អង្គុត្តរនិកាយ ឯក-ទុកនិបាត

ភាគទី៤០

បឋមោ ភាគោ

នមោ តស្ស ភគវតោ អរហតោ សម្មាសម្ពុទ្ធស្ស។

ឯកធម្មាទិបាលិ

[១] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។ ភគវា ឯតទវោច

[២] នាហំ ភិក្ខវេ អញ្ញំ ឯករូបំបិ សមនុបស្សាមិ យំ ឯវំ បុរិសស្ស ចិត្តំ បរិយាទាយ តិដ្ឋតិ យថយិទំ ភិក្ខវេ ឥត្ថីរូបំ ឥត្ថីរូបំ ភិក្ខវេ បុរិសស្ស ចិត្តំ បរិយាទាយ តិដ្ឋតីតិ។

[៣] នាហំ ភិក្ខវេ អញ្ញំ ឯកសទ្ទំបិ សមនុបស្សាមិ យំ ឯវំ បុរិសស្ស ចិត្តំ បរិយាទាយ តិដ្ឋតិ យថយិទំ ភិក្ខវេ ឥត្ថីសទ្ទោ ឥត្ថីសទ្ទោ ភិក្ខវេ បុរិសស្ស ចិត្តំ បរិយាទាយ តិដ្ឋតីតិ។

[៤] នាហំ ភិក្ខវេ អញ្ញំ ឯកគន្ធំបិ សមនុបស្សាមិ យំ ឯវំ បុរិសស្ស ចិត្តំ បរិយាទាយ តិដ្ឋតិ យថយិទំ ភិក្ខវេ ឥត្ថីគន្ធោ ឥត្ថីគន្ធោ ភិក្ខវេ បុរិសស្ស ចិត្តំ បរិយាទាយ តិដ្ឋតីតិ។

[៥] នាហំ ភិក្ខវេ អញ្ញំ ឯករសំបិ សមនុបស្សាមិ យំ ឯវំ បុរិសស្ស ចិត្តំ បរិយាទាយ តិដ្ឋតិ យថយិទំ ភិក្ខវេ ឥត្ថីរសោ ឥត្ថីរសោ ភិក្ខវេ បុរិសស្ស ចិត្តំ បរិយាទាយ តិដ្ឋតីតិ។

[៦] នាហំ ភិក្ខវេ អញ្ញំ ឯកផោដ្ឋព្វំបិ សមនុបស្សាមិ យំ ឯវំ បុរិសស្ស ចិត្តំ បរិយាទាយ តិដ្ឋតិ យថយិទំ ភិក្ខវេ ឥត្ថីផោដ្ឋព្វោ ឥត្ថីផោដ្ឋព្វោ ភិក្ខវេ បុរិសស្ស ចិត្តំ បរិយាទាយ តិដ្ឋតីតិ។

[៧] នាហំ ភិក្ខវេ អញ្ញំ ឯករូបំបិ សមនុបស្សាមិ យំ ឯវំ ឥត្ថិយា ចិត្តំ បរិយាទាយ តិដ្ឋតិ យថយិទំ ភិក្ខវេ បុរិសរូបំ បុរិសរូបំ ភិក្ខវេ ឥត្ថិយា ចិត្តំ បរិយាទាយ តិដ្ឋតីតិ។

[៨] នាហំ ភិក្ខវេ អញ្ញំ ឯកសទ្ទំបិ សមនុបស្សាមិ យំ ឯវំ ឥត្ថិយា ចិត្តំ បរិយាទាយ តិដ្ឋតិ យថយិទំ ភិក្ខវេ បុរិសសទ្ទោ បុរិសសទ្ទោ ភិក្ខវេ ឥត្ថិយា ចិត្តំ បរិយាទាយ តិដ្ឋតីតិ។

[៩] នាហំ ភិក្ខវេ អញ្ញំ ឯកគន្ធំបិ សមនុបស្សាមិ យំ ឯវំ ឥត្ថិយា ចិត្តំ បរិយាទាយ តិដ្ឋតិ យថយិទំ ភិក្ខវេ បុរិសគន្ធោ បុរិសគន្ធោ ភិក្ខវេ ឥត្ថិយា ចិត្តំ បរិយាទាយ តិដ្ឋតីតិ។

[១០] នាហំ ភិក្ខវេ អញ្ញំ ឯករសំបិ សមនុបស្សាមិ យំ ឯវំ ឥត្ថិយា ចិត្តំ បរិយាទាយ តិដ្ឋតិ យថយិទំ ភិក្ខវេ បុរិសរសោ បុរិសរសោ ភិក្ខវេ ឥត្ថិយា ចិត្តំ បរិយាទាយ តិដ្ឋតីតិ។

[១១] នាហំ ភិក្ខវេ អញ្ញំ ឯកផោដ្ឋព្វំបិ សមនុបស្សាមិ យំ ឯវំ ឥត្ថិយា ចិត្តំ បរិយាទាយ តិដ្ឋតិ យថយិទំ ភិក្ខវេ បុរិសផោដ្ឋព្វោ បុរិសផោដ្ឋព្វោ ភិក្ខវេ ឥត្ថិយា ចិត្តំ បរិយាទាយ តិដ្ឋតីតិ។

វគ្គោ បឋមោ [ម. រូបាទិវគ្គោ បឋមោ។]។

[១២] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នោ វា កាមច្ឆន្ទោ ឧប្បជ្ជតិ ឧប្បន្នោ វា កាមច្ឆន្ទោ ភិយ្យោភាវាយ វេបុល្លាយ សំវត្តតិ យថយិទំ ភិក្ខវេ សុភនិមិត្តំ សុភនិមិត្តំ ភិក្ខវេ អយោនិសោ មនសិករោតោ អនុប្បន្នោ ចេវ កាមច្ឆន្ទោ ឧប្បជ្ជតិ ឧប្បន្នោ ច កាមច្ឆន្ទោ ភិយ្យោភាវាយ វេបុល្លាយ សំវត្តតីតិ។

[១៣] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នោ វា ព្យាបាទោ ឧប្បជ្ជតិ ឧប្បន្នោ វា ព្យាបាទោ ភិយ្យោភាវាយ វេបុល្លាយ សំវត្តតិ យថយិទំ ភិក្ខវេ បដិឃនិមិត្តំ បដិឃនិមិត្តំ ភិក្ខវេ អយោនិសោ មនសិករោតោ អនុប្បន្នោ ចេវ ព្យាបាទោ ឧប្បជ្ជតិ ឧប្បន្នោ ច ព្យាបាទោ ភិយ្យោភាវាយ វេបុល្លាយ សំវត្តតីតិ។

[១៤] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នំ វា ថីនមិទ្ធំ ឧប្បជ្ជតិ ឧប្បន្នំ វា ថីនមិទ្ធំ ភិយ្យោភាវាយ វេបុល្លាយ សំវត្តតិ យថយិទំ ភិក្ខវេ អរតិ តន្ទិ វិជម្ភិកា [ម. វិជម្ភិតា។] ភត្តសម្មទោ ចេតសោ ច លីនត្តំ លីនចិត្តស្ស ភិក្ខវេ អនុប្បន្នញ្ចេវ ថីនមិទ្ធំ ឧប្បជ្ជតិ ឧប្បន្នញ្ច ថីនមិទ្ធំ ភិយ្យោភាវាយ វេបុល្លាយ សំវត្តតីតិ។

[១៥] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នំ វា ឧទ្ធច្ចកុក្កុច្ចំ ឧប្បជ្ជតិ ឧប្បន្នំ វា ឧទ្ធច្ចកុក្កុច្ចំ ភិយ្យោភាវាយ វេបុល្លាយ សំវត្តតិ យថយិទំ ភិក្ខវេ ចេតសោ អវូបសមោ អវូបសន្តចិត្តស្ស ភិក្ខវេ អនុប្បន្នញ្ចេវ ឧទ្ធច្ចកុក្កុច្ចំ ឧប្បជ្ជតិ ឧប្បន្នញ្ច ឧទ្ធច្ចកុក្កុច្ចំ ភិយ្យោភាវាយ វេបុល្លាយ សំវត្តតីតិ។

[១៦] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា វិចិកិច្ឆា ឧប្បជ្ជតិ ឧប្បន្នា វា វិចិកិច្ឆា ភិយ្យោភាវាយ វេបុល្លាយ សំវត្តតិ យថយិទំ ភិក្ខវេ អយោនិសោ មនសិការោ អយោនិសោ ភិក្ខវេ មនសិករោតោ អនុប្បន្នា ចេវ វិចិកិច្ឆា ឧប្បជ្ជតិ ឧប្បន្នា ច វិចិកិច្ឆា ភិយ្យោភាវាយ វេបុល្លាយ សំវត្តតីតិ។

[១៧] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នោ វា កាមច្ឆន្ទោ នុប្បជ្ជតិ ឧប្បន្នោ វា កាមច្ឆន្ទោ បហីយតិ យថយិទំ ភិក្ខវេ អសុភនិមិត្តំ អសុភនិមិត្តំ ភិក្ខវេ យោនិសោ មនសិករោតោ អនុប្បន្នោ ចេវ កាមច្ឆន្ទោ នុប្បជ្ជតិ ឧប្បន្នោ ច កាមច្ឆន្ទោ បហីយតីតិ។

[១៨] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នោ វា ព្យាបាទោ នុប្បជ្ជតិ ឧប្បន្នោ វា ព្យាបាទោ បហីយតិ យថយិទំ ភិក្ខវេ មេត្តា ចេតោវិមុត្តិ មេត្តំ ភិក្ខវេ ចេតោវិមុត្តឹ យោនិសោ មនសិករោតោ អនុប្បន្នោ ចេវ ព្យាបាទោ នុប្បជ្ជតិ ឧប្បន្នោ ច ព្យាបាទោ បហីយតីតិ។

[១៩] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នំ វា ថីនមិទ្ធំ នុប្បជ្ជតិ ឧប្បន្នំ វា ថីនមិទ្ធំ បហីយតិ យថយិទំ ភិក្ខវេ អារម្ភធាតុ និក្កមធាតុ បរក្កមធាតុ អារទ្ធវីរិយស្ស ភិក្ខវេ អនុប្បន្នញ្ចេវ ថីនមិទ្ធំ នុប្បជ្ជតិ ឧប្បន្នញ្ច ថីនមិទ្ធំ បហីយតីតិ។

[២០] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នំ វា ឧទ្ធច្ចកុក្កុច្ចំ នុប្បជ្ជតិ ឧប្បន្នំ វា ឧទ្ធច្ចកុក្កុច្ចំ បហីយតិ យថយិទំ ភិក្ខវេ ចេតសោ វូបសមោ វូបសន្តចិត្តស្ស ភិក្ខវេ អនុប្បន្នញ្ចេវ ឧទ្ធច្ចកុក្កុច្ចំ នុប្បជ្ជតិ ឧប្បន្នញ្ច ឧទ្ធច្ចកុក្កុច្ចំ បហីយតីតិ។

[២១] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា វិចិកិច្ឆា នុប្បជ្ជតិ ឧប្បន្នា វា វិចិកិច្ឆា បហីយតិ យថយិទំ ភិក្ខវេ យោនិសោ មនសិការោ យោនិសោ ភិក្ខវេ មនសិករោតោ អនុប្បន្នា ចេវ វិចិកិច្ឆា នុប្បជ្ជតិ ឧប្បន្នា ច វិចិកិច្ឆា បហីយតីតិ។

វគ្គោ [ម. នីវរណប្បហានវគ្គោ] ទុតិយោ។

[២២] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ អភាវិតំ អកម្មនីយំ [អកម្មនិយន្តិបិ បាឋោ។] ហោតិ យថយិទំ ភិក្ខវេ ចិត្តំ ចិត្តំ ភិក្ខវេ អភាវិតំ អកម្មនីយំ ហោតីតិ។

[២៣] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ ភាវិតំ កម្មនីយំ ហោតិ យថយិទំ ភិក្ខវេ ចិត្តំ ចិត្តំ ភិក្ខវេ ភាវិតំ កម្មនីយំ ហោតីតិ។

[២៤] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ អភាវិតំ មហតោ អនត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ អភាវិតំ មហតោ អនត្ថាយ សំវត្តតីតិ។

[២៥] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ ភាវិតំ មហតោ អត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ ភាវិតំ មហតោ អត្ថាយ សំវត្តតីតិ។

[២៦] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ អភាវិតំ អបាតុភូតំ មហតោ អនត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ អភាវិតំ អបាតុភូតំ មហតោ អនត្ថាយ សំវត្តតីតិ។

[២៧] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ ភាវិតំ បាតុភូតំ មហតោ អត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ ភាវិតំ បាតុភូតំ មហតោ អត្ថាយ សំវត្តតីតិ។

[២៨] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ អភាវិតំ អពហុលីកតំ មហតោ អនត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ អភាវិតំ អពហុលីកតំ មហតោ អនត្ថាយ សំវត្តតីតិ។

[២៩] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ ភាវិតំ ពហុលីកតំ មហតោ អត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ ភាវិតំ ពហុលីកតំ មហតោ អត្ថាយ សំវត្តតីតិ។

[៣០] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ អភាវិតំ អពហុលីកតំ ទុក្ខាធិវាហំ ហោតិ យថយិទំ ភិក្ខវេ ចិត្តំ ចិត្តំ ភិក្ខវេ អភាវិតំ អពហុលីកតំ ទុក្ខាធិវាហំ ហោតីតិ។

[៣១] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ ភាវិតំ ពហុលីកតំ សុខាធិវាហំ ហោតិ យថយិទំ ភិក្ខវេ ចិត្តំ ចិត្តំ ភិក្ខវេ ភាវិតំ ពហុលីកតំ សុខាធិវាហំ ហោតីតិ។

វគ្គោ [ម. អកម្មនីយវគ្គោ។] តតិយោ។

[៣២] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ អទន្តំ មហតោ អនត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ អទន្តំ មហតោ អនត្ថាយ សំវត្តតីតិ។

[៣៣] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ ទន្តំ មហតោ អត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ ទន្តំ មហតោ អត្ថាយ សំវត្តតីតិ។

[៣៤] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ អគុត្តំ មហតោ អនត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ អគុត្តំ មហតោ អនត្ថាយ សំវត្តតីតិ។

[៣៥] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ គុត្តំ មហតោ អត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ គុត្តំ មហតោ អត្ថាយ សំវត្តតីតិ។

[៣៦] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ អរក្ខិតំ មហតោ អនត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ អរក្ខិតំ មហតោ អនត្ថាយ សំវត្តតីតិ។

[៣៧] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ រក្ខិតំ មហតោ អត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ រក្ខិតំ មហតោ អត្ថាយ សំវត្តតីតិ។

[៣៨] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ អសំវុតំ មហតោ អនត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ អសំវុតំ មហតោ អនត្ថាយ សំវត្តតីតិ។

[៣៩] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ សំវុតំ មហតោ អត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ សំវុតំ មហតោ អត្ថាយ សំវត្តតីតិ។

[៤០] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ អទន្តំ អគុត្តំ អរក្ខិតំ អសំវុតំ មហតោ អនត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ អទន្តំ អគុត្តំ អរក្ខិតំ អសំវុតំ មហតោ អនត្ថាយ សំវត្តតីតិ។

[៤១] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ ទន្តំ គុត្តំ រក្ខិតំ សំវុតំ មហតោ អត្ថាយ សំវត្តតិ យថយិទំ ភិក្ខវេ ចិត្តំ ចិត្តំ ភិក្ខវេ ទន្តំ គុត្តំ រក្ខិតំ សំវុតំ មហតោ អត្ថាយ សំវត្តតីតិ។

វគ្គោ [ម. អទន្តវគ្គោ] ចតុត្ថោ។

[៤២] សេយ្យថាបិ ភិក្ខវេ សាលិសូកំ វា យវសូកំ វា មិច្ឆាបណិហិតំ ហត្ថេន វា បាទេន វា អក្កន្តំ ហត្ថំ វា បាទំ វា ភិជ្ជិស្សតិ [ឱ. ភេច្ឆតិ។] លោហិតំ វា ឧប្បាទេស្សតីតិ នេតំ ឋានំ វិជ្ជតិ តំ កិស្ស ហេតុ មិច្ឆាបណិហិតត្តា ភិក្ខវេ សូកស្ស [សាលិសូកស្សាតិប្យត្ថិ។] ឯវមេវ ខោ ភិក្ខវេ សោ វត ភិក្ខុ មិច្ឆាបណិហិតេន ចិត្តេន អវិជ្ជំ ភិជ្ជិស្សតិ វិជ្ជំ ឧប្បាទេស្សតិ និព្វានំ សច្ឆិករិស្សតីតិ នេតំ ឋានំ វិជ្ជតិ តំ កិស្ស ហេតុ មិច្ឆាបណិហិតត្តា ភិក្ខវេ ចិត្តស្សាតិ។

[៤៣] សេយ្យថាបិ ភិក្ខវេ សាលិសូកំ វា យវសូកំ វា សម្មាបណិហិតំ ហត្ថេន វា បាទេន វា អក្កន្តំ ហត្ថំ វា បាទំ វា ភិជ្ជិស្សតិ លោហិតំ វា ឧប្បាទេស្សតីតិ ឋានមេតំ វិជ្ជតិ តំ កិស្ស ហេតុ សម្មាបណិហិតត្តា ភិក្ខវេ សូកស្ស [សាលិសូកស្សាតិប្យត្ថិ។] ឯវមេវ ខោ ភិក្ខវេ សោ វត ភិក្ខុ សម្មាបណិហិតេន ចិត្តេន អវិជ្ជំ ភិជ្ជិស្សតិ វិជ្ជំ ឧប្បាទេស្សតិ និព្វានំ សច្ឆិករិស្សតីតិ ឋានមេតំ វិជ្ជតិ តំ កិស្ស ហេតុ សម្មាបណិហិតត្តា ភិក្ខវេ ចិត្តស្សាតិ។

[៤៤] ឥធាហំ ភិក្ខវេ ឯកច្ចំ បុគ្គលំ បទុដ្ឋចិត្តំ ឯវំ ចេតសា ចេតោ បរិច្ច បជានាមិ ឥមម្ហិ ចេ អយំ សមយេ បុគ្គលោ កាលំ ករេយ្យ យថាភតំ និក្ខិត្តោ ឯវំ និរយេ តំ កិស្ស ហេតុ ចិត្តំ ហិស្ស ភិក្ខវេ បទុដ្ឋំ ចេតោបទោសហេតុ ច បន ភិក្ខវេ ឯវមិធេកច្ចេ សត្តា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជន្តីតិ។

[៤៥] ឥធាហំ ភិក្ខវេ ឯកច្ចំ បុគ្គលំ បសន្នចិត្តំ ឯវំ ចេតសា ចេតោ បរិច្ច បជានាមិ ឥមម្ហិ ចេ អយំ សមយេ បុគ្គលោ កាលំ ករេយ្យ យថាភតំ និក្ខិត្តោ ឯវំ សគ្គេ តំ កិស្ស ហេតុ ចិត្តំ ហិស្ស ភិក្ខវេ បសន្នំ ចេតោបសាទហេតុ ច បន ភិក្ខវេ ឯវមិធេកច្ចេ សត្តា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជន្តីតិ។

[៤៦] សេយ្យថាបិ ភិក្ខវេ ឧទករហទោ អាវិលោ លុលិតោ កលលីភូតោ តត្ថ ចក្ខុមា បុរិសោ តីរេ ឋិតោ ន បស្សេយ្យ សិប្បិសម្ពុកម្បិ សក្ខរកថលម្បិ មច្ឆគុម្ពម្បិ ចរន្តម្បិ តិដ្ឋន្តម្បិ តំ កិស្ស ហេតុ អាវិលត្តា ភិក្ខវេ ឧទកស្ស ឯវមេវ ខោ ភិក្ខវេ សោ វត ភិក្ខុ អាវិលេន ចិត្តេន អត្តត្ថំ វា ញស្សតិ បរត្ថំ វា ញស្សតិ ឧភយត្ថំ វា ញស្សតិ ឧត្តរឹ វា មនុស្សធម្មា អលមរិយញ្ញាណទស្សនវិសេសំ សច្ឆិករិស្សតីតិ នេតំ ឋានំ វិជ្ជតិ តំ កិស្ស ហេតុ អាវិលត្តា ភិក្ខវេ ចិត្តស្សាតិ។

[៤៧] សេយ្យថាបិ ភិក្ខវេ ឧទករហទោ អច្ឆោ វិប្បសន្នោ អនាវិលោ តត្ថ ចក្ខុមា បុរិសោ តីរេ ឋិតោ បស្សេយ្យ សិប្បិសម្ពុកម្បិ សក្ខរកថលម្បិ មច្ឆគុម្ពម្បិ ចរន្តម្បិ តិដ្ឋន្តម្បិ តំ កិស្ស ហេតុ អនាវិលត្តា ភិក្ខវេ ឧទកស្ស ឯវមេវ ខោ ភិក្ខវេ សោ វត ភិក្ខុ អនាវិលេន ចិត្តេន អត្តត្ថំ វា ញស្សតិ បរត្ថំ វា ញស្សតិ ឧភយត្ថំ វា ញស្សតិ ឧត្តរឹ វា មនុស្សធម្មា អលមរិយញ្ញាណទស្សនវិសេសំ សច្ឆិករិស្សតីតិ ឋានមេតំ វិជ្ជតិ តំ កិស្ស ហេតុ អនាវិលត្តា ភិក្ខវេ ចិត្តស្សាតិ។

[៤៨] សេយ្យថាបិ ភិក្ខវេ យានិ កានិចិ រុក្ខជាតានិ ចន្ទនោ [ម. ផន្ទនោ។] តេសំ អគ្គមក្ខាយតិ យទិទំ មុទុតាយ ចេវ កម្មញ្ញតាយ ច ឯវមេវ ខោ អហំ ភិក្ខវេ នាញ្ញំ ឯកធម្មំបិ សមនុបស្សាមិ យំ ឯវំ ភាវិតំ ពហុលីកតំ មុទុព្ចា ហោតិ កម្មនីយញ្ច យថយិទំ ភិក្ខវេ ចិត្តំ ចិត្តំ ភិក្ខវេ ភាវិតំ ពហុលីកតំ មុទុព្ចា ហោតិ កម្មនីយញ្ចាតិ។

[៤៩] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ លហុបរិវត្តំ យថយិទំ ភិក្ខវេ ចិត្តំ យាវញ្ចិទំ ភិក្ខវេ ឧបមាបិ ន សុករា យាវ លហុបរិវត្តំ ចិត្តន្តិ។

[៥០] បភស្សរមិទំ ភិក្ខវេ ចិត្តំ តញ្ច ខោ អាគន្តុកេហិ ឧបក្កិលេសេហិ ឧបក្កិលិដ្ឋន្តិ។

[៥១] បភស្សរមិទំ ភិក្ខវេ ចិត្តំ តញ្ច ខោ អាគន្តុកេហិ ឧបក្កិលេសេហិ វិប្បមុត្តន្តិ។

វគ្គោ [ឱ.ម. បណិហិតអច្ឆនវគ្គោ។] បញ្ចមោ។

[៥២] បភស្សរមិទំ ភិក្ខវេ ចិត្តំ តញ្ច ខោ អាគន្តុកេហិ ឧបក្កិលេសេហិ ឧបក្កិលិដ្ឋំ តំ អស្សុតវា បុថុជ្ជនោ យថាភូតំ នប្បជានាតិ តស្មា អស្សុតវតោ បុថុជ្ជនស្ស ចិត្តភាវនា នត្ថីតិ វទាមីតិ។

[៥៣] បភស្សរមិទំ ភិក្ខវេ ចិត្តំ តញ្ច ខោ អាគន្តុកេហិ ឧបក្កិលេសេហិ វិប្បមុត្តំ តំ សុតវា អរិយសាវកោ យថាភូតំ បជានាតិ តស្មា សុតវតោ អរិយសាវកស្ស ចិត្តភាវនា អត្ថីតិ វទាមីតិ។

[៥៤] អច្ឆរាសំឃាតមត្តំបិ ចេ ភិក្ខវេ ភិក្ខុ មេត្តចិត្តំ អាសេវតិ អយំ វុច្ចតិ ភិក្ខវេ ភិក្ខុ អរិត្តជ្ឈានោ វិហរតិ សត្ថុសាសនករោ ឱវាទប្បដិករោ អមោឃំ រដ្ឋបិណ្ឌំ ភុញ្ជតិ កោ បន វាទោ យេ នំ ពហុលីករោន្តីតិ។

[៥៥] អច្ឆរាសំឃាតមត្តំបិ ចេ ភិក្ខវេ ភិក្ខុ មេត្តាចិត្តំ ភាវេតិ អយំ វុច្ចតិ ភិក្ខវេ ភិក្ខុ អរិត្តជ្ឈានោ វិហរតិ សត្ថុសាសនករោ ឱវាទប្បដិករោ អមោឃំ រដ្ឋបិណ្ឌំ ភុញ្ជតិ កោ បន វាទោ យេ នំ ពហុលីករោន្តីតិ។

[៥៦] អច្ឆរាសំឃាតមត្តំបិ ចេ ភិក្ខវេ ភិក្ខុ មេត្តចិត្តំ មនសិករោតិ អយំ វុច្ចតិ ភិក្ខវេ ភិក្ខុ អរិត្តជ្ឈានោ វិហរតិ សត្ថុសាសនករោ ឱវាទប្បដិករោ អមោឃំ រដ្ឋបិណ្ឌំ ភុញ្ជតិ កោ បន វាទោ យេ នំ ពហុលីករោន្តីតិ។

[៥៧] យេ កេចិ ភិក្ខវេ ធម្មា អកុសលា អកុសលភាគិយា អកុសលបក្ខិកា សព្វេ តេ មនោបុព្វង្គមា មនោ តេសំ ធម្មានំ បឋមំ ឧប្បជ្ជតិ អន្វទេវ អកុសលា ធម្មាតិ។

[៥៨] យេ កេចិ ភិក្ខវេ ធម្មា កុសលា កុសលភាគិយា កុសលបក្ខិកា សព្វេ តេ មនោបុព្វង្គមា មនោ តេសំ ធម្មានំ បឋមំ ឧប្បជ្ជតិ អន្វទេវ កុសលា ធម្មាតិ។

[៥៩] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ ភិក្ខវេ បមាទោ បមត្តស្ស ភិក្ខវេ អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តីតិ។

[៦០] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ ភិក្ខវេ អប្បមាទោ អប្បមត្តស្ស ភិក្ខវេ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តីតិ។

[៦១] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ ភិក្ខវេ កោសជ្ជំ កុសីតស្ស ភិក្ខវេ អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ចកុសលា ធម្មា បរិហាយន្តីតិ។

វគ្គោ [ឱ.ម. អច្ឆរាសំឃាតវគ្គោ។] ឆដ្ឋោ។

[៦២] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ ភិក្ខវេ វីរិយារម្ភោ អារទ្ធវីរិយស្ស ភិក្ខវេ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តីតិ។

[៦៣] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ ភិក្ខវេ មហិច្ឆតា មហិច្ឆស្ស ភិក្ខវេ អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តីតិ។

[៦៤]. នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ ភិក្ខវេ អប្បិច្ឆតា អប្បិច្ឆស្ស ភិក្ខវេ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តីតិ។

[៦៥] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ ភិក្ខវេ អសន្តុដ្ឋិតា អសន្តុដ្ឋស្ស ភិក្ខវេ អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តីតិ។

[៦៦] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ ភិក្ខវេ សន្តុដ្ឋិតា សន្តុដ្ឋស្ស ភិក្ខវេ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តីតិ។

[៦៧] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ ភិក្ខវេ អយោនិសោ មនសិការោ អយោនិសោ ភិក្ខវេ មនសិករោតោ អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តីតិ។

[៦៨] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ ភិក្ខវេ យោនិសោ មនសិការោ យោនិសោ ភិក្ខវេ មនសិករោតោ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តីតិ។

[៦៩] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ ភិក្ខវេ អសម្បជញ្ញំ អសម្បជានស្ស ភិក្ខវេ អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តីតិ។

[៧០] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ ភិក្ខវេ សម្បជញ្ញំ សម្បជានស្ស ភិក្ខវេ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តីតិ។

[៧១] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ ភិក្ខវេ បាបមិត្តតា បាបមិត្តស្ស ភិក្ខវេ អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តីតិ។

វគ្គោ [ម. វីរិយារព្ភាទិវគ្គោ។] សត្តមោ។

[៧២] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ ភិក្ខវេ កល្យាណមិត្តតា កល្យាណមិត្តស្ស ភិក្ខវេ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តីតិ។

[៧៣] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ ភិក្ខវេ អនុយោគោ អកុសលានំ ធម្មានំ អននុយោគោ កុសលានំ ធម្មានំ អនុយោគា ភិក្ខវេ អកុសលានំ ធម្មានំ អននុយោគា កុសលានំ ធម្មានំ អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តីតិ។

[៧៤] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ ភិក្ខវេ អនុយោគោ កុសលានំ ធម្មានំ អននុយោគោ អកុសលានំ ធម្មានំ អនុយោគា ភិក្ខវេ កុសលានំ ធម្មានំ អននុយោគា អកុសលានំ ធម្មានំ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តីតិ។

[៧៥] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា ពោជ្ឈង្គា នុប្បជ្ជន្តិ ឧប្បន្នា វា ពោជ្ឈង្គា ន ភាវនាបារិបូរឹ គច្ឆន្តិ យថយិទំ ភិក្ខវេ អយោនិសោ មនសិការោ អយោនិសោ ភិក្ខវេ មនសិករោតោ អនុប្បន្នា ចេវ ពោជ្ឈង្គា នុប្បជ្ជន្តិ ឧប្បន្នា ច ពោជ្ឈង្គា ន ភាវនាបារិបូរឹ គច្ឆន្តីតិ។

[៧៦] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា ពោជ្ឈង្គា ឧប្បជ្ជន្តិ ឧប្បន្នា វា ពោជ្ឈង្គា ភាវនាបារិបូរឹ គច្ឆន្តិ យថយិទំ ភិក្ខវេ យោនិសោ មនសិការោ យោនិសោ ភិក្ខវេ មនសិករោតោ អនុប្បន្នា ចេវ ពោជ្ឈង្គា ឧប្បជ្ជន្តិ ឧប្បន្នា ច ពោជ្ឈង្គា ភាវនាបារិបូរឹ គច្ឆន្តីតិ។

[៧៧] អប្បមត្តិកា ឯសា ភិក្ខវេ បរិហានិ យទិទំ ញាតិបរិហានិ ឯតំ បដិកិដ្ឋំ ភិក្ខវេ បរិហានីនំ យទិទំ បញ្ញាបរិហានីតិ។

[៧៨] អប្បមត្តិកា ឯសា ភិក្ខវេ វុឌ្ឍិ យទិទំ ញាតិវុឌ្ឍិ ឯតទគ្គំ ភិក្ខវេ វុឌ្ឍីនំ យទិទំ បញ្ញាវុឌ្ឍិ តស្មាតិហ ភិក្ខវេ ឯវំ សិក្ខិតព្វំ បញ្ញាវុឌ្ឍិយា វឌ្ឍិស្សាមាតិ ឯវំ ហិ វោ ភិក្ខវេ សិក្ខិតព្វន្តិ។

[៧៩] អប្បមត្តិកា ឯសា ភិក្ខវេ បរិហានិ យទិទំ ភោគបរិហានិ ឯតំ បដិកិដ្ឋំ ភិក្ខវេ បរិហានីនំ យទិទំ បញ្ញាបរិហានីតិ។

[៨០]. អប្បមត្តិកា ឯសា ភិក្ខវេ វុឌ្ឍិ យទិទំ ភោគវុឌ្ឍិ ឯតទគ្គំ ភិក្ខវេ វុឌ្ឍីនំ យទិទំ បញ្ញាវុឌ្ឍិ តស្មាតិហ ភិក្ខវេ ឯវំ សិក្ខិតព្វំ បញ្ញាវុឌ្ឍិយា វឌ្ឍិស្សាមាតិ ឯវំ ហិ វោ ភិក្ខវេ សិក្ខិតព្វន្តិ។

[៨១] អប្បមត្តិកា ឯសា ភិក្ខវេ បរិហានិ យទិទំ យសោបរិហានិ ឯតំ បដិកិដ្ឋំ ភិក្ខវេ បរិហានីនំ យទិទំ បញ្ញាបរិហានីតិ។

[៨២] អប្បមត្តិកា ឯសា ភិក្ខវេ វុឌ្ឍិ យទិទំ យសោវុឌ្ឍិ ឯតទគ្គំ ភិក្ខវេ វុឌ្ឍីនំ យទិទំ បញ្ញាវុឌ្ឍិ តស្មាតិហ ភិក្ខវេ ឯវំ សិក្ខិតព្វំ បញ្ញាវុឌ្ឍិយា វឌ្ឍិស្សាមាតិ ឯវំ ហិ វោ ភិក្ខវេ សិក្ខិតព្វន្តិ។

វគ្គោ [ម. កល្យាណមិត្តាទិវគ្គោ។] អដ្ឋមោ។

[៨៣] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ ភិក្ខវេ បមាទោ បមាទោ ភិក្ខវេ មហតោ អនត្ថាយ សំវត្តតីតិ។

[៨៤] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ ភិក្ខវេ អប្បមាទោ អប្បមាទោ ភិក្ខវេ មហតោ អត្ថាយ សំវត្តតីតិ។

[៨៥] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ ភិក្ខវេ កោសជ្ជំ កោសជ្ជំ ភិក្ខវេ មហតោ អនត្ថាយ សំវត្តតីតិ។

[៨៦] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ ភិក្ខវេ វីរិយារម្ភោ វីរិយារម្ភោ ភិក្ខវេ មហតោ អត្ថាយ សំវត្តតីតិ។

[៨៧] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ ភិក្ខវេ មហិច្ឆតា មហិច្ឆតា ភិក្ខវេ មហតោ អនត្ថាយ សំវត្តតីតិ។

[៨៨] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ ភិក្ខវេ អប្បិច្ឆតា អប្បិច្ឆតា ភិក្ខវេ មហតោ អត្ថាយ សំវត្តតីតិ។

[៨៩] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ ភិក្ខវេ អសន្តុដ្ឋិតា អសន្តុដ្ឋិតា ភិក្ខវេ មហតោ អនត្ថាយ សំវត្តតីតិ។

[៩០] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ ភិក្ខវេ សន្តុដ្ឋិតា សន្តុដ្ឋិតា ភិក្ខវេ មហតោ អត្ថាយ សំវត្តតីតិ។

[៩១] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ ភិក្ខវេ អយោនិសោ មនសិការោ អយោនិសោ មនសិការោ ភិក្ខវេ មហតោ អនត្ថាយ សំវត្តតីតិ។

[៩២] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ ភិក្ខវេ យោនិសោ មនសិការោ យោនិសោ មនសិការោ ភិក្ខវេ មហតោ អត្ថាយ សំវត្តតីតិ។

[៩៣] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ ភិក្ខវេ អសម្បជញ្ញំ អសម្បជញ្ញំ ភិក្ខវេ មហតោ អនត្ថាយ សំវត្តតីតិ។

[៩៤] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ ភិក្ខវេ សម្បជញ្ញំ សម្បជញ្ញំ ភិក្ខវេ មហតោ អត្ថាយ សំវត្តតីតិ។

[៩៥] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ ភិក្ខវេ បាបមិត្តតា បាបមិត្តតា ភិក្ខវេ មហតោ អនត្ថាយ សំវត្តតីតិ។

[៩៦] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ ភិក្ខវេ កល្យាណមិត្តតា កល្យាណមិត្តតា ភិក្ខវេ មហតោ អត្ថាយ សំវត្តតីតិ។

[៩៧] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ ភិក្ខវេ អនុយោគោ អកុសលានំ ធម្មានំ អននុយោគោ កុសលានំ ធម្មានំ អនុយោគោ ភិក្ខវេ អកុសលានំ ធម្មានំ អននុយោគោ កុសលានំ ធម្មានំ មហតោ អនត្ថាយ សំវត្តតីតិ។

[៩៨] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ ភិក្ខវេ អនុយោគោ កុសលានំ ធម្មានំ អននុយោគោ អកុសលានំ ធម្មានំ អនុយោគោ ភិក្ខវេ កុសលានំ ធម្មានំ អននុយោគោ អកុសលានំ ធម្មានំ មហតោ អត្ថាយ សំវត្តតីតិ។

វគ្គោ [ម. បមាទាទិវគ្គោ។] នវមោ។

[៩៩] អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ យំ ឯវំ មហតោ អនត្ថាយ សំវត្តតិ យថយិទំ ភិក្ខវេ បមាទោ បមាទោ ភិក្ខវេ មហតោ អនត្ថាយ សំវត្តតីតិ។

[១០០] អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ យំ ឯវំ មហតោ អត្ថាយ សំវត្តតិ យថយិទំ ភិក្ខវេ អប្បមាទោ អប្បមាទោ ភិក្ខវេ មហតោ អត្ថាយ សំវត្តតីតិ។

[១០១] អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ យំ ឯវំ មហតោ អនត្ថាយ សំវត្តតិ យថយិទំ ភិក្ខវេ កោសជ្ជំ កោសជ្ជំ ភិក្ខវេ មហតោ អនត្ថាយ សំវត្តតីតិ។

[១០២]. អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ យំ ឯវំ មហតោ អត្ថាយ សំវត្តតិ យថយិទំ ភិក្ខវេ វីរិយារម្ភោ វីរិយារម្ភោ ភិក្ខវេ មហតោ អត្ថាយ សំវត្តតីតិ។

[១០៣] អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ។បេ។ មហិច្ឆតា ភិក្ខវេ មហតោ អនត្ថាយ សំវត្តតីតិ។

[១០៤] អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ។បេ។ អប្បិច្ឆតា ភិក្ខវេ មហតោ អត្ថាយ សំវត្តតីតិ។

[១០៥] អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ។បេ។ អសន្តុដ្ឋិតា ភិក្ខវេ មហតោ អនត្ថាយ សំវត្តតីតិ។

[១០៦] អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ។បេ។ សន្តុដ្ឋិតា ភិក្ខវេ មហតោ អត្ថាយ សំវត្តតីតិ។

[១០៧] អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ។បេ។ អយោនិសោ មនសិការោ ភិក្ខវេ មហតោ អនត្ថាយ សំវត្តតីតិ។

[១០៨] អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ។បេ។ យោនិសោ មនសិការោ ភិក្ខវេ មហតោ អត្ថាយ សំវត្តតីតិ។

[១០៩] អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ។បេ។ អសម្បជញ្ញំ ភិក្ខវេ មហតោ អនត្ថាយ សំវត្តតីតិ។

[១១០] អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ។បេ។ សម្បជញ្ញំ ភិក្ខវេ មហតោ អត្ថាយ សំវត្តតីតិ។

[១១១] ពាហិរំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ យំ ឯវំ មហតោ អនត្ថាយ សំវត្តតិ យថយិទំ ភិក្ខវេ បាបមិត្តតា បាបមិត្តតា ភិក្ខវេ មហតោ អនត្ថាយ សំវត្តតីតិ។

