ អតច្ឆំ អនត្ថសញ្ហិតំ សា ច បរេសំ អប្បិយា អមនាបា ន តំ តថាគតោ វាចំ ភាសតិ យម្បិ តថាគតោ វាចំ ជានាតិ ភូតំ តច្ឆំ អនត្ថសញ្ហិតំ សា ច បរេសំ អប្បិយា អមនាបា តម្បិ តថាគតោ វាចំ ន ភាសតិ យញ្ច ខោ តថាគតោ វាចំ ជានាតិ ភូតំ តច្ឆំ អត្ថសញ្ហិតំ សា ច បរេសំ អប្បិយា អមនាបា តត្រ កាលញ្ញូ តថាគតោ ហោតិ តស្សា វាចាយ វេយ្យាករណាយ យំ តថាគតោ វាចំ ជានាតិ អភូតំ អតច្ឆំ អនត្ថសញ្ហិតំ សា ច បរេសំ បិយា មនាបា តំ តថាគតោ វាចំ ន ភាសតិ យម្បិ តថាគតោ វាចំ ជានាតិ ភូតំ តច្ឆំ អនត្ថសញ្ហិតំ សា ច បរេសំ បិយា មនាបា តម្បិ តថាគតោ វាចំ ន ភាសតិ យញ្ច ខោ តថាគតោ វាចំ ជានាតិ ភូតំ តច្ឆំ អត្ថសញ្ហិតំ សា ច បរេសំ បិយា មនាបា តត្រ កាលញ្ញូ តថាគតោ ហោតិ តស្សា វាចាយ ព្យាករណាយ [ឱ.ម. វេយ្យាករណាយ។] តំ កិស្ស ហេតុ អត្ថិ ហិ [ឱ.ម. ហិសទ្ទោ នត្ថិ។] រាជកុមារ តថាគតស្ស សត្តេសុ [ម. សត្តេ។] អនុកម្បាតិ។

[៩៥] យេ មេ ភន្តេ ខត្តិយបណ្ឌិតាបិ ព្រាហ្មណបណ្ឌិតាបិ គហបតិបណ្ឌិតាបិ សមណបណ្ឌិតាបិ បញ្ហំ អភិសង្ខរិត្វា តថាគតំ ឧបសង្កមិត្វា បុច្ឆន្តិ បុព្វេ វ នុ ខោ ឯតំ ភន្តេ ភគវតោ ចេតសោ បរិវិតក្កិតំ ហោតិ យេ មំ ឧបសង្កមិត្វា ឯវំ បុច្ឆិស្សន្តិ តេសាហំ ឯវំ បុដ្ឋោ ឯវំ ព្យាករិស្សាមីតិ ឧទាហុ ឋានសោវេតំ តថាគតំ បដិភាតីតិ។ តេនហិ រាជកុមារ តញ្ញេវេត្ថ បដិបុច្ឆិស្សាមិ យថា តេ ខមេយ្យ តថា នំ ព្យាករេយ្យាសិ តំ កឹ មញ្ញសិ រាជកុមារ កុសលោ ត្វំ រថស្ស អង្គប្បច្ចង្គានន្តិ។ ឯវំ ភន្តេ កុសលោ អហំ រថស្ស អង្គប្បច្ចង្គានន្តិ។ តំ កឹ មញ្ញសិ រាជកុមារ យេ តំ ឧបសង្កមិត្វា ឯវំ បុច្ឆេយ្យុំ កិន្នាមិទំ រថស្ស អង្គប្បច្ចង្គន្តិ បុព្វេ វ នុ ខោ តេ ឯតំ ចេតសោ បរិវិតក្កិតំ អស្ស យេ មំ ឧបសង្កមិត្វា ឯវំ បុច្ឆិស្សន្តិ តេសាហំ ឯវំ បុដ្ឋោ ឯវំ ព្យាករិស្សាមីតិ ឧទាហុ ឋានសោវេតំ តំ បដិភាសេយ្យាតិ។ អហំ ហិ ភន្តេ រថិកោ សញ្ញាតោ កុសលោ រថស្ស អង្គប្បច្ចង្គានំ សព្វានិ មេ រថស្ស អង្គប្បច្ចង្គានិ សុវិទិតានិ ឋានសោវេតំ មំ បដិភាសេយ្យាតិ។ ឯវមេវ ខោ រាជកុមារ យេ តេ ខត្តិយបណ្ឌិតាបិ ព្រាហ្មណបណ្ឌិតាបិ គហបតិបណ្ឌិតាបិ សមណបណ្ឌិតាបិ បញ្ហំ អភិសង្ខរិត្វា តថាគតំ ឧបសង្កមិត្វា បុច្ឆិស្សន្តិ [ឱ.ម. បុច្ឆន្តិ។] ឋានសោវេតំ តថាគតំ បដិភាតិ តំ កិស្ស ហេតុ សា ហិ រាជកុមារ តថាគតស្ស ធម្មធាតុ សុប្បដិវិទ្ធា យស្សា ធម្មធាតុយា សុប្បដិវិទ្ធត្តា ឋានសោវេតំ តថាគតំ បដិភាតីតិ។

[៩៦] ឯវំ វុត្តេ អភយោ រាជកុមារោ ភគវន្តំ ឯតទវោច អភិក្កន្តំ ភន្តេ អភិក្កន្តំ ភន្តេ សេយ្យថាបិ ភន្តេ និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ ភគវតា អនេកបរិយាយេន ធម្មោ បកាសិតោ ឯសាហំ ភន្តេ ភគវន្តំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភគវា ធារេតុ អជ្ជតគ្គេ បាណុបេតំ សរណង្គតន្តិ។

អភយរាជកុមារសុត្តំ អដ្ឋមំ និដ្ឋិតំ។

នវមំ ពហុវេទនីយសុត្តំ

[៩៧] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ អថខោ បញ្ចកង្គោ ថបតិ យេនាយស្មា ឧទាយី តេនុបសង្កមិ ឧបសង្កមិត្វា អាយស្មន្តំ ឧទាយឹ អភិវាទេត្វា ឯកមន្តំ និសីទិ។

[៩៨] ឯកមន្តំ និសិន្នោ ខោ សោ [ឱ. សោតិ ន ទិស្សតិ។] បញ្ចកង្គោ ថបតិ អាយស្មន្តំ ឧទាយឹ ឯតទវោច កតិ នុ ខោ ភន្តេ ឧទាយិ វេទនា វុត្តា ភគវតាតិ។ តិស្សោ ខោ គហបតិ វេទនា វុត្តា ភគវតា សុខា វេទនា ទុក្ខា វេទនា អទុក្ខមសុខា វេទនា ឥមា ខោ គហបតិ តិស្សោ វេទនា វុត្តា ភគវតាតិ។ ន ខោ ភន្តេ ឧទាយិ តិស្សោ វេទនា វុត្តា ភគវតា ទ្វេ វេទនា វុត្តា ភគវតា សុខា វេទនា ទុក្ខា វេទនា យាយំ ភន្តេ អទុក្ខមសុខា វេទនា សន្តស្មឹ ឯសា បណីតេ សុខេ វុត្តា ភគវតាតិ។ ទុតិយម្បិ ខោ អាយស្មា ឧទាយី បញ្ចកង្គំ ថបតឹ ឯតទវោច ន ខោ គហបតិ ទ្វេ វេទនា វុត្តា ភគវតា តិស្សោ វេទនា វុត្តា ភគវតា សុខា វេទនា ទុក្ខា វេទនា អទុក្ខមសុខា វេទនា ឥមា ខោ គហបតិ តិស្សោ វេទនា វុត្តា ភគវតាតិ។ ទុតិយម្បិ ខោ បញ្ចកង្គោ ថបតិ អាយស្មន្តំ ឧទាយឹ ឯតទវោច ន ខោ ភន្តេ ឧទាយិ តិស្សោ វេទនា វុត្តា ភគវតា ទ្វេ វេទនា វុត្តា ភគវតា សុខា វេទនា ទុក្ខា វេទនា យាយំ ភន្តេ អទុក្ខមសុខា វេទនា សន្តស្មឹ ឯសា បណីតេ សុខេ វុត្តា ភគវតាតិ។ តតិយម្បិ ខោ អាយស្មា ឧទាយី បញ្ចកង្គំ ថបតឹ ឯតទវោច ន ខោ គហបតិ ទ្វេ វេទនា វុត្តា ភគវតា តិស្សោ វេទនា វុត្តា ភគវតា សុខា វេទនា ទុក្ខា វេទនា អទុក្ខមសុខា វេទនា ឥមា ខោ គហបតិ តិស្សោ វេទនា វុត្តា ភគវតាតិ។ តតិយម្បិ ខោ បញ្ចកង្គោ ថបតិ អាយស្មន្តំ ឧទាយឹ ឯតទវោច ន ខោ ភន្តេ ឧទាយិ តិស្សោ វេទនា វុត្តា ភគវតា ទ្វេ វេទនា វុត្តា ភគវតា សុខា វេទនា ទុក្ខា វេទនា យាយំ ភន្តេ អទុក្ខមសុខា វេទនា សន្តស្មឹ ឯសា បណីតេ សុខេ វុត្តា ភគវតាតិ។ នេវ ខោ អសក្ខិ អាយស្មា ឧទាយី បញ្ចកង្គំ ថបតឹ សញ្ញាបេតុំ ន បនាសក្ខិ បញ្ចកង្គោ ថបតិ អាយស្មន្តំ ឧទាយឹ សញ្ញាបេតុំ។

[៩៩] អស្សោសិ ខោ អាយស្មា អានន្ទោ អាយស្មតោ ឧទាយិស្ស បញ្ចកង្គេន ថបតិនា សទ្ធឹ ឥមំ កថាសល្លាបំ។ អថខោ អាយស្មា អានន្ទោ យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ អាយស្មា អានន្ទោ យាវតកោ អហោសិ អាយស្មតោ ឧទាយិស្ស បញ្ចកង្គេន ថបតិនា សទ្ធឹ កថាសល្លាបោ តំ សព្វំ ភគវតោ អារោចេសិ។ ឯវំ វុត្តេ ភគវា អាយស្មន្តំ អានន្ទំ ឯតទវោច សន្តញ្ញេវ [ឱ. សន្តំយេវ។] ខោ អានន្ទ បរិយាយំ បញ្ចកង្គោ ថបតិ ឧទាយិស្ស នាព្ភិនុមោទិ [ឱ.ម. នាព្ភនុមោទិ។] សន្តញ្ញេវ ច បន បរិយាយំ ឧទាយី បញ្ចកង្គស្ស ថបតិស្ស នាព្ភិនុមោទិ ទ្វេបានន្ទ វេទនា វុត្តា មយា បរិយាយេន តិស្សោបិ វេទនា វុត្តា មយា បរិយាយេន ចតស្សោបិ វេទនា វុត្តា មយា បរិយាយេន បញ្ចបិ វេទនា វុត្តា មយា បរិយាយេន ឆបិ វេទនា វុត្តា មយា បរិយាយេន អដ្ឋារសបិ វេទនា វុត្តា មយា បរិយាយេន ឆត្តឹសាបិ វេទនា វុត្តា មយា បរិយាយេន អដ្ឋសតម្បិ [ឱ. អដ្ឋសតំ។] វេទនា វុត្តា មយា បរិយាយេន ឯវំ បរិយាយទេសិតោ ខោ អានន្ទ មយា ធម្មោ ឯវំ បរិយាយទេសិតេ ខោ អានន្ទ មយា ធម្មេ យេ អញ្ញមញ្ញស្ស សុភាសិតំ សុលបិតំ ន សមនុជានិស្សន្តិ ន សមនុមញ្ញិស្សន្តិ ន សមនុមោទិស្សន្តិ តេសមេតំ បាដិកង្ខំ ភណ្ឌនជាតា កលហជាតា វិវាទាបន្នា អញ្ញមញ្ញំ មុខសត្តីហិ វិតុទន្តា វិហរិស្សន្តីតិ [ឱ.ម. ឥតិសទ្ទោ ន ទិស្សតិ។] ឯវំ បរិយាយទេសិតោ ខោ អានន្ទ មយា ធម្មោ ឯវំ បរិយាយទេសិតេ ខោ អានន្ទ មយា ធម្មេ យេ អញ្ញមញ្ញស្ស សុភាសិតំ សុលបិតំ សមនុជានិស្សន្តិ សមនុមញ្ញិស្សន្តិ សមនុមោទិស្សន្តិ តេសមេតំ បាដិកង្ខំ សមគ្គា សម្មោទមានា អវិវទមានា ខីរោទកីភូតា អញ្ញមញ្ញំ បិយចក្ខូហិ សម្បស្សន្តា វិហរិស្សន្តិ។

[១០០] បញ្ច ខោ ឥមេ អានន្ទ កាមគុណា កតមេ បញ្ច ចក្ខុវិញ្ញេយ្យា រូបា ឥដ្ឋា កន្តា មនាបា បិយរូបា កាមូបសញ្ហិតា រជនីយា សោតវិញ្ញេយ្យា សទ្ទា… ឃានវិញ្ញេយ្យា គន្ធា… ជីវ្ហាវិញ្ញេយ្យា រសា… កាយវិញ្ញេយ្យា ផោដ្ឋព្វា ឥដ្ឋា កន្តា មនាបា បិយរូបា កាមូបសញ្ហិតា រជនីយា ឥមេ ខោ អានន្ទ បញ្ច កាមគុណា។ យំ ខោ អានន្ទ ឥមេ បញ្ច កាមគុណេ បដិច្ច ឧប្បជ្ជតិ សុខំ សោមនស្សំ ឥទំ វុច្ចតិ កាមសុខំ។

[១០១] យោ ខោ អានន្ទ ឯវំ វទេយ្យ ឯតបរមំ សត្តា សុខំ សោមនស្សំ បដិសំវេទេន្តីតិ ឥទមស្ស នានុជានាមិ តំ កិស្ស ហេតុ អត្ថានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច។ កតមញ្ចានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច ឥធានន្ទ ភិក្ខុ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ ឥទំ ខោ អានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច។ យោ ខោ អានន្ទ ឯវំ វទេយ្យ ឯតបរមំ សត្តា សុខំ សោមនស្សំ បដិសំវេទេន្តីតិ ឥទមស្ស នានុជានាមិ តំ កិស្ស ហេតុ អត្ថានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច។ កតមញ្ចានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច ឥធានន្ទ ភិក្ខុ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវំ អវិតក្កំ អវិចារំ សមាធិជំ បីតិសុខំ ទុតិយំ ឈានំ។បេ។ តតិយំ ឈានំ… ចតុត្ថំ ឈានំ ឧបសម្បជ្ជ វិហរតិ ឥទំ ខោ អានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច។ កតមញ្ចានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច ឥធានន្ទ ភិក្ខុ សព្វសោ រូបសញ្ញានំ សមតិក្កមា បដិឃសញ្ញានំ អត្ថង្គមា នានត្តសញ្ញានំ អមនសិការា អនន្តោ អាកាសោតិ អាកាសានញ្ចាយតនំ ឧបសម្បជ្ជ វិហរតិ ឥទំ ខោ អានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច។ កតមញ្ចានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច ឥធានន្ទ ភិក្ខុ សព្វសោ អាកាសានញ្ចាយតនំ សមតិក្កម្ម អនន្តំ វិញ្ញាណន្តិ វិញ្ញាណញ្ចាយតនំ ឧបសម្បជ្ជ វិហរតិ ឥទំ ខោ អានន្ទ ឯតម្ហា សុខា។បេ។ កតមញ្ចានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច ឥធានន្ទ ភិក្ខុ សព្វសោ វិញ្ញាណញ្ចាយតនំ សមតិក្កម្ម នត្ថិ កិញ្ចីតិ អាកិញ្ចញ្ញាយតនំ ឧបសម្បជ្ជ វិហរតិ ឥទំ ខោ អានន្ទ ឯតម្ហា សុខា។បេ។ កតមញ្ចានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច ឥធានន្ទ ភិក្ខុ សព្វសោ អាកិញ្ចញ្ញាយតនំ សមតិក្កម្ម នេវសញ្ញានាសញ្ញាយតនំ ឧបសម្បជ្ជ វិហរតិ ឥទំ ខោ អានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច។

[១០២] យោ ខោ អានន្ទ ឯវំ វទេយ្យ ឯតបរមំ សត្តា សុខំ សោមនស្សំ បដិសំវេទេន្តីតិ ឥទមស្ស នានុជានាមិ តំ កិស្ស ហេតុ អត្ថានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច។ កតមញ្ចានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច ឥធានន្ទ ភិក្ខុ សព្វសោ នេវសញ្ញានាសញ្ញាយតនំ សមតិក្កម្ម សញ្ញាវេទយិតនិរោធំ ឧបសម្បជ្ជ វិហរតិ ឥទំ ខោ អានន្ទ ឯតម្ហា សុខា អញ្ញំ សុខំ អភិក្កន្តតរញ្ច បណីតតរញ្ច។ ឋានំ ខោ បនេតំ អានន្ទ វិជ្ជតិ យំ អញ្ញតិត្ថិយា បរិព្វាជកា ឯវំ វទេយ្យុំ សញ្ញាវេទយិតនិរោធំ សមណោ គោតមោ អាហ តញ្ច សុខស្មឹ បញ្ញបេតិ តយិទំ កឹសុ តយិទំ កថំសូតិ ឯវំវាទិនោ អានន្ទ អញ្ញតិត្ថិយា បរិព្វាជកា ឯវមស្សុ វចនីយា ន ខោ អាវុសោ ភគវា សុខំយេវ វេទនំ សន្ធាយ សុខស្មឹ បញ្ញបេតិ អបិចាវុសោ យត្ថ យត្ថ សុខំ ឧបលព្ភតិ យហឹ យហឹ តំ តំ តថាគតោ សុខស្មឹ បញ្ញបេតីតិ។ ឥទមវោច ភគវា អត្តមនោ អាយស្មា អានន្ទោ ភគវតោ ភាសិតំ អភិនន្ទីតិ។

ពហុវេទនីយសុត្តំ នវមំ និដ្ឋិតំ។

ទសមំ អបណ្ណកសុត្តំ

[១០៣] ឯវម្មេ សុតំ។ ឯកំ សមយំ ភគវា កោសលេសុ ចារិកញ្ចរមានោ មហតា ភិក្ខុសង្ឃេន សទ្ធឹ យេន សាលា នាម កោសលានំ ព្រាហ្មណគ្គាមោ តទវសរិ។ អស្សោសុំ ខោ សាលេយ្យកា ព្រាហ្មណគហបតិកា សមណោ ខលុ ភោ គោតមោ សក្យបុត្តោ សក្យកុលា បព្វជិតោ កោសលេសុ ចារិកញ្ចរមានោ មហតា ភិក្ខុសង្ឃេន សទ្ធឹ សាលំ អនុប្បត្តោ។ តំ ខោ បន ភវន្តំ គោតមំ ឯវំ កល្យាណោ កិត្តិសទ្ទោ អព្ភុគ្គតោ ឥតិបិ សោ ភគវា អរហំ សម្មាសម្ពុទ្ធោ វិជ្ជាចរណសម្បន្នោ សុគតោ លោកវិទូ អនុត្តរោ បុរិសទម្មសារថិ សត្ថា ទេវមនុស្សានំ ពុទ្ធោ ភគវា សោ ឥមំ លោកំ សទេវកំ សមារកំ សព្រហ្មកំ សស្សមណព្រាហ្មណឹ បជំ សទេវមនុស្សំ សយំ អភិញ្ញា សច្ឆិកត្វា បវេទេតិ សោ ធម្មំ ទេសេតិ អាទិកល្យាណំ មជ្ឈេកល្យាណំ បរិយោសានកល្យាណំ សាត្ថំ សព្យញ្ជនំ កេវលបរិបុណ្ណំ បរិសុទ្ធំ ព្រហ្មចរិយំ បកាសេតិ សាធុ ខោ បន តថារូបានំ អរហតំ ទស្សនំ ហោតីតិ។ អថខោ សាលេយ្យកា ព្រាហ្មណគហបតិកា យេន ភគវា តេនុបសង្កមឹសុ ឧបសង្កមិត្វា អប្បេកច្ចេ ភគវន្តំ អភិវាទេត្វា ឯកមន្តំ និសីទឹសុ អប្បេកច្ចេ ភគវតា សទ្ធឹ សម្មោទឹសុ សម្មោទនីយំ កថំ សារាណីយំ វីតិសារេត្វា ឯកមន្តំ និសីទឹសុ អប្បេកច្ចេ យេន ភគវា តេនញ្ជលិម្បណាមេត្វា ឯកមន្តំ និសីទឹសុ អប្បេកច្ចេ ភគវតោ សន្តិកេ នាមគោត្តំ សាវេត្វា ឯកមន្តំ និសីទឹសុ អប្បេកច្ចេ តុណ្ហីភូតា ឯកមន្តំ និសីទឹសុ។

[១០៤] ឯកមន្តំ និសិន្នេ ខោ សាលេយ្យកេ ព្រាហ្មណគហបតិកេ ភគវា ឯតទវោច អត្ថិ បន វោ គហបតយោ កោចិ មនាបោ សត្ថា យស្មឹ វោ អាការវតី សទ្ធា បដិលទ្ធាតិ។ នត្ថិ ខោ នោ ភន្តេ កោចិ មនាបោ សត្ថា យស្មឹ នោ អាការវតី សទ្ធា បដិលទ្ធាតិ។ មនាបំ វោ គហបតយោ សត្ថារំ អលភន្តេហិ អយំ អបណ្ណកោ ធម្មោ សមាទាយ វត្តិតព្វោ អបណ្ណកោ ហិ គហបតយោ ធម្មោ សមត្តោ សមាទិន្នោ សោ វោ ភវិស្សតិ ទីឃរត្តំ ហិតាយ សុខាយ។ កតមោ ច គហបតយោ អបណ្ណកោ ធម្មោ។

[១០៥] សន្តិ គហបតយោ ឯកេ សមណព្រាហ្មណា ឯវំវាទិនោ ឯវំទិដ្ឋិនោ នត្ថិ ទិន្នំ នត្ថិ យិដ្ឋំ នត្ថិ ហុតំ នត្ថិ សុកដទុក្កដានំ កម្មានំ ផលំ វិបាកោ នត្ថិ អយំ លោកោ នត្ថិ បរោ លោកោ នត្ថិ មាតា នត្ថិ បិតា នត្ថិ សត្តា ឱបបាតិកា នត្ថិ លោកេ សមណព្រាហ្មណា សម្មគ្គតា សម្មាបដិបន្នា យេ ឥមញ្ច លោកំ បរញ្ច លោកំ សយំ អភិញ្ញា សច្ឆិកត្វា បវេទេន្តីតិ តេសញ្ញេវ [ឱ. តេសំយេវ។] ខោ គហបតយោ សមណព្រាហ្មណានំ ឯកេ សមណព្រាហ្មណា ឧជុវិបច្ចនីកវាទា តេ ឯវមាហំសុ អត្ថិ ទិន្នំ អត្ថិ យិដ្ឋំ អត្ថិ ហុតំ អត្ថិ សុកដទុក្កដានំ កម្មានំ ផលំ វិបាកោ អត្ថិ អយំ លោកោ អត្ថិ បរោ លោកោ អត្ថិ មាតា អត្ថិ បិតា អត្ថិ សត្តា ឱបបាតិកា អត្ថិ លោកេ សមណព្រាហ្មណា សម្មគ្គតា សម្មាបដិបន្នា យេ ឥមញ្ច លោកំ បរញ្ច លោកំ សយំ អភិញ្ញា សច្ឆិកត្វា បវេទេន្តីតិ។ តំ កឹ មញ្ញថ គហបតយោ ននុមេ សមណព្រាហ្មណា អញ្ញមញ្ញំ ឧជុវិបច្ចនីកវាទាតិ។ ឯវំ ភន្តេ។

[១០៦] តត្រ គហបតយោ យេ តេ សមណព្រាហ្មណា ឯវំវាទិនោ ឯវំទិដ្ឋិនោ នត្ថិ ទិន្នំ នត្ថិ យិដ្ឋំ នត្ថិ ហុតំ។បេ។ យេ ឥមញ្ច លោកំ បរញ្ច លោកំ សយំ អភិញ្ញា សច្ឆិកត្វា បវេទេន្តីតិ តេសមេតំ បាដិកង្ខំ យមិទំ កាយសុចរិតំ វចីសុចរិតំ មនោសុចរិតំ ឥមេ តយោ កុសលេ ធម្មេ អភិនិព្វជ្ជេត្វា យមិទំ កាយទុច្ចរិតំ វចីទុច្ចរិតំ មនោទុច្ចរិតំ ឥមេ តយោ អកុសលេ ធម្មេ សមាទាយ វត្តិស្សន្តិ តំ កិស្ស ហេតុ ន ហិ តេ ភោន្តោ សមណព្រាហ្មណា បស្សន្តិ អកុសលានំ ធម្មានំ អាទីនវំ ឱការំ សង្កិលេសំ កុសលានំ ធម្មានំ នេក្ខម្មេ អានិសំសំ វោទានបក្ខំ។ សន្តំយេវ ខោ [ម. ខោសទ្ទោ នត្ថិ។] បន បរំ លោកំ នត្ថិ បរោ លោកោតិស្ស ទិដ្ឋិ ហោតិ សាស្ស ហោតិ មិច្ឆាទិដ្ឋិ។ សន្តំយេវ ខោ បន បរំ លោកំ នត្ថិ បរោ លោកោតិ សង្កប្បេតិ ស្វាស្ស ហោតិ មិច្ឆាសង្កប្បោ។ សន្តំយេវ ខោ បន បរំ លោកំ នត្ថិ បរោ លោកោតិ វាចំ ភាសតិ សាស្ស ហោតិ មិច្ឆាវាចា។ សន្តំយេវ ខោ បន បរំ លោកំ នត្ថិ បរោ លោកោតិ អាហ យេ តេ អរហន្តោ បរលោកវិទុនោ តេសមយំ បច្ចនីកំ ករោតិ។ សន្តំយេវ ខោ បន បរំ លោកំ នត្ថិ បរោ លោកោតិ បរំ សញ្ញបេតិ សាស្ស ហោតិ អសទ្ធម្មសញ្ញត្តិ [អដ្ឋកថាយម្បន អសទ្ធម្មប្បញ្ញត្តីតិ ទិស្សតិ។] តាយ ច បន អសទ្ធម្មសញ្ញត្តិយា អត្តានុក្កំសេតិ បរំ វម្ភេតិ។ ឥតិ បុព្វេវ ខោ បនស្ស សុសីល្យ បហីនំ ហោតិ ទុស្សីល្យំ បច្ចុបដ្ឋិតំ អយញ្ច មិច្ឆាទិដ្ឋិ មិច្ឆាសង្កប្បោ មិច្ឆាវាចា អរិយានំ បច្ចនីកតា អសទ្ធម្មសញ្ញត្តិ អត្តុក្កំសនា បរវម្ភនា។ ឯវំសិមេ អនេកេ បាបកា អកុសលា ធម្មា សម្ភវន្តិ មិច្ឆាទិដ្ឋិប្បច្ចយា។

[១០៧] តត្រ គហបតយោ វិញ្ញូ បុរិសោ ឥតិ បដិសញ្ចិក្ខតិ សចេ ខោ នត្ថិ បរោ លោកោ ឯវមយំ ភវំ បុរិសបុគ្គលោ កាយស្ស ភេទា បរម្មរណា [បរម្មរណាតិ ន ទិស្សតិ។] សោត្ថិមត្តានំ ករិស្សតិ សចេ ខោ អត្ថិ បរោ លោកោ ឯវមយំ ភវំ បុរិសបុគ្គលោ កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជិស្សតិ។ កាមំ ខោ បន មាហុ បរោ លោកោ ហោតុ នេសំ ភវតំ សមណព្រាហ្មណានំ សច្ចំ វចនំ អថ ច បនាយំ ភវំ បុរិសបុគ្គលោ ទិដ្ឋេវ ធម្មេ វិញ្ញូនំ គារយ្ហោ ទុស្សីលោ បុរិសបុគ្គលោ មិច្ឆាទិដ្ឋី នត្ថិកវាទោតិ។ សចេ ខោ អត្ថេវ បរោ លោកោ ឯវំ ឥមស្ស ភោតោ បុរិសបុគ្គលស្ស ឧភយត្ថ កលិគ្គហោ យញ្ច ទិដ្ឋេវ ធម្មេ វិញ្ញូនំ គារយ្ហោ យញ្ច កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជិស្សតិ។ ឯវមស្សាយំ អបណ្ណកោ ធម្មោ ទុស្សមត្តោ ទុស្សមាទិន្នោ ឯកំសំ ផរិត្វា តិដ្ឋតិ រិញ្ចតិ កុសលដ្ឋានំ [ឱ.ម. កុសលំ ឋានន្តិ ទិស្សតិ។]។

[១០៨] តត្រ គហបតយោ យេ តេ សមណព្រាហ្មណា ឯវំវាទិនោ ឯវំទិដ្ឋិនោ អត្ថិ ទិន្នំ។បេ។ យេ ឥមញ្ច លោកំ បរញ្ច លោកំ សយំ អភិញ្ញា សច្ឆិកត្វា បវេទេន្តីតិ តេសមេតំ បាដិកង្ខំ យមិទំ កាយទុច្ចរិតំ វចីទុច្ចរិតំ មនោទុច្ចរិតំ ឥមេ តយោ អកុសលេ ធម្មេ អភិនិព្វជ្ជេត្វា យមិទំ កាយសុចរិតំ វចីសុចរិតំ មនោសុចរិតំ ឥមេ តយោ កុសលេ ធម្មេ សមាទាយ វត្តិស្សន្តិ តំ កិស្ស ហេតុ បស្សន្តិ ហិ តេ ភោន្តោ សមណព្រាហ្មណា អកុសលានំ ធម្មានំ អាទីនវំ ឱការំ សង្កិលេសំ កុសលានំ ធម្មានំ នេក្ខម្មេ អានិសំសំ វោទានបក្ខំ។ សន្តំយេវ ខោ បន បរំ លោកំ អត្ថិ បរោ លោកោតិស្ស ទិដ្ឋិ ហោតិ សាស្ស ហោតិ សម្មាទិដ្ឋិ។ សន្តំយេវ ខោ បន បរំ លោកំ អត្ថិ បរោ លោកោតិ សង្កប្បេតិ ស្វាស្ស ហោតិ សម្មាសង្កប្បោ។ សន្តំយេវ ខោ បន បរំ លោកំ អត្ថិ បរោ លោកោតិ វាចំ ភាសតិ សាស្ស ហោតិ សម្មាវាចា។ សន្តំយេវ ខោ បន បរំ លោកំ អត្ថិ បរោ លោកោតិ អាហ យេ តេ អរហន្តោ បរលោកវិទុនោ តេសមយំ ន បច្ចនីកំ ករោតិ។ សន្តំយេវ ខោ បន បរំ លោកំ អត្ថិ បរោ លោកោតិ បរំ សញ្ញបេតិ សាស្ស ហោតិ សទ្ធម្មសញ្ញត្តិ តាយ ច បន សទ្ធម្មសញ្ញត្តិយា នេវត្តានុក្កំសេតិ ន បរំ វម្ភេតិ។ ឥតិ បុព្វេវ ខោ បនស្ស ទុស្សីល្យំ បហីនំ ហោតិ សុសីល្យំ បច្ចុបដ្ឋិតំ អយញ្ច សម្មាទិដ្ឋិ សម្មាសង្កប្បោ សម្មាវាចា អរិយានំ អប្បច្ចនីកតា សទ្ធម្មសញ្ញត្តិ អនត្តុក្កំសនា អបរវម្ភនា។ ឯវំសិមេ អនេកេ កុសលា ធម្មា សម្ភវន្តិ សម្មាទិដ្ឋិប្បច្ចយា។

[១០៩] តត្រ គហបតយោ វិញ្ញូ បុរិសោ ឥតិ បដិសញ្ចិក្ខតិ សចេ ខោ អត្ថិ បរោ លោកោ ឯវមយំ ភវំ បុរិសបុគ្គលោ កាយស្ស ភេទា បរម្មរណា សុគតឹ សគ្គំ លោកំ ឧបបជ្ជិស្សតិ។ កាមំ ខោ បន មាហុ បរោ លោកោ ហោតុ នេសំ ភវតំ សមណព្រាហ្មណានំ សច្ចំ វចនំ អថ ច បនាយំ ភវំ បុរិសបុគ្គលោ ទិដ្ឋេវ ធម្មេ វិញ្ញូនំ បាសំសោ សីលវា បុរិសបុគ្គលោ សម្មាទិដ្ឋិ អត្ថិកវាទោតិ។ សចេ ខោ អត្ថេវ បរោ លោកោ ឯវំ ឥមស្ស ភោតោ បុរិសបុគ្គលស្ស ឧភយត្ថ កដគ្គាហោ យញ្ច ទិដ្ឋេវ ធម្មេ វិញ្ញូនំ បាសំសោ យញ្ច កាយស្ស ភេទា បរម្មរណា សុគតឹ សគ្គំ លោកំ ឧបបជ្ជិស្សតិ។ ឯវមស្សាយំ អបណ្ណកោ ធម្មោ សុសមត្តោ សមាទិន្នោ ឧភយំសំ ផរិត្វា តិដ្ឋតិ រិញ្ចតិ អកុសលដ្ឋានំ [ឱ.ម. អកុសលំ ឋានន្តិ ទិស្សតិ។]។

[១១០] សន្តិ គហបតយោ ឯកេ សមណព្រាហ្មណា ឯវំវាទិនោ ឯវំទិដ្ឋិនោ ករតោ ការយតោ ឆិន្ទតោ ឆេទាបយតោ បចតោ បចាបយតោ [ឱ.ម. បាចយតោ។] សោចតោ សោចាបយតោ កិលមតោ កិលមាបយតោ [ឱ. សោចយតោ កិលមយតោតិ ទិស្សតិ។] ផន្ទតោ ផន្ទាបយតោ បាណមតិបាតាបយតោ [ឱ. បាណមតិមាបយតោ។] អទិន្នំ អាទិយតោ សន្ធឹ ឆិន្ទតោ និល្លោបំ ហរតោ ឯកាគារិកំ ករោតោ បរិបន្ថេ តិដ្ឋតោ បរទារំ គច្ឆតោ មុសា ភណតោ ករោតោ [ឱ. ករតោ។] ន ករីយតិ បាបំ ខុរបរិយន្តេន ចេបិ ចក្កេន យោ ឥមិស្សា បឋវិយា បាណេ ឯកមំសខលំ ឯកមំសបុញ្ជំ ករេយ្យ នត្ថិ តតោនិទានំ បាបំ នត្ថិ បាបស្ស អាគមោ ទក្ខិណំ ចេបិ [ឱ. ទក្ខិណញ្ចេបិ។] គង្គាយ តីរំ គច្ឆេយ្យ ហនន្តោ ឃាតេន្តោ ឆិន្ទន្តោ ឆេទាបេន្តោ បចន្តោ បាចេន្តោ នត្ថិ តតោនិទានំ បាបំ នត្ថិ បាបស្ស អាគមោ ឧត្តរំ ចេបិ [ឱ. ឧត្តរញ្ចេបិ។] គង្គាយ តីរំ គច្ឆេយ្យ ទទន្តោ ទាបេន្តោ យជន្តោ យជាបេន្តោ [ឱ. យាជេន្តោ។] នត្ថិ តតោនិទានំ បុញ្ញំ នត្ថិ បុញ្ញស្ស អាគមោ ទានេន ទមេន សញ្ញមេន សច្ចវជ្ជេន នត្ថិ បុញ្ញំ នត្ថិ បុញ្ញស្ស អាគមោតិ។ តេសំយេវ ខោ គហបតយោ សមណព្រាហ្មណានំ ឯកេ សមណព្រាហ្មណា ឧជុវិបច្ចនីកវាទា តេ ឯវមាហំសុ ករតោ ការយតោ ឆិន្ទតោ ឆេទាបយតោ បចតោ បចាបយតោ សោចតោ សោចាបយតោ កិលមតោ កិលមាបយតោ ផន្ទតោ ផន្ទាបយតោ បាណមតិបាតាបយតោ អទិន្នំ អាទិយតោ សន្ធឹ ឆិន្ទតោ និល្លោបំ ហរតោ ឯកាគារិកំ ករោតោ បរិបន្ថេ តិដ្ឋតោ បរទារំ គច្ឆតោ មុសា ភណតោ ករោតោ [ឱ. ករតោ។] ករីយតិ បាបំ ខុរបរិយន្តេន ចេបិ ចក្កេន យោ ឥមិស្សា បឋវិយា បាណេ ឯកមំសខលំ ឯកមំសបុញ្ជំ ករេយ្យ អត្ថិ តតោនិទានំ បាបំ អត្ថិ បាបស្ស អាគមោ ទក្ខិណំ ចេបិ គង្គាយ តីរំ គច្ឆេយ្យ ហនន្តោ ឃាតេន្តោ ឆិន្ទន្តោ ឆេទាបេន្តោ បចន្តោ បាចេន្តោ អត្ថិ តតោនិទានំ បាបំ អត្ថិ បាបស្ស អាគមោ ឧត្តរំ ចេបិ គង្គាយ តីរំ គច្ឆេយ្យ ទទន្តោ ទាបេន្តោ យជន្តោ យជាបេន្តោ អត្ថិ តតោនិទានំ បុញ្ញំ អត្ថិ បុញ្ញស្ស អាគមោ ទានេន ទមេន សញ្ញមេន សច្ចវជ្ជេន អត្ថិ បុញ្ញំ អត្ថិ បុញ្ញស្ស អាគមោតិ។ តំ កឹ មញ្ញថ គហបតយោ ននុមេ សមណព្រាហ្មណា អញ្ញមញ្ញស្ស ឧជុវិបច្ចនីកវាទាតិ។ ឯវំ ភន្តេ។

[១១១] តត្រ គហបតយោ យេ តេ សមណព្រាហ្មណា ឯវំវាទិនោ ឯវំទិដ្ឋិនោ ករតោ ការយតោ ឆិន្ទតោ ឆេទាបយតោ បចតោ បចាបយតោ សោចតោ សោចាបយតោ កិលមតោ កិលមាបយតោ ផន្ទតោ ផន្ទាបយតោ បាណមតិបាតាបយតោ អទិន្នំ អាទិយតោ សន្ធឹ ឆិន្ទតោ និល្លោបំ ហរតោ ឯកាគារិកំ ករោតោ បរិបន្ថេ តិដ្ឋតោ បរទារំ គច្ឆតោ មុសា ភណតោ ករោតោ ន ករីយតិ បាបំ ខុរបរិយន្តេន ចេបិ ចក្កេន យោ ឥមិស្សា បឋវិយា បាណេ ឯកមំសខលំ ឯកមំសបុញ្ជំ ករេយ្យ នត្ថិ តតោនិទានំ បាបំ នត្ថិ បាបស្ស អាគមោ ទក្ខិណំ ចេបិ គង្គាយ តីរំ គច្ឆេយ្យ ហនន្តោ ឃាតេន្តោ។បេ។ ទានេន ទមេន សញ្ញមេន សច្ចវជ្ជេន នត្ថិ បុញ្ញំ នត្ថិ បុញ្ញស្ស អាគមោតិ។ តេសមេតំ បាដិកង្ខំ យមិទំ កាយសុចរិតំ វចីសុចរិតំ មនោសុចរិតំ ឥមេ តយោ កុសលេ ធម្មេ អភិនិព្វជ្ជេត្វា យមិទំ កាយទុច្ចរិតំ វចីទុច្ចរិតំ មនោទុច្ចរិតំ ឥមេ តយោ អកុសលេ ធម្មេ សមាទាយ វត្តិស្សន្តិ តំ កិស្ស ហេតុ ន ហិ តេ ភោន្តោ សមណព្រាហ្មណា បស្សន្តិ អកុសលានំ ធម្មានំ អាទីនវំ ឱការំ សង្កិលេសំ កុសលានំ ធម្មានំ នេក្ខម្មេ អានិសំសំ វោទានបក្ខំ។ សន្តំយេវ ខោ បន កិរិយំ នត្ថិ កិរិយាតិស្ស ទិដ្ឋិ ហោតិ សាស្ស ហោតិ មិច្ឆាទិដ្ឋិ។ សន្តំយេវ ខោ បន កិរិយំ នត្ថិ កិរិយាតិ សង្កប្បេតិ ស្វាស្ស ហោតិ មិច្ឆាសង្កប្បោ។ សន្តំយេវ ខោ បន កិរិយំ នត្ថិ កិរិយាតិ វាចំ ភាសតិ សាស្ស ហោតិ មិច្ឆាវាចា។ សន្តំយេវ ខោ បន កិរិយំ នត្ថិ កិរិយាតិ អាហ យេ តេ អរហន្តោ កិរិយវាទា តេសមយំ បច្ចនីកំ ករោតិ។ សន្តំយេវ ខោ បន កិរិយំ នត្ថិ កិរិយាតិ បរំ សញ្ញបេតិ សាស្ស ហោតិ អសទ្ធម្មសញ្ញត្តិ តាយ ច បន អសទ្ធម្មសញ្ញត្តិយា អត្តានុក្កំសេតិ បរំ វម្ភេតិ។ ឥតិ បុព្វេវ ខោ បនស្ស សុសីល្យំ បហីនំ ហោតិ ទុស្សីល្យំ បច្ចុបដ្ឋិតំ អយញ្ច មិច្ឆាទិដ្ឋិ មិច្ឆាសង្កប្បោ មិច្ឆាវាចា អរិយានំ បច្ចនីកតា អសទ្ធម្មសញ្ញត្តិ អត្តុក្កំសនា បរវម្ភនា។ ឯវំសិមេ អនេកេ បាបកា អកុសលា ធម្មា សម្ភវន្តិ មិច្ឆាទិដ្ឋិប្បច្ចយា។

[១១២] តត្រ គហបតយោ វិញ្ញូ បុរិសោ ឥតិ បដិសញ្ចិក្ខតិ សចេ ខោ នត្ថិ កិរិយា ឯវមយំ ភវំ បុរិសបុគ្គលោ កាយស្ស ភេទា បរម្មរណា [ឱ.ម. បរម្មរណាតិ ន ទិស្សតិ។] សោត្ថិមត្តានំ ករិស្សតិ។ សចេ ខោ អត្ថិ កិរិយា ឯវមយំ ភវំ បុរិសបុគ្គលោ កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជិស្សតិ។ កាមំ ខោ បន មាហុ កិរិយា ហោតុ នេសំ ភវតំ សមណព្រាហ្មណានំ សច្ចំ វចនំ អថ ច បនាយំ ភវំ បុរិសបុគ្គលោ ទិដ្ឋេវ ធម្មេ វិញ្ញូនំ គារយ្ហោ ទុស្សីលោ បុរិសបុគ្គលោ មិច្ឆាទិដ្ឋី អកិរិយវាទោតិ។ សចេ ខោ អត្ថេវ កិរិយា ឯវំ ឥមស្ស ភោតោ បុរិសបុគ្គលស្ស ឧភយត្ថ កលិគ្គាហោ យញ្ច ទិដ្ឋេវ ធម្មេ វិញ្ញូនំ គារយ្ហោ យញ្ច កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជិស្សតីតិ [ឱ.ម. ឥតិសទ្ទោ ន ទិស្សតិ។]។ ឯវមស្សាយំ អបណ្ណកោ ធម្មោ ទុស្សមត្តោ ទុស្សមាទិន្នោ ឯកំសំ ផរិត្វា តិដ្ឋតិ រិញ្ចតិ កុសលដ្ឋានំ។

[១១៣] តត្រ គហបតយោ យេ តេ សមណព្រាហ្មណា ឯវំវាទិនោ ឯវំទិដ្ឋិនោ ករតោ ការយតោ ឆិន្ទតោ ឆេទាបយតោ បចតោ បចាបយតោ សោចតោ សោចាបយតោ កិលមតោ កិលមាបយតោ ផន្ទតោ ផន្ទាបយតោ បាណមតិបាតាបយតោ អទិន្នំ អាទិយតោ សន្ធឹ ឆិន្ទតោ និល្លោបំ ហរតោ ឯកាគារិកំ ករោតោ បរិបន្ថេ តិដ្ឋតោ បរទារំ គច្ឆតោ មុសា ភណតោ ករតោ ករីយតិ បាបំ ខុរបរិយន្តេន ចេបិ ចក្កេន យោ ឥមិស្សា បឋវិយា បាណេ ឯកមំសខលំ ឯកមំសបុញ្ជំ ករេយ្យ អត្ថិ តតោនិទានំ បាបំ អត្ថិ បាបស្ស អាគមោ ទក្ខិណញ្ចេបិ គង្គាយ តីរំ គច្ឆេយ្យ ហនន្តោ ឃាតេន្តោ ឆិន្ទន្តោ ឆេទាបេន្តោ បចន្តោ បាចេន្តោ អត្ថិ តតោនិទានំ បាបំ អត្ថិ បាបស្ស អាគមោ ឧត្តរញ្ចេបិ គង្គាយ តីរំ គច្ឆេយ្យ ទទន្តោ ទាបេន្តោ យជន្តោ យជាបេន្តោ អត្ថិ តតោនិទានំ បុញ្ញំ អត្ថិ បុញ្ញស្ស អាគមោ ទានេន ទមេន សញ្ញមេន សច្ចវជ្ជេន អត្ថិ បុញ្ញំ អត្ថិ បុញ្ញស្ស អាគមោតិ។ តេសមេតំ បាដិកង្ខំ យមិទំ កាយទុច្ចរិតំ វចីទុច្ចរិតំ មនោទុច្ចរិតំ ឥមេ តយោ អកុសលេ ធម្មេ អភិនិព្វជ្ជេត្វា យមិទំ កាយសុចរិតំ វចីសុចរិតំ មនោសុចរិតំ ឥមេ តយោ កុសលេ ធម្មេ សមាទាយ វត្តិស្សន្តីតិ [ឱ.ម. ឥតិសទ្ទោ ន ទិស្សតិ។] តំ កិស្ស ហេតុ បស្សន្តិ ហិ តេ ភោន្តោ សមណព្រាហ្មណា អកុសលានំ ធម្មានំ អាទីនវំ ឱការំ សង្កិលេសំ កុសលានំ ធម្មានំ នេក្ខម្មេ អានិសំសំ វោទានបក្ខំ។ សន្តំយេវ ខោ បន កិរិយំ អត្ថិ កិរិយាតិស្ស ទិដ្ឋិ ហោតិ សាស្ស ហោតិ សម្មាទិដ្ឋិ។ សន្តំយេវ ខោ បន កិរិយំ អត្ថិ កិរិយាតិ សង្កប្បេតិ ស្វាស្ស ហោតិ សម្មាសង្កប្បោ។ សន្តំយេវ ខោ បន កិរិយំ អត្ថិ កិរិយាតិ វាចំ ភាសតិ សាស្ស ហោតិ សម្មាវាចា។ សន្តំយេវ ខោ បន កិរិយំ អត្ថិ កិរិយាតិ អាហយេ តេ អរហន្តោ កិរិយវាទា តេសមយំ ន បច្ចនីកំ ករោតិ។ សន្តំយេវ ខោ បន កិរិយំ អត្ថិ កិរិយាតិ បរំ សញ្ញបេតិ សាស្ស ហោតិ សទ្ធម្មសញ្ញត្តិ តាយ ច បន សទ្ធម្មសញ្ញត្តិយា នេវត្តានុក្កំសេតិ ន បរំ វម្ភេតិ។ ឥតិ បុព្វេវ ខោ បនស្ស ទុស្សីល្យំ បហីនំ ហោតិ សុសីល្យំ បច្ចុបដ្ឋិតំ អយញ្ច សម្មាទិដ្ឋិ សម្មាសង្កប្បោ សម្មាវាចា អរិយានំ អបច្ចនីកតា សទ្ធម្មសញ្ញត្តិ អនត្តុក្កំសនា អបរវម្ភនា។ ឯវំសិមេ អនេកេ កុសលា ធម្មា សម្ភវន្តិ សម្មាទិដ្ឋិប្បច្ចយា។