[១១២] ពាហិរំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ យំ ឯវំ មហតោ អត្ថាយ សំវត្តតិ យថយិទំ ភិក្ខវេ កល្យាណមិត្តតា កល្យាណមិត្តតា ភិក្ខវេ មហតោ អត្ថាយ សំវត្តតីតិ។

[១១៣] អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ យំ ឯវំ មហតោ អនត្ថាយ សំវត្តតិ យថយិទំ ភិក្ខវេ អនុយោគោ អកុសលានំ ធម្មានំ អននុយោគោ កុសលានំ ធម្មានំ អនុយោគោ ភិក្ខវេ អកុសលានំ ធម្មានំ អននុយោគោ កុសលានំ ធម្មានំ មហតោ អនត្ថាយ សំវត្តតីតិ។

[១១៤] អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គំបិ សមនុបស្សាមិ យំ ឯវំ មហតោ អត្ថាយ សំវត្តតិ យថយិទំ ភិក្ខវេ អនុយោគោ កុសលានំ ធម្មានំ អននុយោគោ អកុសលានំ ធម្មានំ អនុយោគោ ភិក្ខវេ កុសលានំ ធម្មានំ អននុយោគោ អកុសលានំ ធម្មានំ មហតោ អត្ថាយ សំវត្តតីតិ។

[១១៥] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ សទ្ធម្មស្ស សម្មោសាយ អន្តរធានាយ សំវត្តតិ យថយិទំ ភិក្ខវេ បមាទោ បមាទោ ភិក្ខវេ សទ្ធម្មស្ស សម្មោសាយ អន្តរធានាយ សំវត្តតីតិ។

[១១៦] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតិ យថយិទំ ភិក្ខវេ អប្បមាទោ អប្បមាទោ ភិក្ខវេ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតីតិ។

[១១៧] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ សទ្ធម្មស្ស សម្មោសាយ អន្តរធានាយ សំវត្តតិ យថយិទំ ភិក្ខវេ កោសជ្ជំ កោសជ្ជំ ភិក្ខវេ សទ្ធម្មស្ស សម្មោសាយ អន្តរធានាយ សំវត្តតីតិ។

[១១៨] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតិ យថយិទំ ភិក្ខវេ វីរិយារម្ភោ វីរិយារម្ភោ ភិក្ខវេ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតីតិ។

[១១៩] នាហំ ភិក្ខវេ អញ្ញំ ឯកធម្មំបិ សមនុបស្សាមិ។បេ។ មហិច្ឆតា ភិក្ខវេ សទ្ធម្មស្ស សម្មោសាយ អន្តរធានាយ សំវត្តតីតិ។

[១២០] នាហំ ភិក្ខវេ អញ្ញំ ឯកធម្មំបិ សមនុបស្សាមិ។បេ។ អប្បិច្ឆតា ភិក្ខវេ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតីតិ។

[១២១] នាហំ ភិក្ខវេ អញ្ញំ ឯកធម្មំបិ សមនុបស្សាមិ។បេ។ អសន្តុដ្ឋិតា ភិក្ខវេ សទ្ធម្មស្ស សម្មោសាយ អន្តរធានាយ សំវត្តតីតិ។

[១២២] នាហំ ភិក្ខវេ អញ្ញំ ឯកធម្មំបិ សមនុបស្សាមិ។បេ។ សន្តុដ្ឋិតា ភិក្ខវេ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតីតិ។

[១២៣] នាហំ ភិក្ខវេ អញ្ញំ ឯកធម្មំបិ សមនុបស្សាមិ។បេ។ អយោនិសោ មនសិការោ ភិក្ខវេ សទ្ធម្មស្ស សម្មោសាយ អន្តរធានាយ សំវត្តតីតិ។

[១២៤] នាហំ ភិក្ខវេ អញ្ញំ ឯកធម្មំបិ សមនុបស្សាមិ។បេ។ យោនិសោ មនសិការោ ភិក្ខវេ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតីតិ។

[១២៥] នាហំ ភិក្ខវេ អញ្ញំ ឯកធម្មំបិ សមនុបស្សាមិ។បេ។ អសម្បជញ្ញំ ភិក្ខវេ សទ្ធម្មស្ស សម្មោសាយ អន្តរធានាយ សំវត្តតីតិ។

[១២៦] នាហំ ភិក្ខវេ អញ្ញំ ឯកធម្មំបិ សមនុបស្សាមិ។បេ។ សម្បជញ្ញំ ភិក្ខវេ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតីតិ។

[១២៧] នាហំ ភិក្ខវេ អញ្ញំ ឯកធម្មំបិ សមនុបស្សាមិ។បេ។ បាបមិត្តតា ភិក្ខវេ សទ្ធម្មស្ស សម្មោសាយ អន្តរធានាយ សំវត្តតីតិ។

[១២៨] នាហំ ភិក្ខវេ អញ្ញំ ឯកធម្មំបិ សមនុបស្សាមិ។បេ។ កល្យាណមិត្តតា ភិក្ខវេ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតីតិ។

[១២៩] នាហំ ភិក្ខវេ អញ្ញំ ឯកធម្មំបិ សមនុបស្សាមិ។បេ។ អនុយោគោ ភិក្ខវេ អកុសលានំ ធម្មានំ អននុយោគោ កុសលានំ ធម្មានំ សទ្ធម្មស្ស សម្មោសាយ អន្តរធានាយ សំវត្តតីតិ។

[១៣០] នាហំ ភិក្ខវេ អញ្ញំ ឯកធម្មំបិ សមនុបស្សាមិ យោ ឯវំ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតិ យថយិទំ ភិក្ខវេ អនុយោគោ កុសលានំ ធម្មានំ អននុយោគោ អកុសលានំ ធម្មានំ អនុយោគោ ភិក្ខវេ កុសលានំ ធម្មានំ អននុយោគោ អកុសលានំ ធម្មានំ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតីតិ។

វគ្គោ ទសមោ។

[១៣១] យេបិ តេ ភិក្ខវេ ភិក្ខូ អធម្មំ ធម្មោតិ ទីបេន្តិ តេ ភិក្ខវេ ភិក្ខូ ពហុជនាហិតាយ បដិបន្នា ពហុជនាសុខាយ ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ ពហុញ្ច តេ ភិក្ខវេ ភិក្ខូ អបុញ្ញំ បសវន្តិ តេ ចិមំ សទ្ធម្មំ អន្តរធាបេន្តីតិ។

[១៣២] យេបិ តេ ភិក្ខវេ ភិក្ខូ ធម្មំ អធម្មោតិ ទីបេន្តិ។បេ។ អវិនយំ វិនយោតិ ទីបេន្តិ។បេ។ វិនយំ អវិនយោតិ ទីបេន្តិ។បេ។ អភាសិតំ អលបិតំ តថាគតេន ភាសិតំ លបិតំ តថាគតេនាតិ ទីបេន្តិ។បេ។ ភាសិតំ លបិតំ តថាគតេន អភាសិតំ អលបិតំ តថាគតេនាតិ ទីបេន្តិ។បេ។ អនាចិណ្ណំ តថាគតេន អាចិណ្ណំ តថាគតេនាតិ ទីបេន្តិ។បេ។ អាចិណ្ណំ តថាគតេន អនាចិណ្ណំ តថាគតេនាតិ ទីបេន្តិ។បេ។ អប្បញ្ញត្តំ តថាគតេន បញ្ញត្តំ តថាគតេនាតិ ទីបេន្តិ។បេ។ បញ្ញត្តំ តថាគតេន អប្បញ្ញត្តំ តថាគតេនាតិ ទីបេន្តិ តេ ភិក្ខវេ ភិក្ខូ ពហុជនាហិតាយ បដិបន្នា ពហុជនាសុខាយ ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ ពហុញ្ច តេ ភិក្ខវេ ភិក្ខូ អបុញ្ញំ បសវន្តិ តេ ចិមំ សទ្ធម្មំ អន្តរធាបេន្តីតិ។

[១៣៣] យេបិ តេ ភិក្ខវេ ភិក្ខូ អធម្មំ អធម្មោតិ ទីបេន្តិ តេ ភិក្ខវេ ភិក្ខូ ពហុជនហិតាយ បដិបន្នា ពហុជនសុខាយ ពហុនោ ជនស្ស អត្ថាយ ហិតាយ សុខាយ ទេវមនុស្សានំ ពហុញ្ច តេ ភិក្ខវេ ភិក្ខូ បុញ្ញំ បសវន្តិ តេ ចិមំ សទ្ធម្មំ ឋបេន្តីតិ។

[១៣៤] យេបិ តេ ភិក្ខវេ ភិក្ខូ ធម្មំ ធម្មោតិ ទីបេន្តិ។បេ។ អវិនយំ អវិនយោតិ ទីបេន្តិ។បេ។ វិនយំ វិនយោតិ ទីបេន្តិ។បេ។ អភាសិតំ អលបិតំ តថាគតេន អភាសិតំ អលបិតំ តថាគតេនាតិ ទីបេន្តិ។បេ។ ភាសិតំ លបិតំ តថាគតេន ភាសិតំ លបិតំ តថាគតេនាតិ ទីបេន្តិ។បេ។ អនាចិណ្ណំ តថាគតេន អនាចិណ្ណំ តថាគតេនាតិ ទីបេន្តិ។បេ។ អាចិណ្ណំ តថាគតេន អាចិណ្ណំ តថាគតេនាតិ ទីបេន្តិ។បេ។ អប្បញ្ញត្តំ តថាគតេន អប្បញ្ញត្តំ តថាគតេនាតិ ទីបេន្តិ។បេ។ បញ្ញត្តំ តថាគតេន បញ្ញត្តំ តថាគតេនាតិ ទីបេន្តិ តេ ភិក្ខវេ ភិក្ខូ ពហុជនហិតាយ បដិបន្នា ពហុជនសុខាយ ពហុនោ ជនស្ស អត្ថាយ ហិតាយ សុខាយ ទេវមនុស្សានំ ពហុញ្ច តេ ភិក្ខវេ ភិក្ខូ បុញ្ញំ បសវន្តិ តេ ចិមំ សទ្ធម្មំ ឋបេន្តីតិ។

វគ្គោ [ម. អធម្មាទិវគ្គោ។] ឯកាទសមោ។

[១៣៥] យេបិ តេ ភិក្ខវេ ភិក្ខូ អនាបត្តឹ អាបត្តីតិ ទីបេន្តិ។បេ។ អាបត្តឹ អនាបត្តីតិ ទីបេន្តិ។បេ។ លហុកំ អាបត្តឹ គរុកា អាបត្តីតិ ទីបេន្តិ។បេ។ គរុកំ អាបត្តឹ លហុកា អាបត្តីតិ ទីបេន្តិ។បេ។ ទុដ្ឋុល្លំ អាបត្តឹ អទុដ្ឋុល្លា អាបត្តីតិ ទីបេន្តិ។បេ។ អទុដ្ឋុល្លំ អាបត្តឹ ទុដ្ឋុល្លា អាបត្តីតិ ទីបេន្តិ។បេ។ សាវសេសំ អាបត្តឹ អនវសេសា អាបត្តីតិ ទីបេន្តិ។បេ។ អនវសេសំ អាបត្តឹ សាវសេសា អាបត្តីតិ ទីបេន្តិ។បេ។ សប្បដិកម្មំ អាបត្តឹ អប្បដិកម្មា អាបត្តីតិ ទីបេន្តិ។បេ។ អប្បដិកម្មំ អាបត្តឹ សប្បដិកម្មា អាបត្តីតិ ទីបេន្តិ តេ ភិក្ខវេ ភិក្ខូ ពហុជនាហិតាយ បដិបន្នា ពហុជនាសុខាយ ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ ពហុញ្ច តេ ភិក្ខវេ ភិក្ខូ អបុញ្ញំ បសវន្តិ តេ ចិមំ សទ្ធម្មំ អន្តរធាបេន្តីតិ។

[១៣៦] យេបិ តេ ភិក្ខវេ ភិក្ខូ អនាបត្តឹ អនាបត្តីតិ ទីបេន្តិ តេ ភិក្ខវេ ភិក្ខូ ពហុជនហិតាយ បដិបន្នា ពហុជនសុខាយ ពហុនោ ជនស្ស អត្ថាយ ហិតាយ សុខាយ ទេវមនុស្សានំ ពហុញ្ច តេ ភិក្ខវេ ភិក្ខូ បុញ្ញំ បសវន្តិ តេ ចិមំ សទ្ធម្មំ ឋបេន្តីតិ។

[១៣៧] យេបិ តេ ភិក្ខវេ ភិក្ខូ អាបត្តឹ អាបត្តីតិ ទីបេន្តិ តេ ភិក្ខវេ ភិក្ខូ ពហុជនហិតាយ បដិបន្នា ពហុជនសុខាយ ពហុនោ ជនស្ស អត្ថាយ ហិតាយ សុខាយ ទេវមនុស្សានំ ពហុញ្ច តេ ភិក្ខវេ ភិក្ខូ បុញ្ញំ បសវន្តិ តេ ចិមំ សទ្ធម្មំ ឋបេន្តីតិ។

[១៣៨] យេបិ តេ ភិក្ខវេ ភិក្ខូ លហុកំ អាបត្តឹ លហុកោ អាបត្តីតិ ទីបេន្តិ។បេ។ គរុកំ អាបត្តឹ គរុកា អាបត្តីតិ ទីបេន្តិ។បេ។ ទុដ្ឋុល្លំ អាបត្តឹ ទុដ្ឋុល្លា អាបត្តីតិ ទីបេន្តិ។បេ។ អទុដ្ឋុល្លំ អាបត្តឹ អទុដ្ឋុល្លា អាបត្តីតិ ទីបេន្តិ។បេ។ សាវសេសំ អាបត្តឹ សាវសេសា អាបត្តីតិ ទីបេន្តិ។បេ។ អនវសេសំ អាបត្តឹ អនវសេសា អាបត្តីតិ ទីបេន្តិ។បេ។ សប្បដិកម្មំ អាបត្តឹ សប្បដិកម្មា អាបត្តីតិ ទីបេន្តិ។បេ។ អប្បដិកម្មំ អាបត្តឹ អប្បដិកម្មា អាបត្តីតិ ទីបេន្តិ តេ ភិក្ខវេ ភិក្ខូ ពហុជនហិតាយ បដិបន្នា ពហុជនសុខាយ ពហុនោ ជនស្ស អត្ថាយ ហិតាយ សុខាយ ទេវមនុស្សានំ ពហុញ្ច តេ ភិក្ខវេ ភិក្ខូ បុញ្ញំ បសវន្តិ តេ ចិមំ សទ្ធម្មំ ឋបេន្តីតិ។

វគ្គោ [ម. អនាបត្តាទិវគ្គោ។] ទ្វាទសមោ។

ឯកបុគ្គលបាលិ

[១៣៩] ឯកបុគ្គលោ ភិក្ខវេ លោកេ ឧប្បជ្ជមានោ ឧប្បជ្ជតិ ពហុជនហិតាយ ពហុជនសុខាយ លោកានុកម្បាយ អត្ថាយ ហិតាយ សុខាយ ទេវមនុស្សានំ កតមោ ឯកបុគ្គលោ តថាគតោ អរហំ សម្មាសម្ពុទ្ធោ អយំ ខោ ភិក្ខវេ ឯកបុគ្គលោ លោកេ ឧប្បជ្ជមានោ ឧប្បជ្ជតិ ពហុជនហិតាយ ពហុជនសុខាយ លោកានុកម្បាយ អត្ថាយ ហិតាយ សុខាយ ទេវមនុស្សានន្តិ។

[១៤០] ឯកបុគ្គលស្ស ភិក្ខវេ បាតុភាវោ ទុល្លភោ លោកស្មឹ កតមស្ស ឯកបុគ្គលស្ស តថាគតស្ស អរហតោ សម្មាសម្ពុទ្ធស្ស ឥមស្ស ខោ ភិក្ខវេ ឯកបុគ្គលស្ស បាតុភាវោ ទុល្លភោ លោកស្មិន្តិ។

[១៤១] ឯកបុគ្គលោ ភិក្ខវេ លោកេ ឧប្បជ្ជមានោ ឧប្បជ្ជតិ អច្ឆរិយមនុស្សោ កតមោ ឯកបុគ្គលោ តថាគតោ អរហំ សម្មាសម្ពុទ្ធោ អយំ ខោ ភិក្ខវេ ឯកបុគ្គលោ លោកេ ឧប្បជ្ជមានោ ឧប្បជ្ជតិ អច្ឆរិយមនុស្សោតិ។

[១៤២] ឯកបុគ្គលស្ស ភិក្ខវេ កាលកិរិយា ពហុនោ ជនស្ស អនុតប្បា ហោតិ កតមស្ស ឯកបុគ្គលស្ស តថាគតស្ស អរហតោ សម្មាសម្ពុទ្ធស្ស ឥមស្ស ខោ ភិក្ខវេ ឯកបុគ្គលស្ស កាលកិរិយា ពហុនោ ជនស្ស អនុតប្បា ហោតីតិ។

[១៤៣] ឯកបុគ្គលោ ភិក្ខវេ លោកេ ឧប្បជ្ជមានោ ឧប្បជ្ជតិ អទុតិយោ អសហាយោ អប្បដិមោ អប្បដិសមោ អប្បដិភាគោ អប្បដិបុគ្គលោ អសមោ អសមសមោ ទិបទានំ អគ្គោ កតមោ ឯកបុគ្គលោ តថាគតោ អរហំ សម្មាសម្ពុទ្ធោ អយំ ខោ ភិក្ខវេ ឯកបុគ្គលោ លោកេ ឧប្បជ្ជមានោ ឧប្បជ្ជតិ អទុតិយោ អសហាយោ អប្បដិមោ អប្បដិសមោ អប្បដិភាគោ អប្បដិបុគ្គលោ អសមោ អសមសមោ ទិបទានំ អគ្គោតិ។

[១៤៤] ឯកបុគ្គលស្ស ភិក្ខវេ បាតុភាវា មហតោ ចក្ខុស្ស បាតុភាវោ ហោតិ មហតោ អាលោកស្ស បាតុភាវោ ហោតិ មហតោ ឱភាសស្ស បាតុភាវោ ហោតិ ឆន្នំ អនុត្តរិយានំ បាតុភាវោ ហោតិ ចតុន្នំ បដិសម្ភិទានំ សច្ឆិកិរិយា ហោតិ អនេកធាតុប្បដិវេធោ ហោតិ នានាធាតុប្បដិវេធោ ហោតិ វិជ្ជាវិមុត្តិផលសច្ឆិកិរិយា ហោតិ សោតាបត្តិផលសច្ឆិកិរិយា ហោតិ សកទាគាមិផលសច្ឆិកិរិយា ហោតិ អនាគាមិផលសច្ឆិកិរិយា ហោតិ អរហត្តផលសច្ឆិកិរិយា ហោតិ កតមស្ស ឯកបុគ្គលស្ស តថាគតស្ស អរហតោ សម្មាសម្ពុទ្ធស្ស ឥមស្ស ខោ ភិក្ខវេ ឯកបុគ្គលស្ស បាតុភាវោ មហតោ ចក្ខុស្ស បាតុភាវោ ហោតិ មហតោ អាលោកស្ស បាតុភាវោ ហោតិ មហតោ ឱភាសស្ស បាតុភាវោ ហោតិ ឆន្នំ អនុត្តរិយានំ បាតុភាវោ ហោតិ ចតុន្នំ បដិសម្ភិទានំ សច្ឆិកិរិយា ហោតិ អនេកធាតុប្បដិវេធោ ហោតិ នានាធាតុប្បដិវេធោ ហោតិ វិជ្ជាវិមុត្តិផលសច្ឆិកិរិយា ហោតិ សោតាបត្តិផលសច្ឆិកិរិយា ហោតិ សកទាគាមិផលសច្ឆិកិរិយា ហោតិ អនាគាមិផលសច្ឆិកិរិយា ហោតិ អរហត្តផលសច្ឆិកិរិយា ហោតីតិ។

[១៤៥] នាហំ ភិក្ខវេ អញ្ញំ ឯកបុគ្គលម្បិ សមនុបស្សាមិ យោ ឯវំ តថាគតេន អនុត្តរំ ធម្មចក្កំ បវត្តិតំ សម្មទេវ អនុប្បវត្តេតិ យថយិទំ ភិក្ខវេ សារីបុត្តោ សារីបុត្តោ ភិក្ខវេ តថាគតេន អនុត្តរំ ធម្មចក្កំ បវត្តិតំ សម្មទេវ អនុប្បវត្តេតីតិ។

បុគ្គលវគ្គោ [ឱ. ឯកបុគ្គលវគ្គោ តេរសមោ។]។

ឯតទគ្គបាលិ

[១៤៦] ឯតទគ្គំ ភិក្ខវេ មម សាវកានំ ភិក្ខូនំ រត្តញ្ញូនំ យទិទំ អញ្ញាកោណ្ឌញ្ញោ។ មហាបញ្ញានំ យទិទំ សារីបុត្តោ។ ឥទ្ធិមន្តានំ យទិទំ មហាមោគ្គល្លានោ។ ធូតវាទានំ [ធុតង្គវាទានន្តិបិ ទិស្សតិ។ ម. ធុតង្គធរានំ] យទិទំ មហាកស្សបោ។ ទិព្វចក្ខុកានំ យទិទំ អនុរុទ្ធោ។ ឧច្ចាកុលិកានំ យទិទំ ភទ្ទិយោ កាឡិគោធាយបុត្តោ។ មញ្ជុស្សរានំ យទិទំ លកុណ្តកភទ្ទិយោ។ សីហនាទិកានំ យទិទំ បិណ្ឌោលភារទ្វាជោ។ ធម្មកថិកានំ យទិទំ បុណ្ណោ មន្តានីបុត្តោ។ សង្ខិត្តេន ភាសិតស្ស វិត្ថារេន អត្ថំ វិភជន្តានំ យទិទំ មហាកច្ចានោតិ។

វគ្គោ បឋមោ។

[១៤៧] ឯតទគ្គំ ភិក្ខវេ មម សាវកានំ ភិក្ខូនំ មនោមយំ កាយំ អភិនិម្មិនន្តានំ[ម. អភិនិម្មិកានំ។] យទិទំ ចុល្លបន្ថកោ។ ចេតោវិវដ្ដកុសលានំ យទិទំ ចុល្លបន្ថកោ។ បញ្ញាវិវដ្ដកុសលានំ[ឱ.ម. សញ្ញាវិវដ្តកុសលានំ។] យទិទំ មហាបន្ថកោ។ អរណវិហារីនំ យទិទំ សុភូតិ។ ទក្ខិណេយ្យានំ យទិទំ សុភូតិ។ អារញ្ញកានំ យទិទំ រេវតោ ខទិរវនិយោ។ ឈាយីនំ យទិទំ កង្ខារេវតោ។ អារទ្ធវីរិយានំ យទិទំ សោណោ កោលិវិសោ។ កល្យាណវាក្ករណានំ យទិទំ សោណោ កុដិកណ្ណោ។ លាភីនំ យទិទំ សីវលី។ សទ្ធាធិមុត្តានំ យទិទំ វក្កលីតិ។

វគ្គោ ទុតិយោ។

[១៤៨] ឯតទគ្គំ ភិក្ខវេ មម សាវកានំ ភិក្ខូនំ សិក្ខាកាមានំ យទិទំ រាហុលោ។ សទ្ធាបព្វជិតានំ យទិទំ រដ្ឋបាលោ។ បឋមំ សលាកំ គណ្ហន្តានំ យទិទំ កុណ្ឌធានោ។ បដិភាណវន្តានំ យទិទំ វង្គីសោ។ សមន្តប្បាសាទិកានំ យទិទំ ឧបសេនោ វង្គន្តបុត្តោ។ សេនាសនប្បញ្ញាបកានំ យទិទំ ទព្វោ មល្លបុត្តោ។ ទេវតានំ បិយមនាបានំ យទិទំ បិលិន្ទវច្ឆោ។ ខិប្បាភិញ្ញានំ យទិទំ ពាហិយោ ទារុចីរិយោ។ ចិត្តកថិកានំ យទិទំ កុមារកស្សបោ។ បដិសម្ភិទប្បត្តានំ យទិទំ មហាកោដ្ឋិតោតិ។

វគ្គោ តតិយោ។

[១៤៩] ឯតទគ្គំ ភិក្ខវេ មម សាវកានំ ភិក្ខូនំ ពហុស្សុតានំ យទិទំ អានន្ទោ។ សតិមន្តានំ យទិទំ អានន្ទោ។ គតិមន្តានំ យទិទំ អានន្ទោ។ ធិតិមន្តានំ យទិទំ អានន្ទោ។ ឧបដ្ឋាកានំ យទិទំ អានន្ទោ។ មហាបរិសានំ យទិទំ ឧរុវេលកស្សបោ។ កុលប្បសាទកានំ យទិទំ កាឡុទាយិ។ អប្បាពាធានំ យទិទំ ពក្កុលោ [ម. អប្បាពាធិកានំ យទិទំ ពាកុលោ]។ បុព្វេនិវាសំ អនុស្សរន្តានំ យទិទំ សោភិតោ។ វិនយធរានំ យទិទំ ឧបាលិ។ ភិក្ខុនោវាទកានំ យទិទំ នន្ទកោ។ ឥន្ទ្រិយេសុ គុត្តទ្វារានំ យទិទំ នន្ទោ។ ភិក្ខុឱវាទកានំ យទិទំ មហាកប្បិនោ។ តេជោធាតុកុសលានំ យទិទំ សាគតោ។ បដិភាណេយ្យកានំ យទិទំ រាធោ។ លូខចីវរធរានំ យទិទំ មោឃរាជាតិ។

វគ្គោ ចតុត្ថោ។

[១៥០] ឯតទគ្គំ ភិក្ខវេ មម សាវិកានំ ភិក្ខុនីនំ រត្តញ្ញូនំ យទិទំ មហាបជាបតី គោតមី។ មហាបញ្ញានំ យទិទំ ខេមា។ ឥទ្ធិមន្តីនំ [ស. ឥទ្ធិមន្តានំ។] យទិទំ ឧប្បលវណ្ណា។ វិនយធរានំ យទិទំ បដាចារា។ ធម្មកថិកានំ យទិទំ ធម្មទិន្នា។ ឈាយិនីនំ [ស.ឈាយីនំ។] យទិទំ នន្ទា។ អារទ្ធវីរិយានំ យទិទំ សោណា។ ទិព្វចក្ខុកានំ យទិទំ សកុលា [ម.ពកុលា។]។ ខិប្បាភិញ្ញានំ យទិទំ ភទ្ទា កុណ្ឌលកេសា។ បុព្វេនិវាសំ អនុស្សរន្តីនំ យទិទំ ភទ្ទា កាបិលានី។ មហាភិញ្ញាបត្តានំ យទិទំ ភទ្ទា កច្ចានា។ លូខចីវរធរានំ យទិទំ កិសាគោតមី។ សទ្ធាធិមុត្តានំ យទិទំ សិគាលមាតាតិ។

វគ្គោ បញ្ចមោ។

[១៥១] ឯតទគ្គំ ភិក្ខវេ មម សាវកានំ ឧបាសកានំ បឋមំ សរណំ គច្ឆន្តានំ យទិទំ តបុស្សភល្លិកា វាណិជា។ ទាយកានំ យទិទំ សុទត្តោ គហបតិ អនាថបិណ្ឌិកោ។ ធម្មកថិកានំ យទិទំ ចិត្តោ គហបតិ មច្ឆិកសណ្ឌិកោ។ ចតូហិ សង្គហវត្ថូហិ បរិសំ សង្គណ្ហន្តានំ យទិទំ ហត្ថកោ អាឡវកោ។ បណីតទាយកានំ យទិទំ មហានាមោ សក្កោ។ មនាបទាយកានំ យទិទំ ឧគ្គោ គហបតិ វេសាលិកោ។ សង្ឃុបដ្ឋាកានំ យទិទំ ឧគ្គតោ គហបតិ។ អវេច្ចប្បសន្នានំ យទិទំ សូរោ អម្ពដ្ឋោ។ បុគ្គលប្បសន្នានំ យទិទំ ជីវកោ កោមារភច្ចោ។ វិស្សាសកានំ យទិទំ នកុលបិតា គហបតីតិ។

វគ្គោ ឆដ្ឋោ។

[១៥២] ឯតទគ្គំ ភិក្ខវេ មម សាវិកានំ ឧបាសិកានំ បឋមំ សរណំ គច្ឆន្តីនំ យទិទំ សុជាតា សេនានិធីតា [ម.សេនិយធីតា។]។ ទាយិកានំ យទិទំ វិសាខា មិគារមាតា។ ពហុស្សុតានំ យទិទំ ខុជ្ជុត្តរា។ មេត្តាវិហារិនីនំ យទិទំ សាមាវតី។ ឈាយិនីនំ យទិទំ ឧត្តរា នន្ទមាតា។ បណីតទាយិកានំ យទិទំ សុប្បវាសា កោលិយធីតា។ គិលានុបដ្ឋាកីនំ យទិទំ សុប្បិយា ឧបាសិកា។ អវេច្ចប្បសន្នានំ យទិទំ កាតិយានី។ វិស្សាសិកានំ យទិទំ នកុលមាតា គហបតានី។ អនុស្សវប្បសន្នានំ យទិទំ កាលី ឧបាសិកា កុររឃរិកាតិ [ម. កាឡី ឧបាសិកា កុលឃរិកាតិ។]។

វគ្គោ [ឱ. ឯតទគ្គោ វគ្គោ។] សត្តមោ។

អដ្ឋានបាលិ

[១៥៣] អដ្ឋានមេតំ ភិក្ខវេ អនវកាសោ យំ ទិដ្ឋិសម្បន្នោ បុគ្គលោ កញ្ចិ សង្ខារំ និច្ចតោ ឧបគច្ឆេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ បុថុជ្ជនោ កញ្ចិ សង្ខារំ និច្ចតោ ឧបគច្ឆេយ្យ ឋានមេតំ វិជ្ជតីតិ។

[១៥៤] អដ្ឋានមេតំ ភិក្ខវេ អនវកាសោ យំ ទិដ្ឋិសម្បន្នោ បុគ្គលោ កញ្ចិ សង្ខារំ សុខតោ ឧបគច្ឆេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ បុថុជ្ជនោ កញ្ចិ សង្ខារំ សុខតោ ឧបគច្ឆេយ្យ ឋានមេតំ វិជ្ជតីតិ។

[១៥៥] អដ្ឋានមេតំ ភិក្ខវេ អនវកាសោ យំ ទិដ្ឋិសម្បន្នោ បុគ្គលោ កញ្ចិ ធម្មំ អត្តតោ ឧបគច្ឆេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ បុថុជ្ជនោ កញ្ចិ ធម្មំ អត្តតោ ឧបគច្ឆេយ្យ ឋានមេតំ វិជ្ជតីតិ។

[១៥៦] អដ្ឋានមេតំ ភិក្ខវេ អនវកាសោ យំ ទិដ្ឋិសម្បន្នោ បុគ្គលោ មាតរំ ជីវិតា វោរោបេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ បុថុជ្ជនោ មាតរំ ជីវិតា វោរោបេយ្យ ឋានមេតំ វិជ្ជតីតិ។

[១៥៧] អដ្ឋានមេតំ ភិក្ខវេ អនវកាសោ យំ ទិដ្ឋិសម្បន្នោ បុគ្គលោ បិតរំ ជីវិតា វោរោបេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ បុថុជ្ជនោ បិតរំ ជីវិតា វោរោបេយ្យ ឋានមេតំ វិជ្ជតីតិ។

[១៥៨] អដ្ឋានមេតំ ភិក្ខវេ អនវកាសោ យំ ទិដ្ឋិសម្បន្នោ បុគ្គលោ អរហន្តំ ជីវិតា វោរោបេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ បុថុជ្ជនោ អរហន្តំ ជីវិតា វោរោបេយ្យ ឋានមេតំ វិជ្ជតីតិ។

[១៥៩] អដ្ឋានមេតំ ភិក្ខវេ អនវកាសោ យំ ទិដ្ឋិសម្បន្នោ បុគ្គលោ តថាគតស្ស ទុដ្ឋេន ចិត្តេន លោហិតំ ឧប្បាទេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ បុថុជ្ជនោ តថាគតស្ស ទុដ្ឋេន ចិត្តេន លោហិតំ ឧប្បាទេយ្យ ឋានមេតំ វិជ្ជតីតិ។

[១៦០] អដ្ឋានមេតំ ភិក្ខវេ អនវកាសោ យំ ទិដ្ឋិសម្បន្នោ បុគ្គលោ សង្ឃំ ភិន្ទេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ បុថុជ្ជនោ សង្ឃំ ភិន្ទេយ្យ ឋានមេតំ វិជ្ជតីតិ។

[១៦១] អដ្ឋានមេតំ ភិក្ខវេ អនវកាសោ យំ ទិដ្ឋិសម្បន្នោ បុគ្គលោ អញ្ញំ សត្ថារំ ឧទ្ទិសេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ បុថុជ្ជនោ អញ្ញំ សត្ថារំ ឧទ្ទិសេយ្យ ឋានមេតំ វិជ្ជតីតិ។

[១៦២] អដ្ឋានមេតំ ភិក្ខវេ អនវកាសោ យំ ឯកិស្សា លោកធាតុយា ទ្វេ អរហន្តោ សម្មាសម្ពុទ្ធា អបុព្វំ អចរិមំ ឧប្បជ្ជេយ្យុំ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ ឯកិស្សា លោកធាតុយា ឯកោ អរហំ សម្មាសម្ពុទ្ធោ ឧប្បជ្ជេយ្យ ឋានមេតំ វិជ្ជតីតិ។

វគ្គោ បឋមោ។

[១៦៣]. អដ្ឋានមេតំ ភិក្ខវេ អនវកាសោ យំ ឯកិស្សា លោកធាតុយា ទ្វេ រាជានោ ចក្កវត្តី អបុព្វំ អចរិមំ ឧប្បជ្ជេយ្យុំ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ ឯកិស្សា លោកធាតុយា ឯកោ រាជា ចក្កវត្តិ ឧប្បជ្ជេយ្យ ឋានមេតំ វិជ្ជតីតិ។

[១៦៤] អដ្ឋានមេតំ ភិក្ខវេ អនវកាសោ យំ ឥត្ថី អរហំ អស្ស សម្មាសម្ពុទ្ធោ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ បុរិសោ អរហំ អស្ស សម្មាសម្ពុទ្ធោ ឋានមេតំ វិជ្ជតីតិ។

[១៦៥] អដ្ឋានមេតំ ភិក្ខវេ អនវកាសោ យំ ឥត្ថី រាជា អស្ស ចក្កវត្តិ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ បុរិសោ រាជា អស្ស ចក្កវត្តិ ឋានមេតំ វិជ្ជតីតិ។

[១៦៦] អដ្ឋានមេតំ ភិក្ខវេ អនវកាសោ យំ ឥត្ថី សក្កត្តំ ការេយ្យ។បេ។ មារត្តំ ការេយ្យ។បេ។ ព្រហ្មត្តំ ការេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ បុរិសោ សក្កត្តំ ការេយ្យ។បេ។ មារត្តំ ការេយ្យ។បេ។ ព្រហ្មត្តំ ការេយ្យ ឋានមេតំ វិជ្ជតីតិ។

[១៦៧] អដ្ឋានមេតំ ភិក្ខវេ អនវកាសោ យំ កាយទុច្ចរិតស្ស ឥដ្ឋោ កន្តោ មនាបោ វិបាកោ និព្វត្តេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ កាយទុច្ចរិតស្ស អនិដ្ឋោ អកន្តោ អមនាបោ វិបាកោ និព្វត្តេយ្យ ឋានមេតំ វិជ្ជតីតិ។

[១៦៨] អដ្ឋានមេតំ ភិក្ខវេ អនវកាសោ យំ វចីទុច្ចរិតស្ស។បេ។

[១៦៩] អដ្ឋានមេតំ ភិក្ខវេ អនវកាសោ យំ មនោទុច្ចរិតស្ស ឥដ្ឋោ កន្តោ មនាបោ វិបាកោ និព្វត្តេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ មនោទុច្ចរិតស្ស អនិដ្ឋោ អកន្តោ អមនាបោ វិបាកោ និព្វត្តេយ្យ ឋានមេតំ វិជ្ជតីតិ។

[១៧០] អដ្ឋានមេតំ ភិក្ខវេ អនវកាសោ យំ កាយសុចរិតស្ស អនិដ្ឋោ អកន្តោ អមនាបោ វិបាកោ និព្វត្តេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ កាយសុចរិតស្ស ឥដ្ឋោ កន្តោ មនាបោ វិបាកោ និព្វត្តេយ្យ ឋានមេតំ វិជ្ជតីតិ។

[១៧១] អដ្ឋានមេតំ ភិក្ខវេ អនវកាសោ យំ វចីសុចរិតស្ស។បេ។

[១៧២] អដ្ឋានមេតំ ភិក្ខវេ អនវកាសោ យំ មនោសុចរិតស្ស អនិដ្ឋោ អកន្តោ អមនាបោ វិបាកោ និព្វត្តេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ មនោសុចរិតស្ស ឥដ្ឋោ កន្តោ មនាបោ វិបាកោ និព្វត្តេយ្យ ឋានមេតំ វិជ្ជតីតិ។

វគ្គោ ទុតិយោ។

[១៧៣] អដ្ឋានមេតំ ភិក្ខវេ អនវកាសោ យំ កាយទុច្ចរិតសមង្គី តន្និទានា តប្បច្ចយា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ កាយទុច្ចរិតសមង្គី តន្និទានា តប្បច្ចយា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជេយ្យ ឋានមេតំ វិជ្ជតីតិ។

[១៧៤] អដ្ឋានមេតំ ភិក្ខវេ អនវកាសោ យំ វចីទុច្ចរិតសមង្គី។បេ។

[១៧៥] អដ្ឋានមេតំ ភិក្ខវេ អនវកាសោ យំ មនោទុច្ចរិតសមង្គី តន្និទានា តប្បច្ចយា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ មនោទុច្ចរិតសមង្គី តន្និទានា តប្បច្ចយា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជេយ្យ ឋានមេតំ វិជ្ជតីតិ។

[១៧៦] អដ្ឋានមេតំ ភិក្ខវេ អនវកាសោ យំ កាយសុចរិតសមង្គី តន្និទានា តប្បច្ចយា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ កាយសុចរិតសមង្គី តន្និទានា តប្បច្ចយា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជេយ្យ ឋានមេតំ វិជ្ជតីតិ។

[១៧៧] អដ្ឋានមេតំ ភិក្ខវេ អនវកាសោ យំ វចីសុចរិតសមង្គី។បេ។

[១៧៨] អដ្ឋានមេតំ ភិក្ខវេ អនវកាសោ យំ មនោសុចរិតសមង្គី តន្និទានា តប្បច្ចយា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជេយ្យ នេតំ ឋានំ វិជ្ជតិ។ ឋានញ្ច ខោ ឯតំ ភិក្ខវេ វិជ្ជតិ យំ មនោសុចរិតសមង្គី តន្និទានា តប្បច្ចយា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជេយ្យ ឋានមេតំ វិជ្ជតីតិ។