[១១៤] តត្រ គហបតយោ វិញ្ញូ បុរិសោ ឥតិ បដិសញ្ចិក្ខតិ សចេ ខោ អត្ថិ កិរិយា ឯវមយំ ភវំ បុរិសបុគ្គលោ កាយស្ស ភេទា បរម្មរណា សុគតឹ សគ្គំ លោកំ ឧបបជ្ជិស្សតិ។ កាមំ ខោ បន មាហុ កិរិយា ហោតុ នេសំ ភវតំ សមណព្រាហ្មណានំ សច្ចំ វចនំ អថ ច បនាយំ ភវំ បុរិសបុគ្គលោ ទិដ្ឋេវ ធម្មេ វិញ្ញូនំ បាសំសោ សីលវា បុរិសបុគ្គលោ សម្មាទិដ្ឋី កិរិយវាទោតិ។ សចេ ខោ អត្ថេវ កិរិយា ឯវំ ឥមស្ស ភោតោ បុរិសបុគ្គលស្ស ឧភយត្ថ កដគ្គាហោ យញ្ច ទិដ្ឋេវ ធម្មេ វិញ្ញូនំ បាសំសោ យញ្ច កាយស្ស ភេទា បរម្មរណា សុគតឹ សគ្គំ លោកំ ឧបបជ្ជិស្សតិ។ ឯវមស្សាយំ អបណ្ណកោ ធម្មោ សុសមត្តោ សមាទិន្នោ ឧភយំសំ ផរិត្វា តិដ្ឋតិ រិញ្ចតិ អកុសលដ្ឋានំ។

[១១៥] សន្តិ គហបតយោ ឯកេ សមណព្រាហ្មណា ឯវំវាទិនោ ឯវំទិដ្ឋិនោ នត្ថិ ហេតុ នត្ថិ បច្ចយោ សត្តានំ សង្កិលេសាយ អហេតូ អប្បច្ចយា សត្តា សង្កិលិស្សន្តិ នត្ថិ ហេតុ នត្ថិ បច្ចយោ សត្តានំ វិសុទ្ធិយា អហេតូ អប្បច្ចយា សត្តា វិសុជ្ឈន្តិ នត្ថិ ពលំ នត្ថិ វីរិយំ នត្ថិ បុរិសត្ថាមោ នត្ថិ បុរិសបរក្កមោ សព្វេ សត្តា សព្វេ បាណា សព្វេ ភូតា សព្វេ ជីវា អវសា អពលា អវីរិយា និយតិសង្គតិភាវបរិណតា [ម. និយតិសង្គតិសភាវបរិណតា។] ឆស្វេវាភិជាតីសុ [ឱ. ឆស្សេវាភិជាតីសុ។] សុខទុក្ខំ បដិសំវេទេន្តីតិ តេសំយេវ ខោ គហបតយោ សមណព្រាហ្មណានំ ឯកេ សមណព្រាហ្មណា ឧជុវិបច្ចនីកវាទា តេ ឯវមាហំសុ អត្ថិ ហេតុ អត្ថិ បច្ចយោ សត្តានំ សង្កិលេសាយ សហេតូ សប្បច្ចយា សត្តា សង្កិលិស្សន្តិ អត្ថិ ហេតុ អត្ថិ បច្ចយោ សត្តានំ វិសុទ្ធិយា សហេតូ សប្បច្ចយា សត្តា វិសុជ្ឈន្តិ អត្ថិ ពលំ អត្ថិ វីរិយំ អត្ថិ បុរិសថាមោ អត្ថិ បុរិសបរក្កមោ [ឱ. ឥធ នាតិ ទិស្សតិ។] សព្វេ សត្តា សព្វេ បាណា សព្វេ ភូតា សព្វេ ជីវា សវសា សពលា សវីរិយា [ឱ. អវសា អពលា អវីរិយា។] និយតិសង្គតិភាវបរិណតា ឆស្វេវាភិជាតីសុ សុខទុក្ខំ បដិសំវេទេន្តីតិ។ តំ កឹ មញ្ញថ គហបតយោ ននុមេ សមណព្រាហ្មណា អញ្ញមញ្ញំ ឧជុវិបច្ចនីកវាទាតិ។ ឯវំ ភន្តេ។

[១១៦] តត្រ គហបតយោ យេ តេ សមណព្រាហ្មណា ឯវំវាទិនោ ឯវំទិដ្ឋិនោ នត្ថិ ហេតុ នត្ថិ បច្ចយោ សត្តានំ សង្កិលេសាយ អហេតូ អប្បច្ចយា សត្តា សង្កិលិស្សន្តិ នត្ថិ ហេតុ នត្ថិ បច្ចយោ សត្តានំ វិសុទ្ធិយា អហេតូ អប្បច្ចយា សត្តា វិសុជ្ឈន្តិ នត្ថិ ពលំ នត្ថិ វីរិយំ នត្ថិ បុរិសថាមោ នត្ថិ បុរិសបរក្កមោ សព្វេ សត្តា សព្វេ បាណា សព្វេ ភូតា សព្វេ ជីវា អវសា អពលា អវីរិយា និយតិសង្គតិភាវបរិណតា ឆស្វេវាភិជាតីសុ សុខទុក្ខំ បដិសំវេទេន្តីតិ តេសមេតំ បាដិកង្ខំ យមិទំ កាយសុចរិតំ វចីសុចរិតំ មនោសុចរិតំ ឥមេ តយោ កុសលេ ធម្មេ អភិនិព្វជ្ជេត្វា យមិទំ កាយទុច្ចរិតំ វចីទុច្ចរិតំ មនោទុច្ចរិតំ ឥមេ តយោ អកុសលេ ធម្មេ សមាទាយ វត្តិស្សន្តិ តំ កិស្ស ហេតុ ន ហិ តេ ភោន្តោ សមណព្រាហ្មណា បស្សន្តិ អកុសលានំ ធម្មានំ អាទីនវំ ឱការំ សង្កិលេសំ កុសលានំ ធម្មានំ នេក្ខម្មេ អានិសំសំ វោទានបក្ខំ។ សន្តំយេវ ខោ បន ហេតុំ នត្ថិ ហេតូតិស្ស ទិដ្ឋិ ហោតិ សាស្ស ហោតិ មិច្ឆាទិដ្ឋិ។ សន្តំយេវ ខោ បន ហេតុំ នត្ថិ ហេតូតិ សង្កប្បេតិ ស្វាស្ស ហោតិ មិច្ឆាសង្កប្បោ។ សន្តំយេវ ខោ បន ហេតុំ នត្ថិ ហេតូតិ វាចំ ភាសតិ សាស្ស ហោតិ មិច្ឆាវាចា។ សន្តំយេវ ខោ បន ហេតុំ នត្ថិ ហេតូតិ អាហ យេ តេ អរហន្តោ ហេតុវាទា តេសមយំ បច្ចនីកំ ករោតិ។ សន្តំយេវ ខោ បន ហេតុំ នត្ថិ ហេតូតិ បរំ សញ្ញបេតិ សាស្ស ហោតិ អសទ្ធម្មសញ្ញត្តិ តាយ ច បន អសទ្ធម្មសញ្ញត្តិយា អត្តានុក្កំសេតិ បរំ វម្ភេតិ។ ឥតិ បុព្វេវ ខោ បនស្ស សុសីល្យំ បហីនំ ហោតិ ទុស្សីល្យំ បច្ចុបដ្ឋិតំ អយញ្ច មិច្ឆាទិដ្ឋិ មិច្ឆាសង្កប្បោ មិច្ឆាវាចា អរិយានំ បច្ចនីកតា អសទ្ធម្មសញ្ញត្តិ អត្តានុក្កំសនា បរវម្ភនា។ ឯវំសិមេ អនេកេ បាបកា អកុសលា ធម្មា សម្ភវន្តិ មិច្ឆាទិដ្ឋិប្បច្ចយា។

[១១៧] តត្រ គហបតយោ វិញ្ញូ បុរិសោ ឥតិ បដិសញ្ចិក្ខតិ សចេ ខោ នត្ថិ ហេតុ ឯវមយំ ភវំ បុរិសបុគ្គលោ កាយស្ស ភេទា បរម្មរណា សោត្ថិមត្តានំ ករិស្សតិ។ សចេ ខោ អត្ថិ ហេតុ ឯវមយំ ភវំ បុរិសបុគ្គលោ កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជិស្សតិ។ កាមំ ខោ បន មាហុ ហេតុ ហោតុ នេសំ ភវតំ សមណព្រាហ្មណានំ សច្ចំ វចនំ អថ ច បនាយំ ភវំ បុរិសបុគ្គលោ ទិដ្ឋេវ ធម្មេ វិញ្ញូនំ គារយ្ហោ ទុស្សីលោ បុរិសបុគ្គលោ មិច្ឆាទិដ្ឋី អហេតុកវាទោតិ។ សចេ ខោ អត្ថេវ ហេតុ ឯវំ ឥមស្ស ភោតោ បុរិសបុគ្គលស្ស ឧភយត្ថ កលិគ្គាហោ យញ្ច ទិដ្ឋេវ ធម្មេ វិញ្ញូនំ គារយ្ហោ យញ្ច កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជិស្សតិ។ ឯវមស្សាយំ អបណ្ណកោ ធម្មោ ទុស្សមត្តោ សមាទិន្នោ ឯកំសំ ផរិត្វា តិដ្ឋតិ រិញ្ចតិ កុសលដ្ឋានំ។

[១១៨] តត្រ គហបតយោ យេ តេ សមណព្រាហ្មណា ឯវំវាទិនោ ឯវំទិដ្ឋិនោ អត្ថិ ហេតុ អត្ថិ បច្ចយោ សត្តានំ សង្កិលេសាយ សហេតូ សប្បច្ចយា សត្តា សង្កិលិស្សន្តិ អត្ថិ ហេតុ អត្ថិ បច្ចយោ សត្តានំ វិសុទ្ធិយា សហេតូ សប្បច្ចយា សត្តា វិសុជ្ឈន្តិ អត្ថិ ពលំ អត្ថិ វីរិយំ អត្ថិ បុរិសថាមោ អត្ថិ បុរិសបរក្កមោ សព្វេ សត្តា សព្វេ បាណា សព្វេ ភូតា សព្វេ ជីវា សវសា សពលា សវីរិយា និយតិសង្គតិភាវបរិណតា ឆស្វេវាភិជាតីសុ សុខទុក្ខំ បដិសំវេទេន្តីតិ តេសមេតំ បាដិកង្ខំ យមិទំ កាយទុច្ចរិតំ វចីទុច្ចរិតំ មនោទុច្ចរិតំ ឥមេ តយោ អកុសលេ ធម្មេ អភិនិព្វជ្ជេត្វា យមិទំ កាយសុចរិតំ វចីសុចរិតំ មនោសុចរិតំ ឥមេ តយោ កុសលេ ធម្មេ សមាទាយ វត្តិស្សន្តិ តំ កិស្ស ហេតុ បស្សន្តិ ហិ តេ ភោន្តោ សមណព្រាហ្មណា អកុសលានំ ធម្មានំ អាទីនវំ ឱការំ សង្កិលេសំ កុសលានំ ធម្មានំ នេក្ខម្មេ អានិសំសំ វោទានបក្ខំ។ សន្តំយេវ ខោ បន ហេតុំ អត្ថិ ហេតូតិស្ស ទិដ្ឋិ ហោតិ សាស្ស ហោតិ សម្មាទិដ្ឋិ។ សន្តំយេវ ខោ បន ហេតុំ អត្ថិ ហេតូតិ សង្កប្បេតិ ស្វាស្ស ហោតិ សម្មាសង្កប្បោ។ សន្តំយេវ ខោ បន ហេតុំ អត្ថិ ហេតូតិ វាចំ ភាសតិ សាស្ស ហោតិ សម្មាវាចា។ សន្តំយេវ ខោ បន ហេតុំ អត្ថិ ហេតូតិ អាហ យេ តេ អរហន្តោ ហេតុវាទា តេសមយំ ន បច្ចនីកំ ករោតិ។ សន្តំយេវ ខោ បន ហេតុំ អត្ថិ ហេតូតិ បរំ សញ្ញបេតិ សាស្ស ហោតិ សទ្ធម្មសញ្ញត្តិ តាយ ច បន សទ្ធម្មសញ្ញត្តិយា នេវត្តានុក្កំសេតិ ន បរំ វម្ភេតិ។ ឥតិ បុព្វេវ ខោ បនស្ស ទុស្សីល្យំ បហីនំ ហោតិ សុសីល្យំ បច្ចុបដ្ឋិតំ អយញ្ច សម្មាទិដ្ឋិ សម្មាសង្កប្បោ សម្មាវាចា អរិយានំ អបច្ចនីកតា សទ្ធម្មសញ្ញត្តិ អនត្តុក្កំសនា អបរវម្ភនា។ ឯវំសិមេ អនេកេ កុសលា ធម្មា សម្ភវន្តិ សម្មាទិដ្ឋិប្បច្ចយា។

[១១៩] តត្រ គហបតយោ វិញ្ញូ បុរិសោ ឥតិ បដិសញ្ចិក្ខតិ សចេ ខោ អត្ថិ ហេតុ ឯវមយំ ភវំ បុរិសបុគ្គលោ កាយស្ស ភេទា បរម្មរណា សុគតឹ សគ្គំ លោកំ ឧបបជ្ជិស្សតិ។ កាមំ ខោ បន មាហុ ហេតុ ហោតុ នេសំ ភវតំ សមណព្រាហ្មណានំ សច្ចំ វចនំ អថ ច បនាយំ ភវំ បុរិសបុគ្គលោ ទិដ្ឋេវ ធម្មេ វិញ្ញូនំ បាសំសោ សីលវា បុរិសបុគ្គលោ សម្មាទិដ្ឋី ហេតុវាទោតិ។ សចេ ខោ អត្ថេវ ហេតុ ឯវំ ឥមស្ស ភោតោ បុរិសបុគ្គលស្ស ឧភយត្ថ កដគ្គាហោ យញ្ច ទិដ្ឋេវ ធម្មេ វិញ្ញូនំ បាសំសោ យញ្ច កាយស្ស ភេទា បរម្មរណា សុគតឹ សគ្គំ លោកំ ឧបបជ្ជិស្សតិ។ ឯវមស្សាយំ អបណ្ណកោ ធម្មោ សុសមត្តោ សមាទិន្នោ ឧភយំសំ ផរិត្វា តិដ្ឋតិ រិញ្ចតិ អកុសលដ្ឋានំ។

[១២០] សន្តិ គហបតយោ ឯកេ សមណព្រាហ្មណា ឯវំវាទិនោ ឯវំទិដ្ឋិនោ នត្ថិ សព្វសោ អារុប្បាតិ តេសំយេវ ខោ គហបតយោ សមណព្រាហ្មណានំ ឯកេ សមណព្រាហ្មណា ឧជុវិបច្ចនីកវាទា តេ ឯវមាហំសុ អត្ថិ សព្វសោ អារុប្បាតិ។ តំ កឹ មញ្ញថ គហបតយោ ននុមេ សមណព្រាហ្មណា អញ្ញមញ្ញស្ស ឧជុវិបច្ចនីកវាទាតិ។ ឯវំ ភន្តេ។ តត្រ គហបតយោ វិញ្ញូ បុរិសោ ឥតិ បដិសញ្ចិក្ខតិ យេ ខោ [ម. យេ ច ខោ។] តេ ភោន្តោ សមណព្រាហ្មណា ឯវំវាទិនោ ឯវំទិដ្ឋិនោ នត្ថិ សព្វសោ អារុប្បាតិ ឥទំ មេ អទិដ្ឋំ យេបិ តេ ភោន្តោ សមណព្រាហ្មណា ឯវំវាទិនោ ឯវំទិដ្ឋិនោ អត្ថិ សព្វសោ អារុប្បាតិ ឥទំ មេ អវិទិតំ អហញ្ចេវ ខោ បន អជានន្តោ អបស្សន្តោ ឯកំសេន អាទាយ វោហរេយ្យំ ឥទមេវ សច្ចំ មោឃមញ្ញន្តិ ន មេតំ អស្ស បដិរូបំ យេ ខោ តេ ភោន្តោ សមណព្រាហ្មណា ឯវំវាទិនោ ឯវំទិដ្ឋិនោ នត្ថិ សព្វសោ អារុប្បាតិ សចេ ខោ តេសំ ភវតំ សមណព្រាហ្មណានំ សច្ចំ វចនំ ឋានមេតំ វិជ្ជតិ យេ តេ ទេវា រូបិនោ មនោមយា អបណ្ណកំ មេ តត្រូបបត្តិ ភវិស្សតិ យេ បន តេ ភោន្តោ សមណព្រាហ្មណា ឯវំវាទិនោ ឯវំទិដ្ឋិនោ អត្ថិ សព្វសោ អារុប្បាតិ សចេ តេសំ ភវតំ សមណព្រាហ្មណានំ សច្ចំ វចនំ ឋានមេតំ វិជ្ជតិ យេ តេ ទេវា អរូបិនោ សញ្ញាមយា អបណ្ណកំ មេ តត្រូបបត្តិ ភវិស្សតិ ទិស្សន្តិ ខោ បន រូបាធិករណំ ទណ្ឌាទានសត្ថាទានកលហវិគ្គហវិវាទតុវំតុវបេសុញ្ញមុសាវាទា នត្ថិ ខោ បនេតំ សព្វសោ អារុប្បេតិ។ សោ ឥតិ បដិសង្ខាយ រូបានំយេវ និព្វិទាយ វិរាគាយ និរោធាយ បដិបន្នោ ហោតិ។

[១២១] សន្តិ គហបតយោ ឯកេ សមណព្រាហ្មណា ឯវំវាទិនោ ឯវំទិដ្ឋិនោ នត្ថិ សព្វសោ ភវនិរោធោតិ។ តេសំយេវ ខោ គហបតយោ សមណព្រាហ្មណានំ ឯកេ សមណព្រាហ្មណា ឧជុវិបច្ចនីកវាទា តេ ឯវមាហំសុ អត្ថិ សព្វសោ ភវនិរោធោតិ។ តំ កឹ មញ្ញថ គហបតយោ ននុមេ សមណព្រាហ្មណា អញ្ញមញ្ញស្ស ឧជុវិបច្ចនីកវាទាតិ។ ឯវំ ភន្តេ។ តត្រ គហបតយោ វិញ្ញូ បុរិសោ ឥតិ បដិសញ្ចិក្ខតិ យេ ខោ តេ ភោន្តោ សមណព្រាហ្មណា ឯវំវាទិនោ ឯវំទិដ្ឋិនោ នត្ថិ សព្វសោ ភវនិរោធោតិ ឥទំ មេ អទិដ្ឋំ យេបិ តេ ភោន្តោ សមណព្រាហ្មណា ឯវំវាទិនោ ឯវំទិដ្ឋិនោ អត្ថិ សព្វសោ ភវនិរោធោតិ ឥទំ មេ អវិទិតំ អហញ្ចេវ ខោ បន អជានន្តោ អបស្សន្តោ ឯកំសេន អាទាយ វោហរេយ្យំ ឥទមេវ សច្ចំ មោឃមញ្ញន្តិ ន មេតំ អស្ស បដិរូបំ យេ ខោ តេ ភោន្តោ សមណព្រាហ្មណា ឯវំវាទិនោ ឯវំទិដ្ឋិនោ នត្ថិ សព្វសោ ភវនិរោធោតិ សចេ តេសំ ភវតំ សមណព្រាហ្មណានំ សច្ចំ វចនំ ឋានមេតំ វិជ្ជតិ យេ តេ ទេវា អរូបិនោ សញ្ញាមយា អបណ្ណកំ មេ តត្រូបបត្តិ ភវិស្សតិ យេ បន តេ ភោន្តោ សមណព្រាហ្មណា ឯវំវាទិនោ ឯវំទិដ្ឋិនោ អត្ថិ សព្វសោ ភវនិរោធោតិ សចេ តេសំ ភវតំ សមណព្រាហ្មណានំ សច្ចំ វចនំ ឋានមេតំ វិជ្ជតិ យំ ទិដ្ឋេវ ធម្មេ បរិនិព្វាយិស្សាមិ។ យេ ខោ តេ ភោន្តោ សមណព្រាហ្មណា ឯវំវាទិនោ ឯវំទិដ្ឋិនោ នត្ថិ សព្វសោ ភវនិរោធោតិ តេសមយំ ទិដ្ឋិ សរាគាយ សន្តិកេ សំយោគាយ សន្តិកេ អភិនន្ទនាយ សន្តិកេ អជ្ឈោសានាយ សន្តិកេ ឧបាទានាយ សន្តិកេ យេ បន តេ ភោន្តោ សមណព្រាហ្មណា ឯវំវាទិនោ ឯវំទិដ្ឋិនោ អត្ថិ សព្វសោ ភវនិរោធោតិ តេសមយំ ទិដ្ឋិ អសារាគាយ សន្តិកេ អសំយោគាយ សន្តិកេ អនភិនន្ទនាយ សន្តិកេ អនជ្ឈោសានាយ សន្តិកេ អនុបាទានាយ សន្តិកេតិ។ សោ ឥតិ បដិសង្ខាយ ភវានំយេវ និព្វិទាយ វិរាគាយ និរោធាយ បដិបន្នោ ហោតិ។

[១២២] ចត្តារោមេ គហបតយោ បុគ្គលា សន្តោ សំវិជ្ជមានា លោកស្មឹ កតមេ ចត្តារោ ឥធ គហបតយោ ឯកច្ចោ បុគ្គលោ អត្តន្តបោ ហោតិ អត្តបរិតាបនានុយោគមនុយុត្តោ ឥធ គហបតយោ ឯកច្ចោ បុគ្គលោ បរន្តបោ ហោតិ បរបរិតាបនានុយោគមនុយុត្តោ ឥធ គហបតយោ ឯកច្ចោ បុគ្គលោ អត្តន្តបោ ច ហោតិ អត្តបរិតាបនានុយោគមនុយុត្តោ បរន្តបោ ច បរបរិតាបនានុយោគមនុយុត្តោ ឥធ គហបតយោ ឯកច្ចោ បុគ្គលោ នេវត្តន្តបោ ច ហោតិ នាត្តបរិតាបនានុយោគមនុយុត្តោ ន បរន្តបោ បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតីភូតោ សុខប្បដិសំវេទី ព្រហ្មភូតេន អត្តនា វិហរតិ។

[១២៣] កតមោ ច គហបតយោ បុគ្គលោ អត្តន្តបោ អត្តបរិតាបនានុយោគមនុយុត្តោ។ ឥធ គហបតយោ ឯកច្ចោ បុគ្គលោ អចេលកោ ហោតិ មុត្តាចារោ ហត្ថាវលេខនោ [ឱ.ម. ហត្ថាបលេខនោ។]។ យថា កន្ទរកសុត្តំ [ឱ. កន្ទរកសុត្តន្តំ។ ម. កន្ទរកសុត្តន្តេ។] តថា វិត្ថារោ។ ឥតិ ឯវរូបំ អនេកវិហិតំ កាយស្ស អាតាបនបរិតាបនានុយោគមនុយុត្តោ វិហរតិ អយំ វុច្ចតិ គហបតយោ បុគ្គលោ អត្តន្តបោ អត្តបរិតាបនានុយោគមនុយុត្តោ។ កតមោ ច គហបតយោ បុគ្គលោ បរន្តបោ បរបរិតាបនានុយោគមនុយុត្តោ។ ឥធ គហបតយោ បុគ្គលោ ឱរព្ភិកោ ហោតិ សូករិកោ ហោតិ។បេ។ យេ វា បនញ្ញេបិ កេចិ កុរូរកម្មន្តា អយំ វុច្ចតិ គហបតយោ បុគ្គលោ បរន្តបោ បរបរិតាបនានុយោគមនុយុត្តោ។ កតមោ ច គហបតយោ បុគ្គលោ អត្តន្តបោ ច អត្តបរិតាបនានុយោគមនុយុត្តោ បរន្តបោ ច បរបរិតាបនានុយោគមនុយុត្តោ។ ឥធ គហបតយោ ឯកច្ចោ បុគ្គលោ រាជា វា ហោតិ ខត្តិយោ មុទ្ធាវសិត្តោ។បេ។ តេបិ ទណ្ឌតជ្ជិតា ភយតជ្ជិតា អស្សុមុខា រោទមានា បរិកម្មានិ ករោន្តិ អយំ វុច្ចតិ គហបតយោ បុគ្គលោ អត្តន្តបោ ច អត្តបរិតាបនានុយោគមនុយុត្តោ បរន្តបោ ច បរបរិតាបនានុយោគមនុយុត្តោ។ កតមោ ច គហបតយោ បុគ្គលោ នេវត្តន្តបោ ច នាត្តបរិតាបនានុយោគមនុយុត្តោ ន បរន្តបោ ច ន បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតីភូតោ សុខប្បដិសំវេទី ព្រហ្មភូតេន អត្តនា វិហរតិ។ ឥធ គហបតយោ តថាគតោ លោកេ ឧប្បជ្ជតិ អរហំ សម្មាសម្ពុទ្ធោ។បេ។ សោ ឥមេ បញ្ច នីវរណេ បហាយ ចេតសោ ឧបក្កិលេសេ បញ្ញាយ ទុព្វលីករណេ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវំ អវិតក្កំ អវិចារំ សមាធិជំ បីតិសុខំ ទុតិយំ ឈានំ ឧបសម្បជ្ជ វិហរតិ បីតិយា ច វិរាគា។បេ។ តតិយំ ឈានំ ឧបសម្បជ្ជ វិហរតិ សុខស្ស ច បហានា។បេ។ ចតុត្ថំ ឈានំ ឧបសម្បជ្ជ វិហរតិ។ សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ បុព្វេនិវាសានុស្សតិញ្ញាណាយ ចិត្តំ អភិនិន្នាមេតិ។ សោ អនេកវិហិតំ បុព្វេនិវាសំ អនុស្សរតិ សេយ្យថីទំ ឯកម្បិ ជាតឹ ទ្វេបិ ជាតិយោ។បេ។ ឥតិ សាការំ សឧទ្ទេសំ អនេកវិហិតំ បុព្វេនិវាសំ អនុស្សរតិ។ សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ សត្តានំ ចុតូបបាតញ្ញាណាយ ចិត្តំ អភិនិន្នាមេតិ។ សោ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សតិ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ។បេ។ យថាកម្មូបគេ សត្តេ បជានាតិ។ សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ អាសវានំ ខយញ្ញាណាយ ចិត្តំ អភិនិន្នាមេតិ។ សោ ឥទំ ទុក្ខន្តិ យថាភូតំ បជានាតិ។បេ។ អយំ អាសវនិរោធគាមិនី បដិបទាតិ យថាភូតំ បជានាតិ។ តស្ស ឯវំ ជានតោ ឯវំ បស្សតោ កាមាសវាបិ ចិត្តំ វិមុច្ចតិ ភវាសវាបិ ចិត្តំ វិមុច្ចតិ អវិជ្ជាសវាបិ ចិត្តំ វិមុច្ចតិ វិមុត្តស្មឹ វិមុត្តមិតិ ញាណំ ហោតិ ខីណា ជាតិ វុសិតំ ព្រហ្មចរិយំ កតំ ករណីយំ នាបរំ ឥត្ថត្តាយាតិ បជានាតិ អយំ វុច្ចតិ គហបតយោ បុគ្គលោ នេវត្តន្តបោ នាត្តបរិតាបនានុយោគមនុយុត្តោ ន បរន្តបោ ន បរបរិតាបនានុយោគមនុយុត្តោ សោ អនត្តន្តបោ អបរន្តបោ ទិដ្ឋេវ ធម្មេ និច្ឆាតោ និព្វុតោ សីតីភូតោ សុខប្បដិសំវេទី ព្រហ្មភូតេន អត្តនា វិហរតីតិ។

[១២៤] ឯវំ វុត្តេ សាលេយ្យកា ព្រាហ្មណគហបតិកា ភគវន្តំ ឯតទវោចុំ អភិក្កន្តំ ភោ គោតម អភិក្កន្តំ ភោ គោតម សេយ្យថាបិ ភោ គោតម និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ [ឱ. ឯវមេវំ។ ម. ឯវមេវ ខោ។] ភោតា គោតមេន អនេកបរិយាយេន ធម្មោ បកាសិតោ ឯតេ មយំ ភវន្តំ គោតមំ សរណំ គច្ឆាម ធម្មញ្ច ភិក្ខុសង្ឃញ្ច ឧបាសកេ នោ ភវំ គោតមោ ធារេតុ អជ្ជតគ្គេ បាណុបេតេ សរណង្គតេតិ។

អបណ្ណកសុត្តំ ទសមំ និដ្ឋិតំ។

គហបតិវគ្គោ បឋមោ។

តស្ស វគ្គស្ស ឧទ្ទានំ

កន្ទរនាគរសំវរោ បោតលិយោ បុន ជីវកភច្ចោ

ឧបាលិទមោ តថា កុក្កុរោ អភយោ

ពហុវេទនិយោបិ ច អបណ្ណកតាទសមោ

បឋមោ បវរោ វគ្គោ ច។

ភិក្ខុវគ្គោ

[ឆដ្ឋ. អម្ពលដ្ឋិករាហុលោវាទសុត្តំ]

បឋមំ ចូឡរាហុលោវាទសុត្តំ

[១២៥] ឯវម្មេ សុតំ។ ឯកំ សមយំ ភគវា រាជគហេ វិហរតិ វេឡុវនេ កលន្ទកនិវាបេ។ តេន ខោ បន សមយេន អាយស្មា រាហុលោ អម្ពលដ្ឋិកាយំ វិហរតិ។ អថខោ ភគវា សាយណ្ហសមយំ បដិសល្លានា វុដ្ឋិតោ យេន អម្ពលដ្ឋិកា យេនាយស្មា រាហុលោ តេនុបសង្កមិ។ អទ្ទសា ខោ អាយស្មា រាហុលោ ភគវន្តំ ទូរតោ វ អាគច្ឆន្តំ ទិស្វាន អាសនំ បញ្ញាបេសិ ឧទកញ្ច បាទានំ។ និសីទិ ភគវា បញ្ញត្តេ អាសនេ និសជ្ជ បាទេ បក្ខាលេសិ។ អាយស្មាបិ ខោ រាហុលោ ភគវន្តំ អភិវាទេត្វា ឯកមន្តំ និសីទិ។

[១២៦] អថខោ ភគវា បរិត្តំ ឧទកាវសេសំ ឧទកាធានេ ឋបេត្វា អាយស្មន្តំ រាហុលំ អាមន្តេសិ បស្សសិ នោ ត្វំ រាហុល ឥមំ បរិត្តំ ឧទកាវសេសំ ឧទកាធានេ ឋបិតន្តិ។ ឯវំ ភន្តេ។ ឯវំ បរិត្តំ ខោ រាហុល តេសំ សាមញ្ញំ យេសំ នត្ថិ សម្បជានមុសាវាទេ លជ្ជាតិ។ អថខោ ភគវា បរិត្តំ ឧទកាវសេសំ ឆឌ្ឌេត្វា អាយស្មន្តំ រាហុលំ អាមន្តេសិ បស្សសិ នោ ត្វំ រាហុល ឥមំ បរិត្តំ ឧទកាវសេសំ ឆឌ្ឌិតន្តិ។ ឯវំ ភន្តេ។ ឯវំ ឆឌ្ឌិតំ ខោ រាហុល តេសំ សាមញ្ញំ យេសំ នត្ថិ សម្បជានមុសាវាទេ លជ្ជាតិ។ អថខោ ភគវា តំ ឧទកាធានំ និក្កុជ្ជិត្វា អាយស្មន្តំ រាហុលំ អាមន្តេសិ បស្សសិ នោ ត្វំ រាហុល ឥមំ ឧទកាធានំ និក្កុជ្ជិតន្តិ។ ឯវំ ភន្តេ។ ឯវំ និក្កុជ្ជិតំ ខោ រាហុល តេសំ សាមញ្ញំ យេសំ នត្ថិ សម្បជានមុសាវាទេ លជ្ជាតិ។ អថខោ ភគវា តំ ឧទកាធានំ ឧក្កុជ្ជិត្វា អាយស្មន្តំ រាហុលំ អាមន្តេសិ បស្សសិ នោ ត្វំ រាហុល ឥមំ ឧទកាធានំ រិត្តំយេវ [ឱ.ម. រិត្តំ។] តុច្ឆន្តិ។ ឯវំ ភន្តេ។ ឯវំ រិត្តំ តុច្ឆំ ខោ រាហុល តេសំ សាមញ្ញំ យេសំ នត្ថិ សម្បជានមុសាវាទេ លជ្ជាតិ [ឱ. ឥតិសទ្ទោ ន ទិស្សតិ។]។

[១២៧] សេយ្យថាបិ រាហុល រញ្ញោ នាគោ ឦសាទន្តោ ឧរុឡ្ហវាភិជាតោ [ឱ. ឧព្ពូឡ្ហវាភិជាតោ។] សង្គាមាវចរោ សោ [ម. សោតិ នត្ថិ។] សង្គាមគតោ បុរិមេហិបិ បាទេហិ កម្មំ ករោតិ បច្ឆិមេហិបិ បាទេហិ កម្មំ ករោតិ បុរិមេនបិ កាយេន កម្មំ ករោតិ បច្ឆិមេនបិ កាយេន កម្មំ ករោតិ សីសេនបិ កម្មំ ករោតិ កណ្ណេហិបិ កម្មំ ករោតិ ទន្តេហិបិ កម្មំ ករោតិ នង្គុដ្ឋេនបិ កម្មំ ករោតិ រក្ខតេវ សោណ្ឌំ។ តត្ថ ហត្ថារោហស្ស ឯវំ ហោតិ អយំ ខោ រញ្ញោ នាគោ ឦសាទន្តោ ឧរុឡ្ហវាភិជាតោ សង្គាមាវចរោ សង្គាមគតោ បុរិមេហិបិ បាទេហិ កម្មំ ករោតិ បច្ឆិមេហិបិ បាទេហិ កម្មំ ករោតិ បុរិមេនបិ កាយេន កម្មំ ករោតិ បច្ឆិមេនបិ កាយេន កម្មំ ករោតិ សីសេនបិ កម្មំ ករោតិ កណ្ណេហិបិ កម្មំ ករោតិ ទន្តេហិបិ កម្មំ ករោតិ នង្គុដ្ឋេនបិ កម្មំ ករោតិ រក្ខតេវ សោណ្ឌំ អបរិច្ចត្តំ ខោ រញ្ញោ នាគស្ស ជីវិតន្តិ។ យតោ ខោ រាហុល រញ្ញោ នាគោ ឦសាទន្តោ ឧរុឡ្ហវាភិជាតោ សង្គាមាវចរោ សង្គាមគតោ បុរិមេហិបិ បាទេហិ កម្មំ ករោតិ បច្ឆិមេហិបិ បាទេហិ កម្មំ ករោតិ។បេ។ នង្គុដ្ឋេនបិ កម្មំ ករោតិ សោណ្ឌាយបិ កម្មំ ករោតិ។ តត្ថ ហត្ថារោហស្ស ឯវំ ហោតិ អយញ្ច ខោ រញ្ញោ នាគោ ឦសាទន្តោ ឧរុឡ្ហវាភិជាតោ សង្គាមាវចរោ សង្គាមគតោ បុរិមេហិបិ បាទេហិ កម្មំ ករោតិ បច្ឆិមេហិបិ បាទេហិ កម្មំ ករោតិ បុរិមេនបិ កាយេន កម្មំ ករោតិ បច្ឆិមេនបិ កាយេន កម្មំ ករោតិ សីសេនបិ កម្មំ ករោតិ កណ្ណេហិបិ កម្មំ ករោតិ ទន្តេហិបិ កម្មំ ករោតិ នង្គុដ្ឋេនបិ កម្មំ ករោតិ សោណ្ឌាយបិ កម្មំ ករោតិ បរិច្ចត្តំ ខោ រញ្ញោ នាគស្ស ជីវិតំ នត្ថិទានិ កិញ្ចិ រញ្ញោ នាគស្ស អករណីយន្តិ។ ឯវមេវ ខោ រាហុល យស្ស កស្សចិ សម្បជានមុសាវាទេ នត្ថិ លជ្ជា នាហំ តស្ស កិញ្ចិ បាបំ កម្មំ អករណីយន្តិ វទាមិ។ តស្មាតិហ តេ រាហុល ហស្សាបិ ន មុសា ភណិស្សាមីតិ ឯវញ្ហិ តេ រាហុល សិក្ខិតព្វំ។

[១២៨] តំ កឹ មញ្ញសិ រាហុល កិមត្ថិយោ អាទាសោតិ។ បច្ចវេក្ខណត្ថោ ភន្តេតិ។ ឯវមេវ ខោ រាហុល បច្ចវេក្ខិត្វា បច្ចវេក្ខិត្វា កាយេន កម្មំ កាតព្វំ [ឱ.ម. កត្តព្វំ។] បច្ចវេក្ខិត្វា បច្ចវេក្ខិត្វា វាចាយ កម្មំ កាតព្វំ [ឱ.ម. កត្តព្វំ។] បច្ចវេក្ខិត្វា បច្ចវេក្ខិត្វា មនសា កម្មំ កាតព្វំ [ឱ.ម. កត្តព្វំ។]។

[១២៩] យទេវ ត្វំ រាហុល កាយេន កម្មំ កត្តុកាមោ អហោសិ តទេវ តេ កាយកម្មំ បច្ចវេក្ខិតព្វំ យន្នុ ខោ អហំ ឥទំ កាយេន កម្មំ កត្តុកាមោ ឥទំ មេ កាយកម្មំ អត្តព្យាពាធាយបិ សំវត្តេយ្យ បរព្យាពាធាយបិ សំវត្តេយ្យ ឧភយព្យាពាធាយបិ សំវត្តេយ្យ អកុសលំ ឥទំ កាយកម្មំ ទុក្ខុទ្រយំ ទុក្ខវិបាកន្តិ។ សចេ ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ កាយេន កម្មំ កត្តុកាមោ ឥទំ មេ កាយកម្មំ អត្តព្យាពាធាយបិ សំវត្តេយ្យ បរព្យាពាធាយបិ សំវត្តេយ្យ ឧភយព្យាពាធាយបិ សំវត្តេយ្យ អកុសលំ ឥទំ កាយកម្មំ ទុក្ខុទ្រយំ ទុក្ខវិបាកន្តិ ឯវរូបំ តេ រាហុល កាយេន កម្មំ សសក្កំ [ម. សំសក្កំ។] ន ករណីយំ។ សចេ បន ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ កាយេន កម្មំ កត្តុកាមោ ឥទំ មេ កាយកម្មំ នេវត្តព្យាពាធាយបិ សំវត្តេយ្យ ន បរព្យាពាធាយបិ សំវត្តេយ្យ ន ឧភយព្យាពាធាយបិ សំវត្តេយ្យ កុសលំ ឥទំ កាយកម្មំ សុខុទ្រយំ សុខវិបាកន្តិ ឯវរូបំ តេ រាហុល កាយេន កម្មំ ករណីយំ។ ករោន្តេនបិ តេ រាហុល កាយេន កម្មំ តទេវ តេ កាយកម្មំ បច្ចវេក្ខិតព្វំ យន្នុ ខោ អហំ ឥទំ កាយេន កម្មំ ករោមិ ឥទំ មេ កាយកម្មំ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ អកុសលំ ឥទំ កាយកម្មំ ទុក្ខុទ្រយំ ទុក្ខវិបាកន្តិ។សចេ [ម. សចេ បន។] ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ កាយេន កម្មំ ករោមិ ឥទំ មេ កាយកម្មំ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ អកុសលំ ឥទំ កាយកម្មំ ទុក្ខុទ្រយំ ទុក្ខវិបាកន្តិ បដិសំហរេយ្យាសិ ត្វំ រាហុល ឯវរូបំ កាយកម្មំ។ សចេ បន ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ កាយេន កម្មំ ករោមិ ឥទំ មេ កាយកម្មំ នេវត្តព្យាពាធាយបិ សំវត្តតិ ន បរព្យាពាធាយបិ សំវត្តតិ ន ឧភយព្យាពាធាយបិ សំវត្តតិ កុសលំ ឥទំ កាយកម្មំ សុខុទ្រយំ សុខវិបាកន្តិ អនុបទជ្ជេយ្យាសិ [ម. អនុបរជ្ជេយ្យាសិ។] ត្វំ រាហុល ឯវរូបំ កាយកម្មំ។ កត្វាបិ តេ រាហុល កាយេន កម្មំ តទេវ តេ កាយកម្មំ បច្ចវេក្ខិតព្វំ យន្នុ ខោ អហំ ឥទំ កាយេន កម្មំ អកាសឹ ឥទំ មេ កាយកម្មំ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ អកុសលំ ឥទំ កាយេន កម្មំ ទុក្ខុទ្រយំ ទុក្ខវិបាកន្តិ។ សចេ [ម. សចេ ខោ។] ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ កាយកម្មំ អកាសឹ ឥទំ មេ កាយកម្មំ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ អកុសលំ ឥទំ កាយកម្មំ ទុក្ខុទ្រយំ ទុក្ខវិបាកន្តិ ឯវរូបំ តេ រាហុល កាយកម្មំ សត្ថរិ វា វិញ្ញូសុ វា សព្រហ្មចារីសុ ទេសេតព្វំ វិវរិតព្វំ ឧត្តានីកាតព្វំ ទេសេត្វា វិវរិត្វា ឧត្តានីកត្វា អាយតឹ សំវរំ អាបជ្ជិតព្វំ។ សចេ បន ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ កាយេន កម្មំ អកាសឹ ឥទំ មេ កាយកម្មំ នេវត្តព្យាពាធាយបិ សំវត្តតិ ន បរព្យាពាធាយបិ សំវត្តតិ ន ឧភយព្យាពាធាយបិ សំវត្តតិ កុសលំ ឥទំ កាយកម្មំ សុខុទ្រយំ សុខវិបាកន្តិ តេនេវ ត្វំ រាហុល បីតិប្បាមុជ្ជេន វិហរេយ្យាសិ អហោរត្តានុសិក្ខី កុសលេសុ ធម្មេសុ។

[១៣០] យទេវ ត្វំ រាហុល វាចាយ កម្មំ កត្តុកាមោ អហោសិ តទេវ តេ វចីកម្មំ បច្ចវេក្ខិតព្វំ យន្នុ ខោ អហំ ឥទំ វាចាយ កម្មំ កត្តុកាមោ ឥទំ មេ វចីកម្មំ អត្តព្យាពាធាយបិ សំវត្តេយ្យ បរព្យាពាធាយបិ សំវត្តេយ្យ ឧភយព្យាពាធាយបិ សំវត្តេយ្យ អកុសលំ ឥទំ វចីកម្មំ ទុក្ខុទ្រយំ ទុក្ខវិបាកន្តិ។ សចេ ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ វាចាយ កម្មំ កត្តុកាមោ ឥទំ មេ វចីកម្មំ អត្តព្យាពាធាយបិ សំវត្តេយ្យ បរព្យាពាធាយបិ សំវត្តេយ្យ ឧភយព្យាពាធាយបិ សំវត្តេយ្យ អកុសលំ ឥទំ វចីកម្មំ ទុក្ខុទ្រយំ ទុក្ខវិបាកន្តិ ឯវរូបំ តេ រាហុល វាចាយ កម្មំ សសក្កំ ន ករណីយំ។ សចេ បន ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ វាចាយ កម្មំ កត្តុកាមោ ឥទំ មេ វចីកម្មំ នេវត្តព្យាពាធាយបិ សំវត្តេយ្យ ន បរព្យាពាធាយបិ សំវត្តេយ្យ ន ឧភយព្យាពាធាយបិ សំវត្តេយ្យ កុសលំ ឥទំ វចីកម្មំ សុខុទ្រយំ សុខវិបាកន្តិ ឯវរូបំ តេ រាហុល វាចាយ កម្មំ ករណីយំ។ ករោន្តេនបិ តេ រាហុល វាចាយ កម្មំ តទេវ តេ វចីកម្មំ បច្ចវេក្ខិតព្វំ យន្នុ ខោ អហំ ឥទំ វាចាយ កម្មំ ករោមិ ឥទំ មេ វចីកម្មំ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ អកុសលំ ឥទំ វចីកម្មំ ទុក្ខុទ្រយំ ទុក្ខវិបាកន្តិ។ សចេ ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ វាចាយ កម្មំ ករោមិ ឥទំ មេ វចីកម្មំ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ អកុសលំ ឥទំ វចីកម្មំ ទុក្ខុទ្រយំ ទុក្ខវិបាកន្តិ បដិសំហរេយ្យាសិ ត្វំ រាហុល ឯវរូបំ វចីកម្មំ។ សចេ បន ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ វាចាយ កម្មំ ករោមិ ឥទំ មេ វចីកម្មំ នេវត្តព្យាពាធាយបិ សំវត្តតិ ន បរព្យាពាធាយបិ សំវត្តតិ ន ឧភយព្យាពាធាយបិ សំវត្តតិ កុសលំ ឥទំ វចីកម្មំ សុខុទ្រយំ សុខវិបាកន្តិ អនុបទជ្ជេយ្យាសិ ត្វំ រាហុល ឯវរូបំ វចីកម្មំ។ កត្វាបិ តេ រាហុល វាចាយ កម្មំ តទេវ តេ វចីកម្មំ បច្ចវេក្ខិតព្វំ យន្នុ ខោ អហំ ឥទំ វាចាយ កម្មំ អកាសឹ ឥទំ មេ វចីកម្មំ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ អកុសលំ ឥទំ វចីកម្មំ ទុក្ខុទ្រយំ ទុក្ខវិបាកន្តិ។ សចេ ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ វាចាយ កម្មំ អកាសឹ ឥទំ មេ វចីកម្មំ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ អកុសលំ ឥទំ វចីកម្មំ ទុក្ខុទ្រយំ ទុក្ខវិបាកន្តិ ឯវរូបំ តេ រាហុល វចីកម្មំ សត្ថរិ វា វិញ្ញូសុ វា សព្រហ្មចារីសុ ទេសេតព្វំ វិវរិតព្វំ ឧត្តានីកាតព្វំ ទេសេត្វា វិវរិត្វា ឧត្តានីកត្វា អាយតឹ សំវរំ អាបជ្ជិតព្វំ។ សចេ បន ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ វាចាយ កម្មំ អកាសឹ ឥទំ មេ វចីកម្មំ នេវត្តព្យាពាធាយបិ សំវត្តតិ ន បរព្យាពាធាយបិ សំវត្តតិ ន ឧភយព្យាពាធាយបិ សំវត្តតិ កុសលំ ឥទំ វចីកម្មំ សុខុទ្រយំ សុខវិបាកន្តិ តេនេវ ត្វំ រាហុល បីតិប្បាមុជ្ជេន វិហរេយ្យាសិ អហោរត្តានុសិក្ខី កុសលេសុ ធម្មេសុ។

[១៣១] យទេវ ត្វំ រាហុល មនសា កម្មំ កត្តុកាមោ អហោសិ តទេវ តេ មនោកម្មំ បច្ចវេក្ខិតព្វំ យន្នុ ខោ អហំ ឥទំ មនសា កម្មំ កត្តុកាមោ ឥទំ មេ មនោកម្មំ អត្តព្យាពាធាយបិ សំវត្តេយ្យ បរព្យាពាធាយបិ សំវត្តេយ្យ ឧភយព្យាពាធាយបិ សំវត្តេយ្យ អកុសលំ ឥទំ មនោកម្មំ ទុក្ខុទ្រយំ ទុក្ខវិបាកន្តិ។ សចេ ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ មនសា កម្មំ កត្តុកាមោ ឥទំ មេ មនោកម្មំ អត្តព្យាពាធាយបិ សំវត្តេយ្យ បរព្យាពាធាយបិ សំវត្តេយ្យ ឧភយព្យាពាធាយបិ សំវត្តេយ្យ អកុសលំ ឥទំ មនោកម្មំ ទុក្ខុទ្រយំ ទុក្ខវិបាកន្តិ ឯវរូបំ តេ រាហុល មនសា កម្មំ សសក្កំ ន ករណីយំ។ សចេ បន ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ មនសា កម្មំ កត្តុកាមោ ឥទំ មេ មនោកម្មំ នេវត្តព្យាពាធាយបិ សំវត្តេយ្យ ន បរព្យាពាធាយបិ សំវត្តេយ្យ ន ឧភយព្យាពាធាយបិ សំវត្តេយ្យ កុសលំ ឥទំ មនោកម្មំ សុខុទ្រយំ សុខវិបាកន្តិ ឯវរូបំ តេ រាហុល មនសា កម្មំ ករណីយំ។ ករោន្តេនបិ តេ រាហុល មនសា កម្មំ តទេវ តេ មនោកម្មំ បច្ចវេក្ខិតព្វំ យន្នុ ខោ អហំ ឥទំ មនសា កម្មំ ករោមិ ឥទំ មេ មនោកម្មំ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ អកុសលំ ឥទំ មនោកម្មំ ទុក្ខុទ្រយំ ទុក្ខវិបាកន្តិ។ សចេ ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ មនសា កម្មំ ករោមិ ឥទំ មេ មនោកម្មំ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ អកុសលំ ឥទំ មនោកម្មំ ទុក្ខុទ្រយំ ទុក្ខវិបាកន្តិ បដិសំហរេយ្យាសិ ត្វំ រាហុល ឯវរូបំ មនោកម្មំ។ សចេ បន ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ មនសា កម្មំ ករោមិ ឥទំ មេ មនោកម្មំ នេវត្តព្យាពាធាយបិ សំវត្តតិ ន បរព្យាពាធាយបិ សំវត្តតិ ន ឧភយព្យាពាធាយបិ សំវត្តតិ កុសលំ ឥទំ មនោកម្មំ សុខុទ្រយំ សុខវិបាកន្តិ អនុបទជ្ជេយ្យាសិ ត្វំ រាហុល ឯវរូបំ មនោកម្មំ។ កត្វាបិ តេ រាហុល មនសា កម្មំ តទេវ តេ មនោកម្មំ បច្ចវេក្ខិតព្វំ យន្នុ ខោ អហំ ឥទំ មនសា កម្មំ អកាសឹ ឥទំ មេ មនោកម្មំ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ អកុសលំ ឥទំ មនោកម្មំ ទុក្ខុទ្រយំ ទុក្ខវិបាកន្តិ។ សចេ ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ មនសា កម្មំ អកាសឹ ឥទំ មេ មនោកម្មំ អត្តព្យាពាធាយបិ សំវត្តតិ បរព្យាពាធាយបិ សំវត្តតិ ឧភយព្យាពាធាយបិ សំវត្តតិ អកុសលំ ឥទំ មនោកម្មំ ទុក្ខុទ្រយំ ទុក្ខវិបាកន្តិ ឯវរូបេ [ម. ឯវរូបំ។] បន តេ រាហុល មនោកម្មេ [ម. មនោកម្មំ។] អដ្ដិយិតព្វំ ហរាយិតព្វំ ជិគុច្ឆិតព្វំ អដ្ដិយិត្វា ហរាយិត្វា ជិគុច្ឆិត្វា អាយតឹ សំវរំ អាបជ្ជិតព្វំ។ សចេ បន ត្វំ រាហុល បច្ចវេក្ខមានោ ឯវំ ជានេយ្យាសិ យំ ខោ អហំ ឥទំ មនសា កម្មំ អកាសឹ ឥទំ មេ មនោកម្មំ នេវត្តព្យាពាធាយបិ សំវត្តតិ ន បរព្យាពាធាយបិ សំវត្តតិ ន ឧភយព្យាពាធាយបិ សំវត្តតិ កុសលំ ឥទំ មនោកម្មំ សុខុទ្រយំ សុខវិបាកន្តិ តេនេវ ត្វំ រាហុល បីតិប្បាមុជ្ជេន វិហរេយ្យាសិ អហោរត្តានុសិក្ខី កុសលេសុ ធម្មេសុ។

[១៣២] យេ ហិ កេចិ រាហុល អតីតមទ្ធានំ សមណា វា ព្រាហ្មណា វា កាយកម្មំ បរិសោធេសុំ វចីកម្មំ បរិសោធេសុំ មនោកម្មំ បរិសោធេសុំ សព្វេ តេ ឯវមេវ [ឱ.ម. ឯវមេវំ។] បច្ចវេក្ខិត្វា បច្ចវេក្ខិត្វា កាយកម្មំ បរិសោធេសុំ បច្ចវេក្ខិត្វា បច្ចវេក្ខិត្វា វចីកម្មំ បរិសោធេសុំ បច្ចវេក្ខិត្វា បច្ចវេក្ខិត្វា មនោកម្មំ បរិសោធេសុំ។ យេបិ ហិ [ឱ.ម. យេហិបិ។] កេចិ រាហុល អនាគតមទ្ធានំ សមណា វា ព្រាហ្មណា វា កាយកម្មំ បរិសោធេស្សន្តិ វចីកម្មំ បរិសោធេស្សន្តិ មនោកម្មំ បរិសោធេស្សន្តិ សព្វេ តេ ឯវមេវ បច្ចវេក្ខិត្វា បច្ចវេក្ខិត្វា កាយកម្មំ បរិសោធេស្សន្តិ បច្ចវេក្ខិត្វា បច្ចវេក្ខិត្វា វចីកម្មំ បរិសោធេស្សន្តិ បច្ចវេក្ខិត្វា បច្ចវេក្ខិត្វា មនោកម្មំ បរិសោធេស្សន្តិ។ យេបិ ហិ កេចិ រាហុល ឯតរហិ សមណា វា ព្រាហ្មណា វា កាយកម្មំ បរិសោធេន្តិ វចីកម្មំ បរិសោធេន្តិ មនោកម្មំ បរិសោធេន្តិ សព្វេ តេ ឯវមេវ បច្ចវេក្ខិត្វា បច្ចវេក្ខិត្វា កាយកម្មំ បរិសោធេន្តិ បច្ចវេក្ខិត្វា បច្ចវេក្ខិត្វា វចីកម្មំ បរិសោធេន្តិ បច្ចវេក្ខិត្វា បច្ចវេក្ខិត្វា មនោកម្មំ បរិសោធេន្តិ។ តស្មាតិហ តេ រាហុល បច្ចវេក្ខិត្វា បច្ចវេក្ខិត្វា កាយកម្មំ បរិសោធេស្សាមិ បច្ចវេក្ខិត្វា បច្ចវេក្ខិត្វា វចីកម្មំ បរិសោធេស្សាមិ បច្ចវេក្ខិត្វា បច្ចវេក្ខិត្វា មនោកម្មំ បរិសោធេស្សាមីតិ ឯវញ្ហិ តេ [ឱ. ឯវំ ហិ វោ។ ម. ឯវំ ហិ តេ។] រាហុល សិក្ខិតព្វន្តិ។ ឥទមវោច ភគវា អត្តមនោ អាយស្មា រាហុលោ ភគវតោ ភាសិតំ អភិនន្ទីតិ។

ចូឡរាហុលោវាទសុត្តំ បឋមំ និដ្ឋិតំ។

ទុតិយំ មហារាហុលោវាទសុត្តំ

[១៣៣] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ អថខោ ភគវា បុព្វណ្ហសមយំ និវាសេត្វា បត្តចីវរមាទាយ សាវត្ថឹ បិណ្ឌាយ បាវិសិ។ អាយស្មាបិ ខោ រាហុលោ បុព្វណ្ហសមយំ និវាសេត្វា បត្តចីវរមាទាយ ភគវន្តំ បិដ្ឋិតោ បិដ្ឋិតោ អនុពន្ធិ។ អថខោ ភគវា អបលោកេត្វា អាយស្មន្តំ រាហុលំ អាមន្តេសិ យំ កិញ្ចិ រាហុល រូបំ អតីតានាគតប្បច្ចុប្បន្នំ អជ្ឈត្តំ វា ពហិទ្ធា វា ឱឡារិកំ វា សុខុមំ វា ហីនំ វា បណីតំ វា យំ ទូរេ សន្តិកេ វា សព្វំ រូបំ នេតំ មមនេសោហមស្មិ។ ន មេសោ អត្តាតិ ឯវមេតំ យថាភូតំ សម្មប្បញ្ញាយ ទដ្ឋព្វន្តិ។ រូបមេវ នុ ខោ ភគវា រូបមេវ នុ ខោ សុគតាតិ។ រូបម្បិ រាហុល វេទនាបិ រាហុល សញ្ញាបិ រាហុល សង្ខារាបិ រាហុល វិញ្ញាណម្បិ រាហុលាតិ។

[១៣៤] អថខោ អាយស្មា រាហុលោ កោ នុជ្ជ [ឱ.ម. នជ្ជ។] ភគវតា សម្មុខា ឱវាទេន ឱវទិតោ គាមំ បិណ្ឌាយ បវិសិស្សតីតិ តតោ បដិនិវត្តិត្វា អញ្ញតរស្មឹ រុក្ខមូលេ និសីទិ បល្លង្កំ អាភុជិត្វា ឧជុំ កាយំ បណិធាយ បរិមុខំ សតឹ ឧបដ្ឋបេត្វា។ អទ្ទសា ខោ អាយស្មា សារីបុត្តោ អាយស្មន្តំ រាហុលំ អញ្ញតរស្មឹ រុក្ខមូលេ និសិន្នំ បល្លង្កំ អាភុជិត្វា ឧជុំ កាយំ បណិធាយ បរិមុខំ សតឹ ឧបដ្ឋបេត្វា ទិស្វាន អាយស្មន្តំ រាហុលំ អាមន្តេសិ អានាបានស្សតឹ រាហុល ភាវនំ ភាវេហិ អានាបានស្សតិ រាហុល ភាវនា ភាវិតា ពហុលីកតា មហប្ផលា ហោតិ មហានិសំសាតិ។ អថខោ អាយស្មា រាហុលោ សាយណ្ហសមយំ បដិសល្លានា វុដ្ឋិតោ យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ អាយស្មា រាហុលោ ភគវន្តំ ឯតទវោច កថំ ភាវិតា នុ ខោ ភន្តេ អានាបានស្សតិ កថំ ពហុលីកតា មហប្ផលា ហោតិ មហានិសំសាតិ។

[១៣៥] យំ កិញ្ចិ រាហុល រូបំ [ឱ.ម. រូបន្តិ ន បញ្ញាយតិ។] អជ្ឈត្តំ បច្ចត្តំ កក្ខលំ ខរិគតំ ឧបាទិន្នំ សេយ្យថីទំ កេសា លោមា នខា ទន្តា តចោ មំសំ ន្ហារូ អដ្ឋី អដ្ឋិមិញ្ជំ វក្កំ ហទយំ យកនំ កិលោមកំ បិហកំ បប្ផាសំ អន្តំ អន្តគុណំ ឧទរិយំ ករីសំ យំ វា បនញ្ញម្បិ កិញ្ចិ អជ្ឈត្តំ បច្ចត្តំ កក្ខលំ ខរគតំ ឧបាទិន្នំ អយំ វុច្ចតិ រាហុល អជ្ឈត្តិកា បឋវីធាតុ។ យា ចេវ ខោ បន អជ្ឈត្តិកា បឋវីធាតុ យា ច ពាហិរា បឋវីធាតុ បឋវីធាតុរេវេសា។ តំ នេតំ មម នេសោហមស្មិ ន មេសោ អត្តាតិ ឯវមេតំ យថាភូតំ សម្មប្បញ្ញាយ ទដ្ឋព្វំ។ ឯវមេតំ យថាភូតំ សម្មប្បញ្ញាយ ទិស្វា បឋវីធាតុយា និព្វិន្ទតិ បឋវីធាតុយា ចិត្តំ វិរាជេតិ។

[១៣៦] កតមា ច រាហុល អាបោធាតុ អាបោធាតុ សិយា អជ្ឈត្តិកា សិយា ពាហិរា។ កតមា ច រាហុល អជ្ឈត្តិកា អាបោធាតុ យំ អជ្ឈត្តំ បច្ចត្តំ អាបោ អាបោគតំ ឧបាទិន្នំ សេយ្យថីទំ បិត្តំ សេម្ហំ បុព្វោ លោហិតំ សេទោ មេទោ អស្សុ វសា ខេឡោ សិង្ឃាណិកា លសិកា មុត្តំ យំ វា បនញ្ញម្បិ កិញ្ចិ អជ្ឈត្តំ បច្ចត្តំ អាបោ អាបោគតំ ឧបាទិន្នំ អយំ វុច្ចតិ រាហុល អជ្ឈត្តិកា អាបោធាតុ។ យា ចេវ ខោ បន អជ្ឈត្តិកា អាបោធាតុ យា ច ពាហិរា អាបោធាតុ អាបោធាតុរេវេសា។ តំ នេតំ មម នេសោហមស្មិ ន មេសោ អត្តាតិ ឯវមេតំ យថាភូតំ សម្មប្បញ្ញាយ ទដ្ឋព្វំ។ ឯវមេតំ យថាភូតំ សម្មប្បញ្ញាយ ទិស្វា អាបោធាតុយា និព្វិន្ទតិ អាបោធាតុយា ចិត្តំ វិរាជេតិ។

[១៣៧] កតមា ច រាហុល តេជោធាតុ តេជោធាតុ សិយា អជ្ឈត្តិកា សិយា ពាហិរា។ កតមា ច រាហុល អជ្ឈត្តិកា តេជោធាតុ យំ អជ្ឈត្តំ បច្ចត្តំ តេជោ តេជោគតំ ឧបាទិន្នំ សេយ្យថីទំ យេន ច សន្តបតិ យេន ច ជីរតិ [ឱ.ម. ជីរិយតិ។] យេន ច បរិឌយ្ហតិ [ម. បរិទយ្ហតិ។] យេន ច អសិតំ បីតំ ខាយិតំ សាយិតំ [ឱ. អសិតបីតខាយិតសាយិតំ។] សម្មា បរិណាមំ គច្ឆតិ យំ វា បនញ្ញម្បិ កិញ្ចិ អជ្ឈត្តំ បច្ចត្តំ តេជោ តេជោគតំ ឧបាទិន្នំ អយំ វុច្ចតិ រាហុល អជ្ឈត្តិកា តេជោធាតុ។ យា ចេវ ខោ បន អជ្ឈត្តិកា តេជោធាតុ យា ច ពាហិរា តេជោធាតុ តេជោធាតុរេវេសា។ តំ នេតំ មម នេសោហមស្មិ ន មេសោ អត្តាតិ ឯវមេតំ យថាភូតំ សម្មប្បញ្ញាយ ទដ្ឋព្វំ។ ឯវមេតំ យថាភូតំ សម្មប្បញ្ញាយ ទិស្វា តេជោធាតុយា និព្វិន្ទតិ តេជោធាតុយា ចិត្តំ វិរាជេតិ។

[១៣៨] កតមា ច រាហុល វាយោធាតុ វាយោធាតុ សិយា អជ្ឈត្តិកា សិយា ពាហិរា។ កតមា ច រាហុល អជ្ឈត្តិកា វាយោធាតុ យំ អជ្ឈត្តំ បច្ចត្តំ វាយោ វាយោគតំ ឧបាទិន្នំ សេយ្យថីទំ ឧទ្ធង្គមា វាតា អធោគមា វាតា កុច្ឆិសយា វាតា កោដ្ឋសយា វាតា អង្គមង្គនុសារិនោ វាតា អស្សាសោ បស្សាសោ យំ វា បនញ្ញម្បិ កិញ្ចិ អជ្ឈត្តំ បច្ចត្តំ វាយោ វាយោគតំ ឧបាទិន្នំ អយំ វុច្ចតិ រាហុល អជ្ឈត្តិកា វាយោធាតុ។ យា ចេវ ខោ បន អជ្ឈត្តិកា វាយោធាតុ យា ច ពាហិរា វាយោធាតុ វាយោធាតុរេវេសា។ តំ នេតំ មម នេសោហមស្មិ ន មេសោ អត្តាតិ ឯវមេតំ យថាភូតំ សម្មប្បញ្ញាយ ទដ្ឋព្វំ។ ឯវមេតំ យថាភូតំ សម្មប្បញ្ញាយ ទិស្វា វាយោធាតុយា និព្វិន្ទតិ វាយោធាតុយា ចិត្តំ វិរាជេតិ។

[១៣៩] កតមា ច រាហុល អាកាសធាតុ អាកាសធាតុ សិយា អជ្ឈត្តិកា សិយា ពាហិរា។ កតមា ច រាហុល អជ្ឈត្តិកា អាកាសធាតុ យំ អជ្ឈត្តំ បច្ចត្តំ អាកាសំ អាកាសគតំ ឧបាទិន្នំ សេយ្យថីទំ កណ្ណច្ឆិទ្ទំ នាសច្ឆិទ្ទំ មុខទ្វារំ យេន ច អសិតំ បីតំ ខាយិតំ សាយិតំ អជ្ឈោហរតិ យត្ថ ច អសិតំ បីតំ ខាយិតំ សាយិតំ សំតិដ្ឋតិ យេន ច អសិតំ បីតំ ខាយិតំ សាយិតំ អធោភាគា និក្ខមតិ យំ វា បនញ្ញម្បិ កិញ្ចិ អជ្ឈត្តំ បច្ចត្តំ អាកាសំ អាកាសគតំ អឃំ អឃគតំ វិវរំ វិវរគតំ អសម្ផុដ្ឋំ មំសលោហិតេហិ [ឱ. អឃំ អឃគតំ វិវរំ វិវរគតំ អសម្ផុដ្ឋំ មំសលោហិតេហិ ន ទិស្សតិ។] ឧបាទិន្នំ អយំ វុច្ចតិ រាហុល អជ្ឈត្តិកា អាកាសធាតុ។ យា ចេវ ខោ បន អជ្ឈត្តិកា អាកាសធាតុ យា ច ពាហិរា អាកាសធាតុ អាកាសធាតុរេវេសា។ តំ នេតំ មម នេសោហមស្មិ ន មេសោ អត្តាតិ ឯវមេតំ យថាភូតំ សម្មប្បញ្ញាយ ទដ្ឋព្វំ។ ឯវមេតំ យថាភូតំ សម្មប្បញ្ញាយ ទិស្វា អាកាសធាតុយា និព្វិន្ទតិ អាកាសធាតុយា ចិត្តំ វិរាជេតិ។

[១៤០] បឋវីសមំ រាហុល ភាវនំ ភាវេហិ បឋវីសមញ្ហិ [ឱ.ម. បឋវីសមំ ហិ។] តេ រាហុល ភាវនំ ភាវយតោ ឧប្បន្នា មនាបាមនាបា ផស្សា ចិត្តំ ន បរិយាទាយ ឋស្សន្តិ។ សេយ្យថាបិ រាហុល បឋវិយា សុចិម្បិ និក្ខិបន្តិ អសុចិម្បិ និក្ខិបន្តិ គូថគតម្បិ និក្ខិបន្តិ មុត្តគតម្បិ និក្ខិបន្តិ ខេឡគតម្បិ និក្ខិបន្តិ បុព្វគតម្បិ និក្ខិបន្តិ លោហិតគតម្បិ និក្ខិបន្តិ ន ច តេន បឋវី អដ្ដិយតិ វា ហរាយតិ វា ជិគុច្ឆតិ វា ឯវមេវ ខោ ត្វំ រាហុល បឋវីសមំ ភាវនំ ភាវេហិ បឋវីសមញ្ហិ តេ រាហុល ភាវនំ ភាវយតោ ឧប្បន្នា មនាបាមនាបា ផស្សា ចិត្តំ ន បរិយាទាយ ឋស្សន្តិ។

[១៤១] អាបោសមំ រាហុល ភាវនំ ភាវេហិ អាបោសមញ្ហិ តេ រាហុល ភាវនំ ភាវយតោ ឧប្បន្នា មនាបាមនាបា ផស្សា ចិត្តំ ន បរិយាទាយ ឋស្សន្តិ។ សេយ្យថាបិ រាហុល អាបស្មឹ សុចិម្បិ ធោវន្តិ អសុចិម្បិ ធោវន្តិ គូថគតម្បិ ធោវន្តិ មុត្តគតម្បិ ធោវន្តិ ខេឡគតម្បិ ធោវន្តិ បុព្វគតម្បិ ធោវន្តិ លោហិតគតម្បិ ធោវន្តិ ន ច តេន អាបោ អដ្ដិយតិ វា ហរាយតិ ជិគុច្ឆតិ វា ឯវមេវ ខោ ត្វំ រាហុល អាបោសមំ ភាវនំ ភាវេហិ អាបោសមញ្ហិ តេ រាហុល ភាវនំ ភាវយតោ ឧប្បន្នា មនាបាមនាបា ផស្សា ចិត្តំ ន បរិយាទាយ ឋស្សន្តិ។

[១៤២] តេជោសមំ រាហុល ភាវនំ ភាវេហិ តេជោសមញ្ហិ តេ រាហុល ភាវនំ ភាវយតោ ឧប្បន្នា មនាបាមនាបា ផស្សា ចិត្តំ ន បរិយាទាយ ឋស្សន្តិ។ សេយ្យថាបិ រាហុល តេជោ សុចិម្បិ ឌហតិ អសុចិម្បិ ឌហតិ គូថគតម្បិ ឌហតិ មុត្តគតម្បិ ឌហតិ ខេឡគតម្បិ ឌហតិ បុព្វគតម្បិ ឌហតិ លោហិតគតម្បិ ឌហតិ ន ច តេន តេជោ អដ្ដិយតិ វា ហរាយតិ វា ជិគុច្ឆតិ វា ឯវមេវ ខោ ត្វំ រាហុល តេជោសមំ ភាវនំ ភាវេហិ តេជោសមញ្ហិ តេ រាហុល ភាវនំ ភាវយតោ ឧប្បន្នា មនាបាមនាបា ផស្សា ចិត្តំ ន បរិយាទាយ ឋស្សន្តិ។

[១៤៣] វាយោសមំ រាហុល ភាវនំ ភាវេហិ វាយោសមញ្ហិ តេ រាហុល ភាវនំ ភាវយតោ ឧប្បន្នា មនាបាមនាបា ផស្សា ចិត្តំ ន បរិយាទាយ ឋស្សន្តិ។ សេយ្យថាបិ រាហុល វាយោ សុចិម្បិ ឧបវាយតិ អសុចិម្បិ ឧបវាយតិ គូថគតម្បិ ឧបវាយតិ មុត្តគតម្បិ ឧបវាយតិ ខេឡគតម្បិ ឧបវាយតិ បុព្វគតម្បិ ឧបវាយតិ លោហិតគតម្បិ ឧបវាយតិ ន ច តេន វាយោ អដ្ដិយតិ វា ហរាយតិ វា ជិគុច្ឆតិ វា ឯវមេវ ខោ ត្វំរាហុល វាយោសមំ ភាវនំ ភាវេហិ វាយោសមញ្ហិ តេ រាហុល ភាវនំ ភាវយតោ ឧប្បន្នា មនាបាមនាបា ផស្សា ចិត្តំ ន បរិយាទាយ ឋស្សន្តិ។

[១៤៤] អាកាសសមំ រាហុល ភាវនំ ភាវេហិ អាកាសសមញ្ហិ តេ រាហុល ភាវនំ ភាវយតោ ឧប្បន្នា មនាបាមនាបា ផស្សា ចិត្តំ ន បរិយាទាយ ឋស្សន្តិ។ សេយ្យថាបិ រាហុល អាកាសោ ន កត្ថចិ បតិដ្ឋិតោ ឯវមេវ ខោ ត្វំ រាហុល អាកាសសមំ ភាវនំ ភាវេហិ អាកាសសមញ្ហិ តេ រាហុល ភាវនំ ភាវយតោ ឧប្បន្នា មនាបាមនាបា ផស្សា ចិត្តំ ន បរិយាទាយ ឋស្សន្តិ។

[១៤៥] មេត្តំ រាហុល ភាវនំ ភាវេហិ មេត្តញ្ហិ [ឱ.ម. មេត្តំ ហិ។] តេ រាហុល ភាវនំ ភាវយតោ យោ ព្យាបាទោ សោ បហិយិស្សតិ។ ករុណំ រាហុល ភាវនំ ភាវេហិ ករុណញ្ហិ តេ រាហុល ភាវនំ ភាវយតោ យា វិហេសា សា បហិយិស្សតិ។ មុទិតំ រាហុល ភាវនំ ភាវេហិ មុទិតញ្ហិ តេ រាហុល ភាវនំ ភាវយតោ យា អរតិ សា បហិយិស្សតិ។ ឧបេក្ខំ រាហុល ភាវនំ ភាវេហិ ឧបេក្ខញ្ហិ តេ រាហុល ភាវនំ ភាវយតោ យោ បដិឃោ សោ បហិយិស្សតិ។ អសុភំ រាហុល ភាវនំ ភាវេហិ អសុភញ្ហិ តេ រាហុល ភាវនំ ភាវយតោ យោ រាគោ សោ បហិយិស្សតិ។ អនិច្ចសញ្ញំ រាហុល ភាវនំ ភាវេហិ អនិច្ចសញ្ញញ្ហិ តេ រាហុល ភាវនំ ភាវយតោ យោ អស្មិមានោ សោ បហិយិស្សតិ។

[១៤៦] អានាបានស្សតឹ រាហុល ភាវនំ ភាវេហិ អានាបានស្សតិ រាហុល ភាវិតា ពហុលីកតា មហប្ផលា ហោតិ មហានិសំសា។ កថំ ភាវិតា ច រាហុល អានាបានស្សតិ កថំ ពហុលីកតា មហប្ផលា ហោតិ មហានិសំសា។ ឥធ រាហុល ភិក្ខុ អរញ្ញគតោ វា រុក្ខមូលគតោ វា សុញ្ញាគារគតោ វា និសីទតិ បល្លង្កំ អាភុជិត្វា ឧជុំ កាយំ បណិធាយ បរិមុខំ សតឹ ឧបដ្ឋបេត្វា សោ សតោ វ អស្សសតិ សតោ បស្សសតិ។ ទីឃំ វា អស្សសន្តោ ទីឃំ អស្សសាមីតិ បជានាតិ ទីឃំ វា បស្សសន្តោ ទីឃំ បស្សសាមីតិ បជានាតិ។ រស្សំ វា អស្សសន្តោ រស្សំ អស្សសាមីតិ បជានាតិ រស្សំ វា បស្សសន្តោ រស្សំ បស្សសាមីតិ បជានាតិ។ សព្វកាយប្បដិសំវេទី អស្សសិស្សាមីតិ សិក្ខតិ សព្វកាយប្បដិសំវេទី បស្សសិស្សាមីតិ សិក្ខតិ។ បស្សម្ភយំ កាយសង្ខារំ អស្សសិស្សាមីតិ សិក្ខតិ បស្សម្ភយំ កាយសង្ខារំ បស្សសិស្សាមីតិ សិក្ខតិ។ បីតិប្បដិសំវេទី អស្សសិស្សាមីតិ សិក្ខតិ បីតិប្បដិសំវេទី បស្សសិស្សាមីតិ សិក្ខតិ។ សុខប្បដិសំវេទី អស្សសិស្សាមីតិ សិក្ខតិ សុខប្បដិសំវេទី បស្សសិស្សាមីតិ សិក្ខតិ។ ចិត្តសង្ខារប្បដិសំវេទី អស្សសិស្សាមីតិ សិក្ខតិ ចិត្តសង្ខារប្បដិសំវេទី បស្សសិស្សាមីតិ សិក្ខតិ។ បស្សម្ភយំ ចិត្តសង្ខារំ អស្សសិស្សាមីតិ សិក្ខតិ បស្សម្ភយំ ចិត្តសង្ខារំ បស្សសិស្សាមីតិ សិក្ខតិ។ ចិត្តប្បដិសំវេទី អស្សសិស្សាមីតិ សិក្ខតិ ចិត្តប្បដិសំវេទី បស្សសិស្សាមីតិ សិក្ខតិ។ អភិប្បមោទយំ ចិត្តំ អស្សសិស្សាមីតិ សិក្ខតិ អភិប្បមោទយំ ចិត្តំ បស្សសិស្សាមីតិ សិក្ខតិ។ សមាទហំ ចិត្តំ អស្សសិស្សាមីតិ សិក្ខតិ សមាទហំ ចិត្តំ បស្សសិស្សាមីតិ សិក្ខតិ។ វិមោចយំ ចិត្តំ អស្សសិស្សាមីតិ សិក្ខតិ វិមោចយំ ចិត្តំ បស្សសិស្សាមីតិ សិក្ខតិ។ អនិច្ចានុបស្សី អស្សសិស្សាមីតិ សិក្ខតិ អនិច្ចានុបស្សី បស្សសិស្សាមីតិ សិក្ខតិ។ វិរាគានុបស្សី អស្សសិស្សាមីតិ សិក្ខតិ វិរាគានុបស្សី បស្សសិស្សាមីតិ សិក្ខតិ។ និរោធានុបស្សី អស្សសិស្សាមីតិ សិក្ខតិ និរោធានុបស្សី បស្សសិស្សាមីតិ សិក្ខតិ។ បដិនិស្សគ្គានុបស្សី អស្សសិស្សាមីតិ សិក្ខតិ បដិនិស្សគ្គានុបស្សី បស្សសិស្សាមីតិ សិក្ខតិ។ ឯវំ ភាវិតា ខោ រាហុល អានាបានស្សតិ ឯវំ ពហុលីកតា មហប្ផលា ហោតិ មហានិសំសា ឯវំ ភាវិតាយ ខោ រាហុល អានាបានស្សតិយា ឯវំ ពហុលីកតាយ យេបិ តេ ចរិមកា អស្សាសប្បស្សាសា តេបិ វិទិតាវ និរុជ្ឈន្តិ នោ អវិទិតាតិ។ ឥទមវោច ភគវា អត្តមនោ អាយស្មា រាហុលោ ភគវតោ ភាសិតំ អភិនន្ទីតិ។

មហារាហុលោវាទសុត្តំ ទុតិយំ និដ្ឋិតំ។

តតិយំ ចូឡមាលុង្ក្យោវាទសុត្តំ [ឆដ្ឋ ចូឡមាលុក្យសុត្តំ]

[១៤៧] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ អថខោ អាយស្មតោ មាលុង្ក្យបុត្តស្ស [ឱ. មាលុង្ក្យាបុត្តស្ស។ ម. មាលុក្យបុត្តស្ស។] រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ យានិមានិ ទិដ្ឋិគតានិ ភគវតា អព្យាកតានិ ឋបិតានិ បដិក្ខិត្តានិ សស្សតោ លោកោតិបិ [ឱ. លោកោ ឥតិបិ។] អស្សស្សតោ លោកោតិបិ [ឱ. លោកោ ឥតិបិ។] អន្តវា លោកោតិបិ [ឱ. លោកោ ឥតិបិ។] អនន្តវា លោកោតិបិ [ឱ. លោកោ ឥតិបិ។] តំ ជីវំ តំ សរីរន្តិបិ [ឱ. សរីរំ ឥតិបិ។] អញ្ញំ ជីវំ អញ្ញំ សរីរន្តិបិ [ឱ. សរីរំ ឥតិបិ។] ហោតិ តថាគតោ បរម្មរណាតិបិ ន ហោតិ តថាគតោ បរម្មរណាតិបិ ហោតិ ច ន ច ហោតិ តថាគតោ បរម្មរណាតិបិ នេវ ហោតិ ន ន ហោតិ តថាគតោ បរម្មរណាតិបិ តានិ មេ ភគវា ន ព្យាករោតិ យានិ មេ ភគវា ន ព្យាករោតិ តម្មេ ន រុច្ចតិ តម្មេ នក្ខមតិ សោហំ ភគវន្តំ ឧបសង្កមិត្វា ឯតមត្ថំ បុច្ឆិស្សាមិ សចេ មេ ភគវា ព្យាករិស្សតិ សស្សតោ លោកោតិ វា។បេ។ នេវ ហោតិ ន ន ហោតិ តថាគតោ បរម្មរណាតិ វា ឯវាហំ ភគវតិ ព្រហ្មចរិយំ ចរិស្សាមិ នោ ចេ [ឱ.ម. ចេ មេ។] ភគវា ព្យាករិស្សតិ សស្សតោ លោកោតិ វា អស្សស្សតោ លោកោតិ វា អន្តវា លោកោតិ វា អនន្តវា លោកោតិ វា តំ ជីវំ តំ សរីរន្តិ វា អញ្ញំ ជីវំ អញ្ញំ សរីរន្តិ វា ហោតិ តថាគតោ បរម្មរណាតិ វា ន ហោតិ តថាគតោ បរម្មរណាតិ វា ហោតិ ច ន ច ហោតិ តថាគតោ បរម្មរណាតិ វា នេវ ហោតិ ន ន ហោតិ តថាគតោ បរម្មរណាតិ វា ឯវាហំ សិក្ខំ បច្ចក្ខាយ ហីនាយាវត្តិស្សាមីតិ។

[១៤៨] អថខោ អាយស្មា មាលុង្ក្យបុត្តោ សាយណ្ហសមយំ បដិសល្លានា វុដ្ឋិតោ យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ អាយស្មា មាលុង្ក្យបុត្តោ ភគវន្តំ ឯតទវោច ឥធ មយ្ហំ ភន្តេ រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ យានិមានិ ទិដ្ឋិគតានិ ភគវតា អព្យាកតានិ ឋបិតានិ បដិក្ខិត្តានិ សស្សតោ លោកោតិបិ អស្សស្សតោ លោកោតិបិ អន្តវា លោកោតិបិ អនន្តវា លោកោតិបិ តំ ជីវំ តំ សរីរន្តិបិ អញ្ញំ ជីវំ អញ្ញំ សរីរន្តិបិ ហោតិ តថាគតោ បរម្មរណាតិបិ ន ហោតិ តថាគតោ បរម្មរណាតិបិ ហោតិ ច ន ច ហោតិ តថាគតោ បរម្មរណាតិបិ នេវ ហោតិ ន ន ហោតិ តថាគតោ បរម្មរណាតិបិ តានិ មេ ភគវា ន ព្យាករោតិ យានិ មេ ភគវា ន ព្យាករោតិ តម្មេ ន រុច្ចតិ តម្មេ នក្ខមតិ សោហំ ភគវន្តំ ឧបសង្កមិត្វា ឯតមត្ថំ បុច្ឆិស្សាមិ សចេ [ឱ.ម. សចេ មេ។] ភគវា ព្យាករិស្សតិ សស្សតោ លោកោតិ វា អស្សស្សតោ លោកោតិ វា អន្តវា លោកោតិ វា អនន្តវា លោកោតិ វា តំ ជីវំ តំ សរីរន្តិ វា អញ្ញំ ជីវំ អញ្ញំ សរីរន្តិ វា ហោតិ តថាគតោ បរម្មរណាតិ វា ន ហោតិ តថាគតោ បរម្មរណាតិ វា ហោតិ ច ន ច ហោតិ តថាគតោ បរម្មរណាតិ វា នេវ ហោតិ ន ន ហោតិ តថាគតោ បរម្មរណាតិ វា ឯវាហំ ភគវតិ ព្រហ្មចរិយំ ចរិស្សាមិ នោ ចេ មេ ភគវា ព្យាករិស្សតិ សស្សតោ លោកោតិ វា អស្សស្សតោ លោកោតិ វា។បេ។ នេវ ហោតិ ន ន ហោតិ តថាគតោ បរម្មរណាតិ វា ឯវាហំ សិក្ខំ បច្ចក្ខាយ ហីនាយាវត្តិស្សាមីតិ។ សចេ ភគវា ជានាតិ សស្សតោ លោកោតិ សស្សតោ លោកោតិ មេ ភគវា ព្យាករោតុ សចេ ភគវា ជានាតិ អស្សស្សតោ លោកោតិ អស្សស្សតោ លោកោតិ មេ ភគវា ព្យាករោតុ នោ ចេ ភគវា ជានាតិ សស្សតោ លោកោតិ វា អស្សស្សតោ លោកោតិ វា អជានតោ ខោ បន អបស្សតោ ឯតទេវ ឧជុកំ ហោតិ យទិទំ ន ជានាមិ ន បស្សាមីតិ។ សចេ ភគវា ជានាតិ អន្តវា លោកោតិ អន្តវា លោកោតិ មេ ភគវា ព្យាករោតុ សចេ ភគវា ជានាតិ អនន្តវា លោកោតិ អនន្តវា លោកោតិ មេ ភគវា ព្យាករោតុ នោ ចេ ភគវា ជានាតិ អន្តវា លោកោតិ វា អនន្តវា លោកោតិ វា អជានតោ ខោ បន អបស្សតោ ឯតទេវ ឧជុកំ ហោតិ យទិទំ ន ជានាមិ ន បស្សាមីតិ។ សចេ ភគវា ជានាតិ តំ ជីវំ តំ សរីរន្តិ តំ ជីវំ តំ សរីរន្តិ មេ ភគវា ព្យាករោតុ សចេ ភគវា ជានាតិ អញ្ញំ ជីវំ អញ្ញំ សរីរន្តិ អញ្ញំ ជីវំ អញ្ញំ សរីរន្តិ មេ ភគវា ព្យាករោតុ នោ ចេ ភគវា ជានាតិ តំ ជីវំ តំ សរីរន្តិ វា អញ្ញំ ជីវំ អញ្ញំ សរីរន្តិ វា អជានតោ ខោ បន អបស្សតោ ឯតទេវ ឧជុកំ ហោតិ យទិទំ ន ជានាមិ ន បស្សាមីតិ។ សចេ ភគវា ជានាតិ ហោតិ តថាគតោ បរម្មរណាតិ ហោតិ តថាគតោ បរម្មរណាតិ មេ ភគវា ព្យាករោតុ សចេ ភគវា ជានាតិ ន ហោតិ តថាគតោ បរម្មរណាតិ ន ហោតិ តថាគតោ បរម្មរណាតិ មេ ភគវា ព្យាករោតុ នោ ចេ ភគវា ជានាតិ ហោតិ តថាគតោ បរម្មរណាតិ វា ន ហោតិ តថាគតោ បរម្មរណាតិ វា អជានតោ ខោ បន អបស្សតោ ឯតទេវ ឧជុកំ ហោតិ យទិទំ ន ជានាមិ ន បស្សាមីតិ។ សចេ ភគវា ជានាតិ ហោតិ ច ន ច ហោតិ តថាគតោ បរម្មរណាតិ ហោតិ ច ន ច ហោតិ តថាគតោ បរម្មរណាតិ មេ ភគវា ព្យាករោតុ សចេ ភគវា ជានាតិ នេវ ហោតិ ន ន ហោតិ តថាគតោ បរម្មរណាតិ នេវ ហោតិ ន ន ហោតិ តថាគតោ បរម្មរណាតិ មេ ភគវា ព្យាករោតុ នោ ចេ ភគវា ជានាតិ ហោតិ ច ន ច ហោតិ តថាគតោ បរម្មរណាតិ វា នេវ ហោតិ ន ន ហោតិ តថាគតោ បរម្មរណាតិ វា អជានតោ ខោ បន អបស្សតោ ឯតទេវ ឧជុកំ ហោតិ យទិទំ ន ជានាមិ ន បស្សាមីតិ។

[១៤៩] កិន្នុ ខោ តាហំ [ឱ. កិន្នុ តាហំ។ ម. កឹ នុ ខោ សាហំ។] មាលុង្ក្យបុត្ត ឯវំ អវចំ ឯហិ ត្វំ មាលុង្ក្យបុត្ត មយិ ព្រហ្មចរិយំ ចរអហន្តេ ព្យាករិស្សាមិ សស្សតោ លោកោតិ វា អស្សស្សតោ លោកោតិ វា អន្តវា លោកោតិ វា អនន្តវា លោកោតិ វា តំ ជីវំ តំ សរីរន្តិ វា អញ្ញំ ជីវំ អញ្ញំ សរីរន្តិ វា ហោតិ តថាគតោ បរម្មរណាតិ វា ន ហោតិ តថាគតោ បរម្មរណាតិ វា ហោតិ ច ន ច ហោតិ តថាគតោ បរម្មរណាតិ វា នេវ ហោតិ ន ន ហោតិ តថាគតោ បរម្មរណាតិ វាតិ។ នោ ហេតំ ភន្តេ។ ត្វំ វា បន មំ ឯវំ អវច អហំ ភន្តេ ភគវតិ ព្រហ្មចរិយំ ចរិស្សាមិ ភគវា មេ ព្យាករិស្សតិ សស្សតោ លោកោតិ វា អស្សស្សតោ លោកោតិ វា អន្តវា លោកោតិ វា អនន្តវា លោកោតិ វា តំ ជីវំ តំ សរីរន្តិ វា អញ្ញំ ជីវំ អញ្ញំ សរីរន្តិ វា ហោតិ តថាគតោ បរម្មរណាតិ វា ន ហោតិ តថាគតោ បរម្មរណាតិ វា ហោតិ ច ន ច ហោតិ តថាគតោ បរម្មរណាតិ វា នេវ ហោតិ ន ន ហោតិ តថាគតោ បរម្មរណាតិ វាតិ។ នោ ហេតំ ភន្តេ។ ឥតិ កិរ មាលុង្ក្យបុត្ត នេវាហន្តំ វទាមិ ឯហិ ត្វំ មាលុង្ក្យបុត្ត មយិ ព្រហ្មចរិយំ ចរ អហន្តេ ព្យាករិស្សាមិ សស្សតោ លោកោតិ វា អស្សស្សតោ លោកោតិ។បេ។ នេវ ហោតិ ន ន ហោតិ តថាគតោ បរម្មរណាតិ វាតិ នបិ កិរ ត្វំ វទេសិ អហំ ភន្តេ ភគវតិ ព្រហ្មចរិយំ ចរិស្សាមិ ភគវា មេ ព្យាករិស្សតិ សស្សតោ លោកោតិ វា អស្សស្សតោ លោកោតិ វា។បេ។ នេវ ហោតិ ន ន ហោតិ តថាគតោ បរម្មរណាតិ វាតិ ឯវំ សន្តេ មោឃបុរិស កោ សន្តោ កំ បច្ចាចិក្ខសិ។