វគ្គោ តតិយោ។

អបរា ឯកធម្មាទិបាលិ

[១៧៩] ឯកធម្មោ ភិក្ខវេ ភាវិតោ ពហុលីកតោ ឯកន្តនិព្វិទាយ វិរាគាយ និរោធាយ ឧបសមាយ អភិញ្ញាយ សម្ពោធាយ និព្វានាយ សំវត្តតិ។ កតមោ ឯកធម្មោ។ ពុទ្ធានុស្សតិ។ អយំ ខោ ភិក្ខវេ ឯកធម្មោ ភាវិតោ ពហុលីកតោ ឯកន្តនិព្វានាយ វិរាគាយ និរោធាយ ឧបសមាយ អភិញ្ញាយ សម្ពោធាយ និព្វានាយ សំវត្តតីតិ។

[១៨០] ឯកធម្មោ ភិក្ខវេ ភាវិតោ ពហុលីកតោ ឯកន្តនិព្វិទាយ វិរាគាយ និរោធាយ ឧបសមាយ អភិញ្ញាយ សម្ពោធាយ និព្វានាយ សំវត្តតិ។ កតមោ ឯកធម្មោ។ ធម្មានុស្សតិ… សង្ឃានុស្សតិ… សីលានុស្សតិ… ចាគានុស្សតិ… ទេវតានុស្សតិ… អានាបានស្សតិ… មរណស្សតិ… កាយគតាសតិ… ឧបសមានុស្សតិ។ អយំ ខោ ភិក្ខវេ ឯកធម្មោ ភាវិតោ ពហុលីកតោ ឯកន្តនិព្វិនាយ វិរាគាយ និរោធាយ ឧបសមាយ អភិញ្ញាយ សម្ពោធាយ និព្វានាយ សំវត្តតីតិ។

វគ្គោ បឋមោ។

[១៨១] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា ភិយ្យោភាវាយ វេបុល្លាយ សំវត្តន្តិ យថយិទំ ភិក្ខវេ មិច្ឆាទិដ្ឋិ។ មិច្ឆាទិដ្ឋិកស្ស ភិក្ខវេ អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា ភិយ្យោភាវាយ វេបុល្លាយ សំវត្តន្តីតិ។

[១៨២] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា កុសលា ធម្មា ភិយ្យោភាវាយ វេបុល្លាយ សំវត្តន្តិ យថយិទំ ភិក្ខវេ សម្មាទិដ្ឋិ។ សម្មាទិដ្ឋិកស្ស ភិក្ខវេ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច កុសលា ធម្មា ភិយ្យោភាវាយ វេបុល្លាយ សំវត្តន្តីតិ។

[១៨៣] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា កុសលា ធម្មា នុប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ ភិក្ខវេ មិច្ឆាទិដ្ឋិ។ មិច្ឆាទិដ្ឋិកស្ស ភិក្ខវេ អនុប្បន្នា ចេវ កុសលា ធម្មា នុប្បជ្ជន្តិ ឧប្បន្នា ច កុសលា ធម្មា បរិហាយន្តីតិ។

[១៨៤] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា អកុសលា ធម្មា នុប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ ភិក្ខវេ សម្មាទិដ្ឋិ។ សម្មាទិដ្ឋិកស្ស ភិក្ខវេ អនុប្បន្នា ចេវ អកុសលា ធម្មា នុប្បជ្ជន្តិ ឧប្បន្នា ច អកុសលា ធម្មា បរិហាយន្តីតិ។

[១៨៥] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា មិច្ឆាទិដ្ឋិ ឧប្បជ្ជតិ ឧប្បន្នា វា មិច្ឆាទិដ្ឋិ បវឌ្ឍតិ យថយិទំ ភិក្ខវេ អយោនិសោ មនសិការោ។ អយោនិសោ ភិក្ខវេ មនសិករោតោ អនុប្បន្នា ចេវ មិច្ឆាទិដ្ឋិ ឧប្បជ្ជតិ ឧប្បន្នា ច មិច្ឆាទិដ្ឋិ បវឌ្ឍតីតិ។

[១៨៦] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេន អនុប្បន្នា វា សម្មាទិដ្ឋិ ឧប្បជ្ជតិ ឧប្បន្នា វា សម្មាទិដ្ឋិ បវឌ្ឍតិ យថយិទំ ភិក្ខវេ យោនិសោ មនសិការោ។ យោនិសោ ភិក្ខវេ មនសិករោតោ អនុប្បន្នា ចេវ សម្មាទិដ្ឋិ ឧប្បជ្ជតិ ឧប្បន្នា ច សម្មាទិដ្ឋិ បវឌ្ឍតីតិ។

[១៨៧] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេនេវំ សត្តា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជន្តិ យថយិទំ ភិក្ខវេ មិច្ឆាទិដ្ឋិ។ មិច្ឆាទិដ្ឋិយា ភិក្ខវេ សមន្នាគតា សត្តា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជន្តីតិ។

[១៨៨] នាហំ ភិក្ខវេ អញ្ញំ ឯកធម្មំបិ សមនុបស្សាមិ យេនេវំ សត្តា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជន្តិ យថយិទំ ភិក្ខវេ សម្មាទិដ្ឋិ។ សម្មាទិដ្ឋិយា ភិក្ខវេ សមន្នាគតា សត្តា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជន្តីតិ។

[១៨៩] មិច្ឆាទិដ្ឋិកស្ស ភិក្ខវេ បុរិសបុគ្គលស្ស យញ្ចេវ កាយកម្មំ យថាទិដ្ឋិសមត្តំ សមាទិន្នំ យញ្ច វចីកម្មំ យថាទិដ្ឋិសមត្តំ សមាទិន្នំ យញ្ច មនោកម្មំ យថាទិដ្ឋិសមត្តំ សមាទិន្នំ យា ច ចេតនា យា ច បត្ថនា យោ ច បណិធិ យេ ច សង្ខារា សព្វេ តេ ធម្មា អនិដ្ឋាយ អកន្តាយ អមនាបាយ អហិតាយ ទុក្ខាយ សំវត្តន្តិ។ តំ កិស្ស ហេតុ។ ទិដ្ឋិ ហិ ភិក្ខវេ បាបិកា។ សេយ្យថាបិ ភិក្ខវេ និម្ពពីជំ វា កោសាតកីពីជំ វា តិត្តកលាពុពីជំ វា អល្លាយ បឋវិយា និក្ខិត្តំ យញ្ចេវ បឋវីរសំ ឧបាទិយតិ យញ្ច អាបោរសំ ឧបាទិយតិ សព្វន្តំ តិត្តកត្តាយ កដុកត្តាយ អសាតត្តាយ សំវត្តតិ។ តំ កិស្ស ហេតុ។ ពីជំ ហិ ភិក្ខវេ បាបកំ។ ឯវមេវ ខោ ភិក្ខវេ មិច្ឆាទិដ្ឋិកស្ស បុរិសបុគ្គលស្ស យញ្ចេវ កាយកម្មំ យថាទិដ្ឋិសមត្តំ សមាទិន្នំ យញ្ច វចីកម្មំ យថាទិដ្ឋិសមត្តំ សមាទិន្នំ យញ្ច មនោកម្មំ យថាទិដ្ឋិសមត្តំ សមាទិន្នំ យា ច ចេតនា យា ច បត្ថនា យោ ច បណិធិ យេ ច សង្ខារា សព្វេ តេ ធម្មា អនិដ្ឋាយ អកន្តាយ អមនាបាយ អហិតាយ ទុក្ខាយ សំវត្តន្តិ។ តំ កិស្ស ហេតុ។ ទិដ្ឋិ ហិ ភិក្ខវេ បាបិកាតិ។

[១៩០] សម្មាទិដ្ឋិកស្ស ភិក្ខវេ បុរិសបុគ្គលស្ស យញ្ចេវ កាយកម្មំ យថាទិដ្ឋិសមត្តំ សមាទិន្នំ យញ្ច វចីកម្មំ យថាទិដ្ឋិសមត្តំ សមាទិន្នំ យញ្ច មនោកម្មំ យថាទិដ្ឋិសមត្តំ សមាទិន្នំ យា ច ចេតនា យា ច បត្ថនា យោ ច បណិធិ យេ ច សង្ខារា សព្វេ តេ ធម្មា ឥដ្ឋាយ កន្តាយ មនាបាយ ហិតាយ សុខាយ សំវត្តន្តិ។ តំ កិស្ស ហេតុ។ ទិដ្ឋិ ហិ ភិក្ខវេ ភទ្ទិកា។ សេយ្យថាបិ ភិក្ខវេ ឧច្ឆុពីជំ វា សាលិពីជំ វា មុទ្ទិកាពីជំ វា អល្លាយ បឋវិយា និក្ខិត្តំ យញ្ចេវ បឋវីរសំ ឧបាទិយតិ យញ្ច អាបោរសំ ឧបាទិយតិ សព្វន្តំ មធុរត្តាយ សាតត្តាយ អសេចនកត្តាយ សំវត្តតិ។ តំ កិស្ស ហេតុ។ ពីជំ ហិ ភិក្ខវេ ភទ្ទកំ។ ឯវមេវ ខោ ភិក្ខវេ សម្មាទិដ្ឋិកស្ស បុរិសបុគ្គលស្ស យញ្ចេវ កាយកម្មំ យថាទិដ្ឋិសមត្តំ សមាទិន្នំ យញ្ច វចីកម្មំ យថាទិដ្ឋិសមត្តំ សមាទិន្នំ យញ្ច មនោកម្មំ យថាទិដ្ឋិសមត្តំ សមាទិន្នំ យា ច ចេតនា យា ច បត្ថនា យោ ច បណិធិ យេ ច សង្ខារា សព្វេ តេ ធម្មា ឥដ្ឋាយ កន្តាយ មនាបាយ ហិតាយ សុខាយ សំវត្តន្តិ។ តំ កិស្ស ហេតុ។ ទិដ្ឋិ ហិ ភិក្ខវេ ភទ្ទិកាតិ។

វគ្គោ ទុតិយោ។

[១៩១] ឯកបុគ្គលោ ភិក្ខវេ លោកេ ឧប្បជ្ជមានោ ឧប្បជ្ជតិ ពហុជនាហិតាយ ពហុជនាសុខាយ ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ។ កតមោ ឯកបុគ្គលោ។ មិច្ឆាទិដ្ឋិកោ ហោតិ វិបរីតទស្សនោ សោ ពហុជនំ សទ្ធម្មា វុដ្ឋាបេត្វា អសទ្ធម្មេ បតិដ្ឋាបេតិ។ អយំ ខោ ភិក្ខវេ ឯកបុគ្គលោ លោកេ ឧប្បជ្ជមានោ ឧប្បជ្ជតិ ពហុជនាហិតាយ ពហុជនាសុខាយ ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានន្តិ។

[១៩២] ឯកបុគ្គលោ ភិក្ខវេ លោកេ ឧប្បជ្ជមានោ ឧប្បជ្ជតិ ពហុជនហិតាយ ពហុជនសុខាយ ពហុនោ ជនស្ស អត្ថាយ ហិតាយ សុខាយ ទេវមនុស្សានំ។ កតមោ ឯកបុគ្គលោ។ សម្មាទិដ្ឋិកោ ហោតិ អវិបរីតទស្សនោ សោ ពហុជនំ អសទ្ធម្មា វុដ្ឋាបេត្វា សទ្ធម្មេ បតិដ្ឋាបេតិ។ អយំ ខោ ភិក្ខវេ ឯកបុគ្គលោ លោកេ ឧប្បជ្ជមានោ ឧប្បជ្ជតិ ពហុជនហិតាយ ពហុជនសុខាយ ពហុនោ ជនស្ស អត្ថាយ ហិតាយ សុខាយ ទេវមនុស្សានន្តិ។

[១៩៣] នាហំ ភិក្ខវេ អញ្ញំ ឯកធម្មំបិ សមនុបស្សាមិ យំ ឯវំ មហាសាវជ្ជំ យថយិទំ ភិក្ខវេ មិច្ឆាទិដ្ឋិ។ មិច្ឆាទិដ្ឋិបរមានិ ភិក្ខវេ វជ្ជានីតិ [ឱ.ម. មហាសាវជ្ជានីតិ។]។

[១៩៤] នាហំ ភិក្ខវេ អញ្ញំ ឯកបុគ្គលំបិ សមនុបស្សាមិ យោ ឯវំ ពហុជនាហិតាយ បដិបន្នោ ពហុជនាសុខាយ ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ យថយិទំ ភិក្ខវេ មក្ខលិ មោឃបុរិសោ។ សេយ្យថាបិ ភិក្ខវេ នទីមុខេ ខិបំ ឧឌ្ឌេយ្យ [ម. ខិប្បំ ឧជ្ជេយ្យ។] ពហុន្នំ មច្ឆានំ អហិតាយ ទុក្ខាយ អនយាយ ព្យសនាយ។ ឯវមេវ ខោ ភិក្ខវេ មក្ខលិ មោឃបុរិសោ មនុស្សខិបម្មញ្ញេ លោកេ ឧប្បន្នោ ពហុន្នំ សត្តានំ អហិតាយ ទុក្ខាយ អនយាយ ព្យសនាយាតិ។

[១៩៥] ទុរក្ខាតេ ភិក្ខវេ ធម្មវិនយេ យោ ច សមាទបេតិ យញ្ច សមាទបេតិ យោ ច សមាទបិតោ តថត្តាយ បដិបជ្ជតិ សព្វេ តេ ពហុំ អបុញ្ញំ បសវន្តិ។ តំ កិស្ស ហេតុ។ ទុរក្ខាតត្តា ភិក្ខវេ ធម្មស្សាតិ។

[១៩៦] ស្វាក្ខាតេ ភិក្ខវេ ធម្មវិនយេ យោ ច សមាទបេតិ យញ្ច សមាទបេតិ យោ ច សមាទបិតោ តថត្តាយ បដិបជ្ជតិ សព្វេ តេ ពហុំ បុញ្ញំ បសវន្តិ។ តំ កិស្ស ហេតុ។ ស្វាក្ខាតត្តា ភិក្ខវេ ធម្មស្សាតិ។

[១៩៧] ទុរក្ខាតេ ភិក្ខវេ ធម្មវិនយេ ទាយកេន មត្តា ជានិតព្វា នោ បដិគ្គាហកេន។ តំ កិស្ស ហេតុ។ ទុរក្ខាតត្តា ភិក្ខវេ ធម្មស្សាតិ។

[១៩៨] ស្វាក្ខាតេ ភិក្ខវេ ធម្មវិនយេ បដិគ្គាហកេន មត្តា ជានិតព្វា នោ ទាយកេន។ តំ កិស្ស ហេតុ។ ស្វាក្ខាតត្តា ភិក្ខវេ ធម្មស្សាតិ។

[១៩៩] ទុរក្ខាតេ ភិក្ខវេ ធម្មវិនយេ យោ អារទ្ធវីរិយោ សោ ទុក្ខំ វិហរតិ។ តំ កិស្ស ហេតុ។ ទុរក្ខាតត្តា ភិក្ខវេ ធម្មស្សាតិ។

[២០០] ស្វាក្ខាតេ ភិក្ខវេ ធម្មវិនយេ យោ កុសីតោ សោ ទុក្ខំ វិហរតិ។ តំ កិស្ស ហេតុ។ ស្វាក្ខាតត្តា ភិក្ខវេ ធម្មស្សាតិ។

[២០១] ទុរក្ខាតេ ភិក្ខវេ ធម្មវិនយេ យោ កុសីតោ សោ សុខំ វិហរតិ។ តំ កិស្ស ហេតុ។ ទុរក្ខាតត្តា ភិក្ខវេ ធម្មស្សាតិ។

[២០២] ស្វាក្ខាតេ ភិក្ខវេ ធម្មវិនយេ យោ អារទ្ធវីរិយោ សោ សុខំ វិហរតិ។ តំ កិស្ស ហេតុ។ ស្វាក្ខាតត្តា ភិក្ខវេ ធម្មស្សាតិ។

[២០៣] សេយ្យថាបិ ភិក្ខវេ អប្បមត្តកោបិ គូថោ ទុគ្គន្ធោ ហោតិ ឯវមេវ ខោ អហំ ភិក្ខវេ អប្បមត្តកំបិ ភវំ ន វណ្ណេមិ អន្តមសោ អច្ឆរាសំឃាតមត្តំបីតិ។

[២០៤] សេយ្យថាបិ ភិក្ខវេ អប្បមត្តកំបិ មុត្តំ ទុគ្គន្ធំ ហោតិ… អប្បមត្តកោបិ ខេឡោ ទុគ្គន្ធោ ហោតិ… អប្បមត្តកោបិ បុព្វោ ទុគ្គន្ធោ ហោតិ… អប្បមត្តកំបិ លោហិតំ ទុគ្គន្ធំ ហោតិ ឯវមេវ ខោ អហំ ភិក្ខវេ អប្បមត្តកំបិ ភវំ ន វណ្ណេមិ អន្តមសោ អច្ឆរាសំឃាតមត្តំបីតិ។

វគ្គោ តតិយោ។

[២០៥] សេយ្យថាបិ ភិក្ខវេ អប្បមត្តកំ ឥមស្មឹ ជម្ពូទីបេ [ជម្ពុទីបេតិបិ បាឋោ។] អារាមរាមណេយ្យកំ វនរាមណេយ្យកំ ភូមិរាមណេយ្យកំ បោក្ខរណីរាមណេយ្យកំ អថខោ ឯតទេវ ពហុតរំ យទិទំ ឧក្កូលវិកូលំ នទីវិទុគ្គំ ខាណុកណ្ដកដ្ឋានំ [ឱ. ខាណុកណ្តកាធានំ] បព្វតវិសមំ។ ឯវមេវ ខោ ភិក្ខវេ អប្បកា តេ សត្តា យេ ថលជា អថ ខោ ឯតេវ សត្តា ពហុតរា យេ ឱទកា។ ឯវមេវ ខោ ភិក្ខវេ អប្បកា តេ សត្តា យេ មនុស្សេសុ បច្ចាជាយន្តិ។ អថ ខោ ឯតេវ សត្តា ពហុតរា យេ អញ្ញត្រ មនុស្សេហិ បច្ចាជាយន្តិ។ ឯវមេវ ខោ ភិក្ខវេ អប្បកា តេ សត្តា យេ មជ្ឈិមេសុ ជនបទេសុ បច្ចាជាយន្តិ អថ ខោ ឯតេវ សត្តា ពហុតរា យេ បច្ចន្តិមេសុ ជនបទេសុ បច្ចាជាយន្តិ អវិញ្ញាតារេសុ មិលក្ខេសុ។ ឯវមេវ ខោ ភិក្ខវេ អប្បកា តេ សត្តា យេ បញ្ញវន្តោ អជឡា អនេឡមូគា បដិពលា សុភាសិតទុព្ភាសិតស្ស អត្ថមញ្ញាតុំ អថ ខោ ឯតេវ សត្តា ពហុតរា យេ ទុប្បញ្ញា ជឡា ឯឡមូគា ន បដិពលា សុភាសិតទុព្ភាសិតស្ស អត្ថមញ្ញាតុំ។ ឯវមេវ ខោ ភិក្ខវេ អប្បកា តេ សត្តា យេ អរិយេន បញ្ញាចក្ខុនា សម្មន្នាគតា អថ ខោ ឯតេវ សត្តា ពហុតរា យេ អវិជ្ជាគតា សម្មូឡ្ហា។ ឯវមេវ ខោ ភិក្ខវេ អប្បកា តេ សត្តា យេ លភន្តិ តថាគតំ ទស្សនាយ អថ ខោ ឯតេវ សត្តា ពហុតរា យេ ន លភន្តិ តថាគតំ ទស្សនាយ។ ឯវមេវ ខោ ភិក្ខវេ អប្បកា តេ សត្តា យេ លភន្តិ តថាគតប្បវេទិតំ ធម្មវិនយំ សវនាយ អថ ខោ ឯតេវ សត្តា ពហុតរា យេ ន លភន្តិ តថាគតប្បវេទិតំ ធម្មវិនយំ សវនាយ។ ឯវមេវ ខោ ភិក្ខវេ អប្បកា តេ សត្តា យេ សុត្វា ធម្មំ ធារេន្តិ អថ ខោ ឯតេវ សត្តា ពហុតរា យេ សុត្វា ធម្មំ ន ធារេន្តិ។ ឯវមេវ ខោ ភិក្ខវេ អប្បកា តេ សត្តា យេ ធតានំ ធម្មានំ អត្ថំ ឧបបរិក្ខន្តិ អថ ខោ ឯតេវ សត្តា ពហុតរា យេ ធតានំ ធម្មានំ អត្ថំ ន ឧបបរិក្ខន្តិ។ ឯវមេវ ខោ ភិក្ខវេ អប្បកា តេ សត្តា យេ អត្ថមញ្ញាយ ធម្មមញ្ញាយ ធម្មានុធម្មំ បដិបជ្ជន្តិ អថ ខោ ឯតេវ សត្តា ពហុតរា យេ អត្ថមញ្ញាយ ធម្មមញ្ញាយ ធម្មានុធម្មំ ន បដិបជ្ជន្តិ។ ឯវមេវ ខោ ភិក្ខវេ អប្បកា តេ សត្តា យេ សំវេជនីយេសុ ឋានេសុ សំវិជន្តិ អថ ខោ ឯតេវ សត្តា ពហុតរា យេ សំវេជនីយេសុ ឋានេសុ ន សំវិជន្តិ។ ឯវមេវ ខោ ភិក្ខវេ អប្បកា តេ សត្តា យេ សំវិគ្គា យោនិសោ បទហន្តិ អថ ខោ ឯតេវ សត្តា ពហុតរា យេ សំវិគ្គា យោនិសោ ន បទហន្តិ។ ឯវមេវ ខោ ភិក្ខវេ អប្បកា តេ សត្តា យេ វវស្សគ្គារម្មណំ ករិត្វា លភន្តិ សមាធឹ លភន្តិ ចិត្តស្សេកគ្គតំ អថ ខោ ឯតេវ សត្តា ពហុតរា យេ វវស្សគ្គារម្មណំ ករិត្វា ន លភន្តិ សមាធឹ ន លភន្តិ ចិត្តស្សេកគ្គតំ។ ឯវមេវ ខោ ភិក្ខវេ អប្បកា តេ សត្តា យេ អន្នគ្គរសគ្គានំ លាភិនោ អថ ខោ ឯតេវ សត្តា ពហុតរា យេ អន្នគ្គរសគ្គានំ ន លាភិនោ ឧញ្ឆេន កបាលភត្តេន យាបេន្តិ។ ឯវមេវ ខោ ភិក្ខវេ អប្បកា តេ សត្តា យេ អត្ថរសស្ស ធម្មរសស្ស វិមុត្តិរសស្ស លាភិនោ អថ ខោ ឯតេវ សត្តា ពហុតរា យេ អត្ថរសស្ស ធម្មរសស្ស វិមុត្តិរសស្ស ន លាភិនោ។ តស្មាតិហ ភិក្ខវេ ឯវំ សិក្ខិតព្វំ អត្ថរសស្ស ធម្មរសស្ស វិមុត្តិរសស្ស លាភិនោ ភវិស្សាមាតិ។ ឯវំ ហិ វោ ភិក្ខវេ សិក្ខិតព្វន្តិ។

[២០៦] សេយ្យថាបិ ភិក្ខវេ អប្បមត្តកំ ឥមស្មឹ ជម្ពូទីបេ អារាមរាមណេយ្យកំ វនរាមណេយ្យកំ ភូមិរាមណេយ្យកំ បោក្ខរណីរាមណេយ្យកំ អថ ខោ ឯតទេវ ពហុតរំ យទិទំ ឧក្កូលវិកូលំ នទីវិទុគ្គំ ខាណុកណ្ដកដ្ឋានំ បព្វតវិសមំ។ ឯវមេវ ខោ ភិក្ខវេ អប្បកា តេ សត្តា យេ មនុស្សា ចុតា មនុស្សេសុ បច្ចាជាយន្តិ អថ ខោ ឯតេវ សត្តា ពហុតរា យេ មនុស្សា ចុតា និរយេ បច្ចាជាយន្តិ តិរច្ឆានយោនិយា បច្ចាជាយន្តិ បិត្តិវិសយេ បច្ចាជាយន្តិ។ ឯវមេវ ខោ ភិក្ខវេ អប្បកា តេ សត្តា យេ មនុស្សា ចុតា ទេវេសុ បច្ចាជាយន្តិ អថ ខោ ឯតេវ សត្តា ពហុតរា យេ មនុស្សា ចុតា និរយេ បច្ចាជាយន្តិ តិរច្ឆានយោនិយា បច្ចាជាយន្តិ បិត្តិវិសយេ បច្ចាជាយន្តិ។ ឯវមេវ ខោ ភិក្ខវេ អប្បកា តេ សត្តា យេ ទេវា ចុតា ទេវេសុ បច្ចាជាយន្តិ អថ ខោ ឯតេវ សត្តា ពហុតរា យេ ទេវា ចុតា និរយេ បច្ចាជាយន្តិ តិរច្ឆានយោនិយា បច្ចាជាយន្តិ បិត្តិវិសយេ បច្ចាជាយន្តិ។ ឯវមេវ ខោ ភិក្ខវេ អប្បកា តេ សត្តា យេ ទេវា ចុតា មនុស្សេសុ បច្ចាជាយន្តិ អថ ខោ ឯតេវ សត្តា ពហុតរា យេ ទេវា ចុតា និរយេ បច្ចាជាយន្តិ តិរច្ឆានយោនិយា បច្ចាជាយន្តិ បិត្តិវិសយេ បច្ចាជាយន្តិ។ ឯវមេវ ខោ ភិក្ខវេ អប្បកា តេ សត្តា យេ និរយា ចុតា មនុស្សេសុ បច្ចាជាយន្តិ អថ ខោ ឯតេវ សត្តា ពហុតរា យេ និរយា ចុតា និរយេ បច្ចាជាយន្តិ តិរច្ឆានយោនិយា បច្ចាជាយន្តិ បិត្តិវិសយេ បច្ចាជាយន្តិ។ ឯវមេវ ខោ ភិក្ខវេ អប្បកា តេ សត្តា យេ និរយា ចុតា ទេវេសុ បច្ចាជាយន្តិ អថ ខោ ឯតេវ សត្តា ពហុតរា យេ និរយា ចុតា និរយេ បច្ចាជាយន្តិ តិរច្ឆានយោនិយា បច្ចាជាយន្តិ បិត្តិវិសយេ បច្ចាជាយន្តិ។ ឯវមេវ ខោ ភិក្ខវេ អប្បកា តេ សត្តា យេ តិរច្ឆានយោនិយា ចុតា មនុស្សេសុ បច្ចាជាយន្តិ អថ ខោ ឯតេវ សត្តា ពហុតរា យេ តិរច្ឆានយោនិយា ចុតា និរយេ បច្ចាជាយន្តិ តិរច្ឆានយោនិយា បច្ចាជាយន្តិ បិត្តិវិសយេ បច្ចាជាយន្តិ។ ឯវមេវ ខោ ភិក្ខវេ អប្បកា តេ សត្តា យេ តិរច្ឆានយោនិយា ចុតា ទេវេសុ បច្ចាជាយន្តិ អថ ខោ ឯតេវ សត្តា ពហុតរា យេ តិរច្ឆានយោនិយា ចុតា និរយេ បច្ចាជាយន្តិ តិរច្ឆានយោនិយា បច្ចាជាយន្តិ បិត្តិវិសយេ បច្ចាជាយន្តិ។ ឯវមេវ ខោ ភិក្ខវេ អប្បកា តេ សត្តា យេ បិត្តិវិសយា ចុតា មនុស្សេសុ បច្ចាជាយន្តិ អថ ខោ ឯតេវ សត្តា ពហុតរា យេ បិត្តិវិសយា ចុតា និរយេ បច្ចាជាយន្តិ តិរច្ឆានយោនិយា បច្ចាជាយន្តិ បិត្តិវិសយេ បច្ចាជាយន្តិ។ ឯវមេវ ខោ ភិក្ខវេ អប្បកា តេ សត្តា យេ បិត្តិវិសយា ចុតា ទេវេសុ បច្ចាជាយន្តិ អថ ខោ ឯតេវ សត្តា ពហុតរា យេ បិត្តិវិសយា ចុតា និរយេ បច្ចាជាយន្តិ តិរច្ឆានយោនិយា បច្ចាជាយន្តិ បិត្តិវិសយេ បច្ចាជាយន្តិ។

វគ្គោ ចតុត្ថោ។

បសាទករធម្មាទិបាលិ

[២០៧] អទ្ធមិទំ ភិក្ខវេ លាភានំ យទិទំ អារញ្ញកត្តំ បិណ្ឌបាតិកត្តំ បំសុកូលិកត្តំ តេចីវរិកត្តំ ធម្មកថិកត្តំ វិនយធរកត្តំ ពាហុសច្ចំ ថាវរេយ្យំ អាកប្បសម្បទា បរិវារសម្បទា មហាបរិវារតា កុលបុត្តិ វណ្ណបោក្ខរតា កល្យាណវាក្ករណតា អប្បិច្ឆតា អប្បាពាធតាតិ។

[២០៨] អច្ឆរាសំឃាតមត្តំបិ ចេ ភិក្ខវេ ភិក្ខុ បឋមំ ឈានំ ភាវេតិ អយំ វុច្ចតិ ភិក្ខវេ ភិក្ខុ អរិត្តជ្ឈានោ វិហរតិ សត្ថុសាសនករោ ឱវាទប្បដិករោ អមោឃំ រដ្ឋបិណ្ឌំ ភុញ្ជតិ កោ បន វាទោ យេ នំ ពហុលីករោន្តីតិ។

[២០៩] អច្ឆរាសំឃាតមត្តំបិ ចេ ភិក្ខវេ ភិក្ខុ ទុតិយំ ឈានំ ភាវេតិ… តតិយំ ឈានំ ភាវេតិ… ចតុត្ថំ ឈានំ ភាវេតិ… មេត្តំ ចេតោវិមុត្តឹ ភាវេតិ… ករុណំ ចេតោវិមុត្តឹ ភាវេតិ.… មុទិតំ ចេតោវិមុត្តឹ ភាវេតិ.… ឧបេក្ខំ ចេតោវិមុត្តឹ ភាវេតិ.… កាយេ កាយានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សំ… វេទនាសុ វេទនានុបស្សី វិហរតិ។បេ។ ចិត្តេ ចិត្តានុបស្សី វិហរតិ។បេ។ ធម្មេសុ ធម្មានុបស្សី វិហរតិ អាតាបី សម្បជានោ សតិមា វិនេយ្យ លោកេ អភិជ្ឈាទោមនស្សំ… អនុប្បន្នានំ បាបកានំ អកុសលានំ ធម្មានំ អនុប្បាទាយ ឆន្ទំ ជនេតិ វាយមតិ វីរិយំ អារភតិ ចិត្តំ បគ្គណ្ហាតិ បទហតិ… ឧប្បន្នានំ បាបកានំ អកុសលានំ ធម្មានំ បហានាយ ឆន្ទំ ជនេតិ វាយមតិ វីរិយំ អារភតិ ចិត្តំ បគ្គណ្ហាតិ បទហតិ… អនុប្បន្នានំ កុសលានំ ធម្មានំ ឧប្បាទាយ ឆន្ទំ ជនេតិ វាយមតិ វីរិយំ អារភតិ ចិត្តំ បគ្គណ្ហាតិ បទហតិ …ឧប្បន្នានំ កុសលានំ ធម្មានំ ឋិតិយា អសម្មោសាយ ភិយ្យោភាវាយ វេបុល្លាយ ភាវនាយ បារិបូរិយា ឆន្ទំ ជនេតិ វាយមតិ វីរិយំ អារភតិ ចិត្ត បគ្គណ្ហាតិ បទហតិ… ឆន្ទសមាធិប្បធានសង្ខារសមន្នាគតំ ឥទ្ធិបាទំ ភាវេតិ… វីរិយសមាធិប្បធានសង្ខារសមន្នាគតំ ឥទ្ធិបាទំ ភាវេតិ… ចិត្តសមាធិប្បធានសង្ខារសមន្នាគតំ ឥទ្ធិបាទំ ភាវេតិ… វីមំសាសមាធិប្បធានសង្ខារសមន្នាគតំ ឥទ្ធិបាទំ ភាវេតិ… សទ្ធិន្ទ្រិយំ ភាវេតិ… វីរិយិន្ទ្រិយំ ភាវេតិ… សតិន្ទ្រិយំ ភាវេតិ… សមាធិន្ទ្រិយំ ភាវេតិ… បញ្ញិន្ទ្រិយំ ភាវេតិ… សទ្ធាពលំ ភាវេតិ… វីរិយពលំ ភាវេតិ… សតិពលំ ភាវេតិ… សមាធិពលំ ភាវេតិ… បញ្ញាពលំ ភាវេតិ… សតិសម្ពោជ្ឈង្គំ ភាវេតិ… ធម្មវិចយសម្ពោជ្ឈង្គំ ភាវេតិ… វីរិយសម្ពោជ្ឈង្គំ ភាវេតិ… បីតិសម្ពោជ្ឈង្គំ ភាវេតិ… បស្សទ្ធិសម្ពោជ្ឈង្គំ ភាវេតិ… សមាធិសម្ពោជ្ឈង្គំ ភាវេតិ… ឧបេក្ខាសម្ពោជ្ឈង្គំ ភាវេតិ… សម្មាទិដ្ឋឹ ភាវេតិ… សម្មាសង្កប្បំ ភាវេតិ… សម្មាវាចំ ភាវេតិ… សម្មាកម្មន្តំ ភាវេតិ… សម្មាអាជីវំ ភាវេតិ… សម្មាវាយាមំ ភាវេតិ… សម្មាសតឹ ភាវេតិ… សម្មាសមាធឹ ភាវេតិ…

[២១០] អជ្ឈត្តំ រូបសញ្ញី ពហិទ្ធា រូបានិ បស្សតិ បរិត្តានិ សុវណ្ណទុព្វណ្ណានិ តានិ អភិភុយ្យ ជានាមិ បស្សាមីតិ ឯវំ សញ្ញី ហោតិ…

[២១១] អជ្ឈត្តំ រូបសញ្ញី ពហិទ្ធា រូបានិ បស្សតិ អប្បមាណានិ សុវណ្ណទុព្វណ្ណានិ តានិ អភិភុយ្យ ជានាមិ បស្សាមីតិ ឯវំ សញ្ញី ហោតិ…

[២១២] អជ្ឈត្តំ អរូបសញ្ញី ពហិទ្ធា រូបានិ បស្សតិ បរិត្តានិ សុវណ្ណទុព្វណ្ណានិ តានិ អភិភុយ្យ ជានាមិ បស្សាមីតិ ឯវំ សញ្ញី ហោតិ…

[២១៣] អជ្ឈត្តំ អរូបសញ្ញី ពហិទ្ធា រូបានិ បស្សតិ អប្បមាណានិ សុវណ្ណទុព្វណ្ណានិ តានិ អភិភុយ្យ ជានាមិ បស្សាមីតិ ឯវំ សញ្ញី ហោតិ…

[២១៤] អជ្ឈត្តំ អរូបសញ្ញី ពហិទ្ធា រូបានិ បស្សតិ នីលានិ នីលវណ្ណានិ នីលនិទស្សនានិ នីលនិភាសានិ តានិ អភិភុយ្យ ជានាមិ បស្សាមីតិ ឯវំ សញ្ញី ហោតិ…

[២១៥] អជ្ឈត្តំ អរូបសញ្ញី ពហិទ្ធា រូបានិ បស្សតិ បីតានិ បីតវណ្ណានិ បីតនិទស្សនានិ បីតនិភាសានិ តានិ អភិភុយ្យ ជានាមិ បស្សាមីតិ ឯវំ សញ្ញី ហោតិ…

[២១៦] អជ្ឈត្តំ អរូបសញ្ញី ពហិទ្ធា រូបានិ បស្សតិ លោហិតកានិ លោហិតកវណ្ណានិ លោហិតកនិទស្សនានិ លោហិតកនិភាសានិ តានិ អភិភុយ្យ ជានាមិ បស្សាមីតិ ឯវំ សញ្ញី ហោតិ…

[២១៧] អជ្ឈត្តំ អរូបសញ្ញី ពហិទ្ធា រូបានិ បស្សតិ ឱទាតានិ ឱទាតវណ្ណានិ ឱទាតនិទស្សនានិ ឱទាតនិភាសានិ តានិ អភិភុយ្យ ជានាមិ បស្សាមីតិ ឯវំ សញ្ញី ហោតិ… រូបី រូបានិ បស្សតិ…

[២១៨] អជ្ឈត្តំ អរូបសញ្ញី ពហិទ្ធា រូបានិ បស្សតិ… សុភន្តេវ អធិមុត្តោ ហោតិ…

[២១៩] សព្វសោ រូបសញ្ញានំ សមតិក្កមា បដិឃសញ្ញានំ អត្ថង្គមា នានត្តសញ្ញានំ អមនសិការា អនន្តោ អាកាសោតិ អាកាសានញ្ចាយតនំ ឧបសម្បជ្ជ វិហរតិ…

[២២០] សព្វសោ អាកាសានញ្ចាយតនំ សមតិក្កម្ម អនន្តំ វិញ្ញាណន្តិ វិញ្ញាណញ្ចាយតនំ ឧបសម្បជ្ជ វិហរតិ…

[២២១] សព្វសោ វិញ្ញាណញ្ចាយតនំ សមតិក្កម្ម នត្ថិ កិញ្ចីតិ អាកិញ្ចញ្ញាយតនំ ឧបសម្បជ្ជ វិហរតិ…