[១៥០] យោ ខោ មាលុង្ក្យបុត្ត ឯវំ វទេយ្យ ន តាវាហំ ភគវតិ ព្រហ្មចរិយំ ចរិស្សាមិ យាវ មេ ភគវា ន ព្យាករិស្សតិ សស្សតោ លោកោតិ វា អស្សស្សតោ លោកោតិ វា។បេ។ ហោតិ ច ន ច ហោតិ តថាគតោ បរម្មរណាតិ វា នេវ ហោតិ ន ន ហោតិ តថាគតោ បរម្មរណាតិ វាតិ អព្យាកតមេវ តំ មាលុង្ក្យបុត្ត តថាគតេន អស្ស អថខោ [ឱ.ម. សោសទ្ទោ នត្ថិ។] សោ បុគ្គលោ កាលំ ករេយ្យ។ សេយ្យថាបិ មាលុង្ក្យបុត្ត បុរិសោ សល្លេន វិទ្ធោ អស្ស សវិសេន គាឡ្ហបលេបនេន តស្ស មិត្តាមច្ចា ញាតិសាលោហិតា ភិសក្កំ សល្លកត្តំ ឧបដ្ឋបេយ្យុំ។ សោ ឯវំ វទេយ្យ ន តាវាហំ ឥមំ សល្លំ អាហរិស្សាមិ យាវ ន តំ បុរិសំ ជានាមិ យេនម្ហិ វិទ្ធោ ខត្តិយោ វា ព្រាហ្មណោ វា វេស្សោ វា សុទ្ទោ វាតិ។ សោ ឯវំ វទេយ្យ ន តាវាហំ ឥមំ សល្លំ អាហរិស្សាមិ យាវ ន តំ បុរិសំ ជានាមិ យេនម្ហិ វិទ្ធោ ឯវំនាមោ ឯវំគោត្តោ ឥតិ វាតិ។ សោ ឯវំ វទេយ្យ ន តាវាហំ ឥមំ សល្លំ អាហរិស្សាមិ យាវ ន តំ បុរិសំ ជានាមិ យេនម្ហិ វិទ្ធោ ទីឃោ វា រស្សោ វា មជ្ឈិមោ វាតិ។ សោ ឯវំ វទេយ្យ ន តាវាហំ ឥមំ សល្លំ អាហរិស្សាមិ យាវ ន តំ បុរិសំ ជានាមិ យេនម្ហិ វិទ្ធោ កាឡោ វា សាមោ វា មង្គុរច្ឆវី វាតិ។ សោ ឯវំ វទេយ្យ ន តាវាហំ ឥមំ សល្លំ អាហរិស្សាមិ យាវ ន តំ បុរិសំ ជានាមិ យេនម្ហិ វិទ្ធោ អសុកស្មឹ គាមេ វា និគមេ វា នគរេ វាតិ។ សោ ឯវំ វទេយ្យ ន តាវាហំ ឥមំ សល្លំ អាហរិស្សាមិ យាវ ន តំ ធនុំ ជានាមិ យេនម្ហិ វិទ្ធោ យទិ វា ចាបោ យទិ វា កោទណ្ឌោតិ។ សោ ឯវំ វទេយ្យ ន តាវាហំ ឥមំ សល្លំ អាហរិស្សាមិ យាវ ន តំ ជិយំ ជានាមិ យាយម្ហិ វិទ្ធោ យទិ វា អក្កស្ស យទិ វា សណ្ឋស្ស យទិ វា ន្ហារុស្ស យទិ វា មរុវាយ យទិ វា ខីរបណ្ណិនោតិ។ សោ ឯវំ វទេយ្យ ន តាវាហំ ឥមំ សល្លំ អាហរិស្សាមិ យាវ ន តំ កណ្ឌំ ជានាមិ យេនម្ហិ វិទ្ធោ យទិ វា គច្ឆំ [ម. ឯវំ។ ឱ. កច្ឆំ។] យទិ វា រោបិមន្តិ។ សោ ឯវំ វទេយ្យ ន តាវាហំ ឥមំ សល្លំ អាហរិស្សាមិ យាវ ន តំ កណ្ឌំ ជានាមិ យេនម្ហិ វិទ្ធោ យស្ស បត្តេហិ វា ជិតំ [ម. វា ខិត្តំ។] យទិ វា គិជ្ឈស្ស យទិ វា កង្ខស្ស យទិ វា កុលលស្ស យទិ វា មោរស្ស យទិ វា សិថិលហនុនោតិ។ សោ ឯវំ វទេយ្យ ន តាវាហំ ឥមំ សល្លំ អាហរិស្សាមិ យាវ ន តំ កណ្ឌំ ជានាមិ យេនម្ហិ វិទ្ធោ យស្ស ន្ហារុនា បរិក្ខិត្តំ យទិ វា គវស្ស យទិ វា មហិស្ស យទិ វា រោរុវស្ស [ម. ភេរវស្ស។] យទិ វា សេម្ហារស្សាតិ។ សោ ឯវំ វទេយ្យ ន តាវាហំ ឥមំ សល្លំ អាហរិស្សាមិ យាវ ន តំ កណ្ឌំ ជានាមិ យេនម្ហិ វិទ្ធោ យទិ វា សល្លំ យទិ វា ខុរប្បំ យទិ វា វេកណ្ណំ [ឱ.ម. វេកណ្ឌំ។] យទិ វា នារាចំ យទិ វា វច្ឆទន្តំ យទិ វា ករវិរបត្តន្តិ អញ្ញាតមេវ តំ មាលុង្ក្យបុត្ត តេន បុរិសេន អស្ស អថខោ [ឱ.ម. ខោសទ្ទោ នត្ថិ។] សោ បុរិសោ កាលំ ករេយ្យ។ ឯវមេវ ខោ មាលុង្ក្យបុត្ត យោ ឯវំ វទេយ្យ ន តាវាហំ ភគវតិ ព្រហ្មចរិយំ ចរិស្សាមិ យាវ តំ [ឱ.ម. តន្តិ នត្ថិ។] មេ ភគវា ន ព្យាករិស្សតិ សស្សតោ លោកោតិ វា អស្សស្សតោ លោកោតិ វា អន្តវា លោកោតិ វា អនន្តវា លោកោតិ វា តំ ជីវំ តំ សរីរន្តិ វា អញ្ញំ ជីវំ អញ្ញំ សរីរន្តិ វា ហោតិ តថាគតោ បរម្មរណាតិ វា ន ហោតិ តថាគតោ បរម្មរណាតិ វា ហោតិ ច ន ច ហោតិ តថាគតោ បរម្មរណាតិ វា នេវ ហោតិ ន ន ហោតិ តថាគតោ បរម្មរណាតិ វាតិ អព្យាកតមេវ តំ មាលុង្ក្យបុត្ត តថាគតេន អស្ស អថខោ សោ បុគ្គលោ កាលំ ករេយ្យ។

[១៥១] សស្សតោ លោកោតិ មាលុង្ក្យបុត្ត ទិដ្ឋិយា សតិ ព្រហ្មចរិយវាសោ អភវិស្សាតិ ឯវំ នោ អស្សស្សតោ លោកោតិ មាលុង្ក្យបុត្ត ទិដ្ឋិយា សតិ ព្រហ្មចរិយវាសោ អភវិស្សាតិ ឯវម្បិ នោ សស្សតោ លោកោតិ មាលុង្ក្យបុត្ត ទិដ្ឋិយា សតិ អស្សស្សតោ លោកោតិ វា ទិដ្ឋិយា សតិ អត្ថេវ ជាតិ អត្ថិ ជរា អត្ថិ មរណំ សន្តិ សោកបរិទេវទុក្ខទោមនស្សុបាយាសា យេសាហំ ទិដ្ឋេវ ធម្មេ និឃាតំ បញ្ញបេមិ។ អន្តវា លោកោតិ មាលុង្ក្យបុត្ត ទិដ្ឋិយា សតិ ព្រហ្មចរិយវាសោ អភវិស្សាតិ ឯវំ នោ អនន្តវា លោកោតិ មាលុង្ក្យបុត្ត ទិដ្ឋិយា សតិ ព្រហ្មចរិយវាសោ អភវិស្សាតិ ឯវម្បិ នោ អន្តវា លោកោតិ មាលុង្ក្យបុត្ត ទិដ្ឋិយា សតិ អនន្តវា លោកោតិ វា ទិដ្ឋិយា សតិ អត្ថេវ ជាតិ អត្ថិ ជរា អត្ថិ មរណំ សន្តិ សោកបរិទេវទុក្ខទោមនស្សុបាយាសា យេសាហំ ទិដ្ឋេវ ធម្មេ និឃាតំ បញ្ញបេមិ។ តំ ជីវំ តំ សរីរន្តិ មាលុង្ក្យបុត្ត ទិដ្ឋិយា សតិ ព្រហ្មចរិយវាសោ អភវិស្សាតិ ឯវំ នោ អញ្ញំ ជីវំ អញ្ញំ សរីរន្តិ មាលុង្ក្យបុត្ត ទិដ្ឋិយា សតិ ព្រហ្មចរិយវាសោ អភវិស្សាតិ ឯវម្បិ នោ តំ ជីវំ តំ សរីរន្តិ មាលុង្ក្យបុត្ត ទិដ្ឋិយា សតិ អញ្ញំ ជីវំ អញ្ញំ សរីរន្តិ វា ទិដ្ឋិយា សតិ អត្ថេវ ជាតិ។បេ។ និឃាតំ បញ្ញបេមិ។ ហោតិ តថាគតោ បរម្មរណាតិ មាលុង្ក្យបុត្ត ទិដ្ឋិយា សតិ ព្រហ្មចរិយវាសោ អភវិស្សាតិ ឯវំ នោ ន ហោតិ តថាគតោ បរម្មរណាតិ មាលុង្ក្យបុត្ត ទិដ្ឋិយា សតិ ព្រហ្មចរិយវាសោ អភវិស្សាតិ ឯវម្បិ នោ ហោតិ តថាគតោ បរម្មរណាតិ មាលុង្ក្យបុត្ត ទិដ្ឋិយា សតិ ន ហោតិ តថាគតោ បរម្មរណាតិ វា ទិដ្ឋិយា សតិ អត្ថេវ ជាតិ។បេ។ យេសាហំ ទិដ្ឋេវ ធម្មេ និឃាតំ បញ្ញបេមិ។ ហោតិ ច ន ច ហោតិ តថាគតោ បរម្មរណាតិ មាលុង្ក្យបុត្ត ទិដ្ឋិយា សតិ ព្រហ្មចរិយវាសោ អភវិស្សាតិ ឯវំ នោ នេវ ហោតិ ន ន ហោតិ តថាគតោ បរម្មរណាតិ មាលុង្ក្យបុត្ត ទិដ្ឋិយា សតិ ព្រហ្មចរិយវាសោ អភវិស្សាតិ ឯវម្បិ នោ ហោតិ ច ន ច ហោតិ តថាគតោ បរម្មរណាតិ មាលុង្ក្យបុត្ត ទិដ្ឋិយា សតិ នេវ ហោតិ ន ន ហោតិ តថាគតោ បរម្មរណាតិ វា ទិដ្ឋិយា សតិ អត្ថេវ ជាតិ អត្ថិ ជរា អត្ថិ មរណំ សន្តិ សោកបរិទេវទុក្ខទោមនស្សុបាយាសា យេសាហំ ទិដ្ឋេវ ធម្មេ និឃាតំ បញ្ញបេមិ។

[១៥២] តស្មាតិហ មាលុង្ក្យបុត្ត អព្យាកតញ្ច មេ អព្យាកតតោ ធារេថ ព្យាកតញ្ច មេ ព្យាកតតោ ធារេថ។ កិញ្ច មាលុង្ក្យបុត្ត មយា អព្យាកតំ សស្សតោ លោកោតិ មាលុង្ក្យបុត្ត មយា អព្យាកតំ អស្សស្សតោ លោកោតិ មាលុង្ក្យបុត្ត [ឱ. មាលុង្ក្យបុត្ត ឥតិ ន ទិស្សតិ។] មយា អព្យាកតំ អន្តវា លោកោតិ មាលុង្ក្យបុត្ត [ឱ. មាលុង្ក្យបុត្ត ឥតិ ន ទិស្សតិ។] មយា អព្យាកតំ អនន្តវា លោកោតិ មាលុង្ក្យបុត្ត [ឱ. មាលុង្ក្យបុត្ត ឥតិ ន ទិស្សតិ។] មយា អព្យាកតំ តំ ជីវំ តំ សរីរន្តិ មយា អព្យាកតំ អញ្ញំ ជីវំ អញ្ញំ សរីរន្តិ មយា អព្យាកតំ ហោតិ តថាគតោ បរម្មរណាតិ មយា អព្យាកតំ ន ហោតិ តថាគតោ បរម្មរណាតិ មយា អព្យាកតំ ហោតិ ច ន ច ហោតិ តថាគតោ បរម្មរណាតិ មយា អព្យាកតំ នេវ ហោតិ ន ន ហោតិ តថាគតោ បរម្មរណាតិ មយា អព្យាកតំ។ កស្មា ចេតំ មាលុង្ក្យបុត្ត មយា អព្យាកតំ ន ហេតំ មាលុង្ក្យបុត្ត អត្ថសញ្ហិតំ នាទិព្រហ្មចរិយកំ ន និព្វិទាយ ន វិរាគាយ ន និរោធាយ ន ឧបសមាយ ន អភិញ្ញាយ ន សម្ពោធាយ ន និព្វានាយ សំវត្តតិ តស្មា តំ មយា អព្យាកតំ។ កិញ្ច មាលុង្ក្យបុត្ត មយា ព្យាកតំ ឥទំ ទុក្ខន្តិ មាលុង្ក្យបុត្ត មយា ព្យាកតំ អយំ ទុក្ខសមុទយោតិ មយា ព្យាកតំ អយំ ទុក្ខនិរោធោតិ មយា ព្យាកតំ អយំ ទុក្ខនិរោធគាមិនី បដិបទាតិ មយា ព្យាកតំ។ កស្មា ចេតំ មាលុង្ក្យបុត្ត មយា ព្យាកតំ ឯតញ្ហិ មាលុង្ក្យបុត្ត អត្ថសញ្ហិតំ ឯតំ អាទិព្រហ្មចរិយកំ ឯតំ [ម. ឯតន្តិ ន ទិស្សតិ។] និព្វិទាយ វិរាគាយ និរោធាយ ឧបសមាយ អភិញ្ញាយ សម្ពោធាយ និព្វានាយ សំវត្តតិ តស្មា តំ មយា ព្យាកតំ។ តស្មាតិហ មាលុង្ក្យបុត្ត អព្យាកតញ្ច មេ អព្យាកតតោ ធារេថ ព្យាកតញ្ច មេ ព្យាកតតោ ធារេថាតិ។ ឥទមវោច ភគវា អត្តមនោ អាយស្មា មាលុង្ក្យបុត្តោ ភគវតោ ភាសិតំ អភិនន្ទីតិ។

ចូឡមាលុង្ក្យោសុត្តំ តតិយំ និដ្ឋិតំ។

ចតុត្ថំ មហាមាលុង្ក្យោវាទសុត្តំ [ឆដ្ឋ. មហាមាលុក្យសុត្តំ]

[១៥៣] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។ ភគវា ឯតទវោច ធារេថ នោ តុម្ហេ ភិក្ខវេ មយា ទេសិតានិ បញ្ចោរម្ភាគិយានិ សញ្ញោជនានីតិ។ ឯវំ វុត្តេ អាយស្មា មាលុង្ក្យបុត្តោ [មាលុង្ក្យោបុត្តោតិបិ មាលុក្យបុត្តោតិបិ បាឋោ ទិស្សតិ។] ភគវន្តំ ឯតទវោច អហំ ខោ ភន្តេ ធារេមិ ភគវតា ទេសិតានិ បញ្ចោរម្ភាគិយានិ សញ្ញោជនានីតិ [ឱ.ម. សំយោជនានីតិ។]។ យថាកថំ បន ត្វំ មាលុង្ក្យបុត្ត ធារេសិ មយា ទេសិតានិ បញ្ចោរម្ភាគិយានិ សញ្ញោជនានីតិ។ សក្កាយទិដ្ឋឹ ខោ អហំ ភន្តេ ភគវតា ឱរម្ភាគិយំ សញ្ញោជនំ ទេសិតំ ធារេមិ វិចិកិច្ឆំ ខោ អហំ ភន្តេ ភគវតា ឱរម្ភាគិយំ សញ្ញោជនំ ទេសិតំ ធារេមិ សីលព្វត្តបរាមាសំ ខោ អហំ ភន្តេ ភគវតា ឱរម្ភាគិយំ សញ្ញោជនំ ទេសិតំ ធារេមិ កាមច្ឆន្ទំ ខោ អហំ ភន្តេ ភគវតា ឱរម្ភាគិយំ សញ្ញោជនំ ទេសិតំ ធារេមិ ព្យាបាទំ ខោ អហំ ភគវតា ឱរម្ភាគិយំ សញ្ញោជនំ ទេសិតំ ធារេមិ ឯវំ ខោ អហំ ភន្តេ ធារេមិ ភគវតា ទេសិតានិ បញ្ចោរម្ភាគិយានិ សញ្ញោជនានីតិ។

[១៥៤] កស្ស ខោ នាម ត្វំ មាលុង្ក្យបុត្ត មយា ឥមានិ [ឱ. ឥមានីតិ ន ទិស្សតិ។] ឯវំ បញ្ចោរម្ភាគិយានិ សញ្ញោជនានិ ទេសិតានិ ធារេសិ ននុ មាលុង្ក្យបុត្ត អញ្ញតិត្ថិយា បរិព្វាជកា ឥមិនា តរុណូបមេន ឧបារម្ភេន ឧបារម្ភិស្សន្តិ ទហរស្ស ហិ មាលុង្ក្យបុត្ត កុមារស្ស មន្ទស្ស ឧត្តានសេយ្យកស្ស សក្កាយោតិបិ ន ហោតិ កុតោ បនស្ស ឧប្បជ្ជិស្សតិ សក្កាយទិដ្ឋិ អនុសេតិ ត្វេវស្ស សក្កាយទិដ្ឋានុសយោ ទហរស្ស ហិ មាលុង្ក្យបុត្ត កុមារស្ស មន្ទស្ស ឧត្តានសេយ្យកស្ស ធម្មាតិបិ ន ហោតិ កុតោ បនស្ស ឧប្បជ្ជិស្សតិ ធម្មេសុ វិចិកិច្ឆា អនុសេតិ ត្វេវស្ស វិចិកិច្ឆានុសយោ ទហរស្ស ហិ មាលុង្ក្យបុត្ត កុមារស្ស មន្ទស្ស ឧត្តានសេយ្យកស្ស សីលាតិបិ ន ហោតិ កុតោ បនស្ស ឧប្បជ្ជិស្សតិ សីលេសុ សីលព្វត្តបរាមាសោ អនុសេតិ ត្វេវស្ស សីលព្វត្តបរាមាសានុសយោ ទហរស្ស ហិ មាលុង្ក្យបុត្ត កុមារស្ស មន្ទស្ស ឧត្តានសេយ្យកស្ស កាមាតិបិ ន ហោតិ កុតោ បនស្ស ឧប្បជ្ជិស្សតិ កាមេសុ កាមច្ឆន្ទោ អនុសេតិ ត្វេវស្ស កាមរាគានុសយោ ទហរស្ស ហិ មាលុង្ក្យបុត្ត កុមារស្ស មន្ទស្ស ឧត្តានសេយ្យកស្ស សត្តាតិបិ ន ហោតិ កុតោ បនស្ស ឧប្បជ្ជិស្សតិ សត្តេសុ ព្យាបាទោ អនុសេតិ ត្វេវស្ស ព្យាបាទានុសយោ ននុ មាលុង្ក្យបុត្ត អញ្ញតិត្ថិយា បរិព្វាជកា ឥមិនា តរុណូបមេន ឧបារម្ភេន ឧបារម្ភិស្សន្តីតិ។ ឯវំ វុត្តេ អាយស្មា អានន្ទោ ភគវន្តំ ឯតទវោច ឯតស្ស ភគវា កាលោ ឯតស្ស សុគត កាលោ យំ ភគវា បញ្ចោរម្ភាគិយានិ សញ្ញោជនានិ ទេសេយ្យ ភគវតោ សុត្វា ភិក្ខូ ធារេស្សន្តីតិ។ តេនហានន្ទ សុណាហិ [ឱ.ម. សុណោហិ។] សាធុកំ មនសិករោហិ ភាសិស្សាមីតិ។ ឯវំ ភន្តេតិ ខោ អាយស្មា អានន្ទោ ភគវតោ បច្ចស្សោសិ។

[១៥៥] ភគវា ឯតទវោច ឥធានន្ទ អស្សុតវា បុថុជ្ជនោ អរិយានំ អទស្សាវី អរិយធម្មស្ស អកោវិទោ អរិយធម្មេ អវិនីតោ សប្បុរិសានំ អទស្សាវី សប្បុរិសធម្មស្ស អកោវិទោ សប្បុរិសធម្មេ អវិនីតោ សក្កាយទិដ្ឋិបរិយុដ្ឋិតេន ចេតសា វិហរតិ សក្កាយទិដ្ឋិបរេតេន ឧប្បន្នាយ ច សក្កាយទិដ្ឋិយា និស្សរណំ យថាភូតំ នប្បជានាតិ តស្ស សា សក្កាយទិដ្ឋិ ថាមគតា អប្បដិវិនីតា ឱរម្ភាគិយសញ្ញោជនំ។ វិចិកិច្ឆាបរិយុដ្ឋិតេន ចេតសា វិហរតិ វិចិកិច្ឆាបរេតេនឧប្បន្នាយ ច វិចិកិច្ឆាយ និស្សរណំ យថាភូតំ នប្បជានាតិ តស្ស សា វិចិកិច្ឆា ថាមគតា [ឱ.ម. ឱរម្ភាគិយំ សំយោជនំ។] អប្បដិវិនីតា ឱរម្ភាគិយសញ្ញោជនំ [ឱ.ម. ឱរម្ភាគិយំ សំយោជនំ។]។ សីលព្វត្តបរាមាសបរិយុដ្ឋិតេន ចេតសា វិហរតិ សីលព្វត្តបរាមាសបរេតេន ឧប្បន្នស្ស ច សីលព្វត្តបរាមាសស្ស និស្សរណំ យថាភូតំ នប្បជានាតិ តស្ស សោ សីលព្វត្តបរាមាសោ ថាមគតោ អប្បដិវិនីតោ ឱរម្ភាគិយសញ្ញោជនំ [ឱ.ម. ឱរម្ភាគិយំ សំយោជនំ។]។ កាមរាគបរិយុដ្ឋិតេន ចេតសា វិហរតិ កាមរាគបរេតេន ឧប្បន្នស្ស ច កាមរាគស្ស និស្សរណំ យថាភូតំ នប្បជានាតិ តស្ស សោ កាមរាគោ ថាមគតោ អប្បដិវិនីតោ ឱរម្ភាគិយសញ្ញោជនំ [ឱ.ម. ឱរម្ភាគិយំ សំយោជនំ។]។ ព្យាបាទបរិយុដ្ឋិតេន ចេតសា វិហរតិ ព្យាបាទបរេតេន ឧប្បន្នស្ស ច ព្យាបាទស្ស និស្សរណំ យថាភូតំ នប្បជានាតិ តស្ស សោ ព្យាបាទោ ថាមគតោ អប្បដិវិនីតោ ឱរម្ភាគិយសញ្ញោជនំ។ សុតវា ច ខោ អានន្ទ អរិយស្សាវកោ អរិយានំ ទស្សាវី អរិយធម្មស្ស កោវិទោ អរិយធម្មេ សុវិនីតោ សប្បុរិសានំ ទស្សាវី សប្បុរិសធម្មស្ស កោវិទោ សប្បុរិសធម្មេ សុវិនីតោ ន សក្កាយទិដ្ឋិបរិយុដ្ឋិតេន ចេតសា វិហរតិ ន សក្កាយទិដ្ឋិបរេតេន ឧប្បន្នាយ ច សក្កាយទិដ្ឋិយា និស្សរណំ យថាភូតំ បជានាតិ តស្ស សា សក្កាយទិដ្ឋិ សានុសយា បហីយតិ។ ន វិចិកិច្ឆាបរិយុដ្ឋិតេន ចេតសា វិហរតិ ន វិចិកិច្ឆាបរេតេន ឧប្បន្នាយ ច វិចិកិច្ឆាយ និស្សរណំ យថាភូតំ បជានាតិ តស្ស សា វិចិកិច្ឆា សានុសយា បហីយតិ។ ន សីលព្វត្តបរាមាសបរិយុដ្ឋិតេន ចេតសា វិហរតិ ន សីលព្វត្តបរាមាសបរេតេន ឧប្បន្នស្ស ច សីលព្វត្តបរាមាសស្ស និស្សរណំ យថាភូតំ បជានាតិ តស្ស សោ សីលព្វត្តបរាមាសោ សានុសយោ បហីយតិ។ ន កាមរាគបរិយុដ្ឋិតេន ចេតសា វិហរតិ ន កាមរាគបរេតេន ឧប្បន្នស្ស ច កាមរាគស្ស និស្សរណំ យថាភូតំ បជានាតិ តស្ស សោ កាមរាគោ សានុសយោ បហីយតិ។ ន ព្យាបាទបរិយុដ្ឋិតេន ចេតសា វិហរតិ ន ព្យាបាទបរេតេន ឧប្បន្នស្ស ច ព្យាបាទស្ស និស្សរណំ យថាភូតំ បជានាតិ តស្ស សោ ព្យាបាទោ សានុសយោ បហីយតិ។

[១៥៦] យោ អានន្ទ មគ្គោ យា បដិបទា បញ្ចន្នំ ឱរម្ភាគិយានំ សញ្ញោជនានំ បហានាយ តំ មគ្គំ តំ បដិបទំ អនាគម្ម បញ្ចោរម្ភាគិយានិ សញ្ញោជនានិ ញស្សតិ វា ទក្ខតិ វា បជហិស្សតិ វាតិ នេតំ ឋានំ វិជ្ជតិ។ សេយ្យថាបិ អានន្ទ មហតោ រុក្ខស្ស តិដ្ឋតោ សារវតោ តចំ អច្ឆេត្វា ផេគ្គុំ អច្ឆេត្វា សារច្ឆេទោ ភវិស្សតីតិ នេតំ ឋានំ វិជ្ជតិ ឯវមេវ ខោ អានន្ទ យោ មគ្គោ យា បដិបទា បញ្ចន្នំ ឱរម្ភាគិយានំ សញ្ញោជនានំ បហានាយ តំ មគ្គំ តំ បដិបទំ អនាគម្ម បញ្ចោរម្ភាគិយានិ សញ្ញោជនានិ ញស្សតិ វា ទក្ខតិ វា បជហិស្សតិ វាតិ នេតំ ឋានំ វិជ្ជតិ។ យោ ច ខោ អានន្ទ មគ្គោ យា បដិបទា បញ្ចន្នំ ឱរម្ភាគិយានំ សញ្ញោជនានំ បហានាយ តំ មគ្គំ តំ បដិបទំ អាគម្ម បញ្ចោរម្ភាគិយានិ សញ្ញោជនានិ ញស្សតិ វា ទក្ខតិ វា បជហិស្សតិ វាតិ ឋានមេតំ វិជ្ជតិ។ សេយ្យថាបិ អានន្ទ មហតោ រុក្ខស្ស តិដ្ឋតោ សារវតោ តចំ ឆេត្វា ផេគ្គុំ ឆេត្វា សារច្ឆេទោ ភវិស្សតីតិ ឋានមេតំ វិជ្ជតិ ឯវមេវ ខោ អានន្ទ យោ មគ្គោ យា បដិបទា បញ្ចន្នំ ឱរម្ភាគិយានំ សញ្ញោជនានំ បហានាយ តំ មគ្គំ តំ បដិបទំ អាគម្ម បញ្ចោរម្ភាគិយានិ សញ្ញោជនានិ ញស្សតិ វា ទក្ខតិ វា បជហិស្សតិ វាតិ ឋានមេតំ វិជ្ជតិ។ សេយ្យថាបិ អានន្ទ គង្គា នទី បូរា ឧទកស្ស សមតិត្តិកា កាកបេយ្យា អថខោ ទុព្វលកោ បុរិសោ អាគច្ឆេយ្យ អហំ ឥមិស្សា គង្គាយ នទិយា តិរិយំ ពាហាយ សោតំ ឆេត្វា សោត្ថិនា បារំ គច្ឆិស្សាមីតិ [ឱ. គច្ឆាមីតិ។] សោ ន សក្កុណេយ្យ គង្គាយ នទិយា តិរិយំ ពាហាយ សោតំ ឆេត្វា សោត្ថិនា បារំ គន្តុំ ឯវមេវ ខោ អានន្ទ យស្ស កស្សចិ សក្កាយនិរោធាយ ធម្មេ ទេសិយមានេ ចិត្តំ ន បក្ខន្ទតិ នប្បសីទតិ ន សន្តិដ្ឋតិ ន វិមុច្ចតិ។ សេយ្យថាបិ សោ ទុព្វលកោ បុរិសោ ឯវមេវ តេ [ឱ.ម. ឯវមេតេ។] ទដ្ឋព្វា។ សេយ្យថាបិ អានន្ទ គង្គា នទី បូរា ឧទកស្ស សមតិត្តិកា កាកបេយ្យា អថ ពលវា បុរិសោ អាគច្ឆេយ្យ អហំ ឥមិស្សា គង្គាយ នទិយា តិរិយំ ពាហាយ សោតំ ឆេត្វា សោត្ថិនា បារំ គមិស្សាមីតិ សោ សក្កុណេយ្យ គង្គាយ នទិយា តិរិយំ ពាហាយ សោតំ ឆេត្វា សោត្ថិនា បារំ គន្តុំ ឯវមេវ ខោ អានន្ទ យស្ស កស្សចិ សក្កាយនិរោធាយ ធម្មេ ទេសិយមានេ ចិត្តំ បក្ខន្ទតិ បសីទតិ សន្តិដ្ឋតិ វិមុច្ចតិ។ សេយ្យថាបិ សោ ពលវា បុរិសោ ឯវមេវ តេ [ឱ.ម. ឯវមេតេ។] ទដ្ឋព្វា។

[១៥៧] កតមោ ច អានន្ទ មគ្គោ កតមា ច បដិបទា [ឱ. កតមោ ចានន្ទ មគ្គោ កតមា បដិបទាតិ ទិស្សន្តិ។] បញ្ចន្នំ ឱរម្ភាគិយានំ សញ្ញោជនានំ បហានាយ។ ឥធានន្ទ ភិក្ខុ ឧបធិវិវេកា អកុសលានំ ធម្មានំ បហានា សព្វសោ កាយទុដ្ឋុល្លានំ បដិប្បស្សទ្ធិយា វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ។ សោ យទេវ តត្ថ ហោតិ រូបគតំ វេទនាគតំ សញ្ញាគតំ សង្ខារគតំ វិញ្ញាណគតំ តេ ធម្មេ អនិច្ចតោ ទុក្ខតោ រោគតោ គណ្ឌតោ សល្លតោ អឃតោ អាពាធតោ បរតោ បលោកតោ សុញ្ញតោ អនត្តតោ សមនុបស្សតិ។ សោ តេហិ ធម្មេហិ ចិត្តំ បដិបាបេតិ [ឱ. បដិវាបេតិ។ ម. បតិដ្ឋាបេតិ បដិបាទេតីតិ អដ្ឋកថាយំ ទិស្សតិ។] សោ តេហិ ធម្មេហិ ចិត្តំ បដិបាបេត្វា អមតាយ ធាតុយា ចិត្តំ ឧបសំហរតិ ឯតំ សន្តំ ឯតំ បណីតំ យទិទំ សព្វសង្ខារសមថោ សព្វូបធិប្បដិនិស្សគ្គោ តណ្ហក្ខយោ វិរាគោ និរោធោ និព្វានន្តិ។ សោ តត្ថដ្ឋិតោ អាសវានំ ខយំ បាបុណាតិ នោ ចេ អាសវានំ ខយំ បាបុណាតិ តេនេវ ធម្មរាគេន តាយ ធម្មនន្ទិយា បញ្ចន្នំ ឱរម្ភាគិយានំ សញ្ញោជនានំ បរិក្ខយា ឱបបាតិកោ ហោតិ តត្ថ បរិនិព្វាយី អនាវត្តិធម្មោ តស្មា លោកា។ អយម្បិ ខោ អានន្ទ មគ្គោ អយំ បដិបទា បញ្ចន្នំ ឱរម្ភាគិយានំ សញ្ញោជនានំ បហានាយ។ បុន ចបរំ អានន្ទ ភិក្ខុ វិតក្កវិចារានំ វូបសមា។បេ។ តតិយំ ឈានំ។បេ។ ចតុត្ថំ ឈានំ ឧបសម្បជ្ជ វិហរតិ។ សោ យទេវ តត្ថ ហោតិ រូបគតំ វេទនាគតំ សញ្ញាគតំ សង្ខារគតំ វិញ្ញាណគតំ។បេ។ សញ្ញោជនានំ បហានាយ។

[១៥៨] បុន ចបរំ អានន្ទ ភិក្ខុ សព្វសោ រូបសញ្ញានំ សមតិក្កមា បដិឃសញ្ញានំ អដ្ឋង្គមា នានត្តសញ្ញានំ អមនសិការា អនន្តោ អាកាសោតិ អាកាសានញ្ចាយតនំ ឧបសម្បជ្ជ វិហរតិ។ សោ យទេវ តត្ថ ហោតិ វេទនាគតំ សញ្ញាគតំ សង្ខារគតំ វិញ្ញាណគតំ តេ ធម្មេ អនិច្ចតោ ទុក្ខតោ រោគតោ គណ្ឌតោ សល្លតោ អឃតោ អាពាធតោ បរតោ បលោកតោ សុញ្ញតោ អនត្តតោ សមនុបស្សតិ។ សោ តេហិ ធម្មេហិ ចិត្តំ បដិបាបេតិ សោ តេហិ ធម្មេហិ ចិត្តំ បដិបាបេត្វា អមតាយ ធាតុយា ចិត្តំ ឧបសំហរតិ ឯតំ សន្តំ ឯតំ បណីតំ យទិទំ សព្វសង្ខារសមថោ សព្វូបធិប្បដិនិស្សគ្គោ តណ្ហក្ខយោ វិរាគោ និរោធោ និព្វានន្តិ។ សោ តត្ថដ្ឋិតោ អាសវានំ ខយំ បាបុណាតិ នោ ចេ អាសវានំ ខយំ បាបុណាតិ តេនេវ ធម្មរាគេន តាយ ធម្មនន្ទិយា បញ្ចន្នំ ឱរម្ភាគិយានំ សញ្ញោជនានំ បរិក្ខយា ឱបបាតិកោ ហោតិ តត្ថ បរិនិព្វាយី អនាវត្តិធម្មោ តស្មា លោកា។ អយម្បិ ខោ អានន្ទ មគ្គោ អយំ បដិបទា បញ្ចន្នំ ឱរម្ភាគិយានំ សញ្ញោជនានំ បហានាយ។ បុន ចបរំ អានន្ទ ភិក្ខុ សព្វសោ អាកាសានញ្ចាយតនំ សមតិក្កម្ម អនន្តំ វិញ្ញាណន្តិ វិញ្ញាណញ្ចាយតនំ ឧបសម្បជ្ជ វិហរតិ។ សោ យទេវ តត្ថ ហោតិ វេទនាគតំ។បេ។ សញ្ញោជនានំ បហានាយ។ បុន ចបរំ អានន្ទ ភិក្ខុ សព្វសោ វិញ្ញាណញ្ចាយតនំ សមតិក្កម្ម នត្ថិ កិញ្ចីតិ អាកិញ្ចញ្ញាយតនំ ឧបសម្បជ្ជ វិហរតិ។ សោ យទេវ តត្ថ ហោតិ វេទនាគតំ សញ្ញាគតំ សង្ខារគតំ វិញ្ញាណគតំ តេ ធម្មេ អនិច្ចតោ ទុក្ខតោ រោគតោ គណ្ឌតោ សល្លតោ អឃតោ អាពាធតោ បរតោ បលោកតោ សុញ្ញតោ អនត្តតោ សមនុបស្សតិ។ សោ តេហិ ធម្មេហិ ចិត្តំ បដិបាបេតិ សោ តេហិ ធម្មេហិ ចិត្តំ បដិបាបេត្វា អមតាយ ធាតុយា ចិត្តំ ឧបសំហរតិ ឯតំ សន្តំ ឯតំ បណីតំ យទិទំ សព្វសង្ខារសមថោ សព្វូបធិប្បដិនិស្សគ្គោ តណ្ហក្ខយោ វិរាគោ និរោធោ និព្វានន្តិ។ សោ តត្ថដ្ឋិតោ អាសវា ខយំ បាបុណាតិ នោ ចេ អាសវានំ ខយំ បាបុណាតិ តេនេវ ធម្មរាគេន តាយ ធម្មនន្ទិយា បញ្ចន្នំ ឱរម្ភាគិយានំ សញ្ញោជនានំ បរិក្ខយា ឱបបាតិកោ ហោតិ តត្ថ បរិនិព្វាយី អនាវត្តិធម្មោ តស្មា លោកា។ អយំ ខោ អានន្ទ មគ្គោ អយំ បដិបទា បញ្ចន្នំ ឱរម្ភាគិយានំ សញ្ញោជនានំ បហានាយាតិ។

[១៥៩] ឯសោ ចេ ភន្តេ មគ្គោ ឯសា បដិបទា បញ្ចន្នំ ឱរម្ភាគិយានំ សញ្ញោជនានំ បហានាយ អថ កិញ្ចរហិ ឥធេកច្ចេ ភិក្ខូ ចេតោវិមុត្តិនោ ឯកច្ចេ ភិក្ខូ [ឱ. ភិក្ខូតិ ន ទិស្សតិ។] បញ្ញាវិមុត្តិនោតិ។ ឯត្ថ ខោ តេសាហំ អានន្ទ ឥន្ទ្រិយវេមត្តតំ វទាមីតិ។ ឥទមវោច ភគវា អត្តមនោ អាយស្មា អានន្ទោ ភគវតោ ភាសិតំ អភិនន្ទីតិ។

មហាមាលុង្ក្យោវាទសុត្តំ ចតុត្ថំ និដ្ឋិតំ។

បញ្ចមំ ភទ្ទាលិសុត្តំ

[១៦០] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។ ភគវា ឯតទវោច អហំ ខោ ភិក្ខវេ ឯកាសនភោជនំ ភុញ្ជាមិ ឯកាសនភោជនំ ខោ អហំ ភិក្ខវេ ភុញ្ជមានោ អប្បាពាធតញ្ច សញ្ជានាមិ អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ច អថ តុម្ហេបិ ភិក្ខវេ ឯកាសនភោជនំ ភុញ្ជថ ឯកាសនភោជនំ ខោ ភិក្ខវេ តុម្ហេបិ ភុញ្ជមានា អប្បាពាធតញ្ច សញ្ជានិស្សថ អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ចាតិ។

[១៦១] ឯវំ វុត្តេ អាយស្មា ភទ្ទាលិ ភគវន្តំ ឯតទវោច អហំ ខោ ភន្តេ ន ឧស្សហាមិ ឯកាសនភោជនំ ភុញ្ជិតុំ ឯកាសនភោជនញ្ហិ មេ ភន្តេ ភុញ្ជតោ សិយា កុក្កុច្ចំ សិយា វិប្បដិសារោតិ។ តេនហិ ត្វំ ភទ្ទាលិ យត្ថ និមន្តិតោ អស្សសិ តត្ថ ឯកទេសំ ភុញ្ជិត្វា ឯកទេសំ នីហរិត្វាបិ បរិភុញ្ជេយ្យាសិ ឯវម្បិ ខោ ត្វំ ភទ្ទាលិ ភុញ្ជមានោ បេស្សសីតិ។ ឯវម្បិ ខោ អហំ ភន្តេ ន ឧស្សហាមិ ភុញ្ជិតុំ ឯវម្បិ ហិ មេ ភន្តេ ភុញ្ជតោ សិយា កុក្កុច្ចំ សិយា វិប្បដិសារោតិ។ អថខោ អាយស្មា ភទ្ទាលិ ភគវតា សិក្ខាបទេ បញ្ញាបិយមានេ ភិក្ខុសង្ឃេ សិក្ខំ សមាទិយមានេ អនុស្សាហំ បវេទេសិ។ អថខោ អាយស្មា ភទ្ទាលិ សព្វន្តំ តេមាសំ ន ភគវតោ សម្មុខីភាវំ ភទ្ទាលិ យថាតំ សត្ថុ សាសនេ សិក្ខាយ អបរិបូរការី [អបរិបូរិការីបីតិ បាឋោ។]។

[១៦២] តេន ខោ បន សមយេន សម្ពហុលា ភិក្ខូ ភគវតោ ចីវរកម្មំ ករោន្តិ និដ្ឋិតចីវរោ ភគវា តេមាសច្ចយេន ចារិកំ បក្កមិស្សតីតិ។ អថខោ អាយស្មា ភទ្ទាលិ យេ តេ ភិក្ខូ តេនុបសង្កមិ ឧបសង្កមិត្វា តេហិ ភិក្ខូហិ សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នំ ខោ អាយស្មន្តំ ភទ្ទាលឹ តេ ភិក្ខូ ឯតទវោចុំ ឥទំ ខោ អាវុសោ ភទ្ទាលិ ភគវតោ ចីវរកម្មំ ករីយតិ និដ្ឋិតចីវរោ ភគវា តេមាសច្ចយេន ចារិកំ បក្កមិស្សតីតិ។ ឥង្ឃាវុសោ ភទ្ទាលិ ឯតំ ទេសំ សាធុកំ មនសិករោហិ មា តេ បច្ឆា ទុក្ករតរំ អហោសីតិ។ ឯវមាវុសោតិ ខោ អាយស្មា ភទ្ទាលិ តេសំ ភិក្ខូនំ បដិស្សុត្វា យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ អាយស្មា ភទ្ទាលិ ភគវន្តំ ឯតទវោច អច្ចយោ មំ ភន្តេ អច្ចគមា យថាពាលំ យថាមូឡ្ហំ យថាអកុសលំ យោហំ ភគវតា សិក្ខាបទេ បញ្ញាបិយមានេ ភិក្ខុសង្ឃេ សិក្ខំ សមាទិយមានេ អនុស្សាហំ បវេទេសឹ [ម. បវេទេមិ។] តស្ស មេ ភន្តេ ភគវា អច្ចយំ អច្ចយតោ បដិគ្គណ្ហាតុ អាយតឹ សំវរាយាតិ។

[១៦៣] តគ្ឃ ត្វំ ភទ្ទាលិ អច្ចយោ អច្ចគមា យថាពាលំ យថាមូឡ្ហំ យថាអកុសលំ យំ ត្វំ មយា សិក្ខាបទេ បញ្ញាបិយមានេ ភិក្ខុសង្ឃេ សិក្ខំ សមាទិយមានេ អនុស្សាហំ បវេទេសិ។ សមយោបិ ខោ តេ ភទ្ទាលិ អប្បដិវិទ្ធោ អហោសិ ភគវា ខោ សាវត្ថិយំ វិហរតិ ភគវាបិ មំ ជានិស្សតិ ភទ្ទាលិ នាម ភិក្ខុ សត្ថុ សាសនេ សិក្ខាយ អបរិបូរការីតិ អយម្បិ ខោ តេ ភទ្ទាលិ សមយោ អប្បដិវិទ្ធោ អហោសិ។ សមយោបិ ខោ តេ ភទ្ទាលិ អប្បដិវិទ្ធោ អហោសិ សម្ពហុលា ខោ ភិក្ខុ សាវត្ថិយំ វស្សំ ឧបគតា តេបិ មំ ជានិស្សន្តិ ភទ្ទាលិ នាម ភិក្ខុ សត្ថុ សាសនេ សិក្ខាយ អបរិបូរការីតិ អយម្បិ ខោ តេ ភទ្ទាលិ សមយោ អប្បដិវិទ្ធោ អហោសិ។ សមយោបិ ខោ តេ ភទ្ទាលិ អប្បដិវិទ្ធោ អហោសិ សម្ពហុលា ខោ ភិក្ខុនិយោ សាវត្ថិយំ វស្សំ ឧបគតា តាបិ មំ ជានិស្សន្តិ ភទ្ទាលិ នាម ភិក្ខុ សត្ថុ សាសនេ សិក្ខាយ អបរិបូរការីតិ អយម្បិ ខោ តេ ភទ្ទាលិ សមយោ អប្បដិវិទ្ធោ អហោសិ។ សមយោបិ ខោ តេ ភទ្ទាលិ អប្បដិវិទ្ធោ អហោសិ សម្ពហុលា ខោ ឧបាសកា សាវត្ថិយំ បដិវសន្តិ តេបិ មំ ជានិស្សន្តិ ភទ្ទាលិ នាម ភិក្ខុ សត្ថុ សាសនេ សិក្ខាយ អបរិបូរការីតិ អយម្បិ ខោ តេ ភទ្ទាលិ សមយោ អប្បដិវិទ្ធោ អហោសិ។ សមយោបិ ខោ តេ ភទ្ទាលិ អប្បដិវិទ្ធោ អហោសិ សម្ពហុលា ខោ ឧបាសិកា សាវត្ថិយំ បដិវសន្តិ តាបិ មំ ជានិស្សន្តិ ភទ្ទាលិ នាម ភិក្ខុ សត្ថុ សាសនេ សិក្ខាយ អបរិបូរការីតិ អយម្បិ ខោ តេ ភទ្ទាលិ សមយោ អប្បដិវិទ្ធោ អហោសិ។ សមយោបិ ខោ តេ ភទ្ទាលិ អប្បដិវិទ្ធោ អហោសិ សម្ពហុលា ខោ នានាតិត្ថិយា សមណព្រាហ្មណា សាវត្ថិយំ វស្សំ ឧបគតា តេបិ មំ ជានិស្សន្តិ ភទ្ទាលិ នាម ភិក្ខុ សមណស្ស គោតមស្ស សាវកោ ថេរញ្ញតរោ ភិក្ខុ សាសនេ សិក្ខាយ អបរិបូរការីតិ អយម្បិ ខោ តេ ភទ្ទាលិ សមយោ អប្បដិវិទ្ធោ អហោសីតិ។ អច្ចយោ មំ ភន្តេ អច្ចគមា យថាពាលំ យថាមូឡ្ហំ យថាអកុសលំ យោហំ ភគវតា សិក្ខាបទេ បញ្ញាបិយមានេ ភិក្ខុសង្ឃេ សិក្ខំ សមាទិយមានេ អនុស្សាហំ បវេទេសឹ តស្ស មេ ភន្តេ ភគវា អច្ចយំ អច្ចយតោ បដិគ្គណ្ហាតុ អាយតឹ សំវរាយាតិ។

[១៦៤] តគ្ឃ ត្វំ ភទ្ទាលិ អច្ចយោ អច្ចគមា យថាពាលំ យថាមូឡ្ហំ យថាអកុសលំ យំ ត្វំ មយា សិក្ខាបទេ បញ្ញាបិយមានេ ភិក្ខុសង្ឃេ សិក្ខំ សមាទិយមានេ អនុស្សាហំ បវេទេសិ។ តំ កឹ មញ្ញសិ ភទ្ទាលិ ឥធស្ស ភិក្ខុ ឧភតោភាគវិមុត្តោ តមហំ ឯវំ វទេយ្យំ ឯហិ មេ ត្វំ ភិក្ខុ បង្កេ សង្កមោ ហោហីតិ អបិ នុ ខោ [ឱ. ខោសទ្ទោ នត្ថិ។] សោ សង្កមេយ្យ វា អញ្ញេន វា កាយំ សន្នាមេយ្យ នោតិ វា វទេយ្យាតិ។ នោ ហេតំ ភន្តេ។ តំ កឹ មញ្ញសិ ភទ្ទាលិ ឥធស្ស ភិក្ខុ បញ្ញាវិមុត្តោ កាយសក្ខី ទិដ្ឋិប្បត្តោ សទ្ធាវិមុត្តោ ធម្មានុសារី សទ្ធានុសារី តមហំ ឯវំ វទេយ្យំ ឯហិ មេ ត្វំ ភិក្ខុ បង្កេ សង្កមោ ហោហីតិ អបិ នុ ខោ [ឱ. ខោសទ្ទោ នត្ថិ។] សោ សង្កមេយ្យ វា អញ្ញេន វា កាយំ សន្នាមេយ្យ នោតិ វា វទេយ្យាតិ។ នោ ហេតំ ភន្តេ។ តំ កឹ មញ្ញសិ ភទ្ទាលិ អបិ នុ ត្វំ ភទ្ទាលិ [ម. ភទ្ទាលីតិ ន ទិស្សតិ។] តស្មឹ សមយេ ឧភតោភាគវិមុត្តោ វា ហោសិ បញ្ញាវិមុត្តោ វា កាយសក្ខី វា ទិដ្ឋិប្បត្តោ វា សទ្ធាវិមុត្តោ វា ធម្មានុសារី វា សទ្ធានុសារី វាតិ។ នោ ហេតំ ភន្តេ។ ននុ ត្វំ ភទ្ទាលិ តស្មឹ សមយេ រិត្តោ តុច្ឆោ អបរទ្ធោតិ។ ឯវំ ភន្តេ អច្ចយោ មំ ភន្តេ អច្ចគមា យថាពាលំ យថាមូឡ្ហំ យថាអកុសលំ យោហំ ភគវតា សិក្ខាបទេ បញ្ញាបិយមានេ ភិក្ខុសង្ឃេ សិក្ខំ សមាទិយមានេ អនុស្សាហំ បវេទេសឹ តស្ស មេ ភន្តេ ភគវា អច្ចយំ អច្ចយតោ បដិគ្គណ្ហាតុ អាយតឹ សំវរាយាតិ។

[១៦៥] តគ្ឃ ត្វំ ភទ្ទាលិ អច្ចយោ អច្ចគមា យថាពាលំ យថាមូឡ្ហំ យថាអកុសលំ យំ ត្វំ មយា សិក្ខាបទេ បញ្ញាបិយមានេ ភិក្ខុសង្ឃេ សិក្ខំ សមាទិយមានេ អនុស្សាហំ បវេទេសិ យតោ ច ខោ ត្វំ ភទ្ទាលិ អច្ចយំ អច្ចយតោ ទិស្វា យថាធម្មំ បដិករោសិ តន្តេ មយំ បដិគ្គណ្ហាម វុទ្ធិ ហេសា ភទ្ទាលិ អរិយស្ស វិនយេ យោ អច្ចយំ អច្ចយតោ ទិស្វា យថាធម្មំ បដិករោតិ អាយតឹ សំវរំ អាបជ្ជតិ។

[១៦៦] ឥធ ភទ្ទាលិ ឯកច្ចោ ភិក្ខុ សត្ថុ សាសនេ សិក្ខាយ [ឱ. សិក្ខាយាតិ ន ទិស្សតិ។] អបរិបូរការី ហោតិ តស្ស ឯវំ ហោតិ យន្នូនាហំ វិវិត្តំ សេនាសនំ ភជេយ្យំ អរញ្ញំ រុក្ខមូលំ បព្វតំ កន្ទរំ គិរិគុហំ សុសានំ វនបត្ថំ អព្ភោកាសំ បលាលបុញ្ជំ អប្បេវនាមាហំ ឧត្តរឹ មនុស្សធម្មា អលមរិយញ្ញាណទស្សនវិសេសំ សច្ឆិករេយ្យន្តិ។ សោ វិវិត្តំ សេនាសនំ ភជតិ អរញ្ញំ រុក្ខមូលំ បព្វតំ កន្ទរំ គិរិគុហំ សុសានំ វនបត្ថំ អព្ភោកាសំ បលាលបុញ្ជំ តស្ស តថា វូបកដ្ឋស្ស វិហរតោ សត្ថាបិ ឧបវទតិ អនុវិច្ច វិញ្ញូ សព្រហ្មចារី ឧបវទន្តិ ទេវតាបិ ឧបវទន្តិ អត្តាបិ [ម. អត្តនាបិ។] អត្តានំ ឧបវទតិ សោ សត្ថារាបិ ឧបវទិតោ អនុវិច្ច វិញ្ញូហិ សព្រហ្មចារីហិ ឧបវទិតោ ទេវតាហិបិ ឧបវទិតោ អត្តនាបិ អត្តា [ឱ. អត្តានំ។] ឧបវទិតោ ន ឧត្តរឹ មនុស្សធម្មា អលមរិយញ្ញាណទស្សនវិសេសំ សច្ឆិករោតិ តំ កិស្ស ហេតុ ឯវញ្ហេតំ [ម. ឯវញ្ហិទំ។] ភទ្ទាលិ ហោតិ យថាតំ សត្ថុ សាសនេ សិក្ខាយ អបរិបូរការិស្ស។

[១៦៧] ឥធ បន ភទ្ទាលិ ឯកច្ចោ ភិក្ខុ សត្ថុ សាសនេ សិក្ខាយ បរិបូរការី ហោតិ តស្ស ឯវំ ហោតិ យន្នូនាហំ វិវិត្តំ សេនាសនំ ភជេយ្យំ អរញ្ញំ រុក្ខមូលំ បព្វតំ កន្ទរំ គិរិគុហំ សុសានំ វនបត្ថំ អព្ភោកាសំ បលាលបុញ្ជំ អប្បេវនាមាហំ ឧត្តរឹ មនុស្សធម្មា អលមរិយញ្ញាណទស្សនវិសេសំ សច្ឆិករេយ្យន្តិ។ សោ វិវិត្តំ សេនាសនំ ភជតិ អរញ្ញំ រុក្ខមូលំ បព្វតំ កន្ទរំ គិរិគុហំ សុសានំ វនបត្ថំ អព្ភោកាសំ បលាលបុញ្ជំ តស្ស តថា វូបកដ្ឋស្ស វិហរតោ សត្ថាបិ ន ឧបវទតិ អនុវិច្ច វិញ្ញូ សព្រហ្មចារី ន ឧបវទន្តិ ទេវតាបិ ន ឧបវទន្តិ អត្តាបិ អត្តានំ ន ឧបវទតិ សោ សត្ថារាបិ អនុបវទិតោ អនុវិច្ច វិញ្ញូហិ សព្រហ្មចារីហិ អនុបវទិតោ ទេវតាហិបិ អនុបវទិតោ អត្តនាបិ អត្តា អនុបវទិតោ ឧត្តរឹ មនុស្សធម្មា អលមរិយញ្ញាណទស្សនវិសេសំ សច្ឆិករោតិ។ សោ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ តំ កិស្ស ហេតុ ឯវញ្ហេតំ ភទ្ទាលិ ហោតិ យថាតំ សត្ថុ សាសនេ សិក្ខាយ បរិបូរការិស្ស។ បុន ចបរំ ភទ្ទាលិ ភិក្ខុ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវំ អវិតក្កំ អវិចារំ សមាធិជំ បីតិសុខំ ទុតិយំ ឈានំ ឧបសម្បជ្ជ វិហរតិ តំ កិស្ស ហេតុ ឯវញ្ហេតំ ភទ្ទាលិ ហោតិ យថាតំ សត្ថុ សាសនេ សិក្ខាយ បរិបូរការិស្ស។ បុន ចបរំ ភទ្ទាលិ ភិក្ខុ បីតិយា ច វិរាគា។បេ។ តតិយំ ឈានំ ឧបសម្បជ្ជ វិហរតិ តំ កិស្ស ហេតុ ឯវញ្ហេតំ ភទ្ទាលិ ហោតិ យថាតំ សត្ថុ សាសនេ សិក្ខាយ បរិបូរការិស្ស។ បុន ចបរំ ភទ្ទាលិ ភិក្ខុ សុខស្ស ច បហានា។បេ។ ចតុត្ថំ ឈានំ ឧបសម្បជ្ជ វិហរតិ តំ កិស្ស ហេតុ ឯវញ្ហេតំ ភទ្ទាលិ ហោតិ យថាតំ សត្ថុ សាសនេ សិក្ខាយ បរិបូរការិស្ស។

[១៦៨] សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ បុព្វេនិវាសានុស្សតិញ្ញាណាយ ចិត្តំ អភិនិន្នាមេតិ។ សោ អនេកវិហិតំ បុព្វេនិវាសំ អនុស្សរតិ សេយ្យថីទំ ឯកម្បិ ជាតឹ។បេ។ ឥតិ សាការំ សឧទ្ទេសំ អនេកវិហិតំ បុព្វេនិវាសំ អនុស្សរតិ តំ កិស្ស ហេតុ ឯវញ្ហេតំ ភទ្ទាលិ ហោតិ យថាតំ សត្ថុ សាសនេ សិក្ខាយ បរិបូរការិស្ស។ សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ សត្តានំ ចុតូបបាតញ្ញាណាយ ចិត្តំ អភិនិន្នាមេតិ។ សោ ទិព្វេន ចក្ខុនា វិសុទ្ធេន អតិក្កន្តមានុសកេន សត្តេ បស្សតិ ចវមានេ ឧបបជ្ជមានេ ហីនេ បណីតេ សុវណ្ណេ ទុព្វណ្ណេ សុគតេ ទុគ្គតេ យថាកម្មូបគ្គេ សត្តេ បជានាតិ ឥមេ វត ភោន្តោ សត្តា កាយទុច្ចរិតេន សមន្នាគតា។បេ។ វិនិបាតំ និរយំ ឧបបន្នា ឥមេ វា បន ភោន្តោ សត្តា កាយសុចរិតេន សមន្នាគតា។បេ។ សុគតឹ សគ្គំ លោកំ ឧបបន្នាតិ។ ឥតិ ទិព្វេន ចក្ខុនា វិសុទ្ធេន អតិក្កន្តមានុសកេន។បេ។ យថាកម្មូបគ្គេ សត្តេ បជានាតិ តំ កិស្ស ហេតុ ឯវញ្ហេតំ ភទ្ទាលិ ហោតិ យថាតំ សត្ថុ សាសនេ សិក្ខាយ បរិបូរការិស្ស។ សោ ឯវំ សមាហិតេ ចិត្តេ បរិសុទ្ធេ បរិយោទាតេ អនង្គណេ វិគតូបក្កិលេសេ មុទុភូតេ កម្មនីយេ ឋិតេ អានេញ្ជប្បត្តេ អាសវានំ ខយញ្ញាណាយ ចិត្តំ អភិនិន្នាមេតិ។ សោ ឥទំ ទុក្ខន្តិ យថាភូតំ បជានាតិ។បេ។ អយំ ទុក្ខនិរោធគាមិនី បដិបទាតិ យថាភូតំ បជានាតិ ឥមេ អាសវាតិ យថាភូតំ បជានាតិ អយំ អាសវសមុទយោតិ យថាភូតំ បជានាតិ អយំ អាសវនិរោធោតិ យថាភូតំ បជានាតិ អយំ អាសវនិរោធគាមិនី បដិបទាតិ យថាភូតំ បជានាតិ។ តស្ស ឯវំ ជានតោ ឯវំ បស្សតោ កាមាសវាបិ ចិត្តំ វិមុច្ចតិ ទិដ្ឋាសវាបិ ចិត្តំ វិមុច្ចតិ ភវាសវាបិ ចិត្តំ វិមុច្ចតិ អវិជ្ជាសវាបិ ចិត្តំ វិមុច្ចតិ វិមុត្តស្មឹ វិមុត្តមិតិ ញាណំ ហោតិ ខីណា ជាតិ វុសិតំ ព្រហ្មចរិយំ កតំ ករណីយំ នាបរំ ឥត្ថត្តាយាតិ បជានាតិ តំ កិស្ស ហេតុ ឯវញ្ហេតំ ភទ្ទាលិ ហោតិ យថាតំ សត្ថុ សាសនេ សិក្ខាយ បរិបូរការិស្សាតិ។ ឯវំ វុត្តេ អាយស្មា ភទ្ទាលិ ភគវន្តំ ឯតទវោច កោនុ ខោ ភន្តេ ហេតុ កោ បច្ចយោ យេនមិធេកច្ចំ ភិក្ខុំ បវយ្ហ បវយ្ហ ការណំ ករោន្តិ កោ បន ភន្តេ ហេតុ កោ បច្ចយោ យេនមិធេកច្ចំ ភិក្ខុំ នោ តថា បវយ្ហ បវយ្ហ ការណំ ករោន្តីតិ។

[១៦៩] ឥធ ភទ្ទាលិ ឯកច្ចោ ភិក្ខុ អភិណ្ហាបត្តិកោ ហោតិ អាបត្តិពហុលោ សោ ភិក្ខូហិ វុច្ចមានោ អញ្ញេនញ្ញំ [ម. អញ្ញេនាញ្ញំ។] បដិចរតិ ពហិទ្ធា កថំ អបនាមេតិ កោបញ្ច ទោសញ្ច អប្បច្ចយញ្ច បាតុករោតិ ន សម្មា វត្តតិ ន លោមំ បាតេតិ ន នេត្ថារំ វត្តតិ យេន សង្ឃោ អត្តមនោ ហោតិ តំ ករោមីតិ នាហ។ តត្រ ភទ្ទាលិ ភិក្ខូនំ ឯវំ ហោតិ អយំ ខោ អាវុសោ ភិក្ខុ អភិណ្ហាបត្តិកោ អាបត្តិពហុលោ សោ ភិក្ខូហិ វុច្ចមានោ អញ្ញេនញ្ញំ បដិចរតិ ពហិទ្ធា កថំ អបនាមេតិ កោបញ្ច ទោសញ្ច អប្បច្ចយញ្ច បាតុករោតិ ន សម្មា វត្តតិ ន លោមំ បាតេតិ ន នេត្ថារំ វត្តតិ យេន សង្ឃោ អត្តមនោ ហោតិ តំ ករោមីតិ នាហ សាធុ វតាយស្មន្តោ ឥមស្ស ភិក្ខុនោ តថា តថា ឧបបរិក្ខថ យថយិទំ [ឱ. យថាស្សិទំ] អធិករណំ ន ខិប្បមេវ វូបសមេ្មយ្យាតិ។ តស្ស ខោ ឯវំ ភទ្ទាលិ ភិក្ខុនោ ភិក្ខូ តថា តថា ឧបបរិក្ខន្តិ យថយិទំ អធិករណំ ន ខិប្បមេវ វូបសម្មតិ។ ឥធ បន ភទ្ទាលិ ឯកច្ចោ ភិក្ខុ អភិណ្ហាបត្តិកោ ហោតិ [ឱ. ហោតីតិ ន ទិស្សតិ។] អាបត្តិពហុលោ សោ ភិក្ខូហិ វុច្ចមានោ នាញ្ញេនញ្ញំ បដិចរតិ ពហិទ្ធា កថំ ន អបនាមេតិ ន កោបញ្ច ទោសញ្ច អប្បច្ចយញ្ច បាតុករោតិ សម្មា វត្តតិ លោមំ បាតេតិ នេត្ថារំ វត្តតិ យេន សង្ឃោ អត្តមនោ ហោតិ តំ ករោមីតិ អាហ។ តត្រ ភទ្ទាលិ ភិក្ខូនំ ឯវំ ហោតិ អយំ ខោ អាវុសោ ភិក្ខុ អភិណ្ហាបត្តិកោ អាបត្តិពហុលោ សោ ភិក្ខូហិ វុច្ចមានោ នាញ្ញេនញ្ញំ បដិចរតិ ពហិទ្ធា កថំ ន អបនាមេតិ ន កោបញ្ច ទោសញ្ច អប្បច្ចយញ្ច បាតុករោតិ សម្មា វត្តតិ លោមំ បាតេតិ នេត្ថារំ វត្តតិ យេន សង្ឃោ អត្តមនោ ហោតិ តំ ករោមីតិ អាហ សាធុ វតាយស្មន្តោ ឥមស្ស ភិក្ខុនោ តថា តថា ឧបបរិក្ខថ យថយិទំ អធិករណំ ខិប្បមេវ វូបសមេ្មយ្យាតិ។ តស្ស ខោ ឯវំ ភទ្ទាលិ ភិក្ខុនោ ភិក្ខូ តថា តថា ឧបបរិក្ខន្តិ យថយិទំ អធិករណំ ខិប្បមេវ វូបសម្មតិ។

[១៧០] ឥធ ភទ្ទាលិ ឯកច្ចោ ភិក្ខុ អធិច្ចាបត្តិកោ ហោតិ អនាបត្តិពហុលោ សោ ភិក្ខូហិ វុច្ចមានោ អញ្ញេនញ្ញំ [ម. អញ្ញេនាញ្ញំ។] បដិចរតិ ពហិទ្ធា កថំ អបនាមេតិ កោបញ្ច ទោសញ្ច អប្បច្ចយញ្ច បាតុករោតិ ន សម្មា វត្តតិ ន លោមំ បាតេតិ ន នេត្ថារំ វត្តតិ យេន សង្ឃោ អត្តមនោ ហោតិ តំ ករោមីតិ នាហ។ តត្រ ភទ្ទាលិ ភិក្ខូនំ ឯវំ ហោតិ អយំ ខោ អាវុសោ ភិក្ខុ អធិច្ចាបត្តិកោ អនាបត្តិពហុលោ សោ ភិក្ខូហិ វុច្ចមានោ អញ្ញេនញ្ញំ បដិចរតិ ពហិទ្ធា កថំ អបនាមេតិ កោបញ្ច ទោសញ្ច អប្បច្ចយញ្ច បាតុករោតិ ន សម្មា វត្តតិ ន លោមំ បាតេតិ ន នេត្ថារំ វត្តតិ យេន សង្ឃោ អត្តមនោ ហោតិ តំ ករោមីតិ នាហ សាធុ វតាយស្មន្តោ ឥមស្ស ភិក្ខុនោ តថា តថា ឧបបរិក្ខថ យថាយិទំ អធិករណំ ន ខិប្បមេវ វូបសមេ្មយ្យាតិ។ តស្ស ខោ ឯវំ [ឱ. ឯតំ។] ភទ្ទាលិ ភិក្ខុនោ ភិក្ខូ តថា តថា ឧបបរិក្ខន្តិ យថយិទំ អធិករណំ ន ខិប្បមេវ វូបសម្មតិ។ ឥធ បន ភទ្ទាលិ ឯកច្ចោ ភិក្ខុ អធិច្ចាបត្តិកោ ហោតិ អនាបត្តិពហុលោ សោ ភិក្ខូហិ វុច្ចមានោ នាញ្ញេនញ្ញំ បដិចរតិ ន ពហិទ្ធា កថំ អបនាមេតិ ន កោបញ្ច ទោសញ្ច អប្បច្ចយញ្ច បាតុករោតិ សម្មា វត្តតិ លោមំ បាតេតិ នេត្ថារំ វត្តតិ យេន សង្ឃោ អត្តមនោ ហោតិ តំ ករោមីតិ អាហ។ តត្រ ភទ្ទាលិ ភិក្ខូនំ ឯវំ ហោតិ អយំ ខោ អាវុសោ ភិក្ខុ អធិច្ចាបត្តិកោ អនាបត្តិពហុលោ សោ ភិក្ខូហិ វុច្ចមានោ នាញ្ញេនញ្ញំ បដិចរតិ ន ពហិទ្ធា កថំ អបនាមេតិ ន កោបញ្ច ទោសញ្ច អប្បច្ចយញ្ច បាតុករោតិ សម្មា វត្តតិ លោមំ បាតេតិ នេត្ថារំ វត្តតិ យេន សង្ឃោ អត្តមនោ ហោតិ តំ ករោមីតិ អាហ សាធុ វតាយស្មន្តោ ឥមស្ស ភិក្ខុនោ តថា តថា ឧបបរិក្ខថ យថយិទំ អធិករណំ ខិប្បមេវ វូបសមេ្មយ្យាតិ។ តស្ស ខោ ឯវំ ភទ្ទាលិ ភិក្ខុនោ ភិក្ខូ តថា តថា ឧបបរិក្ខន្តិ យថយិទំ អធិករណំ ខិប្បមេវ វូបសម្មតិ។

[១៧១] ឥធ ភទ្ទាលិ ឯកច្ចោ ភិក្ខុ សទ្ធាមត្តកេន វហតិ បេមមត្តកេន។ តត្រ ភទ្ទាលិ ភិក្ខូនំ ឯវំ ហោតិ អយំ ខោ អាវុសោ ភិក្ខុ សទ្ធាមត្តកេន វហតិ បេមមត្តកេន សចេ មយំ ឥមំ ភិក្ខុំ បវយ្ហ បវយ្ហ [ម. បសយ្ហ បសយ្ហ។] ការណំ ការេស្សាម មា យម្បិស្ស តំ សទ្ធាមត្តកំ បេមមត្តកំ តម្ហាបិ បរិហាយីតិ។ សេយ្យថាបិ ភទ្ទាលិ បុរិសស្ស ឯកំ ចក្ខុំ តស្ស មិត្តាមច្ចា ញាតិសាលោហិតា តំ ឯកំ ចក្ខុំ រក្ខេយ្យុំ មា យម្បិស្ស តំ ឯកំ ចក្ខុំ តម្ហាបិ បរិហាយីតិ ឯវមេវ ខោ ភទ្ទាលិ [ម. ឯវមេវំ ភទ្ទាលិ។] ឥធេកច្ចោ ភិក្ខុ សទ្ធាមត្តកេន វហតិ បេមមត្តកេន។ តត្រ ភទ្ទាលិ ភិក្ខូនំ ឯវំ ហោតិ អយំ ខោ អាវុសោ ភិក្ខុ សទ្ធាមត្តកេន វហតិ បេមមត្តកេន សចេ មយំ ឥមំ ភិក្ខុំ បវយ្ហ បវយ្ហ ការណំ ការេស្សាម មា យម្បិស្ស តំ សទ្ធាមត្តកំ បេមមត្តកំ តម្ហាបិ បរិហាយីតិ។ អយំ ខោ [ម. ខោសទ្ទោ នត្ថិ។] ភទ្ទាលិ ហេតុ អយំ បច្ចយោ យេនមិធេកច្ចំ ភិក្ខុំ [ម. យេនមិធេកច្ចេ ភិក្ខូ តថា តថា។] បវយ្ហ បវយ្ហ ការណំ ការេន្តិ [ឱ. ករោន្តិ។ ម. ករោន្តីតិ។] អយំ បន ភទ្ទាលិ ហេតុ អយំ បច្ចយោ យេនមិធេកច្ចំ ភិក្ខុំ ន តថា បវយ្ហ បវយ្ហ ការណំ ការេន្តីតិ [ម. អយំ បន ភទ្ទាលិ ហេតុ អយំ បច្ចយោ យេនមិធេកច្ចំ ភិក្ខុំ ន តថា បវយ្ហ បវយ្ហ ការណំ ការេន្តីតិ ន ទិស្សន្តិ។]។ កោ នុ ខោ ភន្តេ ហេតុ កោ បច្ចយោ យេន បុព្វេ អប្បតរានិ ចេវ សិក្ខាបទានិ អហេសុំ ពហុតរា ច ភិក្ខូ អញ្ញាយ សណ្ឋហឹសុ កោ បន ភន្តេ ហេតុ កោ បច្ចយោ យេនេតរហិ ពហុតរានិ ចេវ សិក្ខាបទានិ ហោន្តិ អប្បតរា ច ភិក្ខូ អញ្ញាយ សណ្ឋហន្តីតិ។

[១៧២] ឯវញ្ហេតំ [ឱ. ឯវំហេតំ។ ម. ឯវមេតំ។] ភទ្ទាលិ ហោតិ សត្តេសុ ហាយមានេសុ សទ្ធម្មេ អន្តរធាយមានេ ពហុតរានិ ចេវ សិក្ខាបទានិ ហោន្តិ អប្បតរា ច ភិក្ខូ អញ្ញាយ សណ្ឋហន្តិ [ម. សណ្ឋហន្តីតិ។]។ ន តាវ ភទ្ទាលិ សត្ថា សាវកានំ សិក្ខាបទំ បញ្ញាបេតិ យាវ ន ឥធេកច្ចេ អាសវដ្ឋានីយា ធម្មា សង្ឃេ បាតុភវន្តិ។ យតោ ច ខោ ភទ្ទាលិ ឥធេកច្ចេ អាសវដ្ឋានីយា ធម្មា សង្ឃេ បាតុភវន្តិ អថ សត្ថា សាវកានំ សិក្ខាបទំ បញ្ញាបេតិ តេសំយេវ អាសវដ្ឋានីយានំ ធម្មានំ បដិឃាតាយ។ ន តាវ ភទ្ទាលិ ឥធេកច្ចេ អាសវដ្ឋានីយា ធម្មា សង្ឃេ បាតុភវន្តិ យាវ ន សង្ឃោ មហត្តំ បត្តោ ហោតិ។ យតោ ច ខោ ភទ្ទាលិ សង្ឃោ មហត្តំ បត្តោ ហោតិអថ [ម. បត្តោតិ អថ។] ឥធេកច្ចេ អាសវដ្ឋានីយា ធម្មា សង្ឃេ បាតុភវន្តិ អថ សត្ថា សាវកានំ សិក្ខាបទំ បញ្ញាបេតិ តេសំយេវ អាសវដ្ឋានីយានំ ធម្មានំ បដិឃាតាយ។ ន តាវ ភទ្ទាលិ ឥធេកច្ចេ អាសវដ្ឋានីយា ធម្មា សង្ឃេ បាតុភវន្តិ យាវ ន សង្ឃោ លាភគ្គំ បត្តោ ហោតិ… យសគ្គំ បត្តោ ហោតិ… ពាហុសច្ចំ បត្តោ ហោតិ… រត្តញ្ញុតំ [រត្តញ្ញត្តំ។] បត្តោ ហោតិ។ យតោ ច ខោ ភទ្ទាលិ សង្ឃោ រត្តញ្ញុតំ បត្តោ ហោតិ អថ ឥធេកច្ចេ អាសវដ្ឋានីយា ធម្មា សង្ឃេ បាតុភវន្តិ អថ សត្ថា សាវកានំ សិក្ខាបទំ បញ្ញាបេតិ តេសំយេវ អាសវដ្ឋានីយានំ ធម្មានំ បដិឃាតាយ។

[១៧៣] អប្បកា ខោ តុម្ហេ ភទ្ទាលិ តេន សមយេន អហុវត្ថ យទា វោ អហំ អាជានីយសុសូបមំ ធម្មបរិយាយំ ទេសេសឹ [ឱ. តន្តិ ន ទិស្សតិ។] តំ សរសិ ត្វំ [ម. ត្វន្តិ នត្ថិ។] ភទ្ទាលីតិ។ នោ ហេតំ ភន្តេ។ តត្រ ភទ្ទាលិ កឹ [ឱ.ម. កំ។] ហេតុំ បច្ចេសីតិ។ សោ ហិ នូនាហំ ភន្តេ ទីឃរត្តំ សត្ថុ សាសនេ សិក្ខាយ អបរិបូរការី អហោសិន្តិ។ ន ខោ ភទ្ទាលិ ឯសេវ ហេតុ ឯស បច្ចយោ អបិច មេ ត្វំ ភទ្ទាលិ ទីឃរត្តំ ចេតសា ចេតោ បរិច្ច វិទិតោ នវាយំ [ម. នបាយំ។] មោឃបុរិសោ មយា ធម្មេ ទេសិយមានេ អដ្ឋិកត្វា មនសិកត្វា សព្វចេតសោ សមន្នាហរិត្វា ឱហិតសោតោ ធម្មំ សុណាតីតិ អបិច តេ អហំ ភទ្ទាលិ អាជានីយសុសូបមំ ធម្មបរិយាយំ ទេសិស្សាមិ តំ សុណាហិ សាធុកំ មនសិករោហិ ភាសិស្សាមីតិ។ ឯវំ ភន្តេតិ ខោ អាយស្មា ភទ្ទាលិ ភគវតោ បច្ចស្សោសិ។

[១៧៤] ភគវា ឯតទវោច សេយ្យថាបិ ភទ្ទាលិ ទក្ខោ អស្សទមកោ ភទ្រំ អស្សាជានីយំ លភិត្វា បឋមេនេវ មុខាធានេ ការណំ ការេតិ។ តស្ស មុខាធានេ ការណំ ការិយមានស្ស ហោន្តិយេវ វិសូកាយិតានិ វិសេវិតានិ វិប្ផន្ទិតានិ កានិចិ កានិចិ យថាតំ អការិតបុព្វំ ការណំ ការិយមានស្ស។ សោ អភិណ្ហការណា អនុបុព្វការណា តស្មឹ ឋានេ បរិនិព្វាយតិ។ យតោ ខោ ភទ្ទាលិ ភទ្រោ អស្សាជានីយោ អភិណ្ហការណា អនុបុព្វការណា តស្មឹ ឋានេ បរិនិព្វុតោ ហោតិ តមេនំ អស្សទមកោ ឧត្តរឹ ការណំ ការេតិ យុគាធានេ។ តស្ស យុគាធានេ ការណំ ការិយមានស្ស ហោន្តិយេវ វិសូកាយិតានិ វិសេវិតានិ វិប្ផន្ទិតានិ កានិចិ កានិចិ យថាតំ អការិតបុព្វំ ការណំ ការិយមានស្ស។ សោ អភិណ្ហការណា អនុបុព្វការណា តស្មឹ តស្មឹ ឋានេ បរិនិព្វាយតិ។ យតោ ខោ ភទ្ទាលិ ភទ្រោ អស្សាជានីយោ អភិណ្ហការណា អនុបុព្វការណា តស្មឹ ឋានេ បរិនិព្វុតោ ហោតិ តមេនំ អស្សទមកោ ឧត្តរឹ ការណំ ការេតិ អនុក្កមេ មណ្ឌលេ ខុរកាសេ [ឱ. ខុរកាយេ។] ធាវេ រវត្ថេ [ម. ទវត្ថេ។] រាជគុណេ រាជវំសេ ឧត្តមេ ជវេ ឧត្តមេ ហយេ ឧត្តមេ សាខល្យេ។ តស្ស ឧត្តមេ ជវេ ឧត្តមេ ហយេ ឧត្តមេ សាខល្យេ ការណំ ការិយមានស្ស ហោន្តិយេវ វិសូកាយិតានិ វិសេវិតានិ វិប្ផន្ទិតានិ កានិចិ កានិចិ យថាតំ អការិតបុព្វំ ការណំ ការិយមានស្ស។ សោ អភិណ្ហការណា អនុបុព្វការណា តស្មឹ ឋានេ បរិនិព្វាយតិ។ យតោ ខោ ភទ្ទាលិ ភទ្រោ អស្សាជានីយោ អភិណ្ហការណា អនុបុព្វការណា តស្មឹ ឋានេ បរិនិព្វុតោ ហោតិ តមេនំ អស្សទមកោ ឧត្តរឹ វណ្ណិយំ ច ពលិយំ ច [ឱ. ឧត្តរី វណ្ណិយញ្ច វលិយញ្ច។ ម. ឧត្តរិវណ្ណិយញ្ច វាណិយញ្ច។] អនុប្បវេច្ឆតិ។ ឥមេហិ ខោ ភទ្ទាលិ ទសហង្គេហិ សមន្នាគតោ ភទ្រោ អស្សាជានីយោ រាជារហោ ហោតិ រាជភោគ្គោ រញ្ញោ អង្គន្តេ្វវ សង្ឃំ [ឱ. សង្ខំ។] គច្ឆតិ ឯវមេវ ខោ ភទ្ទាលិ ទសហិ ធម្មេហិ សមន្នាគតោ ភិក្ខុ អាហុនេយ្យោ ហោតិ បាហុនេយ្យោ ទក្ខិណេយ្យោ អញ្ជលិករណីយោ អនុត្តរំ បុញ្ញក្ខេត្តំ លោកស្សាតិ [ឱ.ម. ឥតិសទ្ទោ ន ទិស្សតិ។] កតមេហិ ទសហិ ឥធ ភទ្ទាលិ ភិក្ខុ អសេក្ខាយ សម្មាទិដ្ឋិយា សមន្នាគតោ ហោតិ អសេក្ខេន សម្មាសង្កប្បេន សមន្នាគតោ ហោតិ អសេខាយ សម្មាវាចាយ សមន្នាគតោ ហោតិ អសេក្ខេន សម្មាកម្មន្តេន សមន្នាគតោ ហោតិ អសេក្ខេន សម្មាអាជីវេន សមន្នាគតោ ហោតិ អសេក្ខេន សម្មាវាយាមេន សមន្នាគតោ ហោតិ អសេខាយ សម្មាសតិយា សមន្នាគតោ ហោតិ អសេក្ខេន សម្មាសមាធិនា សមន្នាគតោ ហោតិ អសេក្ខេន សម្មាញាណេន សមន្នាគតោ ហោតិ អសេខាយ សម្មាវិមុត្តិយា សមន្នាគតោ ហោតិ ឥមេហិ ខោ ភទ្ទាលិ ទសហិ ធម្មេហិ សមន្នាគតោ ភិក្ខុ អាហុនេយ្យោ ហោតិ បាហុនេយ្យោ ទក្ខិណេយ្យោ អញ្ជលិករណីយោ អនុត្តរំ បុញ្ញក្ខេត្តំ លោកស្សាតិ។ ឥទមវោច ភគវា អត្តមនោ អាយស្មា ភទ្ទាលិ ភគវតោ ភាសិតំ អភិនន្ទីតិ។

ភទ្ទាលិសុត្តំ បញ្ចមំ និដ្ឋិតំ។

ឆដ្ឋំ លដុកិកោបមសុត្តំ

[១៧៥] ឯវមេ្ម សុតំ។ ឯកំ សមយំ ភគវា អង្គុត្តរាបេសុ វិហរតិ អាបណំ នាម អង្គុត្តរាបានំ និគមោ។ អថខោ ភគវា បុព្វណ្ហសមយំ និវាសេត្វា បត្តចីវរមាទាយ អាបណំ បិណ្ឌាយ បាវិសិ។ អាបណេ បិណ្ឌាយ ចរិត្វា បច្ឆាភត្តំ បិណ្ឌបាតប្បដិក្កន្តោ យេនញ្ញតរោ វនសណ្ឌោ តេនុបសង្កមិ ឧបសង្កមិត្វា ទិវាវិហារាយ តំ វនសណ្ឌំ អជ្ឈោគហេត្វា អញ្ញតរស្មឹ រុក្ខមូលេ ទិវាវិហារំ និសីទិ។ អាយស្មាបិ ខោ ឧទាយី បុព្វណ្ហសមយំ និវាសេត្វា បត្តចីវរមាទាយ អាបណំ បិណ្ឌាយ បាវិសិ។ អាបណេ បិណ្ឌាយ ចរិត្វា បច្ឆាភត្តំ បិណ្ឌបាតប្បដិក្កន្តោ យេន សោ វនសណ្ឌោ តេនុបសង្កមិ ឧបសង្កមិត្វា ទិវាវិហារាយ តំ វនសណ្ឌំ អជ្ឈោគហេត្វា អញ្ញតរស្មឹ រុក្ខមូលេ ទិវាវិហារំ និសីទិ។ អថខោ អាយស្មតោ ឧទាយិស្ស រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ ពហុន្នំ វត នោ ភគវា ទុក្ខធម្មានំ អបហត្តា ពហុន្នំ វត នោ ភគវា សុខធម្មានំ ឧបហត្តា ពហុន្នំ វត នោ ភគវា អកុសលានំ ធម្មានំ អបហត្តា ពហុន្នំ វត នោ ភគវា កុសលានំ ធម្មានំ ឧបហត្តាតិ។ អថខោ អាយស្មា ឧទាយី សាយណ្ហសមយំ បដិសល្លានា វុដ្ឋិតោ យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។

[១៧៦] ឯកមន្តំ និសិន្នោ ខោ អាយស្មា ឧទាយី ភគវន្តំ ឯតទវោច ឥធ មយ្ហំ ភន្តេ រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ ពហុន្នំ វត នោ ភគវា ទុក្ខធម្មានំ អបហត្តា ពហុន្នំ វត នោ ភគវា សុខធម្មានំ ឧបហត្តា ពហុន្នំ វត នោ ភគវា អកុសលានំ ធម្មានំ អបហត្តា ពហុន្នំ វត នោ ភគវា កុសលានំ ធម្មានំ ឧបហត្តាតិ។ មយញ្ហិ ភន្តេ បុព្វេ សាយញ្ចេវ ភុញ្ជាម បាតោ ច ទិវា ច វិកាលេ។ អហុ ខោ សោ ភន្តេ សមយោ យំ ភគវា ភិក្ខូ អាមន្តេសិ ឥង្ឃ តុម្ហេ ភិក្ខវេ ឯតំ ទិវា វិកាលភោជនំ បជហថាតិ។ តស្ស មយ្ហំ ភន្តេ អហុទេវ អញ្ញថត្តំ អហុទេវ [ឱ. អហុ។] ទោមនស្សំ យម្បិ នោ សទ្ធា គហបតិកា ទិវា វិកាលេ បណីតំ ខាទនីយំ ភោជនីយំ ទេន្តិ តស្សបិ នោ ភគវា បហានមាហ តស្សបិ នោ សុគតោ បដិនិស្សគ្គមាហាតិ តេ មយំ ភន្តេ ភគវតិ បេមញ្ច គារវញ្ច ហិរិញ្ច ឱត្តប្បញ្ច សម្បស្សមានា ឯវន្តំ ទិវា វិកាលភោជនំ បជហិម្ហា តេ មយំ ភន្តេ សាយញ្ចេវ ភុញ្ជាម បាតោ ច អហុ ខោ សោ ភន្តេ សមយោ យំ ភគវា ភិក្ខូ អាមន្តេសិ ឥង្ឃ តុម្ហេ ភិក្ខវេ ឯតំ រត្តឹ វិកាលភោជនំ បជហថាតិ តស្ស មយ្ហំ ភន្តេ អហុទេវ អញ្ញថត្តំ អហុទេវ [ឱ. អហុ។] ទោមនស្សំ យម្បិ នោ ឥមេសំ ទ្វិន្នំ ភត្តានំ បណីតសង្ខាតតរំ តស្សបិ នោ ភគវា បហានមាហ តស្សបិ នោ សុគតោ បដិនិស្សគ្គមាហាតិ។ ភូតបុព្វំ ភន្តេ អញ្ញតរោ បុរិសោ ទិវា សូបេយ្យំ លភិត្វា បជាបតឹ [ឱ.ម. បជាបត្តិន្តិ ន ទិស្សតិ។] ឯវមាហ ហន្ទ [ឱ.ម. ហន្ទ ច។] ឥមំ និក្ខិបថ សាយំ សព្វេវ សមគ្គា ភុញ្ជិស្សាមាតិ យាកាចិ ភន្តេ សង្ខតិយោ សព្វា តា រត្តឹ អប្បា ទិវា តេ មយំ ភន្តេ ភគវតិ បេមញ្ច គារវញ្ច ហិរិញ្ច ឱត្តប្បញ្ច សម្បស្សមានា ឯវន្តំ រត្តឹ វិកាលភោជនំ បជហិម្ហា។ ភូតបុព្វំ ភន្តេ ភិក្ខូ រត្តន្ធការតិមិសាយំ បិណ្ឌាយ ចរន្តា ចន្ទនិកម្បិ បវិសន្តិ ឱឡិគល្លេបិ បបតន្តិ កណ្ដករាជិម្បិ [ឱ. កណ្តកវដ្តម្បិ។] អារោហន្តិ សុត្តម្បិ គាវឹ អារោហន្តិ មាណវេហិបិ សមាគច្ឆន្តិ កតកម្មេហិបិ អកតកម្មេហិបិ មាតុគ្គាមោបិ តេ អសទ្ធម្មេន និមន្តេតិ។ ភូតបុព្វាហំ ភន្តេ រត្តន្ធការតិមិសាយំ បិណ្ឌាយ ចរាមិ អទ្ទសា ខោ មំ ភន្តេ អញ្ញតរា ឥត្ថី វិជ្ជន្តរិកាយ ភាជនំ ធោវន្តី ទិស្វា មំ ភីតា វិស្សរមកាសិ អព្ភុម្មេ [ឱ. អព្ភុំ មេ។] បិសាចោ វត មន្តិ។ ឯវំ វុត្តេ អហំ ភន្តេ តំ ឥត្ថឹ ឯតទវោចំ ន ភគិនិ បិសាចោ ភិក្ខុ បិណ្ឌាយ ឋិតោតិ។ ភិក្ខុស្ស បិតុ មារិ ភិក្ខុស្ស មាតុ មារិ វរន្តេ ភិក្ខុ តិណ្ហេន គោវិកន្តនេន [ឱ. គោវិកត្តនេន។] កុច្ឆិ បរិកន្តោ [ឱ. បរិកត្តោ។] ន ត្វេវ [ម. ន ត្វេវ វរំ។] យំ [ឱ. យា។] រត្តន្ធការតិមិសាយំ កុច្ឆិហេតុ បិណ្ឌាយ ចរសីតិ។ តស្ស មយ្ហំ ភន្តេ តទនុស្សរតោ ឯវំ ហោតិ ពហុន្នំ នោ ភគវា ទុក្ខធម្មានំ អបហត្តា ពហុន្នំ វត នោ ភគវា សុខធម្មានំ ឧបហត្តា ពហុន្នំ វត នោ ភគវា អកុសលានំ ធម្មានំ អបហត្តា ពហុន្នំ វត នោ ភគវា កុសលានំ ធម្មានំ ឧបហត្តាតិ។

[១៧៧] ឯវមេវ បនុទាយិ ឥធេកច្ចេ មោឃបុរិសា ឥទំ បជហថាតិ មយា វុច្ចមានា តេ ឯវមាហំសុ កឹ បនិមស្ស អប្បមត្តកស្ស ឱរមត្តកស្ស អធិសល្លិខតេវាយំ សមណោតិ តេ តញ្ចេវ នប្បជហន្តិ មយិ ច អប្បច្ចយំ ឧបដ្ឋបេន្តិ [ឱ.ម. ឧបដ្ឋាបេន្តិ។] យេ ច ភិក្ខូ សិក្ខាកាមា តេសន្តំ ឧទាយិ ហោតិ ពលវំ ពន្ធនំ ទឡ្ហំ ពន្ធនំ ថិរំ ពន្ធនំ អបូតិកំ ពន្ធនំ ថូលោ កឡិង្គរោ។ សេយ្យថាបិ ឧទាយិ លដុកិកា [លឌុកិកាតិប្យត្ថិ។] សកុណិកា បូតិលតាយ ពន្ធនេន ពន្ធា [ឱ. ពទ្ធា។] តត្ថេវ វធំ វា ពន្ធំ វា មរណំ វា អាគមេតិ យោ នុ ខោ ឧទាយិ ឯវំ វទេយ្យ យេន សា លដុកិកា សកុណិកា បូតិលតាយ ពន្ធនេន ពន្ធា តត្ថេវ វធំ វា ពន្ធំ វា មរណំ វា អាគមេតិ តញ្ហិ តស្សា អពលំ ពន្ធនំ ទុព្វលំ ពន្ធនំ បូតិកំ ពន្ធនំ អសារកំ ពន្ធនន្តិ សម្មា នុ ខោ សោ ឧទាយិ វទមានោ វទេយ្យាតិ។ នោ ហេតំ ភន្តេ យេន សា ភន្តេ លដុកិកា សកុណិកា បូតិលតាយ ពន្ធនេន ពន្ធា តត្ថេវ វធំ វា ពន្ធំ វា មរណំ វា អាគមេតិ តញ្ហិ តស្សា ពលវំ ពន្ធនំ ទឡ្ហំ ពន្ធនំ ថិរំ ពន្ធនំ អបូតិកំ ពន្ធនំ ថូលោ កឡិង្គរោតិ ឯវមេវ ខោ ឧទាយិ ឥធេកច្ចេ មោឃបុរិសា ឥទំ បជហថាតិ មយា វុច្ចមានា តេ ឯវមាហំសុ កឹ បនិមស្ស អប្បមត្តកស្ស ឱរមត្តកស្ស អធិសល្លិខតេវាយំ សមណោតិ តេ តញ្ចេ នប្បជហន្តិ មយិ ច អប្បច្ចយំ ឧបដ្ឋបេន្តិ យេ ច ភិក្ខូ សិក្ខាកាមា តេសន្តំ ឧទាយិ ហោតិ ពលវំ ពន្ធនំ ទឡ្ហំ ពន្ធនំ ថិរំ ពន្ធនំ អបូតិកំ ពន្ធនំ ថូលោ កឡិង្គរោ។