[២២២] សព្វសោ អាកិញ្ចញ្ញាយតនំ សមតិក្កម្ម នេវសញ្ញានាសញ្ញាយតនំ ឧបសម្បជ្ជ វិហរតិ…

[២២៣] សព្វសោ នេវសញ្ញានាសញ្ញាយតនំ សមតិក្កម្ម សញ្ញាវេទយិតនិរោធំ ឧបសម្បជ្ជ វិហរតិ…

[២២៤] បឋវីកសិណំ ភាវេតិ… អាបោកសិណំ ភាវេតិ… តេជោកសិណំ ភាវេតិ… វាយោកសិណំ ភាវេតិ… នីលកសិណំ ភាវេតិ… បីតកសិណំ ភាវេតិ… លោហិតកសិណំ ភាវេតិ… ឱទាតកសិណំ ភាវេតិ… អាកាសកសិណំ ភាវេតិ… វិញ្ញាណកសិណំ ភាវេតិ… អសុភសញ្ញំ ភាវេតិ… មរណសញ្ញំ ភាវេតិ… អាហារេ បដិកូលសញ្ញំ ភាវេតិ… សព្វលោកេ អនភិរតិសញ្ញំ ភាវេតិ… អនិច្ចសញ្ញំ ភាវេតិ… អនិច្ចេ ទុក្ខសញ្ញំ ភាវេតិ… ទុក្ខេ អនត្តសញ្ញំ ភាវេតិ… បហានសញ្ញំ ភាវេតិ… វិរាគសញ្ញំ ភាវេតិ… និរោធសញ្ញំ ភាវេតិ…អនិច្ចសញ្ញំ ភាវេតិ… អនត្តសញ្ញំ ភាវេតិ… មរណសញ្ញំ ភាវេតិ… អាហារេ បដិកូលសញ្ញំ ភាវេតិ… សព្វលោកេ អនភិរតសញ្ញំ ភាវេតិ… អដ្ឋិកសញ្ញំ ភាវេតិ… បុឡវកសញ្ញំ ភាវេតិ… វិនីលកសញ្ញំ ភាវេតិ… វិច្ឆិទ្ទកសញ្ញំ ភាវេតិ… ឧទ្ធុមាតកសញ្ញំ ភាវេតិ… ពុទ្ធានុស្សតឹ ភាវេតិ… ធម្មានុស្សតឹ ភាវេតិ… សង្ឃានុស្សតឹ ភាវេតិ… សីលានុស្សតឹ ភាវេតិ… ចាគានុស្សតឹ ភាវេតិ… ទេវតានុស្សតឹ ភាវេតិ… អានាបានស្សតឹ ភាវេតិ… មរណស្សតឹ ភាវេតិ… កាយគតាសតឹ ភាវេតិ… ឧបសមានុស្សតឹ ភាវេតិ… បឋមជ្ឈានសហគតំ សទ្ធិន្ទ្រិយំ ភាវេតិ… វីរិយិន្ទ្រិយំ ភាវេតិ… សតិន្ទ្រិយំ ភាវេតិ… សមាធិន្ទ្រិយំ ភាវេតិ… បញ្ញិន្ទ្រិយំ ភាវេតិ… សទ្ធាពលំ ភាវេតិ… វីរិយពលំ ភាវេតិ… សតិពលំ ភាវេតិ… សមាធិពលំ ភាវេតិ… បញ្ញាពលំ ភាវេតិ… ទុតិយជ្ឈានសហគតំ។បេ។ តតិយជ្ឈានសហគតំ។បេ។ ចតុត្ថជ្ឈានសហគតំ។បេ។ មេត្តាសហគតំ។បេ។ ករុណាសហគតំ។បេ។ មុទិតាសហគតំ។បេ។ ឧបេក្ខាសហគតំ សទ្ធិន្ទ្រិយំ ភាវេតិ… វីរិយិន្ទ្រិយំ ភាវេតិ… សតិន្ទ្រិយំ ភាវេតិ… សមាធិន្ទ្រិយំ ភាវេតិ… បញ្ញិន្ទ្រិយំ ភាវេតិ… សទ្ធាពលំ ភាវេតិ… វីរិយពលំ ភាវេតិ… សតិពលំ ភាវេតិ… សមាធិពលំ ភាវេតិ… បញ្ញាពលំ ភាវេតិ អយំ វុច្ចតិ ភិក្ខវេ ភិក្ខុ អរិត្តជ្ឈានោ វិហរតិ សត្ថុសាសនករោ ឱវាទប្បដិករោ អមោឃំ រដ្ឋបិណ្ឌំ ភុញ្ជតិ កោ បន វាទោ យេ នំ ពហុលីករោន្តីតិ។

[២២៥] យស្ស កស្សចិ ភិក្ខវេ មហាសមុទ្ទោ ចេតសា ផុដោ អន្តោគធា តស្ស កុន្នទិយោ យា កាចិ សមុទ្ទំ គមា ឯវមេវ ភិក្ខវេ យស្ស កស្សចិ កាយគតាសតិ ភាវិតា ពហុលីកតា អន្តោគធា តស្ស កុសលា ធម្មា យេ កេចិ វិជ្ជាភាគិយាតិ។

[២២៦] ឯកធម្មោ ភិក្ខវេ ភាវិតោ ពហុលីកតោ មហតោ សំវេគាយ សំវត្តតិ មហតោ អត្ថាយ សំវត្តតិ មហតោ យោគក្ខេមាយ សំវត្តតិ សតិសម្បជញ្ញាយ សំវត្តតិ ញាណទស្សនប្បដិលាភាយ សំវត្តតិ ទិដ្ឋធម្មសុខវិហារាយ សំវត្តតិ វិជ្ជាវិមុត្តិផលសច្ឆិកិរិយាយ សំវត្តតិ។ កតមោ ឯកធម្មោ។ កាយគតាសតិ។ អយំ ខោ ភិក្ខវេ ឯកធម្មោ ភាវិតោ ពហុលីកតោ មហតោ សំវេគាយ សំវត្តតិ មហតោ អត្ថាយ សំវត្តតិ មហតោ យោគក្ខេមាយ សំវត្តតិ សតិសម្បជញ្ញាយ សំវត្តតិ ញាណទស្សនប្បដិលាភាយ សំវត្តតិ ទិដ្ឋធម្មសុខវិហារាយ សំវត្តតិ វិជ្ជាវិមុត្តិផលសច្ឆិកិរិយាយ សំវត្តតីតិ។

[២២៧] ឯកធម្មេ ភិក្ខវេ ភាវិតេ ពហុលីកតេ កាយោបិ បស្សម្ភតិ ចិត្តំបិ បស្សម្ភតិ វិតក្កវិចារាបិ វូបសម្មន្តិ កេវលាបិ វិជ្ជាភាគិយា ធម្មា ភាវនាបារិបូរឹ គច្ឆន្តិ។ កតមស្មឹ ឯកធម្មេ។ កាយគតាសតិយា។ ឥមស្មឹ ខោ ភិក្ខវេ ឯកធម្មេ ភាវិតេ ពហុលីកតេ កាយោបិ បស្សម្ភតិ ចិត្តំបិ បស្សម្ភតិ វិតក្កវិចារាបិ វូបសម្មន្តិ កេវលាបិ វិជ្ជាភាគិយា ធម្មា ភាវនាបារិបូរឹ គច្ឆន្តីតិ។

[២២៨] ឯកធម្មេ ភិក្ខវេ ភាវិតេ ពហុលីកតេ អនុប្បន្នា ចេវ អកុសលា ធម្មា នុប្បជ្ជន្តិ ឧប្បន្នា ច អកុសលា ធម្មា បហីយន្តិ [ម. បរិហាយន្តិ។]។ កតមស្មឹ ឯកធម្មេ។ កាយគតាសតិយា ឥមស្មឹ ខោ ភិក្ខវេ ឯកធម្មេ ភាវិតេ ពហុលីកតេ អនុប្បន្នា ចេវ អកុសលា ធម្មា នុប្បជ្ជន្តិ ឧប្បន្នា ច អកុសលា ធម្មា បហីយន្តីតិ។

[២២៩] ឯកធម្មេ ភិក្ខវេ ភាវិតេ ពហុលីកតេ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច កុសលា ធម្មា ភិយ្យោភាវាយ វេបុល្លាយ សំវត្តន្តិ។ កតមស្មឹ ឯកធម្មេ។ កាយគតាសតិយា។ ឥមស្មឹ ខោ ភិក្ខវេ ឯកធម្មេ ភាវិតេ ពហុលីកតេ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច កុសលា ធម្មា ភិយ្យោភាវាយ វេបុល្លាយ សំវត្តន្តីតិ។

[២៣០] ឯកធម្មេ ភិក្ខវេ ភាវិតេ ពហុលីកតេ អវិជ្ជា បហីយតិ វិជ្ជា ឧប្បជ្ជតិ អស្មិមានោ បហីយតិ អនុសយា សមុគ្ឃាតំ គច្ឆន្តិ សញ្ញោជនា បហីយន្តិ។ កតមស្មឹ ឯកធម្មេ។ កាយគតាសតិយា។ ឥមស្មឹ ខោ ភិក្ខវេ ឯកធម្មេ ភាវិតេ ពហុលីកតេ អវិជ្ជា បហីយតិ វិជ្ជា ឧប្បជ្ជតិ អស្មិមានោ បហីយតិ អនុសយា សមុគ្ឃាតំ គច្ឆន្តិ សញ្ញោជនា បហីយន្តីតិ។

[២៣១] ឯកធម្មោ ភិក្ខវេ ភាវិតោ ពហុលីកតោ បញ្ញាបភេទាយ សំវត្តតិ អនុបាទាបរិនិព្វានាយ សំវត្តតិ។ កតមោ ឯកធម្មោ។ កាយគតាសតិ។ អយំ ខោ ភិក្ខវេ ឯកធម្មោ ភាវិតោ ពហុលីកតោ បញ្ញាបភេទាយ សំវត្តតិ អនុបាទាបរិនិព្វានាយ សំវត្តតីតិ។

[២៣២] ឯកធម្មេ ភិក្ខវេ ភាវិតេ ពហុលីកតេ អនេកធាតុប្បដិវេធោ ហោតិ នានាធាតុប្បដិវេធោ ហោតិ អនេកធាតុប្បដិសម្ភិទា ហោតិ។ កតមស្មឹ ឯកធម្មេ។ កាយគតាសតិយា។ ឥមស្មឹ ខោ ភិក្ខវេ ឯកធម្មេ ភាវិតេ ពហុលីកតេ អនេកធាតុប្បដិវេធោ ហោតិ នានាធាតុប្បដិវេធោ ហោតិ អនេកធាតុប្បដិសម្ភិទា ហោតីតិ។

[២៣៣] ឯកធម្មោ ភិក្ខវេ ភាវិតោ ពហុលីកតោ សោតាបត្តិផលសច្ឆិកិរិយាយ សំវត្តតិ សកទាគាមិផលសច្ឆិកិរិយាយ សំវត្តតិ អនាគាមិផលសច្ឆិកិរិយាយ សំវត្តតិ អរហត្តផលសច្ឆិកិរិយាយ សំវត្តតិ។ កតមោ ឯកធម្មោ។ កាយគតាសតិ។ អយំ ខោ ភិក្ខវេ ឯកធម្មោ ភាវិតោ ពហុលីកតោ សោតាបត្តិផលសច្ឆិកិរិយាយ សំវត្តតិ សកទាគាមិផលសច្ឆិកិរិយាយ សំវត្តតិ អនាគាមិផលសច្ឆិកិរិយាយ សំវត្តតិ អរហត្តផលសច្ឆិកិរិយាយ សំវត្តតីតិ។

[២៣៤] ឯកធម្មោ ភិក្ខវេ ភាវិតោ ពហុលីកតោ បញ្ញាបដិលាភាយ សំវត្តតិ បញ្ញាវុឌ្ឍិយា សំវត្តតិ បញ្ញាវេបុល្លាយ សំវត្តតិ មហាបញ្ញតាយ សំវត្តតិ បុថុប្បញ្ញតាយ សំវត្តតិ វិបុលប្បញ្ញតាយ[ម. វេបុល្លតាយ។] សំវត្តតិ គម្ភីរប្បញ្ញតាយ សំវត្តតិ អសមត្ថប្បញ្ញតាយ[ឱ. អសាមន្តប្បញ្ញតាយ។ អដ្ឋកថាយម្បិ ឯវមេវ។] សំវត្តតិ ភូរិប្បញ្ញតាយ សំវត្តតិ បញ្ញាពាហុល្លាយ សំវត្តតិ សីឃប្បញ្ញតាយ សំវត្តតិ លហុប្បញ្ញតាយ សំវត្តតិ ហាសប្បញ្ញតាយ សំវត្តតិ ជវនប្បញ្ញតាយ សំវត្តតិ តិក្ខប្បញ្ញតាយ សំវត្តតិ និព្វេធិកប្បញ្ញតាយ សំវត្តតិ។ កតមោ ឯកធម្មោ។ កាយគតាសតិ។ អយំ ខោ ភិក្ខវេ ឯកធម្មោ ភាវិតោ ពហុលីកតោ បញ្ញាបដិលាភាយ សំវត្តតិ បញ្ញាវុឌ្ឈិយា សំវត្តតិ បញ្ញាវេបុល្លាយ សំវត្តតិ មហាបញ្ញតាយ សំវត្តតិ បុថុប្បញ្ញតាយ សំវត្តតិ វិបុលប្បញ្ញតាយ សំវត្តតិ គម្ភីរប្បញ្ញតាយ សំវត្តតិ អសមត្ថប្បញ្ញតាយ សំវត្តតិ ភូរិប្បញ្ញតាយ សំវត្តតិ បញ្ញាពាហុល្លាយ សំវត្តតិ សីឃប្បញ្ញតាយ សំវត្តតិ លហុប្បញ្ញតាយ សំវត្តតិ ហាសប្បញ្ញតាយ សំវត្តតិ ជវនប្បញ្ញតាយ សំវត្តតិ តិក្ខប្បញ្ញតាយ សំវត្តតិ និព្វេធិកប្បញ្ញតាយ សំវត្តតីតិ។

[២៣៥] អមតន្តេ ភិក្ខវេ ន បរិភុញ្ជន្តិ យេ កាយគតាសតឹ ន បរិភុញ្ជន្តិ។ អមតន្តេ ភិក្ខវេ បរិភុញ្ជន្តិ យេ កាយគតាសតឹ បរិភុញ្ជន្តីតិ។

[២៣៦] អមតន្តេសំ ភិក្ខវេ អបរិភុត្តំ យេសំ កាយគតាសតិ អបរិភុត្តា។ អមតន្តេសំ ភិក្ខវេ បរិភុត្តំ យេសំ កាយគតាសតិ បរិភុត្តាតិ។

[២៣៧] អមតន្តេសំ ភិក្ខវេ បរិហីនំ យេសំ កាយគតាសតិ បរិហីនា។ អមតន្តេសំ ភិក្ខវេ អបរិហីនំ យេសំ កាយគតាសតិ អបរិហីនាតិ។

[២៣៨] អមតន្តេសំ ភិក្ខវេ វិរទ្ធំ យេសំ កាយគតាសតិ វិរទ្ធា។ អមតន្តេសំ ភិក្ខវេ អារទ្ធំ យេសំ កាយគតាសតិ អារទ្ធាតិ។

[២៣៩] អមតន្តេ ភិក្ខវេ បមាទឹសុ[ម. បមាទំសុ។] យេ កាយគតាសតឹ បមាទឹសុ។ អមតន្តេ ភិក្ខវេ ន បមាទឹសុ យេ កាយគតាសតឹ ន បមាទឹសូតិ។

[២៤០] អមតន្តេសំ ភិក្ខវេ បមុដ្ឋំ យេសំ កាយគតាសតិ បមុដ្ឋា។ អមតន្តេសំ ភិក្ខវេ អប្បមុដ្ឋំ យេសំ កាយគតាសតិ អប្បមុដ្ឋាតិ។

[២៤១] អមតន្តេសំ ភិក្ខវេ អនាសេវិតំ យេសំ កាយគតាសតិ អនាសេវិតា។ អមតន្តេសំ ភិក្ខវេ អាសេវិតំ យេសំ កាយគតាសតិ អាសេវិតាតិ។

[២៤២] អមតន្តេសំ ភិក្ខវេ អភាវិតំ យេសំ កាយគតាសតិ អភាវិតា។ អមតន្តេសំ ភិក្ខវេ ភាវិតំ យេសំ កាយគតាសតិ ភាវិតាតិ។

[២៤៣] អមតន្តេសំ ភិក្ខវេ អពហុលីកតំ យេសំ កាយគតាសតិ អពហុលីកតា។ អមតន្តេសំ ភិក្ខវេ ពហុលីកតំ យេសំ កាយគតាសតិ ពហុលីកតាតិ។

[២៤៤] អមតន្តេសំ ភិក្ខវេ អនភិញ្ញាតំ យេសំ កាយគតាសតិ អនភិញ្ញាតា។ អមតន្តេសំ ភិក្ខវេ អភិញ្ញាតំ យេសំ កាយគតាសតិ អភិញ្ញាតាតិ។

[២៤៥] អមតន្តេសំ ភិក្ខវេ អបរិញ្ញាតំ យេសំ កាយគតាសតិ អបរិញ្ញាតា។ អមតន្តេសំ ភិក្ខវេ បរិញ្ញាតំ យេសំ កាយគតាសតិ បរិញ្ញាតាតិ។

[២៤៦] អមតន្តេសំ ភិក្ខវេ អសច្ឆិកតំ យេសំ កាយគតាសតិ អសច្ឆិកតា។ អមតន្តេសំ ភិក្ខវេ សច្ឆិកតំ យេសំ កាយគតាសតិ សច្ឆិកតាតិ [ម. ឥតោ បរំ ឥទមវោច ភគវា អត្តមនា តេ ភិក្ខូ ភគវតោ ភាសិតំ អភិនន្ទុន្តីតិ ទិស្សន្តិ។]។

ឯកនិបាតស្ស សុត្តសហស្សំ សមត្តំ។

សុត្តន្តបិដកេ អង្គុត្តរនិកាយស្ស ទុកនិបាតោ

នមោ តស្ស ភគវតោ អរហតោ សម្មាសម្ពុទ្ធស្ស។

បឋមបណ្ណាសកោ

[២៤៧] ឯវម្មេ សុតំ។ ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តត្រ ខោ ភគវា ភិក្ខូ អាមន្តេសិ ភិក្ខវោតិ។ ភទន្តេតិ តេ ភិក្ខូ ភគវតោ បច្ចស្សោសុំ។ ភគវា ឯតទវោច ទ្វេមានិ ភិក្ខវេ វជ្ជានិ។ កតមានិ ទ្វេ។ ទិដ្ឋធម្មិកញ្ច វជ្ជំ សម្បរាយិកញ្ច វជ្ជំ។ កតមញ្ច ភិក្ខវេ ទិដ្ឋធម្មិកំ វជ្ជំ។ ឥធ ភិក្ខវេ ឯកច្ចោ បស្សតិ ចោរំ អាគុចារឹ រាជានោ គហេត្វា វិវិធា កម្មករណា ការោន្តេ កសាហិបិ តាឡេន្តេ វេត្តេហិបិ តាឡេន្តេ អឌ្ឍទណ្ឌកេហិបិ តាឡេន្តេ ហត្ថំបិ ឆិន្ទន្តេ បាទំបិ ឆិន្ទន្តេ ហត្ថបាទំបិ ឆិន្ទន្តេ កណ្ណំបិ ឆិន្ទន្តេ នាសំបិ ឆិន្ទន្តេ កណ្ណនាសំបិ ឆិន្ទន្តេ ពិលង្គថាលិកំបិ ករោន្តេ សង្ខមុណ្ឌិកំបិ ករោន្តេ រាហុមុខំបិ ករោន្តេ ជោតិមាលិកំបិ ករោន្តេ ហត្ថប្បជ្ជោតិកំបិ ករោន្តេ ឯរកវដ្តិកំបិ ករោន្តេ ចីរកវាសិកំបិ ករោន្តេ ឯណេយ្យកំបិ ករោន្តេ ពឡិសមំសិកំបិ ករោន្តេ កហាបណកំបិ ករោន្តេ ខារាបដិច្ឆកំបិ ករោន្តេ បលិឃបរិវត្តកំបិ ករោន្តេ បលាលបីឋកំបិ ករោន្តេ តត្តេនបិ តេលេន ឱសិញ្ចន្តេ សុនខេហិបិ ខាទាបេន្តេ ជីវន្តំបិ សូលេ ឧត្តាសេន្តេ អសិនាបិ សីសំ ឆិន្ទន្តេ។ តស្ស ឯវំ ហោតិ។ យថារូបានំ ខោ បាបកានំ កម្មានំ ហេតុ ចោរំ អាគុចារឹ រាជានោ គហេត្វា វិវិធា កម្មករណា ការោន្តិ កសាហិបិ តាឡេន្តិ។បេ។ អសិនាបិ សីសំ ឆិន្ទន្តិ។ អហញ្ចេវ ខោ បន ឯវរូបំ បាបកម្មំ ករេយ្យំ មំបិ រាជានោ គហេត្វា ឯវរូបា វិវិធា កម្មករណា ការេយ្យុំ កសាហិបិ តាឡេយ្យុំ។បេ។ អសិនាបិ សីសំ ឆិន្ទេយ្យុន្តិ។ សោ ទិដ្ឋធម្មិកស្ស វជ្ជស្ស ភីតោ ន បរេសំ បាភតំ បលុម្បន្តោ[ម. វិលុបេន្តោ។] ចរតិ។ ឥទំ វុច្ចតិ ភិក្ខវេ ទិដ្ឋធម្មិកំ វជ្ជំ។ កតមញ្ច ភិក្ខវេ សម្បរាយិកំ វជ្ជំ។ ឥធ ភិក្ខវេ ឯកច្ចោ ឥតិ បដិសញ្ចិក្ខតិ កាយទុច្ចរិតស្ស ខោ បាបកោ [ម. ឯត្ថន្តរេ ទុក្ខោតិ បទំ អត្ថិ។] វិបាកោ អភិសម្បរាយំ វចីទុច្ចរិតស្ស ខោ បាបកោ វិបាកោ អភិសម្បរាយំ មនោទុច្ចរិតស្ស ខោ បាបកោ វិបាកោ អភិសម្បរាយំ អហញ្ចេវ ខោ បន កាយេន ទុច្ចរិតំ ចរេយ្យំ វាចាយ ទុច្ចរិតំ ចរេយ្យំ មនសា ទុច្ចរិតំ ចរេយ្យំ កិញ្ច តំ យេនា ហំ [ម. យាហំ។] កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជេយ្យន្តិ។ សោ សម្បរាយិកស្ស វជ្ជស្ស ភីតោ កាយទុច្ចរិតំ បហាយ កាយសុចរិតំ ភាវេតិ វចីទុច្ចរិតំ បហាយ វចីសុចរិតំ ភាវេតិ មនោទុច្ចរិតំ បហាយ មនោសុចរិតំ ភាវេតិ សុទ្ធំ អត្តានំ បរិហរតិ។ ឥទំ វុច្ចតិ ភិក្ខវេ សម្បរាយិកំ វជ្ជំ។ ឥមានិ ខោ ភិក្ខវេ ទ្វេ វជ្ជានិ។ តស្មាតិហ ភិក្ខវេ ឯវំ សិក្ខិតព្វំ ទិដ្ឋធម្មិកស្ស វជ្ជស្ស ភាយិស្សាម សម្បរាយិកស្ស វជ្ជស្ស ភាយិស្សាម វជ្ជភីរុនោ ភវិស្សាម វជ្ជភយទស្សាវិនោតិ ឯវំ ហិ វោ ភិក្ខវេ សិក្ខិតព្វំ។ វជ្ជភីរុនោ ភិក្ខវេ វជ្ជភយទស្សាវិនោ ឯតំ បាដិកង្ខំ យំ បរិមុញ្ចិស្សតិ សព្វវជ្ជេហីតិ។

[២៤៨] ទ្វេមានិ ភិក្ខវេ បធានានិ ទុរភិសម្ភវានិ លោកស្មឹ។ កតមានិ ទ្វេ។ យញ្ច គិហីនំ អគារំ អជ្ឈាវសតិ ចីវរបិណ្ឌបាតសេនាសនគិលានប្បច្ចយភេសជ្ជបរិក្ខារានុប្បាទនត្ថំ បធានំ យញ្ច អគារស្មា អនគារិយំ បព្វជិតានំ សព្វុបធិប្បដិនិស្សគ្គត្ថំ បធានំ។ ឥមានិ ខោ ភិក្ខវេ ទ្វេ បធានានិ ទុរភិសម្ភវានិ លោកស្មឹ។ ឯតទគ្គំ ភិក្ខវេ ឥមេសំ ទ្វិន្នំ បធានានំ យទិទំ សព្វុបធិប្បដិនិស្សគ្គត្ថំ បធានំ។ តស្មាតិហ ភិក្ខវេ ឯវំ សិក្ខិតព្វំ សព្វុបធិប្បដិនិស្សគ្គត្ថំ បធានំ បទហិស្សាមាតិ ឯវំ ហិ វោ ភិក្ខវេ សិក្ខិតព្វន្តិ។

[២៤៩] ទ្វេមេ ភិក្ខវេ ធម្មា តបនីយា។ កតមេ ទ្វេ។ ឥធ ភិក្ខវេ ឯកច្ចស្ស កាយទុច្ចរិតំ កតំ ហោតិ អកតំ ហោតិ កាយសុចរិតំ វចីទុច្ចរិតំ កតំ ហោតិ អកតំ ហោតិ វចីសុចរិតំ មនោទុច្ចរិតំ កតំ ហោតិ អកតំ ហោតិ មនោសុចរិតំ សោ កាយទុច្ចរិតំ មេ កតន្តិ តប្បតិ អកតំ មេ កាយសុចរិតន្តិ តប្បតិ វចីទុច្ចរិតំ មេ កតន្តិ តប្បតិ អកតំ មេ វចីសុចរិតន្តិ តប្បតិ មនោទុច្ចរិតំ មេ កតន្តិ តប្បតិ អកតំ មេ មនោសុចរិតន្តិ តប្បតិ។ ឥមេ ខោ ភិក្ខវេ ទ្វេ ធម្មា តបនីយាតិ។

[២៥០] ទ្វេមេ ភិក្ខវេ ធម្មា អតបនីយា។ កតមេ ទ្វេ។ ឥធ ភិក្ខវេ ឯកច្ចស្ស កាយសុចរិតំ កតំ ហោតិ អកតំ ហោតិ កាយទុច្ចរិតំ វចីសុចរិតំ កតំ ហោតិ អកតំ ហោតិ វចីទុច្ចរិតំ មនោសុចរិតំ កតំ ហោតិ អកតំ ហោតិ មនោទុច្ចរិតំ សោ កាយសុចរិតំ មេ កតន្តិ ន តប្បតិ អកតំ មេ កាយទុច្ចរិតន្តិ ន តប្បតិ វចីសុចរិតំ មេ កតន្តិ ន តប្បតិ អកតំ មេ វចីទុច្ចរិតន្តិ ន តប្បតិ មនោសុចរិតំ មេ កតន្តិ ន តប្បតិ អកតំ មេ មនោទុច្ចរិតន្តិ ន តប្បតិ។ ឥមេ ខោ ភិក្ខវេ ទ្វេ ធម្មា អតបនីយាតិ។

[២៥១] ទ្វិន្នាហំ ភិក្ខវេ ធម្មានំ ឧបញ្ញាសឹ យា ច អសន្តុដ្ឋិតា កុសលេសុ ធម្មេសុ យា ច អប្បដិវាណិតា បធានស្មឹ។ អប្បដិវាណំ សុទាហំ ភិក្ខវេ បទហាមិ កាមំ តចោ នហារុ ច អដ្ឋិ ច អវសិស្សតុ សរីរេ ឧបសុស្សតុ មំសលោហិតំ យន្តំ បុរិសត្ថាមេន បុរិសវីរិយេន បុរិសបរក្កមេន បត្តព្វំ ន តំ អបាបុណិត្វា វីរិយស្ស សណ្ឋានំ ភវិស្សតីតិ តស្ស មយ្ហំ ភិក្ខវេ អប្បមាទាធិគតា ពោធិ[ម. សម្ពោធិ។] អប្បមាទាធិគតោ អនុត្តរោ យោគក្ខេមោ។ តុម្ហេ ចេបិ ភិក្ខវេ អប្បដិវាណំ បទហេយ្យាថ កាមំ តចោ នហារុ ច អដ្ឋិ ច អវសិស្សតុ សរីរេ ឧបសុស្សតុ មំសលោហិតំ យន្តំ បុរិសត្ថាមេន បុរិសវីរិយេន បុរិសបរក្កមេន បត្តព្វំ ន តំ អបាបុណិត្វា វីរិយស្ស សណ្ឋានំ ភវិស្សតីតិ តុម្ហេបិ ភិក្ខវេ នចិរស្សេវ យស្សត្ថាយ កុលបុត្តា សម្មទេវ អគារស្មា អនគារិយំ បព្វជន្តិ តទនុត្តរំ ព្រហ្មចរិយបរិយោសានំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរិស្សថ។ តស្មាតិហ ភិក្ខវេ ឯវំ សិក្ខិតព្វំ អប្បដិវាណំ បទហិស្សាម កាមំ តចោ នហារុ ច អដ្ឋិ អវសិស្សតុ សរីរេ ឧបសុស្សតុ មំសលោហិតំ យន្តំ បុរិសត្ថាមេន បុរិសវីរិយេន បុរិសបរក្កមេន បត្តព្វំ ន តំ អបាបុណិត្វា វីរិយស្ស សណ្ឋានំ ភវិស្សតីតិ ឯវំ ហិ វោ ភិក្ខវេ សិក្ខិតព្វន្តិ។

[២៥២] ទ្វេមេ ភិក្ខវេ ធម្មា។ កតមេ ទ្វេ។ យា ច សញ្ញោជនិយេសុ ធម្មេសុ អស្សាទានុបស្សិតា យា ច សញ្ញោជនិយេសុ ធម្មេសុ និព្វិទានុបស្សិតា។ សញ្ញោជនិយេសុ ភិក្ខវេ ធម្មេសុ អស្សាទានុបស្សី វិហរន្តោ រាគំ នប្បជហតិ ទោសំ នប្បជហតិ មោហំ នប្បជហតិ រាគំ អប្បហាយ ទោសំ អប្បហាយ មោហំ អប្បហាយ ន បរិមុច្ចតិ ជាតិយា ជរាមរណេន សោកេហិ បរិទេវេហិ ទុក្ខេហិ ទោមនស្សេហិ ឧបាយាសេហិ ន បរិមុច្ចតិ ទុក្ខស្មាតិ វទាមិ។ សញ្ញោជនិយេសុ ភិក្ខវេ ធម្មេសុ និព្វិទានុបស្សី វិហរន្តោ រាគំ បជហតិ ទោសំ បជហតិ មោហំ បជហតិ រាគំ បហាយ ទោសំ បហាយ មោហំ បហាយ បរិមុច្ចតិ ជាតិយា ជរាមរណេន សោកេហិ បរិទេវេហិ ទុក្ខេហិ ទោមនស្សេហិ ឧបាយាសេហិ បរិមុច្ចតិ ទុក្ខស្មាតិ វទាមិ។ ឥមេ ខោ ភិក្ខវេ ទ្វេ ធម្មាតិ។

[២៥៣] ទ្វេមេ ភិក្ខវេ ធម្មា កណ្ហា។ កតមេ ទ្វេ។ អហិរិកញ្ច អនោត្តប្បញ្ច។ ឥមេ ខោ ភិក្ខវេ ទ្វេ ធម្មា កណ្ហាតិ។

[២៥៤] ទ្វេមេ ភិក្ខវេ ធម្មា សុក្កា។ កតមេ ទ្វេ។ ហិរិ ច ឱត្តប្បញ្ច។ ឥមេ ខោ ភិក្ខវេ ទ្វេ ធម្មា សុក្កាតិ។

[២៥៥] ទ្វេមេ ភិក្ខវេ សុក្កា ធម្មា លោកំ បាលេន្តិ។ កតមេ ទ្វេ។ ហិរិ ច ឱត្តប្បញ្ច។ ឥមេ ខោ ភិក្ខវេ ទ្វេ សុក្កា ធម្មា លោកំ ន បាលេយ្យុំ នយិធ បញ្ញាយេថ មាតាតិ វា មាតុច្ឆាតិ វា មាតុលានីតិ វា អាចរិយភរិយាតិ វា គរូនំ ទារាតិ វា សម្ភេទំ លោកោ អគមិស្ស យថា អជេឡកា កុក្កុដសូករា សោណសិគាលា។ យស្មា ច ខោ ភិក្ខវេ ឥមេ ទ្វេ សុក្កា ធម្មា លោកំ បាលេន្តិ តស្មា បញ្ញាយតិ មាតាតិ វា មាតុច្ឆាតិ វា មាតុលានីតិ វា អាចរិយភរិយាតិ វា គរូនំ ទារាតិ វាតិ។

[២៥៦] ទ្វេមា ភិក្ខវេ វស្សូបនាយិកា។ កតមា ទ្វេ។ បុរិមិកា ច បច្ឆិមិកា ច។ ឥមា ខោ ភិក្ខវេ ទ្វេ វស្សូបនាយិកាតិ។

កម្មករណវគ្គោ បឋមោ។

[២៥៧] ទ្វេមានិ ភិក្ខវេ ពលានិ។ កតមានិ ទ្វេ។ បដិសង្ខានពលញ្ច ភាវនាពលញ្ច។ កតមញ្ច ភិក្ខវេ បដិសង្ខានពលំ។ ឥធ ភិក្ខវេ ឯកច្ចោ ឥតិ បដិសញ្ចិក្ខតិ កាយទុច្ចរិតស្ស ខោ បាបកោ វិបាកោ ទិដ្ឋេ ចេវ ធម្មេ អភិសម្បរាយញ្ច វចីទុច្ចរិតស្ស បាបកោ វិបាកោ ទិដ្ឋេ ចេវ ធម្មេ អភិសម្បរាយញ្ច មនោទុច្ចរិតស្ស បាបកោ វិបាកោ ទិដ្ឋេ ចេវ ធម្មេ អភិសម្បរាយញ្ចាតិ សោ ឥតិ បដិសង្ខាយ កាយទុច្ចរិតំ បហាយ កាយសុចរិតំ ភាវេតិ វចីទុច្ចរិតំ បហាយ វចីសុចរិតំ ភាវេតិ មនោទុច្ចរិតំ បហាយ មនោសុចរិតំ ភាវេតិ សុទ្ធំ អត្តានំ បរិហរតិ ឥទំ វុច្ចតិ ភិក្ខវេ បដិសង្ខានពលំ។ កតមញ្ច ភិក្ខវេ ភាវនាពលំ។ តត្រ ភិក្ខវេ យទិទំ ភាវនាពលំ សេក្ខមេតំ ពលំ។ សេក្ខំ ហិ សោ ភិក្ខវេ [ឱ.ឯត្ថន្តរេ តន្តិ បាឋោ ហោតិ។] ពលំ អាគម្ម រាគំ បជហតិ ទោសំ បជហតិ មោហំ បជហតិ រាគំ បហាយ ទោសំ បហាយ មោហំ បហាយ យំ អកុសលំ ន តំ ករោតិ យំ បាបំ ន តំ សេវតិ ឥទំ វុច្ចតិ ភិក្ខវេ ភាវនាពលំ។ ឥមានិ ខោ ភិក្ខវេ ទ្វេ ពលានីតិ។

[២៥៨] ទ្វេមានិ ភិក្ខវេ ពលានិ។ កតមានិ ទ្វេ។ បដិសង្ខានពលញ្ច ភាវនាពលញ្ច។ កតមញ្ច ភិក្ខវេ បដិសង្ខានពលំ។ ឥធ ភិក្ខវេ ឯកច្ចោ ឥតិ បដិសញ្ចិក្ខតិ កាយទុច្ចរិតស្ស ខោ បាបកោ វិបាកោ ទិដ្ឋេ ចេវ ធម្មេ អភិសម្បរាយញ្ច វចីទុច្ចរិតស្ស បាបកោ វិបាកោ ទិដ្ឋេ ចេវ ធម្មេ អភិសម្បរាយញ្ច មនោទុច្ចរិតស្ស បាបកោ វិបាកោ ទិដ្ឋេ ចេវ ធម្មេ អភិសម្បរាយញ្ចាតិ សោ ឥតិ បដិសង្ខាយ កាយទុច្ចរិតំ បហាយ កាយសុចរិតំ ភាវេតិ វចីទុច្ចរិតំ បហាយ វចីសុចរិតំ ភាវេតិ មនោទុច្ចរិតំ បហាយ មនោសុចរិតំ ភាវេតិ សុទ្ធំ អត្តានំ បរិហរតិ ឥទំ វុច្ចតិ ភិក្ខវេ បដិសង្ខានពលំ។ កតមញ្ច ភិក្ខវេ ភាវនាពលំ។ ឥធ ភិក្ខវេ ភិក្ខុ សតិសម្ពោជ្ឈង្គំ ភាវេតិ វិវេកនិស្សិតំ វិរាគនិស្សិតំ និរោធនិស្សិតំ វោស្សគ្គបរិណាមឹ ធម្មវិចយសម្ពោជ្ឈង្គំ ភាវេតិ… វីរិយសម្ពោជ្ឈង្គំ ភាវេតិ… បីតិសម្ពោជ្ឈង្គំ ភាវេតិ… បស្សទ្ធិសម្ពោជ្ឈង្គំ ភាវេតិ… សមាធិសម្ពោជ្ឈង្គំ ភាវេតិ… ឧបេក្ខាសម្ពោជ្ឈង្គំ ភាវេតិ វិវេកនិស្សិតំ វិរាគនិស្សិតំ និរោធនិស្សិតំ វោស្សគ្គបរិណាមឹ ឥទំ វុច្ចតិ ភិក្ខវេ ភាវនាពលំ។ ឥមានិ ខោ ភិក្ខវេ ទ្វេ ពលានីតិ។

[២៥៩] ទ្វេមានិ ភិក្ខវេ ពលានិ។ កតមានិ ទ្វេ។ បដិសង្ខានពលញ្ច ភាវនាពលញ្ច។ កតមញ្ច ភិក្ខវេ បដិសង្ខានពលំ។ ឥធ ភិក្ខវេ ឯកច្ចោ ឥតិ បដិសញ្ចិក្ខតិ កាយទុច្ចរិតស្ស ខោ បាបកោ វិបាកោ ទិដ្ឋេ ចេវ ធម្មេ អភិសម្បរាយញ្ច វចីទុច្ចរិតស្ស បាបកោ វិបាកោ ទិដ្ឋេ ចេវ ធម្មេ អភិសម្បរាយញ្ច មនោទុច្ចរិតស្ស បាបកោ វិបាកោ ទិដ្ឋេ ចេវ ធម្មេ អភិសម្បរាយញ្ចាតិ សោ ឥតិ បដិសង្ខាយ កាយទុច្ចរិតំ បហាយ កាយសុចរិតំ ភាវេតិ វចីទុច្ចរិតំ បហាយ វចីសុចរិតំ ភាវេតិ មនោទុច្ចរិតំ បហាយ មនោសុចរិតំ ភាវេតិ សុទ្ធំ អត្តានំ បរិហរតិ ឥទំ វុច្ចតិ ភិក្ខវេ បដិសង្ខានពលំ។ កតមញ្ច ភិក្ខវេ ភាវនាពលំ។ ឥធ ភិក្ខវេ ភិក្ខុ វិវិច្ចេវ កាមេហិ វិវិច្ច អកុសលេហិ ធម្មេហិ សវិតក្កំ សវិចារំ វិវេកជំ បីតិសុខំ បឋមំ ឈានំ ឧបសម្បជ្ជ វិហរតិ វិតក្កវិចារានំ វូបសមា អជ្ឈត្តំ សម្បសាទនំ ចេតសោ ឯកោទិភាវំ អវិតក្កំ អវិចារំ សមាធិជំ បីតិសុខំ ទុតិយំ ឈានំ ឧបសម្បជ្ជ វិហរតិ បីតិយា ច វិរាគា ឧបេក្ខកោ ច វិហរតិ សតោ ច សម្បជានោ សុខញ្ច កាយេន បដិសំវេទេតិ យន្តំ អរិយា អាចិក្ខន្តិ ឧបេក្ខកោ សតិមា សុខវិហារីតិ តតិយំ ឈានំ ឧបសម្បជ្ជ វិហរតិ សុខស្ស ច បហានា ទុក្ខស្ស ច បហានា បុព្វេវ សោមនស្សទោមនស្សានំ អត្ថង្គមា អទុក្ខមសុខំ ឧបេក្ខាសតិបារិសុទ្ធឹ ចតុត្ថំ ឈានំ ឧបសម្បជ្ជ វិហរតិ ឥទំ វុច្ចតិ ភិក្ខវេ ភាវនាពលំ។ ឥមានិ ខោ ភិក្ខវេ ទ្វេ ពលានីតិ។