[១៧៨] ឥធ បនុទាយិ ឯកច្ចេ កុលបុត្តា ឥទំ បជហថាតិ មយា វុច្ចមានា តេ ឯវមាហំសុ កឹ បនិមស្ស អប្បមត្តកស្ស ឱរមត្តកស្ស បហាតព្វស្ស យស្ស នោ ភគវា បហានមាហ យស្ស នោ សុគតោ បដិនិស្សគ្គមាហាតិ តេ តញ្ចេវ បជហន្តិ មយិ ច ន អប្បច្ចយំ ឧបដ្ឋបេន្តិ យេ ច ភិក្ខូ សិក្ខាកាមា តេ តំ បហាយ អប្បោស្សុក្កា បន្នលោមា បរទវុត្តា [ម. បរទត្តវុត្តា។] មិគភូតេន ចេតសា វិហរន្តិ តេសន្តំ ឧទាយិ ហោតិ អពលំ ពន្ធនំ ទុព្វលំ ពន្ធនំ បូតិកំ ពន្ធនំ អសារកំ ពន្ធនំ។ សេយ្យថាបិ ឧទាយិ រញ្ញោ នាគោ ឦសាទន្តោ ឧរុឡ្ហវាភិជាតោ [ឱ. អព្វូឡ្ហវាភិជាតោ។] សង្គាមាវចរោ ទឡ្ហេហិ វរត្តេហិ ពន្ធនេហិ ពន្ធោ ឦសកំយេវ កាយំ សន្នាមេត្វា តានិ ពន្ធនានិ សញ្ឆិន្ទិត្វា សម្បទាលេត្វា យេនកាមំ បក្កមតិ យោ នុ ខោ ឧទាយិ ឯវំ វទេយ្យ យេហិ សោ រញ្ញោ នាគោ ឦសាទន្តោ ឧរុឡ្ហវាភិជាតោ សង្គាមាវចរោ ទឡ្ហេហិ វរត្តេហិ ពន្ធនេហិ ពន្ធោ ឦសកំយេវ កាយំ សន្នាមេត្វា តានិ ពន្ធនានិ សញ្ឆិន្ទិត្វា សម្បទាលេត្វា យេនកាមំ បក្កមតិ តញ្ហិ តស្ស ពលវំ ពន្ធនំ ទឡ្ហំ ពន្ធនំ ថិរំ ពន្ធនំ អបូតិកំ ពន្ធនំ ថូលោ កឡិង្គរោតិ សម្មា នុ ខោ សោ ឧទាយិ វទមានោ វទេយ្យាតិ។ នោ ហេតំ ភន្តេ យេហិ ភន្តេ សោ [ឱ. យេហិ សោ ភន្តេ។ ម. យេហិ ភន្តេ។] រញ្ញោ នាគោ ឦសាទន្តោ ឧរុឡ្ហវាភិជាតោ សង្គាមាវចរោ ទឡ្ហេហិ វរត្តេហិ ពន្ធនេហិ ពន្ធោ ឦសកំយេវ កាយំ សន្នាមេត្វា តានិ ពន្ធនានិ សញ្ឆិន្ទិត្វា សម្បទាលេត្វា យេនកាមំ បក្កមតិ តញ្ហិ តស្ស អពលំ ពន្ធនំ។បេ។ អសារកំ ពន្ធនន្តិ។ ឯវមេវ ខោ ឧទាយិ ឥធេកច្ចេ កុលបុត្តា ឥទំ បជហថាតិ មយា វុច្ចមានា តេ ឯវមាហំសុ កឹ បនិមស្ស អប្បមត្តកស្ស ឱរមត្តកស្ស បហាតព្វស្ស យស្ស នោ ភគវា បហានមាហ យស្ស នោ សុគតោ បដិនិស្សគ្គមាហាតិ តេ តញ្ចេវ បជហន្តិ មយិ ច ន អប្បច្ចយំ ឧបដ្ឋបេន្តិ យេ ច ភិក្ខូ សិក្ខាកាមា តេ តំ បហាយ អប្បោស្សុក្កា បន្នលោមា បរទវុត្តា មិគភូតេន ចេតសា វិហរន្តិ តេសន្តំ ឧទាយិ ហោតិ អពលំ ពន្ធនំ បូតិកំ ពន្ធនំ អសារកំ ពន្ធនំ។

[១៧៩] សេយ្យថាបិ ឧទាយិ បុរិសោ ទឡិទ្ទោ អស្សកោ អនាឡិយោ [អនាឡ្ហិយោតិ អដ្ឋកថា។] តស្សស្ស ឯកំ អគារកំ ឱលុគ្គវិលុគ្គំ កាកាតិទាយឹ [កាកបាយិន្តិ តត្ថេវ ទិស្សតិ។] ន បរមរូបំ ឯកា កឡោបិកា [ឱ. ខដោបិកា។] ឱលុគ្គវិលុគ្គា ន បរមរូបា ឯកិស្សា កុម្ភិយា ធញ្ញសមវាបកំ ន បរមរូបំ ឯកា ជាយិកា ន បរមរូបា សោ អារាមគតំ ភិក្ខុំ បស្សេយ្យ សុធោតហត្ថបាទំ មនុញ្ញំ ភោជនំ ភុត្តាវឹ សីតាយ ឆាយាយ និសិន្នំ អធិចិត្តេ យុត្តំ។ តស្ស ឯវមស្ស សុខំ វត ភោ សាមញ្ញំ អារោគ្យំ វត ភោ សាមញ្ញំ សោ វតស្សំ យោហំ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជ្ជេយ្យន្តិ។ សោ ន សក្កុណេយ្យ ឯកំ អគារកំ ឱលុគ្គវិលុគ្គំ កាកាតិទាយឹ ន បរមរូបំ បហាយ ឯកំ កឡោបិកំ ឱលុគ្គវិលុគ្គំ ន បរមរូបំ បហាយ ឯកិស្សា កុម្ភិយា ធញ្ញសមវាបកំ ន បរមរូបំ បហាយ ឯកំ ជាយិកំ ន បរមរូបំ បហាយ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជិតុំ។ យោ នុ ខោ ឧទាយិ ឯវំ វទេយ្យ យេហិ សោ បុរិសោ ពន្ធនេហិ ពន្ធោ ន សក្កោតិ ឯកំ អគារកំ ឱលុគ្គវិលុគ្គំ កាកាតិទាយឹ ន បរមរូបំ បហាយ ឯកំ កឡោបិកំ ឱលុគ្គវិលុគ្គំ ន បរមរូបំ បហាយ ឯកិស្សា កុម្ភិយា ធញ្ញសមវាបកំ ន បរមរូបំ បហាយ ឯកំ ជាយិកំ ន បរមរូបំ បហាយ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជិតុំ តញ្ហិ តស្ស អពលំ ពន្ធនំ ទុព្វលំ ពន្ធនំ បូតិកំ ពន្ធនំ អសារកំ ពន្ធនន្តិ សម្មា នុ ខោ សោ ឧទាយិ វទមានោ វទេយ្យាតិ។ នោ ហេតំ ភន្តេ យេហិ ភន្តេ សោ បុរិសោ ពន្ធនេហិ ពន្ធោ ន សក្កោតិ ឯកំ អគារកំ ឱលុគ្គវិលុគ្គំ កាកាតិទាយឹ ន បរមរូបំ បហាយ ឯកំ កឡោបិកំ ឱលុគ្គវិលុគ្គំ ន បរមរូបំ បហាយ ឯកិស្សា កុម្ភិយា ធញ្ញសមវាបកំ ន បរមរូបំ បហាយ ឯកំ ជាយិកំ ន បរមរូបំ បហាយ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជិតុំ តញ្ហិ តស្ស ពលវំ ពន្ធនំ ទឡ្ហំ ពន្ធនំ ថិរំ ពន្ធនំ អបូតិកំ ពន្ធនំ ថូលោ កឡិង្គរោតិ។ ឯវមេវ ខោ ឧទាយិ ឥធេកច្ចេ មោឃបុរិសា ឥទំ បជហថាតិ មយា វុច្ចមានា តេ ឯវមាហំសុ កឹ បនិមស្ស អប្បមត្តកស្ស ឱរមត្តកស្ស អធិសល្លិខតេវាយំ សមណោតិ តេ តញ្ចេវ នប្បជហន្តិ មយិ ច អប្បច្ចយំ ឧបដ្ឋបេន្តិ យេ ច ភិក្ខូ សិក្ខាកាមា តេសន្តំ ឧទាយិ ហោតិ ពលវំ ពន្ធនំ ទឡ្ហំ ពន្ធនំ ថិរំ ពន្ធនំ អបូតិកំ ពន្ធនំ ថូលោ កឡិង្គរោតិ។

[១៨០] សេយ្យថាបិ ឧទាយិ គហបតិ វា គហបតិបុត្តោ វា អទ្ធោ មហទ្ធនោ មហាភោគោ នេកានំ និក្ខគណានំ ចយោ នេកានំ ធញ្ញគណានំ ចយោ នេកានំ ខេត្តគណានំ ចយោ នេកានំ វត្ថុគណានំ ចយោ នេកានំ ភរិយគណានំ [ឱ. ភរិយាគណានន្តិប្យត្ថិ។] ចយោ នេកានំ ទាសគណានំ ចយោ នេកានំ ទាសីគណានំ ចយោ សោ អារាមគតំ ភិក្ខុំ បស្សេយ្យ សុធោតហត្ថបាទំ មនុញ្ញំ ភោជនំ ភុត្តាវឹ សីតាយ ឆាយាយ និសិន្នំ អធិចិត្តេ យុត្តំ។ តស្ស ឯវមស្ស សុខំ វត ភោ សាមញ្ញំ អារោគ្យំ វត ភោ សាមញ្ញំ សោ វតស្សំ យោហំ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជ្ជេយ្យន្តិ។ សោ សក្កុណេយ្យ នេកានិ និក្ខគណានិ បហាយ នេកានិ ធញ្ញគណានិ បហាយ នេកានិ ខេត្តគណានិ បហាយ នេកានិ វត្ថុគណានិ បហាយ នេកានិ ភរិយគណានិ បហាយ នេកានិ ទាសគណានិ បហាយ នេកានិ ទាសីគណានិ បហាយ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជិតុំ។ យោ នុ ខោ ឧទាយិ ឯវំ វទេយ្យ យេហិ សោ គហបតិ វា គហបតិបុត្តោ វា ពន្ធនេហិ ពន្ធោ សក្កោតិ នេកានិ និក្ខគណានិ បហាយ នេកានិ ធញ្ញគណានិ បហាយ នេកានិ ខេត្តគណានិ បហាយ នេកានិ វត្ថុគណានិ បហាយ នេកានិ ភរិយគណានិ បហាយ នេកានិ ទាសគណានិ បហាយ នេកានិ ទាសីគណានិ បហាយ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជិតុំ តញ្ហិ តស្ស ពលវំ ពន្ធនំ ទឡ្ហំ ពន្ធនំ ថិរំ ពន្ធនំ អបូតិកំ ពន្ធនំ ថូលោ កឡិង្គរោតិ សម្មា នុ ខោ សោ ឧទាយិ វទមានោ វទេយ្យាតិ។ នោ ហេតំ ភន្តេ យេហិ ភន្តេ សោ គហបតិ វា គហបតិបុត្តោ វា ពន្ធនេហិ ពន្ធោ សក្កោតិ នេកានិ និក្ខគណានិ បហាយ នេកានិ ធញ្ញគណានិ បហាយ នេកានិ ខេត្តគណានិ បហាយ នេកានិ វត្ថុគណានិ បហាយ នេកានិ ភរិយគណានិ បហាយ នេកានិ ទាសគណានិ បហាយ នេកានិ ទាសីគណានិ បហាយ កេសមស្សុំ ឱហារេត្វា កាសាយានិ វត្ថានិ អច្ឆាទេត្វា អគារស្មា អនគារិយំ បព្វជិតុំ តញ្ហិ តស្ស អពលំ ពន្ធនំ ទុព្វលំ ពន្ធនំ បូតិកំ ពន្ធនំ អសារកំ ពន្ធនន្តិ។ ឯវមេវ ខោ ឧទាយិ ឥធេកច្ចេ កុលបុត្តា ឥទំ បជហថាតិ មយា វុច្ចមានា តេ ឯវមាហំសុ កឹ បនិមស្ស អប្បមត្តកស្ស ឱរមត្តកស្ស បហាតព្វស្ស យស្ស នោ ភគវា បហានមាហ យស្ស នោ សុគតោ បដិនិស្សគ្គមាហាតិ តេ តញ្ចេវ បជហន្តិ មយិ ច ន អប្បច្ចយំ ឧបដ្ឋបេន្តិ យេ ច ភិក្ខូ សិក្ខាកាមា តេ តំ បហាយ អប្បោស្សុក្កា បន្នលោមា បរទវុត្តា មិគភូតេន ចេតសា វិហរន្តិ តេសន្តំ ឧទាយិ ហោតិ អពលំ ពន្ធនំ ទុព្វលំ ពន្ធនំ បូតិកំ ពន្ធនំ អសារកំ ពន្ធនំ។

[១៨១] ចត្តារោមេ ឧទាយិ បុគ្គលា សន្តោ សំវិជ្ជមានា លោកស្មឹ កតមេ ចត្តារោ ឥធុទាយិ ឯកច្ចោ បុគ្គលោ ឧបធិប្បហានាយ បដិបន្នោ ហោតិ ឧបធិប្បដិនិស្សគ្គាយ តមេនំ ឧបធិប្បហានាយ បដិបន្នំ ឧបធិប្បដិនិស្សគ្គាយ ឧបធិប្បដិសំយុត្តា សរសង្កប្បា សមុទាចរន្តិ សោ តេ អធិវាសេតិ នប្បជហតិ ន វិនោទេតិ ន ព្យន្តីករោតិ ន អនភាវង្គមេតិ ឥមំ ខោ អហំ ឧទាយិ បុគ្គលំ សំយុត្តោតិ វទាមិ នោ វិសំយុត្តោ តំ កិស្ស ហេតុ ឥន្ទ្រិយវេមត្តតា ហិ មេ ឧទាយិ ឥមស្មឹ បុគ្គលេ វិទិតា។ ឥធ បនុទាយិ ឯកច្ចោ បុគ្គលោ ឧបធិប្បហានាយ បដិបន្នោ ហោតិ ឧបធិប្បដិនិស្សគ្គាយ តមេនំ ឧបធិប្បហានាយ បដិបន្នំ ឧបធិប្បដិនិស្សគ្គាយ ឧបធិប្បដិសំយុត្តា សរសង្កប្បា សមុទាចរន្តិ សោ តេ នាធិវាសេតិ បជហតិ វិនោទេតិ ព្យន្តីករោតិ អនភាវង្គមេតិ ឥមម្បិ ខោ អហំ ឧទាយិ បុគ្គលំ សំយុត្តោតិ វទាមិ នោ វិសំយុត្តោ តំ កិស្ស ហេតុ ឥន្ទ្រិយវេមត្តតា ហិ មេ ឧទាយិ ឥមស្មឹ បុគ្គលេ វិទិតា។ ឥធ បនុទាយិ ឯកច្ចោ បុគ្គលោ ឧបធិប្បហានាយ បដិបន្នោ ហោតិ ឧបធិប្បដិនិស្សគ្គាយ តមេនំ ឧបធិប្បហានាយ បដិបន្នំ ឧបធិប្បដិនិស្សគ្គាយ កទាចិ ករហចិ សតិសម្មោសា ឧបធិប្បដិសំយុត្តា សរសង្កប្បា សមុទាចរន្តិ ទន្ធោ ឧទាយិ សតុប្បាទោ អថខោ នំ ខិប្បមេវ បជហតិ វិនោទេតិ ព្យន្តីករោតិ អនភាវង្គមេតិ។ សេយ្យថាបិ ឧទាយិ បុរិសោ ទិវសសន្តត្តេ អយោកដាហេ ទ្វេ វា តីណិ វា ឧទកផុសិតានិ និបាតេយ្យ ទន្ធោ ឧទាយិ ឧទកផុសិតានំ និបាតោ អថខោ នំ ខិប្បមេវ បរិក្ខយំ បរិយាទានំ គច្ឆេយ្យ ឯវមេវ ខោ ឧទាយិ ឥធេកច្ចោ បុគ្គលោ ឧបធិប្បហានាយ បដិបន្នោ ហោតិ ឧបធិប្បដិនិស្សគ្គាយ តមេនំ ឧបធិប្បហានាយ បដិបន្នំ ឧបធិប្បដិនិស្សគ្គាយ កទាចិ ករហចិ សតិសម្មោសា ឧបធិប្បដិសំយុត្តា សរសង្កប្បា សមុទាចរន្តិ ទន្ធោ ឧទាយិ សតុប្បាទោ អថខោ នំ ខិប្បមេវ បជហតិ វិនោទេតិ ព្យន្តីករោតិ អនភាវង្គមេតិ ឥមម្បិ ខោ អហំ ឧទាយិ បុគ្គលំ សំយុត្តោតិ វទាមិ នោ វិសំយុត្តោ តំ កិស្ស ហេតុ ឥន្ទ្រិយវេមត្តតា ហិ មេ ឧទាយិ ឥមស្មឹ បុគ្គលេ វិទិតា។ ឥធ បនុទាយិ ឯកច្ចោ បុគ្គលោ ឧបធិ ទុក្ខស្ស មូលន្តិ ឥតិ វិទិត្វា និរុបធី ហោតិ ឧបធិសង្ខយេ វិមុត្តោ ឥមំ ខោ អហំ ឧទាយិ បុគ្គលំ វិសំយុត្តោតិ វទាមិ នោ សំយុត្តោ តំ កិស្ស ហេតុ ឥន្ទ្រិយវេមត្តតា ហិ មេ ឧទាយិ ឥមស្មឹ បុគ្គលេ វិទិតា។ ឥមេ ខោ ឧទាយិ ចត្តារោ បុគ្គលា សន្តោ សំវិជ្ជមានា លោកស្មឹ [ឱ.ម. ឥមេ ខោ ឧទាយិ ចត្តារោ បុគ្គលា សន្តោ សំវិជ្ជមានា លោកស្មិន្តិ ន ទិស្សន្តិ។]។

[១៨២] បញ្ច ខោ ឥមេ ឧទាយិ កាមគុណា កតមេ បញ្ច ចក្ខុវិញ្ញេយ្យា រូបា ឥដ្ឋា កន្តា មនាបា បិយរូបា កាមូបសញ្ហិតា រជនីយា សោតវិញ្ញេយ្យា សទ្ទា… ឃានវិញ្ញេយ្យា គន្ធា… ជិវ្ហាវិញ្ញេយ្យា រសា… កាយវិញ្ញេយ្យា ផោដ្ឋព្វា ឥដ្ឋា កន្តា មនាបា បិយរូបា កាមូបសញ្ហិតា រជនីយា។ ឥមេ ខោ ឧទាយិ បញ្ច កាមគុណា។ យំ ខោ ឧទាយិ ឥមេ បញ្ច កាមគុណេ បដិច្ច ឧប្បជ្ជតិ សុខំ សោមនស្សំ ឥទំ វុច្ចតិ កាមសុខំ មិឡ្ហសុខំ បុថុជ្ជនសុខំ អនរិយសុខំ ន អាសេវិតព្វំ ន ភាវេតព្វំ ន ពហុលីកាតព្វំ ភាយិតព្វំ ឯតស្ស សុខស្សាតិ វទាមិ។

[១៨៣] ឥធុទាយិ ភិក្ខុ វិវិច្ចេវ កាមេហិ។បេ។ បឋមំ ឈានំ ឧបសម្បជ្ជ វិហរតិ វិតក្កវិចារានំ វូបសមា។បេ។ ទុតិយំ ឈានំ ឧបសម្បជ្ជ វិហរតិ បីតិយា ច វិរាគា។បេ។ តតិយំ ឈានំ ឧបសម្បជ្ជ វិហរតិ សុខស្ស ច បហានា។បេ។ ចតុត្ថំ ឈានំ ឧបសម្បជ្ជ វិហរតិ ឥទំ វុច្ចតិ នេក្ខម្មសុខំ វិវេកសុខំ [ឱ.ម. បវិវេកសុខំ។] ឧបសមសុខំ សម្ពោធិសុខំ អាសេវិតព្វំ ភាវេតព្វំ ពហុលីកាតព្វំ ន ភាយិតព្វំ ឯតស្ស សុខស្សាតិ វទាមិ។

[១៨៤] ឥធុទាយិ ភិក្ខុ វិវិច្ចេវ កាមេហិ។បេ។ បឋមំ ឈានំ ឧបសម្បជ្ជ វិហរតិ។ ឥទំ ខោ អហំ ឧទាយិ ឥញ្ជិតស្មឹ វទាមិ កិញ្ច តត្ថ ឥញ្ជិតស្មឹ យទេវ តត្ថ វិតក្កវិចារា អនិរុទ្ធា ហោន្តិ ឥទំ តត្ថ ឥញ្ជិតស្មឹ។ ឥធុទាយិ ភិក្ខុ វិតក្កវិចារានំ វូបសមា។បេ។ ទុតិយំ ឈានំ ឧបសម្បជ្ជ វិហរតិ។ ឥទម្បិ ខោ អហំ ឧទាយិ ឥញ្ជិតស្មឹ វទាមិ កិញ្ច តត្ថ ឥញ្ជិតស្មឹ យទេវ តត្ថ បីតិសុខំ អនិរុទ្ធំ ហោតិ ឥទំ តត្ថ ឥញ្ជិតស្មឹ។ ឥធុទាយិ ភិក្ខុ បីតិយា ច វិរាគា។បេ។ តតិយំ ឈានំ ឧបសម្បជ្ជ វិហរតិ។ ឥទម្បិ ខោ អហំ ឧទាយិ ឥញ្ជិតស្មឹ វទាមិ កិញ្ច តត្ថ ឥញ្ជិតស្មឹ យទេវ តត្ថ ឧបេក្ខាសុខំ អនិរុទ្ធំ ហោតិ ឥទំ តត្ថ ឥញ្ជិតស្មឹ។ ឥធុទាយិ ភិក្ខុ សុខស្ស ច បហានា។បេ។ ចតុត្ថំ ឈានំ ឧបសម្បជ្ជ វិហរតិ។ ឥទំ ខោ អហំ ឧទាយិ អនេញ្ជិតស្មឹ វទាមិ។

[១៨៥] ឥធុទាយិ ភិក្ខុ វិវិច្ចេវ កាមេហិ។បេ។ បឋមំ ឈានំ ឧបសម្បជ្ជ វិហរតិ។ ឥទំ ខោ អហំ ឧទាយិ អនលន្តិ វទាមិ បជហថាតិ វទាមិ សមតិក្កមថាតិ វទាមិ។ កោ ច តស្ស សមតិក្កមោ ឥធុទាយិ ភិក្ខុ វិតក្កវិចារានំ វូបសមា។បេ។ ទុតិយំ ឈានំ ឧបសម្បជ្ជ វិហរតិ អយំ តស្ស សមតិក្កមោ។ ឥទម្បិ ខោ អហំ ឧទាយិ អនលន្តិ វទាមិ បជហថាតិ វទាមិ សមតិក្កមថាតិ វទាមិ។ កោ ច តស្ស សមតិក្កមោ ឥធុទាយិ ភិក្ខុ បីតិយា ច វិរាគា។បេ។ តតិយំ ឈានំ ឧបសម្បជ្ជ វិហរតិ អយំ តស្ស សមតិក្កមោ។ ឥទម្បិ ខោ អហំ ឧទាយិ អនលន្តិ វទាមិ បជហថាតិ វទាមិ សមតិក្កមថាតិ វទាមិ។ កោ ច តស្ស សមតិក្កមោ ឥធុទាយិ ភិក្ខុ សុខស្ស ច បហានា។បេ។ ចតុត្ថំ ឈានំ ឧបសម្បជ្ជ វិហរតិ អយំ តស្ស សមតិក្កមោ។ ឥទម្បិ ខោ អហំ ឧទាយិ អនលន្តិ វទាមិ បជហថាតិ វទាមិ សមតិក្កមថាតិ វទាមិ។ កោ ច តស្ស សមតិក្កមោ ឥធុទាយិ ភិក្ខុ សព្វសោ រូបសញ្ញានំ សមតិក្កមា បដិឃសញ្ញានំ អដ្ឋង្គមា នានត្តសញ្ញានំ អមនសិការា អនន្តោ អាកាសោតិ អាកាសានញ្ចាយតនំ ឧបសម្បជ្ជ វិហរតិ អយំ តស្ស សមតិក្កមោ។ ឥទម្បិ ខោ អហំ ឧទាយិ អនលន្តិ វទាមិ បជហថាតិ វទាមិ សមតិក្កមថាតិ វទាមិ។ កោ ច តស្ស សមតិក្កមោ ឥធុទាយិ ភិក្ខុ សព្វសោ អាកាសានញ្ចាយតនំ សមតិក្កម្ម អនន្តំ វិញ្ញាណន្តិ វិញ្ញាណញ្ចាយតនំ ឧបសម្បជ្ជ វិហរតិ អយំ តស្ស សមតិក្កមោ។ ឥទម្បិ ខោ អហំ ឧទាយិ អនលន្តិ វទាមិ បជហថាតិ វទាមិ សមតិក្កមថាតិ វទាមិ។ កោ ច តស្ស សមតិក្កមោ ឥធុទាយិ ភិក្ខុ សព្វសោ វិញ្ញាណញ្ចាយតនំ សមតិក្កម្ម នត្ថិ កិញ្ចីតិ អាកិញ្ចញ្ញាយតនំ ឧបសម្បជ្ជ វិហរតិ អយំ តស្ស សមតិក្កមោ។ ឥទម្បិ ខោ អហំ ឧទាយិ អនលន្តិ វទាមិ បជហថាតិ វទាមិ សមតិក្កមថាតិ វទាមិ។ កោ ច តស្ស សមតិក្កមោ ឥធុទាយិ ភិក្ខុ សព្វសោ អាកិញ្ចញ្ញាយតនំ សមតិក្កម្ម នេវសញ្ញានាសញ្ញាយតនំ ឧបសម្បជ្ជ វិហរតិ អយំ តស្ស សមតិក្កមោ។ ឥទម្បិ ខោ អហំ ឧទាយិ អនលន្តិ វទាមិ បជហថាតិ វទាមិ សមតិក្កមថាតិ វទាមិ។ កោ ច តស្ស សមតិក្កមោ ឥធុទាយិ សព្វសោ នេវសញ្ញានាសញ្ញាយតនំ សមតិក្កម្ម សញ្ញាវេទយិតនិរោធំ ឧបសម្បជ្ជ វិហរតិ អយំ តស្ស សមតិក្កមោ។ ឥតិ ខោ អហំ ឧទាយិ នេវសញ្ញានាសញ្ញាយតនស្សបិ បហានំ វទាមិ។ បស្សសិ នោ ត្វំ ឧទាយិ តំ សញ្ញោជនំ អណុំ វា ថូលំ វា យស្សាហំ នោ បហានំ វទាមីតិ។ នោ ហេតំ ភន្តេតិ។ ឥទមវោច ភគវា អត្តមនោ អាយស្មា ឧទាយី ភគវតោ ភាសិតំ អភិនន្ទីតិ។

លដុកិកោបមសុត្តំ ឆដ្ឋំ និដ្ឋិតំ។

សត្តមំ ចាតុមសុត្តំ

[១៨៦] ឯវមេ្ម សុតំ។ ឯកំ សមយំ ភគវា ចាតុមាយំ វិហរតិ អាមលកីវនេ។ តេន ខោ បន សមយេន សារីបុត្តមោគ្គល្លានប្បមុខានិ បញ្ចមត្តានិ ភិក្ខុសតានិ ចាតុមំ អនុប្បត្តានិ ហោន្តិ ភគវន្តំ ទស្សនាយ។ តេ ច អាគន្តុកា ភិក្ខូ នេវាសិកេហិ ភិក្ខូហិ សទ្ធឹ បដិសម្មោទមានា សេនាសនានិ បញ្ញាបយមានា បត្តចីវរានិ បដិសាមយមានា ឧច្ចាសទ្ទា មហាសទ្ទា អហេសុំ។ អថខោ ភគវា អាយស្មន្តំ អានន្ទំ អាមន្តេសិ កេ បនេតេ អានន្ទ ឧច្ចាសទ្ទា មហាសទ្ទា កេវដ្ដា មញ្ញេ មច្ឆំ វិលោបេន្តីតិ។ ឯតានិ ភន្តេ សារីបុត្តមោគ្គល្លានប្បមុខានិ បញ្ចមត្តានិ ភិក្ខុសតានិ ចាតុមំ អនុប្បត្តានិ ភគវន្តំ ទស្សនាយ តេ អាគន្តុកា ភិក្ខូ នេវាសិកេហិ ភិក្ខូហិ សទ្ធឹ បដិសម្មោទមានា អាសនានិ [ឱ.ម សេនាសនានិ។] បញ្ញាបយមានា បត្តចីវរានិ បដិសាមយមានា ឧច្ចាសទ្ទា មហាសទ្ទាតិ។ តេនាហានន្ទ មម វចនេន ភិក្ខូ [ឱ.ម. តេ ភិក្ខូ។] អាមន្តេហិ សត្ថា អាយស្មន្តេ [ឱ. សត្ថាយស្មន្តេ។] អាមន្តេសីតិ។ ឯវំ ភន្តេតិ ខោ អាយស្មា អានន្ទោ ភគវតោ បដិស្សុត្វា យេន តេ ភិក្ខូ តេនុបសង្កមិ ឧបសង្កមិត្វា តេ ភិក្ខូ ឯតទវោច សត្ថា អាយស្មន្តេ [ឱ. សត្ថាយស្មន្តេ។] អាមន្តេតីតិ។ ឯវមាវុសោតិ ខោ តេ ភិក្ខូ អាយស្មតោ អានន្ទស្ស បដិស្សុត្វា យេន ភគវា តេនុបសង្កមឹសុ ឧបសង្កមិត្វា ភគវន្តំ អភិវាទេត្វា ឯកមន្តំ និសីទឹសុ។ ឯកមន្តំ និសិន្នេ ខោ តេ ភិក្ខូ ភគវា ឯតទវោច កិន្នុ តុម្ហេ ភិក្ខវេ ឧច្ចាសទ្ទា មហាសទ្ទាកេវដ្ដា មញ្ញេ មច្ឆំ វិលោបេន្តីតិ។ ឥមានិ ភន្តេ សារីបុត្តមោគ្គល្លានប្បមុខានិ បញ្ចមត្តានិ ភិក្ខុសតានិ ចាតុមំ អនុប្បត្តានិ ភគវន្តំ ទស្សនាយ តេមេ អាគន្តុកា ភិក្ខូ នេវាសិកេហិ ភិក្ខូហិ សទ្ធឹ បដិសម្មោទមានា សេនាសនានិ បញ្ញាបយមានា បត្តចីវរានិ បដិសាមយមានា ឧច្ចាសទ្ទា មហាសទ្ទាតិ។ គច្ឆថ ភិក្ខវេ បណាមេមិ វោ ន វោ មម សន្តិកេ វត្ថព្វន្តិ។ ឯវំ ភន្តេតិ ខោ តេ ភិក្ខូ ភគវតោ បដិស្សុត្វា ឧដ្ឋាយាសនា ភគវន្តំ អភិវាទេត្វា បទក្ខិណំ កត្វា សេនាសនំ សំសាមេត្វា បត្តចីវរមាទាយ បក្កមឹសុ។

[១៨៧] តេន ខោ បន សមយេន ចាតុមេយ្យកា សក្យា សន្ថាគារេ សន្និបតិតា ហោន្តិ កេនចិទេវ ករណីយេន។ អទ្ទសំសុ [ឱ. អទ្ទសាសុំ។] ខោ ចាតុមេយ្យកា សក្យា តេ ភិក្ខូ ទូរតោវ អាគច្ឆន្តេ ទិស្វាន យេន តេ ភិក្ខូ តេនុបសង្កមឹសុ ឧបសង្កមិត្វា តេ ភិក្ខូ ឯតទវោចុំ ហន្ទ កហំ បន តុម្ហេ អាយស្មន្តោ គច្ឆថាតិ។ ភគវតា ខោ អាវុសោ ភិក្ខុសង្ឃោ បណាមិតោតិ។ តេនហាយស្មន្តោ មុហុត្តំ និសីទថ អប្បេវនាម មយំ សក្កុណេយ្យាម ភគវន្តំ បសាទេតុន្តិ។ ឯវមាវុសោតិ ខោ តេ ភិក្ខូ ចាតុមេយ្យកានំ សក្យានំ បច្ចស្សោសុំ។ អថខោ ចាតុមេយ្យកា សក្យា យេន ភគវា តេនុបសង្កមឹសុ ឧបសង្កមិត្វា ភគវន្តំ អភិវាទេត្វា ឯកមន្តំ និសីទឹសុ។ ឯកមន្តំ និសិន្នា ខោ ចាតុមេយ្យកា សក្យា ភគវន្តំ ឯតទវោចុំ អភិនន្ទតុ ភន្តេ ភគវា ភិក្ខុសង្ឃំ អភិវទតុ ភន្តេ ភគវា ភិក្ខុសង្ឃំ សេយ្យថាបិ ភន្តេ ភគវតា បុព្វេ ភិក្ខុសង្ឃោ អនុគ្គហិតោ ឯវមេវ ភគវា ឯតរហិ អនុគ្គណ្ហាតុ ភិក្ខុសង្ឃំ សន្តេត្ថ ភន្តេ ភិក្ខូ នវា អចិរប្បព្វជិតា អធុនាគតា ឥមំ ធម្មវិនយំ តេសំ ភគវន្តំ ទស្សនាយ អលភន្តានំ សិយា អញ្ញថត្តំ សិយា វិបរិណាមោ សេយ្យថាបិ ភន្តេ ពីជានំ តរុណានំ ឧទកំ អលភន្តានំ សិយា អញ្ញថត្តំ សិយា វិបរិណាមោ ឯវមេវ [ឱ.ម. ឯវមេវ ខោ។] ភន្តេ សន្តេត្ថ ភិក្ខូ នវា អចិរប្បព្វជិតា អធុនាគតា ឥមំ ធម្មវិនយំ តេសំ ភគវន្តំ ទស្សនាយ អលភន្តានំ សិយា អញ្ញថត្តំ សិយា វិបរិណាមោ សេយ្យថាបិ ភន្តេ វច្ឆស្ស តរុណស្ស មាតរំ អបស្សន្តស្ស សិយា អញ្ញថត្តំ សិយា វិបរិណាមោ ឯវមេវ ខោ ភន្តេ សន្តេត្ថ ភិក្ខូ នវា អចិរប្បព្វជិតា អធុនាគតា ឥមំ ធម្មវិនយំ តេសំ ភគវន្តំ អបស្សន្តានំ សិយា អញ្ញថត្តំ សិយា វិបរិណាមោ អភិនន្ទតុ ភន្តេ ភគវា ភិក្ខុសង្ឃំ អភិវទតុ ភន្តេ ភគវា ភិក្ខុសង្ឃំ សេយ្យថាបិ ភន្តេ ភគវតា បុព្វេ ភិក្ខុសង្ឃោ អនុគ្គហិតោ ឯវមេវ ភគវា ឯតរហិ អនុគ្គណ្ហាតុ ភិក្ខុសង្ឃន្តិ។

[១៨៨] អថខោ ព្រហ្មា សហម្បតិ ភគវតោ ចេតសា ចេតោ បរិវិតក្កមញ្ញាយ សេយ្យថាបិ នាម ពលវា បុរិសោ សម្មិញ្ជិតំ វា ពាហំ បសារេយ្យ បសារិតំ វា ពាហំ សម្មិញ្ជេយ្យ ឯវមេវ ព្រហ្មលោកេ អន្តរហិតោ ភគវតោ បុរតោ បាតុរហោសិ។ អថខោ ព្រហ្មា សហម្បតិ ឯកំ ឧត្តរាសង្គំ ករិត្វា យេន ភគវា តេនញ្ជលិម្បណាមេត្វា ភគវន្តំ ឯតទវោច អភិនន្ទតុ ភន្តេ ភគវា ភិក្ខុសង្ឃំ អភិវទតុ ភន្តេ ភគវា ភិក្ខុសង្ឃំ សេយ្យថាបិ ភន្តេ ភគវតា បុព្វេ ភិក្ខុសង្ឃោ អនុគ្គហិតោ ឯវមេវ ភគវា ឯតរហិ អនុគ្គណ្ហាតុ ភិក្ខុសង្ឃំ សន្តេត្ថ ភន្តេ ភិក្ខូ នវា អចិរប្បព្វជិតា អធុនាគតា ឥមំ ធម្មវិនយំ តេសំ ភគវន្តំ ទស្សនាយ អលភន្តានំ សិយា អញ្ញថត្តំ សិយា វិបរិណាមោ សេយ្យថាបិ ភន្តេ ពីជានំ តរុណានំ ឧទកំ អលភន្តានំ សិយា អញ្ញថត្តំ សិយា វិបរិណាមោ ឯវមេវ ភន្តេ [ឱ.ម. ឯវមេវ ខោ។] សន្តេត្ថ ភិក្ខូ នវា អចិរប្បព្វជិតា អធុនាគតា ឥមំ ធម្មវិនយំ តេសំ ភគវន្តំ ទស្សនាយ អលភន្តានំ សិយា អញ្ញថត្តំ សិយា វិបរិណាមោ សេយ្យថាបិ ភន្តេ វច្ឆស្ស តរុណស្ស មាតរំ អបស្សន្តស្ស សិយា អញ្ញថត្តំ សិយា វិបរិណាមោ ឯវមេវ ខោ ភន្តេ សន្តេត្ថ ភិក្ខូ នវា អចិរប្បព្វជិតា អធុនាគតា ឥមំ ធម្មវិនយំ តេសំ ភគវន្តំ អបស្សន្តានំ សិយា អញ្ញថត្តំ សិយា វិបរិណាមោ អភិនន្ទតុ ភន្តេ ភគវា ភិក្ខុសង្ឃំ អភិវទតុ ភន្តេ ភគវា ភិក្ខុសង្ឃំ សេយ្យថាបិ ភន្តេ ភគវតា បុព្វេ ភិក្ខុសង្ឃោ អនុគ្គហិតោ ឯវមេវ ភគវា ឯតរហិ អនុគ្គណ្ហាតុ ភិក្ខុសង្ឃន្តិ។ អសក្ខឹសុ ខោ ចាតុមេយ្យកា ច សក្យា ព្រហ្មា ច សហម្បតិ ភគវន្តំ បសាទេតុំ ពីជូបមេន ច តរុណូបមេន ចាតិ [ឱ.ម. ច]។

[១៨៩] អថខោ អាយស្មា មហាមោគ្គល្លានោ ភិក្ខូ អាមន្តេសិ ឧដ្ឋេថាវុសោ [ម. អយមេវ បាឋោ។ ឱ. ឧដ្ឋហថាវុសោ។] គណ្ហថ បត្តចីវរំ បសាទិតោ ភគវា ចាតុមេយ្យកេហិ ច សក្យេហិ ព្រហ្មុនា ច សហម្បតិនា ពីជូបមេន ច តរុណូបមេន ចាតិ។ ឯវមាវុសោតិ ខោ តេ ភិក្ខូ អាយស្មតោ មហាមោគ្គល្លានស្ស បដិស្សុត្វា ឧដ្ឋាយាសនា បត្តចីវរមាទាយ យេន ភគវា តេនុបសង្កមឹសុ ឧបសង្កមិត្វា ភគវន្តំ អភិវាទេត្វា ឯកមន្តំ និសីទឹសុ។ ឯកមន្តំ និសិន្នំ ខោ អាយស្មន្តំ សារីបុត្តំ ភគវា ឯតទវោច កិន្តិ តេ សារីបុត្ត អហោសិ មយា ភិក្ខុសង្ឃេ បណាមិតេតិ [ម. ភិក្ខុសង្ឃោ បណាមិតោតិ។]។ ឯវំ ខោ មេ ភន្តេ អហោសិ ភគវតា ភិក្ខុសង្ឃេ បណាមិតេ អប្បោស្សុក្កោទានិ ភគវា ទិដ្ឋធម្មសុខវិហារំ អនុយុត្តោ វិហរិស្សតិ មយម្បិទានិ អប្បោស្សុក្កា ទិដ្ឋធម្មសុខវិហារមនុយុត្តា វិហរិស្សាមាតិ។ អាគមេហិ ត្វំ សារីបុត្ត អាគមេហិ ត្វំ សារីបុត្ត [ម. ឥតោ បរំ ទិដ្ឋធម្មសុខវិហារន្តិ បាឋោ ទិស្សតិ។] ន ខោ តេ សារីបុត្ត បុនបិ ឯវរូបំ ចិត្តំ ឧប្បាទេតព្វន្តិ។ អថខោ ភគវា អាយស្មន្តំ មហាមោគ្គល្លានំ អាមន្តេសិ កិន្តិ តេ មោគ្គល្លាន អហោសិ មយា ភិក្ខុសង្ឃេ បណាមិតេតិ។ ឯវំ ខោ មេ ភន្តេ អហោសិ ភគវតា ភិក្ខុសង្ឃេ បណាមិតេ អប្បោស្សុក្កោទានិ ភគវា ទិដ្ឋធម្មសុខវិហារំ អនុយុត្តោ វិហរិស្សតិ អហញ្ចទានិ អាយស្មា ច សារីបុត្តោ ភិក្ខុសង្ឃំ បរិហរិស្សាមាតិ។ សាធុ សាធុ មោគ្គល្លាន អហំ វា ហិ មោគ្គល្លាន ភិក្ខុសង្ឃំ បរិហរេយ្យំ សារីបុត្តមោគ្គល្លានា វាតិ។

[១៩០] អថខោ ភគវា ភិក្ខូ អាមន្តេសិ ចត្តារិមានិ ភិក្ខវេ ភយានិ ឧទកោរោហន្តេ បាដិកង្ខិតព្វានិ កតមានិ ចត្តារិ ឧម្មិភយំ កុម្ភីលភយំ អាវដ្ដភយំ សុសុកាភយំ ឥមានិ ខោ ភិក្ខវេ ចត្តារិ ភយានិ ឧទកោរោហន្តេ បាដិកង្ខិតព្វានិ ឯវមេវ ខោ ភិក្ខវេ ចត្តារិមានិ ភយានិ ឥធេកច្ចេ បុគ្គលេ ឥមស្មឹ ធម្មវិនយេ អគារស្មា អនគារិយំ បព្វជិតេ បាដិកង្ខិតព្វានិ កតមានិ ចត្តារិ ឧម្មិភយំ កុម្ភីលភយំ អាវដ្ដភយំ សុសុកាភយំ។

[១៩១] កតមញ្ច ភិក្ខវេ ឧម្មិភយំ ឥធ ភិក្ខវេ ឯកច្ចោ កុលបុត្តោ សទ្ធា អគារស្មា អនគារិយំ បព្វជិតោ ហោតិ ឱតិណ្ណោម្ហិ ជាតិយា ជរាយ មរណេន សោកេហិ បរិទេវេហិ ទុក្ខេហិ ទោមនស្សេហិ ឧបាយាសេហិ ទុក្ខោតិណ្ណោ ទុក្ខបរេតោ អប្បេវនាម ឥមស្ស កេវលស្ស ទុក្ខក្ខន្ធស្ស អន្តកិរិយា បញ្ញាយេថាតិ។ តមេនំ តថា បព្វជិតំ សមានំ សព្រហ្មចារី ឱវទន្តិ អនុសាសន្តិ ឯវន្តេ អភិក្កមិតព្វំ ឯវន្តេ បដិក្កមិតព្វំ ឯវន្តេ អាលោកិតព្វំ ឯវន្តេ វិលោកិតព្វំ ឯវន្តេ សម្មិញ្ជិតព្វំ ឯវន្តេ បសារិតព្វំ ឯវន្តេ សង្ឃាដិបត្តចីវរំ ធារេតព្វន្តិ។ តស្ស ឯវំ ហោតិ មយំ បុព្វេ អគារិយភូតា សមានា អញ្ញេ ឱវទាមបិ អនុសាសាមបិ ឥមេ បនម្ហាកំ បុត្តមត្តា មញ្ញេ នត្តមត្តា មញ្ញេ អម្ហេ ឱវទិតព្វំ អនុសាសិតព្វំ មញ្ញន្តីតិ។ សោ សិក្ខំ បច្ចក្ខាយ ហីនាយាវត្តតិ។ អយំ វុច្ចតិ ភិក្ខវេ ឧម្មិភយស្ស ភីតោ សិក្ខំ បច្ចក្ខាយ ហីនាយាវត្តោ។ ឧម្មិភយន្តិ ខោ ភិក្ខវេ កោធុបាយាសស្សេតំ អធិវចនំ។