[២៦០] ទ្វេមា ភិក្ខវេ តថាគតស្ស ធម្មទេសនា។ កតមា ទ្វេ។ សង្ខិត្តេន ច វិត្ថារេន ច។ ឥមា ខោ ភិក្ខវេ ទ្វេ តថាគតស្ស ធម្មទេសនាតិ។

[២៦១] យស្មឹ ភិក្ខវេ អធិករណេ អាបន្នោ [ម. អាបត្តាបន្នោ។] ច ភិក្ខុ ចោទកោ ច ភិក្ខុ ន សាធុកំ អត្តនា វ អត្តានំ បច្ចវេក្ខន្តិ តស្មេតំ ភិក្ខវេ អធិករណេ បាដិកង្ខំ ទីឃត្តាយ ខរត្តាយ វាឡត្តាយ សំវត្តិស្សតិ ភិក្ខូ ច ន ផាសុំ វិហរិស្សន្តិ។ យស្មិញ្ច ខោ ភិក្ខវេ អធិករណេ អាបន្នោ [ម. អាបត្តាបន្នោ។] ច ភិក្ខុ ចោទកោ ច ភិក្ខុ សាធុកំ អត្តនា វ អត្តានំ បច្ចវេក្ខន្តិ តស្មេតំ ភិក្ខវេ អធិករណេ បាដិកង្ខំ ន ទីឃត្តាយ ន ខរត្តាយ ន វាឡត្តាយ សំវត្តិស្សតិ ភិក្ខូ ច ផាសុំ វិហរិស្សន្តិ។ កថញ្ច ភិក្ខវេ អាបន្នោ [ម. អាបត្តាបន្នោ។] ភិក្ខុ សាធុកំ អត្តនា វ អត្តានំ បច្ចវេក្ខតិ។ ឥធ ភិក្ខវេ អាបន្នោ [ម. អាបត្តាបន្នោ។] ភិក្ខុ ឥតិ បដិសញ្ចិក្ខតិ អហំ ខោ អកុសលំ អាបន្នោ កញ្ចិទេវ ទេសំ កាយេន តស្មា មំ សោ [ឱ. តំ មំ សោ។] ភិក្ខុ អទ្ទស អកុសលំ អាបជ្ជមានំ កញ្ចិទេវ ទេសំ កាយេន នោ ចេ អហំ អកុសលំ អាបជ្ជេយ្យំ កញ្ចិទេវ ទេសំ កាយេន ន មំ សោ ភិក្ខុ បស្សេយ្យ អកុសលំ អាបជ្ជមានំ កញ្ចិទេវ ទេសំ កាយេន យស្មា ច ខោ អហំ អកុសលំ អាបន្នោ កញ្ចិទេវ ទេសំ កាយេន តស្មា មំ សោ ភិក្ខុ អទ្ទស អកុសលំ អាបជ្ជមានំ កញ្ចិទេវ ទេសំ កាយេន ទិស្វា ច បន មំ សោ ភិក្ខុ អកុសលំ អាបជ្ជមានំ កញ្ចិទេវ ទេសំ កាយេន អនត្តមនោ អហោសិ អនត្តមនោ សមានោ អនត្តមនវចនំ មំ សោ ភិក្ខុ អវច អនត្តមនវចនាហំ តេន ភិក្ខុនា វុត្តោ សមានោ អនត្តមនោ អហោសឹ អនត្តមនោ សមានោ បរេសំ អារោចេសឹ ឥតិ មមេវ តត្ថ អច្ចយោ អច្ចគមា សុំកទាយិកំវ ភណ្ឌស្មិន្តិ ឯវំ ខោ ភិក្ខវេ អាបន្នោ ភិក្ខុ សាធុកំ អត្តនា វ អត្តានំ បច្ចវេក្ខតិ។ កថញ្ច ភិក្ខវេ ចោទកោ ភិក្ខុ សាធុកំ អត្តនា វ អត្តានំ បច្ចវេក្ខតិ។ ឥធ ភិក្ខវេ ចោទកោ ភិក្ខុ ឥតិ បដិសញ្ចិក្ខតិ អយំ ខោ ភិក្ខុ អកុសលំ អាបន្នោ កញ្ចិទេវ ទេសំ កាយេន តស្មា [ឱ. កាហំ។] អហំ ឥមំ ភិក្ខុំ អទ្ទសំ អកុសលំ អាបជ្ជមានំ កញ្ចិទេវ ទេសំ កាយេន នោ ចេ អយំ ភិក្ខុ អកុសលំ អាបជ្ជេយ្យ កញ្ចិទេវ ទេសំ កាយេន នាហំ ឥមំ ភិក្ខុំ បស្សេយ្យំ អកុសលំ អាបជ្ជមានំ កញ្ចិទេវ ទេសំ កាយេន យស្មា ច ខោ អយំ ភិក្ខុ អកុសលំ អាបន្នោ កញ្ចិទេវ ទេសំ កាយេន តស្មា អហំ ឥមំ ភិក្ខុំ អទ្ទសំ អកុសលំ អាបជ្ជមានំ កញ្ចិទេវ ទេសំ កាយេន ទិស្វា ច បនាហំ ឥមំ ភិក្ខុំ អកុសលំ អាបជ្ជមានំ កញ្ចិទេវ ទេសំ កាយេន អនត្តមនោ អហោសឹ អនត្តមនោ សមានោ អនត្តមនវចនាហំ ឥមំ ភិក្ខុំ អវចំ អនត្តមនវចនាយំ ភិក្ខុ មយា វុត្តោ សមានោ អនត្តមនោ អហោសិ អនត្តមនោ សមានោ បរេសំ អារោចេសិ ឥតិ មមេវ តត្ថ អច្ចយោ អច្ចគមា សុំកទាយិកំវ ភណ្ឌស្មិន្តិ ឯវំ ខោ ភិក្ខវេ ចោទកោ ភិក្ខុ សាធុកំ អត្តនា វ អត្តានំ បច្ចវេក្ខតិ។ យស្មឹ ភិក្ខវេ អធិករណេ អាបន្នោ ច ភិក្ខុ ចោទកោ ច ភិក្ខុ ន សាធុកំ អត្តនា វ អត្តានំ បច្ចវេក្ខន្តិ តស្មេតំ ភិក្ខវេ អធិករណេ បាដិកង្ខំ ទីឃត្តាយ ខរត្តាយ វាឡត្តាយ សំវត្តិស្សតិ ភិក្ខូ ច ន ផាសុំ វិហរិស្សន្តិ។ យស្មឹ ច ខោ ភិក្ខវេ អធិករណេ អាបន្នោ ច ភិក្ខុ ចោទកោ ច ភិក្ខុ សាធុកំ អត្តនា វ អត្តានំ បច្ចវេក្ខន្តិ តស្មេតំ ភិក្ខវេ អធិករណេ បាដិកង្ខំ ន ទីឃត្តាយ ខរត្តាយ វាឡត្តាយ សំវត្តិស្សតិ ភិក្ខូ ច ផាសុំ វិហរិស្សន្តីតិ។

[២៦២] អថ ខោ អញ្ញតរោ ព្រាហ្មណោ យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ សោ ព្រាហ្មណោ ភគវន្តំ ឯតទវោច កោ នុ ខោ ភោ គោតម ហេតុ កោ បច្ចយោ យេនមិធេកច្ចេ សត្តា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជន្តីតិ។ អធម្មចរិយាវិសមចរិយាហេតុ ខោ ព្រាហ្មណ ឯវមិធេកច្ចេ សត្តា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជន្តីតិ។ កោ បន ភោ គោតម ហេតុ កោ បច្ចយោ យេនមិធេកច្ចេ សត្តា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជន្តីតិ។ ធម្មចរិយាសមចរិយាហេតុ ខោ ព្រាហ្មណ ឯវមិធេកច្ចេ សត្តា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជន្តីតិ។ អភិក្កន្តំ ភោ គោតម អភិក្កន្តំ ភោ គោតម សេយ្យថាបិ ភោ គោតម និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ ភោតា គោតមេន អនេកបរិយាយេន ធម្មោ បកាសិតោ ឯសាហំ ភវន្តំ គោតមំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភវំ គោតមោ ធារេតុ អជ្ជតគ្គេ បាណុបេតំ សរណំ គតន្តិ។

[២៦៣] អថ ខោ ជាណុស្សោណី ព្រាហ្មណោ យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ ជានុស្សោណី ព្រាហ្មណោ ភគវន្តំ ឯតទវោច កោ នុ ខោ ភោ គោតម ហេតុ កោ បច្ចយោ យេនមិធេកច្ចេ សត្តា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជន្តីតិ។ កតត្តា ច ព្រាហ្មណ អកតត្តា ច ឯវមិធេកច្ចេ សត្តា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជន្តីតិ។ កោ បន ភោ គោតម ហេតុ កោ បច្ចយោ យេនមិធេកច្ចេ សត្តា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជន្តីតិ។ កតត្តា ច ព្រាហ្មណ អកតត្តា ច ឯវមិធេកច្ចេ សត្តា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជន្តីតិ។ ន ខោ អហំ ឥមស្ស ភោតោ គោតមស្ស សង្ខិត្តេន ភាសិតស្ស វិត្ថារេន [ឱ. ឯត្ថន្តរេ វិត្ថារេន អត្ថំ អវិភត្តស្សាតិ ទិស្សតិ។] អត្ថំ អាជានាមិ [ឱ. ឯត្ថន្តរេ វិត្ថារេន អត្ថំ អវិភត្តស្សាតិ ទិស្សតិ។] សាធុ មេ ភវំ គោតមោ តថា ធម្មំ ទេសេតុ យថា អហំ ឥមស្ស ភោតោ គោតមស្ស សង្ខិត្តេន ភាសិតស្ស វិត្ថារេន អត្ថំ អាជានេយ្យន្តិ។ តេនហិ ព្រាហ្មណ សុណាហិ សាធុកំ មនសិករោហិ ភាសិស្សាមីតិ។ ឯវំ ភោតិ ខោ ជានុស្សោណី ព្រាហ្មណោ ភគវតោ បច្ចស្សោសិ។ ភគវា ឯតទវោច ឥធ ព្រាហ្មណ ឯកច្ចស្ស កាយទុច្ចរិតំ កតំ ហោតិ អកតំ ហោតិ កាយសុចរិតំ វចីទុច្ចរិតំ កតំ ហោតិ អកតំ ហោតិ វចីសុចរិតំ មនោទុច្ចរិតំ កតំ ហោតិ អកតំ ហោតិ មនោសុចរិតំ ឯវំ ខោ ព្រាហ្មណ កតត្តា ច អកតត្តា ច ឯវមិធេកច្ចេ សត្តា កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជន្តិ ឥធ បន ព្រាហ្មណ ឯកច្ចស្ស កាយសុចរិតំ កតំ ហោតិ អកតំ ហោតិ កាយទុច្ចរិតំ វចីសុចរិតំ កតំ ហោតិ អកតំ ហោតិ វចីទុច្ចរិតំ មនោសុចរិតំ កតំ ហោតិ អកតំ ហោតិ មនោទុច្ចរិតំ ឯវំ ខោ ព្រាហ្មណ កតត្តា ច អកតត្តា ច ឯវមិធេកច្ចេ សត្តា កាយស្ស ភេទា បរម្មរណា សុគតឹ សគ្គំ លោកំ ឧបបជ្ជន្តីតិ។ អភិក្កន្តំ ភោ គោតម។បេ។ ឧបាសកំ មំ ភវំ គោតមោ ធារេតុ អជ្ជតគ្គេ បាណុបេតំ សរណំ គតន្តិ។

[២៦៤] អថ ខោ អាយស្មា អានន្ទោ យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នំ ខោ អាយស្មន្តំ អានន្ទំ ភគវា ឯតទវោច ឯកំសេនាហំ អានន្ទ អករណីយំ វទាមិ កាយទុច្ចរិតំ វចីទុច្ចរិតំ មនោទុច្ចរិតន្តិ។ យមិទំ ភន្តេ ភគវតា ឯកំសេន អករណីយំ អក្ខាតំ កាយទុច្ចរិតំ វចីទុច្ចរិតំ មនោទុច្ចរិតំ តស្មឹ អករណីយេ កយិរមានេ កោ អាទីនវោ បាដិកង្ខោតិ។ យមិទំ អានន្ទ មយា ឯកំសេន អករណីយំ អក្ខាតំ កាយទុច្ចរិតំ វចីទុច្ចរិតំ មនោទុច្ចរិតំ តស្មឹ អករណីយេ កយិរមានេ អយំ អាទីនវោ បាដិកង្ខោ អត្តាបិ អត្តានំ ឧបវទតិ អនុវិច្ច វិញ្ញូ គរហន្តិ បាបកោ កិត្តិសទ្ទោ អព្ភុគ្គច្ឆតិ សម្មូឡ្ហោ កាលំ ករោតិ កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជតិ យមិទំ អានន្ទ មយា ឯកំសេន អករណីយំ អក្ខាតំ កាយទុច្ចរិតំ វចីទុច្ចរិតំ មនោទុច្ចរិតំ តស្មឹ អករណីយេ កយិរមានេ អយំ អាទីនវោ បាដិកង្ខោ ឯកំសេនាហំ អានន្ទ ករណីយំ វទាមិ កាយសុចរិតំ វចីសុចរិតំ មនោសុចរិតន្តិ។ យមិទំ ភន្តេ ភគវតា ឯកំសេន ករណីយំ អក្ខាតំ កាយសុចរិតំ វចីសុចរិតំ មនោសុចរិតំ តស្មឹ ករណីយេ កយិរមានេ កោ អានិសំសោ បាដិកង្ខោតិ។ យមិទំ អានន្ទ មយា ឯកំសេន ករណីយំ អក្ខាតំ កាយសុចរិតំ វចីសុចរិតំ មនោសុចរិតំ តស្មឹ ករណីយេ កយិរមានេ អយំ អានិសំសោ បាដិកង្ខោ អត្តាបិ អត្តានំ ន ឧបវទតិ អនុវិច្ច វិញ្ញូ បសំសន្តិ កល្យាណោ កិត្តិសទ្ទោ អព្ភុគ្គច្ឆតិ អសម្មូឡ្ហោ កាលំ ករោតិ កាយស្ស ភេទា បរម្មរណា សុគតឹ សគ្គំ លោកំ ឧបបជ្ជតិ យមិទំ អានន្ទ មយា ឯកំសេន ករណីយំ អក្ខាតំ កាយសុចរិតំ វចីសុចរិតំ មនោសុចរិតំ តស្មឹ ករណីយេ កយិរមានេ អយំ អានិសំសោ បាដិកង្ខោតិ។

[២៦៥] អកុសលំ ភិក្ខវេ បជហថ សក្កា ភិក្ខវេ អកុសលំ បជហិតុំ នោ ចេ តំ ភិក្ខវេ សក្កា អភវិស្ស អកុសលំ បជហិតុំ នាហំ ឯវំ វទេយ្យំ អកុសលំ ភិក្ខវេ បជហថាតិ យស្មា ច ខោ ភិក្ខវេ សក្កា អកុសលំ បជហិតុំ តស្មាហំ ឯវំ វទាមិ អកុសលំ ភិក្ខវេ បជហថាតិ អកុសលញ្ចហិទំ ភិក្ខវេ បហីនំ អហិតាយ ទុក្ខាយ សំវត្តេយ្យ នាហំ ឯវំ វទេយ្យំ អកុសលំ ភិក្ខវេ បជហថាតិ យស្មា ច ខោ ភិក្ខវេ អកុសលំ បហីនំ ហិតាយ សុខាយ សំវត្តតិ តស្មាហំ ឯវំ វទាមិ អកុសលំ ភិក្ខវេ បជហថាតិ កុសលំ ភិក្ខវេ ភាវេថ សក្កា ភិក្ខវេ កុសលំ ភាវេតុំ នោ ចេតំ ភិក្ខវេ សក្កា អភវិស្ស កុសលំ ភាវេតុំ នាហំ ឯវំ វទេយ្យំ កុសលំ ភិក្ខវេ ភាវេថាតិ យស្មា ច ខោ ភិក្ខវេ សក្កា កុសលំ ភាវេតុំ តស្មាហំ ឯវំ វទាមិ កុសលំ ភិក្ខវេ ភាវេថាតិ កុសលញ្ចហិទំ ភិក្ខវេ ភាវិតំ អហិតាយ ទុក្ខាយ សំវត្តេយ្យ [ឱ. សំវត្តតិ។] នាហំ ឯវំ វទេយ្យំ [ឱ. នាហំ វទាមិ។] កុសលំ ភិក្ខវេ ភាវេថាតិ យស្មា ច ខោ ភិក្ខវេ កុសលំ ភាវិតំ ហិតាយ សុខាយ សំវត្តតិ តស្មាហំ ឯវំ វទាមិ កុសលំ ភិក្ខវេ ភាវេថាតិ។

[២៦៦] ទ្វេមេ ភិក្ខវេ ធម្មា សទ្ធម្មស្ស សម្មោសាយ អន្តរធានាយ សំវត្តន្តិ។ កតមេ ទ្វេ។ ទុន្និក្ខិត្តញ្ច បទព្យញ្ជនំ អត្ថោ ច ទុន្នីតោ។ ទុន្និក្ខិត្តស្ស ភិក្ខវេ បទព្យញ្ជនស្ស អត្ថោបិ ទុន្នយោ ហោតិ។ ឥមេ ខោ ភិក្ខវេ ទ្វេ ធម្មា សទ្ធម្មស្ស សម្មោសាយ អន្តរធានាយ សំវត្តន្តិ។ ទ្វេមេ ភិក្ខវេ ធម្មា សទ្ធម្មស្ស ឋិតិយា អសម្មោសាយ អនន្តរធានាយ សំវត្តន្តិ។ កតមេ ទ្វេ។ សុនិក្ខិត្តញ្ច បទព្យញ្ជនំ អត្ថោ ច សុនីតោ។ សុនិក្ខិត្តស្ស ភិក្ខវេ បទព្យញ្ជនស្ស អត្ថោបិ សុនយោ ហោតិ។ ឥមេ ខោ ភិក្ខវេ ទ្វេ ធម្មា សទ្ធម្មស្ស ឋិតិយា អសម្មោសាយ អនន្តរធានាយ សំវត្តន្តីតិ។

អធិករណវគ្គោ ទុតិយោ។

[២៦៧] ទ្វេមេ ភិក្ខវេ ពាលា។ កតមេ ទ្វេ។ យោ ច អច្ចយំ អច្ចយតោ ន បស្សតិ យោ ច អច្ចយំ ទេសេន្តស្ស យថាធម្មំ ន បដិគ្គណ្ហាតិ។ ឥមេ ខោ ភិក្ខវេ ទ្វេ ពាលា។ ទ្វេមេ ភិក្ខវេ បណ្ឌិតា។ កតមេ ទ្វេ។ យោ ច អច្ចយំ អច្ចយតោ បស្សតិ យោ ច អច្ចយំ ទេសេន្តស្ស យថាធម្មំ បដិគ្គណ្ហាតិ។ ឥមេ ខោ ភិក្ខវេ ទ្វេ បណ្ឌិតាតិ។

[២៦៨] ទ្វេមេ ភិក្ខវេ តថាគតំ អព្ភាចិក្ខន្តិ។ កតមេ ទ្វេ។ ទុដ្ឋោ វា ទោសន្តរោ សទ្ធោ វា ទុគ្គហិតេន។ ឥមេ ខោ ភិក្ខវេ ទ្វេ តថាគតំ អព្ភាចិក្ខន្តីតិ។

[២៦៩] ទ្វេមេ ភិក្ខវេ តថាគតំ អព្ភាចិក្ខន្តិ។ កតមេ ទ្វេ។ យោ ច អភាសិតំ អលបិតំ តថាគតេន ភាសិតំ លបិតំ តថាគតេនាតិ ទីបេតិ យោ ច ភាសិតំ លបិតំ តថាគតេន អភាសិតំ អលបិតំ តថាគតេនាតិ ទីបេតិ។ ឥមេ ខោ ភិក្ខវេ ទ្វេ តថាគតំ អព្ភាចិក្ខន្តិ។ ទ្វេមេ ភិក្ខវេ តថាគតំ នាព្ភាចិក្ខន្តិ។ កតមេ ទ្វេ។ យោ ច អភាសិតំ អលបិតំ តថាគតេន អភាសិតំ អលបិតំ តថាគតេនាតិ ទីបេតិ យោ ច ភាសិតំ លបិតំ តថាគតេន ភាសិតំ លបិតំ តថាគតេនាតិ ទីបេតិ។ ឥមេ ខោ ភិក្ខវេ ទ្វេ តថាគតំ នាព្ភាចិក្ខន្តីតិ។

[២៧០] ទ្វេមេ ភិក្ខវេ តថាគតំ អព្ភាចិក្ខន្តិ។ កតមេ ទ្វេ។ យោ ច នេយ្យត្ថំ សុត្តន្តំ នីតត្ថោ សុត្តន្តោតិ ទីបេតិ យោ ច នីតត្ថំ សុត្តន្តំ នេយ្យត្ថោ សុត្តន្តោតិ ទីបេតិ។ ឥមេ ខោ ភិក្ខវេ ទ្វេ តថាគតំ អព្ភាចិក្ខន្តិ។ ទ្វេមេ ភិក្ខវេ តថាគតំ នាព្ភាចិក្ខន្តិ។ កតមេ ទ្វេ។ យោ ច នេយ្យត្ថំ សុត្តន្តំ នេយ្យត្ថោ សុត្តន្តោតិ ទីបេតិ យោ ច នីតត្ថំ សុត្តន្តំ នីតត្ថោ សុត្តន្តោតិ ទីបេតិ។ ឥមេ ខោ ភិក្ខវេ ទ្វេ តថាគតំ នាព្ភាចិក្ខន្តីតិ។

[២៧១] បដិច្ឆន្នកម្មន្តស្ស ភិក្ខវេ ទ្វិន្នំ គតីនំ អញ្ញតរា គតិ បាដិកង្ខា និរយោ វា តិរច្ឆានយោនិ វា។ អប្បដិច្ឆន្នកម្មន្តស្ស ភិក្ខវេ ទ្វិន្នំ គតីនំ អញ្ញតរា គតិ បាដិកង្ខា ទេវា វា មនុស្សា វាតិ។

[២៧២] មិច្ឆាទិដ្ឋិកស្ស ភិក្ខវេ ទ្វិន្នំ គតីនំ អញ្ញតរា គតិ បាដិកង្ខា និរយោ វា តិរច្ឆានយោនិ វា។ សម្មាទិដ្ឋិកស្ស ភិក្ខវេ ទ្វិន្នំ គតីនំ អញ្ញតរា គតិ បាដិកង្ខា ទេវា វា មនុស្សា វាតិ។

[២៧៣] ទុស្សីលស្ស ភិក្ខវេ ទ្វេ បដិគ្គាហា និរយោ វា តិរច្ឆានយោនិ វា។ សីលវតោ ភិក្ខវេ ទ្វេ បដិគ្គហា ទេវា វា មនុស្សា វាតិ។

[២៧៤] ទ្វាហំ ភិក្ខវេ អត្ថវសេ សម្បស្សមានោ អរញ្ញវនបត្ថានិ បន្តានិ សេនាសនានិ បដិសេវាមិ។ កតមេ ទ្វេ។ អត្តនោ ច ទិដ្ឋធម្មសុខវិហារំ សម្បស្សមានោ បច្ឆិមញ្ច ជនតំ អនុកម្បមានោ។ ឥមេ ខោ អហំ ភិក្ខវេ ទ្វេ អត្ថវសេ សម្បស្សមានោ អរញ្ញវនបត្ថានិ បន្តានិ សេនាសនានិ បដិសេវាមីតិ។

[២៧៥] ទ្វេមេ ភិក្ខវេ ធម្មា វិជ្ជាភាគិយា។ កតមេ ទ្វេ។ សមថោ ច វិបស្សនា ច។ សមថោ ភិក្ខវេ ភាវិតោ កិមត្ថមនុភោតិ [ឱ. កមត្ថមនុភោតិ។ ម. កតមត្ថមនុភោតិ។]។ ចិត្តំ ភាវិយតិ។ ចិត្តំ ភាវិតំ កិមត្ថមនុភោតិ។ យោ រាគោ សោ បហីយតិ។ វិបស្សនា ភិក្ខវេ ភាវិតា កិមត្ថមនុភោតិ។ បញ្ញា ភាវិយតិ។ បញ្ញា ភាវិតា កិមត្ថមនុភោតិ។ យា អវិជ្ជា សា បហីយតីតិ។

[២៧៦] រាគុបក្កិលិដ្ឋំ វា ភិក្ខវេ ចិត្តំ ន វិមុច្ចតិ អវិជ្ជូបក្កិលិដ្ឋា វា បញ្ញា ន ភាវិយតិ។ ឥតិ ខោ [ឱ. ឥមា ខោ។] ភិក្ខវេ រាគវិរាគា ចេតោវិមុត្តិ អវិជ្ជាវិរាគា បញ្ញាវិមុត្តីតិ។

ពាលវគ្គោ តតិយោ។

[២៧៧] អសប្បុរិសភូមិញ្ច វោ ភិក្ខវេ ទេសេស្សាមិ សប្បុរិសភូមិញ្ច តំ សុណាថ សាធុកំ មនសិករោថ ភាសិស្សាមីតិ។ ឯវម្ភន្តេតិ ខោ តេ ភិក្ខូ ភគវតោ បច្ចស្សោសុំ។ ភគវា ឯតទវោច កតមា ច ភិក្ខវេ អសប្បុរិសភូមិ។ អសប្បុរិសោ ភិក្ខវេ អកតញ្ញូ ហោតិ អកតវេទី អសព្ភិហេតំ ភិក្ខវេ ឧបញ្ញាតំ យទិទំ អកតញ្ញុតា អកតវេទិតា កេវលា [ម. កេវលំ។] ឯសា ភិក្ខវេ អសប្បុរិសភូមិ យទិទំ អកតញ្ញុតា អកតវេទិតា។ សប្បុរិសោ ច ខោ ភិក្ខវេ កតញ្ញូ ហោតិ កតវេទី សព្ភិហេតំ ភិក្ខវេ ឧបញ្ញាតំ យទិទំ កតញ្ញុតា កតវេទិតា កេវលា ឯសា ភិក្ខវេ សប្បុរិសភូមិ យទិទំ កតញ្ញុតា កតវេទិតាតិ។

[២៧៨] ទ្វិន្នាហំ ភិក្ខវេ ន សុប្បដិការំ វទាមិ។ កតមេសំ ទ្វិន្នំ។ មាតុ ច បិតុ ច។ ឯកេន ភិក្ខវេ អំសេន មាតរំ បរិហរេយ្យ ឯកេន អំសេន បិតរំ បរិហរេយ្យ វស្សសតាយុកោ វស្សសតជីវី សោ ច នេសំ ឧច្ឆាទនបរិមទ្ទននហាបនសម្ពាហនេន បដិជគ្គេយ្យ តេបិ តត្ថេវ មុត្តករីសំ ចជេយ្យុំ ន ត្វេវ ភិក្ខវេ មាតាបិតុន្នំ កតំ វា ហោតិ បដិកតំ វា។ ឥមិស្សា ច ភិក្ខវេ មហាបឋវិយា បហូតសត្តរតនាយ មាតាបិតរោ ឥស្សរាធិបច្ចេ រជ្ជេ បតិដ្ឋាបេយ្យ ន ត្វេវ ភិក្ខវេ មាតាបិតុន្នំ កតំ វា ហោតិ បដិកតំ វា។ តំ កិស្ស ហេតុ។ ពហុការា ភិក្ខវេ មាតាបិតរោ បុត្តានំ អាបាទកា បោសកា ឥមស្ស លោកស្ស ទស្សេតារោ។ យោ ច ខោ ភិក្ខវេ មាតាបិតរោ អស្សទ្ធេ សទ្ធាសម្បទាយ សមាទបេតិ និវេសេតិ បតិដ្ឋាបេតិ ទុស្សីលេ សីលសម្បទាយ សមាទបេតិ និវេសេតិ បតិដ្ឋាបេតិ មច្ឆរី ចាគសម្បទាយ សមាទបេតិ និវេសេតិ បតិដ្ឋាបេតិ ទុប្បញ្ញេ បញ្ញាសម្បទាយ សមាទបេតិ និវេសេតិ បតិដ្ឋាបេតិ ឯត្តាវតា ខោ ភិក្ខវេ មាតាបិតុន្នំ កតញ្ច ហោតិ បដិកតញ្ចាតិ។

[២៧៩] អថ ខោ អញ្ញតរោ ព្រាហ្មណោ យេន ភគវា តេនុបសង្កមិ ឧបសង្កមិត្វា ភគវតា សទ្ធឹ សម្មោទិ សម្មោទនីយំ កថំ សារាណីយំ រីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ សោ ព្រាហ្មណោ ភគវន្តំ ឯតទវោច កឹវាទី ភវំ គោតមោ កិមក្ខាយីតិ។ កិរិយវាទី ចាហំ ព្រាហ្មណ អកិរិយវាទី ចាតិ។ យថាកថំ បន ភវំ គោតមោ កិរិយវាទី ច អកិរិយវាទី ចាតិ។ អកិរិយំ ខោ អហំ ព្រាហ្មណ វទាមិ កាយទុច្ចរិតស្ស វចីទុច្ចរិតស្ស មនោទុច្ចរិតស្ស អនេកវិហិតានំ បាបកានំ អកុសលានំ ធម្មានំ អកិរិយំ វទាមិ។ កិរិយញ្ច ខោ អហំ ព្រាហ្មណ វទាមិ កាយសុចរិតស្ស វចីសុចរិតស្ស មនោសុចរិតស្ស អនេកវិហិតានំ កុសលានំ ធម្មានំ កិរិយំ វទាមិ។ ឯវំ ខោ អហំ ព្រាហ្មណ កិរិយវាទី ច អកិរិយវាទី ចាតិ។ អភិក្កន្តំ ភោ គោតម។បេ។ ឧបាសកំ មំ ភវំ គោតមោ ធារេតុ អជ្ជតគ្គេ បាណុបេតំ សរណំ គតន្តិ។

[២៨០] អថ ខោ អនាថបិណ្ឌិកោ គហបតិ យេន ភគវា តេនុបសង្កមិ ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នោ ខោ អនាថបិណ្ឌិកោ គហបតិ ភគវន្តំ ឯតទវោច កតិ នុ ខោ ភន្តេ លោកេ ទក្ខិណេយ្យា កត្ថ ច ទានំ ទាតព្វន្តិ។ ទ្វេ ខោ គហបតិ លោកេ ទក្ខិណេយ្យា សេក្ខោ ច អសេក្ខោ ច។ ឥមេ ខោ គហបតិ ទ្វេ លោកេ ទក្ខិណេយ្យា ឯត្ថ ច ទានំ ទាតព្វន្តិ។ ឥទមវោច ភគវា ឥទំ វត្វាន សុគតោ អថាបរំ ឯតទវោច សត្ថា

សេក្ខោ ច អសេក្ខោ ច ឥមស្មឹ លោកេ

អាហុនេយ្យា យជមានានំ ហោន្តិ

តេ ឧជុភូតា កាយេន វាចាយ ឧទ ចេតសា

ខេត្តន្តំ យជមានានំ ឯត្ថ ទិន្នំ មហប្ផលន្តិ។

[២៨១] ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តេន ខោ បន សមយេន អាយស្មា សារីបុត្តោ សាវត្ថិយំ វិហរតិ បុព្វារាមេ មិគារមាតុប្បាសាទេ។ តត្រ ខោ អាយស្មា សារីបុត្តោ ភិក្ខូ អាមន្តេសិ អាវុសោ ភិក្ខវោតិ។ អាវុសោតិ ខោ តេ ភិក្ខូ អាយស្មតោ សារីបុត្តស្ស បច្ចស្សោសុំ។ អាយស្មា សារីបុត្តោ ឯតទវោច អជ្ឈត្តសញ្ញោជនញ្ច អាវុសោ បុគ្គលំ ទេសេស្សាមិ ពហិទ្ធាសញ្ញោជនញ្ច តំ សុណាថ សាធុកំ មនសិករោថ ភាសិស្សាមីតិ។ ឯវំ អាវុសោតិ ខោ តេ ភិក្ខូ អាយស្មតោ សារីបុត្តស្ស បច្ចស្សោសុំ។ អាយស្មា សារីបុត្តោ ឯតទវោច កតមោ ចាវុសោ អជ្ឈត្តសញ្ញោជនោ បុគ្គលោ។ ឥធាវុសោ ភិក្ខុ សីលវា ហោតិ បាតិមោក្ខសំវរសំវុតោ វិហរតិ អាចារគោចរសម្បន្នោ អណុមត្តេសុ វជ្ជេសុ ភយទស្សាវី សមាទាយ សិក្ខតិ សិក្ខាបទេសុ សោ កាយស្ស ភេទា បរម្មរណា អញ្ញតរំ ទេវនិកាយំ ឧបបជ្ជតិ សោ តតោ ចុតោ អាគាមី ហោតិ អាគន្តា ឥត្ថត្តំ អយំ វុច្ចតាវុសោ អជ្ឈត្តសញ្ញោជនោ បុគ្គលោ អាគាមី អាគន្តា ឥត្ថត្តំ។ កតមោ ចាវុសោ ពហិទ្ធាសញ្ញោជនោ បុគ្គលោ។ ឥធាវុសោ ភិក្ខុ សីលវា ហោតិ បាតិមោក្ខសំវរសំវុតោ វិហរតិ អាចារគោចរសម្បន្នោ អណុមត្តេសុ វជ្ជេសុ ភយទស្សាវី សមាទាយ សិក្ខតិ សិក្ខាបទេសុ សោ អញ្ញតរំ សន្តំ ចេតោវិមុត្តឹ ឧបសម្បជ្ជ វិហរតិ សោ កាយស្ស ភេទា បរម្មរណា អញ្ញតរំ ទេវនិកាយំ ឧបបជ្ជតិ។ សោ តតោ ចុតោ អនាគាមី ហោតិ អនាគន្តា ឥត្ថត្តំ។ អយំ វុច្ចតាវុសោ ពហិទ្ធាសញ្ញោជនោ បុគ្គលោ អនាគាមី អនាគន្តា ឥត្ថត្តំ។ បុន ចបរំ អាវុសោ ភិក្ខុ សីលវា ហោតិ បាតិមោក្ខសំវរសំវុតោ វិហរតិ អាចារគោចរសម្បន្នោ អណុមត្តេសុ វជ្ជេសុ ភយទស្សាវី សមាទាយ សិក្ខតិ សិក្ខាបទេសុ សោ កាមានំយេវ និព្វិទាយ វិរាគាយ និរោធាយ បដិបន្នោ ហោតិ សោ ភវានំយេវ និព្វិទាយ វិរាគាយ និរោធាយ បដិបន្នោ ហោតិ សោ តណ្ហក្ខយាយ បដិបន្នោ ហោតិ សោ លោភក្ខយាយ បដិបន្នោ ហោតិ សោ កាយស្ស ភេទា បរម្មរណា អញ្ញតរំ ទេវនិកាយំ ឧបបជ្ជតិ សោ តតោ ចុតោ អនាគាមី ហោតិ អនាគន្តា ឥត្ថត្តំ អយំ វុច្ចតាវុសោ ពហិទ្ធាសញ្ញោជនោ បុគ្គលោ អនាគាមី អនាគន្តា ឥត្ថត្តន្តិ។

អថ ខោ សម្ពហុលា សមចិត្តា ទេវតា យេន ភគវា តេនុបសង្កមឹសុ ឧបសង្កមិត្វា ភគវន្តំ អភិវាទេត្វា ឯកមន្តំ អដ្ឋំសុ។ ឯកមន្តំ ឋិតា ខោ តា ទេវតា ភគវន្តំ ឯតទវោចុំ ឯសោ ភន្តេ អាយស្មា សារីបុត្តោ បុព្វារាមេ មិគារមាតុប្បាសាទេ ភិក្ខូនំ អជ្ឈត្តសញ្ញោជនញ្ច បុគ្គលំ ទេសេតិ ពហិទ្ធាសញ្ញោជនញ្ច ហដ្ឋា ភន្តេ បរិសា សាធុ ភន្តេ ភគវា យេនាយស្មា សារីបុត្តោ តេនុបសង្កមតុ អនុកម្បំ ឧបាទាយាតិ។ អធិវាសេសិ ភគវា តុណ្ហីភាវេន។ អថខោ ភគវា សេយ្យថាបិ នាម ពលវា បុរិសោ សម្មិញ្ជិតំ វា ពាហំ បសារេយ្យ បសារិតំ វា ពាហំ សម្មិញ្ជេយ្យ ឯវមេវ ជេតវនេ អន្តរហិតោ បុព្វារាមេ មិគារមាតុប្បាសាទេ អាយស្មតោ សារីបុត្តស្ស បមុខេ [ម.សម្មុខេ។] បាតុរហោសិ។ និសីទិ ភគវា បញ្ញត្តេ អាសនេ។ អាយស្មាបិ ខោ សារីបុត្តោ ភគវន្តំ អភិវាទេត្វា ឯកមន្តំ និសីទិ។ ឯកមន្តំ និសិន្នំ ខោ អាយស្មន្តំ សារីបុត្តំ ភគវា ឯតទវោច ឥធ សារីបុត្ត សម្ពហុលា សមចិត្តា ទេវតា យេនាហំ តេនុបសង្កមឹសុ ឧបសង្កមិត្វា មំ អភិវាទេត្វា ឯកមន្តំ អដ្ឋំសុ។ ឯកមន្តំ ឋិតា ខោ សារីបុត្ត តា ទេវតា មំ ឯតទវោចុំ ឯសោ ភន្តេ អាយស្មា សារីបុត្តោ បុព្វារាមេ មិគារមាតុប្បាសាទេ ភិក្ខូនំ អជ្ឈត្តសញ្ញោជនញ្ច បុគ្គលំ ទេសេតិ ពហិទ្ធាសញ្ញោជនញ្ច ហដ្ឋា ភន្តេ បរិសា សាធុ ភន្តេ ភគវា យេនាយស្មា សារីបុត្តោ តេនុបសង្កមតុ អនុកម្បំ ឧបាទាយាតិ តា ខោ បន សារីបុត្ត ទេវតា ទសបិ ហុត្វា វីសតិម្បិ ហុត្វា តឹសម្បិ ហុត្វា ចត្តាឡីសម្បិ ហុត្វា បញ្ញាសម្បិ ហុត្វា សដ្ឋិម្បិ ហុត្វា អារគ្គកោដិនិតុទនមត្តេបិ តិដ្ឋន្តិ ន ច អញ្ញមញ្ញំ ព្យាពាធេន្តិ សិយា ខោ បន តេ សារីបុត្ត ឯវមស្ស តត្ថ នូន តាសំ ទេវតានំ តថាចិត្តំ ភាវិតំ យេន តា ទេវតា ទសបិ ហុត្វា វីសតិម្បិ ហុត្វា តឹសម្បិ ហុត្វា ចត្តាឡីសម្បិ ហុត្វា បញ្ញាសម្បិ ហុត្វា សដ្ឋិម្បិ ហុត្វា អារគ្គកោដិនិតុទនមត្តេបិ តិដ្ឋន្តិ ន ច អញ្ញមញ្ញំ ព្យាពាធេន្តីតិ ន ខោ បនេតំ សារីបុត្ត ឯវំ ទដ្ឋព្វំ ឥធេវ សារីបុត្ត តាសំ ទេវតានំ តថាចិត្តំ ភាវិតំ យេន តា ទេវតា ទសបិ ហុត្វា។បេ។ ន ច អញ្ញមញ្ញំ ព្យាពាធេន្តិ តស្មាតិហ សារីបុត្ត ឯវំ សិក្ខិតព្វំ សន្តិន្ទ្រិយា ភវិស្សាម សន្តមានសាតិ ឯវញ្ហិ តេ [ឱ.ម. ឯវញ្ហិ វោ។ សន្តិន្ទ្រិយានញ្ហិ វោ។] សារីបុត្ត សិក្ខិតព្វំ សន្តិន្ទ្រិយានញ្ហិ តេ [ឱ.ម. ឯវញ្ហិ វោ។ សន្តិន្ទ្រិយានញ្ហិ វោ។] សារីបុត្ត សន្តមានសានំ សន្តំយេវ កាយកម្មំ ភវិស្សតិ សន្តំ វចីកម្មំ សន្តំ មនោកម្មំ សន្តំយេវុបហារំ ឧបហរិស្សាម សព្រហ្មចារីសូតិ ឯវញ្ហិ តេ [ឱ.ម. ឯវញ្ហិ វោ។ សន្តិន្ទ្រិយានញ្ហិ វោ។] សារីបុត្ត សិក្ខិតព្វំ អនស្សុំ ខោ សារីបុត្ត អញ្ញតិត្ថិយា បរិព្វាជកា យេ ឥមំ ធម្មបរិយាយំ នាស្សោសុន្តិ។