[១៩២] កតមញ្ច ភិក្ខវេ កុម្ភីលភយំ ឥធ ភិក្ខវេ ឯកច្ចោ កុលបុត្តោ សទ្ធា អគារស្មា អនគារិយំ បព្វជិតោ ហោតិ ឱតិណ្ណោម្ហិ ជាតិយា ជរាយ មរណេន សោកេហិ បរិទេវេហិ ទុក្ខេហិ ទោមនស្សេហិ ឧបាយាសេហិ ទុក្ខោតិណ្ណោ ទុក្ខបរេតោ អប្បេវនាម ឥមស្ស កេវលស្ស ទុក្ខក្ខន្ធស្ស អន្តកិរិយា បញ្ញាយេថាតិ។ តមេនំ តថា បព្វជិតំ សមានំ សព្រហ្មចារី ឱវទន្តិ អនុសាសន្តិ ឥទំ តេ ខាទិតព្វំ ឥទំ តេ ន ខាទិតព្វំ ឥទំ តេ ភុញ្ជិតព្វំ ឥទំ តេ ន ភុញ្ជិតព្វំ ឥទំ តេ សាយិតព្វំ ឥទំ តេ ន សាយិតព្វំ ឥទំ តេ បាតព្វំ ឥទំ តេ ន បាតព្វំ កប្បិយំ តេ ខាទិតព្វំ អកប្បិយំ តេ ន ខាទិតព្វំ កប្បិយំ តេ ភុញ្ជិតព្វំ អកប្បិយំ តេ ន ភុញ្ជិតព្វំ កប្បិយំ តេ សាយិតព្វំ អកប្បិយំ តេ ន សាយិតព្វំ កប្បិយំ តេ បាតព្វំ អកប្បិយំ តេ ន បាតព្វំ កាលេ តេ ខាទិតព្វំ វិកាលេ តេ ន ខាទិតព្វំ កាលេ តេ ភុញ្ជិតព្វំ វិកាលេ តេ ន ភុញ្ជិតព្វំ កាលេ តេ សាយិតព្វំ វិកាលេ តេ ន សាយិតព្វំ កាលេ តេ បាតព្វំ វិកាលេ តេ ន បាតព្វន្តិ។ តស្ស ឯវំ ហោតិ មយំ ខោ បុព្វេ អគារិយភូតា សមានា យំ ឥច្ឆាម តំ ខាទាម យំ ន ឥច្ឆាម ន តំ ខាទាម យំ ឥច្ឆាម តំ ភុញ្ជាម យំ ន ឥច្ឆាម ន តំ ភុញ្ជាម យំ ឥច្ឆាម តំ សាយាម យំ ន ឥច្ឆាម ន តំ សាយាម យំ ឥច្ឆាម តំ បិវាម [ឱ. បិបាម។] យំ ន ឥច្ឆាម ន តំ បិវាម កប្បិយម្បិ ខាទាម អកប្បិយម្បិ ខាទាម កប្បិយម្បិ ភុញ្ជាម អកប្បិយម្បិ ភុញ្ជាម កប្បិយម្បិ សាយាម អកប្បិយម្បិ សាយាម កប្បិយម្បិ បិវាម អកប្បិយម្បិ បិវាម កាលេបិ ខាទាម វិកាលេបិ ខាទាម កាលេបិ ភុញ្ជាម វិកាលេបិ ភុញ្ជាម កាលេបិ សាយាម វិកាលេបិ សាយាម កាលេបិ បិវាម វិកាលេបិ បិវាម យម្បិ នោ សទ្ធា គហបតិកា ទិវា វិកាលេ បណីតំ ខាទនីយំ ភោជនីយំ ទេន្តិ តត្ថបិមេ មុខាវរណំ មញ្ញេ ករោន្តីតិ។ សោ សិក្ខំ បច្ចក្ខាយ ហីនាយាវត្តតិ។ អយំ វុច្ចតិ ភិក្ខវេ កុម្ភីលភយស្ស ភីតោ សិក្ខំ បច្ចក្ខាយ ហីនាយាវត្តោ។ កុម្ភីលភយន្តិ ខោ ភិក្ខវេ ឱទរិកត្តស្សេតំ អធិវចនំ។

[១៩៣] កតមញ្ច ភិក្ខវេ អាវដ្ដភយំ ឥធ ភិក្ខវេ ឯកច្ចោ កុលបុត្តោ សទ្ធា អគារស្មា អនគារិយំ បព្វជិតោ ហោតិ ឱតិណ្ណោម្ហិ ជាតិយា ជរាយ មរណេន សោកេហិ បរិទេវេហិ ទុក្ខេហិ ទោមនស្សេហិ ឧបាយាសេហិ ទុក្ខោតិណ្ណោ ទុក្ខបរេតោ អប្បេវនាម ឥមស្ស កេវលស្ស ទុក្ខក្ខន្ធស្ស អន្តកិរិយា បញ្ញាយេថាតិ។ សោ ឯវំ បព្វជិតោ សមានោ បុព្វណ្ហសមយំ និវាសេត្វា បត្តចីវរមាទាយ គាមំ វា និគមំ វា បិណ្ឌាយ បវិសតិ អរក្ខិតេនេវ កាយេន អរក្ខិតាយ វាចាយ អនុបដ្ឋិតាយ សតិយា អសំវុតេហិ ឥន្ទ្រិយេហិ។ សោ តត្ថ បស្សតិ គហបតឹ វា គហបតិបុត្តំ វា បញ្ចហិ កាមគុណេហិ សមប្បិតំ សមង្គីភូតំ បរិចារិយមានំ។ តស្ស ឯវំ ហោតិ មយំ [ឱ.ម. មយំ ខោ។] បុព្វេ អគារិយភូតា សមានា បញ្ចហិ កាមគុណេហិ សមប្បិតា សមង្គីភូតា បរិចារិម្ហា សំវិជ្ជន្តេ [ម. សំវិជ្ជន្តិ។] ខោ កុលេ ភោគា សក្កា ភោគេ ច ភុញ្ជិតុំ បុញ្ញានិ ច កាតុន្តិ។ សោ សិក្ខំ បច្ចក្ខាយ ហីនាយាវត្តតិ។ អយំ វុច្ចតិ ភិក្ខវេ អាវដ្ដភយស្ស ភីតោ សិក្ខំ បច្ចក្ខាយ ហីនាយាវត្តោ។ អាវដ្ដភយន្តិ ខោ ភិក្ខវេ បញ្ចន្នេតំ កាមគុណានំ [បញ្ចន្នំ កាមគុណានមេតំ។] អធិវចនំ។

[១៩៤] កតមញ្ច ភិក្ខវេ សុសុកាភយំ ឥធ ភិក្ខវេ ឯកច្ចោ កុលបុត្តោ សទ្ធា អគារស្មា អនគារិយំ បព្វជិតោ ហោតិ ឱតិណ្ណោម្ហិ ជាតិយា ជរាយ មរណេន សោកេហិ បរិទេវេហិ ទុក្ខេហិ ទោមនស្សេហិ ឧបាយាសេហិ ទុក្ខោតិណ្ណោ ទុក្ខបរេតោ អប្បេវនាម ឥមស្ស កេវលស្ស ទុក្ខក្ខន្ធស្ស អន្តកិរិយា បញ្ញាយេថាតិ។ សោ ឯវំ បព្វជិតោ សមានោ បុព្វណ្ហសមយំ និវាសេត្វា បត្តចីវរមាទាយ គាមំ វា និគមំ វា បិណ្ឌាយ បវិសតិ អរក្ខិតេនេវ កាយេន អរក្ខិតាយ វាចាយ អនុបដ្ឋិតាយ សតិយា អសំវុតេហិ ឥន្ទ្រិយេហិ។ សោ តត្ថ បស្សតិ មាតុគ្គាមំ ទុន្និវត្ថំ វា ទុប្បារុតំ វា តស្ស មាតុគ្គាមំ ទិស្វា ទុន្និវត្ថំ វា ទុប្បារុតំ វា រាគោ ចិត្តំ អនុទ្ធំសេតិ។ សោ រាគានុទ្ធំសេន ចិត្តេន សិក្ខំ បច្ចក្ខាយ ហីនាយាវត្តតិ។ អយំ វុច្ចតិ ភិក្ខវេ សុសុកាភយស្ស ភីតោ សិក្ខំ បច្ចក្ខាយ ហីនាយាវត្តោ។ សុសុកាភយន្តិ ខោ ភិក្ខវេ មាតុគ្គាមស្សេតំ អធិវចនំ។ ឥមានិ ខោ ភិក្ខវេ ចត្តារិ ភយានិ ឥធេ កច្ចេ បុគ្គលេ ឥមស្មឹ ធម្មវិនយេ អគារស្មា អនគារិយំ បព្វជិតេ បាដិកង្ខិតព្វានីតិ។ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទុន្តិ។

ចាតុមសុត្តំ សត្តមំ និដ្ឋិតំ។

អដ្ឋមំ នឡកបានសុត្តំ

[១៩៥] ឯវមេ្ម សុតំ។ ឯកំ សមយំ ភគវា កោសលេសុ វិហរតិ នឡកបានេ បលាសវនេ។ តេន ខោ បន សមយេន សម្ពហុលា អភិញ្ញាតា អភិញ្ញាតា កុលបុត្តា ភគវន្តំ ឧទ្ទិស្ស សទ្ធា អគារស្មា អនគារិយំ បព្វជិតា ហោន្តិ អាយស្មា ច អនុរុទ្ធោ អាយស្មា ច ភទ្ទិយោ [ម. ឯវំ។ ឱ. នន្ទិយោ។] អាយស្មា ច កិម្ពិលោ [កិមិលោតិប្យត្ថិ។] អាយស្មា ច ភគ្គុ អាយស្មា ច កោណ្ឌញ្ញោ [ម. ឯវំ។ ឱ. កុណ្ឌធានោ។] អាយស្មា ច រេវតោ អាយស្មា ច អានន្ទោ អញ្ញេ ច អភិញ្ញាតា អភិញ្ញាតា កុលបុត្តា។ តេន ខោ បន សមយេន ភគវា ភិក្ខុសង្ឃបរិវុតោ អព្ភោកាសេ និសិន្នោ ហោតិ។ អថខោ ភគវា កុលបុត្តេ [ឱ.ម. តេ កុលបុត្តេ។] អារព្ភ ភិក្ខូ អាមន្តេសិ យេ តេ ភិក្ខវេ កុលបុត្តា មមំ ឧទ្ទិស្ស សទ្ធា អគារស្មា អនគារិយំ បព្វជិតា កច្ចិ តេ ភិក្ខវេ អភិរតា ព្រហ្មចរិយេតិ។ តេ ភិក្ខូ តុណ្ហី [ឯវំ វុត្តេ តេ ភិក្ខូ តុណ្ហី អហេសុន្តិ កត្ថចិ បោត្ថកេសុ ទិស្សន្តិ។] អហេសុំ។ ទុតិយម្បិ ខោ ភគវា តេ កុលបុត្តេ អារព្ភ ភិក្ខូ អាមន្តេសិ យេ តេ ភិក្ខវេ កុលបុត្តា មមំ ឧទ្ទិស្ស សទ្ធា អគារស្មា អនគារិយំ បព្វជិតា កច្ចិ តេ ភិក្ខវេ ភិក្ខូ អភិរតា ព្រហ្មចរិយេតិ។ ទុតិយម្បិ ខោ តេ ភិក្ខូ តុណ្ហី អហេសុំ។ តតិយម្បិ ខោ ភគវា តេ កុលបុត្តេ អារព្ភ ភិក្ខូ អាមន្តេសិ យេ តេ ភិក្ខវេ កុលបុត្តា មមំ ឧទ្ទិស្ស សទ្ធា អគារស្មា អនគារិយំ បព្វជិតា កច្ចិ តេ ភិក្ខវេ ភិក្ខូ អភិរតា ព្រហ្មចរិយេតិ។ តតិយម្បិ ខោ តេ ភិក្ខូ តុណ្ហី អហេសុំ។

[១៩៦] អថខោ ភគវតោ ឯតទហោសិ យន្នូនាហំ តេវ កុលបុត្តេ បុច្ឆេយ្យន្តិ។ អថខោ ភគវា អាយស្មន្តំ អនុរុទ្ធំ អាមន្តេសិ កច្ចិ តុម្ហេ អនុរុទ្ធា អភិរតា ព្រហ្មចរិយេតិ។ តគ្ឃ មយំ ភន្តេ អភិរតា ព្រហ្មចរិយេតិ។ សាធុ សាធុ អនុរុទ្ធា ឯតំ ខោ អនុរុទ្ធា តុម្ហាកំ បដិរូបំ កុលបុត្តានំ សទ្ធា អគារស្មា អនគារិយំ បព្វជិតានំ យំ តុម្ហេ អភិរមេយ្យាថ ព្រហ្មចរិយេ យេន តុម្ហេ អនុរុទ្ធា ភទ្រេន យោព្វនេន សមន្នាគតា បឋមេន វយសា សុសុកាឡកេសា កាមេ បរិភុញ្ជេយ្យាថ តេន តុម្ហេ អនុរុទ្ធា ភទ្រេន យោព្វនេន សមន្នាគតា បឋមេន វយសា សុសុកាឡកេសា អគារស្មា អនគារិយំ បព្វជិតា តេ ខោ បន តុម្ហេ អនុរុទ្ធា នេវ រាជាភិនីតា អគារស្មា អនគារិយំ បព្វជិតា ន ចោរាភិនីតា អគារស្មា អនគារិយំ បព្វជិតា ន ឥនដ្ដា អគារស្មា អនគារិយំ បព្វជិតា ន ភយដ្ដា អគារស្មា អនគារិយំ បព្វជិតា ន អាជីវិកាបកតា [ម. នាជីវិកាបកតា។] អគារស្មា អនគារិយំ បព្វជិតា អបិច ខោម្ហិ ឱតិណ្ណោ ជាតិយា ជរាយ មរណេន សោកេហិ បរិទេវេហិ ទុក្ខេហិ ទោមនស្សេហិ ឧបាយាសេហិ ទុក្ខោតិណ្ណោ ទុក្ខបរេតោ អប្បេវនាម ឥមស្ស កេវលស្ស ទុក្ខក្ខន្ធស្ស អន្តកិរិយា បញ្ញាយេថាតិ ននុ តុម្ហេ អនុរុទ្ធា ឯវំ សទ្ធា អគារស្មា អនគារិយំ បព្វជិតាតិ។ ឯវំ ភន្តេ។ ឯវំ បព្វជិតេន ច បន អនុរុទ្ធា កុលបុត្តេន កិមស្ស ករណីយំ។ វិវេកំ អនុរុទ្ធា កាមេហិ វិវេកំ អកុសលេហិ ធម្មេហិ បីតិសុខំ នាធិគច្ឆតិ អញ្ញំ វា តតោ សន្តតរំ។ តស្ស អភិជ្ឈាបិ ចិត្តំ បរិយាទាយ តិដ្ឋតិ ព្យាបាទោបិ ចិត្តំ បរិយាទាយ តិដ្ឋតិ ថីនមិទ្ធម្បិ ចិត្តំ បរិយាទាយ តិដ្ឋតិ វិចិកិច្ឆាបិ ចិត្តំ បរិយាទាយ តិដ្ឋតិ ឧទ្ធច្ចកុក្កុច្ចម្បិ ចិត្តំ បរិយាទាយ តិដ្ឋតិ អរតិបិ ចិត្តំ បរិយាទាយ តិដ្ឋតិ តន្ទីបិ ចិត្តំ បរិយាទាយ តិដ្ឋតិ វិវេកំ អនុរុទ្ធា កាមេហិ វិវេកំ អកុសលេហិ ធម្មេហិ បីតិសុខំ នាធិគច្ឆតិ អញ្ញំ វា តតោ សន្តតរំ។ វិវេកំ អនុរុទ្ធា កាមេហិ វិវេកំ អកុសលេហិ ធម្មេហិ បីតិសុខំ អធិគច្ឆតិ អញ្ញំ វា [ឱ. អញ្ញញ្ច។ ម. អញ្ញំ ច។] តតោ សន្តតរំ។ តស្ស អភិជ្ឈាបិ ចិត្តំ ន បរិយាទាយ តិដ្ឋតិ ព្យាបាទោបិ ចិត្តំ ន បរិយាទាយ តិដ្ឋតិ ថីនមិទ្ធម្បិ ចិត្តំ ន បរិយាទាយ តិដ្ឋតិ ឧទ្ធច្ចកុក្កុច្ចម្បិ ចិត្តំ ន បរិយាទាយ តិដ្ឋតិ វិចិកិច្ឆាបិ ចិត្តំ ន បរិយាទាយ តិដ្ឋតិ អរតិបិ ចិត្តំ ន បរិយាទាយ តិដ្ឋតិ តន្ទីបិ ចិត្តំ ន បរិយាទាយ តិដ្ឋតិ វិវេកំ អនុរុទ្ធា កាមេហិ វិវេកំ អកុសលេហិ ធម្មេហិ បីតិសុខំ អធិគច្ឆតិ អញ្ញំ វា តតោ សន្តតរំ។

[១៩៧] កិន្តិ វោ [ម. តេ។] អនុរុទ្ធា មយិ ហោតិ យេ អាសវា សង្កិលេសិកា បោនោព្ភវិកា សទរា ទុក្ខវិបាកា អាយតឹ ជាតិជរាមរណិយា អប្បហីនា តេ តថាគតស្ស តស្មា តថាគតោ សង្ខាយេកំ បដិសេវតិ សង្ខាយេកំ អធិវាសេតិ សង្ខាយេកំ បរិវជ្ជេតិ សង្ខាយេកំ វិនោទេតីតិ។ ន ខោ នោ ភន្តេ ភគវតិ ឯវំ ហោតិ យេ អាសវា សង្កិលេសិកា បោនោព្ភវិកា សទរា ទុក្ខវិបាកា អាយតឹ ជាតិជរាមរណិយា អប្បហីនា តេ តថាគតស្ស តស្មា តថាគតោ សង្ខាយេកំ បដិសេវតិ សង្ខាយេកំ អធិវាសេតិ សង្ខាយេកំ បរិវជ្ជេតិ សង្ខាយេកំ វិនោទេតីតិ ឯវំ ខោ នោ ភន្តេ ភគវតិ ហោតិ យេ អាសវា សង្កិលេសិកា បោនោព្ភវិកា សទរា ទុក្ខវិបាកា អាយតឹ ជាតិជរាមរណិយា បហីនា តេ តថាគតស្ស តស្មា តថាគតោ សង្ខាយេកំ បដិសេវតិ សង្ខាយេកំ អធិវាសេតិ សង្ខាយេកំ បរិវជ្ជេតិ សង្ខាយេកំ វិនោទេតីតិ។ សាធុ សាធុ អនុរុទ្ធា តថាគតស្ស អនុរុទ្ធា យេ អាសវា សង្កិលេសិកា បោនោព្ភវិកា សទរា ទុក្ខវិបាកា អាយតឹ ជាតិជរាមរណិយា បហីនា តេ [ឱ. តេតិ ន ទិស្សតិ។] ឧច្ឆិន្នមូលា តាលាវត្ថុកតា អនភាវង្គតា [ម. អយមេវ បាឋោ។ ឱ. អនភាវគតោ។] អាយតឹ អនុប្បាទធម្មា សេយ្យថាបិ អនុរុទ្ធា តាលោ មត្ថកច្ឆិន្នោ អភព្វោ បុន វិរូឡ្ហិយា ឯវមេវ ខោ អនុរុទ្ធា តថាគតស្ស យេ អាសវា សង្កិលេសិកា បោនោព្ភវិកា សទរា ទុក្ខវិបាកា អាយតឹ ជាតិជរាមរណិយា បហីនា ឧច្ឆិន្នមូលា តាលាវត្ថុកតា អនភាវង្គតា អាយតឹ អនុប្បាទធម្មា តស្មា តថាគតោ សង្ខាយេកំ បដិសេវតិ សង្ខាយេកំ អធិវាសេតិ សង្ខាយេកំ បរិវជ្ជេតិ សង្ខាយេកំ វិនោទេតីតិ [ឱ. វិនោទេតិ។]។

[១៩៨] តំ កឹ មញ្ញសិ អនុរុទ្ធា កំ អត្ថវសំ សម្បស្សមានោ តថាគតោ សាវកេ អព្ភតីតេ កាលកតេ [ម. កាលំ កតេ។] ឧបបត្តីសុ ព្យាករោតិ អសុ អមុត្រ ឧបន្នោ [ឱ. ឧបបន្នោ។] អសុ អមុត្រ ឧប្បន្នោតិ។ ភគវំមូលកា [ម. ភគវំមូលិកា។] នោ ភន្តេ ធម្មា ភគវំនេត្តិកា ភគវំបដិសរណា សាធុ វត ភន្តេ ភគវន្តំយេវ បដិភាតុ ឯតស្ស ភាសិតស្ស អត្ថោ ភគវតោ សុត្វា ភិក្ខូ ធារេស្សន្តីតិ។ ន ខោ អនុរុទ្ធា តថាគតោ ជនកុហនត្ថំ ន ជនលបនត្ថំ ន លាភសក្ការសិលោ កានិសំសត្ថំ ន ឥតិ មំ ជនោ ជានាតូតិ សាវកេ អព្ភតីតេ កាលកតេ ឧបបត្តីសុ ព្យាករោតិ អសុ អមុត្រ ឧប្បន្នោ អសុ អមុត្រ ឧប្បន្នោតិ។ សន្តិ ច ខោ អនុរុទ្ធា កុលបុត្តា សទ្ធា ឱឡារវេទា ឱឡារប្បាមុជ្ជា តេ តំ សុត្វា តថត្ថាយ ចិត្តំ ឧបសំហរន្តិ តេសំ តំ អនុរុទ្ធា ហោតិ ទីឃរត្តំ ហិតាយ សុខាយ។

[១៩៩] ឥធានុរុទ្ធា ភិក្ខុ សុណាតិ ឥត្ថន្នាមោ ភិក្ខុ កាលកតោ សោ ភគវតា ព្យាកតោ អញ្ញាយ សណ្ឋហីតិ សោ ខោ បនស្ស អាយស្មា សាមំ ទិដ្ឋោ វា ហោតិ អនុស្សវសុតោ វា ឯវំសីលោ សោ អាយស្មា អហោសិ ឥតិបិ ឯវំធម្មោ សោ អាយស្មា អហោសិ ឥតិបិ ឯវំបញ្ញោ សោ អាយស្មា អហោសិ ឥតិបិ ឯវំវិហារី សោ អាយស្មា អហោសិ ឥតិបិ ឯវំវិមុត្តោ សោ អាយស្មា អហោសិ ឥតិបីតិ។ សោ តស្ស សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តោ តថត្ថាយ ចិត្តំ ឧបសំហរតិ។ ឯវម្បិ ខោ អនុរុទ្ធា ភិក្ខុនោ ផាសុវិហារោ ហោតិ។ ឥធានុរុទ្ធា ភិក្ខុ សុណាតិ ឥត្ថន្នាមោ ភិក្ខុ កាលកតោ សោ ភគវតា ព្យាកតោ បញ្ចន្នំ ឱរម្ភាគិយានំ សញ្ញោជនានំ បរិក្ខយា ឱបបាតិកោ តត្ថ បរិនិព្វាយី អនាវត្តិធម្មោ តស្មា លោកាតិ សោ ខោ បនស្ស អាយស្មា សាមំ ទិដ្ឋោ វា ហោតិ អនុស្សវសុតោ វា ឯវំសីលោ សោ អាយស្មា អហោសិ ឥតិបិ ឯវំធម្មោ។បេ។ ឯវំបញ្ញោ… ឯវំវិហារី… ឯវំវិមុត្តោ សោ អាយស្មា អហោសិ ឥតិបីតិ។ សោ តស្ស សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តោ តថត្ថាយ ចិត្តំ ឧបសំហរតិ។ ឯវម្បិ ខោ អនុរុទ្ធា ភិក្ខុនោ ផាសុវិហារោ ហោតិ។ ឥធានុរុទ្ធា ភិក្ខុ សុណាតិ ឥត្ថន្នាមោ ភិក្ខុ កាលកតោ សោ ភគវតា ព្យាកតោ តិណ្ណំ សញ្ញោជនានំ បរិក្ខយា រាគទោសមោហានំ តនុត្តា សកទាគាមី សកិទេវ ឥមំ លោកំ អាគន្ត្វា ទុក្ខស្សន្តំ ករិស្សតីតិ សោ ខោ បនស្ស អាយស្មា សាមំ ទិដ្ឋោ វា ហោតិ អនុស្សវសុតោ វា ឯវំសីលោ សោ អាយស្មា អហោសិ ឥតិបិ ឯវំធម្មោ។បេ។ ឯវំបញ្ញោ… ឯវំវិហារី… ឯវំវិមុត្តោ សោ អាយស្មា អហោសិ ឥតិបីតិ។ សោ តស្ស សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តោ តថត្ថាយ ចិត្តំ ឧបសំហរតិ។ ឯវម្បិ ខោ អនុរុទ្ធា ភិក្ខុនោ ផាសុវិហារោ ហោតិ។ ឥធានុរុទ្ធា ភិក្ខុ សុណាតិ ឥត្ថន្នាមោ ភិក្ខុ កាលកតោ សោ ភគវតា ព្យាកតោ តិណ្ណំ សញ្ញោជនានំ បរិក្ខយា សោតាបន្នោ អវិនិបាតធម្មោ និយតោ សម្ពោធិបរាយនោតិ សោ ខោ បនស្ស អាយស្មា សាមំ ទិដ្ឋោ វា ហោតិ អនុស្សវសុតោ វា ឯវំសីលោ សោ អាយស្មា អហោសិ ឥតិបិ ឯវំធម្មោ។បេ។ ឯវំបញ្ញោ… ឯវំវិហារី… ឯវំវិមុត្តោ សោ អាយស្មា អហោសិ ឥតិបីតិ។ សោ តស្ស សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តោ តថត្ថាយ ចិត្តំ ឧបសំហរតិ។ ឯវម្បិ ខោ អនុរុទ្ធា ភិក្ខុនោ ផាសុវិហារោ ហោតិ។

[២០០] ឥធានុរុទ្ធា ភិក្ខុនី សុណាតិ ឥត្ថន្នាមា ភិក្ខុនី កាលកតា សា ភគវតា ព្យាកតា អញ្ញាយ សណ្ឋហីតិ សា ខោ បនស្សា ភគិនី សាមំ ទិដ្ឋា វា ហោតិ អនុស្សវសុតា វា ឯវំសីលា សា ភគិនី អហោសិ ឥតិបិ ឯវំធម្មា សា ភគិនី អហោសិ ឥតិបិ ឯវំបញ្ញា សា ភគិនី អហោសិ ឥតិបិ ឯវំវិហារិនី សា ភគិនី អហោសិ ឥតិបិ ឯវំវិមុត្តា សា ភគិនី អហោសិ ឥតិបីតិ។ សា តស្សា សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តី តថត្ថាយ ចិត្តំ ឧបសំហរតិ។ ឯវម្បិ ខោ អនុរុទ្ធា ភិក្ខុនិយា ផាសុវិហារោ ហោតិ។ ឥធានុរុទ្ធា ភិក្ខុនី សុណាតិ ឥត្ថន្នាមា ភិក្ខុនី កាលកតា សា ភគវតា ព្យាកតា បញ្ចន្នំ ឱរម្ភាគិយានំ សញ្ញោជនានំ បរិក្ខយា ឱបបាតិកា តត្ថ បរិនិព្វាយិនី អនាវត្តិធម្មា តស្មា លោកាតិ សា ខោ បនស្សា ភគិនី សាមំ ទិដ្ឋា វា ហោតិ អនុស្សវសុតា វា ឯវំសីលា សា ភគិនី អហោសិ ឥតិបិ ឯវំធម្មា សា ភគិនី អហោសិ ឥតិបិ ឯវំបញ្ញា សា ភគិនី អហោសិ ឥតិបិ ឯវំវិហារិនី សា ភគិនី អហោសិ ឥតិបិ ឯវំវិមុត្តា សា ភគិនី អហោសិ ឥតិបីតិ។ សា តស្សា សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តី តថត្ថាយ ចិត្តំ ឧបសំហរតិ។ ឯវម្បិ ខោ អនុរុទ្ធា ភិក្ខុនិយា ផាសុវិហារោ ហោតិ។ ឥធានុរុទ្ធា ភិក្ខុនី សុណាតិ ឥត្ថន្នាមា ភិក្ខុនី កាលកតា សា ភគវតា ព្យាកតា តិណ្ណំ សញ្ញោជនានំ បរិក្ខយា រាគទោសមោហានំ តនុត្តា សកទាគាមិនី សកិទេវ ឥមំ លោកំ អាគន្ត្វា ទុក្ខស្សន្តំ ករិស្សតីតិ សា ខោ បនស្សា ភគិនី សាមំ ទិដ្ឋា វា ហោតិ អនុស្សវសុតា វា ឯវំសីលា សា ភគិនី អហោសិ ឥតិបិ ឯវំធម្មា។បេ។ ឯវំបញ្ញា… ឯវំវិហារិនី… ឯវំវិមុត្តា សា ភគិនី អហោសិ ឥតិបីតិ។ សា តស្ស សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តី តថត្ថាយ ចិត្តំ ឧបសំហរតិ។ ឯវម្បិ ខោ អនុរុទ្ធា ភិក្ខុនិយា ផាសុវិហារោ ហោតិ។ ឥធានុរុទ្ធា ភិក្ខុនី សុណាតិ ឥត្ថន្នាមា ភិក្ខុនី កាលកតា សា ភគវតា ព្យាកតា តិណ្ណំ សញ្ញោជនានំ បរិក្ខយា សោតាបន្នា អវិនិបាតធម្មា និយតា សម្ពោធិបរាយនាតិ សា ខោ បនស្សា ភគិនី សាមំ ទិដ្ឋា វា ហោតិ អនុស្សវសុតា វា ឯវំសីលា សា ភគិនី អហោសិ ឥតិបិ ឯវំធម្មា។បេ។ ឯវំបញ្ញា… ឯវំវិហារិនី… ឯវំវិមុត្តា សា ភគិនី អហោសិ ឥតិបីតិ។ សា តស្សា សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តី តថត្ថាយ ចិត្តំ ឧបសំហរតិ។ ឯវម្បិ ខោ អនុរុទ្ធា ភិក្ខុនិយា ផាសុវិហារោ ហោតិ។

[២០១] ឥធានុរុទ្ធា ឧបាសកោ សុណាតិ ឥត្ថន្នាមោ ឧបាសកោ កាលកតោ សោ ភគវតា ព្យាកតោ បញ្ចន្នំ ឱរម្ភាគិយានំ សញ្ញោជនានំ បរិក្ខយា ឱបបាតិកោ តត្ថ បរិនិព្វាយី អនាវត្តិធម្មោ តស្មា លោកាតិ សោ ខោ បនស្ស អាយស្មា សាមំ ទិដ្ឋោ វា ហោតិ អនុស្សវសុតោ វា ឯវំសីលោ សោ អាយស្មា អហោសិ ឥតិបិ ឯវំធម្មោ សោ អាយស្មា អហោសិ ឥតិបិ ឯវំបញ្ញោ សោ អាយស្មា អហោសិ ឥតិបិ ឯវំវិហារី សោ អាយស្មា អហោសិ ឥតិបិ ឯវំវិមុត្តោ សោ អាយស្មា អហោសិ ឥតិបីតិ។ សោ តស្ស សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តោ តថត្ថាយ ចិត្តំ ឧបសំហរតិ។ ឯវម្បិ ខោ អនុរុទ្ធា ឧបាសកស្ស ផាសុវិហារោ ហោតិ។ ឥធានុរុទ្ធា ឧបាសកោ សុណាតិ ឥត្ថន្នាមោ ឧបាសកោ កាលកតោ សោ ភគវតា ព្យាកតោ តិណ្ណំ សញ្ញោជនានំ បរិក្ខយា រាគទោសមោហានំ តនុត្តា សកទាគាមី សកិទេវ ឥមំ លោកំ អាគន្ត្វា ទុក្ខស្សន្តំ ករិស្សតីតិ សោ ខោ បនស្ស អាយស្មា សាមំ ទិដ្ឋោ វា ហោតិ អនុស្សវសុតោ វា ឯវំសីលោ សោ អាយស្មា អហោសិ ឥតិបិ ឯវំធម្មោ។បេ។ ឯវំបញ្ញោ… ឯវំវិហារី… ឯវំវិមុត្តោ សោ អាយស្មា អហោសិ ឥតិបីតិ។ សោ តស្ស សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តោ តថត្ថាយ ចិត្តំ ឧបសំហរតិ។ ឯវម្បិ ខោ អនុរុទ្ធា ឧបាសកស្ស ផាសុវិហារោ ហោតិ។ ឥធានុរុទ្ធា ឧបាសកោ សុណាតិ ឥត្ថន្នាមោ ឧបាសកោ កាលកតោ សោ ភគវតា ព្យាកតោ តិណ្ណំ សញ្ញោជនានំ បរិក្ខយា សោតាបន្នោ អវិនិបាតធម្មោ និយតោ សម្ពោធិបរាយនោតិ សោ ខោ បនស្ស អាយស្មា សាមំ ទិដ្ឋោ វា ហោតិ អនុស្សវសុតោ វា ឯវំសីលោ សោ អាយស្មា អហោសិ ឥតិបិ ឯវំធម្មោ។បេ។ ឯវំបញ្ញោ… ឯវំវិហារី… ឯវំវិមុត្តោ សោ អាយស្មា អហោសិ ឥតិបីតិ។ សោ តស្ស សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តោ តថត្ថាយ ចិត្តំ ឧបសំហរតិ។ ឯវម្បិ ខោ អនុរុទ្ធា ឧបាសកស្ស ផាសុវិហារោ ហោតិ។

[២០២] ឥធានុរុទ្ធា ឧបាសិកា សុណាតិ ឥត្ថន្នាមា ឧបាសិកា កាលកតា សា ភគវតា ព្យាកតា បញ្ចន្នំ ឱរម្ភាគិយានំ សញ្ញោជនានំ បរិក្ខយា ឱបបាតិកា តត្ថ បរិនិព្វាយិនី អនាវត្តិធម្មា តស្មា លោកាតិ សា ខោ បនស្សា ភគិនី សាមំ ទិដ្ឋា វា ហោតិ អនុស្សវសុតា វា ឯវំសីលា សា ភគិនី អហោសិ ឥតិបិ ឯវំធម្មា។បេ។ ឯវំបញ្ញា… ឯវំវិហារិនី… ឯវំវិមុត្តា សា ភគិនី អហោសិ ឥតិបីតិ។ សា តស្សា សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តី តថត្តាយ ចិត្តំ ឧបសំហរតិ។ ឯវម្បិ ខោ អនុរុទ្ធាឧបាសិកាយ ផាសុវិហារោ ហោតិ។ ឥធានុរុទ្ធា ឧបាសិកា សុណាតិ ឥត្ថន្នាមា ឧបាសិកា កាលកតា សា ភគវតា ព្យាកតា តិណ្ណំ សញ្ញោជនានំ បរិក្ខយា រាគទោសមោហានំ តនុត្តា សកទាគាមិនី សកិទេវ ឥមំ លោកំ អាគន្ត្វា ទុក្ខស្សន្តំ ករិស្សតីតិ សា ខោ បនស្សា ភគិនី សាមំ ទិដ្ឋា វា ហោតិ អនុស្សវសុតា វា ឯវំសីលា សា ភគិនី អហោសិ ឥតិបិ ឯវំធម្មា។បេ។ ឯវំបញ្ញា… ឯវំវិហារិនី… ឯវំវិមុត្តា សា ភគិនី អហោសិ ឥតិបីតិ។ សា តស្សា សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តី តថត្តាយ ចិត្តំ ឧបសំហរតិ។ ឯវម្បិ ខោ អនុរុទ្ធា ឧបាសិកាយ ផាសុវិហារោ ហោតិ។ ឥធានុរុទ្ធា ឧបាសិកា សុណាតិ ឥត្ថន្នាមា ឧបាសិកា កាលកតា សា ភគវតា ព្យាកតា តិណ្ណំ សញ្ញោជនានំ បរិក្ខយា សោតាបន្នា អវិនិបាតធម្មា និយតា សម្ពោធិបរាយនាតិ សា ខោ បនស្សា ភគិនី សាមំ ទិដ្ឋា វា ហោតិ អនុស្សវសុតា វា ឯវំសីលា សា ភគិនី អហោសិ ឥតិបិ ឯវំធម្មា សា ភគិនី អហោសិ ឥតិបិ ឯវំវិហារិនី សា ភគិនី អហោសិ ឥតិបិ ឯវំវិមុត្តា សា ភគិនី អហោសិ ឥតិបីតិ។ សា តស្សា សទ្ធញ្ច សីលញ្ច សុតញ្ច ចាគញ្ច បញ្ញញ្ច អនុស្សរន្តី តថត្តាយ ចិត្តំ ឧបសំហរតិ។ ឯវម្បិ ខោ អនុរុទ្ធា ឧបាសិកាយ ផាសុវិហារោ ហោតិ។ ឥតិ ខោ អនុរុទ្ធា តថាគតោ ន ជនកុហនត្ថំ ន ជនលបនត្ថំ ន លាភសក្ការសិលោកានិសំសត្ថំ ន ឥតិ មំ ជនោ ជានាតូតិ សាវកេ អព្ភតីតេ កាលកតេ ឧបបត្តីសុ ព្យាករោតិ អសុ អមុត្រ ឧប្បន្នោ អសុ អមុត្រ ឧប្បន្នោតិ។ សន្តិ ខោ [ឱ.ម. សន្តិ ច ខោ។] អនុរុទ្ធា កុលបុត្តា សទ្ធា ឱឡារវេទា ឱឡារប្បាមុជ្ជា តេ តំ សុត្វា តថត្តាយ ចិត្តំ ឧបសំហរន្តិ តេសន្តំ អនុរុទ្ធា ហោតិ ទីឃរត្តំ ហិតាយ សុខាយាតិ។ ឥទមវោច ភគវា អត្តមនោ អាយស្មា អនុរុទ្ធោ ភគវតោ ភាសិតំ អភិនន្ទីតិ។

នឡកបានសុត្តំ អដ្ឋមំ និដ្ឋិតំ។

នវមំ គោលិស្សានិសុត្តំ [ឆដ្ឋ. គោលិយានិសុត្តំ]

[២០៣] ឯវមេ្ម សុតំ។ ឯកំ សមយំ ភគវា រាជគហេ វិហរតិ វេឡុវនេ កលន្ទកនិវាបេ។ តេន ខោ បន សមយេន គោលិស្សានិ នាម [ម. គោលិយានិ នាម។ ឱ. គុលិស្សានិ នាម។] ភិក្ខុ អារញ្ញកោ បទរសមាចារោ សង្ឃមជ្ឈេ ឱសដោ ហោតិ កេនចិទេវ ករណីយេន។

[២០៤] តត្រ ខោ អាយស្មា សារីបុត្តោ គោលិស្សានឹ នាម ភិក្ខុំ អារព្ភ ភិក្ខូ អាមន្តេសិ អារញ្ញកេនាវុសោ ភិក្ខុនា សង្ឃគតេន សង្ឃេ វិហរន្តេន សព្រហ្មចារីសុ សគារវេន ភវិតព្វំ សប្បតិស្សេន។ សចេ អាវុសោ អារញ្ញកោ ភិក្ខុ សង្ឃគតោ សង្ឃេ វិហរន្តោ សព្រហ្មចារីសុ អគារវោ ហោតិ អប្បតិស្សោ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា សព្រហ្មចារីសុ អគារវោ ហោតិ [ឱ. ហោតីតិ ន ទិស្សតិ។] អប្បតិស្សោតិ តស្ស [ឥតិស្សាតិ បាឋេន ភវិតព្វំ។] ភវន្តិ វត្តារោ តស្មា អារញ្ញកេន ភិក្ខុនា សង្ឃគតេន សង្ឃេ វិហរន្តេន សព្រហ្មចារីសុ សគារវេន ភវិតព្វំ សប្បតិស្សេន។

[២០៥] អារញ្ញកេនាវុសោ ភិក្ខុនា សង្ឃគតេន សង្ឃេ វិហរន្តេន អាសនកុសលេន ភវិតព្វំ ឥតិ ថេរេ ច ភិក្ខូ នានុប្បខជ្ជ និសីទិស្សាមិ នវេ ច ភិក្ខូ ន អាសនេន បដិពាហិស្សាមីតិ។ សចេ អាវុសោ អារញ្ញកោ ភិក្ខុ សង្ឃគតោ សង្ឃេ វិហរន្តោ ន អាសនកុសលោ ហោតិ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា [ឥតោ បរំ អាសនកុសលោ ន ហោតីតិ មរម្មបោត្ថកេ ទិស្សតិ។] អភិសមាចារិកម្បិ ធម្មំ ន ជានាតីតិ តស្ស ភវន្តិ វត្តារោ តស្មា អារញ្ញកេន ភិក្ខុនា សង្ឃគតេន សង្ឃេ វិហរន្តេន អាសនកុសលេន ភវិតព្វំ [ម.ឥតោ បរំ អភិសមាចារិកោបិ ធម្មោ ជានិតព្វោ សចេ អាវុសោ អារញ្ញកោ ភិក្ខុ… ន អភិសមាចារិកម្បិ ធម្មំ ន ជានាតិ តស្ស ភវន្តិ វត្តារោ កិម្បិនិមស្សាយស្មតោ… ន ជានាតីតិ តស្ស ភវន្តិ វត្តារោ តស្មា អារញ្ញកេន ភិក្ខុនា អភិសមាចារោ ធម្មោ ជានិតព្វោ ទិស្សន្តិ។]។

[២០៦] អារញ្ញកេនាវុសោ ភិក្ខុនា សង្ឃគតេន សង្ឃេ វិហរន្តេន នាតិកាលេន គាមោ បវិសិតព្វោ ន ទិវា បដិក្កមិតព្វំ សចេ អាវុសោ អារញ្ញកោ ភិក្ខុ សង្ឃគតោ សង្ឃេ វិហរន្តោ អតិកាលេន គាមំ បវិសតិ ទិវា បដិក្កមតីតិ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា អតិកាលេន គាមំ បវិសតិ ទិវា បដិក្កមតីតិ តស្ស ភវន្តិ វត្តារោ តស្មា អារញ្ញកេន ភិក្ខុនា សង្ឃគតេន សង្ឃេ វិហរន្តេន នាតិកាលេន គាមោ បវិសិតព្វោ ន ទិវា បដិក្កមិតព្វំ។

[២០៧] អារញ្ញកេនាវុសោ ភិក្ខុនា សង្ឃគតេន សង្ឃេ វិហរន្តេន ន បុរេភត្តំ បច្ឆាភត្តំ កុលេសុ ចារិត្តំ អាបជ្ជិតព្វំ។ សចេ អាវុសោ អារញ្ញកោ ភិក្ខុ សង្ឃគតោ សង្ឃេ វិហរន្តោ បុរេភត្តំ បច្ឆាភត្តំ កុលេសុ ចារិត្តំ អាបជ្ជតិ តស្ស ភវន្តិ វត្តារោ អយន្នូនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន វិហរតោ វិកាលេ ចរិយា ពហុលីកតា តមេនំ សង្ឃគតម្បិ សមុទាចរតីតិ តស្ស [ឱ. សមុទាចរតីតិស្ស។] ភវន្តិ វត្តារោ តស្មា អារញ្ញកេន ភិក្ខុនា សង្ឃគតេន សង្ឃេ វិហរន្តេន ន បុរេភត្តំ បច្ឆាភត្តំ កុលេសុ ចារិត្តំ អាបជ្ជិតព្វំ។

[២០៨] អារញ្ញកេនាវុសោ ភិក្ខុនា សង្ឃគតេន សង្ឃេ វិហរន្តេន អនុទ្ធតេន ភវិតព្វំ អចបលេន។ សចេ អាវុសោ អារញ្ញកោ ភិក្ខុ សង្ឃគតោ សង្ឃេ វិហរន្តោ ឧទ្ធតោ ហោតិ ចបលោ តស្ស ភវន្តិ វត្តារោ ឥទន្នូនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន វិហរតោ ឧទ្ធច្ចំ ចាបល្យំ ពហុលីកតំ តមេនំ សង្ឃគតម្បិ សមុទាចរតីតិ តស្ស ភវន្តិ វត្តារោ តស្មា អារញ្ញកេន ភិក្ខុនា សង្ឃគតេន សង្ឃេ វិហរន្តេន អនុទ្ធតេន ភវិតព្វំ អចបលេន។

[២០៩] អារញ្ញកេនាវុសោ ភិក្ខុនា សង្ឃគតេន សង្ឃេ វិហរន្តេន អមុខរេន ភវិតព្វំ អវិកិណ្ណវាចេន។ សចេ អាវុសោ អារញ្ញកោ ភិក្ខុ សង្ឃគតោ សង្ឃេ វិហរន្តោ មុខរោ ហោតិ វិកិណ្ណវាចោ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា មុខរោ វិកិណ្ណវាចោតិ តស្ស [ឱ. វិកិណ្ណវាចោតិស្ស។] ភវន្តិ វត្តារោ តស្មា អារញ្ញកេន ភិក្ខុនា សង្ឃគតេន សង្ឃេ វិហរន្តេន អមុខរេន ភវិតព្វំ អវិកិណ្ណវាចេន។

[២១០] អារញ្ញកេនាវុសោ ភិក្ខុនា សង្ឃគតេន សង្ឃេ វិហរន្តេន សុវចេន ភវិតព្វំ កល្យាណមិត្តេន។ សចេ អាវុសោ អារញ្ញកោ ភិក្ខុ សង្ឃគតោ សង្ឃេ វិហរន្តោ ទុព្វចោ ហោតិ បាបមិត្តោ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា ទុព្វចោ បាបមិត្តោតិ តស្ស ភវន្តិ វត្តារោ តស្មា អារញ្ញកេន ភិក្ខុនា សង្ឃគតេន សង្ឃេ វិហរន្តេន សុវចេន ភវិតព្វំ កល្យាណមិត្តេន។

[២១១] អារញ្ញកេនាវុសោ ភិក្ខុនា ឥន្ទ្រិយេសុ គុត្តទ្វារេន ភវិតព្វំ។ សចេ អាវុសោ អារញ្ញកោ ភិក្ខុ ឥន្ទ្រិយេសុ គុត្តទ្វារោ ន [ឱ.ម. អគុត្តទ្វារោ។] ហោតិ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា ឥន្ទ្រិយេសុ គុត្តទ្វារោ ន [ឱ.ម. អគុត្តទ្វារោ។] ហោតីតិ តស្ស ភវន្តិ វត្តារោ តស្មា អារញ្ញកេន ភិក្ខុនា ឥន្ទ្រិយេសុ គុត្តទ្វារេន ភវិតព្វំ។