[២៨២] ឯកំ សមយំ អាយស្មា មហាកច្ចានោ វរណាយំ វិហរតិ កទ្ទមទហតីរេ [ម.ភទ្ទសារិតីរេ។]។ អថខោ អារាមទណ្ឌោ ព្រាហ្មណោ យេនាយស្មា មហាកច្ចានោ តេនុបសង្កមិ ឧបសង្កមិត្វា អាយស្មតា មហាកច្ចានេន សទ្ធឹ សម្មោទិ សម្មោទនីយំ កថំ សារាណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ អារាមទណ្ឌោ ព្រាហ្មណោ អាយស្មន្តំ មហាកច្ចានំ ឯតទវោច កោ នុ ខោ ភោ កច្ចាន ហេតុ កោ បច្ចយោ យេន ខត្តិយាបិ ខត្តិយេហិ វិវទន្តិ ព្រាហ្មណាបិ ព្រាហ្មណេហិ វិវទន្តិ គហបតិកាបិ គហបតិកេហិ វិវទន្តីតិ។ កាមរាគវិនិវេសវិនិពន្ធបលិគេធបរិយុដ្ឋានជ្ឈោសានហេតុ ខោ ព្រាហ្មណ ខត្តិយាបិ ខត្តិយេហិ វិវទន្តិ ព្រាហ្មណាបិ ព្រាហ្មណេហិ វិវទន្តិ គហបតិកាបិ គហបតិកេហិ វិវទន្តីតិ។ កោ បន ភោ កច្ចាន ហេតុ កោ បច្ចយោ យេន សមណាបិ សមណេហិ វិវទន្តីតិ។ ទិដ្ឋិរាគវិនិវេសវិនិពន្ធបលិគេធបរិយុដ្ឋានជ្ឈោសានហេតុ [ម. ទិដ្ឋិរាគាភិនិវេសវិនិពន្ធបលិគេធបរិយុដ្ឋានជ្ឈោសានហេតុ។] ខោ ព្រាហ្មណ សមណាបិ សមណេហិ វិវទន្តីតិ។ អត្ថិ បន ភោ កច្ចាន កោចិ លោកស្មឹ យោ ឥមញ្ចេវ កាមរាគវិនិវេសវិនិពន្ធបលិគេធបរិយុដ្ឋានជ្ឈោសានំ សមតិក្កន្តោ ឥមញ្ច ទិដ្ឋិរាគវិនិវេសវិនិពន្ធបលិគេធបរិយុដ្ឋានជ្ឈោសានំ សមតិក្កន្តោតិ។ អត្ថិ ព្រាហ្មណ លោកស្មឹ យោ ឥមញ្ចេវ កាមរាគវិនិវេសវិនិពន្ធបលិគេធបរិយុដ្ឋានជ្ឈោសានំ សមតិក្កន្តោ ឥមញ្ច ទិដ្ឋិរាគវិនិវេសវិនិពន្ធបលិគេធបរិយុដ្ឋានជ្ឈោសានំ សមតិក្កន្តោតិ។ កោ បន សោ ភោ កច្ចាន លោកស្មឹ យោ ឥមញ្ចេវ កាមរាគវិនិវេសវិនិពន្ធបលិគេធបរិយុដ្ឋានជ្ឈោសានំ សមតិក្កន្តោ ឥមញ្ច ទិដ្ឋិរាគវិនិវេសវិនិពន្ធបលិគេធបរិយុដ្ឋានជ្ឈោសានំ សមតិក្កន្តោតិ។ អត្ថិ ព្រាហ្មណ បុរត្ថិមេសុ ជនបទេសុ សាវត្ថី នាម នគរំ តត្ថ សោ ភគវា ឯតរហិ វិហរតិ អរហំ សម្មាសម្ពុទ្ធោ សោ ហិ ព្រាហ្មណ ភគវា ឥមញ្ចេវ កាមរាគវិនិវេសវិនិពន្ធបលិគេធបរិយុដ្ឋានជ្ឈោសានំ សមតិក្កន្តោ ឥមញ្ច ទិដ្ឋិរាគវិនិវេសវិនិពន្ធបលិគេធបរិយុដ្ឋានជ្ឈោសានំ សមតិក្កន្តោតិ។ ឯវំ វុត្តេ អារាមទណ្ឌោ ព្រាហ្មណោ ឧដ្ឋាយាសនា ឯកំសំ ឧត្តរាសង្គំ ករិត្វា ទក្ខិណជានុមណ្ឌលំ បឋវិយំ និហន្ត្វា យេន ភគវា តេនញ្ជលិម្បណាមេត្វា តិក្ខត្តុំ ឧទានំ ឧទានេសិ នមោ តស្ស ភគវតោ អរហតោ សម្មាសម្ពុទ្ធស្ស នមោ តស្ស ភគវតោ អរហតោ សម្មាសម្ពុទ្ធស្ស នមោ តស្ស ភគវតោ អរហតោ សម្មាសម្ពុទ្ធស្ស យោ ហិ សោ ភគវា ឥមញ្ចេវ កាមរាគវិនិវេសវិនិពន្ធបលិគេធបរិយុដ្ឋានជ្ឈោសានំ សមតិក្កន្តោ ឥមញ្ច ទិដ្ឋិរាគវិនិវេសវិនិពន្ធបលិគេធបរិយុដ្ឋានជ្ឈោសានំ សមតិក្កន្តោតិ។ អភិក្កន្តំ ភោ កច្ចាន អភិក្កន្តំ ភោ កច្ចាន សេយ្យថាបិ ភោ កច្ចាន និក្កុជ្ជិតំ វា ឧក្កុជ្ជេយ្យ បដិច្ឆន្នំ វា វិវរេយ្យ មូឡ្ហស្ស វា មគ្គំ អាចិក្ខេយ្យ អន្ធការេ វា តេលប្បជ្ជោតំ ធារេយ្យ ចក្ខុមន្តោ រូបានិ ទក្ខន្តីតិ ឯវមេវ ភោតា កច្ចានេន អនេកបរិយាយេន ធម្មោ បកាសិតោ ឯសាហំ ភោ កច្ចាន តំ ភវន្តំ [ឱ.ម. ភគវន្តំ។] គោតមំ សរណំ គច្ឆាមិ ធម្មញ្ច ភិក្ខុសង្ឃញ្ច ឧបាសកំ មំ ភវំ កច្ចានោ ធារេតុ អជ្ជតគ្គេ បាណុបេតំ សរណំ គតន្តិ។

[២៨៣] ឯកំ សមយំ អាយស្មា មហាកច្ចានោ មធុរាយំ វិហរតិ គុន្ទាវនេ។ អថខោ កណ្ឌរាយនោ ព្រាហ្មណោ យេនាយស្មា មហាកច្ចានោ តេនុបសង្កមិ ឧបសង្កមិត្វា អាយស្មតា មហាកច្ចានេន សទ្ធឹ សម្មោទិ។បេ។ ឯកមន្តំ និសិន្នោ ខោ កណ្ឌរាយនោ ព្រាហ្មណោ អាយស្មន្តំ មហាកច្ចានំ ឯតទវោច សុតមេតំ ភោ កច្ចាន ន សមណោ កច្ចានោ ព្រាហ្មណេ ជិណ្ណេ វុឌ្ឍេ មហល្លកេ អទ្ធគតេ វយោអនុប្បត្តេ អភិវាទេតិ វា បច្ចុដ្ឋេតិ វា អាសនេន វា និមន្តេតីតិ តយិទំ [ឱ. យទិទំ។] ភោ កច្ចាន តថេវ ន ហិ ភវំ កច្ចានោ ព្រាហ្មណេ ជិណ្ណេ វុឌ្ឍេ មហល្លកេ អទ្ធគតេ វយោអនុប្បត្តេ អភិវាទេតិ វា បច្ចុដ្ឋេតិ វា អាសនេន វា និមន្តេតិ តយិទំ ភោ កច្ចាន ន សម្បន្នមេវាតិ។ អត្ថិ ព្រាហ្មណ តេន ភគវតា ជានតា បស្សតា អរហតា សម្មាសម្ពុទ្ធេន វុឌ្ឍិភូមិ ច អក្ខាតា ទហរភូមិ ច វុឌ្ឍោ ចេបិ ព្រាហ្មណ ហោតិ អសីតិកោ វា នវុតិកោ វា វស្សសតិកោ វា ជាតិយា សោ ច កាមេ បរិភុញ្ជតិ កាមមជ្ឈេ វសតិ កាមបរិឡាហេន បរិឌយ្ហតិ កាមវិតក្កេហិ ខជ្ជតិ កាមបរិយេសនាយ ឧស្សុក្កោ អថខោ សោ ពាលោ ន ថេរោត្វេវ [ឱ. ន ថេរោ ត្វេវ ឥតិ បទំបិ នត្ថិ។] សំខំ គច្ឆតិ ទហរោ ចេបិ ព្រាហ្មណ ហោតិ យុវា សុសូ កាឡកេសោ ភទ្រេន យោព្វនេន សមន្នាគតោ បឋមេន វយសា សោ ច ន កាមេ បរិភុញ្ជតិ ន កាមមជ្ឈេ វសតិ ន កាមបរិឡាហេន បរិឌយ្ហតិ ន កាមវិតក្កេហិ ខជ្ជតិ ន កាមបរិយេសនាយ ឧស្សុក្កោ អថខោ សោ បណ្ឌិតោ ថេរោត្វេវ សំខំ គច្ឆតីតិ។ ឯវំ វុត្តេ កណ្ឌរាយនោ ព្រាហ្មណោ ឧដ្ឋាយាសនា ឯកំសំ ឧត្តរាសង្គំ ករិត្វា ទហរានំ សុទំ ភិក្ខូនំ បាទេ សិរសា វន្ទតិ វុឌ្ឈា ភវន្តោ វុឌ្ឈិភូមិយំ ឋិតា ទហរា មយំ ទហរភូមិយំ ឋិតា អភិក្កន្តំ ភោ កច្ចាន។បេ។ ឧបាសកំ មំ ភវំ កច្ចានោ ធារេតុ អជ្ជតគ្គេ បាណុបេតំ សរណំ គតន្តិ។

[២៨៤] យស្មឹ ភិក្ខវេ សមយេ ចោរា ពលវន្តោ ហោន្តិ រាជានោ តស្មឹ សមយេ ទុព្វលា ហោន្តិ តស្មឹ ភិក្ខវេ សមយេ រញ្ញោ ន ផាសុ ហោតិ អតិយាតុំ វា និយ្យាតុំ វា បច្ចន្តិមេ វា ជនបទេ អនុសញ្ញាតុំ [ម អនុសញ្ចរិតុំ។] ព្រាហ្មណគហបតិកានំបិ តស្មឹ សមយេន ផាសុ ហោតិ អតិយាតុំ វា និយ្យាតុំ វា ពាហិរានិ វា កម្មន្តានិ បដិវេក្ខិតុំ។ ឯវមេវ ខោ ភិក្ខវេ យស្មឹ សមយេ បាបភិក្ខូ ពលវន្តោ ហោន្តិ បេសលា ភិក្ខូ តស្មឹ សមយេ ទុព្វលា ហោន្តិ តស្មឹ ភិក្ខវេ សមយេ បេសលា ភិក្ខូ តុណ្ហីភូតា តុណ្ហីភូតា វ សង្ឃមជ្ឈេ សំកសាយន្តិ [ម. សង្កម្មជ្ឈាយន្តិ។] បច្ចន្តិមេ វា ជនបទេ ភជន្តិ។ តយិទំ ភិក្ខវេ ហោតិ ពហុជនាហិតាយ ពហុជនាសុខាយ ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ។ យស្មឹ ភិក្ខវេ សមយេ រាជានោ ពលវន្តោ ហោន្តិ ចោរា តស្មឹ សមយេ ទុព្វលា ហោន្តិ តស្មឹ ភិក្ខវេ សមយេ រញ្ញោ ផាសុ ហោតិ អតិយាតុំ វា និយ្យាតុំ វា បច្ចន្តិមេ វា ជនបទេ អនុសញ្ញាតុំ ព្រាហ្មណគហបតិកានំបិ តស្មឹ សមយេ ផាសុ ហោតិ អតិយាតុំ វា និយ្យាតុំ វា ពាហិរានិ វា កម្មន្តានិ បដិវេក្ខិតុំ។ ឯវមេវ ខោ ភិក្ខវេ យស្មឹ សមយេ បេសលា ភិក្ខូ ពលវន្តោ ហោន្តិ បាបកា ភិក្ខូ តស្មឹ សមយេ ទុព្វលា ហោន្តិ តស្មឹ ភិក្ខវេ សមយេ បាបភិក្ខូ តុណ្ហីភូតា តុណ្ហីភូតា វ សង្ឃមជ្ឈេ សំកសាយន្តិ យេន វា តេន វា បបតន្តិ [ម. យេន វាបន តេន បក្កមន្តិ។ ឱ. យេន វាបន តេន បបតន្តិ។]។ តយិទំ ភិក្ខវេ ហោតិ ពហុជនហិតាយ ពហុជនសុខាយ ពហុនោ ជនស្ស អត្ថាយ ហិតាយ សុខាយ ទេវមនុស្សានន្តិ។

[២៨៥] ទ្វិន្នាហំ ភិក្ខវេ មិច្ឆាបដិបត្តឹ ន វណ្ណេមិ គិហិស្ស វា បព្វជិតស្ស វា។ គិហី វា ភិក្ខវេ បព្វជិតោ វា មិច្ឆាបដិបន្នោ មិច្ឆាបដិបត្តាធិករណហេតុ នារាធកោ ហោតិ ញាយំ ធម្មំ កុសលំ។ ទ្វិន្នាហំ ភិក្ខវេ សម្មាបដិបត្តឹ វណ្ណេមិ គិហិស្ស វា បព្វជិតស្ស វា។ គិហី វា ភិក្ខវេ បព្វជិតោ វា សម្មាបដិបន្នោ សម្មាបដិបត្តាធិករណហេតុ អារាធកោ ហោតិ ញាយំ ធម្មំ កុសលន្តិ។

[២៨៦] យេ តេ ភិក្ខវេ ភិក្ខូ ទុគ្គហិតេហិ សុត្តន្តេហិ ព្យញ្ជនប្បដិរូបកេហិ អត្ថញ្ច ធម្មញ្ច បដិពាហន្តិ តេ ភិក្ខវេ ភិក្ខូ ពហុជនាហិតាយ បដិបន្នា ពហុជនាសុខាយ ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ ពហុញ្ច តេ ភិក្ខវេ ភិក្ខូ អបុញ្ញំ បសវន្តិ តេ ចិមំ សទ្ធម្មំ អន្តរធាបេន្តិ។ យេ តេ ភិក្ខវេ ភិក្ខូ សុគ្គហិតេហិ សុត្តន្តេហិ ព្យញ្ជនប្បដិរូបកេហិ អត្ថញ្ច ធម្មញ្ច អនុលោមេន្តិ តេ ភិក្ខវេ ភិក្ខូ ពហុជនហិតាយ បដិបន្នា ពហុជនសុខាយ ពហុនោ ជនស្ស អត្ថាយ ហិតាយ សុខាយ ទេវមនុស្សានំ ពហុញ្ច តេ ភិក្ខវេ ភិក្ខូ បុញ្ញំ បសវន្តិ តេ ចិមំ សទ្ធម្មំ ឋបេន្តីតិ។

សមចិត្តវគ្គោ ចតុត្ថោ។

[២៨៧] ទ្វេមា ភិក្ខវេ បរិសា។ កតមា ទ្វេ។ ឧត្តានា ច បរិសា គម្ភីរា ច បរិសា។ កតមា ច ភិក្ខវេ ឧត្តានា បរិសា។ ឥធ ភិក្ខវេ យស្សំ បរិសាយំ ភិក្ខូ ឧទ្ធតា ហោន្តិ ឧន្នឡា ចបលា មុខរា វិកិណ្ណវាចា មុដ្ឋស្សតី អសម្បជានា អសមាហិតា វិព្ភន្តចិត្តា បាកតិន្ទ្រិយា អយំ វុច្ចតិ ភិក្ខវេ ឧត្តានា បរិសា។ កតមា ច ភិក្ខវេ គម្ភីរា បរិសា។ ឥធ ភិក្ខវេ យស្សំ បរិសាយំ ភិក្ខូ អនុទ្ធតា ហោន្តិ អនុន្នឡា អចបលា អមុខរា អវិកិណ្ណវាចា ឧបដ្ឋិតស្សតី សម្បជានា សមាហិតា ឯកគ្គចិត្តា សំវុតិន្ទ្រិយា អយំ វុច្ចតិ ភិក្ខវេ គម្ភីរា បរិសា។ ឥមា ខោ ភិក្ខវេ ទ្វេ បរិសា។ ឯតទគ្គំ ភិក្ខវេ ឥមាសំ ទ្វិន្នំ បរិសានំ យទិទំ គម្ភីរា បរិសាតិ។

[២៨៨]. ទ្វេមា ភិក្ខវេ បរិសា។ កតមា ទ្វេ។ វគ្គា ច បរិសា សមគ្គា ច បរិសា។ កតមា ច ភិក្ខវេ វគ្គា បរិសា។ ឥធ ភិក្ខវេ យស្សំ បរិសាយំ ភិក្ខូ ភណ្ឌនជាតា កលហជាតា វិវាទាបន្នា អញ្ញមញ្ញំ មុខសត្តីហិ វិតុទន្តា វិហរន្តិ អយំ វុច្ចតិ ភិក្ខវេ វគ្គា បរិសា។ កតមា ច ភិក្ខវេ សមគ្គា បរិសា។ ឥធ ភិក្ខវេ យស្សំ បរិសាយំ ភិក្ខូ សមគ្គា សម្មោទមានា អវិវទមានា ខីរោទកីភូតា អញ្ញមញ្ញំ បិយចក្ខូហិ សម្បស្សន្តា វិហរន្តិ អយំ វុច្ចតិ ភិក្ខវេ សមគ្គា បរិសា។ ឥមា ខោ ភិក្ខវេ ទ្វេ បរិសា។ ឯតទគ្គំ ភិក្ខវេ ឥមាសំ ទ្វិន្នំ បរិសានំ យទិទំ សមគ្គា បរិសាតិ។

[២៨៩] ទ្វេមា ភិក្ខវេ បរិសា។ កតមា ទ្វេ។ អនគ្គវតី ច បរិសា អគ្គវតី ច បរិសា។ កតមា ច ភិក្ខវេ អនគ្គវតី បរិសា។ ឥធ ភិក្ខវេ យស្សំ បរិសាយំ ថេរា ភិក្ខូ ពាហុល្លិកា ហោន្តិ សាថលិកា វោក្កមនេ បុព្វង្គមា បវិវេកេ និក្ខិត្តធុរា ន វីរិយំ អារភន្តិ អប្បត្តស្ស បត្តិយា អនធិគតស្ស អធិគមាយ អសច្ឆិកតស្ស សច្ឆិកិរិយាយ តេសំ បច្ឆិមា ជនតា ទិដ្ឋានុគតឹ អាបជ្ជតិ សាបិ ហោតិ ពាហុល្លិកា សាថលិកា វោក្កមនេ បុព្វង្គមា បវិវេកេ និក្ខិត្តធុរា ន វីរិយំ អារភតិ អប្បត្តស្ស បត្តិយា អនធិគតស្ស អធិគមាយ អសច្ឆិកតស្ស សច្ឆិកិរិយាយ អយំ វុច្ចតិ ភិក្ខវេ អនគ្គវតី បរិសា។ កតមា ច ភិក្ខវេ អគ្គវតី បរិសា។ ឥធ ភិក្ខវេ យស្សំ បរិសាយំ ថេរា ភិក្ខូ ន ពាហុល្លិកា ហោន្តិ ន សាថលិកា វោក្កមនេ និក្ខិត្តធុរា បវិវេកេ បុព្វង្គមា វីរិយំ អារភន្តិ អប្បត្តស្ស បត្តិយា អនធិគតស្ស អធិគមាយ អសច្ឆិកតស្ស សច្ឆិកិរិយាយ តេសំ បច្ឆិមា ជនតា ទិដ្ឋានុគតឹ អាបជ្ជតិ សាបិ ហោតិ ន ពាហុល្លិកា ន សាថលិកា វោក្កមនេ និក្ខិត្តធុរា បវិវេកេ បុព្វង្គមា វីរិយំ អារភតិ អប្បត្តស្ស បត្តិយា អនធិគតស្ស អធិគមាយ អសច្ឆិកតស្ស សច្ឆិកិរិយាយ អយំ វុច្ចតិ ភិក្ខវេ អគ្គវតី បរិសា។ ឥមា ខោ ភិក្ខវេ ទ្វេ បរិសា។ ឯតទគ្គំ ភិក្ខវេ ឥមាសំ ទ្វិន្នំ បរិសានំ យទិទំ អគ្គវតី បរិសាតិ។

[២៩០] ទ្វេមា ភិក្ខវេ បរិសា។ កតមា ទ្វេ។ អនរិយា ច បរិសា អរិយា ច បរិសា។ កតមា ច ភិក្ខវេ អនរិយា បរិសា។ ឥធ ភិក្ខវេ យស្សំ បរិសាយំ ភិក្ខូ ឥទំ ទុក្ខន្តិ យថាភូតំ នប្បជានន្តិ អយំ ទុក្ខសមុទយោតិ យថាភូតំ នប្បជានន្តិ អយំ ទុក្ខនិរោធោតិ យថាភូតំ នប្បជានន្តិ អយំ ទុក្ខនិរោធគាមិនី បដិបទាតិ យថាភូតំ នប្បជានន្តិ អយំ វុច្ចតិ ភិក្ខវេ អនរិយា បរិសា។ កតមា ច ភិក្ខវេ អរិយា បរិសា។ ឥធ ភិក្ខវេ យស្សំ បរិសាយំ ភិក្ខូ ឥទំ ទុក្ខន្តិ យថាភូតំ បជានន្តិ អយំ ទុក្ខសមុទយោតិ យថាភូតំ បជានន្តិ អយំ ទុក្ខនិរោធោតិ យថាភូតំ បជានន្តិ អយំ ទុក្ខនិរោធគាមិនី បដិបទាតិ យថាភូតំ បជានន្តិ អយំ វុច្ចតិ ភិក្ខវេ អរិយា បរិសា។ ឥមា ខោ ភិក្ខវេ ទ្វេ បរិសា។ ឯតទគ្គំ ភិក្ខវេ ឥមាសំ ទ្វិន្នំ បរិសានំ យទិទំ អរិយា បរិសាតិ។

[២៩១] ទ្វេមា ភិក្ខវេ បរិសា។ កតមា ទ្វេ។ បរិសកសដោ ច បរិសមណ្ឌោ ច។ កតមោ ច ភិក្ខវេ បរិសកសដោ។ ឥធ ភិក្ខវេ យស្សំ បរិសាយំ ភិក្ខូ ឆន្ទាគតឹ គច្ឆន្តិ ទោសាគតឹ គច្ឆន្តិ មោហាគតឹ គច្ឆន្តិ ភយាគតឹ គច្ឆន្តិ អយំ វុច្ចតិ ភិក្ខវេ បរិសកសដោ។ កតមោ ច ភិក្ខវេ បរិសមណ្ឌោ។ ឥធ ភិក្ខវេ យស្សំ បរិសាយំ ភិក្ខូ ន ឆន្ទាគតឹ គច្ឆន្តិ ន ទោសាគតឹ គច្ឆន្តិ ន មោហាគតឹ គច្ឆន្តិ ន ភយាគតឹ គច្ឆន្តិ អយំ វុច្ចតិ ភិក្ខវេ បរិសមណ្ឌោ។ ឥមា ខោ ភិក្ខវេ ទ្វេ បរិសា។ ឯតទគ្គំ ភិក្ខវេ ឥមាសំ ទ្វិន្នំ បរិសានំ យទិទំ បរិសមណ្ឌោតិ។

[២៩២] ទ្វេមា ភិក្ខវេ បរិសា។ កតមា ទ្វេ។ ឧក្កាចិតវិនីតា បរិសា នោ បដិបុច្ឆាវិនីតា បដិបុច្ឆាវិនីតា បរិសា នោ ឧក្កាចិតវិនីតា។ កតមា ច ភិក្ខវេ ឧក្កាចិតវិនីតា បរិសា នោ បដិបុច្ឆាវិនីតា។ ឥធ ភិក្ខវេ យស្សំ បរិសាយំ ភិក្ខូ យេ តេ សុត្តន្តា តថាគតភាសិតា គម្ភីរា គម្ភីរត្ថា លោកុត្តរា សុញ្ញតប្បដិសំយុត្តា តេសុ ភញ្ញមានេសុ ន សុស្សូសន្តិ ន សោតំ ឱទហន្តិ ន អញ្ញាចិត្តំ ឧបដ្ឋាបេន្តិ ន ច តេ ធម្មេ ឧគ្គហេតព្វំ បរិយាបុណិតព្វំ មញ្ញន្តិ យេ បន តេ សុត្តន្តា កវិកតា កាវេយ្យា ចិត្តក្ខរា ចិត្តព្យញ្ជនា ពាហិរកា សាវកភាសិតា តេសុ ភញ្ញមានេសុ សុស្សូសន្តិ សោតំ ឱទហន្តិ អញ្ញាចិត្តំ ឧបដ្ឋាបេន្តិ តេ ច ធម្មេ ឧគ្គហេតព្វំ បរិយាបុណិតព្វំ មញ្ញន្តិ តេ តំ ធម្មំ បរិយាបុណិត្វា ន ចេវ អញ្ញមញ្ញំ បដិបុច្ឆន្តិ ន បដិវិវរន្តិ ឥទំ កថមិមស្ស ក្វត្ថោតិ តេ អវិវដញ្ចេវ ន វិវរន្តិ អនុត្តានីកតញ្ច ន ឧត្តានីករោន្តិ អនេកវិហិតេសុ ច កង្ខាឋានីយេសុ ធម្មេសុ កង្ខំ នប្បដិវិនោទេន្តិ អយំ វុច្ចតិ ភិក្ខវេ ឧក្កាចិតវិនីតា បរិសា នោ បដិបុច្ឆាវិនីតា។ កតមា ច ភិក្ខវេ បដិបុច្ឆាវិនីតា បរិសា នោ ឧក្កាចិតវិនីតា។ ឥធ ភិក្ខវេ យស្សំ បរិសាយំ ភិក្ខូ យេ តេ សុត្តន្តា កវិកតា កាវេយ្យា ចិត្តក្ខរា ចិត្តព្យញ្ជនា ពាហិរកា សាវកភាសិតា តេសុ ភញ្ញមានេសុ ន សុស្សូសន្តិ ន សោតំ ឱទហន្តិ ន អញ្ញាចិត្តំ ឧបដ្ឋាបេន្តិ ន ច តេ ធម្មេ ឧគ្គហេតព្វំ បរិយាបុណិតព្វំ មញ្ញន្តិ យេ បន តេ សុត្តន្តា តថាគតភាសិតា គម្ភីរា គម្ភីរត្ថា លោកុត្តរា សុញ្ញតប្បដិសំយុត្តា តេសុ ភញ្ញមានេសុ សុស្សូសន្តិ សោតំ ឱទហន្តិ អញ្ញាចិត្តំ ឧបដ្ឋាបេន្តិ តេ ច ធម្មេ ឧគ្គហេតព្វំ បរិយាបុណិតព្វំ មញ្ញន្តិ តេ តំ ធម្មំ បរិយាបុណិត្វា អញ្ញមញ្ញំ បដិបុច្ឆន្តិ បដិវិវរន្តិ ឥទំ កថមិមស្ស ក្វត្ថោតិ តេ អវិវដញ្ចេវ វិវរន្តិ អនុត្តានីកតញ្ច ឧត្តានីករោន្តិ អនេកវិហិតេសុ ច កង្ខាឋានីយេសុ ធម្មេសុ កង្ខំ បដិវិនោទេន្តិ អយំ វុច្ចតិ ភិក្ខវេ បដិបុច្ឆាវិនីតា បរិសា នោ ឧក្កាចិតវិនីតា។ ឥមា ខោ ភិក្ខវេ ទ្វេ បរិសា។ ឯតទគ្គំ ភិក្ខវេ ឥមាសំ ទ្វិន្នំ បរិសានំ យទិទំ បដិបុច្ឆាវិនីតា បរិសា នោ ឧក្កាចិតវិនីតាតិ។

[២៩៣] ទ្វេមា ភិក្ខវេ បរិសា។ កតមា ទ្វេ។ អាមិសគរុ បរិសា នោ សទ្ធម្មគរុ សទ្ធម្មគរុ បរិសា នោ អាមិសគរុ។ កតមា ច ភិក្ខវេ អាមិសគរុ បរិសា នោ សទ្ធម្មគរុ។ ឥធ ភិក្ខវេ យស្សំ បរិសាយំ ភិក្ខូ គិហីនំ ឱទាតវសនានំ សម្មុខា អញ្ញមញ្ញស្ស វណ្ណំ ភាសន្តិ អសុកោ ភិក្ខុ ឧភតោភាគវិមុត្តោ អសុកោ បញ្ញាវិមុត្តោ អសុកោ កាយសក្ខី អសុកោ ទិដ្ឋិប្បត្តោ អសុកោ សទ្ធាវិមុត្តោ អសុកោ ធម្មានុសារី អសុកោ សទ្ធានុសារី អសុកោ សីលវា កល្យាណធម្មោ អសុកោ ទុស្សីលោ បាបធម្មោតិ តេ តេន លាភំ លភន្តិ តេ តំ លាភំ លភិត្វា គធិតា មុច្ឆិតា អជ្ឈោបន្នា អនាទីនវទស្សាវិនោ អនិស្សរណប្បញ្ញា បរិភុញ្ជន្តិ អយំ វុច្ចតិ ភិក្ខវេ អាមិសគរុ បរិសា នោ សទ្ធម្មគរុ។ កតមា ច ភិក្ខវេ សទ្ធម្មគរុ បរិសា នោ អាមិសគរុ។ ឥធ ភិក្ខវេ យស្សំ បរិសាយំ ភិក្ខូ ន គិហីនំ ឱទាតវសនានំ សម្មុខា អញ្ញមញ្ញស្ស វណ្ណំ ភាសន្តិ អសុកោ ភិក្ខុ ឧភតោភាគវិមុត្តោ អសុកោ បញ្ញាវិមុត្តោ អសុកោ កាយសក្ខី អសុកោ ទិដ្ឋិប្បត្តោ អសុកោ សទ្ធាវិមុត្តោ អសុកោ ធម្មានុស្សារី អសុកោ សទ្ធានុសារី អសុកោ សីលវា កល្យាណធម្មោ អសុកោ ទុស្សីលោ បាបធម្មោតិ។ តេ តេន លាភំ លភន្តិ តេ តំ លាភំ លភិត្វា អគធិតា អមុច្ឆិតា អនជ្ឈោបន្នា អាទីនវទស្សាវិនោ និស្សរណប្បញ្ញា បរិភុញ្ជន្តិ អយំ វុច្ចតិ ភិក្ខវេ សទ្ធម្មគរុ បរិសា នោ អាមិសគរុ។ ឥមា ខោ ភិក្ខវេ ទ្វេ បរិសា។ ឯតទគ្គំ ភិក្ខវេ ឥមាសំ ទ្វិន្នំ បរិសានំ យទិទំ សទ្ធម្មគរុ បរិសា នោ អាមិសគរូតិ។

[២៩៤] ទ្វេមា ភិក្ខវេ បរិសា។ កតមា ទ្វេ។ វិសមា ច បរិសា សមា ច បរិសា។ កតមា ច ភិក្ខវេ វិសមា បរិសា។ ឥធ ភិក្ខវេ យស្សំ បរិសាយំ អធម្មកម្មានិ បវត្តន្តិ ធម្មកម្មានិ នប្បវត្តន្តិ អវិនយកម្មានិ បវត្តន្តិ វិនយកម្មានិ នប្បវត្តន្តិ អធម្មកម្មានិ ទិប្បន្តិ ធម្មកម្មានិ ន ទិប្បន្តិ អវិនយកម្មានិ ទិប្បន្តិ វិនយកម្មានិ ន ទិប្បន្តិ អយំ វុច្ចតិ ភិក្ខវេ វិសមា បរិសា។ វិសមត្តា ភិក្ខវេ បរិសាយ អធម្មកម្មានិ បវត្តន្តិ ធម្មកម្មានិ នប្បវត្តន្តិ អវិនយកម្មានិ បវត្តន្តិ វិនយកម្មានិ នប្បវត្តន្តិ អធម្មកម្មានិ ទិប្បន្តិ ធម្មកម្មានិ ន ទិប្បន្តិ អវិនយកម្មានិ ទិប្បន្តិ វិនយកម្មានិ ន ទិប្បន្តិ។ កតមា ច ភិក្ខវេ សមា បរិសា។ ឥធ ភិក្ខវេ យស្សំ បរិសាយំ ធម្មកម្មានិ បវត្តន្តិ អធម្មកម្មានិ នប្បវត្តន្តិ វិនយកម្មានិ បវត្តន្តិ អវិនយកម្មានិ នប្បវត្តន្តិ ធម្មកម្មានិ ទិប្បន្តិ អធម្មកម្មានិ ន ទិប្បន្តិ វិនយកម្មានិ ទិប្បន្តិ អវិនយកម្មានិ ន ទិប្បន្តិ អយំ វុច្ចតិ ភិក្ខវេ សមា បរិសា។ សមត្តា ភិក្ខវេ បរិសាយ ធម្មកម្មានិ បវត្តន្តិ អធម្មកម្មានិ នប្បវត្តន្តិ វិនយកម្មានិ បវត្តន្តិ អវិនយកម្មានិ នប្បវត្តន្តិ ធម្មកម្មានិ ទិប្បន្តិ អធម្មកម្មានិ ន ទិប្បន្តិ វិនយកម្មានិ ទិប្បន្តិ អវិនយកម្មានិ ន ទិប្បន្តិ។ ឥមា ខោ ភិក្ខវេ ទ្វេ បរិសា។ ឯតទគ្គំ ភិក្ខវេ ឥមាសំ ទ្វិន្នំ បរិសានំ យទិទំ សមា បរិសាតិ។

[២៩៥] ទ្វេមា ភិក្ខវេ បរិសា។ កតមា ទ្វេ។ អធម្មិកា ច បរិសា ធម្មិកា ច បរិសា។បេ។ ឥមា ខោ ភិក្ខវេ ទ្វេ បរិសា។ ឯតទគ្គំ ភិក្ខវេ ឥមាសំ ទ្វិន្នំ បរិសានំ យទិទំ ធម្មិកា បរិសាតិ។

[២៩៦] ទ្វេមា ភិក្ខវេ បរិសា។ កតមា ទ្វេ។ អធម្មវាទិនី ច បរិសា ធម្មវាទិនី ច បរិសា។ កតមា ច ភិក្ខវេ អធម្មវាទិនី បរិសា។ ឥធ ភិក្ខវេ យស្សំ បរិសាយំ ភិក្ខូ អធិករណំ អាទិយន្តិ ធម្មិកំ វា អធម្មិកំ វា តេ តំ អធិករណំ អាទិយិត្វា ន ចេវ អញ្ញមញ្ញំ សញ្ញាបេន្តិ ន ច សញ្ញត្តឹ ឧបគច្ឆន្តិ ន ច និជ្ឈាបេន្តិ ន ច និជ្ឈត្តឹ ឧបគច្ឆន្តិ តេ អសញ្ញត្តិពលា អនិជ្ឈត្តិពលា អប្បដិនិស្សគ្គមន្តិនោ តមេវ អធិករណំ ថាមសា បរាមស្ស [ម. បរាមសា។] អភិនិវិស្ស វោហរន្តិ ឥទមេវ សច្ចំ មោឃមញ្ញន្តិ អយំ វុច្ចតិ ភិក្ខវេ អធម្មវាទិនី បរិសា។ កតមា ច ភិក្ខវេ ធម្មវាទិនី បរិសា។ ឥធ ភិក្ខវេ យស្សំ បរិសាយំ ភិក្ខូ អធិករណំ អាទិយន្តិ ធម្មិកំ វា អធម្មិកំ វា តេ តំ អធិករណំ អាទិយិត្វា អញ្ញមញ្ញំ សញ្ញាបេន្តិ ចេវ សញ្ញត្តិញ្ច ឧបគច្ឆន្តិ និជ្ឈាបេន្តិ ចេ និជ្ឈត្តិញ្ច ឧបគច្ឆន្តិ តេ សញ្ញត្តិពលា និជ្ឈត្តិពលា បដិនិស្សគ្គមន្តិនោ ន តមេវ អធិករណំ ថាមសា បរាមស្ស [ម. បរាមសា។] អភិនិវិស្ស វោហរន្តិ ឥទមេវ សច្ចំ មោឃមញ្ញន្តិ អយំ វុច្ចតិ ភិក្ខវេ ធម្មវាទិនី បរិសា។ ឥមា ខោ ភិក្ខវេ ទ្វេ បរិសា។ ឯតទគ្គំ ភិក្ខវេ ឥមាសំ ទ្វិន្នំ បរិសានំ យទិទំ ធម្មវាទិនី បរិសាតិ។

បរិសវគ្គោ បញ្ចមោ។

បណ្ណាសកោ បឋមោ សមត្តោ។

ទុតិយបណ្ណាសកោ

[២៩៧] ទ្វេមេ ភិក្ខវេ បុគ្គលា លោកេ ឧប្បជ្ជមានា ឧប្បជ្ជន្តិ ពហុជនហិតាយ ពហុជនសុខាយ ពហុនោ ជនស្ស អត្ថាយ ហិតាយ សុខាយ ទេវមនុស្សានំ។ កតមេ ទ្វេ។ តថាគតោ ច អរហំ សម្មាសម្ពុទ្ធោ រាជា ច ចក្កវត្តី។ ឥមេ ខោ ភិក្ខវេ ទ្វេ បុគ្គលា លោកេ ឧប្បជ្ជមានា ឧប្បជ្ជន្តិ ពហុជនហិតាយ ពហុជនសុខាយ ពហុនោ ជនស្ស អត្ថាយ ហិតាយ សុខាយ ទេវមនុស្សានន្តិ។

[២៩៨] ទ្វេមេ ភិក្ខវេ បុគ្គលា លោកេ ឧប្បជ្ជមានា ឧប្បជ្ជន្តិ អច្ឆរិយមនុស្សា។ កតមេ ទ្វេ។ តថាគតោ ច អរហំ សម្មាសម្ពុទ្ធោ រាជា ច ចក្កវត្តី។ ឥមេ ខោ ភិក្ខវេ ទ្វេ បុគ្គលា លោកេ ឧប្បជ្ជមានា ឧប្បជ្ជន្តិ អច្ឆរិយមនុស្សាតិ។

[២៩៩] ទ្វិន្នំ ភិក្ខវេ បុគ្គលានំ កាលកិរិយា ពហុនោ ជនស្ស អនុតប្បា [ម. អនុតប្បោ។] ហោតិ។ កតមេសំ ទ្វិន្នំ។ តថាគតស្ស ច អរហតោ សម្មាសម្ពុទ្ធស្ស រញ្ញោ ច ចក្កវត្តិស្ស។ ឥមេសំ ខោ ភិក្ខវេ ទ្វិន្នំ បុគ្គលានំ កាលកិរិយា ពហុនោ ជនស្ស អនុតប្បា ហោតីតិ។

[៣០០] ទ្វេមេ ភិក្ខវេ ថូបារហា។ កតមេ ទ្វេ។ តថាគតោ ច អរហំ សម្មាសម្ពុទ្ធោ រាជា ច ចក្កវត្តី។ ឥមេ ខោ ភិក្ខវេ ទ្វេ ថូបារហាតិ។

[៣០១] ទ្វេមេ ភិក្ខវេ ពុទ្ធា។ កតមេ ទ្វេ។ តថាគតោ ច អរហំ សម្មាសម្ពុទ្ធោ បច្ចេកពុទ្ធោ ច។ ឥមេ ខោ ភិក្ខវេ ទ្វេ ពុទ្ធាតិ។

[៣០២] ទ្វេមេ ភិក្ខវេ អសនិយា ផលន្តិយា ន សន្តសន្តិ។ កតមេ ទ្វេ។ ភិក្ខុ ច ខីណាសវោ ហត្ថាជានីយោ ច។ ឥមេ ខោ ភិក្ខវេ ទ្វេ អសនិយា ផលន្តិយា ន សន្តសន្តីតិ។

[៣០៣] ទ្វេមេ ភិក្ខវេ អសនិយា ផលន្តិយា ន សន្តសន្តិ។ កតមេ ទ្វេ។ ភិក្ខុ ច ខីណាសវោ អស្សាជានីយោ ច។ ឥមេ ខោ ភិក្ខវេ ទ្វេ អសនិយា ផលន្តិយា ន សន្តសន្តីតិ។

[៣០៤] ទ្វេមេ ភិក្ខវេ អសនិយា ផលន្តិយា ន សន្តសន្តិ។ កតមេ ទ្វេ។ ភិក្ខុ ច ខីណាសវោ សីហោ ច មិគរាជា។ ឥមេ ខោ ភិក្ខវេ ទ្វេ អសនិយា ផលន្តិយា ន សន្តសន្តីតិ។

[៣០៥] ទ្វេមេ ភិក្ខវេ អត្ថវសេ សម្បស្សមានា កឹបុរិសា មានុសឹ វាចំ ន ភាសន្តិ។ កតមេ ទ្វេ។ មា ច មុសា ភណិម្ហា មា ច បរំ អភូតេន អព្ភាចិក្ខិម្ហាតិ។ ឥមេ ខោ ភិក្ខវេ ទ្វេ អត្ថវសេ សម្បស្សមានា កឹបុរិសា មានុសឹ វាចំ ន ភាសន្តីតិ។

[៣០៦] ទ្វិន្នំ ភិក្ខវេ ធម្មានំ អតិត្តោ អប្បដិវាណោ មាតុគ្គាមោ កាលំ ករោតិ។ កតមេសំ ទ្វិន្នំ។ មេថុនធម្មសហបត្តិយា ច វិជាយនស្ស ច។ ឥមេសំ ខោ ភិក្ខវេ ទ្វិន្នំ ធម្មានំ អតិត្តោ អប្បដិវាណោ មាតុគ្គាមោ កាលំ ករោតីតិ។

[៣០៧] អសន្តសន្និវាសញ្ច វោ ភិក្ខវេ ទេសេស្សាមិ សន្តសន្និវាសញ្ច តំ សុណាថ សាធុកំ មនសិករោថ ភាសិស្សាមីតិ។ ឯវំ ភន្តេតិ ខោ តេ ភិក្ខូ ភគវតោ បច្ចស្សោសុំ។ ភគវា ឯតទវោច កថញ្ច ភិក្ខវេ អសន្តសន្និវាសោ ហោតិ កថញ្ច អសន្តោ សន្និវសន្តិ។ ឥធ ភិក្ខវេ ថេរស្ស ភិក្ខុនោ ឯវំ ហោតិ ថេរោបិ មំ ន វទេយ្យ មជ្ឈិមោបិ មំ ន វទេយ្យ នវោបិ មំ ន វទេយ្យ ថេរំបាហំ ន វទេយ្យំ មជ្ឈិមំបាហំ ន វទេយ្យំ នវំបាហំ ន វទេយ្យំ ថេរោ ចេបិ មំ វទេយ្យ អហិតានុកម្បី មំ វទេយ្យ នោ ហិតានុកម្បី នោតិ នំ វទេយ្យំ វិហេសេយ្យំបិ នំ បស្សម្បិស្ស ន បដិករេយ្យំ មជ្ឈិមោ ចេបិ មំ វទេយ្យ នវោ ចេបិ មំ វទេយ្យ អហិតានុកម្បី មំ វទេយ្យ នោ ហិតានុកម្បី នោតិ នំ វទេយ្យំ វិហេសេយ្យំបិ [ម. វិហេធេយ្យំ។] នំ បស្សម្បិស្ស ន បដិករេយ្យំ មជ្ឈិមស្សបិ ភិក្ខុនោ ឯវំ ហោតិ។បេ។ នវស្សបិ ភិក្ខុនោ ឯវំ ហោតិ ថេរោបិ មំ ន វទេយ្យំ មជ្ឈិមោបិ មំ ន វទេយ្យ នវោបិ មំ ន វទេយ្យ ថេរំបាហំ ន វទេយ្យំ មជ្ឈិមំបាហំ ន វទេយ្យំ នវំបាហំ ន វទេយ្យំ ថេរោ ចេបិ មំ វទេយ្យ អហិតានុកម្បី មំ វទេយ្យ នោ ហិតានុកម្បី នោតិ នំ វទេយ្យំ វិហេសេយ្យំបិ នំ បស្សម្បិស្ស ន បដិករេយ្យំ មជ្ឈិមោ ចេបិ មំ វទេយ្យ… នវោ ចេបិ មំ វទេយ្យ អហិតានុកម្បី មំ វទេយ្យ នោ ហិតានុកម្បី នោតិ នំ វទេយ្យំ វិហេសេយ្យំបិ នំ បស្សម្បិស្ស ន បដិករេយ្យំ។ ឯវំ ខោ ភិក្ខវេ អសន្តសន្និវាសោ ហោតិ ឯវញ្ច អសន្តោ សន្និវសន្តិ។ កថញ្ច ភិក្ខវេ សន្តសន្និវាសោ ហោតិ កថញ្ច សន្តោ សន្និវសន្តិ។ ឥធ ភិក្ខវេ ថេរស្ស ភិក្ខុនោ ឯវំ ហោតិ ថេរោបិ មំ វទេយ្យ មជ្ឈិមោបិ មំ វទេយ្យ នវោបិ មំ វទេយ្យ ថេរំបាហំ វទេយ្យំ មជ្ឈិមំបាហំ វទេយ្យំ នវំបាហំ វទេយ្យំ ថេរោ ចេបិ មំ វទេយ្យ ហិតានុកម្បី មំ វទេយ្យ នោ អហិតានុកម្បី សាធូតិ នំ វទេយ្យំ ន នំ វិហេសេយ្យំ បស្សម្បិស្ស បដិករេយ្យំ មជ្ឈិមោ ចេបិ មំ វទេយ្យ… នវោ ចេបិ មំ វទេយ្យ ហិតានុកម្បី មំ វទេយ្យ នោ អហិតានុកម្បី សាធូតិ នំ វទេយ្យំ ន នំ វិហេសេយ្យំ បស្សម្បិស្ស បដិករេយ្យំ មជ្ឈិមស្ស ភិក្ខុនោ ឯវំ ហោតិ។បេ។ នវស្សបិ ភិក្ខុនោ ឯវំ ហោតិ ថេរោបិ មំ វទេយ្យ មជ្ឈិមោបិ មំ វទេយ្យ នវោបិ មំ វទេយ្យ ថេរំបាហំ វទេយ្យំ មជ្ឈិមំបាហំ វទេយ្យំ នវំបាហំ វទេយ្យំ ថេរោ ចេបិ មំ វទេយ្យ ហិតានុកម្បី មំ វទេយ្យ នោ អហិតានុកម្បី សាធូតិ នំ វទេយ្យំ ន នំ វិហេសេយ្យំ បស្សម្បិស្ស បដិករេយ្យំ មជ្ឈិមោ ចេបិ មំ វទេយ្យ… នវោ ចេបិ មំ វទេយ្យ ហិតានុកម្បី មំ វទេយ្យ នោ អហិតានុកម្បី សាធូតិ នំ វទេយ្យំ ន នំ វិហេសេយ្យំ បស្សម្បិស្ស បដិករេយ្យំ។ ឯវំ ខោ ភិក្ខវេ សន្តសន្និវាសោ ហោតិ ឯវញ្ច សន្តោ សន្និវសន្តីតិ។

[៣០៨] យស្មឹ ភិក្ខវេ អធិករណេ ឧភតោវចីសំសារោ ទិដ្ឋិបលាសោ ចេតសោ អាឃាតោ អប្បច្ចយោ អនភិរទ្ធិ អជ្ឈត្តំ អបវូសន្តំ [ម. អវូបសន្តោ។] ហោតិ តស្មេតំ ភិក្ខវេ អធិករណេ បាដិកង្ខំ ទីឃត្តាយ ខរត្តាយ វាឡត្តាយ សំវត្តិស្សតិ ភិក្ខូ ច ន ផាសុំ វិហរិស្សន្តិ។ យស្មឹ ច ខោ ភិក្ខវេ អធិករណេ ឧភតោវចីសំសារោ ទិដ្ឋិបលាសោ ចេតសោ អាឃាតោ អប្បច្ចយោ អនភិរទ្ធិ អជ្ឈត្តំ សុវូបសន្តំ ហោតិ តស្មេតំ ភិក្ខវេ អធិករណេ បាដិកង្ខំ ន ទីឃត្តាយ ខរត្តាយ វាឡត្តាយ សំវត្តិស្សតិ ភិក្ខូ ច ផាសុំ វិហរិស្សន្តីតិ។

បុគ្គលវគ្គោ បឋមោ.[ឱ. បុគ្គលវគ្គោ ឆដ្ឋោ។។

[៣០៩] ទ្វេមានិ ភិក្ខវេ សុខានិ។ កតមានិ ទ្វេ។ គិហិសុខញ្ច បព្វជ្ជាសុខញ្ច។ ឥមានិ ខោ ភិក្ខវេ ទ្វេ សុខានិ។ ឯតទគ្គំ ភិក្ខវេ ឥមេសំ ទ្វិន្នំ សុខានំ យទិទំ បព្វជ្ជាសុខន្តិ។

[៣១០] ទ្វេមានិ ភិក្ខវេ សុខានិ។ កតមានិ ទ្វេ។ កាមសុខញ្ច នេក្ខម្មសុខញ្ច។ ឥមានិ ខោ ភិក្ខវេ ទ្វេ សុខានិ។ ឯតទគ្គំ ភិក្ខវេ ឥមេសំ ទ្វិន្នំ សុខានំ យទិទំ នេក្ខម្មសុខន្តិ។

[៣១១] ទ្វេមានិ ភិក្ខវេ សុខានិ។ កតមានិ ទ្វេ។ ឧបធិសុខញ្ច និរុបធិសុខញ្ច។ ឥមានិ ខោ ភិក្ខវេ ទ្វេ សុខានិ។ ឯតទគ្គំ ភិក្ខវេ ឥមេសំ ទ្វិន្នំ សុខានំ យទិទំ និរុបធិសុខន្តិ។

[៣១២] ទ្វេមានិ ភិក្ខវេ សុខានិ។ កតមានិ ទ្វេ។ សាសវញ្ច សុខំ អនាសវញ្ច សុខំ។ ឥមានិ ខោ ភិក្ខវេ ទ្វេ សុខានិ។ ឯតទគ្គំ ភិក្ខវេ ឥមេសំ ទ្វិន្នំ សុខានំ យទិទំ អនាសវសុខន្តិ។

[៣១៣] ទ្វេមានិ ភិក្ខវេ សុខានិ។ កតមានិ ទ្វេ។ សាមិសញ្ច សុខំ និរាមិសញ្ច សុខំ។ ឥមានិ ខោ ភិក្ខវេ ទ្វេ សុខានិ។ ឯតទគ្គំ ភិក្ខវេ ឥមេសំ ទ្វិន្នំ សុខានំ យទិទំ និរាមិសំ សុខន្តិ។

[៣១៤] ទ្វេមានិ ភិក្ខវេ សុខានិ។ កតមានិ ទ្វេ។ អរិយសុខញ្ច អនរិយសុខញ្ច។ ឥមានិ ខោ ភិក្ខវេ ទ្វេ សុខានិ។ ឯតទគ្គំ ភិក្ខវេ ឥមេសំ ទ្វិន្នំ សុខានំ យទិទំ អរិយសុខន្តិ។

[៣១៥] ទ្វេមានិ ភិក្ខវេ សុខានិ។ កតមានិ ទ្វេ។ កាយិកញ្ច សុខំ ចេតសិកញ្ច សុខំ។ ឥមានិ ខោ ភិក្ខវេ ទ្វេ សុខានិ។ ឯតទគ្គំ ភិក្ខវេ ឥមេសំ ទ្វិន្នំ សុខានំ យទិទំ ចេតសិកំ សុខន្តិ។

[៣១៦] ទ្វេមានិ ភិក្ខវេ សុខានិ។ កតមានិ ទ្វេ។ សប្បីតិកញ្ច សុខំ និប្បីតិកញ្ច សុខំ។ ឥមានិ ខោ ភិក្ខវេ ទ្វេ សុខានិ។ ឯតទគ្គំ ភិក្ខវេ ឥមេសំ ទ្វិន្នំ សុខានំ យទិទំ និប្បីតិកំ សុខន្តិ។

[៣១៧] ទ្វេមានិ ភិក្ខវេ សុខានិ។ កតមានិ ទ្វេ។ សាតសុខញ្ច ឧបេក្ខាសុខញ្ច។ ឥមានិ ខោ ភិក្ខវេ ទ្វេ សុខានិ។ ឯតទគ្គំ ភិក្ខវេ ឥមេសំ ទ្វិន្នំ សុខានំ យទិទំ ឧបេក្ខាសុខន្តិ។

[៣១៨] ទ្វេមានិ ភិក្ខវេ សុខានិ។ កតមានិ ទ្វេ។ សមាធិសុខញ្ច អសមាធិសុខញ្ច។ ឥមានិ ខោ ភិក្ខវេ ទ្វេ សុខានិ។ ឯតទគ្គំ ភិក្ខវេ ឥមេសំ ទ្វិន្នំ សុខានំ យទិទំ សមាធិសុខន្តិ។

[៣១៩] ទ្វេមានិ ភិក្ខវេ សុខានិ។ កតមានិ ទ្វេ។ សប្បីតិការម្មណញ្ច សុខំ និប្បីតិការម្មណញ្ច សុខំ។ ឥមានិ ខោ ភិក្ខវេ ទ្វេ សុខានិ។ ឯតទគ្គំ ភិក្ខវេ ឥមេសំ ទ្វិន្នំ សុខានំ យទិទំ និប្បីតិការម្មណំ សុខន្តិ។

[៣២០] ទ្វេមានិ ភិក្ខវេ សុខានិ។ កតមានិ ទ្វេ។ សាតារម្មណញ្ច សុខំ ឧបេក្ខារម្មណញ្ច សុខំ។ ឥមានិ ខោ ភិក្ខវេ ទ្វេ សុខានិ។ ឯតទគ្គំ ភិក្ខវេ ឥមេសំ ទ្វិន្នំ សុខានំ យទិទំ ឧបេក្ខារម្មណំ សុខន្តិ។

[៣២១] ទ្វេមានិ ភិក្ខវេ សុខានិ។ កតមានិ ទ្វេ។ រូបារម្មណញ្ច សុខំ អរូបារម្មណញ្ច សុខំ។ ឥមានិ ខោ ភិក្ខវេ ទ្វេ សុខានិ។ ឯតទគ្គំ ភិក្ខវេ ឥមេសំ ទ្វិន្នំ សុខានំ យទិទំ អរូបារម្មណំ សុខន្តិ។

សុខវគ្គោ ទុតិយោ។

[៣២២] សនិមិត្តា ភិក្ខវេ ឧប្បជ្ជន្តិ បាបកា អកុសលា ធម្មា នោ អនិមិត្តា។ តស្សេវ និមិត្តស្ស បហានា ឯវន្តេ បាបកា អកុសលា ធម្មា ន ហោន្តីតិ។

[៣២៣] សនិទានា ភិក្ខវេ ឧប្បជ្ជន្តិ បាបកា អកុសលា ធម្មា នោ អនិទានា។ តស្សេវ និទានស្ស បហានា ឯវន្តេ បាបកា អកុសលា ធម្មា ន ហោន្តីតិ។

[៣២៤] សហេតុកា ភិក្ខវេ ឧប្បជ្ជន្តិ បាបកា អកុសលា ធម្មា នោ អហេតុកា។ តស្សេវ ហេតុស្ស បហានា ឯវន្តេ បាបកា អកុសលា ធម្មា ន ហោន្តីតិ។

[៣២៥] សសង្ខារា ភិក្ខវេ ឧប្បជ្ជន្តិ បាបកា អកុសលា ធម្មា នោ អសង្ខារា។ តេសំយេវ សង្ខារានំ បហានា ឯវន្តេ បាបកា អកុសលា ធម្មា ន ហោន្តីតិ។

[៣២៦] សប្បច្ចយា ភិក្ខវេ ឧប្បជ្ជន្តិ បាបកា អកុសលា ធម្មា នោ អប្បច្ចយា។ តស្សេវ បច្ចយស្ស បហានា ឯវន្តេ បាបកា អកុសលា ធម្មា ន ហោន្តីតិ។

[៣២៧]សរូបា ភិក្ខវេ ឧប្បជ្ជន្តិ បាបកា អកុសលា ធម្មា នោ អរូបា។ តស្សេវ រូបស្ស បហានា ឯវន្តេ បាបកា អកុសលា ធម្មា ន ហោន្តីតិ។

[៣២៨] សវេទនា ភិក្ខវេ ឧប្បជ្ជន្តិ បាបកា អកុសលា ធម្មា នោ អវេទនា។ តស្សាយេវ វេទនាយ បហានា ឯវន្តេ បាបកា អកុសលា ធម្មា ន ហោន្តីតិ។

[៣២៩] សសញ្ញា ភិក្ខវេ ឧប្បជ្ជន្តិ បាបកា អកុសលា ធម្មា នោ អសញ្ញា។ តស្សាយេវ សញ្ញាយ បហានា ឯវន្តេ បាបកា អកុសលា ធម្មា ន ហោន្តីតិ។

[៣៣០] សវិញ្ញាណា ភិក្ខវេ ឧប្បជ្ជន្តិ បាបកា អកុសលា ធម្មា នោ អវិញ្ញាណា។ តស្សេវ វិញ្ញាណស្ស បហានា ឯវន្តេ បាបកា អកុសលា ធម្មា ន ហោន្តីតិ។

[៣៣១] សង្ខតារម្មណា ភិក្ខវេ ឧប្បជ្ជន្តិ បាបកា អកុសលា ធម្មា នោ អសង្ខតារម្មណា។ តស្សេវ សង្ខតស្ស បហានា ឯវន្តេ បាបកា អកុសលា ធម្មា ន ហោន្តីតិ។

សនិមិត្តវគ្គោ តតិយោ។

[៣៣២] ទ្វេមេ ភិក្ខវេ ធម្មា។ កតមេ ទ្វេ។ ចេតោវិមុត្តិ ច បញ្ញាវិមុត្តិ ច។ ឥមេ ខោ ភិក្ខវេ ទ្វេ ធម្មាតិ។

[៣៣៣] ទ្វេមេ ភិក្ខវេ ធម្មា។ កតមេ ទ្វេ។ បគ្គាហោ ច អវិក្ខេបោ ច។ ឥមេ ខោ ភិក្ខវេ ទ្វេ ធម្មាតិ។

[៣៣៤] ទ្វេមេ ភិក្ខវេ ធម្មា។ កតមេ ទ្វេ។ នាមញ្ច រូបញ្ច។ ឥមេ ខោ ភិក្ខវេ ទ្វេ ធម្មាតិ។

[៣៣៥] ទ្វេមេ ភិក្ខវេ ធម្មា។ កតមេ ទ្វេ។ វិជ្ជា ច វិមុត្តិ ច។ ឥមេ ខោ ភិក្ខវេ ទ្វេ ធម្មាតិ។

[៣៣៦] ទ្វេមេ ភិក្ខវេ ធម្មា។ កតមេ ទ្វេ។ ភវទិដ្ឋិ ច វិភវទិដ្ឋិ ច។ ឥមេ ខោ ភិក្ខវេ ទ្វេ ធម្មាតិ។

[៣៣៧] ទ្វេមេ ភិក្ខវេ ធម្មា។ កតមេ ទ្វេ។ អហិរិកញ្ច អនោត្តប្បញ្ច។ ឥមេ ខោ ភិក្ខវេ ទ្វេ ធម្មាតិ។

[៣៣៨] ទ្វេមេ ភិក្ខវេ ធម្មា។ កតមេ ទ្វេ។ ហិរិ [ហ្រី ឥតិ សក្កដភាសានុវត្តនេន ហិរី ឥតិបិ បាឋោ។] ច ឱត្តប្បញ្ច។ ឥមេ ខោ ភិក្ខវេ ទ្វេ ធម្មាតិ។

[៣៣៩] ទ្វេមេ ភិក្ខវេ ធម្មា។ កតមេ ទ្វេ។ ទោវចស្សតា ច បាបមិត្តតា ច។ ឥមេ ខោ ភិក្ខវេ ទ្វេ ធម្មាតិ។

[៣៤០] ទ្វេមេ ភិក្ខវេ ធម្មា។ កតមេ ទ្វេ។ សោវចស្សតា ច កល្យាណមិត្តតា ច។ ឥមេ ខោ ភិក្ខវេ ទ្វេ ធម្មាតិ។

[៣៤១] ទ្វេមេ ភិក្ខវេ ធម្មា។ កតមេ ទ្វេ។ ធាតុកុសលតា ច មនសិការកុសលតា ច។ ឥមេ ខោ ភិក្ខវេ ទ្វេ ធម្មាតិ។

[៣៤២] ទ្វេមេ ភិក្ខវេ ធម្មា។ កតមេ ទ្វេ។ អាបត្តិកុសលតា ច អាបត្តិវុដ្ឋានកុសលតា ច។ ឥមេ ខោ ភិក្ខវេ ទ្វេ ធម្មាតិ។

ធម្មវគ្គោ ចតុត្ថោ។

[៣៤៣] ទ្វេមេ ភិក្ខវេ ពាលា។ កតមេ ទ្វេ។ យោ ច អនាគតំ ភារំ វហតិ យោ ច អាគតំ ភារំ ន វហតិ។ ឥមេ ខោ ភិក្ខវេ ទ្វេ ពាលាតិ។

[៣៤៤] ទ្វេមេ ភិក្ខវេ បណ្ឌិតា។ កតមេ ទ្វេ។ យោ ច អគតំ ភារំ វហតិ យោ ច អានាគតំ ភារំ វហតិ។ ឥមេ ខោ ភិក្ខវេ ទ្វេ បណ្ឌិតាតិ។

[៣៤៥] ទ្វេមេ ភិក្ខវេ ពាលា។ កតមេ ទ្វេ។ យោ ច អកប្បិយេ កប្បិយសញ្ញី យោ ច កប្បិយេ អកប្បិយសញ្ញី។ ឥមេ ខោ ភិក្ខវេ ទ្វេ ពាលាតិ។

[៣៤៦] ទ្វេមេ ភិក្ខវេ បណ្ឌិតា។ កតមេ ទ្វេ។ យោ ច អកប្បិយេ អកប្បិយសញ្ញី យោ ច កប្បិយេ កប្បិយសញ្ញី។ ឥមេ ខោ ភិក្ខវេ ទ្វេ បណ្ឌិតាតិ។

[៣៤៧] ទ្វេមេ ភិក្ខវេ ពាលា។ កតមេ ទ្វេ។ យោ ច អនាបត្តិយា អាបត្តិសញ្ញី យោ ច អាបត្តិយា អនាបត្តិសញ្ញី។ ឥមេ ខោ ភិក្ខវេ ទ្វេ ពាលាតិ។

[២៤៨] ទ្វេមេ ភិក្ខវេ បណ្ឌិតា។ កតមេ ទ្វេ។ យោ ច អនាបត្តិយា អនាបត្តិសញ្ញី យោ ច អាបត្តិយា អាបត្តិសញ្ញី។ ឥមេ ខោ ភិក្ខវេ ទ្វេ បណ្ឌិតាតិ។

[៣៤៩] ទ្វេមេ ភិក្ខវេ ពាលា។ កតមេ ទ្វេ។ យោ ច អធម្មេ ធម្មសញ្ញី យោ ច ធម្មេ អធម្មសញ្ញី។ ឥមេ ខោ ភិក្ខវេ ទ្វេ ពាលាតិ។

[៣៥០] ទ្វេមេ ភិក្ខវេ បណ្ឌិតា។ កតមេ ទ្វេ។ យោ ច អធម្មេ អធម្មសញ្ញី យោ ច ធម្មេ ធម្មសញ្ញី។ ឥមេ ខោ ភិក្ខវេ ទ្វេ បណ្ឌិតាតិ។

[៣៥១] ទ្វេមេ ភិក្ខវេ ពាលា។ កតមេ ទ្វេ។ យោ ច អវិនយេ វិនយសញ្ញី យោ ច វិនយេ អវិនយសញ្ញី។ ឥមេ ខោ ភិក្ខវេ ទ្វេ ពាលាតិ។

[៣៥២] ទ្វេមេ ភិក្ខវេ បណ្ឌិតា។ កតមេ ទ្វេ។ យោ ច អវិនយេ អវិនយសញ្ញី យោ ច វិនយេ វិនយសញ្ញី។ ឥមេ ខោ ភិក្ខវេ ទ្វេ បណ្ឌិតាតិ។

[៣៥៣] ទ្វិន្នំ ភិក្ខវេ អាសវា វឌ្ឍន្តិ។ កតមេសំ ទ្វិន្នំ។ យោ ច នកុក្កុច្ចាយិតព្វំ កុក្កុច្ចាយតិ យោ ច កុក្កុច្ចាយិតព្វំ ន កុក្កុច្ចាយតិ។ ឥមេសំ ខោ ភិក្ខវេ ទ្វិន្នំ អាសវា វឌ្ឍន្តីតិ។

[៣៥៤] ទ្វិន្នំ ភិក្ខវេ អាសវា ន វឌ្ឍន្តិ។ កតមេសំ ទ្វិន្នំ។ យោ ច នកុក្កុច្ចាយិតព្វំ ន កុក្កុច្ចាយតិ យោ ច កុក្កុច្ចាយិតព្វំ កុក្កុច្ចាយតិ។ ឥមេសំ ខោ ភិក្ខវេ ទ្វិន្នំ អាសវា ន វឌ្ឍន្តីតិ។

[៣៥៥] ទ្វិន្នំ ភិក្ខវេ អាសវា វឌ្ឍន្តិ។ កតមេសំ ទ្វិន្នំ។ យោ ច អកប្បិយេ កប្បិយសញ្ញី យោ ច កប្បិយេ អកប្បិយសញ្ញី។ ឥមេសំ ខោ ភិក្ខវេ ទ្វិន្នំ អាសវា វឌ្ឍន្តីតិ។

[៣៥៦] ទ្វិន្នំ ភិក្ខវេ អាសវា ន វឌ្ឍន្តិ។ កតមេសំ ទ្វិន្នំ។ យោ ច អកប្បិយេ អកប្បិយសញ្ញី យោ ច កប្បិយេ កប្បិយសញ្ញី។ ឥមេសំ ខោ ភិក្ខវេ ទ្វិន្នំ អាសវា ន វឌ្ឍន្តីតិ។

[៣៥៧] ទ្វិន្នំ ភិក្ខវេ អាសវា វឌ្ឍន្តិ។ កតមេសំ ទ្វិន្នំ។ យោ ច អនាបត្តិយា អាបត្តិសញ្ញី យោ ច អាបត្តិយា អនាបត្តិសញ្ញី។ ឥមេសំ ខោ ភិក្ខវេ ទ្វិន្នំ អាសវា វឌ្ឍន្តីតិ។

[៣៥៨] ទ្វិន្នំ ភិក្ខវេ អាសវា ន វឌ្ឍន្តិ។ កតមេសំ ទ្វិន្នំ។ យោ ច អនាបត្តិយា អនាបត្តិសញ្ញី យោ ច អាបត្តិយា អាបត្តិសញ្ញី។ ឥមេសំ ខោ ភិក្ខវេ ទ្វិន្នំ អាសវា ន វឌ្ឍន្តីតិ។

[៣៥៩] ទ្វិន្នំ ភិក្ខវេ អាសវា វឌ្ឍន្តិ។ កតមេសំ ទ្វិន្នំ។ យោ ច អធម្មេ ធម្មសញ្ញី យោ ច ធម្មេ អធម្មសញ្ញី។ ឥមេសំ ខោ ភិក្ខវេ ទ្វិន្នំ អាសវា វឌ្ឍន្តីតិ។

[៣៦០] ទ្វិន្នំ ភិក្ខវេ អាសវា ន វឌ្ឍន្តិ។ កតមេសំ ទ្វិន្នំ។ យោ ច អធម្មេ អធម្មសញ្ញី យោ ច ធម្មេ ធម្មសញ្ញី។ ឥមេសំ ខោ ភិក្ខវេ ទ្វិន្នំ អាសវា ន វឌ្ឍន្តីតិ។

[៣៦១] ទ្វិន្នំ ភិក្ខវេ អាសវា វឌ្ឍន្តិ។ កតមេសំ ទ្វិន្នំ។ យោ ច អវិនយេ វិនយសញ្ញី យោ ច វិនយេ អវិនយសញ្ញី។ ឥមេសំ ខោ ភិក្ខវេ ទ្វិន្នំ អាសវា វឌ្ឍន្តីតិ។

[៣៦២] ទ្វិន្នំ ភិក្ខវេ អាសវា ន វឌ្ឍន្តិ។ កតមេសំ ទ្វិន្នំ។ យោ ច អវិនយេ អវិនយសញ្ញី យោ ច វិនយេ វិនយសញ្ញី។ ឥមេសំ ខោ ភិក្ខវេ ទ្វិន្នំ អាសវា ន វឌ្ឍន្តីតិ។

ពាលវគ្គោ បញ្ចមោ។

ទុតិយោ បណ្ណាសកោ សមត្តោ។

តតិយបណ្ណាសកោ

[៣៦៣] ទ្វេមា ភិក្ខវេ អាសា ទុប្បជហា។ កតមា ទ្វេ។ លាភាសា ច ជីវិតាសា ច។ ឥមា ខោ ភិក្ខវេ ទ្វេ អាសា ទុប្បជហាតិ។

[៣៦៤] ទ្វេមេ ភិក្ខវេ បុគ្គលា ទុល្លភា លោកស្មឹ។ កតមេ ទ្វេ។ យោ ច បុព្វការី យោ ច កតញ្ញូ កតវេទី។ ឥមេ ខោ ភិក្ខវេ ទ្វេ បុគ្គលា ទុល្លភា លោកស្មិន្តិ។

[៣៦៥] ទ្វេមេ ភិក្ខវេ បុគ្គលា ទុល្លភា លោកស្មឹ។ កតមេ ទ្វេ។ តិត្តោ ច តប្បេតា ច។ ឥមេ ខោ ភិក្ខវេ ទ្វេ បុគ្គលា ទុល្លភា លោកស្មិន្តិ។

[៣៦៦] ទ្វេមេ ភិក្ខវេ បុគ្គលា ទុត្តប្បយា។ កតមេ ទ្វេ។ យោ ច លទ្ធំ លទ្ធំ និក្ខិបតិ យោ ច លទ្ធំ លទ្ធំ វិស្សជ្ជេតិ។ ឥមេ ខោ ភិក្ខវេ ទ្វេ បុគ្គលា ទុត្តប្បយាតិ។

[៣៦៧] ទ្វេមេ ភិក្ខវេ បុគ្គលា សុតប្បយា។ កតមេ ទ្វេ។ យោ ច លទ្ធំ លទ្ធំ ន និក្ខិបតិ យោ ច លទ្ធំ លទ្ធំ ន វិស្សជ្ជេតិ។ ឥមេ ខោ ភិក្ខវេ ទ្វេ បុគ្គលា សុតប្បយាតិ។

[៣៦៨] ទ្វេមេ ភិក្ខវេ បច្ចយា រាគស្ស ឧប្បាទាយ។ កតមេ ទ្វេ។ សុភនិមិត្តញ្ច អយោនិសោ ច មនសិការោ។ ឥមេ ខោ ភិក្ខវេ ទ្វេ បច្ចយា រាគស្ស ឧប្បាទាយាតិ។

[៣៦៩] ទ្វេមេ ភិក្ខវេ បច្ចយា ទោសស្ស ឧប្បាទាយ។ កតមេ ទ្វេ។ បដិឃនិមិត្តញ្ច អយោនិសោ ច មនសិការោ។ ឥមេ ខោ ភិក្ខវេ ទ្វេ បច្ចយា ទោសស្ស ឧប្បាទាយាតិ។

[៣៧០] ទ្វេមេ ភិក្ខវេ បច្ចយា មិច្ឆាទិដ្ឋិយា ឧប្បាទាយ។ កតមេ ទ្វេ។ បរតោ ច ឃោសោ អយោនិសោ ច មនសិការោ។ ឥមេ ខោ ភិក្ខវេ ទ្វេ បច្ចយា មិច្ឆាទិដ្ឋិយា ឧប្បាទាយាតិ។

[៣៧១] ទ្វេមេ ភិក្ខវេ បច្ចយា សម្មាទិដ្ឋិយា ឧប្បាទាយ។ កតមេ ទ្វេ។ បរតោ ច ឃោសោ យោនិសោ ច មនសិការោ។ ឥមេ ខោ ភិក្ខវេ ទ្វេ បច្ចយា សម្មាទិដ្ឋិយា ឧប្បាទាយាតិ។

[៣៧២] ទ្វេមា ភិក្ខវេ អាបត្តិយោ។ កតមា ទ្វេ។ លហុកា ច អាបត្តិ គរុកា ច អាបត្តិ។ ឥមា ខោ ភិក្ខវេ ទ្វេ អាបត្តិយោតិ។

[៣៧៣] ទ្វេមា ភិក្ខវេ អាបត្តិយោ។ កតមា ទ្វេ។ ទុដ្ឋុល្លា ច អាបត្តិ អទុដ្ឋុល្លា ច អាបត្តិ។ ឥមា ខោ ភិក្ខវេ ទ្វេ អាបត្តិយោតិ។

[៣៧៤] ទ្វេមា ភិក្ខវេ អាបត្តិយោ។ កតមា ទ្វេ។ សាវសេសា ច អាបត្តិ អនវសេសា ច អាបត្តិ។ ឥមា ខោ ភិក្ខវេ ទ្វេ អាបត្តិយោតិ។

អាសាវគ្គោ បឋមោ។

[៣៧៥] សទ្ធោ ភិក្ខវេ ភិក្ខុ ឯវំ សម្មា អាយាចមានោ អាយាចេយ្យ តាទិសោ ហោមិ យាទិសា សារីបុត្តមោគ្គល្លានាតិ។ ឯសា ភិក្ខវេ តុលា ឯតំ បមាណំ មម សាវកានំ ភិក្ខូនំ យទិទំ សារីបុត្តមោគ្គល្លានាតិ។

[៣៧៦] សទ្ធា ភិក្ខវេ ភិក្ខុនី ឯវំ សម្មា អាយាចមានា អាយាចេយ្យ តាទិសា ហោមិ យាទិសា ខេមា ច ភិក្ខុនី ឧប្បលវណ្ណា ចាតិ។ ឯសា ភិក្ខវេ តុលា ឯតំ បមាណំ មម សាវិកានំ ភិក្ខុនីនំ យទិទំ ខេមា ច ភិក្ខុនី ឧប្បលវណ្ណា ចាតិ។

[៣៧៧] សទ្ធោ ភិក្ខវេ ឧបាសកោ ឯវំ សម្មា អាយាចមានោ អាយាចេយ្យ តាទិសោ ហោមិ យាទិសោ ចិត្តោ ច គហបតិ ហត្ថកោ ច អាឡវកោតិ។ ឯសា ភិក្ខវេ តុលា ឯតំ បមាណំ មម សាវកានំ ឧបាសកានំ យទិទំ ចិត្តោ ច គហបតិ ហត្ថកោ ច អាឡវកោតិ។