[២១២] អារញ្ញកេនាវុសោ ភិក្ខុនា ភោជនេ មត្តញ្ញុនា ភវិតព្វំ។ សចេ អាវុសោ អារញ្ញកោ ភិក្ខុ ភោជនេ អមត្តញ្ញូ ហោតិ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា ភោជនេ អមត្តញ្ញូ ហោតីតិ តស្ស [ឱ. អមត្តញ្ញូតិស្ស។ ម. អមត្តញ្ញូតិ តស្ស។] ភវន្តិ វត្តារោ តស្មា អារញ្ញកេន ភិក្ខុនា ភោជនេ មត្តញ្ញុនា ភវិតព្វំ។

[២១៣] អារញ្ញកេនាវុសោ ភិក្ខុនា ជាគរិយំ អនុយុត្តេន ភវិតព្វំ។ សចេ អាវុសោ អារញ្ញកោ ភិក្ខុ ជាគរិយំ អននុយុត្តោ ហោតិ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា ជាគរិយំ អននុយុត្តោ ហោតីតិ តស្ស ភវន្តិ វត្តារោ តស្មា អារញ្ញកេន ភិក្ខុនា ជាគរិយំ អនុយុត្តេន ភវិតព្វំ។

[២១៤] អារញ្ញកេនាវុសោ ភិក្ខុនា អារទ្ធវីរិយេន ភវិតព្វំ។ សចេ អាវុសោ អារញ្ញកោ ភិក្ខុ កុសីតោ ហោតិ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា កុសីតោ ហោតីតិ តស្ស ភវន្តិ វត្តារោ តស្មា អារញ្ញកេន ភិក្ខុនា អារទ្ធវីរិយេន ភវិតព្វំ។

[២១៥] អារញ្ញកេនាវុសោ ភិក្ខុនា ឧបដ្ឋិតស្សតិនា ភវិតព្វំ។ សចេ អាវុសោ អារញ្ញកោ ភិក្ខុ មុដ្ឋស្សតី ហោតិ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា មុដ្ឋស្សតីតិ តស្ស ភវន្តិ វត្តារោ តស្មា អារញ្ញកេន ភិក្ខុនា ឧបដ្ឋិតស្សតិនា ភវិតព្វំ។

[២១៦] អារញ្ញកេនាវុសោ ភិក្ខុនា សមាហិតេន ភវិតព្វំ។ សចេ អាវុសោ អារញ្ញកោ ភិក្ខុ អសមាហិតោ ហោតិ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា អសមាហិតោតិ តស្ស ភវន្តិ វត្តារោ តស្មា អារញ្ញកេន ភិក្ខុនា សមាហិតេន ភវិតព្វំ។

[២១៧] អារញ្ញកេនាវុសោ ភិក្ខុនា បញ្ញវតា ភវិតព្វំ។ សចេ អាវុសោ អារញ្ញកោ ភិក្ខុ ទុប្បញ្ញោ ហោតិ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា ទុប្បញ្ញោតិ តស្ស ភវន្តិ វត្តារោ តស្មា អារញ្ញកេន ភិក្ខុនា បញ្ញវតា ភវិតព្វំ។

[២១៨] អារញ្ញកេនាវុសោ ភិក្ខុនា អភិធម្មេ អភិវិនយេ យោគោ ករណីយោ។ សន្តាវុសោ អារញ្ញកំ ភិក្ខុំ អភិធម្មេ អភិវិនយេ បញ្ហំ បុច្ឆិតារោ។ សចេ អាវុសោ អារញ្ញកោ ភិក្ខុ អភិធម្មេ អភិវិនយេ បញ្ហំ បុដ្ឋោ ន សម្បាយតិ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា អភិធម្មេ អភិវិនយេ បញ្ហំ បុដ្ឋោ ន សម្បាយតីតិ តស្ស ភវន្តិ វត្តារោ តស្មា អារញ្ញកេន ភិក្ខុនា អភិធម្មេ អភិវិនយេ យោគោ ករណីយោ។

[២១៩] អារញ្ញកេនាវុសោ ភិក្ខុនា យេ តេ សន្តា វិមោក្ខា អតិក្កម្ម រូបេ អារុប្បា តត្ថ យោគោ ករណីយោ។ សន្តាវុសោ អារញ្ញកំ ភិក្ខុំ យេ តេ សន្តា វិមោក្ខា អតិក្កម្ម រូបេ អារុប្បា តត្ថ [ឱ.ម. តត្ថ បញ្ហំ។] បុច្ឆិតារោ។ សចេ អាវុសោ អារញ្ញកោ ភិក្ខុ យេ តេ សន្តា វិមោក្ខា អតិក្កម្ម រូបេ អារុប្បា តត្ថ បញ្ហំ បុដ្ឋោ ន សម្បាយតិ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា យេ តេ សន្តា វិមោក្ខា អតិក្កម្ម រូបេ អារុប្បា តត្ថ បញ្ហំ បុដ្ឋោ ន សម្បាយតីតិ តស្ស ភវន្តិ វត្តារោ តស្មា អារញ្ញកេន ភិក្ខុនា យេ តេ សន្តា វិមោក្ខា អតិក្កម្ម រូបេ អារុប្បា តត្ថ យោគោ ករណីយោ។

[២២០] អារញ្ញកេនាវុសោ ភិក្ខុនា ឧត្តរិមនុស្សធម្មេ យោគោ ករណីយោ។ សន្តាវុសោ អារញ្ញកំ ភិក្ខុំ ឧត្តរិមនុស្សធម្មេ បញ្ហំ បុច្ឆិតារោ។ សចេ អាវុសោ អារញ្ញកោ ភិក្ខុ ឧត្តរិមនុស្សធម្មេ បញ្ហំ បុដ្ឋោ ន សម្បាយតិ តស្ស ភវន្តិ វត្តារោ កិម្បនិមស្សាយស្មតោ អារញ្ញកស្ស ឯកស្សារញ្ញេ សេរិវិហារេន យោ អយមាយស្មា យស្សត្ថាយ [ឱ. យស្សបត្ថាយ។] បព្វជិតោ តមត្ថំ ន ជានាតីតិ តស្ស ភវន្តិ វត្តារោ តស្មា អារញ្ញកេន ភិក្ខុនា ឧត្តរិមនុស្សធម្មេ យោគោ ករណីយោតិ។

[២២១] ឯវំ វុត្តេ អាយស្មា មហាមោគ្គល្លានោ អាយស្មន្តំ សារីបុត្តំ ឯតទវោច អារញ្ញកេនេវ នុ ខោ អាវុសោ សារីបុត្ត ភិក្ខុនា ឥមេ ធម្មា សមាទាយ វត្តិតព្វា ឧទាហុ គាមន្តវិហារិនាបីតិ។ អារញ្ញកេនបិ ខោ អាវុសោ មោគ្គល្លាន ភិក្ខុនា ឥមេ ធម្មា សមាទាយ វត្តិតព្វា បគេវ គាមន្តវិហារិនាតិ។

គោលិស្សានិសុត្តំ នវមំ និដ្ឋិតំ។

[ឱ. គុលិស្សានិសុត្តន្តំ នវមំ។ ម. គោលិយានិ សុត្តន្តំ នវមំ។]

ទសមំ កីដាគិរិសុត្តំ

[២២២] ឯវមេ្ម សុតំ។ ឯកំ សមយំ ភគវា កាសីសុ ចារិកំ ចរតិ មហតា ភិក្ខុសង្ឃេន សទ្ធឹ។ តត្រ ខោ ភគវា ភិក្ខូ អាមន្តេសិ អហំ ខោ ភិក្ខវេ អញ្ញត្រេវ រត្តិភោជនា [ម. សព្វត្ថ រត្តិភោជនន្តិ ទិស្សតិ។] ភុញ្ជាមិ អញ្ញត្រ [ម. អញ្ញត្រេវ។] ខោ បនាហំ ភិក្ខវេ រត្តិភោជនា ភុញ្ជមានោ អប្បាពាធតញ្ច សញ្ជានាមិ អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ច ឯថ តុម្ហេបិ ភិក្ខវេ អញ្ញត្រេវ រត្តិភោជនា ភុញ្ជថ អញ្ញត្រ ខោ បន ភិក្ខវេ តុម្ហេបិ រត្តិភោជនា ភុញ្ជមានា អប្បាពាធតញ្ច សញ្ជានិស្សថ អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ចាតិ។ ឯវំ ភន្តេតិ ខោ តេ ភិក្ខូ ភគវតោ បច្ចស្សោសុំ។

[២២៣] អថខោ ភគវា កាសីសុ អនុបុព្វេន ចារិកំ ចរមានោ យេន កីដាគិរិ នាម កាសីនំ និគមោ តទវសរិ។ តត្រ សុទំ ភគវា កីដាគិរិស្មឹ វិហរតិ កាសីនំ និគមេ។ តេន ខោ បន សមយេន អស្សជិបុនព្វសុកា នាម ភិក្ខូ កីដាគិរិស្មឹ អាវាសិកា ហោន្តិ។ អថខោ សម្ពហុលា ភិក្ខូ យេន អស្សជិបុនព្វសុកា ភិក្ខូ តេនុបសង្កមឹសុ ឧបសង្កមិត្វា អស្សជិបុនព្វសុកេ ភិក្ខូ ឯតទវោចុំ ភគវា ខោ អាវុសោ អញ្ញត្រេវ រត្តិភោជនា ភុញ្ជតិ ភិក្ខុសង្ឃោ ច អញ្ញត្រ ខោ បនាវុសោ រត្តិភោជនា ភុញ្ជមានា អប្បាពាធតញ្ច សញ្ជានន្តិ អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ច ឯថ តុម្ហេបិ អាវុសោ អញ្ញត្រេវ រត្តិភោជនា ភុញ្ជថ អញ្ញត្រ ខោ បនាវុសោ តុម្ហេបិ រត្តិភោជនា ភុញ្ជមានា អប្បាពាធតញ្ច សញ្ជានិស្សថ អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ចាតិ។ ឯវំ វុត្តេ អស្សជិបុនព្វសុកា ភិក្ខូ តេ ភិក្ខូ ឯតទវោចុំ មយំ ខោ អាវុសោ សាយញ្ចេវ ភុញ្ជាម បាតោ ច ទិវា ច វិកាលេ តេ មយំ សាយញ្ចេវ ភុញ្ជមានា បាតោ ច ទិវា ច វិកាលេ អប្បាពាធតញ្ច សញ្ជានាម អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ច តេ មយំ កឹ សន្ទិដ្ឋិកំ ហិត្វា កាលិកំ អនុធាវិស្សាម សាយញ្ចេវ មយំ ភុញ្ជិស្សាម បាតោ ច ទិវា ច វិកាលេតិ។

[២២៤] យតោ ខោ [ម. យតោ ច ខោ។] តេ ភិក្ខូ នាសក្ខឹសុ អស្សជិបុនព្វសុកេ ភិក្ខូ សញ្ញាបេតុំ អថ តេ ភិក្ខូ [ឱ.ម. តេ ភិក្ខូតិ ន ទិស្សតិ។] យេន ភគវា តេនុបសង្កមឹសុ ឧបសង្កមិត្វា ភគវន្តំ អភិវាទេត្វា ឯកមន្តំ និសីទឹសុ។ ឯកមន្តំ និសិន្នា ខោ តេ ភិក្ខូ ភគវន្តំ ឯតទវោចុំ ឥធ មយំ ភន្តេ យេន អស្សជិបុនព្វសុកា ភិក្ខូ តេនុបសង្កមិម្ហា [ឱ.ម. តេនុបសង្កមិម្ហ។] ឧបសង្កមិត្វា អស្សជិបុនព្វសុកេ ភិក្ខូ ឯតទវោចុម្ហា [ឱ.ម. ឯតទវោចុម្ហ។] ភគវា ខោ អាវុសោ អញ្ញត្រេវ រត្តិភោជនា ភុញ្ជតិ ភិក្ខុសង្ឃោ ច អញ្ញត្រ ខោ បនាវុសោ រត្តិភោជនា ភុញ្ជមានា អប្បាពាធតញ្ច សញ្ជានន្តិ អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ច ឯថ តុម្ហេបិ អាវុសោ អញ្ញត្រេវ រត្តិភោជនា ភុញ្ជថ អញ្ញត្រ ខោ បនាវុសោ តុម្ហេបិ រត្តិភោជនា ភុញ្ជមានា អប្បាពាធតញ្ច សញ្ជានិស្សថ អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ចាតិ ឯវំ វុត្តេ ភន្តេ [ម. ភន្តេតិ ន ទិស្សតិ។] អស្សជិបុនព្វសុកា ភិក្ខូ អម្ហេ ឯតទវោចុំ មយំ ខោ អាវុសោ សាយញ្ចេវ ភុញ្ជាម បាតោ ច ទិវា ច វិកាលេ តេ មយំ សាយញ្ចេវ ភុញ្ជមានា បាតោ ច ទិវា ច វិកាលេ អប្បាពាធតញ្ច សញ្ជានាម អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ច តេ មយំ កឹ សន្ទិដ្ឋិកំ ហិត្វា កាលិកំ អនុធាវិស្សាម សាយញ្ចេវ មយំ ភុញ្ជិស្សាម បាតោ ច ទិវា ច វិកាលេតិ យតោ ខោ មយំ ភន្តេ នាសក្ខិម្ហា អស្សជិបុនព្វសុកេ ភិក្ខូ សញ្ញាបេតុំ អថ មយំ ឯតមត្ថំ ភគវតោ អារោចេមាតិ។ អថខោ ភគវា អញ្ញតរំ ភិក្ខុំ អាមន្តេសិ ឯហិ ត្វំ ភិក្ខុ មម វចនេន អស្សជិបុនព្វសុកេ ភិក្ខូ អាមន្តេហិ សត្ថាយស្មន្តេ អាមន្តេតីតិ។ ឯវំ ភន្តេតិ ខោ សោ ភិក្ខុ ភគវតោ បដិស្សុត្វា យេន អស្សជិបុនព្វសុកា ភិក្ខូ តេនុបសង្កមិ ឧបសង្កមិត្វា អស្សជិបុនព្វសុកេ ភិក្ខូ ឯតទវោច សត្ថាយស្មន្តេ អាមន្តេតីតិ។ ឯវមាវុសោតិ ខោ អស្សជិបុនព្វសុកា ភិក្ខូ តស្ស ភិក្ខុនោ បដិស្សុត្វា យេន ភគវា តេនុបសង្កមឹសុ ឧបសង្កមិត្វា ភគវន្តំ អភិវាទេត្វា ឯកមន្តំ និសីទឹសុ។ ឯកមន្តំ និសិន្នេ ខោ អស្សជិបុនព្វសុកេ ភិក្ខូ ភគវា ឯតទវោច សច្ចំ កិរ ភិក្ខវេ សម្ពហុលា ភិក្ខូ តុម្ហេ ឧបសង្កមិត្វា ឯតទវោចុំ ភគវា ខោ អាវុសោ អញ្ញត្រេវ រត្តិភោជនា ភុញ្ជតិ ភិក្ខុសង្ឃោ ច អញ្ញត្រ ខោ បនាវុសោ រត្តិភោជនា ភុញ្ជមានា អប្បាពាធតញ្ច សញ្ជានន្តិ អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ច ឯថ តុម្ហេបិ អាវុសោ អញ្ញត្រេវ រត្តិភោជនា ភុញ្ជមានា អប្បាពាធតញ្ច សញ្ជានិស្សថ អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ចាតិ ឯវំ វុត្តេ កិរ [ម. កឹ នុ។] ភិក្ខវេ តុម្ហេ តេ ភិក្ខូ ឯវំ អវចុត្ថ មយំ ខោ បនាវុសោ សាយញ្ចេវ ភុញ្ជាម បាតោ ច ទិវា ច វិកាលេ តេ មយំ សាយញ្ចេវ ភុញ្ជមានា បាតោ ច ទិវា ច វិកាលេ អប្បាពាធតញ្ច សញ្ជានាម អប្បាតង្កតញ្ច លហុដ្ឋានញ្ច ពលញ្ច ផាសុវិហារញ្ច តេ មយំ កឹ សន្ទិដ្ឋិកំ ហិត្វា កាលិកំ អនុធាវិស្សាម សាយញ្ចេវ មយំ ភុញ្ជិស្សាម បាតោ ច ទិវា ច វិកាលេតិ។ ឯវំ ភន្តេ។

[២២៥] កិន្នុ មេ តុម្ហេ ភិក្ខវេ ឯវំ ធម្មំ ទេសិតំ អាជានាថ យំ កិញ្ចាយំ បុរិសបុគ្គលោ បដិសំវេទេតិ សុខំ វា ទុក្ខំ វា អទុក្ខមសុខំ វា តស្ស អកុសលា ធម្មា បរិហាយន្តិ កុសលា ធម្មា អភិវឌ្ឍន្តីតិ។ នោ ហេតំ ភន្តេ។ ននុ មេ តុម្ហេ ភិក្ខវេ ឯវំ ធម្មំ ទេសិតំ អាជានាថ ឥធេកច្ចស្ស ឯវរូបំ សុខំ វេទនំ វេទិយតោ អកុសលា ធម្មា អភិវឌ្ឍន្តិ កុសលា ធម្មា បរិហាយន្តិ ឥធ បនេកច្ចស្ស ឯវរូបំ សុខំ វេទនំ វេទិយតោ អកុសលា ធម្មា បរិហាយន្តិ កុសលា ធម្មា អភិវឌ្ឍន្តិ ឥធេកច្ចស្ស ឯវរូបំ ទុក្ខំ វេទនំ វេទិយតោ អកុសលា ធម្មា អភិវឌ្ឍន្តិ កុសលា ធម្មា បរិហាយន្តិ ឥធ បនេកច្ចស្ស ឯវរូបំ ទុក្ខំ វេទនំ វេទិយតោ អកុសលា ធម្មា បរិហាយន្តិ កុសលា ធម្មា អភិវឌ្ឍន្តិ ឥធេកច្ចស្ស ឯវរូបំ អទុក្ខមសុខំ វេទនំ វេទិយតោ អកុសលា ធម្មា អភិវឌ្ឍន្តិ កុសលា ធម្មា បរិហាយន្តិ ឥធ បនេកច្ចស្ស ឯវរូបំ អទុក្ខមសុខំ វេទនំ វេទិយតោ អកុសលា ធម្មា បរិហាយន្តិ កុសលា ធម្មា អភិវឌ្ឍន្តិ។ ឯវំ ភន្តេ។

[២២៦] សាធុ ភិក្ខវេ មយា ចេតំ ភិក្ខវេ អញ្ញាតំ អភវិស្ស អទិដ្ឋំ អវិទិតំ អសច្ឆិកតំ អផុសិតំ [ឱ.ម. អផស្សិតំ។] បញ្ញាយ ឥធេកច្ចស្ស ឯវរូបំ សុខំ វេទនំ វេទិយតោ អកុសលា ធម្មា អភិវឌ្ឍន្តិ កុសលា ធម្មា បរិហាយន្តីតិ ឯវមហំ អជានន្តោ ឯវរូបំ សុខំ វេទនំ បជហថាតិ វទេយ្យំ អបិ នុ [ម. អបិ នុ ខោ។] មេ ឯតំ ភិក្ខវេ ឯវរូបំ អភវិស្សាតិ។ នោ ហេតំ ភន្តេ។ យស្មា ច ខោ ឯតំ ភិក្ខវេ មយា ញាតំ ទិដ្ឋំ វិទិតំ សច្ឆិកតំ ផុសិតំ បញ្ញាយ ឥធេកច្ចស្ស ឯវរូបំ សុខំ វេទនំ វេទិយតោ អកុសលា ធម្មា អភិវឌ្ឍន្តិ កុសលា ធម្មា បរិហាយន្តីតិ តស្មាហំ ឯវរូបំ សុខំ វេទនំ បជហថាតិ វទាមិ។ មយា ចេតំ ភិក្ខវេ អញ្ញាតំ អភវិស្ស អទិដ្ឋំ អវិទិតំ អសច្ឆិកតំ អផុសិតំ បញ្ញាយ ឥធេកច្ចស្ស ឯវរូបំ សុខំ វេទនំ វេទិយតោ អកុសលា ធម្មា បរិហាយន្តិ កុសលា ធម្មា អភិវឌ្ឍន្តីតិ ឯវមហំ [ម. ឯវាហំ។] អជានន្តោ ឯវរូបំ សុខំ វេទនំ ឧបសម្បជ្ជ វិហរថាតិ វទេយ្យំ អបិ នុ មេ ឯតំ ភិក្ខវេ បដិរូបំ អភវិស្សាតិ។ នោ ហេតំ ភន្តេ។ យស្មា ច ខោ ឯតំ ភិក្ខវេ មយា ញាតំ ទិដ្ឋំ វិទិតំ សច្ឆិកតំ ផុសិតំ បញ្ញាយ ឥធេកច្ចស្ស ឯវរូបំ សុខំ វេទនំ វេទិយតោ អកុសលា ធម្មា បរិហាយន្តិ កុសលា ធម្មា អភិវឌ្ឍន្តីតិ តស្មាហំ ឯវរូបំ សុខំ វេទនំ ឧបសម្បជ្ជ វិហរថាតិ វទាមិ។

[២២៧] មយា ចេតំ ភិក្ខវេ អញ្ញាតំ អភវិស្ស អទិដ្ឋំ អវិទិតំ អសច្ឆិកតំ អផុសិតំ បញ្ញាយ ឥធេកច្ចស្ស ឯវរូបំ ទុក្ខំ វេទនំ វេទិយតោ អកុសលា ធម្មា អភិវឌ្ឍន្តិ កុសលា ធម្មា បរិហាយន្តីតិ ឯវមហំ អជានន្តោ ឯវរូបំ ទុក្ខំ វេទនំ បជហថាតិ វទេយ្យំ អបិ នុ មេ ឯតំ ភិក្ខវេ បដិរូបំ អភវិស្សាតិ។ នោ ហេតំ ភន្តេ។ យស្មា ច ខោ ឯតំ ភិក្ខវេ មយា ញាតំ ទិដ្ឋំ វិទិតំ សច្ឆិកតំ ផុសិតំ បញ្ញាយ ឥធេកច្ចស្ស ឯវរូបំ ទុក្ខំ វេទនំ វេទិយតោ អកុសលា ធម្មា អភិវឌ្ឍន្តិ កុសលា ធម្មា បរិហាយន្តីតិ តស្មាហំ ឯវរូបំ ទុក្ខំ វេទនំ បជហថាតិ វទាមិ។ មយា ចេតំ ភិក្ខវេ អញ្ញាតំ អភវិស្ស អទិដ្ឋំ អវិទិតំ អសច្ឆិកតំ អផុសិតំ បញ្ញាយ ឥធេកច្ចស្ស ឯវរូបំ ទុក្ខំ វេទនំ វេទិយតោ អកុសលា ធម្មា បរិហាយន្តិ កុសលា ធម្មា អភិវឌ្ឍន្តីតិ ឯវមហំ អជានន្តោ ឯវរូបំ ទុក្ខំ វេទនំ ឧបសម្បជ្ជ វិហរថាតិ វទេយ្យំ អបិ នុ មេ ឯតំ ភិក្ខវេ បដិរូបំ អភវិស្សាតិ។ នោ ហេតំ ភន្តេ។ យស្មា ច ខោ ឯតំ ភិក្ខវេ មយា ញាតំ ទិដ្ឋំ វិទិតំ សច្ឆិកតំ ផុសិតំ បញ្ញាយ ឥធេកច្ចស្ស ឯវរូបំ ទុក្ខំ វេទនំ វេទិយតោ អកុសលា ធម្មា បរិហាយន្តិ កុសលា ធម្មា អភិវឌ្ឍន្តីតិ តស្មាហំ ឯវរូបំ ទុក្ខំ វេទនំ ឧបសម្បជ្ជ វិហរថាតិ វទាមិ។

[២២៨] មយា ចេតំ ភិក្ខវេ អញ្ញាតំ អភវិស្ស អទិដ្ឋំ អវិទិតំ អសច្ឆិកតំ អផុសិតំ បញ្ញាយ ឥធេកច្ចស្ស ឯវរូបំ អទុក្ខមសុខំ វេទនំ វេទិយតោ អកុសលា ធម្មា អភិវឌ្ឍន្តិ កុសលា ធម្មា បរិហាយន្តីតិ ឯវមហំ អជានន្តោ ឯវរូបំ អទុក្ខមសុខំ វេទនំ បជហថាតិ វទេយ្យំ អបិ នុ មេ ឯតំ ភិក្ខវេ បដិរូបំ អភវិស្សាតិ។ នោ ហេតំ ភន្តេ។ យស្មា ច ខោ ឯតំ ភិក្ខវេ មយា ញាតំ ទិដ្ឋំ វិទិតំ សច្ឆិកតំ ផុសិតំ បញ្ញាយ ឥធេកច្ចស្ស ឯវរូបំ អទុក្ខមសុខំ វេទនំ វេទិយតោ អកុសលា ធម្មា អភិវឌ្ឍន្តិ កុសលា ធម្មា បរិហាយន្តីតិ តស្មាហំ ឯវរូបំ អទុក្ខមសុខំ វេទនំ បជហថាតិ វទាមិ។ មយា ចេតំ ភិក្ខវេ អញ្ញាតំ អភវិស្ស អទិដ្ឋំ អវិទិតំ អសច្ឆិកតំ អផុសិតំ បញ្ញាយ ឥធេកច្ចស្ស ឯវរូបំ អទុក្ខមសុខំ វេទនំ វេទិយតោ អកុសលា ធម្មា បរិហាយន្តិ កុសលា ធម្មា អភិវឌ្ឍន្តីតិ ឯវមហំ អជានន្តោ ឯវរូបំ អទុក្ខមសុខំ វេទនំ ឧបសម្បជ្ជ វិហរថាតិ វទេយ្យំ អបិ នុ មេ ឯតំ ភិក្ខវេ បដិរូបំ អភវិស្សាតិ។ នោ ហេតំ ភន្តេ។ យស្មា ច ខោ ឯតំ ភិក្ខវេ មយា ញាតំ ទិដ្ឋំ វិទិតំ សច្ឆិកតំ ផុសិតំ បញ្ញាយ ឥធេកច្ចស្ស ឯវរូបំ អទុក្ខមសុខំ វេទនំ វេទិយតោ អកុសលា ធម្មា បរិហាយន្តិ កុសលា ធម្មា អភិវឌ្ឍន្តីតិ តស្មាហំ ឯវរូបំ អទុក្ខមសុខំ វេទនំ ឧបសម្បជ្ជ វិហរថាតិ វទាមិ។

[២២៩] នាហំ ភិក្ខវេ សព្វេសំយេវ ភិក្ខូនំ អប្បមាទេន ករណីយន្តិ វទាមិ ន បនាហំ ភិក្ខវេ សព្វេសំយេវ ភិក្ខូនំ ន អប្បមាទេន ករណីយន្តិ វទាមិ។ យេ តេ ភិក្ខវេ ភិក្ខូ អរហន្តោ ខីណាសវា វុសិតវន្តោ កតករណីយា ឱហិតភារា អនុប្បត្តសទត្ថា បរិក្ខីណភវសញ្ញោជនា សម្មទញ្ញា វិមុត្តា តថារូបានាហំ ភិក្ខវេ ភិក្ខូនំ ន អប្បមាទេន ករណីយន្តិ វទាមិ តំ កិស្ស ហេតុ កតន្តេសំ អប្បមាទេន អភព្វា តេ បមជ្ជិតុំ។ យេ ច ខោ តេ ភិក្ខវេ ភិក្ខូ សេក្ខា អប្បត្តមានសា អនុត្តរំ យោគក្ខេមំ បត្ថយមានា វិហរន្តិ តថារូបានាហំ ភិក្ខវេ ភិក្ខូនំ អប្បមាទេន ករណីយន្តិ វទាមិ តំ កិស្ស ហេតុ អប្បេវនាម ឥមេ អាយស្មន្តោ អនុលោមិកានិ សេនាសនានិ បដិសេវមានា កល្យាណមិត្តេ ភជមានា ឥន្ទ្រិយានិ សមន្នានយមានា យស្សត្ថាយ កុលបុត្តា សម្មទេវ អគារស្មា អនគារិយំ បព្វជន្តិ តទនុត្តរំ ព្រហ្មចរិយបរិយោសានំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរេយ្យុន្តិ។ ឥមំ ខោ អហំ ភិក្ខវេ ឥមេសំ ភិក្ខូនំ អប្បមាទផលំ សម្បស្សមានោ អប្បមាទេន ករណីយន្តិ វទាមិ។

[២៣០] សត្តិមេ ភិក្ខវេ បុគ្គលា សន្តោ សំវិជ្ជមានា លោកស្មឹ កតមេ សត្ត ឧភតោភាគវិមុត្តោ បញ្ញាវិមុត្តោ កាយសក្ខី ទិដ្ឋិប្បត្តោ សទ្ធាវិមុត្តោ ធម្មានុសារី សទ្ធានុសារី។

[២៣១] កតមោ ច ភិក្ខវេ បុគ្គលោ ឧភតោភាគវិមុត្តោ ឥធ ភិក្ខវេ ឯកច្ចោ បុគ្គលោ យេ តេ សន្តា វិមោក្ខា អតិក្កម្ម រូបេ អារុប្បា តេ កាយេន ផុសិត្វា វិហរតិ បញ្ញាយ ចស្ស ទិស្វា អាសវា បរិក្ខីណា ហោន្តិ អយំ វុច្ចតិ ភិក្ខវេ បុគ្គលោ ឧភតោភាគវិមុត្តោ។ ឥមស្ស ខោ អហំ ភិក្ខវេ ភិក្ខុនោ ន អប្បមាទេន ករណីយន្តិ វទាមិ តំ កិស្ស ហេតុ កតន្តស្ស អប្បមាទេន អភព្វោ សោ បមជ្ជិតុំ។

[២៣២] កតមោ ច ភិក្ខវេ បុគ្គលោ បញ្ញាវិមុត្តោ ឥធ ភិក្ខវេ ឯកច្ចោ បុគ្គលោ យេ តេ សន្តា វិមោក្ខា អតិក្កម្ម រូបេ អារុប្បា តេ ន កាយេន ផុសិត្វា វិហរតិ បញ្ញាយ ចស្ស ទិស្វា អាសវា បរិក្ខីណា ហោន្តិ អយំ វុច្ចតិ ភិក្ខវេ បុគ្គលោ បញ្ញាវិមុត្តោ។ ឥមស្សបិ ខោ អហំ ភិក្ខវេ ភិក្ខុនោ ន អប្បមាទេន [ម. នាហំ ភិក្ខវេ ភិក្ខុនោ អប្បមាទេន។] ករណីយន្តិ វទាមិ តំ កិស្ស ហេតុ កតន្តស្ស អប្បមាទេន អភព្វោ សោ បមជ្ជិតុំ។

[២៣៣] កតមោ ច ភិក្ខវេ បុគ្គលោ កាយសក្ខី ឥធ ភិក្ខវេ ឯកច្ចោ បុគ្គលោ យេ តេ សន្តា វិមោក្ខា អតិក្កម្ម រូបេ អារុប្បា តេ កាយេន ផុសិត្វា វិហរតិ បញ្ញាយ ចស្ស ទិស្វា ឯកច្ចេ អាសវា បរិក្ខីណា ហោន្តិ អយំ វុច្ចតិ ភិក្ខវេ បុគ្គលោ កាយសក្ខី។ ឥមស្ស ខោ អហំ ភិក្ខវេ ភិក្ខុនោ អប្បមាទេន ករណីយន្តិ វទាមិ តំ កិស្ស ហេតុ អប្បេវនាម អយមាយស្មា អនុលោមិកានិ សេនាសនានិ បដិសេវមានោ កល្យាណមិត្តេ ភជមានោ ឥន្ទ្រិយានិ សមន្នានយមានោ យស្សត្ថាយ កុលបុត្តា សម្មទេវ អគារស្មា អនគារិយំ បព្វជន្តិ តទនុត្តរំ ព្រហ្មចរិយបរិយោសានំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរេយ្យាតិ។ ឥមំ ខោ អហំ ភិក្ខវេ ឥមស្ស ភិក្ខុនោ អប្បមាទផលំ សម្បស្សមានោ អប្បមាទេន ករណីយន្តិ វទាមិ។

[២៣៤] កតមោ ច ភិក្ខវេ បុគ្គលោ ទិដ្ឋិប្បត្តោ ឥធ ភិក្ខវេ ឯកច្ចោ បុគ្គលោ យេ តេ សន្តា វិមោក្ខា អតិក្កម្ម រូបេ អារុប្បា តេ ន [ម. នសទ្ទោ ន ហោតិ។] កាយេន ផុសិត្វា វិហរតិ បញ្ញាយ ចស្ស ទិស្វា ឯកច្ចេ អាសវា បរិក្ខីណា ហោន្តិ តថាគតប្បវេទិតា ចស្ស ធម្មា បញ្ញាយ វោទិដ្ឋា ហោន្តិ វោចរិតា អយំ វុច្ចតិ ភិក្ខវេ បុគ្គលោ ទិដ្ឋិប្បត្តោ។ ឥមស្សបិ ខោ អហំ ភិក្ខវេ ភិក្ខុនោ អប្បមាទេន ករណីយន្តិ វទាមិ តំ កិស្ស ហេតុ អប្បេវនាម អយមាយស្មា អនុលោមិកានិ សេនាសនានិ បដិសេវមានោ កល្យាណមិត្តេ ភជមានោ ឥន្ទ្រិយានិ សមន្នានយមានោ យស្សត្ថាយ កុលបុត្តា សម្មទេវ អគារស្មា អនគារិយំ បព្វជន្តិ តទនុត្តរំ ព្រហ្មចរិយបរិយោសានំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរេយ្យាតិ។ ឥមំ ខោ អហំ ភិក្ខវេ ឥមស្ស ភិក្ខុនោ អប្បមាទផលំ សម្បស្សមានោ អប្បមាទេន ករណីយន្តិ វទាមិ។

[២៣៥] កតមោ ច ភិក្ខវេ បុគ្គលោ សទ្ធាវិមុត្តោ ឥធ ភិក្ខវេ ឯកច្ចោ បុគ្គលោ យេ តេ សន្តា វិមោក្ខា អតិក្កម្ម រូបេ អារុប្បា តេ ន កាយេន ផុសិត្វា វិហរតិ បញ្ញាយ ចស្ស ទិស្វា ឯកច្ចេ អាសវា បរិក្ខីណា ហោន្តិ តថាគតេ ចស្ស សទ្ធា និវិដ្ឋា ហោតិ មូលជាតា បតិដ្ឋិតា អយំ វុច្ចតិ ភិក្ខវេ បុគ្គលោ សទ្ធាវិមុត្តោ។ ឥមស្សបិ ខោ អហំ ភិក្ខវេ ភិក្ខុនោ អប្បមាទេន ករណីយន្តិ វទាមិ តំ កិស្ស ហេតុ អប្បេវនាម អយមាយស្មា អនុលោមិកានិ សេនាសនានិ បដិសេវមានោ កល្យាណមិត្តេ ភជមានោ ឥន្ទ្រិយានិ សមន្នានយមានោ យស្សត្ថាយ កុលបុត្តា សម្មទេវ អគារស្មា អនគារិយំ បព្វជន្តិ តទនុត្តរំ ព្រហ្មចរិយបរិយោសានំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរេយ្យាតិ។ ឥមំ ខោ អហំ ភិក្ខវេ ឥមស្ស ភិក្ខុនោ អប្បមាទផលំ សម្បស្សមានោ អប្បមាទេន ករណីយន្តិ វទាមិ។

[២៣៦] កតមោ ច ភិក្ខវេ បុគ្គលោ ធម្មានុសារី ឥធ ភិក្ខវេ ឯកច្ចោ បុគ្គលោ យេ តេ សន្តា វិមោក្ខា អតិក្កម្ម រូបេ អារុប្បា តេ ន កាយេន ផុសិត្វា វិហរតិ បញ្ញាយ ចស្ស ទិស្វា ឯកច្ចេ អាសវា បរិក្ខីណា ហោន្តិ តថាគតប្បវេទិតា ចស្ស ធម្មា បញ្ញាយ មត្តសោ និជ្ឈានំ ខមន្តិ អបិចស្ស ឥមេ ធម្មា ហោន្តិ សេយ្យថីទំ សទ្ធិន្ទ្រិយំ វីរិយិន្ទ្រិយំ សតិន្ទ្រិយំ សមាធិន្ទ្រិយំ បញ្ញិន្ទ្រិយំ អយំ វុច្ចតិ ភិក្ខវេ បុគ្គលោ ធម្មានុសារី។ ឥមស្សបិ ខោ អហំ ភិក្ខវេ ភិក្ខុនោ អប្បមាទេន ករណីយន្តិ វទាមិ តំ កិស្ស ហេតុ អប្បេវនាម អយមាយស្មា អនុលោមិកានិ សេនាសនានិ បដិសេវមានោ កល្យាណមិត្តេ ភជមានោ ឥន្ទ្រិយានិ សមន្នានយមានោ យស្សត្ថាយ កុលបុត្តា សម្មទេវ អគារស្មា អនគារិយំ បព្វជន្តិ តទនុត្តរំ ព្រហ្មចរិយបរិយោសានំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរេយ្យាតិ។ ឥមំ ខោ អហំ ភិក្ខវេ ឥមស្ស ភិក្ខុនោ អប្បមាទផលំ សម្បស្សមានោ អប្បមាទេន ករណីយន្តិ វទាមិ។

[២៣៧] កតមោ ច ភិក្ខវេ បុគ្គលោ សទ្ធានុសារី ឥធ ភិក្ខវេ ឯកច្ចោ បុគ្គលោ យេ តេ សន្តា វិមោក្ខា អតិក្កម្ម រូបេ អារុប្បា តេ ន កាយេន ផុសិត្វា វិហរតិ បញ្ញាយ ចស្ស ទិស្វា ឯកច្ចេ អាសវា បរិក្ខីណា ហោន្តិ តថាគតេ ចស្ស សទ្ធាមត្តំ ហោតិ បេមមត្តំ អបិចស្ស ឥមេ ធម្មា ហោន្តិ សេយ្យថីទំ សទ្ធិន្ទ្រិយំ វីរិយិន្ទ្រិយំ សតិន្ទ្រិយំ សមាធិន្ទ្រិយំ បញ្ញិន្ទ្រិយំ អយំ វុច្ចតិ ភិក្ខវេ បុគ្គលោ សទ្ធានុសារី។ ឥមស្សបិ ខោ អហំ ភិក្ខវេ ភិក្ខុនោ អប្បមាទេន ករណីយន្តិ វទាមិ តំ កិស្ស ហេតុ អប្បេវនាម អយមាយស្មា អនុលោមិកានិ សេនាសនានិ បដិសេវមានោ កល្យាណមិត្តេ ភជមានោ ឥន្ទ្រិយានិ សមន្នានយមានោ យស្សត្ថាយ កុលបុត្តា សម្មទេវ អគារស្មា អនគារិយំ បព្វជន្តិ តទនុត្តរំ ព្រហ្មចរិយបរិយោសានំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរេយ្យាតិ។ ឥមំ ខោ អហំ ភិក្ខវេ ឥមស្ស ភិក្ខុនោ អប្បមាទផលំ សម្បស្សមានោ អប្បមាទេន ករណីយន្តិ វទាមិ។

[២៣៨] នាហំ ភិក្ខវេ អាទិកេនេវ អញ្ញារាធនំ វទាមិ អបិច ភិក្ខវេ អនុបុព្វសិក្ខា អនុបុព្វកិរិយា អនុបុព្វប្បដិបទា អញ្ញារាធនា ហោតិ។ កថញ្ច ភិក្ខវេ អនុបុព្វសិក្ខា អនុបុព្វកិរិយា អនុបុព្វប្បដិបទា អញ្ញារាធនា ហោតិ។ ឥធ ភិក្ខវេ សទ្ធាជាតោ ឧបសង្កមតិ ឧបសង្កមន្តោ បយិរុបាសតិ បយិរុបាសន្តោ សោតំ ឱទហតិ ឱហិតសោតោ ធម្មំ សុណាតិ សុត្វា ធម្មំ ធារេតិ ធតានំ ធម្មានំ អត្ថំ ឧបបរិក្ខតោ ធម្មា និជ្ឈានំ ខមន្តិ ធម្មនិជ្ឈានក្ខន្តិយា សតិ ឆន្ទោ ជាយតិ ឆន្ទជាតោ ឧស្សហតិ ឧស្សហិត្វា តុលេតិ តុលយិត្វា បទហតិ បហិតត្តោ សមានោ កាយេន ចេវ បរមំ សច្ចំ សច្ឆិករោតិ បញ្ញាយ ច នំ អតិវិជ្ឈ [បដិវិជ្ឈាតីតិ កត្ថចិ បោត្ថកេ ទិស្សតិ។] បស្សតិ។ សាបិ នាម ភិក្ខវេ សទ្ធា នាហោសិ តម្បិ នាម ភិក្ខវេ ឧបសង្កមនំ នាហោសិ សាបិ នាម ភិក្ខវេ បយិរុបាសនា នាហោសិ តម្បិ នាម ភិក្ខវេ សោតាវធានំ នាហោសិ តម្បិ នាម ភិក្ខវេ ធម្មស្សវនំ នាហោសិ សាបិ នាម ភិក្ខវេ ធម្មធារណា នាហោសិ សាបិ នាម ភិក្ខវេ អត្ថុបបរិក្ខតា [ឱ. អត្ថូបបរិក្ខា។ ម. អត្ថុបបរិក្ខា។] នាហោសិ សាបិ នាម ភិក្ខវេ ធម្មនិជ្ឈានក្ខន្តិ នាហោសិ សោបិ នាម ភិក្ខវេ ឆន្ទោ នាហោសិ សោបិ នាម ភិក្ខវេ ឧស្សាហោ នាហោសិ សាបិ នាម ភិក្ខវេ តុលនា នាហោសិ តម្បិ នាម ភិក្ខវេ បធានំ នាហោសិ វិប្បដិបន្នាត្ថ ភិក្ខវេ មិច្ឆាបដិបន្នាត្ថ ភិក្ខវេ កីវទូរេវិមេ ភិក្ខវេ មោឃបុរិសា អបក្កន្តា ឥមស្មា ធម្មវិនយា។

[២៣៩] អត្ថិ ភិក្ខវេ ចតុប្បទំ វេយ្យាករណំ យស្សុទ្ទិដ្ឋស្ស វិញ្ញូ បុរិសោ នចិរស្សេវ បញ្ញាយ អត្ថំ [ឱ.ម. បញ្ញាយត្ថំ។] អាជានេយ្យ ឧទ្ទិសិស្សាម [ឱ. ឧទ្ទិសិស្សាមិ។] វោ [ម. វោតិ ន ទិស្សតិ។] ភិក្ខវេ អាជានិស្សថ មេតន្តិ។ តេ ច មយំ ភន្តេ កេ ច ធម្មស្ស អញ្ញាតារោតិ។ យោបិ សោ ភិក្ខវេ សត្ថា អាមិសគរុកោ [ឱ.ម. អាមិសគរុ។] អាមិសទាយាទោ អាមិសេហិ សំសដ្ឋោ វិហរតិ តស្សបាយំ ឯវរូបី បណោបណវិយា [ឱ. បណោបណវិធា។] ន ឧបេតិ ឯវញ្ច នោ អស្ស អថ នំ ករេយ្យាម ន ច នោ ឯវមស្ស [ឱ. ឯវស្ស។] ន នំ ករេយ្យាមាតិ។ កិម្បន ភិក្ខវេ យំ តថាគតោ សព្វសោ អាមិសេហិ វិសំសដ្ឋោ វិហរតិ សទ្ធស្ស ភិក្ខវេ សាវកស្ស សត្ថុ សាសនេ បរិយោគយ្ហ [ឱ.ម. បរិយោគាយាតិ ទិស្សតិ។] វត្តតោ អយមនុធម្មោ ហោតិ សត្ថា ភគវា សាវកោហមស្មិ ជានាតិ ភគវា នាហំ ជានាមីតិ។ សទ្ធស្ស ភិក្ខវេ សាវកស្ស សត្ថុ សាសនេ បរិយោគយ្ហ វត្តតោ រូឡ្ហនីយំ [ឱ. រុម្ហនិយំ។] សត្ថុ សាសនំ ហោតិ ឱជវន្តំ។ សទ្ធស្ស ភិក្ខវេ សាវកស្ស សត្ថុ សាសនេ បរិយោគយ្ហ វត្តតោ អយមនុធម្មោ ហោតិ កាមំ តចោ ច នហារុ ច អដ្ឋិ ច អវសិស្សតុ មេ សរីរេ អវសុស្សតុ មំសលោហិតំ យន្តំ បុរិសត្ថាមេន បុរិសវីរិយេន បុរិសបរក្កមេន បត្តព្វំ ន តំ អបាបុណិត្វា វីរិយស្ស សន្ថានំ ភវិស្សតីតិ។ សទ្ធស្ស ភិក្ខវេ សាវកស្ស សត្ថុ សាសនេ បរិយោគយ្ហ វត្តតោ ទ្វិន្នំ ផលានំ អញ្ញតរំ ផលំ បាដិកង្ខំ ទិដ្ឋេវ ធម្មេ អញ្ញា សតិ វា ឧបាទិសេសេ អនាគាមិតាតិ។ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទុន្តិ។

កីដាគិរិសុត្តំ ទសមំ និដ្ឋិតំ។

ភិក្ខុវគ្គោ ទុតិយោ និដ្ឋិតោ។

តស្ស វគ្គស្ស ឧទ្ទានំ

កុញ្ជររាហុលសស្សតលោកោ

មាលុង្ក្យបុត្តោ ច ភទ្ទាលិនាមោ

ទិជខុទ្ទសហម្បតិយាចនា

នាឡកីបទរគិរិនាមោ

អសមោ បវរោ ទុតិយោ វរវគ្គោ។

ចប់ ភាគ២៣។

សូមអនុមោទនា !!!