[៣៧៨] សទ្ធា ភិក្ខវេ ឧបាសិកា ឯវំ សម្មា អាយាចមានា អាយាចេយ្យ តាទិសា ហោមិ យាទិសា ខុជ្ជុត្តរា ច ឧបាសិកា វេឡុកណ្តកិយា ច នន្ទមាតាតិ។ ឯសា ភិក្ខវេ តុលា ឯតំ បមាណំ មម សាវិកានំ ឧបាសិកានំ យទិទំ ខុជ្ជុត្តរា ច ឧបាសិកា វេឡុកណ្តកិយា ច នន្ទមាតាតិ។

[៣៧៩] ទ្វីហិ ភិក្ខវេ ធម្មេហិ សមន្នាគតោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ សាវជ្ជោ ច ហោតិ សានុវជ្ជោ វិញ្ញូនំ ពហុញ្ច អបុញ្ញំ បសវតិ។ កតមេហិ ទ្វីហិ។ អននុវិច្ច អបរិយោគាហេត្វា អវណ្ណារហស្ស វណ្ណំ ភាសតិ អននុវិច្ច អបរិយោគាហេត្វា វណ្ណារហស្ស អវណ្ណំ ភាសតិ។ ឥមេហិ ខោ ភិក្ខវេ ទ្វីហិ ធម្មេហិ សមន្នាគតោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ សាវជ្ជោ ច ហោតិ សានុវជ្ជោ វិញ្ញូនំ ពហុញ្ច អបុញ្ញំ បសវតិ។ ទ្វីហិ ភិក្ខវេ ធម្មេហិ សមន្នាគតោ បណ្ឌិតោ ព្យត្តោ សប្បុរិសោ អក្ខតំ អនុបហតំ អត្តានំ បរិហរតិ អនវជ្ជោ ច ហោតិ អននុវជ្ជោ វិញ្ញូនំ ពហុញ្ច បុញ្ញំ បសវតិ។ កតមេហិ ទ្វីហិ។ អនុវិច្ច បរិយោគាហេត្វា អវណ្ណារហស្ស អវណ្ណំ ភាសតិ អនុវិច្ច បរិយោគាហេត្វា វណ្ណារហស្ស វណ្ណំ ភាសតិ។ ឥមេហិ ខោ ភិក្ខវេ ទ្វីហិ ធម្មេហិ សមន្នាគតោ បណ្ឌិតោ ព្យត្តោ សប្បុរិសោ អក្ខតំ អនុបហតំ អត្តានំ បរិហរតិ អនវជ្ជោ ច ហោតិ អននុវជ្ជោ វិញ្ញូនំ ពហុញ្ច បុញ្ញំ បសវតីតិ។

[៣៨០] ទ្វីហិ ភិក្ខវេ ធម្មេហិ សមន្នាគតោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ សាវជ្ជោ ច ហោតិ សានុវជ្ជោ វិញ្ញូនំ ពហុញ្ច អបុញ្ញំ បសវតិ។ កតមេហិ ទ្វីហិ។ អននុវិច្ច អបរិយោគាហេត្វា អប្បសាទនីយេ ឋានេ បសាទំ ឧបទំសេតិ អននុវិច្ច អបរិយោគាហេត្វា បសាទនីយេ ឋានេ អប្បសាទំ ឧបទំសេតិ។ ឥមេហិ ខោ ភិក្ខវេ ទ្វីហិ ធម្មេហិ សមន្នាគតោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ សាវជ្ជោ ច ហោតិ សានុវជ្ជោ វិញ្ញូនំ ពហុញ្ច អបុញ្ញំ បសវតិ។ ទ្វីហិ ភិក្ខវេ ធម្មេហិ សមន្នាគតោ បណ្ឌិតោ ព្យត្តោ [ម. វិយត្តោ។] សប្បុរិសោ អក្ខតំ អនុបហតំ អត្តានំ បរិហរតិ អនវជ្ជោ ច ហោតិ អននុវជ្ជោ វិញ្ញូនំ ពហុញ្ច បុញ្ញំ បសវតិ។ កតមេហិ ទ្វីហិ។ អនុវិច្ច បរិយោគាហេត្វា អប្បសាទនីយេ ឋានេ អប្បសាទំ ឧបទំសេតិ អនុវិច្ច បរិយោគាហេត្វា បសាទនីយេ ឋានេ បសាទំ ឧបទំសេតិ។ ឥមេហិ ខោ ភិក្ខវេ ទ្វីហិ ធម្មេហិ សមន្នាគតោ បណ្ឌិតោ ព្យត្តោ សប្បុរិសោ អក្ខតំ អនុបហតំ អត្តានំ បរិហរតិ អនវជ្ជោ ច ហោតិ អននុវជ្ជោ វិញ្ញូនំ ពហុញ្ច បុញ្ញំ បសវតីតិ។

[៣៨១] ទ្វីសុ ភិក្ខវេ មិច្ឆាបដិបជ្ជមានោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ សាវជ្ជោ ច ហោតិ សានុវជ្ជោ វិញ្ញូនំ ពហុញ្ច អបុញ្ញំ បសវតិ។ កតមេសុ ទ្វីសុ។ មាតរិ ច បិតរិ ច។ ឥមេសុ ខោ ភិក្ខវេ ទ្វីសុ មិច្ឆាបដិបជ្ជមានោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ សាវជ្ជោ ច ហោតិ សានុវជ្ជោ វិញ្ញូនំ ពហុញ្ច អបុញ្ញំ បសវតិ។ ទ្វីសុ ភិក្ខវេ សម្មាបដិបជ្ជមានោ បណ្ឌិតោ ព្យត្តោ សប្បុរិសោ អក្ខតំ អនុបហតំ អត្តានំ បរិហរតិ អនវជ្ជោ ច ហោតិ អននុវជ្ជោ វិញ្ញូនំ ពហុញ្ច បុញ្ញំ បសវតិ។ កតមេសុ ទ្វីសុ។ មាតរិ ច បិតរិ ច។ ឥមេសុ ខោ ភិក្ខវេ ទ្វីសុ សម្មាបដិបជ្ជមានោ បណ្ឌិតោ ព្យត្តោ សប្បុរិសោ អក្ខតំ អនុបហតំ អត្តានំ បរិហរតិ អនវជ្ជោ ច ហោតិ អននុវជ្ជោ វិញ្ញូនំ ពហុញ្ច បុញ្ញំ បសវតីតិ។

[៣៨២] ទ្វីសុ ភិក្ខវេ មិច្ឆាបដិបជ្ជមានោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ សាវជ្ជោ ច ហោតិ សានុវជ្ជោ វិញ្ញូនំ ពហុញ្ច អបុញ្ញំ បសវតិ។ កតមេសុ ទ្វីសុ។ តថាគតេ ច តថាគតសាវកេ ច។ ឥមេសុ ខោ ភិក្ខវេ ទ្វីសុមិច្ឆាបដិបជ្ជមានោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ សាវជ្ជោ ច ហោតិ សានុវជ្ជោ វិញ្ញូនំ ពហុញ្ច អបុញ្ញំ បសវតិ។ ទ្វីសុ ភិក្ខវេ សម្មាបដិបជ្ជមានោ បណ្ឌិតោ ព្យត្តោ សប្បុរិសោ អក្ខតំ អនុបហតំ អត្តានំ បរិហរតិ អនវជ្ជោ ច ហោតិ អននុវជ្ជោ វិញ្ញូនំ ពហុញ្ច បុញ្ញំ បសវតិ។ កតមេសុ ទ្វីសុ។ តថាគតេ ច តថាគតសាវកេ ច។ ឥមេសុ ខោ ភិក្ខវេ ទ្វីសុ សម្មាបដិបជ្ជមានោ បណ្ឌិតោ ព្យត្តោ សប្បុរិសោ អក្ខតំ អនុបហតំ អត្តានំ បរិហរតិ អនវជ្ជោ ច ហោតិ អននុវជ្ជោ វិញ្ញូនំ ពហុញ្ច បុញ្ញំ បសវតីតិ។

[៣៨៣] ទ្វេមេ ភិក្ខវេ ធម្មា។ កតមេ ទ្វេ។ សចិត្តវោទានញ្ច ន ច កិញ្ចិ លោកេ ឧបាទិយតិ។ ឥមេ ខោ ភិក្ខវេ ទ្វេ ធម្មាតិ។

[៣៨៤] ទ្វេមេ ភិក្ខវេ ធម្មា។ កតមេ ទ្វេ។ កោធោ ច ឧបនាហោ ច។ ឥមេ ខោ ភិក្ខវេ ទ្វេ ធម្មាតិ។

[៣៨៥] ទ្វេមេ ភិក្ខវេ ធម្មា។ កតមេ ទ្វេ។ កោធវិនយោ ច ឧបនាហវិនយោ ច។ ឥមេ ខោ ភិក្ខវេ ទ្វេ ធម្មាតិ។

អាយាចនវគ្គោ ទុតិយោ។

[៣៨៦] ទ្វេមានិ ភិក្ខវេ ទានានិ។ កតមានិ ទ្វេ។ អាមិសទានញ្ច ធម្មទានញ្ច។ ឥមានិ ខោ ភិក្ខវេ ទ្វេ ទានានិ។ ឯតទគ្គំ ភិក្ខវេ ឥមេសំ ទ្វិន្នំ ទានានំ យទិទំ ធម្មទានន្តិ។

[៣៨៧] ទ្វេមេ ភិក្ខវេ យាគា។ កតមេ ទ្វេ។ អាមិសយាគោ ច ធម្មយាគោ ច។ ឥមេ ខោ ភិក្ខវេ ទ្វេ យាគា។ ឯតទគ្គំ ភិក្ខវេ ឥមេសំ ទ្វិន្នំ យាគានំ យទិទំ ធម្មយាគោតិ។

[៣៨៨] ទ្វេមេ ភិក្ខវេ ចាគា។ កតមេ ទ្វេ។ អាមិសច្ចាគោ ច ធម្មច្ចាគោ ច។ ឥមេ ខោ ភិក្ខវេ ទ្វេ ចាគា។ ឯតទគ្គំ ភិក្ខវេ ឥមេសំ ទ្វិន្នំ ចាគានំ យទិទំ ធម្មច្ចាគោតិ។

[៣៨៩] ទ្វេមេ ភិក្ខវេ បរិច្ចាគា។ កតមេ ទ្វេ។ អាមិសបរិច្ចាគោ ច ធម្មបរិច្ចាគោ ច។ ឥមេ ខោ ភិក្ខវេ ទ្វេ បរិច្ចាគា។ ឯតទគ្គំ ភិក្ខវេ ឥមេសំ ទ្វិន្នំ បរិច្ចាគានំ យទិទំ ធម្មបរិច្ចាគោតិ។

[៣៩០] ទ្វេមេ ភិក្ខវេ ភោគា។ កតមេ ទ្វេ។ អាមិសភោគោ ច ធម្មភោគោ ច។ ឥមេ ខោ ភិក្ខវេ ទ្វេ ភោគា។ ឯតទគ្គំ ភិក្ខវេ ឥមេសំ ទ្វិន្នំ ភោគានំ យទិទំ ធម្មភោគោតិ។

[៣៩១] ទ្វេមេ ភិក្ខវេ សម្ភោគា។ កតមេ ទ្វេ។ អាមិសសម្ភោគោ ច ធម្មសម្ភោគោ ច។ ឥមេ ខោ ភិក្ខវេ ទ្វេ សម្ភោគា។ ឯតទគ្គំ ភិក្ខវេ ឥមេសំ ទ្វិន្នំ សម្ភោគានំ យទិទំ ធម្មសម្ភោគោតិ។

[៣៩២] ទ្វេមេ ភិក្ខវេ សំវិភាគា។ កតមេ ទ្វេ។ អាមិសសំវិភាគោ ច ធម្មសំវិភាគោ ច។ ឥមេ ខោ ភិក្ខវេ ទ្វេ សំវិភាគា។ ឯតទគ្គំ ភិក្ខវេ ឥមេសំ ទ្វិន្នំ សំវិភាគានំ យទិទំ ធម្មសំវិភាគោតិ។

[៣៩៣] ទ្វេមេ ភិក្ខវេ សង្គហា។ កតមេ ទ្វេ។ អាមិសសង្គហោ ច ធម្មសង្គហោ ច។ ឥមេ ខោ ភិក្ខវេ ទ្វេ សង្គហា។ ឯតទគ្គំ ភិក្ខវេ ឥមេសំ ទ្វិន្នំ សង្គហានំ យទិទំ ធម្មសង្គហោតិ។

[៣៩៤] ទ្វេមេ ភិក្ខវេ អនុគ្គហា។ កតមេ ទ្វេ។ អាមិសានុគ្គហោ ច ធម្មានុគ្គហោ ច។ ឥមេ ខោ ភិក្ខវេ ទ្វេ អនុគ្គហា។ ឯតទគ្គំ ភិក្ខវេ ឥមេសំ ទ្វិន្នំ អនុគ្គហានំ យទិទំ ធម្មានុគ្គហោតិ។

[៣៩៥] ទ្វេមា ភិក្ខវេ អនុកម្បា។ កតមា ទ្វេ។ អាមិសានុកម្បា ច ធម្មានុកម្បា ច។ ឥមា ខោ ភិក្ខវេ ទ្វេ អនុកម្បា។ ឯតទគ្គំ ភិក្ខវេ ឥមាសំ ទ្វិន្នំ អនុកម្បានំ យទិទំ ធម្មានុកម្បាតិ។

ទានវគ្គោ តតិយោ។

[៣៩៦] ទ្វេមេ ភិក្ខវេ សន្ថារា។ កតមេ ទ្វេ។ អាមិសសន្ថារោ ច ធម្មសន្ថារោ ច។ ឥមេ ខោ ភិក្ខវេ ទ្វេ សន្ថារា។ ឯតទគ្គំ ភិក្ខវេ ឥមេសំ ទ្វិន្នំ សន្ថារានំ យទិទំ ធម្មសន្ថារោតិ។

[៣៩៧] ទ្វេមេ ភិក្ខវេ បដិសន្ថារា។ កតមេ ទ្វេ។ អាមិសប្បដិសន្ថារោ ច ធម្មប្បដិសន្ថារោ ច។ ឥមេ ខោ ភិក្ខវេ ទ្វេ បដិសន្ថារា។ ឯតទគ្គំ ភិក្ខវេ ឥមេសំ ទ្វិន្នំ បដិសន្ថារានំ យទិទំ ធម្មប្បដិសន្ថារោតិ។

[៣៩៨] ទ្វេមា ភិក្ខវេ ឯសនា។ កតមា ទ្វេ។ អាមិសេសនា ច ធម្មេសនា ច។ ឥមា ខោ ភិក្ខវេ ទ្វេ ឯសនា។ ឯតទគ្គំ ភិក្ខវេ ឥមាសំ ទ្វិន្នំ ឯសនានំ យទិទំ ធម្មេសនាតិ។

[៣៩៩] ទ្វេមា ភិក្ខវេ បរិយេសនា។ កតមា ទ្វេ។ អាមិសបរិយេសនា ច ធម្មបរិយេសនា ច។ ឥមា ខោ ភិក្ខវេ ទ្វេ បរិយេសនា។ ឯតទគ្គំ ភិក្ខវេ ឥមាសំ ទ្វិន្នំ បរិយេសនានំ យទិទំ ធម្មបរិយេសនាតិ។

[៤០០] ទ្វេមា ភិក្ខវេ បរិយេដ្ឋិយោ។ កតមា ទ្វេ។ អាមិសបរិយេដ្ឋិ ច ធម្មបរិយេដ្ឋិ ច។ ឥមា ខោ ភិក្ខវេ ទ្វេ បរិយេដ្ឋិយោ។ ឯតទគ្គំ ភិក្ខវេ ឥមាសំ ទ្វិន្នំ បរិយេដ្ឋីនំ យទិទំ ធម្មបរិយេដ្ឋីតិ។

[៤០១] ទ្វេមា ភិក្ខវេ បូជា។ កតមា ទ្វេ។ អាមិសបូជា ច ធម្មបូជា ច។ ឥមា ខោ ភិក្ខវេ ទ្វេ បូជា។ ឯតទគ្គំ ភិក្ខវេ ឥមាសំ ទ្វិន្នំ បូជានំ យទិទំ ធម្មបូជាតិ។

[៤០២] ទ្វេមានិ ភិក្ខវេ អតិថេយ្យានិ។ កតមានិ ទ្វេ។ អាមិសាតិថេយ្យញ្ច ធម្មាតិថេយ្យញ្ច។ ឥមានិ ខោ ភិក្ខវេ ទ្វេ អតិថេយ្យានិ។ ឯតទគ្គំ ភិក្ខវេ ឥមេសំ ទ្វិន្នំ អតិថេយ្យានំ យទិទំ ធម្មាតិថេយ្យន្តិ។

[៤០៣] ទ្វេមា ភិក្ខវេ ឥទ្ធិយោ។ កតមា ទ្វេ។ អាមិសិទ្ធិ ច ធម្មិទ្ធិ ច។ ឥមា ខោ ភិក្ខវេ ទ្វេ ឥទ្ធិយោ។ ឯតទគ្គំ ភិក្ខវេ ឥមាសំ ទ្វិន្នំ ឥទ្ធីនំ យទិទំ ធម្មិទ្ធីតិ។

[៤០៤] ទ្វេមា ភិក្ខវេ វុឌ្ឍិយោ។ កតមា ទ្វេ។ អាមិសវុឌ្ឍិ ច ធម្មវុឌ្ឍិ ច។ ឥមា ខោ ភិក្ខវេ ទ្វេ វុឌ្ឍិយោ។ ឯតទគ្គំ ភិក្ខវេ ឥមាសំ ទ្វិន្នំ វុឌ្ឍីនំ យទិទំ ធម្មវុឌ្ឍីតិ។

[៤០៥] ទ្វេមានិ ភិក្ខវេ រតនានិ។ កតមានិ ទ្វេ។ អាមិសរតនញ្ច ធម្មរតនញ្ច។ ឥមានិ ខោ ភិក្ខវេ ទ្វេ រតនានិ។ ឯតទគ្គំ ភិក្ខវេ ឥមេសំ ទ្វិន្នំ រតនានំ យទិទំ ធម្មរតនន្តិ។

[៤០៦] ទ្វេមេ ភិក្ខវេ សន្និចយា។ កតមេ ទ្វេ។ អាមិសសន្និចយោ ច ធម្មសន្និចយោ ច។ ឥមេ ខោ ភិក្ខវេ ទ្វេ សន្និចយា។ ឯតទគ្គំ ភិក្ខវេ ឥមេសំ ទ្វិន្នំ សន្និចយានំ យទិទំ ធម្មសន្និចយោតិ។

[៤០៧] ទ្វេមានិ ភិក្ខវេ វេបុល្លានិ។ កតមានិ ទ្វេ។ អាមិសវេបុល្លញ្ច ធម្មវេបុល្លញ្ច។ ឥមានិ ខោ ភិក្ខវេ ទ្វេ វេបុល្លានិ។ ឯតទគ្គំ ភិក្ខវេ ឥមេសំ ទ្វិន្នំ វេបុល្លានំ យទិទំ ធម្មវេបុល្លន្តិ។

សន្ថារវគ្គោ ចតុត្ថោ។

[៤០៨] ទ្វេមេ ភិក្ខវេ ធម្មា។ កតមេ ទ្វេ។ សមាបត្តិកុសលតា ច សមាបត្តិវុដ្ឋានកុសលតា ច។ ឥមេ ខោ ភិក្ខវេ ទ្វេ ធម្មាតិ។

[៤០៩] ទ្វេមេ ភិក្ខវេ ធម្មា។ កតមេ ទ្វេ។ អាជ្ជវញ្ច មទ្ទវញ្ច។ ឥមេ ខោ ភិក្ខវេ ទ្វេ ធម្មាតិ។

[៤១០] ទ្វេមេ ភិក្ខវេ ធម្មា។ កតមេ ទ្វេ។ ខន្តិ ច សោរច្ចំ ច។ ឥមេ ខោ ភិក្ខវេ ទ្វេ ធម្មាតិ។

[៤១១] ទ្វេមេ ភិក្ខវេ ធម្មា។ កតមេ ទ្វេ។ សាខល្យញ្ច បដិសន្ថារោ ច។ ឥមេ ខោ ភិក្ខវេ ទ្វេ ធម្មាតិ។

[៤១២] ទ្វេមេ ភិក្ខវេ ធម្មា។ កតមេ ទ្វេ។ អវិហឹសា ច សោចេយ្យញ្ច។ ឥមេ ខោ ភិក្ខវេ ទ្វេ ធម្មាតិ។

[៤១៣] ទ្វេមេ ភិក្ខវេ ធម្មា។ កតមេ ទ្វេ។ ឥន្ទ្រិយេសុ អគុត្តទ្វារតា ច ភោជនេ អមត្តញ្ញុតា ច។ ឥមេ ខោ ភិក្ខវេ ទ្វេ ធម្មាតិ។

[៤១៤] ទ្វេមេ ភិក្ខវេ ធម្មា។ កតមេ ទ្វេ។ ឥន្ទ្រិយេសុ គុត្តទ្វារតា ច ភោជនេ មត្តញ្ញុតា ច។ ឥមេ ខោ ភិក្ខវេ ទ្វេ ធម្មាតិ។

[៤១៥] ទ្វេមេ ភិក្ខវេ ធម្មា។ កតមេ ទ្វេ។ បដិសង្ខានពលញ្ច ភាវនាពលញ្ច។ ឥមេ ខោ ភិក្ខវេ ទ្វេ ធម្មាតិ។

[៤១៦] ទ្វេមេ ភិក្ខវេ ធម្មា។ កតមេ ទ្វេ។ សតិពលញ្ច សមាធិពលញ្ច [ម. ភាវនាពលញ្ច។]។ ឥមេ ខោ ភិក្ខវេ ទ្វេ ធម្មាតិ។

[៤១៧] ទ្វេមេ ភិក្ខវេ ធម្មា។ កតមេ ទ្វេ។ សមថោ ច វិបស្សនា ច។ ឥមេ ខោ ភិក្ខវេ ទ្វេ ធម្មាតិ។

[៤១៨] ទ្វេមេ ភិក្ខវេ ធម្មា។ កតមេ ទ្វេ។ សីលវិបត្តិ ច ទិដ្ឋិវិបត្តិ ច។ ឥមេ ខោ ភិក្ខវេ ទ្វេ ធម្មាតិ។

[៤១៩] ទ្វេមេ ភិក្ខវេ ធម្មា។ កតមេ ទ្វេ។ សីលសម្បទា ច ទិដ្ឋិសម្បទា ច។ ឥមេ ខោ ភិក្ខវេ ទ្វេ ធម្មាតិ។

[៤២០] ទ្វេមេ ភិក្ខវេ ធម្មា។ កតមេ ទ្វេ។ សីលវិសុទ្ធិ ច ទិដ្ឋិវិសុទ្ធិ ច។ ឥមេ ខោ ភិក្ខវេ ទ្វេ ធម្មាតិ។

[៤២១] ទ្វេមេ ភិក្ខវេ ធម្មា។ កតមេ ទ្វេ។ ទិដ្ឋិវិសុទ្ធិ ច យថាទិដ្ឋិស្ស ច បធានំ។ ឥមេ ខោ ភិក្ខវេ ទ្វេ ធម្មាតិ។

[៤២២] ទ្វេមេ ភិក្ខវេ ធម្មា។ កតមេ ទ្វេ។ អសន្តុដ្ឋិតា ច កុសលេសុ ធម្មេសុ អប្បដិវាណិតា ច បធានស្មឹ។ ឥមេ ខោ ភិក្ខវេ ទ្វេ ធម្មាតិ។

[៤២៣] ទ្វេមេ ភិក្ខវេ ធម្មា។ កតមេ ទ្វេ។ មុដ្ឋស្សច្ចញ្ច អសម្បជញ្ញញ្ច។ ឥមេ ខោ ភិក្ខវេ ទ្វេ ធម្មាតិ។

[៤២៤] ទ្វេមេ ភិក្ខវេ ធម្មា។ កតមេ ទ្វេ។ សតិ ច សម្បជញ្ញញ្ច។ ឥមេ ខោ ភិក្ខវេ ទ្វេ ធម្មាតិ។

សមាបត្តិវគ្គោ បញ្ចមោ។

តតិយោ បណ្ណាសកោ សមត្តោ។

បណ្ណាសកាសង្គហិតា សុត្តន្តា

[៤២៥] ទ្វេមេ ភិក្ខវេ ធម្មា។ កតមេ ទ្វេ។ កោធោ ច ឧបនាហោ ច… មក្ខោ ច បឡាសោ ច… ឥស្សា ច មច្ឆរិយញ្ច… មាយា ច សាថេយ្យញ្ច… អហិរិកញ្ច អនោត្តប្បញ្ច។ ឥមេ ខោ ភិក្ខវេ ទ្វេ ធម្មាតិ។

[៤២៦] ទ្វេមេ ភិក្ខវេ ធម្មា។ កតមេ ទ្វេ។ អក្កោធោ ច អនុបនាហោ ច… អមក្ខោ ច អបឡាសោ ច… អនិស្សា ច អមច្ឆរិយញ្ច… អមាយា ច អសាថេយ្យញ្ច… ហិរិ ច ឱត្តប្បញ្ច។ ឥមេ ខោ ភិក្ខវេ ទ្វេ ធម្មាតិ។

[៤២៧] ទ្វីហិ ភិក្ខវេ ធម្មេហិ សមន្នាគតោ ទុក្ខំ វិហរតិ។ កតមេហិ ទ្វីហិ។ កោធេន ច ឧបនាហេន ច… មក្ខេន ច បឡាសេន ច… ឥស្សាយ ច មច្ឆរិយេន ច… មាយាយ ច សាថេយ្យេន ច… អហិរិកេន ច អនោត្តប្បេន ច។ ឥមេហិ ខោ ភិក្ខវេ ទ្វីហិ ធម្មេហិ សមន្នាគតោ ទុក្ខំ វិហរតីតិ។

[៤២៨] ទ្វីហិ ភិក្ខវេ ធម្មេហិ សមន្នាគតោ សុខំ វិហរតិ។ កតមេហិ ទ្វីហិ។ អកោធេន ច អនុបនាហេន ច… អមក្ខេន ច អបឡាសេន ច… អនិស្សាយ ច អមច្ឆរិយេន ច… អមាយាយ ច អសាថេយ្យេន ច … ហិរិយា ច ឱត្តប្បេន ច។ ឥមេហិ ខោ ភិក្ខវេ ទ្វីហិ ធម្មេហិ សមន្នាគតោ សុខំ វិហរតីតិ។

[៤២៩] ទ្វេមេ ភិក្ខវេ ធម្មា សេក្ខស្ស ភិក្ខុនោ បរិហានាយ សំវត្តន្តិ។ កតមេ ទ្វេ។ កោធោ ច ឧបនាហោ ច… មក្ខោ ច បឡាសោ ច… ឥស្សា ច មច្ឆរិយញ្ច… មាយា ច សាថេយ្យញ្ច… អហិរិកញ្ច អនោត្តប្បញ្ច។ ឥមេ ខោ ភិក្ខវេ ទ្វេ ធម្មា សេក្ខស្ស ភិក្ខុនោ បរិហានាយ សំវត្តន្តីតិ។

[៤៣០] ទ្វេមេ ភិក្ខវេ ធម្មា សេក្ខស្ស ភិក្ខុនោ អបរិហានាយ សំវត្តន្តិ។ កតមេ ទ្វេ។ អកោធោ ច អនុបនាហោ ច… អមក្ខោ ច អបឡាសោ ច… អនិស្សា ច អមច្ឆរិយញ្ច… អមាយា ច អសាថេយ្យញ្ច… ហិរិ ច ឱត្តប្បញ្ច។ ឥមេ ខោ ភិក្ខវេ ទ្វេ ធម្មា សេក្ខស្ស ភិក្ខុនោ អបរិហានាយ សំវត្តន្តីតិ។

[៤៣១] ទ្វីហិ ភិក្ខវេ ធម្មេហិ សមន្នាគតោ យថាភតំ និក្ខិត្តោ ឯវំ និរយេ។ កតមេហិ ទ្វីហិ។ កោធេន ច ឧបនាហេន ច… មក្ខេន ច បឡាសេន ច… ឥស្សាយ ច មច្ឆរិយេន ច… មាយាយ ច សាថេយ្យេន ច… អហិរិកេន ច អនោត្តប្បេន ច។ ឥមេហិ ខោ ភិក្ខវេ ទ្វីហិ ធម្មេហិ សមន្នាគតោ យថាភតំ និក្ខិត្តោ ឯវំ និរយេតិ។

[៤៣២] ទ្វីហិ ភិក្ខវេ ធម្មេហិ សមន្នាគតោ យថាភតំ និក្ខិត្តោ ឯវំ សគ្គេ។ កតមេហិ ទ្វីហិ។ អកោធេន ច អនុបនាហេន ច… អមក្ខេន ច អបឡាសេន ច… អនិស្សាយ ច អមច្ឆរិយេន ច… អមាយាយ ច អសាថេយ្យេន ច… ហិរិយា ច ឱត្តប្បេន ច។ ឥមេហិ ខោ ភិក្ខវេ ទ្វីហិ ធម្មេហិ សមន្នាគតោ យថាភតំ និក្ខិត្តោ ឯវំ សគ្គេតិ។

[៤៣៣] ទ្វីហិ ភិក្ខវេ ធម្មេហិ សមន្នាគតោ ឥធេកច្ចោ កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជតិ។ កតមេហិ ទ្វីហិ។ កោធេន ច ឧបនាហេន ច… មក្ខេន ច បឡាសេន ច… ឥស្សាយ ច មច្ឆរិយេន ច… មាយាយ ច សាថេយ្យេន ច… អហិរិកេន ច អនោត្តប្បេន ច។ ឥមេហិ ខោ ភិក្ខវេ ទ្វីហិ ធម្មេហិ សមន្នាគតោ ឥធេកច្ចោ កាយស្ស ភេទា បរម្មរណា អបាយំ ទុគ្គតឹ វិនិបាតំ និរយំ ឧបបជ្ជតីតិ។

[៤៣៤] ទ្វីហិ ភិក្ខវេ ធម្មេហិ សមន្នាគតោ ឥធេកច្ចោ កាយស្ស ភេទា បរម្មរណា សុគតឹ សគ្គំ លោកំ ឧបបជ្ជតិ។ កតមេហិ ទ្វីហិ។ អកោធេន ច អនុបនាហេន ច… អមក្ខេន ច អបឡាសេន ច… អនិស្សាយ ច អមច្ឆរិយេន ច… អមាយាយ ច អសាថេយ្យេន ច… ហិរិយា ច ឱត្តប្បេន ច។ ឥមេហិ ខោ ភិក្ខវេ ទ្វីហិ ធម្មេហិ សមន្នាគតោ ឥធេកច្ចោ កាយស្ស ភេទា បរម្មរណា សុគតឹ សគ្គំ លោកំ ឧបបជ្ជតីតិ។

[៤៣៥] ទ្វេមេ ភិក្ខវេ ធម្មា អកុសលា… ទ្វេមេ ភិក្ខវេ ធម្មា កុសលា… ទ្វេមេ ភិក្ខវេ ធម្មា សាវជ្ជា… ទ្វេមេ ភិក្ខវេ ធម្មា អនវជ្ជា… ទ្វេមេ ភិក្ខវេ ធម្មា ទុក្ខុទ្រយា… ទ្វេមេ ភិក្ខវេ ធម្មា សុខុទ្រយា… ទ្វេមេ ភិក្ខវេ ធម្មា ទុក្ខវិបាកា… ទ្វេមេ ភិក្ខវេ ធម្មា សុខវិបាកា… ទ្វេមេ ភិក្ខវេ ធម្មា សព្យាបជ្ឈា… ទ្វេមេ ភិក្ខវេ ធម្មា អព្យាបជ្ឈា។ កតមេ ទ្វេ។ អកោធោ ច អនុបនាហោ ច… អមក្ខោ ច អបឡាសោ ច… អនិស្សា ច អមច្ឆរិយញ្ច… អមាយា ច អសាថេយ្យញ្ច… ហិរិ ច ឱត្តប្បញ្ច។ ឥមេ ខោ ភិក្ខវេ ទ្វេ ធម្មា អព្យាបជ្ឈាតិ [ម.ឥមស្មឹ បរិយោសានេ កោធបេយ្យាលញ្ច អកុសលបេយ្យាលញ្ច វគ្គោសោឡសមោតិ បាឋោ ហោតិ។]

[៤៣៦] ទ្វេមេ ភិក្ខវេ អត្ថវសេ បដិច្ច តថាគតេន សាវកានំ សិក្ខាបទំ បញ្ញត្តំ។ កតមេ ទ្វេ។ សង្ឃសុដ្ឋុតាយ សង្ឃផាសុតាយ… ទុម្មង្កូនំ បុគ្គលានំ និគ្គហាយ បេសលានំ ភិក្ខូនំ ផាសុវិហារាយ… ទិដ្ឋធម្មិកានំ អាសវានំ សំវរាយ សម្បរាយិកានំ អាសវានំ បដិឃាតាយ… ទិដ្ឋធម្មិកានំ វេរានំ សំវរាយ សម្បរាយិកានំ វេរានំ បដិឃាតាយ… ទិដ្ឋធម្មិកានំ វជ្ជានំ សំវរាយ សម្បរាយិកានំ វជ្ជានំ បដិឃាតាយ… ទិដ្ឋធម្មិកានំ ភយានំ សំវរាយ សម្បរាយិកានំ ភយានំ បដិឃាតាយ… ទិដ្ឋធម្មិកានំ អកុសលានំ ធម្មានំ សំវរាយ សម្បរាយិកានំ អកុសលានំ ធម្មានំ បដិឃាតាយ… គិហីនំ អនុកម្បាយ បាបិច្ឆានំ[ម. ឯត្ថន្តរេ ភិក្ខូនន្តិ បទំ អត្ថិ។] បក្ខុបច្ឆេទាយ… អប្បសន្នានំ បសាទាយ បសន្នានំ ភិយ្យោភាវាយ… សទ្ធម្មដ្ឋិតិយា វិនយានុគ្គហាយ។ ឥមេ ខោ ភិក្ខវេ ទ្វេ អត្ថវសេ បដិច្ច តថាគតេន សាវកានំ សិក្ខាបទំ បញ្ញត្តន្តិ។

[៤៣៧] ទ្វេមេ ភិក្ខវេ អត្ថវសេ បដិច្ច តថាគតេន សាវកានំ បាតិមោក្ខំ បញ្ញត្តំ… បាតិមោក្ខុទ្ទេសោ បញ្ញត្តា… បាតិមោក្ខដ្ឋបនំ បញ្ញត្តំ… បវារណា បញ្ញត្តា… បវារណាឋបនំ បញ្ញត្តំ… តជ្ជនីយកម្មំ បញ្ញត្តំ… និយស្សកម្មំ បញ្ញត្តំ… បព្វាជនីយកម្មំ បញ្ញត្តំ… បដិសារណីយកម្មំ បញ្ញត្តំ… ឧក្ខេបនីយកម្មំ បញ្ញត្តំ… បរិវាសទានំ បញ្ញត្តំ… មូលាយប្បដិកស្សនំ បញ្ញត្តំ… មានត្តទានំ បញ្ញត្តំ… អព្ភានំ បញ្ញត្តំ… ឱសារណំ [ឱ.ម. ឱសារណីយំ។] បញ្ញត្តំ… និស្សារណំ [និស្សារណីយំ។] បញ្ញត្តំ… ឧបសម្បទា បញ្ញត្តា… ញត្តិកម្មំ បញ្ញត្តំ… ញត្តិទុតិយកម្មំ បញ្ញត្តំ… ញត្តិចតុត្ថកម្មំ បញ្ញត្តំ… អប្បញ្ញត្តេ បញ្ញត្តំ… បញ្ញត្តេ អនុប្បញ្ញត្តំ… សម្មុខាវិនយោ បញ្ញត្តោ… សតិវិនយោ បញ្ញត្តោ… អមូឡ្ហវិនយោ បញ្ញត្តោ… បដិញ្ញាតករណំ បញ្ញត្តំ… យេភុយ្យសិកា បញ្ញត្តា… តស្សបាបិយសិកា បញ្ញត្តា… តិណវត្ថារកោ បញ្ញត្តោ។ កតមេ ទ្វេ។ សង្ឃសុដ្ឋុតាយ សង្ឃផាសុតាយ… ទុម្មង្កូនំ បុគ្គលានំ និគ្គហាយ បេសលានំ ភិក្ខូនំ ផាសុវិហារាយ… ទិដ្ឋធម្មិកានំ អាសវានំ សំវរាយ សម្បរាយិកានំ អាសវានំ បដិឃាតាយ… ទិដ្ឋធម្មិកានំ វេរានំ សំវរាយ សម្បរាយិកានំ វេរានំ បដិឃាតាយ… ទិដ្ឋធម្មិកានំ វជ្ជានំ សំវរាយ សម្បរាយិកានំ វជ្ជានំ បដិឃាតាយ… ទិដ្ឋធម្មិកានំ ភយានំ សំវរាយ សម្បរាយិកានំ ភយានំ បដិឃាតាយ… ទិដ្ឋធម្មិកានំ អកុសលានំ ធម្មានំ សំវរាយ សម្បរាយិកានំ អកុសលានំ ធម្មានំ បដិឃាតាយ… គិហីនំ អនុកម្បាយ បាបិច្ឆានំ បក្ខុបច្ឆេទាយ… អប្បសន្នានំ បសាទាយ បសន្នានំ ភិយ្យោភាវាយ… សទ្ធម្មដ្ឋិតិយា វិនយានុគ្គហាយ។ ឥមេ ខោ ភិក្ខវេ ទ្វេ អត្ថវសេ បដិច្ច តថាគតេន សាវកានំ តិណវត្ថារកោ បញ្ញត្តោតិ។

[៤៣៨] រាគស្ស ភិក្ខវេ អភិញ្ញាយ ទ្វេ ធម្មា ភាវេតព្វា។ កតមេ ទ្វេ។ សមថោ ច វិបស្សនា ច។ រាគស្ស ភិក្ខវេ អភិញ្ញាយ ឥមេ ទ្វេ ធម្មា ភាវេតព្វាតិ។ រាគស្ស ភិក្ខវេ បរិញ្ញាយ… បរិក្ខយាយ… បហានាយ… ខយាយ… វយាយ… វិរាគាយ… និរោធាយ… បាគាយ… បដិនិស្សគ្គាយ។ ឥមេ ទ្វេ ធម្មា ភាវេតព្វាតិ។

[៤៣៩] ទោសស្ស… មោហស្ស… កោធស្ស… ឧបនាហស្ស… មក្ខស្ស… បឡាសស្ស… ឥស្សាយ… មច្ឆរិយស្ស… មាយាយ… សាថេយ្យស្ស… ថម្ភស្ស… សារម្ភស្ស… មានស្ស… អតិមានស្ស… មទស្ស… បមាទស្ស អភិញ្ញាយ… បរិញ្ញាយ… បរិក្ខយាយ… បហានាយ… ខយាយ… វយាយ… វិរាកាយ… និរោធាយ… បាគាយ… បដិនិស្សគ្គាយ… ឥមេ ទ្វេ ធម្មា ភាវេតព្វាតិ។

ទុកនិបាតោ សមត្តោ។

ចប់ ភាគ៤០។

សូមអនុមោទនា !!!